تازيون خبرون

Daily Archives: August 5, 2019

والاريل ڪشمير جي عوام جي ڊگهي اذيت ناڪ رات جي پڄاڻي جو وقت اچي ويو آهي: عمران خان

اسلام آباد(م.ڊ) پاڪستان ڪشميرين جي حمايت جاري رکندي ڀارت جي هر قسم جي اڳرائي جو منهن ٽوڙ جواب ڏيڻ جو عزم ورجايو آهي ۽ گڏيل قومن جي سلامتي ڪائونسل کان هٿين خالي ڪشيرين تي ڀارت طرفان ڪلسٽر بمن جي استعمال جو نوٽيس وٺڻ جو مطالبو ڪيو آهي. وزيراعظم عمران خان جي صدارت ۾ قومي سلامتي ڪائونسل جو جلاس ٿيو، جنهن ۾ آرمي چيف جنرل قمر جاويد باجوه، ايئر چيف، نيول چيف، چيئرمين جوائنٽ چيفس آف اسٽاف ڪميٽي، ڊي جي آءِ ايس آءِ، بچاءَ واري وزير پرويز خٽڪ، پرڏيهي وزير شاهه محمود قريشي، ڪشمير معاملن جي وزير، پرڏيهي سيڪريٽري ۽ ٻين شرڪت ڪئي. پڌرنامي موجب اجلاس دوران ڪشمير ۾ تيزي سان خراب ٿيندڙ صورتحال تي غور ويچار بعد اتفاق ڪيو ويو ته ڀارت پاڪستان کي ڀڙڪائڻ لاءِ ايل او سي تي شهرين مٿان ڪلسٽر بم استعمال ڪري رهيو آهي. پاڪستان ڪشميرين جي سفارتي، سياسي ۽ اخلاقي حمايت جاري رکندو، پڌرنامي ۾ چيو ويو ته والاريل ڪشمير ۾ واڌو ڀارتي فوج جي مقرري ٻرندي تي تيل هارڻ برابر آهي. پڌرنامي موجب اجلاس دوران چيو ويو ته ڀارت والاريل ڪشمير بابت مونجهارو ۽ غلط ڄاڻ پکيڙي پنهنجا ڪڌا عزم لڪائڻ چاهي ٿو. پڌرنامي ۾ چيو ويو ته ڀارت پنهنجا ڪڌا حربا ڇڏي تڪرار جي پرامن حل لاءِ اڳتي وڌي. ڀارتي قدمن سان والاريل ڪشمير جي صورتحال انتهائي خراب ٿي رهي آهي. اجلاس دوران وزيراعظم چيو ته پاڪستان گڏيل قومن جي ٺهرائن ۽ ڪشميرين جي خواهشن موجب ڪشمير مسئلي جو حل چاهي ٿو. پاڪستان ڪشميرين سان سدائين گڏ آهي، کين ڪڏهن به اڪيلو نه ڇڏيندو. عمران خان چيو ته پاڪستان ڪنهن به ڀارتي اڳرائي جو پوري قوم جي حمايت سان منهن ڏيندو. ان کانسواءِ وزيراعظم عمران خان ڀارتي اڳرائين ۽ والاريل ڪشمير جي صورتحال بابت ٽوئيٽس ڪندي چيو ته والاريل ڪشمير ۾ ڪلسٽر بمن جي استعمال جي سخت لفظن جي مذمت ڪئي، وزيراعظم چيو ته ڀارت ڪلسٽر بمن جو استعمال ڪري 1983 واري معاملي جي پنهنجي ئي وعدي جي ڀڃڪڙي ڪئي آهي. هن چيو ته گڏيل قومن جي سلامتي ڪائونسل عالمي امن ۽ سلامتي کي پيش ايندڙ خطرن جو نوٽيس وٺي، عمران خان هڪ ٽوئيٽ ۾ لکيو ته هي وقت آهي ته والاريل ڪشمير جي عوام جي ڊگهي اذيت ناڪ رات جو خاتمو ٿئي. گڏيل قومن جي ٺهرائن جي روشني ۾ ڪشميرين کي پنهنجو خودمختياري جو حق استعمال ڪرڻ جي آزاد هئڻ گهرجي. عمران خان چيو ته ڏکڻ ايشيا ۾ امن ۽ سلامتي جو واحد رستو رڳو “پرامن ڪشمير“ مان گذري ٿو.

 

وسيم اختر کي ڪهڙي طاقت ڪم کان روڪيو؟ڪراچي کي برباد ڪندڙ ٻين تي الزام پيا هڻن: مرتضيٰ وهاب

