تازيون خبرون
اقتصادي رابطا ڪميٽي3 لک ميٽرڪ ٽن ڪڻڪ ٻاهران گهرائڻ جي منظوري ڏئي ڇڏي - سنڌ حڪومت جو پاسڪو کان اضافي ڪڻڪ خريدڻ ۽ ذخيره اندوزن خلاف آپريشن جو فيصلو - 4 ڏينهن جيل ۾ نه رهندڙن جو رڙيون ختم نه پيون ٿين: فردوس عاشق - سنڌ هاءِ ڪورٽ آءِ جي ڪليم امام جي بدلي روڪي ڇڏي، ڪم جاري رکڻ جي هدايت - صدر پاڪستان عارف علوي جو اين آئي سي وي ڊي جو دورو، معياري علاج جي تعريف، مريضن سان به ملاقات - مشهور رسالي ٽائم پاڪستاني وزيراعظم عمران خان کي ماحوليات جي ترجماني ڪندڙ دنيا جي 5 شخصيتن ۾ شامل ڪري ورتو - عارف علوي جو ڪم اسپتالن جا دورا ڪرڻ ناهي. سنڌ حڪومت تي الزام هڻي وفاقي وزيرن غير ذميواري جو مظاهرو ڪيو: سعيد غني - تحريڪ انصاف ۾ ڌڙابندي، 20 ميمبرن الڳ گروپ ٺاهي ڇڏيو - مولانا فضل الرحمان هيل پنهنجي ڏڍ تي اسلام آباد آيو هو، هن ڀيري ملا ملٽري الائنس اڳ جهڙو نه هو: شيخ رشيد - 16 مهينن ۾ عوام کي نواز شريف جي ترقي ڪندي پاڪستان ۽ عمران خان جي نئين پاڪستان ۾ فرق جي خبر پئجي وئي: ن ليگ

Monthly Archives: January 2020

اقتصادي رابطا ڪميٽي3 لک ميٽرڪ ٽن ڪڻڪ ٻاهران گهرائڻ جي منظوري ڏئي ڇڏي

اسلام آباد (بيورو رپورٽ) اقتصادي رابطا ڪميٽي ملڪ ۾ اٽي جي بحران کي منهن ڏيڻ لاءِ هنگامي بُنيادن تي پرڏيهه مان 3 لک ٽن ڪڻڪ گهرائڻ جي منظوري ڏئي ڇڏي آهي، ناڻي کاتي جي ترجمان موجب پنجاب ۽ پاسڪو کي به ذخيرو ڪيل ڪڻڪ فوري طور جاري ڪرڻ جي هدايت ڪئي وئي آهي.اقتصادي رابطا ڪميٽي طرفان اٽي جي بحران کي منهن ڏيڻ لاءِ 3 لک ٽن ڪڻڪ ٻاهران گهرائڻ جي منظوري ڏئي ڇڏي آهي. ذريعن موجب ڪميٽي فيصلو ڪيو آهي ته پرڏيهه مان ڪڻڪ گهرائڻ لاءِ فوري طور لائسنس جاري ڪيا ويا ويندا، اُن حوالي سان اسٽيٽ بئنڪ سوڌو ٻين سمورين لاڳاپيل بئنڪس کي ڪڻڪ امپورٽرز لاءِ ايل سي جون هدايتون به جاري ڪيون وينديون.ذريعن جو چوڻ آهي ته سامونڊي ٻيڙي ذريعي پرڏيهه مان ڪڻڪ گهرائڻ لاءِ ڪيماڙي بندرگاهه تي جاءِ مخصوص ڪئي وئي آهي، عام طور تي اهي سمورا مرحلا طئه ڪرڻ لاءِ 15 کان 20 ڏينهن لڳي ويندي آهن، پر ملڪ ۾ اٽي جي بحران ۽ حڪومتي جي هنگامي فيصلن جي نتيجي ۾ اهي سمورا مرحلا 48 ڪلاڪن ۾ پورا ڪيا ويندا. ذريعن جو آهي ته وفاقي سرڪار جي فيصلي پٽاندڙ پلانٽ پروٽيڪشن ڊپارٽمينٽ کي ٻاهران گهرايل ڪڻڪ جي هنگامي بُنيادن تي ڪليئرنس ڏيڻ جي حوالي سان هدايتون جاري ڪيون وينديون.ٻئي پاسي وفاقي ناڻي واري وزارت جي ترجمان بيان جاري ڪندي چيو آهي ته اي سي سي اجلاس دوران پنجاب ۽ پاسڪو کي پنهنجي ذخيرن مان ڪڻڪ فوري جاري ڪرڻ جي هدايت ڪئي وئي آهي، پاسڪو ۽ پنجاب جي ڪڻڪ جاري ڪرڻ جي صورت ۾ اٽي جي کوٽ کي ڪنٽرول ڪرڻ ۾ مدد ملندي. ترجمان چيو آهي ته پرڏيهه کان گهرايل سموري ڪڻڪ پهچڻ جو مرحلو مارچ مهيني تائين پورو ٿي ويندو.

