تازيون خبرون
حڪومت جي يو آءِ سان ڳالهين لاءِ راضي، مولانا وزير اعظم جي استعيفيٰ جو شرط رکي ڇڏيو - اهي ماڻهو ضد تي آهن ته آئين ٽوڙيو وڃي، آئين جي ابتڙ ڪوبه ڪم ٿيڻ نه ڏينداسين: مراد علي شاهه - غريبن جي پئسن مان بنگلا ٺهرائيندڙن لاءِ 4-5 ڪروڙ رُپيا جمع ڪرائڻ ڪو مسئلو نه آهي: عدالت - موري  ڀرسان بس ڪلٽي، 6 ڄڻا فوت، 35  زخمي - مسلم امت جو گڏيل اتحاد ۽ اتفاق خطي ۾ امن ۽ معاشي استحقام جو ضامن آهي: فردوس عاشق اعواڻ - شاهي جوڙي جو چترال پهچڻ تي شاندار استقبال، روايتي ٽوپي پهرائي ويئي - مون کي يقين آهي ته ڌرڻو نه هنيو ويندو، سولائي سان ڌرڻي جي اجازت نه ملندي: شيخ رشيد - پ پ چونڊن دوران ڪيل واعدا پاڙي رهي آهي، صحافين جي جان مال جي تحفط  لاءِ  قانون جوڙي رهيا  آهيون: سعيد غني - حمزه شهباز کي ميڊيا سان ڳالهائڻ کان روڪڻ ۽ صحافين تي تشدد جي مذمت، ملڪ تي عمران سوچ مڙهيل آهي:مريم اورنگزيب - نيب انور مجيد سوڌو ٻين جوابدارن خلاف ريفرنس داخل ڪرڻ ۽ ايس بي سي اي ۽ ڪي ايم سي خلاف جاچ جي منظوري ڏئي ڇڏي

Monthly Archives: August 2019

نئين ايل اين جي پاليسي تيار ڪري ورتي آهي، جلد اعلان ڪيو ويندو: وفاقي حڪومت

اسلام آباد (اين اين آءِ) وفاقي حڪومت چيو آهي ته نئين ايل اين جي پاليسي تيار ڪري ڇڏي آهي جلد اعلان ڪيو ويندو، ڪاروبار آسانا بڻائڻ لاءِ سڌارن واري پاليسي منظور ڪرائي ويندي، ڪيترن ئي شعبن ۾ صحيح معنيٰ مقابلي وارو ماحول موجود نه آهي، مقابلي جو ماحول پيدا ڪري سيڙپڪاري ۾ واڌ ڪري سگهجي ٿي، پيٽروليم شعبي ۾ سيڙپڪاري لاءِ 30 جي لڳ ڀڳ منظوريون گهربل آهن، پيٽروليم ڳولڻ ۽ پيداوار لاءِ 27 نوان بلاڪ متعارف ڪرائي رهيا آهيون، عوام جي آساني لاءِ بلن جي ادائگي جا ڏينهن وڌائي رهيا آهيون، يوٽلٽي بل جاري ڪرڻ جي تاريخ کان 15 ڏينهن ۾ بل جمع ڪرائڻو پوندو، سيپٽمبر کان گيس جي استعمال بابت عوامي جاڳرتا مهم هلائي ويندي، خميس تي عمر ايوب ۽ نديم بابر سان گڏ پريس ڪانفرنس ڪندي فردوس عاشق اعواڻ چيو ته وزيراعظم ملڪ ۾ سيڙپڪاري کي هٿي وٺرائڻ لاءِ ڪوشش ڪري رهيو آهي، هن چيو ته وزيراعظم جي هدايت تي سيڙپڪارن لاءِ باقائده روڊ ميپ بڻايو پيو وڃي، توانائي جي وزير عمر ايوب چيو ته سيڙپڪاري ۽ ڪاروبار آسان بڻائڻ لاءِ موثر قدم کنيا پيا وڃن، اسان جو مقصد ملڪ ۾ سيڙپڪاري وڌائڻ آهي، نديم، بابر چيو ته جيستائين ملڪ ۾ ڪاروبار نه وڌندو نوڪريون نٿيون وڌي سگهن، هن چيو ته وزيراعظم جي هدايت موجب سڌارا ۽ آسانيون پيدا ڪري رهيا آهيون، هن چيو ته پيٽروليم وزارت ۾ انهن شين تي ڪافي وقت کان ڪم ڪري رهيا آهيون، ڪاروبار آسان بڻائڻ لاءِ سڌارن جي پاليسي منظور ڪرائي ويندي، هن چيو ته نئين ايل اين جي پاليسي تيار ڪري ورتي آهي، جلد اعلان ڪيو ويندو، هن چيو ته 5 ٻاهرين ڪمپني کي ايل اين جي ٽرمينل لڳائڻ جي اجازت ڏني وئي آهي، هن چيو ته جتان گيس لڀندي ان علائقي کي اوليتي بنيادن تي گيس ڏينداسين، هن چيو ته گيس جي واڌو بلن جو معاملو جلد حل ڪيو ويندو، هڪ سوال تي فردوس عاشق اعواڻ چيو ته جمعي تي عام موڪل نه هوندي پر سموريون آفيسون ۽ تعليمي ادارا کليل رهندا.

