تازيون خبرون
ٽرمپ جي ڪشمير مسئلي تي وري ٽياڪڙي جي آڇ، ڀارت تي ڇڪتاڻ گهٽائڻ لاءِ زور - وفاقي حڪومت جو نجي شخصيتن تائين نيب ڪارروائي جا اختيار ختم ڪرڻ جو فيصلو - سرڪاري ملازم غير قانوني حڪم مڃڻ جو پابند ناهي: سپريم ڪورٽ - ستلج ۽ سنڌو درياهه ۾ پاڻي جي وهڪري ۾ واڌ، 33 ڳوٺ پاڻي هيٺ، لڏ پلاڻ - ڪرنٽ اڪائونٽ خساري ۾ لاٿ وڏي ڪاميابي آهي: عمران خان - صادق سنجراڻي سان اسد قيصر جي ملاقات، ڪشمير مسئلي کي بين الاقوامي سطح تي اٿارڻ لاءِ پارليامينٽ جا وفد موڪلڻ جو فيصلو - شاهه محمود قريشي جو آئيوري پوسٽ، ڊينش ۽ ناروي جي پرڏيهي وزيرن سان ٽيليفون تي رابطو، والاريل ڪشمير جي صورتحال تي ڳالهيون - ڪراچي جو ڪچرو سڀني کي صاف ڪرڻ کپي پر تحريڪ انصاف ۽ ايم ڪيو ايم سياسي پوائنٽ اسڪورنگ ۾ مصروف آهن: سعيد غني - ايف بي آر ٽيڪس  نيٽ کي وسعت ڏيندي هڪ لک امير ٽيڪس نان فائلرز کي نوٽيس جاري ڪري ڇڏيا - هتي ويچارا ٿي اچن ٿا، اهو وقت پري نه آهي جڏهن ڪراچي ۾ قبرن لاءِ جاءِ نه ملندي: سنڌ هاءِ ڪورٽ

