تازيون خبرون
هڪ سال ۾ پيٽروليم شين جي مد ۾ 206 ارب 28 ڪروڙ ٽئڪس اوڳاڙيو ويو: وفاقي سرڪار جو اعتراف - وزيراعظم چيف سيڪريٽري ۽ آئي جي سنڌ ذريعي متبادل نظام هلائڻ چاهي ٿو، ائين ٿيڻ نه ڏينداسين: سنڌ سرڪار - جسٽس (ر) الطاف ابراهيم قريشي وقتي چيف اليڪشن ڪمشنر ٿي ويو - ايشيائي ترقياتي بئنڪ پاڪستان لاءِ هڪ ارب 30 ڪروڙ ڊالرز جو قرض منظور ڪري ورتو - حڪومت جو ڪم واپار جي رستي ۾ آيل رنڊڪن کي ختم ڪري آسانيون پيدا ڪرڻ آهي: عمران خان - وزير اعظم ملڪ کي مضبوط ڪرڻ چاهي ٿو پر مخالف ڌر ڌيان هٽائڻ چاهي ٿي: فردوس عاشق - ملڪ رياض جي وارثن ۽ برطانوي حڪومت وچ ۾ نبيري مان مليل رقم سماجي بهبود لاءِ استعمال ڪئي ويندي: شهزاد اڪبر - وڏي وزير جي صدارت ۾ پبلڪ سيفٽي ڪميشن جو اجلاس، آءِ جي سنڌ جي عدم شرڪت تي ڪاوڙ جو اظهار، ٺهراءُ منظور - ڪراچي مان اغوا ٿيل دعا منگي بازياب نه ٿي، سنڌ جي مختلف شهرن ۾ احتجاجي مظاهرا، ريليون - اسلام ڪوٽ: مسافر ڪوچ موٽر سائيڪل کي بچائيندي ڪلٽي، واٽھڙو فوت، 3 عورتن سميت 7 ڄڻا زخمي

Daily Archives: December 4, 2019

قوم کي ملڪي معيشت جي حوالي سان وڌيڪ سٺيون خبرون ملنديون: عمران خان

اسلام آباد (ويب ڊيسڪ) وزيراعظم عمران خان چيو آهي ته قوم کي ملڪي معيشت جي حوالي سان وڌيڪ سٺيون خبرون ملنديون. وزيراعظم جي صدارت هيٺ وفاقي ڪابينا جو اجلاس ٿيو، جنهن ۾ معاشي صورتحال، مختلف منصوبن ۽ موجوده سياسي صورتحال تي غور ويچار ڪيو ويو. ذريعن موجب وفاقي ڪابينا کي پاڪستان جي معاشي صورتحال ۾ بهتري تي بريفنگ ڏني وئي، جڏهن ته وزيراعظم ۽ ڪابينا عالمي معاشي درجي ۾ بهتري تي معاشي ٽيم جي واکاڻ ڪئي. اجلاس جي ٻئي سيشن ۾ آرمي ايڪٽ ۾ ترميم تي قانون سازي ۽ چيف اليڪشن ڪمشنر توڙي ميمبرن جي مقرري تي صلاح مشورو ڪيو ويو. ذريعن جو چوڻ آهي ته ڪابينا نيشنل انشورنس ڪمپني جي سي اي او جي مقرري ۽ آزاد ڄمون ڪشمير جي مالي سال 20-2019 جي پراپرٽي بجيٽ جي منظوري ڏني. ڪابينا اجلاس ۾ اقتصادي رابطا ڪميٽي جي فيصلن ۽ نجڪاري بابت خاص ڪميٽي جي فيصلن جي به منظوري ڏني وئي. وزيراعظم چيو ته معاشي ٽيم ملڪي معيشت کي سڌي رستي تي آڻي ڇڏيو آهي، هاڻ قوم کي ملڪي معيشت بابت سٺيون خبرون ملنديون، عالمي ادارن طرفان پاڪستاني معيشت بابت هاڪاري رپورٽون اچي رهيون آهن. واضح رهي ته موڊيز انويسٽر سروس گذريل ڏينهن پنهنجي بيان ۾ چيو هو ته پاڪستاني حڪومت کي تصديق ڪئي وئي آهي ته ملڪ ۾ جاري ڪئي ويندڙ مقامي ۽ پرڏيهي ڪرنسي ۽ غير محفوظ قرضن جي درجي بندي بي ٿري ۽ آئوٽ لڪ کي ناڪاري مان مستحڪم ڪيو ويو آهي. موڊيز طرفان جاري بيان موجب آئوٽ لڪ ۾ اها تبديلي ادائيگين ۾ توازن، پاليسي ايڊجسٽمينٽ جي حمايت ۽ ڪرنسي جي لچڪ سبب سامهون آئي آهي، جيتوڻيڪ ناڻي جي مٽاسٽا جي ذخيرن ۾ گهٽتائي آئي ۽ ان جي نئين سر تعمير ۾ وقت لڳندو پر اهڙا قدم ٻاهرين خطرن کي گهٽ ڪرڻ ۾ مدد فراهم ڪندا. بيان ۾ وڌيڪ چيو ويو ته ڪرنسي جي قدر ۾ گهٽتائي سبب ملڪ مالياتي معاملن ۾، گهڻي ڀاڱي قرضن جي سطح سان ڪمزور ٿي ويندا آهن، جڏهن ته آءِ ايم ايف پروگرام ذريعي پاڪستان ۾ جاري مالي سڌارا قرضن جي استحڪام ۽ ليڪويڊيٽي بابت خطرن کي گهٽ ڪري ڇڏيندا. هوڏانهن وزيراعظم جي ناڻي بابت صلاحڪار عبدالحفيظ شيخ جو چوڻ هو ته اها اڳڀرائي حڪومت طرفان ملڪي معيشت جي حوالي سان کنيل ڪامياب قدمن ۽ ڊگهي عرصي لاءِ مضبوط ترقي جو بنياد فراهم ڪرڻ جي عڪاسي آهي.

