تازيون خبرون
حڪومت جي يو آءِ سان ڳالهين لاءِ راضي، مولانا وزير اعظم جي استعيفيٰ جو شرط رکي ڇڏيو - اهي ماڻهو ضد تي آهن ته آئين ٽوڙيو وڃي، آئين جي ابتڙ ڪوبه ڪم ٿيڻ نه ڏينداسين: مراد علي شاهه - غريبن جي پئسن مان بنگلا ٺهرائيندڙن لاءِ 4-5 ڪروڙ رُپيا جمع ڪرائڻ ڪو مسئلو نه آهي: عدالت - موري  ڀرسان بس ڪلٽي، 6 ڄڻا فوت، 35  زخمي - مسلم امت جو گڏيل اتحاد ۽ اتفاق خطي ۾ امن ۽ معاشي استحقام جو ضامن آهي: فردوس عاشق اعواڻ - شاهي جوڙي جو چترال پهچڻ تي شاندار استقبال، روايتي ٽوپي پهرائي ويئي - مون کي يقين آهي ته ڌرڻو نه هنيو ويندو، سولائي سان ڌرڻي جي اجازت نه ملندي: شيخ رشيد - پ پ چونڊن دوران ڪيل واعدا پاڙي رهي آهي، صحافين جي جان مال جي تحفط  لاءِ  قانون جوڙي رهيا  آهيون: سعيد غني - حمزه شهباز کي ميڊيا سان ڳالهائڻ کان روڪڻ ۽ صحافين تي تشدد جي مذمت، ملڪ تي عمران سوچ مڙهيل آهي:مريم اورنگزيب - نيب انور مجيد سوڌو ٻين جوابدارن خلاف ريفرنس داخل ڪرڻ ۽ ايس بي سي اي ۽ ڪي ايم سي خلاف جاچ جي منظوري ڏئي ڇڏي

Daily Archives: September 18, 2019

وفاقي ڪابينا اجلاس: مريم نواز بابت اليڪشن ڪميشن جو فيصلو چئلينج ڪرڻ جو اعلان يو ويندو

اسلام آباد (ويب ڊيسڪ) اطلاعات ۽ نشريات بابت وزيراعظم عمران خان جي خاص مددگار فردوس عاشق اعواڻ چيو آهي ته وفاقي ڪابينا بنا نالي ايڪٽ تحت خاص بئنچ جوڙڻ جي منظوري ڏئي ڇڏي. اسلام آباد ۾ وفاقي ڪابينا جي اجلاس کانپوءِ بريفنگ ڏيندي فردوس عاشق اعواڻ ٻڌايو ته اجلاس ۾ 16 نڪاتي ايجنڊا تي غور ڪيو ويو، بنا نالي ايڪٽ تحت ڪيس خاص بئنچن کي موڪليا ويندا. هن چيو ته اجلاس ۾ وزيراعظم آمريڪا جي دوري جي حوالي سان ڪابينا کي اعتماد ۾ ورتو، هو ڪشميرين جو سفير بڻجي آمريڪا وڃي رهيو آهي ۽ هن خطي جي پرامن ماحول کي خراب ڪرڻ جي ڪوشش تي ڳڻتيءَ جو اظهار ڪيو. سندس چوڻ هو ته ميڊيا رياست جو چوٿون ٿنڀ آهي ۽ وزيراعظم ميڊيا جي آزادي تي يقين رکي ٿو، تنهن ڪري حڪومت ”اسپيشل ميڊيا ٽربيونل“ ٺاهيندي، جنهن ۾ حڪومت سميت سمورن اسٽيڪ هولڊرن جو احتساب ٿي سگهندو، ٽربيونل کي اختيار حاصل هوندو ته شڪايت تي منهنجو، توهان جو ۽ صحافتي ادارن جي مالڪن سميت سمورن اسٽيڪ هولڊرن جو احتساب ڪري سگهي. فردوس عاشق اعواڻ موجب شڪايت پيمرا جي ”شڪايت ڪائونسل“ مان نڪري ميڊيا ٽربيونل ۾ منتقل ٿي ويندي، ميڊيا ٽربيونل نين ۽ ٻڌڻي هيٺ شڪايتن يا ڪيسن جو جائزو وٺندو، اسپيشل ميڊيا ٽربيونل جي سرپرستي اعليٰ عدليا ڪندي ۽ ٽربيونل 90 ڏينهن اندر شڪايت جو ازالو ڪندو. هن وڌيڪ چيو ته ڪابينا ن ليگ اڳواڻ مريم نواز بابت اليڪشن ڪميشن جي فيصلي کي چئلينج ڪرڻ جو فيصلو ڪيو آهي.

