تازيون خبرون
پاڪستان هائوسنگ اسڪيم شروع ٿيڻ سان 40 صنعتن جو ڦيٿو هلڻ شروع ٿي ويندو: عمران خان - آصف زرداري ۽ شهباز شريف کي پيسا موڪليندڙ 4 ڪمپنيون گڏيل آهن: شهزاد اڪبر - ن ليگ پاران وزيراعظم، شهزاد اڪبر ۽ ٻين خلاف برطانوي عدالت ۾ وڃڻ جو اعلان - پ پ جا وڏيرا پاڻي چور آهن، نادر مگسي پاران رينجرز گهرائڻ جو مطالبو - پاڪستان ۾ 10 کان 15 سيڪڙو ماڻهو معذور آهن، انهن جو خيال رکڻ معاشري جي گڏيل زميواري آهي: عارف علوي - شهباز شريف جو خاندان ڏوهه قبول ڪري ڪرپشن کان توبه ڪري وٺي: فردوس عاشق اعواڻ - صادق سنجراڻي سان اسد قيصر ۽ عثمان بوزدار جون ملاقاتون، تحريڪ عدم اعتماد کي ناڪام بڻائڻ لاءِ ساٿ ڏيڻ جي خاطري - اڳوڻي صدر جي رمانڊ ۾ 14 ڏينهن جي واڌ، پرڏيهي امداد اسٽيٽ بئنڪ ۾ ايندي آهي: آصف علي زرداري - يونيسيف جي سهڪار سان پورهيو ڪندڙ ٻارڙن بابت سروي ڪري رهيا آهيون جئين انهن کي فني تعليم ڏئي سگهجي: وڏو وزير - ايڪنڪ داسو پن بجلي منصوبي جي منظور ڏئي ڇڏي آهي، ڪراچي ۾ پاڻي جي فراهمي بابت جلد خوشخبري ٻڌائينداسين: فيصل واوڊا

Daily Archives: July 5, 2019

راڻا ثناءُ الله جي گرفتاري سان حڪومت جو تعلق ناهي، پاڪستان ۾ عدالتون ۽ادارا آزاد آهن: عمران خان

اسلام آباد(ويب ڊيسڪ) وزير اعظم عمران خان جو چوڻ آهي ته راڻا ثناءُ الله جي گرفتاري سان حڪومت جو ڪو به واسطو ناهي پر مخالف  ڌر حڪومت تي الزام هڻي پنهنجن ڏوهن تان ڌيان هٽائڻ چاهي ٿي. تفصيل موجب وزير اعظم عمران خان جي صدارت هيٺ پارٽي ترجمان ۽ اڳواڻ جو اجلاس ٿيو، جنهن ۾ وفاقي وزيرن به شرڪت ڪئي، اجلاس ۾ مخالف ڌر اڳواڻن جي گرفتارين کان پوءِ پيدا ٿيل صورتحال تي به ڳالهيون ڪيون ويون.  ان موقعي تي وزير اعظم عمران خان جو چوڻ هو ته مخالف ڌر رڳو پنهنجي ڏوهه تان ڌيان هٽائڻ جي لاءِ حڪومت تي الزام هڻي رهي آهي، انتقام جي سياست پي ٽي آءِ جو نظريو ناهي، ليگي اڳواڻ راڻا ثناءُ الله جي گرفتاري سان حڪومت جو ڪو به واسطو ناهي، جن ماڻحن تي ڪيس آهن عدالتن ۾ انهن جون صفايون ڏيو، پاڪستان ۾ هاڻ اداري ۽ عدالتون آزاد آهن. وزير اعظم جو چوڻ هو ته بنا نالي ملڪيت رکندڙن کي پورو موقعو ڏنو ويو، پر هاڻ بنا نالي ملڪيت رکندڙن جي خلاف بنا فرق جي ڪارروائي ٿيندي. ان کان اڳ وزير اعظم عمران خان سان پنجاب جي وڏي وزير عثمان بوزدار ملاقات ڪئي، وزير اعظم کي پنجاب ۾ صنعتي شعبي، زراعت ۽ سياحت جي هٿي لاءِ ڪيل بندوبستن، خاص اقتصادي زونز جي قيام ۽ واپاري طبقي جي مسئلن ۽ حل تي بريفنگ ڏني وئي. وزير اعظم جو چوڻ هو ته ڏکين معاشي حالتن ۾ حڪومت متوازن بجيٽ پيش ڪئي آهي، بجيٽ ۾ صنعتي شعبي کي هٿي ۽ ڪمزور طبقي جي تحفظ تي سمورو ڌيان ڏنو ويو، معاشي صورتحال کي نظر ۾ رکندي حڪومت ڏکيا فيصلا ڪيا، انهن فيصلن جو مقصد معيشت جو رخ درست ڪرڻ ۽ ملڪ کي معاشي ڏکيائين مان ڪڍڻ آهي.

