تازيون خبرون
اقتصادي رابطا ڪميٽي3 لک ميٽرڪ ٽن ڪڻڪ ٻاهران گهرائڻ جي منظوري ڏئي ڇڏي - سنڌ حڪومت جو پاسڪو کان اضافي ڪڻڪ خريدڻ ۽ ذخيره اندوزن خلاف آپريشن جو فيصلو - 4 ڏينهن جيل ۾ نه رهندڙن جو رڙيون ختم نه پيون ٿين: فردوس عاشق - سنڌ هاءِ ڪورٽ آءِ جي ڪليم امام جي بدلي روڪي ڇڏي، ڪم جاري رکڻ جي هدايت - صدر پاڪستان عارف علوي جو اين آئي سي وي ڊي جو دورو، معياري علاج جي تعريف، مريضن سان به ملاقات - مشهور رسالي ٽائم پاڪستاني وزيراعظم عمران خان کي ماحوليات جي ترجماني ڪندڙ دنيا جي 5 شخصيتن ۾ شامل ڪري ورتو - عارف علوي جو ڪم اسپتالن جا دورا ڪرڻ ناهي. سنڌ حڪومت تي الزام هڻي وفاقي وزيرن غير ذميواري جو مظاهرو ڪيو: سعيد غني - تحريڪ انصاف ۾ ڌڙابندي، 20 ميمبرن الڳ گروپ ٺاهي ڇڏيو - مولانا فضل الرحمان هيل پنهنجي ڏڍ تي اسلام آباد آيو هو، هن ڀيري ملا ملٽري الائنس اڳ جهڙو نه هو: شيخ رشيد - 16 مهينن ۾ عوام کي نواز شريف جي ترقي ڪندي پاڪستان ۽ عمران خان جي نئين پاڪستان ۾ فرق جي خبر پئجي وئي: ن ليگ

Daily Archives: December 6, 2019

جيلن ۾ رکڻ جو شوق ناهي، قوم جو لٽيل پئسو واپس ڪريو: وفاقي سرڪار

اسلام آباد (م.ڊ) وزيراعظم جي خصوصي معاون شهزاد اڪبر چيو آهي ته شهباز شريف جي اثاثن ۾ 10 سالن دوران 70 سيڪڙو اضافو ٿيو، قوم جو لٽيل پئسو واپس ڪريو، اسان کي جيلن ۾ رکڻ جو شوق نه آهي.  اسلام آباد ۾ وفاقي وزير مراد سعيد سان گڏ پريس ڪانفرنس ڪندي وزيراعظم جي خصوصي معاون چيو ته شهباز شريف طرفان لنڊن ۾ ڪيل نيوز ڪانفرنس ٺُس ٿي وئي، هڪ هن پائي جي ڪرپشن ثابت ڪرڻ جي ڳالهه ڪئي آهي، پر هتي ته اربين رُپين جي ڪرپشن ٿي آهي. شهزاد اڪبر چيو ته نيب جي جاچ موجب شهباز شريف جي اثاثن ۾ 10 سال دوران 70 سيڪڙو اضافو ٿيو آهي، سلمان شهباز جي اثاثن ۾ هڪ هزار ڀيرا اضافو ٿيو ۽ حمزه شهباز جي اثاثن ۾ ته هوش خطا ڪندڙ اضافو ٿيو آهي. سلمان شهباز ڀاڳيلو آهي ۽ سندس ملڪيتون ضبط ڪرڻ وارو عمل شروع ٿي چڪو آهي. احتساب بابت وزيراعظم جي خصوصي معاون شهزاد اڪبر جو چوڻ هو ته جعلي ٽي ٽيز ذريعي معصوم ماڻهن جي نالن تي ٻاهران پئسا آيا ۽ 32 ڪمپنيز ٺاهيون ويون، ڪاغذي ڪمپنين ذريعي اهو ثابت ڪرڻ جي ڪوشش ڪئي وئي ته سڀ ڪجهه ڊڪليئر ٿيل آهي. هُڻ چيو ته ايندڙ ڏينهن ۾ مختلف ڪمپنيز جا ڪارناما به بيان ڪندو. جعيل ٽي ٽيز ذريعي 32-32 جعلي ڪمپنيز ٺاهيون ويون، اهو ڪاروبار 200 کان وڌيڪ ٽي ٽيز جي رقم مان شروع ڪيو ويو. پريس ڪانفرنس دوران شهزاد اڪبر چيو ته ملڪ جو لُٽيل ناڻو واپس ڪريو، اسان کي ماڻهن کي جيلن ۾ رکڻ جو ڪوبه شوق نه آهي، شهباز شريف وڏيون دعوائون ڪيون ته پنجاب ۾ ڪرپشن جا الزام لڳائڻ تي ڊيلي ميل خلاف عدالت ۾ ويندو، هُو عدالت ته ويو ئي ڪونه، پر ڊيلي ميل جي رپورٽ جو جواب به اڃا تائين نه ڏنو آهي.

