تازيون خبرون
هڪ سال ۾ پيٽروليم شين جي مد ۾ 206 ارب 28 ڪروڙ ٽئڪس اوڳاڙيو ويو: وفاقي سرڪار جو اعتراف - وزيراعظم چيف سيڪريٽري ۽ آئي جي سنڌ ذريعي متبادل نظام هلائڻ چاهي ٿو، ائين ٿيڻ نه ڏينداسين: سنڌ سرڪار - جسٽس (ر) الطاف ابراهيم قريشي وقتي چيف اليڪشن ڪمشنر ٿي ويو - ايشيائي ترقياتي بئنڪ پاڪستان لاءِ هڪ ارب 30 ڪروڙ ڊالرز جو قرض منظور ڪري ورتو - حڪومت جو ڪم واپار جي رستي ۾ آيل رنڊڪن کي ختم ڪري آسانيون پيدا ڪرڻ آهي: عمران خان - وزير اعظم ملڪ کي مضبوط ڪرڻ چاهي ٿو پر مخالف ڌر ڌيان هٽائڻ چاهي ٿي: فردوس عاشق - ملڪ رياض جي وارثن ۽ برطانوي حڪومت وچ ۾ نبيري مان مليل رقم سماجي بهبود لاءِ استعمال ڪئي ويندي: شهزاد اڪبر - وڏي وزير جي صدارت ۾ پبلڪ سيفٽي ڪميشن جو اجلاس، آءِ جي سنڌ جي عدم شرڪت تي ڪاوڙ جو اظهار، ٺهراءُ منظور - ڪراچي مان اغوا ٿيل دعا منگي بازياب نه ٿي، سنڌ جي مختلف شهرن ۾ احتجاجي مظاهرا، ريليون - اسلام ڪوٽ: مسافر ڪوچ موٽر سائيڪل کي بچائيندي ڪلٽي، واٽھڙو فوت، 3 عورتن سميت 7 ڄڻا زخمي

Daily Archives: November 14, 2019

نواز شريف کي 4 هفتن لاءِ پرڏيهه وڃڻ جي مشروط اجازت ڏيڻ جو فيصلو

اسلام آباد (بيورو رپورٽ) وفاقي ڪابينا جي ذيلي ڪميٽي نواز شريف کي ساڍا 7 ارب جا بانڊز جمع ڪرائڻ جي صورت ۾ نواز شريف کي/ڏسو صفحو 3 بقايا نمبر 01

4 هفتن لاءِ پرڏيهه وڃڻ جي مشروط اجازت ڏيڻ جو فيصلو ڪري ورتو آهي. ذيلي ڪميٽي ۾ ٻن ڏينهن تائين صلاح مشورن کانپوءِ ڪميٽي جي سربراهه ۽ وفاقي وزير فروغ نسيم پريس ڪانفرنس ڪئي، جنهن دوران شهزاد اڪبر به ساڻس گڏ هو. فروغ نسيم اعلان ڪيو ته حڪومت نواز شريف کي پرڏيهه وڃڻ لاءِ 4 هفتن تائين هڪ ڀيرو مشروط اجازت ڏيڻ جو فيصلو ڪيو ويو آهي، چئن هفتن ۾ جيڪڏهن نواز شريف جي طبيعت ٺيڪ ٿئي ٿي ته ڏيهه واپس ايندو ۽ جيڪڏهن سندس طبيعت بهتر نه ٿي ته واڌ لاءِ ٻيهر حڪومت سان رابطو ڪيو ويندو. پريس ڪانفرنس دوران وفاقي وزير چيو ته جيڪڏهن شهباز شريف 7 يا ساڍا 7 ارب رُپين جا ضمانتي بانڊ جمع ڪرائڻ لاءِ تيار آهي ته طبي بُنيادن تي نواز شريف جو اي سي ايل مان نالو چئن هفتن لاءِ ڪڍيو ويندو. حڪومت پنهنجو فيصلو ڪري ورتو آهي ۽ اجازت نامو به جاري ڪيو ويندو، هاڻي نواز ليگ تي آهي ته معاملي کي ڪيئن اڳتي کڻي هلي سگهي ٿي. .

 

سنڌ حڪومت جو وفاق خلاف سپريم ڪورٽ وڃڻ جو اعلان

ڪراچي(اسٽاف رپورٽر) سنڌ جي وڏي وزير سيد مراد علي شاهه نيب آرڊينيننس جي ترميم جنهن تحت هڪ ڏوهاري جنهن 50 ملين رپين تائين گهوٻيون ڪيون آهن کي جيل ۾ سي ڪلاس جي سهولت ڏني وڃي کي چيلنج ڪرڻ جو اعلان ڪيو آهي. هن چيو ته وفاقي حڪومت، صوبائي حڪومت جي حدن ۾ مداخلت /ڏسو صفحو 3 بقايا نمبر 35