Daily Archives: August 7, 2019

جيڪو ڀارت چيو اسان نٿا مڃون، رت جي آخري ڦڙي تائين وڙهنداسين: عمران خان

اسلام آباد (اين اين آءِ) وزيراعظم عمران خان چيو آهي ته جيڪڏهن ڀارت حملو ڪيو ته جواب ڏينداسين، رت جي آخري ڦڙي تائين وڙهنداسين، ڀارت ڪالهه جيڪو ڪيو اهو ان جي اليڪشن جو منشور هو، اهو ئي ان جو نظريو آهي، آر ايس ايس جا باني رڳو هندو راڄ چاهين ٿا، هندن جي نظريي کي سمجهڻ تي قائد اعظم کي خراج تحسين پيش ڪريون ٿا، ڀارت پنهنجي نظريي لاءِ آئين ۽ سمورن عالمي قانون جي ڀڃڪڙي ڪئي آهي، ڪشميرين کي طاقت جي نشي ۾ ڇٿڻ جي ڪوشش تي ان پاران رد عمل ايندو، اڳڪٿي ڪريان ٿو ٻيهر پلواما جهڙو واقعو ٿيندو ۽ الزام پاڪستان تي لڳندو، نيو ڪليئر بليڪ ميلنگ نه پيو ڪري، هي ايڪشن وٺڻ جو وقت آهي، دنيا کي اپيل آهي ته اها پنهنجن ٺاهيل قانون تي عمل ڪرائي، ائين نه ٿيو ته اسان ذميوار ناهيون، ماضي ۾ ايڪشن نه وٺڻ تي ڀارت کي هٿي ملي، هر فورم تي پنهنجو ڪيس وڙهنداسين، ڏسي رهيا آهيون ته انٽرنيشنل ڪرمنل ڪورٽ ۾ ڪئين وڃون، ڀارتي قدم کي جنرل اسيمبلي ۾ اٿارينداسين، ڪشميرين سان سڄو پاڪستان نه پر سڄي مسلم دنيا گڏ آهي، اڱاري تي پارليامينٽ جي گڏيل اجلاس ۾ والاريل ڪشمير جي معاملي تي پاليسي بيان ڏيندي وزيراعظم عمران خان چيو ته اسان کي ان اجلاس جي اهميت کي سمجهڻ گهرجي، هن اجلاس کي پاڪستاني قوم پر سڄي دنيا ڏسي رهي آهي، هن چيو ته جيڪڏهن اپوزيشن ائين گوڙ ڪرڻ چاهي ٿي ته مان ويهي رهان ٿو، جنهن تي شهباز شريف چيو ته مان پنهنجي دوستن کي گذارش ڪريان ٿو ته ان کي ٻڌو پوءِ اسان جواب ڏينداسين، وزيراعظم چيو ته هن سيشن جي اهميت رڳو ڪشميرين، پاڪستان لاءِ ناهي پر ڀارت جيڪو فيصلو ڪيو ان جا اثر سڄي دنيا تي پوندا، هي اهم آهي ته تحمل سان ٻڌو ته اڄ هتان اهم پيغام ويندو، هن چيو ته منهنجي حڪومت جي پهرين ترجيح هئي ته پاڪستان ۾ غربت کي ختم ڪيو وڃي، ان لاءِ سمورن پاڙيسرين سان سٺا لاڳاپا قائم ڪيا وڃن ڇو ته عدم استحڪام جا اثر واڌ جي شرح تي پون ٿا، عمران خان چيو ته مان سمورن پاڙيسرين سان رابطو ڪرڻ جي ڪوشش ڪئي ته خطي ۾ سيڙپڪاري ايندي ته غربت ختم ٿي ويندي، مان ڀارت سان رابطو ڪيو، توهان هڪ قدم اسان ڏانهن وڌائيندا ته اسان 2 قدم وڌائينداسين، افغانستان، چين ۽ ٻين ملڪن جو دورو ڪيو، تازوئي آمريڪا جو دورو ڪيو، هن چيو ته آمريڪا جو دورو ان ڪوشش جي ڪڙي هئي ته ماضي ۾ جيڪي مسئلا هئا اهي ختم ٿين ته جيئن پاڪستان کي استحڪام ملي ۽ غربت ختم ٿي سگهي، هن چيو ته مودي پاڪستان ۾ دهشتگردن جي موجود هجڻ جا خدشا ظاهر ڪيا هئا، اسان کيس سمجهايو ته 2014 ۾ آرمي پبلڪ سانحو ٿيو ته سمورين سياسي پارٽين نيشنل ايڪشن پلان پاس ڪيو هو ته پاڪستان جي زمين کي ڪنهن دهشتگردي ٽولي پاران استعمال ڪرڻ جي اجازت نه ڏني ويندي، اسان ڀارت سان ڳالهين جي خواهش جو اظهار ڪيو پر کيس ان ۾ دلچسپي نه هئي، ان کانپوءِ پلواما واقعو ٿيو، پلواما ۾ مودي کي سمجهايو ته ان ۾ پاڪستان جو هٿ نه هو پر ان وقت ڀارت ۾ چونڊون هيون ۽ کيس ڪشمير ۾ ٿيندڙ ظلمن کان دنيا جو ڌيان هٽائڻو هو، وزيراعظم چيو ته ڀارت جو مقصد جنگي جنون ۽ پاڪستان خلاف نفرت پيدا ڪري اليڪشن ۾ ڪامياب ٿيڻ هو، ڀارت ڊوزيئر بعد ۾ موڪليو، جهاز پهريان موڪليا، ان جو پاڪستان جي هوائي فوج ڀرپور جواب ڏنو، اسان ان جو پائيليٽ پڪڙيو ته اهو ٻڌائڻ لاءِ آزاد ڪيو ته اسان جنگ نٿا چاهيون، هن چيو ته ان کانپوءِ اسان ڀارتي چونڊن تائين خاموش ٿي وياسين، هن چيو ته بشڪڪ ۾ ڪوٺايل ڪانفرنس ۾ ڀارت جو رويو ڏسي اسان کي احساس ٿيو ته هو اسان جي امن جي ڪوششن کي غلط سمجهي رهيو آهي، ان کي اسان جي ڪمزوري سمجهي رهيو آهي ان لاءِ اسان وڌيڪ ڳالهيون نه ڪرڻ جو فيصلو ڪيو، وزيراعظم چيو ته ٻه طرفي طور تي هي معاملو اڳتي نه پيو وڌي ۽ ننڍي کنڊ ۾ ڪشمير مسئلي سبب هڪ ارب ماڻهو متاثر ٿي رهيا آهن ان لاءِ آمريڪي صدر سان ملاقات ۾ درخواست ڪئي ته هو ٽياڪڙي جو ڪردار ادا ڪري ۽ ڀارت جو رد عمل توهان جو سامهون هو، هن چيو ته جنهن جو خدشو هو اهو سامهون اچي ويو، هن چيو ته اڄ ڀارت ۾ جيڪي ماڻهو ٻه قومي نظريي کي نه مڃيندا هئا اڄ اهي به چئي رهيا آهن ته قائد اعظم جو ٻه قومي نظريو ٺيڪ هو، هو چئي رهيا آهن ته هتي سمورين اقلتين، مسلمانن ۽ عيسائي برادري سان به ساڳيو ورتاءُ ٿي رهيو آهي، هن چيو ته قائد اعظم 11 آگسٽ جي تقرير ۾ چيو هو ته سڀ پنهنجن عبادتگاهن ۾ وڃڻ لاءِ آزاد آهن ۽ اسان غلطي سان چئون ٿا ته قائد اعظم سيڪيولر هو، هن چيو ته حقيقت ۾ هي ٻه نظريا هئا هڪ ته نسل پرست نظريو اهو هو ته مسلمانن کي برابري جو درجو نٿو ڏنو وڃي، ٻيو نظريو قائد اعظم جو هو ته هتي سڀ برابر آهن، اهو نظريو رياست مديني مان ورتو هو، وزيراعظم چيو ته نبي صلم آخري خطبي ۾ چيو هو ته اسان سڀ آدم جو اولاد آهيون، هن نسل پرستي کي رد ڪيو هو ۽ پاڪستان جنهن نظريي تي ٺهيو ان ۾ ساڙ نه هو، هن چيو ته قائد اعظم 11 آگسٽ جي تقرير ۽ تحريڪ پاڪستان جي تقرير ۾ چيو هو ته هندستان ۾ کين بنيادي حق نه ملندا ته هو مسلم ڪارڊ نه کيڏي رهيو هو جنهن نظريي سان ان جو مقابلو آهي ان کي هو سمجهي ويو هو، هن چيو ته اڄ جيڪو ڪجهه ڀارت ۾ ٿي رهيو آهي اسان ان جا مخالف آهيون، اسان جي ملڪ ۾ اقلتين سان ناانصافي ٿئي ته اسان پنهنجي دين ۽ نظريي جي خلاف وڃون ٿا پر موجوده بي جي پي جي حڪومت جڏهن گوشت کائيندڙن کي ٽنگي ڇڏي ٿي ۽ ماڻهو انهن کي ماري ڇڏين ٿا جيئن انهن ڪالهه ڪشمير ۾ ڪيو، گذريل 5 سال جيڪو تشدد ڪيو ۽ جيڪو عيسائي برادري سان ڪيو اهو ڀارت جو نظريو آهي، وزيراعظم چيو ته اسان جو مقابلو نسل پرست نظريي سان آهي، ڪشيمر ۾ انهن پنهنجي نظريي موجب ڪيو پر اهي پنهنجي ملڪ جي آئين، سپريم ڪورٽ، والاريل ڪشمير جي فيصلي جي خلاف ويا، گڏيل قومن جي سلامتي ڪونسل ۽ جنرل اسيمبلي جي ٺهرائن ۽ شملا معاهدي جي خلاف ويا، هن چيو ته ڀارتي حڪومت ڪشيمر جي خاص حيثيت تبديل ڪري مسلمانن کي اقليت ۾ تبديل ڪرڻ چاهي ٿي، اڪثريت کي اقليت ۾ تبديل ڪرڻ جنيو ڪنويشن جي آرٽيڪل 49 جي خلاف آهي ان کي جنگي ڏوهه سمجهيو وڃي ٿو.