 

وفاقي حڪومت کي 10 ڏينهن ۾ اليڪشن ڪميشن جي ميمبرن جي مقرري هدايت

اسلام آباد (م.ڊ) اسلام آباد هاءِ ڪورٽ اليڪشن ڪميشن جي ميمبرز جي مقرري وارو معاملو ڏهه ڏينهن ۾ حل ڪرڻ جي هدايت ڪندي چيو آهي ته اسان پارليامينٽ کي مضبوط ڏيڻ گهرون ٿا ۽ اهو ڪم توهان کي ڪرڻو آهي، چيف اليڪشن ڪمشنر جو عهدو انتهائي اهم آهي، حڪومت ۽ اپوزيشن کي گڏجي معاملو حل ڪرڻ گهرجي. اسلام آباد هاءِ ڪورٽ ۾ اليڪشن ڪميشن جي ٻن ميمبرز جي مقرري نه ٿيڻ خلاف درخواست تي ٻڌڻي ٿي، جنهن دوران عدالت حڪومت کي اليڪشن ڪميشن جي ٻن ميمبرز جي مقرري وارو معاملو 10 ڏينهن ۾ حل ڪرڻ جي هدايت ڪري ڇڏي. درخواست تي ٻڌڻي چيف جسٽس اطهر من الله ڪئي ۽ وفاق طرفان ايڊيشنل اٽارني جنرل طارق کوکر پيش ٿيو. ٻڌڻيءَ دوران وفاقي سرڪار ميمبرز جي مقرري وارو مامرو حل ڪرڻ لاءِ وڌيڪ مهلت جي استدعا ڪئي، ايڊيشنل اٽارني جنرل چيو ته گذريل ڏينهن پارلياماني ڪميٽي جو ستون اجلاس ٿيو، معاملو حل ڪرڻ لاءِ وڌيڪ وقت ڏنو وڃي. چيف جسٽس اطهر من الله ريمارڪس ڏيندي چيو ته قومي اسيمبلي جي اسپيڪر ۽ سينيٽ چيئرمين جي ڪوششن کي ساراهيون ٿا، حڪومت ۽ اپوزيشن جي ڪوششن جو به قدر ڪريون ٿا. عدالت ن ليگ اڳواڻ ۽ درخواستگذار محسن شاهه رانجهان کان پڇيو ته ڇا توهان سُپريم ڪورٽ ۾ ڪا پٽيشن داخل ڪرائي آهي ڇا؟ سمجهه ۾ نٿو اچي ته جڏهن معاملا حل ٿيڻ وڃي رهيا آهن ته توهان عدالت ڇو آيا؟ توهان اهڙا مامرا عدالت ۾ ڇو آڻيندا آهيو، سمجهه ۾ نٿو اچي. چيف جسٽس درخواستگذار سان مخاطب ٿيندي ريمارڪس ڏنا ته سڀ ڪجهه توهان وٽ آهي، چونڊيل نمائندا آهيو، پاڻ معاملا حل ڪيو، مون کي سمجهه ۾ نٿو اچي ته پارليامينٽ جا معاملا عدالت ۾ ڇو آڻي رهيا آهيو؟ توهان کي اسان وٽ نه اچڻ گهرجي، بلڪه سمورا اختلاف پارليامينٽ ۾ حل ڪريو، هر ميمبر کي گهرجي ته ڪوشش ڪري عدالت بدران پارليامينٽ ۾ ئي معاملو حل ڪري. چيف جسٽس اطهر من الله نواز ليگ اڳواڻ محسن شاهه نواز رانجها سان مخاطب ٿيندي چيو ته اسان پارليامينٽ کي مضبوط ڏيڻ گهرون ٿا ۽ اهو ڪم توهان کي ڪرڻو آهي، چيف اليڪشن ڪمشنر جو عهدو انتهائي اهم آهي، حڪومت ۽ اپوزيشن کي گڏجي معاملو حل ڪرڻ گهرجي. هتي ماضي ۾ ڪجهه شيون ٺيڪ نه ٿيون آهن، اسان جي نظر ۾ آهي، توهان کي پارليامينٽ ۾ وڏا وڏا اشوز حل ڪرڻي آهن، هي ته رڳو ٻن ميمبرز جي مقرري جو معاملو آهي. چيف جسٽس اطهر من الله پنهنجي ريمارڪس ۾ چيو ته نيلسن منڊيلا 24 سال قيد ڪاٽڻ باوجود پنهنجي مخالفن کي معاف ڪري ڇڏيو هو. محسن شاهه نواز رانجها چيو ته کيس اُن پٽيشن جي خبر نه آهي، جيڪا سُپريم ڪورٽ ۾ داخل ڪئي وئي.ٻڌڻيءَ دوران سيڪريٽري قومي اسيمبلي عدالت کي استدعا ڪئي ته قومي اسيمبلي جي اسپيڪر ۽ سينيٽ چيئرمين درخواست ڪئي آهي ته معاملو حل ڪرڻ لاءِ وڌيڪ وقت ڏنو وڃي. جنهن تي چيف جسٽس ريمارڪس ڏيندي چيو ته درخواستگذار به وقت ڏيڻ چاهي ٿو، ٻئي ڌُريون متفق آهن ته معاملو حل ڪري وٺو. پارليامينٽ جي بالادستي جي ذميواري توهان تي لاڳو ٿئي ٿي. عدالت معاملو 10 ڏينهن ۾ حل ڪرڻ جي هدايت ڪري ڇڏي.

