تازيون خبرون

Category Archives: اسپيشل

2100ع تائين هماليا ۽ هندوڪش جي هڪ ڏهائي برف رجهي ويندي: ماهرن جو انڪشاف

کٽمنڊو (ويب ڊيسڪ) سموري دنيا ۾ وڌندڙ گرمي يعني گلوبل وارمنگ سبب دنيا جي سڀ کان ڊگھي چوٽي وارو سلسلو هماليا جو هڪ ڏهائي ۾ برف 2100ع تائين رجهڻ جو خدشو آهي. اهو انڪشاف انٽرنيشنل سينٽر فارانٽگريٽڊ ڊيولپمنٽ ( آءِ سي آءِ موڊ) طرفان جاري ڪيل تجزياتي رپورٽ ۾ ڪيو ويو. اها رپورٽ 5 سالن اندر تيار ڪئي وئي جنهن ۾ 22 ملڪن ۽ 185 ادارن جي 350 کان وڌيڪ ماهرن جي مدد سان ورتي وئي.رپورٽ موجب 2100ع تائين هماليا ۽ هندوڪش جي تقريبن هڪ ڏهائي برف رجهي ويندي جنهن جي نتيجي ۾ درياهن ۾ شديد ٻوڏ پيدا ٿي ويندي.واضح رهي ته هماليا سڀني پهاڙي سلسلن مان ڊگھو جابلو سلسلو آهي جنهن ۾ دنيا جي سڀني کان ڊگھي چوٽي نيپال جو “مائونٽ ايورسٽ” موجود آهي. 8 هزار ميٽرن کان دنيا جو سڀئي چوٽيون هن سلسلي ۾ موجود آهن. ان سلسلي جي اونچائي کي سمجهڻ لاءِ اهو ڄاڻڻ ضروري آهي ته ان ۾ 7 هزار 2 سئو ميٽرن کان وڌيڪ اونچون 100 کان وڌيڪ چوٽيون آهن جڏهن ته ان کان ٻاهر دنيا جي بلند ترين چوٽي ڪوهه اينڊيز ۾ موجود اڪونڪا گوا آهي جنهن  جي اونچائي رڳو6 هزار 9 سئو 62 ميٽر آهي. سائنسدانن موجب وسيع برفاني گولن تي مشتمل هندوڪش ۽ هماليا جو اهو خطو انٽارڪٽيڪا ۽ آرڪٽڪ خطي کان بعد ٽيون قطب آهي. اهو خطو 3 هزار 5 سئو ڪلوميٽرن تي مشتمل آهي ۽ جبلن جو اهو سلسلو افغانستان، بنگلاديش، ڀوٽان، چين، ڀارت، ميانمار، نيپال ۽ پاڪستان تائين پکيڙيل آهي.رپورٽ موجب ان جي رجهڻ سبب يانگزي درياهه، ميڪونگ درياهه، سنڌو درياهه، گنگا ۾ ٻوڏ ايندي جتي هاري سوڪڙي دوران برفاني گولن جي رجهڻ سان حاصل ٿيندڙ پاڻي تي گزارو ڪندا آهن.ان ٻوڏ سان فصل کي گھڻو نقصان پهچندو جڏهن ته ڀرپاسي وارا علائقي دنياجي تاريخ تان مٽجي سگھن ٿا. ان خطي ۾ تقريبن 25 ڪروڙ ماڻهو جابلو علائقن ۾ رهن ٿا جڏهن ته ميداني علائقن ۾ رهڻ وارن جو انگ هڪ ارب 65 ڪروڙ آهي. ڄاڻايل رپورٽ جي سربراهي ڪندڙ فلپس ويسٽر جو چوڻ آهي ته اِهو اُهو ماحولياتي بحران آهي جنهن بابت ڪنهن به ناهي ٻڌو. گلوبل وارمنگ 8 ملڪن تان پکيڙجندي هماليا هندوڪش جي سلسلي ۾ موجود برفاني گولن سان ڍڪيل گھڻين چوٽين کي هڪ صدي ۾ ڀتن ۾ تبديل ڪري چڪي آهي. رپورٽ ۾ چيو ويو آهي ته جيڪڏهن 2015ع جي پيرس ماحولياتي مهائدي تحت گلوبل وارمنگ کي روڪڻ لاءِ سخت بندوبست به ڪيا وڃن تڏهن به 2100ع تائين خطي جي هڪ ڏهائي کان وڏيڪ برف رجهي ويندي، ۽ جيڪڏهن اسان هلندڙ سال دوران گرين هائوس گيسز جي روڪ ٿام ڪرڻ ۾ ناڪام ٿي وياسين ته ٻن ڏهائين ۾ برف رجهي ويندي.