 

سياست سان تعلق ناهي، جيڪو ڪندو اهو ئي ڀريندو، ڪرپشن جو حسان ڏيڻو پوندو: نيب چيئرمين

اسلام آباد ( ويب ڊيسڪ ) نيب چيئرمين جاويد اقبال چيو آهي ته نيب سياسي انتقام تي يقين نه ٿي رکي، جيڪو ڪندو اهو ئي ڀريندو.  اسلام آباد ۾ تقريب کي خطاب ڪندي نيب چيئرمين جاويد اقبال چيو ته اداري جو ڪم رڳو احتساب ڪرڻ آهي، نيب جي ڪوشش هوندي آهي ته ملڪ مان ڪرپشن ختم ڪئي وڃي، 35 سال اقتدار ۾ رهندڙن جو احتساب ٿيندو. هن چيو ته ماڻهو عدالتن مان ٻاهر نڪري چون ٿا ته نيب سياسي انتقام جو نشانو بڻائي رهي آهي، نيب جي پاليسي آهي ته جيڪو ڪندو اهو ئي ڀريندو جنهن تي اسان قائم آهيون. جاويد اقبال چيو ته سڀني کي يقين ڏياريان ٿو ته نيب ۾ سياسي انتقام جو ڪو سوال ئي پيدا نه ٿو ٿي، نيب جو سياست سان ڪو تعلق ناهي.  هن چيو ته توهان ثابت ڪيو ته نيب جو سياست سان تعلق آهي، جيڪڏهن ٿيو ته مان پاڻ ئي عهدو ڇڏي ڏيندس.  هن چيو ته نيب پنهنجي ڪارروائي دوران ماڻهن خاص طور تي عورتن جي عزت نفس جو خيال رکيو آهي. سندس چوڻ هو ته نيب وٽ شاهديون موجود آهن، اسان ماڻهن کان ڪرپشن بابت پڇا ڪنداسين ۽ ذميواري کان منهن نه موڙينداسين. جاويد اقبال چيو ته مهينن کان اقتدار ۾ رهندڙ ماڻهن جو به احتساب ٿي رهيو آهي، نيب اڳيان سڀ برابر آهن، شاهديون نه ملڻ تي ڪيس بند ڪيو ويندو آهي. هن چيو ته ڪروڙين ۽ اربين رپين جي مني لانڊرنگ ڪئي وئي آهي، نيب ڪنهن به قسم جي سياسي انتقام تي يقين نه ٿي رکي، سياست سان ڪو به واسطو ناهي.  سندس چوڻ هو ته نيب 326 بلين رپين جي رقم جمع ڪرائي وئي آهي، ماضي ۾ جيڪو ٿيو نه ٿي ها ته ملڪ ترقي ڪندڙ ملڪن ۾ شامل هجي ها. جاويد اقبال چيو ته اسان جو ڪنهن سان ملڪيت جو تڪرار ناهي، انتقامي ڪارروائي ڇو ڪنداسين.  هن چيو ته ملڪ مان ڪرپشن جو خاتمو نيب جو ڪم آهي، جيڪڏهن ڪرپشن ختم نه ٿي ته نيب پاڻ ڏوهي هوندي.

 

ملڪ مشڪل دور ۾ مليو، قرض لاهڻ لاءِ ڏکيا فيصلا ڪرڻا آهن: حفيظ شيخ

اسلام آباد ( ويب ڊيسڪ ) ناڻي واري صلاحڪار ڊاڪٽر عبدالحفيظ شيخ چيو آهي ته ايمنسٽي اسڪيم تحت هڪ لک 37 هزار ماڻهن کان 70 ارب رپيه اوڳاڙيا ويا آهن. اسلام آباد ۾ پريس ڪانفرنس ڪندي ڊاڪٽر عبدالحفيظ شيخ چيو ته  آءِ ايم ايف پروگرام جي منظوري ڏئي پاڪستان جي پاليسين تي ڀاڙيو ويو، پروگرام جي منظوري کانپوءِ ٻيا مالياتي ادارا به پاڪستان کي فنڊ ڏيندا، قرض واپس ڪرڻ لاءِ محنت ڪرڻي پوندي.  هن چيو ته آءِ ايم ايف جي پئڪيج سان معيشت ۾ استحڪام ايندو، آءِ ايم ايف بورڊ جي ڪنهن ميمبر پاڪستان لاءِ امداد جي مخالفت  نه ڪئي آهي. هن چيو ته پروگرام جي منظوري ڏئي پاڪستان جي پاليسين تي ڀاڙيو ويو، پروگرام جي منظوري کانپوءِ ٻيا مالياتي ادارا به پاڪستان کي فنڊ ڏيندا، ايشيائي ترقياتي بئنڪ 3 ڏهائي 2 ارب ڊالر پاڪستان کي اضافي ڏيڻ جو سوچي رهي آهي،  عالمي مالياتي بئنڪ به پاڪستان کي اضافي رقم ڏيندي. سندس چوڻ هو ته اي ڊي بي ۽ عالمي بئنڪ جا فنڊ بجٽري سپورٽ لاءِ  به هوندا، قرض پروگرام تي آءِ ايم ايف به پريس ڪانفرنس ڪندي، ملڪ مشڪل دور ۾ مليو، ملڪي قرض تاريخ جي بلند ترين سطح تي آهي، قرض واپس ڪرڻ لاءِ محنت ڪرڻي پوندي.  ناڻي واري صلاحڪار ڊاڪٽر عبدالحفيظ شيخ چيو ته دوست ملڪن کان ڊپازٽس حاصل ڪيا آهن، آءِ ڊي جي بي ۽ سعودي عرب دير ادائيگين تي تيل فراهم ڪندا، آءِ ايم ايف پروگرام جي منظوري مان ظاهر آهي ته نئين پاڪستاني قيادت اعتماد ڪيو ويو آهي، اسان کي پنهنجا خرچ گهٽ ڪرڻ سان گڏ ڏکيا فيصلا ڪرڻا آهن.  هن چيو ته امير کان ٽيڪس وٺڻي آهي ۽ ڪمزور طبقي جو دفاع ڪرڻ آهي، عورتن جي ڀلائي لاءِ فنڊ ۾ 100 ارب رپين جو اضافو ڪيو ويو آهي، بجيٽ ۾ ڪاروباري سيڪٽر کي سهولتون ڏنيون ويون آهن.