 

نيب قانون تبديل ڪرڻ جو چيو هو پر حڪومت ڪجهه نه ڪيو: چيف جسٽس

اسلام آباد (ويب ڊيسڪ) چيف جسٽس آف پاڪستان جسٽس آصف سعيد کوسا ريمارڪس ڏيندي چيو آهي ته حڪومت کي نيب قانون تبديل ڪرڻ جو چيو هو پر ان تي عمل نه ڪيو ويو. سپريم ڪورٽ ۾ پنجاب لينڊ ڊولپمينٽ ڪارپوريشن جي اڳوڻي چيف ايگزيڪيوٽو آفيسر امتياز حيدر جي ضمانت جي درخواست تي ٻڌڻي ٿي. ان موقعي تي چيف جسٽس ريمارڪس ڏنا ته تاثر ڏنو ويو سپريم ڪورٽ نيب قانون ۾ سختي ڪري ڇڏي آهي، چيو ويو ته ڪنهن کي نقصان يا فائدو پهچائڻ لاءِ عدالت قانون سخت ڪيو، عدالت سختي ناهي ڪئي رڳو قانون جي پوزيشن واضح ڪئي هئي، حڪومت کي نيب قانون تبديل ڪرڻ جو چيو هو پر حڪومت ڪجهه نه ڪيو. هن چيو ته جيڪڏهن ان معاملي کي اسان تفصيل سان ٻڌنداسين ته مڪمل انصاف ڪنداسين، ٿي سگهي ٿو اسان ان سڄي ڪيس کي ختم ڪري ڇڏيون، هڪ سال 8 مهينن جو وقت تمام وڏو آهي، قانون ۾ 30 ڏينهن جو وقت ڏنو ويو آهي، امتياز حيدر جو ڪو ڪردار نٿو ٺهي، کيس پنهنجي ڪردار کي ڏسڻو آهي. سپريم ڪورٽ امتياز حيدر جي ضمانت جي درخواست منظوري ڪري ورتي، جڏهن ته جوابدار جو پاسپورٽ جمع ڪرائڻ جي نيب جي اپيل رد ڪندي جوابدار کي 10-10 لکن جا ٻه مچلڪا جمع ڪرائڻ جو حڪم ڏنو.

 

