تازيون خبرون
شاهد خاقان عباسي نيب هٿان گرفتار، نيب ۽ نيازي تماشو لڳائي رهيو آهي: ن ليگ - ن ليگ جي خواهش پوري ٿي، شاهد خاقان چوري کائڻ وارو مجنو نه بڻجي: فردوس عاشق - ادارا قانون جي بالادستي کي يقيني بڻائن، حڪومت ڪم ۾ مداخلت نه ڪندي: عمران خان - سياسي اڳواڻن جون گرفتاريون بني گالا مان ملندڙ هدايتن تي پيون ٿين: مرتضيٰ وهاب - حڪومت گرفتارين ذريعي ناڪاميون لڪائڻ چاهي ٿي، اپوزيشن خلاف امتيازي احتساب قبولڻ جوڳو ناهي: بلاول ڀٽو زرداري - پنهنجي پارٽي ۾ پاڻ کي مڃرائڻ ۽ پنهنجي جاءِ بڻائڻ جي لاءِ ڏاڍيون قربانيون ڏيڻيون پيون: مريم نواز جو انٽرويو - ايڇ آءِ وي تي ڪنٽرول ۽ پکيڙجڻ کي روڪڻ لاءِ 600 ملين رپيا مختص، متاثرن جي بحاليءَ لاءِ ھڪ ارب فنڊ قائم ڪيو آھي: وڏو وزير - شاهد خاقان کي گرفتاري جي خبر هئي، ايل اين جي ڪيس ۾ اڃان به ڪيتريون ئي گرفتاريون ٿينديون؛ شيخ رشيد - جج ويڊيو اسڪينڊل: ايف آءِ اي ٽيم جو ميان طارق جي دڪان ۽ آفيس تي ڇاپو، اهم دستاويز هٿ - نيب جو نالو تبديل ڪري ن ليگ احتساب بيورو رکيو وڃي، عمران خان کي پاڪستاني هٽلر ٿيڻ نه ڏينداسين: احسن اقبال/مريم اورنگزيب

Category Archives: مکيه خبرون

شاهد خاقان عباسي نيب هٿان گرفتار، نيب ۽ نيازي تماشو لڳائي رهيو آهي: ن ليگ

لاهور/ راولپنڊي ( ويب ڊيسڪ ) اڳوڻي وزيراعظم شاهد خاقان عباسي کي ايل اين جي ڪيس ۾ گرفتار ڪيو ويو آهي. مسلم ليگ ن اڳواڻ ۽ اڳوڻي وزيراعظم شاهد خاقان عباسي طلبي باوجود نيب ۾ پيش نه ٿيو.  اڳوڻي وزيراعظم شاهد خاقان عباسي طلب جي نوٽيس باوجود نيب اڳيان پيش ٿيڻ کان انڪار ڪيو.  شاهد  خاقان عباسي نيب کي خط لکيو جنهن ۾ هن چيو ته نيب جي آفيس ۾ پيش ٿيڻ لاءِ تيار آهيان، مناسب وقت ڏنو وڃي. هن چيو ته نيب ۾ طلبي جو خط گذريل ڏينهن مليو هڪ ڏينهن جي نوٽيس تي نيب آفيس ۾ پيش ٿيڻ ممڪن ناهي. پيشي کانپوءِ انڪار کانپوءِ نيب لاهور ۾ شاهد خاقان عباسي کي گرفتار ڪري ورتو. شاهد خاقان عباسي کي لاهور ٽول پلازه تي روڪڻ کانپوءِ نيب جي اختيارين پنهنجي تحويل ۾ ورتو. مسلم ليگ ن اڳواڻ احسن اقبال شاهد خاقان عباسي کي گرفتار ڪرڻ جي تصديق ڪئي.  نيب ترجمان موجب جوابدارن تي من پسند ڪمپني کي ايل اين جي ٽرمينل جو 15 سالن لاءِ ٺيڪو ڏيڻ، مبينا طور تي ملڪي ناڻي کي اربين رپين جو نقصان پهچائڻ جو الزام آهي. ٻئي پاسي پاڪستان مسلم ليگ ن جي صدر شهباز شريف چيو آهي ته شاهد خاقان عباسي کي غلط طريقي سان گرفتار ڪيو ويو ۽ اِها گرفتاري حڪومت ۽ نيب جي ملي ڀڳت آهي. لاهور ۾ پريس ڪانفرنس ڪندي شهباز شريف چيو ته اڄ عمران خان نيازي ۽ نيب جي ملي ڀڳت سان مسلم ليگ ن جي قيادت تي ڀرپور وار ٿيو آهي، اڄ غلط طريقي سان شاهد خاقان عباسي کي گرفتار ڪيو ويو. هن چيو ته شاهد خاقان عباس کي گرفتار ڪرڻ جي لاءِ نيب وٽ وارن نه هئا ڊي جي نيب کيس پهرين واٽس ايپ پيغام ڏيکاريو جڏهن ته پوءِ هن کي گرفتاري جي وارنٽ جي ڪاپي ڏيکاري حراست ۾ ورتو ويو. شهباز شريف جو چوڻ هو ته اِهو تماشو آهي جيڪو عمران خان ۽ نيب جي ملي ڀڳت سان لڳل آهي، ان جو سبب اِهو اهي ته عمران خان 11 مهينن ۾ ملڪي معيشت جو جنازو ڪڍيو ۽ ان تباهه ٿيل معيشت جي جنازي کي انهن گرفتارين جي پٺيان لڪائڻ چاهي