تازيون خبرون

Daily Archives: October 17, 2019

حڪومت جي يو آءِ سان ڳالهين لاءِ راضي، مولانا وزير اعظم جي استعيفيٰ جو شرط رکي ڇڏيو

اسلام آباد (ويب ڊيسڪ) وزير اعظم عمران خان جي يو آءِ (ف) جي سربراهه مولانا فضل الرحمان سان ڳالهين جي لاءِ راضي ٿي ويو آهي، وزير اعظم عمران خان تحريڪ انصاف جي ڪور ڪميٽي جي اجلاس کي خطاب ڪندي چيو ته جي يو آئي سان گڏ سياسي حل جي لاءِ ڳالهيون ۾ ڪوئي مسئلو نه آهي،  عمران خان آزادي مارچ جو سياسي حل ڳولڻ جي ذمه داري وزير دفاع پرويز خٽڪ کي سونپي ڇڏي آهي، سندس وڌيڪ چوڻ هو ته آزادي مارچ جي مسئلي تي پرويز خٽڪ ڪمٽي قائم ڪري ۽ پنهنجي مرضي سان ميمبرن جي چونڊ ڪري، ڪور ڪميٽي جي اجلاس ۾ مولانا فضل الرحمان جي آزادي مارچ، ملڪي سياسي و معاشي معاملن سميت ٻين اهم معاملن تي مشاورت ڪئي وئي، وزير اعظم ڪور ڪميٽي کي پنهنجي چين، ايارن ۽ سعودي عرب جي دوري تي اعتماد ۾ ورتو. ٻئي طرف جمعيت علماءِ اسلام (ف) جي سربراهه مولانا فضل الرحمان چيو آهي ته وزيراعظم عمران خان جي استعيفيٰ کان اڳ حڪومت سان ڳالهين نه ٿينديون. پختونخواهه ملي عوامي پارٽي جي سربراهه محمود خان اچڪزئي سان ملاقات کانپوءِ ساڻس گڏ پريس ڪانفرنس ڪندي مولانا فضل الرحمان چيو ته قوم 10 مهينن ۾ جعلي چونڊن جا نتيجا ڏسي ڇڏيا، 4 سئو ادارا کپايا پيا وڃن، هاڻ سڄي قوم جو هڪ ئي آواز آهي ته نيون چونڊون ڪرايون وڃن، چونڊن کانپوءِ جيڪي به نتيجا اچن، ڪير به کٽي اسان کي قبول هوندو. هن چيو ته حڪومتي ماڻهو غلط فهميون پيدا ڪري رهيا آهن، حڪومت جا سمورا حربا ناڪام ٿي چڪا آهن، وزيراعظم جي استعيفيٰ کان اڳ حڪومت سان ڳالهيون نه ٿينديون، آئين جي حڪمراني ۽ ادارن طرفان حدن ۾ رهي ڪم ڪرڻ جي مطالبي تي ٻي راءِ نٿي ٿي سگهي. سندس چوڻ هو ته ڪنهن به اداري عوام جو رستو روڪڻ جي ڪوشش ڪئي ته سمجهيو ويندو ادارا رياست لاءِ نه پر ڪنهن ٻئي لاءِ استعمال ٿي رهيا آهن، اسان ادارن سان تڪرار نٿا چاهيون پر ادارن کي ٻڌائڻ چاهيون ٿا ته جيڪڏهن مارشل لا جي ڪوشش ڪئي وئي ته آزادي جو رُخ انهن ڏانهن موڙيو ويندو. ان موقعي تي محمود خان اچڪزئي چيو ته اسان جي ڪنهن سان ذاتي دشمني ناهي، پاڪستان ڏينهون ڏينهن اڪيلو ٿيندو پيو وڃي، جيڪڏهن سڀ ادارا اهو پڪو پهه ڪن ته پنهنجي حدن ۾ رهندا ته پاڪستان ٺيڪ ٿي سگهي ٿو. هن چيو ته مولانا فضل الرحمان جي تحريڪ کي مذهبي تحريڪ سان جوڙڻ غلط آهي، بنا دير هڪ گول ميز ڪانفرنس گهرائي وڃي، جنهن ۾ مولانا فضل الرحمان کي آڻڻ منهنجي ذميواري آهي. سندس چوڻ هو ته آئين جي بالادستي لاءِ اسان آزادي مارچ ۾ شامل ٿينداسين.

