تازيون خبرون
مودي نئين دور جو هٽلر قرار، ڪشمير تي حملو پاڪستان تي حملي جي برابر آهي: فردوس عاشق - الله جي ڳالهه ڪڏهن به تبديل ناهي ٿيندي، مسلمان پاڻ کي سياسي طور مضبوط ڪن: حج جو خطبو - وفاقي حڪومت جو اورسيز پاڪستانين لاءِ صحت کارڊ جاري ڪرڻ جو اعلان - وطن لاءِ حياتي ڏيڻ سڀ کان وڏي قرباني آهي، شهيد قوم جا هيرو آهن : آرمي چيف - ڀارت جو سمجهوتا ايڪسپريس ۽ ٿر ايڪسپرين بحال ڪرڻ جو مطالبو رد، آرمي چيف ۽ عمران خان هڪ ئي گاڏي جا ٻه ڦيٿا آهن: شيخ رشيد - فريال ٽالپر ۽ آصف زرداري خلاف ٽئڪس اوڳاڙي جو نوٽيس معطل، عدالت ايف بي آر کي ٽئڪس اوڳاڙڻ کان روڪي ڇڏيو - وفاقي حڪومت گيس ٽيرف ۾ 200 سيڪڙو تائين واڌ کان پوءِ  ڏيڍ مهيني اندر وڌيڪ 39 سيڪڙو واڌ ڪري ڇڏي - سپريم جوڊيشل ڪائونسل، جسٽس قاضي فائز عيسيٰ تي فرد جرم لاڳو ڪري ڇڏيو - ڪراچي سميت سنڌ ۾ سانوڻي جو وسڪارو، روڊ رستا ٻڏي ويا، مواصلاتي نظام درهم برهم، ڪرنٽ لڳڻ سبب 4 فوت - هزارين ڪشميرين جو پاڪستاني جهندي واري مارچ ڀارت جي لاءِ اڻٽٽ ڀت آهي: سراج الحق

Category Archives: سنڌ

سنڌ ڪابينا ۾ وڏي پيماني تي تبديلي، اطلاعات کاتو سعيد غني حوالي، نوٽيفڪيشن جاري

ڪراچي (م.ڊ) سنڌ جي وزيرن ۽ مشيرن جي کاتن ۾ ردوبدل جو نوٽيفڪيشن جاري ڪيو ويو آهي. صوبائي وزير سعيد غني کي سُڌ سماءَ، سهيل انور سيال کي آبپاشي کاتو، ناصر شاهه کي لوڪل گورنمينٽ ۽ ۽ ڄام اڪرام ڌاريجو کي صنعت ۽ تجارت جا قلمدان ڏنا ويا.وڏي وزير جي منظوري سان چيف سيڪريٽري طرفان جاري ڪيل نوٽيفڪيشن موجب صوبائي وزير ناصر شاهه کي لوڪل گورنمينٽ، ٻيلو کاتو ۽ مذهبي معاملن جا قلمدان ڏنا ويا. صوبائي وزير باري پتافي کي لائيو اسٽاڪ ۽ فشريز کاتو الاٽ ڪيا ويا، جڏهن ته صوبائي وزير هري رام ڪشوري لال کي اقيلتن ۽ خوراڪ کاتي جا قلمدان ڏنا ويا. جاري ٿيل نوٽيفڪيشن ۾ ٻڌايو ويو آهي ته صوبائي وزير اسماعيل راهو کي زراعت کاتو ڏنو ويو، جڏهن ته صوبائي وزير سعيد غني کي سُڌ سماءَ ۽ پورهئي کاتي جو قلمدان به سونپيو ويو آهي. نوٽيفڪيشن موجب صوبائي وزير شبير بجاراڻي کي قدرتي وسيلن، پبلڪ هيلٿ ۽ ٻهراڙي جي ترقي وارا کاتا ڏنا ويا. سردار شاهه وٽ ثقافت ۽ سياحت وارو کاتو آهي، جڏهن ته صوبائي وزير فراز ڏيرو کي بحالي کاتو ڏنو ويو آهي. نوٽيفڪيشن موجب صوبائي وزير تيمور ٽالپر کي انفارميشن، سائنس اينڊ ٽيڪنالوجي وزارت ڏني وئي آهي، جڏهن ته سهيل انور سيال کي آبپاشي، زڪوات ۽ عشر، اوقاف ۽ ائنٽي ڪرپشن کاتي جا قلمدان ڏنا ويا آهن. جاري ٿيل نوٽيفڪيشن موجب صوبائي وزير ڄام اڪرام ڌاريجوکي صنعت ۽ تجارت، جڏهن ته مرتضيٰ بلوچ کي هيومن سيٽلمينٽ جا کاتا ڏنا ويا آهن.سنڌ سرڪار طرفان صوبائي صلاحڪارن کي قلمدان ڏيڻ جي حوالي سان به نوٽيفڪيشن جاري ڪيو ويو آهي، جنهن موجب صوبائي صلاحڪار نثار کهڙو کي ورڪس اينڊ سروسز ۽ يونيورسٽيز اينڊ بورڊس جا کاتا سونپيا ويا، اُن کانسواءِ مرتضيٰ وهاب کي قانون، ماحوليات، ماحولياتي تبديلي ۽ ساحلي ترقيءَ وارن کاتن جو صلاحڪار بڻايو ويو آهي. جڏهن ته صوبائي صلاحڪار اعجاز شاهه شيرازي کي سماجي ڀلائي وارو کاتو ڏنو ويو آهي.

