تازيون خبرون

Daily Archives: November 1, 2019

رحيم يار خان: تيزگام ايڪسپريس کي باهه، 73 مسافر سڙي فوت، سوين زخمي، اسپتالن ۾ ايمرجنسي لاڳو، امدادي ڪاررواين ۾ فوج به شامل

رحيم يار خان(ويب ڊيسڪ) ڪراچي کان راولپنڊي ويندڙ تيز گام ايڪسپريس  ۾ پنجاب جي ضلعي رحيم يار خان جي ڀرسان گيس سلنڊر ڦاٽڻ سان باهه سبب 74 ڄڻا فوت ٿي ويا جڏهن ته 30 کان وڌيڪ مسافر زخمي/ڏسو صفحو 3 بقايا نمبر 01

ٿي پيا. بدقسمت  ٽرين سان حادثو صبح 6:15 منٽ تي پنجاب جي ضلعي رحيم يار خان جي تحصيل لياقت پور ۾ چني ڳوٺ جي ڀرسان چڪ نمبر 6 جي تانوري اسٽيشن تي پيش آيا. ريسڪيو اهلڪارن موجب باهه جي شدت ڏاڍي گهڻي هئي جنهن تيزي سان بوگين کي پنهنجي وڪڙ ۾ آڻي ڇڏيو. حادثي جي فوري بعد زخمين کي مقامي ماڻهن جي مدد سان ويجهي شيخ زيد اسپتال، بهاولپور وڪٽوريه اسپتال ۽ ملتان جي اٽالين برن يونٽ منتقل ڪيو جڏهن ته سڄي ضلعي جي ٻين اسپتالن ۾ به ايمرجنسي لاڳو ڪئي وئي آهي. اختيارين جو چوڻ هو ته باهه ٽرين جي بوگي نمبر 3 ۾ موجود سلينڊر ڦاٽڻ سان لڳي جنهن تيزي سان وڌيڪ 3 بوگين کي پنهنجي وڪڙ هيٺ آڻي ڇڏيو. اختيارين جو اِهو به چوڻ هو ته متاثر بوگين ۾ سوار مسافر رائيونڊ اجتماع ۾ شرڪت جي لاءِ وڃي رهيا هئا ۽ باهه جي وڪڙ ۾ ايندڙ 2 بوگيون خاص طور تي بڪ ڪرايون ويون هيون. متاثره بوگين ۾ گهڻو ڪري مرد سوار هئا جنهن وٽ کائڻ پيئڻ جي لاءِ سلنڊر موجود هئا.  اکين ڏٺين شاهدن موجب سلنڊر ڦاٽڻ سبب ٽرين ۾ ڌماڪو ٿيو جنهن جو آواز ٻڌي ٻين مسافرن دهشتگردي سمجهي هلندڙ ريل مان ٽپو ڏنو. اکين موجب هلندڙ ٽرين مان ريلوي ڦاٽڪ جي ڀرسان پٿرن تي ٽپو ڏيڻ سبب گهڻا مسافر زخمي ٿيا جنهن ۾ 3 کان 4 عورتون به شامل آهن. حادثي کان پوءِ سڀ کان پهرين  مقامي ماڻهن فوري طور تي واقعي واري هنڌ پهچي پنهنجي مدد پاڻ جي تحت امدادي ڪارروائيون شروع ڪيون. ريلوي واري وفاقي وزير شيخ رشيد احمد خانگي ٽي وي چينل سان ڳالهائيندي تصديق ڪئي ته 13 ڄڻا ريل مان ٽپو ڏيڻ ۽ مختلف سببن جي ڪري جڏهن ته گڏيل طور تي  64 ڄڻا فوت ٿيا جڏهن ته 33 زخمي ٿيا. بعد ۾ هڪ ويڊيو پيغام جاري ڪندي هن ٻڌايو ته متاثر ڪوچز ۾ مهراب پور، نواب شاهه ۽ حيدرآباد مان مسافرن کي سوار ڪرايو ويو. ان سان گڏ هن فوت ٿيلن جي لاءِ 15 لک رپيا ۽ زخمين جي لاءِ  5 لک رپيا معاوضي جو به اعلان ڪيو. ريلوي واري وزير چيو