تازيون خبرون
هڪ سال ۾ پيٽروليم شين جي مد ۾ 206 ارب 28 ڪروڙ ٽئڪس اوڳاڙيو ويو: وفاقي سرڪار جو اعتراف - وزيراعظم چيف سيڪريٽري ۽ آئي جي سنڌ ذريعي متبادل نظام هلائڻ چاهي ٿو، ائين ٿيڻ نه ڏينداسين: سنڌ سرڪار - جسٽس (ر) الطاف ابراهيم قريشي وقتي چيف اليڪشن ڪمشنر ٿي ويو - ايشيائي ترقياتي بئنڪ پاڪستان لاءِ هڪ ارب 30 ڪروڙ ڊالرز جو قرض منظور ڪري ورتو - حڪومت جو ڪم واپار جي رستي ۾ آيل رنڊڪن کي ختم ڪري آسانيون پيدا ڪرڻ آهي: عمران خان - وزير اعظم ملڪ کي مضبوط ڪرڻ چاهي ٿو پر مخالف ڌر ڌيان هٽائڻ چاهي ٿي: فردوس عاشق - ملڪ رياض جي وارثن ۽ برطانوي حڪومت وچ ۾ نبيري مان مليل رقم سماجي بهبود لاءِ استعمال ڪئي ويندي: شهزاد اڪبر - وڏي وزير جي صدارت ۾ پبلڪ سيفٽي ڪميشن جو اجلاس، آءِ جي سنڌ جي عدم شرڪت تي ڪاوڙ جو اظهار، ٺهراءُ منظور - ڪراچي مان اغوا ٿيل دعا منگي بازياب نه ٿي، سنڌ جي مختلف شهرن ۾ احتجاجي مظاهرا، ريليون - اسلام ڪوٽ: مسافر ڪوچ موٽر سائيڪل کي بچائيندي ڪلٽي، واٽھڙو فوت، 3 عورتن سميت 7 ڄڻا زخمي

Category Archives: پاڪستان

هڪ سال ۾ پيٽروليم شين جي مد ۾ 206 ارب 28 ڪروڙ ٽئڪس اوڳاڙيو ويو: وفاقي سرڪار جو اعتراف

اسلا آباد (م.ڊ) وفاقي سرڪار اعتراف ڪيو آهي ته هڪ سال ۾ رڳو پيٽروليم شين ۾ ٽئڪسز جي مد ۾ عوام جي کيسي مان 206 ارب 28 ڪروڙ رُپيا ڪڍيا ويا آهن. قومي اسيمبلي جي اجلاس ۾ سوال جوابن جي وقفي دوران حڪومت طرفان پيٽرول جي اگهن جي حوالي سان جواب ڏنو ويو. جنهن ۾ حڪومت اعتراف ڪيو آهي ته حڪومت هڪ سال دوران پيٽروليم شين ۾ ٽئڪسز جي مد ۾ 206 ارب 28 ڪروڙ رُپيا عوام جي کيسي مان ڪڍي ورتا. پيٽروليم کاتي جي وفاقي وزير عمر ايوب طرفان جواب ۾ چيو ويو آهي ته حڪومت ڊيزل تي في لٽر 45 رُپيا 75 پئسا جي حساب سان عوام کان ٽئڪس اوڳاڙي رهي آهي، جڏهن ته پيٽرول تي 35 رُپيا، گاسليٽ تي 20 رُپيا ۽ لائيٽ ڊيزل تي 14 رُپيا 98 پئسا في لٽر جي حساب سان ٽئڪس اوڳاڙيو پيو وڃي. قومي اسيمبلي ۾ لکت ۾ جمع ڪرايل جواب ۾ چيو ويو آهي ته گذريل هڪ سال دوران تيل جي اگهن ۾ 17 ڀيرا تبديلي ڪئي وئي، پيٽروليم شين جي اگهن ۾ 6 ڀيرا اضافو ۽ 11 ڀيرا گهٽتائي ڪئي وڳئي آهي. جواب ۾ عالمي سطح تي تيل سستو ٿيڻ واري ڳالهه کي رد ڪيو ويو ۽ حڪومت چيو آهي ته اهو چوڻ صحيح نه آهي ته عالمي مارڪيٽ ۾ تيل سستو ٿيڻ باوجود پاڪستان ۾ مهانگو ڪيو پيو وڃي، عالمي منڊي ۾ تيل جي اگهن ۾ ڪڏهن گهٽتائي ۽ ڪڏهن اضافو ٿيندو آهي.