 

ڪراچي ۾ ڪچري جي سياست پئي ٿئي، علي زيدي مسئلا وڌايا، وفاق مداخلت بند ڪري: مراد علي شاهه

ڪراچي (اسٽاف رپورٽر) سنڌ جي وڏي وزير سيد مراد علي شاھھ چيو آھي تھ ڪراچي ۾ ڪچري جي سياست وڌندي پئي وڃي. قانون موجب شهر جي صفائي ۽ ڪچرو کڻڻ جو ڪم ڊي ايم سيز جڏهن ته نالن جي صفائي جو ڪم ڪي ايم سي جو آهي. هن چيو ته ڊپٽي ڪمشنرن کي ضلعي جي حساب سان ڪچرو کڻڻ جو ڪم حوالي ڪندي چيو آهي ته جتي به ڪچرو آهي انهن جون تصويرون ڪڍندي ٻڌايو وڃي ته ڪچرو گڏ ڪرڻ جا ڪيترا دڳ آهن ۽ علائقن بابت تفصيلي ڄاڻ به جمعي ڪرائي وڃي ۽ ان کانپوءِ جامع رٿابندي سان صفائي جو عمل شروع ڪيو وڃي ۽ اها ڳالهه واضح ڪئي وڃي ته صفائي جي ڪم ۾ ڪيترا ڏينهن لڳندا؟ اهڙن خيالن جو اظهار هن اڄ مقامي هوٽل ۾ سنڌ اسٽريٽيجي پلان جي افتتاحي تقريب ۾ شرڪت کانپوءِ ميڊيا سان ڳالهائيندي ڪيو. هن چيو ته ڊي ايم سيز سنڌ سالڊ ويسٽ مينجمينٽ کي درخواست ڪئي ته هو کين علائقن جو ڪچرو کڻي. هن چيو ته اسان سنڌ سالڊ ويسٽ مينجمينٽ قائم ڪئي آهي. ڊي ايم سيز جون چونڊون ٿي وڃن ان کانپوءِ جيڪڏهن اهي ڪونسلز  چاهيندا ته سنڌ سالڊ ويسٽ مينجمينٽ ڪچرو کڻندي. سنڌ سالڊ ويسٽ مينجمينٽ ڪراچي جي ڏکڻ ضلعي ۾ پهرين ڪم شروع ڪيو آهي. چونڊن وارن ڏينهن ۾ اهو ڪم ڪجهه سست ٿي ويو هو. ڏکڻ ۽ مشرقي ضلعن ۾ سنڌ سالڊ ويسٽ مينجمينٽ ڪجهه بهتر ڪم ڪري رهي آهي. اسان جي ٻين ادارن جي علائقن ۾ جيڪڏهن ڏٺو وڇي ته اتي به ڪچرو پيل آهي، اهو به سنڌ حڪومت جي کاتي ۾ وڌو ويو. وڏي وزير چيو ته وفاقي حڪومت چيو هو ته هو ڪچرو نالن مان کڻندي. انهن اهو ڪچرو نالن مان ڪڍي کليل جاءِ تي ڦِٽو ڪيو ۽ ان کي لينڊفل سائيٽ تي نه کڻي ويا. مون وفاقي وزير علي زيدي سان پاڻ ڳالهايو هو ته ڪچرو لينڊ فل سائيٽ تي ڦِٽو ڪجي پر ان ڳالهه تي عمل نه ڪيو ويو جنهن سان مسئلا وڌيا ۽ شهر ۾ مکيون ۽ مڇرن جي ڀرمار ٿي. هنچيو ته اسان 21 سيپٽمبر کان خاص مهم ذريعي ڪچرو کڻڻ شروع ڪنداسين. آئون علي زيدي کي درخواست ڪندس ته هو 21 سيپٽمبر کان 21 آڪٽوبر تائين ڪراچي ۾ پنهنجي مهم بند ڪري. اسان ڪچرو کڻندي سمورن علائقن کي صاف سٿرو ڪري ڏيکارينداسين. هن چيو ته وفاقي حڪومت ملڪ اندر موجوده مالي مسئلن جو تدارڪ ڪري ته بهتر ٿيندو. هڪ سوال جي جواب ۾ هن چيو ته مونکي نيب جو نوٽيس گذريل ڏينهن مليو هو. نوٽيس بابت جڏهن ڳالهه ٻولهه ٿي ته هن چيو ته سوالنامو گهرائي وٺو. هن چيو ته هو جڏهن ڏسندو ته کيس خبر پوندي ته اهي ڇا بابت آهن؟ هن چيو ته 149 ته پري جي ڳالهه آهي پر هو ڪابه ڪميٽي سنڌ جي ايگزيڪٽو اٿارٽي جي راضپي کانسواءِ ٺاهين ٿا ته اهو آئين جي آرٽيڪل 97 جي ڀڃڪڙي آهي. هن چيو ته آئون وفاقي حڪومت کي چوان ٿو ته اوهان آئين تي عمل ڪندي پنهنجو ڪم ڪيو، ٻين صوبن جي معاملن ۾ مداخلت نه ڪريو. هن چيو ته آئي بي اي پاس استادن کي 2016 ۾ مقرر ڪيا ويا هئا ۽ انهن کي چيو ويو آهي ته اوهان سنڌ پبلڪ سروس ڪميشن ۾ پيش ٿيو. جنهن تي پاس ٿي آيا آهيو اها 17 گريڊ جي پوسٽ آهي جيڪا ايس پي ايس سي کانسواءِ پُر نٿي ٿي سگهي. پرامن احتجاج ڪوبه ڪري ٿو ته ان کي اسان نٿا جهليون. مندر ٽوڙڻ بابت پڇيل سوال بابت وڏي وزير چيو ته آئون اهڙن غيراخلاقي حرڪتن جي سخت لفظن ۾ مذمت ڪريان ٿو. ان کان پهرين تقريب کي خطاب ڪندي وڏي وزير سيد مراد علي شاهه چيو ته پاڻي اسان جي زندگي ۾ گهڻو اهم آهي. پاڻي جا وسيلا دنيا ۾ گهٽجن پيا جنهن ۾ پاڪستان به شامل آهي. اسان پاڻي جي وسيلن کي وڌائي نٿا سگهون پر پاڻي کي محفوظ ضرور ڪري سگهون ٿا، جنهن لاءِ سنڌ حڪومت ڪم ڪري رهي آهي. پروگرام جو انعقاد پي ايڇ اي ۽ لوڪل گورنمنٽ ڪيو هو. پروگرام جومقصد پيئڻ جي پاڻي جي فراهمي، نيڪالي واري پاڻي جي پاليسي ۽ روين ۾ تبديلن لاءِ حڪمت عملي جي شروعات ڪرڻ آهي. تقريب ۾ صوبائي وزير بلديات سيد ناصر حسين شاهه، صوبائي صلاحڪار مرتضيٰ وهاب، پبلڪ هيلٿ انجنيئرنگ واري صوبائي وزير شبير بجاراڻي، چيئرپرسن رٿابندي ۽ ترقي ناهيد شاهه، سيڪريٽري بلديات روشن شيخ ۽ سيڪريٽري پي ايڇ اي نياز عباسي شرڪت ڪئي.  وڏي وزير سيد مراد علي شاهه چيو ته صاف پيئڻ جي پاڻي تي شهرين جو حق آهي. اسان پاڻي واري شعبي کي گهڻي اهميت ڏيون ٿا. وڏي وزير چيو ته اسان گرائونڊ واٽر کي به بهتر ڪرڻ لاءِ ڪم ڪري رهيا آهيون. اسان آر او پلانٽس لڳائي ٿر ۾ ڪنهن حد تائين پاڻي جي گهرجن کي پورو ڪيو آهي. جڏهن ڪنهن به علائقي ۾ آر او پلانٽ خراب هوندو آهي ته ماڻهو چون ٿا ته ان کي ٺيڪ ڪرايو وڃي. هن چيو ته اسان ڪراچي کي پاڻي پهچائڻ لاءِ ڪجهه اهم رٿائن تي ڪم ڪري رهيا آهيون. اسان لوڪل گرونمنٽ کي وڌيڪ مضبوط ڪنداسين ۽ ان کي وڌيڪ فنڊز ڏينداسين. هن چيو ته پبلڪ هيلٿ انجنيئرنگ ڊپارٽمنٽ جو 16-2015 ۾ بجيٽ 2.9 بلين رپيا هئا جيڪو هاڻي 4.3 بلين رپيا آهي. گذريل سال 9 بلين رپيا پي ايڇ اي جو بجيٽ هو ۽ هلندڙ سال 19 بلين رپين کان وڌيڪ آهي. هن چيو ته پي ايڇ اي صوبي جي ڳوٺاڻي علائقن ۾ پيئڻ جي پاڻي ۽ نيڪالي جي پاڻي جي ذميدار آهي. هن چيو ته اسان پنهنجي ڊيولپمينٽ پارٽنرز سان گڏجي پاڻي ۽ نيڪالي جا مسئلا حل ڪنداسين. هن چيو ته اسان هينئر تائين پوليو کي ڪنٽرول نه ڪري سگهياسين. 2017 ۾ پوليو تي ڪنٽرول ٿي ويو هو هاڻي ٻيهر اهي بيماريون ملڪ ۾ وڌي ويون آهن. هن چيو ته آئون سنڌ حڪومت پاران عوام کي خاطري ڪرايان ٿو ته پاڻي ۽ نيڪالي بابت اوهان جي مسئلن کي حل ڪنداسين.

