تازيون خبرون

Category Archives: فن ۽ تفريح

مهوش حيات شادي بابت خاموشي ٽوڙي ڇڏي

اسلام آباد (شوبز نيوز) مشهور اداڪاره مهوش حيات شادي بابت خاموشي ٽوڙيندي چيو آهي ته جاڪو به منهنجو مڙس ٿيو کيس منهنجي خودمختيار هجڻ تي ڪو اعتراض نه هجڻ گهرجي. اداڪاره پنهنجي تازي انٽرويو ۾ چيو ته آئون پنهنجي ڪم سان شادي ڪري چڪي آهيان ڇو جو اڃان تمام گهڻا ڪم آهن جيڪي آئون ڪرڻ چاهيان ٿي ۽ ڪجهه حاصل ڪرڻ چاهيان ٿي ، آئون هڪ خودمختيار شخصيت آهيان ۽ پنهنجي مالي مدد پاڻ ڪري سگهان ٿي. مهوش حيات پنهنجي ڊريم پراجيڪٽ جي حوالي سان پڻ خواهش جو اظهار ڪندي چيو ته آئون ايڪشن سان ڀرپور فلم ۾ ڪم ڪرڻ پسند ڪندس جيڪا عورتن جي سپر هيرو جي حوالي سان هجي، اصل ۾ هالي ووڊ وٽ تمام گهڻيون عورت سپر هيروز آهن ان ڪري اسان وٽ به ته هجڻ گهرجي.

 

انجلينا جولي پنهنجي نالي جي آخر تان ”پٽ“ هٽائي ڇڏيو

لاس اينجلس (شوبز نيوز) هالي ووڊ اداڪاره انجلينا جولي بريڊ پٽ سان باقاعده عليحدگي کانپوءِ پنهنجي نالي جي آخر تان ”پٽ“ هٽائي ڇڏيو آهي. سڌ سماءُ وارن ذريعن موجب انجلينا جولي بريڊپٽ کان باضابطه طور ڌار ٿيڻ جي کانپوءِ پنهنجي نالي جي آخر تان ”پٽ“ هٽائي ڇڏيو آهي، پر عدالت ۾ ڌار ٿيڻ لاءِ ڏنل دستاويز ۾ انهن 6 ٻارن جن مان 3 هنج ورتل ۽ 3 ٻارڙين بريڊ پٽ جي نالن سان جولي-پٽ وضاحت طور برقرار رکيو ويندو. واضع رهي ته انجلينا جولي ذهني مطابقت ۽ وڏي هنج ورتل ويتنامي پٽ ميڊوڪس سان بريڊ جي مبينا طور بد سلوڪي جي الزام ۾ سيپٽمبر 2016ع ۾ بريڊ پٽ کان ڌار ٿيندي عدالت ۾ طلاق جي درخواست داخل ڪئي هئي پر هاڻي ٻئي باضابطه طور ڌار ٿي ويا آهن پر باضابطه طلاق جي ڪاروائي اڃان مڪمل ناهي ٿي.

 

سجل کانپوءِ سندس ڀيڻ صبور علي به فلم ۾ اداڪاري جا جوهر ڏيکاريندي

ڪراچي(شوبز نيوز) اداڪارا ۽ ماڊل سجل علي جي ڀيڻ صبو علي به وڏي اسڪرين تي پنهنجي فني صلاحيتن کي هيروئن طور مڃائڻ لاءِ جدوجهد شروع ڪري ڇڏي، ٽي وي ڊرامن ۾ پنهنجي متاثر ڪندڙ پرفارمنس کانپوءِ هاڻ هوءَ فلمن ۾ جلوا ڏيکاريندي.اداڪارا صبور کي هدايتڪار اسد ممتاز پنهنجي نئين فلم ۾ عاشق ۾ هيروئن طور سائن ڪري ورتو آهي جنهن جي شوٽنگ جلد شروع ٿيندي، فلم جي ٻين فنڪارن ۾ باجرا يامين، حمزا فردوس، سليم معراج ۽ عدنان شاهه ٽيپو شامل آهن.صبور ان کان اڳ هدايتڪار نبيل قريشي جي فلم ايڪٽر ان لا ۾ معاون اداڪارا طور ڪم ڪري فلمي ڪيريئر جي شروعات ڪري چڪي آهي، فلم ۾ ڀارتي اداڪار اوم پوري به ڪردار ادا ڪيو هو.