 

جسٽس (ر) الطاف ابراهيم قريشي وقتي چيف اليڪشن ڪمشنر ٿي ويو

اسلام آباد (بيورو رپورٽ) جسٽس (ر) الطاف ابراهيم قريشي وقتي چيف اليڪشن ڪمشنر جي حيثيت ۾ حلف کڻي ورتو، سردار رضا محمد خان 6 ڊسمبر 2014 تي پنهنجي عهدي جو حلف کنيو هو، ان جو ملازمت وارو مدو اڄ پورو ٿي ويو آهي، سردار رضا محمد خان جي رٽائر ٿيڻ کانپوءِ اليڪشن ڪميشن پنجاب جي سينيئر ميمبر جسٽس الطاف ابراهيم قريشي وقتي چيف اليڪشن ڪمشنر جي عهدي جو حلف کڻي ورتو آهي، چيف اليڪشن ڪمشنر جي معاملي تي حڪومت ۽ اپوزيشن اڃان تائين هڪ نالي تي اتفاق نه ڪري سگهيون آهن ۽ اپوزيشن چيف اليڪشن ڪمشنر جي مقرري وارو معاملو سپريم ڪورٽ ۾ به کڻي وئي آهي. ان کانسواءِ اليڪشن ڪميشن جي ٻن ميمبرز جي مقرري جي حوالي سان به حڪومت ۽ اپوزيشن جي وچ ۾ اتفاق ٿيڻ رهيل آهي.

 

ايشيائي ترقياتي بئنڪ پاڪستان لاءِ هڪ ارب 30 ڪروڙ ڊالرز جو قرض منظور ڪري ورتو

ڪراچي (ڊيسڪ رپورٽ) ايشيائي ترقياتي بئنڪ پاڪستان لاءِ هڪ ارب 30 ڪروڙ ڊالرز جو قرض منظور ڪري ورتو آهي. ايشيائي ترقياتي بئنڪ جي پڌرائي موجب بورڊ آف ڊائريڪٽرز جي اجلاس ۾ پاڪستان لاءِ قرض جي منظوري ڏني وئي، هاڻي پاڪستان کي خصوصي بُنيادن تي قرض جي رقم فوري مهيا ڪئي ويندي. بيان ۾ چيو ويو آهي ته 2018ع جي وچ واري عرصي ۾ پيدا ٿيل مالي خرابين جي استحڪام لاءِ پاڪستان کي قرض جاري ڪيو پيو وڃي، پاليسي بيس قرض آءِ ايم ايف جي سربراهي ۾ ملٽي ڊونر ريفارم پروگرام جو حصو آهي، پاڪستان جي معيشت کي بحال ڪيو ويو آهي ۽ اُن کي هڪ ارب ڊالرز فنانسنگ جي ضرورت آهي، جڏهن ته 30 ڪروڙ ڊالرز توانائي جي شعبي ۾ گردشي قرض جي ادائگي لاءِ ڏنا ويندا.

