تازيون خبرون

Category Archives: ايڊيٽوريل

چونڊن جا اڻپورا سرڪاري نتيجا..!

اليڪشن ڪميشن طرفان قومي ۽ صوبائي اسيمبليءَ جي ڪامياب اميدوارن جو نوٽيفڪيشن جاري ڪيو ويو. قومي اسيمبليءَ جي تڪ اين اي 53 اسلام آباد، اين اي 35 بنون، اين اي 95 ميانوالي، اين اي 243 ڪراچيءَ تان تحريڪ انصاف جي سربراهه عمران خان جي ڪاميابيءَ جو نوٽيفڪيشن جاري ڪندي ان کي ضابطه اخلاق جي ڀڃڪڙيءَ جي ڪيس جي حتمي فيصلي سان مشروط ڪيو آهي. اين اي 129 لاهور تان قومي اسيمبليءَ جي اسپيڪر اياز صادق جي ڪاميابيءَ جو نوٽيفڪيشن به جاري ڪندي ان کي ضابطه اخلاق جي ڀڃڪڙي جي حتمي فيصلي سان مشروط ڪيو ويو آهي. اين اي 25 نوشهره تان ڪامياب اميدوار پرويز خٽڪ جي نوٽيفڪيشن کي اليڪشن ڪميشن طرفان ضابطه اخلاق جي ڀڃڪڙيءَ جي ڪيس جو حتمي فيصلو اچڻ سان مشروط ڪيو ويو آهي. اين اي 131 لاهور تان ڪاميابيءَ جو نوٽيفڪيشن لاهور هاءِ ڪورٽ جي فيصلي جي روشني ۾ روڪيو ويو آهي. قومي ۽ صوبائي اسيمبلين جي 34 تڪن جو نوٽيفيڪيشن  ڪيس عدالتن ۾ ٻڌڻي هيٺ هئڻ يا چونڊ ملتوي ٿيڻ سبب جاري نه ٿي سگهيو.   اين اي 60 راولپنڊي ۽ 103 فيصل آباد ۾ چونڊ ملتوي ٿيڻ سبب  نوٽيفيڪيشن جاري نه ٿي سگهيو، ٽوبه ٽيڪ سنگهه، اين اي 140 قصور جو نوٽيفيڪيشن لاهور هاءِ ڪورٽ جي فيصلي جي روشني ۾ روڪيو ويو آهي. اين اي 215 سانگهڙ جو نتيجو سنڌ هاءِ ڪورٽ جڏهن ته اين اي 271 ڪيچ جو نتيجو ڪامياب اميدوار زبيده جلال طرفان  چونڊن جي خرچن جو تفصيل جمع نه ڪرائڻ سبب جاري ناهي ڪيو ويو، اهڙي طرح پنجاب اسيمبلي جي تڪ پي پي 76 سرگوڌا، پي پي 118 ٽوبه ٽيڪ سنگهه، پي پي 123 ٽوبه ٽيڪ سنگهه، پي پي 77 قصور تان ڪامياب اميدوارن جو نتيجو لاهور هاءِ ڪورٽ جي فيصلي جي روشني ۾ روڪيو ويو آهي جڏهن ته  پي پي 103 فيصل آباد ۽ پي پي 87 ميانوالي ۾ اميدوارن جي وفات سبب چونڊ ملتوي ڪئي وئي هئي. پي پي 296 راجن پور تان ڪامياب اميدوار جي وفات سبب نوٽيفڪيشن روڪيو ويو. سنڌ اسيمبليءَ جي تڪ پي ايس 29 خيرپور، پي ايس 36 نوشهروفيروز، پي ايس 48 ميرپورخاص، پي ايس 54 ٿرپارڪر، پي ايس 82 ڄامشورو جو نتيجو سنڌ هاءِ ڪورٽ جي فيصلن جي روشنيءَ تحت جاري ناهي ڪيو ويو،

 

ڪالا باغ ڊيم بابت سنڌي خدشن جي تصديق….!

