تازيون خبرون
آخري دم تائين وڙهنداسين، مودي ياد رک سر جو جواب پٿر سان ڏينداسين: عمران خان - “آرٽيڪل 149” جو پڙاڏو: پ پ جو وفاقي سرڪار کان استعيفيٰ ۽ نئين سر چونڊن جو مطالبو - سنڌو ديش ڳالهه مناسب ناهي، صوبائي خودمختياري تي يقين رکون ٿا: شاهه محمود - آفيسر شاهي هلڻ نه ڏبي، عهدن تي ويٺل ماڻهن جي اڪثيريت عوام جي خدمت نٿي ڪري: سپريم ڪورٽ - اسان کي هر محاذ تي سفارتي ڪاميابي ۽ ڀارت کي شڪست ٿي رهي آهي: فردوس عاشق اعواڻ - مهاجرن جو قرض اسان کي نه وسارڻ گهرجي (اسد عمر) سڀ کان پهرين بنگال ۽ سنڌ ٺهراءُ پاس ڪيا: خورشيد شاهه - ڪشمير جو مسئلو حل ڪرڻ کان سواءِ ڳالهيون نٿيون ٿي سگهن، ٽيبل هيٺان ڪشميرين جو سمجهوتو ناهي ٿيڻ وارو: شيخ رشيد - بلاول ڀٽو زرداري جي بيان مان ملڪ دشمني ڪڍي ڏيکاريو: پيپلز پارٽي جو حڪومتي ميمبرن کي چئلينج - ڪراچي ۾ ٻوريون وجهي سيوريج لائيون ۽ گٽر بند ڪندڙن جي ڳولا جي ذميواري رينجرز حوالي - آزاد ڪشمير تي قبضي لاءِ مڪمل تيار آهيون، آخري فيصلو حڪومت ڪندي: ڀارتي آرمي چيف پاران ڌمڪي

Monthly Archives: July 2019

ٻٽي شهريت وارن کي چونڊ وڙهڻ جي اجازت ملي وئي، وفاقي حڪومت منظوري ڏئي ڇڏي

اسلام آباد(ويب ڊيسڪ) حڪومت ٻٽي شهريت جي ٻڌل پاڪستانين کي ملڪ جي چونڊ عمل ۾ ڀرپور حصو وٺڻ جي اجازت ڏيڻ جي باضابطا منظوري ڏئي ڇڏي. وزير اعظم عمران خان جي سربراهي ۾ ٿيل وفاقي ڪابينا جا اجلاس ۾ فيصلو ڪيو ويو ته پرڏيهه ۾ رهندڙ پاڪستانين کي ملڪ جي سياسي عمل ۾ شريڪ ٿيڻ جو موقعو ڏيڻ ملڪ جي مفاد ۾ آهي. ان حوالي سان هڪ ڪميٽي جوڙي وئي آهي جڏهن ته سمورن مرحلن لاڳاپيل قانون سميت ضروري ترميمون ڪرڻ جو عمل جلد شروع ڪيو ويندو. ان کان سواءِ وفاقي ڪابينا اڳوڻي حڪمرانن سان خانگي دورن جي مد ۾ سرڪاري ناڻي مان ڪيل خرچ وصول ڪرڻ جو فيصلو ڪري ورتو جڏهن ته ٻٽي شهرين وارن پاڪستانين کي اليڪشن جي عمل ۾ ڀرپور حصو وٺڻ جي اجازت ڏيڻ جي به اصولي منظوري ڏني وئي. وفاقي ڪابينا جي اجلاس ۾ ٻن وزير اعظمن يوسف رضا گيلاني، راجا پرويز اشرف ۽ اڳوڻي صدر ممنون حسين جي پرڏيهي دورن تي ڪيل خرچن  جي تفصيل پيش ڪئي وئي. ڪابينا کي ٻڌايو ويو ته اڳوڻي وزير اعظم يوسف رضا گيلاني پنهنجي ساڍن چئن سالن جي دور ۾ 48 پرڏيهي دورا ڪيا جنهن جو وقت 92 ڏينهن بڻجي ٿو انهن دورن دوران وفد جي ميمبرن جو انگ 2 هزار 67 هو جڏهن ته ان تي ڪيل خرچ 57 ڪروڙ 16 لک رپيا آيا. يوسف رضا گيلاني جا 9 دورا ذاتي يا ٽرانزٽ نوعيت جا هئا، ذاتي دورن ۾ 1 دبئي، 2 برطانيا جڏهن ته ٽرانز دورن ۾ 3 برطانيا ۽ 3 دبئي جا دورا شامل آهن. ڪابينا کي ٻڌايو ويو ته راجا پرويز اشرف ڪل 9 دورا ڪيا جنهن جو وقت 18 ڏينهن هو، انهن دورن ۾ وفد جي ميمبرن جو انگ 398 هو جڏهن ته انهن دورن تي ڪل 10 ڪروڙ 69 لک خرچ ٿيا. اهڙي ريت اڳوڻي صدر ممنون حسين پنهنجي دور ۾ 31 پرڏيهي دورا ڪيا جنهن جو وقت 115 ڏينهن ان ۾ وفد جو انگ 745 هو جڏهن ته ان ۾ 27 ڪروڙ 82 لک رپين جو خرچ سرڪاري ناڻي مان ادا ڪيو ويو. هن جا 7 ذاتي دورا سعودي عرب جا هئا جڏهن ته ٽرانزٽ دورن ۾ 2 ترڪي ۽ 1 سري لنڪا جو دورو شامل هو. بعد ۾ ڪابينا فيصلو ڪيو ته اڳوڻن حڪمرانن جي ذاتي دورن جي مد ۾ سرڪاري ناڻي مان کنيل خرچ انهن حڪمرانن کان وصول ڪيا وڃن ۽ ان عمل جو فوير طور تي آغاز ڪيو وڃي. ان کان سواءِ اڳوڻن حڪمرانن جي ڪيمپ آفيسن تي ڪيل خرچ به هنن کان ئي وصول ڪيا ويندا. ڪابينا ۾ اِهو به فيصلو ڪيو ته مستقبل ۾ حڪمرانن جي ذاتي دورن ۽ پرڏيهه علاج جي مد ۾ ڪيل خرچ هو پاڻ برداشت ڪندا. اڳوڻن حڪمرانن جي دور ۾ مختلف وزارتن ۾ بڻيل آڊٽ پيرا ۽ انهن جي جوابن جو ٻيهر جائزو ورتو ويندو. اجلاس دوران ڪابينا کي ماضي ۾ پاڪستان انٽرنيشنل ايئر لائن کي مختلف طريقن سان رسايل نقصانن ۽ سياسي مداخلت جي باري ۾ به تفصيلي بريفنگ ڏني وئي. ڪابينا کي ٻڌايو ويو ته سال 2012ع کان 2018ع تائين گهٽ يا وڌ 50 اڏام کي ذاتي مقصدن جي لاءِ استعمال ڪيو ويو ۽ مختلف ماڳن ڏانهن موڙيو ويو. ان کان سواءِ اجلاس ۾ اقتصادي رابطا ڪميٽي ( اي سي سي) جي 17 جولاءِ 2019ع جي فيصلن جي واڌ ڪئي وئي. وزير اعظم چيو ته ان ڳالهه کي يقيني بڻايو وڃي ته ملڪ جي ڪنهن حصي ۾ اٽي جي قيمت ۾ واڌ نه ٿئي ۽ اٽي جي قيمت تي مسلسل نظر رکي وڃي.

