تازيون خبرون
عمران خان جي سعودي ولي عهد سان ملاقات، تيل ٺڪاڻن تي حملي جي مذمت، ڪشمير صورتحال تي ڳالهيون - پنڊي جو موسم تبديل ٿي رهيو آهي، حڪران ڀلي شوق پورا ڪن: آصف علي زرداري - ميڊيا کي ذميوار ڪردار ادا ڪندي ڏسڻ چاهيون ٿا، ڪو به قانون زبردستي مڙهيو نه ويندو: فردوس عاشق - بلديا فيڪٽري سانحو: مالڪن مرڪزي جوابدارن رحمان ڀولا ۽ زبير چريا کي سڃاڻي ورتو آهي جڏهن ته ڇرڪائيندڙ انڪشاف به ڪيا آهن. - تحقيق ۽ تجربن سان ئي علم جي ميدان ۾ ترقي ڪري سگهجي ٿي: صدر عارف علوي - مدرسا اسڪول سميت تعليمي ادارن ۾ جديد ٽيڪنالاجي نه هوندي ته اسان گهڻو پوئتي رهجي وينداسين: چيف جسٽس - ڪتي جي ڏاڙهڻ سان ٻارڙي جي موت تي ڏک جو اظهار، فوتي ٻارڙي تي سياسي ڪئپنگ ڪئي ويئي: بلاول ڀٽو زرداري - سي پي اين اي پاران سڀني ڌرين سان گڏجي ميڊيا ٽربيونلن خلاف جدوجهد جو اعلان - حڪمرانن جي اشرافيا ۾ واحد سياستدان آهن جو هڪ ٻئي جي دشمني ۾ سبقت وٺڻ جي ڪوشش ڪندا آهن: خواجه آصف - ٿر جي معصوم ٻارڙن تي موت جو رقص،مٺي سول اسپتال ۾ وڌيڪ 4 ٻارڙا فوت

Daily Archives: August 22, 2019

ٽرمپ جي ڪشمير مسئلي تي وري ٽياڪڙي جي آڇ، ڀارت تي ڇڪتاڻ گهٽائڻ لاءِ زور

واشنگٽن (ويب ڊيسڪ) آمريڪي صدر ڊونلڊ ٽرمپ هڪ ڀيرو ٻيهر ڪشمير مسئلي تي ٽياڪڙي جي آڇ ڪندي چيو آهي ته ڀارتي وزيراعظم سان هن هفتي ٿيندڙ ملاقات ۾ ڪشمير بابت ڳالهائيندس. وائيٽ هائوس ۾ صحافين سان ڳالهائيندو آمريڪي صدر چيو ته ڪشمير هڪ پيچيده مسئلو آهي اتي هندو به آهن ۽ مسلمان به، آئون اهو ته نه چوندس ته اتي ٻئي سٺي طريقي رهي رهيا آهن پر آئون ان معاملي تي ڀارتي وزيراعظم مودي سان هفتي ٿيندڙ ملاقات ۾ ضرور ڳالهائيندس ۽ پوري ڪوشش ڪندس ته ان مسئلي تي ٻنهي ملڪن وچ ۾ ٽياڪڙي ڪرايان. هوڏانهن آمريڪي گھرو کاتي جي هڪ وڏي عهديدار خطي جي دوري تان واپسي کان پوءِ صحافين سان ڳالهائڻ دوران ڀارت تي زور وڌو آهي ته هو ترت والاريل ڪشمير مان ڪرفيو ۽ پابنديون هٽائي، بنيادي شهرين آزادي بحال ڪئي وڃي ۽ گرفتار ڪشميري اڳواڻن کي آزاد ڪيو وڃي آمريڪي عهديدار جو چوڻ هو ته آمريڪا کي والاريل ڪشمير ۾ گرفتارين ۽ اتان جي شهرين کي قيد رکڻ جي اطلاعن تي ڳڻتي آهي، اسان ڀارت تي زور ڏينداسين ته هو شهرين جي انفرادي حقن جو احترام، قانوني طريقيڪار جي پابندي ۽ ان مسئلي جي حل لاءِ ڳالهايون ڪري. هن چيو ته صدر ٽرمپ هن وقت پاڪ _ڀارت وزيراعظمن سان فون تي ڳالهايو آهي ۽ هنن تي ڪشمير جي معاملي تي ڇڪتاڻ ۾ گھٽتائي آڻڻ تي زور ڏنو ويو آهي، آمريڪا کي ڀارت جي خدشن جي خبر آهي پر خطي جو حالتون معمول تي آڻڻ لاءِ جلد کان جلد قدم کنيا وڃن، پاڪستان ۽ ڀارت ٻئي ايٽمي طاقتون آهن اسان انهن تي زور وڌو آهي ته هو ڪشمير تي ڳالهيون شروع ڪن. ان کان پوءِ برطانيا ۽ فرانس به ڀارت تي زور ڏ نو آهي ته هو ڇڪتاڻ ۾ گھٽتائي آڻي ۽ پاڪستان سان ان مسئلي کي حل ڪرڻ لاءِ ڳالهيون شروع ڪري. هن هفتي فرانس ۾ ٿيندڙ جي 7 ملڪن جي اجلاس ۾ به اهو مسئلو ڀارتي وزيراعظم نريندر مودي جي سامهون اٿارڻ جو فيصلو ڪيو آهي. برطانوي وزيراعظم بورس جانسن جي ترجمان طرفان جاري ڪيل پڌرائي موجب وزيراعظم جانسن ڪشمير جي صورتحال تي ڀارتي وزيراعظم نريندر مودي سان فون تي رابطو ڪيو آهي ۽ هن کي واضح ڪيو آهي ته برطانيا چاهي ٿو ته پاڪستان ۽ ڀارت ٻه طرفي ڳالهائين ذريعي ان مسئلي کي حل ڪن، هن چيو ته فرانس ۾ ٿيندڙ جي 7 سربراهي اجلاس ۾ ان تي وڌيڪ ڳالهه ٻولهه ٿيندي. پيرس ۾ هڪ فرانسيسي عهديدار به چيو آهي ته صدر ايمانوئيل ميڪرون ميڪرون ڪشمير جي مسئلي تي ڀارتي وزيراعظم سان جي 7 اجلاس دوران ڳالهائيندو، صدر ميڪرون ۽ مودي وچ ۾ ورڪنگ ڊنر تي ملاقات ٿيندي. هڪ فرانسيسي سفارتڪار نالو نه ظاهر ڪرڻ جي شرط تي ٻڌايو ته ان ۾ ڪو شڪ ناهي ته اها ملاقات ڪشمير ايجنڊا تي هوندي.