واٽر اينڊ پاور ڊويلپمينٽ اٿارٽي (واپڊا) جي چيئرمين ڪالا باغ ڊيم تي سنڌ جي خدشن کي بالڪل درست قرار ڏئي ڇڏيو  آهي. سينيٽر شميم آفريدي جي صدارت هيٺ سينيٽ جي اسٽيڊنگ ڪميٽي  جو اسلام آباد ۾ اجلاس ٿيو. چيئرمين واپڊا مزمل حسين شرڪت ڪندڙن کي بريفنگ ڏيندي ٻڌايو ته جيستائين اتفاق راءِ نه ٿيندي ڪالا باغ ڊيم تي ڪم شروع نه ڪنداسين، جيڪڏهن ڪالا باغ ڊيم تعمير ٿيو ته ان جو آپريشن سنڌ جي حوالي ڪئي وڃي، سنڌ جا خدشا درست آهن، سنڌ کي خدشو آهي ته ڪالا باغ ڊيم مان پنجاب کي پاڻي ڏنو ويندو. . واپڊا چيئرمين پاڻي کوٽ جو حل  ملڪ ۾ ڪمند جو فصل پوکڻ جي مخالفت ڪندي ڪڍيو آهي، سندس  چوڻ آهي  ته ڪمند ۽ ٻين وڌيڪ پاڻي استعمال ڪندڙ فصلن جي پوک گهٽ ڪرڻ گهرجي، پنجاب ۽ سنڌ ۾ آبپاشي جي لاءِ استعمال ٿيندڙ 50 سيڪڙو پاڻي ضايع ٿي ويندو آهي، پاڻي ماپڻ جي لاءِ لڳايل ٽيلي  ميٽري سسٽم به ٽوڙيو ويو آهي، پاڪستان وٽ 30 ڏينهن جو پاڻي جو ذخيرو ڪرڻ جي صلاحيت آهي، ڀارت 170 ڏينهن جي لاءِ پاڻي ذخيرو ڪرڻ جي صلاحيت رکي ٿو. ڀارت وٽ 943 ڊيم آهن، پاڪستان وٽ رڳو 155 ننڍا وڏا ڊيم آهن، پاڻي جي چوري سڀ کان وڏو مسئلو آهي، نو لک 60 هزار ٽيوب ويلز ملڪ ۾ هلي رهيون آهن جنهن جي ڪري زمين هيٺ پاڻي گهٽ ٿي ويو آهي، نيسپاڪ ۾ 192 سفارشي ڀرتي ڪيا ويا آهن، سياسي ڀرتين جي ڪري اِهو ادارو تباهه ٿي چڪو آهي.

جي يو آءِ ف جنرل سيڪريٽري علامه راشد محمود سومرو  به ڪالاباغ ڊيم جي مخالفت ڪندي چيو آهي ته ڪالاباغ ڊيم جو نالو تبديل ڪري مڪو مدينو رکيو تڏهن به قبول نه هوندو،  ڪالا باغ ڊيم ڪنهن به صورت ۾ قبول نه آهي، ڪالاباغ ڊيم کي سنڌ، ڪي پي ڪي ۽ بلوچستان اسيمبليون رد ڪري چڪيون آهن، قانون موجب عدليا ڪالاباغ ڊيم ٺاهڻ بابت فيصلو نٿي ڏئي سگهي، جي يو آءِ ڪنهن به صورت ۾ ڪالاباغ ڊيم ٺاهڻ نه ڏيندي، سنڌ ۾ لکين ايڪڙ بنجر بڻجي وئي آهي، عالم سڳورن گڏيل طور تي ڪالاباغ ڊيم خلاف فتويٰ ڏني آهي، سنڌو دريا جو پاڻي ڪوٽڙي بئراج تائين نه پيو پهچي، سمنڊ 26 لک ايڪڙ زمين ڳڙڪائي ويو آهي، شهيد خالد محمود سومرو ڪالاباغ ڊيم جي خلاف جدوجهد ڪري فتوا جاري ڪرائي،. جڏهن ته ان سان گڏ ڪالاباغ ڊيم خلاف احتجاجي مارچ ڪيا ويا هئا جيڪي تاريخ جو حصو آهي.

 

پي ٽي آءِ جا 11 نڪتا…!