 

اوڀر ۽ اولهه جي سرحدن تي سڄي خطي اندر امن بحال ٿيڻ سان دهشتگرد سرگرميون ختم ٿينديون: مراد علي شاهه

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته دهشتگردي ۽ لاڳاپيل سرگرمين کي ختم ڪرڻو پوندو ۽ اهو تڏهن ممڪن ٿيندو جڏهن مشرق ۽ مغربي سرحدن تي سڄي خطي اندر امن بحال هجي. هن اهي ڳالهيون اڄ آمريڪي وفد جنهن جي اڳواڻي امريڪن قونصل جنرل مسٽر رابرٽ سلبريسٽين (Mr. Robert Silberstein)  ۽ ڊپٽي اسسٽنٽ سيڪريٽري اسٽريٽجڪ پاليسي ٽيررسٽ فنانسنگ اينڊ انانشل ڪرائم مسٽر اسڪوٽ ريم(Mr Scott Rem) ڪري رهيا هئا سان ڳالهيون ڪندي چيون. ملاقات ۾ جيڪي ٻيا آمريڪي آفيسر شامل ٿيا انهن ۾ مس مائيڪل ڪروڪٽ (Ms. Michelle Crockett)، مسٽر گرانٽ وڪيرس(Mr. Grant Vickers)، مسٽر ڊيوڊ گلبريٿ(Mr. David Galbraith) ، مسٽر نيل فلپس، مسٽر چاند مائنير(Mr. Chad Mineer) ، مس صنم نور، عمير ممتاز ۽ سيڪريٽري گهرو کاتو قاضي ڪبير، ايڊيشنل آئي جي سي ٽي ڊي ۽ ڊي آئي جي عبدالله شيخ شامل هئا. هن چيو ته خطي ۾ دهشتگردي ۾ واڌ ٿيو آهي ڇوته انڊيا وادي ڪشمير ۾ مسلمانن خلاف ظلم ڪيا آهن. هن چيو ته سڄي خطي ۾ امن جا وڏي مفاد ۾ ان کي مڪمل طور روڪڻو پوندو. مراد علي شاهه چيو ته افغانستان ۾ ان جي حڪومت کي پنهنجي ملڪ اندر هڪ وڏو محدود حصي تي ضابطو آهي ۽ اهو ئي سبب آهي ته اتي دهشتگردي جي سرگرمين بابت سازشون ٿين ٿيون جيڪي بعد ۾ پاڪستان تي اثرانداز ٿين ٿيون. هن چيو ته صوبائي حڪومت گذريل ڪيترن ئي سالن کان دهشتگردي جي خلاف جنگ وڙهي رهيو آهي ۽ هاڻي اسان ان تي وڏي حد تائين ضابطو آندو آهي. هن چيو ته سنڌ حڪومت وفاقي حڪومت سان گڏجي دهشتگردن جي فنانسنگ بابت معاملن تي قابو پائڻ لاءِ ڪم ڪري رهي آهي، صوبائي ۽ وفاقي حڪومتن جي ايجنسين گڏجي دهشتگردي جي فنانسنگ خلاف ڪم ڪري رهي آهي. هن چيو ته سيڪريٽري گهرو کاتي تحت دهشتگردي جي فنانسنگ خلاف گهرو کاتي ۾ يونٽ ڪم ڪري رهيو آهي، سنڌ ۾ 5 ٽيررازم فنانسنگ جا يڪس ٿيا جنهن کي سزا به ٿي چڪي آهي. هن چيو ته اسان چيرٽي رجسٽريشن ايڪٽ پاس ڪيو آهي ۽ چيرٽي ۽ ٻين فنڊز ريگيوليٽ ٿي سگهندا. هن وڌيڪ چيو ته صوبائي ايجنسين 19 ڪيسز ٽيراازم فنانسنگ جا ڊٽيڪٽ ڪيا آهن. مراد علي شاهه چيو ته سنڌ ۾ دهشتگردي ۽ دهشتگردي جي فنانسنگ خلاف سي ٽي ڊي ڪم ڪري رهي آهي، هاڻي فقط تصديق ٿيل چيرٽي ٿي سگهي ٿي ۽ سنڌ حڪومت قرباني جي جانورن جي کلن جي به چيرٽي کي نظر رکيل آهي. هن چيو ته سنڌ حڪومت جو سي ٽي ڊي ڊپارٽمينٽ گذريل ٽن سالن ۾ 500 کان ويجهو دهشتگرد گرفتار ڪيا آهن ۽ گرفتار ٿيل دهشتگردن ۾ ڪيترن ئي سزا ٿي چڪي آهي.

 

 

ٿر جون ٽئلينٽيڊ 2 نينگريون چين ۾ ڌاڪو ڄمائڻ لاءِ سنبري پيون، فٽبال ورلڊ ڪپ ڪيڏڻ لاءِ چين وينديون

 

اسلام ڪوٽ (اسپورٽس نيوز) ٿر جون 2 شاگردياڻيون فٽ بال جي راند ۾ سنڌ اندر پاڻ مڃائڻ بعد پرڏيهه ۾ به ڌاڪو ڄمائڻ لاءِ سنبري پيون آهن. جمنا ۽ ديوي چين ۾ ٿيندڙ عالمي فٽ بال ٽورنامينٽ ۾ حصو وٺڻ لاءِ تياري ڪري ورتي آهي. ڳوٺ جيئند درس جون رهواسين 2 شاگردياڻيون 12 ورهين جي ديوي ۽ ڳوٺ ابن جو تڙ جي رهواسڻ نينگري 10 سالن جي جمنا نه رڳو ٿر پر سنڌ لاءِ هڪ مثال بڻجي ويون. غريب پورهيتن جي گهر ۾ جنم وٺندڙ ٻئي نينگريون پنهنجي ٽئلينٽ جي بنياد تي ڪاميابي جا ڏاڪا چُمي رهيون آهن ۽ مٿن نه رڳو والدين ۽ ٿر جا ماڻهو، پر سموري سنڌ جا ماڻهو به فخر محسوس ڪري رهيا آهن. ٻنهي نينگرين آل سنڌ فٽ بال ٽورنامينٽ دوران مختلف ٽيمن سان مقابلن ۾ حصو ورتو، جنهن دوران هُنن بهترين راند کيڏي پاڻ مڃايو ۽ اُنهي بنياد تي چين ۾ ٿيندڙ فٽ بال ٽورنامينٽ ۾ ٻنهي نينگرين کي چونڊيو ويو. نينگري جمنا ۽ ديوي ٽورنامينٽ ۾ حصو وٺڻ لاءِ 8 آگسٽ تي چين روانيون ٿينديون. فٽ بال ٽورنامينٽ جون مئچز چين جي صوبي ڪنگ دائو ۾ ٿينديون ۽ سندن سمورو خرچ ٿر فائونڊيشن طرفان ادا ڪيو ويندو.

