تازيون خبرون
اقتصادي رابطا ڪميٽي3 لک ميٽرڪ ٽن ڪڻڪ ٻاهران گهرائڻ جي منظوري ڏئي ڇڏي - سنڌ حڪومت جو پاسڪو کان اضافي ڪڻڪ خريدڻ ۽ ذخيره اندوزن خلاف آپريشن جو فيصلو - 4 ڏينهن جيل ۾ نه رهندڙن جو رڙيون ختم نه پيون ٿين: فردوس عاشق - سنڌ هاءِ ڪورٽ آءِ جي ڪليم امام جي بدلي روڪي ڇڏي، ڪم جاري رکڻ جي هدايت - صدر پاڪستان عارف علوي جو اين آئي سي وي ڊي جو دورو، معياري علاج جي تعريف، مريضن سان به ملاقات - مشهور رسالي ٽائم پاڪستاني وزيراعظم عمران خان کي ماحوليات جي ترجماني ڪندڙ دنيا جي 5 شخصيتن ۾ شامل ڪري ورتو - عارف علوي جو ڪم اسپتالن جا دورا ڪرڻ ناهي. سنڌ حڪومت تي الزام هڻي وفاقي وزيرن غير ذميواري جو مظاهرو ڪيو: سعيد غني - تحريڪ انصاف ۾ ڌڙابندي، 20 ميمبرن الڳ گروپ ٺاهي ڇڏيو - مولانا فضل الرحمان هيل پنهنجي ڏڍ تي اسلام آباد آيو هو، هن ڀيري ملا ملٽري الائنس اڳ جهڙو نه هو: شيخ رشيد - 16 مهينن ۾ عوام کي نواز شريف جي ترقي ڪندي پاڪستان ۽ عمران خان جي نئين پاڪستان ۾ فرق جي خبر پئجي وئي: ن ليگ

Daily Archives: December 12, 2019

لاهوري وڪيلن تاريخ رقم ڪري ڇڏي، اسپتال تي ڪاهه، عوام۽ صوبائي وزير تي تشدد، 4 مريض فوت

لاهور (ويب ڊيسڪ) لاهور ۾ پنجاب انسٽيٽيوٽ آف ڪارڊيالاجي (پي آءِ سي) ۾ وڪيلن ڪاهه اسپتال اندر ۽ ٻاهر ڀڃ ڊاهه ڪئي، جنهن سبب طبي امداد نه ملڻ جي ڪري 4 مريض فوت ۽ ڪيترائي زخمي پڻ ٿيا، جڏهن ته وزيراعظم ۽ پنجاب جي وڏي وزير واقعي جو نوٽيس ورتو آهي. گرينڊ هيلٿ الائنس جي چيئرمين ڊاڪٽر سلمان حسيب موجب ان پرتشدد مظاهري دوران 4 مريض زندگي جي جنگ هارائي ويا پر رپورٽن موجب مريضن جي حالت ڳڻتي جوڳي هئي ۽ وڪيلن طرفان ايمرجنسي وارڊن ۾ گهڙڻ کانپوءِ کين طبي امداد نه ملي سگهي. واضح رهي ته ڄاڻايل معاملو ان وقت شروع ٿيو، جڏهن وڪيلن الزام هنيو ته وائرل ٿيندڙ هڪ ويڊيو ۾ ينگ ڊاڪٽر وڪيلن تي ٽوڪَ ڪري رهيا هئا، جنهن تي هنن سوشل ميڊيا تي مهم هلائي پر ڊاڪٽرن موجب وڪيلن جو هڪ ڌڙو انسپيڪٽر جنرل وٽ ويو هو ۽ کيس چيو هو ته ٻن ڊاڪٽرن خلاف اي ٽي اي جي قلم 7 تحت ڪيس داخل ڪيو وڃي پر انهن جي بقول آءِ جي ان معاملي تي انڪار ڪري ڇڏيو. پوءِ اڄ وڪيلن جو وڏو انگ ويڊيو جي معاملي تي احتجاج ڪرڻ لاءِ پي آءِ سي ٻاهران گڏ ٿيو پر اهو احتجاج پرتشدد ٿي ويو ۽ وڪيلن اسپتال جا ٻاهريان ۽ اندريان رستا بند ڪري ڇڏيا. رپورٽن موجب احتجاج ڪندڙ اسپتال جا گيٽ ٽوڙي اندر داخل ٿيا، انهن نه رڳو پٿر اڇلايا پر اسپتال جي ايمرجنسي جا شيشا ٽوڙيا ۽ لتن توڙي ڏنڊن سان ٻاهر بيٺل گاڏين جي ڀڃ ڊاهه ڪئي. اهڙي صورتحال ۾ ڪجهه مريض اسپتال نه پهچي سگهيا، جڏهن ته اسپتال ۾ علاج هيٺ مريضن سان گڏوگڏ ڏيکارڻ لاءِ آيل مريضن توڙي سندن وارثن ڏکيائين کي منهن ڏنو. وڪيل اسپتال جي آءِ سي يو، سي سي يو ۽ آپريشن ٿيٽر ڏانهن به وڌيا، جڏهن ته انهن ڪجهه عملي تي به تشدد ڪيو ۽ عملي ڀڄي جان بچائي. رڳو اهو ئي نه پر مڇريل وڪيلن ميڊيا جي نمائندن کي به نه بخشيو، انهن تي به پٿراءُ ڪيو، جنهن ۾ خانگي ٽي وي چئنل جي عورت رپورٽر ڪنزا ملڪ زخمي ٿي پئي. بگڙيل صورتحال کي نظر ۾ رکندي پوليس جي واڌو نفري پهتي ۽ ٺاپر جي ڪوشش ڪرائي پر مڇريل ماڻهن هڪ پوليس موبائل کي پڻ باهه ڏئي ڇڏي، جڏهن ته پوليس مڇريل وڪيلن کي ڇڙوڇڙ ڪرڻ لاءِ ڳوڙها آڻيندڙ گئس جي استعمال سان گڏ لٺبازي به ڪئي. ان موقعي تي پوليس ڪجهه وڪيلن کي گرفتار پڻ ڪيو، جنهن تي وڪيلن سول سيڪريٽريٽ ڏانهن ويندڙ روڊ بند ڪري ڇڏيو. خراب صورتحال تي پنجاب جي صحت واري وزير ڊاڪٽر ياسمين راشد به پي آءِ سي پهتي، جڏهن ته ڊي آءِ جي آپريشن پڻ اسپتال پهتو. واقعي کانپوءِ لاهور هاءِ ڪورٽ بار جو صدر ۽ سيڪريٽري پي آءِ سي اسپتال پهتو ۽ وڪيلن سان ڳالهيون ڪرڻ جي ڪوشش ڪئي.