گذريل ڏينهن ن ليگ جي مرڪز  لاهور جي گريٽر اقبال پارڪ ۾ جلسي کي خطاب ڪندي عمران خان  11 نڪتن جو اعلان ڪندي چيو ته علامه  اقبال اسان کي هڪ خواب ڏنو هو، هن ملڪ جو ڇا مقصد هو، جڏهن هڪ قوم پنهنجي نظرئي تان هٽندي آهي ته اها تباهه ٿي ويندي آهي. پاڻ سڳورن مديني جي رياست ۾ سڀ کان پهريان انصاف جو بنياد رکيو، قائداعظم جي سوچ هئي ته پاڪستان ۾ سڀني جا حق هڪ جهڙا هوندا. طاقتور ۽ غريب لاءِ لڳ قانون هجي ته قومون برباد ٿي وينديون آهن. پنهنجي نڪتن جا تفصيل ٻڌائيندي عمران خان چيو ته تعليم ۽ صحت لاءِ وڌيڪ رقم مختص ڪنداسين ملڪ هلائڻ لاءِ پيسو ناهي اهو گڏ ڪري ڏيکارينداسين، ملڪ ۾ هڪ جهڙو تعليمي نظام متعارف ڪرائينداسين. دنيا ۾ ڪو به ملڪ ترقي نٿو ڪري سگهي جنهن تعليم تي زور نه ڏنو هجي، سڀني ايشين ٽائيگرين پنهنجي ٻارن کي تعليم ڏئي ترقي حاصل ڪئي.پاڪستان ۾ 8 لک ٻار انگريزي ميڊيم اسڪول ۾ آهن جڏهن ته سوا ٽي ڪروڙ ٻار سرڪاري اسڪولن ۾ پڙهن ٿا ۽ 25  لک ٻار مدرسن ۾ پڙهي رهيا آهن جرمني ۽ جاپان جي حڪومتن ٻي عالمي جنگ کان پوءِ انساني وسيلن تي خرچ ڪيو تحريڪ انصاف حڪومت ۾ اچڻ کان پوءِ هڪ جهڙو تعليم نظام آڻيندي. صحت جو نظام بهتر بڻائينداسين، ملڪ ۾ اهڙيون اسپتالون ٺاهي ڏيکارينداسين جتي غريبن کي پئسا نه هجڻ جو ڪوبه فڪر نه هوندو. خيبرپختوخواهه 70 سيڪڙو خاندانن لاءِ هيلٿ ڪارڊ جي سهولت موجود آهي، سڄي ملڪ لاءِ هيلٿ ڪارڊ آڻينداسين، شوڪت خانم اسپتال ۾ 75 سيڪڙو علاج مفت ۾ ٿئي ٿو. ٽيڪس جو نظام صحيح ڪنداسين، اسان وٽ ملڪ هلائڻ لاءِ پئسو ناهي هوندو ۽ قرض ۾ ٻڏندا وياسين، اسان ملڪ کي قرضن مان نجات ڏيارينداسين. انهي پاڪستان قوم مان پئسو گڏ ڪري ڏينداسين، عوام کي اعتماد ٿي وڃي ته پئسو ڏيندو.  مون دعويٰ ڪئي ته هو موجودا حڪومت جي مقابلي ۾ ٻيڻي ٽيڪس حاصل ڪري ڏيکاريندو. ڪرپشن جو خاتمو ڪنداسين، ڪرپشن جو خاتمو ڪرڻ لاءِ نيب ۽ عدالتن کي مضبوط ڪنداسين، تمام چوري روڪيندڙ ادارن کي درست ڪنداسين، ڪڏهن ڪنهن ٻڌو آهي ته ڪنهن پارٽي 20 ميمبرن کي ڪرپشن سبب ڪڍيو هجي، اسان 20 اسيمبلي ميمبرن کي ڪرپشن ڪرڻ جي ڪري پنهنجي پارٽي مان ڪڍي ڇڏيو. اسان سرمائيڪاري اڻينداسين، ملڪ ۾ اهڙيون پاليسيون بڻائينداسين جنهن سان سرمائيڪاري وڌندي، پرڏيهي ۾ رهندڙ پاڪستاني سب کان وڌيڪ پئسو ملڪ ۾ آڻيندو ته هتي جي ماڻهن کي نوڪريون ملنديون. سرمائيڪاري آڻيندڙن لاءِ وزيراعظم هائوس ۾ هڪ ڌار سيل قائم ڪيو ويندو. جتي سندن رڪاوٽون ختم ڪيون وينديون. تحريڪ انصاف پنهنجي حڪومت ۾ بيروزگاري ختم ڪندي ۽ نوجوان کي نوڪريون ڏيندي، 50 لک سستا گهر بڻائينداسين ته جيئن غريب پنهنجي گهر جو مالڪ بڻجي سگهي. هريپور جيان اسڪل ۽ ٽيڪنيڪل تعليم ڏينداسين ته جيئن ماڻهو روزگار حاصل ڪن.

 

پنهنجي ئي حڪومت کان پڇاڻو…!!

اڳوڻي وزيراعظم نواز شريف  گذريل ڏينهن لاهور م ڪوٺايل اجلاس ۾ چيو  هو ته ايندڙ چونڊن ۾ اها سوچ ختم ڪنداسين ته جنهن تي ڳجهيون طاقتون هونديون آهن رڳو اهي ئي اليڪشن کٽي سگهن ٿا، مسلم ليگ ن ايندڙ چونڊن ۾ پنهنجي زور تي ضرور ڪاميابي حاصل ڪندي.   ايندڙ چونڊن ۾ ووٽ کي عزت ڏياري ويندي، پارٽي جا مخلص ڪارڪن ايندڙ چونڊن جي تياري ڪن. ملڪ ۾ ڪجهه ماڻهن جي خوشامد ۽ چاپلوسي ڪئي پئي وڃي، مشرف جي به خوشامد ڪئي وئي، ڇا ڪڏهن اسان ڪنهن اصول تي بيهنداسين.  پاڪستان ۾ چونڊيل نمائندن سان ناانصافي ڪئي پئي وڃي، جيڪڏهن دل ۾ عوام جو قدر نه هجي ته منصب نه رکڻ گهرجي، احسن اقبال درست چيو ته توهان جي عزت آهي ته سياستدانن جي به آهي. اسان کي پنهنجي سوچن ۽ ذهنن کي تبديل ڪرڻو پوندو. اسان خلاف ڪيسن ۾ ڪجهه ثابت نه ٿي سگهيو آهي، اهڙن ڪيسن ۽ زيادتين خلاف اٿي کڙو ٿيڻو پوندو. ذاتي مفادن لاءِ ملڪ ۽ قوم جي مفادن کي قربان ڪيو پيو وڃي. اڳوڻي بنگلاديش ترقي جي ميدان ۾ پاڪستان کان اڳتي نڪري چڪو آهي، اسان کي پنهنجي جيءَ ۾ جاتي پائڻ ڏسڻ گهرجي. ووٽ کي عزت ڏيو جو نعرو گهر گهر پهچي چڪو آهي، حڪومت پنهنجو مدو پورو ڪري رهي آهي. بنگلاديش ۽ سريلنڪا جي ڪرنسي به پاڪستان کان بهتر آهي، اسان هڪ وک اڳتي ۽ 2 وکون پوئتي ٿيندا رهياسين ته ڇا ٿيندو. ترقي ڪندڙ ملڪ هاڻي پوئتي وڃي رهيو آهي، پرويز خٽڪ جي وات مان نڪري ويو ته کيس مٿان کان آڊر مليو، اهڙي قسم جي سياست کي روڪي ئي جديد دنيا ۾ داخل ٿي سگهجي ٿو. وزيراعظم شاهد خاقان عباسي ۽ شهباز شريف ٻڌائين ته حڪومتي عملداري ڪٿي آهي.