 

 

ايران ۾ مسافر جهاز ڪري تباهه، 66 ڄڻا اجل جو شڪار

تهران (اين اين آءِ) ايران جي خانگي هوائي ڪمپني آسمان جو مسافر جهاز ڪري تباهه ٿي ويو جنهن ۾ عملي جي ڇهه ماڻهن سميت سمورا 66 ڄڻا فوت ٿي ويا. مسافر جهاز تهران کان ڏکڻ اولهه شهر يسوج وڃي رهيو هو ته خراب موسم سبب حادثي واري هنڌ هيليڪاپٽر به پهچي نه سگهيو ۽ اصفهيان ويجهو ڪري تباهه ٿي ويو. مسافر جهاز آسمان ايئر لائين جو هو ۽ اهو خيال ڪيو پيو وڃي ته جهاز روسي قسم اي ٽي آر 500-72 جهاز آهي ايراني عملدارن آسمان ايئر لائين جي جهاز جي حادثي جو سبب ڳولڻ لاءِ جاچ شروع ڪري ڇڏي آهي ايراني ميڊيا موجب آچر تي مسافر جهاز تهران کان ڏکڻ اولهه شهر ياسوج وڃي رهيو هو ته اوچتو ان جو رابطو ڪنٽرول روم سان ڪٽجي ويو ۽ اصفهيان صوبي جي جبلن سان ٽڪرائجي ڪري تباهه ٿي ويو جنهن ۾ 2 سيڪيورٽي گارڊ، 2 خدمت گذار، پائليٽ ۽ هڪ مددگار پائيليٽ سميت ٻيا 60 ڄڻا سوار هئا.

 

اماراتي حڪومت 31 پاڪستانين جي 60 ارب ماليت جي 55 ملڪيتن جي تصديق ڪري ڇڏي

اسلام آباد ( ويب ڊيسڪ ) گڏيل عرب امارات جي حڪومت 31 پاڪستانين جي 60 ارب جي 55 ملڪيتن جي تصديق ڪئي آهي. امارات ٽيڪس اختيارين 53 پاڪستاني سيڙپڪارن جا تفصيل فراهم ڪيا آهن جنهن ۾ رڳو 5 پنهنجا اثاثا ايف بي آر وٽ ظاهر ڪيا آهن. ايف آءِ اي جي معاشي ڏوهن بابت ونگ گڏيل عرب امارات جي ناڻي واري وزارت کان 16 نومبر 2017ع تي درخواست ڪئي هئي ته هو امير پاڪستانين جا تفصيل فراهم ڪن. ايف بي آر جي تيار ڪيل دستاويزن موجب گڏيل عرب امارات جي ٽيڪس اختيارين 53 پاڪستاني شهرين جا تفصيل فراهم ڪيا آهن جنهن ۾ ڪيترائي ريئل اسٽيٽ سان واڳيل سيڙپڪار آهن. تفصيلن ۾ 31 ڪيسن ۾ پاسپورٽس جا نقل به فراهم ڪيا ويا آهن جيڪي 22 جنوري 2018ع ۽ 28 جنوري تي لکيل خطن ۾ موجود آهن.ايف آءِ اي اختيارين جو چوڻ آهي ته 31 پاڪستاني شهرين جا 60 ارب رپين جي ماليت جا 55 اثاثا دبئي ۾ موجود آهن.

 

 

پنهنجي سرزمين ڪنهن جي به خلاف استعمال ٿيڻ نه ڏينداسين ۽ ٻين ملڪن مان به اها ئي اميد رکون ٿا: آرمي چيف