 

وفاقي حڪومت جو نجي شخصيتن تائين نيب ڪارروائي جا اختيار ختم ڪرڻ جو فيصلو

اسلام آباد (اين اين آءِ) وزيراعظم عمران خان سان وفاقي وزير فروغ نسيم ملاقات ڪئي جنهن ۾ نوان قانون لاڳو ڪرڻ ۾ هن وقت تائين اڳڀرائي کان آگاهه ڪيو، ملاقات ۾ پارلياماني سيڪريٽري مليڪا بخاري، سيڪريٽري قانون ارشد فاروق ۽ ٻيا آفيسر موجود هئا، قانون واري وزير، وزيراعظم کي عام مفاد لاءِ نون قانون ۽ اهي لاڳو ڪرڻ ۾ هن وقت تائين اڳڀرائي کان آگاهه ڪيو، نون قانون ۾ ڪوڊ آف سول پروسيجر (ترميمي بل 2019) ليگل ايڊ اينڊ جسٽس اٿارٽي بل 2019، انفورسمنٽ آف وومين پراپرٽي رائيٽس بل 2019، ليٽرز آف اينڊمنسٽريشن اينڊ سينسيشن سرٽيفڪيٽ بل 2019، وصل بلوور پروٽيڪشن اينڊ ويجيلنس ڪميشن بل 2019، سروس ٽربيونل (ترميمي بل 2019) ميوچل ليگل اسسٽنس بل 2019، مسلم فيملي لاز (ترميمي ايڪٽ 2019 سيڪشن 4 ۽ سيڪشن 7 ۽ قانوني نظام لاءِ ايڪشن پلان فار وومين اينڊ گرلز شامل آهن، قانون واري وزير ٻڌايو ته عوام کي ان جا حق ۽ ٻين معاملن بابت لاڳاپيل قانون ۽ ماتحت قانون بابت آگاهي فراهم ڪرڻ لاءِ پاڪستان ڪوڊ کي آن لائين ڪيو ويو آهي، ان ڏس ۾ پاڪستان ڪوڊ جي نالي سان هڪ اپيليڪيشن ٺاهي وئي آهي، جيڪا جلد عوام کي سندن موبائيل فونز تي مهيا ٿيندي، هن اپيليڪيشن تحت 1840 کان مارچ 2019 تائين جي قانون جو سمورو تفصيل ملي سگهندو، پاڪستان ڪوڊ ۾ هن وقت تائين (23) مختلف شعبن بابت 844 قانون درج آهن، قانون واري وزير، وزيراعظم کي مختلف قانونن تي اڳڀرائي کان آگاهه ڪيو، وزيراعظم چيو ته عوام کي سستو انصاف جي پهچ ڏيڻ حڪومت جي پهرين ترجيح آهي، وزيراعظم چيو ته بنا دير ۽ آسان انصاف ئي عوام جي مسئلن جي حل ۽ سندن زندگين ۾ واضح تبديلي جو ضامن آهي.  ٻئي طرف اطلاعات کاتي جي صلاحڪار ڊاڪٽر فردوس عاشق اععواڻ سان گڏ پريس ڪانفرنس ڪندي قانون واري وزير فروغ نسيم چيو آهي ته نيب ڪيسز ۾ ضمانت ڏيڻ جو اختيار هاڻي ٽرائل ڪورٽ کي ملندو، نيب ڪيسز ۾ ضمانت ڏيڻ يا نه ڏيڻ ٽرائل ڪورٽ جو صوابديدي اختيار هوندو، هن چيو ته جج ارشد ملڪ بابت چيف جسٽس اسلام آباد هائي ڪورٽ جي چوڻ تي وڌيڪ ڪارروائي ٿيندي.