 

سنڌ حڪومت ۽ آءِ جي پوليس وري آمهون سامهون..!

حڪومت جا ڏينهن هاڻي آڱرين تي ڳڻڻ جيترا بچيا آهن ان باوجود سنڌ سرڪار آءِ جي سنڌ پوليس خلاف نت نوان حربا استعمال ڪرڻ ۾ رڌل آهي،  قانون واري وزير ضياءَ الحسن لنجار جي صدارت هيٺ پوليس ايڪٽ بابت اعليٰ سطحي اجلاس گذريل ڏينهن ٿيو، ڄاڻ مطابق ته سنڌ سرڪار پاران نئين پوليس ايڪٽ بابت تيار ڪيل مسودي بابت آگاهي ڏيندي چيو ويو ته ايڪٽ کي سنڌ پوليس ايڪٽ 2018 جو نالو ڏنو ويو آهي، جنهن تي فوري عملدرآمد ڪيو ويندو، ان لاءِ پوليس ايڪٽ ۾ ترميم جو بل سنڌ اسيمبلي جي هلندڙ سيشن ۾ پيش ڪري منظور ڪرايو ويندو، جنهن ۾ آءِ جي جي مقرري ۽ ان خلاف ڪارروائي لاءِ وفاق کي وڏو وزير سفارش ڪندو. جي آءِ ٽي گهرو وزير جي منظوري سان جڙي سگهندي، نئين ايڪٽ تحت وفاقي حڪومت آءِ جي جي مقرري لاءِ وڏي وزير جي سفارش ڪيل ٽن نالن مان هڪ کي مقرر ڪرڻ جي پابند هوندي، خراب ڪارڪردگي تي وڏو وزير آءِ جي کي هٽائڻ لاءِ ڪارروائي ڪرڻ جو اختيار رکندو. جڏهن ته نئين ايڪٽ ۾ جاچ جا اختيار به گهرو کاتي کي ڏنا ويندا، جاچ ۾ عدالت به مداخلت نه ڪري سگهندي،  نئين پوليس ايڪٽ ۾ آءِ جي جا بدلين ۽ مقررين بابت اختيار گهٽائي صرف گريڊ هڪ کان گريڊ 16 سپاهي کان انسپيڪٽرن ۽ ايس ايڇ اوز تائين جا اختيار آءِ جي کي ڏنا ويا آهن، جڏهن ته گريڊ 17 جي آفيسر اي ايس پي ۽ ڊي ايس پي کي بدلي ڪرڻ جا اختيار گهرو وزير ۽ گريڊ 18 ۽ ان کان مٿي ايس پي کان آءِ جي تائين جي آفيسرن جي بدلين جا اختيار وڏي وزير کي هوندا. جڏهن ته جي آءِ ٽي به گهرو وزير جي حڪم سان ئي ٺهي سگهندي،  سنڌ سرڪار نئين ايڪٽ لاءِ پوليس کان 24 ڪلاڪن ۾ جواب گهريو آهي، جڏهن ته پوليس اختيارين نئين پوليس ايڪٽ تي خدشن جو اظهار ڪندي ان کي مڃڻ کان انڪار ڪري ڇڏيو ۽ چيو ته نئون پوليس ايڪٽ جي پيشواراڻي پوليس معاملن ۾ مداخلت آهي، مسودي ۾ ڪجهه انتظامي ۽ مالي معاملا به ڪورٽ جي حڪم جي ابتڙ آهن، آءِ جي پوليس اي ڊي خواجا سنڌ سرڪار جي نئين پوليس ايڪٽ تي اعتراض واريندي چيو ته آءِ جي جي مقرري جو مدو ٻه بدران 3 سال هجڻ گهرجي، ۽ خيبرپختونخوا وانگر سنڌ ۾ به پوليس جا سمورا معاملا آءِ جي وٽ هجڻ گهرجن، ان تي سنڌ سرڪار کي اعتراض نه هجڻ گهرجي، سنڌ سرڪار کي ڊرافٽ پهرين پوليس کي ڏيڻ گهرجي جيئن ان کي پڙهي تجويزون ڏئي سگهجن ها، تڪڙ ۾ ان تي ڪمينٽس نه ٿا ڏئي سگهجن، ان لاءِ وقت ڏنو وڃي، جيئن پوليس پنهنجو ڊرافٽ پيش ڪري سگهي، پوليس ريفارمز لاءِ سنڌ سرڪار، پوليس ۽ سول سوسائٽي کان مشورا ورتا وڃن. پوليس اختيارين ۽ سنڌ سرڪار وچ ۾ ڊيڊ لاڪ پيدا ٿيڻ بعد معاملي جي حل لاءِ سب ڪميٽي ٺاهي وئي جيڪا جلد کان جلد پوليس ايڪٽ تي ڪم ڪري ڌرين کان نيون تجويزون وٺي شامل ڪندي.