 

حڪومت جو ڪم واپار جي رستي ۾ آيل رنڊڪن کي ختم ڪري آسانيون پيدا ڪرڻ آهي: عمران خان

اسلام آباد(ويب ڊيسڪ) وزير اعظم عمران خان ڪامياب نوجوان پروگرام ۾ عورتن جي وڏي انگ ۾ شرڪت کي ساراهيندي چيو آهي ته حڪومت جو ڪم واپار جي رستي ۾ آيل رنڊڪن کي ختم ڪري آسانيون پيدا ڪرڻ آهي. اسلام آباد ۾ ڪامياب جوان پروگرام جي تحت چيڪ ورهائڻ واري تقريب کي خطاب شروع ڪرڻ کان اڳ وزير اعظم چيو ته نوجوان چون ٿا ته ٻڌو آهي عمران خان ڪرپٽ ماڻهن سان هٿ ناهي ملائيندو. وزير اعظم عمران خان چيو ته ان پروگرام ۾ سڀ کان وڌيڪ خيال رکڻو آهي ته ان پروگرام ۾ شفافيت هجي ۽ چيڪ ميرٽ تي ورهائجن ڇو ته ماڻهن کي اميد آهي ته حڪومت انهن جي واپار ۾ سهڪار ڪندي. سندس چوڻ هو ته 15 يا 20 ڏينهن ۾ لڳ ڀڳ 10 لک ماڻهن قرض جي لاءِ رابطو ڪيو ان ڪري ماڻهن کي اميد آهي ۽ مون کي خوشي آهي ته عورتن ان ۾ پوري طرح شرڪت ڪئي. وزير اعظم چيو ته هن وقت تائين هڪ لک 90 هزار عورتن پنهنجي واپار جي منصوبن جي خاطر قرض جي لاءِ درخواست ڏني. هن چيو ته ان پروگرام جي سڀ کان وڏي ڳالهه اِها آهي ته حڪومت ننڍي ۽ وچولي درجي جي واپار کي سهولت ڏئي رهيو آهي، حڪومت جو ڪم واپار جي رستي ۾ ايندڙ رنڊڪن کي ختم ڪرڻ آهي. ڪامياب نوجوان جي حوالي سان رٿيل تقريب کي خطاب ڪندي چيو ته آئون جڏهن پهريون ڀيرو برطانيا ويس ته مانچسٽر جي سڄي ٽيڪسٽائل صنعت يهودين وٽ هئي پر هتان ماڻهو ويا جن مزدوري به ڪئي ۽ ننڍي واپار وارا به ويا ۽ منهنجي ڏسندي ڏسندي 10 سالن ۾ مانچسٽر ۾ ٽيڪسٽائل جو واپار پاڪستان جي هٿ ۾ اچي ويو. سندس چوڻ هو ته ڪپهه پاڻ پاڪستان جي پيدوار آهي ۽ ان جي باوجود ڪهڙا سبب آهن جو هو پاڪستان ۾ پنهنجو واپار شروع نٿي ڪري سگهي، حالانڪ اسان کي وڌيڪ آسان هئڻ گهرجي. عمران خان چيو ته ڪامياب معاشرن ۽ جيڪي پوئتي رهجي ويندا آهن انهن معاشرن ۾ فرق اِهو ئي آهي ته ڪامياب معاشرن ۾ ميرٽ هوندي آهي ۽ واپار شروع ڪرڻ جي لاءِ موقعا ۽ سهولتون ڏيندا آهن ۽ پوءِ جنهن نوجوان جي اندر جنون ۽ محنت ڪرڻ جو جذبو هوندو آهي اُهي ان معاشري ۾ مٿي هليو ويندو آهي. هن چيو ته هي ڪو معاشري ۾ ڪامياب ناهي ٿي سگهندو پر جنهن ۾ محنت ڪرڻ جي صلاحيت هوندي آهي اُهي ڪامياب ٿيندا آهن ۽ ان کي ميرٽ چئبو آهي. سندس چوڻ هو ته هميشه اُهو ملڪ اڳتي وڌندو آهي جنهن جو ميرٽ جو نظام بهتر هوندو آهي جتي نظام ۽ ادارا اهڙا هوندا آهن جيڪي انملڪ جي يرٽ کي اڳتي کڻي ويندا آهن. وزير اعظم عمران خان چيو ته ميرٽ جو پهريون قدم اِهو آهي ته هڪ آن لائن جي نظام جنهن ۾ ڪا به سفارش ناهي هلندي جيڪا به ڪواليفاءِ ڪندو جنهن طرح اڄ ماڻهن کي قرض ڏنا ويا آهن اِها وڏي ڪاميابي آهي. هن چيو ته ٻي ڪوشش اسان کي اِها ڪرڻي آهي ته واپار جي لاءِ آسانيون پيدا ڪيون ۽ سڀ کان وڌيڪ ننڍي ۽ وچولي درجي کي آسانيون پيدا ڪرڻيون آهن ڇو ته انهن کي وڌيڪ ضرورت پوندي آهي، وڏي واپار وٽ وسيلا هوندا آهن اُهي وري رنڊڪون ختم ڪري سگهن ٿا. پروگرام تي ڳالهائيندي هن چيو ته اسان جو قرض ڏيڻ جو اِهو پروگرام نوجوانن جي لاءِ آهي پر ان کان ننڍي ۽ وچولي درجي جا واپاري به فائدو کڻندا