ڪابل (ويب ڊيسڪ) آرمي چيف جنرل قمر جاويد باجوا چيو آهي ته علائقائي امن ۽ استحڪام جو رستو افغانستان مان ٿي گذرندو آهي، پاڪستان پنهنجي سرزمين ڪنهن به ٻئي ملڪ خلاف استعمال ٿيڻ نه ڏيندو ۽ اسان ٻين ملڪن مان به اها ئي اميد رکون ٿا. افغانستان ۾ ڊفينس ڪانفرنس کي خطاب ڪندي جنرل قمر جاويد باجوا چيو ته پاڪستان پنهنجي سرزمين تان دهشتگردن جا سڀ ٺڪاڻا ختم ڪري ڇڏيا آهن، دهشتگرد 27 لک افغان پناهگيرن جي موجودگي جو فائدو کڻندا آهن، اهي پاڪ – افغان سرحد تي اثرائتي سيڪيورٽي جي عدم موجودگي جو به فائدو کڻن ٿا. سندس چوڻ هو ته افغان پناهگيرن جي آڙ ۾ دهشتگردي ڪندڙن جي به نشاندهي ڪئي پئي وڃي. ان کان اڳ آءِ ايس پي آر ڊفينس ڪانفرنس ۾ شرڪت لاءِ آرمي چيف جي افغانستان پهچڻ جو اطلاع ڏيندي ٻڌايو هو ته ڪانفرنس ۾ ڪمانڊر سينٽ ڪام، ڪمانڊر ريزولوٽ سپورٽ مشن ۽ افغان آرمي چيف به شريڪ ٿيندا.27

 

ٽرمپ لاءِ پاڪستان سان لاڳاپا ختم ڪرڻ مهانگو ثابت ٿي سگهي ٿو: آمريڪي اخبار

نيويارڪ (اين اين آءِ) آمريڪا اخبار نيويارڪ ٽائمز صدر ڊونلڊ ٽرمپ کي باخبر ڪيو آهي ته واشنگٽن کي ڏنل پهچ پاڪستان ڪنهن به وقت بند ڪري سگهي ٿو نيو يارڪ ٽائمز پنهنجي ايڊيٽوريل ۾ خبردار ڪيو ته صدر ٽرمپ ان ڳالهه جو متهمل نه ٿو ٿي سگهي ته پاڪستان کي ڇڏي ڏئي، جڏهن ته ٽرمپ جي پاڪستان خلاف فيصلي مان نه ٿو لڳي ته ان وٽ اثرن کي منهن ڏيڻ جي پاليسي موجود آهي. ٽرمپ جو پراڻن پارٽنرز کي آمريڪا کان پري ڪرڻ جو فيصلو چين لاءِ فائديمند ثابت ٿيندو جڏهن ته ٽرمپ انتظاميه کي ٻيا سفارتي طريقا استعمال ڪرڻ گهرجن. آمريڪي اخبار ٽرمپ کي خبردار ڪيو ته سعودي عرب ۽ امارات سان لاڳاپا استعمال ۾ آڻڻ گهرجن ۽ آمريڪا کي پاڪستان سان تعاون لاءِ گوڙ ڪرڻ بدران خاموش ڳالهه ٻولهه ڪرڻ جي ضرورت آهي. اخبار آمريڪي صدر کي مشورو ڏنو آهي ته سعودي عرب ۽ گڏيل عرب امارات ذريعي طالبان جي خليج فارس ۾ فنڊ گڏ ڪرڻ جي ڪوشش ناڪام ڪرڻ گهرجي.

 

هندستان پاڪستان خلاف سازشون ڪري رهيو آهي پر هو سمجهي ڇڏي ته اسان جي فوج ۽ دفاع ڪافي مضبوط آهي: پرويز مشرف