ته مسافرن جو سامان چيڪ ڪرڻ جي سهولت رڳو وڏين اسٽيشنن تي موجود آهي باقي ننڍين اسٽيشنن تي مسافرن جي سامان جي ڳولا لاءِ ڪو به نظام ناهي. هن چيو ته ريلوي ۾ اِها روايت موجود آهي ته تبليغي جماعت جي لاءِ امير جي نالي تي بوگي بڪ ڪئي ويندي هئي جڏهن ته هر مسافر جي تفصيل نه ورتي ويندي هئي. هن ٻڌايو ته ٽرين جي اڪانومي ڪلاس ۾ موجود 2 سلنڊر ڦاٽن سان بوگين ۾ باهه لڳي، جنهن تي تبليغي جماعت جا ماڻهو نيرن تيار ڪري رهيا هئا ان سان گڏ هنن دعويٰ ڪئي ته 2 ڪلاڪن ۾  ٽريڪ بحال ڪيو ويندو. حادثي سبب ٻين ريل گاڏين کي هنن جي ويجهي اسٽيشنز تي ئي روڪيو ويو جڏهن ته ساڳي ٽريڪ تي ايندڙ بهاو الدين زڪريا ايڪسپريس کي لياقت پور کان اڳ خان پور اسٽيشن تي روڪيو ويو. ٻئي پاسي ريلوي اختيارين موجب ٽرين ۾ سلنڊر کڻي وڃڻ جي بلڪل اجازت ناهي ۽ جاچ کان پوءِ  ان ڳالهه کي ڏٺو ويندو ته ڪنهن جي غفلت جي ڪري مسافر ٽرين ۾ سلنڊر کڻي سوار ٿيا. ان ضمن ۾ ڊويزنل ڪمرشل آفيسر جنيد اسلم خانگي ٽي وي چينل سان ڳالهائيندي ٻڌايو ته متاثر ٿيل 2 بوگيون اڪانومي جڏهن ته هڪ بزنس ڪوچ هئي ۽ هڪ بوگي امير حسين جڏهن ته ٻئي جماعت جي نالي تي بڪ ڪرائي وئي هئي. هن چيو ته تبليغي جماعت جي لاءِ بوگيون ڪنهن هڪ شخص جي نالي تي بڪ  ڪرائي وينديون آهن ۽ باقي تفصيل ان جي امير وٽ هوندي آهي جنهن جي ڪري سمورن مسافرن جي سڃاڻپ فراهم نٿي ڪري سگهجي البت  هن اِهو ضرور ٻڌايو ته هڪ بوگي ۾ 78 جڏهن ته ٻي بوگي ۾ 77 ڄڻن جي لاءِ بڪنگ ڪرائي وئي هئي. هن ٻڌايو ته بزنس ڪلاڪ بوگي ۾ 54 ڄڻن جي بڪنگ ڪرائي وئي هئي جنهن ۾ مختلف ماڻهو سوار هئا. حادثي جي باري ۾ خانگي ٽي وي چينل سان ڳالهائيندي ريلويز  جي چيئرمين سڪندر سلطان جو چوڻ هو ته ٽرين ۾ سلنڊر ۽ گاسليٽ کڻي وڃڻ جي اجازت ناهي ۽ ان جي جاچ جو آغاز ڪيو ويو آهي ته ٽرين ۾ مسافر  سلنڊر کڻي ڪيئن سوار ٿيا. رحيم يار خان ۾ تيز گام ايڪسپريس ۾ خوفناڪ باهه تي پاڪ فوج جون امدادي ٽيمون به سول انتظاميا سان سهڪار ڪري رهيون آهن. پاڪ فوج جي شعبي آءِ ايس پي آر طرفان جاري بيان موجب واقعي واري هنڌ ريسڪيو ۽ ريليف فراهم ڪرڻ لاءِ سول انتظاميا جي سهڪار جي لاءِ پاڪ فوج جا جٿا، ڊاڪٽر ۽ طبي عملي کي روانو ڪيو ويو. آءِ ايس پي آر ٻڌايو ته سخت زخمين کي منتقل ڪرڻ جي لاءِ ملتان کان آرمي ايوي ايشن جو هيليڪاپٽر به روانو ڪيو ويو.