 

آصف زرداري جي طبي بُنيادن تي ضمانت منظور، هڪ ڪروڙ جا مچلڪا جمع ڪرائڻ جو حڪم

اسلام آباد(ويب ڊيسڪ) اسلام آباد هاءِ ڪورٽ پاڪستان پيپلز پارٽي جي شريڪ چيئرمين ۽ اڳوڻي صدر آصف علي زرداري جي طبي بنيادن تي ضمانت واري درخواست منظور ڪري ورتي. وفاقي راڄڌاني جي عدالت عاليه ۾ چيف جسٽس اطهر من الله جي سربراهي ۾ جسٽس عامر فاروق تي ٻڌل 2 رڪني بينچ آصف علي زرداري ۽ فريال ٽالپر جي گرفتاري کان پوءِ واري ضمانت جي درخواست تي ٻڌڻي ڪئي. ان موقعي تي آصف زرداري ۽ فريال ٽالپر جو وڪيل فاروق ايڇ نائيڪ عدالت ۾ پيش ٿيا جڏهن ته نيب طرفان پراسيڪيوٽر جنرل جهانزيب ڀروانا ۽ ڊپٽي پراسيڪيوٽر جنرل سردار مظفر عباسي پيش ٿيا. ٻڌڻي دوران آصف زرداري جي وڪيل کان سواءِ سندس پٽ ۽ پ پ چيئرمين بلاول ڀٽو زرداري به موجود هو. عدالت ۾ ٻڌڻي جي آغاز تي پمز اسپتال طرفان آصف زرداري جي ميڊيڪل رپورٽ پيش ڪئي وئي، جنهن تي عدالت پڇيو ته ڇا نيب جي رپورٽ ڏسي ورتي آهي. گڏوگڏ ئي چيف جسٽس نيب پراسيڪيوٽر کي ميڊيڪل رپورٽ زور سان پڙهڻ جي هدايت ڪئي، جنهن تي نيب پراسيڪيوٽر اڳوڻي صدر آصف علي زرداري جي ميڊيڪل رپورٽ پڙهڻ شروع ڪئي. نيب پراسيڪيوٽر چيو ته اسلام آباد هاءِ ڪورٽ جي حڪم تي نئون ميڊيڪل بورڊ جوڙيو ويو، ميڊيڪل بورڊ آصف علي زرداري جو تفصيلي معائنو ڪيو. عدالت ۾ پيش ميڊيڪل رپورٽ ۾ ٻڌايو ته آصف زرداري مختلف قسم جي بيمارين ۾ مبتلا آهي ۽ هن کي دل جي تڪليف به آهي.  ميڊيڪل رپورٽ ۾ ٻڌايو ويو ته جوابدار طويل عرصي کان شگر جو مريض آهي جڏهن ته هن جا 3 اسسٽنٽ به وڌا ويا آهن. ميڊيڪل رپورٽ موجب آصف زرداري ٽائپ ٽو ذيابيطس جو مريض آهي، هن کي دل جي تڪليف به آهي جڏهن ته هن کي انجيو گرافي جي ضرورت آهي. عدالت ۾ پيش ڪيل ميڊيڪل رپورٽ ۾ ٻڌايو ويو ته آصف زرداري کي اسسٽنٽ وجهڻ دوران انجيو پلاسٽي جي ضرورت به پئجي سگهي ٿي ۽ جيل ۾ رهندي هن جو علاج ممڪن ناهي. طبي رپورٽ ۾ ٻڌايو ويو ته آصف زرداري جو جيل ۾ رهڻ هن جي سِرَ لاءِ خطرو ٿي سگهي ٿو، ان تي نيب پراسيڪيوٽر ٻڌايو ته اڳوڻو صدر اسپتال ۾ ئي علاج هيٺ آهي، هن جي معاملي ۾ جاچ مڪمل ٿي چڪي آهي ۽ ريفرنس به داخل ڪيو ويو آهي. ان تي چيف جسٽس پڇيو ته ڇا ان رپورٽ کان پوءِ جوابدار کي انهيءَ اسپتال ۾ رکيو ويندو. گڏوگڏ ئي عدالت پڇيو ته ڇا اڳوڻو صدر پنهنجي مرضي سان علاج ڪرائي رهيو آهي، ڇا نيب چاهي ٿو ته آصف زرداري کي قيد ڪري قومي ناڻي مان علاج جاري رکيو وڃي؟ ان تي نيب پراسيڪيوٽر ڪو به جواب نه ڏئي سگهيو. بعد ۾ پاڪ لين ۽ ميگا مني لانڊرنگ ريفرنس ۾ آصف زرداري جي ضمانت کي منظور ڪندي هڪ هڪ ڪروڙ رپين جا 2 ضمانتي مچلڪا جمع ڪرائڻ جو حڪم ڏئي ڇڏيو. ان کان سواءِ فريال ٽالپر جي درخواست تي نيب جو جواب نه اچڻ تائين معاملي کي 17 ڊسمبر تائين ملتوي ڪري ڇڏيو

