تازيون خبرون
وفاقي ڪابينا جو بجلي ۽ گيس جون قيمتون نه وڌائڻ جو فيصلو - سنڌ پوليس ۾ ڪانسٽيبل جون 6 هزار کان وڌيڪ سيٽون خالي، ڀرتيون شروع ڪرڻ جي هدايت ڪئي. - قومي لٽيرن کي عوام نظرن کان ڪيرائي ڇڏيو: فردوس عاشق اعواڻ - آرمي چيف جي ڪويت جي عسڪري ۽ سياسي قيادت سان ملاقات، بچاءُ ۽ سيڪيورٽي جي مختلف شعبن ۾ ٻن طرفه سهڪار وڌائڻ تي اتفاق - حڪومت پاران ٽيڪس وصولي جا حدف حاصل نه ٿيڻ جو اعتراف - سپريم ڪورٽ جي ججز خلاف الزام لڳائڻ تي حڪومت اٽارني جنرل آف پاڪستان انور منصور خان استعيفيٰ وٺي ڇڏي - انتظار جون گهڙيون ختم، پي ايس ايل جو ميلو سجي ويو، انتهائي سخت سيڪيورٽي جا انتظام ڪيا ويا آهن: ناصر حسين شاهه - ملڪ  جي تاريخ ۾ ايتري مهانگائي ناهي ٿي جيتري گذريل 15 مهينن ۾ ٿي آهي: بلاول ڀٽو زرداري - سپريم ڪورٽ گيس انفرا اسٽرڪچر ڊولپمينٽ سيس (جي آءِ ڊي سي) بابت ڪيس جو فيصلو محفوط ڪري ڇڏيو - ايڪسپورٽ گهٽ آهي، ائين ملڪ نٿو هلي سگهي: اسٽيٽ بينڪ جو موجودا معيشت جي صورتحال تي ڳڻتي جو اظهار

Category Archives: پاڪستان

غير جمهوري سازش نه ڪنداسين، آئيندي طريقي سان حڪومت ڪيرائينداسين: بلاول ڀٽو زرداري

لاهور (ويب ڊيسڪ) پ پ چيئرمين بلاول ڀٽو زرداري چيو آهي ته تحريڪ انصاف حڪومت ۾ معاشي حالتون خراب، انساني جمهوري حقن ۽ ميڊيا تي پابنديون آهن، چاهيان ٿو ته موقعو ملندي ئي حڪومت ڪيرائي ڇڏيان. لاهور ۾ صحافين سان غير رسمي گفتگو ڪندي بلاول ڀٽو زرداري چيو مون کي ٻڌايو ته حڪومت ڪيرائڻ جا ڪيترا طريقا آهن؟ آئيني، جمهوري ۽ قانوني طريقي سان حڪومت ڪيرائڻ چاهيان ٿو، غير جمهوري سازش نه ڪنداسين. هن چيو ته آءِ ايم ايف وٽ اسان به وياسين پر انهن جي هر شرط نه مڃي، اسان دهشتگردي جو مقابلو ڪيو، جنگ وڙهي، ٻن ٻوڏن جو مقابلو ڪيو، پوءِ به اسان جي دور ۾ پگهارن ۾ سوا سئو سيڪڙو واڌ ڪئي وئي، هن حڪومت جو ڪو اسٽيڪ ئي ناهي، تنهن ڪري اهي آءِ ايم ايف جي هر شرط مڃي رهيا آهن. سندس چوڻ هو ته حڪومت جيڪو ڪجهه ڪري رهي آهي، اهو فاشسزم آهي، اڄ تحريڪ انصاف اهو ڪردار ادا ڪري رهي آهي، جيڪو 90 ۾ ن ليگ جو هو، جيڪڏهن ترقي ميٽرو سان آهي ته پوءِ ان جي سامهون هارائي چڪو آهيان، سمجهه ۾ نٿو اچي ته پنجاب عثمان بوزدار جي هٿن ۾ ڏئي عمران خان ڪيئن سمهي پوندو آهي، خيبر پختونخواهه ۾ خبر ناهي ته وڏو وزير ڪير آهي. پ پ چيئرمين موجب مان هن حڪومت خلاف تحريڪ لاءِ سڀني طبقن سان رابطو ڪرڻ نڪتو آهيان، حڪومت جي حربن باوجود انهن خلاف پنهنجي جدوجهد ڪندا رهنداسين، عوام کي ٻڌائڻو آهي ته انهن جو اسٽيڪ چونڊ، سياست ۽ معيشت ۾ هجڻ گهرجي، عوام جو اسٽيڪ نه هوندو ته پوءِ رياست ڪيئن هلندي، ٻڌو آهي ته ملڪ جا ناليوارا ادارا هاڻ مهانگائي جي جاچ ڪندا، ادارن کي انهن معاملن کان پري رهي پنهنجو شان برقرار رکڻ گهرجي. بلاول ڀٽو زرداري وڌيڪ چيو ته ن ليگ جو پارليامينٽ ۾ اپوزيشن طور انتهائي اهم ڪردار آهي، اسان انهن کانسواءِ ڪجهه نٿا ڪري سگهون، اسان ٽئين نمبر تي آهيون، اسان اپوزيشن سان گڏجي هلڻ ۾ ڪا ڪسر نه ڇڏي، ن ليگ يا فضل الرحمان سان جيڪو واعدو ڪيو، ان کي پاڙيوسين، مولانا جي ڌرڻي کان اڳ سڀ گڏ هئا، ن ليگ سان سٺا لاڳاپا هئا پر هاڻ سڀ ڪجهه سامهون آهي، تاڙي ٻنهي هٿن سان وڄندي آهي.

