تازيون خبرون
هڪ سال ۾ پيٽروليم شين جي مد ۾ 206 ارب 28 ڪروڙ ٽئڪس اوڳاڙيو ويو: وفاقي سرڪار جو اعتراف - وزيراعظم چيف سيڪريٽري ۽ آئي جي سنڌ ذريعي متبادل نظام هلائڻ چاهي ٿو، ائين ٿيڻ نه ڏينداسين: سنڌ سرڪار - جسٽس (ر) الطاف ابراهيم قريشي وقتي چيف اليڪشن ڪمشنر ٿي ويو - ايشيائي ترقياتي بئنڪ پاڪستان لاءِ هڪ ارب 30 ڪروڙ ڊالرز جو قرض منظور ڪري ورتو - حڪومت جو ڪم واپار جي رستي ۾ آيل رنڊڪن کي ختم ڪري آسانيون پيدا ڪرڻ آهي: عمران خان - وزير اعظم ملڪ کي مضبوط ڪرڻ چاهي ٿو پر مخالف ڌر ڌيان هٽائڻ چاهي ٿي: فردوس عاشق - ملڪ رياض جي وارثن ۽ برطانوي حڪومت وچ ۾ نبيري مان مليل رقم سماجي بهبود لاءِ استعمال ڪئي ويندي: شهزاد اڪبر - وڏي وزير جي صدارت ۾ پبلڪ سيفٽي ڪميشن جو اجلاس، آءِ جي سنڌ جي عدم شرڪت تي ڪاوڙ جو اظهار، ٺهراءُ منظور - ڪراچي مان اغوا ٿيل دعا منگي بازياب نه ٿي، سنڌ جي مختلف شهرن ۾ احتجاجي مظاهرا، ريليون - اسلام ڪوٽ: مسافر ڪوچ موٽر سائيڪل کي بچائيندي ڪلٽي، واٽھڙو فوت، 3 عورتن سميت 7 ڄڻا زخمي

Daily Archives: October 3, 2019

سنڌ اسيمبلي ۾ صوبي جي ورهاڱي ۽ متحده جي بل خلاف ٺهراءَ منظور، اپوزيشن جو احتجاج، ڊائيس جو گهيراءُ

ڪراچي(م.ڊ) سنڌ اسيمبلي ۾ صوبن جي حدن ۾ ڦيرڦار ۽ سنڌ جي ورهاڱي خلاف ٺهراءُ اڪثريتي راءِ سان منظور ڪيو ويو آهي. پي ٽي آءِ ۽ ايم ڪيو ايم هڪ ڀيرو ٻيهر سنڌ دشمني جو ثبوت ڏيندي ٺهراءُ جي مخالفت ۾ ووٽ ڏئي ڇڏيو. سنڌ اسيمبلي جي اجلاس دوران پ پ ايم پي اي غلام قادر چانڊيو متحده طرفان صوبن جي حدن ۾ ڦيرڦار جا اختيار صوبائي اسيمبليز کان کسڻ واري بل خلاف ٺهراءُ پيش ڪيو. جنهن دوران اپوزيشن ميمبرز طرفان حڪومتي ميمبرز جي رويي خلاف احتجاج ۽ گوڙ ڪيو ويو. اپوزيشن ميمبرز اسپيڪر جي ڊائيس جو گهيراءُ ڪيو، جنهن تي اسپيڪر آغا سراج دوراني چيو ته ڇا توهان سنڌ جي خلاف آهيو؟ اسان مري وينداسين پر سنڌ جو ورهاڱو برداشت نه ڪنداسين. صوبائي وزير سعيد غني چيو ته متحده جو بِل رڳو نه پر سمورن صوبن خلاف سازش آهي، جيڪڏهن قومي اسيمبلي ۽ سينيٽ مان بل پاس ڪرائڻ جي ڪوشش ڪئي وئي ته ڀرپور ردعمل ڏيکارينداسين، سنڌ ڪنهن جي پيءُ جي جاگير نه آهي. متحده جو بِل ملڪ ۽ وفاق خلاف سازش آهي، اهڙي ترميمي بل کي ڪچري جي دٻي ۾ وجهڻ گهرجي، اسان هن ترميم خلاف هر حد تائين وينداسين.
اجلاس ۾ ايم پي اي نصرت سحر عباسي به جي ڊي اي طرفان ٺهراءُ پيش ڪيو، سندس چوڻ هو ته سندن جماعت ڪڏهن به سنڌ جي ورهاڱي خلاف ٺهراءُ جي مخالفت نه ڪئي آهي، پير پاڳاري واضح لفظن ۾ آرٽيڪل 149 جي مخالفت ڪئي، سندن پارٽي ته پيپلز پارٽي جي دور ۾ ٻٽي نظام خلاف به جدوجهد ڪئي هئي. جيستائين جي ڊي اي جو هڪ ميمبر به زنده آهي، سنڌ کي ڪوبه ورهائي نه سگهندو. سنڌ اسيمبلي جي اجلاس دوران پيپلز پارٽي ۽ جي ڊي اي جي ميمبرز سنڌ جي ورهاڱي ۽ متحده جي بل خلاف ٺهراءُ جي حمايت ۾ ووٽ ڏنو، جڏهن ته متحده ۽ پي ٽي آءِ ميمبرز ٺهراءُ جي مخالفت ۾ ووٽ ڏئي متحده جي بِل جي حمايت ڪئي. اُن کانسواءِ ايم ڪيو ايم ۽ پي ٽي آءِ جا ميمبرز واڪ آئوٽ ڪري ويا. واضح رهي ته ايم ڪيو ايم طرفان گذريل ڏينهن قومي اسيمبلي ۾ ترميمي بِل پيش ڪيو ويو، جنهن ۾ صوبائي حدن ۾ ڦيرڦار يا ورهاڱي جي حوالي سان صوبائي اسيمبليز کان اختيار کسڻ جي ڳالهه ڪئي وئي آهي. بِل ۾ آئين ۾ شامل اُها شَق ختم ڪرڻ جي تجويز ڏني وئي آهي، جنهن ۾ لکيل آهي ته ڪنهن به صوبي جي حدن ۾ ڦيرڦار جي حوالي سان جيڪڏهن قومي اسيمبلي ۽ سينيٽ ۾ بِل منظور ٿئي ٿو، ته صدر تيستائين اُن جي منظوري نه ڏيندو، جيستائين لاڳاپيل صوبي جي اسيمبلي 2 ڀاڱي 3 جي اڪثريت سان اُن جي منظوري نه ڏئي.