 

اخباري مالڪ اسان جي نه پر لڳي ٿو ته اسان هنن جي ماتحت ٿي ويا آهيون: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته منهنجو تعلق پاڪستان پيپلز پارٽي سان آهي جنهن ملڪ کي هڪ متفقه آئين ڏنو ۽ ان آئين جي تمهيد ۾ لکيل آهي ته ”هي آئين انساني حقن جي ڳالهه ڪندو آهي“ ۽ انهيءَ آئين تحت مون حلف کنيو آهي ۽ منهنجو هي فرض آهي ته آئون انساني حقن جو جهنڊو بلند رکان. هن اها ڳالهه اڄ مقامي هوٽل ۾ پلرز پاران هيومن رائٽس ڪمٽمنٽس بابت چيلنجن ۽ کين حل واري عنوان هيٺ ڪوٺايل سيمينار کي خطاب ڪندي ڪئي. وڏي وزير چيو ته سڀ کان وڌيڪ قانون سازي سنڌ اسيمبلي ڪئي آهي. هن چيو ته جيستائين حڪومت نه چاهي ڪوبه قانون پاس نٿو ٿي سگهي اسان جو مسئلو قانون تي عملدرآمد آهي ۽ اسان جي بيوروڪريسي ان عملدرآمد بابت تربيت يافته نه آهي. هن چيو ته چونڊيل فرد عوامي نمائندا آهن جڏهن ته آفيسر سرڪاري ملازم آهن. اسان کي ان ڳالهه تي ڌيان ڏيڻ جي ضرورت آهي. وڏي وزير چيو ته انساني حقن، هڪ انسان ٻئي انسان کي ڏيندو آهي ۽ اسان کي پنهنجي اندر ليئو پائي ڏسڻ گهرجي ته اسان پنهنجا حق درست نموني ادا ڪري رهيا آهيون. وڏي وزير چيو ته اڄ لاهور ۾ وڪيلن جي مظاهري ۾ انهن ڪهڙي ريت انساني حقن جي پاسداري ڪئي، ان بابت اسان کي سوچڻ گهرجي. وڏي وزير چيو ته اسان سياسي تنقيد برداشت ڪندا آهيون ڇوته تنقيد ڪندڙن جي ڪاوڙ ڪٿي ته نڪرڻي آهي، آئون تنقيد کي دل تي نه وٺندو آهيان پر تنقيد ڪرڻ کان پهرين اهو ضرور سوچڻ گهرجي ته سياستدانن جا به انساني حق هوندا آهن. هن چيو ته ماجده رضوي پهرين عورت جج آهي ۽ اهو به پيپلز پارٽي جي حڪومت ۾ ٿيو. شهيد بي بي هميشه انساني حقن جي ڳالهه ڪئي ۽ چيئرمين بلاول ڀٽو به ساڳئي قدم تي هلي رهيو آهي. ۽ هن اسيمبلي ۾ انساني حقن جي ڪميٽي جو چيئرمين بڻجڻ پسند ڪيو. هن چيو ته اسان جي پارٽي ليڊرشپ شاگرد يونين جي بحالي لاءِ پريس ڪانفرنس ڪندي آهي. وڏي وزير چيو ته آئون ٽي هفته اڳ زرداري صاحب سان ملڻ ويس ته ان شاگرد يونين بحال ڪرڻ واري قانون جي تياري ۾ دير ٿيڻ تي مايوسي جو اظهار ڪيو . هن چيو ته اسان ڪميٽي ۾ پڻ نئين ايندڙ قانون ۾ شاگردن کي نمائندگي ڏني آهي. اهو شاگرد يونين جو مسودو لاءِ اسٽينڊنگ ڪميٽي ڏانهن ويندو  جيڪو سڀني سان صلاح مشورو ڪندي. مون شاگرد يونينون ڏٺيون آهن جيڪي منهنجي شاگردي واري دور ۾ ئي ختم ٿي ويون. هن چيو ته جيڪي نوجوان پڙهي رهيا آهن اهي رڳو اسٽيڪ هولڊرز نه آهن، ناڪاري راءِ به يونين لاءِ موجود آهي. تقرير جي آزادي ته آهي پر تقرير کانپوءِ ڇا ٿيندو انهيءَ جي گارنٽي نه آهي. ٽيننسي ايڪٽ ۾ اڪائونٽنٽ سسٽم جي ڳالهه آهي. جڏهن 1977 ۾ مارشل لاءِ لڳي ته منهنجو پيءُ جيل ويو  ۽ مون زمينن جي سنڀال ڪئي. آئون جيترو هارين سان گڏ ويٺو آهيان اوهان نه ويٺا هوندا. آئون انهن سان سڄو حساب ڪتاب ڪندو هوس. اڪائونٽنگ جي قانون ۾ باقاعده ڪانٽريڪٽ هوندو آهي جتي فرق رکيو ويندو آهي اسان انهيءَ کي ختم ڪرڻ جي ڪوشش ڪنداسين. وڏي وزير چيو ته صحافين لاءِ اسان اها پڻ شرط لڳائي هئي ته کين ادارن کي اسان جيڪي اشتهارن جي مد ۾ رقم ڏيندا آهيون انهيءَ منجهان اهي پنهنجي ڪارڪنن کي پگهارون ڏيندا پر اخباري مالڪ اسان جي ماتحت ته نه آهن لڳي ايئن ٿو جو اسان کين ماتحت اچي ويا آهيون. نوجوانن جي اي پي سي بابت اهو چوندس ته آئون انهيءَ لاءِ ڪوشش ڪندس ته اهڙي قسم جي ڪابه اي پي سي سڏرائي وڃي جنهن تي بحث مباحثا ٿيڻ گهرجن. اسان ٽرانسجينڊر لاءِ جيڪا ڪوٽا رکي آهي انهيءَ جو هرگز مطلب اهو نه آهي ته اوهان ميرٽ تي اپلاءِ ڪرڻ ڇڏي ڏيو. انهيءَ بابت آئون اهو ڏسندس ته اختيار حڪومت وٽ آهي يا نه. اسان مذهب جو جبراً تبديلي وارو قانون جوڙيو جنهن ۾ 18 سال واري عمر رکڻ غلطي هئي. اسان ڪوشش ڪئي آهي ته ڪراچي سرڪلر ريلوي جي بحالي واري منصوبي ۾ ڪنهن کي بي گهر نه ڪجي ۽ ان بابت صوبائي وزير بلديات سان ڳالهائيندس ته هو ڪي سي آر منصوبي سبب بي گهر ٿيندڙ ماڻهن سان ڳالهائي ۽ انهن جا مسئلا ٻڌي.وڏي وزير سيد مراد علي شاهه تقريب کانپوءِ ميڊيا سان ڳالهائيندي چيو ته اڄ زرداري صاحب کي طبي بنيادن تي ضمانت ملي آهي، اها ڪابه ڊيل نه آهي جيڪڏهن زرداري صاحب سنڌ ۾ هجن ها ته جيل قانون تحت سهولتون حاصل ڪري ها. هن چيو ته حڪومت سڀني کي چور چئي وقت برباد ڪري رهي آهي. هڪ سوال جي جواب ۾ هن چيو ته سي سي آئي اجلاس  بابت ميٽنگ جو نوٽيس ايندو آهي دعوت نٿي ملي. وڏي وزير طور منهنجو فرض آهي ته اجلاس ۾ شرڪت ڪريان. 13 مهينن کان سي سي آئي جو اجلاس نه سڏرايو ويو . پاڻي جو مسئلو آهي، ڪميٽي جي رپورٽ اچي وئي آهي جنهن جي اصلاح سي سي آئي اجلاس وٽان ڪرائڻي آهي. هن چيو ته اسان جي فنڊن جي ڪٽوتي ٿي آهي ۽ اسان کي پنهنجا فنڊز سي سي آئي ذريعي واپس وٺڻا آهن. آئي جي سنڌ بابت هڪ سوال جي جواب ۾ هن چيو ته سنڌ جو آئي جي سنڌ حڪومت کي رپورٽ ڪندو آهي ۽ سنڌ حڪومت جي پوليس سان ڪابه ڇڪتاڻ نه آهي. مون کي ٻڌايو وڃي ته ڪير  ڳالهه کي ڊگهيڙي رهيو آهي ته انهيءَ خلاف ڪارروائي ڪندس. دعا منگي بابت هن چيو ته پوليس جانچ ڪري رهي آهي ۽ پوليس جلد ملوث گينگ کي گرفتار ڪري وٺندي. هن چيو ته جنهن ڏينهن دعا منگي اغوا ٿي آئون انهيءَ رات سمهي نه سگهيو آهيان. وڏي وزير ڪتي جي ڏاڙهڻ سبب فوت ٿيندڙ ٻار بابت پڇيل سوال جي جواب ۾ چيو ته جڏهن ٻار کي ڪتي ڏاڙهو ته اسان علاج لاءِ ترت ڪراچي منتقل ڪيو جيڪڏهن 1 سيڪڙو به ٻار جو بهتر علاج ڪٿي به ممڪن هجي ها ته آئون ٻارڙي کي اتي اماڻيان ها. وڏي وزير چيو ته مون لاهور جو واقعو ٽي وي تي ڏٺو آهي جنهن کي ڏسي مونکي تمام گهڻو ڏک پهتو  آهي. مونکي تفصيل بابت خبر نه آهي ان ڪري آئون وڌيڪ نه ڳالهائيندس. پرامن احتجاج سڀني جو حق آهي پر قانون کي هٿ ۾ کڻڻ جي اجازت ڪنهن کي به نه آهي.