نيب نثار کهڙو، سراج دُراني ۽ رئوف کوسو خلاف جاچ جي منظوري ڏئي ڇڏي

اسلام آباد (م.ڊ) نيب جي ايگزيڪيوٽو بورڊ اڳوڻي صوبائي وزير نثار کهڙو، اسپيڪر آغا سراج دُراني ۽ اڳوڻي ايم پي اي عبدالرئوف کوسو خلاف جاچ جي منظوري ڏئي ڇڏي، جڏهن ته فرزانه راجا ۽ علي احمد لنڊ خلاف ريفرنس داخل ڪرڻ جي منظوري ڏني وئي آهي. نيب چيئرمين رٽائرڊ جسٽس جاويد اقبال جي سربراهيءَ ۾ ايگزيڪيوٽو بورڊ جو اجلاس ٿيو، جنهن دوران مختلف ريفرنسز ۽ انڪوائريز جو جائزو ورتو ويو. نيب ترجمان جي پڌرائي موجب ايگزيڪيوٽو بورڊ جي اجلاس دوران 6 ريفرنسز جي منظوري ڏني وئي آهي. جنهن موجب بينظير انڪم سپورٽ پروگرام جي اڳوڻي چيئرپرسن فرازانه راجا خلاف ڪرپشن جو ريفرنس داخل ڪيو ويندو، جڏهن ته سنڌ ۾ مبينا طور 13 هزار غيرقانوني ڀرتيون ڪرڻ وارو ريفرنس علي احمد لنڊ ۽ ٻين خلاف داخل ڪرڻ جي منظوري ڏني وئي آهي، جوابدارن تي الزام آهي ته سنڌ جي مڪاني کاتي ۾ جعلي ڀرتيون ڪير قومي ناڻي کي نقصان پهچايو آهي. ترجمان موجب نيب جي ايگزيڪيوٽو بورڊ ٽن انويسٽيگيشنز (جاچ) جي به منظوري ڏني آهي، جنهن موجب خوراڪ کاتي جي اڳوڻي وزير نثار کهڙو ۽ ٻين خلاف به جاچ جي منظوري ڏني وئي آهي، ان کانسواءِ ايگزيڪيوٽو بورڊ 15 انڪوائريز جي به منظوري ڏني وئي آهي، جڏهن ته سنڌ اسيمبلي جي اسپيڪر آغا سراج دُراني ۽ اڳوڻي ايم پي اي عبدالرئوف کوسو خلاف انڪوائريز جي منظوري ڏني وئي آهي. اُن کانسواءِ سنڌ روشن منصوبي جي عملدارن ۽ نوشهروفيروز روينيو کاتي جي عبدالحق سوڌو ٻين آفيسرز خلاف به انڪوائري شروع ڪرڻ جي منظوري ڏني وئي آهي. نيب جي پڌرائي ۾ چيو ويو آهي ته اپوزيشن ليڊر شهباز شريف، بليغ الرحمان ۽ ن ليگ ايم اين راڻا ثناءُ الله خلاف وڌيڪ انڪوائريز جي به منظوري ڏني وئي آهي.

 

ماڪڙ مان جان ڇڏائڻ کان لاچاري ظاهر، ڪمند جا اگهه پنجاب کان وڌيڪ مقرر ڪيڻ جي هام

ڪراچي (اسٽاف رپورٽر) زراعت کاتي جي وزير اسماعيل راهو ماڪڙ هٿان فصل ناس ٿيڻ جو اعتراف ڪندي ماڪڙ مان جان ڇڏائڻ کان لاچاري ظاهر ڪري ڇڏي. اسماعيل راهو چيو آهي ته سروي کانپوءِ نقصان جي معاوضي جي سفارش ڪئي ويندي، وفاقي سرڪار هڪڙو جهاز ڏنو، اُن جو به رڳو تيل ختم ٿي وڃي ٿو.اسپيڪر آغا سراج دراني جي صدارت هيٺ سنڌ اسيمبلي جي اجلاس دوران ڪمند جا اگهه اڃا تائين مقرر نه ٿيڻ ۽ صوبي ۾ ماڪڙ مار اسپري مهم شروع نه ٿيڻ بابت سوال پُڇيا ويا، جِن جا جواب ڏيندي زراعت کاتي جي صوبائي وزير اسماعيل راهو دعويٰ ڪئي ته سنڌ سرڪار پنجاب جي ڀيٽ ۾ ڪمند جا وڌيڪ اگهه مقرر ڪندي، ڪمند جا اگهه سنڌ ڪابينا جي اجلاس ۾ مقرر ڪيا ويندا. سندس چوڻ هو ته گذريل سال ڪمند جو في مڻ اگهه 182 رُپيا مقرر ڪيو ويو هو. عارف مصطفيٰ جو چوڻ هو ته ڇاڪاڻ ته سنڌ ۾ عوامي حڪومت آهي، تنهن ڪري ڪمند جو في مڻ اگهه اڍائي سئو رُپيا مقرر ڪيو وڃي. جي ڊي اي ايم پي اي نصرت سحر عباسي جي سوال تي جواب ڏيندي صوبائي وزير اسماعيل راهو چيو ته ماڪڙ مار اسپري جي حوالي سان وفاقي سرڪار کي ڪيترائي ڀيرا خط لکيا،جڏهن ته فيڊرل پلانٽ پروٽيڪشن وارن کان به 2 ايئر ڪرافت گهريا. هن چيو ته سنڌ ۾ ماڪڙ مار اسپري لاءِ رڳو هڪڙو ايئر ڪرافٽ موڪليو ويو، اُن جو به تيل ختم ٿي وڃي ٿو، ڪڏهن وري دوائون ختم ٿي وڃن ٿيون، جِن دوائن سان اسپري ٿي رهيو آهي، اهي ماڪڙ کي مارڻ نه پر ڀڄائڻ واريون آهن. سنڌ اسيمبلي جي اجلاس ۾ صوبائي وزير اسماعيل راهو دعوي ڪئي ته وفاقي سرڪار طرفان جهازن جي ڀاڙي لاءِ هڪ ڪروڙ رُپيا گهريا ويا، اُهي به ڏئي ڇڏيا، وري چيو ويو ته دوائن لاءِ پئسا نه آهن، ڊسمبر جي آخر ۾ گرانٽ جاري ٿيندي، سنڌ حڪومت پئسا ڏيڻ جي آڇ ڪري چڪي آهي. زراعت کاتي جي صوبائي وزير سنڌ اسيمبلي ۾ اعتراف ڪيو ته نومبر مهيني ۾ ماڪڙ فصلن کي تمام گهڻو نقصان پهچايو آهي، جڏهن ته آڪٽوبر ۽ اُن کان اڳ گهڻو نقصان نه ٿيو هو. هُن چيو ته ماڪڙ سبب فصلن کي ٿيل نقصان جي سروي ڪرائڻ جو فيصلو ڪيو ويو آهي، اُن کانپوءِ متاثرن کي معاوضو ڏيڻ جي سفارش ڪئي ويندي.