 

ڀارت ۾ ڪم ڪرڻ لاءِ هاڻي به آڇون موجود آهن: وينا ملڪ جي دعويٰ

لاهور (شوبز نيوز) پاڪستاني اداڪاره ۽ ٽي وي ميزبان وينا ملڪ چيو آهي ته ڀارت ۾ ڪم ڪرڻ لاءِ هاڻي به آڇون موجود آهن، پر هاڻي آئون ڪڏهن به ڀارت نه وينديس. وينا ملڪ جو چوڻ هو ته پنهنجي مرضي موجب ڀارتي فلمي صنعت ۾ ڪم شروع ڪيو هو ۽ پنهنجي مرضي سان ئي ڀارت ۾ ڪم ڪرڻ ڇڏي ڏنو آهي. هڪ انٽرويو ۾ وينا ملڪ چيو ته هاڻي ڪيتري به وڏي آڇ ڪئي وڃي يا سلمان خان ۽ شاهه رخ سان گڏ ڪم ڪرڻ جو چيو وڃي، پر پوءِ پاڪستان ڇڏي ڪم لاءِ ڀارت نه وينديس. هن چيو ته ڀارت ۾ ڪم دوران ڌمڪيون به مليون آهن، پر مون ڪڏهن ڌمڪين تي ڌيان ناهي ڏنو، ڀارت ۾ ڪم نه ڪرڻ جو سڀ کان وڏو سبب اتي پاڪستاني فنڪارن کي اهميت نه ڏيڻ آهي.

 

سلمان خان، دپيڪا پڊوڪون سان ڪم نه ڪرڻ بابت ٻڌائي ڇڏيو

ممبئي (ويب ڊيسڪ) سبالي ووڊ مداح سلمان خان ۽ دپيڪا پڊوڪون کي به فلم ۾ گڏ ڏسڻ چاهيندا آهن ڇو جو هن وقت تائين ٻنهي گڏجي ڪنهن به فلم ۾ ڪم ناهي ڪيو پر ان جو سبب ڪهڙو آهي؟ سلمان خان پهريون ڀيرو ان راز تان پڙدو کٽي ڇڏيو. ميڊيا طرفان پڇيل سوال جو جواب ڏيندي هن دلچسپ انداز ۾ چيو ته سچ ڳالهه ته اها آهي جو مان پاڻ  به حيران آهيان ته دپيڪا پڊوڪون سان گڏ ڪڏهن ڪم ڪندس. سلمان خان ان پٺيان انا پرستي کي سبب قرار ڏيڻ بابت خبرن کي رد ڪري ڇڏيو ۽ کلندي چيو ته هن وقت تائين ڪنهن به مونکي دپيڪا سان ڪاسٽ ئي ناهي ڪيو. دپيڪا پڊوڪون هڪ سپر اسٽار آهي ۽ هن سان ڪم ڪرڻ لاءِ مونکي هن جي لائق ٿيڻو پوندو.

 

ڀارتي ميڊيا صحيح ڪردار ادا نه پئي ڪري: ننديتا داس

ممبئي (شوبز نيوز) ڀارتي ميڊيا جي زهر اوڳاڇيندڙ پراپيگينڊا کي جتي عالمي سطح تي ڪوڙو قرار ڏنو ويو اتي پاڪستان ۾ دوکي تي ٻڌل ڀارتي حملي بابت حقيقتون سامهون اچڻ تي ڀارت ۾ ان کي شديد تنقيد جو نشانو بڻايو ويو آهي. ميڊيا رپورٽن موجب بالي ووڊ اداڪارا ننديتا داس ڀارتي ميڊيا کي بي جي پي جي پراپيگينڊا مشين قرار ڏئي ڇڏيو آهي. ننديتا داس سوشل ميڊيا تي ڀارتي ميڊيا کي تنقيد جو نشانو بڻائيندي چيو آهي ته پلوامه حملي بعد ڀارتي ميڊيا ثابت ڪري ڇڏيو ته اهي حڪمران جماعت ڀارتيا جنتا پارٽي جي پراپيگينڊا مشين آهن. سندس چوڻ هو ته ڀارتي ميڊيا پنهنجون پيشيوراڻيون خدمتون انجام ڏيڻ بدران ناڪاري پراپيگينڊا سان عوام کي جنگ لاءِ مڇرائي رهي آهي.

 

ماڊل لائبا خان پنهنجي نئين وڊيو سبب خوش بڻيل

لاهور (شوبز نيوز) پاڪستاني اداڪاره ۽ ماڊل لائبا خان پنهنجي نئين وڊيو “اينڊ هوگيا” جي ڪاميابي تي پرجوش آهي. اداڪاره ۽ فنڪاره ميگهاجي ۽ ڀارتي ڀنگڙا اسٽار وريندر سنگهه جي ڳايل گاني “اينڊ هوگيا” کي ميگهاجي آفيشل چينل تي رليز ڪيو ويو آهي، جنهن جي ڀارت ۾ مشهوري مهم جاري آهي. ان وڊيو ۾ اداڪاره لائبا خان ماڊلنگ ڪئي هئي، جنهن ۾ لائبا جي ڪم کي گهڻو پسند ڪيو پيو وڃي. لائبا خان جو چوڻ آهي ته کيس گهڻي خوشي ٿي رهي آهي ته سندس نئون وڊيو دنيا ۾ مقبوليت ماڻي رهيو آهي، ان جو واضح ثبوت سڄي دنيا مان ملندڙ ڪمينٽس ۽ مبارڪون آهن. لائبا خان وڌيڪ چيو ته ان ڪاميابي جو سمورو ڪريڊٽ هوءَ ميگهاجي کي ڏئي ٿي، جنهن اهو گانو ڳايو ۽ پروموٽ ڪيو، مان مستقبل ۾ به ميگهاجي سان اهڙا پراجيڪٽس ڪندي رهنديس.