ٿو، جڏهن ته ظلم ۽ ذيادتي ڪري عوام جو ڌيان هٽائڻ چاهي ٿو. شاهد خاقان عباسي جي باري ۾ مختصر ٻڌائيندي هن چيو ته ملڪ ۾ 5 هزار ميگا واٽ بجلي پيدا ڪرڻ جو منصوبو لڳايو جڏهن ته گيس جي لوڊشيڊنگ ختم ڪرڻ ۾ شاهد خاقان عباسي جو ڪليدي ڪردار آهي. پنهنجي ڳالهه کي جاري رکندي هن چيو ته نواز شريف کي هن ملڪ جي غريب عوام جو ڏک سور هو ۽ آهي، ان کي ڏسندي گيس جي اگهن ۾ هيٺين سطح تي واڌ ناهي ڪئي ۽ آءِ ايم ايف جي ڊڪٽيشن ناهي ورتي وئي. مسلم ليگ ن جي صدر وڌيڪ چيو ته شاهد خاقان  جو قصور ڪهڙو آهي ته هو نواز شريف جو ساٿي آهي ۽ دلير ماڻهو آهي جيڪو سمجهوتو ناهي ڪندو. گڏوگڏ ئي هن چيو ته احتساب ڪٿي آهي، شفاف انصاف تي ٻڌل احتساب پاڪستان ۾ ڪاٿي آهي، هي احتساب جي نالي تي مسلم ليگ ن جي خلاف بدترين انتقام آهي، قوم سمجهي چڪي آهي ته مسلم ليگ ن جو اڳواڻ انتقام جو نشانو بڻجي رهيو آهي. ليگي صدر جو چوڻ هو ته عمران خان دنيا ۾ پاڪستان کي اهڙو ملڪ بڻائي ڇڏيو آهي جنهن تي هر موقعي تي دنيا کلي آهي، عمران خان مخالف ڌر کي گاريون ڏيندڙن کي وزير بڻائي ڇڏيو آهي جڏهن ته ايندڙ ڏينهن وزارت واپس وٺندو رهندو آهي، توهان ڪڏهن ايف بي آر چيئرمين لڳايو ٿا ته ڪڏهن هٽايو ٿا. پنهنجي ڳالهه کي جاري رکندي عمران خان بجيٽ ۾ عوام تي ٽيڪس جي ڪهاڙي هلائي، ڪجهه ڏينهن پهرين واپارين ۽ سيڙپڪارن هڙتال ڪئي، 71 سالن جي تاريخ ۾ اهڙو ٽيڪس ڪڏهن به ناهي لڳو جيڪو هنن لڳايو آهي. شهباز شريف چيو ته توهان دنيا ۾ پاڪستان کي بدنام ڪري ڇڏيو، هتي ڪير اچي سيڙپڪاري ڪندو، معيشت ۽ هارين جو ٻيڙو غرق ڪري ڇڏيو، ماني جي قيمت 15 کان 20 رپين تائين اچي وئي آهي غريب جي لاءِ جيئڻ ڏکيو ٿي ويو آهي. پريس ڪانفرنس دوران مسلم ليگ ن جي صدر جو چوڻ هو ته انهن سمورن سبب ۽ بدترين غفلت جي ڪاوڙ مسلم ليگ ن جي تي پئي ڪئي وڃي ۽ نيب جي جيلن ۽ اذيت خانن ۾ جيڪي ماڻهو بند آهن انهن ۾ اڪثريت مسلم ليگ ن جي قيادت جي اهي جڏهن ته ٻئي نمبر تي پيپلز پارٽي جي آهي. هن چيو ته قوم ڄاڻي ٿي ته اربين، کربين جا ڪرپشن ڪيس نيب وٽ پيا آهن پر انهن تي ڪا به ڪارروائي نٿي ٿئي ڇو ته اِهي موجوده حڪومت جا آهن، ان جو هڪ مثال بس ريپڊ ٽرانسپورٽ پشاور آهي. شهباز شريف پنهنجي ڳالهه ٻولهه جاري رکي ۽ چيو ته عمران خان ۽ نيب جي اها ڪهاڙي مسلم ليگ ن جي تي ان ڪري هلائي پئي وڃي ڇو ته اسان عوام جي خدمت ڪئي آهي ۽ اِها ئي شئي عمران خان کي سمهڻ نٿي ڏئي. ليگي صدر جو چوڻ هو ته عمران خان پاڪستان کي تباهه ڪري ڇڏيو پر وقت اچي ويو آهي ته قوم توهن کان ان جو حساب وٺندي، گڏوگڏ ئي هن چيو ته اسان نواز شريف جي قيادت ۾ خدمت ڪئي غطليون اسان کان به ٿيون هونديون ڇو ته اسان به انسان آهيون. وزير اعظم تي تنقيد ڪندي چيو ته عمران خان هڪ ناڪام، ضدي، ڪاوڙ سان ڀريل، مغرور ۽ سليڪٽڊ وزير اعظم آهي هن ڪڏهن به سڀني جي ڳالهه ناهي ڪئي، 1992 جو ورلڊ ڪپ کٽڻ تي به هن مان مان مان ڪئي پر اسان واري ڳالهه نه ڪئي. هن چيو ته نيب ۽ عمران خان گڏيل آهن، جيڪڏهن ائين نه ٿئي ته ميگا ڪرپشن جي ڪيسن جي باجود نيب ستل نه هجي ها، پر اسان کي رڳو هڪ ڳالهه جي سزا ملي رهي آهي جنهن کي اسان کي ڀوڳڻو آهي ۽ ڀوڳينداسين پر عمران خان کي اِهو سودو مهانگو پوندو.