 

حڪومتي پاليسي جي تائيد، ڪشميرين لاءِ هر حد تائين وينداسين: پاڪ فوج جو اعلان

راولپنڊي(ويب ڊيسڪ) چيف آف آرمي اسٽاف جنرل قمر جاويد باجوه جو چوڻ آهي ته پاڪ فوج، حق خودارادي جي لاءِ ڪشميري ڀائرن سان گڏ بيٺي آهي ۽ اسان ان ذميواري کي پڄاڻي تائين پهچائڻ جي لاءِ هر حد تائين وينداسين. پاڪ فوج جي شعبي آءِ ايس پي آر طرفان جاري بيان ۾ چيو ويو آهي ته آرمي چيف جنرل قمر جاويد باجوه جي صدارت هيٺ ڪور ڪمانڊ ڪانفرنس رٿي وئي. ڪور ڪمانڊر ڪانفرنس ۾ ڪشمير جي صوتحال جي هڪ نقطي واري ايجنڊا تي غور ڪيو ويو. اجلاس ۾ شرڪت ڪندڙن ڪشمير بابر ڀارتي قدم رد ڪرڻ جي حڪومتي پاليسي جي مڪمل تائيد ڪندي چيو ته پاڪستان، ڪشمير تي شرم جوڳو قبضو آرتيڪل 370 يا 35 اي جي ذريعي قانوني بڻائڻ جون ڀارتي ڪوششون ڪڏهن به قبول نه ڪنداسين. آرمي چيف جو چوڻ هو ته پاڪ فوج حق خوداراديت جي لاءِ ڪشميري ڀائرن سان گڏ بيٺي آهي ۽ اسان ان ذميواري کي پڄاڻي تائين پهچائڻ جي لاءِ هر حد تائين وينداسين.