 

 

عمران خان مڙي وڃي، کائنس هڪ هڪ ظلم جو حساب ورتو ويندو: شهباز شريف

لاهور (اين اين آءِ) ن ليگ جي صدر ۽ قومي اسيمبلي ۾ مخالف ڌر اڳواڻ شهباز شريف چيو آهي ته عمران خان اهو وقت پري ناهي جڏهن تون قوم جي اڳيان پيش ٿيندي ۽ هڪ هڪ ظلم جو بدلو ورتو ويندو،  ڪارڪنن دل نه لاهين، قيادت توهان سان گڏ آهي جنهن ماڻهو هن ملڪ کي ايٽمي طاقت بڻايو، سي پيڪ جو تحفو ڏنو، ملڪ مان اونداهي ختم ڪئي ان کي جيل ۾ وڌو ويو آهي، اهڙن خيالن جو اظهار هن ڪوٽ لکپت جيل مان ٻاهران گڏ ٿيل ڪارڪنن کي خطاب ڪندي ڪيو، شهباز شريف چيو ته سعد رفيق، سلمان رفيق ۽ راڻا ثناءُ الله کي سمورين سهولتن کان محروم ڪيو پيو وڃي، ڪارڪنن پريشان نه ٿين، الله جي مدد اسان سان آهي، هن چيو ته ن ليگ جي دور ۾ ملڪ جي ترقي ٿي، مان توهان کي پيغام ڏيان ٿو ته دل نه لاهيو، حوصلو ڪريو، قيادت توهان سان وک وک تي گڏ آهي، ان کان اڳ شهباز شريف سان مولانا فضل رحمان ٽيلفون تي رابطو ڪري رهبر ڪميٽي جي اڄ جمعي تي ٿيندڙ اجلاس ۽ ٻين معاملن تي خيالن جي ڏي وٺ ڪئي، مولانا فضل رحمان شهباز شريف کي نواز شريف لاءِ خاص پيغام ڏنو.

 

راڻا ثناءُ الله پوليس مقابلن جو چيمپئن هو ۽ ڪيترن ئي بي گناهن کي پوليس مقابلن ۾ مارايو: فردوس عاشق اعواڻ

اسلام آباد(ويب ڊيسڪ) وزير اعظم جي سڌُ سماءَ ۽ نشريات بابت خاص مددگار فردوس عاشق اعواڻ جو چوڻ آهي ته راڻا ثناءُ الله پوليس مقابلن جو چيمپئن هو ۽ ڪيترن ئي بي گناهن کي پوليس مقابلن ۾ مارايو. اسلام آباد ۾ پريس ڪانفرنس ڪندي وزير اعظم جي سڌُ سماءَ ۽ نشريات بابت خاص مددگار فردوس عاشق اعواڻ جو چوڻ هو ته 2007ع ۾ چارڊر آف ڪرپشن کي چارٽر آف ڊيموڪريسي جو نالو ڏنو ويو، ميچ فڪسنگ ڪري سياست ڪندا رهيا ۽ وارا فڪس ڪري ملڪ ۽ قوم کي نقصان پهچايو ويو، شخصيتون مضبوط ٿينديون ويون ۽ ادارا ڪمزور ٿيندا رهيا، چوٿين نسل کي گروي رکيو ويو. فردوس عاشق اعواڻ جو چوڻ هو ته عمران خان عوام جي حقن جو ضامن بڻجي آيو آهي، جيڪڏهن هو سسٽم جو حصو بڻجي وڃي ها ته هن لاءِ قبول هيو، پر هن جي عزم محنت ڪش کي حق ڏيارڻو هو، هن پڪو پهه ڪري رکيو آهي ته نه ڪرپشن ڪرڻي آهي نه ڪرڻ ڏيڻي آهي، آصف زرداري جي بنا نالي اثاثا سامهون اچي ويا آهن، بنا نالي اثاثا ايف بي آر اٽيچ ڪري ورتا آهن هاڻ آصف زرداري کي عمران خان ڪيئن ٿو سٺو لڳي سگهي. سڌُ سماءَ ۽ نشريات بابت خاص مددگار چيو ته راڻا ثناءُ الله پوليس مقابلن جو چيمپئن هو ۽ ڪيترن ئي بي گناهن کي پوليس مقابلن ۾ مارايو، فاشسٽ حڪومت اُها هوندي آهي جيڪا اُميد وارين عورتن کي گوليون هڻي، جيڪو نشو پکيڙي رهيو هو ان کي هيرو بڻائي پيش ڪيو پيو وڃي، حڪومت کي نشو پکيڙيندڙن ۽ انهن جي سهولتڪارن کي پڪڙڻو آهي، هاڻ پاڪستان تبديل ٿي چڪو آهي نئين پاڪستان ۾ قانون جي حڪمراني آهي، وڏن منهن تي قانون لاڳو ٿيندو ته عام ماڻهو ڏانهن به اِهو ئي پيغام ويندو ته هاڻ قانون جي حڪمراني آهي. فردوس عاشق اعواڻ جو چوڻ هو ته عمران خان جڏهن وزير اعظم بڻيو ته آمريڪي صدر ٽرمپ جي بيان تي پاڪستان جيڪو موقف اختيار ڪيو ان تي خاموشي ٿي، اڄ عمران خان وقار سان آمريڪا وڃي رهيو آهي، آمريڪي کي منٿون ڪري نه پر ڳاٽ اونچو ڪري وڃي رهيو آهي، هي نئون پاڪستان آهي عمران خان سفير جي گهر ۾ رهندو ڪنهن فائيو اسٽار هوٽل ۾ نه.