ڪري رهي آهي ۽ هن چيو ته وفاقي حڪومت جي قومي احتساب آرڊينيننس 1999 ۾ ترميم موجب 50 ملين رپين تائين گهوٻين/غبن ڪندڙ ڏوهاري کي جيل ۾ سي ڪلاس جي سهولت ڏني ويندي. هن چيو ته اهو خصوصي جيل مينوئل جو معاملو آهي ۽ وفاقي حڪومت اهڙي طرح جي ترميم ڪرڻ جي مجاز نه آهي ان ڪري صوبائي حڪومت ان کي عدالت ۾ چيلنج ڪرڻ جو فيصلو ڪيو آهي. هن اها ڳالهه اڄ بارادري ۾ ڪراچي واٽر بورڊ کي 20 سڪش ۽ هائي پريشر جيٽنگ مشينن سپرد ڪرڻ واري تقريب کانپوءِ ڳالهائيندي ڪئي. هن چيو ته وفاقي حڪومت آرڊينيننس ۾ قلم 10 شامل ڪئي آهي جنهن تحت ڄاڻايل ڏوهاري جنهن 50 ملين رپين تائين گهوٻي ڪئي آهي ان کي جيل ۾ سي ڪلاس جي سهولت ڏني ويندي. هڪ سوال جي جواب ۾ مراد علي شاهه چيو ته وفاقي حڪومت ڪيترائي ڀيرا ورجائي چڪي آهي ته 18هين آئيني ترميم ڪو آسماني صحيفو نه آهي جو ان ۾ ترميم نه ٿي سگهي. آئون انهن کي ٻڌائڻ چاهيان ٿو ته اوهان ضرور ترميم ڪري سگهو ٿا پر اها ترميم صوبن کي وڌيڪ اختيار ڏيڻ لاءِ ٿي سگهي ٿي پر اوهان (وفاقي حڪومت) کي اها ترميم ختم ڪرڻ جي اجازت نه ڏني ويندي. هڪ سوال جي جواب ۾ وڏي وزير چيو ته سنڌ ۾ پيپلز پارٽي جي حڪومت تي اهو الزام آهي ته هو ڪي فور جي الائنمنٽ ۾ تبديلي ڪري رهي آهي پر اهو ثابت ٿي چڪو آهي ته صوبائي حڪومت الائنمنٽ بابت ڪا ڇيڙڇاڙ نه ڪئي آهي. منصوبو ضرور مڪمل ٿيندو جنهن لاءِ آئون سخت محنت ڪري رهيو آهيان. هن چيو ته ايس-ٿري منصوبو به مڪمل ٿيندو. مراد علي شاهه چيو ته صوبائي حڪومت ڪي فور تي ايف ڊبليو او جيڪو هڪ سٺي ساک رکندڙ ادارو آهي سان گڏ ڪم ڪري رهي آهي ۽ گهڻو جلد اتي ڪم شروع ٿي ويندو. مراد علي شاهه ڄامشورو-سيوهڻ ٻه سانگي منصوبي جي مثال ڏيندي چيو ته کيس حڪومت پنهنجي حصي جا ست ارب رپيا اڳ ئي وفاقي حڪومت کي ڏئي چڪي آهي تنهن هوندي به روڊ کي ٻٽو ڪرڻ وارو ڪم تمام سست رفتاري سان ٿي رهيو آهي. هن چيو ته اهو ته وفاقي حڪومت جو رويو آهي. هن ياد ڏياريندي چيو ته هن (وزيراعظم عمران خان) 162 ارب رپين واري پيڪيج  جو اعلان ڪيو هو حالانڪه آئون ان پروگرام ۾ نه هوس پر مونکي اها ڄاڻ ملندي خوشي ٿي ته منهنجي شهر کي هڪ سٺو ترقياتي پيڪيج ملي رهيو آهي پر اهو اعلان رڳو اعلان جي حد تائين ئي محدود رهيو ۽ ان حوالي سان هينئر تائين ڪابه اڳڀرائي نه ٿي سگهي آهي. هن چيو ته وفاقي حڪومت ملڪ جي معيشت کي تباهه ڪري رهي آهي. هن چيو ته غريب ماڻهو پيٽ ڀري کاڌو به نٿا کائي سگهن. ڀاڄين جي ملهه ۾ تمام گهڻو اضافو ٿي چڪو آهي ۽ هي (ناڻي بابت وفاقي صلاحڪار ) چوي پيو ته ڀاڄين واري مارڪيٽ ۾ ٽماٽا 17 رپيا ڪلو آهي جيڪا هڪ حيران ڪندڙ ڳالهه آهي.  گورنر سنڌ بابت پڇيل هڪ سوال جي جواب ۾ هن چيو ته هو سنڌ ۾ رهي ٿو جيڪا هڪ سٺي ڳالهه آهي. هو گورنر هائوس آهي ۽ گورنر کي اتي رهڻ جو مڪمل اختيار حاصل آهي. هن چيو ته جيتري تائين گورنر هائوس جون ڀتون ڪرائڻ جو سوال آهي ته کيس حڪومت ان لاءِ هرگز اجازت نه ڏيندي. وڏي وزير آئين جي آرٽيڪل 105 جو حوالو ڏيندي چيو ته گورنر وڏي وزير جي ايڊوائيز تي ڪم ڪرڻ جو پابند آهي. اهو تمام آسان آهي ۽ ان ۾ ڪوبه فرق نه آهي جيڪڏهن هر هڪ پنهنجي آئيني ڪردار کي فالو ڪري.