 

وزير اعظم ملڪ کي مضبوط ڪرڻ چاهي ٿو پر مخالف ڌر ڌيان هٽائڻ چاهي ٿي: فردوس عاشق

اسلام آباد(ويب ڊيسڪ) وزير اعظم عمران خان جي سڌُ سماءَ ۽ نشريات بابت خاص مددگار فردوس عاشق اعواڻ جو چوڻ آهي ته وزير اعظم ملڪ کي مضبوط ڪرڻ چاهي ٿو پر مخالف ڌر ڌيان هٽائڻ چاهي ٿي. ميڊيا سان ڳالهائيندي فردوس عاشق اعواڻ جو چوڻ هو ته مخالف ڌر کي جمهوري ۽ آئيني طريقي سان کڻي هلي رهيو آهي پر مخالف ڌر جي ارمانن مان هڪ ارمان وزير اعظم کي مائنس ڪرڻ آهي، وزير اعظم ملڪ کي مضبوط ڪرڻ چاهي ٿو ۽ مخالف ڌر ڌيان هٽائڻ چاهي ٿي، مخالف ڌر پنهنجا هٿيار ۽ اوزار ايندڙ چار سالن لاءِ پنهنجي کيسي ۾ رکن، مخالف ڌر پارليماني ڪردار ادا ڪندي ته حڪومت تي احسان ڪو نه ٿيندو.

 

ملڪ رياض جي وارثن ۽ برطانوي حڪومت وچ ۾ نبيري مان مليل رقم سماجي بهبود لاءِ استعمال ڪئي ويندي: شهزاد اڪبر