 

اسان اڃا تائين مارشل لا جي ذهنيت ۾ پيا رهون: سپريم ڪورٽ

اسلام آباد (ويب ڊيسڪ) سپريم ڪورٽ جي جج جسٽس قاضي فائز عيسيٰ چيو آهي ته اسان اڃا تائين مارشل لا جي ذهنيت ۾ رهي رهيا آهيون ۽ هر ڳالهه تي آرڊيننس جاري ڪرڻا آهن ته جمهوريت ڪهڙي ڪم جي. جسٽس مشير عالم جي سربراهي ۾ سپريم ڪورٽ جي ٽي رڪني بئنچ سپريم ڪورٽ بار هائوسنگ سوسائٽي بابت ڪيس جي ٻڌڻي ڪئي. جسٽس اعجاز الاحسن چيو ته ڇا هائوسنگ فائونڊيشن متاثرن کي رقم ڏيڻ لاءِ تيار آهي؟ جيڪڏهن هائوسنگ فائونڊيشن متاثرن سان رقم جو معاملو طئي ڪري ڇڏي ته عدالت فيصلو ڪندي، ظاهري طور اصل معاملو 600 ڪنال جي رقم جو آهي. هائوسنگ فائونڊيشن جي وڪيل چيو ته حڪومت هائونسگ فائونڊيشن بابت جولاءِ ۾ صدارتي آرڊيننس جاري ڪيو آهي، اڳ ئي گهڻيون ادائيگيون ٿي چڪيون آهن، هاڻ ممڪن ناهي. جسٽس قاضي فائز عيسيٰ ريمارڪس ڏنا ته اسان اڃا تائين مارشل لاءِ جي ذهنيت ۾ رهي رهيا آهيون، جولاءِ ۾ اهو آرڊيننس آيو ۽ اسيمبلي ۾ ان تي بحث به نه ڪرايو ويو، جيڪڏهن هر ڳالهه تي آرڊيننس جاري ڪرڻو آهي ته پوءِ جمهوريت ڪهڙي ڪم جي آهي، اسيمبلي ۾ ڪنهن بل تي بحث ناهي ڪرايو ويندو. سپريم ڪورٽ بار جي صدر امان الله ڪنراڻي چيو ته اسان هائونسگ فائونڊيشن کي رقم ادا ڪري چڪا آهيون، اسان جو معاملو آءِ 14 کان الڳ آهي، اسان جي معاملي کي ۽ ان معاملي کي عدالت ڌار ڌار ڏسي. عدالت ۾ ايف 14 بابت متاثرن ۽ هائوسنگ فائونڊيشن جا دليل مڪمل ٿي ويا، جنهن کانپوءِ ڪيس جي وڌيڪ ٻڌڻي سومر تائين ملتوي ڪئي وئي.

 

اپوزيشن جو هڪ ئي موقف آهي ته موجوده حڪومت گهر ڀيڙو ٿيڻ گهرجي: ن ليگ/جي يو آ ءِ(ف)