چونڊن کان اڳ فنڊ جي ورهاست ڇو..؟

سپريم ڪورٽ چونڊن کان اڳ پارليامينٽ ميمبرن کي ترقياتي فنڊ جاري ڪرڻ جو نوٽيس ورتو. چيف جسٽس ثاقب نثار جي سربراهيءَ ۾ سپريم ڪورٽ جي ٽه رڪني بئنچ هڪ ڪيس جي ٻڌڻي دوران پارليامينٽ ميمبرن کي ترقياتي فنڊ ڏيڻ جو نوٽيس ورتو. چيف جسٽس رمارڪس ڏيندي چيو ته اها ڳالهه سامهون اچي رهي آهي ته حڪومت چونڊن کان اڳ ميمبرن کي فنڊ جاري ڪري رهي آهي، ڇا ميمبرن کي ترقياتي فنڊ ڏيڻ جو عمل پري پول ڌانڌلي ۾ نه ٿو اچي؟ اليڪشن کان اڳ ڪروڙين رپين جا فنڊ ڪهڙي قانون تحت جاري ڪيا ويا آهن. ايڊيشنل اٽارني جنرل حڪومت کان فنڊ جاري ڪرڻ جي قانوني حيثيت پڇي عدالت کي آگاهه ڪري. ٿي سگهي ٿو ته چونڊن کان اڳ ترقياتي فنڊ جاري ڪرڻ تي پابندي لڳائي وڃي، سرڪاري فنڊن کي اسيمبلي ميمبرن جي صوابديد تي ڇڏي سگهجي ٿو. اها گائيڊ لائين هئڻ گهرجي ته سرڪاري اشتهار ڪنهن لاءِ هجڻ گهرجي، اهو ڪم اسان پنهنجي ذميواري سمجهي ڪري رهيا آهيون، حڪمران پنهنجي مشهوري لاءِ سرڪاري ناڻو استعمال نه ڪن پر سياسي مشهوري لاءِ پنهنجو پارٽي فنڊ استعمال ڪن، سرڪاري پئسي سان اشتهار پري پول ڌانڌلي آهي. چيف جسٽس حڪم ڏنو ته پ پ سرڪاري اشتهار ذريعي جيڪا پنهنجي سياسي مشهوري ڪئي اها رقم قومي ناڻي ۾ جمع ڪرائي وڃي. اي پي اين ايس جي وڪيل چيو ته عدالت ۾ گائيڊ لائين پيش ڪري رهيا آهيون، سرڪاري اشتهار ووٽ گهرڻ لاءِ استعمال نه ٿو ٿي سگهي ان سان سياسي مشهوري نه ملڻ گهرجي ۽ سياسي شخصيتن جي تصوير نه هئڻ گهرجي، سرڪاري منصوبن کان آگاهي عوام جو حق آهي. چيف جسٽس چيو ته اسان چاهيون ٿا ته سياسي ليڊر پنهنجون تصويرون اشتهار ۾ لڳائڻ بند ڪن، جيڪا تصوير لڳي آهي ان جا پارٽي اڳواڻن کان پئسا واپس ڪرايو، اهو معاملو هڪ ٻن ڏينهن ۾ حل ٿي ويندو جنهن تي ڪم ڪري رهيا آهيون. چيف جسٽس ايڊيشنل ايڊووڪيٽ جنرل عاصمه حامد کان پڇيو ته اشتهارن ۾ سياستدانن جون تصويرون شامل آهن. وڪيل چيو ته ها آهن. چيف جسٽس پڇيو ته ذاتي مشهوري جا پئسا ڪير ڏيندو؟ ڇا توهان 55 لک رپين جو پهريون چيڪ جمع ڪرائي ڇڏيو، هي معاملو سڄو ڏينهن ٻڌندس. ڪي پي ڪي جي اطلاعات سيڪريٽري چيو ته پهرين ڊسمبر 2017ع کان 28 فيبروري 2018ع تائين 24 ڪروڙن جا اشتهار ڏنا ويا جن ۾ عمران خان ۽ پرويز خٽڪ جون تصويرون لڳل ناهن. چيف جسٽس چيو ته سرڪاري اشتهارن تي 24 ڪروڙ رپيا لڳايا ويا آهن. سيڪريٽري چيو ته اهي اشتهار عوامي آگاهي ۽ فيڊ بيڪ لاءِ ڏنا ويا.

 

رضا رباني جي چيئرمين شپ، پ پ ۽ ن ليگ آمهون سامهون..

مسلم ليگ ن جي سربراهه ميان نواز شريف جي سربراهي ۾ اتحادي پارٽين جو اهم اجلاس ٿيو جنهن ۾ جي يو آءِ جي (ف) جي سربراهه مولانا فضل الرحمان، پشتونخوا ميپ جي محمود خان اچڪزئي ۽ نيشنل پارٽي جي حاصل بزنجو شرڪت ڪئي جڏهن ته اجلاس ۾ ن ليگ جا سينيٽر به موجود هئا. اجلاس ۾ نواز شريف اتحادي پارٽين جي سامهون تجويز رکي ته پيپلز پارٽي طرفان رضا رباني کي جيڪڏهن سينيٽ جي چيئرمين جي اميدوار طور سامهون آندو ويو آهي ته سندن فيصلي جي حمايت ڪئي وڃي. اطلاعن موجب نواز شريف جي تجويز کي اتحادي اڳواڻن طرفان بهتر ڳالهه قرار ڏنو ويو آهي ۽ تجويز جي ڀرپور حمايت ڪئي وئي.