 

نيب پ پ ايم پي اي نادر مگسي ۽ سردار چانڊيو خلاف جاچ جي منظوري ڏئي ڇڏي

اسلام آباد (م.ڊ) نيب جي ايگزيڪيوٽو بورڊ پ پ ايم پي اي نادر مگسي ۽ سردار چانڊيو خلاف جاچ جي منظوري ڏئي ڇڏي، جڏهن ته ڊي جي ثقافت منظور ڪناسرو خلاف جاچ شروع ڪرڻ ۽ زرعي يونيورسٽي جي اڳوڻي وي سي خلاف جاچ بند ڪرڻ جي منظوري ڏني وئي آهي. نيب چيئرمين رٽائرڊ جسٽس جاويد اقبال جي سربراهيءَ ۾ ايگزيڪيوٽو بورڊ جي اجلاس دوران ڪرپشن اسڪينڊلز جي حوالي سان ريفرنس، انڪوائريز ۽ انويسٽيگيشنز جو جائزو ورتو ويو. نيب ترجمان جي پڌرائي موجب ايگزيڪيوٽو بورڊ جي اجلاس دوران ائنٽي ڪرپشن اسٽيبلشمينٽ ڪراچي، روينيو کاتي جي اسڪيم ۾ آفيسرز ۽ ملازمن خلاف ٻن انويسٽيگيشنز (جاچ) جي منظوري ڏني وئي آهي، جڏهن ته 4 انڪوائريز جي به منظوري ڏني وئي آهي. نيب ترجمان جي پڌرائي موجب ايگزيڪيوٽو بورڊ پ پ ايم پي اي مير نادر مگسي، لوڪل گورنمينٽ سنڌ ۽ صوبائي هاءِ ويز کاتي جي آفيسرز توڙي ملازمن خلاف جاچ (انڪوائري) جي منظوري ڏئي ڇڏي آهي، جڏهن ته ٺيڪيدار بلاول شيخ، پرسرام، ايم پي اي سردار چانڊيو ۽ ٻين خلاف به انڪوائري جي منظوري ڏني وئي آهي. نيب جي ايگزيڪيوٽو بورڊ ثقافت کاتي جي ڊي جي منظور احمد ڪناسرو، ڊائريڪٽوريٽ آف پلاننگ اينڊ ڊولپمينٽ ۾ ڪرپشن ۽ لينڊ يوٽيلائيزيشن جي آفيسرز توڙي ملازمن خلاف انڪوائريز جي منظوري ڏئي ڇڏي آهي، جڏهن ته زرعي يونيورسٽي جي نااهل قرار ڏنل وي سي ڊاڪٽر مجيب الدين ميمڻ ۽ ٻين خلاف به جاچ (انڪوائري) شاهديون نه ملڻ جي بنياد تي بند ڪرڻ جي منظوري ڏني وئي آهي. نيب جي ايگزيڪيوٽو بورڊ جي اجلاس دوران فيصلو ڪيو ويو آهي ته عبدالجبار ڀٽو، سيد احمد شاهه ۽ ٻين خلاف جاچ تي قانوني ڪارروائي ڪرڻ لاءِ چيف سيڪريٽري کي لکت ۾سفارش ڪئي ويندي.