 

سنڌ حڪومت جو پاسڪو کان اضافي ڪڻڪ خريدڻ ۽ ذخيره اندوزن خلاف آپريشن جو فيصلو

ڪراچي (اسٽاف رپورٽر) سنڌ جي وڏي وزير سيد مراد علي شاهه ڪڻڪ جي ذخيرن خلاف اڄ کان آپريشن شروع ڪرڻ جي هدايت ڪئي آهي. آپريشن ۾ پوليس ۽ رينجرز جا اهلڪار حصو وٺندا جڏهن ته صوبي جي ٻين ضلعن ۾ ڪمشنرن، ڊپٽي ڪمشنرن جي نگراني هيٺ ڪڻڪ ذخيرو ڪندڙ خلاف سخت آپريشن ڪرڻ جو فيصلو ڪيو ويو آهي. وڏي وزير اهي هدايتون اڄ وزيراعليٰ هائوس ۾ ڪڻڪ جي مسئلي تي هڪ اهم اجلاس جي صدارت ڪندي ڏنيون. اجلاس ۾ چيف سيڪريٽري ممتاز علي شاهه، وزير خوراڪ هري رام، وزير زراعت اسماعيل راهو، صوبائي صلاحڪار مرتضيٰ وهاب، وڏي وزير جو پرنسپل سيڪريٽري ساجد جمال ابڙو، سيڪريٽري ناڻو حسن نقوي، سيڪريٽري خوراڪ لئيق احمد، سيڪريٽري ٻيلو کاتو رحيم سومرو شرڪت ڪئي. اجلاس ۾ ٻڌايو ويو ته سنڌ حڪومت وٽ پنهنجي ڪڻڪ 7 لک ٽن هئي جنهن مان 4 لک ٽن ڪڻڪ ڏئي چڪا آهيون. صوبائي وزير هري رام اجلاس کي ٻڌايو ته حيدرآباد ۾ پاسڪو جا 12 هزار ٿيلها پهچي چڪا آهن. وڏي وزير چيو ته ڪراچي شهر لاءِ هر مهيني هڪ لک 30 هزار ٽن ڪڻڪ جاري ٿيندي آهي. هن چيو ته 15 مارچ تائين خوراڪ کاتو ڪڻڪ جاري ڪندو آهي جنهن حساب سان خوراڪ کاتي کي هينئر به 2 مهينن لاءِ ڪڻڪ جي فراهمي يقيني بڻائڻي آهي.  وڏي وزير خوراڪ کاتي کي هدايت ڏيندي چيو ته سنڌ جي گودامن ۾ 3 لک 35 هزار ٽن ڪڻڪ موجود آهي جيڪا ملز کي ڏئي رقم وصول ڪئي وڃي.  وڏي وزير پاسڪو کان وڌيڪ ڪڻڪ خريد ڪرڻ جو فيصلو ڪيو آهي. هن چيو ته سنڌ حڪومت 90 بلين رپين جي قرض مان 20 بلين رپين جا قرض بينڪن کي واپس ڪيا آهن. پاسڪو کي به وڏي وزير جي هدايت تي خوراڪ کاتو ڪڻڪ جي مد ۾ ادائيگي ڪري چڪو آهي. اجلاس ۾ ٻڌايو ويو ته پاسڪو کان 4 لک ٽن ڪڻڪ وٺي رهيا آهيون ۽ اڄ 75 هزار ٿيلها ڪراچي ۾ سپلائي ٿي چڪا آهن. مارڪيٽ ۾ ڪڻڪ جي اگهه ۾ استحڪام آڻڻ لاءِ وڌيڪ 3 ڏينهن لڳندا. هن وقت فلور ملن پاران مختلف جاين تي اٽو 43 رپيا في ڪلوگرام جي حساب سان ڏئي رهيا آهن. سنڌ حڪومت مختلف گودامن تي ڇاپو هڻي ڪڻڪ برآمد ڪرڻ جو فيصلو ڪيو آهي ۽ اڄ کان ڪراچي ۾ ڪڻڪ جي ذخيرن خلاف پوليس ۽ رينجرز تحت آپريشن شروع ٿي رهيو آهي جڏهن ته صوبي جي ٻين ضلعن ۾ ڪمشنرن ۽ ڊپٽي ڪمشنرن جي نگراني هيٺ ذخيرن خلاف سخت آپريشن ڪيو ويندو. وڏي وزير سيد مراد علي شاهه چيو ته ڪڻڪ کي ذخيرو ڪرڻ جي اجازت نه ڏينداسين ۽ ذخيرو ڪندڙن خلاف سخت ڪارروائي ڪئي ويندي. هن چيو ته جلد صوبي اندر جاري ڪڻڪ ۽ اٽي جي بحران تي ضابطو آندو ويندو.