 

اٽي بحران جي شروعاتي رپورٽ تي وزيراعظم وڌيڪ جواب طلب ڪيا آهن.راڻا ثناءُ الله مون کي بچايو تحريڪ هلائي رهيو آهي: فردوس عاشق

اسلام آباد (اين اين آءِ) وزيراعظم جي صلاحڪار فردوس عاشق اعواڻ چيو آهي ته وزيراعظم جو اسملنگ جي خلاف ڪريڪ ڊائون عوامي رليف لاءِ وڏو قدم آهي، قومي معيشت کي اربين رپين جو نقصان پهچائيندڙ اسملنگر کي چٿيو پيو وڃي، عمران خان پاران ذخيرو ڪندڙن خلاف قدم عام واهپي جي شين جي اگهن ۾ استحڪام آڻيندا، اربع تي ٽوئيٽر تي هڪ بيان ۾ هن چيو ته بلوچستان ۾ بارڊر مارڪيٽ قائم ڪرڻ جي اڳڀرائي کي به تيز ڪرڻ جون هدايتون ڪيون ويون آهن، هن چيو ته اسملنگ کي روڪڻ لاءِ وڏي پيماني تي ڪارروائي جو فيصلو وزيراعظم جو قانون تي عملداري تي پختي ازم جو اظهار آهي، هن چيو ته هي ملڪي معيشت کي اربين رپين جي نقصان کان بچائڻ لاءِ عملي قدم آهي، هن چيو ته وزيراعظم صوبائي حڪومتن کان ڪڻڪ اگهن لاٿ لاءِ تجويز طلب ڪئي آهي، بجلي ۽ گيس جي حوالي سان ماضي جي حڪومتن جي فيصلن جو بار عوام پنهنجي ڪلهن تي کنيو، هن چيو ته وزيراعظم پيٽرول، ڊيزل ۽ گيس اگهن ۾ لاٿ جو روڊ ميچ جوڙڻ جي هدايت ڪئي آهي.

 

عالمي سطح تي به ملڪن ۾ برابري ناهي، 5 ملڪن وٽ ويٽو جا اختيار هجڻ به اڻبرابري جو مثال آهي: انتونيو گوتريس