 

ن ليگ جي خواهش پوري ٿي، شاهد خاقان چوري کائڻ وارو مجنو نه بڻجي: فردوس عاشق

لاهور(ويب ڊيسڪ) وزير اعظم جي سڌُ سماءَ بابت خاص مددگار فردوس عاشق اعواڻ جو چوڻ آهي ته شاهد خاقان عباسي جي ته اِها خواهش هئي ته کيس گرفتار ڪيو وڃي. لاهور ۾ پريس ڪانفرنس ڪندي فردوس عاشق اعواڻ چيو ته قانون جي عملداري جيئن جيئن رنگ پڪڙيندي آهي انهن جي منهن جو رنگ پيلو ٿيڻ لڳندو آهي ۽ اڄ شهباز شريف جي منهن جو پيلو رنگ اِهو ثابت ڪري رهيو هو ته قانون پنهنجو ڪم ڪري رهيو آهي. هن چيو ته هڪ سبق سڀني کي سکڻ گهرجي ته هتي اصل حڪمران پروردگار آهي باقي ماڻهو آهن جن کي اچڻو ۽ هليو وڃڻو آهي پر جن خدا جي ڌرتي تي خدا بڻجي سندس مخلوق جو استحصال ڪيو ان کي اڄ شام غريبان ڏسڻي پئي. خاص مددگار چيو ته شاهد خاقان عباسي جي خواهش هئي ته هو هر هر نيب کي گهرائي  چئي رهيو هو ته مون کي گرفتار ڇو نٿا ڪيو ته ڪير به شخص جيڪو نيب جو ڏوهاري هجي اُهو گرفتاري کان بچڻ لاءِ گرفتاري کان اڳ واري ضمانت ڪرائيندو آهي يا جيڪو قانوني آپشنز هجي ان تي غور ڪندو آهي. فردوس عاشق اعواڻ چيو آهي ته شاهد خاقان عباسي نه ته گرفتاري کان اڳ ضمانت ڪرائي هئي نه ئي قانون جي حوالي سان اهڙو ڪو آپشن استعمال ڪيو جيڪو سندس گرفتاري جي رستي ۾ رنڊڪ بڻي ها. سندس چوڻ هو ته شاهد خاقان عباسي چوري کائڻ وارو مجنو نه بڻجي، هن ميان صاحب سان گڏ عهد و پيما نڀائڻ جو قسم کنيوهو ته هو هاڻ ئي بوکلائجي ويو آهي، توهان کي پنهنجي مڪافات عمل مان گذرڻو آهي.  فردوس عاشق اعواڻ چيو ته نيب هر شخص کي صفائي جو موقعو ڏيندو آهي ته ضروري ناهي ته هر شخص جي گرفتاري عمل ۾ اچي، شاهد خاقان عباسي نيب مان جيڪا ڀاڄ حاصل ڪئي ان جي ڪري سندس دلي خواهش پوري ٿي. سندس چوڻ هو ته پاڪستان مسلم ليگ ن جي قيادت کي حڪومت تي الزام تراشيون ۽ وزير اعظم پاڪستان کي ان عمل ۾ گهلڻ اِهو ظاهر ٿو ڪري ته ن ليگ جي قيادت وزير اعظم سان ذاتي عداوت، حسد ۽ بغض رکي ٿي. خاص مددگار چيو ته وزير اعظم جو رڳو اِهو ڏوهه آهي ته اُن هن ملڪ ۾ قانون جي حڪمراني کي يقيني بڻايو، هر شخص تي قانون کي لاڳو ڪيو ۽ پاڪستان جو هر شهري اڄ گڏيل طور تي قانوني تقاضائن جي ماتحت آهي. فردوس عاشق اعواڻ چيو ته جيڪي ماڻهو قانون کي پنهنجي تابع رکندا هئا اڄ اُهي قانون جي تابع اچي رهيا آهن ته هنن کي پريشان ٿيڻ جي ضرورت نه هئڻ گهرجي، کين قانون کي منهن ڏيڻ گهرجي، جيڪڏهن هنن ڪجهه غلط ناهي ڪيو ته کين آڱيون هلائي هلائي پنهنجي بي گناهي جا ثبو نه ڏيڻ گهرجن ثبوت ڏيڻ جو فورم عدالت آهي. هن چيو ته گرفتار ماڻهن عدالتن ۾ وڃي پنهنجي بي گناهي جو ثبوت ڏين، آئون پراميد آهيان ته هن ملڪ ۾ عدلتون آزاد آهن، ادارا بااختيا آهن ۽ اِهو ڪو به سبب ناهي ته کين انصاف نه ملي. خاص مددگار چيو ته جنهن جنهن جي ڏاڙهي ۾ ڪک آهي ان کي ضمير جي عدالت ۾ پريشاني کي منهن ڏيڻو آهي ۽ ضمير جي عدالت جي قيدي کي ميڊيا ۾ اچي وضاحتون ڏيڻ جي ضرورت پئجي رهي آهي.

 

ادارا قانون جي بالادستي کي يقيني بڻائن، حڪومت ڪم ۾ مداخلت نه ڪندي: عمران خان

لاهور (ويب ڊيسڪ) وزيراعظم عمران خان چيو آهي ته ادارا قانون جي بالادستي کي يقيني بڻائن، حڪومت ادارن جي ڪم ۾ مداخلت نه ڪندي. وزيراعظم عمران خان سان لاهور چيمبر آف ڪامرس اينڊ انڊسٽري جي نمائندن ملاقات ڪئي، جنهن ۾ سندس خاص مددگار فردوس عاشق اعواڻ، پنجاب جو وڏو وزير عثمان بوزدار، لاهور چيمبر صدر الماس حيدر، سينيئر نائب صدر خواجا شهزاد ۽ ٻيا به شريڪ ٿيا. واپاري اڳواڻن ۽ صنعت ڪارن وزيراعظم کي انڊسٽريل زوننگ، ڪاروبار جو آسان بڻائڻ ۽ ڪاروباري طبقي کي پيش مسئلن جي حوالي سان آگاهه ڪيو ۽ وزيراعظم کي انڊسٽري تي لڳايل ٽيڪسن بابت پنهنجا خدشا پيش ڪيا. وزيراعظم چيو ته انڊسٽري کي هٿي ڏيڻ لاءِ قدم کڻي رهيا آهيون، جيستائين ٽيڪس نظام درست نه ٿيندو اڳتي نه وڌي سگهنداسين، ڏکين حالتن ۾ ڏکيا فيصلا ڪرڻا پوندا آهن، ملڪ هن وقت ڏکين حالتن ۾ آهي، تنهن ڪري واپاري ۽ عوام ساٿ ڏئي. سندس چوڻ هو ته قانون سڀني لاءِ برابر آهي، ادارا قانون جي بالادستي کي يقيني بڻائن، حڪومت ادارن جي ڪم ۾ مداخلت نه ڪندي. عمران خان ڪاروبار ۾ آساني ۽ ڪاروباري طبقي کي سهولتن جي فراهمي جي حوالي سان حڪومتي قدمن بابت شرڪت ڪندڙن کي آگاهي ڏني ۽ چيو ته جلد ڪاروباري ماڻهو حڪومتي ڪوششن جي نتيجن مان فائدو حاصل ڪندا. انڊسٽريل زوننگ ۽ ٽائون پلاننگ جي حوالي سان وزيراعظم چيو ته ماضي ۾ ان جي اهميت کي نظرانداز ڪيو ويو، جنهن سبب گدلاڻ، بنيادي سهولتن جي کوٽ ۽ ٻين سماجي مسئلن جنم ورتو، 1960 جي ڏهاڪي ۾ پاڪستان ايشيا ۾ ڀرپور ترقي ڪري رهيو هو، جنهن جو سبب صنعتي ترقي هئي. هن چيو ته بدقسمتي سان اسان هڪ ناڪاري مائينڊ سيٽ جو شڪار ٿي وياسين ۽ خطي جا ٻيا ملڪ اسان کان اڳتي نڪري ويا، ملڪي ترقي لاءِ صنعتي ترقي اڻٽر آهي، ان سان روزگار جا موقعا ملندا ۽ بيروزگاري ختم ٿيندي.