ڪراچي (اسٽاف رپورٽر)   وزيراعليٰ سنڌ جي اطلاعات ، قانون ۽ اينٽي ڪرپشن بابت صلاحڪار بئرسٽر مرتضيٰ وهاب ،  ميئر ڪي ايم سي وسيم اختر جي بيان ۽ وفاقي وزير علي زيدي جي صفائي مهم تي ردعمل ڏيندي پنهنجي بيان ۾ چيو آهي ته ڪراچي کي برباد ڪندڙ اڄ ٻين تي الزام تراشي ڪري رهيا آهن. هن چيو ته ڪراچي جي تباهي جو سنڌ حڪومت تي الزام اڄ جو وڏو لطيفو آهي. بئرسٽر مرتضيٰ وهاب چيو ته ميئر کان ڪجهه ٿي نه ٿو سگهي اهو صرف الزام هڻندو رهندو آهي. هن چيو ته وسيم اختر ٻڌائي ته ڪهڙي طاقت هن کي شهر جي صفائي سٿرائي کان روڪيو آهي؟ پنهنجي نااهلي ۽ غفلت ٻين تي ٿوپڻ کان پري رهو. بئرسٽر مرتضيٰ وهاب چيو ته هر ادارو ۽ شخص پنهنجي ذميواري نڀائي ها ته ڪراچي وارا سک جو ساهه کڻن ها. هن چيو ته افسوس ڪراچي جي دعويدارن ئي هن شهرکي نوچي تباهي جي ڪناري تي پهچايو. هن چيو ته بحري معاملن واري وفاقي وزير جي صفائي مهم صرف  فوٽو سيشن کان وڌ ڪجهه به نه آهي. بئرسٽر مرتضيٰ وهاب جو وڌيڪ چوڻ هو ته بحري معاملا سنڀالي نه ٿا سگهن ۽  هليا آهن شهر صاف ڪرڻ. هن چيو ته بلدياتي ادارن جي ڪمن کي پنهنجي کاتي ۾ سونپڻ ڪو پي ٽي آءِ وارن کان سکي. بئرسٽر مرتضيٰ وهاب چيو ته علي زيدي صاحب ڊي ايم سي ڪيماڙي جي صفائي مهم جو ڪريڊٽ ٽوئٽ ڪري پنهنجي کاتي سونپي ڇڏيو، زيدي صاحب ۽ ان جي فوٽو سيشن ٽيم لاءِ دعاگو آهيون. هن چيو ته نالا صاف ڪرڻ جا دعويدار اهو ڄاڻي وٺن ته ڪراچي ۾ 556 وڏا ننڍا نالا آهن.

 

عالمي برادري ڪشمير مسئلي جي پرامن حل لاءِ ڀارت تي دٻاءُ وجهي: او آءِ سي

رياض (ويب ڊيسڪ) اسلامي سهڪار تنظيم (او آءِ سي) ڀارت طرفان سيز فائر معاهدي جي ڀڃڪڙي ۽ ڪلسٽر بم جي استعمال تي ڳڻتي جو اظهار ڪندي شهادتن تي افسوس جو اظهار ڪيو آهي. او آءِ سي جي سيڪريٽري جنرل طرفان ٽوئيٽر تي جاري ڪيل بيان ۾ چيو ويو آهي ته ڀارت طرفان شهري آبادي تي ڪلسٽر بم جو استعمال ڳڻتي جوڳو عمل آهي، جڏهن ته والاريل ڪشمير ۾ ڀارتي فوج جي واڌو نفري ۽ بگڙجندڙ صورتحال تي به ڳڻتي آهي. بيان ۾ چيو ويو آهي ته عالمي برادري ڪشمير مسئلي جي پرامن حل لاءِ ڀارت تي دٻاءُ وجهي ۽ پنهنجون ذميواريون نڀائي، جڏهن ته سلامتي ڪائونسل جي ٺهرائن موجب ڪشميرين کي آزادي جو حق ڏنو وڃي.

 

آزاد ڪشمير، نوسيري جي آبادي ۾ ڪلسٽر بم وکريا پيا آهن: رپورٽ

مظفرآباد (اين اين آءِ) ڀارت پاران ايل او سي تي ڪلسٽر بمن جي استعمال جا ناقابل ترديد ثبوت آڏو اچي ويا آهن ميڊيا رپورٽس موجب ڀارت پاران لائين آف ڪنٽرول تي ڪلسٽر بمن جي استعمال جا ترديد نه ٿيڻ جوڳا ثبوت ظاهر ٿي ويا آهن آزاد ڪشمير جي علائقي نوسيري جي آبادي ۾ ڪلسٽر بم وکريا پيا آهن انهي علائقي ۾ گذريل ڏينهن ڪلسٽر بمن سان چار ڄڻا شهيد ٿيا هئا ۽ 11 زخمي ٿيا هئا آءِ ايس پي آرموجب ڀارتي فوج لائين آف ڪنٽرول تي شهري آبادي کي ڪلسٽر بمن سان نشانو بڻائي رهي آهي ڀارتي فوج 30 ۽ 31 تي آزاد ڪشمير جي نيلم وادي ۾ توبخاني جي ذريعي ڪلسٽر ايمونيشن جو استعمال ڪيو جنهن سبب چئن ورهين جي ٻارڙي سميت 2 ڄڻا شهيد ۽ 11 زخمي ٿيا هئا.

 

 

ڀارتي فورسز والاريل وادي ۾ وڌيڪ 7 ڪشميري نوجوانن کي شهيد ڪري ڇڏيو

سرينگر (ويب ڊيسڪ) والاريل ڪشمير ۾ ڀارتي فوج جي رياستي دهشتگردي جاري آهي ۽ قابض فورسز وڌيڪ 7 ڪشميري نوجوانن کي شهيد ڪري ڇڏيو. ڪشمير ميڊيا سروس موجب ڀارتي فورسز ڪپواڙا ضلعي ۾ رياستي دهشتگردي جو مظاهرو ڪيو، جنهن جي نتيجي ۾ 7 ڪشميري نوجوان شهيد ٿي ويا. سرينگر ۾ ڀارتي فوج جي ترجمان ڪارروائي جي تصديق ڪندي چيو ته ڪشميرين نوجوانن کي ڪيرن جي علائقي ۾ ماريو ويو. هوڏانهن شوپيان ۾ هڪ شهيد نوجوان جي جنازي نماز ادا ڪئي وئي، جنهن ۾ وڏي انگ ۾ ڪشميرين شرڪت ڪئي.