لاهور(م.ڊ)گڏيل قومن جي سيڪريٽري جنرل انتونيو گوتريس چيو آهي ته عالمي سطح تي به ملڪن ۾ برابري ناهي، ماڻهن ۽ ملڪن ۾ برابري قائم ڪرڻ آسان نه پر ڊگهو عمل آهي، سلامتي ڪائونسل جي فقط 5 ملڪن وٽ ويٽو جا اختيار هجڻ به اڻبرابري جو مثال آهي. لاهور جي خانگي يونيورسٽي ۾ خطاب ڪندي انتونيو گوتريس چيو ته21 هين صدي ۾ نوجوانن جو گڏيل قومن ۾ اهم ڪردار هوندو.، نوجوانن کي جديد ٽيڪنالاجي سيکارڻي ۽ مستقبل جي چيلينجز کي منهن ڏيڻ لاءِ نصاب ۾ تبديلي ڪرڻي پوندي. هن چيو ته طاقت ڏني نه پر ورتي ويندي آهي، ادارن وچ۾ ڳالهه ٻولهه ضروري آهي. اظهار جي آزادي، خوراڪ، رهائش ۽ سياسي حق به انساني حقن جو حصو آهن. هن چيو ته اڄ جي دور ۾ سڀ کان وڏو مسئلو ماحولياتي گدلاڻ آهي موسمياتي تبديلي کي سامهون رکندي فيصلا ڪرڻا پوندا.گڏيل قومن جي سيڪريٽري جنرل چيو ته پاڪستان مان پوليو جو خاتمو ڪنداسين، اسان جي پهرين ترجيح سموري دنيا مان پوليو جو خاتمو ڪرڻ آهي. دنيا جي سموري قيادت کي اپيل ڪريان ٿو ته اها گڏجي پوليو جي خاتمي لاءِ ڪردار ادا ڪري. انتونيو گوتريس چيو ته پاڪستان اچي تمام گهڻي خوشي ٿي آهي ڇاڪاڻ ته ماضي جي ڀيٽ ۾ هاڻي گهڻو محفوظ ملڪ آهي. گڏيل قومن جي سيڪريٽري جنرل دوري دوران هڪ اسڪول ۾ ٻارڙن کي پوليو جا ڦڙا پڻ پياريا جڏهن ته اسڪولي ٻارڙن روايتي لباس پهري انتونيو گوتريس جي شاندار آجيان ڪئي ۽ کيس گلدستا پڻ پيش ڪيا. گڏيل قومن جي سيڪريٽري جنرل ڪرتار پور پهچي بابا گرو نانڪ گوردوارا جو دورو پڻ ڪيو، کيس ڪرتار پور راهداري جي منصوبي بابت تفصيلي آگاهي ڏني وئي. ان موقعي تي انتونيو گوتريس امن لاءِ پاڪستان جي ڪوشش جي ساراهه ڪندي چيو ته ڪرتار پور راهداري پاڪستان جي امن دوست خواهش جو عملي ثبوت آهي.

 

 

ايف اي ٽي ايف مني لانڊرنگ، ٽيرر فنانسنگ خلاف پاڪستاني ڪوششن جو اعتراف، نالو في الحال گري لسٽ ۾ رهڻ جو امڪان

اسلام آباد (اين اين آءِ) فنانشنل ايڪشن ٽاسڪ فورس مني لانڊرنگ، ٽيرر فنانسنگ جي خلاف پاڪستاني ڪوششن جو اعتراف ڪري ورتو آهي، پاڪستان بليڪ لسٽ نه ٿيندو، نالو في الحال گري لسٽ ۾ رهڻ جو امڪان آهي، چين ملائيشيا، ترڪي سميت دوست ملڪن جي حمايت حاصل آهي، پاڪستاني وفد ايف اي ٽي ايف کي قانونسازي، ٻين قدمن بابت ڄاڻ ڏيندي ٻڌايو ته پابندي مڙهيل تنظِيمن ۽ ماڻهن خلاف عملي ڪارروائي تي ڄاڻ ڏني وئي، عملدارن ٻڌايو ته چندو گڏ ڪرڻ ۽ استعمال تي پابندي، جڏهن ته اثاثا ضبط ڪيا ويا، شڪي ٽرانزيڪشن، ڪيش ڪوريئرز، راونگي نظام جي سخت نگراني ڪئي وئي، غير قانوني دولت، ويليو ٽرانفسر سروس جي خلاف قانون سخت ڪيا ويا، غير منافعي بخش تنظيمن، مالياتي ادارن جي مڪمل جاچ پڙتال جي خاطري ڪرائي، عملدارن ٻڌايو ته ڪجهه گروپن پاران ٽِيرر فنانسنگ جي خطرن کي روڪيو، قانون لاڳو ڪندڙ ادارن وچ ۾ رابطا بهتر ٿيا.

 

 

افغان پناهگيرن جي واپسيءَ تائين عسڪريت پسندي جي خاتمي جي ضمانت نٿا ڏئي سگهون: عمران خان