 

سرڪاري ملازم غير قانوني حڪم مڃڻ جو پابند ناهي: سپريم ڪورٽ

اسلام آباد (ويب ڊيسڪ) سپريم هاءِ ڪورٽ قرار ڏنو آهي ته سرڪاري ملازم غير قانوني حڪم مڃڻ جو پابند ناهي. سپريم ڪورٽ ۾ ڪراچي پورٽ ٽرسٽ جي اڳوڻي چيئرمين جاويد حنيف عباسي خلاف غير قانوني مقررين بابت ڪيس جي ٻڌڻي ٿي. وڪيل صفائي چيو ته وزيراعظم جي هدايتن تي عارضي ملازمتن کي مستقل ڪيو، وزيراعظم جا حڪم پورٽ اينڊ شپنگ بابت وفاقي وزير بابر غوري ذريعي مليا. جسٽس عظمت سعيد کوسا چيو ته انيتا تراب ڪيس کان پوءِ سرڪاري ملازم غير قانون حڪم مڃڻ جو پابند نه آهي، عارضي ملازمتن کي سواءِ ڪنهن اشتهار جي مستقل ڪيو ويو، ڇا پاڪستان جو ٻيو عوام ٻئي درجي جو شهري آهي، ڇا باقي عوام ڪي پي ٽي ۾ نوڪري نٿو ڪري سگھي؟. جسٽس عمر عطا بنديال چيو ته چيئرمين طور وزيراعظم جي هدايتن کي ڏسڻ گھرجي ها. جنهن کان پوءِ عدالت ڪي پي ٽي ۾ مقررين بابت ڪابينا جو نوٽيفڪيشن طلب ڪندي ڪيس جي ٻڌڻي ٻن هفتن تائين ملتوي ڪري ڇڏيئ

 

ستلج ۽ سنڌو درياهه ۾ پاڻي جي وهڪري ۾ واڌ، 33 ڳوٺ پاڻي هيٺ، لڏ پلاڻ

لاهور (ويب ڊيسڪ) ستلج ۽ سنڌو درياهه ۾ پاڻ جي وهڪري ۾ لاڳيتو واڌ جي نتيجي ۾ 33 ڳوٺ پاڻي هيٺ اچي ويا. قدرتي آفت کي منهن ڏيندڙ وفاقي اداري نيشنل ڊزاسٽر مئنيجمينٽ اٿارٽي (اين ڊي ايم اي) جي ترجمان برگيڊيئر مختار احمد ٻڌايو آهي ته ستلج درياهه ۾ وهڪري ۾ گھڻي واڌ ٿي رهي آهي، رات 10 وڳي گنڊا سنگھه والا تي پاڻي جي سطح 18.70 فٽ ۽ وهڪرو 52000 ڪيوسڪ هو. مختار احمد چيو ته قصور ۾ درياهه جي ڀرپاسي وارا 18 ڳوٺ پاڻ هيٺ اچي ويا آهن ۽ بڪي ونڊ کي 90 سيڪڙو تائين خالي ڪرايو ويو آهي، راول ڊيم به پاڻي سان ڀرجي ويو آهي ۽ وڌيڪ گنجائش ختم ٿيڻ واري آهي، جلد راول ڊيم جا اسپل ويز کوليا ويندا. فلڊ ڪنٽرول روم موجب سنڌو درياهه ۾ به پاڻي جي سطح ۾ واڌ جاري آهي، گڊو واري هنڌ تي هن وقت وچولي ٻوڏ آهي، سنڌو درياهه پاڻي سبب ڪچي 15 کان وڌيڪ ننڍا ڳوٺ ۽ هزارين ايڪڙ فصل پاڻي هيٺ اچي ويا آهن، ڪچي جي علائقي مان ماڻهن کي محفوظ هنڌن تي متقل ڪيو پيو وڃي. اين ڊي ايم اي موجب قصور جي ضلعي انتظاميا متاثرن لاءِ 17 ڪيمپون قائم ڪيون آهن پر هن وقت تائين ڪنهن به رهائش اختيار ناهي ڪئي، هڪ لک کان ڏيڍ لک ڪيوسڪ جو ٻوڏ وهڪرو اڄ شام کان سڀاڻي منجهند تائين گنڊا سنگھه والا هيڊ ورڪس تان گذرندو.