 

ڪراچي ۾ حد دخليون، سنڌ سرڪار ناڪام، وفاقي سرڪار فلاپ ٿي ته ڇا ٿيندو؟: سپريم ڪورٽ

ڪراچي (ويب ڊيسڪ) سپريم ڪورٽ ڪراچي رجسٽري فٽ پاٿن ۽ پارڪن تان چوڪيون هٽائڻ لاءِ 9 آگسٽ تائين مهلت ڏئي ڇڏي. سپريم ڪورٽ ڪراچي رجسٽري ۾ جسٽس گلزار احمد جي سربراهي ۾ ڪراچي جي فٽ پاٿن ۽ پارڪن تان پوليس ۽ رينجرز جون چوڪيون هٽائڻ بابت ڪيس جي ٻڌڻي ٿي. جسٽس گلزار احمد ريمارڪس ڏنا ته ڪراچي ۾ تازو برسات پئي، اسان ڏٺو ته ڪجهه ماڻهو ڪيفي پيالا تي ويهي چائي جو مزو وٺي رهيا هئا ۽ ڪجهه ماڻهن ته رڳو آفيس مان ويهي ئي پتو لڳايو ته ڪرنٽ لڳڻ سان ڪيترا ماڻهو فوت ٿيا. هن ريمارڪس ڏيندي وڌيڪ چيو ته ڪراچي جو ميئر وسيم اختر رين ڪوٽ پائي برسات جي پاڻي مان لطف اندوز ٿيندو رهيو، جڏهن ته ان جي ڀرپاسي ۾ موجود سمورا ماڻهو پِسندا رهيا، شهري هر شئي کي ڏسي رهيا آهن، توهان کي اندازو ناهي ته ان جا اثر ڪهڙا هوندا. عدالت چيو ته وفاق طرفان هاڻ ڪراچي کي صاف ڪرڻ جو بار کنيو ويو آهي، جيتوڻيڪ شهري حڪومت ۽ صوبائي حڪومت مڪمل طور ناڪام آهي، جيڪڏهن وفاقي حڪومت به فيل ٿي وڃي ٿي ته توهان کي اندازو آهي ڇا ٿيندو؟ پوءِ سپريم ڪورٽ ڪراچي رجسٽري پوليس چوڪيون هٽائڻ لاءِ 9 آگسٽ تائين مهلت ڏني ۽ ان ئي ڏينهن ان حوالي سان رپورٽ به طلب ڪري ورتي، جڏهن ته عدالت ڪيس جي ٻڌڻي 9 آگسٽ تائين ملتوي ڪري ڇڏي.

 