 

سياسي اڳواڻن جون گرفتاريون بني گالا مان ملندڙ هدايتن تي پيون ٿين: مرتضيٰ وهاب

ڪراچي (اسٽاف رپورٽر) اسپتالن تي سيلز ٽيڪس لاڳو ڪرڻ واري وفاقي حڪومت جي فيصلي بابت اطلاعات، قانون ۽ اينٽي ڪرپشن واري صوبائي وزير بئريسٽر مرتضيٰ وهاب چيو آهي ته تحريڪ انصاف جي نا اهل حڪومت صحت جي شعبي کي به ڪمائي جو ذريعو بڻائي ڇڏيو آهي. ايف بي آر پاران اسپتالن کي سيلز ٽيڪس جي ادائيگي لاءِ نوٽس ڏيڻ ظلم آهي بئريسٽر مرتضيٰ وهاب چيو ته هاڻي اسپتالون به سيلز ٽيڪس جي وڪڙ ۾ اچي چڪيون آهن بجلي ۽ گئيس ڪمپنين کي اسپتالن کان اسٽينڊرڊ سيلز ٽيڪس اوڳاڙي جو حڪم مليو آهي. ملڪ ۾ صحت جون سهولتون هونئن به ناڪافي آهن ان تي سيلز ٽيڪس لاڳو ڪرڻ زيادتي آهي.بئريسٽر مرتضيٰ وهاب چيو ته تحريڪ انصاف جي نااهل حڪومت هر شعبي کي تباهه ڪري ڇڏيو آهي. جڏهن اسپتالون به ٽيڪس ڏينديون ته صحت جون سهولتون عوام جي پهچ کان پري ٿينديون. پاڪستان پيپلزپارٽي ڪڏهن به عوامي خدمت وارن شعبن سان کنئوس نه ڪئي هئي. تحريڪ انصاف سياسي انتقام ۽ استحصال ڪرڻ ۾ بدحواس ٿي چڪي آهي تنهنڪري حڪومت هوش کان ڪم وٺي ۽ اسپتالن کان سيلز ٽيڪس اوڳاڙي وارو فيصلو واپس وٺي.ٻئي پاسي اطلاعات، قانون ۽ اينٽي ڪرپشن واري صوبائي وزير بئريسٽر مرتضيٰ وهاب جون ڪراچي ۾ احتجاج ڪندڙ نرسن سان ڳالهيون ڪامياب ٿي ويون. اطلاعات واري صلاحڪار بئريسٽر مرتضيٰ وهاب جي ڳالهين کانپوءِ نرسن احتجاج ختم ڪري ڇڏيو ان موقعي تي هن چيو ته نرسن جي مطالبن جي منظوري وارو نوٽيفڪيشن 24 ڪلاڪن ۾ جاري ٿي ويندو ڇو ته پيپلزپارٽي جي سنڌ حڪومت عوام جي مسئلن کي حل ڪرڻ تي يقين رکندي آهي ۽ عوام جي صحت جي حوالي سان ڪا به ڪوتاهي نه ڪئي ويندي ان موقعي تي مظاهرو ڪندڙن سان ڳالهيون ڪندي بئريسٽر مرتضيٰ وهاب چيو ته وڏي وزير توهان جي احتجاج جو نوٽس ورتو آهي حڪومت توهان جا مسئلا حل ڪرڻ چاهي ٿي احتجاج اوهان جو حق آهي پر مهزب انداز ۾ هجي. وڏي وزير جي هدايتن تي حراست ۾ ورتل سمورن ماڻهن کي آزاد ڪيو ويو آهي اوهان ڪنهن جي منفي ڳالهين ۾ نه اچو. وڏي وزير صحت واري سيڪريٽري کي توهان جا مسئلا ترت حل ڪرڻ لاءِ هدايتون ڏنيون آهن اوهان خاطري ڪيو ته مسئلا حل ٿيندا اسين نٿا چاهيون مائرون ڀينرون پنهنجي مسئلن جي حل لاءِ روڊن تي اچن سڀاڻي جمعي نماز کانپوءِ توهان جي مطالبن جو نوٽيفڪيشن جاري ٿي ويندو. هوڏانهن بئريسٽر مرتضيٰ وهاب ايل اين جي ڪيس ۾ شاهد خاقان عباسي جي گرفتاري تي سخت مذمت ڪندي چيو ته اسان سمجهون ٿا ته عدالت مان ڏوهه ثابت ٿيڻ تائين شاهد خاقان عباسي جي گرفتاري ۽ سياسي مخالفن کي گرفتار ڪرڻ جو عمل مذمت جوڳو آهي. بني گالا مان ملندڙ هدايتن تي گرفتاريون عمل ۾ اينديون آهن پيپلزپارٽي ۽ مسلم ليگ ن جي اڳواڻن کي سياسي انتقام جو نشانو بڻايو پيو وڃي آصف علي زرداري، فريال ٽالپر ۽ شاهد خاقان عباسي خلاف ڪو جرم ثابت ٿيو آهي ته ٻڌايو وڃي نيب ۽ وفاقي حڪومت کي سوچڻ گهرجي.

 

حڪومت گرفتارين ذريعي ناڪاميون لڪائڻ چاهي ٿي، اپوزيشن خلاف امتيازي احتساب قبولڻ جوڳو ناهي: بلاول ڀٽو زرداري

ڪراچي (ويب ڊيسڪ) پ پ چيئرمين بلاول ڀٽو زرداري اڳوڻي وزيراعظم شاهد خاقان عباسي جي فوري طور آزادي جو مطالبو ڪندي چيو آهي ته اپوزيشن خلاف امتيازي احتساب قبولڻ جوڳو ناهي. شاهد خاقان عباسي جي گرفتاري تي ردعمل ڏيندي بلاول ڀٽو زرداري چيو ته سليڪٽڊ حڪومت طرفان گڏيل اپوزيشن خلاف غير قانوني ۽ غير آئيني طريقن ذريعي امتيازي احتساب قبول نه ڪرڻ جوڳو آهي، ملڪي معيشت تي حڪومتي حملن خلاف اپوزيشن جو احتجاج نه بيهندو. هن چيو ته اڳوڻي وزيراعظم جي گرفتاري عوام جي چونڊيل نمائندن خلاف انتقامي ڪارروائين جو تسلسل آهي، سليڪٽڊ حڪومت سياسي مخالفن کي حراست ۾ رکي پنهنجي ناڪاميون لڪائڻ چاهي ٿي.