 

4 ڏينهن جيل ۾ نه رهندڙن جو رڙيون ختم نه پيون ٿين: فردوس عاشق

اسلام آباد (ويب ڊيسڪ) اطلاعات ۽ نشريات بابت وزيراعظم جي خاص مددگار فردوس عاشق اعواڻ چيو آهي ته غريبن جي همدرديءَ ۾ واڳونءَ جا ڳوڙها ڳاڙيندڙن جو پوکيل ٻج اڄ عوام لُڻي رهيو آهي، 4 ڏينهن جيل ۾ نه رهندڙن جو رڙيون ختم نه پيون ٿين. سماجي رابطن جي ويب سائيٽ ٽوئيٽر تي ٽوئيٽ ڪندي فردوس عاشق اعواڻ لکيو ته حڪومت 71 سالن جي مسئلن مان ڇوٽڪاري لاءِ ڏکيا فيصلا ڪيا، پنهنجي ڪارڪنن سان ويساهه گهاتيون ڪندڙ ڪهڙي منهن سان ٻين تي الزام هڻي رهيا آهن. هن چيو ته حڪومت 16 مهينن ۾ قرضن جي ادائيگيءَ سميت معاشي نظم ۽ ضبط قائم ڪرڻ لاءِ وقتائتا ۽ جرئتمنداڻا فيصلا ڪيا، مالياتي ۽ انتظاميا طور ڏکيا فيصلا قوم کي 71 سالن جي مسئلن مان ڇوٽڪارو ڏيارڻ لاءِ ڪيا ويا، قوم جي همت ۽ حوصلي سان خوشحالي جي نئين دور جي شروعات ٿي رهي آهي. سندس چوڻ هو ته وزيراعظم عمران خان کي قوم جي ڏکيائين جو احساس آهي، عوام کي سڌي ريت رليف ڏيڻ لاءِ 7 ارب رپين جو يوٽيلٽي اسٽورز ذريعي پيڪيج ڏنو ويو، ايندڙ ڏينهن ۾ عوام جي ڀلائيءَ لاءِ وڌيڪ اپاءَ ورتا ويندا.