 

بلاول جي بيان تي قومي اسيمبلي ۾ گوڙ ، مراد سعيد ۽ قادر پٽيل آمهون سامهون

اسلام آباد (ويب ڊيسڪ) قومي اسيمبلي جي اجلاس ۾ وفاقي مواصلاتي وزير مراد سعيد پنهنجن خيالن جو اظهار ڪندي چيو آهي ته ڪراچي گند جو ڍير بڻجي چڪو آهي، ماڻهن مري رهيا آهن، پيئڻ جو صاف پاڻي موجود نه آهي ۽ ان سڀني شين کي يقيني بڻائڻ سنڌ حڪومت جي ذميواري آهي. بلاول ڀٽو زرداري طرفان سنڌو ديش جي بيان جو ذڪر ڪندي هن چيو ته قومي احتساب بيورو (نيب) طرفان جعلي اڪائونٽس ڪيس جي جاچ لاءِ گھرائڻ تي مراد علي شاهه سنڌ اسيمبلي ۾ تقرير ڪري بلاول ڀٽي جو بيان ورجايو. وفاقي وزير چيو ته ڪراچي لاءِ ڪميٽي قائم ڪري اتان جي عوام جا مسئلا حل ڪرڻ جي ڳالهه ڪئي ته جواب ڏنو ويو ته وفاق نه بچندو، وفاق بچندو پر اوهان جي سياست نه بچندي. سندس چوڻ هو ته گذريل 5 ورهين ۾ هر سال ٿر ۾ بک ۽ غربت سبب 550 ٻارڙا فوت ٿي وڃن ٿا، پاڪستان ۾ خوراڪ جي کوٽ سبب ٻارن جي واڌ ويجهه متاثر ٿيڻ جو عمل سڀ کان وڌيڪ سنڌ ۾ آهي، بينظير انڪم سپورٽ پروگرام جي انگن اکرن موجب سڄي پاڪستان ۾ سڀ کان وڌيڪ غربت سنڌ ۾ آهي. هن وڏي وزير مراد علي شاهه کي مخاطب ڪندي چيو ته سيهوڻ ڌماڪي ۾ زخمين کي کڻڻ لاءِ اسٽريچر به نه هئا ۽ نه ئي اسپتال منتقل ڪرڻ لاءِ ايمبولنسز موجود هيون، وڏي وزير جو تڪ هوندي به اتي اسپتال نه هئي. سندس وڌيڪ چوڻ هو ته جيڪي پاڪستان جي ورهاڳي جي ڳالهه ڪن ٿا اهي پاڻ ورهائجي ويندا هنن جي سياست ختم ٿي ويندي پر پاڪستان رهندو. قومي اسيمبلي ۾ مراد سعيد جي سوالن جو جواب ڏيندي پاڪستان پيپلز پارٽي جي اڳواڻ عبدالقادر پٽيل چيو ته روز تقريرون ڪري اپوزيشن کي طنز جو نشانو بڻائي جيڪڏهن اوهان سمجهو ٿا ته اوهان بهترين ڪم ڪيو آهي ته اوهان گمان ۽ خيال مان  ٻاهر نڪرو. هن چيو ته پ پ اها واحد پارٽي آهي جنهن وفاق کي نقصان کان بچائڻ لاءِ سنڌ جي قوم پرستن جو رستو روڪيو، پ پ قربانيون ڏئي ڪري وفاق ۽ پاڪستان کي بچايو آهي. پي ٽي اڳواڻ کي مخاطب ڪندي پ پ اڳواڻ چيو ته اوهان کي سياست ۾ ايندي جيترا ڏينهن گذريا آهن اسان جي جلاوطني ۽ جيلن جو مدو اوترو آهي. عبدالقادر پٽيل وڌيڪ چيو ته 2 يا 3 ادارن جي جهيڙن تي آئين جي آرٽيڪل 149 ذريعي ڪراچي کي ڌار ڪرڻ جو اهو خواب آهي جيڪو الطاف حسين ڏٺو هو ۽ عمران خان کي ان تي عمل نه ڪرڻ گھرجي. پ پ اڳواڻ چيو ته ڪراچي لاءِ آرٽيڪل 149 جو جواب ئي نٿو ٺهي، ان کان اڳ آرٽيڪل اي جي 47 سان ڪراچي کي هلايو ويو هو ۽ هاڻ   جڏهن قانون لاڳو ڪندڙ ادارن ان جو خاتمو ڪيو ته اتان جا نالي ماتر نمائيندا آرٽيڪل 149 جو مطالبو ڪري رهيا آهن ۽ اوهان انهن جي تائيد ڪري رهيا آهيو ڇا اوهان وساري ڇڏيو آهي ته ڪراچي اندر هڪ ڏينهن ۾ 100 لاش ڪرندا هئا. هن چيو ته اسان کي جواب ڏيڻ ايندو آهي پر ايوان جو ماحول خراب ٿيڻ ڪري گھٽ ڳالهائيندا آهيون ان کي اسان جي ڪمزوري نه سمجهو وڃي. ڪشمير جي حوالي سان سندس چوڻ هو ته والاريل ڪشمير اهڙا ڪنسرٽ ڪري ۽ فنڪارن ذريعي آزاد نه ٿيندو پر ان لاءِ سڀني جماعتن کي اعتماد ۾ ورتو وڃي. ان کان پوءِ قومي اسيمبلي جي اسپيڪر اسد قيير بحري معاملن واري وفاقي وزير علي زيدي کي خطاب جي اجازت ڏني پر هڪ قومي اسيمبلي ميمبر طرفان ڪورم پورو نه هجڻ جي نشاندهي تي اجلاس ملتوي ڪيو ويو.