 

پنهنجي پارٽي ۾ پاڻ کي مڃرائڻ ۽ پنهنجي جاءِ بڻائڻ جي لاءِ ڏاڍيون قربانيون ڏيڻيون پيون: مريم نواز جو انٽرويو

اسلام آباد(ويب ڊيسڪ) پاڪستان مسلم ليگ ن جي اڳواڻ جو چوڻ آهي ته پنهنجي پارٽي ۾ پاڻ کي مڃرائڻ ۽ پنهنجي جاءِ بڻائڻ جي لاءِ کيس ڏاڍيون قربانيون ڏيڻيون پيون. وائس آف آمريڪا اردو جي صحافي کي ڏنل انٽرويو ۾ پاڪستان مسلم ليگ ن جي نائب صدر ۽ پارٽي جي تاحيات سربراهه نواز شريف جي ڌيءَ مريم نواز چيو ته هر معاشرو پوءِ ڀلي اُهو اولهه هجي يا اوڀر ان ۾ مختلف طريقن سان عورت سان نفرت تي ٻڌل ذهنيت موجود هوندي آهي. هن چيو ته جيڪا عورت عوام ۾ شهرت رکي ٿي خاص طور تي قيادت ۾ هوندي آهي ان کي مرد هم منصبن جي ڀيٽ ۾ وڌيڪ سخت تنقيد کي منهن ڏيڻو پوندو آهي. مريم نواز چيو ته اهڙين عورتن تي سخت تنقيد ٿيندي آهي ۽ انهن جي خلاف سخت راءِ قائم ڪئي ويندي آهي. هن چيو ته جيڪڏهن هڪ عورت جو ڪو نظريو ناهي، اصول، خيال آهي هو پهنجي لاءِ  ڪو ڪم ڪرڻ چاهي ٿي ته ان کي هميشه ٿوري شڪ سان ڏٺو ويندو. ليگي اڳواڻ چيو ته ڪڏهن اهڙين عورتن کي ناڪاري طور تي پرعزم طور تي ڏٺو ويندو آهي. مريم نواز چيو ته اسان کي عورتن جي ڪپڙن، جوتن ظاهر حالت تان ڌيان هٽائي ان جي قابلي ۽ ڪارڪردگي تي ڌيان آڻڻ ضرورت آهي. هن ٻڌايو ته کيس پنهنجي پارٽي ۾ به ان چيلينج کي منهن ڏيڻو پيو پوي. مريم نواز چيو ته ائين ڪرڻ ڏاڍو ڏکيو ڪم آهي ۽ مون کي پنهنجي پارٽي ۾ به ائين ڪرڻ جي ضرورت هئي ڇو ته پاڪستان مسلم ليگ ن تاريخي، روايتي ۽ حقيقي طور تي مردن جي چنبي هيٺ رهي آهي. سندس چوڻ هو ته پنهنجي پارٽي ۾ پاڻ کي مڃرائڻ جي لاءِ مون کي ڪيتريون ئي قربانيون ڏيڻيون پيون، مون کي هڪ عام ماڻهوءَ کان وڌيڪ محنت ڪرڻي پئي. مريم نواز چيو ته مون کي جيل وڃڻو پيو جتي آئون 3 مهينا رهيس اُتي مون ٿانو ڌوتا، ڪپڙا ڌوتا، ڪوئن واري ماني کاڌي آهي ۽ کٽ تي گذارو ڪيو آهي. مسلم ليگ ن جي نائب صدر چيو ته مون کي ان ڳالهه جو ڪو به افسوس ناهي، چيو ويندو آهي ته جيلن ۾ بهترين تربيتي اسڪول هوندا آهن، ته پوءِ منهنجي ته ڏاڍي سٺي ٽريننگ ٿي آهي. مريم نواز چيو ته هو جيل وڃڻ جي تجربي مان مضبوط ٿي آهي. هن چيو ته منهنجي پنهنجي پارٽي طرفان شايد ڪڏهن مزاحمت هجي يا مڃرائڻ لاءِ محنت ڪرڻي پئي هجي پر پاڪستان جو عوام مون کي جيڪو رد عمل ڏنو ان ۾ ڪڏهن به مون کي صنفي امتياز نظر ناهي آيو. ليگي اڳواڻ چيو ته آئون خوشگوار طور تي حيران ٿي هيس. هن تازو ئي منڊي بهاو الدين جي ريلي جو احوال بيان ڪيو جتي پارٽي ورڪرن جي هڪ وڏي انگ سندس پرجوش استقبال ڪيو، رستي ۾ مختلف ماڳن تي استقبال جي ڪري سندس قافلو دير جو شڪار ٿي ويو هو. مريم نواز چيو ته آئون گاڏي کان ٻاهر نڪتس مون کي ماڻهن جي ان بي مثال محبت جو جواب ڏيڻو پي، هن وڌيڪ چيو ته ماڻهن مون کي چيو ته پاڻ کي خطري ۾ ڇو وجهي رهيا آهيو. مسلم ليگ ن جي نائب صدر چيو ته انهن 13 ڪلاڪن جي ريلين ۾ رڳو هڪ شئي آهي عوام جي محبت ۽ حمايت. مريم نواز چيو ته هاڻ هوءَ احتجاجي ريليون ڪڍندي جيڪي نه رڳو سندس پيءُ ۽ اڳوڻي وزير اعظم نواز شريف جي آزادي پر قانون جي بالادستي آئين جي تقدس لاءِ، ووٽ کي عزت ڏيڻ لاءِ، ان سان گڏوگڏ ميڊيا ۽ عام ماڻهو تي پابندي جي خلاف هونديون. هن چيو ته جيئن شيون تبديل ٿينديون، آئون پنهنجي حڪمت عملي سامهون آڻيندس. مسلم ليگ ن جي اڳواڻ چيو ته منهنجي ڪا به ذاتي خواهش ناهي جنهن کي آئون ڪاميابي ۽ ناڪامي جي طور تي پيمائش ڪري سگهان، منهنجي هڪ جدوجهد آهي. مريم نواز چيو ته جيڪو رستو مون اختيار ڪيو آهي ته اُهو ڏاڍو ڏکيو آهي ۽ مون گذريل 3 سالن ۾ مون ان جي ڳري قيمت ادا ڪئي آهي. سندس چوڻ هو ته گذريل ڪجهه سالن ۾ کيس چيلنجن کي منهن ڏيڻو پيو، هن چيو ته منهنجي خلاف ڊان ليڪس، پاناما ليڪس منهنجي مٿان بڻيا جنهن سان منهنجو ۽ نواز شريف جو ڪو به تعلق نه هو، ان کان پوءِ احتساب عدالت سزا ٻڌائي، مون 3 مهينا جيل ڪاٽيو ان دوران منهنجي ماءُ لاڏاڻو ڪري وئي منهنجو پيءُ جيڪو 3 ڀيرا وزير اعظم بڻيو، ان جي عمر 70 سال آهي بيمار آهي اڄ هو جيل ۾ آهي. نواز شريف جي ڌيءَ چيو ته اِهو رستو ڏاڍو ڏکيو آهي پر منهنجي لاءِ مريم نواز هئڻ جي ناطي اهو اهم آهي ته آئون تاريخ ۾ درست رخ ۾ بيٺي آهيان. احتساب عادلت جي جج ارشد ملڪ بابت تازي ويڊيو اسڪينڊل بابت ڳالهائيندي مريم نواز چيو ته العزيزيه ريفرنس ۾ جنهن ج نواز شريف کي سزا ٻڌائي اُهي پاڻ چئي رهيا آهن ته کين بليڪ ميل ڪيو ويو هو. مريم نواز چيو ته جج صاحب نه رڳو اِهو چئي رهيا آهن پر هو وضاحت