آرٽيڪل 370 جو خاتمو بدامني ۽ وڏي احتجاج جو سبب بڻجي سگهي ٿو: ايمنسٽي انٽرنيشنل

نئين دهلي (ويب ڊيسڪ) ايمنسٽي انٽرنيشنل ڀارت خبردار ڪيو آهي ته نئين دهلي طرفان خطي جي اسٽيڪ هولڊرن سان صلاح مشوري بنا والاريل ڪشمير جي خاص حيثيت ختم ڪرڻ جو فيصلو ۽ شهرين جي حقن کي مڪمل طور معطل ڪرڻ ڇڪتاڻ ۾ واڌ جو سبب بڻجي سگهي ٿو. ايمنسٽي انٽرنيشنل ڀارت جي هڪ بيان ۾ چيو ويو آهي ته ڀارتي حڪومت جو والاريل ڪشمير جي اسٽيڪ هولڊرن سان صلاح مشوري کانسواءِ آئين تحت اتان جي خاص حيثيت کي ختم ڪرڻ جو هڪ طرفو فيصلو، شهرين جي حقن کي مڪمل طور معطل ڪرڻ، مواصلاتي نظام کي مڪمل طور بند ڪرڻ سان امڪاني طور ڇڪتاڻ، رياست ۾ ماڻهن کي ڌار ڪرڻ ۽ انساني حقن جي وڌيڪ ڀڃڪڙين جو خطرو آهي. انساني حقن جي اداري طرفان چيو ويو آهي ته آرٽيڪل 370 جو خاتمو رياست ۾ بدامني ۽ وڏي سطح تي احتجاج جو سبب بڻجي سگهي ٿو، وادي ۾ هزارن جي انگ ۾ واڌو فوج مقرر ڪئي وئي آهي ۽ ڪرفيو لاڳو ڪري رهواسين جي آزاداڻي چُرپر محدود ڪئي وئي آهي، کين پرامن احتجاج جي حق کان روڪيو ويو آهي. گڏوگڏ اهو به چيو ويو آهي ته ڄمون ۽ ڪشمير ۾ ٽيلي ڪميونيڪيشن سروسز کي اڻڄاتل مدي لاءِ معطل ڪرڻ به عالمي انساني حقن جي معيار موجب ناهي. بيان ۾ ايمنسٽي انٽرنيشنل ڀارت جي سربراهه آڪر پٽيل جو حوالو ڏيندي چيو ويو ته گذريل ڪجهه ڏينهن ۾ والاريل ڪشمير ۾ هزارين فوجين جي واڌو مقرري، ٽيلي فون ۽ انٽرنيٽ سروسز جي معطلي، پرامن اسيمبلي تي پابندي کي ڏٺو ويو آهي، جنهن هتان جي عوام کي اڳ ئي ڪناري تي ڪري ڇڏيو آهي، ان صورتحال کي وڌيڪ سنگين ان وقت بڻايو ويو، جڏهن اهم سياسي اسٽيڪ هولڊرن کي نظربند ڪيو ويو ۽ والاريل وادي جي حوالي سان پارليامينٽ جو اهم فيصلو اتان جي ماڻهن جي مشاورت کانسواءِ ڪيو ويو. ايمنسٽي انٽرنيشنل انڊيا بيان ۾ زور ڏنو آهي ته والاريل وادي ۾ ڀڃڪڙين جو خاتمو ان وقت تائين نٿو ٿي سگهي، جيستائين اتان جي ماڻهن کي ان معاملي تي ڳالهائڻ جي اجازت نه ڏني وڃي.

 

اسان جو ٻچو ٻچو ڪشمير سان گڏ آهي، پاڪستان ڪشميرين کي اڪيلو نه ڇڏيندو: فردوس عاشق اعواڻ

اسلام آباد (اين اين آءِ) وزيراعظم عمران خان جي سڌسماءِ جي خاص مددگار فردوس عاشق اعواڻ هڪ دفعو ٻيهر واضح ڪيو آهي ته پاڪستان ڪشميرين کي اڪيلو نه ڇڏيندو ڪشمير جو هر شخص پاڪستان ۽ پاڪستاني پارليامينٽ ڏانهن ڏسي رهيو آهي ڪشميرين جي اخلاقي سياسي ۽ سفارتي حمايت جاري رکڻ گهرجي اڱاري تي پارليمينٽ هائوس ٻاهران ميڊيا سان ڳالهائيندي فردوس عاشق اعواڻ چيو ته اڄ ڪشميري عوام ۽ ان جي جدوجهد سان ٻڌي جو ڏينهن آهي هن چيو ته اڄ سياست جو ڏينهن نه آهي ڪشميرين سان ٻڌي جو پيغام ڏيڻ گهرجي ڪشميرين جي اخلاقي ۽ سياسي ۽ سفارتي حمايت جاري رکڻ گهرجي هن چيو ته هي ٺهراءُ اپوزيشن ۽ پارليمان جي خواهشن مطابق هوندو پاڪستان جي موقف جي حمايت ڪندڙ اپوزيشن اڳواڻن کي به خراج تحسين پيش ڪيو هو هن چيو ته ڪشميرين سان ٻڌي سان پيغام ڏيڻ اسان جو ٻچو ٻچو ڪشمير سان گڏ آهي. هن چيو ته 9 لک ڪشمير جي آواز کي دٻائڻ لاءِ ڀارتي فوج آهي هن چيو ته ڪشمير جو هر شخص پاڪستان ۽ پاڪستاني پارليامينٽ ڏانهن ڏسي رهيو آهي ڪشمير اسان جو گڏيل مسئلو آهي هن ٻڌايو ته وزيراعظم بين الاقوامي سطح تي رابطا ڪري رهيو آيه ۽ مختلف ملڪن جي سربراهن سان ڳالهيون ڪري رهيو آهي ته جيئن لاڳواپيل عالمي فورمن تي ڪشمير جو ڪيس بهتر نموني سان پيش ڪيو وڃي.