 

ٻيهر سنڌ ۾ ڊاڪو راج جي ايمرجنسي برداشت نه ڪندس: مراد علي شاهه

ڪراچي (اسٽاف رپورٽر): سنڌ جي وڏي وزير سيد مراد علي شاهه سکر ۽ لاڙڪاڻي ڊويزن جي ڪچي وارن علائقن ۾ ڌاڙيلن خلاف ڪريڪ ڊائون ۽ سخت آپريشن ڪرڻ جو فيصلو ڪيو آهي جتي ڀنگ عيوض اغوا جي ڪيسن ۾ واڌ ٿي رهي آهي. هن اهو فيصلو اڄ وزيراعليٰ سيڪريٽريٽ ۾ اماڻيل پوليس رپورٽن جي روشني ۾ ڪيو. هن چيف سيڪريٽري ممتاز علي شاهه ۽ سيڪريٽري گهرو قاضي ڪبير کي ڄاڻايل آپريشن بابت پڇا ڪئي ۽ کين هدايت ڪئي ته امن ۽ امان جي بابت اجلاس سڏرائي ته جيئن آپريشن بابت رٿابندي ۽ حڪمت عملي کي آخري شڪل ڏئي سگهجي. وڏي وزير چيو ته ڀنگ عيوض کنڀڻ هڪ سنگين ڏوهه آهي ۽ ان کي برداشت نه ڪيو ويندو. لاڙڪاڻي، سکر، خيرپور کان نواب شاهه جي ڪچي وارن علائقن ۾ ڪجهه ڌاڙيل پنهنجو ٺڪاڻو ٺاهي ويٺا آهن ۽ اهي شهرن مان معصوم ماڻهن کي کنڀي رهيا آهن.  هن چيو ته اهو آپريشن شهيد بينظيرآباد کان ڪشمور جي ڪچي وارن علائقن تائين محدود نه رهندو پر ان کي ڌاڙيلن جي سهولتڪارن يا پٿاريدارن جي دائري تائين وسيع ڪيو ويندو. آپريشن ذريعي سڀني هسٽري شيٽرز، جنهن جي مٿان انعام رکيل آهن ۽ ٻين ڏوهن ۾ ملوث فردن سان سختي سان منهن ڏنو ويندو. وڏي وزير چيو ته هو ايندڙ ڪجهه ڏينهن اندر آئي جي پوليس ۽ ٻين لاڳاپيل عملدارن جي صلاح مشوري سان ڄاڻايل آپريشن لاءِ حڪمت عملي کي آخري شڪل ڏيڻ لاءِ امن ۽ امان بابت هڪ اعليٰ سطحي اجلاس سڏائي رهيو آهيان. وڏي وزير چيو ته هو آئي جي پوليس کي ڌاڙيلن جي مُٺ مان مغوي ماڻهن کي آزاد ڪرائڻ لاءِ پهرين ئي هدايت ڏئي چڪو آهيان. هن چيو ته آئون ٻيهر صوبي ۾ ڊاڪو راج جي ايمرجنسي برداشت نه ڪندس. مراد علي شاهه چيو ته سڄي صوبي اندر امن ۽ امان جي مجموعي صورتحال اطمينان بخش آهي پر ڀنگ عيوض اغوا ۽ ڪراچي ۾ اسٽريٽ ڪرائيم جهڙا نوان چيلنج آڏو آيا آهن. ايڊيشنل