 

راڻا ثناءُ جي منشيات حرام ۽ وزير اعظم جي حلال، مرڻ مهانگو، جيئڻ مهانگو ۽ رت سستو آهي، هيءَ ڪهڙي تبديلي آهي؟: بلاول زرداري

چارسده(ويب ڊيسڪ) پاڪستان پيپلز پارٽي جي چيئرمين بلاول ڀٽو زرداري جو چوڻ آهي ته مرڻ مهانگو، جيئڻ مهانگو ۽ رت سستو آهي، هيءَ ڪهڙي تبديلي آهي؟ چارسده ۾ جلسي کي خطاب ڪندي بلاول چيو ته مهانگائي جي سونامي عوام کي ٻوڙي ڇڏيو آهي، ٽيڪسز جي ٻوڏ ۾ عوام کي لوڙهيو ويو آهي، قوم سان ڪوڙ تي ڪوڙ ڳالهايو پيو وڃي، هر طبقي جو معاشي قتل ٿي رهيو آهي، هيءَ ڪهڙي تبديلي آهي؟ هن چيو ته اسان 1973 جي آئين ڏانهن اک به کڻڻ ڏيندي، سليڪٽڊ هي سڀ ڪجهه ختم ڪرڻ چاهي ٿو، صدارتي نظام آڻڻ چاهيون ٿا، ون يونٽ نظام آڻڻ چاهيون ٿا. بلاول الزام هنيو ته سڄي ملڪ ۾ بندوق جي زور تي اسان جي پولنگ ايجنٽن کي ٻاهر ڪيو ويو، پاڪستان جي تاريخ ۾ پهريون ڀيرو فوج جي پولنگ اسٽيشن جي اندر ۽ ٻاهر بيهاريو ويو، مشرف ۽ ضياءَ جي حڪومت ۾ به فوج کي پولنگ اسٽيشن جي اندر نه بيهاريو ويو، عمران نيازي شفاف اليڪشن کان ڊڄندو آهي، اليڪشن ڪميشن جاڳي، توهان ڪيترا اليڪشن عمران خان کي کٽرائيندا؟ هن وڌيڪ چيو ته هي پينشن ۾ واڌ نه ڪري بزرگن جو معاشي قتل ڪري رهيا آهن، ننڍن واپارين جو معاشي قتل ڪري رهيا آهن، هي تبديلي هي نئون پاڪستان عوام جي لاءِ عذاب بڻيل آهي، پيپلز پارٽي هميشه غريب ماڻهو جي لاءِ جدوجهد ڪئي آهي، جيستائين جمهوري حق محفوظ نه هوندا تيستائين معاشي حق محفوظ نه هوندا. بلاول چيو ته آئين ڏانهن اک به کڻڻ نه ڏينداسين، جمهوري ۽ معاشي حقن جو دفاع ڪنداسين، سڄي ملڪ ۾ اسان جي پولنگ ايجنٽن کي ٻاهر رکيو ويو، منهنجو تڪ جو فارم 45 اڄ به گم آهي، 2013ع ۽ 2018ع ۾ دهشتگردي عروج تي هئي پوءِ به فوج کي پولنگ اسٽيشن تي نه بيهاريو، هي اسان جا ادارا آهن، انهن کي تڪراري نه بڻايو وڃي. هن چيو ته اليڪشن ڪميشن جاڳي، هي اسان وٽ اليڪشن ڪميشن آهي يا سليڪشن ڪميشن؟ سيڪشن 144 تي مخالف ڌر جي نمائندن کي هراسان ڪيو ويندو آهي، اليڪشن ڪميشن پنهنجو آزاد ڪردار ادا ڪري، هي اليڪشن ثابت ڪندي ته اسان وٽ اليڪشن ڪميشن آهي يا سليڪشن ڪميشن آهي. پيپلز پارٽي جي چيئرمين چيو ته ڪنهن قسم جي آزادي ۽ جمهوريت آهي ته اسان جو ميڊيا سنسر آهي، اڳوڻي صدر جو انٽرويو نه هلي سگهيو، هي ڪهڙي قسم جي آزادي ۽ جمهوريت آهي. هن چيو ته هتي ٻٽو نظام آهي، جهونپڙي حرام بني گالا حلال آهي. بلاول ڀٽو چيو ته انهن جو ٻٽو نظام آهي، جهونپڙي حرام آهي، بني گالا حلال آهي، نواز شريف جي آف شور ڪمپني حرام آهي، ايم ڪيو ايم جي فارن فنڊنگ حرام آهي پر پي ٽي آءِ جي فارن فنڊنگ حلال آهي، راڻا ثناءُ الله جي منشيات حرام آهي ۽ وزير اعظم جي منشيات حلال آهي. هن چيو ته ڌانڌلي ورتل حڪومت ڌانڌلي ڪري بجيٽ پاس ڪرايو آهي، قبيلائي علان جي نمائندن کي اجلاس ۾ اچڻ ناهي ڏنو ويو، هي عوام دشمن بجيٽ آهي، عوام دشمن بجيٽ سان رت چوسي رهيا آهن، ڀاڄي مهانگي ڪري ڇڏي، ڊيل مهانگو ڪري ڇڏيو، کنڊ مهانگي ڪري ڇڏي، مهانگائي جي سونامي ۾ عوام کي لوڙهيو ويو آهي، هي عوام کي بيروزگاري جي دلدل ڏانهن ڌِڪي رهيا آهن، حڪومت هر شئي تي ٽيڪس لڳائي ڇڏيو آهي.