اسلام آباد (اين اين آءِ) وزيراعظم عمران خان چيو آهي ته افغان مهاجرن جي واپس وڃڻ تائين عسڪريت پسندي جي ختم ٿيڻ جي ضمانت نٿي ڏئي سگهجي، اسان امن ڳالهين ۾ سهولت جي وڌ ۾ وڌ ڪوشش ڪئي آهي، معاملي تي سڄو ملڪ هڪ پچ تي آهي، پاڪستان ۾ عسڪريت پسندن جي ڪا به پناهگاهه نه آهي، افغانستان جو تڪرار اسان جي مفاد ۾ نه آهي، افغانستان ۾ انساني بنيادن تي امن چاهيون ٿا، سومر تي ملڪ ۾ 40 سالن کان رهندڙ افغان مهاجرن جي حوالي سان عالمي ڪانفرنس کي خطاب ڪندي هن چيو ته گذريل 20 سال پاڪستان جي عوام لاءِ ڏکيا رهيا پر اسان ڏکين حالتن جي باوجود لکين افغانين جي ميزباني ڪئي، عمران خان چيو ته پاڪستان افغان مهاجرن جي ميزباني جا 40 سال مڪمل ٿيڻ تي خوشي ملهائي رهيو آهي، هن چيو ته مان ائين ان ڪري چئي رهيو آهيان ڇو ته دنيا ۾ اڪثر ائين ناهي ٿيندو ته مهاجر اهڙي اعزاز سان رهن ۽ ميزبانن گذريل 20 سالن ۾ معاشي چئلينجز جي باوجود مهاجرن سان بهتر تعلق قائم رکيو هجي، وزيراعظم چيو ته هن صورتحال جو هڪ خوشگوار اثر اهو آهي ته پاڪستان ۾ ڪيترن ئي سالن کان ڪرڪيٽ ڏسڻ کانپوءِ هاڻ افغانستان جي انٽرنيشنل ٽيم به آهي. وزيراعظم عمران خان چيو آهي ته افغانستان ۾ پرامن حل لاءِ پاڪستان ۾ حڪومت ۽ سمورا ادارا گڏ آهن، اسان سمورين ڏکيائين جي باوجود لکين افغان مهاجرن جي ميزباني نه ڇڏي، افغانستان ۾ بدامني ڪنهن به طرف پاڪستان لاءِ درست ناهي، دعا آهي ته امن ڳالهيون ڪامياب ٿين، پاڪستان ۾ دهشتگردن جو هاڻ هڪ به ٺڪاڻو نه آهي، ڀارت ۾ شهريت جي تڪراري قانون سان 20 ڪروڙ مسلمانن کي نشانو بڻايو ويو آهي، گڏيل قومون ڀارت ۾ انتهاپسند قدمن جو نوٽيس وٺي، افغانستان ۾ امن ٿيندو ته علائقائي واپار وڌندو جنهن مان خطي جا سمورا ملڪ فائدو حاصل ڪندا، سومر تي هتي 40 سالن کان رهندڙ افغان مهاجرن جي حوالي سان عالمي ڪانفرنس کي خطاب ڪندي هن چيو ته افغانستان جي ٻارن پاڪستان ۾ ڪرڪيٽ سکي، افغانستان جي ڪرڪيٽ ٽيم عالمي ٽيم بڻجي وئي آهي، هن چيو ته افغانستان جو عوام امن چاهي ٿو ۽ اسان افغانستان ۾ امن چاهيون ٿا، دعا آهي ته افغانستان ۾ امن ڳالهيون ڪامياب ٿين، اسان وٽ افغان مهاجرن جون ڪيتريون ئي ڪيمپون آهن، هر هڪ کي چيڪ نٿو ڪري سگهجي، ڀارت جي موجوده صورتحال تي ڳڻتي جو اظهار ڪندي هن چيو ته اڄوڪو وزيراعظم نهرو ۽ گاندي جو نه آهي، اڄوڪو ڀارت جي آڊيالاجي نفرت تي ٻڌل آهي ۽ انتهاپسداڻي سوچ هاوي آهي، ڀارت ۾ شهريت جي تڪراري قانون سان 20 ڪروڙ مسلمانن کي نشانو بڻايو پيو