 

اهي ماڻهو ضد تي آهن ته آئين ٽوڙيو وڃي، آئين جي ابتڙ ڪوبه ڪم ٿيڻ نه ڏينداسين: مراد علي شاهه

ڪراچي (اين اين آءِ)  ملڪ جنهن جو خواب علامه اقبال ڏٺو هو، قائداعظم ان کي بڻايو، قائد ملت ان کي هٿي وٺرائي، قائد عوام جدت بخشي ۽ محترمه شهيد ان کي خوشحالي ڏانهن وٺي وئي جنهن کي ”نئون پاڪستان“ متجاوز ڪري ڇڏيو آهي ۽ ماڻهن کي جيڪي روزگار تي لڳل هئا انهن کي روزگار کان محروم ڪيو پيو وڃي. اها ڳالهه وڏي وزير مراد علي شاهه گذريل ڏينهن قائد ملت لياقت علي خان جي 68هين ورسي جي موقعي تي گلن جي چادر چڙهائي ۽ فاتحه خواني کانپوءِ ميڊيا سان ڳالهائيندي چئي. ان موقعي تي صوبائي وزير امتياز شيخ، مرتضيٰ بلوچ ۽ مرتضيٰ وهاب پڻ ساڻس گڏ هئا. هڪ سوال جي جواب ۾ وڏي وزير چيو ته هي اهو پاڪستان نه آهي جنهن جو علامه اقبال خواب ڏٺو هو ۽ قائداعظم محمد علي جناح جنهن جي بنياد رکي هئي ۽ جنهن کي شهيد ڀٽو آئيني طور تي جت بخشي ۽ ان کي وري شهيد محترمه بينظير ڀٽو خوشحالي ڏانهن وٺي وئي هئي. هن چيو ته هاڻي جيڪو پاڪستان آهي ان کي پي ٽي آئي اهڙي ريت بڻايو آهي جو مهنگائي جي سونامي سبب ۽ اگهن جي مسلسل واڌ ذريعي ماني ٽُڪر به کسيو پيو وڃي ۽ اهي جنهن ان ملڪ جي خدمت ڪئي انهن کي جيلن ۾ وڌو پيو وڃي، اهو آهي نئون پاڪستان. هڪ سوال جي جواب ۾ وڏي وزير چيو ته ڪجهه ماڻهو افواهه پکيڙي رهيا آهن ته سنڌ حڪومت ڪراچي جو نالو تبديل ڪري رهي آهي. هن چيو ته اسان ڇو نالو (ڪراچي جو) نالو تبديل ڪدناسين، هي اسان جو شهر آهي ۽ سڄي دنيا ۾ ڄاتو ويندو آهي ۽ هي شهر اسان سڀني کي پيارو آهي. هن چيو ته هي خبرون بي بنياد آهن ۽ هن ميڊيا تي زور ڀريو ته اهي ماڻهن يا گروپس جيڪي ڪراچي جي نالي جي تبديلي بابت افواهون پکيڙي رهيا آهن انهن کي ڳولا ڪري. ڪچري کڻڻ واري ڪم بابت ڳالهائيندي وڏي وزير چيو ته هينئر تائين 3 لک ٽن ڪچرو کڄي چڪو آهي ۽ بچيل ڪچرو به 31 آڪٽوبر جي ڊيڊ لائين جيڪا مقرر ڪئي آهي تائين کڄي ويندو. هن ميڊيا کي ٻڌايو ته اڄ هتي شهيد ملت لياقت علي شان جي 68هين شهادت ڏهاڙي جي موقعي تي کانئس خراج عقيدت پيش ڪرڻ پنهنجي ڪابينا ميمبرن سان گڏ حاضر ٿيو آهيان. شهيد ملت لياقت علي خان ، قائداعظم محمد علي جناح جو ساٿي هو، انهن اسان کي هي پيارو ملڪ پاڪستان ڏنو آهي. اسان جي بدقسمتي هئي جو پاڪستان جي وجود ۾ اچڻ کان پهرين قائداعظم محمد علي جناح ۽ ان کان ڪجهه عرصو پوءِ شهيد ملت لياقت علي خان اسان کان جدا ٿي ويو ۽ ان کانپوءِ ملڪ ۾ ڪيترائي مسئلا سامهون آيا. هن چيو ته پاڪستان جي پهرين منتخب وزيراعظم ذوالفقار علي ڀٽو جڏهن قائداعظم محمد علي جناح جو نظريو وٺي اڳيان وڌيو ته کيس شهيد ڪيو ويو، ان کانپوءِ هڪ ڀيرو ٻيهر ملڪ ۾ مارشل لاءِ لڳي ويو ۽ شهيد محترمه بينظير ڀٽو جي جدوجهد سان مارشل لاءِ ختم ٿيو. وڏي وزير مراد علي شاهه چيو ته پنهنجي چيئرمين بلاول ڀٽو زرداري ۽ صدر پاڪستان پيپلز پارٽي پارليمنٽيرين آصف علي زرداري جي اڳواڻي ۾ اهو عهد ڪريون ٿا ته اسان قائداعظم محمد علي جناح، شهيد ملت لياقت علي خان، شهيد عوام ذوالفقار علي ڀٽو ۽ شهيد جمهوريت محترمه بينظير ڀٽو جي بڻايل اصولن تي اهو ملڪ جنهن جو خواب علامه اقبال ڏٺو ۽ ان کي پچاڻي تي قائداعظم محمد علي جناح پهچايو هو ان پاڪستان کي اسان مضبوط ۽ مستحڪم بڻائينداسين. موجوده حالاتن بابت هڪ سوال جي جواب ۾ وڏي وزير چيو ته علامه محمد اقبال اهڙي پاڪستان جو خواب نه ڏٺو هو جتي ماڻهن کي بيروزگار ڪرڻ جون ڳالهيون ڪيون وڃن ۽ قائداعظم محمد علي جناح هي ملڪ ان لاءِ بڻايو نه هو ته وفاقي وزير چوي ته عوام نوڪرين لاءِ حڪومت ڏانهن نه ڏسي ۽ جتي ادارا بند ڪرڻ جون ڳالهيون ڪيون وڃن. هن چيو ته هي قائداعظم محمد علي جناح جي نظرئي ۽ علامه اقبال جي خواب جي خلاف آهي جنهن جي هي (وفاقي وزير) ڳالهه ڪري رهيو آهي.
ڪراچي سميت سڄي سنڌ جي وسيلن تي ڪجهه ماڻهن جو قبضي ڪرڻ جي مهم بابت پڇيل سوال جي جواب ۾ وڏي وزير مراد علي شاهه چيو ته هي ڪابه ڳجهيل ڳالهه ڪونهي اوهان پاڻ ٻڌو هو ته آرٽيڪل 149 جون ڳالهيون ڪيون ويون، جنهن تي صوبائي حڪومت اسيمبلي ۾ قرارداد به پاس ڪري چڪي آهي. هن چيو ته اسان آئين جي ابتڙ ڪوبه ڪم ٿيڻ نه ڏينداسين اهي ماڻهو ضد تي آهن ته آئين کي ٽوڙيو وڃي. آئين جي ڀڃڪڙي ڪئي وئي ته انهن کي خبر آهي ته سزا ڇا هوندي. ڪي فور رٿا بابت گورنر جي هڪ بيان بابت پڇيل هڪ سوال جي جواب ۾ وڏي وزير چيو ته گورنر جو انتظامي معاملن ۾ ڪوبه عمل دخل نه هوندو آهي ان لاءِ آئون کين ڳالهين کي سنجيده نه وٺندو آهيان. هن وڌيڪ چيو ته ڪي فور رٿا بابت اجلاس ۾ وفاقي وزير منصوبه بندي خسرو بختيار شرڪت ڪئي هئي ان اجلاس ۾ نيسپاڪ جي رپورٽ پيش ڪئي وئي هئي ۽ منصوبي جي ڊيزائنگ بابت جيڪي مسئلا درپيش آهن ان جي حل لاءِ به ويٺا هئاسين. هن چيو ته منهنجي ڪوشش آهي ته ڪي فور جو ڊزائين درست ڪري منصوبي کي شروع ڪيو وڃي. مونکي آفيسرن ٻڌايو ته ڪميشن بڻائي وئي آهي جنهن ۾ کين دٻاءُ وڌو ويو آهي. منهنجي خيال موجب گورنر صاحب کي ان بابت ڪابه خبر ڪونهي، ان ڪري هو اهڙيون ڳالهيون ڪري رهيو آهي، گورنر کي وفاقي ۽ صوبائي حڪومتون رپورٽ ئي ڪونه ٿيون ڪن ان ڪري هو پنهنجي مرضي سان غلط ڳالهائي ويندو آهي. ڪراچي صفائي مهم بابت سوال جي جواب ۾ وڏي وزير چيو ته اسان 21 سيپٽمبر کان هڪ مهيني لاءِ صفائي مهم شروع ڪئي آهي ۽ آئون ان جي رٿابندي سيپٽمبر جي پهرين هفتي ۾ ڪئي آهي ۽ سڀني ڊپٽي ڪمشنرن کي چيو ته جتي به بيڪ لاگ نظر اچي ان کي کڻڻو آهي. آئون صفائي جي ڪم جي پاڻ نگراني ڪري رهيو آهيان، ڪچرو ڪيترن ئي جاين تي هوندو، بيڪ لاگ روزاني گڏ ٿي رهيو آهي، ڪجهه ضلعن ۾ ڪچرو گڏ ئي نه پيو ٿئي، آئون چئي سگهان ٿو ته 3 لک ٽن کان وڌيڪ ڪچرو لينڊفل سائيٽن تي پهچايو ويو آهي ۽ لينڊفل سائيٽن تي ويسٽ اسٽيشن هوندو آهي، هي اهو ڪچرو آهي جيڪو اسان ڊپٽي ڪمشنرن کان ڪم ڪرايو آهي. ان جو ڀيٽ نه ڪريو ڪجهه ڏينهن پهرين وفاق پاران هڪ مهم شروع ڪئي وئي ۽ ان مهم ۾ انهن دعويٰ ڪيو هو ته 1.5 لک ٽن ڪچرو کڄي چڪو آهي پر لينڊفل سائيٽن تي 15 هزار ٽن ڪچرو پهچايو ويو ۽ بچيل ڪچرو اتي ئي موجود رهيو ۽وڌيڪ مسئلا پيدا ڪيا ويا. اسان جي ڪم کي اوهان ڏسي سگهون ٿا ۽ آئون انتظاميا کان ڪچرو کڻائي رهيو آهيان جيڪڏهن ڪوبه غلط ڪري رهيو آهي ته اوهان (ميڊيا) مونکي ٻڌايو . اسان وٽ 6 ضلعا آهن جنهن مان 3 ضلعن ۾ ويسٽ مينجمينٽ بورڊ ڪم ڪري رهيو آهي. ڪچرو  جيڪو کنيو ويو آهي ان جو 70 کان 75 سيڪڙو انهن ضلعن جو آهي جتي ويسٽ مينجمينٽ بورڊ ڪم نه پئي ڪري يعني ڪورنگي مان ڪچرو نه کنيو ويو. مون صفائي جي عمل کي مستقل طور ڪرڻ لاءِ ڪي ايم سي ميئر ۽ ڊي ايم سيز جي چيئرمينن سان ڪيترائي اجلاس ڪيا آهن ۽ آئون انهن سان گڏ روڊن تي پڻ نڪتو آهيان. انهن جا جيڪي مسئلا آهن بجيٽ کانسواءِ به کيس گاڏيون ٺيڪ ڪرائڻ، ماڻهو هائر ڪرڻ ۽ هر شيءِ انهن تي خيالن جي ڏي وٺ ڪئي آهي. آئون ٻيهر چوان ٿو ته اهو ڪم ڊي ايم سيز جو آهي. آئون سمجهان ٿو ته اسان جي صفائي مهم سان هڪ واضح فرق نظر اچي رهيو آهي ۽ جيڪڏهن ڪنهن کي ڪجهه چوڻو آهي ته اهي ڳالهائيندا رهندا.  ڪتي ڏاڙهڻ واري انجيڪشن بابت هڪ سوال جي جواب ۾ هن چيو ته گذريل ڏينهن صحت واري وزير واضح طور ان ڳالهه جو جواب ڏنو آهي ته اسان وٽ ڪيتريون دوائون موجود آهن ۽ ڪٿي ڪٿي آهن. ڪتي جي ڏاڙهڻ جون دوائون موجود آهن ۽ اهي دوائون اسان کي وفاقي حڪومت سپلائي ڪندي آهي. گرفتاري بابت هڪ سوال تي وڏي وزير خوشگوار انداز ۾ چيو ته منهنجي گرفتاري جو مونکي خبر ڪونهي. ڪراچي جو نالو تبديل ڪرڻ بابت پڇيل سوال تي هن چيو ته ڪراچي منهنجو شهر آهي ۽ اهڙي ڪابه ڳالهه ڪونهي. ان کان پهرين وڏي وزير لياقت علي خان جي 68هين ورسي جي موقعي تي قائدملت جي مزار تي حاضري ڏني ۽ کيس مزار تي گلن جي چادر چڙهائي ۽ فاتحه خواني پڙهي. هن مهمانن جي ڪتاب ۾ پنهنجا تاثرات پڻ قلمبند ڪيا. وڏي وزير چيو ته اها هڪ بدقسمتي هئي جو قائداعظم محمد علي جناح جي وفات کانپوءِ قائدملت به اسان کي ڇڏي ويو پر کين ملڪ جي ترقي لاءِ ڪيل ڪاوشن کي شهيد ڀٽو ۽ شهيد محترمه بينظير ڀٽو جاري رکيو.