اسلام آباد(ويب ڊيسڪ) وزير اعظم جي احتساب بابت خاص مددگار شهزاد اڪبر ملڪ رياض جي وارثن ۽ برطانوي حڪومت جي وچ ۾ نبيري مان مليل 19 ڪروڙ پائونڊ تي واضح ڪيو آهي ته ان رقم کي وفاقي حڪومت سماجي بهبود لاءِ استعمال ڪندي. سندس چوڻ هو ته نبيري واري معاهدي ۾ ون هائيڊ پارڪ جي وڪري ۽ ان مان حاصل ٿيل رقم اسٽيٽ بينڪ آف پاڪستان ڏانهن منتقل ڪرڻ به شامل آهي، اِها رقم سپريم ڪورٽ آف پاڪستان جي نيشنل بينڪ اڪائونٽ ۾ منتقل ڪئي وئي. شهزاد اڪبر جو چوڻ هو ته وفاقي حڪومت سماجي بهبود ۽ غريبن تي خرچ ڪرڻ لاءِ ان رقم کي حاصل ڪرڻ لاءِ سپريم ڪورٽ ۾ درخواست ڏني آهي. واضح رهي ته اڱاري تي برطانيا جي نشنل ڪرائم ايجنسي (اين سي اي) پراپرٽي ٽائيڪون ملڪ رياض جي وارثن سان هڪ سول نبيري تي راضي ٿي هئي. اين سي اي 19 ڪروڙ پائونڊ جي نبيري واري آڇ قبول ڪئي هئي، جنهن ۾ لڳ ڀڳ 5 ڪروڙ پائونڊ ماليت جي هڪ برطانيا جي ملڪيت (ون هائيڊ پار پليس لنڊن، ڊبليو 22 ايل ايچ) ۽ منجمد ڪيل 9 اڪائونٽن ۾ موجود سمورا فنڊ شامل هئا. ان حوالي سان هڪ باضابطا بيان ۾ ايجنسي طرفان چيو ويو هو ته فنڊ پاڪستان جي حوالي ڪيا ويندا. ان سموري معاملي کان پوءِ اِها سوال سامهون اچي رهيا هئا ته نبيري مان حاصل رقم ملڪ رياض جي ان ڏنڊ لاءِ استعمال ڪئي ويندي جيڪو سپريم ڪورٽ هن تي هنيو آهي. پر انهن سوالن جي اٿڻ تي وزير جي احتساب بابت خاص مددگار وضاحت ڏئي ڇڏي. سماجي رابطن واري ويب سائيٽ ٽوئيٽر تي پنهنجي ٽوئيٽس ۾ هن چيو ته ان معاملي تي ڪيل معاهدي ۽ ان جي پيچيدگين تي ڪو به تبصرو نه ڪرڻ جي ڳالهه کي ورجائيندي لکيو ته حڪومت پاڪستان ان معاملي تي ان کان وڌيڪ اڳتي وڃڻ جھي لاءِ هڪ رازداري جي معاهدي تي صحيح ڪئي آهي. پر هن اِهو به چيو ته حڪومت ان وقت اهڙن وڌيڪ معاملن ۾ ٻين حڪومتن سان رابطي ۾ آهي ۽ لکين ڊالر ماليت جي وڌيڪ وصولي جو امڪان آهي. حڪومت سول ڪيسز ۾ معاهدن تي حوصلا افزائي ڪندي.

 