 

ڪرنٽ اڪائونٽ خساري ۾ لاٿ وڏي ڪاميابي آهي: عمران خان

اسلام آباد(م.ڊ) وزير اعظم عمران خان چيو آهي ته ڪرنٽ اڪائونٽ خساري ۾ لاٿ وڏي ڪاميابي آهي، ٽوئيٽر پيغام ۾ وزير اعظم عمران خان جو چوڻ هو ته برآمدات ۽ ترسيلات زر وڌائي ۽درآمدات گهٽ ڪري پرڏيهي ناهموارين ۾ لاٿ جون حڪومتي ڪاوشون ڪارآمد ثابت ٿي رهيون آهن، هن چيو ته گذريل سال جي مقابلي ۾ ڪرنٽ اڪائونٽ خسارو 6 ارب ڊالر گهٽ آهي، هلندڙ سال جولائي جو خسارو گذريل  سال جولائي 2018  جي مقابلي ۾ 73 سيڪڙو يا 1.5 ارب ڊالر گهٽ آهي جيڪو يقينن هڪ وڏي ڪاميابي آهي.

 

صادق سنجراڻي سان اسد قيصر جي ملاقات، ڪشمير مسئلي کي بين الاقوامي سطح تي اٿارڻ لاءِ پارليامينٽ جا وفد موڪلڻ جو فيصلو

اسلام آباد (اين اين آءِ) چيئرمين سينيٽ محمد صادق سنجراڻي سان قومي اسيمبلي جي اسپيڪر اسد قيصر ملاقات ڪئي ٻنهي اڳواڻن ڪشمير جي مسئلي کي بين الاقوامي سطح تي اٿارڻ تي تفصيلي خيالن جي ڏي وٺ ڪئي ملاقات ۾ فيصلو ڪيو ويو ته ڪشمير جي موجوده صورتحال جي حوالي سان عالمي برادري کي آگاهه ڪرڻ ۽ ڪشمرين تي ڀارتي ظلمن جي خلاف بين االاقوامي سطح تي عام راءِ هموار ڪرڻ لا3 پارليامينٽ جا گڏيل وفد موڪليا ويندا جنهن ۾ ٻنهي ايوانن جي ميمبرن ۽ ڪشميرين جا نمائندا شامل هوندا ان ڏس ۾ پرڏيهي وزارت ۽ ٻاهرين ملڪن ۾ پاڪستان جا سفارتخانا وفد جي پرڏيهي پارليامينٽ ميمبر پارليماني تنظيمن ۽ هيومن رائٽس جي ادارن سان ملاقات جو پروگرام جوڙيندا.

 

شاهه محمود قريشي جو آئيوري پوسٽ، ڊينش ۽ ناروي جي پرڏيهي وزيرن سان ٽيليفون تي رابطو، والاريل ڪشمير جي صورتحال تي ڳالهيون