به ڏئي رهيا آهن ته ڪهڙي ريت انهن کي ذاتي نوعيت جي هڪ غير اخلاقي ويڊيو ڏيکاري وئي ۽ نواز شريف کي سزا ڏيڻ جي لاءِ بليڪ ميل ڪيو ويو، توهان ان جي هن غير اخلاقي ويڊيو بابت ڄاڻو ٿا. سندس چوڻ هو ته اسان ان کي ڪنهن هڪ تي ٻڌل نٿا ڏسي سگهون ڇو ته اِهو ڪوڙ جو ڄار آهي ۽ اهڙن واقعن جو سلسلو آهي جيڪو نواز شريف جي خلاف فيصلي تي اچي ختم ٿيو آهي جنهن ۾ کيس سزا ڏني وئي آهي. مريم نواز چيو ته پاناما کان شروع ٿيل سازشون اقامي تي وڃي ختم ٿيون، اقامي کي دنيا ڄاڻي ٿي ته هو رهائشي ويزا آهي ۽ ان ۾ هڪ تصوراتي پگهار نه وٺڻ تي 22 ڪروڙ عوام جي وزير اعظم کي نااهل ڪيو ويو. هن چيو ته ڳالهه اِتي ختم نٿي ته پوءِ جي آءِ ٽ بڻي اِها سڀني کي خبر آهي ته ڪيئن بڻي ان کان پوءِ ججن کي احتياط سان چونڊيو ويو جنهن ۾ ججن جي ريڪارڊ کي ڏٺو ويندو آهي ته انهن مان ڪنهن کي بليڪ ميل ڪري سگهجي ٿو. مسلم ليگ ن جي نائب صدر چيو ته احتساب عدالت جون پيشيون 6 کان 8 مهينن تائين جاري رهيون جنهن ۾ 120 ڀيرا پاڻ اُتي موجود هيس. سندس چوڻ هو ته اِهي جج چونڊيا ويا ۽ سڄي گيم پلان تي عملدرآمد ڪيو ويو. مريم نواز افسوس جو اطهار ڪيو ته بدقسمتي سان ان سڀ ۾ ميڊيا جا ميديا جا ڪجهه عنصر به شامل هئا. وڌيڪ ثبوت پيش ڪرڻ بابت پوئتي هٽڻ بابت سوال جي جواب ۾ مريم نواز چيو ته آئون پوئتي ناهيان هٽي رهي، آئون رڳو ذميواري سان ڪم ڪري رهي آهيان. هن چيو ته آئون پنهنجي پيءُ لاءِ مرڻ لاءِ به تيار آهيان پر آئون هڪ پاڪستاني به آهيان ۽ منهنجو مقصد ادارن سان وڙهڻ ناهي. مريم نواز چيو ته منهنجو مقصد آهي ته پاڪستان ۾ قانون تي عمل ٿئي ۽ پاڪستان ۾ جمهوري اصولن کي مضبوط بڻايو وڃي. سول ملٽري لاڳاپن ۾ عدم توازن بابت سوال تي مريم نواز چيو ته اول اِهو ته عدم توازن ٿيڻ ئي نه گهرجي. مسلم ليگ ن جي نائب صدر چيو ته آئين ۾ هر اداري جو ڪردار، دائري ڪار ۽ اٿارٽي واضح طور تي بيان ڪئي وئي آهي. مريم نواز چيو ته جيڪڏهن ان توازن کي طاقت جي ذريعي زبردستي هڪ پاسي جهڪائڻ جي ڪوشش ڪئي وئي ته ان سان عدم تواز پيدا نه ٿيندو پر اِها هڪ تباهي هوندي جيڪا اسان هاڻ ڏسي رهيا آهيون. سندس چوڻ هو ته بدقسمتي سان پاڪستان جي تاريخ ۾ جمهوريت ڪڏهن سڌي سنئين ۽ ڪڏهن بلاواسطه طريقي سان معطل رهي آهي. مسلم ليگ ن جي اڳواڻ چيو ته پاڪستان ۾ ڪڏهن به جمهوريت کي صحيح طريقي سان زور پڪڙڻ جي اجازت ناهي ڏني وئي. هن چيو ته ڪو به ملڪ جيڪو سياسي طور تي غير مستحڪم هجي ترقي نٿو ڪري سگهي. مريم نواز چيو ته هاڻ 2019ع ۾ 2018ع جي اليڪشن کان پوءِ اسان جيڪو ڪجهه ڏسي رهيا آهيون اُها آمريت نه يا ملٽري ٽيڪ اوور نه پر سليڪٽڊ وزر اعظم جي صورت ۾ ان جي باقيات ۽ علامتون ڏسي رهيا آهيون. هن سوال ڪيو ته وزير اعظم عمران خان سليڪٽڊ وزير اعظم کان ڊنل ڇو آهي؟ مريم نواز چيو ته کيس پاڪستان جي عوام ناهي چونڊيو ۽ اِهو رڳو آئون ناهيان چئي رهي پر سڄي دنيا ڏسي رهي آهي. مسلم ليگ ن جي نائب صدر چيو ته کيس اِهو لفظ ايترو خراب ڇو ٿو لڳي؟ ان جو مطلبو اِهو آهي ته هي سڀ سچ آهي. سندس چوڻ هو ته رڳو سچ کان ڊپ لڳندو آهي ڪوڙ کان انسان کي ڊپ ناهي لڳندو. هن وڌيڪ چيو ته منهنجي باري ۾ هزار ڪوڙ ڳالهايا ويا پر جڏهن مون ڪجهه ڪيو ئي ناهي ته مون کي فڪر ڇا جي هجي. مريم نواز چيو ته پارليامينٽ ۾ لفظ سليڪٽڊ تي پابندي لاڳو ڪئي وئي، جيڪڏهن توهان سليڪٽڊ ناهيو ته پوءِ توهان کي تڪليف ڪهڙي آهي؟ هن چيو ته وزير اعظم سليڪٽڊ آهي، هو اليڪٽڊ ناهي. مسلم ليگ ن جي نائب صدر چيو ته وزير اعظم عمران خان کي 3 مرحلن ۾ سليڪٽ ڪيو ويو، پري اليڪشن مرحلو جيڪو شايد 2 سال پهرين شروع ٿيو هو پولنگ جي ڏينهن ڌانڌلي ۽ پولنگ کان پوءِ ڌانڌل ڪئي وئي جيڪا اڄ تائين جاري آهي. هن چيو ته پولنگ کان پوءِ ڪئي ويندڙ ڌانڌلي اڄ تائين جاري آهي جنهن تي ڪير انهن جي تاريخي ناڪامين، نالائقين ۽ نااهلي جي باري ۾ ڳالهائيندو ان جي زبان بند ڪئي ويندي. مريم نواز چيو ته ماضي ۾ به ڪڏهن ائين ناهي ٿيو ته اڳوڻي صدر آصف علي زرداري ۽ مون سميت سياسي اڳواڻن جي انٽرويوز ت پابندي نه لڳائي وئي هئي. هن چيو ته مارش: لا جڏهن لڳندي آهي ته اعلانيل هوندي آهي سڀني کي خبر آهي ته سڀ شيون معطل آهن پر اِها پهرين حڪومت آهي جنهن ۾ جمهوريت هوندي به بدترين سويلين مارشل لا، انساني حقن ۽ آزادي اظهار راءِ کي اڻ اعلانيل پابندي جي ذريعي معطل آهي نه رڳو مون تي پر هر ان مخالف تي جيڪو سچ ڳالهائڻ چاهي ٿو يا لکڻ چاهي ٿو. مريم نواز چيو ته سويلين مارشل لا، مارشل لا جو بدترين قسم آهي.