 

 

وزيراعظم لاهور اسپتال ۾ وڪيلن جي هنگامن واري واقعي تي نوٽيس ورتو، رپورٽ طلب، وڏي وزير جاچ ڪميٽي جوڙي ڇڏي

اسلام آباد /لاهور(م.ڊ) وزيراعظم عمران خان لاهور اسپتال ۾ وڪيلن جي هنگامن واري واقعي تي رپورٽ طلب ڪري ورتي آهي، پنجاب جي وڏي وزير چيو آهي ته وڊيو تڪرار تي ٺاهه ٿي ويو هو، پوءِ به هنگاما ڪيا ويا، ذميوارن خلاف ڪارروائي ڪئي ويندي. وزيراعظم عمران خان لاهور ۾ ڪارڊيو اسپتال اندر وڪيلن جي هنگامي ۽ چڪرين واري واقعي جو نوٽيس ورتو آهي. وزيراعظم طرفان پنجاب جي چيف سيڪريٽري ۽ آءِ جي پنجاب کان رپورٽ پڻ طلب ڪئي وئي آهي, ٻئي پاسي اسلام آباد ۾ ميڊيا سان ڳالهائيندي پنجاب جي وڏي وزير عثمان بُزدار چيو ته موجوده صورتحال کانپوءِ امن امان جي حوالي سان اجلاس طلب ڪيو ويو آهي، هو سڌو لاهور وڃي صورتحال جو جائزو وٺندو. وڪيلن تي چٿرن واري ينگ ڊاڪٽرز جي وڊيو تي پيدا ٿيل تڪرار جي حوالي سان پنجاب جي وڏي وزير چيو ته معاملي تي ٺاهه ٿي ويو هو، هنگامن ۽ ڀڃ ڊاهه ۾ جيڪو به ملوث هوندو، اُن خلاف سخت ڪارروائي ڪئي ويندي.  ٻئي طرف پنجاب جي وڏي وزير عثمان بوزدار پنجاب انسٽيٽيوٽ آف ڪارڊيالاجي (پي آءِ سي) تي ڪاهه واري واقعي جي جاچ لاءِ قانون واري وزير جي سربراهي ۾ جاچ ڪميٽي جوڙي ڇڏي. عثمان بوزدار لاهور ۾ پنجاب انسٽيٽيوٽ آف ڪارڊيالاجي ۾ وڪيلن طرفان ڀڃ داهه جو نوٽيس وٺندي چيف سيڪريٽري پنجاب ۽ لاڳاپيل اختيارين کان رپورٽ طلب ڪري ورتي. پنجاب جي وڏي وزير واقعي جي جاچ لاءِ قانون واري وزير راجا بشارت جي سربراهي ۾ هڪ ڪميٽي پڻ جوڙي آهي، جنهن ۾ صحت واري وزير ڊاڪٽر ياسمين راشد، آءِ جي پوليس، ايڊيشنل چيف سيڪريٽري ۽ سيڪريٽري اسپيشلائزڊ هيلٿ اينڊ ميڊيڪل ايجوڪيشن شامل آهن. ڪميٽي واقعي بابت جاچ ڪري رپورٽ وڏي وزير کي پيش ڪندي، جنهن کي نظر ۾ رکندي ذميوارن خلاف ڪارروائي عمل ۾ آندي ويندي. پنجاب جي وڏي وزير عثمان بوزدار ان ڏس ۾ صحافين سان ڳالهائيندي چيو ته مسئلي تي ڪو ٺاهه نه ٿيندو، جيڪو به ملوث هوندو، ان خلاف سخت ڪارروائي ٿيندي. واضح رهي ته لاهور ۾ پنجاب انسٽيٽيوٽ آف ڪارڊيالاجي (پي آءِ سي) ۾ اڄ وڪيلن ڪاهه ڪري اسپتال اندر ۽ ٻاهر ڀڃ ڊاهه ڪئي، جنهن سبب طبي امداد نه ملڻ جي ڪري 4 مريض فوت ۽ ڪيترائي زخمي پڻ ٿيا، جڏهن ته وزيراعظم عمران خان پڻ واقعي جو نوٽيس ورتو آهي. گرينڊ هيلٿ الائنس جي چيئرمين ڊاڪٽر سلمان حسيب موجب ان پرتشدد مظاهري دوران 4 مريض زندگي جي جنگ هارائي ويا پر رپورٽن موجب مريضن جي حالت ڳڻتي جوڳي هئي ۽ وڪيلن طرفان ايمرجنسي وارڊن ۾ گهڙڻ کانپوءِ کين طبي امداد نه ملي سگهي. واضح رهي ته ڄاڻايل معاملو ان وقت شروع ٿيو، جڏهن وڪيلن الزام هنيو ته وائرل ٿيندڙ هڪ ويڊيو ۾ ينگ ڊاڪٽر وڪيلن تي ٽوڪَ ڪري رهيا هئا، جنهن تي هنن سوشل ميڊيا تي مهم هلائي پر ڊاڪٽرن موجب وڪيلن جو هڪ ڌڙو انسپيڪٽر جنرل وٽ ويو هو ۽ کيس چيو هو ته ٻن ڊاڪٽرن خلاف اي ٽي اي جي قلم 7 تحت ڪيس داخل ڪيو وڃي پر انهن جي بقول آءِ جي ان معاملي تي انڪار ڪري ڇڏيو.