 

ٽماٽرن ۽ مٽرن جي اگهن کان اڻڄاڻ مهانگائي ڇا ڪنٽرول ڪندا: سعيد غني

ڪراچي(اسٽاف رپورٽر) سنڌ جي اطلاعات ۽ محنت واري صوبائي وزير سعيد غني چيو آهي ته وفاقي سرڪار کي غريبن جي ڪا به پرواهه ناهي ملڪ ۾ مهانگائي جي شرح 9 سال کان وڌيڪ آهي اهي ماڻهو عوام جي ووٽن سان نه پر چور دروازن کان اقتدار ۾ آيا آهن ان حڪومت کي عوام جو احساس ناهي ۽ ملڪ جا ڪروڙين ماڻهو انهن کي برداشت ڪرڻ تي مجبور آهن عوام جي چونڊيل وزيرن کي ٽماٽرن ۽ مٽرن جي اگهن جو علم ناهي اهي مهانگائي کي ڇا ڪنٽرول ڪندا. ان ملڪ ۾ ڪو فرد اهڙو ناهي جيڪو سڪون جي زندگي گزاري رهيو هجي. صوبائي وزير سعيد غني سنڌ اسيمبلي ۾ ميڊيا ڪارنر تي صحافين سان ڳالهه ٻولهه ڪري رهيو هو. سعيد غني وڌيڪ چيو ته وزيراعظم، پنجاب جي وڏي وزير جي تعريف ڪندي ناهي ٿڪندو پر اتان جو حال اهو آهي ته صوبي ۾ پنج آئي جي ۽ ڪيترائي سيڪريٽرين کي تبديل ڪيو ويو آهي ان لاءِ اسان چوندا آهيون جيستائين نااهل حڪمران اقتدار ۾ رهندا ملڪ ۾ بهتري نه ايندي. اطلاعات ۽ محنت واري وزير چيو ته خبر شايع ٿي آهي ته پنجاب جي اسپتالن ۾ اينٽي ريبيز ويڪسين 83 سيڪڙو اسپتالن ۾ ناهي ۽ 1732 مرڪز اهڙا آهن جٿي اها ويڪسين ناهي جڏهن ته پي ٽي آئي سنڌ حڪومت کي چوندي آهي اسان ته هڪ هڪ ويڪسين جي تفصيل ٻڌائي چڪا آهيون ان مان اندازو ڪيو ته پنجاب ۾ ڪهڙي صورتحال هوندي هن چيو ته وزيراعظم جي حلقي ميانوالي ۾ نانگ جي ڪکڻ سان ٻارڙي فوت ٿي وئي ۽ اتي ڪنهن کي به ويڪسين نه ملي ڇو ته ويڪسين جي کوٽ پوري پاڪستان ۾ آهي. هن چيو ته شماريات کاتي مطابق ملڪ ۾ گذريل 9 سالن جي ڀيٽ ۾ مهانگائي ۾ اضافو ٿيو آهي. هن حڪومت کي عوام جو ڪو به احساس ناهي ملڪ جا ڪروڙين ماڻهو نه اهل حڪمرانن جيڪري ڀوڳي رهيا آهن، جنهن حڪومت جي وزيرن کي ٽماٽرن ۽ مٽرن جي قيمت جي ڄاڻ ناهي اهي مهانگائي تي ڪهڙو ڪنٽرل ڪري سگهندا هن چيو ته ملڪ جو ڪو به اهڙو شهري ناهي جيڪو سڪون جي زندگي گزراي رهيو هجي. خرابي باوجود ڪا به تبديلي نه پئي اچي. ان هائوس تبديلي ذڪر آئين ۾ موجود آهي. سعيد غني چيو ته نالائقي ۽ نا اهلي وڏي پيماني تي ڏسڻ ۾ اچي پئي. قانون واري وزير، اٽارني جنرل، پاڪستان جي بهترين وڪيلن جي باوجود هڪڙو نوٽيفڪيشن به درست نموني ٺهي نه سگهيو. آرمي چيف جي ملازمت جي مدي ۾ واڌ وارو فائيل عام اهميت نٿو رکي. ملڪ جو صدر جو اهو چوڻ ته ياد نه رهيو، اها غلط بياني آهي. سپريم ڪورٽ ۾ وڃي ڪوڙ ڳالهيو ويو. ڏسڻو پوندو ته اها نالائقي آهي يا ڄاڻي واڻي ايئن ڪيو ويو. هن چيو ته اسان کي هميشه عوام چونڊيو ۽ عمران خان کي جن سليڪٽ ڪيو انهن سڀني کي خبر آهي ته آرٽيڪل 243 ۾ ترميم لاءِ حڪومت کي ٻه ڀاڱي ٽي اڪثريت گهربل هوندي آهي حڪومت سنجيده هجي ها ته ڳالهه ٻولهه ڪري ها پر ان معاملي کي تڪراري بڻائڻ جي ڪوشش ڪئي وئي هن چيو ته پيپلزپارٽي کي آسان گرنهه نه سمجهيو وڃي، جيڪڏهن ترميم ڪرائڻي آهي ته سنجيده ڳالهيون ڪيون وڃن ۽ زيادتيون بند ٿيڻ گهرجن.