 

ڪراچي شهر ۾ وڌندڙ گند ڪچري جو نوٽيس، وڏي وزير پاران خانگي فرمن جا ڪانٽريڪٽ رد ڪرڻ جي هدايت

ڪراچي (اسٽاف رپورٽر) سنڌ جي وڏي وزير  سد مراد علي شاهه شهر۾وڌندڙ گند ڪچري جو سختيءَ سان نوٽس وٺندي  سنڌسالڊ ويسٽ مئنجمنٽ اٿارٽيءَ کي هدايت ڪئي ته اهي شهر مان گند ڪچري کڻڻ ۽ صفائيءَ لاءِ مقرر ڪيل خانگي فرمن جا ڪانٽريڪٽ رد ڪري ڇڏي ۽ هن مڪاني ادارن واري کاتي تي زور ڀريو ته اهي ڊي ايم سيز مان نااهل، ڪاهل ۽ دلچسپي نه وٺندڙ ميونسپل ڪمشنرز کي هٽايو وڃي. هن چيو ته اهو عمل ناقابل برداشت آهي ۽ مان لاڳايپل آفيسرن پاران اهڙي قسم جي سستي، ڪاهلي ۽ غفلت کي برداشت نه ٿو ڪري سگهان. هن اهڙيون هدايتون اڄ شهر ۾ صفائيءَ بابت مسئلن جي حوالي سان ويچار بابت گهرايل اهم اجلاس جي صدارت ڪندي ڏنيون. اجلاس ۾ صوبائي وزير سعيد غني، صلاحڪار مرتضيٰ وهاب، چيف سيڪريٽري سنڌ ممتاز شاهه، ڪمشنر ڪراچي افتخار شالهواڻي، سيڪريٽري بلديات خالد حيدر شاهه، ايم ڊي سنڌ سالڊ ويسٽ مئنجمنٽ اٿارٽي ڊاڪٽر عطا الداس، شهر جي  سمورن 6 ڊپٽي ڪمشنرن شرڪت ڪئي. وڏي وزير چيو ته روڊ جيڪي ويجهڙ ۾ ٻيهر تيار ڪيا ويا  آهن اهي سٺا نظر نه پيا اچن، ڇاڪاڻ ته انهن جي صفائي نه پئي ٿئي ۽ جيتري ٿئي پئي اها به ڪجهه حصي جي. اسان جا ڊي ايم سيز جا آفيسر به پنهنجي ڪم ۾ ناڪام ٿي ويا آهن. هن چيو ته مان جتي به ويو آهيان اتي گند پيل ڏٺو آهي ۽ ڪوبه لاڳاپيل آفيسر بشمول ميونسپل ڪمشنر ۽ ڊي سيز ڪم ڪندي نظر نه آيا آهن. هن چيو ته سندس ان ڳالهه جو پڻ نوٽس ورتو آهي ته ڪلفٽن پل جيڪو ضلعي سينٽرل ۾ اچي پيو اتي بيٺل وڻن کي وڍيو ويو آهي، جيڪڏهن ڪنهن به شخص وڻ وڍيو ويو آهي ته ان کي لازمي گرفتار ڪيو وڃي ۽ مان ان کي سلاخن پويان ڏسڻ چاهيان ٿو. هن سمورن ڊي سيز کي هدايت ڪئي ته اهي پنهنجن علائقن ۾ وڻن جي حفاظت ڪن ۽ وڌ ۾ وڌ جيترو  ٿي سگهي وڻ ۽ ٻوٽا لڳايا وڃن. مراد علي شاهه ايم ڊي سنڌ سولڊ ويسٽ مئنجمنٽ کي ٻڌايو ته سندس ضلعي اولهه ۾ صفائي واري ڪم ۾ مصروف ڪمپنين جي ڪارڪردگيءَ مان خوش نه آهي. هن چيو ته ضلعي ڏکڻ ۾ به صفائيءَ لاءِ هائير ڪيل خانگي ڪمپني به اطمنان بخش ريت ڪم نه پئي ڪري. هن صوبائي وزير بلديات سعيد غني کي هدايت ڪئي ته هُو ذاتي طور تي مداخلت ڪري ۽ فوري طور شهر مان ڪچرو کڻڻ ۽ صفائي ۽ ٻهارو ڪرڻ لاءِ ڪم ڪندڙ ڪمپنين جا ڪانٽريڪٽ رد پيا وڃن. هن صوبائي وزير کي اها به هدايت ڪئي ته هُو نااهل، ڪاهل ۽ غفلت جو مظاهرو ڪندڙ ميونسپل ڪمشنرن کي به هٽائڻ شروع ڪيو وڃي. هن چيو ته اسانکي ڪنهن به اهڙي آفيسر جي ضرورت نه آهي جيڪو پنهنجي ڪم سا مخلص نه هوندو، وڏي وزير ڊي سيز جي نگرانيءَ هيٺ ڪميٽيون جوڙيون جيڪي ڪچرو کڻڻ، صفائيءَ ۽ ٻهارو ڏيڻ واري ڪمن جي نگراني ڪنديون. هن چيو ته مان چاهيان ٿو ته اهي سب ڊويزن جي سطح تي ٿيڻ گهرجي جتي اسسٽنٽ ڪمشنرن کي سونپي وڃي ته اهي پنهنجن لاڳاپيل علائقن کي صاف رکن. هن چيو ته ڊي ايم سيز جا ميونسپل ڪمشنرز پنهنجن ڊپٽي ڪمشنرن کي صفائي سٿرائي وارن ڪمن جي حوالي سان جوابده هوندا. مراد علي شاهه ڪمشنر ڪراچيءَ کي هدايت ڪئي ته شهر ۾ صفائيءَ جي حوالي سان ٿيندڙ هر هڪ ڪم کي ذاتي طور تي ڏسي ۽ ڪچري جي ڍيرن کي کڻڻ شروع ڪيو وڃي.