 

جهيڙو ٽارڻ لاءِ پهتل صوبائي وزير فياض چوهاڻ تي به وڪيلن جو تشدد، وار پٽيا ويا

لاهور (م.ڊ) لاهور ۾ احتجاج دوران وڪيلن صوبائي وزير فياض الحسن چوهاڻ تي به حملو ڪري ڏنو، تشدد کانپوءِ وارن مان گهلي اڳتي وٺي ويا. لاهور جي ڪارڊيو اسپتال ۾ وڪيلن جي ڀڃ ڊاهه، هنگامي ۽ ڇڪتاڻ جي ڄاڻ ملڻ بعد پنجاب جي سُڌ سماءَ وارو وزير فياض الحسن چوهاڻ پهتو، وڪيلن صوبائي وزير تي به تشدد ڪيو ۽ وارن مان جهلي کيس وٺي ويا. صوبائي وزير فياض الحسن چوهاڻ واقعي جي رپورٽ وٺڻ لاءِ پهتو هو ته مٿس به تشدد ڪيو ويو.صوبائي وزير فياض الحسن چوهاڻ واقعي تي ردعمل ظاهر ڪندي چيو آهي ته هو رپورٽ وٺڻ ۽ جهيڙو ٽارڻ لاءِ اسپتال پهتو هو، پر کيس به تشدد جو نشانو بڻايو ويو. هُن چيو ته کيس اغوا ڪرڻ جي ڪوشش ڪئي وئي، وڪيلن خلاف ڪيس داخل ڪري ذميوارن کي عبرت جو نشانو بڻايو ويندو.

 

پنجاب انسٽيٽيوٽ آف ڪارڊيالاجي (پي آءِ سي) ۾ پيش آيل واقعي جي ذميوارن خلاف سخت ڪارروائي ڪبي: وفاقي سرڪار

اسلام آباد (ويب ڊيسڪ) وفاقي گهرو وزير اعجاز شاهه چيو آهي ته پنجاب انسٽيٽيوٽ آف ڪارڊيالاجي (پي آءِ سي) ۾ پيش آيل واقعي جي ذميوارن خلاف سخت ڪارروائي ڪبي. لاهور ۾ پيش آيل واقعي تي افسوس جو اظهار ڪندي اعجاز شاهه چيو ته ائين نه ٿيڻ گهرجي ها، منهنجي زندگي ۾ اسپتال تي ڪڏهن به اهڙو حملو ناهي ٿيو، واقعي جي جاچ ضرور ٿيندي ۽ ذميوارن خلاف سخت ڪارروائي ڪنداسين. هن چيو ته وڪيلن ۽ ڊاڪٽرن ۾ 4 هفتا اڳ ويڙهه ٿي هئي پر ان کانپوءِ ٺاهه ڪرايو ويو هو، معاملو به چُپ ٿي ويو هو پر اڄ ٻيهر شروعات ٿي وئي، واقعو سوشل ميڊيا تي هلندڙ ويڊيو سبب پيش آيو، وڪيل سوشل ميڊيا تي ويڊيو ڏسي مڇريا.

 

لاهور ۾ وڪيل گردي جي مذمت، وڪيل تنظيمون ذميواري پوري ڪن، نيب ڪو ادارو نه تماشو آهي: سعيد غني