 

غريبن جي پئسن مان بنگلا ٺهرائيندڙن لاءِ 4-5 ڪروڙ رُپيا جمع ڪرائڻ ڪو مسئلو نه آهي: عدالت

ڪراچي (اسٽاف رپورٽر) سنڌ هاءِ ڪورٽ فلور ملز مالڪن کي رهتون ۽ مارڪ اپ فوري طور جمع ڪرائڻ جو حڪم ڏيندي چيو آهي ته غريبن جي پئسن مان بنگلا ٺهرائيندڙ ماڻهن لاءِ 4-5 ڪروڙ رُپيا جمع ڪرائڻ ڪو مسئلو نه آهي. سنڌ هاءِ ڪورٽ ۾ خوراڪ کاتي کان ڪڻڪ وٺي 40 ڪروڙ روپين جي مبينا ڪرپشن واري ڪيس جي ٻڌڻي ٿي، جنهن دوران خوراڪ کاتي ۽ نيب طرفان فلور ملز جي مالڪن سان گڏجاڻي بابت رپورٽ پيش ڪئي. خوراڪ کاتي طرفان عدالت کي آگاهي ڏني وئي ته نيب آفيسرز، فلو ملز مالڪن ۽ خوراڪ کاتي طرفان گڏيل صلاح مشوري سان مارڪ اپ واري مسئلي جو حل ڪڍيو ويو آهي. سمورن جوابدارن ڪڻڪ جي رقم واپس ڪئي پر مارڪ اپ جمع نه ڪرايو. فلور ملز مالڪن کي مارڪ اپ بابت آگاهه ڪيو ويو آهي. عدالت ۾ جمع ڪرايل رپورٽ موجب ٽن فلور ملز جي مالڪن ڏانهن 14 ڪروڙ 51 لک 27 هزار 861 رُپيا رهتون آهن، جِن مان راڻيپور فلور ملز تي 6 ڪروڙ هڪ لک، خيرپور فلور ملز تي هڪ ڪروڙ 33 لک 68 هزار ۽ گوپانگ فلور ملز تي 2 ڪروڙ 88 لک 93 هزار رُپيا بقايا آهي. عدالت فلور ملز مالڪن کي فوري طور رهتون ۽ مارڪ اپ جمع ڪرائڻ جو حڪم ڏيندي ريمارڪس ڏنا آهن ته اها رقم نيب يا عدالت نه، پر سنڌ جي خوراڪ کاتي جي اڪائونٽ ۾ جمع ڪرائي وڃي. ٻڌڻيءَ دوران فلور ملز مالڪن جي وڪيل چيو ته هڪ ڏينهن ۾ ايڏي رقم جمع ڪرائڻ ممڪن نه آهي. جنهن تي عدالت ريمارڪس ڏيندي چيو ته جِن ماڻهن غريبن جي پئسن مان بنگلا ٺهرايا، اُنهن لاءِ 4-5 ڪروڙ رُپيا جمع ڪرائڻ ڪو مسئلو نه آهي. بعد ۾ عدالت ٻڌڻي 23 آڪٽوبر تائين ملتوي ڪري ڇڏي.

 

موري  ڀرسان بس ڪلٽي، 6 ڄڻا فوت، 35  زخمي

مورو(م.ڊ) مورو ڀرسان قومي شاهراھ نزد المدينه پيٽرول پمپ وٽ ڀٽ شاھ کان سکر ويندي ڀٽ شاھ جي پانڌيئڙن جي بس ڊرائيور کي ننڊ جو جھوٽو اچڻ سبب ڪلٽي ٿي پئي، نتيجي ۾ 6 ڄڻا فوت ٿي ويا، 30 کان وڌيڪ زخمي ٿي پيا، زخمين ۽ فوتين جي لاشن کي موٽروي پوليس، ايڌي ايمبولنس رضاڪارن ۽ سوشل سماجي ماڻھن پاران مورو اسپتال آندو ويو، جتي زخمين کي ڊاڪٽرن پاران طبي امداد ڏني وئي، حادثي دوران موقعي تي 3 ڄڻا ڪوچ ھيٺيان اچڻ سبب چيڀاٽجي فوت ٿيا ۽ 3 ڄڻا مورو اسپتال ۾ زخمن جا سور نه سھندي فوت ٿيا، فوتين ۾ شوڪت ولد گل حسن شيخ ويٺل سکر، ممتاز ولد يوسف شيخ ويٺل سکر، ڍولڻ ولد انور شيخ ويٺل سکر، ديدار ولد امداد عباسي ويٺل خيرپور، امير بخش ولد مشتاق لانگاھ ويٺل خيرپور ميرس ۽ عبدالله شامل آهن، زخمين ۾ حاجي عبدالله تڙت، فرمان ڇڄڙ، برڪت شيخ، صاحب شيخ، حبدار شيخ، رسول بخش مبيجو، نذير احمد مبيجو، صدام عباسي، جميل احمد عباسي، محمد نواز ڇڄڙ، قادر بخش تڙت، خورشيد احمد بلوچ، خدابخش چنو، محمد ملوڪ چاچڙ، مير حسن شنباڻي، ٻاجهي ڪانڻيجو، سرور ڪانڌڙو، غلام اصغر شنباڻي شامل آهن جن مان 4 ڄڻن کي نوابشاھ منتقل ڪيو ويو، ٻين زخمين جو علاج جاري آهي. تعلقي اسپتال م ايمرجنسي لاڳو ڪئي وئي ۽ پنج ايمبولينس پڻ مختلف اسپتالن مان گھرايون ويون.