ڪراچي (اين اين آءِ) آل پاڪستان مسلم ليگ جي سربراهه جنرل ريٽائرڊ پرويز مشرف چيو آهي ته هندستان پاڪستان جي خلاف سازشون ڪري رهيو آهي پر هو ڄاڻ وٺي ته اسان جي فوج ۽ دفاع ڪافي مضبوط آهي پاڪستان پنهنجو دفاع ڪرڻ ڄاڻي ٿو ملڪ جي سياست ۾ تبديلي جي ضرورت آهي. اي پي ايم ايل هم خيال ماڻهن سان گڏجي نئون اتحاد ٺاهي رهي آهي عوام اسان جو ساٿ ڏئي اسان حڪومت ۾ اچي سندن مسئلا حل ڪنداسين ايم ڪيو ايم جو نالو هڪ چٽو آهي پيپلز پارٽي ايم ڪيو ايم ۽ اي اين پي هٿيار ڏئي ڪراچي جي ماڻهن کي ويڙهايو. اسان کي انهن کان نجات حاصل ڪرڻي پوندي. عوام کي چوان ٿو ته قوميتن واري سياست ڇڏي پاڪستانيت جي سياست ڪريو اسان ايندڙ چونڊن ۾ ڀرپور ڪاميابي حاصل ڪرڻ جي ڪوشش ڪنداسين. اهڙن خيالن جو اظهار هن گذريل رات اي پي ايل ايل سنڌ سائوٿ ريجن ڪراچي جي تحت لياقت آباد فلاءِ اوور تي عام جلسي کي خطاب دوران ڪيو. جلسي کي اي پي ايم ايل جي صدر ڊاڪٽر محمد امجد، اي پي ايل ايل سائوٿ ريجن جي صدر احمد حسين، جنرل سيڪريٽري اسلم مينائي، محمد علي شيرواني ۽ ٻين اڳواڻن به خطاب ڪيو. جلسي ۾ عوام کي پرويز مشرف جون تصويرون، پاڪستان ۽ اي پي ايم ايل جا جهنڊا هئا جلسي ۾ جيئي پاڪستان ۽ جيئي پرويز مشرف جا نعرا پڻ لڳايا ويا. جلسي ۾ ميوزيڪل پروگرام ۽ آتشبازي جو پڻ مظاهرو ڪيو جلسي کي خطاب ڪندي پرويز مشرف چيو ته ڪراچي جي عوام کي ڀليڪار چوان ٿو لياقت آباد ايم ڪيو ايم جو قلعو هوندو هو اڄ اسان لياقت آباد ۾ جلسو ڪيو آهي ڪراچي پاڪستان آهي هن شهر ۾ سنڌي، مهاجر، پٺاڻ، بنگالي، برمي، سرائيڪي، پنجابي، بلوچي سميت سموريون قومون رهن ٿيون هتي سڀ ماڻهو آباد آهن ڪراچي جي ماڻهن کي استعمال ڪيو هتي لاش ملندا هئا ڪجهه سياسي طاقتون عوام کي ويڙهائينديون رهيون اسان کي انهن کان ڇوٽڪارو حاصل ڪرڻو پوندو هن چيو ته مون کي ڪجهه به نه گهرجي مان صدر، آرمي چيف رهي چڪو آهيان مان مڊل ڪلاس طبقي سان تعلق رکان ٿو مان پاڪستان جي ترقي جو سوچان ٿو ڪراچي ۾ لاشن تي سياست ٿيندي هئي ڪراچي ۾ ڪيترائي خاندان تباهه ٿي ويا، مان به مهاجر آهيان پر مان پنهنجو پاڻ کي مهاجر نه ٿو سمجهان مان سڀ کان پهريان پاڪستاني آهيان.

 

آمريڪا پاڪستان جي مالي ۽ فوجي امداد روڪڻ جو اعلان ڪري ڇڏيو

اسلام آباد/واشنگٽن ( ويب ڊيسڪ ) آمريڪا پاڪستان سان هر قسم جو سڪيورٽي سهڪار معطل ڪرڻ جو اعلان ڪري ڇڏيو جنهن تحت پاڪستان کي فوجي سامان ۽ مالي امداد فراهم نه ڪئي ويندي. آمريڪي پرڏيهي وزارت جي ترجمان بيدر نورٽ ميڊيا کي بريفنگ ڏيندي ٻڌايو ته هاڻي نه ته پاڪستان کي فوجي سامان ڏنو ويندو ۽ نه سڪيورٽي جي مد ۾ فنڊ فراهم ڪيو ويندو، انتظاميه پاڪستان جي امداد ۾ ڪٽوتي جو ڪاٿو لڳائي رهي آهي ته ڪيترا ملين ڊالر ڪاٽيا پيا وڃن. هن چيو ته پاڪستان جي امداد فيصلائتن قدمن سان بحال ٿي سگهي ٿي ۽ اهو تڏهن ٿيندو جڏهن پاڪستان حقاني نيٽ ورڪ ۽ افغان طالبان خلاف فيصلائتي ڪارروائي ڪندو. سندس چوڻ هو ته دهشتگرد گروپ جي خطي کي عدم استحڪام جو شڪار ڪري رهيا آهن ۽ افغانستان ۾ اسان جي اتحادين تي حملن ۾ ملوث آهن. ٻئي طرف پرڏيهي کاتي جي ترجمان ڊاڪٽر فيصل چيو آهي ته پاڪستان دهشتگردي جي خلاف جنگ پنهنجي وسيلن سان وڙهي آهي. پرڏيهي کاتي طرفان جاري بيان موجب پرڏيهي کاتي جي ترجمان ڊاڪٽر محمد فيصل جو چوڻ هو ته پاڪستان دهشتگردي خلاف ڳري رقم پنهنجي وسيلن تي خرچ ڪئي ۽ گذريل 15 سالن ۾ پاڪستان جا 120 ارب ڊالر خرچ ٿيا، اڳتي لاءِ به خطي ۾ امن ۽ پنهنجي شهرين جي جان ۽ مال جي تحفظ لاءِ پرعزم آهيون. پرڏيهي کاتي جي ترجمان چيو ته دهشتگردي خلاف پاڪ آمريڪا اتحاد حقيقت ۾ آمريڪي سلامتي جا مقصد پورا ڪندو آهي،  پاڪ آمريڪا دهشتگردي جي خاتمي جي سهڪار جو فائدو سڀ کان وڌيڪ آمريڪا ۽ عالمي برادري کي ٿيو، سيڪيورٽي معاملن تي آمريڪا سان رابطي ۾ آهيون ۽ ان معاملي تي آمريڪي اتنظاميا جي جواب ۽ تفصيل جو انتظار آهي.