جيلن ۾ رکڻ جو شوق ناهي، قوم جو لٽيل پئسو واپس ڪريو: وفاقي سرڪار

اسلام آباد (م.ڊ) وزيراعظم جي خصوصي معاون شهزاد اڪبر چيو آهي ته شهباز شريف جي اثاثن ۾ 10 سالن دوران 70 سيڪڙو اضافو ٿيو، قوم جو لٽيل پئسو واپس ڪريو، اسان کي جيلن ۾ رکڻ جو شوق نه آهي.  اسلام آباد ۾ وفاقي وزير مراد سعيد سان گڏ پريس ڪانفرنس ڪندي وزيراعظم جي خصوصي معاون چيو ته شهباز شريف طرفان لنڊن ۾ ڪيل نيوز ڪانفرنس ٺُس ٿي وئي، هڪ هن پائي جي ڪرپشن ثابت ڪرڻ جي ڳالهه ڪئي آهي، پر هتي ته اربين رُپين جي ڪرپشن ٿي آهي. شهزاد اڪبر چيو ته نيب جي جاچ موجب شهباز شريف جي اثاثن ۾ 10 سال دوران 70 سيڪڙو اضافو ٿيو آهي، سلمان شهباز جي اثاثن ۾ هڪ هزار ڀيرا اضافو ٿيو ۽ حمزه شهباز جي اثاثن ۾ ته هوش خطا ڪندڙ اضافو ٿيو آهي. سلمان شهباز ڀاڳيلو آهي ۽ سندس ملڪيتون ضبط ڪرڻ وارو عمل شروع ٿي چڪو آهي. احتساب بابت وزيراعظم جي خصوصي معاون شهزاد اڪبر جو چوڻ هو ته جعلي ٽي ٽيز ذريعي معصوم ماڻهن جي نالن تي ٻاهران پئسا آيا ۽ 32 ڪمپنيز ٺاهيون ويون، ڪاغذي ڪمپنين ذريعي اهو ثابت ڪرڻ جي ڪوشش ڪئي وئي ته سڀ ڪجهه ڊڪليئر ٿيل آهي. هُڻ چيو ته ايندڙ ڏينهن ۾ مختلف ڪمپنيز جا ڪارناما به بيان ڪندو. جعيل ٽي ٽيز ذريعي 32-32 جعلي ڪمپنيز ٺاهيون ويون، اهو ڪاروبار 200 کان وڌيڪ ٽي ٽيز جي رقم مان شروع ڪيو ويو. پريس ڪانفرنس دوران شهزاد اڪبر چيو ته ملڪ جو لُٽيل ناڻو واپس ڪريو، اسان کي ماڻهن کي جيلن ۾ رکڻ جو ڪوبه شوق نه آهي، شهباز شريف وڏيون دعوائون ڪيون ته پنجاب ۾ ڪرپشن جا الزام لڳائڻ تي ڊيلي ميل خلاف عدالت ۾ ويندو، هُو عدالت ته ويو ئي ڪونه، پر ڊيلي ميل جي رپورٽ جو جواب به اڃا تائين نه ڏنو آهي.