 

 

سنڌ هاءِ ڪورٽ آءِ جي ڪليم امام جي بدلي روڪي ڇڏي، ڪم جاري رکڻ جي هدايت

ڪراچي (ويب ڊيسڪ) سنڌ هاءِ ڪورٽ آءِ جي جي تبديلي بابت ڪيس ۾ چيو آهي ته جيستائين اسٽيبلشمينٽ ڊويزن جو جواب نٿو اچي، تيستائين ڪليم امام ئي آءِ جي رهندو. سنڌ هاءِ ڪورٽ ۾ آءِ جي جي تبديلي بابت ڪيس جي ٻڌڻي ٿي، جنهن سلسلي ۾ سنڌ حڪومت طرفان ايڊووڪيٽ جنرل عدالت ۾ پيش ٿيو. ٻڌڻي دوران درخواست گذار جي وڪيل موقف اختيار ڪيو ته آءِ جي جي تبديلي تي وفاق ۽ صوبي ۾ ڪا مشاورت نه ٿي، سنڌ حڪومت جي خط ۾ وفاقي ۽ صوبائي حڪومت وچ ۾ صلاح مشوري جو ذڪر ناهي، وفاقي حڪومت سنڌ حڪومت جي درخواست منظور ڪرڻ کان انڪار ڪري ڇڏيو، وفاق چيو ته جيستائين ڪليم امام بابت فيصلو نٿو ٿئي، چارج ڪنهن ٻئي آفيسر کي نٿي ڏئي سگهجي. ان موقعي تي ايڊووڪيٽ جنرل سنڌ عدالت کي ٻڌايو ته سنڌ حڪومت  ٽيليفون ذريعي هدايتون ڏنيون آهن، اهو عوامي مفاد جو معاملو آهي. جسٽس محمد علي مظفر ريمارڪس ڏنا ته وفاق طرفان سنڌ حڪومت کي اڃا تائين ڪو جواب ناهي ڏنو ويو، سنڌ هاءِ ڪورٽ اڳ ئي فيصلو ڏئي چڪي آهي ته صوبي ۽ وفاق جي مشاورت کانپوءِ آءِ جي تبديل ٿيندو، قانون ۾ آءِ جي سنڌ جي عهدي جو مدو 3 سال آهي، نئين آءِ جي جي مقرري قانون موجب ڪئي وڃي. عدالت چيو ته سنڌ حڪومت طرفان آءِ جي کي تبديل ڪرڻ جي خط جو اڃا تائين جواب ناهي مليو، جيستائين اسٽيبلشمينٽ ڊويزن کان جواب نٿو اچي، ڪليم امام ئي آءِ جي رهندو، اسان آءِ جي جي تبديلي کان نٿا روڪيون پر اها قانون موجب ٿيڻ گهرجي. پوءِ عدالت ڪيس جي وڌيڪ ٻڌڻي 28 جنوري تائين ملتوي ڪري ڇڏي.

 

صدر پاڪستان عارف علوي جو اين آئي سي وي ڊي جو دورو، معياري علاج جي تعريف، مريضن سان به ملاقات