وڃي، عمران خان چيو ته نازي ازم وانگر ڀارت ۾ وڌندڙ انتهاپسندي خطرناڪ آهي، گڏيل قومون ڀارت ۾ انتهاپسند قدمن جو نوٽيس وٺي، وزيراعظم چيو ته ڇا هڪ ارب جي آبادي وارو وزيراعظم ۽ آرمي چيف ايترو غير ذميواراڻو بيان ڏئي سگهي ٿو، هن چيو ته گڏيل قومن جي جنرل سيڪريٽري جو ڌيان ڀارت ڏانهن ڇڪرائڻ چاهيان ٿو، گڏيل قومن ڀارت ۾ پنهنجو ڪردار ادا نه ڪيو ته صورتحال خراب ٿي سگهي ٿي، ڀارت ۾ نفرت تي ضابطو نه ڪيو ويو ته وڏي پيماني تي رتو ڇاڻ ٿي سگهي ٿي، هن چيو ته والاريل ڪشمير ۾ مودي جي سوچ 80 لک ڪشميرين کي عذاب ۾ مبتلا ڪري ڇڏيو آهي جنهن تي گڏيل قومن سميت عالمي برادري کي پنهنجو ڪردار ادا ڪرڻ گهرجي. عمران خان چيو ته سخاوت جو بينڪ بيلنس سان ڪو به واسطو نه آهي، اسلام اسان کي اخوت ۽ انسانن کي گڏ ڪرڻ جو درس ڏئي ٿو، عمران خان چيو ته اهو منهنجو مڃڻ آهي ته گذريل 40 سالن ۾ افغانستان جو عوام ٻين ڪميونٽي جي ڀيٽ ۾ سڀ کان گهڻو متاثر ٿيو آهي، دلي دعا ڪريان ٿو ته افغانستان ۾ امن ڳالهيون ڪامياب ٿين، هن چيو ته اسان امن ڳالهين ۾ سهولت جي ڪوشش ڪئي آهي، زلمي خليل زاد ڄاڻي ٿو ته سڄو ملڪ هڪ پچ تي آهي، اسان جي سيڪيورٽي فورسز هڪ پچ تي آهي، اسان افغانستان ۾ امن چاهيون ٿا، گڏيل قومن جي جنرل سيڪريٽري جو ڌيان ڀارت ۽ والاريل ڪشمير ڏانهن ڇڪائيندو وزيراعظم عمران خان چيو ته سڄي دنيا ۾ قومپرست پارٽيون، هڪ ٻي انساني برادري کي پنهنجن مسئلن جو ذميوار قرار ڏيندي سامهون اچي رهيون آهن ۽ ڀارت ۾ مسلمانن کي نشانو بڻائيندڙ 2 قانون متعارف ڪرايا ويا جيڪي مستقبل اسان جي ملڪ لاءِ وڏي پريشاني جو سبب بڻجندا، ڇو ته هتي مهاجرن جو هڪ وڏو مسئلو موجود آهي، گڏيل قومن جي جنرل سيڪريٽري انتونيوگوتريس ڪانفرنس کي خطاب ڪندي چيو ته دنيا کي تسليم ڪرڻ گهرجي ته افغان مهاجرن لاءِ پاڪستان جي ڪوششن جي ڀيٽ ۾ پاڪستان لاءِ عالمي حمايت تمام گهٽ رهي آهي، هن چيو ته اسان ٻڌي ۽ همدردي جي ذڪر جوڳي ڪهاڻي جو اعتراف ڪرڻ لاءِ هتي گڏ ٿيا آهيون، ائين ڪرڻ اهم آهي ڇو ته هي ڪهاڻي ڏهاڪن تي ٻڌل آهي، گڏيل قومن جي جنرل سيڪريٽري چيو ته 40 سالن کان پاڪستان افغان مهاجرن لاءِ پنهنجا دروازا کولي ڇڏيا، هن چيو ته 40 سالن کان افغانستان جو عوام مسئلن جي ور چڙهيل آهي، پاڪستان ۾ افغان مهاجرن جي 40 سالن جي ميزباني جي ڳالهه ڀائراڻا لاڳاپا ۽ قرباني جي جذبن تي ٻڌل آهي، هن چيو ته 40 سالن کان افغانستان جي عوام ڪيترائي بحران ڏٺا آهن، جڏهن ته پاڪستان جي عوام انهن سان ٻڌي جو اظهار ڪيو.