 

لينڊ اسڪينڊل: سنڌ حڪومت 45 ڄڻن تي 72 ڪيس داخل ڪرڻ جي منظوري ڏئي ڇڏي

ڪراچي (م.ڊ) چيف سيڪريٽري سرڪاري زمينن جي غيرقانوني الاٽمينٽ، ڪرپشن ۽ قانون جون حدون اورانگھڻ سميت اربين رپين جي فراڊ اسڪينڊل ۾ روينيو کاتي جي 45 کان مٿي ڪامورن ۽ بااثر خانگي ماڻهن خلاف 27 ڪيس داخل ڪرڻ جي منظوري ڏئي ڇڏي، ان حوالي سان ڪالهه چيف سيڪريٽري سيد ممتاز علي شاھ جي صدارت هيٺ اينٽي ڪرپشن ڪاميٽي ون ( اي سي سي 1) جو اجلاس ٿيو، جنهن ۾ اينٽي ڪرپشن اختيارين پاران روينيو ۽ ڪوآپريٽو کاتي سميت پوليس اسپتال جي ڪرپشن ۽ لاقانونيت وارا معاملا پيش ڪيا ويا. ڪيسن جو جائزو وٺڻ کانپوءِ چيف سيڪريٽري سيد ممتاز علي شاھ روينيو کاتي ۽ پوليس اسپتال خلاف 27 ڌار ڌار ڪيس داخل ڪرڻ جي منظوري ڏني، روينيو کاتي جي سرڪار جي اربين رپين جي ماليت واري زمين جي غيرقانوني الاٽمينٽ سميت ٻين معاملن تي لينڊ يوٽيلائيزيشن کاتي جي ٽن اڳوڻن سيڪريٽرين دانش سعيد، آفتاب ميمڻ ۽ غلام مصطفيٰ ڦُل، سيڪشن آفيسر عمران حميد ۽ حمادالدين چاچڙ، اسسٽنٽ ڪمشنر غلام حيدر چانڊيو، ڊي سي عارف ڪلوڙ، مختيارڪار طفيل خاصخيلي، سيڪشن آفيسر زين العابدين، پي ٽي آءِ ملير جي مقامي اڳواڻ ڊاڪٽر مسرور سيال، خانگي ماڻهن ۽ عملدارن الهڏنو بروهي، وحيد عبدالقادر، آمنه بانو، عامر عباس، محمد جميل، منصور ميمڻ، اعظم خان، بلال خان، رفيق احمد صديقي، عبدالستار، فيصل عباس، ڀاشاني ملتان، ايوب ڪلوڙ، خليل الرحمان، سيد ذوالفقار شاھ، سڪينه، رحيمداد، ملڪ داد، محمد طفيل، فضل داد، نصرت بيبي، فوزيه، محمد مشتاق احمد، محمد صالح، محمد صفر بروهي، خادم حسين، سراج احمد، مشتاق سولنگي، يوسف عباسي، محمد اسلم، سائره پرويز، محبوب علي، محمد موسيٰم، محمد عيسيٰ، فياض مهيسر، عباس سڌايو، جليل بروهي، عمران بٽ، ظفر احمد، محمد اسلم، شڪيل احمد، رياض احمد، بهادر پنجواڻي، صادق پنجواڻي ۽ ٻين تي ڪيس داخل ٿيندا هڪ ئي وقت 2 سرڪاري نوڪريون ڪرڻ وارو اسڪينڊل، 24 سالن تائين اعليٰ عهدن تي 2 نوڪريون ڪندڙ ڪاموري طيب عمراڻي خلاف اينٽي ڪرپشن کي ڪيس داخل ڪرڻ جي منظوري ڏني وئي آهي. ان سلسلي ۾ مليل ڄاڻ موجب طيب عمراڻي 1992ع ۾ سيسي ۾ ميڊيڪل آفيسر طور ڀرتي ٿيو هو، جيڪو 1993ع ۾ ڪميشن پاس ڪري صحت کاتي ۾ ڊاڪٽر طور ڀرتي ٿيو، لاڳيتو 2 نوڪريون ڪرڻ ۽ ٻنهي هنڌن تان پگھارون کڻڻ واري معاملي جو ڦاٽ ڦاٽڻ کانپوءِ سندس خلاف اينٽي ڪرپشن ۾ جاچ هلي رهي هئي. اينٽي ڪرپشن اختيارين پاران سندس ڪيس اي سي سي ون ۾ پيش ڪيو ويو، جنهن بعد چيف سيڪريٽري مٿس ڪيس داخل ڪرڻ جي منظوري ڏني آهي.  روينيو کاتي جي ڪامورن خلاف 6 اوپن انڪوائريون ۽ ڪرپشن سميت غيرقانوني ڪمن جي الزام هيٺ آيل ڪوآپريٽو کاتي جي ڪامورن خلاف 3 اوپن انڪوائرين جي به منظوري ڏني وئي آهي. ان سلسلي ۾ مليل ڄاڻ موجب ته اينٽي ڪرپشن کاتي جي اختيارين پاران چيف سيڪريٽري جي صدارت هيٺ ٿيل اينٽي ڪرپشن ڪاميٽي ون جي اجلاس ۾ روينيو کاتي ۾ غيرقانوني الاٽمينٽ ۽ ٻين معاملن تي اجلاس جي ميمبرن پاران تفصيلي جائزو وٺڻ کان پوءِ چيف سيڪريٽري پاران 6 اوپن انڪوائريون ڪرڻ جي منظوري ڏني وئي. جڏهن ته ڪوآپريٽو کاتي جي ڪرپشن ڪيسن جو به جائزو ورتو ويو جنهن کانپوءِ چيف سيڪريٽري پاران اينٽي ڪرپشن کاتي جي اختيارين کي هدايت ڪئي ته ڪوآپريٽو جي ڪامورن خلاف 3 اوپن انڪوائريون ڪيون وڃن.