 

ٿولهه سبب ڪو ڪم ڪرڻ لاءِ تيار ناهي: زارا نور

ڪراچي (شوبز نيوز) مشهور اداڪاره زارا نور عباس انڪشاف ڪيو آهي ته سندس جسماني بناوت سبب ڪيترين ئي ڪمپنين ساڻس گڏ ڪم ڪرڻ کان انڪار ڪيو آهي. ڊراما سيريل “خاموشي” سان مشهوري ماڻيندڙ اداڪاره موجب ٿلهي جسامت نه رکڻ سبب مختلف برانڊز کيس تمام وڏي يا گهڻي ويڪري به چئي ڇڏيو ۽ تنقيد ڪئي. هڪ ليبل ته ساڻس ڪم ڪرڻ کان ئي انڪار ڪري ڇڏيو ته هوءَ سمارٽ ناهي. زارا ڊگهي پوسٽ ۾ پنهنجو پاڻ کي قبولڻ جي ڪهاڻي بيان ڪئي. هن لکيو ته هڪ سٺي ڏينهن، جڏهن مون کي اهي ڳالهيون پريشان ڪري رهيون هيون ته مون پاڻ ڏانهن ڏٺو ۽ پاڻ کي ئي ٻڌايو ته مان سدائين ڪنهن ڳالهه ته رکندي هئس ته ”مان جيڪا آهيان سا آهيان“ مان هڪ اهڙي ڇوڪري آهيان، جيڪا پاڻ سان پيار ڪري ٿي، مان جهڙي آهيان، ان حالت ۾ ئي ڪم مليو ته ٺيڪ نه ته ڪير زحمت نه ڪري. زارا جو ايندڙ پراجيڪٽ وجاهت رئوف جي نئين ايندڙ فلم ”ڇلاوا“ آهي، جيڪا عيدالفطر جي موقعي تي رليز ٿيندي.

 

ورن ڌون زال جي خوبي ٻڌائي ڇڏي

ممبئي (شوبز نيوز) ڪافي ود ڪرن شو ۾ هڪ ڳاله جيڪا ڪرن پنهنجي مهمانن کان پڇڻ ڪڏهن به ناهي وساريندو اهو سندن لاڳاپن ۽ ويجهن ساٿين بابت سوال آهي. ورن ڌون ۽ ڪترينا ڪيف سندس شو ۾ شرڪت ڪئي ته هن ساڳيو موضوع کوليو ۽ ورن ڌون سميت ڪترينا کان سندس بريڪ اپ ۽ سنگل رهڻ بابت به پڇيو. شو دوران ورن ڌون جا نتاشا دلال سان ڊگها لاڳاپا به دلچسپي جو موضوع رهيا. باليووڊ اداڪار ورن ڌون چيو ته نتاشا ساٿي طور سدائين کيس همتايو ۽ مدد ڪئي آهي، انڪري سندس به ذميواري بڻجي ٿي ته هو نتاشا جي خوابن ۽ خواهشن جو خيال رکي. ان بابت ڳالهائيندي اداڪار چيو ته نتاشا جي انفراديت ان جو سبب آهي ته مان نتاشا سان گڏ آهيان. هن چيو ته مان نتاشا کي اسڪولي دور کان سڃاڻان ٿو هوءَ شادي اڳ ۽ پوءِ به منهنجي ڪيريئر لاءِ مددگار رهي آهي، منهنجو به فرض آهي ته ساڻس سٺو رهان ۽ سندس خيال ڪريان.

 

مردان ۾ اداڪاره لبنيٰ گلالئي جو تشدد ٿيل لاش هٿ

مردان(م.ڊ) مرادن ۾ مقامي اداڪاره لبنيٰ گلالئي جو تشدد ٿيل لاش هٿ آيو آهي. رپورٽن مطابق مردان جي ٿاڻي چوره جي حد ۾ مقامي اداڪاره لبنيٰ گلالئي جو تشدد ٿيل لاش هٿ آيو آهي، قتل جو ڪيس مقتولا جي امڙ جي فرياد تي ٽن جوابدارن خلاف داخل ڪيو ويو آهي. مقتول اداڪاره جي امڙ جو چوڻ آهي ته ڌيءُ مڙس کان ناراض ٿي گهر آئي هئي، نواب، فضل مالڪ ۽ شاهه حسين ڌيءَ کي ٻيهر گهر  وٺي وڃڻ لاءِ آيا، ٽئي جوابدار ناٺي جا دوست آهن. مقتولا جي امڙ مطابق ڌيءَ جي واپسي جي ڪجهه دير کانپوءِ رابطي جي ڪوشش ڪئي پر سندس نمبر بند مليو،واقعي کانپوءِ ناٺي به روپوش آهي.