ڪراچي(پ.ر) صدر پاڪستان ڊاڪٽر عارف علوي جو گهر واري سميت  اين آئي سي وي ڊي جو دورو، معياري علاج جي تعريف، مريضن سان به ملاقات، تفصيل موجب: صدر پاڪستان ڊاڪٽر عارف علوي پنهنجي گهر واري ثمينه علوي سان گڏ دل جي مرض جي قومي اداري جو دورو ڪيو، اين آئي سي وي ڊي پهچڻ تي صدر ڊاڪٽر عارف علوي جو اين آئي سي وي ڊي جي ايگزيڪٽو ڊائريڪٽر پروفيسر نديم قمر، ايگزيڪٽو ايڊمنسٽريٽر ڊاڪٽر حميد الله ملڪ، سي او او عذره مقصود ۽ مئنيجمنٽ ڪنسلٽنٽ حيدر آعواڻ استقبال ڪيو، صدر ڊاڪٽر عارف علوي اين آئي سي وي ڊي جي مختلف شعبن ايمرجنسي، ايڪو، ڪيٿهه ليب ۽ مردن ۽ عورتن جي واردن جو دورو ڪيو، جتي ان کي اين آئي سي وي ڊي جي ايگزيڪٽو ڊائريڪٽر پروفيسر نديم قمر ان کي مريضن کي ڏني ويندڙ سهولتن بابت بريفنگ ڏني، صدر دوري دوران اسپتال ۾ داخل مريضن سان ڳالهه ٻولهه پڻ ڪئي،  ان موقعي تي صدر ڊاڪٽر عارف علوي جو چوڻ هو ته اين آئي سي وي ڊي م پوري ملڪ مان ايندڙ مريضن کي دل جي مرض جو جديد علاج مفت فراهم ڪيو وڃي ٿو، هن چيو ته اين آئي سي وي ڊي طرفان فراهم ڪيون ويندڙ خدمتون تعريف جي قابل  اهن.

 

مشهور رسالي ٽائم پاڪستاني وزيراعظم عمران خان کي ماحوليات جي ترجماني ڪندڙ دنيا جي 5 شخصيتن ۾ شامل ڪري ورتو

اسلام آباد (ويب ڊيسڪ) مشهور رسالي ٽائم پاڪستاني وزيراعظم عمران خان کي ماحوليات جي ترجماني ڪندڙ دنيا جي 5 شخصيتن ۾ شامل ڪري ورتو. ماحولياتي تبديلين بابت آواز اٿارڻ تي وزيراعظم عمران خان کي عالمي سطح تي سٺي موٽ ملي رهي آهي ۽ ٽائم ميگزين عمران خان کي ماحوليات جي ترجماني ڪندڙ دنيا جي 5 شخصيتن ۾ شامل ڪندي سندس تصوير ٽائيٽل پيج تي لڳائي ڇڏي آهي. عالمي اقتصادي فورم جي سهڪار سان عالمي رسالي عمران خان سان گڏ جرمن چانسلر انجيلا مرڪل، مائڪرو سافٽ جي باني بل گيٽس، يورپ جي مرڪزي بئنڪ جي صدر ڪرسٽين ليگارڊ ۽ ايمازون جي مالڪ جيف بيزوس جون تصويرون ڇاپيون آهن. واضح رهي ته وزيراعظم عمران خان 22 جنوري تي عالمي اقتصادي فورم ۾ خاص تقرير ڪندو ۽ ماحولياتي تبديلي جي مسئلي تي اجاڳر ڪندو.

 

عارف علوي جو ڪم اسپتالن جا دورا ڪرڻ ناهي. سنڌ حڪومت تي الزام هڻي وفاقي وزيرن غير ذميواري جو مظاهرو ڪيو: سعيد غني