 

وفاقي قانون وزارت نوان صوبا ٺاهڻ لاءِ صوبائي اسيمبلين جو ڪردار ختم ڪرڻ جي حمايت ڪري ڇڏي

اسلام آباد (ويب نيوز) وفاقي قانون وزارت نوان صوبا ٺاهڻ لاءِ صوبائي اسيمبلين جو ڪردار ختم ڪرڻ جي حمايت ڪري ڇڏي. تفصيل موجب ايم ڪيو ايم جي ميمبر ڪشور زهره قومي اسيمبلي ۾ آئين جي آرٽيڪل 239 جي شق 4 کي ختم ڪرڻ لاءِ بل جمع ڪرايو هو، جڏهن ته آئين جي شق 4 ۾ چيو ويو آهي ته آئين ۾ ترميم جو ڪو به اهڙو بل جيڪو ڪنهن به صوبي جي حدن ۾ ردوبدل يا تبديلي ڪندڙ هجي ته اهو صدر پاڪستان کي پارليامينٽ مان منظور ٿيڻ باوجود منظوري لاءِ ان وقت تائين پيش نٿو ڪري سگهجي جيستائين لاڳاپيل صوبي جي صوبائي اسيمبلي مان ڪل ميمبرن جي ٻه ڀاڱي 3 اڪثريت سان اهڙو ترميمي بل منظور نه ڪيو وڃي، ايم ڪيو ايم جي ان بل تي قومي اسيمبلي جي قانون انصاف واري ڪاميٽي پاران قانون جي وزارت کان راءِ گهري وئي هئي، ڪاميٽي جي ذريعن ميڊياکي ٻڌايو آهي ته قانون وزارت لکت ۾ جواب ڪاميٽي کي اماڻي ڇڏيو آهي، جنهن ۾ قانون واري وزارت چيو آهي ته ڪشور زهره آئين جي آرٽيڪل 239 جي شق 4 کي ختم ڪرڻ جو هي بل جمع ڪرايو آهي جنهن تحت ڪنهن به صوبي جي حدن ۾ تبديلي ڪرڻ جو بل صدر کي منظوري لاءِ تيستائين نٿو اماڻي سگهجي جيستائين لاڳاپيل صوبائي اسيمبلي 2 ڀاڱي 3 جي اڪثريت سان منظوري نه ڏي، قانون وزارت جواب ۾ وڌيڪ لکيو ته انهي ترميمي بل جي عوامي اهميت ۽ سياسي نتيجا رکندڙ آهي، ان ڪري ان بل جي قانون وزارت هن اسٽيج تي مخالفت نٿي ڪري، پر انهي بل جي منظوري ٻه ڀاڱي 3 جي اڪثريت سان ئي ٻنهي ايوانن مان ملي سگهي ٿي، قانون وزارت ان بل بابت بين الصوبائي رابطن واري وزارت ذريعي صوبن کان به راءِ طلب ڪئي جنهن تي بلوچستان حڪومت بل کي صوبائي ڪابينا جي اجلاس ۾ غور هيٺ آندو، ۽ ان بعد بلوچستان حڪومت متفقه طور تي ان بل جي سخت مخالفت ڪرڻ وارو موقف لکت ۾ وفاقي حڪومت کي اماڻي ڇڏيو ، جڏهن ته باقي ٽن صوبن پاران اڃا تائين انهي حوالي سان جواب نه اماڻيا ويا آهن، ياد رهي ته بل ايم ڪيو ايم جي ميمبر ڪشور زهره پهرين آڪٽوبر 2019ع تي قومي اسيمبلي ۾ پيش ڪيو هو جنهن کي قومي اسيمبلي وڌيڪ غور لاءِ قانون انصاف ڪميٽي حوالي ڪري ڇڏيو هو، بل تي غور لاءِ 7 فيبروري تي قومي اسيمبلي جي قانون انصاف ڪاميٽي جو اجلاس طلب ڪيو ويو هو، پر اهو اجلاس اوچتو ملتوي ٿي ويو هو.

 

دنيا تسليم ڪري ته پاڪستان کي عالمي سهڪار تمام گهٽ رهيو آهي: انتونيو گوتريس

اسلام آباد (ويب ڊيسڪ) گڏيل قومن جي سيڪريٽري جنرل انتونيو گوتريس چيو آهي دنيا کي تسليم ڪرڻ گهرجي ته افغان پناهگيرن لاءِ پاڪستان جي ڪوششن جي ڀيٽ ۾ پاڪستان کي عالمي حمايت تمام گهٽ رهي آهي. اسلام آباد ۾ افغان پناهگيرن بابت ڪانفرنس کي خطاب ڪندي انتونيو گوتريس چيو ته اسان يڪجهتي ۽ همدردي جي ذڪر جوڳي ڪهاڻي جو اعتراف ڪرڻ لاءِ هتي گڏ ٿيا آهيون، ائين ڪرڻ اهم آهي ڇو ته اها ڪهاڻي ڪيترن ئي ڏهاڪن تي ٻڌل آهي، 40 سالن کان پاڪستان افغان پناهگيرن لاءِ پنهنجا دَر کليل رکيا. هن چيو ته 40 سالن کان افغان عوام ڏکيائين جو شڪار آهي، پاڪستان ۾ افغان پناهگيرن جي 40 سال ميزباني جي ڪهاڻي ڀائراڻن لاڳاپن ۽ قرباني جي جذبن تي ٻڌل آهي، 40 سالن کان افغانستان جي عوام ڪيترن ئي بحرانن کي منهن ڏنو، جڏهن ته ڪيترن ئي سالن کان پاڪستاني عوام انهن سان يڪجهتي جو اظهار ڪيو، اها سخاوت هاڻ ڏهاڪن ۽ نسلن تي ٻڌل آهي، جيڪا دنيا جي تاريخ ۾ پناهگيرن جي سڀ کان ڊگهي عرصي تائين جاري رهڻ واري آهي. سندس چوڻ هو ته اها ڪهاڻي منهنجي دل جي به گهڻي ويجهو آهي، جڏهن مان گڏيل قومن جي انساني حقن بابت ڪمشنر جي عهدي تي هيس، ان عرصي دوران پاڪستان گهڻي قدر پناهگيرن جي ميزباني ڪندڙ ملڪن ۾ پهرين نمبر تي هو، 1979 کان وٺي هر چئن سان ٽي سال پاڪستان يا ايران پناهگيرن جي ميزباني ڪندڙ سڀ کان وڏن ملڪن ۾ شمار ٿيندا رهيا، دنيا جي ٻين حصن ۾ وڏا تڪرار سامهون آيا آهن ۽ پناهگيرن جي آبادي ۾ واڌ ٿي آهي پر پاڪستان اڄ به پناهگيرن جي ميزباني ڪندڙ دنيا جو ٻيو ڏو ملڪ آهي. انتونيو گوتريس چيو ته افغانستان جي عوام کي امن، خوشحالي ۽ انساني حقن جي احترام جي ضرورت آهي ۽ اهو سندن حق آهي، جڏهن ته اسان کي اهو تسليم ڪرڻ گهرجي ته پاڪستان جي قومي ڪوششن جي ڀيٽ ۾ پاڪستان لاءِ عالمي سهڪار تمام گهٽ رهيو آهي، اسان کي افغان پناهگيرن جي ميزباني ۾ پاڪستان سان گڏ ڪم ڪرڻ تي فخر آهي.