 

بلاول جي سوچ غير جمهوري آهي، قانون سازي پارليامينٽ جي بنيادي ذميواري ۽ فرض آهي: فردوس عاشق اعواڻ

اسلام آباد (ويب ڊيسڪ) اطلاعات بابت وزيراعظم جي خاص مددگار فردوس عاشق اعواڻ چيو آهي ته بلاول ڀٽو زرداري طرفان آرمي چيف جي ملازمت جي مدي ۾ واڌ جي حوالي سان قانون سازي کي پنهنجي سياسي ايجنڊي سان مشروط ڪرڻ غير جمهوري سوچ آهي. پ پ چيئرمين جي بيان تي ردعمل ڏيندي فردوس عاشق اعواڻ چيو ته قانون سازي پارليامينٽ جي بنيادي ذميواري ۽ فرض آهي، بلاول طرفان ان کي پنهنجي سياسي ايجنڊي سان مشروط ڪرڻ غير جمهوري سوچ آهي. سماجي رابطن جي ويب سائيٽ ٽوئيٽر تي پنهنجي بيان ۾ فردوس عاشق اعواڻ وڌيڪ چيو ته بلاول ڪنهن معاملي ۾ ته سياسي بليڪ ميلنگ کان ٻاهر نڪري سوچي، پارليامينٽ کي سياسي بليڪ ميلنگ لاءِ استعمال ڪرڻ جي سوچ پ پ جي دعوائن جي ابتڙ آهي. واضح رهي ته چيئرمين بلاول ڀٽو زرداري گذريل ڏينهن چيو هو اڳ ۾ اسان جو وزيراعظم نئون ايندو، پوءِ آئين ۾ ترميم ٿيندي. پاڪستان انسٽيٽيوٽ آف ميڊيڪل سائنسز (پمز) ۾ پيءُ آصف زرداري سان عيادت کانپوءِ صحافين سان ڳالهائيندي پ پ چيئرمين جو چوڻ هو ته اسان سپريم ڪورٽ جي تفصيلي فيصلي جو انتظار ڪري رهيا آهيون، اميد آهي ته عدالتي فيصلي سان اسان کي قانون سازي ۾ رهنمائي ملندي، جيئن 18هين ترميم تي به عدالتي فيصلي سان رهنمائي ملي هئي. بلاول موجب لڳي ٿو ته وزيراعظم اپوزيشن سان اتفاق راءِ نٿو چاهي، حڪومت 3 مهينن ۾ هڪ نوٽيفڪيشن نه ٺاهي سگهي، تنهن ڪري مون کي لڳي رهيو آهي ته حڪومت 6 مهينن ۾ قانون سازي تي اپوزيشن ۾ اعتماد ۾ نه وٺي سگهندي.

 