 

نواز شريف جي علاج کي دير وارن حربن جي ور چاڙهڻ بدترين ظلم آهي: ن ليگ

اسلام آباد/لاهور (م.ڊ/اين اين آءِ)اسلام آباد(م.ڊ) نواز ليگ نوازشريف کي پرڏيهه مان علاج مشروط اجازت ڏيڻ واري فيصلي کي رد ڪندي سڀاڻي سينيئر قيادت جو اجلاس سڏائي ورتو. قانون واري وزير فروغ نسيم جي پريس ڪانفرنس تي ردعمل ظاهر ڪندي ن ليگ /ڏسو صفحو 3 بقايا نمبر 27

ترجمان بيان جاري ڪيو، مريم اورنگزيب بيان ۾ چيو آهي ته اڳوڻي وزيراعظم نوازشريف جي صحت بابت بيان ۾ چيو آهي ته ان ماڻهو کان سياسي ڀنگ گهريو پيو وڃي جيڪو پنهنجي زال کي موت جي بستر تي ڇڏي ڌيءُ جو هٿ وٺي وطن واپس آيو هو هڪ بيان ۾ هن چيو ته ميان نوازشريف جي صحت سان سياست جي خطرناڪ راند کيڏي پئي وڃي حڪومت صورتحال جي سنگيني جو احساس ڪندي جلد فيصلو ڪري هن چيو ته حڪومت عدالت بڻجڻ جي ڪوشش ڪري عدليه جي توهين ڪري رهي آهي هن چيو ته ميان نوازشڙيف جي صحت تي غور لاءِ ڊاڪٽرن جو هنگامي اجلاس ختم ٿي ويو هن چيو ته داڪٽرن مطابق اسٽيرائڊز جي هاءِ ڊوز ڏيڻ جي ڪري محمد نوازشريف جي صحت تي خراب اثر ظاهر ٿي رهيا آهن هن چيو ته هاءِ اسٽيرائيڊز جي ڊوز ميان نوازشريف جي پليٽ ليٽس کي سفر لاءِ گهربل سطح تي آڻڻ لاءِ ڏني ويئي هئي هن چيو ته اسٽي رائيٽس جي ڳچ مقدار سبب ميان نوازشريف جي صحت تي سائيڊ افيڪٽس ٿيا آهن هن چيو ته اسٽيرائيڊز جي وڌيڪ مقدار ميان نوازشريف کي ٻين بيمارين جي پسمنظر ۾ خطرناڪ آهي ميان نوازشريف جي طبي حالت ۽ علامتن جي جائزي لاءِ شام جو ڊاڪٽرن جو ٻيهر اجلاس ٿيندو هن چيو ته ڊاڪٽر ميان نوازشريف جي صحت جي خراب ٿيندڙ صورتحال تي دوائن ۾ ڦيرڦار ڪئي آهي هن چيو ته حڪومت ميان نوازشريف جي صحت تي دير ڪري مجرماڻي غفلت ڪري رهي آهي هن چيو ته ميان نوازشريف جي زندگي 22 ڪروڙ عوام جي امانت آهي.حڪومتي فيصلو عمران صاحب جي تعصباڻي رويي ۽ سياسي انتقام تي ٻڌل آهي، تنهنڪري ان کي رد ڪيون ٿا. هن چيو ته اي سي ايل مان نالو ڪڍڻ کي مشروط ڪرڻ جهڙو پاڪستان جي تاريخ ۾ مثال نه ٿو ملي. مريم اورنگزيب چيو ته سڪيورٽي بانڊ جمع ڪرائڻ بابت نون ليگ پنهنجو واضح موقف پيش ڪري چڪي آهي. ن ليگ ترجمان چيو ته حڪومت هڪ پاسي نوازشريف جي صحت ڳڻتي جوڳي هئڻ جو اعتراف ڪري رهي آهي، ٻئي پاسي بدنيتي سان سندس پرڏيهه مان علاج ڪرائڻ ۾ رنڊڪون وجهي رهي آهي. هن چيو ته نوازشريف جي علاج لاءِ هر گهڙي قيمتي آهي. سندس علاج کي دير وارن حربن جي ور چاڙهڻ بدترين ظلم ۽ زيادتي آهي. مريم اورنگزيب چيو ته شهبازشريف پارٽي جي سينيئر قيادت جو اجلاس سڀاڻي طلب ڪيو آهي، جنهن ۾ حڪومتي فيصلي بعد حڪمت عملي بابت سينيئر قيادت کي اعتماد ۾ ورتو ويندو، اجلاس بعد شهبازشريف سڀاڻي منجهند 3 وڳي ڌاري پريس ڪانفرنس به ڪندو. مريم اورنگزيب چيو ته حڪومت دير وارن حربن ذريعي نوازشريف جي زندگي سان کيڏي رهي آهي، کيس ڪجهه به ٿيو ته ذميوار بي حس ۽ ڪٺور دل حڪومت هوندي. بئي طرف  اڳوڻي وزيراعظم ميان نوازشريف جو سندس گهر علاج ٿي رهيو آهي ۽ ڊاڪٽر پليٽس ليٽس جي معاملي تي سخت ڳڻتي ۾ آهن ڊاڪٽرن شريف فئملي کي نوازشريف کي 24 ڪلاڪن ۾ ٻاهرين ملڪ منتقل ڪرڻ جي صلاح ڏني آهي ذريعن موجب نوازشريف جو پنهنجي رهائشگاهه جاتي امره جي شريف ميڊيڪل ڪمپليڪس جي ڊاڪٽرن جي نگراني هيٺ علاج ٿي رهيو آهي اسٽريئڊز جي ڊوز جي باوجود نوازشريف جا پليٽس ليٽس 22 جي لڳ ڀڳ آهن ۽ ان صورتحال ۾ ڊاڪٽر سخت پريشان آهن نوازشريف جي جسم تي ٿيل داغ هاڻي وڌي رهيا آهن ٻئي پاسي نوازشريف جو بلڊ پريشر ۽ شگر ليول به مقرر حد کان وڌيڪ آهي ذريعن موجب ڊاڪٽرن جي نوازشريف جي گهرڀاتين سان مشاورت ٿي رهي آهي ۽ خاندان کي راءِ ڏني ويئي ته جيڪڏهن ٻاهر وڃڻ ۾ وڌيڪ دير ٿي ته اڳوڻي وزيراعظم جي حياتي کي خطرو ٿي سگهي ٿو. ذريعن موجب نوازشريف جو وزن گذريل ٻن ڏينهن کان گهٽجي ويو آهي جڏهن ته شگر ۽ ٻين بيمارين سبب نوازشريف جي قوت مدافعت گهٽ ٿي ويئي آهي موجوده صورتحال ۾ نوازشريف کي پاڪستان ۾ رکڻ خطري کان خالي نه آهي جيڪڏهن 24 ڪلاڪن کان وڌيڪ دير سان کيس روانو ڪيو وڃي ٿو ته وڌيڪ اسٽيرائيڊز ڏيڻ به خطرناڪ ٿيندو.