هن چيو ته مان ايندڙ هفتي جي شروع ۾ شهر جا اوچتا دورا ڪندس ۽ ڪنهن به غفلت ۽ ڪوتاهي نظر آئي ته ان خلاف سخت ڪارروائي ڪئي ويندي. وڏي وزير ڪمشنر ڪراچي، ڊپٽي ڪمشنرن ۽ ٻين لوڪل باڊي جي آفيسرن کي به هدايت  ڪئي ته اهي پنهنجن علائقن ۾ وڻڪاري مهم شروع ڪئي وڃي. هن چيو ته رڳو ٻوٽا لڳائڻ ڪافي نه آهي پر لڳايل ٻوٽن جين نهداشت به ضروري آهي ته جيئن اهي سٺي ريت وڌي سگهن. هن چيو ته ڪراچيءَ ۾ وڏي پئماني تي وڻڪاري ۽ ساوڪ جي گهرج آهي ۽ هر هڪ کي ان حوالي سان سندن ڪردار ادا ڪرڻ گهرجي. اجلاس ۾ واضح ڪيو ويو ته ضلعي سينٽرل مان 2200 ٽن ڪچرو گڏ ٿيندو آهي ۽ ان مان بمشڪل 1600 ٽن لينڊ فل سائيٽس تائين پهچايو ويندو آهي ۽ اهڙي ريت ضلعي اولهه ۾ 2500 ٽن ڪچرو گڏ ٿيندو آهي ۽ ان مان بمشڪل 1000 ٽن ڪچرو کنيو ويندو آهي. ان تي وڏي وزير پنهنجي ڪاوڙ جو اظهار ڪندي لاڳاپيل ڊپٽي ڪمشنرن کي هدايت ڪئي ته اهي هڪ اسپيشل اسائنمنٽ جي طور تي ڪچري کي کڻڻ وارو ڪم شروع ڪيو وڃي ۽ ڪچري جي پيل ڍيرن کي هٽائڻ لاءِ ڪجهه ڊمپرن جون خدمتون به حاصل ڪيون وڃن. هن ڊپٽي ڪمشنرن کي هدايت ڪئي ته اهي سندن علائقن ۾ سٺي ريت صفائي سٿرائي ۾ ناڪام ٿيندڙ ڊي ايم سيز، ميونسپل ڪمشنرن بابت کين رپورٽ پيش ڪئي وڃي. هن نوان تعمير ڪيل روڊن جي فوٽ پاٿن جي مرمت ۽ رنگ ڪرڻ جي به هدايت ڪئي ۽ اهم هنڌن کي خوبصورت بڻائڻ جي پڻ هدايت ڪئي. ڪمشنر ڪراچي سينگهارن واري ڪمن جي ذاتي طور تي نگراني ڪندو.  ٻئي طرف سنڌ جي وڏي وزير  سد مراد علي شاهه پاليسي فيصلو وٺندي نمائش کان ميونسپل پارڪ  ايٽ گريڊ بي آر ٽي گرين لائن کي تعمير ڪرڻ جي هدايت ڪئي ٻئي صورت ۾ ٻين مختلف روڊن کان ايندڙ بي آر ٽي لائنز کي ڳنڍڻ ۾ ڏکيائي ٿيندي. هن اهو فيصلو اڄ ڪراچي ماس ٽرانزٽ ۽ بي آر ٽي  پروجيڪٽ بابت وزيراعليٰ هائوس ۾ اجلاس جي صدارت ڪندي ڪيو، اجلاس ۾ مڪاني ادارن وارو صوبائي وزير سعيد غني، ٽرانسپورٽ وارو وزير اويس شاهه، چيف سيڪريٽري ممتاز شاهه، چيئرپرسن پي اينڊ ڊي ناهيد شاهه، سيڪريٽري بلديات خالد حيدر شاهه، سيڪريٽري ٽرانسپورٽ عباس ڏيٿو، ڪنسلٽنٽس ۽ ٻين لاڳاپيل آفيسرن شرڪت ڪئي. چيف سيڪريٽري ممتاز شاهه اجلاس کي ٻڌايو ته وفاقي حڪومت صوبائي حڪومت کي بي آر ٽي گرين لائن جي انفراسٽريڪچر نمائش کان ميونسپل پارڪ لاءِ ٻه آپشن ڏنا آهن يا ته ايٽ-گريڊ يا انڊرگرائونڊ. وڏي وزير چيو ته منصوبي جي لاڳت ۾ واڌ ٿيندي جيڪڏهن هڪ ٽنل ايم اي جناح  روڊ کان ميونسپل پارڪ تعمير ڪيو وڃي، تعميراتي ڪمن سان ايم اي جناح روڊ تي موجود مارڪيٽن ۾ هلندڙ سرگرمين ۾ اضافو ٿيندو. هن چيو ته منصوبي کي مڪمل ڪرڻ لاءِ به ڊگهو عرصو گهربل آهي انڪري ٻه ڪلو ميٽر ٽنل جي تعمير فزيبل نه آهي. وڏي وزير چيو ته بي آر ٽي گرين لائن جو حصو ايٽ-گريڊ تعمير ڪيو وڃي ته جيئن اهو جلد مڪمل ٿي سگهي ڇاڪاڻ ته ان جي تڪميل تي اڳئي گهڻو وقت لڳايو ويو آهي. ڪنسلٽنٽ وڏي وزير کي ٻڌايو ته ايٽ-گريڊ چئن لائنن وارو ٽريڪ هوندو جنهن جي ڪجهه حصن تي ٽن لائن تائين گهٽتائي ڪئي وئيندي. ان تي وڏي وزير ڪنسلٽنٽس تي زور ڀريو ته اهي ٽريف انجنيئر ذريعي انهن مسئلن کي حل ڪيو وڃي ٻئي صورت ۾ گرين لائن جي هلندڙ رٿا ڪڏهن به ڏينهن جي روشني ۾ نه ڏٺو ويندو، مراد علي شاهه چيو ته ٻيا مختلف روڊ جهڙوڪ لياري، ڪياماڙي، هاڪس بي، فشريز ۽ ٻين مختلف علائقن کان ايم اي جناح روڊ سان ڳنڍڻ ۾ ڏکيائيون اينديون. اهم مسئلو بي آر ٽي جي مختلف روڊن جو مکيه جنڪشن سان ڳنڍڻ جو هوندو انڪري اسان کي ان کي ايٽ گريڊ بڻائڻو آهي.