ميڊيا کي دٻاءَ ۾ آڻي مرضِي جون خبرون هلائڻ جي ڪوشش افسوسناڪ آهي:بلاول زرداري

اسلام آباد (اين اين آءِ) پ پ جي چيئرمين بلاول ڀٽو ڊان ميڊيا گروپ جي صحافين سان ٻڌي جو اظهار ڪندي چيو آهي ته ميڊيا کي دٻاءَ ۾ آڻي مرضِي جون خبرون هلائڻ جي ڪوشش افسوسناڪ آهي، اسان ڪنهن به صورت ۾ اظهار جي آزادي کسڻ جي اجازت نه ڏينداسين، اڱاري تي بلاول ڀٽو ڊان ميڊيا گروپ جي آفيس پهتو ۽ صحافين سان گذريل ڏينهن ٿيل واقعي تي ٻڌي جو اظهار ڪيو، بلاول ڀٽو ريزيڊنٽ ايڊيٽر فهد حسين ۽ ٽي وي جي بيورو چيف افتخار شيرازي سان ملاقات ڪئي، پ پ چيئرمين سان فرحت الله بابر، نير بخاري ۽ فيصل ڪريم ڪنڊي گڏ هو، بلاول ڀٽو چيو ته ميڊيا گروپ جي آفيس تي چڙهائي جي مزمت ڪريان ٿو، هن چيو ته ميڊيا جي ادارن کي هڪ سازش ۽ رٿابندي تحت ڊيڄاريو ۽ ڌمڪايو پيو وڃي.

 

 

 

 

 

سڄي ملڪ ۾ ڊينگي پکڙجي ويو آهي، هن و وقت تائين ڊينگي جا 52 هزار 476 ڪيس رپورٽ ٿيا: مراد علي شاهه