 

اسلام آباد ۾ آزادي مارچ ختم، پلان بي شروع، شاهراهون بند ڪرڻ جي هدايت

چمن/اسلام آباد (م.ڊ) جي يو آءِ جو پلان اَي وارو اسلام آباد ۾ آزادي مارچ ختم، مولانا فضل الرحمان پلان بي تي عملدرآمد اعلان ڪري ڇڏيو. ڪارڪنن کي پنهنجن پنهنجن علائقن ۾ مقامي قيادت جي هدايتن تي عملدرآمد ڪرڻ جو حڪم. جي يو آءِ جو آزادي مارچ 13 ڏينهن اڳ ڪراچي مان نڪتو هو، جيڪو /ڏسو صفحو 3 بقايا نمبر 21

اسلام آباد پهچڻ بعد ڌرڻي جي صورت اختيار ڪري ويو هو. مولانا فضل الرحمان مارچ کي پلان اي قرار ڏنو هو، اڄ خطاب ڪندي پلان بي تي عملدرآمد جو اعلان ڪيو. هن ڪارڪنن کي هدايت ڪندي چيو ته هو پلان بي تحت اڳتي وڌن ۽ شاهراهون بلاڪن ڪرڻ واري احتجاج ۾ حصو وٺن.هن چيو ته ڪارڪن شهرن ۾ ڪو به رستو بند نه ڪن، ته جيئن عوام پريشان نه ٿين، شهرن کان ٻاهر قومي شاهرانن تي ڌرڻا هنيا وڃن. هن چيو ته حڪومتي ڌريون سوچي رهيون هيون ته مارچ ۾ شامل ماڻهو اٿي ويندا ته حڪومت لاءِ آسانيون پيدا ٿينديون، پر هاڻي گهٽي گهٽي ۾ احتجاج ٿيندو. مولانا فضل الرحمان چيو ته ڪِرندڙ ڀت کي هڪ وڌيڪ ڌِڪو ڏيڻ جو انتظار آهي.هن چيو ته آزادي مارچ جو مرحلو ڪيترو پرامن هو، سڄي دنيا ڏسي ڇڏيو ته اسان ڪيترا منظم آهيون، اڳتي به پرامن رهڻو آهي. جمعيت علماءِ اسلام ( جي يو آءِ ف) جي قيادت ۾ مخالف ڌر جماعتن جي آزادي مارچ جو اڄ 14هون ڏينهن آهي، آزادي مارچ ۾ شرڪت ڪندڙ ايڇ نائن گرائونڊ ۾ موجود آهن، مولانا فضل الرحمان جي پلان بي واري اعلان کانپوءِ جي يو آءِ ۽ پشتونخوا ملي عوامي پارٽي جي ڪارڪنن رڪاوٽون وجهي ڪوئٽا چمن شاهراهه ٽريفڪ لاءِ بند ڪري ڇڏيو.ٻنهي پارٽين جي ڪارڪنن رڪاوٽون وجهي سيد حميد ڪراس کي ٽريفڪ جي لاءِ بند ڪري ڇڏيو آهي، مسافرن کي سخت پريشانين کي منهن ڏسڻو پئجي رهيو آهي، مولانا واسع جو چوڻ آهي ته احتجاج جي پلان بي تي بلوچستان ۾ عمل شروع ڪري ڇڏيو آهي.