ڪراچي (اين اين آء) سنڌ جي اطلاعات ۽ محنت واري صوبائي وزير سعيد غني چيو آهي ته ملڪ ۾ اٽي جي بحران سان ماڻهو پريشان آهن. وفاقي وزيرن غير ذميوراي جو مظاهرو ڪيو ۽ سنڌ حڪومت کي ذميوار قرار ڏنو جڏهن ته حقيق اها آهي ته سنڌ کي چار لک ٽن ڪڻڪ کڻڻي هئي جيڪا هڪ لک ٽن ملي باقي ٽي لک ٽن ٻين صوبن کان کڻڻي هئي ڏهن ڏينهن تائين ٽرانسپورٽ جي هڙتال رهي پر هاڻي ڪڻڪ پهچڻ شروع ٿي وئي آهي ۽ سوا لک بيگ پهچي چڪا آهن ان شاالله جلد سنڌ ۾ اٽي جو بحران ختم ڪري ڇڏينداسين.اهڙن خيالن جو اظهار هن ميڊيا سان ڳالهه ٻولهه ڪندي ڪيو.صوبائي وزير وڌيڪ چيو ته پنجاب ۾ اٽي جو بحران بد انتظامي ۽ نالائقي جي ڪري ٿيو ڪي پي ۾ ڪڻڪ فيڊ ملز کي ڏني وئي لڳي ٿو ته انسانن کان وڌيڪ مرغيون اهم آهن سنڌ ۾ اگر اسان ذميوار آهيون ته باقي صوبن ۾ اهي ذميوار آهن ان لاءِ اهي به استيفيٰ ڏين.سعيد غني چيو ته هڪ پاسي نومبر ڊسمبر ۾ ماني وڌيڪ کائڻ جو بيان ڏنو ويو لڳي ٿو ان مهينن ۾ هو پاڻ وڌيڪ کائيندا هوندا اٽي جو بحران بد انتظامي سان پيدا ٿيو آهي  اسان جي صدر مملڪت کي اٽي جي بحران جي خبر ئي ناهي صدر مملڪت جو ڪم اسپتالن جو دورو ڪرڻ ناهي بلڪي عوام جي ڏک ۽ سور کي سمجهڻ آهي صوبائي وزير چيو ته ڪراچي جا وڏا اسپتال اسان بهتر بڻايا آهن جنهن کانپوءِ ٻين صوبن جا ماڻهو به هتي علاج ڪرائيندا آهن. وفاق جي ڪجهه آفيسرن به اسپتالن جو دورو ڪيو آهي. هن وڌيڪ چيو ته پي ٽي آئي جي سليڪٽيڊ حڪومت سوچيل سمجهيل منصوبي جي تحت سنڌ حڪومت لاءِ مشڪلون پيدا ڪري رهي آهي. هڪ سوال جي جواب ۾ صوبائي وزير چيو ته آئي جي سنڌ جي مسئلي تي ڪو به ڊيڊ لاڪ ناهي اڄ يا سڀاڻي فيصلو ٿي ويندو آئي جي بابت اسان جا خدشا صحيح ثابت ٿي رهيا آهن ان لاءِ پي ٽي آئي جي ڪجهه ماڻهن جو شور ڪرڻ سمجهه ۾ اچي رهيو آهي هاڻي ته ڪليم امام جي ڪيريئر تي به سواليه نشان آهي ڏسون ٿا ته ڪهڙو صوبو ان کي پنهنجي صوبي ۾ لڳڻ ڏئي ٿو هن چيو ته جنهن وزير ڪابينا اجلاس ۾ پوليس آفيسرن خلاف شڪايت ڪئي ان خلاف من گهڙت رپورٽس بڻائي وئي. پنجاب ۾ پي ٽي آ.ئي حڪومت ايندي ئي بلدياتي نظام ختم ڪري ڇڏيو ايڊمنسٽريٽرز جي ذريعي بلدياتي ادارا هلايا پيا وڃن سنڌ ۾ ته بلدياتي نظام موجود آهي ته ڪهڙي منهن سان سنڌ تي تنقيد ڪئي پئي وڃي صوبائي وزير وڌيڪ چيو ته ايم ڪيو ايم ۽ پي ٽي آئي جي دوستي وڌيڪ دير تائين نه هلندي.