 

 

مسلم امت جو گڏيل اتحاد ۽ اتفاق خطي ۾ امن ۽ معاشي استحقام جو ضامن آهي: فردوس عاشق اعواڻ

اسلام آباد (اين اين آءِ) وزيراعظم جي سڌسماءِ جي خاص مددگار ڊاڪٽر فردوس عاشق اعواڻ چيو آهي ته مسلم امت جي گڏيل اتحاد ۽ اتفاق خطي ۾ امن ۽ معاشي استحڪام جو ضامن آهي ڪشمير مسئلي تي سعودي عرب پنهنجي حمايت جو عزم ورجايو ۽ تڪرار جي پرامن طريقي سان حل ٿيڻ تي زور ڏنو وزيراعظم عمران خان جي دوري سان پاڪستان ۽ سعودي عرب جي گڏيل اعتماد ۾ اضافو ٿيندو ۽ مختلف شعبن ۾ ويجهي تعاون تي ٻڌل لاڳاپا وڌيڪ مضبوط ٿيندا اربع تي ٽيوٽر تي پنهنجي بيان ۾ هن چيو ته ايران کان پوءِ فوجي قيادت جي خطي ۾ ڇڪتاڻ گهٽائڻ ۽ امن ۽ استحڪام کي هٿي وٺرائڻ لاءِ وزيراعظم جي ڪوششن کي سارائن عمران خان کي مسلم امت جي رهبر طور ممتاز ڪري ٿو هن چيو ته پاڪستان برادر اسلامي ملڪن وچ ۾ اخوت جي جذبي ۽ هم آهنگي کي هٿي وٺرائڻ جو خواهشمند آهي هن چيو ته مسلم امت جو گڏيل اتحاد ۽ اتفاق خطي ۾ امن ۽ معاشي استحڪام جو ضامن آهي هن چيو ته وزيراعظم عمرانخ ان سعودي قيادت کي والاريل ڄمون ۽ ڪشمير ۾ انساني حقن جي سنگين صورتحال مواصلاتي پابندين ۽ مسلسل لاڪ ڊائون کان آگاهه ڪيو.

 

شاهي جوڙي جو چترال پهچڻ تي شاندار استقبال، روايتي ٽوپي پهرائي ويئي

چترال (اين اين آءِ) برطانوي شاهي جوڙو شهزاده وليم ۽ ان جي زال ڪيٽ مڊلٽن جو چترال پهچڻ تي شاندار استقبال ڪيو ويو ۽ کين روايتي ٽوپي پهرائي ويئي ذريعن موجب برطانوي شاهي جوڙي ڪوه هندو ڪش جي برف سان ڍڪيل پهاڙن ۽ اتان جي خوبصورت نظارن جو فضائي جائزو ورتو ان کان سواءِ جوڙي موسمياتي تبديلين سان ڳرندڙ گليشيئرز کي به ڏٺو ۽ ڳڻتي جو اظهار ڪيو ذريعن موجب شاهي جوڙي چترال ۾ سيلاب سان ٿيندڙ نقصانن ۽ سرچ اينڊ ريسڪيو ٽيمن جي صلاحيت جو جائزو ورتو جنهن کان پوءِ جوڙي مقامي ڪيلاش قبيلي جي روايتي ريتن رسمن کي به ڏٺو.

 

 

مون کي يقين آهي ته ڌرڻو نه هنيو ويندو، سولائي سان ڌرڻي جي اجازت نه ملندي: شيخ رشيد

اسلام آباد (اين اين آءِ) ريلوي جي وفاقي وزير شيخ رشيد چيو آهي ته مون کي يقين آهي ته ڌرڻو نه هنيو ويندو، سولائي سان ڌرڻي جي اجازت نه ملندي، مولانا فضل رحمان سياسي ماڻهو آهي، هو ڄاڻي ٿو ته ڌرڻي جو نتيجو ڇا نڪرندو، صحافين سان ڳالهائيندي هن چيو ته شهباز شريف سدائين ادارن سان صلح جي پاليسي اختيار ڪئي آهي، هن چيو ته وزيراعظم 3 وڳي ميٽنگ سڏائي آهي، حڪمت عملي تيار ڪئي ويندي، هن چيو ته ڌرڻي بابت سموري صورتحال 26 آڪٽومبر تائين واضح ٿي ويندي، مولانا صاحب سان ڳالهيون ڪرڻ وارا ڪري رهيا آهن اڃا نتيجو ناهي نڪتو، شيخ رشيد چيو ته ڌرڻي تي اڻوندڙ واقعو ٿيو ته قانون حرڪت ۾ ايندو، وزيراعظم عمران خان ڪي به ڳالهيون نه پيو ڪري پر ڳالهيون ڪرڻ وارا ماڻهو مولانا سان رابطي ۾ آهن، ضروري نه آهي ته ڌرڻو هنيو وڃي رڳو جلسو به ٿي سگهي ٿو، پ پ ڌرڻي ۾ شامل نه ٿيندي، ن ليگ ٻن حصن ۾ ورهائجي وئي آهي، شهباز شريف ۾ ايتري همت ناهي جو هو کلي سامهون اچي سگهي، نواز شريف ڌرڻي جو حامي ۽ شهباز شريف نه آهي، وفاقي وزير چيو ته شهباز شريف چاهي ٿو ته معاملا صلح سان حل ڪيا وڃن، جڏهن ته سعد رفيق، خواجه آصف، اياز صادق سٺي سوچ رکڻ وارا آهن، ن ليگ ۾ ڪنهن وٽ اڃا فائنل ايجنڊا نه آهي، ن ليگ ڌرڻي ۾ وئي ته ان جي قيمت اپوزيشن کي ادا ڪرڻي پوندي.