 

ايڇ آءِ وي تي ڪنٽرول ۽ پکيڙجڻ کي روڪڻ لاءِ 600 ملين رپيا مختص، متاثرن جي بحاليءَ لاءِ ھڪ ارب فنڊ قائم ڪيو آھي: وڏو وزير

ڪراچي (اسٽاف رپورٽر) وڏي وزير سيد مراد علي شاهه چيو آھي تھ سندس ايڇ آءِ وي تي ڪنٽرول ۽ ان جي پکيڙجڻ کي روڪڻ لاءِ 600 ملين رپيا مختص ڪيا آھن ۽ ايڇ آءِ وي کان متاثر ماڻھن جي بحاليءَ لاءِ ھڪ ارب رپين جو انڊومينٽ فنڊ پڻ قائم ڪيو آھي. ھن اھا ڳالھھ اڄ امريڪا جي ھڪ وفد گليڊ سائنسز سان ھڪ اجلاس جي صدارت ڪندي ڪئي، وفد جي اڳواڻي تنظيم جي نائب صدر ڪلفورڊ سيميول ڪري رھيو ھو، وفد جي ٻين ميمبرن ۾ سينئر ڊائريڪٽر ڏکڻ ايشيا مس ھيما سرينيوسن، سينئر ڊائريڪٽر گورنمينٽ افيئرز ايشيا پيسفڪ جو ڪيلوڊيو ليلن فيلڊ ۽ فيروز سنز ليب جي سي اِي او عثمان خالد وحيد شامل ھئا. وڏي وزير چيو تھ سندس جڏھن ضلعي لاڙڪاڻي جي شھر نئون ديرو ۾ ايڇ آءِ وي کان متاثر ڪجھھ ماڻھن بابت ٻڌو تھ انھن متاثر ماڻھن جي اسڪريننگ لاءِ خاص ٽيمون اماڻيون. ھن چيو تھ اسان معاملي کي ڌٻائڻ بدران علائقي جي ماڻھن جي اسڪريننگ ڪرڻ کي ترجيح ڏئي رھيا آھيون. مراد علي شاھھ چيو تھ 32151 ماڻھن جي اسڪريننگ ڪئي وئي جنھن مان 936 بشمول 770 ٻار ۽ 166 نوجوان ايڇ آءِ وي پازيٽوِ متاثر ھئا. ھن چيو تھ انھن 936 مريضن مان 47 سيڪڙو مرد ۽ 53 عورتون شامل آھن. وڏي وزير ايڇ آءِ وي مريضن جي ڄمار بابت ٻڌائيندي چيو تھ 936 ايڇ آءِ وي پازيٽِوِ ڪيسن ۾ 56 مريض 5 ورھين جي ڄمار جا آھن جڏھن تھ 26 سيڪڙو جي ڄمار 5 کان 14 ورھيا، 16 سيڪڙو 15 کان 45 ورھيا ۽ 2 سيڪڙو 45 کان وڌيڪ واري ڄمار آھي. وڏي وزير سندس حڪومت پاران ڪيل اپائن بابت ٻڌائيندي چيو تھ چلڊرين اسپتال لاڙڪاڻي ۾ نئون پيڊرياٽرڪ ٽريٽمنٽ سينٽر قائم ڪري رھيا آھيون ۽ اھڙو ھڪ سينٽر تعلقي اسپتال رتوديرو ۾ پڻ قائم ڪري رھيا آھيون. سنڌ بلڊ ٽرانسفيوزن اٿارٽي (ايس بي ٽي اي) غيرقانوني بلڊ بينڪ خلاف آپريشن شروع ڪيو آھي ۽ اتائي ڪلينڪن کي پڻ سيل ڪيو ويو آھي. ھن چيو تھ ان سان گڏ ڪجھھ ننڍا پروگرام جھڙوڪ ليڊي ھيلٿ ورڪرز، اي پي آءِ، نيوٽريشن، ايم اين سي ايڇ، ھيپاٽائيٽس بھ موئثر ريت رتوديرو ۽ لاڙڪاڻي ۾ جاري آھن. ھن چيو تھ اسان لاڙڪاڻي ۾ آٽو لاڪ سرنج بھ متعارف ڪرائي آھي. مراد علي شاھھ چيو تھ بين الاقوامي اين جي اوز ۽ يو اين ايجنسين جھڙوڪ يونيسيف، ڊبليو ايڇ او، يو اين ايڊ، جي ايف اي ٽي ايم، يو ايس ايڊ-جي ايس آءِ کي فني سھڪار لاءِ آن بورڊ ورتو ويو آھي. ھن چيو تھ آغا خان يونيورسٽي اسپتال، ايس آءِ يو ٽي ۽ ٻيا ادارا علاج، اسڪريننگ، لاڳاپيل ميڊيڪل آفيسرن ۽ ٽيڪنيڪل اسٽاف جي صلاحيتن ۾ واڌ ۾ سھڪار ڪري رھيا آھن. واضح رھي تھ ڊبليو ايڇ او مشن رتيديري، لاڙڪاڻي جو ھڪ ھفتي وارو دورو ڪيو ۽ ايڇ آءِ وي ٽريٽمنٽ سينٽرن تي ٽيسٽنگ ۽ علاج سميت فزيشن جي سکيا تي ڌيان ڏنو ويو. وڏي وزير ڊبليو ايڇ او واري ايڇ آءِ وي آئوٽ بريڪ بابت ٽي مشن جو اھتمام ڪرڻ ۽ 600 ايڇ آءِ وي پازيٽو ٻارن کي ٽن مھينن لاءِ ضروري دوائون فراھم ڪرڻ تي ٿورا مڃيا. ھن يونيسف، اين اي سي پي، گلوبل فنڊ، يو اين ايڊ، يو اين ايف پي اي، يو ايس ايڊ، نئين زندگي ٽرسٽ، اي ڪي يو ايڇ، ايس آءِ يو ٽي، ڊي يو ايڇ ايس ۽ اي پي ايل ايڇ آءِ وي جو بھ سندس حڪومت سان گڏ ايڇ آءِ وي جي پکيرجڻ کي روڪڻ ۽ متاثر ماڻھن جي علاج ۾ سھڪار ڪرڻ تي ٿورا مڃيا. گليڊ سائنسز جي نائب صدر ڪلفورڊ سيميول وڏي وزير کي سندس اداري پارنا سھڪار جي آڇ ڪئي. وڏي وزير سيڪريٽري صحت سعيد اعواڻ کي ھدايت ڪئي تھ گليڊ سائنسز جي وفد سان اجلاس منعقد ڪري ۽ جتي سندن سھڪار جي گھرج آھي ان تي خيالن جي ڏي وٺ ڪئي وڃي. ھن چيو تھ مان سروسز ۾ ڊپليڪيشن نھ ٿو چاھيان پر ان جي جتي ضرورت ھجي اتي ان جي لازمي وضاحت ٿيڻ گھرجي.