اسلام آباد (بيورو رپورٽ) مولانا فضل الرحمان آزادي مارچ جي تاريخ تبديل ڪرڻ جي حوالي سان نواز ليگ جي سفارشن تي مجلس عاملا سان مشورن بعد جواب ڏيڻ جي خاطري ڪرائي ڇڏي. احسن اقبال جي اڳواڻيءَ ۾ نواز ليگ جي وفد جي يو آءِ سربراهه مولانا فضل الرحمان سان ملاقات ڪئي، جنهن دوران نواز ليگ جي وفد طرفان پارٽي جي ڪور ڪميٽي جي فيصلي بابت فضل الرحمان کي آگاهه ڪيو. اُن کانسواءِ آزادي مارچ جي تاريخ تبديل ڪرڻ جي حوالي سان به صلاح مشورا ڪيا ويا. ملاقات بعد مولانا فضل الرحمان ۽ نواز ليگ جي وفد گڏيل طور ميڊيا سان ڳالهايون ڪيون. احسن اقبال چيو ته سندن جماعت مولانا فضل الرحمان جي ڌرڻي جي حمايت ڪري ٿي، سمورين اپوزيشن پارٽيز جو اِن معاملي تي هڪڙو ئي موقف آهي ته موجوده حڪومت ڌانڌلي جي نتيجي ۾ آئي آهي، اُن کي گهر ڀيڙو ٿيڻ گهرجي. ملڪ ۾ مهانگائيءَ جي طوفان سبب ڪاروبار بند ٿي رهيا آهن، موجوده صورتحال جو ڪارڻ اناڙي وزيراعظم آهي، ائين نه ٿئي جو حڪومت جون ناڪامين جو بار عسڪري قيادت کي به کڻڻو پوي. نواز ليگ اڳواڻ چيو ته مولانا فضل الرحمان آڏو ڳالهه رکي وئي آهي ته آزاد مارچ لاءِ ڪجهه وقت ڏنو وڃي ته جيئن منظم ٿي بهتر نتيجا حاصل ڪري سگهجن، مولانا فضل الرحمان چيو آهي ته هو مجلس عاملا اڳيان نواز ليگ جون سفارشون رکندو. اُن موقعي تي ڳالهائيندي مولانا فضل الرحمان چيو ته سڀني جو اتفاق آهي ته ملڪ اندروني طور ٻُڏي رهيو آهي، مهانگائيءَ جي ڪري عام ماڻهو صبح شام پريشان آهي، پاڪستان جي مذهب سڃاڻپ پڻ ختم ٿي رهي آهي.

 

سنڌ ۾ انتظامي يونٽ بڻايا پيا وڃن صوبي کي تقسيم ٿيڻ نه ڏينداسين: پيپلز پارٽي

ڪراچي (اين اين آءِ) سنڌ جي اطلاعات ۽ محنت واري کاتي جي صوبائي وزير سعيد غني چيو آهي ته سنڌ ۾ انتظامي يونٽ بڻايا پيا وڃن صوبي کي تقسيم ٿيڻ نه ڏينداسين ايم ڪيو ايم سنڌ جي صوبائي حد ۾ تبديلي جي خواهشمند آهي اهو ممڪن ئي ناهي ته صوبائي اسيمبلي جي مرضي بغير ايئن ڪيو وڃي. اهڙن خيالن جو اظهار هن سنڌ اسيمبلي ۾ ميڊيا ڪارنر تي صحافين سان ڳالهه ٻولهه ڪندي ڪيو. سعيد غني وڌيڪ چيو ته ايم ڪيو ايم الطاف حسين سان علحيدگي کانپوءِ به ان جي نظريات تي قائم آهي صرف الطاف حسين سان لاتعلقي واري اعلان تي ڪم نه هلندو هن چيو ته ايم ڪيو ايم جو اهو طريقو آهي پهريون سازش ڪندا آهن پوءِ چوندا آهن سنڌ اسان جي امڙ آهي ايم ڪيو ايم آرٽيڪل 239 جي آرٽيڪل 4 کي ڪڍڻ جو بل قومي اسيمبلي ۾ جمع ڪرايو آهي ايم ڪيو ايم سنڌ اسيمبلي ۾ پنهنجي غلط مقصد ۾ ناڪامي کانپوءِ قومي اسيمبلي ۾ اها ڪوشش ڪئي آهي ۽ پي ٽي آئي ان ترميم جي مخالفت ناهي ڪئي هاڻي اها ترميم سنڌ حڪومت کي موڪلي وئي آهي جنهن تي صوبائي ڪابينا اعتراض ۽ ناراضگي جو اظهار ڪيو آهي هن چيو ته ايم ڪيو ايم جي رڪن کي ان جو حق حاصل آهي پر پي ٽي آئي انهن جي حمايت ڇو ڪئي ۽ اتحادي به خاموش رهيا اها ترميم صوبائي اسيمبلي جو اختيار کسڻ جي سازش آهي ايم ڪيو ايم خراب راند کيڏي رهي آهي ۽ ملڪ خلاف سازشن ۾ مصروف آهي اها سازش سنڌ جي لاءِ نه پر ملڪ جي ٻين ننڍن صوبن لاءِ به آهي. هن چيو ته ان ترميم سان ملڪ ۾ بحران پيدا ٿيندو ۽ ننڍن صوبن ۾ احساس محرومي وڌندي، سنڌ هڪ آهي ۽ هڪ رهندي ۽ سنڌ جو هڪ هڪ ماڻهو ان کي رد ڪندو  ان خلاف وڙهندو ۽ مرندو پر اها سازس ڪامياب نه ٿيڻ ڏبي. هڪ سوال جي جواب ۾ هن چيو ته ايم ڪيو ايم سنڌ کي پنهنجي ماءُ سمجهندي آهي ته پوءِ ڇو ان کي ورهائڻ جي ڳالهه ڪندي آهي ايم ڪيو ايم جو اهو طريقو رهيو آهي ته وڙهايو ۽ حڪومت ڪيو. مشرف جي  دور کان وٺي اڄ تائين سنڌ کي ورهائڻ جي خواهش پنهنجي موت پاڻ مري ويندي. پي ٽي آئي جو پارلياماني معاملن وارو وزير انهن جو حامي ڪيئن ٿيو منهنجو سوال ان جماعتن سان به آهي جيڪي سنڌ جي تقسيم جي مخالفت ڪندا آهن پر اهي خاموش ڇو آهن هن چيو ته آئين ۾ طريقو موجود آهي پر صوبائي اسيمبلي کان ان جو حق ڇو کسيو پيو وڃي. اطلاعات ۽ محنت واري صوبائي وزير سعيد غني پيٽرول جا اگهه گهٽ نه ڪرڻ تي وفاق جي مذمت ڪئي اوگرا عالمي مارڪيٽ تحت پيٽرول جي اگهن ۾ گهٽتائي جي سفارش ڪئي هئي پر اوگرا جي سفارشن تي عمل نه ڪيو ويو جڏهن ته اسد عمر ٻيا وزير ۽ عمران خان پاڻ پيٽرول ليوي ۾ گهٽتائي جي ڳالهه ڪندا هئا جيڪا ليوي 8 کان 9 رپيا هجڻ کپي اها 15 رپيا ورتي پئي وڃي جڏهن ته بجلي جي اگهن ۾ به اضافو ڪيو ويو آهي جنهن سان حڪومت عوام کان 53 ارب رپيا ساليانو وصول ڪندي هن چيو ته گيس جي اگهن ۾ وڌيڪ اضافي جي به تياري ڪئي اٿن سعيد غني چيو ته وفاقي حڪومت جي اپائڻ ڪارڻ ملڪ جي معيشيت کي تباهه ڪيو ويو آهي ۽ ملڪ ۾ مهانگائي جو طوفان آهي ماڻهو ڏينهون ڏينهن بيروزگار ٿي رهيا آهن ۽ انهن کي سخت ڳڻتي آهي.