 

اڳوڻي وزير اعظم سان گهرڀاتين جي ملاقات، راڻا ثناءُ الله اپوزيشن جو اثرائتو آواز آهي، گرفتاري ان کي دٻائڻ جو ڪوشش آهي: نواز شريف

لاهور (اين اين آءِ) ن ليگ جي اڳواڻ نواز شريف سان گهرڀاتين ڪوٽ لکپت جيل ۾ ملاقات ڪئي، پارٽي اڳواڻ سان ٻڌي جي اظهار لاءِ وڏي انگ ۾ پارٽي اڳواڻ ۽ ڪارڪنن به جيل ٻاهران پهتا، پوليس ڪارڪنن پاران ڪيمپ لڳائڻ لاءِ آندل سامان واپس اماڻي ڇڏيو، پنجاب پوليس ۽ جيل جي اهلڪار ڪارڪنن جي مرڪزي دروازي ڏانهن وڌڻ جي ڪوشش ناڪام ڪري ڇڏي، تفصيل موجب گهرو وزارت جي حڪمن جي روشني ۾ به گذريل ڏينهن رڳو نواز شريف جي گهرڀاتين کي ملاقات جي اجازت ڏني وئي، شهباز شريف، مريم نواز سميت خاندان جي 5 ماڻهن نواز شريف سان ملاقات ڪئي، ان موقعي تي ملڪ جي صورتحال تي خيالن جي ڏي وٺ ڪئي وئي، نواز شريف راڻا ثناءُ جي منشيات ڪيس ۾ گرفتاري جي مذمت ڪندي چيو ته راڻا ثناءُ الله اپوزيشن جو اثرائتو آواز آهي ۽ ان کي دٻائڻ لاءِ ڪوڙو ڪيس داخل ڪيو ويو، ان موقعي تي شهباز شريف ۽ مريم نواز، نواز شريف سان مختلف معاملن تي خيالن جي ڏي وٺ ڪئي، شهباز شريف ۽ مريم نواز جي اچڻ تي ڪارڪنن سندن گاڏين تي گلن جي ورکا ڪري استقبال ڪيو، شاهد خاقان عباسي، خواجه محمد آصف، رانا محمد تنوير، احسن اقبال، خرم دستگير، مريم اورنگزيب، مصدق ملڪ سميت ٻين اڳواڻن ۽ ڪارڪنن جو وڏو انگ جيل پهتو جڏهن ته کين ملاقات جي اجازت نه ڏني وئي. ڊاڪٽر عدنان ٽوئيٽر چيو ته ڪيترائي ڪلاڪ انتظار ڪيو پر نواز شريف جي طبي چڪاس جي اجازت نه ڏني وئي. هن آخر ۾ لکيو ته هي ڏکيو وقت به گذري ويندو.