 

سول سروسز ۾ سڌارا اڌ صدي کان مدي خارج نظام ۾ تبديلي ۽ نئين روشن مستقبل لاءِ اهم سنگ ميل ثابت ٿيندا: فردوس عاشق اعواڻ

اسلام آباد (اين اين آءِ) وزيراعظم جي سڌ سماءَ جي خاص مددگار فردوس عاشق اعواڻ چيو آهي ته سول سروسز ۾ سڌارا اڌ صدي کان مدي خارج نظام ۾ تبديلي ۽ نئين روشن مستقبل لاءِ اهم سنگ ميل ثابت ٿيندا، ترقي جا معيار تبديل ڪيا ويا، ٽوئيٽر تي بيان ۾ هن چيو ته ماڻهن جي راضپي يا ڪنهن سياسي خاندان جي خدمت ڪرڻ ترقي جو معيار نه بڻجندي، فردوس عاشق اعواڻ چيو ته ترقي جو معيار محنت، صلاحيت، عوامي خدمت ۽ عوام جي مسئلن جي حل سان ڳنڍيو ويو آهي، هن چيو ته آفيسرن جي ترقي هاڻ انهن جي ڪارڪردگي ۽ عوامي رليف سان لاڳاپيل آهي، وزيراعظم عمران خان تحريڪ انصاف جي منشور تحت سول سروسز ۾ سڌارا آڻڻ جو واعدو پورو ڪيو آهي، هن چيو ته آفيسر شاهي اندر جزا ۽ سزا جو نظام آڻڻ جو قوم سان ڪيل واعدو پورو ٿي ويو آهي، هن چيو ته جيڪو ڪارڪردگي ڏيکاريندو ان کي ميرٽ تي پروموشن ڏنو ويندو ۽ سپورٽ ڪيو ويندو، هن چيو ته پروموشن ۾ وڃڻ کان اڳ ان جي ڪارڪردگي جو جائزو ورتو ويندو، هن چيو ته 20 سال سروس جو هڪ بينچ مارڪ بڻايو ويو آهي، ان عرصي کانپوءِ سرڪاري ملازم جي ڪارڪردگي جو جائزو ورتو ويندو، ڪيترائي سول سروينٽس ترقي حاصل ڪري سگهندا، هن چيو ته سول سرونٽ ايڪٽ 1973 جي سيڪشن 13 تحت هي تبديليون ڪيون ويون آهن.

 

افغان مهاجرن جي وطني واپسي لاءِ افغانستان ۾ جٽادار امن بنيادي شرط آهي: شاهه محمود قريشي