ڪراچي(اسٽاف رپورٽر) سنڌ جي اطلاعات ۽ محنت واري صوبائي وزير سعد غني چيو آهي ته لاهور ۾ وڪيلن پاران اسپتال تي چڙهائي ۽ ان جي نتيجي ۾ رپورٽ جي مطابق ڪجھ فوتگين جي شديد لفظن ۾ مذمت ڪندي وڪيل تنظيمن کان مطالبو ڪو آهي ته هو ان تي پنهنجي ذميواري پوري ڪن. نيب هڪ تماشو آهي ڪو ادارو ناهي. 6 مهينن تائين خورشيد شاھ بنا سبب جي گرفتار ڪرڻ کان پوءِ هاڻ جي آئي ٽي بڻائڻ ياد آئي آهي. آصف علي زرداري جي رهائي حق جي فتح آهي ۽ اسان کي اميد آهي ته 17 ڊسمبر تي فريال ٽالپور جي درخواست ضمانت تي به عدالت ميرٽ تي فيصلو ڪندي. اهڙن خيالن جو اظهار هن صحافين کي مٺائي کارائڻ کان پوءِ ميڊيا سان ڳالھ ٻولھ ڪندي ڪيو. ان کان پهرين پيپلز پارٽي جي سنڌ اسيمبلي ۾ ميمبرن جن ۾ عورتون به شامل آهن انهن صحافين کي مڍائي کارائي ۽ پنهنجي پارٽي جي شريڪ چيئرمين آصف علي زرداري جي رهائي تي مبارڪون وصول ڪيون. ان موقعي تي ميڊيا سان ڳالھ ڪندي اطلاعات واري صوبائي وزير سعيد غني چيو ته لاهور ۾ پنجاب انسٽيٽيوٽ آف ڪارڊيولاجي تي ٿيندڙ واقعي جي شديد لفظن ۾ مذمت ڪريان ٿو هن چيو ته وڪيل اسان جي معاشري جي هڪ ذميوار برادري آهن ۽ کين قانون جو سڀ کان وڌيڪ پتو آهي. هن چيو ته کين قانون جو سڀ کان وڌيڪ خيال رکڻ گھرجي. سعيد غني چيو ته اڄ لاهور ۾ ٿيندڙ واقعن کي اسان مختلف خانگي چئنلن تي ڏٺو آهي اهي انتهائي افسوس ناڪ آهن جهڙي ريت هن ان وڏي اسپتال کي بند ڪيو ويو. مريضن کي پريشان ڪيو ويو ۽ مون کي علم ناهي ته هنگامي جي دوران ڪجھ فتگيون به ٿيون آهن هن چيو ته ان تي وڪيل تنظيمن کي سخت نوٽيس وٺڻ گھرجي ۽ وڪيلن جي وچ ۾ اهڙا ماڻهون جيڪي اهڙي قسم جي واقعن جو ڪارڻ آهن انهن جي خلاف ڪارروائي ڪرڻ گھرجي. سعيد غني چيو ته اڄ پوري پاڪستاني عوام کي مبارڪون پيش ڪريان ٿو ته جو الله پاڪ جي ڪرم سان اسلام آباد هائي ڪروٽ مان آصف علي زرداري جي ضمانت منظور ٿي وئي آهي. هن چيو ته اساسن ڪيترن ئي ڏينهن کان چوندا رهيا آهيون ته ضمانت ان جو حق آهي پر جيئن ته هو پاڻ ضمانت وٺڻ نه پيو چاهي ۽ هو عمران نيازي کي کيس جيل ۾ رکڻ ۽ کيس ٽوڙڻ جي خواهش جو جواب ڏئي رهيو هو پر جڏهن آصف علي زرداري جي گھر وارن ۽ پارٽي پاران درخواست ڪئي وئي ته ته هو ضمانت تي راضي ٿيو ۽ اڄ عدالت سڳوري ان جي بيماري کي نظر ۾ رکندي ميرٽ تي فيصلو ڏنو ۽ کيس ضمانت ڏني. سعيد غني چيو ته اسان کي اميد آهي ته جهڙي ريت آصف علي زرداري کي ضمانت ڏني وئي آهي اهڙي ريت 17 ڊسمبر تي فريال ٽالپور جي ضمانت جي درخواست تي عدالت ميرٽ تي فيصلو ڪندي ۽ هڪ عورت ۽ ٻئي پاسي خاص ٻار  کي نظر ۾ رکندي ان کي ضمانت ڏني ويندي. هن چيو ته فريال تالپور جي هڪ ٻارڙي اسپيشل چائلڊ آهي ۽ هن ڀيري هن قومي اسمبلي جي بجائي صوبائي اسيمبلي جي چونڊ انڪري وڙهي جو هوءَ پنهنجي ڌيءَ جي سارسنڀال ڪري سگھي ڇو ته جڏهن هوءَ قومي اسيمبلي جي ميمبر هئي ته کيس هر اجلاس جي موقعي تي ان ٻارڙي پاڻ سان اسلام آباد گڏ آڻڻو پوندو هو ۽ اهو هڪ تڪليف وارو عمل آهي. ۽ هاڻ به جڏهن هوءَ 6 مهينن کان قيد ۾ آهي ته ان ٻارڙي تي توجه نه ڏئي سگھي آهي. هن چيو ته اڃان تائين فريال ٽالپور تي ڪو به الزام ثابت ناهي ٿيو ۽ نيب جيڪا جانچ ڪرڻي هئي اها به ڪري روتي آهي ۽ هاڻ هو جوڊيشل رمانڊ تي جيل ۾ آهي ۽ قانون جي مطابق جيڪڏهن ڪنهن تي ڪو به الزام ثابت نه ٿئي ته ان کي جيل ۾ رکڻ رکڻ بنا سبب آهي ۽ ان جي ضمانت منظور ٿيڻ گھرجي. هڪ سوال جي جواب ۾ سعيد غني چيو ته آصف علي زرداري جو ٻاهرين ملڪ وڃڻ جو ڪو به ارادو ناهي ۽ هتي ملڪ ۾ رهي ئي علاج ڪرائيندو. هڪ سوال جي جواب ۾ سعيد غني چيو ته هن ملڪ ۾ نبي هڪ ادارو نه پر هڪ تماشو آهي هن چيو ته خورشيد شاھ تي 500 ارب روپين جي ڪرپشن جو الزام لڳائي کيس گرفتار ڪيو ويو ۽ 6 مهينن تائين ڪجھ ثابت ناهي ٿيو ته جي آئي ٽي ٺاهڻ جو ڊرامو ڪيو پيو وڃي. هن چيو ته اڄ سنڌ ۾ هڪ اهڙي متنازع شخص کي ڊي جي نيب مقرر ڪيو ويو آهي جيڪو اسان جي سياسي مخالفن جو ويجھو ساٿي هجڻ سان گڏوگڏ آصف علي زرداري جي زبان ڪٽڻ جي ڪيس ۾ به ملوث آهي. هن چيو ته ان شخص کي نيب جو ڊي جي ان ڪري بڻايو ويو آهي جو مان هميشه حسنين مرزا جي ڪرپشن تي ان کر گرفتار ڪرڻ جو مطالبو ڪندو آهيان ته ان کي گرفتار نه ڪيو وڃي. هڪ سوال جي جواب ۾ هن چيو ته اسان هميشه الزامن کي عدالتن ۾ منهن ڏنو آهي ۽ هاڻ به اهو ڪنداسين. هڪ سوال جي جواب ۾ هن چيو ته آصف علي زرداري ۽ فريال ٽالپور جي گرفتاري غلط ڪيس بڻائي ڪئي وئي آهي ۽ جنهن فيڪ ڪيس جي ڳالھ ڪئي پئي وڃي اهو ڪيس ئي غلط آهي.