 

ڀارتي لوڪ سڀا ۾ والاريل ڪشمير جي خاص حيثيت ختم ڪرڻ بابت بل پيش، اپوزيشن جي مخالفت، مودي سرڪار جي جارحيت خلاف سخت احتجاج ڪيو.

نئين دهلي (ويب ڊيسڪ) ڀارتي لوڪ سڀا ۾ والاريل ڪشمير جي خاص حيثيت ختم ڪرڻ بابت بل پيش ڪيو ويو ته اپوزيشن ميمبرن مخالفت ڪئي ۽ مودي سرڪار جي جارحيت خلاف سخت احتجاج ڪيو. پرڏيهي ميڊيا موجب راجيا سڀا کان منظوري بعد گھرو وزير اميت شاهه آئين جي آرٽيڪل 35 اي ۽ 370 جي خاتمي جو بل اڄ لوڪ سڀا ۾ پيش ڪيو ته اپوزيشن ميمبرن اڳ کان پيش ڪيل تحريڪ التويٰ تي اسپيڪر کان اجلاس جي ايجنڊا ملتوي ڪرڻ جي درخواست ڪري ڇڏي. لوڪ سڀا اسپيڪر اپوزيشن ميمبرن جي درخواست کي بلڊوز ڪندي گھرو وزير کي بل پيش ڪرڻ جي هدايت ڪئي، جنهن تي اپوزيشن ميمبر پنهنجي سيٽن تان اُٿي بيهي رهيا ۽ بي جي پي عددي اڪثيريت سبب اسيمبلي ۾ غنڊاگردي خلاف سخت احتجاج ڪيو. لوڪ سڀا ۾ ڪانگريس جي اڳواڻ اڌير رانجن چوڌري بحث ۾ حصو وٺندي چيو ته هاڻوڪي مودي حڪومت آمريڪي ٽياڪڙي جي معاملي تي چيو هو ته اهو پاڪستان ۽ هندستان جو اندروني معاملو آهي ته ڇا هاڻ اهو هڪ اندروني معاملو ناهي رهيو. اولهه بنگال جي وڏي وزير ممتا بينرجي بل کي رد ڪندي چيو ته بل کي تسليم نٿا ڪيون ۽ هر سطح تي تڪراري بل خلاف آواز اٿارينداسين، ايتري اهم ۽ وڏي قانونسازي هڪ طرفي طور تي رڳو عددي اڪثريت جي بنياد تي نٿي ڪري سگھجي، ان معاملي تي سڀني اسٽيڪ هولڊرز کي اعتماد ۾ وٺڻ گھرجي ها. ٻين اپوزيشن اڳواڻن به مودي سرڪار جي پاليسين تي سخت تنقيد ڪندي چيو ته ڪاري قانون کي عددي طاقت جي بنياد تي منظور ڪرائي آئين جي توهين ڪئي وئي آهي، جنهن جا سنگين نتيجا سامهون ايندا. وقتي ڪاميابي تي خوش بي جي پي کي مستقبل ۾ شرمندگي ۽ پڇتاءَ کان سواءِ ڪجهه نه ملندو. گھرو وزير اميت شاهه اپوزيشن جي گوڙ دوران ڀَڀڪيون هڻندي چيو ته اپوزيشن ڄاڻي ڇڏي ڪشمير ڀارت جو اڻٽٽ انگ آهي ۽ ڪشمير لاءِ پنهنجي جان به قربان ڪرڻ لاءِ تيار آهيون، حڪومتي ميمبرن جي ڀڀڪين ۽ اپوزيشن جي گوڙ دوران بل منظور ڪيو ويو.