اسلام آباد (اين اين آءِ) پرڏيهي وزير شاهه محمود قريشي چيو آهي ته افغان مهاجرن جي وطني واپسي لاءِ افغانستان ۾ جٽادار امن بنيادي شرط آهي، پاڪستان ۽ افغانستان جو تعلق گڏيل مذهب، ثقافت ۽ قدرن تي قائم آهي، افغان مهاجرن جي وطن واپسي سان پاڪستان معاشري ۾ بحالي لاءِ عالمي سهڪار جي سخت ضرورت آهي، افغان مهاجرن کي بينڪ اڪائونٽ کولڻ جي اجازت ڏيڻ جو تازو قدم فائديمند آهي، جنهن سان ان جي معاشي هم آهنگي ۾ مدد ملندي، سومر تي پاڪستان ۾ چاليهه سالن کان رهندڙ افغان مهاجرن جي حوالي سان عالمي ڪانفرنس کي خطاب ڪندي هن چيو ته افغان مهاجرن جي وطن واپسي لاءِ افغانستان ۾ جٽادار امن بنيادي شرط آهي، هن چيو ته پاڪستان 40 سالن کان 30 لک رجسٽرڊ ۽ اڻ رجسٽرڊ مهاجرن جي ميزباني ڪري رهيو آهي، هن چيو ته افغان مهاجرن کي هن سال به ڪانفرنس مان ڪيتريون ئي اميدون آهن، هن چيو ته پاڪستان ۽ افغانستان جو تعلق گڏيل مذهب، قدرن ۽ ثقافت تي قائم آهي، پرڏيهي وزير چيو ته پاڪستان، افغان امن عمل جي حمايت جاري رکندو، هن چيو ته پاڪستان 22 سالن جي ڊگهي عرصي تانئين افغان مهاجرن جو سڀ کان وڏو ميزبان رهيو آهي، افغان مهاجرن کي بينڪ اڪائونٽ کولڻ جي اجازت ڏيڻ جو تازو قدم فائديمند آهي.

 

حڪومت احسان الله احسان جي فرار ٿيڻ جي تصديق ڪري ڇڏي

اسلام آباد (اين اين آءِ) گهرو وزير اعجاز شاهه احسان الله احسان جي فرار ٿيڻ جي خبر جي تصديق ڪري ڇڏي آهي، وفاقي وزير چيو ته ان بابت رياست باخبر آهي ان تي ڪم ٿي رهيو آهي، جلد سٺي خبر ملندي، غير قانوني سوسائٽين کي بلڪل ختم ڪرڻ گهرجي، صحافين سان ڳالهائيندي گهرو وزير احسان الله احسان جي فرار ٿيڻ جي خبر جي تصديق ڪري ڇڏي، هن چيو ته ان کان رياست باخبر آهي، ان تي ڪم ٿي رهيو آهي، معاشري کي بهتر بڻائڻ لاءِ پيسا خرچ نه پيا ڪريون، هر شيءِ کي پاڪستان پينل ڪوڊ ۾ وجهي سوسائٽي نٿي هلي، گهرو وزير چيو ته اسان جي معاشري ۾ اهڙو نظام نٿو اچي سگهي جو گهر ۾ ماءُ پٽ کي مار ڏئي ته پوليس اچي وڃي، هن چيو ته اسان کي اخلاقي سپورٽ معاشري جي ڪرڻي آهي، هن چيو ته غير قانوني سوسائٽين کي ختم ڪرڻ گهرجي، انهن غير قانوني سوسائٽين جو هڪو پاڻي بند ڪرڻ گهرجي، هن چيو ته جن جون قانوني سوسائٽيون آهن انهن کي گيس، پاڻي، بجلي انهن غير قانوني سوسائٽين جي ڪري نه پيو ملي، هن چيو ته نئين ايئرپورٽ وٽ جيتريون سوسائٽيون ٺهيون ان سان گڏ ڪچيون آباديون ٺهي رهيون آهن، هن چيو ته پاسپورٽ آفيسون سمورن ضلعن ۾ ٺاهيون ويون آهن، مون سفارش ڪئي آهي ته جنهن تعلقي جي آبادي 10 لک کان وڌيڪ هجي اتي پاسپورٽ آفيس ٺاهي وڃي، هن چيو ته بنگلاديش جي ٽيم آئي ته مان گهر کان نه نڪري سگهيس، ڇو ته ميرٽ ۾ ٽيم ترسيل هئي، گهرو وزير چيو ته مان سموري انتظاميا کي گهرايو ته رستا ڇو بند آهن، گهرو وزير چيو ته پوليس، انتظاميا فوج تي سموري ذميواري وجهي ڇڏي، گهرو وزير چيو ته مان پي سي بي جي چيئرمين کي فون ڪري چيو ته هاڻ جيڪڏهن ڪا ٽيم آئي ۽ ميرٽ ۾ ترسايو ويو ته ڪا به سيڪيورٽي نه ملندي، گهرو وزير چيو ته مون کي چيو ويو ته پي ايس ايل جي سمورن رانديگرن کي اسٽيٽ گيسٽ جو درجو ڏيو.