 

وفاقي حڪومت کي 10 ڏينهن ۾ اليڪشن ڪميشن جي ميمبرن جي مقرري هدايت

اسلام آباد (م.ڊ) اسلام آباد هاءِ ڪورٽ اليڪشن ڪميشن جي ميمبرز جي مقرري وارو معاملو ڏهه ڏينهن ۾ حل ڪرڻ جي هدايت ڪندي چيو آهي ته اسان پارليامينٽ کي مضبوط ڏيڻ گهرون ٿا ۽ اهو ڪم توهان کي ڪرڻو آهي، چيف اليڪشن ڪمشنر جو عهدو انتهائي اهم آهي، حڪومت ۽ اپوزيشن کي گڏجي معاملو حل ڪرڻ گهرجي. اسلام آباد هاءِ ڪورٽ ۾ اليڪشن ڪميشن جي ٻن ميمبرز جي مقرري نه ٿيڻ خلاف درخواست تي ٻڌڻي ٿي، جنهن دوران عدالت حڪومت کي اليڪشن ڪميشن جي ٻن ميمبرز جي مقرري وارو معاملو 10 ڏينهن ۾ حل ڪرڻ جي هدايت ڪري ڇڏي. درخواست تي ٻڌڻي چيف جسٽس اطهر من الله ڪئي ۽ وفاق طرفان ايڊيشنل اٽارني جنرل طارق کوکر پيش ٿيو. ٻڌڻيءَ دوران وفاقي سرڪار ميمبرز جي مقرري وارو مامرو حل ڪرڻ لاءِ وڌيڪ مهلت جي استدعا ڪئي، ايڊيشنل اٽارني جنرل چيو ته گذريل ڏينهن پارلياماني ڪميٽي جو ستون اجلاس ٿيو، معاملو حل ڪرڻ لاءِ وڌيڪ وقت ڏنو وڃي. چيف جسٽس اطهر من الله ريمارڪس ڏيندي چيو ته قومي اسيمبلي جي اسپيڪر ۽ سينيٽ چيئرمين جي ڪوششن کي ساراهيون ٿا، حڪومت ۽ اپوزيشن جي ڪوششن جو به قدر ڪريون ٿا. عدالت ن ليگ اڳواڻ ۽ درخواستگذار محسن شاهه رانجهان کان پڇيو ته ڇا توهان سُپريم ڪورٽ ۾ ڪا پٽيشن داخل ڪرائي آهي ڇا؟ سمجهه ۾ نٿو اچي ته جڏهن معاملا حل ٿيڻ وڃي رهيا آهن ته توهان عدالت ڇو آيا؟ توهان اهڙا مامرا عدالت ۾ ڇو آڻيندا آهيو، سمجهه ۾ نٿو اچي. چيف جسٽس درخواستگذار سان مخاطب ٿيندي ريمارڪس ڏنا ته سڀ ڪجهه توهان وٽ آهي، چونڊيل نمائندا آهيو، پاڻ معاملا حل ڪيو، مون کي سمجهه ۾ نٿو اچي ته پارليامينٽ جا معاملا عدالت ۾ ڇو آڻي رهيا آهيو؟ توهان کي اسان وٽ نه اچڻ گهرجي، بلڪه سمورا اختلاف پارليامينٽ ۾ حل ڪريو، هر ميمبر کي گهرجي ته ڪوشش ڪري عدالت بدران پارليامينٽ ۾ ئي معاملو حل ڪري. چيف جسٽس اطهر من الله نواز ليگ اڳواڻ محسن شاهه نواز رانجها سان مخاطب ٿيندي چيو ته اسان پارليامينٽ کي مضبوط ڏيڻ گهرون ٿا ۽ اهو ڪم توهان کي ڪرڻو آهي، چيف اليڪشن ڪمشنر جو عهدو انتهائي اهم آهي، حڪومت ۽ اپوزيشن کي گڏجي معاملو حل ڪرڻ گهرجي. هتي ماضي ۾ ڪجهه شيون ٺيڪ نه ٿيون آهن، اسان جي نظر ۾ آهي، توهان کي پارليامينٽ ۾ وڏا وڏا اشوز حل ڪرڻي آهن، هي ته رڳو ٻن ميمبرز جي مقرري جو معاملو آهي. چيف جسٽس اطهر من الله پنهنجي ريمارڪس ۾ چيو ته نيلسن منڊيلا 24 سال قيد ڪاٽڻ باوجود پنهنجي مخالفن کي معاف ڪري ڇڏيو هو. محسن شاهه نواز رانجها چيو ته کيس اُن پٽيشن جي خبر نه آهي، جيڪا سُپريم ڪورٽ ۾ داخل ڪئي وئي.ٻڌڻيءَ دوران سيڪريٽري قومي اسيمبلي عدالت کي استدعا ڪئي ته قومي اسيمبلي جي اسپيڪر ۽ سينيٽ چيئرمين درخواست ڪئي آهي ته معاملو حل ڪرڻ لاءِ وڌيڪ وقت ڏنو وڃي. جنهن تي چيف جسٽس ريمارڪس ڏيندي چيو ته درخواستگذار به وقت ڏيڻ چاهي ٿو، ٻئي ڌُريون متفق آهن ته معاملو حل ڪري وٺو. پارليامينٽ جي بالادستي جي ذميواري توهان تي لاڳو ٿئي ٿي. عدالت معاملو 10 ڏينهن ۾ حل ڪرڻ جي هدايت ڪري ڇڏي.

 

ڊيجيٽل پاڪستان اسان جو مستقبل آهي، نوجوانن جون صلاحيتون دنيا جي سامهون آڻينداسين: عمران خان