 

مودي ڀارت جو قصائي ته هو پر اڄ ڪشمير جو به قصائي بڻجي ويو: بلاول ڀٽو زرداري

اسلام آباد (اين اين آءِ) پ پ پ چيئرمين بلاول ڀٽو زرداري ڀارت پاران والاريل ڪشمير جي خاص حيثيت ختم ڪرڻ تي ردعمل ڏيندي چيو ته مودي ڀارت جو قصائي ته هو اڄ ڪشمير جو قصائي بڻجي ويو آهي پ پ پ چيئرمين بلاول ڀٽو زرداري پارليامينٽ جي گڏيل اجلاس ۾ شرڪت دوران چيو ته مودي سرڪار تي تنقيد ڪندي چيو ته غيرآئيني طريقي سان هن انتهاپسند وزيراعطم جي خاص حيثيت ختم، ڪري ڇڏي آهي هي هڪ تاريخي حملو آهي ڀارت جي مسلمانن تي خاص ڪري ڪشميري مسلمان تي هڪ صحافي جي سوال تي ته وزيراعظم ملائيشيا جي وزيراعظم کي فون ڇو ڪئي آمريڪي صدر کي فون ڇو نه ڪئي جي جواب ۾ بلاول ڀٽو ٽوڪ واري لهجي ۾ چيو ته مون کي خبر نه آهي وزيراعظم ايئن ڇو ڪيو.

 

ڀارت پاڪستان جي ساهه جي رڳ ۾ هٿ وجهي، غيرت ۽ عزت کي للڪاريو آهي، اسان کي ان جا هٿ وَڍڻ گهرجن: شهباز شريف

اسلام آباد (ويب ڊيسڪ) قومي اسيمبلي ۾ مخالف ڌر اڳواڻ شهباز شريف چيو آهي ته ڀارت پاڪستان جي ساهه جي رڳ ۾ هٿ وڌو آهي، اسان کي ان جا هٿ وَڍڻ گهرجن. پارليامينٽ جي گڏيل اجلاس ۾ خيالن جو اظهار ڪندي شهباز شريف چيو ته 71 ورهين ۾ ڪنهن جي به جرئت نه هئي ته ڪشمير جي خاص حيثيت ختم ڪري پر مودي اهو ڪري ڇڏيو، مودي سرڪار رڳو ڪشميرين کان حق ناهن کسيا پر پاڪستان جي غيرت ۽ عزت کي للڪاريو آهي، گڏيل قومن جي مُنهن تي چماٽ هنئي آهي ۽ سڄي مهذب دنيا کي ڪٽهڙي ۾ آڻي بيهاريو آهي. سندس چوڻ هو ته والاريل ڪشمير ۾ نسل ڪشي جو خطرو آهي، اتي ماڻهن کي گهرن ۾ نظربند ڪيو ويو آهي، ڪشمير جي صورتحال تي خاموش نٿا ويهي سگهون، ڪشمير ۾ جيڪو ڪجهه ٿي چڪو آهي ان تي روايتي مذمت ۽ گڏيل ٺهرائن سان ڪم نه هلندو، اسان کي ٺوس فيصلو ڪرڻو پوندو ته جيئن دشمن کي خبر پئجي سگهي ته اسان خاموش نٿا ويهي سگهون، اسان چوڙيون ناهن پاتيون، اسان وڏيون قربانيون ڏنيون آهن، هاڻ ڪشمير جي معاملي تي ڄمي بيهڻ گهرجي، ڀارت پاڪستان جي ساهه واري رڳ ۾ هٿ وڌو آهي، ڀارت جا هٿ وَڍڻ گهرجن. هن چيو ته پاڪستان جو واسطو ڪشمير جي وجود سان آهي، پاڪستان ڪشميرين جو آهي ۽ ڪشميري پاڪستان جا آهن، وزيراعظم تاريخي حوالي سان ڳالهه ڪئي پر پي ٽي آءِ حڪومت جي 48 ڪلاڪ گذرڻ باوجود ڀارتي قدم تي پاليسي ۽ ان جو جواب ڪٿي آهي؟ اپوزيشن صبح 11 وڳي کان ايوان ۾ آهي پر وزيراعظم عمران خان دير سان پهتو، اهو ٻڌايو ته اپوزيشن سنجيده ناهي يا عمران خان؟ شهباز شريف چيو ته ان ۾ ڪو شڪ ناهي ته اسان کي پاڙيسري ملڪن سان عزت ۽ وقار وارا لاڳاپا قائم ڪرڻا آهن، اسان جون ڀارت سان 3 جنگيون ٿيون، وزيراعظم جي ٽرمپ سان ملاقات ٿي، آمريڪي صدر چيو ته مودي ڪشمير تي ٽياڪڙي جي آڇ ڪئي آهي، ڀارت خاموشي سان نه رڳو ان آڇ کان انڪار ڪيو پر ان کي ڪشمير ۾ جيڪو ڪرڻو هو اهو ڪري ڇڏيو.