 

 

ڊيجيٽل پاڪستان اسان جو مستقبل آهي، نوجوانن جون صلاحيتون دنيا جي سامهون آڻينداسين: عمران خان

اسلام آباد(ويب ڊيسڪ) وزير اعظم عمران خان چيو آهي ته ڊيجيٽل پاڪستان اسان جو مستقبل آهي ۽ ان جي ذريعي دنيا جي ٻي سڀ کان وڏي نوجوان آبادي تي ٻڌل ملڪ هئڻ جي ڪري اسان جي آبادي اسان جي طاقت بڻجي ويندي. ڊيجيٽل پاڪستان ويزن بابت تقريب کي خطاب ڪندي وزير اعظم چيو ته مون کي ڊيجيٽل پاڪستان تي پهرين ڌيان ڏيڻ گهرجي ها ڇو ته هي اسان جي نوجوانن جي لاءِ اهم آهي، دنيا ان ڏانهن وڃي رهي آهي پر اسان پوئتي رهيل آهيون. هن چيو ته هاڻ اسان جو سڄو ڌيان ڊيجيٽل پاڪستان منصوبي تي هوندو جنهن جي ذريعي اسان نوجوانن جون صلاحيتون دنيا جي سامهون آڻينداسين ۽ ان هڪ شئي سان اسان جي نوجوان آبادي اسان جي لاءِ طاقت بڻجندي ڇو ته اسان وٽ دنيا ۾ ٻي سڀ کان وڏي نوجوان آبادي آهي، هي اسان جي لاءِ وڏو موقعو آهي ۽ اسان ان مان فائدو کڻنداسين. وزير اعظم چيو ته مون اوورسيز پاڪستانين جو اندازو آهي ته هنن جي پرڏيهه وڃڻ جو سبب ڪهڙو هوندو آهي، هنن جي پهرين ڪوشش هوندي آهي ته پنهنجي خاندان کي پالن، انهن کي سٺي تعليم ڏين پر پوءِ هو پنهنجي ۾ عجيب قصن جو شڪار ٿي ويندا آهن ڇو ته هو پاڪستان اچڻ چاهي ٿو پر هن جا اُتان جا عادي ٿي چڪا آحن ۽ هو پاڪستان اچڻ ئي نٿا چاهن ان ڪري ان صورت ۾ هو اُتي ڦاسي ويندا آهن. مون انگلينڊ ۾ پاڪستانين جا ڪيترائي نسل ڏٺا ۽ انهن جا مسئلا به ڏٺا. وزير اعظم خاص طور اوورسيز پاڪستانين کي مخاطب ڪندي چيو ته توهان کي زندگي ۾ هڪ فيصلو ڪرڻو هوندو آهي توهان جي زندگي جو مقصد ڇا آهي، اِهو توهان پنهنجي پاڻ کان سوال پڇندا آهيو ۽ جيڪي ان جو صحيح جواب ڏيندا آهن اُهي ماڻهو دنيا ۾ مٿي به ويندا، عزت به ٿيندي، انهن جي دل ۾ سڪون به ايندو آهي پر جيڪي ماڻهو غلط فيصلا ڪندا آهن ۽ انهن کي سمجهه ۾ ناهي ايندو ته زندگي جو مقصد ڇا آهي ته انهن کي  ڏکيائين کي منهن ڏيڻو پوندو آهي.