 

 

پاڪستان کي 33 ارب ڊالر امداد ڏئي بيوقوفي ڪئي: (ٽرمپ)، ٽرمپ افغانستان ۾ ناڪامي تي مايوس آهي: خواجه آصف

واشنگٽن/اسلام آباد/لاهور(م.ڊ) آمريڪي صدر ڊونلڊ ٽرمپ هڪ ڀيرو ٻيهر پاڪستان تي تنقيد ڪندي چيو آهي ته آمريڪا گذريل 15 سالن دوران اسلام آباد کي 33 ارب ڊالرز امداد ڏئي چريائپ ڪئي. ڊونلڊ ٽرمپ 2018ع جو پهريون ٽوئيٽ ئي پاڪستان بابت ڪيو، جنهن ۾ هن هڪ ڀيرو ٻيهر پاڪستان تي ڇتي تنقيد ڪئي. هن چيو ته پاڪستان اسان کي ڪوڙ ۽ دوکي کانسواءِ ٻيو ڪجهه به ناهي ڏنو ۽ اسان جي اڳواڻن کي پاڪستان بيوقوف سمجهيو. پرڏيهي وزير خواجا آصف چيو آهي ته جلد ٽرمپ جي ٽوئيٽ جو جواب ڏئي دنيا کي سچائي ٻڌائينداسين ته حقيقت ۽ افساني ۾ فرق آهي. پرڏيهي وزير خواجا آصف سماجي رابطي جي ويب سائيٽ ٽوئيٽر  ۽ ڪيپٽل ٽاڪ شو ۾ آمريڪي صدر جي بيان تي رد عمل ڏيندي چيو ته انشاءَ الله جلد ڊونلڊ ٽرمپ جي ٽوئيٽ جو جواب ڏينداسين ۽ دنيا کي سچائي ٻڌائينداسين. هن چيو ته ٽرمپ افغانستان ۾ آمريڪا جي ناڪامي تي مايوسي جو شڪار آهي، هن چيو ته اسان آمريڪا کي پهرين ئي نو مور چئي چڪا آهيون، ٽرمپ جي نو مور جي ڪا به اهميت ناهي، آمريڪا کي گهرجي ته افغانستان ۾ فوجي طاقت بجاءِ ڳالهين جو رستو اختيار ڪري، امريڪا کي هڪ هڪ پائي جو سرعا حساب ڏيڻ لاءِ تيار آهيون، پرڏيهي وزير چيو ته صدر ٽرمپ جي بيان تي غُور جي لاءِ وفاقي ڪابينا جو اجلاس طلب ڪيو اهي، هوڏانهن آمريڪي صدر ڊونلڊ ٽرمپ جي پاڪستان خلاف بيان کانپوءِ وفاقي ڪابينا جو اجلاس اڄ طلب ڪيو ويو آهي خانگي ٽي وي ذريعن جي حوالي سان ٻڌايو آهي ته اجلاس وزيراعظم شاهد خاقان عباسي جي صدارت هيٺ ٿيندو جنهن ۾ آمريڪي صدر جي نئين بيان سميت ڏکڻ ايشيا پاليسي جا معاملا به غور هيٺ آندا ويندا. وفاقي ڪابينا اجلاس ۾ ملڪ جي سلامتي صورتحال سميت اهم قومي معاملن تي ويچار ڪيو ويندو.