 

پاڪستان جي بجيٽ پنهنجي ساک وڃائي چڪي آهي: عالمي بينڪ جي رپورٽ

اسلام آباد ( ويب ڊيسڪ ) عالمي بئنڪ چيو آهي ته پاڪستان جي بجيٽ جي ساک وڌيڪ ڪري پئي آهي ۽ پبلڪ فنانس مئنيجمينٽ سسٽم به بگڙي چڪو آهي.  عالمي بئنڪ جون مهيني م ناڻي وزارت کي پنهنجي پبلڪ ايڪسپينڊيچر اينڊ فنانشل اڪائونٽبلٽي رپورٽ جو آخري ڊرافٽ موڪليو هو. رپورٽ ۾ مالي سال 2015- 16 کان وٺي 2017- 18 تائين پاڪستان جي پبلڪ فنانس مئنجمينٽ سسٽم ۽ بجيٽ جو معروضي جائزو ورتو ويو آهي. رپورٽ سان ناڻي واري وزارت جي نهايت ناقص ڪارڪردگي ظاهر ٿئي ٿي جيڪا پنهنجي ذميواريون سنڀالڻ ۾ ناڪام رهي ۽ مالياتي قانونن جي ڀڃڪڙيون ٿيڻ ڏنيون. ناڻي واري وزارت طرفان رپورٽ ۾ نرمي لاءِ ورلڊ بئنڪ تي دٻاءُ هو  پر عالمي اداري جي هڪ اهلڪار موجب عالمي بئنڪ طرفان اها رپورٽ فائنل هئي.  ذريعن موجب ناڻي واري وزارت جا مختلف شعبا هڪ ٻئي کي ذميوار قرار ڏيندا رهيا پر ان سلسلي ۾ اڃا تائين ڪنهن خلاف ڪابه ڪارروائي نه ٿي آهي. تازي رپورٽ جي ڀيٽ 2012ع ۾ عالمي بئنڪ طرفان ڪيل ان جائزي سان ڪئي وئي ته خبر پئي ته سمورا انگ اکر ۽ست اهم ٿنڀ زوال جو شڪار آهن.