 

ملڪ ۾ 3 قسمن جا تعليمي نصاب هلي رهيا آهن، تعليم جو هڪجهڙو نصاب ترقي لاءِ ضروري آهي: وزيراعظم

اسلام آباد (اين اين آءِ) وزيراعظم عمران خان چيو آهي ته ملڪ ۾ 3 قسمن جو تعليمي نصاب هلي رهيو آهي، هڪجهڙو تعليمي نصاب ترقي لاءِ ضروري آهي، هاڻوڪي تعليمي نظام سبب اڪثريت مٿي نٿي اچي سگهي، طبقاتي تعليم جو نظام ختم ڪنداسين، مدرسن جي کتابين کي به جديد تعليم ذريعي مٿي اچڻ جو موقعو ملندو، پاڪستان، ترڪي ۽ ملائيشيا مسلمانن جي تاريخ ۽ موقف دنيا اڳيان پيش ڪرڻ لاءِ ٽي وي چينل شروع ڪندا، هو اربع تي تعليم جي وزارت جي انتظام هيٺ ديني مدرسن جي کتابين ۾ انعام ورهائڻ واري تقريب کي خطاب ڪري رهيو هو، ان موقعي تي شفقت محمود، نور الحق قادري، سيد اعجاز شاهه ۽ نعيم الحق موجود هو، وزيراعظم چيو ته نبي اڪرم صلم سڀ کان وڌيڪ تعليم حاصل ڪرڻ تي زور ڀريو، نبي ڪريم صلم فرمايو ته تعليم حاصل ڪريو پوءِ ڇو نه توهان کي چين وڃڻو پوي، ڇو ته پاڻ سڳورا ڄاڻيندا هئا ته تعليم کانسواءِ معاشرو ترقي نٿو ڪري سگهي، 70 سالن تائين دنيا جا مشهور سائنسدان مسلمان هئا، مسلمان تلوار سان نه پر علم سان ترقي ڪئي، هن چيو ته انگريزن هڪ منصوبي تحت مسلمانن جو تعليمي نصاب ختم ڪيو، تعليم ختم ٿي ته مسلمان ترقي نه ڪري سگهيو، هن وقت اسان جي ملڪ ۾ 3 قسمن جو مختلف نصاب هلي رهيو آهي، تحريڪ انصاف جي حڪومت فيصلو ڪيو آهي ته تعليم جي طبقاتي نظام کي ختم ڪيو ويندو، هڪ ئي ملڪ ۾ ٽن قسمن جو تعليمي نصاب وڏي ناانصافي آهي، ديني مدرسن جي کتابين کي ديني تعليم سان گڏ جديد دور جي تعليم حاصل ڪرڻي پوندي ته جيئن اهي به وڏن عهدن تي اچي سگهن ڇو ته هن وقت رڳو انگريزي تعليم جو نظام حاصل ڪندڙ ئي مٿي وڃي سگهي ٿو، هن چيو ته علامه اقبال اوڀر ۽ اولهه جي تهذيبن ۾ ڀيٽ ڪئي، تعليم جي وزير کي چوندس ته اسان جي تعليمي ادارن ۾ اقباليات جو مضمون لازمي پڙهايو وڃي ڇو ته اسان جو سياسي رول ماڊل قائد اعظم ۽ نظرياتي رول ماڊل علامه اقبال آهي، علامه اقبال کي سمجهڻ سان اهو پتو پوي ٿو ته مسلمانن جي تاريخ ۽ طاقت هئي، اهي دنيا تي ڪيئن ڇائنجي ويا، هن چيو ته اڄ هر هنڌ مسلمانن تي ظلم ٿي رهيو آهي، والاريل ڪشمير ۾ 80 لک ماڻهو کليل جيل ۾ بند آهن، ڪوشش آهي ته تعليم جي نظام ۾ هڪجهڙائي آڻي تحقيق جو رستو تيار ڪريون، هڪجهڙي تعليم لاءِ ڪميٽي جوڙي وئي آهي ته جئين نوجوان نسل اعليٰ ڪارڪردگي ڏيکاري سگهي، هن چيو ته ترڪي، پاڪستان ۽ ملائيشيا الجزيره ۽ بي بي سي وانگر ٽي وي چينل شروع ڪرڻ جو فيصلو ڪيو آهي، هن چينل جو مقصد مسلمانن جي نمائندگي ۽ دنيا اڳيان مسلمانن جو موقف پيش ڪرڻ آهي، هن چيو ته اسان اهڙيون فلمون ٺاهڻ چاهيون ٿا جن ذريعي اسان جي ٻارن کي پنهنجي هيروز جي خبر پوي، ترڪي سلطنت عثمانيا جي تاريخ جي آگاهي لاءِ اهڙي قسم جي هڪ فلم ٺاهي آهي، ان کان اڳ وزيراعظم مختلف امتحانن ۾ خاص ڪارڪردگي ڏيکاريندڙ ديني مدرسن جي شاگردن ۾ انعام ورهايا.