اجلاس ۾ اهو به فيصلو ڪيو ويو ته جيڪڏهن رضا رباني کان سواءِ ٻئي ڪنهن اميدوار کي سامهون آندو ويندو ته ن ليگ ۽ سندس اتحادي پارٽيون ان جو ڀرپور مقابلو ڪنديون. طئي ٿيو ته سموريون اتحادي پارٽيون پهرين پنهنجا نمبر پورا ڪن،  نمبر گيم جو انگ پورو ٿيڻ کان پوءِ ڳالهيون ڪيون وينديون ۽ پوءِ سموريون اتحادي پارٽيون پنهنجا اميدوار سامهون آڻينديون. هوڏانهن وري نواز ليگ ۾ به اختلاف سامهون آيا آهن. وزيراعظم راجا ظفر الحق کي سينيٽ چيئرمين بڻائڻ جي مخالفت ڪئي آهي ۽ شهباز شريف پرويز رشيد جي مخالفت ڪئي آهي. اهڙي صورتحال ۾ مشاهد حسين ۽ حاصل بزنجو جي سينيٽ چيئرمين بڻجڻ جا امڪان وڌي ويا آهن. نواز ليگ اڳواڻن متحده اڳواڻن ڪامران ٽيسوري ۽ ٻين سان ملاقات ڪئي، اين اين پي سان به رابطا ڪيا آهن.

پ پ چيئرمين آصف زرداري مولانا فضل الرحمان سان ملاقات ڪئي، جنهن ۾ مولانا فضل الرحمان کانئس وقت گهري ورتو. مولانا فضل الرحمان چيو ته اسان اجلاس ۾ فيصلو ڪنداسين، ان موقعي تي صحافي آصف زرداري کان سوال ڪيو ته نواز شريف رضا رباني جي حمايت جو اعلان ڪيو آهي، جنهن تي زرداري جواب ڏنو. مهرباني، پر مان نه ٿو چاهيان. هوڏانهن پ پ سليم مانڊوي والا کي سينيٽ چيئرمين بڻائڻ گهري ٿي. پي ٽي آءِ، بوچستان مان انوار الحق کي ڊپٽي چيئرمين بڻائڻ جي تجويز ڏني آهي. سينيٽر قيوم سومري فاٽا جي سينيٽر سان ملاقات ڪئي. سجاد طوري چيو ته جيڪڏهن ڊپٽي چيئرمين فاٽا مان آيو ته قبائلي عوام لاءِ وڏي خوشي جو سبب بڻجندي.

 