 

پ پ چونڊن دوران ڪيل واعدا پاڙي رهي آهي، صحافين جي جان مال جي تحفط  لاءِ  قانون جوڙي رهيا  آهيون: سعيد غني

ڪراچي (اسٽاف رپورٽر)   اطلاعات ۽ پورهئي کاتي جي صوبائي وزير سعيد غني سان آمريڪا جي قونصل جنرل روبرٽ سلبرسٽين سندس آفيس ۾ ملاقات ڪئي. ان موقعي تي صوبائي وزير سعيد غني سان يو ايس قونصليٽ جو پوليٽيڪل يونٽ چيف نيل ايم فلپس ۽ پوليٽيڪل اسپيشلسٽ قرت العين اسماعيل به موجود هئي. ملاقات ۾ مختلف معاملن تي ڳالهيون ڪيون ويون خاص ڪري سنڌ صوبي ۾ سنڌ حڪومت پاران جاري منصوبن صحت، تعليم، سميت ٻين منصوبن ۾ ڪيل اصلاحات ۽ ٿرپارڪر ۾ جاري ترقياتي ڪمن بابت ڳالهيون ڪيون ويون. ان موقعي تي اطلاعات ۽ پورهئي واري صوبائي وزير سعيد غني آمريڪا جي قونصل جنرل کي پورهئي کاتي ۾ سوشل سيڪيورٽي يونيورسلائيزيشن جي حوالي سان سنڌ حڪومت ۽ محنت کاتي پاران جاري ڪمن بابت آگاهه ڪيو ۽ ٻڌايو ته سنڌ حڪومت مزدورن  محنت ڪش کي وڌ کان وڌ سهولتن جي فراهمي لاءِ سوشل سيڪيورٽي يونيورسلائيزيشن تي ڪم جو آغاز ڪري چڪي آهي ۽ جلد ئي صوبي جي سمورن شعبن ۾ ڪم ڪرڻ وارن مزدورن محنت ڪش کي ان جو فائدو ٿيندو صوبائي وزير سنڌ سرڪار پاران ٿرپارڪر جي ترقي ۽ بنيادي وسيلن جي فراهمي جي حوالي سان جاري ڪمن بابت آمريڪا جي قونصل جنرل کي آگاهه ڪيو. هن ڪراچي سميت سموري صوبي ۾ صحت جي سهولت خاص ڪري دل جو مرض، جگر جي پيوند ڪاري، ڪينسر، گردن سميت ٻين ڪيترائي مرضن جي مفت علاج جي سهولتن لاءِ اين آئي وي سي ڊي جي قيام ۽ صوبي ۾ يونٽس جي تيزي ۾ ڪيل اضافي بابت آگاهه ڪيو. ان موقعي تي آمريڪا جي قونصل جنرل سنڌ حڪومت خاص ڪري صوبائي وزير جي ڪاوشن تي خوشي جو اظهار ڪيو ۽ چيو ته ان وقت سنڌ صوبي ۾ جهڙي طره سنڌ حڪومت عوام جي ڀلائِي لاءِ ڪم ڪري رهي آهي ان جا مثبت رزلٽ سامهون ايندا. ان موقعي تي آمريڪا جي  قونصل جنرل کي صوبائي وزير اطلاعات ۽ محنت واري کاتن بابت بريفنگ ڏني ۽ ٻڌايو ته ٻنهي کاتن ۾ اصلاحات لاءِ هاڻوڪي سنڌ سرڪار ڪيترائي اپاءُ ورتا آهن خاص ڪري صحافين کي سهولتن جي فراهمي ۽ انهن کي آزاد ۽ بيباڪ صحافت جي لاءِ سمورن وسيلن جي فراهمي ڪئي پئي وڃي صحافين جي جان مال جي تحفظ لاءِ به سنڌ سرڪار ڪيترائي قانون جوڙي رهي آهي. ان موقعي تي وفد ۾ شامل پوليٽيڪل يونٽ چيف نيل ايم فلپس ۽ پوليٽيڪل اسپيشلسٽ قرت العين اسماعيل به سنڌ صوبي ۾ پاڪستان پيپلزپارٽي جي ڪردار کي ساراهيو ۽ چيو ته پيپلزپارٽي چونڊن دوران عوام سان جيڪي واعدا ڪيا آهن ان سڀني کي پورو ڪرڻ لاءِ جيڪي اپاءُ وٺي رهي آهي اهي تعريف جوڳا آهن بعد ۾ صوبائي وزير سعيد غني مهمانن کي روايتي شال جو تحفو پيش ڪيو.