 

تحريڪ انصاف ۾ ڌڙابندي، 20 ميمبرن الڳ گروپ ٺاهي ڇڏيو

لاهور (ويب ڊيسڪ) حڪمران جماعت تحريڪ انصاف جي 20 ميمبرن پنجاب اسيمبلي کان مسئلا حل ڪرائڻ لاءِ ڌڙو ٺاهي ڇڏيو. تحريڪ انصاف پنجاب اسيمبلي جي ميمبرن حلف کنيو آهي ته اهي هڪٻئي سان گڏ رهندا ۽ گڏجي مطالبا مڃرائيندا. ڪاوڙيل ميمبرن جي ان ڌڙي پنجاب جي وڏي وزير کان پنهنجي پنهنجي تڪن لاءِ فنڊن ۽ عوامي منصوبن جو مطالبو ڪيو آهي. ان ڏس ۾ ليه مان پنجاب اسيمبلي جي ميمبر شهاب الدين جو چوڻ هو ته گروپ ۾ هن کانسواءِ ملڪ غضنفر ڇينا، تيمور لالي، مامون تارڙ، فيصل فاروق چيما، اعجاز خان، گلريز افضل چن، ڪرنل غضنفر عباس، خواجا دائود بنديشا، محيءُ الدين کوسا ۽ عامر عنايت شهواڻي سميت ٻيا شامل آهن. هن ٻڌايو ته ڌڙي وڏي وزير کان پنهنجي تڪن لاءِ فنڊ جاري ڪرڻ ۽ عوامي منصوبا شروع ڪرڻ جو مطالبو ڪيو آهي. سندس وڌيڪ چوڻ هو ته اسان تحريڪ انصاف سان گڏ آهيون ۽ گڏ رهنداسين، جڏهن ته تحريڪ انصاف جي پليٽ فارم تائين ئي ايندڙ چونڊون وڙهنداسين. شهاب الدين موجب عثمان بوزدار سان ملاقات ۾ عوامي مسئلن جي حل تي ڳالهه ٻولهه ٿي آهي.

 

مولانا فضل الرحمان هيل پنهنجي ڏڍ تي اسلام آباد آيو هو، هن ڀيري ملا ملٽري الائنس اڳ جهڙو نه هو: شيخ رشيد