 

ڀارت ڌمڪين ذريعي ڪشميرين لاءِ آواز اٿارڻ کان نٿو روڪي سگهي: ايمنسٽي انٽرنيشنل

لنڊن (ويب ڊيسڪ) انساني حقن جي عالمي تنظيم ايمنسٽي انٽرنيشنل جي سربراهه ڪُمي نائيڊو چيو آهي ته ڀارتي حڪومت طرفان ڊيڄارڻ ۽ ڌمڪائڻ جي ڪوششن باوجود سندن گروپ کي ڪشمير جي صورتحال تي آواز اٿارڻ کان نٿو روڪي سگهجي. مالياتي ڏوهن جي جاچ ڪندڙ ڀارتي کاتي تازو ايمنسٽي جي مقامي برانچ تي الزام مڙهيو هو ته اها ناڻي جي مٽاسٽا جي حوالي سان ڀارتي قاعدن جي ڀڃڪڙي ڪري رهي آهي. اهو الزام والاريل ڪشمير ۾ مودي حڪومت جي قدمن تي تنقيد کانپوءِ سامهون آيو. ايمنسٽي انٽرنيشنل جي سربراهه ڪُمي نائيڊو موجب مودي حڪومت ڀارت ۾ ايمنسٽي کي چِٿڻ جي ڪوشش ڪئي آهي، ڊيڄارڻ ۽ ڌمڪائڻ باوجود ڪشمير جي صورتحال تي آواز اٿارڻ کان نه مُڙنداسين.

 

وزيراعظم سان آءِ ايم ايف وفد جي ملاقات، مالياتي پيڪيج جي مدد کانپوءِ حڪومتي قدمن تي ڳالهه ٻولهه ٿي

اسلام آباد (ويب ڊيسڪ) وزيراعظم عمران خان سان آءِ ايم ايف وفد ملاقات ڪئي آهي. آءِ ايم ايف وفد جي اڳواڻي ڊائريڪٽر مڊل ايسٽ ۽ سينٽرل ايشيا جيهاد آزور ڪري رهيو هو، جڏهن ته ملاقات ۾ ناڻي بابت صلاحڪار، سيڪريٽري ۽ اسٽيٽ بئنڪ گورنر پڻ موجود هئا، ذريعن موجب ملاقات ۾ آءِ ايم ايف وفد جي مالياتي پيڪيج جي مدد کانپوءِ حڪومتي قدمن تي ڳالهه ٻولهه ٿي، جڏهن ته وزيراعظم حڪومت جي معاشي سڌارن جي حوالي سان وفد کي آگاهه ڪيو. هوڏانهن آءِ ايم ايف وفد ناڻي بابت صلاحڪار عبدالحفيظ شيخ سان پڻ ملاقات ڪئي، جنهن ۾ ملڪي معاشي صورتحال تي بريفنگ ڏني وئي. ملاقات ۾ پاڪستان جي معاشي صورتحال ۽ قرض پروگرام ۾ اڳڀرائي جو جائزو ورتو ويو، جڏهن ته عبدالحفيظ شيخ آءِ ايم ايف وفد کي معاشي استحڪام لاءِ کنيل قدمن تي بريفنگ ڏني.

 