 

وفاقي حڪومت زلزلي متاثرن کي ٿيل نقصان جي برابر معاوضو ادا ڪري:بلاول ڀٽو جو مطالبو

ميرپور (ويب ڊيسڪ) پ پ چيئرمين بلاول ڀٽو زرداري سوال اٿاريندي چيو آهي ته وزيراعظم عمران خان ڪشميرين لاءِ ڪهڙو غير معمولي ڪم ڪيو آهي. بلاول ڀٽو زرداري ميرپور، آزاد ڪشمير ۾ زلزلي سبب متاثر علائقي جي دوري کانپوءِ صحافين سان ڳالهائيندي چيو ته وفاق جي ذميواري آهي ته عوام جو خيال رکي ۽ اسان سڀ ان لاءِ آواز اٿارينداسين، اسان متاثر سان يڪجهتي جي اظهار لاءِ هتي آيا آهيون، سنڌ حڪومت رليز لاءِ ڪئمپس ۽ ٻيون ضروري شيون موڪليون آهن ۽ متاثر ماڻهن جي ٿراپي لاءِ سنڌ جون اسپتالون ڪم ڪرڻ لاءِ تيار آهن. هن مطالبو ڪندي چيو ته وفاقي حڪومت زلزلي متاثرن کي ٿيل نقصان جي برابر معاوضو ادا ڪري. سندس وڌيڪ چوڻ هو 50 کان وڌيڪ ڏينهن کان والاريل ڪشمير ۾ قيد اسان جي ڀائرن ۽ ڀينرن تي ڀارتي ظلم جي مذمت ڪيون ٿا، ڪشميرين کي بنيادي حق ڏيارڻ لاءِ جدوجهد ڪنداسين، والاريل ڪشمير جي عوام تي تاريخي حملو ٿيو آهي، ان تي پاڪستان جيڪو به ڪري اهو گهٽ آهي، اسان کي انهن سان يڪجهتي جي اظهار لاءِ هر ممڪن ڪم ڪرڻ گهرجي. بلاول ڀٽو زرداري چيو ته وزيراعظم جي تقرير سٺي ٿي سگهي ٿي پر ان کي والاريل ڪشمير جي مسئلي تي وڌيڪ زور ڏيڻ گهرجي ها، عمران خان گڏيل قومن ۾ بيٺو هو ۽ کيس انهن جي ٺهرائن موجب والاريل ڪشمير جي عوام جي جمهوري حقن لاءِ ڳالهائڻ گهرجي ها. هڪ سوال جي جواب ۾ هن چيو ته قومي اسيمبلي ۾ اپوزيشن ۽ پيپلز پارٽي گڏيل اجلاس جو مطالبو ڪيو هو ته جيئن اسان ان مسئلي کي اٿاري سگهون پر بدقسمتي سان جهڙي ريت حڪومت اجلاس گهرايو، ان ۾ پرڏيهي وزير ئي موجود نه هو ۽ ويراعظم پارليامينٽ جي فلور تي سوال ڪري رهيو هو ته مان ڇا ڪيان، گڏيل قومن ۾ تقرير ته هر سال ٿيندي آهي پر عمران خان ڪهڙو غير معمولي ڪم ڪيو آهي؟ پ پ چيئرمين چيو ته والاريل ڪشمير جو عوام پاڪستان ڏانهن ڏسي رهيو آهي ۽ عمران خان اپوزيشن کي فتح ڪرڻ ۾ رڌل آهي. مولانا فضل الرحمان جي ڌرڻي ۾ شرڪت کان انڪار جي فيصلي بابت پڇيل سوال جو جواب ڏيندي بلاول ڀٽو زرداري چيو ته پ پ ڌرڻي جي سياست جي مخالف آهي، جڏهن ته مولانا صاحب جي ڌرڻي جي اخلاقي ۽ سياسي حمايت جو اعلان ڪيو آهي، جلد مولانا صاحب سان ملاقات ڪندس.