اسلام آباد ( مانيٽرنگ ڊيسڪ) ريلويز واري وفاقي وزير شيخ ر شيد چيو آهي ته مولانا فضل الرحمان هيل پنهنجي ڏڍ تي اسلام آباد آيو هو، هن ڀيري ملا ملٽري الائنس اڳ جهڙو نه هو. نواز ليگ مولانا فضل الرحمان کي اڳتي ڪري پنهنجا معاملا اڪلائي ڇڏيا. مولانا تمام گهڻو چالاڪ آهي پر پوءِ به سندس سياست جا ڏور رس نتيجا نڪرندا ۽ سڀ نتيجا هن جي ئي خلاف ويندا. کيس ڪا به گارنٽي نه ڪرائي وئي آهي. ڪالهه هتي هڪ ٽي وي چينل سان ڳالهائيندي هن چيو ته عمران خان جي جاءِ تي هجان ها ته سڀ کان پهرين نواز ليگ ۾ گروپ جوڙيان ها، پنجاب ۽ مرڪز ۾ ماڻهو ڌڙو ٺاهڻ لاءِ تيار هئا. هن چيو ته ق ليگ ن ليگ سان گڏ نه ٿي هلي سگهي پر اها پ پ سان هلي چڪي آهي، هن چيو ته ٻه ٽي مهينا خير سان گذري ويا ته عمران خان 5 سال پورا ڪري ويندو. پ پ ۽ ن ليگ اسان هٿ جي لٺ ۽ گهڙي آهن. آئون ٽي وي نه ٿو ڏسان، رڳو اخبار پڙهندو آهيان. عمران رات جو دير سان ميسيج ڪندو آهي. هن چيو ته عمران حڪومت هلائڻ لاءِ جتن ڪري رهيو آهي پر نتيجا نه پيا اچن. سندس ٽيم وٽ تجربو ناهي. هن چيو ته عمران سادو ناهي پر سمجهدار آهي، انهي ڪري انهي عهدي تي پهتو آهي، هن چيو ته شگر مافيا طاقتور آهي، انهن مون کي به ڌمڪيون ڏنيون آهن ته ايندڙ چونڊون ڪيئن ٿو کٽين؟ عمران خان اطلاعات واري وزارت جي آڇ ڪئي پر مون انڪار ڪيو. ڪڏهن ڪڏهن حڪومت کي سچ ڳالهائڻ سان خطرو هوندو آهي ته آئون ميڊيا سان نه ڳالهائيندو آهيان. هن چيو ته نواز شريف ملڪ واپس نه ايندو پر شهباز شريف اچي سگهي ٿو، هو اقتدار جي راهدارين جو بادشاهه آهي. هو فيبروري مارچ يا اپريل ۾ ايندو. هن چيو ته شريف خاندان جون ملڪيتون اڳ ۾ به نيلام ٿيون هيون پر هنن واپس اچي وري حاصل ڪري ورتيون، هاڻ به وٺي ويندا. هن چيو ته حڪومت جو مدو 4 سال هجڻ گهرجي. هن چيو ته 2020ع ۾ ڪي به چونڊون ٿيندي نظر نه پيون اچن. اهو سال حڪومت ۽ عوام لاءِ به ڏکيو هوندو هن چيو ته ڪو اتحادي حڪومت کي ڇڏي نه پيو وڃي، ايم ڪيو ايم، ق ليگ ۽ جي ڊي اي کي وڌيڪ وزارتون نه ملنديون. هن چيو ته مڪاني چونڊن جي مخالفت ڪندس، اهي في الحال نه ٿيڻ گهرجن. عمران خان عثمان بوزدار سان گڏ آهي ته آئون به سندس حمايت ڪريان ٿو. 2020ع حڪومت ۽ عوام لاءِ به ڏکيو هوندو. چوڌري نثار ٺيڪ چوندو هو شريف خاندان جي تباهي جي ذميوار مريم نواز آهي.

 

 

16 مهينن ۾ عوام کي نواز شريف جي ترقي ڪندي پاڪستان ۽ عمران خان جي نئين پاڪستان ۾ فرق جي خبر پئجي وئي: ن ليگ

اسلام آباد (ويب ڊيسڪ) ن ليگ ترجمان مريم اورنگزيب چيو آهي ته 16 مهينن ۾ عوام کي نواز شريف جي ترقي ڪندي پاڪستان ۽ عمران خان جي نئين پاڪستان ۾ فرق جي خبر پئجي وئي. پنهنجي بيان ۾ مريم اورنگزيب چيو ته عمران صاحب جي قيادت ۾ چورن ڪڻڪ ۽ کنڊ مان اربين رپيا ڪمايا، هو مهانگائي ۽ تاريخي قرض وٺي نالائقي جو رڪارڊ قائم ڪري چڪو آهي، خان صاحب جي هوندي ملڪ کي ڪنهن دشمن جي ضرورت ناهي. سندس چوڻ هو ته 16مهينن ۾ وڏو نقصان ٿيو آهي، سوال اهو پيدا ٿو ٿئي ته ڇا رڳو نالائقي آهي يا اهو سڀ ڄاڻي واڻي ڪيو پيو وڃي؟ عوام کي نواز شريف ۽ عمران خان جي نئين پاڪستان ۾ فرق جو پتو پئجي ويو آهي، عمران صاحب جي نالائقي جي سونامي سڄي ملڪ کي تباهه ڪري چڪي آهي. هن وڌيڪ چيو ته تباهي جو اهو سفر نه روڪيو ويو ته پاڪستان لنگر خاني ۾ تبديل ٿي ويندو، عمران خان ترقي ڪندڙ ملڪ کي تباهي ڏانهن ڌڪي ڇڏيو آهي، عمران صاحب جي نااهل قيادت ۾ پوليو کان ڊينگي تائين تباهي ٿي.