 

شاهد خاقان کي گرفتاري جي خبر هئي، ايل اين جي ڪيس ۾ اڃان به ڪيتريون ئي گرفتاريون ٿينديون؛ شيخ رشيد

اسلام آباد(ويب ڊيسڪ) ريلوي واري وفاقي وزير شيخ رشيد احمد اڳوڻي وزير اعظم شاهد خاقان عباسي جي گرفتاري تي رد عمل ڏيندي چيو آهي ته ايل اين جي ڪيس ۾ اڃان به ڪيتريون ئي گرفتاريون ٿينديون. تفصيل موجب شيخ رشيد احمد جو چوڻ هو ته شاهد خاقان عباسي کي خبر هئي ته اڄ سندس گرفتاري ٿيندي، هن پهرين کان طئي ڪيو هو ته نيب ۾ پيش نه ٿيندس. سندس چوڻ هو ته شاهد خاقان عبس کي ته اڄ نيب طلب ڪيو هو ڪيڏانهن وڃي رهيو هو، سپريم ڪورٽ ايل اين جي جا سمورا دستاويز نيب کي ڏئي ڇڏيا هئا. هن اِهو به چيو ته مون وٽ جيترا به دستاويز آهن عدالت ۾ جمع ڪرائي چڪو آهيان، 90 ڏينهن ۾ وڏن وڏن ڪيسن جا فيصلا ٿي ويندا. شيخ رشيد جو چوڻ هو ته اِها گرفتاري منهنجي لاءِ ڪا نئين خبر ناهي، چيو هو ته ڪيترن ئي اهم ڪيسن جا فيصلا ٿيندا. هن وڌيڪ چيو ته جيڪو شخص جيتريون رڙيون ڪري رهيو آهي ان جو ڪيس اوترو ئي وڏو آهي، آسان نسخو ٻڌائي ڇڏيو آهي جيڪو وڏيون رڙيون ڪري رهيو آهي ايندڙ وارو ان جو ئي آهي.

 

جج ويڊيو اسڪينڊل: ايف آءِ اي ٽيم جو ميان طارق جي دڪان ۽ آفيس تي ڇاپو، اهم دستاويز هٿ

ملتان (ويب ڊيسڪ) ايف آءِ اي جي سائبر ڪرائم ونگ جج ارشد ملڪ جي ويڊيو جي اهم ڪردار ميان طارق جي دڪان ۽ آفيس تي ڇاپو هڻي هم دستاويز ۾ قبضي ۾ وٺي ڇڏيا. اسلام آباد جي ايف آءِ اي سائبر ڪرائم ونگ ملتان ۾ ڪارروائي ڪندي جج ارشد ملڪ جي ويڊيو جي اهم ڪردار ميان طارق جي دڪان ۽ آفيس تي ڇاپو هنيو، جنهن دوران اهم دستاويز ۽ ڊوائس قبضي ۾ ورتي وئي. ايف آءِ اي ٽيم ميان طارق جي گهر به وئي ۽ گهر ڀاتين کان ساڍن ٽن ڪلاڪن تائين پڇا ڳاڇا ڪئي، جنهن کانپوءِ ٽيم اسلام آباد رواني ٿي وئي. واضح رهي ته ايف آءِ اي جج ارشد ملڪ خلاف ويڊيو اسڪينڊل ۾ ملوث جوابدار ميان طارق کي ڪالهه گرفتار ڪيو هو.

 

نيب جو نالو تبديل ڪري ن ليگ احتساب بيورو رکيو وڃي، عمران خان کي پاڪستاني هٽلر ٿيڻ نه ڏينداسين: احسن اقبال/مريم اورنگزيب

لاهور ( ويب ڊيسڪ ) مسلم ليگ ن اڳواڻن چيو آهي ته ڀلي سڀني کي جيل ۾ وڌو وڃي، اسان جي آواز کي دٻائي نه ٿو سگهجي، عمران خان جي ڌمڪين کان نه ڊڄنداسين. لاهور ۾ ميڊيا سان ڳالهائيندي احسن اقبال چيو ته اڄ وري جمهوريت لاءِ هڪ ڪارو ڏينهن آهي، ووٽن سان چونڊيل وڌيڪ هڪ وزيراعظم کي نيب گرديءَ جو نشانو بڻايو ويو آهي. هن چيو ته پاڪستان جي تاريخ ۾ اهڙي ڪا حڪومت نه آئي آهي جنهن کي هر پاسي کان ٿڌي هوا ملي هجي، حڪومت ملڪي معيشت کي ڏيوالي طرف وٺي وڃي رهي آهي. سندس چوڻ هو ته موجوده حڪومت جي اسڪينڊل تي پردا وڌا پيا وڃن، نيب جو نالو تبديل ڪري ن ليگ احتساب بيورو رکيو وڃي، اسان عمران خان کي پاڪستاني هٽلر ٿيڻ نه ڏينداسين. مريم اورنگزيب چيو ته غير تصديق ٿيل گرفتاري وارنٽ جي فوٽو ڪاپي تي اڳوڻي وزيراعظم کي گرفتار ڪيو ويو آهي.