 

نيپرا بجلي جي قيمت ۾ في يونٽ هڪ روپيو 66 پئسن جي واڌ ڪري ڇڏي

اسلام آباد(م.ڊ)  نيشنل اليڪٽرڪ پاور ريگيوليٽري اٿارٽي نيپرا بجلي جي قيمتن ۾ هڪ روپيو 66 پئسا في يونٽ اضافي  جي منظوري ڏئي ڇڏي آهي. نيپرا پاران جاري ڪيل  بيان موجب اضافو هڪ مهيني جي لاءِ آگسٽ جي فيول ايڊجسٽمينٽ جي مد ۾ ڪيو ويو آهي جنهن سان صارفين تي 22 ارب 60 ڪروڙ جو اضافو  پوندو. نيپرا جي آفيسر موجب گيس ۽ آر ايل اين جي نيپرا جي ريفرنس قيمت کان وڌيڪ آهن. هن چيو ته جيڪڏهن ڪوئلي مان بهتر صلاحيت وارا پلانٽس هلايا وڃن ته 3.4 ارب جي بچت ڪري سگهجي ٿي. سي پي پي اي موجب آگسٽ ۾ پاڻي مان 40.33 سيڪڙو ۽ ڪوئلي مان 13.34 سيڪڙو بجلي پيدا ڪئي وئي. اهڙي طرح مقامي گيس مان 11.87 سيڪڙو ۽  درآمدي ايل اين جي مان 22.89  سيڪڙو بجلي پيدا ڪئي وئي. سي پي پي اي ٻڌايو ته فرنس آئل مان 3.60 سيڪڙو ۽ ايٽمي ذريعن مان 4.66 سيڪڙو بجلي پيدا ڪئي وئي آهي

 

سنڌ صوفين ۽ درويشن جي ڌرتي آهي، حڪومت 4 پابندي پيل تنظيمن جون ملڪيتون ضبط ڪيون: مراد علي شاهه

ڪراچي (اسٽاف رپورٽر)سنڌ جي وڏي وزير سيد مراد علي شاهه چيو آهي ته کيس حڪومت چئن ڪالعدم تنظيمن جي يو اين ايس سي ايڪٽ 1948 ۽ يو اين ايس سي فريزنگ اينڊ سيزيور آرڊر 2019 تحت 65 املاڪ ضبط ڪيون آهن. هن اها ڳالهه اڄ کيس حڪومت پاران دهشتگردي فنانسنگ  کي روڪڻ بابت کنيل اُپاءُ جي سلسلي ۾ آمريڪي وفد سان خيالن جي ڏي وٺي ڪندي چئي. وفد يو ايس ڪانگريس ۾ جم هائمز، سين پيٽرڪ ميلوني، يو ايس ڪانگريس مين ۽ ممبر هائوس پرماننٽ سليڪٽ ڪميٽي آن انٽيليجينس، آمريڪي قونصل جنرل روبرٽ سلبراسٽين ، ڊپٽي قونصل جنرل مسٽر ڊيرين ارڪي، مس ايمنڊا روگرس ٿرپي، مسٽر ايرون ٿرمين، مس ليزا ميجر، مسٽر نيل فلپس ۽ صالح شاهه تي ٻڌل هئا. وڏي وزير جي معاونت سيڪريٽري داخله قاضي ڪبير ۽ وڏي وزير جي پرنسپل سيڪريٽري ساجد جمال ابڙو ڪئي.  وڏي وزير چيو ته يو اين ايس سي ايڪٽ 1948 ۽ يو اين ايس سي فريزنگ اينڊ سيزيور آرڊر 2019 تحت جماعت الداوا، فلاح انسانيت فائونڊيشن ۽ جيش محمد جا 59 املاڪ ۽ تحريڪ طالبان افغانستان جا 6 املاڪ ضبط ڪيا آهن. مراد علي شاهه چيو ته سنڌ صوفين ۽ درويشن جي سرزمين آهي. ۽ هتان جا رهواسي ڀائيچاري ۽ محبت سان رهن ٿا ان ڪري ڪنهن به ڪالعدم تنظيم يا اداري جو هتي موجودگي نٿي ٿي سگهي ان ڪري يو اين سينڪشن ريجائم 1267 ۽ 1373 بابت ڪنهن به انفرادي قانوني ڪارروائي يا گرفتاري نه ٿي آهي. دهشتگردي فنانسنگ جا ڪيسز بابت ڳالهائيندي مراد علي شاهه چيو ته 47 (دهشتگردي فنانسنگ) جا ڪيس رجسٽر ٿيا آهن ۽ جنهن جو سنڌ پوليس جو دهشتگردي ٽوڙ کاتو جانچ ڪري رهيو آهي.  صوبائي داخله کاتو اسٽيٽ بينڪ آف پاڪستان ، فنانشل مانيٽرنگ يونٽ جي ميمبرن تي ٻڌل جي آئي ٽي ميمبر جي ڪميٽي جوڙي وئي آهي.