 

وسيم اختر کي ڪهڙي طاقت ڪم کان روڪيو؟ڪراچي کي برباد ڪندڙ ٻين تي الزام پيا هڻن: مرتضيٰ وهاب

ڪراچي (اسٽاف رپورٽر)   وزيراعليٰ سنڌ جي اطلاعات ، قانون ۽ اينٽي ڪرپشن بابت صلاحڪار بئرسٽر مرتضيٰ وهاب ،  ميئر ڪي ايم سي وسيم اختر جي بيان ۽ وفاقي وزير علي زيدي جي صفائي مهم تي ردعمل ڏيندي پنهنجي بيان ۾ چيو آهي ته ڪراچي کي برباد ڪندڙ اڄ ٻين تي الزام تراشي ڪري رهيا آهن. هن چيو ته ڪراچي جي تباهي جو سنڌ حڪومت تي الزام اڄ جو وڏو لطيفو آهي. بئرسٽر مرتضيٰ وهاب چيو ته ميئر کان ڪجهه ٿي نه ٿو سگهي اهو صرف الزام هڻندو رهندو آهي. هن چيو ته وسيم اختر ٻڌائي ته ڪهڙي طاقت هن کي شهر جي صفائي سٿرائي کان روڪيو آهي؟ پنهنجي نااهلي ۽ غفلت ٻين تي ٿوپڻ کان پري رهو. بئرسٽر مرتضيٰ وهاب چيو ته هر ادارو ۽ شخص پنهنجي ذميواري نڀائي ها ته ڪراچي وارا سک جو ساهه کڻن ها. هن چيو ته افسوس ڪراچي جي دعويدارن ئي هن شهرکي نوچي تباهي جي ڪناري تي پهچايو. هن چيو ته بحري معاملن واري وفاقي وزير جي صفائي مهم صرف  فوٽو سيشن کان وڌ ڪجهه به نه آهي. بئرسٽر مرتضيٰ وهاب جو وڌيڪ چوڻ هو ته بحري معاملا سنڀالي نه ٿا سگهن ۽  هليا آهن شهر صاف ڪرڻ. هن چيو ته بلدياتي ادارن جي ڪمن کي پنهنجي کاتي ۾ سونپڻ ڪو پي ٽي آءِ وارن کان سکي. بئرسٽر مرتضيٰ وهاب چيو ته علي زيدي صاحب ڊي ايم سي ڪيماڙي جي صفائي مهم جو ڪريڊٽ ٽوئٽ ڪري پنهنجي کاتي سونپي ڇڏيو، زيدي صاحب ۽ ان جي فوٽو سيشن ٽيم لاءِ دعاگو آهيون. هن چيو ته نالا صاف ڪرڻ جا دعويدار اهو ڄاڻي وٺن ته ڪراچي ۾ 556 وڏا ننڍا نالا آهن.

 

سنڌ ڪابينا ۾ واڌ، 4 وزيرن پنهنجي عهدن جو حلف کڻي ورتو

ڪراچي (ويب ڊيسڪ) سنڌ ۾ 4 وزيرن پنهنجي عهدن جو حلف کڻي ورتو. حلف برداري تقريب گورنر هائوس ۾ ٿي، جنهن ۾ 4 نون وزيرن پنهنجي عهدن جو حلف کنيو، کين گورنر عمران اسماعيل حلف کڻايو.  حلف کڻندڙن ۾ سيد ناصر شاهه، عبدالباري پتافي، ڄام اڪرام ڌاريجو ۽ سهيل انور سيال شامل آهن. هوڏانهن وڏي وزير سيد مراد علي شاهه نثار کهڙي ۽ اعجاز شاهه شيرازي کي صلاحڪار مقرر ڪيو آهي.

 