 

قلندر جي نگري نه سنڀالي سگهندڙ ملڪ ڇا سنڀاليندا: فردوس عاشق

اسلام آباد /سيوهڻ شريف(رپورٽر/اين اين آءِ) حڪومت پ پ ۽ ن ليگ جي 10 سالن جي اقتدار واري دور ۾ سفر جا خرچ اڳوڻن حڪمرانن کان اڳاڙن جو اعلان ڪندي چيو آهي ته اڳوڻا حڪمران پي آءِ اي کي چنگچي وانگر استعمال ڪندا رهيا آهن، وي آءِ پي اڏامن تي هڪ ارب 6 ڪروڙ کان وڌيڪ نقصان ٿيو، گهرڀاتين لاءِ جهاز استعمال ڪيا ويا، لنڊن ۾ ميان صاحب جيترا ڏينهن علاج هيٺ رهيو ان هنڌ کي ڪيمپ آفيس بڻايو ويو، جهاز لنڊن ۾ بيهارڻ سان پي آءِ اي جو ڪروڙين رپين جو نقصان ٿيو، ڀٽو زنده آهي جو نعرو هڻڻ لاءِ پي آءِ اي بي رحمي سان سکر ڊائيوٽ ٿيندي رهي، پي آءِ اي سان اهڙو ورتاءُ ڪيو ويو جيڪو ڪرائي تي ورتل سائيڪل سان ناهي ڪيو ويندو، گذريل ڏينهن هڪ سياسي ٽولي ڪاري ڏينهن جي آڙ ۾ ڏڦيڙ پکڙڻ جي ڪوشش ڪئي پر عوام ان جي منهن تي ڪارنهن ملي ڇڏي، وزيراعظم چاهي ٿو ته اپوزيشن هاڪاري ڪردار ادا ڪري، مخالف ڌر پنهنجي بائونڊري ۾ رهي کيڏي ته سٺو آهي، اليڪشن وڙهڻ لاءِ ٻٽي شهرت ختم ڪرڻ جو جائزو ورتو پيو وڃي، جهانگير ترين ۽ مريم نواز جا ٻه مختلف نوعيت جا ڪيس آهن، پيمرا جا رولز اسان تيار ناهن ڪيا، مخالف ڌر ايندڙ سال 25 جولاءِ تي پنهنجي ڪاري ڏينهن جي ناڪامي جو ڪارو ڏينهن ملهائيندي، مخالف ڌر کي هر پڙ تي هارائينداسين، اپوزيشن جي ڪنهن ريلي يا جلسي کي نه روڪيو ويندو، عوام پاڻ ڏسندو ته انهن جا شو ڪيئن فلاپ ٿين ٿا، جمعي تي اهڙن خيالن جو اظهار فردوس عاشق اعواڻ ميڊيا کي بريفنگ ڏيندي ڪيو، هن چيو ته عمران خان اهڙو ليڊر آهي جنهن 22 ڪروڙ عوام جي حوالي سان منفي پروپگنڊا کي ختم ڪيو، عمران خان پاڪستان جي جهنڊي جي عزت ڪرائي، هن چيو ته ڪابينا وزيراعظم کي ڪامياب آمريڪا جي دوري تي مبارڪ ڏني، هن چيو ته گذريل ڏينهن سڄو ڏينهن هڪ ٽولو جيڪو مختلف شهرن ۾ احتجاج جي آڙ ۾ ڏڦيڙ پکيڙڻ ۾ رڌل جو انهن ماڻهن ڪارو ڏينهن ملهايو پر عوام سندن منهن تي ڪارنهن ملي رد ڪري ڇڏيو، هن چيو ته پي ٽي آءِ جي چيئرمين گذريل ڏينهن ڪابينا اجلاس ۾ قومي ايئرلائين جي حوالي سان شرم جوڳا انڪشاف ڪيا، هن چيو ته اڳوڻن حڪمرانن پي آءِ کي چنگچي ڪري هلايو، پائيليٽس اڳوڻن حڪمرانن جا ذاتي ڊرائيورن جي حيثيت سان ڪم ڪندا رهيا، 21 ڀيرا پي آءِ اي جي روٽس کي تبديل ڪيو ويو، گذريل ڏينهن سياسي اداڪار عوام جي ڏک ۽ سور جو ڊرامو ڪندا رهيا، 27 ڪروڙ رپين جي شڪل ۾ قوم ڏهي پيڙا کائڻ جو بل ادا ڪيو، پي آءِ اي ۾ 503 ماڻهن جون سياسي بنيادن تي ڀرتيون ڪيون ويون، پي آءِ اي جون 33 آفيسون پي آءِ اي يونين جي قبضي ۾ هيون، هن چيو ته يونين جا عهديدار پنهنجن ماڻهن کي مخصوص فائدا حاصل ڪري مختلف روٽس تي موڪليندا رهيا، ڪنهن ٻئي مقصد جي سهولت لاءِ مختلف ملڪن ۾ پي آءِ اي کي بند ڪيو ويو، هن چيو ته ڀٽو کي زنده رکڻ لاءِ پي آءِ اي جي روٽس کي سکر ايئرپورٽ تي لاٿو ويو، 2012 کان 2017 تائين پي آءِ اي جون 50 وي آءِ پي اڏامون هلايون ويون، پي آءِ اي هڪ ارب 6 ڪروڙ جو وي آءِ پي فلائيٽس جي ڪري ٿو، 2012 کان 2017 تائين پي آءِ اي جون وي آءِ پي اڏامون ناني امان، سندن ٻارن ۽ نوڪرياڻين کي کڻي اچڻ وڃڻ سان 954 ملين جو نقصان ٿيو، زل سبحاني کي دل جي تڪليف ٿيڻ سبب ٻارنهين ملڪ کڻي وڃڻ لاءِ سڄو جهاز ڀرجي ٻاهر ويو، علاج کاناسواءِ 28 ڪروڙ جي لڳ ڀڳ پي آءِ اي کي ڏنڊ ادا ڪرڻو پيو، هن چيو ته هن قوم جا ٻارڙا هن غريب خاندان جي بيماري جو بل ادا ڪندا رهيا جنهن جا پنهنجا ٻار ڪروڙن جي گهر ۾ رهن ٿا، وزيراعظم عمران خان جي هدايت جي روشني ۾ نئون پي آءِ اي چيئرمين مقرر ٿيو، هن چيو ته 2 مهينن اندر پي آءِ اي کي 46 ملين رپيا ڪمائي ٿي، بورڊنگ پاس جو طريقو ٺيڪ ڪري 7 سيڪڙو پي آءِ اي جي ڪمائي ۾ واڌ ٿي آهي، هن چيو ته سادگي مهم تحت آپريشن سسٽم ۾ پي آءِ اي جي خرچن ۾ 20 سيڪڙو گهٽتائي ٿي، پي آءِ اي زل صبحاني جي وڃڻ کانپوءِ پيرن تي بيهڻ جو سفر شروع ڪيو آهي، هن چيو ته اميد آهي ته هلندڙ سال پي آءِ اي پنهنجي خساري کي گهٽائي نفعو ڏيندو، هن چيو ته يوسف رضا گيلاني، راجا پرويز اشرف يا ڏهي پيڙڻ واري سرڪار سمورن جا ٻاهرين ملڪن ۾ سفر ڪرڻ جا خرچ ڏٺا ويا، هن چيو ته وزيراعظم اهو فيصلو ڪيو ته جيڪو علاج يا غير ضروري دورن تي خرچ ٿيو اهو واپس ورتو ويندو. هن چيو ته عمران خان جي نواز شريف سان ڪا ذاتي دشمني نه آهي، مخالف ڌر ايندڙ سال 25 جولاءِ تي ڪارو ڏينهن ناڪام ٿيڻ تي ناڪامي جو ڪارو ڏينهن ملهائيندي، هن چيو ته مخالف ڌر کان وزيراعظم جي عالمي سطح تي عزت برداشت نه پئي ٿئي.