 

مارچ کي نه روڪڻ جو واعدو پاڙيو، وزيراعظم جي استعيفيٰ جو سوال ئي پيدا نٿو ٿئي: حڪومت

اسلام آباد (اين اين آءِ) وفاقي حڪومت هڪ ڀيرو ٻيهر اپوزيشن جي وزيراعظم جي استعيفيٰ جي گهر کي رد ڪندي واضح ڪيو آهي ته مولانا جي مارچ ۾ جڏهن ضابطي اخلاق جي ڀڃڪڙي ٿيندي ته قانون حرڪت ۾ ايندو، جيڪڏهن ٽڪراءُ ٿيندو ته ايندڙ وزيراعظم عمران خان هوندو، اسلام آباد اندر 81 ملڪن جا سفارتخانا ۽ 7 هزار سفارتڪار موجود آهن، سفارتخانن ۽ سفارتڪارن جي سيڪيورٽي کي يقيني بڻائڻ رياست ۽ حڪومت جي ذميواري آهي، اسان کي سياست جي ميدان ۾ هڪٻئي جو مقابلو ڪرڻ ۾ ڪو به عار نه آهي، 2014 جو ڌرڻو قانون جي حڪمراني لاءِ هو، هي مارچ ڪرپشن کي تحفط/ڏسو صفحو 3 بقايا نمبر 38