مودي سرڪار جي قدمن تي ڀارت به ورهائجي چڪو آهي: شاهه محمود قريشي

لاهور (اين اين آءِ) پرڏيهي وزير شاهه محمود قريشي چيو آهي ته 5 آگسٽ جي ڀارتي قدمن ڪشميرين جي آزادي واري جدوجهد کي نئون موڙ ڏيئي ڇڏيو آهي 19 سيٽمبر تي وزيراعظم سان گڏ سعودي عرب وڃي رهيو آهيان سعودي عرب ۾ اهم نشستن کي آڏو رکي قدم کڻنداسين سلامتي ڪائونسل جو ڪشمير جي مسئلي تي اجلاس ڪشميرين جي لاءِ حوصلائتو هو ڀارت پاران سلامتي ڪائونسل جو اجلاس ملتوي ڪرائڻ جي ڪوشش ڪئي ويئي روس ۽ فرانس لچڪ نه ڏيکارن ها ته هي اجلاس نه پئي ٿي سگهيو جڏهن ته چين سلامتي ڪائونسل ۾ پاڪستان جي وڪالت ڪئي، سلامتي ڪائونسل اجلاس سبب ڪشميرجو مسئلو عالمي سطح تي اٿيو سلامتي ڪائونسل اجلاس سان گڏوگڏ او آءِ سي کي متحرڪ ڪرڻ جي به ڪوشش ڪئي، او آءِ سي اجلاس ڪرڻ آسان نه آهي اهڙن خيالن جو اظهار هن لاهور ۾ ڪل جماعتي ڪشمير ڪانفرنس کي خطاب ڪندي شاهه محمود قريشي چيو ته آزادي لاءِ ڪشميرين جي ڊگهي جدوجهد جاري آهي ۽ ڀارت جي 5 آگسٽ جي قدمن آزادي واري جدوجهد کي نئون موڙ ڏيئي ڇڏيو آهي پارليماني اجلاس کان پوءِ فيصلو ٿيو ته ڪشمير جي مسئلي کي عالمي سطح تي اٿارينداسين ڪشمير جي مسئلي کان دنيا جو ڌيان هٽي ويو هو دنيا جو ڌيان هٽڻ سان ڀارت کي فائدو ٿيو ۽ 54 سال کان پوءِ سلامتي ڪائونسل ۾ ڪشمير جي مسئلي تي بحث ٿيو شاهه محمود قريشي چيو ته اسلامي تعاون تنظيم فلسطين جي مسئلن کان پوءِ ٺهي او آءِ سي ۾ فسلطين جي مسئلي تي به هڪجهڙائي ناهي رهي ڪامياب پاليسي تحت جنيوا ۾ 58 ملڪن پاڪستاني موقف جي توثيق ڪئي ڪامياب پاليسي تحت او آءِ سي ڪرفيو جي مخالفت ڪئي ۽ هيومن رائٽس ڪائونسل ۾ ڪشمير ۾ بنيادي حقن جي لتاڙ کي اجاگر ڪيو شاهه محمود قريشي چيو ته 19 سيپٽمبر تي وزيراعظم سان گڏ سعودي عرب وڃي رهيو آهيان.

 

علي زيدي ذاتي دوستن کي پيو نوازي، سياسي انتقام وٺي ڪري پنهنجي ذاتي انا کي تسلي ڏني پئي وڃي؛ سعيد غني

ڪراچي(اسٽاف رپورٽر) سنڌ جي اطلاعات ۽ محنت واري صوبائي وزير سعيد غني چيو آهي ته ملڪ ۾ صرف سياسي مخالفن جو احتساب ڪيو پيو وڃي ۽ انهن کان سياسي انتقام وٺي پنهنجي ذاتي انا کي تسڪين ڏني پئي وڃي اطلاع آهي ته مالم جبه ڪيس ۾ سمورن ملزمن کي ڪلين چٽ ڏني پئي وڃي. اهڙن خيالن جو اظهار هن سنڌ اسيمبلي ۾ ميڊيا ڪارنر تي صحافين سان ڳالهه ٻولهه ڪندي ڪيو، هن وڌيڪ چيو ته گهوٽڪي واقعي ۾ مندرن ۽ دڪانن کي نقصان پهچايو ويو پر رينجر ۽ پوليس حالتن کي قابو ۾ ڪيو جڏهن ته اسان پاڻ اتي وياسين، عالمن واضح ڪيو ته مندر تي حملو ڪندڙن سان انهن جو ڪو به تعلق ناهي، ٻنهي ڌرين ذميوارن خلاف ڪارروائي جي اجازت ڏني، جنهن کانپوءِ جوابدار گرفتار ڪيا ويا، پر انهن خلاف الزام غلط لڳايا ويا ته الزام لڳائيندڙن خلاف ڪارروائي ڪئي ويندي، انهن ٻنهي ڌرين جو شڪريو ادا ڪيو، هڪ سوال جي جواب ۾ سعيد غني چيو ته ميرپورخاص واقعو ٿيو ته ايمبولينس نه ڏني وئي، جنهن ڪري واقعو پيش آيو، جڏهن ته ايمبولينس ورڪنگ ۾ هئي پر ميڊيا اهو واقعو ائين رپورٽ ڪيو ته جيئن اهو واقعو بلاول ڀٽو ڪرايو آهي ته سنڌ حڪومت فوري طور حرڪت ۾ آئي ۽ ذميوارن کي معطل ڪيو آهي، وڌيڪ انڪوائري هلندڙ آهي، متاثرين جي فيملي جا بيان به رڪارڊ ڪيا ويا اهن، هڪ سوال جي جواب تي صوبائي وزير اطلاعات ۽ محنت واري سعيد غني ميڊيا کي ٻڌايو ته علي زيدي پنهنجي ذاتي دوستن کي نوازي رهيو آهي، انهن ماڻهن کي ٺيڪا ڏنا ويا آهن، ان خلاف ايف آءِ اي ۽ ٻين ادارن ۾ جاچ جاري آهي، پي ٽي آءِ حڪومت تي وڏي وزير جي جوڙيل پنهنجي ٽيم رپورٽ ڏني، وڏي وزير جو اهو چوڻ آهي ته اسان جي جاچ پهريان ٿيندي پوءِ نيب ڪيس موڪليو ويندو، بي آر ٽي منصوبا ڪرپشن جو داستان آهن، سنڌ جي تقسيم يا ڪراچي عليحدگي تي اسان جو واضح موقف آهي ته اسان ڪنهن به صورت ۾ تقسيم برداشت نه ڪنداسين، پي ٽي آءِ ۽ جي ڊي اي سنڌ جي تقسيم جي مخالفت ڪندا آهن، پر ايم ڪيو ايم سان گڏ ويٺل آهن، فروغ نسيم اهڙي ڳالهه ڪري دراصل ايم ڪيو ايم جي مدد ڪئي آهي، هن پي ٽي آءِ کي رڳڙو لڳايو آهي، ڇو ته اسان ايم ڪيو ايم جي نيت سان سٺي ريت واقف آهيون، هن چيو ته فروغ نسيم الطاف حسين کي نيلسن منڊيلا سان تعبير ڪيو آهي، ان جي رڪمنڊيشن ايم ڪيو ايم سان ناهي، ڪنهن ٻئي هنڌان ٿي آهي، ان تي ايم ڪيو ايم به اعتراض ڪري چڪي آهي، ايم ڪيو ايم اسان سان گڏ ناهي پر انهن جي حرڪتن کان واقف آهيون.