 

 

شهباز شريف پهرين پنهنجي پارٽي ۾ اِن هائوس تبديلي آڻي پوءِ پارليمان ۾ تبديلي جي ڳالهه ڪري: فردوس عاشق اعواڻ

اسلام آباد(ويب ڊيسڪ) وزير اعظم عمران خان جي سڌُ سماءَ ۽ نشريات بابت خاص مددگار فردوس عاشق اعواڻ شهباز ڊريف کي ن ليگ جي ڪٺ پتلي قرار ڏئي ڇڏيو. فردوس عاشق اعواڻ سماجي رابطن واري ويب سائيٽ ٽوئيٽر تي ٽوئيٽ ڪندي چيو ته شهباز شريف پهرين پنهنجي پارٽي ۾ اِن هائوس تبديلي آڻي پوءِ پارليمان ۾ تبديلي جي ڳالهه ڪري، ن ليگ جو صدر شهباز شريف آهي پر فيصلا سندس جاءِ تي ٻيو ڪير ڪندو آهي، ڪٺ پتلي صدر هئڻ کان بهتر آهي ته پهرين پنهنجي پارٽي جو حقيقي صدر ته بڻجي. فردوس عاشق اعواڻ چيو ته شهباز شريف جو اِن هائوس تبديلي وارو بيان ٻلي جي خواب ۾ ڇڇڙا جي برابر آهي، انهن حسرتن جي لاءِ هن سان همدردي ئي ڪري سگهجي ٿي، اِن هائوس تبديلي جي شوبازي نه ڪيو پر پارليمان ۾ اچي قانون سازي جي ذميواري پوري ڪري.

 

سپريم ڪورٽ جي حڪمن جي روشني ۾ شاگرد يونين جي بحالي جو ڪم شروع ڪري ڇڏيو آهي: مراد علي شاهه