اسلام آباد (اين اين آءِ) پرڏيهي وزير شاهه محمود قريشي ڊينش پرڏيهي وزير جيبڪو فوڊ سان ٽيليفون سان رابطو ڪيو جنهن ۾ والاريل ڄمون ۽ ڪشمير جي صورتحال تي خيالن جي ڏي وٺ ڪئي ويئي پرڏيهي وزير پنهنجي ڊينش هم منصب کي والاريل ڄمون ۽ ڪشمير جي خاص حيثيت ختم ڪرڻ ۽ آبادي تباسب تبديل ڪرڻ جي حوالي سان هندستان جي هڪ طرفي قدمن کان آگاهه ڪيو ڀارت پنج آگسٽ کان والاريل ڄمون ۽ ڪشمير کي مسلسل ڪرفيو جي ذريعي گهيري ۾ آڻي ڇڏيو آهي ۽ ڀارت پاران ڄمون ۽ ڪشمير ۾ انساني حقن جي سنگين ڀڃڪڙين ۾ روزانو واڌ ٿي رهي آهي پرڏيهي وزير چيو ته هندستان جا هڪ طرفا قدم دنيا جي قانونن ۽ گڏيل قومن جي سيڪيورٽي ڪائونسل جي ٺهرائن جي خلاف آهن هن چيو ته اقوام متحده سيڪيورٽِ ڪائونسل جي جنرل سيڪريٽري ۽ سيڪيورٽِ ڪائونسل ان صورتحال جو نوٽيس ورتو آهي هن چيو ته 9 لک کان وڌيڪ ڀارتي فوج والاريل ڄمون ۽ ڪشمير ۾ موجود آهي مسلسل ڪرفيو جي ڪري خوراڪ ۽ دوائن جي سخت کوٽ آهي هن چيو ته اسان اول کان ڳالهين لاءِ تيار هئاسي ۽ ڳالهين لاءِ تيار آهيون هن چيو ته وزيراعظم عمران خان وزيراعظم واري ڪرسي سنڀاليندي چيو هو ته جيڪڏهن دهندستان هڪ وک وڌائي ته اسان ٻه وکون وڌائينداسين شاهه محمود قريشي ڊينش هم منصب کي چيو ته مظلوم ڪشميرين جا اهنج گهٽائڻ ۽ والاريل ڄمون ۽ ڪشمير ۾ ڪرفيو ختم ڪرڻ لاءِ پنهنجو ڪردار ادا ڪري ڊينش جي پرڏيهي وزير چيو ته اسان ان ڳالهه سان متفق آهيون ته ٻن ايٽمي طاقتن وچ ۾ ڇڪتاڻ خطرناڪ ثابت ٿي سگهي ٿي هن چيو ته ان جي ان صورتحال تي سخت نظر آهي ۽ ان سمورن معاملن کي ڳالهين جي ذريعي حل ڪرڻ جي اهميت تي زور ڏنو يورپي يونين جي اعليٰ نمائنده جي بيان، گڏيل قومن جي سيڪيورٽي ڪائونسل جي جنرل سيڪريٽري جو بيان به اسان آڏو آهي ڊنمارڪ کي هن سموري صورتحال تي ڳڻتي آهي جڏهن ته سمورين ڌرين کي چونداسين ته خطي کي ڇڪتاڻ کان بچائڻ لاءِ ڳالهين جو رستو اختيار ڪيو وڃي. ٻنهي پرڏيهي وزيرن جو ان ڏس ۾ گڏيل مشاورت ۽ رابطي جو سلسلو جاري رکڻ تي اتفاق ٿيو. هوڏانهن پرڏيهي وزير شاهه محمود قريشي ناروي جي پرڏيهي وزير اينه اريڪسون سوراعدي سان ٽيليفون تي رابطو ڪيو جنهن ۾ والاريل ڄمون ۽ ڪشمير ۾ انساني حقن جي لتاڙ سميت خطي ۾ امن امان جي صورتحال تي خيالن جي ڏي وٺ ڪئي پرڏيهي وزير پنهنجي ناروي هم منصب کي ڀارت پاران والاريل ڄمون ۽ ڪشمير ۾ هڪ طرفو قدم ۽ ان جي نقصان کان آگاهه ڪيو پرڏيهي وزير چيو ته هندستان 5 آگسٽ کان والاريل ڄمون ۽ ڪشمير ۾ مڪمل لاڪ ڊائون ڪري ڇڏيو آهي جنهن سبب کاڌ خوراڪ جي شين ۽ دوائن جي کوٽ پيدا ٿي ويئي آهي مخدوم شاهه محمود قريشي چيو ته عورتن کي ڄم جي حالت ۾ اسپتالن تائين پهچ نٿي ڏني وڃي شاهه محمود قريشي چيو ته ناروي والاريل ڄمون ۽ ڪشمير ۾ انساني حقن جي سنگين خلاف ورزين کي روڪرائڻ ۾ پنهنجو ڪردار ادا ڪري ناروي جي پرڏيهي وزير ان صورتحال تي ڳڻتي ظاهر ڪندي چيو ته اسان جي خواهش آهي ته هن مسئلي سان لاڳاپيل سموريون ڌريون گڏجي ويهي ان جي پرامن حل لاءِ اڳڀرائي ڪن ٻنهي پرڏيهي وزيرن وچ ۾ افغان امن عمل تي به ڳالهه ٻولهه ٿي ناروي جي پرڏيهي وزير افغان امن عمل ۾ پاڪستان جي ڪردار کي ساراهيو هن چيو ته اسان سمجهيون ٿا ته خطي ۾ امن قائم ڪرڻ لاءِ ڪشمير جي مسئلي جو مستقل حل ضروري آهي ناروي ڌرين جي مائل ٿيڻ جي صورت ۾ پنهنجو مصالحاڻو ڪردار ادا ڪرڻ لاءِ تيار آهي.

ٻِي طرف پرڏيهي وزير مخدوم شاهه محمود قريشي آئيوري پوسٽ جي پرڏيهي وزير مارسل آمونتاانو سان ٽيليفون تي رابطو ڪيو جنهن ۾ ڪشمير جي صورتحال سميت ٻطرفي گڏيل دلچسپي جي معاملن تي خيالن جي ڏي وٺ ڪئي ويئي پرڏيهي وزير چيو ته پاڪستان آئيوري ڪوسٽ کي اولهه آفريڪا جو اهم ملڪ سمجهي ٿو شاهه محمود قريشي پنهنجي هم منصب کي ڀارت پاران والاريل ڄمون ۽ ڪشمير ۾ ٿيندر انساني حقن جي سنگين ڀڃڪڙي کان اگاهه ڪيو پرڏيهي وزير چيو ته اسان کي ڀارت جي ان هڪطرفي قدمن کان پوءِ هڪ نئون انساني الميو جنم وٺندي نظر اچي رهيو آهي هن چيو ته ان صورتحال ۾ آئيوري ڪوسٽ سيڪيورٽي ڪائونسل جو ميمبر هجڻ جي ناطي انساني حقن جي انهن سنگين ڀڃڪڙِن کي روڪڻ ۾ پنهنجو ڪلردار ادا ڪري آئيوري ڪوسٽ جي پرڏيهي وزير چيو ته اسان جي صورتحال تي نظر اهي سيڪيورٽي ڪائونسل جي ميمبر جي حيثيت سان پنهنجي تعاون جو اشارو ڏنو.