 

پاڪستان پنهنجي معيشت کي مستحڪم ڪري ورتو آهي، نئون حدف نوجوانن کي روزگار ڏيڻ آهي : عمران خان

اسلام آباد (اين اين آءِ) وزيراعظم عمران خان چيو آهي ته اسان جي معيشت پنهنجي پيرن تي بيهي چڪي آهي اسان جو اڳيون حدف نوجوانن کي روزگار ڏيڻ لا3 موقعا فراهم ڪرڻ آهي چين جا پاڪستان سان جنهن قسم جا لاڳاپا/ڏسو صفحو 3 بقايا نمبر 02

هاڻي آهن اڳ ڪڏهن نه هئا. چين اسان جي مدد ڪري رهيو آهي ۽ اسان جي به ڪوشش آهي ته اسان سيڙپڪاري لاءِ چين جي مدد ڪيون پاڪستان ۽ چين وچ ۾ معاهدن تي صحيح جي تقريب کي خطاب ڪندي وزيراعظم چيو ته جڏهن حڪومت سنڀالي ته معيشت جو ٻيڙو ٻڏل هو گذريل ٽن مهينن ۾ رپئي جو ملهه بهتر ٿيو آهي ۽ اسان جي ايڪسپورٽ وڌي رهي آهي وزيراعظم چيو ته رپيو مارڪيٽ ٽريڊ جي سطح تي پهچي چڪو آهي رپئي جو ملهه مستحڪم ڪرڻ لاءِ پنهنجي ٽيم کي مبارڪونڏ يان ٿو پاڪستان جي معيشت مستحڪم ٿي چڪي آهي ۽ هاڻي هي ملڪ ترقي ڪندو هن چيو ته سڀ کان سٺي ڳالهه اها آهي ته آءِ ايم ايف، ورلڊ بئنڪ ۽ ايشين بئنڪ پاڻ چيو آهي ته پاڪستان هاڻي سڌي رستي تي هلي رهيو آهي هن چيو ته پاڪستان ۾ هاڻي ٽائر مينوفيڪچرنگ ٿيندا جيڪي اڳ اسمگل ٿي ايندا هئا جنهن سان ٻه شيون ٿينديون هڪ ته اسان کي ٽائر ٻاهران گهرائڻا نه پوندا ٻيو اسان جي ايڪسپورٽ وڌندي جنهن سان اسان جو ڪرنٽ اڪائونٽ خسارو گهٽ ٿيندو ۽ مهانگائي گهٽ ٿيندي هن چيو ته اسان ڪرنٽ اڪائونت خسارو گهٽائڻ لاءِ امپورٽ گهٽتائي ڇڏي آهي جڏهن شيون پاڪستان ۾ تيار ٿيڻ شروع ٿينديون ته خسارو گهٽجي ويندو عمران خان چيو ته ڪوشش آهي ته روزگار لاءِ سمورا موقعا حڪومت فراهم ڪري اسان ان حوالي سان ڪم ڪري رهيا آهيون وزيراعظم ٻڌايو ته ايڪسپورٽ وڌي رهي آهي جڏهن ته خسارو گهٽائڻ لاءِ اسان امپورٽ گهٽائي ڇڏي هئي هن چيو ته حڪومت جي ڪوشش آهي ته عوام لاءِ روزگار جو هر موقعو اسان پاڻ فراهم ڪيون ۽ سيڙپڪارن لاءِ آسانيون پيدا ڪيون وڃن هن چيو ته ڪاروبار جي آسانين جي درجي ۾ بهتري مسلسل جدوجهد جو نتيجو آهي جنهن لاءِ هر شعبو ڪم ڪري رهيو آهي جنهن ۾ ايڪسپورٽ وڌائڻ ۽ سيڙپڪارن کي مائل ڪرڻ جي ڪوشش ڪئي پئي وڃي.

 

مولانا فضل الرحمان جو پلان بي سياسي بدحواسي منصوبو آهي، اهڙو قدم نه کڻي جو سياسي عبرت جو نشان بڻجي: فردوس اعواڻ

اسلام آباد (ويب ڊيسڪ) اطلاعات ۽ نشريات بابت وزيراعظم جي خاص مددگار فردوس عاشق اعواڻ چيو آهي ته مولانا فضل الرحمان جو پلان بي سياسي بدحواسي منصوبو آهي. سماجي رابطن جي ويب سائيٽ ٽوئيٽر تي ٽوئيٽ /ڏسو صفحو 3 بقايا نمبر 03

ڪندي فردوس عاشق اعواڻ لکيو ته جمعيت علماءِ اسلام (ف) جي سربراهه کي سمجهه ۾ نٿو اچي ته ڇا ڪري پر ملڪ کي عدم استحڪام جو شڪار ڪرڻ جا سڀ پلان ناڪام ٿيندا. هن چيو ته مولانا جمهوري ۽ عوامي پلان سامهون آڻي، پلان بي تحت ڪو اهڙو غير ذميواراڻو قدم نه کڻو جو توهان پاڻ سياسي عبرت جو نشان بڻجي وڃو.