 

پاڪستان ڪلبوشن سان گهرڀاتين جي ملاقات کي ڀارت خلاف پروپيگنڊا طور استعمال ڪري رهيوآهي: ڀارتي پرڏيهي وزير جو الزام

نئين دهلي (اين اين آءِ) ڀارتي پرڏيهي وزير سشما سوراج الزام مڙهيو آهي ته پاڪستان ڪلبوشن ياديو سان گهرڀاتين جي ملاقات کي ڀارت جي خلاف پروپيگنڊا طور استعمال ڪري رهيو آهي انسانيت جي نالي تي ٿيندڙ ميٽنگ ۾ انسانيت ۽ خيرسگالي نظر نه آئي ڀارتي پارليامينٽ ۾ ڪلبوشن ياديو سان ماءُ ۽ زال جي ملاقات جي حوالي سان سشما سوراج الزام هنيو پاڪستان ڀارت جي خلاف پروپيگنڊا ڪرڻ جي ڪوشش ڪري رهيو آهي ملاقات دوران ڪلبوشن انتشار جو شڪار هو هن اهو ئي چيو جيڪو ان کي چوڻ لاءِ چيو ويو هو ڪلبوشن گهرڀاتين کي پاڪستان ۾ حراسان ڪيو ويو جڏهن ته ان جي ماءُ ۽ زال جا ڪپڙا به تبديل ڪرايا ويا. سهاڳڙين کي بيواهن وانگر پيش ڪيو ويو ۽ ملاقاتن کان اڳ منهي عورتن جا منگل سوتر بنديا ۽ چوڙيون به لاٿيون ويون ڪلبوشن ملاقات جي دوران سڀ کان پهريان ماءُ کان پنهنجي پيءُ بابت سوال ڪيو ۽ ميءُ جي ڳلي ۾ منگل سوتر نه ڏسي هو سمجهي ويو ته سندس والد فوت ٿي چڪو آهي سشما سوراج چيو ته ڪلبوشن يادو جي گهرڀاتين کي ٻئي دروازي مان ملاقات لاءِ نيو ويو جڏهن ته ڀارتي ڊپٽي هاءِ ڪمشنر کي ڪجهه دير کان پوءِ اندر وڃڻ جي اجازت ڏني ويئي ماءُ مادري زبان مراٺي ۾ ڳالهائڻ گهري پئي جنهن جي اجازت نه ڏني ويئي ان جو انٽرڪام بند به ڪيو ويو پاڪستان هن ميٽنگ جا ته انساني همدردي جي بنياد تي ڏني آهي پر انسانيت جي نالي ٿيندڙ هن ميٽنگ ۾ انسانيت غائب هئي ۽ خيرسگالي به غائب هئي.

 

هلندڙ سال سڄي دنيا ۾ 65 صحافي قتل ڪيا ويا

پئرس (ويب ڊيسڪ) هلندڙ سال سڄي دنيا ۾ 65 صحافين ۽ ميڊيا جي نمائندن کي قتل ڪيو ويو، جن ۾ 9 عورتون به شامل آهن. صحافين جي عالمي تنظيم رپورٽرز  وِد آئوٽ بارڊرز موجب صحافين لاءِ خطرناڪ ترين ملڪن جي فهرست ۾ شام جو پهريون نمبر برقرار آهي، جتي 12 رپورٽرن کي قتل ڪيو ويو، ان کانپوءِ ميڪسيڪو جو نمبر اچي ٿو، جتي 11 صحافي ماريا ويا. واضح رهي ته مجموعي طور گذريل 14 ورهين دوران صحافين جي قتل جي حساب سان هلندڙ سال اهو انگ سڀني کان گهٽ آهي، جڏهن ته 2017ع ۾ خطرناڪ خطن اندر صحافين جي پيشيوراڻي سرگرمين کي پڻ محدود ڪيو ويو. 2016ع ۾ 112 صحافين کي قتل ڪيو ويو هو، جن ۾ 3 عورتون شامل هيون، جڏهن ته 2015ع ۾ 10 عورتن سميت 101 صحافي ماريا ويا هئا.27