اسلام آباد(ويب ڊيسڪ) وزير اعظم عمران خان چيو آهي ته ڊيجيٽل پاڪستان اسان جو مستقبل آهي ۽ ان جي ذريعي دنيا جي ٻي سڀ کان وڏي نوجوان آبادي تي ٻڌل ملڪ هئڻ جي ڪري اسان جي آبادي اسان جي طاقت بڻجي ويندي. ڊيجيٽل پاڪستان ويزن بابت تقريب کي خطاب ڪندي وزير اعظم چيو ته مون کي ڊيجيٽل پاڪستان تي پهرين ڌيان ڏيڻ گهرجي ها ڇو ته هي اسان جي نوجوانن جي لاءِ اهم آهي، دنيا ان ڏانهن وڃي رهي آهي پر اسان پوئتي رهيل آهيون. هن چيو ته هاڻ اسان جو سڄو ڌيان ڊيجيٽل پاڪستان منصوبي تي هوندو جنهن جي ذريعي اسان نوجوانن جون صلاحيتون دنيا جي سامهون آڻينداسين ۽ ان هڪ شئي سان اسان جي نوجوان آبادي اسان جي لاءِ طاقت بڻجندي ڇو ته اسان وٽ دنيا ۾ ٻي سڀ کان وڏي نوجوان آبادي آهي، هي اسان جي لاءِ وڏو موقعو آهي ۽ اسان ان مان فائدو کڻنداسين. وزير اعظم چيو ته مون اوورسيز پاڪستانين جو اندازو آهي ته هنن جي پرڏيهه وڃڻ جو سبب ڪهڙو هوندو آهي، هنن جي پهرين ڪوشش هوندي آهي ته پنهنجي خاندان کي پالن، انهن کي سٺي تعليم ڏين پر پوءِ هو پنهنجي ۾ عجيب قصن جو شڪار ٿي ويندا آهن ڇو ته هو پاڪستان اچڻ چاهي ٿو پر هن جا اُتان جا عادي ٿي چڪا آحن ۽ هو پاڪستان اچڻ ئي نٿا چاهن ان ڪري ان صورت ۾ هو اُتي ڦاسي ويندا آهن. مون انگلينڊ ۾ پاڪستانين جا ڪيترائي نسل ڏٺا ۽ انهن جا مسئلا به ڏٺا. وزير اعظم خاص طور اوورسيز پاڪستانين کي مخاطب ڪندي چيو ته توهان کي زندگي ۾ هڪ فيصلو ڪرڻو هوندو آهي توهان جي زندگي جو مقصد ڇا آهي، اِهو توهان پنهنجي پاڻ کان سوال پڇندا آهيو ۽ جيڪي ان جو صحيح جواب ڏيندا آهن اُهي ماڻهو دنيا ۾ مٿي به ويندا، عزت به ٿيندي، انهن جي دل ۾ سڪون به ايندو آهي پر جيڪي ماڻهو غلط فيصلا ڪندا آهن ۽ انهن کي سمجهه ۾ ناهي ايندو ته زندگي جو مقصد ڇا آهي ته انهن کي  ڏکيائين کي منهن ڏيڻو پوندو آهي.

 

 

شهباز شريف پهرين پنهنجي پارٽي ۾ اِن هائوس تبديلي آڻي پوءِ پارليمان ۾ تبديلي جي ڳالهه ڪري: فردوس عاشق اعواڻ

اسلام آباد(ويب ڊيسڪ) وزير اعظم عمران خان جي سڌُ سماءَ ۽ نشريات بابت خاص مددگار فردوس عاشق اعواڻ شهباز ڊريف کي ن ليگ جي ڪٺ پتلي قرار ڏئي ڇڏيو. فردوس عاشق اعواڻ سماجي رابطن واري ويب سائيٽ ٽوئيٽر تي ٽوئيٽ ڪندي چيو ته شهباز شريف پهرين پنهنجي پارٽي ۾ اِن هائوس تبديلي آڻي پوءِ پارليمان ۾ تبديلي جي ڳالهه ڪري، ن ليگ جو صدر شهباز شريف آهي پر فيصلا سندس جاءِ تي ٻيو ڪير ڪندو آهي، ڪٺ پتلي صدر هئڻ کان بهتر آهي ته پهرين پنهنجي پارٽي جو حقيقي صدر ته بڻجي. فردوس عاشق اعواڻ چيو ته شهباز شريف جو اِن هائوس تبديلي وارو بيان ٻلي جي خواب ۾ ڇڇڙا جي برابر آهي، انهن حسرتن جي لاءِ هن سان همدردي ئي ڪري سگهجي ٿي، اِن هائوس تبديلي جي شوبازي نه ڪيو پر پارليمان ۾ اچي قانون سازي جي ذميواري پوري ڪري.