قلندر جي نگري نه سنڀالي سگهندڙ ملڪ ڇا سنڀاليندا: فردوس عاشق

اسلام آباد /سيوهڻ شريف(رپورٽر/اين اين آءِ) حڪومت پ پ ۽ ن ليگ جي 10 سالن جي اقتدار واري دور ۾ سفر جا خرچ اڳوڻن حڪمرانن کان اڳاڙن جو اعلان ڪندي چيو آهي ته اڳوڻا حڪمران پي آءِ اي کي چنگچي وانگر استعمال ڪندا رهيا آهن، وي آءِ پي اڏامن تي هڪ ارب 6 ڪروڙ کان وڌيڪ نقصان ٿيو، گهرڀاتين لاءِ جهاز استعمال ڪيا ويا، لنڊن ۾ ميان صاحب جيترا ڏينهن علاج هيٺ رهيو ان هنڌ کي ڪيمپ آفيس بڻايو ويو، جهاز لنڊن ۾ بيهارڻ سان پي آءِ اي جو ڪروڙين رپين جو نقصان ٿيو، ڀٽو زنده آهي جو نعرو هڻڻ لاءِ پي آءِ اي بي رحمي سان سکر ڊائيوٽ ٿيندي رهي، پي آءِ اي سان اهڙو ورتاءُ ڪيو ويو جيڪو ڪرائي تي ورتل سائيڪل سان ناهي ڪيو ويندو، گذريل ڏينهن هڪ سياسي ٽولي ڪاري ڏينهن جي آڙ ۾ ڏڦيڙ پکڙڻ جي ڪوشش ڪئي پر عوام ان جي منهن تي ڪارنهن ملي ڇڏي، وزيراعظم چاهي ٿو ته اپوزيشن هاڪاري ڪردار ادا ڪري، مخالف ڌر پنهنجي بائونڊري ۾ رهي کيڏي ته سٺو آهي، اليڪشن وڙهڻ لاءِ ٻٽي شهرت ختم ڪرڻ جو جائزو ورتو پيو وڃي، جهانگير ترين ۽ مريم نواز جا ٻه مختلف نوعيت جا ڪيس آهن، پيمرا جا رولز اسان تيار ناهن ڪيا، مخالف ڌر ايندڙ سال 25 جولاءِ تي پنهنجي ڪاري ڏينهن جي ناڪامي جو ڪارو ڏينهن ملهائيندي، مخالف ڌر کي هر پڙ تي هارائينداسين، اپوزيشن جي ڪنهن ريلي يا جلسي کي نه روڪيو ويندو، عوام پاڻ ڏسندو ته انهن جا شو ڪيئن فلاپ ٿين ٿا، جمعي تي اهڙن خيالن جو اظهار فردوس عاشق اعواڻ ميڊيا کي بريفنگ ڏيندي ڪيو، هن چيو ته عمران خان اهڙو ليڊر آهي جنهن 22 ڪروڙ عوام جي حوالي سان منفي پروپگنڊا کي ختم ڪيو، عمران خان پاڪستان جي جهنڊي جي عزت ڪرائي، هن چيو ته ڪابينا وزيراعظم کي ڪامياب آمريڪا جي دوري تي مبارڪ ڏني، هن چيو ته گذريل ڏينهن سڄو ڏينهن هڪ ٽولو جيڪو مختلف شهرن ۾ احتجاج جي آڙ ۾ ڏڦيڙ پکيڙڻ ۾ رڌل جو انهن ماڻهن ڪارو ڏينهن ملهايو پر عوام سندن منهن تي ڪارنهن ملي رد ڪري ڇڏيو، هن چيو ته پي ٽي آءِ جي چيئرمين گذريل ڏينهن ڪابينا اجلاس ۾ قومي ايئرلائين جي حوالي سان شرم جوڳا انڪشاف ڪيا، هن چيو ته اڳوڻن حڪمرانن پي آءِ کي چنگچي ڪري هلايو، پائيليٽس اڳوڻن حڪمرانن جا ذاتي ڊرائيورن جي حيثيت سان ڪم ڪندا رهيا، 21 ڀيرا پي آءِ اي جي روٽس کي تبديل ڪيو ويو، گذريل ڏينهن سياسي اداڪار عوام جي ڏک ۽ سور جو ڊرامو ڪندا رهيا، 27 ڪروڙ رپين جي شڪل ۾ قوم ڏهي پيڙا کائڻ جو بل ادا ڪيو، پي آءِ اي ۾ 503 ماڻهن جون سياسي بنيادن تي ڀرتيون ڪيون ويون، پي آءِ اي جون 33 آفيسون پي آءِ اي يونين جي قبضي ۾ هيون، هن چيو ته يونين جا عهديدار پنهنجن ماڻهن کي مخصوص فائدا حاصل ڪري مختلف روٽس تي موڪليندا رهيا، ڪنهن ٻئي مقصد جي سهولت لاءِ مختلف ملڪن ۾ پي آءِ اي کي بند ڪيو ويو، هن چيو ته ڀٽو کي زنده رکڻ لاءِ پي آءِ اي جي روٽس کي سکر ايئرپورٽ تي لاٿو ويو، 2012 کان 2017 تائين پي آءِ اي جون 50 وي آءِ پي اڏامون هلايون ويون، پي آءِ اي هڪ ارب 6 ڪروڙ جو وي آءِ پي فلائيٽس جي ڪري ٿو، 2012 کان 2017 تائين پي آءِ اي جون وي آءِ پي اڏامون ناني امان، سندن ٻارن ۽ نوڪرياڻين کي کڻي اچڻ وڃڻ سان 954 ملين جو نقصان ٿيو، زل سبحاني کي دل جي تڪليف ٿيڻ سبب ٻارنهين ملڪ کڻي وڃڻ لاءِ سڄو جهاز ڀرجي ٻاهر ويو، علاج کاناسواءِ 28 ڪروڙ جي لڳ ڀڳ پي آءِ اي کي ڏنڊ ادا ڪرڻو پيو، هن چيو ته هن قوم جا ٻارڙا هن غريب خاندان جي بيماري جو بل ادا ڪندا رهيا جنهن جا پنهنجا ٻار ڪروڙن جي گهر ۾ رهن ٿا، وزيراعظم عمران خان جي هدايت جي روشني ۾ نئون پي آءِ اي چيئرمين مقرر ٿيو، هن چيو ته 2 مهينن اندر پي آءِ اي کي 46 ملين رپيا ڪمائي ٿي، بورڊنگ پاس جو طريقو ٺيڪ ڪري 7 سيڪڙو پي آءِ اي جي ڪمائي ۾ واڌ ٿي آهي، هن چيو ته سادگي مهم تحت آپريشن سسٽم ۾ پي آءِ اي جي خرچن ۾ 20 سيڪڙو گهٽتائي ٿي، پي آءِ اي زل صبحاني جي وڃڻ کانپوءِ پيرن تي بيهڻ جو سفر شروع ڪيو آهي، هن چيو ته اميد آهي ته هلندڙ سال پي آءِ اي پنهنجي خساري کي گهٽائي نفعو ڏيندو، هن چيو ته يوسف رضا گيلاني، راجا پرويز اشرف يا ڏهي پيڙڻ واري سرڪار سمورن جا ٻاهرين ملڪن ۾ سفر ڪرڻ جا خرچ ڏٺا ويا، هن چيو ته وزيراعظم اهو فيصلو ڪيو ته جيڪو علاج يا غير ضروري دورن تي خرچ ٿيو اهو واپس ورتو ويندو. هن چيو ته عمران خان جي نواز شريف سان ڪا ذاتي دشمني نه آهي، مخالف ڌر ايندڙ سال 25 جولاءِ تي ڪارو ڏينهن ناڪام ٿيڻ تي ناڪامي جو ڪارو ڏينهن ملهائيندي، هن چيو ته مخالف ڌر کان وزيراعظم جي عالمي سطح تي عزت برداشت نه پئي ٿئي.