 

حڪومت تي سياسي مخالفن جي حياتين سان کيڏڻ جو الزام، طبي سهولت سمورن سياسي قيدين کي ڏيڻ گهرجيۡ: بلاول ڀٽو زرداري

اسلام آباد(ويب ڊيسڪ) پاڪستان پيپلز پارٽي جي چيئرمين بلاول ڀٽو زرداري حڪومت تي سياسي مخالفن جي حياتين سان کيڏڻ جو الزام هڻي ڇڏيو. سماجي رابطن واري ويب سائيٽ ٽوئيٽر تي هڪ ٽوئيٽ ۾ هن لکيو ته/ڏسو صفحو 3 بقايا نمبر 32

حڪومت جنهن طريقي سان سياسي حريفن جي زندگين سان کيڏي رهي آهي ۽ پنهنجي دٻاءُ جي سازشن ۽ سياسي مقصدن جي لاءِ بيماري جو ناجائز فائدو کڻي  رهي آهي اُهو نفرت جوڳو عمل آهي. هن لکيو ته حڪومت کي صحت تي سياست بند ڪرڻ گهرجي، عدالتن ۽ قانون جي طرفان جن طبي سهولتن جي اجازت ڏني وئي آهي اُهي سمورن سياسي قيدين کي ڏيڻ گهرجي. خيال رهي ته هن وقت ملڪ جا 2 اڳوڻا حڪمران آصف علي زرداري ۽ نواز شريف جي صحت جي مسئلن کي منهن ڏئي رهيو آهي، ان مان مسلم ليگ ن جي سربراهه نواز شريف العزيزيه ريفرنس ۾ طبي بنيادن تي 8 هفتن تي ضمانت تي آهي جڏهن ته پاڪستان پيپلز پارٽي جي شريڪ چيئرمين آصف زرداري ڪوڙي اڪائونٽس ڪيس ۾ گرفتار آهي.

 

هر قسم جي چيلنجن ۽ ايل ايو سي کي منهن ڏيڻ لاءِ تيار آهيون: جنرل قمر جاويد باجوه

 

اسلام آباد(ويب ڊيسڪ) آسٽريلوي هاءِ ڪمشنر ڊاڪٽر جيفري شا جي ايڇ ڪيو جو دورو ڪيو جتي آرمي چيف جنرل قمر جاويد باجوه/ڏسو صفحو 3 بقايا نمبر 37

سان هن جي ملاقات ٿي. تفصيل موجب پاڪ فوج جي شعبي آءِ ايس پي آر جو چوڻ آهي ته آسٽريلوي هاءِ ڪمشنر ڊاڪٽر جيفري شا جي ايڇ ڪيو جو دورو ڪيو. آءِ ايس پي آر موجب آرمي چيف جنرل قمر جاويد باجوه سان آسٽريلوي هاءِ ڪمشنر جي ملاقات به ٿي. ملاقات ۾ گڏيل دلچسپي جي معاملن سميت علائقائي سيڪيورٽي تي ڳالهيون ڪيون ويون. ان کان اڳ 226هين ڪور ڪمانڊر ڪانفرنس جي موقعي تي آرمي چيف جنرل قمر جاويد باجوه جو چوڻ هو ته هر قسم جي چيلنجن ۽ ايل ايو سي کي منهن ڏيڻ لاءِ تيار آهيون.

 

 

نواز شريف کي ڍر ڏينداسين ته سڀاڻي زرداري به تيار ٿي ويندو: فواد چوڌري

اسلام آباد (اين اين آءِ) وفاقي وزير فواد چوڌري چيو آهي ته نوازشريف کي ٻاهر موڪلڻ جو فيصلو وزيراعظم کي پسند نه آهي فواد چوڌري چيو ته ڪابينه اجلاس ۾ نوازشريف جي اي سي ايل جي معاملي تي تفصيلي بحث ڪيو ويو /ڏسو صفحو 3 بقايا نمبر 06