ٻئي طرف  وزيراعظم جي معاون خاص براء اطلاعات فردوس عاشق اعوان جي سيوھڻ شريف آمد,حضرت لعل شھباز قلندر جي مزار جي حاضري,وزير اعلي سنڌ جي تڪ لعل جي ننگري جي حالت زار ڏسي انتھائي ڏک ٿيو,ميڊيا جي وفد سان ڳالھيون, خبر موجب:-وزيراعظم پاڪستان عمران خان جي معاون خاص براء اطلاعات فردوس عاشق اعوان جمع واري رات دير سان سيوھڻ شريف پھتي ته پي ٽي آئي ضلع ڄامشورو جي اڳواڻ سردار حاڪم خان نوحاڻي جي اڳواڻي ۾ سوين پي ٽي آئي ڪارڪنن سندس شاندار استقبال ڪيو, بعد ۾ صوبائي صدر عليم عادل شيخ سان گڏجي درگاھ حضرت لعل شھباز قلندر جي مزار تي حاضري ڏي ۽ گلن جي چادر چاڙھي فاتح خواني ڪئي ۽ پنھنجي جماعت جي حڪومت جي ڪاميابي ملڪ و قوم جي خوشحالي لاء خاص دعائون گھريون, ان دوران وفاقي معاون خاص فردوس عاشق اعوان ڌمال ڪوٽ ۾ ميڊيا جي وفد سان گفتگوء ۾ چيو آھي ته ھوء لعل شھباز قلندر جي خاص عقيدتمند آھي ان عقيدي سان سيوھڻ شريف پھچي پنھنجي مُرشد جي درٻار تي حاضري ڏني آھي ھن سنڌ جي وڏي وزير جي تڪ تعلقه ھيڊ ڪوارٽر ۽ لعل جي ننگري سيوھڻ شريف جي حالت زار بابت چيو ته قلندر لعل شھباز جي ننگري سيوھڻ شريف جا ٽٽل ڦٽل رستا ۽ شھر اندر گندگيء جا ڍير ڏسندي کيس ڏاڍو ڏک پھتو آھي ان مان صاف ظاھر آھي ته سيد مراد علي شاھ کي صرف سنڌ جو وڏو وزير زرداري جي وڪالت ۽ خوش آمد ڪرڻ لاء رکيو آھي ڇو ته سندس تڪ سيوھڻ شريف جو جيڪو حال آھي ان مان اندازو لڳائي سگھجي ٿو ته باقي سنڌ جو ڇا حال ھوندو, وزيراعظم عمران خان جي آمريڪي دوري بابت پڇيل سوال جي جواب ۾ فردوس عاشق ايوان چيو ته پاڪستان جي تاريخ ۾ پھريون وزير اعظم عمران خان آھي جنھن جو آمريڪا پھچڻ تي شاندار استقبال ٿيو آھي ان استقبال ۾ نه رڳي پاڪستاني ڪميونٽي شامل ھئي ان سان گڏ گڏ گورا ڪميونٽي جو پڻ  وڏو تعداد شامل ھُيو,ھن چيو ته عمران خان واحد عالمي ليڊر طور مڃتا ماڻي آھي جيڪو ملڪ جي سڃاڻپ واري جنگ پيو وڙھي, ھڪ ٻئي سوال جي جواب ۾ ھن چيو ته حضرت قلندر لعل شھباز دلين ۾ وسي ٿو ان جي حاضري ڏيئڻ لاء نون ليگ,يا ڪنھن ٻي ليگ کان اجازت وٺڻ جي ضرورت ناھي ھن چيو ته عمران خان سمجھي ٿو ته درگاھون ۽ برصغير ۾ اسلام جي واڌ ويجھ وارن بزرگن جي مزارن تان فيض حاصل ڪري سگھجي ٿو فردوس عاشق اعوان وڌيڪ پڇيل سوالن جي جواب ۾ چيو آھي ته مخالف سينيٽرن چيئرمين سينيٽ جي تبديلي وارو سياسي دنگل شروع ڪري جيڪو محاذ اڀو ڪيو آھي جنھن ۾ کين شڪست ملندي,آخر ۾ معاون خاص فردوس عاشق اعوان مزار تي,موجود مسڪين ماڻھن ۾ ڪپڙو روڪ رقم پڻ تقسيم ڪئي ان کان اڳ تاريخي قلعي تي پنھنجي جماعت جي حڪومت جي ھڪ سال پورو ٿيئڻ تي پھرين سالگرھ جو ڪيڪ پڻ ڪاٽي ڪارڪنن ۾ تقسيم ڪيو ۽ ڪراچي لاء روانا ٿي وئي.