ٻئي طرف  وزيراعظم جي معاون خاص براء اطلاعات فردوس عاشق اعوان جي سيوھڻ شريف آمد,حضرت لعل شھباز قلندر جي مزار جي حاضري,وزير اعلي سنڌ جي تڪ لعل جي ننگري جي حالت زار ڏسي انتھائي ڏک ٿيو,ميڊيا جي وفد سان ڳالھيون, خبر موجب:-وزيراعظم پاڪستان عمران خان جي معاون خاص براء اطلاعات فردوس عاشق اعوان جمع واري رات دير سان سيوھڻ شريف پھتي ته پي ٽي آئي ضلع ڄامشورو جي اڳواڻ سردار حاڪم خان نوحاڻي جي اڳواڻي ۾ سوين پي ٽي آئي ڪارڪنن سندس شاندار استقبال ڪيو, بعد ۾ صوبائي صدر عليم عادل شيخ سان گڏجي درگاھ حضرت لعل شھباز قلندر جي مزار تي حاضري ڏي ۽ گلن جي چادر چاڙھي فاتح خواني ڪئي ۽ پنھنجي جماعت جي حڪومت جي ڪاميابي ملڪ و قوم جي خوشحالي لاء خاص دعائون گھريون, ان دوران وفاقي معاون خاص فردوس عاشق اعوان ڌمال ڪوٽ ۾ ميڊيا جي وفد سان گفتگوء ۾ چيو آھي ته ھوء لعل شھباز قلندر جي خاص عقيدتمند آھي ان عقيدي سان سيوھڻ شريف پھچي پنھنجي مُرشد جي درٻار تي حاضري ڏني آھي ھن سنڌ جي وڏي وزير جي تڪ تعلقه ھيڊ ڪوارٽر ۽ لعل جي ننگري سيوھڻ شريف جي حالت زار بابت چيو ته قلندر لعل شھباز جي ننگري سيوھڻ شريف جا ٽٽل ڦٽل رستا ۽ شھر اندر گندگيء جا ڍير ڏسندي کيس ڏاڍو ڏک پھتو آھي ان مان صاف ظاھر آھي ته سيد مراد علي شاھ کي صرف سنڌ جو وڏو وزير زرداري جي وڪالت ۽ خوش آمد ڪرڻ لاء رکيو آھي ڇو ته سندس تڪ سيوھڻ شريف جو جيڪو حال آھي ان مان اندازو لڳائي سگھجي ٿو ته باقي سنڌ جو ڇا حال ھوندو, وزيراعظم عمران خان جي آمريڪي دوري بابت پڇيل سوال جي جواب ۾ فردوس عاشق ايوان چيو ته پاڪستان جي تاريخ ۾ پھريون وزير اعظم عمران خان آھي جنھن جو آمريڪا پھچڻ تي شاندار استقبال ٿيو آھي ان استقبال ۾ نه رڳي پاڪستاني ڪميونٽي شامل ھئي ان سان گڏ گڏ گورا ڪميونٽي جو پڻ  وڏو تعداد شامل ھُيو,ھن چيو ته عمران خان واحد عالمي ليڊر طور مڃتا ماڻي آھي جيڪو ملڪ جي سڃاڻپ واري جنگ پيو وڙھي, ھڪ ٻئي سوال جي جواب ۾ ھن چيو ته حضرت قلندر لعل شھباز دلين ۾ وسي ٿو ان جي حاضري ڏيئڻ لاء نون ليگ,يا ڪنھن ٻي ليگ کان اجازت وٺڻ جي ضرورت ناھي ھن چيو ته عمران خان سمجھي ٿو ته درگاھون ۽ برصغير ۾ اسلام جي واڌ ويجھ وارن بزرگن جي مزارن تان فيض حاصل ڪري سگھجي ٿو فردوس عاشق اعوان وڌيڪ پڇيل سوالن جي جواب ۾ چيو آھي ته مخالف سينيٽرن چيئرمين سينيٽ جي تبديلي وارو سياسي دنگل شروع ڪري جيڪو محاذ اڀو ڪيو آھي جنھن ۾ کين شڪست ملندي,آخر ۾ معاون خاص فردوس عاشق اعوان مزار تي,موجود مسڪين ماڻھن ۾ ڪپڙو روڪ رقم پڻ تقسيم ڪئي ان کان اڳ تاريخي قلعي تي پنھنجي جماعت جي حڪومت جي ھڪ سال پورو ٿيئڻ تي پھرين سالگرھ جو ڪيڪ پڻ ڪاٽي ڪارڪنن ۾ تقسيم ڪيو ۽ ڪراچي لاء روانا ٿي وئي.