آئي جي ڪراچي اسٽريٽ ڪرمنلز جي خاتمي لاءِ ڪم ڪري رهيو آهي جڏهن ته صوبي جي اتر ۽ وسطي حصن مان ڌاڙيلن خلاف آپريشن وقت جي ضرورت آهي. هن چيو ته ڊرگ مافيا، دهشتگردن ۽ ٻين قانون جي ڀڃڪڙي ڪندڙن خلاف ٽارگيٽڊ آپريشن ڪاميابي سان هلي رهيو آهي جنهن ۾ پوليس، رينجرز ۽ انٽيلي جنس ايجنسيون سخت محنت سان ڪم ڪري رهيون آهن. وڏي وزير چيو ته اهڙي طرح جا آپريشن ڪچي جي علائقن ۾ ڌاڙيلن خلاف شروع ڪرڻ وڃون پيا.وڏي وزير ڪمشنر ڪراچي کي هدايت ڪئي ته هو هيٺائين علائقن جتي برسات جو پاڻي بيٺل آهي ان تي نظر رکي وڃي ۽ جلد کان جلد اتان پاڻي ڪڍڻ جو انتظام ڪيو وڃي. هن ڪمشنر ڪراچي کي شهر ۾ فيوميگيشن شروع ڪرڻ جي به هدايت ڪئي. هن چيو ته نالن جي صفائي ۽ کيس ڪچرو روڊن تي رکڻ سان شهر ۾ مکيون ۽ مڇر پيدا ٿي رهيا آهن. هن چيو ته ان بيماريون پکڙجن ٿيون ان ڪري اتي فيوميگيشن مهم ذريعي ضابطو آندو وڃي. ايم ڊي واٽر بورڊ پنهنجي هڪ رپورٽ ذريعي وڏي وزير کي ٻڌايو ته ٽرڪ تي پيل سڪشن مشين گور قبرستان شاهراه فيصل تي لڳل آهي جيڪا اتي گڏ ٿيل پاڻي کي ڪڍي رهي آهي اهڙي ريت ٻيون گاڏيون جي پي ايم سي جهڙن اهم رستن تان پاڻي ڪڍي رهيون آهن. ريهيبليٽيشن کاتي اڄ موسم بابت هڪ وارننگ جاري ڪئي آهي جنهن ۾ علائقائي موسميات مرڪز ڪراچي موسم بابت وارننگ جاري ڪئي آهي ۽ اڳڪٿي ڪئي آهي ته ايندڙ 24 ڪلاڪن ۾ سنڌ ۾ برساتن جو هڪ نئون سلسلو شروع ٿيڻ وارو آهي جنهن جي نتيجي ۾ سنڌ خاص طور ڪراچي، ڄامشورو، دادو، قمبر-شهدادڪوٽ، نوشهروفيروز، بدين، سانگهڙ ۽ لاڙڪاڻي ضلعن ۾ جمعرات جي شام کان جمعي جي شام تائين تيز برساتون ٿيڻ جو امڪان آهي. ڪراچي: موسم بابت وارننگ ۾ چيو ويو آهي ته ڪراچي ۾ 50 کان 70 ايم ايم (چار وڳي جمعرات/ ٻه پهر 12 وڳي جمعي) تائين تيز برساتون ٿينديون ۽ جمعي ڏينهن ڪراچي ۾ اربن فلڊنگ واري صورتحال ۾ واڌ ٿيڻ جو کٽڪو آهي.