ڏيڻ لاءِ آهي، اڳ به مولانا تي حملا ٿيا، هاڻ به مولانا تي حملي جو چيو پيو وڃي، مارچ کي مڪمل سڪيورٽي ڏني ويندي، جمهوري ماڻهو آهيون ڳالهين تي يقين رکون ٿا، اهڙن خيالن جو اظهار وفاقي وزير اعجاز شاهه ۽ فردوس عاشق اعواڻ ميڊيا کي بريفنگ ڏيندي ڪيو، فردوس عاشق اعواڻ چيو ته اسلام آباد ۾ ملڪن جا سفارتخانا ۽ 7 هزار سفارتڪار موجود آهن، سفارتخانن ۽ سفارتڪارن جي سيڪيورٽي کي يقيني بڻائڻ رياست ۽ حڪومت جي ذميواري آهي، اسان کي سياست جي ميدان ۾ هڪٻئي جو مقابلو ڪرڻ ۾ ڪو به عار نه آهي، 2014 جو ڌرڻو قانون جي حڪمراني لاءِ هو، هي مارچ ڪرپشن کي تحفط ڏيڻ لاءِ آهي، اڳ به مولانا تي حملا ٿيا، هاڻ به مولانا تي حملي جو چيو پيو وڃي، هن چيو ته مولانا جي مارچ کي پيغام ڏيڻ چاهيون ٿا ته 7 هزار سفارتڪارن جي ذريعي پاڪستان جو چهرو دنيا تائين پهچي ٿو، ميرٽ بم ڌماڪي کانپوءِ پاڪستان کي نان فيملي اسٽيشن قرار ڏنو ويو هو، هن چيو ته پاڪستان هن ئي سال اسلام اباد کي سفارتڪارن لاءِ فيملي اسٽيشن قرار ڏيارڻ ۾ ڪامياب ٿيو. هن چيو ته اهي ڪو اهڙو عمل نه ڪن جنهن سان پاڪستان جي سلامتي ۽ دنيا ۾ پاڪستان جو وقار مجروح ٿئي، ان موقعي تي ڳالهائيندي اعجاز شاهه چيو ته اسلام آباد ۾ اڳ به مارچ ٿيندا رهيا آهن، اسلام آباد ۾ ٿيندڙ مارچ جي پوري لسٽ تيار ڪئي آهي، هي مارچ سڪندر مرزا جي ڏينهن کان شروع ٿيو، هن چيو ته قاضي حسين احمد جي مارچ کي نه اچڻ ڏنو ويو ۽ ان ۾ جاني نقصان ٿيو، اسلام آباد ۾ هڪ ڀيرو سپريم ڪورٽ تي چڙهائي ٿي، عوامي تحريڪ، تحريڪ انصاف ۽ تحريڪ لبيڪ اسلام آباد ۾ مارچ ۽ يلغار ڪئي، هن چيو ته حڪومتي ڳالهين واري ڪميٽي ۽ رهبر ڪميٽي جي ڳالهين ۾ هن چيو ته اسان ڊي چوڪ وڃڻو آهي، حڪومت آگاهه ڪيو ته ڊي چوڪ نه پريڊ گرائونڊ وڃو، رهبر ڪميٽي پشاور گرائوند گهريو جنهن سان حڪومت سان خير سگالي جذبي تحت اتفاق ڪيو، هن چيو ته ڊي سي اسلام آباد ۽ جي يو آءِ ۾ معاهدي تي صحيح ٿيڻ کانپوءِ هڪ 37 نقاطي ضابطي اخلاق تي به اتفاق ٿيو، گهرو وزير چيو ته حڪومت مولانا سان سندس مارچ کي نه روڪڻ جو واعدو ڪيو هو جيڪو پوور ڪيو، هن چيو ته 4 ڏينهن جي مارچ ۾ مختلف صوبن مان 25 هزار ماڻهو گوجر خان پهچي چڪا آهن، حڪومت مارچ کي سهولتون فراهم ڪيون آهن، هن چيو ته مولانا جي ڪنٽينر جو روٽ ڌار رکيو آهي ته جيئن ان کي جهٽڪو لڳڻ سان ڪماني نه ٽٽي، هن چيو ته دعاگو آهيون ته مارچ ۾ شامل ماڻهو خيريت سان هتي پهچي وڃن، مارچ کي مڪمل سيڪيورٽي فراهم ڪئي ويندي، هن چيو ته اسان ڌرڻي ۾ شامل ٿيندڙن کي سڪون ۾ رکڻ لاءِ وڌ ۾ وڌ ڪوشش ڪري رهيا آهيون، هن چيو ته مولانا تي پي ٽي آءِ حڪومت کان اڳ حملا ٿي چڪا آهن، مولانا کي خبر آهي ته اهي حملا ڪنهن ڪيا، هاڻ به مولانا تي حملي لاءِ چيو پيو وڃي، کيس مڪمل سيڪيورٽي ڏني ويندي. گهرو وزير چيو ته ڪير گهٻرايل آهي، جيڪو ڊڄي ويو اهو مري ويو، هن چيو ته وزيراعظم نواز شريف جي صحت بابت بيان ڏيڻ کان روڪي ڇڏيو آهي، نواز شريف جو نالو اي سي ايل ۾ آهي، سياست ۽ احتساب هڪ پاسي آهي، جڏهن ته صحت ۽ زندگي هڪ پاسي آهي، الله سائين سڀني کي صحت ۽ زندگي ڏئي.