 

برسات کانپوءِ دريائن ۾ چاڙهه، مٿين درجي جي ٻوڏ، آچر کان ساوڻي جي وسڪاري جي اڳڪٿي

ڪراچي / لاهور ( ويب ڊيسڪ ) سڄي ملڪ ۾ برساتن کانپوءِ دريائن ۾ پاڻي جي سطح بلند ٿي وئي آهي ۽ جنهن سبب ڪيترن ئي هنڌن تي مٿين درجي جي ٻوڏ آهي. سڄي ملڪ ۾ هلندڙ سانوڻي جي برساتن سبب دريائن ۾ پاڻي جي سطح بلند ٿي وئي آهي ۽ ڪيترن ئي هنڌن تي مٿين درجي جي ٻوڏ آهي. فلڊ ڪنٽرول روم موجب سنڌو درياءَ ۾ راجن پور واري هنڌ هيٺين درجي جي ٻوڏ آهي جنهن سبب دريائي رستن تي پوکيل فصل لڙهي ويا آهن جڏهن ته سنڌو درياءَ جي رستن تي آباد ماڻهن لڏپلاڻ شروع ڪري ڇڏي آهي، درياءَ جي حدن ۾ ڪچي جي علائقي ۾ امڪاني ٻوڏ کي نظر ۾ رکندي ماڻهن محفوظ هنڌن تي منتقل ٿيڻ جا اعلان به ڪرايا پيا وڃن. فلڊ ڪنٽرول روم جو چوڻ آهي ته سنڌو درياءَ ۾ ڪوٽ مٺن واري هنڌ ٻه لک 80 هزار ڪيوسڪ پاڻي گذري رهيو آهي جڏهن ته چناب درياءَ ۾ پاڻي جي سطح بلند ٿيڻ سبب هاءِ فلڊ الرٽ جاري آهي، زوب، قلات ۽ ڊي جي خان ڊويزن  ۾ دريائن ۽ برساتي نالن ۾ ٻوڏ کي منهن ڏيڻو پئجي رهيو آهي.  موسميات کاتي موجب برساتن سبب ڪابل درياءَ ۾ نوشهره وٽ وچولي درجي جي ٻوڏ آهي، 24 ڪلاڪن دوران راوي ۽ چناب سان لاڳاپيل ندين ۽ نالن ۾ ٻوڏ جي صورتحال هوندي، ڊي جي خان جي پهاڙي ندين نالن ۾ به هيٺين سطح جي ٻوڏ هوندي.ٻئي طرف موسميات کاتي آچر کان سنڌ ۽ بلوچستان جي وچ توڙي اترين ضلعن ۾ سانوڻي جي برساتن جي اڳڪٿي ڪئي آهي. موسميات کاتي موجب آچر کان اڱاري تائين ميرپور، ٺٽي، حيدرآباد، ڪراچي ۽ بينظير آباد ۾ تيز طوفان ۽ گجگوڙ سان تيز برسات جو امڪان آهي. سکر، لاڙڪاڻي، زوب، سبي ۽ نصير آباد جي ڪجهه هنڌن تي به تيز طوفان سان گڏ برسات ٿي سگهي ٿي. بلوچستان ۾ قلات، مڪران، ڊوزن ۾ تيز برسات ۽ گجگوڙ سان برسات جو امڪان آهي. برساتن سبب ڪراچي، ٺٽي، حيدرآباد ڊويزن ۾ اربن فلڊنگ جڏهن ته قلات، سبي، زوب ڊويزن ۾ به فلش فلڊنگ جو خطرو آهي. موسميات کاتي سمورن ادارن کي هنگامي صورتحال کي منهن ڏيڻ لاءِ هاءِ الرٽ رهڻ جي هدايت ڪئي آهي.

 

ڪراچي ۾ تيز برسات جي اڳڪٿي، سنڌ حڪومت پاران لاڳاپيل ادارن کي الرٽ رهڻ ۽ اڳواٽ انظام ڪرڻ جي هدايت