 

برسات کانپوءِ دريائن ۾ چاڙهه، مٿين درجي جي ٻوڏ، آچر کان ساوڻي جي وسڪاري جي اڳڪٿي

ڪراچي / لاهور ( ويب ڊيسڪ ) سڄي ملڪ ۾ برساتن کانپوءِ دريائن ۾ پاڻي جي سطح بلند ٿي وئي آهي ۽ جنهن سبب ڪيترن ئي هنڌن تي مٿين درجي جي ٻوڏ آهي. سڄي ملڪ ۾ هلندڙ سانوڻي جي برساتن سبب دريائن ۾ پاڻي جي سطح بلند ٿي وئي آهي ۽ ڪيترن ئي هنڌن تي مٿين درجي جي ٻوڏ آهي. فلڊ ڪنٽرول روم موجب سنڌو درياءَ ۾ راجن پور واري هنڌ هيٺين درجي جي ٻوڏ آهي جنهن سبب دريائي رستن تي پوکيل فصل لڙهي ويا آهن جڏهن ته سنڌو درياءَ جي رستن تي آباد ماڻهن لڏپلاڻ شروع ڪري ڇڏي آهي، درياءَ جي حدن ۾ ڪچي جي علائقي ۾ امڪاني ٻوڏ کي نظر ۾ رکندي ماڻهن محفوظ هنڌن تي منتقل ٿيڻ جا اعلان به ڪرايا پيا وڃن. فلڊ ڪنٽرول روم جو چوڻ آهي ته سنڌو درياءَ ۾ ڪوٽ مٺن واري هنڌ ٻه لک 80 هزار ڪيوسڪ پاڻي گذري رهيو آهي جڏهن ته چناب درياءَ ۾ پاڻي جي سطح بلند ٿيڻ سبب هاءِ فلڊ الرٽ جاري آهي، زوب، قلات ۽ ڊي جي خان ڊويزن  ۾ دريائن ۽ برساتي نالن ۾ ٻوڏ کي منهن ڏيڻو پئجي رهيو آهي.  موسميات کاتي موجب برساتن سبب ڪابل درياءَ ۾ نوشهره وٽ وچولي درجي جي ٻوڏ آهي، 24 ڪلاڪن دوران راوي ۽ چناب سان لاڳاپيل ندين ۽ نالن ۾ ٻوڏ جي صورتحال هوندي، ڊي جي خان جي پهاڙي ندين نالن ۾ به هيٺين سطح جي ٻوڏ هوندي.ٻئي طرف موسميات کاتي آچر کان سنڌ ۽ بلوچستان جي وچ توڙي اترين ضلعن ۾ سانوڻي جي برساتن جي اڳڪٿي ڪئي آهي. موسميات کاتي موجب آچر کان اڱاري تائين ميرپور، ٺٽي، حيدرآباد، ڪراچي ۽ بينظير آباد ۾ تيز طوفان ۽ گجگوڙ سان تيز برسات جو امڪان آهي. سکر، لاڙڪاڻي، زوب، سبي ۽ نصير آباد جي ڪجهه هنڌن تي به تيز طوفان سان گڏ برسات ٿي سگهي ٿي. بلوچستان ۾ قلات، مڪران، ڊوزن ۾ تيز برسات ۽ گجگوڙ سان برسات جو امڪان آهي. برساتن سبب ڪراچي، ٺٽي، حيدرآباد ڊويزن ۾ اربن فلڊنگ جڏهن ته قلات، سبي، زوب ڊويزن ۾ به فلش فلڊنگ جو خطرو آهي. موسميات کاتي سمورن ادارن کي هنگامي صورتحال کي منهن ڏيڻ لاءِ هاءِ الرٽ رهڻ جي هدايت ڪئي آهي.

 

ڪراچي ۾ تيز برسات جي اڳڪٿي، سنڌ حڪومت پاران لاڳاپيل ادارن کي الرٽ رهڻ ۽ اڳواٽ انظام ڪرڻ جي هدايت