 

پ پ ۽ جي يو آءِ (ف) تيز گام سانحي تي افسوس جو اظهار، شيخ رشيد کي هٽائڻ جو مطالبو

ڪراچي/ گوجر خان (اين اين آءِ)  پ پ چيئرمين بلاول ڀٽو وزيراعظم عمران خان کان گهر ڪئي آهي ته تيز گام ٽرين حادثي جاچ مڪمل ٿيڻ تائين ريلوي جي وفاقي وزير شيخ رشيد احمد کي عهدي تان هٽائي ڇڏي، ريلوي جي وزير متاثرن کي حادثي جو ذميوار قرار ڏيندي هڪ نئون داستان لکي ڇڏيو آهي جيڪو /ڏسو صفحو 3 بقايا نمبر 06

برداشت کان ٻاهر آهي، ٽوئيٽر بلاول ڀٽو وزيراعظم کي ان جي چونڊن کان پهريان ڪيل ڳالهه ياد ڏياريندي گهر ڪئي ته هو پنهنجي قول جي لڄ رکي ۽ ريلوي جي وزير کي عهدي تان هٽائي، هن گهر ڪئي ته حادثي جي تڪڙي جاچ ڪئي وڃي ۽ ذميوارن جو احتساب ڪيو وڃي، هن چيو ته هي اهو ئي وزير آهي جنهن جي نگراني ۾ ٽرين جا سڀ کان گهڻا حادثا ٿيا آهن، بلاول ڀٽو چيو ته هو سڀاڻي رحيم يار خان وڃي رهيو آهي ۽ اتي متاثرن جي عيادت ڪندو، منهنجا خيال ۽ دعائون متاثرن ۽ انهن جي گهرڀاتين سان گڏ آهن. جميعت علماءِ ف جي سربراهه مولانا فضل رحمان رحيم يار ويجهو تيز گام ايڪسپريس ۾ باهه لڳڻ جي واقعي تي ڏک جو اظهار ڪندي چيو ته خراب رٿابندي حادثن جو سبب بڻجي رهي آهي، مڪمل جاچ ٿيڻ گهرجي، سوشل ميڊيا تي جاري ڪيل بيان ۾ هن چيو ته تيز گام ۾ باهه لڳڻ جي واقعي تي ڏک ۽ ڏکائيل خاندانن سان تعزيت ڪريان ٿو، هن چيو ته هڪٻئي پويان حادثن تي سخت ڳڻتي آهي، حادثن جي مڪمل جاچ ٿيڻ گهرجي.

 

تيز گام سانحو آهي يا دهشتگردي: مولانا فضل الرحمان جاچ جو مطالبو ڪري ڇڏيو

اسلام آباد(م.ڊ) پنهنجي خطاب دوران مولانا فضل الرحمان تيز گام سانحي تي افسوس ۽ فوتين جي وارثن سان تعزيت جو اظهار ڪيو. هُن مطالبو ڪيو ته جاچ ڪئي ڃي ته تيز گام سانحو آهي يا دهشتگردي. واقعي ۾ جيڪو نقصان ٿيو، اُن تي افسوس ٿيو آهي ۽ سمورن متاثرن سان ڏک ونڊيون ٿا. نواز ليگ اڳواڻ احسن اقبال ۽ مريم اورنگزيب جي اعلان کانپوءِ هنگامي پريس ڪانفرنس ڪندي جي يو آءِ اڳواڻ مولانا غفور حيدري چيو ته جيڪڏهن ڪير اهو چئي رهيو آهي ته اسان پروگرام/ڏسو صفحو 3 بقايا نمبر 23

ملتوي ڪيو آهي ته اها سازش آهي، مريم اورنگزيب نه مون سان رابطو ڪيو آهي ۽ نه مون ساڻس رابطو ڪيو. مريم اورنگزيب پاڻ رابطو ڪندي ته خبر پوندي ته هوءَ ڇا چوڻ گهري ٿي. هُن وڌيڪ چيو ته جيڪا غلط فهمي پيدا ڪئي وئي، اُها ختم ٿيڻ گهرجي، آزادي مارچ جا قافلا پروگرام پٽاندڙ اڄ رات اسلام آباد پهچندا، اُنهن جي اسلام آباد ۾ آجيان ڪئي ويندي. مارچ ۾ شامل ماڻهو اسلام آباد ۾ ترسندا ۽ سڀاڻي جمعي نماز به اُتي ادا ڪئي ويندي، جنهن کانپوءِ باضابطا طور جلسو ٿيندو.