نان پرافٽ آرگنائزيشن (اين پي اوز) بابت ڳالهائيندي وڏي وزير چيو ته 527 يا 11.5 سيڪڙو سڀني فعال اين پي اوز جو سروي ڪيو ويو ۽ کيس دهشتگردي فناننسنگ بابت ڪردار جو احاطو ڪيو ويو. سروي ڊيٽا وزارت داخله حڪومت پاڪستان سان پڻ شيئر ڪيو ويو. هن چيو ته 4693 غير فعال يا غير موثر اين پي اوز کي ڊي-رجسٽر ڪيو ويو جڏهن ته وڌيڪ 2828 غير فعال اين ٽي اوز جي ڊي-رجسٽريشن سماجي ڀلائي واري کاتي پاران عمل هيٺ آهن. هن چيو ته آئون هي چوڻ چاهيان ٿو ته 1613 اين پي اوز صنعت ۽ تجارت کاتي ۾ رجسٽر آهن جنهن جي پهرين مرحلي ۾ ڊي-رجسٽريشن جو عمل هلندڙ آهي. مراد علي شاهه چيو ته سنڌ ۾ 25426 اين پي اوز رجسٽر آهن جنهن مان 14834 صنعت کاتي ۽ 10592 اين پي اوز سماجي ڀلائي کاتي ۾ رجسٽر آهن. وڏي وزير ٻڌايو ته سنڌ ۾ 19 اين پي اوز جانچ هيٺ آهن جنهن ۾ 14 اين پي اوز ڪالعدم تنظيمن سان سلهاڙيل آهن جنهن ۾ جي يو ڊي، ايف آئي ايف ۽ جي اي ايم شامل آهن. جڏهن ته 5 اين پي اوز جي پڻ دهشتگردي فنانسنگ بابت جانچ ٿي رهي آهي. هن چيو ته سنڌ چيئرٽيز ايڪٽ 2019 جي قانون جي سنڌ ۾ لاڳو کانپوءِ غير رجسٽر اين پي اوز خلاف ڪارروائي شروع ڪئي ويندي. هن چيو ته ڊرافٽ قانون جي صوبائي ڪابينا جي ميمبرن منظوري ڏني آهي. وڏي وزير چيو ته مختلف پاليسين مثال طور اين پي اوز جي رجسٽريشن ۽ کلون گڏ ڪرڻ بابت ضابطه اخلاق جاري ڪيو ويندو آهي ۽ دهشتگردي فنانسنگ بابت معاملن لاءِ ان تي عملدرآمد کي يقيني بڻايو ويندو آهي. اينٽي مني لانڊر بابت سنڌ حڪومت پاران ڪيل ڪارروائي بابت ڳالهائيندي مراد علي شاهه چيو ته هن سيڪريٽري داخله تحت اينٽي مني لانڊرنگ تي هڪ ٽاسڪ فورس جوڙي آهي . ٽاسڪ فورس کي هدايت ڪئي وئي آهي ته هو اسٽيڪ هولڊرز مثال طور پاڪستان ڪسٽم، ايئرپورٽ سيڪيورٽي فورس ۽ وفاقي تحقيقاتي ايجنسي (ايف آئي اي) سان اهم ايئرپورٽ تي ڪرنسي ڊيٽيڪشن يونٽن جي قيام لاءِ ڳالهائي ۽ ڪرنسي اسمگلنگ جو پتو لڳائي. وڏي وزير چيو ته سرڪاري اهلڪارن جي استعدادڪار ۾ واڌ لاءِ لاڳاپيل اسٽيڪ هولڊرن سميت ڊپٽي ڪمشنر، لاڳاپيل کاتن جا سيڪريٽريز ۽ ايجنسيز سان سيمينار ۽ ورڪشاپس ڪوٺايا ويندا آهن ته جيئن يو اين ايس سي جي حڪومتي منظورين بابت وضاحت ڪئي ويندي آهي ۽ شرڪت ڪندڙن سان لاڳاپيل ڄاڻ/رهنمائي شيئر ڪئي ويندي آهي. دوري تي ايندڙ وفد دهشتگردي فنانسنگ کي ڪنٽرول ڪرڻ بابت حڪومتي ڪاوشن جي واکاڻ ڪئي.

 

سنڌ سرڪار ۽ آءِ جي ۾ ٻيهر تڪرار، ڪال اٽينڊ نه ڪرڻ تان پڇاڻو، ڪليم امام وزيراعليٰ هائوس طلب