ڪراچي (اسٽاف رپورٽر) سنڌ جي وڏي وزير سيد مراد علي شاھھ چيو آھي تھ ڪي ڊبليو ايس بي شھر ۾ پاڻي جي ورھاست لاءِ روٽيشن سسٽم شروع ڪري ۽ سندن ويب سائيٽ ذريعي ماڻھن کي ٻڌايو وڃي تھ جيئن انھن کي معلوم ٿي سگھي ۽ اھي بھتر طريقي سان پاڻي حاصل ڪري سگھن. ھن چيو تھ ڪٿ ڊبليو ايس بي کي گھرجي تھ اھي سموري نظام کي شفاف طريقي سان ٽيڪ اوور ڪري ۽ ان کي ٻين جي رحم ۽ ڪرم تي نٿو ڇڏي سگھجي. ھن اھا ڳالھھ اڄ مڪاني ادارن واري کاتي سان ھڪ اعليٰ سطحي اجلاس جي صدارت ڪندي ڪئي، جنھن ۾ 29 جولاءِ کان شروع ٿيندڙ چوماسي/ شديد برساتن لاءِ تياري ۽ انتظامن سميت شھر ۾ بھتر طريقي سان پاڻيءَ جي ورھاست لاءِ جامع پلان جوڙڻ جي بابت مامرن جو جائزو ورتو ويو. اجلاس ۾ مڪاني ادارن وارو وزير سعيد غني، وڏي وزير جو پرنسپل سيڪريٽري ساجد جمال ابڙو، ڪمشنر ڪراچي افتخار شھلواڻي، سيڪريٽري بلديات خالد حيدر شاھھ، ايم ڊي ڪي ڊبليو ايس بي اسد اللھ خان ۽ واٽر بورڊ جي لاڳاپيل آفيسرن شرڪت ڪئي. صوبائي وزير سعيد غني چيو تھ شھر ۾ 918 ايم جي ڊي گھرج جي مقابلي ۾ 406 ايم جي ڊي پاڻي فراھميءَ لاءِ موجود آھي. ان تي وڏي وزير چيو تھ اٽڪل 50 سيڪڙو کوٽ آھي، انڪري پاڻيءَ جي منصفاڻي طريقي ورڇ ٿيڻ گھجي. ھن چيو تھ جھڙي ريت آبپاشي کاتو پاڻيءَ جو ريٽيشن سسٽم آبادگارن کي ٻڌائيندو آھي، مان چاھيان ٿو تھ واٽر بورڊ بھ ورڇ جو روٽيشن سسٽم جوڙي عوام کي آگاھھ ڪري. ھن چيو تھ ھن وقت ڪجھھ علائقا باقاعدگيءَ سان پاڻي حاصل ڪري رھيا آھن ۽ ٻين علائقن ۾ ڪيترائي ڏينھن انتظار ڪرڻ پئجي وڃي ٿو جيڪا چڱي ڳالھھ نھ آھي. مراد علي شاھھ چيو تھ سندس تصديق ٿيل رپورٽس آھن تھ وال مين پاڻمرادو پاڻي ورھاست جو سسٽم بڻائي ويٺا آھن. ھن صوبائي وزير بلديات کي چيو تھ وال مين ڪنھن کي فيور ڏيڻ ۾ ملوث آھن تھ انھن جي نشاندھي ٿيڻ گھرجي ۽ سندن خلاف ڪرمنل ڪيس پڻ داخل ڪري سگھجي ٿو. ھن ايم ڊي ڪي ڊبليو ايس بي اسداللھ خان کي چيو تھ ھُو ھڪ تفصيلي روٽيشن پلان پنھنجي ويب سائيٽ تي اپ لوڊ ڪري تھ جيئن ماڻھن کي خبر پئجي سگھي تھ اھي ڪڏھن پاڻي حاصل ڪندا. ھن کين اھا پڻ ھدايت ڪئي تھ غيرقانوني پاڻي جا ڪنيڪشن ۽ چوريءَ خلاف بھ ڪارروائي ڪئي وڃي. ھن چيو تھ اھو ڪي ڊبليو ايس بي لاءِ ھڪ وڏو چئلنج آھي ۽ ان کي کين منھن ڏيڻو آھي. وڏي وزير مڪاني ادارن واري وزير تي زور ڀريو تھ ھُو واٽر بورڊ جي انجنيئرن کي پاڻيءِ جي ورھاست واري نظام کي اپ گريڊيشن ۽ مناسب طريقي سان سارسنڀال ڪرڻ لاءِ پابند ڪري تھ جيئن 30 سيڪڙو لائين لاسز/ چوري تي ضابطو آڻي سگھجي. ھن چيو تھ جيڪڏھن اوھان 30 سيڪڙو پاڻي جي نقصانن تي ضابطو آڻڻ ۾ ڪامياب ٿيندا تھ اوھان 174 ايم جي ڊي پاڻي بچائڻ جي قابل ٿيندا جيڪا ھڪ وڏي ڪاميابي آھي.

تيز برساتون:

وڏي وزير سيد مراد علي شاھھ چيو تھ ميٽ ڊپارٽمينٽ شھر ۾ 29 جولائي کان تيز برساتن جي اڳڪٿي ڪئي آھي انڪري ضروري انتظامن بشمول نالن جي صفائي، نيڪاليءَ واري نظام جي مناسب ريت مينٽيننس ۽ روڊن جي مرمت بھ لازمي ھئڻ گھرجي. اجلاس ۾ وڏي وزير کي مڪاني ادارن واري وزير ٻڌايو تھ سنڌ حڪومت ڪراچي ميونسپل ڪارپوريشن (ڪي ايم سي) کي گذريل سال نالن جي صفائيءَ لاءِ 500 ملين رپيا ڏنا ھئا. ڊي ايم سيز کي بھ 250 ملين رپيا ڏنا آھن. ڪي ايم سي جي ڪنٽرول ھيٺ شھر ۾ 16 نالا آھن. وڏي وزير چيو تھ ڪراچي ۾ جتي پاڻي رڪجڻ وارا ھنڌ آھن انھن کي درست ڪيو وڃي. سعيد غني چيو تھ نالن جي صفائي ۽ رنڊڪن وارا ھنڌ يڪ ڪيا ويا آھن. وڏي وزير سيڪريٽري بلديات کي ھدايت ڪئي تھ جن نالن جي صفائي ڪئي وئي آھي ۽ وڌيڪ جيڪي صاف ڪرڻ گھرجن انھن جو ورڪ پلان ڪي ايم سي کان ورتو وڃي. وڏي وزير چيو تھ شھر ۾ 17 نڪاسي آب وارا نالا آھن جيڪڏھن انھن کي صاف رکيو وڃي تھ شھر ۾ پاڻي نھ بيھندو. ھن وڌيڪ چيو تھ ھر نالي جي پروفائل بڻائي، جنھن ۾ ان جي ڊيگهھ، چوڪنگ پوائنٽس، حددخليون، ڪچا پڪا ھنڌ ۽ ڪيپسٽي وغيرا شامل ھجي. وڏي وزير سيڪريٽري بلديات کي وڌيڪ ھدايت ڏني تھ اھا پروفائلنگ ڪري مون ڏانھن موڪلي وڃي ۽ مڪمل پروفائلنگ ڪري ۽ صفائي جو ورڪ پلان بڻائي سنڌ حڪومت کي ڏنو وڃي ۽ ضروري فنڊ حاصل ڪيا وڃن. وڏي وزير وزير بلديات کي ھدايت ڪئي تھ برساتن کي ڏسندي سمورن ڊي ايم سيز ۽ ڪي ايم سي ادارن کي متحرڪ ڪيو وڃي. وڏي وزير ڪي ڊبليو ايس بي تي زور ڀريو تھ اھي بلڪ ٽرانسميشن سسٽم، ڪينالز، سائفن، ڪنڊيوٽس ۽ ڌاٻيجي، گھارو، پپري ۽ اين اي ڪي پمپنگ اسٽيشنز ۽ فلٽر پلانٽس وارن علائقن ۾ واقع ٻين ھنڌن تي پيٽرولنگ شروع ڪئي وڃي. ھن چيو تھ پمپنگ اسٽيشنز تي بجلي معطل ٿيڻ جي صورت ۾ فوري طور تي ڪي اليڪٽرڪ کي شڪايت ڏني وڃي تھ جيئن پمپنگ اسٽيشن بھتر ۽ روان طريقي سان ڪم ڪري سگھن. ايم ڊي واٽر بورڊ وڏي وزير کي ايندڙ امڪاني تيز برساتن جي حوالي سان سندس تياريءَ بابت تفصيلي بريفنگ ڏني.