نوازشريف فئملي ماضي ۾ ايترو ڪوڙ ڳالهايو آهي جو هاڻي جيڪڏهن اها سچ ڳالهائي رهي آهي ته يقين ڪرڻ ڏکيو آهي هن چيو ته نوازشريف جون جيڪي ٽيسٽون ٿيڻيون آهن اهي پاڪستان ۾ نٿيون ٿي سگهن ان لاءِ کيس ٻاهر موڪلڻ جو فيصلو ڪيو ويو فواد چوڌري چيو ته نوازشريف کي مشروط طور تي ٻاهر وڃڻ جي اجازت ڏني ويئي آهي ته جيئن اهو به پنهنجن پٽن ۽ اسحاق ڊار وانگر ٻاهر نه رهجي وڃي پاناما پيپرز ۾ به نوازشريف فئملي جو نالو موجود هو ۽ ان تي ڊگهي عدالتي جنگ ٿي جنهن کان پوءِ ٽرائيل هليو ۽ سزا ٿي ۽ هو سزا مليل آهي جنهن جي ڪري قانوني مونجهارا موجود آهن هن چيو ته جيڪڏهن نوازشريف واپس نه آيو ته سڀاڻي اهو سوال به اٿندو ته نوازشريف کي حڪومت ٻاهر موڪليو هو ملڪ جا لٽيل پئسا هن قوم جا آهن جيڪي نوازشريف کان واپس ڪرڻا آهن فواد چوڌري چيو ته نوازشريف کي ٻاهر موڪلڻ جي حوالي سان جيڪا گارنٽي وٺڻ جي ڳالهه ڪئي ويئي آهي ان تي ڳالهه ٻولهه ٿي رهي آهي ته ڪهڙي طرح ۽ ڪيتري گارنٽي ورتي وڃي اصل معاملو نوازشريف کان پئسا اڳاڙڻ جو آهي ۽ جيڪڏهن پئسا ڏيئي پلي بارگين ۾ هليو وڃي ته معاملو ٻيو ٿي وڃي ها هن چيو ته نوازشريف جيل ۾ رهڻ تي راضي آهي پر پئسا ڏيڻ لاءِ تيار نه آهي. سياسي اڳواڻ پهريان پڪڙيا وڃن ٿا ۽ پوءِ بيمار ٿين ٿا وفاقي وزير چيو ته سياسي صورتحال جو به دٻاءُ هوندو آهي ۽ آزادي مارچ وارن سان به ڳالهيون جاري آهن ۽ ڪوشش آهي ته معاملي جو حل نڪري اچي.وفاقي وزير فواد چوڌري چيو آهي ته شهبازشريف، مريم نواز، خواجه آصف نوازشريف جي ڪرسي سنڀالڻ جي ڊوڙ ۾ آهن هي ماڻهو نوازشريف کي سيڪيورٽي بانڊ ڏيڻ ڏين نوازشريف واپس ايندو ته پئسا واپس ملي ويندا نوازشريف جي صحت تي سياست نه ڪن ته نوازشريف کي شڪ کان سواءِ وڃڻ ڏنو ويندو ته سڀاڻي آصف زرداري ۽ خورشيد شاهه به ٻاهر وڃڻ لاءِچوندا مولانا فضل الرحمان جي ڌرڻي ۾ روز نوان لطيفا ٻڌڻ ۾ اچن ٿا فضل الرحمان جتي جتي نڪرڻ چاهي ٿو نڪري اسان ڏسڻ لاءِ ويٺا آهيون اربع تي وفاقي وزير فواد چوڌري پهرين آرٽيفيشل انٽيليجنس سمٽ کي خطاب ڪندي چيو ته دنيا جي اسلامي ملڪن جو ڌيان پاڪستان ڏانهن هو هن چيو ته 1952 ۾ پاڪستان ۾ پي سي آءِ آر بڻايو ويو پي سي آءِ ايس آر دنيا جو بهتري ادارو بڻجي ويو هو هن چيو ته پاڪستان سوويت يونين ۽ يو ايس اي کان پوءِ پهريون راڪيٽ رهبر خلا ۾ موڪليندڙ ملڪ هو هن چيو ته افغانستان جي جنگ ۾ وڃڻ جي اسان کان غلطي ٿي جنگ ۾ نه وڃون ها ته اسان ٽيڪنالوجي ۾ اڳيان هجون ها هن چيو ته پاڪستان فائنر آپٽيڪ شروع ڪندڙ پهريون ملڪ هو هن چيو ته ماضِ ۾ سويلين ۽ ڊفينس سيڪٽر ڌار ڌار ٽيڪنالوجي تي ڪم ڪندا رهيا هن چيو ته ايس پي ڊي ۽ ايئرفورس جي ٽيڪنالوجي کي اسان سويلين سيڪٽر ۾ استعمال نٿا ڪري سگهون هن چيو ته جنرل باجوا ان معاملي ۾ کلي دل جو مالڪ آهي هن چيو ته اسان ڪوشش ڪري رهيا آهيون ته ڊفينس ۾ استعمال ٿيندڙ ٽيڪنالوجي کي سويلين سيڪٽر ۾ استعمال ڪيو وڃي هن چيو ته ايندڙ سال ٽيڪنالوجي جو 50 سيڪڙو بجيٽ وڌائينداسين هن چيوت ه اسان جي سول سيڪٽر ۾ ريسرچ ڪوآرڊينيٽيڊ نه آهي هن چيو ته اسان جي ريسرچ اندشٽري سان ڳنڍيل نه آهي نادره 22 ڪروڙ مانهن جو ڊيٽا گڏ ڪيو هن چيو ته اسان 140 ملين موبائيل فون جو فنڪر پرنٽ ڊيٽا حاصل ڪيو پر اسان ان ڊيٽا کي استعمال ڪري نه سگهياسين سٽيزن پورٽل به ڊيٽا جي استعمال سان هلي رهيو آهي هن چيو ته چائنا ٽيڪنالوجي ۽ ڊيٽا جي استعمال ۾ گهڻو اڳتي وڃي چڪو آهي چائنا ۾ ٽرين تي بچيل کاڌو هيٺ اڇلائڻ تي ٽڪيٽ ڊبل ڪئي وڃي ٿي ميڊيا سان ڳالهائيندي فواد چوڌري چيو ته ڪابينه ۾ گذريل ڏينهن ڊگهي ميٽنگ ٿي نوازشريف جي صحت جي حوالي سان وزيراعطم جي سمورن معاملن تي عقابي نظر آهي انساني بنياد تي ڪابينه معاملي جو جائزو ورتوآهي ڪابينه نوازشريف کي انساني بنيادن تي ٻاهر وڃڻ جي اجازت ڏني آهي. هن چيو ته 3000 قيدين جيل مان نڪرڻ جون درخواستون داخل ڪيون آهن فواد چوڌري چيو ته عدالت اي سي ايل مان ڪڍي ڇڏي ته اسان جو ڪوبه مسئلو نه آهي هن چيو ته هاڻي سموري ذميواري اسان تي وڌي ويئي آهي مسلم ليگ (ن) جي ساک متاثر ٿي رهي آهي فواد چوڌري چيو ته اسان پاران ڪابه دير نه آهي مسلم ليگ (ن) پاران دير ٿي رهي آهي.