 

مورو ۾ پيءُ هٿان ڌيءَ ڪارنهن الزام تحت قتل، جوابدار گرفتار، ڏوهه جو اعتراف، ڪيس داخل

مورو(رپورٽر) موري جي پوسٽ آفيس ڪالوني ۾ گذريل ڏينهن ڇوڪري جي پراسرار موت جو معاملو حل ٿي ويو، ناري جو قاتل والد نڪتو، پيءُ پنهنجي ڌيءَ کي ڪارنهن الزام ۾ قتل ڪري ڪوڙو رچايو، بندوق هٿ ڪئي وئي آهي، پوليس، گذريل ڏينهن پوسٽ آفيس ڪالوني ۾ ناري صوفيه جو موت واقع ٿيو هو، جنهن جو سبب اتفاقي گولي ڄاڻايو ويو هو، پوليس ڪيس ۾ اڳڀرائي ڪندي ڌيءَ جي قتل جي الزام ۾ والد کي گرفتار ڪري ورتو، جنهن واقعي بابت اعتراف ڪري ورتو آهي، پوليس جو چوڻ آهي ته مورو ٿاڻي تي ڇوڪري جي پيءُ نياز حسين ڪورائي مٿان قتل جي ايف آءِ آر داخل ڪري کيس گرفتار ڪيو ويو آهي، سرڪاري فرياد ۾ ڄاڻايو ويو ته ناري صوفيه کي ڪارو ڪاري جو الزام ڏئي قتل ڪري لاش بنا ٻڌائڻ جي دفن ڪري ثابت لڪائي پئي وئي ته ڳجهي اطلاع تي ڇوڪري جي والد کي گرفتار ڪيو ويو، قاتل وٽان واقعي ۾ استعمال ڪيل بندوق هٿ ڪئي وئي آهي، وڌيڪ جاچ ڪريون پيا.ٻئي طرف  مورو شھر ۾ نوجوان ناري گهر اندر پراسرار نموني گولي لڳڻ سبب مارجي وئي. پوسٽ آفيس ڪالوني ۾ پوسٽ آفيس جي پٽيوالي نياز حسين ڪورائي جي 18 سالن جي نياڻي صفيه ڪورائي گھر ۾ پراسرار نموني گولي لڳڻ سبب زخمي ٿي پئي، کيس مورو اسپتال آندو ويو، جتي طبي امداد ملڻ بعد نوابشاھ اسپتال منتقل ڪيو پئي ويو پر ناري بچي نه سگهيا ۽ زخمن جا سور نه سھندي رستي ۾ ئي فوت ٿي وئي، بنا پوسٽ مارٽم جي لاش دفنائڻ جي ڪوشش جي اطلاع تي پوليس پهچي ناري جو لاش تحويل ۾ ورتو ۽ لاش جو موري اسپتال مان پوسٽ مارٽم ڪرايو. مورو پوليس پٽيوالي نياز حسين ڪورائي جي ڪوارٽر تي ڇاپو هڻي ناري جا رت وارا ڪپڙا پڻ ھٿ ڪري ورتا. ڊي ايس پي مورو غلام محمد مھر ٻڌايو ته پراسرار نموني گولي لڳڻ سبب فوت ٿيل ناري جا مائٽ مختلف بيان ڏئي رهيا آهن، ڪنهن مهل چون ٿا ته پيٽ جي سور سبب فوت ٿي وئي، هاڻي آپگهات قرار ڏين پيا. وڌيڪ پوسٽ مارٽم رپورٽ اچڻ بعد حقيقت سامهون ايندي ته ناري جو موت ڪيئن ٿيو. جڏهن ته فوت ٿيل ناري جي پيءُ نياز حسين ڪورائي ٻڌايو ته گذريل رات جو دير سان ڪمري ۾ ستل ھئاسين، اوچتو فائر جو آواز ٿيو ۽ منهنجي ڌيءَ زخمي ٿي پئي، نوابشاهه نيئندي رستي ۾ فوت ٿي وئي. ان کان اڳ ناري جي پيءُ چيو هو ته پيسٽ ۾ تڪليف سبب سندس ڌيءُ فوت ٿي آهي.

 

ڪوٽڏيجي ڀرسان ويگن جو موٽر سائيڪل کي ٽڪر، 2 عورتن سميت 3 ڄڻا فوت، هڪ زخمي

ڪنب(رپورٽر ) ڪوٽڏيجي ڀرسان ديھ سوهو اسٽاپ لڳ ويگن جو موٽر سائيڪل کي ٽڪر ٻن عورتن سميت 3 ڄڻا فوت هڪ زخمي خبر موجب ڪوٽڏيجي ٿاڻي جي حد ديھ سوهو اسٽاپ ڀرسان تيز رفتار ويگن جو موٽر سائيڪل کي ٽڪر جي نتيجي ۾ مسمات شريفا چانڊيو مسمات ريشما چانڊيو ۽ لطيف چانڊيو فوت ٿي ويا جڏھن ته هڪ ڄڻو زخمي ٿي پيو حادثي جو شڪار خاندان ڪنب جي ڳوٺ بنگل خان چانڊيو مان موٽر سائيڪل تي خيرپور وڃي رهيا هئا ته ديھ سوهو اسٽاپ ڀرسان حادثي ۾ فوت ٿي ويا فوتين جا لاش ڳوٺ بنگل خان چانڊيو ۾ گهر اندر پهچڻ تي ڪهرام مچي ويو ڳوٺ ۾ سوڳ ڇانئجي ويو ڪوٽڏيجي پوليس ويگن کي تحويل ۾ وٺي ڇڏيو جڏهن ته ويگن ڊرائيور فرار ٿي ويو