ڪراچي (اسٽاف رپورٽر) سنڌ جي وڏي وزير سيد مراد علي شاھھ چيو آھي تھ ڪي ڊبليو ايس بي شھر ۾ پاڻي جي ورھاست لاءِ روٽيشن سسٽم شروع ڪري ۽ سندن ويب سائيٽ ذريعي ماڻھن کي ٻڌايو وڃي تھ جيئن انھن کي معلوم ٿي سگھي ۽ اھي بھتر طريقي سان پاڻي حاصل ڪري سگھن. ھن چيو تھ ڪٿ ڊبليو ايس بي کي گھرجي تھ اھي سموري نظام کي شفاف طريقي سان ٽيڪ اوور ڪري ۽ ان کي ٻين جي رحم ۽ ڪرم تي نٿو ڇڏي سگھجي. ھن اھا ڳالھھ اڄ مڪاني ادارن واري کاتي سان ھڪ اعليٰ سطحي اجلاس جي صدارت ڪندي ڪئي، جنھن ۾ 29 جولاءِ کان شروع ٿيندڙ چوماسي/ شديد برساتن لاءِ تياري ۽ انتظامن سميت شھر ۾ بھتر طريقي سان پاڻيءَ جي ورھاست لاءِ جامع پلان جوڙڻ جي بابت مامرن جو جائزو ورتو ويو. اجلاس ۾ مڪاني ادارن وارو وزير سعيد غني، وڏي وزير جو پرنسپل سيڪريٽري ساجد جمال ابڙو، ڪمشنر ڪراچي افتخار شھلواڻي، سيڪريٽري بلديات خالد حيدر شاھھ، ايم ڊي ڪي ڊبليو ايس بي اسد اللھ خان ۽ واٽر بورڊ جي لاڳاپيل آفيسرن شرڪت ڪئي. صوبائي وزير سعيد غني چيو تھ شھر ۾ 918 ايم جي ڊي گھرج جي مقابلي ۾ 406 ايم جي ڊي پاڻي فراھميءَ لاءِ موجود آھي. ان تي وڏي وزير چيو تھ اٽڪل 50 سيڪڙو کوٽ آھي، انڪري پاڻيءَ جي منصفاڻي طريقي ورڇ ٿيڻ گھجي. ھن چيو تھ جھڙي ريت آبپاشي کاتو پاڻيءَ جو ريٽيشن سسٽم آبادگارن کي ٻڌائيندو آھي، مان چاھيان ٿو تھ واٽر بورڊ بھ ورڇ جو روٽيشن سسٽم جوڙي عوام کي آگاھھ ڪري. ھن چيو تھ ھن وقت ڪجھھ علائقا باقاعدگيءَ سان پاڻي حاصل ڪري رھيا آھن ۽ ٻين علائقن ۾ ڪيترائي ڏينھن انتظار ڪرڻ پئجي وڃي ٿو جيڪا چڱي ڳالھھ نھ آھي. مراد علي شاھھ چيو تھ سندس تصديق ٿيل رپورٽس آھن تھ وال مين پاڻمرادو پاڻي ورھاست جو سسٽم بڻائي ويٺا آھن. ھن صوبائي وزير بلديات کي چيو تھ وال مين ڪنھن کي فيور ڏيڻ ۾ ملوث آھن تھ انھن جي نشاندھي ٿيڻ گھرجي ۽ سندن خلاف ڪرمنل ڪيس پڻ داخل ڪري سگھجي ٿو. ھن ايم ڊي ڪي ڊبليو ايس بي اسداللھ خان کي چيو تھ ھُو ھڪ تفصيلي روٽيشن پلان پنھنجي ويب سائيٽ تي اپ لوڊ ڪري تھ جيئن ماڻھن کي خبر پئجي سگھي تھ اھي ڪڏھن پاڻي حاصل ڪندا. ھن کين اھا پڻ ھدايت ڪئي تھ غيرقانوني پاڻي جا ڪنيڪشن ۽ چوريءَ خلاف بھ ڪارروائي ڪئي وڃي. ھن چيو تھ اھو ڪي ڊبليو ايس بي لاءِ ھڪ وڏو چئلنج آھي ۽ ان کي کين منھن ڏيڻو آھي. وڏي وزير مڪاني ادارن واري وزير تي زور ڀريو تھ ھُو واٽر بورڊ جي انجنيئرن کي پاڻيءِ جي ورھاست واري نظام کي اپ گريڊيشن ۽ مناسب طريقي سان سارسنڀال ڪرڻ لاءِ پابند ڪري تھ جيئن 30 سيڪڙو لائين لاسز/ چوري تي ضابطو آڻي سگھجي. ھن چيو تھ جيڪڏھن اوھان 30 سيڪڙو پاڻي جي نقصانن تي ضابطو آڻڻ ۾ ڪامياب ٿيندا تھ اوھان 174 ايم جي ڊي پاڻي بچائڻ جي قابل ٿيندا جيڪا ھڪ وڏي ڪاميابي آھي.