 

ڀارت پاران 370 آرٽيڪل ۽ 35 اي ختم ڪرڻ قانون جي ڀڃڪڙي آهي : شاهه محمود قريشي

جده  (اين اين آءِ) پرڏيهي وزير شاهه محمود قريشي چيو آهي ته ڀارت پاران والاريل ڪشمير جي آئيني حيثيت جو تعين ڪندڙ آرٽيڪل 370 ۽ 35 اي جو خاتمو بين الاقوامي قانون جي ڀڃڪڙي آهي، والاريل ڪشيمر ۾ وڌيڪ فورس موڪلڻ، تعليمي ادارن کي بند ڪرائڻ ۽ ايمرجنسي واري ڪيفيعت ڀارت جي ناپاڪ ارادن جو ڏس ڏئي رهي آهي، ڀارتي قدم ڏکڻ ايشيا ۾ امن امان جي خراب صورتحال کي وڌيڪ خراب ڪرڻ جي برابر آهن جنهن تي توهان کي ترت ڌيان ڏيڻ جي ضرورت آهي، ڀارت پاران والاريل ڪشيمر جي آئيني حيثيت تعين ڪندڙ آرٽيڪل 370 جي خاتمي ۽ ڪشيمر ۾ امن امان جي خراب ٿيندڙ صورتحال کي اڳيان رکي جده ۾ اڱاري تي او آءِ سي ڪشمير بابت ڪانٽيڪٽ گروپ جو هنگامي اجلاس ٿيو، اجلاس ۾ پاڪستان، سعودي عرب، آئيذر بائيجان، ترڪي ۽ ٻين ميمبرن ملڪن جي اڳواڻن شرڪت ڪئي، اجلاس ۾ پاڪستاني وفد جي اڳواڻي شاهه محمود قريشي ڪئي، خطاب ڪندي شاهه محمود قريشي چيو ته والاريل ڪشمير جي ڳڻتي جوڳي صورتحال تي هنگامي اجلاس طلب ڪرڻ ۽ ان ۾ شرڪت ڪرڻ لاءِ وقت ڪڍڻ تي سمورن دوستن ۽ انتظاميا جو ٿورائتو آهيان، هن چيو ته ڀارت پاران لوڪ سڀا جو اجلاس سڏائي 370 آرٽيڪل ۽ 35 اي ختم ڪرڻ قانون جي ڀڃڪڙي آهي، هن چيو ته والاريل ڪشيمر ۾ ڀارتي فوج پاران 1999 کان هن وقت تائين هڪ لک ڪشميري شهيد ڪيا ويا آهن، هن چيو ته 22 هزار کان وڌيڪ عورتون بيوهه ٿيون، هڪ لک 68 هزار ٻار يتيم ٿيا ۽ 12 هزار کان وڌيڪ عورتن جي لڄ لٽي وئي، هن چيو ته مان ڀارت جي قدمن کي اڳيان رکي، خطري کي سمجهندي گڏيل قومن جي سلامتي ڪونسل، جنرل سيڪريٽري او آءِ سي کي پاڪستان جي خدشن کان باخبر ڪيو هو.

 

لوڻي ڪوٽ ڀرسان برساتي پاڻي جي کڏ ۾ ٻڏي ويل ڀيڻ کي بچائڻ دوران 2 ڀائر به ٻڏي فوت، گهر ۾ ڪهرام

ڪوٽڙي (ڊ.ر) لوڻي ڪوٽ ڀرسان برساتي پاڻي جي کڏ ۾ ٻڏي ويل ڀيڻ کي بچائڻ دوران 2 ڀائر به ٻڏي فوت ٿي ويا. ٽنهي ٻارن جا لاش ٻاهر ڪڍيا ويا. لوڻي ڪوٽ ٿاڻي جي حد ۾ راند کيڏڻ دوران 6 سالن جي نينگري سلڪو خاتون برساتي پاڻيءَ جي کڏ ۾ ڪري پئي، جنهن کي بچائڻ لاءِ 2 ڀائر 9 ورهين جي گلشير ۽ 7 سالن جي نصير به کڏ ۾ ٽپو ڏنو. نينگري کڏ ۾ غوطا کائي ٻڌي فوت ٿي ويئي، جڏهن ته ڀيڻ کي بچائڻ جي ڪوشش دوران ٻئي ڀائر به ٻڏي فوت ٿي ويا. اطلاع تي وارث ۽ علائقي واسي پهتا، جِن ٽنهي ڀيڻ ڀائرن جا لاش ٻاهر ڪڍيا. نينگر جا لاش ڄامشورو اسپتال ۾ ضروري ڪارروائي بعد وارثن حوالي ڪيا ويا.