 

ڪراچي جو ڪچرو سڀني کي صاف ڪرڻ کپي پر تحريڪ انصاف ۽ ايم ڪيو ايم سياسي پوائنٽ اسڪورنگ ۾ مصروف آهن: سعيد غني

ڪراچي (اسٽاف رپورٽر)  سنڌ جي اطلاعات ۽ محنت واري صوبائي وزير سعيد غني چيو آهي ته وڏي بد قسمتي جي ڳالهه آهي ته ڪراچي ۾ ڪچري کي اسان سڀني کي گڏجي ڪري صاف ڪرڻ کپي پر تحريڪ انصاف ۽ ايم ڪيو ايم جيڪي ٻئي وفاقي سرڪار ۾ شامل آهن اهي ڪراچي جي ان اشو تي صرف سياسي پوائنٽ اسڪورنگ ڪري رهيا آهن ۽ اهي ڪراچي کي سازشن تحت عذاب ۾ مبتلا ڪري رهيا آهن ته جيئن سنڌ ۾ پيپلزپارٽي جي اميج کي نقصان پهچائي سگهجي ڪچري سان سنڌ حڪومت جو سڌو سئنون قانون جي مطابق تعلق نه آهي لڳي ٿو ته ميئر ڪراچي ان وقت پي ٽي آئي جي ايجنڊي تي آهي ۽ هو ايم ڪيو ايم، پي ٽي آئي جي بي ٽيم آهي مان وٽ اهڙي ڪا پيرني ناهي جيڪا جادو پڙهي ۽ پاڻي سڪي وڃي پيپلزپارٽي ۾ فارورڊ بلاڪ بڻائن جي خواهش ۽ خواب نوان ناهن ۽ جيڪي خواب ۽ خواهش اهي رکندا آهن سنڌ جي عوام گذريل 10 سالن کان هنن کي ذليل ۽ رسوا ڪيو آهي ۽ هاڻي اهي ڪجهه بچي ويا آهن اهي به انشاالله آئنده ختم ٿي ويندا. اهڙن خيالن جو اظهار هن جامع ڪراچي جي شيخ زاهد اسلامڪ سينٽر ۾ نيشنل انسٽي ٽيوٽ آف ليبر ايڊمنسٽريشن (نيلات) جي انظام هيٺ گولڊن جوبلي جي موقعي تي پوسٽ گريجوئيٽ ڊپلومه ايوارڊ جي تقريب کانپوءِ ميڊيا سان ڳالهه ٻولهه ڪندي ڪيو. ان موقعي تي پورهئي کاتي وارو سيڪريٽري رشيد احمد سولنگي، ڪاشف گلزار ڪمشنر سيسي، شيخ امتياز علي ڊي جي نيلات، ۽ ٻيا به ان سان گڏ موجود هئا. ميڊيا سان ڳالهه ٻولهه ڪندي اطلاعات ۽ پورهئي کاتي واري وزير سعيد غني چيو ته قنون جي مطابق گهٽين، پاڙن ۽ روڊن تان ڪچري کڻڻ جو ڪم ڊي ايم سيز جو آهي. هن چيو ته سنڌ سولڊ ويسٽ مئنيجمينٽ بورڊ ڊي ايم سيز جي مدد لاءِ بڻايو ويو آهي ۽ هو پنهنجي مرضي سان نه بلڪه ڊي ايم سيز جي ڪونسل جي منظوري کانپوءِ انهن ڊي ايم سيز ۾ صفائي ۽ ڪچري کڻڻ جو ڪم ڪندو آهي. سعيد غني چيو ته چار ڊي ايم سيز کي اختيار ڏنو آهي ۽ ٻن کي ناهي ڏنو ان لاءِ سولڊ ويسٽ ان چار ڊي ايم سيز ۾ ڪم ڪندو آهي البت دسٽرڪ ويسٽ ۾ مذڪوره ڪمپني مهائدي مطابق ڪم ناهي ڪيو انهي لاءِ ان جو مهائدو رد ڪيو ويو آهي ۽ هاڻي سولڊ ويسٽ ٽن ضلعن ۾ ڪم ڪري رهيو آهي ۽ مان دعوي سان چوان ٿو ته ان وقت ڊسٽرڪ ايسٽ، ملير ۽ سائوٿ ۾ ٻين ڊسٽرڪ جي مقابلي ۾ صفائي سٿرائي جي صورتحال بهتر آهي. سعيد غني چيو ته