ڪراچي (اسٽاف رپورٽر) سنڌ جي وڏي وزير سيد مراد علي شاهه ڊينگي ڪنٽرول پروگرام جي انتظاميا کي هدايت ڪئي آهي ته هو تحقيق تي ٻڌل ڪم شروع ڪري ته جيئن غير محفوظ علائقن ۾ حفاظتي اُپاءُ ورتا وڃن. هن چيو ته صورتحال کي ڪنٽرول ڪرڻ لاءِ فقط اسپتال جي رپورٽس جي بنياد تي ڊيٽا گڏ ڪرڻ ئي ڪافي نه آهي بلڪه اسان کي اهو ڏسڻو آهي ته گذريل سال ڪيترا علائقا متاثر ٿيا هئا ته جيئن لاڳاپيل کاتن سميت بلدياتي ادارا ۽ صحت کاتو اتي ڊينگي سيزن شروع ٿيڻ سان پهرين حفاظتي اُپائن بابت ڄاڻ ڏئي سگهن. هن اها ڳالهه اڄ وزيراعليٰ هائوس ۾ پري وينشن اينڊ ڪنٽرول پروگرام فار ڊينگي (پي سي ڊي پي) بابت ڪوٺايل اجلاس جي صدارت ڪندي ڪئي. اجلاس ۾ چيف سيڪريٽري سيد ممتاز علي شاهه، صوبائي وزير صحت ڊاڪٽر عذره پيچوهو، صوبائي وزير بلديات ناصر حسين شاهه، وڏي وزير جو پرنسپل سيڪريٽري ساجد جمال ابڙو، سيڪريٽري بلديات روشن شيخ، پري وينشن اينڊ ڪنٽرول آف ڊينگي پروگرام مينجر ڊاڪٽر محمود اقبال ۽ ٻين شرڪت ڪئي. وڏي وزير چيو ته ڊينگي ڪنٽرول پروگرام بابت ماڻهن جو چوڻ آهي ته اهو هڪ روٽين پروگرام آهي ۽ ان منجهان ڪوبه تاثر يا فائدو نه ورندو. هن چيو ته اوهان کي گهرجي ته اوهان حقيقت تي ٻڌل ڊيٽا گڏ ڪريو فقط اسپتالن مان نه پر ليبارٽرين منجهان به گڏ ڪريو ته جيئن متاثر ٿيندڙ ماڻهن جي اصل انگ بابت ڄاڻ ملي سگهي ۽ خبر هجڻ گهرجي ته هلندڙ مهيني/سال ۾ ڪهڙا علائقا متاثر ٿيا ۽ گذريل سال ڪيترا ماڻهو متاثر ٿيا آهن ۽ هلندڙ سال ان جي انگ ۾ ڪيترو فرق آيو آهي. هن چيو ته صورتحال کي منهن ڏيڻ لاءِ سائينٽيفڪ طريقو اپنائڻ جي ضرورت آهي. مراد علي شاهه ڊينگي پروگرام ٽيم کي هدايت ڪئي ته هو گذريل سال ۽ هلندڙ سال جي متاثر ٿيندڙ علائقن جا نقشا تيار ڪن ۽ گذريل سال ورتل اُپائن جي اسٽڊي ڪندي کين نتيجن جو جائرو ورتو وڃي ۽ پوءِ ڪمزورين/اوڻائين جيڪڏهن هجن ته انهن جي نشاندهي ڪئي وڃي. هن چيو ته اوهان پنهنجي رهنمائي لاءِ ميڊيڪل يونيورسٽيز کي تحقيقي ڪم لاءِ چئي سگهو ٿا. مراد علي شاهه ڊينگي ڪنٽرول پروگرام کي اها پڻ هدايت ڪئي ته هو لاڳاپيل کاتن سميت ڪمشنرن ۽ ڊپٽي ڪمشنرن کي ڊينگي مڇرن جي واڌويجهه واري عرصي بابت ڄاڻ ڏني وڃي ته جيئن لاڳاپيل ادارا حفاظتي انتظامات ڪري سگهن. وڏي وزير کي ٻڌايو ويو ته ملڪ جا سڀئي صوبا ڊينگي انفيڪشن وگهي متاثر ٿيا آهن. مجموعي طور پهرين ڊسمبر 2019 تائين 52476 ڪيس رپورٽ ٿيا جنهن ۾ 13283 ڪيس اسلام آباد، 10051 پنجاب، 15521 سنڌ، 7080 ڪي پي ڪي، 3386 بلوچستان ۽ 1690 آزاد ڪشمير ۾ رپورٽ ٿيا آهن. صوبائي وزير صحت ڊاڪٽر عذرا پيچوهو وڏي وزير کي ٻڌايو ته شهر جي وڌيڪ متاثر ٿيندڙ علائقن ۾ ضلع ڏکڻ، شرقي ۽ ڪورنگي شامل آهن. فقط 1085 ڪيس صوبي جي ٻين ضلعن مان رپورٽ ٿيا آهن جنهن ۾ وڌيڪ حيدرآباد، عمرڪوٽ ۽ ميرپورخاص مان آهن. وڏي وزير کي ٻڌايو ويو ته 2019 ۾ مجموعي طور 43 فوتگين جي رپورٽ ٿي آهي جنهن ۾ 37 نجي اسپتالن ۽ 6 سرڪاري اسپتالن ۾ ٿيا آهن. فوتگين جو ڪارڻ ڊينگي هميورهيجڪ، بخار ، ڊينگي شاڪ وغيره شامل آهن. واضح رهي ته ڊينگي انفيڪشن ۾ واڌ سيپٽمبر 2019 کان ٿيو آهي جيڪو شديد برساتن، هوا ۾ وڌيڪ آلاڻ ۽ ٽيمپريچر ۽ سالڊ ويسٽ مسئلن جي ڊسپوزل سبب ٿيو آهي. جنهن تي وڏي وزير چيو ته ڪيترائي ملڪ آهن جتي لڳاتار برساتون ٿين ٿيون پر اتي اهڙي طرح جا ڪيس رپورٽ نه ٿيندا آهن. هن ڊينگي پري وينشن اينڊ ڪنٽرول پروگرام جي ٽيم کي چيو ته آئون چاهيان ٿو ته اوهان حل کي تلاش ڪريو ۽ پنهنجن ماهرن، تحقيق ۽ محنت ذريعي حفاظتي اُپائن کي يقيني بڻايو. پروگرام مينيجر پنهنجي رپورٽ ڏيندي چيو ته 3056 ڪيسن منجهان 2697 يا 88 سيڪڙن جو علاج ڪري انهن کين گهر اماڻيو ويو آهي. 2233493 ميٽر ايراضي ۾ فيوميگيٽڊ/ڦوهارو ڪيو ويو آهي. 11925 ڪمرن م به اسپري ڪيو ويو آهي. 1547 مريضن کي ايل ايل آئي اين نيٽ ڏني وئي آهي. 13495 ڪرم ڪش سرگرميون ڏنيون ويون آهن ۽ ڄاڻ مهم هلندڙ آهي.صورتحال بابت اپ ڊيٽ ڏيندي ڊاڪٽر محمود اقبال چيو ته ڪراچي جو هفتي جي بنياد تي ڊيٽا اهو ظاهر ڪندو آهي ته سيپٽمبر 2019 جي پهرين هفتي ۾ 152 ڪيس رپورٽ ٿيا جنهن ۾ وڌاءُ ٿيندو رهيو ۽ اهو تعداد آڪٽوبر 2019 جي چوٿين هفتي ۾ 2470 تائين پهچي ويو. هن چيو ته نومبر جي پهرين هفتي کان ڪيسن ۾ گهٽتائي اچڻ شروع ٿي آهي جڏهن 1313 ڪيس رپورٽ ٿيا هئا جيڪي وڌيڪ گهٽجي ويا هئا ايتريقدر جو نومبر جي آخري هفتي ۾ 809 ڪيس باقي بچيا

 

دادو جي ٻارڙي گل سما بابت خبر حڪومت کي ميڊيا ذريعي پئي آهي ۽ ان حوالي سان ڪنهن به شڪايت نه ڪئي هئي: سعيد غني