 

ميگا ڪرپشن ڪيسن کي انجام تائين پهچائڻ پهرين ترجيح آهي: نيب چيئرمين

پشاور (ويب ڊيسڪ) نيب چيئرمين جسٽس (ر) جاويد اقبال چيو آهي ته ميگا ڪرپشن جي وائيٽ ڪالر ڪيسن کي انجام تائين پهچائڻ پهرين ترجيح آهي. جسٽس (ر) جاويد اقبال نيب خيبر پختونخواهه آفيس جو دورو ڪري ڪارڪردگي جو جائزو ورتو. سندس چوڻ هو ته ميگا ڪرپشن جي وائيٽ ڪالر ڪيسن کي انجام تائين پهچائڻ اسان جي پهرين ترجيح آهي، نيب گذريل 22 مهينن ۾ قوم جا لُٽيل 71 ارب هٿ ڪري قومي ناڻي ۾ جمع ڪرايا، جڏهن ته نيب ڪي پي ان عرصي ۾ 50 ڪروڙ رپيا هٿ ڪري قومي ناڻي ۾ جمع ڪرايا. هن چيو ته خيبر پختونخواهه نيب جي ڪارڪردگي کي معتبر قومي ۽ عالمي ادارن ساراهيو آهي، جنهن سان اندازو ٿئي ٿو ته نيب ڪي پي جي ڪارڪردگي سٺي رهي.

 

اليڪشن ڪميشن مريم نواز کي پارٽي جي نائب صدارت تان هٽائڻ واري تحريڪ جي درخواست رد ڪري ڇڏي

اسلام آباد (اين اين آءِ) اليڪشن ڪميشن آف پاڪستان مريم نواز جي مسلم ليگ (ن) ۾ پارٽي عهدي جي خلف داخل درخواست رد ڪندي کيس پارٽي ۾ نائب صدر لاءِ اهل قرار ڏيئي ڇڏيو اڱاري تي چيف اليڪشن ڪمشنر جسٽس رٽائرڊ سردارمحمد رضا جي سربراهي ۾ ٽن ميمبرن واري بئنچ مريم نواز جي پارٽي عهدي جي خلاف داخل پاڪستان تحريڪ انصاف جي ميمبرن جي درخواست تي محفوظ فيصلو ٻڌايو اليڪشن ڪميشن پنهنجي فيصلي ۾ چيو ته مريم نواز پارٽي جي نائب صدارت لاءِ اهل آهي. جڏهن ته مريم نواز کي پارٽي جو وقتي صدر نٿو بڻائي سگهجي ۽ اهو پاڻ به پارٽي جو ڪوبه فنڪشنل عهدو قبول نه ڪري. واضح رهي ته درخواست ۾ مريم نواز کي مسلم ليگ (ن) ۾ نائب صدر جي عهدي تان هٽائڻ جي اپيل ڪئي ويئي هئي اليڪشن ڪميشن جي فيصلي تي مريم اورنگزيب صحافين سان ڳالهائيندي چيو ته تحريڪ انصاف اي سي پي ۾ سستي شهرت لاءِ درخواست کڻي ويئي هئي هن چيو ته مريم نواز کي عوامي خدمت لاءِ ڪنهن عهدي ۽ سرٽيفڪيٽ جي ضرورت نه آهي آئين ۽ قانون جي بالادستي لاءِ مريم نواز جون خدمتون ڪنهن کان ڳجهيون نه آهن مريم اورنگزيب چيو ته مسلم ليگ (ن) جي حڪومت ۾ مريم نواز پوئتي رهندي صحت ۽ تعليم لاءِ ڪم ڪيو جڏهن ته موجوده حڪومت اهڙي قسم جون ننڍڙيون حرڪتون ڪري رهي هئي جنهن جو جواب اليڪشن ڪميشن کان ملي ويو. مريم نواز جي وڪيل بئريسٽر ظفرالله صحافين سان ڳالهائيندي چيو ته الله جو ڪرم آهي جو اليڪشن ڪميشن اسان جون گذارشون قبول ڪيون هن چيو ته اليڪشن ڪميشن پي ٽي آءِ جي درخواست رد ڪري ڇڏي انصاف تي فيصلو ڪرڻ تي اليڪشن ڪميشن لاءِ ٿورائتا آهيون جهانگير جدون چيو ته حق ۽ سچ جي فتح آهي جيڪڏهن فيصلو اسان جي خلاف اچي ها ته ان جي ٻين پارٽين تي به اثر پون ها جهانگير جدون چيو ته اسان سمجهون ٿا ته نوازشريف جي حوالي سان سپريم ڪورٽ جو فيصلو غلط هو ان تي به ڪڏهن پٽيشن فائل ڪنداسين.