ميڊيا جيڪو ڪچرو ڏيکاري ٿو اهو سينٽرل يا ڪورنگي يا ڪنٽونمينٽ بورڊ ۽ ٻين وفاقي ايجنسين جي انتظام هيٺ علائقن کي ڏيکاري ٿو. هن چيو ته گذريل مهيني جڏهن مان بلديات جو وزير هئس ان وقت هڪ اجلاس دوران ڊسٽرڪ سينٽرل ۽ ڪورنگي جي چيئرمين اسان کان ان حوالي سان مدد گهري ته اسان سنڌ سولڊ ويسٽ کي پابند بڻايو ته هو ان جي مدد ڪن ۽ انهن جي دسٽرڪ جي ڪچري کي ليند فل سائيڊ تائين پهچائڻ ۾ ڪردار ادا ڪري ۽ ان کانپوءِ پاڻ ڊي ايم سي سينٽرل ۽ ڪورنگي جي چيئرمين ان تي اسان جو شڪريو ادا ڪيو سعيد غني چيو ته مونکي افسوس آهي ته ميئر ڪراچي گذريل ڏينهن بحريه ٽائون ۽ ٻين ادارن جو شڪريو ادا ڪيو ته هو ان جي مدد ڪري رهيا آهن پر هاڻي تائين بحريه ٽائون جيڪا صفائي ڪئي ان مان 31 ڊمپر لينڊ فل سائيد تي انهن پهچايا مان به انهن جو شڪريو ادا ڪندو آهيا سنڌ سولڊ ويسٽ صرف ڊسٽرڪ سينٽرل مان 183 ڊمپر کڻي ڪري پهچايا ته ميئر ڪراچي ٻه لفط شڪريئي جا انهن کي به چئي ها هن چيو ته لڳي ٿو ته ميئر ڪراچي پي ٽي آئي جي ايجنڊي تي آهي ۽ اها ڳالهه مان ڪيترائي مهينن کان چوان پيو ته ان وقت ايم ڪيو ايم ڪراچي ۾ پي ٽي آئي جي بي ٽيم بڻيل آهي جيڪو ڪم پي ٽي آئي نٿي ڪري سگهي  اهو ايم ڪيو ايم کان ڪرائي رهي آهي سعيد غني چيو ته مان ڪيتري عرصي کان چئي رهيو آهيان ته سيوريج جي لائنن ۽ گٽرن ۾ ٻوريون وجهي بند ڪيو پيو وڃي ۽ اڄ پاڻ علي زيدي ان ڳالهه جو اعتراف ڪندي پاڻ هڪ ٽوئٽر تي پوسٽ ڪئي ته سيوريج جي لائنن ۾ ٻوريون وڌيون ويون آهن. سعيد غني وڌيڪ چيو ته ميئر ڪراچي چوي ٿو ته صوبائي حڪومت کي ٽيڪس نه ڏيو ان سال سنڌ حڪومت ڪراچي جي مختلف ترقياتي ڪمن تي 125 ارب خرچ ڪرڻ پئي وڃي جڏهن ته ان مقابلي ۾ وفاقي حڪومت جنهن کي ميئر ڪراچي ٽيڪس نه ڏيڻ جو عوام کي چئي رهيو اهي ان پنهنجي بجيٽ ۾ صرف 12 ارب رپيا ڪراچي لاءِ رکيا اهن هن چيو ته وفاقي حڪومت کان 162 ارب رپين جو مطالبو نه ڪري رهيا آهيون ڪي فور جي منصوبي لاءِ ڳالهه ناهي ڪئي ويندي 1200 ڪيوسڪ پاڻي جي اضافي ڪوٽا لاءِ ايم ڪيو ايم ڪڏهن ناهي ڳالهايو سعيد غني چيو ته اسان ڪراچي ۾ سڀن کان وڌيڪ ڪم ڪري رهيا آهيون ۽ اسان ڪراچي کي مڪمل طور اوون ڪري سگهون ٿا ۽ نه ئي ان جي مسئلن کان پوئٽي هٽنداسين هن چيو ته اسان جي توجو ڪراچي تي آهي پر افسوس ته وفاقي وزير علي زيدي هجي يا ميئر ڪراچي وسيم اختر ٻئي ان تي سياسي پوائنٽ اسڪورنگ ڪري هيا آهن.