تيز برساتون:

وڏي وزير سيد مراد علي شاھھ چيو تھ ميٽ ڊپارٽمينٽ شھر ۾ 29 جولائي کان تيز برساتن جي اڳڪٿي ڪئي آھي انڪري ضروري انتظامن بشمول نالن جي صفائي، نيڪاليءَ واري نظام جي مناسب ريت مينٽيننس ۽ روڊن جي مرمت بھ لازمي ھئڻ گھرجي. اجلاس ۾ وڏي وزير کي مڪاني ادارن واري وزير ٻڌايو تھ سنڌ حڪومت ڪراچي ميونسپل ڪارپوريشن (ڪي ايم سي) کي گذريل سال نالن جي صفائيءَ لاءِ 500 ملين رپيا ڏنا ھئا. ڊي ايم سيز کي بھ 250 ملين رپيا ڏنا آھن. ڪي ايم سي جي ڪنٽرول ھيٺ شھر ۾ 16 نالا آھن. وڏي وزير چيو تھ ڪراچي ۾ جتي پاڻي رڪجڻ وارا ھنڌ آھن انھن کي درست ڪيو وڃي. سعيد غني چيو تھ نالن جي صفائي ۽ رنڊڪن وارا ھنڌ يڪ ڪيا ويا آھن. وڏي وزير سيڪريٽري بلديات کي ھدايت ڪئي تھ جن نالن جي صفائي ڪئي وئي آھي ۽ وڌيڪ جيڪي صاف ڪرڻ گھرجن انھن جو ورڪ پلان ڪي ايم سي کان ورتو وڃي. وڏي وزير چيو تھ شھر ۾ 17 نڪاسي آب وارا نالا آھن جيڪڏھن انھن کي صاف رکيو وڃي تھ شھر ۾ پاڻي نھ بيھندو. ھن وڌيڪ چيو تھ ھر نالي جي پروفائل بڻائي، جنھن ۾ ان جي ڊيگهھ، چوڪنگ پوائنٽس، حددخليون، ڪچا پڪا ھنڌ ۽ ڪيپسٽي وغيرا شامل ھجي. وڏي وزير سيڪريٽري بلديات کي وڌيڪ ھدايت ڏني تھ اھا پروفائلنگ ڪري مون ڏانھن موڪلي وڃي ۽ مڪمل پروفائلنگ ڪري ۽ صفائي جو ورڪ پلان بڻائي سنڌ حڪومت کي ڏنو وڃي ۽ ضروري فنڊ حاصل ڪيا وڃن. وڏي وزير وزير بلديات کي ھدايت ڪئي تھ برساتن کي ڏسندي سمورن ڊي ايم سيز ۽ ڪي ايم سي ادارن کي متحرڪ ڪيو وڃي. وڏي وزير ڪي ڊبليو ايس بي تي زور ڀريو تھ اھي بلڪ ٽرانسميشن سسٽم، ڪينالز، سائفن، ڪنڊيوٽس ۽ ڌاٻيجي، گھارو، پپري ۽ اين اي ڪي پمپنگ اسٽيشنز ۽ فلٽر پلانٽس وارن علائقن ۾ واقع ٻين ھنڌن تي پيٽرولنگ شروع ڪئي وڃي. ھن چيو تھ پمپنگ اسٽيشنز تي بجلي معطل ٿيڻ جي صورت ۾ فوري طور تي ڪي اليڪٽرڪ کي شڪايت ڏني وڃي تھ جيئن پمپنگ اسٽيشن بھتر ۽ روان طريقي سان ڪم ڪري سگھن. ايم ڊي واٽر بورڊ وڏي وزير کي ايندڙ امڪاني تيز برساتن جي حوالي سان سندس تياريءَ بابت تفصيلي بريفنگ ڏني.