ڪراچي(م.ڊ) سنڌ سرڪار ۽ آءِ جي پوليس ۾ پوليس اختيارن جي معاملي تان ٻيهر تڪرار، فون ڪال اٽينڊ نه ڪرڻ تان سرڪار طرفان ڪليم امام کان خط لکي پڇاڻو، وڏي وزير آءِ جي کي وزيراعليٰ هائوس طلب ڪري ورتو، ان ڏس ۾ صوبائي صلاحڪار مرتضيٰ وهاب چيو آهي ته آءِ جي کي ڪابينا اجلاس ۾ گھرايو سين پر هو اتي به نه آيو. ان ڏس ۾ مليل ڄاڻ موجب نئون پوليس آرڊر سنڌ اسيمبلي مان منظور ٿيڻ باوجود آءِ جي پوليس ۽ صوبائي حڪومت وچ ۾ هڪ ڀيرو ٻيهر اختيارن واري معاملي تان تڪرار پيدا ٿي ويو، قابل اعتماد ذريعن موجب آءِ جي ڊاڪٽر ڪليم امام سرڪار جي مرضي تحت آفيسرن جون مقرريون ۽ بدليون ته نه ڪيون پر هن سنڌ حڪومت جي وزيرن ۽ ترجمان جي ڪال به اٽينڊ ڪرڻ ڇڏي ڏني آهي، جنهن تي حڪمرانن سخت ناراضگي جو اظهار ڪيو. حڪومتي ذريعن موجب سنڌ سرڪار جي ترجمان مرتضيٰ وهاب آءِ جي سنڌ کي هڪ خط اماڻي کانئس ڪال اٽينڊ نه ڪرڻ توڙي حڪم نه مڃڻ تي پڇاڻو ڪيو. خط ۾ آءِ جي سنڌ کي مخاطب ٿيندي چيو ويو ته هٿيارن جي خريداري ۽ سيپرا رولز متعلق اوهان کان راءِ معلوم ڪرڻ لاءِ ڪال ڪئي پر اوهان ڪال اٽينڊ نه ڪئي، محرم دوران سيڪيورٽي معاملن بابت اوهان کان ڪجهه پڇڻو هو پر اوهان ڪال اٽينڊ نه ڪئي، اوهان کي ڪافي دفعا ڪال ڪئي پر اوهان ڪو به رسپانس نه ڏنو، جنهن تي افسوس ٿيو آهي. خط ۾ ڄاڻايو ويو ته آءِ جي آفيس جي سجاوٽ تي ڪيترو خرچ آيو؟ قانون تحت 25 هزار کان وڌيڪ خرچ ڪرڻ تي گھرو کاتي کان اجازت وٺڻي پوندي آهي، اوهان آفيس جي مرمتي ڪم تي ڪيترو خرچ ڪيو؟، ڇا اوهان گھرو کاتي کان منظوري ورتي آهي؟ خط ۾ آءِ جي آفيس تي ٿيل خرچ ۽ ٻين معاملن تي آءِ جي کان جواب گھريو ويو آهي. هوڏانهن وڏي وزير سيد مراد علي شاهه ڊاڪٽر ڪليم امام کي وزيراعليٰ هائوس طلب ڪيو. جنهن تي ڊاڪٽر ڪليم امام وزيراعليٰ پهچي وڏي وزير سان ملاقات ڪئي. ذريعن موجب وڏي وزير آفيسرن جي مقررين ۽ بدلين جي معاملي تان سنڌ حڪومت جا حڪم نه مڃڻ تي آءِ جي کان پڇاڻو ڪيو، وڏي وزير ڊاڪٽر ڪليم امام کان اهو به پڇيو ته ڪابينه ميمبرن ۽ ترجمان جي ڪال اٽينڊ ڇو نٿي ڪئي وڃي؟. ذريعن موجب ملاقات دوران پوليس جي انتظامي ۽ سيڪيورٽي معاملن تي به ڳالهه ٻولهه ڪئي وئي. ٻئي طرف سنڌ حڪومت جي ترجمان مرتضيٰ وهاب ميڊيا کي ٻڌايو ته سنڌ پوليس صوبائي حڪومت جو ماتحت ادارو آهي، پوليس ۽ حڪومت ۾ ڪي به اختلاف ناهن. مرتضيٰ وهاب جتي اختلافن جي ترديد ڪئي، اتي هن اهو به چيو ته سنڌ پوليس جا آفيسر حڪومت ۽ قانون جي ماتحت آهن، وڏووزير پنهنجي ماتحت آفيسر(آءِ جي) کي نه گھرائيندو ته ڪنهن کي گھرائيندو؟ هن چيو ته آءِ جي جو ڪم قانونسازي ڪرڻ ناهي، ا هو آءِ جي جو اختيار ئي ناهي، قانونسازي ڪرڻ حڪومت جو ڪم آهي، سنڌ پوليس جي آفيسرن جي مقررين ۽ بدلين جا حڪم جاري ٿي چڪا آهن، سندن مقرريون ۽ بدليون ٿي ويون آهن

 

ڪاٺوڙ ويجهو موٽر وي تي تيز رفتار ٽرالر جو ڪار کي ٽڪر، 3 ڄڻا فوت، هڪ عورت ۽ ٻارڙو شديد زخمي

ملير ( رپورٽر) ڪاٺوڙ ويجهو موٽر وي تي تيز رفتار ٽرالر جي ٽڪر ۾ 3 ڄڻا فوت ٿي ويا، هڪ عورت ۽ ٻارڙو شديد زخمي، موٽر وي ايم نائين ڪاٺوڙ تي حيدرآباد کان ڪراچي ايندڙ ٽرالر ڪار کي ٽڪر هنيو، 18 ورهين جو ساگر پٽ شاهد، امبرون پٽ مبرون ۽ 25 ورهين جو فاروق فوت ٿي ويا، هڪ عورت شاهد ۽ ھڪ ٻارڙو زخمي ٿي پيا، ڪار سوار حيدرآباد کان ڪراچي طرف ايندي خراب ٿيل ڪار کي ڌڪو ڏيندي ٽرالر جو شڪار ٿي ويا، فوتين جا لاش پوسٽ مارٽم ۽ زخمين کي علاج لاءِ عباسي شھيد اسپتال منتقل ڪيو ويو، جتي سندن حالت ڳڻتي جوڳي ٻڌائي پئي وڃي.