 

مٺي: معصوم ٻارڙن تي موت جو رقص جاري، غذائي کوٽ سبب 5 ٻارڙا فوت

مٺي(م.ڊ) مٺي ۾ معصوم ٻارڙن تي موت جو رقص جاري آهي، سول اسپتال سميت ٻين اسپتالن ۾ مختلف بيمارين ۽ غذائي کوٽ سبب پنج ٻارڙا فوت ٿي ويا. ننگرپارڪر جي ڳوٺ اوڻ جو وانڊيو جي رهواسي ايشور ڪولهي جو تازو ڄاول پٽ، ڀورو جو هڪ ڏينهن جو پٽ، ڳوٺ مٺڙيو اوٺا جي رهواسي رزاق اوٺو جو تازو ڄاول ٻارڙو ،ڳوٺ چڻيندا جي رهواسي پرڪاش جو هڪ ڏينهن جو پٽ اوم ۽ ڳوٺ چوپڻي جي رهواسي ڪيول ڪولهي جي تازي ڄاول  نياڻي فوت ٿي وئي. سول اسپتال مٺي سميت ٻين شهرن جي اسپتالن ۾ سهولتن جي کوٽ جئين جو تئين برقرار آهي، جنهن سبب ٿرواسي سخت پريشان آهن. معصوم ٻارڙن جون فوتگيون رڪجي ناهن سگهيون، غذائي کوٽ ۽ مختلف بيمارين وگهي ٻارڙا فوت ٿي رهيا آهن، پر سنڌ حڪومت ڪو خاص ڌيان ناهي ڏنو

 

دادو لڳ سراز برادري جي ٻن ڌرين ۾ جهيڙو، ڀاڻج هٿان مامو قتل، جوابدارن ۾ 2 پوليس اهلڪار به شامل، پوليس تي ڌر هئڻ جو الزام

دادو (ڊ.ر) دادو ڀرسان بي سيڪشن ٿاڻي جي حد رميز ڪالوني ۾ مبينا ڀاڻج هٿان چاچو قتل ٿي ويو، سراز برادري جي ٻن ڌرين ۾ جهيڙي دوران 72 سالا پيرسن سابقہ انفارميشن کاتي جو ملازم هاشم پٽ صديق سراز قتل ٿي ويو جنهن جو لاش وارث سول اسپتال دادو کڻائي پهتا مقتول پيرسن جي گهر واري مسمات حميده سراز سندس پٽ غفار سراز، سڪندر سراز ۽ ٻين احتجاج ڪندي دانهيو ته ڪجھه ڏينهن کان گهٽي جي معامري تان تڪرار هلندڙ هو، جوابدارن ۾ ٻن پوليس اهلڪارن سميت 6 ڄڻن گهر تي حملو ڪيو ڏنڊا ۽ سروتا لڳڻ سبب پيرسن موقعي تي ئي فوت ٿي ويو، پوليس اهلڪار عرس سراز، اهلڪار بشير سراز، انور، حسيب، اصغر، سرور سراز ۽ ٻين گهر تي حملو ڪيو مقتول جو لاش وارث ضروري ڪاروائي کان بنا ئي اسپتال مان کڻائي دادو پريس ڪلب آڏو لاش رکي ڌرڻو هنيو، مقتول جي وارثن دانهيو ته جوابدارن ۾ ٻه پوليس اهلڪار آهن پوليس پنهنجن پٽي ڀائرن کي بچائڻ جي ڪوشش ڪري رهي آهي قاتلن کي گرفتار ڪري انصاف فراهم ڪيو وڃي، هوڏانهن ڊيوٽي ڊاڪٽر طالب ڪلهوڙو جو چوڻ هو ته پيرسن جي جسم تي ڪوبه واضع تشدد جو نشان نه هو، پوليس ليٽر نه هجڻ سبب مقتول جي وارثن کي پوليس جو ليٽر کڻي اچڻ لاءِ چيو ته هو لاش کڻائي هليا ويا، هن چيو ته پوسٽ مارٽم بعد ئي وڌيڪ ڪجھه ٻڌائي سگهجي ٿو، آخري اطلاع تائين پوليس پاران ڪوبه ڪيس داخل نه ڪيو ويو هو.