 

اڄ قوم ٻاهر نڪري، ڪشمير ۾ ڀارتي قدم جنيوا ڪنونشن تحت جنگي ڏوهه آهن: عمران خان

اسلام آباد (ويب ڊيسڪ/اين اين آءِ) پاڪستاني قوم اڄ جمعي تي ڪشمير آور ملهائيندي، جنهن جو مقصد ڪشمير جي مظلومن سان ٻڌي جو اظهار ڪرڻ آهي، ايڪتا ڪشمير آور ڏينهن جو 12 کان ساڍي 12 وڳي تائين ملهايو ويندو، سڄي ملڪ ۾ سائرن وڄايا ويندا جنهن کانپوءِ پاڪستان ۽ آزاد ڪشمير ڄمون ڪشمير جو ترانو وڄايو ويندو ان دوران سموري ٽريفڪ ۽ ماڻهو بيهجي ويندا، ڪشميرين سان ٻڌي جي اظهار لاءِ وزيراعظم، وڏا وزير ۽ پارليامينٽ جا ميمبر پنهنجن لاڳاپيل سيڪريٽريٽ ۽ آفيسن جي عمارتن جي ٻاهران، سڄي ملڪ ۾ ٻيا ماڻهو پنهنجين آفيسن، گهرن، مارڪيٽن ۽ واپاري مرڪزن جي ٻاهران گڏ ٿيندا، جمعي جي نماز جي اجتماعن ۾ خاص دعائون گهريون وينديون، هن ڏينهن جي مناسبت سان سڄي ملڪ ۾ عوامي ريليون ڪڍيون وينديون جنهن ۾ معاشري جي سمورن طبقن سان تعلق رکندڙ ماڻهو شرڪت ڪندا.  ٻئي طرف  وزيراعظم عمران خان چيو آهي ته ڪشميرين سان يڪجهتي لاءِ قوم اڄ ٻاهر نڪري. سماجي رابطن جي ويب سائيٽ ٽوئيٽر تي وزيراعظم عمران خان چيو ته قوم اڄ جي ڏينهن 12 وڳي کان ساڍي ٻارهين وڳي تائين ڪشميرين لاءِ نڪري، قوم اڄ ڪشميرين سان يڪجهتي جو اظهار ڪري، ڪشمير ۾ ڀارتي قدم جنيوا ڪنونشن تحت جنگي ڏوهه آهن. هن چيو ته والاريل ڪشمير ۾ ڪرفيو ۽ معصوم ڪشميري عوام جو قتل پاڪستان قبول ڪرڻ جوڳو ناهي، ٻارڙن ۽ عورتن جو به ڀارتي فوج هٿان قتل عام مودي حڪومت جي نسل ڪشي جو ايجنڊا آهي، اڄ عوام 12 وڳي کان ساڍي 12 وڳي تائين روڊن تي نڪري ڪشميري عوام کي پيغام ڏئي ته هو هنن سان ڪلهو ڪلهي ۾ ملائي بيٺل آهن. سندس چوڻ هو ته عوام ٻاهر نڪري ڪشميرين يڪجهتي جو اظهار ڪري ۽ والاريل ڪشمير ۾ واضح پيغام موڪلي، ڪشميرين کي پيغام ڏنو وڃي ته سڄي پاڪستاني قوم ڪشمرين سان گڏ آهي، قوم والاريل ڪشمير ۾ 24 ڏينهن کان جاري غير انساني ڪرفيو ۽ فاشسٽ ظلم تي احتجاج ڪري.

 

سدائين ٻه طرفي ڳالهين جي حمايت ڪئي، هاڻ ڀارت سان ڳالهيون نه ٿينديون: پرڏيهي ترجمان