ڪراچي (اين اين آءِ) سنڌ جي اطلاعات واري وزير سعيد غني چيو آهي ته دادو جي نينگري گل سما بابت خبر حڪومت کي ميڊيا ذريعي پئي ۽ ان حوالي سان ڪنهن به شڪايت نه ڪئي هئي، اڱاري تي سنڌ اسيمبلي جي ڪارروائي وقت هن ايوان کي ٻڌايو ته ڇوڪري کي سنگسار ڪرڻ جا ڪي به پڪا ثبوت نه مليا آهن، مڪمل طرح ڇنڊ ڇاڻ ڪئي پئي وڃي ۽ جيڪو ٿيو اهو ڪنداسين، هن چيو ته گل سما جي قبر ڪشائي ۽ پوسٽ مارٽم جي ڪارروائي ٿيندي، هن ايوان کي ٻڌايو ته ڊفينس جي علائقي مان اغوا ٿيل دعا منگي جي والد نثار منگي سان رابطو ٿيو آهي، پوليس کي ڪجهه ثبوت مليا آهن جن جي روشني ۾ جاچ اڳتي وڌي رهي آهي، جيڪڏهن وفاقي حڪومت کان مدد جي ضرورت پئي ته ضرور وٺنداسين، جنهن کانپوءِ اجلاس اربع تائين ملتوي ڪيو ويو، واضح رهي ته اڱاري تي پرائيويٽ ميمبر ڊي جي باوجود ايوان اڌ کان گهڻو خالي رهيو جنهن تي اسپيڪر ميمبرن کي ڇنڊ پٽي ته جيڪڏهن ايندڙ اجلاس ۾ ائين ٿيو ته اجلاس ملتوي ڪري ڇڏيندس.

 

ڪاروباري طبقي لاءِ گيس ۽ بجلي تي سبسڊي ڏيڻ جو اعلان، موڊيز به پاڪستان جي ريٽنگ مثبت ڪري ڇڏي آهي :حفيظ شيخ

اسلام آباد (اين اين آءِ) وفاقي حڪومت ڪاروباري طبقي لاءِ گيس ۽ بجلي  تي سبسڊي ڏيڻ جو اعلان ڪندي چيو آهي ته عالمي ادارا به هاڻ پاڪستان جي معاشي سڌاري جو انڪشاف ڪري رهيا آهن، پاڪستان اسٽاڪ ايڪسچينج 40 هزار پوائنٽس جي سطح کان ٽپي ويو آهي، موڊيز به پاڪستان جي ريٽنگ مثبت ڪري ڇڏي آهي، گهٽ آمدني وارن ماڻهن کي اڏاوت لاءِ سبسڊي ڏينداسين، سيڙپڪارن لاءِ قرض جي وياج جي شرح ۾ گهٽتائي ڪنداسين، ڪنهن کي ڪا سپليمينٽري گرانٽ نه ڏني پئي وڃي، چاهيون ٿا ته ملڪ ۾ نوڪريون ملن ۽ روزگار جا موقعا ملن، آءِ ايم ايف معاشي حدف پورا ٿيڻ تي 50 ڪروڙ ڊالر جي اڳين قسط ڏيندو، اسان ملڪي معيشت کي ڏيوالو ٿيڻ کان بچايو، ايندڙ مرحلو اقتصادي ترقي ۾ تيزي جو آهي، جاري ۽ تجارتي کاتن ۾ گهٽتائي معاشي استحڪام کي ظاهر ڪري ٿي، ايندڙ سال مهانگائي جي شرح گهٽ ٿي ويندي، ملڪ جي ايڪسپورٽ ۽ ناڻي مٽاسٽا جا ذخير وڌي رهيا آهن، ملڪ جي امپورٽ ۾ ساڍا 5 ارب ڊالر گهٽتائي ٿي آهي، اڱاري تي عبدالحفيظ شيخ، حماد اظهر ۽ شبر زيدي سان گڏ پريس ڪانفرنس ڪندي چيو ته ملڪ ۾ اقتصادي ڪارڪردگي تي بحث هلي رهيو آهي، دنيا تي نظر رکندڙ وڏن ادارن پاڪستان جي معاشي استحڪام جي ساراهه ڪئي، هلندڙ مالي سال ۾ مالياتي خسارو گهٽ ڪيو ويو، واپاري خسار گهٽ ڪيو ويو، فارن ايڪسچينج ريزروو ۾استحڪام آهي، هن چيو ته عالمي بينڪ جي صدر پاڪستان جي ڪارڪردگي کي ساراهيو، ايشيا ترقياتي بينڪ پاڪستان لاءِ امداد ۾ 3 ارب ڊالر جي واڌ ڪئي، آءِ ايم ايف پاڪستان جي ڪارڪردگي جي ساراهه ڪئي، هن چيو ته دنيا جا سيڙپڪار پاڪستان ڏانهن ڏسي رهيا آهن، پاڪستان جي اسٽاڪ مارڪيٽ ۾ هڪ ارب ڊالر سيڙپڪاري ٿي، هن چيو ته نان ٽيڪس روينيو ۾ واڌ ٿي، حڪومت جي خواهش آهي ته سيڙپڪاري وڌي ۽ روزگار جا موقعا پيدا ٿين، ايڪسپورٽ ۾ واڌ لاءِ صنعتي شعبي کي بجلي ۽ گيس ۾ ٽيرف ڏئي رهيا آهيون، ملڪ ۾ اڏاوتي شعبي کي هٿي ڏئي رهيا آهيون، ايف بي آر جو ريفنڊ پروگرام آٽوميٽڪ آهي، حفيظ شيخ چيو ته تيل اسمن جي اگهن ۾ جيترو ٿي سگهيو گهٽتائي ڪئي، گذريل 5 مهينن ۾ تيل اسمن جون قيمتون گهٽايون ويون، هن چيو ته ڊيزل جي اگهه ۾ خاص گهٽتائي ٿي، هن وقت عام ماڻهو کي رليف ڏنو ويو آهي، 151 ارب رپيا غريب لاءِ رکيا، هن چيو ته اٽو، چانور، گيهه ۽ گنڊ ۾ سبسڊي لاءِ يوٽلٽي اسٽورز کي 6 ارب رپيا فراهم ڪيا، حفيظ شيخ چيو ته ٻيهر آءِ ايم ايف وٽ نه وڄڻو پوندو، هن حڪومت ۾ سمورا فيصلا ميرٽ ٿي رهيا آهن، سمورن ادارن کي مضبوط ڪيو پيو وڃي، هن چيو ته حڪومت جي ڪوشش آهي ته شين جون قيمتون جيترو ٿي سگهي گهٽ ڪيون وڃن، تنهنڪري گذريل 5 مهينن ۾ پيٽرول جي قيمت نه وڌائي، حڪومت گيس ۽ بجلي تي سبسڊي فراهم ڪري رهي آهي، ايڪسپورٽ ڪندڙ سيڪٽر رليف ڏئي رهيا آهن، صنعتن کي وياج جي شرح تي 3 سئو ارب رپين جي سبسڊي ڏني پئي وڃي، اڏاوتن جا ڪم وڌايا ويندا، 3 سئو ارب رپيا جا گهر ٺاهڻ لاءِ 30 ارب رپيا سبسڊي ڏني ويندي.