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته سپريم ڪورٽ شاگرد يونين کي مستقل ڪرڻ لاءِ قانون سازي جوڙڻ جي هدايت ڪئي آهي جنهن تي اسان ڪم شروع ڪري ڏنو آهي ۽ جلد ان بابت اڳڀرائي ٿيندي. هن اها ڳالهه اڄ ايڪسپو سينٽر ۾ رٿيل 15هين عالمي ڪتابيميلي جي افتتاح کانپوءِ ميڊيا سان ڳالهائيندي ڪئي. هن چيو ته اسيمبلي سيشن هلي رهيو آهي ۽ قانون سازي پڻ ٿي رهي آهي ۽ سڀني کي ڳالهائڻ جو موقعو پڻ ملي پيو. هن چيو ته سنڌ جي پهرين اسيمبلي هئي جنهن پاڪستان جي قرارداد منظور ڪئي ۽ سنڌ ۾ رهندڙ ئي پاڪستان کي اڳيان وڌائيندا. هڪ سوال جي جواب ۾ هن چيو ته تعليم کاتي جو قلمدان وٽس آهي، استادن جون بدليون سيشن سان ٿينديون. هن چيو ته مون سيڪريٽري تعليم کي استادن جي مقرري تي پابندي لاءِ چيو آهي. هن چيو ته استادن جون ڪيترائي سيٽون خالي پيون آهن جنهن کي ميرٽ تي ڀرتي ڪرڻ لاءِ ڪم هلي رهيو آهي. هن چيو ته تعليم جي نظام کي سڌارڻ لاءِ ڪوشش ڪري رهيا آهيون. هڪ ٻئي سوال جي جواب ۾ چيو ته سنڌ ۾ ٽڊي دل جنهن به فصلن تي حملو ڪيو آهي ان جي سدباب لاءِ قدم کنيا آهن ۽ جون-جولائي ۾ علائقن جو دورو ڪيو هو. متاثر ٿيندڙ علائقن ۾ فصلن کي بچائڻ لاءِ فضائي ڦوهارو ڪرائڻ وفاقي حڪومت جو ڪم آهي پر کيس پلانٽ پروٽيڪشن کاتي جا هيلي ڪاپٽرز خراب آهن جنهن جي مرمت ۽ فيول ۽ زرعي دوائن لاءِ سنڌ حڪومت 10 ملين رپيا ڏنا آهن ته جيئن جلد فصلن تي فضائي ڦوهارو  ڪري هارين کي وڌيڪ نقصان کان بچائي سگهجي. وڏي وزير دعا منگي جي اغوا بابت ڳالهائيندي چيو ته دعا منگي جي اغوا جو هر پهلو کان جائزو وٺون پيا ۽ قانون لاڳو ڪندڙ ادارا کيس بازيابي لاءِ هر زاوئي کان جانچ ڪري رهيا آهن. ان کان پهرين وڏي وزير 15هين ڪتابي ميلي واري تقريب کي خطاب ڪندي چيو ته ڪجهه ڏينهن اڳ مونکي خواجا اظهار ڪتابي ميلي ۾ بطور مهمان خاص شرڪت لاءِ پيغام اماڻيو هو. اظهار صاحب گهٽ فرمائشون ڪنديو آهي ان ڪري آئون ان جي ڳالهه کي نٽائي نٿو سگهي. گذريل ڪتب ميلي ۾ خورشيد شاهه پاڻ سان گڏ قمرالزمان قائره کي آندو هو. قائره صاحب چيو ته اهڙو ڪتابي ميلي هن ڪڏهن به نه ڏٺو. اڄ جي ڪتابي ميلي ۾ نوجوان گهٽ ڏسڻ ۾ اچن پيا ۽ بزرگ وڌيڪ آهن. اڄ به ڪتاب جي هارڊ ڪاپي جي مطالعي ڪرڻ جو مزو ٻيو آهي. ڪتابن جي ڪليڪشن جو پڻ هڪ مزو آهي. آئون اهڙن ڪيترن ئي ماڻهن کي سڃاڻا ٿو جيڪي پنهنجين لائبريرين کي ٻارڙن جيان حفاظت ڪن ٿا. آئون جڏهن شاگرد هوس ته اسان کي لائبريري مان 2 ڪتاب ملندا هئا جڏهن ٻيا وٺڻ ويندا هئا ته ڪتاب واپس گهري ڊگري ڏيندا هئا. آئون جڏهن آمريڪا پڙهڻ ويس اتي لائبريرين کان پڇيو ته ڪيترا ڪتاب کڻي وڃي سگهان ٿو؟ لائبريرين چيو ته جيترو کڻي سگهو ٿا. مون 50 کان 60 ڪتاب کنيا ۽ جڏهن انهن کي پڙهي ورتو ته ڪتاب ورائي ڏنا پر انهن ڪتاب گهريا ڪونه. مون پرڏيهه ۾ لائبريري اندر نوڪري پڻ ڪئي هئي ۽ اتي پاڪستان بابت اهي ڪتاب ڏٺا جيڪي پاڪستان ۾ دستياب نه هئا. مون آدمشماري بابت ڪتاب ڏٺا جنهن جي فوٽوڪاپي ڪرائي کڻي آيو هوس. مون کي ڪتابن جو شوق هميشه کان رهيو آهي. آئون ڪتاب گڏ ڪرڻ ۽ کين مطالعو ڪندڙن سان هر ممڪن سهڪار ۽ مدد ڪندس. آئون پاڪستان پبلشر ۽ بُڪ سيلرز ايسوسي ايشن فائونڊيشن کي ڪامياب عالمي ڪتابي ميلي ڪوٺائڻ تي واڌايون ڏيان ٿو. وڏي وزير چيو ته ڪجهه وقت اڳ ڀان سعيد آباد جو نوجوان مون وٽ آيو ۽ لائبريري جي قيام لاءِ درخواست ڪئي جيڪا قائم ٿي وئي، هاڻي اهو نوجوان ڪتابن پويان ڀڄ ڊڪ ڪرڻ ۾ نظر ايندو آهي. آئون لائيبريرين جي ترقي لاءِ پنهنجو ڪردار ادا ڪندو رهندس. وڏي وزير مراد علي شاهه اڄ 15هين عالمي ڪتابي ميلي جو ايڪسپو سينٽر ۾ افتتاح ڪيو. وڏو وزير مراد علي شاهه سان گڏ قانون بابت صوبائي صلاحڪار مرتضيٰ وهاب ايڪسپو سينٽر پهتا ته کين پاڪستان پبلشر اينڊ بُڪ سيلرز ايسوسي ايشن جي چيئرمين عزيز خالد، ڪمشنر ڪراچي ۽ ٻين آجيان ڪئي.