اسلام آباد (ويب ڊيسڪ): پرڏيهي آفيس جي ترجمان ڊاڪٽر فيصل چيوآهي ته پاڪستان سدائين ٻه طرفي ڳالهين جي حمايت ڪئي پر هاڻ ڀارت سان ڳالهيون نٿيون ٿي سگھن. پرڏيهي آفيس اسلام آباد ۾ويڪلي پريس بريفنگ دوران ڊاڪٽر فيصل چيو ته ڀارت والاريل ڪشمير کي فوجي ڇانوڻي بڻايو آهي، ميڊيا ۽ انٽرنيٽ تي به پابندي لڳائي آهي، والاريل ڪشمير ۾ لاڳيتو ڪرفيو لاڳو آهي جنهن سبب اتي خوراڪ ۽ دوائن جي کوٽ آهي، ڪشميري ڀارتي قدم خلاف احتجاج ڪري رهيا آهن، والاريل ڪشمير ۾ ايترا ماڻهو گرفتار ڪيا ويا آهن جو جيلن ۾ وڌيڪ ماڻهن جي گنجائش ئي نه آهي. هن چيو ته پاڪستان والاريل ڪشمير ۾ ڀارتي قدمن جي مذمت ڪري ٿو، والاريل ڪشمير جي حريت قيادت کي آزاد ڪيو وڃي، ڀارت دنيا کي گمراهه ڪرڻ بند ڪري، ڀارت کي جيڪو وڻي چوندو رهي ان سان حقيقت تبديل نٿي ٿي سگھي. مسئلو ڪشمير رياست جو آهي جنهن جو فيصلو ٿيڻو آهي. ڪشميرين جا جذبا جيستائين نه ڏٺا ويندا تيستائين اڳتي نٿو وڌي سگھجي. سندس چوڻ هو ته ايل او سي تي ڀارتي فائرنگ سان معصوم شهرين شهيد ٿيا، ايل او سي جي ڀڃڪڙي تي ڀارتي ڊپٽي هاءِ ڪمشنر کي طلب ڪيو، پرڏيهي وزير ڀارتي قدمن بابت مختلف ملڪن کي خط لکيا، هن دنيا کي آگاهه ڪيو ته ڪشميرين جي حمايت ۾ ڪنهن به حد تائين وينداسين، پاڪستان ڪڏهن به ٻه طرفي ڳالهين کان پٺتي ناهي هٽيو، سدائين ٻه طرفي ڳالهين جي حمايت ڪئي پر هاڻ ڀارت سان ڳالهيون نٿيون ٿي سگھن، ڪشميري مئسلي تي عالمي عدالت وڃڻ بابت صلاح مشورو ڪري رهيا آهيون. پرڏيهي وزير جا گڏيل قومن جي انساني حقن واري اجلاس ۾ وڃڻ جا امڪان آهن. ڀارت لاءِ هوائي حدون بند ڪرڻ جو فيصلو اڃا ناهي ٿيو. ڪرتارپور راهداري بابت ڊاڪٽر فيصل چيو ته ڪرتارپور راهداري وزيراعظم جي اعلانيل تاريخ موجب کولي ويندي، ان منصوبي جي حوالي سان 30 آگسٽ تي زيرو پوائنٽ تي اجلاس ٿيندو. رڏيهي آفيس ترجمان چيو ته پاڪستان افغانستان ۾ امن جو خواهشمند آهي، آمريڪا ۽ طالبان وچ ۾ ڳالهيون آخري مرحلن ۾ داخل ٿي چڪيون آهن، پاڪستان افغان سرحد تان دهشتگردن جي فائرنگ جو رڳو جواب ڏيندو آهي، افغان حڪومت کي دهشتگردن ڪيمپن جي حوالي سان ڄاڻ ڏني آهي.ڊاڪٽر فيصل هڪ سوال جي جواب ۾ چيو ته اسرائيل سان لاڳاپن جي حوالي سان پاڪستان جي پاليسي واضح آهي ان ۾ ڪا به تبديلي ناهي ٿي.

 

پاڪستان 290 ڪلوميٽرن تائين هدف کي سولائيءَ سان نشانو بڻائيندڙ بيلسٽڪ ميزائيل غزنوي جو ڪامياب ڪري ورتو