 

ٽن هفتن تائين رانا ثناءَ الله جي موومينٽ مانيٽر ڪئي، ثبوت موجود آهن: شهريار آفريدي

لاهور ( ويب ڊيسڪ ) ممڪلتي وزير شهريار آفريدي چيو آهي ته فيصل آباد هوائي اڏي تي هڪ منشيات فروش وڪرو ٿيو جنهن مان اسان کي ليڊز مليون، ٽن هفتن تائين رانا ثناءَ الله جي موومينٽ مانيٽر ڪئي، جنهن جون اسان وٽ فوٽيجز ۽ سموريون شيون موجود آهن، سموريون شاهديون عدالت ۾ پيش ڪنداسين، رانا ثناءَ الله کي عالمي ڏوهارين جي نشاندهي تي گرفتار ڪيو ويو آهي، سموريون شاهديون موجود آهن، عدالت سامهون پيش ڪنداسين. لاهور ۾ پريس ڪانفرنس ڪندي ممڪلتي وزير شهريار آفريدي چيو ته سموري ملڪ ۾ ٽن ڏينهن کان رانا ثناءَ الله بابت بحث هلي رهيو آهي، سئو 12 جي لڳ لڳ ماڻهن کي گرفتار ڪيو ويو آهي، جيڪي راڻا ثناءَ الله لاءِ آواز اٿاري رهيا آهن، ٻين بابت ڇو خاموش آهن.  هن چيو ته جڏهن رانا ثناءَ الله بابت ڳالهه شروع ٿي ته فيصل آباد ۾ هوائي اڏي تي هڪ گرفتاري ڪئي وئي، جنهن جو ڪريڊ اي اين ايف کي وڃي ٿو. سندس چوڻ هو ته ٽن هفتن کانپوءِ رانا ثناءَ جي گاڏي ۽ سندس چرپر کي مانيٽر ڪيو،  فوٽيجز سميت سموريون شيون اسان وٽ موجود آهن. شهريار آفريدي چيو ته سڀ کان وڌيڪ مشڪل ڪم روڊ تي چرپر آهي،  عام گاڏي ناڪن تي پڪڙي ويندي آهي، جڏهن ته وڏن نالن ۽ عهدن وارن کي ناڪن تي نه روڪيو ويندو آهي.  شهريار آفريدي چيو ته پڪڙيل 15 ڪلو هيروئن جي عالمي مارڪيٽ ۾ قيمت 15 کان 16 ڪروڙ رپيه آهي، طاقتور ماڻهو ملوث نه هجن ها ته اهو ڪم هلي نه ٿو سگهي.  هن چيو ته رانا ثناءَ الله لاءِ آواز اٿاريندڙن لاءِ هي پيغام آهي ته اڃا گهڻو ڪجهه سامهون ايندو. سندس چوڻ هو ته 15 ڪلو هيروئن جي ڳالهه ناهي پر پاڪستان جي عزت ۽ سلامتي جي ڳالهه آهي ڇا عالمي سطح تي پاڪستان جي ماضي جي حڪومتن اها ڳالهه متعارف ڪرائي آهي، سموريون شيون عدالت ۾ پيش ڪنداسين، اهڙا خطرناڪ ماڻهو آهن جو سمورو تفصيل نه ٿا ڏئي سگهون. شهريار آفريدي چيو ته اي اين ايف جا  سموري ملڪ ۾ 19 پوليس اسٽيشن آهن ۽ 3 هزار جي لڳ ڀڳ نفري آهي.

 

 

نواز شريف سان ملاقات لاءِ ايندڙ ڪارڪنن کي پوليس روڪي ڇڏيو، منهن ماري، حڪومتي حربن سان حوصلا نٿا گهٽائي سگهجن: شاهد خاقان/خواجه آصف

لاهور (ويب ڊيسڪ) اڳوڻي وزيراعظم نواز شريف سان ڪوٽ لکپت جيل ۾ ملاقات لاءِ ايندڙ ڪارڪنن کي پوليس اندر وڃڻ کان روڪي ڇڏيو، جنهن تي ڪارڪنن ۽ اهلڪارن ۾ ڏند چڪ ٿي. ڪوٽ لکپت جيل ۾ قيد نواز شريف سان ملاقات لاءِ خميس جو ڏينهن مقرر آهي ۽ ملاقات ڪندڙن جي فهرست ۾ اڳوڻي وزيراعظم جي گهر ڀاتين جا نالا شامل آهن، جڏهن ته حڪومت طرفان پنجاب جي سياسي اڳواڻن جي نواز شريف سان ملاقات تي پابندي لاڳو ڪيل آهي. مريم نواز، شهباز شريف ۽ ٻيا گهر ڀاتي نواز شريف سان ملاقات لاءِ جيل پهتا ته ڪارڪنن مٿن گل نڇاور ڪيا ۽ نعريبازي ڪئي. نواز شريف سان ملاقات لاءِ خواجا آصف، احسن اقبال ۽ شاهد خاقان عباسي سميت ٻيا اڳواڻ به ڪوٽ لکپت جيل پهتا پر کين ملڻ جي اجازت نه ڏني وئي. ان دوران ن ليگ ڪارڪنن جي جيل اهلڪارن سان ڏند چڪ ٿي ۽ پوليس ليگي ڪارڪنن کي پوئتي ڌڪي ڇڏيو. صحافين سان ڳالهائيندي شاهد خاقان عباسي چيو ته 40 جي لڳ ڀڳ ايم اين ايز ۽ ايم پي ايز نواز شريف سان ملڻ لاءِ آيا پر ملڻ جي اجازت نه ڏني وئي. سندس چوڻ هو ته سياست جو محور اڄ به نواز شريف آهي، جيل ۽ حڪومتي حربا ڏٺل آهن، اسان پوئتي هٽڻ وارا ناهيون، اڳ به مقابلو ڪيو ۽ اڳتي به ڪندا رهنداسين. خواجا آصف چيو ته جيل مينوئل موجب قيدين سان ملاقات جي اجازت آهي، حڪومتي حربن سان حوصلا نٿا گهٽائي سگهجن.