 

نيب انور مجيد سوڌو ٻين جوابدارن خلاف ريفرنس داخل ڪرڻ ۽ ايس بي سي اي ۽ ڪي ايم سي خلاف جاچ جي منظوري ڏئي ڇڏي

اسلام آباد (بيورو رپورٽ) نيب جي اگزيڪيوٽو بورڊ انور مجيد سوڌو ٻين جوابدارن خلاف ريفرنس داخل ڪرڻ جي منظوري ڏئي ڇڏي، جڏهن ته ايس بي سي اي ۽ ڪي ايم سي خلاف جاچ جي به منظوري ڏني وئي آهي. نيب چيئرمين رٽائرڊ جسٽس جاويد اقبال جي سربراهيءَ ۾ ايگزيڪيوٽو بورڊ جو ٿيو، جنهن دوران ڪرپشن جا وڌيڪ 3 ريفرنسز داخل ڪرڻ جي منظوري ڏني وئي. نيب ترجمان طرفان جاري ڪيل پڌرائي موجب بورڊ انور مجيد ۽ ٻين جوابدارن خلاف ڪرپشن جو ريفرنس داخل ڪرڻ جي منظوري ڏني، مٿن مني لانڊرنگ ۽ ڪرپشن ذريعي قومي ناڻي کي 34 ڪروڙ رُپين جو نقصان پهچائڻ جو الزام آهي. نيب جي ايگزيڪيوٽو بورڊ سنڌ بلڊنگ ڪنٽرول اٿارٽي ۽ ڪراچي ميونسپل ڪارپوريشن جي آفيسرز توڙي ملازمن خلاف جاچ (انويسٽيگيشن) شروع ڪرڻ جي منظوري ڏئي ڇڏي. پڌرائي موجب ايگزيڪيوٽو بورڊ جي اجلاس دوران عالمي توڙي مقامي اين جي اوز ايس ڊي پي آءِ، فافن ۽ ايف اي او رورل پروگرام انتظاميا خلاف شاهديون نه ملڻ جي بنياد تي جاچ بند ڪرڻ جي به منظوري ڏني وئي.

 

حمزه شهباز کي ميڊيا سان ڳالهائڻ کان روڪڻ ۽ صحافين تي تشدد جي مذمت، ملڪ تي عمران سوچ مڙهيل آهي:مريم اورنگزيب

اسلام آباد (اين اين آءِ) پاڪستان مسلم ليگ (ن) ترجمان مريم اونگزيب حمزه شهباز سان ميڊيا کي ڳالهائڻ کان روڪڻ ۽ صحافين تي تشدد جي مذمت ڪندي چيو ته ملڪ تي عمران صاحب جي سوچ مڙهيل آهي عمران صاحب آواز بند ڪرڻ سان سچائي لڪي نٿي سگهي نه ئي ڪوڙ سچ ٿي سگهي ٿو اربع تي هڪ بيان ۾ هن چيو ته نااهل حڪومت سمورن سياسي مخالفن کي يرغمال بڻائي ڇڏيو آهي ۽ ان جا آواز به بند ڪري رهي آهي هن چيو ته سياسي مخالفن جي خلاف ڪرپشن نه پئي ملي حڪومت هاڻي آواز بند ڪري رهي آهي هن چيو ته راءِ جي اظهار جي آزادي تي تاريخ جون بدترين پابنديون مڙهيل آهن نالائق حڪومت رڳو عمران نامو چاهي ٿي هن چيو ته ميڊيا تي تسدد ۽ صحافين سان بداخلاقي حڪومت جو خوف ۾ مبتلا ٿيڻ جو ثبوت آهي هن چيو ته سرڪاري آفيسرن ادارن ۽ ميڊيا تي تشدد ۽ حملا ڪرڻ عمران صاحب جي جماعت جي پراڻي عادل آهي هن چيو ته عمران صاحب پنهنجي تڪبر ۽ ڪوڙ جي سزا ميڊيا کي ڏيڻ سان حقيقت تبديل نه ٿيندي هن چيو ته سياسي قيدين جو هر ڪيس حڪومت جي ڪوڙ ۽ انتقام جو آئينو بڻجي چڪو اهي هن چيو ته ميڊيا تي تشدد ڪندڙ اهلڪارن جي خلاف ڪيس داخل ڪيو وڃي ۽ قانوني ڪارروائي ڪئي وڃي.