راولپنڊي (ويب ڊيسڪ) پاڪستان بيلسٽڪ ميزائيل غزنوي جو ڪامياب ترجبو ڪري ورتو آهي. پاڪ فوج ترجمان ميجر جنرل آصف غفور موجب پاڪستان بيلسٽڪ ميزائيل غزنوي جو ڪامياب تجربو ڪيو آهي، زمين کان زمين تائين مار ڪندڙ ميزائيل غزنوي جو تجربو گذريل رات ڪيو ويو، ميزائيل هر قسم جي رواتي ۽ غير روايي وار هيڊز کڻي وڃڻ جي صلاحيت رکي ٿو ۽ 290 ڪلوميٽرن تائين پنهنجي هدف کي سولائيءَ سان نشانو بڻائي سگھي ٿو. صدر عارف علوي ۽ وزيراعظم عمران خان بيلسٽڪ ميزائيل غزنوي جي ڪامياب تجربي تي قوم ۽ ان منصوبي سان سلهاڙيل سائنسدانن کي مبارڪ ڏني آهي. واضح رهي ته ان اڳ پاڪستان زمين کان زمين تائين مار ڪندڙ ميزائل شاهين ٽو  جو ڪامياب تجربو ڪيو هو  پاڪ فوج جي ترجمان ميجر جنرل آصف غفور طرفان سماجي رابطن جي ويب سائيٽ ٽوئٽر ذريعي ميزائل جي ڪامياب تجربي جو اعلان ڪيو ويو هو.  پاڪ فوج جي ترجمان موجب شاهين ٽو 15 سئو ڪلو ميٽرن تائين هدف کي نشانو بڻائڻ ۽ روايتي ائٽمي هٿيار کڻي وڃڻ جي صلاحيت رکي ٿو. هن چيو ته هو ميزائل تجربي سان پاڪستان جي خطي ۾ گهٽ ۾ گهٽ مزاحمت برقرار رکڻ جي صلاحيت وڌي آهي.

 

ڊينگي جي صورتحال ڳڻتي جوڳي آهي، مريضن جو انگ وڌي سگهي ٿو، پمز ۾ جاءِ خالي رکي وڃي: شيخ رشيد

راولپنڊي (اين اين آءِ) ريلوي جي وزير شيخ رشيد چيو آهي ته ڊينگي جي صورتحال ڳڻتي جوڳي آهي، 5 هزار کان وڌيڪ مريض آندا ويا آهن، تعداد وڌي سگهي ٿو، پمز ۾ جاءِ خالي رکي وڃي، ماڻهن کي احتياط ڪرڻ جي ضرورت آهي، مودي دنيا کي گمراهه ڪري رهيو آهي ان وقت تائين سک سان نه ويهنداسين جيستائين ڪشمير آزاد نٿو ٿي سگهي، خميس تي هولي فيملي اسپتال ۾ شيخ رشيد ميڊيا سان ڳالهائيندي چيو ته ڊينگي جي صورتحال ڳڻتي جوڳي آهي، هي 2015 جي وبا کان وڏي وبا آهي، هن چيو ته 5 هزار کان وڌيڪ مريض آهن جن مان 615 مريض داخل ڪيا ويا آهن، هي انگ وڌي به سگهي ٿو تنهنڪري وزيراعظم گذارش ڪندس ته پمز ۾ جاءِ خالي رکي وڃي، هن چيو ته 19 خانگي اسپتالن کي به چوندس ته اهي به بيڊ رکن، ضلعي انتظاميا پاران پوري ڪوشش ڪئي پئي وڃي، هر هفتي اسپتالن جي پاڻ وزٽ ڪندس، هيلٿ ۽ تعليم تي پاڻ ڌيان ڏئي رهيو آهيان، هن چيو ته ڪنهن ڊينگي مريض جي حالت ڳڻتي جوڳي نه آهي، هڪ سوال تي هن چيو ته اسان ڀارت کي تباهه ۽ برباد ڪري ڇڏينداسين، عمران خان جي جدوجهد تاريخ جو حصو آهي، هن چيو ته ڀارتي ايجنٽ کي تڪليف آهي ته مان جذبات جي ڳالهه ڪري رهيو آهيان پر سنيجنده آهيان، هي مسئلو عمران خان ۽ قمر جاويد باجوه سان حل ٿيندو، هن چيو ته 12 کان ساڍي 12 وڳي عمران خان جي سڏ تي لال حويلي کي بند ڪنداسين، هن چيو ته فضل رحمان کي اسان جي اپيل آهي ته ملڪ جي حالت بهتر نه آهي، مون ٿر ۽ سمجهوتا ايڪسپريس بند ڪري ڇڏي، ڪنهن ۾ جرئت آهي ته هلائي ڏيکاري، هن چيو ته آصف زرداري جيڪڏهن بيمار آهي ته کيس اسپتال منتقل ٿيڻ گهرجي.