 

اي آئي سي وي ڊي جي 12 هين چيسٽ پين يونٽ جو افتتاح، اسٽيٽ آف آرٽ پروجيڪٽ کي دنيا ساراهي ٿي: مرتضيٰ وهاب

ڪراچي(پ.ر) سنڌ حڪومت جي ترجمان ۽ قانون بابت وزير اعليٰ سنڌ جي صلاحڪار بئريسٽر مرتضيٰ وهاب  مرتضيٰ وهاب ميئر ڪراچي وسيم اختر کان گهر ڪئي اهي ته ڪي ايم سي جي زير انتظام هيٺ هلندڙ ڪراچي انسٽيٽيوٽ آف هارٽ ڊيزز اين آئي سي وي ڊي جي حوالي ڪيو وڃي ته جئين ان کي به دل جي بيمارين جي معياري اسپتال بڻائي سگهجي،  هن چيو  ته اين آئي سي وي ڊي جي چيسٽ پين يونٽ جو قيام سنڌ حڪومت جو فليگ شپ پروجيڪٽ آهي اهڙن خيالن جو اظهار هن اورنگي ٽائون ۾ چيسٽ پين يونٽ جي قيام جي افتتاحي تقريب ۾ ميڊيا جي نمائندن سان ڳالھ ٻولھ ڪندي ڪيو. هن چيو ته صحت جي شعبي ۾ دل جي مرض جو علاج تمام مهانگو آهي پر سنڌ حڪومت بنا فرق جي پوري پاڪستانين لاءِ اها سهولت مفت فراهم ڪري رهي آهي. هن چيو ته اين آئي سي وي ڊي جي معياري علاج معالجي جي سهولت جو دائرو پوري صوبي ۾ پکيڙيو ويو آهي هي صوبي جو ٻارنهون ۽ ڪراچي جو نئون چيسٽ پين يونٽ آهي جتي هارٽ اٽيڪ جي مريضن کي فوري طبي امداد ڏئي اين آئي سي وي ڊي روانو ڪيو ويندو آهي. صوبائي صلاحڪار سان اين آئي سي وي ڊي جي ايگزيڪٽيو ڊائريڪٽر ڊاڪٽر نديم قمر ان چيسٽ پين يونٽ جي فائدن جي باري ۾ ٻڌايو ته جيڪڏهن اورنگي ٽائون ۾ ڪنهن شخص کي هارٽ اٽيڪ ٿئي ته ان کي اسپتال پهچڻ ۾ هڪ ڪلاڪ کان وڌيڪ وقت لڳندو آهي اسان جو چيسٽ پين يونٽ فوري طبي امداد فراهم ڪري مريض جي جان بچائڻ ۾ مددگار ثابت ٿيندو قانون واري صلاحڪار چيو ته سنڌ حڪومت جي ان اسٽيٽ آف آرٽ پروجيڪٽ کي دنيا ساراهي رهي آهي پر وفاقي حڪومت ان ڪم ۾ رنڊڪون وجھڻ جي ڪوشش ڪري رهي آهي جنهن کي ميڊيا اجاگر ڪيو آهي جنهن کان پوءِ وفاقي حڪومت کي ان اسپتال کي وفاق جي حوالي ڪرڻ جي فيصلي کي واپس وٺڻو پيو. هن چيو ته انتظامي اعتبار سان اين آئي سي وي ڊي جي فنڊنگ سنڌ حڪومت ڪندي آهي جڏهن ته وفاق کي ان ۾ هلائڻ ۾ ڪا به دلچسپي ناهي جڏهن ته سنڌ حڪومت بجيٽ ۾ به اسپتالن جي لاءِ بجيٽ ۾ پئسا رکيا آهن. هن چيو ته ڪراچي شهر کي صاف ڪرڻ جي مهم جو سربراهه وزير اعليٰ سنڌ هوندو جيڪو ان صفائي مهم کي سڌو سئنون مانيٽر ڪندو.