 

اتر وزيرستان ۾ سڪيورٽي فورسز جي ڪارروائي دوران 2 دهشتگرد مارجي ويا، 2 جوان شهيد

راولپنڊي(نيوز ڊيسڪ) اتر وزيرستان ۾ سڪيورٽي فورسز جي ڪارروائي دوران 2 دهشتگرد مارجي ويا، فائرنگ جي ڏي وٺ ۾ 2 جوان شهيد ٿي ويا. آءِ ايس پي آر پاران جاري ڪيل بيان موجب بويا واري علائقي جي ڳوٺ چار خيل ۾ انٽيليجنس بنيادن تي سڪيورٽي فورسز ڪارروائي ڪئي، جنهن جي نتيجي ۾ 2 دهشتگرد مارجي ويا. آءِ ايس پي آر موجب دهشتگردن سان مهاڏو اٽڪائيندي 2 جوان حوالدار شير زمان خان ۽ سپاهي محمد جواد شهيد ٿي ويا.

 

وزيراعظم چيف اليڪشن ڪمشنر جي لاءِ بابر يعقوب، فضل عباس ميڪن ۽ عارف خان جي نالن جي منظوري ڏئي ڇڏي

اسلام آباد (م.ڊ) وزيراعظم عمران خان چيف اليڪشن ڪمشنر جي لاءِ 3 نالا تجويز ڪري ڇڏيا، قومي اسيمبلي ۾ مخالف ڌر ليڊر شهباز شريف اليڪشن ڪمشنر جي لاءِ ٽي نالا تجويز ڪري چڪو آهي، هاڻ چيف اليڪشن ڪمشنر جي مقرر لاءِ وزيراعظم عمران خان به ٽي نالا تجويز ڪري ورتا، جن مان هڪ نالي تي غور ويچار ڪيو ويندو، ذريعن موجب وزيراعظم چيف اليڪشن ڪمشنر جي لاءِ بابر يعقوب، فضل عباس ميڪن ۽ عارف خان جي نالن جي منظوري ڏئي ڇڏي آهي، بابر يعقوب هن وقت اليڪشن ڪميشن ۾ سيڪريٽري آهي. ذريعن موجب گذريل ڏينهن اليڪشن ڪميشن جي ميمبرز جي مقرر لاءِ انساني حقن بابت وفاقي وزير شيرين مزاري جي صدارت ۾ پارلياماني ڪميٽي جو اجلاس ٿيو هو، جڏهن ته ڌريون نالن تي اتفاق نه ڪري سگهيون هيون ۽ اجلاس ٻيهر هفتي کانپوءِ گهرايو ويو هو، جڏهن ته ذريعن جو چوڻ آهي ته وزيراعظم پاران ٽي نالا تجويز ڪرڻ بعد شيرين مزاري طرفان هفتي کان اڳ اجلاس گهرائڻ جو امڪان آهي.

 

 

ڪراچي مان اغوا ڪيل شاگردياڻي دعا منگي جو هن وقت تائين پتو نه پيو، احتجاج جو سلسلو جاري، وڪيل برادري به شامل

ڪراچي(اين اين آءِ/نمائندن وٽان) ڪراچي مان اغوا ڪيل شاگردياڻي دعا منگي جو هن وقت تائين پتو نه پيو، سنڌ جي مختلف شهرن ۾ دعا منگي جي بازيابي لاءِ مظاهرا جاري آهن، ڪراچي پريس ڪلب آڏو دعا منگي جي بازيابي لاءِ وڪيلن ۽ ٻين ڌرين طرفان احتجاجي مظاهرو ڪيو پيو وڃي، ايس ايم لا ڪاليج منگي اتحاد طرفان پريس ڪلب آڏو احتجاج جاري آهي، دعا منگي جي سئوٽ ڪينجهر سنڌو ميڊيا سان ڳالهائيندي چيو ته ڪافي ڏينهن گذري چڪا آهن، هن وقت تائين دعا منگي جو پتو ناهي پئجي سگهيو، پوليس سنڌ حڪومت ۽ ادارا ناڪام ٿي چڪا آهن، حڪومت کي گهرجي ته جلد کان جلد دعا منگي کي بازياب ڪرايو وڃي. خيرپور ۾ دعا منگي جي بازيابي لاءِ جسقم طرفان جادو شاهه موڙ کان پريس ڪلب تائين احتجاجي ريلي ڪڍي وئي،ميهڙ ۾ ناليواري ليکڪ اعجاز منگي جي ڀاڻيجي دعا منگي جي بازيابي لاءِ قلمڪارن ۽ سڃاڻ ڌرين پاران احتجاج ڪيو ويو، دعا منگي جي اغوا ۽ سندس بازيابي لاءِ ميهڙ جي سڄاڻ ڌرين، صحافين ۽ قلمڪارن احتجاج ڪيو، گڏيل بيان ۾ دعا منگي جي بازيابي جو مطالبو ڪيو ويو. هنن چيو ته دعا منگي کي فورن بازيا ب ڪرائي سندس اغوا ۾ ملوث جوابدار گرفتار ڪيا وڃن، ٻي صورت ۾ دعا منگي جي بازيابي ۽ سنڌ حڪومت خلاف سخت احتجاج ڪيو ويندو.