شريف خاندان خلاف وڌيڪ ريفرنسن جي منظوري…

گذريل ڏينهن نيب چيئرمين جسٽس (ر) جاويد اقبال جي صدارت ۾ نيب جي ايگزيڪيوٽو بورڊ جو اجلاس ٿيو جنهن ۾ سياستدانن سميت مختلف هائوسنگ سوسائٽين ۽ ٻين جي خلاف انڪوائري جي منظوري ڏني وئي. نيب جي جاري ڪيل بيان موجب نيب 15 آف شور ڪمپنين جي مالڪ ذوالفقار بخاري، اين ٽي ايس انتظاميا، پيراگون سٽي انتظاميا سميت احد چيمه جي خلاف به انڪوائري جي منظوري ڏني آهي جڏهن ته نواز شريف جي خلاف ضمني ريفرنسز جي به منظوري ڏني وئي آهي. نواز شريف ۽ ٻين جي خلاف العزيزيه اسٽيل ملز، هل ميٽل ڪيس، فليگ شپ انويسٽمينٽ ۽ 15 ڪمپنين ۾ بدعنواني ۽ ايون فيلڊز ريفرنس ۾ به ضمني ريفرنس داخل ڪيا ويندا. نواز شريف جي خلاف چوڌري شگر ملز ۾ به ڪرپشن جي انڪوائري ڪئي ويندي جڏهن ته شهباز شريف، ڪلثوم نواز، حمزه شهباز ۽ مريم نواز جي خلاف به انڪوائرين جي منظوري ڏني وئي آهي جڏهن ته ملتان ميٽرو بس ۾ شڪي رقم جي منتقلي تي شهباز شريف جي خلاف جاچ جي منظوري ڏني وئي آهي. سرڪاري هيليڪاپٽر جي استعمال تي عمران خان جي انڪوائري جي منظوري ڏني وئي آهي ان کانسواءِ اسحاق ڊار ۽ انوشه رحمان جي خلاف انڪوائري جو حڪم ڏنو ويو آهي جن تي غيرقانوني طور تي نيڪسٽ جنريشن موبائيل سروس جو ٺيڪو ڏيڻ جو الزام آهي جڏهن ته ساڳئي ڪيس ۾ پي ٽي اي جي اڳوڻي چيئرمين ڊاڪٽر اسماعيل شاهه جي خلاف انڪوائري ڪئي ويندي. جڏهن ته نيب ڊاڪٽر عاصم محمود، محمود الحسن ۽ ٻين جي خلاف به انڪوائري جي منظوري ڏني آهي، جوابدارن تي آمدني کان وڌيڪ اثاثا ٺاهڻ جو الزام آهي. نيب بشير دائود، مريم دائود ۽ ٻين جي خلاف پڻ انڪوائري جي منظوري ڏني آهي. انهن تي الزام آهي ته پاناما ڪيس اسڪينڊل ۾ انهن جون آف شور ڪمپنيون آهن. جڏهن ته نيب پورٽ قاسم اٿارٽي جي اڳوڻي مئنيجنگ ڊائريڪٽر عبدالستار ڏيرو جي خلاف به جاچ جي منظوري ڏني آهي. انهن تي به آف شور ڪمپنين جا مالڪ هجڻ جو الزام آهي جڏهن ته نيب سوئي سدرن گئس ڪمپني، پاڪستان اسٽيل ملز جي آفيسرن جي خلاف به انڪوائري جي منظوري ڏني آهي، جوابدارن تي مبينا طور تي پاڪستان اسٽيل ملز جي گئس غيرقانوني طريقي سان بند ڪرڻ جو الزام آهي جڏهن ته نيب پاڪستان اسٽيل ملز جي انتظاميا جي خلاف انڪوائري جي به منظوري ڏني آهي. جڏهن ته نيب ڪي ڊي جي آفيسرن ۽ ٻين جي خلاف به جاچ جي منظوري ڏني آهي. جوابدارن تي رفاهي مقصد جي لاءِ مخصوص ڪيل پلاٽن کي رهائش ۽ ڪمرشل پلاٽن ۾ تبديل ڪرڻ جو الزام آهي جنهن تي قومي ناڻي کي ڪروڙين رپين جو نقصان پهتو. نيب شيل پاڪستان لميٽيڊ جي لائين  مئنيجر ياسر آفندي، ايرو ليوب پرائيويٽ لميٽيڊ جي چيئرمين ارشد جليل ۽ ٻين جي خلاف پڻ جاچ جي منظوري ڏني آهي. جوابدارن ڊفينس ڪوٽا تي ايوي ايشن کان ٻارڻ خريد ڪري عام مارڪيٽ ۾ وڪرو ڪيو جنهن تي قومي ناڻي کي 2370 ملين جو نقصان پهتو. جڏهن ته نيب پيپلزپارٽي جي سينيٽر عثمان سيف الله ۽ ان جي خاندان جي ٻين ڀاتين انور سيف الله، سليم سيف الله ۽ ٻين خلاف جاچ جي منظوري ڏني آهي. جوابدارن تي پاناما اسڪينڊل ۾ 34 آف شور ڪمپنين جي ملڪيت جو الزام آهي.

 

ش ليگ بڻيل ن ليگ

                 وزارت عظميٰ ۽ پارٽي صدارت تان نااهل ٿيل نواز شريف مسلم ليگ (ن) جو تاحيات قائد ۽ شهباز شريف وقتي صدر چونڊجي ويا آهن.  مسلم ليگ (ن) جي سينٽرل ايگزيڪيوٽو جو اجلاس پارٽي چيئرمين راجا ظفرالحق جي صدارت ۾ ٿيو، جنهن ۾ نواز شريف، شهباز شريف، وزيراعظم شاهد خاقان عباسي، اسپيڪر اياز صادق، احسن اقبال، سعد رفيق، مريم نواز، حمزه شهباز ۽ ٻيا شريڪ ٿيا. اجلاس ۾ نواز شريف شهباز کي پارٽي جو وقتي صدر بڻائڻ جي تجويز ڏني. شاهد خاقان تاحيات قائد لاءِ نواز شريف جو نالو تجويز ڪيو، جنهن جي اتفاق راءِ سان منظوري ڏني وئي .  اجلاس کي خطاب ڪندي نواز شريف چيو ته وزيراعظم ذليل ڪري لاٿا پيا وڃن، سياستدان آسان حدف خلاف آهن ۽ آمرن کي هٿ به نه ٿو لاٿو وڃي، ملڪ ۾ آمريت ناهي پر پوءِ به آمريتي دور جهڙا فيصلا ٿي رهيا آهن، ڪجهه طاقتون ملڪ کي ڪهڙي پاسي وٺي وڃڻ چاهين ٿيون؟ 70 ورهين دوران ڪنهن به وزيراعظم مدو پورو نه ڪيو آهي، اسان کي جائزو وٺڻ جي ضرورت آهي ته آخر ڪيستائين ايئن ٿيندو رهندو، عوام ڪجهه ٻيو چاهي ٿو پر ڪجهه طاقتون ملڪ کي ڪهڙي پاسي وٺي وڃڻ چاهين ٿيون، سياسي اڳواڻن ۽ سياسي پارٽين کان جيڪو ڪجهه ٿيو ٿيندو آيو آهي قوم سامهون آهي. رڳو مان نه نڪتو آهيان پر 70 ورهين ۾ ڪنهن به وزيراعظم مدو پورو نه ڪيو آهي. ملڪ جي سڀ کان وڏي پارٽي کي سينيٽ جي چونڊن مان آئوٽ ڪرڻ  قبولڻ جوڳو ناهي. اسان کي چور، ڦورو ۽ ڊرگ ڊيلر چيو ويو، ڪا هڪ، ٻن يا 10 رپين جي ڪرپشن ڪئي آهي ته ٻڌائي وڃي. منهنجي خلاف ڪو ڪيس نئب نه ٺاهيو آهي، چونڊيل وزيراعظم کي ذليل ڪيو ويندو آهي، هر مارشل کي نظريه ضرورت تحت تحفظ ڏنو ويو، مارشل لا تي ٺپو هنيو ويو، آمرن جي هٿن تي بيت ٿيندي رهي آهي، 6 مهينن دوران منهنجي خلاف هڪ ٽڪي جي ڪرپشن ثابت نه ٿي آهي. 1947ع کان جيڪو ڪم شروع ٿيو اهو اڄ تائين ختم نه ٿيو آهي، تاريخ کي قبر ۾ دفن نه ٿو ڪري سگهجي، هڪ نئين تاريخ لکجي رهي آهي، جيڪو 70 ورهين کان ٿيندو آيو آهي اهو تاريخ هڪ  باب آهي. مان حيران آهيان ۽ منهنجي حيراني بلڪل جائز آهي، ڪيستائين اسان ايئن ڪندا رهنداسين، اسان جي پارٽي ان کي قبول نه ڪندي جنهن کي وڻي ان کي هڪلي. پي سي او تحت قسم کڻڻ ملڪ ۾ سڀ کان وڏو ڏوهه آهي.شهباز شريف چيو ته مسلم ليگ ن خلاف فيصلن تي آواز اٿاريندس. اهم فيصلا نواز شريف ئي ڪندو.