 

شادي ڪرڻ چاهيان ٿو پر پيءُ جيل ۾ اهي، في الحال ڌيان اوڏانهن آهي: بلاول ڀٽو زرداري

استور(ويب ڊيسڪ) پاڪستان پيپلز پارٽي جي چيئرمين بلاول ڀٽو زرداري جو چوڻ آهي ته هو شادي ڪرڻ چاهي ٿو پر پيءُ جيل ۾ اهي، في الحال ڌيان اوڏانهن آهي. بلند سياحتي مقام ديوسائي ۾ ميڊيا سان ڳالهائيندي بلاول ڀٽو زرداري چيو ته هو به شادي ڪرڻ چاهي ٿو پر اڃان پيءُ جيل ۾ آهي. هن چيو ته في الحال سمورو ڌيان پيءُ تي آهي. پاڪستان پيپلز پارٽي جي چيئرمين وڌيڪ چيو ته پيپلز پارٽي ۽ گلگت بلتستان جي عوام سان ٽن نسلن جو ساٿ آهي. بلاول چيو ته ذوالفقار علي ڀٽو به ان خوبصورت علائقي جي هڪ هڪ ڪنڊ ۾ پهتو هو ۽ هو به رابطا مهم جي سلسلي ۾ هر جاءِ تي ويندو. پنهنجي شادي بابت ڳالهائيندي بلاول ڀٽو جو چوڻ هو ته هن جي به خواهش آهي ته شادي ٿي وڃي.

 

آصف علي زرداري جي طبيعت خراب، اڊيالا جيل کان پمز اسپتال منتقل

اسلام آباد (اين اين آءِ) اڳوڻي صدر آصف زرداري جي پمز ۾ طبي چڪاس ڪئي وئي، خميس تي اڳوڻي صدر آصف زرداري جي طبيعت ناساز هئڻ تي ميڊيڪل بورڊ جي سفارش تي پمز اسپتال منتقل ڪيو ويو، جتي اسپتال جي 4 ڊاڪٽرن چڪاس ڪئي، ڪارڊڪ سينٽر جي انچارج ڊاڪٽر نعيم، نيورو سرجن ڊاڪٽر عابد فزيوٿراپٽس ڊاڪٽر شرجيل تفصيلي معائنو ڪيو، ذريعن موجب اڳوڻي صدر آصف زرداري کي سخت چيلهه ۾ سور آهي، ڊاڪٽرن کيس فزيوٿراپي جي صلاح ڏني آهي، ذريعن موجب ڊاڪٽرن ٻڌايو ته اڳوڻي صدر آصف زرداري لاءِ فزيوٿراپي لاءِ مهانگي مشين آڻڻ جو فيصلو ڪيو ويو آهي، مشين ايندي ئي سندس فزيو ٿراپي شروع ڪئي ويندي، ذريعن موجب اڳوڻي صدر آصف زرداري جي گهر مان سندس استعمال هيٺ شيون ڪارڊيڪ سينٽر ۾ پهچايون ويون، ان کان اڳ آصف زرداري کي سخت پهري ۾ پمز اسپتال منتقل ڪيو ويو، اڳوڻي صدر کي بڪتربند گاڏي ۾ پمز ۾ آندو ويو، سيڪيورٽي کان اڳيان رکندي پمز اسپتال جي پوئين گيٽ کان کيس آندو ويو.

 

 

دادو جا 3 شاگرد دوست درياهه سنڌ ۾ ٻڏي ويا،2 سئوٽ  فوت، هڪ نوجوان کي غوطا خورن بچائي ورتو