 

 

ايف بي آر ٽيڪس  نيٽ کي وسعت ڏيندي هڪ لک امير ٽيڪس نان فائلرز کي نوٽيس جاري ڪري ڇڏيا

اسلام آباد(ويب ڊيسڪ) فيڊرل بورڊ آف روينيو ٽيڪس  نيٽ کي وسعت ڏيندي هڪ لک امير ٽيڪس نان فائلرز کي نوٽيس جاري ڪري ڇڏيا. ايف بي آر اشارو ڏنو ته ڪجهه ڏينهن ۾ وڌيڪ 1 لک نوٽيس موڪليا ويندا جڏهن ته نوٽيسز جو جواب نه ڏيندڙن خلاف  ڪارروائي ڪئي ويندي. اسلام آباد ۾ ايف بي آر جي اِن لينڊ روينيو پاليسي ميمبر، آءِ آر آپريشنز جي ميمبر ۽ آءِ ٽي جي ميمبر گڏجي پريس ڪانفرنس ڪئي. لينڊ روينيو پاليسي جي ميمبر ڊاڪٽر حامد سرور چيو ته سالياني 6 لک رپيا بجلي جو بل ادا ڪندڙ دڪاندارن کي سيلز ٽيڪس رجسٽريشن  ۾ آڻينداسين ۽ ٽيڪس رجسٽرڊ ماڻهن جو انگ 4 لک تائين وڌائينداسين.  ان موقعي تي آءِ آر آپريشنز جي ميمبر سيما شڪيل چيو ته هڪ لک هاءِ نيٽ ورٿ وارن ماڻهن کي ٽيڪس نيٽ ۾ آنن جي لاءِ نوٽيس جاري ڪري ڇڏيا آهن جڏهن ته وڌيڪ هڪ لک ماڻهن کي نوٽيس جاري ڪنداسين. هن ٻڌايو ته نوٽيسز کي جاري ڪرڻ وارو عمل مرحليوار جاري رهندو ۽ نوٽيسز بينڪ مان رقم ڪڍرائڻ سميت معاشي سرگرمين جي بنياد تي جاري ڪيا ويندا. ان حوالي سان آءِ آر پاليسي جي ميمبر  ڊاڪٽر حامد عتيق سرور جو چوڻ هو ته سيلز ٽيڪس رجسٽريشن وارن جو انگ 3 کان 4 لک تائين وڌائينداسين، جيڪي هن وقت اڍائي لک آهن. هن چيو ته سالياني 6 لک رپيا يا ان کان وڌيڪ بجلي بل ادا ڪندڙ، هڪ هزار مربع فٽ کان وڌيڪ دڪان وارا، ريٽيلرز ۽ صنعتي ڪنڪشنز رکندڙن جي سيلز رجسٽريشن  ترجيحن ۾ شامل آهن. ڊاڪٽر حامد عتيق سرور چيو ته ملڪ ۾ 4 وڏا ريٽيلرز رجسٽرڊ آهن جيڪي ڪپڙي ۽ جوتن سميت 15 کان 20 وڏن برانڊن تي ٻڌل آهن. ان کان سواءِ  آءِ ٽي ايف بي آر جي ميمبر محمود اسلم جو چوڻ هو ته سيلز ٽيڪس رجسٽريشن ۾ ماڻهن کي شڪايتون هيون پر سيلز ٽيڪس رجسٽريشن کي آسان ڪيو ويو آهي، ڪو به شخص پنهنجي ڪمپيوٽر ۽ موبائيل فون جي ذريعي سيلز ٽيڪس رجسٽريشن ڪرائي سگهي ٿو.

 

هتي ويچارا ٿي اچن ٿا، اهو وقت پري نه آهي جڏهن ڪراچي ۾ قبرن لاءِ جاءِ نه ملندي: سنڌ هاءِ ڪورٽ

ڪراچي (اين اين آءِ) سنڌ هاءِ ڪورٽ گلستان جوهر ۾ واٽر بورڊ جي زمين جي چائنا ڪٽنگ ۽ غيرقانوني وڪرو جي معاملي جي چئن هفتن ۾ انڪوائري مڪمل ڪرڻ جي هدايت ڪري ڇڏي سنڌ هاءِ ڪورٽ هن ڪيس ۾ گرفتار چنو مامون جو فرنٽ مين سرڪاري آفيسر ۽ ٻين جوابدارن جي ضمانت جي درخواستن جي ٻڌڻي ٿي پراسيڪيوٽر نيب موقف اختيار ڪيو ته سنڌ حڪومت جي زمين شهري انتظاميه ڪي ايم سي الاٽ ڪري ڇڏي چيف جسٽس سنڌ هاءِ ڪورٽ جسٽس احمد علي شيخ ريمارڪس ڏنا ته هتي ويچارا بڻجي اچن ٿا ان جو وس هلي ته قبرستان به کپائي ڇڏين. ڪلفين وارن جي اڪائونٽ مان ڪروڙين رپيا نڪري رهيا آهن اهو وقت پري نه آهي جڏهن هن شهر ۾ قبرن لاءِ جاءِ نه ملندي جوابدارن جي وڪيل موقف ڏنو ته هن زمين جو ديواني ڪيس به التوا هيٺ آهي چيف جسٽس چيو ته هر جڳاڙي پلاٽ ۾ ديواني ڪيس آهي ان ۾ اسٽي آرڊر به هوندو آهي ۽ 2-2 سال ڪيس نٿو هلي عدالت نيب کي چئن هفتن ۾ انڪوائري مڪمل ڪرڻ جي هدايت ڪندي ٻڌڻي 26 سيپٽمبر تائين ملتوي ڪري ڇڏي.