ن ليگ جون واڳون ڪير سنڀاليندو….؟

مسلم ليگ ن نواز شريف جي نااهلي بعد شهباز شريف کي نئون سربراهه چونڊڻ جو فيصلو ڪيو آهي، سردار يعقوب خان ناصر کي وقتي صدر بڻائڻ جو فيصلو ڪيو ويو آهي. مسلم ليگ ن جي اهم اجلاس ۾ پارٽي اڳواڻن جي اڪثريت شهباز شريف کي پارٽي صدر بڻائڻ جي تجويز ڏئي ڇڏي. سپريم ڪورٽ گذريل ڏينهن چونڊ سڌارا ڪيس جو فيصلو ٻڌائيندي ميان نواز شريف کي پارٽي صدارت لاءِ به نااهل قرار ڏئي ڇڏيو جڏهن ته عدالتي فيصلن کي نواز شريف ڪاوڙ ۽ بغض جو نتيجو قرار ڏئي ڇڏيو آهي. گذريل ڏهاڙي ميان نواز شريف جي صدارت هيٺ پنجاب هائوس اسلام آباد ۾ پارٽي اڳواڻن جو اهم اجلاس ٿيو جنهن ۾ وزير اعظم شاهد خاقان عباسي کان سواءِ مريم نواز، پرويز رشيد، مريم اورنگزيب، عابد شير علي، دانيال عزيز، مصدق ملڪ، تهمينه دولتاڻا ۽ آصف ڪرماڻي سميت ٻيا شريڪ ٿيا جڏهن ته ڪارڪنن جو وڏو انگ به پنجاب هائوس ۾ موجود هو. اطلاعن موجب اجلاس ۾ مسلم ليگ ن جي اڳواڻن ۽ ڪارڪنن ميان نواز شريف جي حق ۾ نعريبازي ڪئي ۽ وزير اعظم نواز شريف جا نعرا هنيا. اجلاس ۾ چونڊ سڌارا ڪيس جي عدالتي فيصلي، پارٽي صدارت، سينيٽ اليڪشن ۽ اڳتي لاءِ حڪمت عملي تي غور ڪيو ويو. مسلم ليگ ن جي اڳواڻن ميان نواز شريف تي پنهنجي ڀرپور اعتماد جو اظهار ڪندي ساڻس گڏ رهڻ جو يقين ڏياريو آهي. ن ليگ جي اجلاس ۾ اڳواڻن جي اڪثريت شهباز شريف کي پارٽي صدر بڻائڻ جي تجويز ڏني جنهن کان پوءِ پنجاب جي وڏي وزير کي پارٽي جو صدر بڻائڻ جا امڪان آهن. اجلاس ۾ ليگي اڳواڻن جي اڪثريت تجويز ڏني ته شهباز شريف بااثر ۽ غير تڪراري آهي، شهباز کي صدر بڻائڻ سان ادارن ۾ ڇڪتاڻ ۾ به گهٽتائي ايندي. پارٽي صدارت جو حتمي فيصلو نواز شريف ڪندو ۽ فيصلي جي مرڪزي مجلس کان منظوري ورتي ويندي. وزيراعظم راجا ظفرالحق کي صدر بڻائڻ جي تجويز ڏني، ڪلثوم نواز ۽ مريم کي صدر بڻائڻ بابت خاص ذڪر نه ٿيو. نواز شريف جي نااهلي بعد سندس امڪاني جانشين مريم نواز جي لڳل پوسٽرن تي به راتو رات حمزه شهباز جا نالا لڳجي ويا آهن جنهن مان ظاهر آهي ته هاڻي ن ليگ جون واڳون نواز شريف خاندان جي هٿن مان نڪري شهباز شريف جي خاندان ڏانهن وڃي رهيون آهن ۽ شهباز شريف جو جانشين حمزا شهباز ئي آهي.