دادو(رپورٽ: محمد رفيق چنه) دادو- مورو لنڪ روڊ ڀرسان پوليس اسٽيشن جهلو جي حد ۾ ڪچي جي علائقي ۾ درياهه جي ٻوڏ جي پاڻي جي ننڍن تلائن ۾ وهنجندڙ دادو شهر جا 3 نوجوان ٻڏي ويا، مقامي ٽوٻن جي مدد سان هڪ ڄڻي کي بچايو ويو جڏهن ته 2 نوجوان پاڻي ۾ ٻڏي فوت ٿي ويا، فوتين ۾ ارسلان پٽ اعجاز سولنگي ۽ نادر علي پٽ عبدالرحمان سولنگي شامل آهن، جڏهن ته هڪ نوجوان مهتاب ملاح کي ڳڻتي جوڳي حالت ۾ پاڻي مان زندهه ڪڍيو ويو جنهن کي سول اسپتال دادو ۾ داخل ڪيو ويو آھي، ٻي طرف فوتي نوجوان جيڪي دادو شھر جي پاڙي ڳوٺ آدم خان سولنگي جا رهواسي ٻڌايا وڃن پيا، فوتي نوجوانن جو پوسٽ مارٽم ڪرائڻ بعد وارث سندن مڙهه گهرن ڏانهن کڻائي ويا، هن افسوسناڪ واقعي تي پوري علائقي ۾ سوڳ جي لهر فوتين جي گهرن ۾ ڪهرام متل جڏهن ته ٻوڏ جي پاڻي سان ڀرجي ويل ڍنڍن، تلائن ۽ واهن ۾ روزانو سوين نوجوان دادو شهر سميت آس پاس کان اچي وهنجن ٿا ۽ انهن کي ڪو به روڪڻ وارو ناهي، جڏهن ته ڊپٽي ڪمشنر دادو ۽ ايس ايس پي دادو کي گهرجي ته درياهه جي پاڻي ۾ وهنجن تي پابندي لڳائي انساني جانيون بچائڻ لاءِ قانوني تحرڪ ورتو وڃي، جيڪڏهن ضلعي انتظاميه جي اهڙي ڪوشش ورتل هجي ها ته اهڙو سانحو پيش نه اچي ها.

 

 

لاڙڪاڻي ۾ ڊي ايس پي پنهنجي پُٽ کي تشدد ڪري بيدردي سان قتل ڪري ڇڏيو ، ڪراچي فرار ٿيڻ جي ڪوشش، گرفتار

لاڙڪاڻو (بيورو رپورٽ) لاڙڪاڻي ۾ ڊي ايس پي پنهنجي پُٽ کي قتل ڪري ڇڏيو. پوليس کيس ڪراچي فرار ٿيندي سوگهو ڪري ورتو. ريشم گهٽيءَ جي رهواسي پوليس آفيسر الهڏنو سانگي پُٽ ذوالقرنين حيدر سانگي کي تشدد ڪري قتل ڪرڻ بعد فرار ٿي ويو. اطلاع تي مارڪيٽ ٿاڻي جي پوليس پهتي ۽ لاش تحويل ۾ وٺي اسپتال منتقل ڪيو، جتان پوسٽ مارٽم بعد لاش وارثن حوالي ڪيو ويو. پوليس ڪارروائي ڪري جوابدار ڊي ايس پي کي گرفتار ڪري ورتو آهي. پوليس جو چوڻ آهي ته جوابدار ڊي ايس پي الهڏنو سانگي پُٽ کي قتل ڪرڻ بعد ڪراچي فرار ٿي رهيو هو، کيس نصير آباد ڀرسان گرفتار ڪيو ويو آهي. پوليس جو چوڻ آهي ته ڊي ايس پي الهڏنو سانگي پُٽ کي وحشياڻو تشدد ڪري قتل ڪيو آهي. سندس نوجوان پُٽ ڏهين جماعت ۾ پڙهندو هو. واقعي جو ڪارڻ معلوم نه ٿي سگهيو آهي، جاچ ڪئي پئي وڃي. گرفتاري بعد صحافين سان مختصر ڳالهائيندي ڊي ايس پي الهڏنو سانگي پٽ کي قتل ڪرڻ وارا الزام رد ڪندي چيو ته ذوالقرنين نافرمان هو، رات جي وقت کيس مارڪٽ ڪئي، جنهن کانپوءِ ذوالقرنين ڀت ۾ پنهنجو مٿو هڻي پاڻ کي ماريو آهي. مون کيس قتل ناهي ڪيو. هن چيو ته پوسٽ مارٽم بعد سڀ ڪجهه سامهون اچي ويندو.