 

مفرور جوابدار گرفتار نه ٿيا، سنڌ هاءِ ڪورٽ پاران جوابدارن جي گرفتار نه ٿيڻ تي ڳڻتي ۽ ڏوهن جي واڌاري جو مک سبب ڀاڳيلا قرار

ڪراچي ( م.ڊ) سنڌ ۾ مفرور جوابدار گرفتار نه ٿي سگهيا، سنڌ هاءِ ڪورٽ پاران جوابدارن جي گرفتار نه ٿيڻ تي ڳڻتي ۽ ڏوهن جي واڌاري جو مک سبب ڀاڳيلا قرار، ان ڏس ۾ جسٽس صلاح الدين پنهور آڏو پوليس اي ڪلاس ڪيل /ڏسو صفحو 2بقايا نمبر 14

ڪيسن جي باري تفصيل پيش ڪيا، عدالت کي ٻڌايو ويو ته سڄي سنڌ ۾ 75 هزار 267 ڪيس اي ڪلاس ٿيل آهن، جن مان ڪراچي سٽي ۾ 25 هزار 205، حيدر آباد ريجن ۾ 3 هزار 16 ۽ سکر ريجن ۾ 14 سو 47 سنگين ڪيسز آهن، رپورٽ موجب ڪراچي ۾ 2009 ع کان 2018ع تائين قتل جا 4 هزار 998، ڦر دوران مزاحمت تي قتل جا 216 ، ڌاڙي ۽ ڦر جا 15 هزار 169 ۽ ڀنگ لاءِ اغوا جا 4 هزار 8 سو 22 ڪيس اي ڪلاس ڪيا ويا آهن، انهن ڪيسن ۾ ڪو به جوابدار گرفتار ناهي، جڏهن جوابدار گرفتار ٿيا ته ان خلاف ڪيس کوليو ويندو، اهڙي طرح سان حيدرآباد ريجن ۾ 3 هزار 16 سنگين ڪيس اي ڪلاس ٿيل آهن، جن مان 477 قتل، ڦر دوران مزاحمت جا 42 قتل ڪيس، ڌاڙي ۽ ڦر جا 2 هزار 480 ۽ ڀنگ خاطر اغوا جا 17 ڪيس اي ڪلاس ڪيا ويا آهن هوڏانهن سکر ريجن ۾ 1447 ڪيسز آهن، جن مان قتل جا 372 ڪيس، ڦر دوران مزاحمت تي قتل جا 7 ڪيس ، ڌاڙي ۽ ڦر جا 1046 ڪيس اي ڪلاس ٿيل آهن، جڏهن سکر ۾ ڀنگ لاءِ اغوا جا 22 ڪيس اي ڪلاس ڪيا ويا آهن. عدالت جاري ٿيل تفصيلي حڪم نامي ۾ آبزرويشن ڏني آهي ته ڪراچي ۾ رينجرز، پوليس سميت ٻيا ادارا متحرڪ آهن، انهي باوجودڪيس جي فرار ٿيل جوابدارن جو نامعلوم هئڻ ۽ گرفتار نه ٿيڻ ڳڻتي جوڳي ڳالهه آهي، عدالت چيو ته جوابدارن جي گرفتار نه ٿيڻ سان ڏوهن ۾ اضافو ٿئي ٿو، عوام جو ڪيس داخل ڪرائڻ تان به اعتبار کڄي وڃي ٿو، جوابدارن جي گرفتار نه ٿيڻ سبب معاشري ۾ خوف واري فضا پيدا ٿي رهي آهي، اهڙي صورتحال ۾ ماڻهو ڪيس داخل ڪرائڻ کي ئي فضول سمجهن ٿا، اها صورتحال عوام کي ڏوهارين جي رحم ڪرم تي ڇڏڻ جي برابر آهي، جيڪڏهن حالتون ائين ئي رهيون ته ڪراچي ميٽروپوليٽن سٽي جهنگ جي مثل هوندو. عدالت چيو ته هزارن جي انگ ۾ مفرور جوابدارن جي گرفتاري لاءِ جنگي بنيادن تي ڪم ڪرڻ جي ضرورت آهي. ان موقعي تي عدالتي معاون عباد حسنين چيو ته مفرور جوابدارن جي گرفتاري لاءِ رينجرز کان مدد ورتي وڃي، رينجرز جو ڪردار امن و امان بحال ڪرڻ آهي رينجرز کان گرفتارين ۽ جاچ بابت ميڪينزم طلب ڪيو وڃي. جڏهن ته سمورن ضلعي ججن کي گرفتار نه ٿيل جوابدارن بابت رپورٽ موڪلي وڃي. عدالتي معاون وڌيڪ چيو ته صوبي جا جوڊيشل مئجسٽريٽ اهڙن ڪيسن جي نگراني ڪري سمورن اي ڪلاس ڪيسن جو رڪارڊ گڏ ڪرائين. جوبدارن جي گرفتاري لاءِ سي سي ٽي وي فوٽيجز جو استعمال موثر بڻايو وڃي. عدالت درخواستگذار مرتضيٰ علي ۽ سندس خاندان کي تحفظ فراهم ڪرڻ جو حڪم ڏيندي ٻڌڻي 4 ڊسمبر تائين ملتوي ڪري ڇڏي. واضح رهي ته مرتضيٰ علي قتل جي ارادي واري ڪيس ۾ مفرور جوابدارن جي گرفتاري لاءِ عدالت ۾ درخواست داخل ڪئي هئي.