 

 

ايل اين جي ڪيس: شاهد خاقان ۽ مفتاح اسماعيل سميت 10 جوابدارن خلاف ريفرنس داخل

اسلام آباد (ويب ڊيسڪ) نيب ايل اين جي ڪيس ۾ اڳوڻي وزيراعظم شاهد خاقان عباسي ۽ اڳوڻي ناڻي بابت صلاحڪار مفتاح اسماعيل سميت 10 جوابدارن خلاف ريفرنس داخل ڪري ڇڏيو. اسلام آباد جي احتساب عدالت جي جج محمد بشير شاهد خاقان عباسي خلاف ايل اين جي ڪيس جي ٻڌڻي ڪئي. نيب راولپنڊي اختيارن جي غلط استعمال تي شاهد خاقان عباسي ۽ مفتاح اسماعيل سميت 10 جوابدارن خلاف ريفرنس داخل ڪري ڇڏيو. ڪيس ۾ چيو ويو ته جوابدارن مارچ 2015 کان سيپٽمبر 2019 تائين هڪ ڪمپني کي 21 ارب رپين کان وڌيڪ جو فائدو پهچايو، جنهن سان 2029 تائين قومي ناڻي کي 47 ارب رپين جو نقصان ٿيندو. ريفرنس موجب ايل اين جي معاهدي سبب عوام تي گئس بل جي مد ۾ 15 سالن دوران 68 ارب رپين کان وڌيڪ جو واڌو بار پوندو. پي ايس او جي اڳوڻي ايم ڊي شيخ عمران الحق به معاهدي ۾ اهم ڪردار ادا ڪيو. ڪيس ۾ اينگرو گروپ چيئرمين حسين دائود کي به نامزد ڪيو ويو آهي، جڏهن ته اڳوڻو سيڪريٽري عابد سعيد ۽ ايم ڊي پيٽروليم شيخ عمران الحق اهم شاهد بڻجي ويا آهن. احتساب عدالت شاهد خاقان عباسي ۽ مفتاح اسماعيل جي جڊيشل رمانڊ ۾ واڌ ڪندي ڪيس جي ٻڌڻي 16 ڊسمبر تائين ملتوي ڪري ڇڏي.