 

چيف جسٽس وڊيوز جي احتساب جي شڪار بي گناهه نواز شريف کي آزاد ڪري پنهنجو نالو تاريخ ۾ لکرائي: مريم نواز

ڪوئيٽا (اين اين آءِ) ن ليگ جي مرڪزي نائب صدر مريم نواز چيو آهي ته چيف جسٽس آف پاڪستان وڊيوز احتساب جي شڪار بي گناهه نواز شريف کي آزاد ڪري پنهنجو نالو تاريخ ۾ لکرايو، بدترين ڌانڌلي جي نتيجي ۾ قائم ٿيل حڪومت رڳو 4 ووٽن جي سهاري تي بيٺي آهي، ڪٺ پتلي حڪمران عوام کي سرم شار ڪرڻ کانسواءِ ڪجهه نٿا ڪري سگهن، حڪومت عوام جي ووٽ سان اچڻ ۽ وڃڻ گهرجي، حڪومت آڻڻ ۽ ڪيرائڻ جو حق رڳو پاڪستان جي عوام جو آهي، اها ڳالهه هن جمعي تي ڪوئيٽا ۾ ن ليگ جي سينيئر نائب صدر سردار يعقوب ناصر جي گهر پارٽي ڪارڪنن کي خطاب ڪندي ڪئي. مريم نواز چيو ته ملڪ هلائڻ لاءِ نواز شريف، شاهد خاقان عباسي جهڙن شينهن کي جيل ۾ رکڻو پوي ٿو، جڏهن سينيٽر نه جهڪيا ۽ هار صاف نظر اچڻ لڳي ته هڪ فوٽون ڪاپي جي بنياد تي شاهد خاقان عباسي کي جيل موڪليو ويو، حڪومت هڪ هٿين خالي مريم نواز کان ڊڄي ٿي، منهنجو آواز بند ڪري بلوچستان جي حق تي ڌاڙو هنيو ويو، ڊڄڻڻ، بيڪائو ۽ پنهنجن آقائن اڳيان جهڪڻ وارن جي آواز تي ڪا پابندي نه آهي، حڪمران ان غلط فهمي ۾ نه رهن ته آواز بند ڪرڻ سان منهنجو آواز عوام تائين نٿو پهچي سگهي، هن چيو ته نواز شريف کي عوام جي خدمت ڪرڻ جي سزا ملي رهي آهي، پاڪستان ۾ جيڪو عوام ۾ مقبول هوندو آهي ان کي نشانو بڻائي سزا ڏني وڃي ٿي، جعلي حڪمرانن جو ڊپ ن ليگ جي عوامي طاقت جو اعتراف آهي، آواز بند ڪرڻ جي ضرورت ان لاءِ پيش اچي رهي آهي ڇو ته ن ليگ جي آواز سان جعلي ايوان ڌڏي رهيو آهي، توهان جيترو آواز بند ڪندو ايترو جذبو ۽ مزاحمت ٿيندي، چونڊن کان اڳ 2 سالن تائين بدترين ڌانڌلي ڪئي وئي ان جي باوجود حڪومت 4 ووٽن تي بيٺي آهي، هن چيو ته تاجرن، ڪاروباري طبقي کي حڪومت تي اعتماد نه آهي، ماڻهو ڪاروبار ڇڏي رهيا آهن، مهانگائي جي شرح 11 سيڪڙو، ناڻي مٽاسٽا جا ذخيرا سڀ کان گهٽ، ڊالر 164 رپين جو ٿي ويو، اسٽاڪ مارڪيٽ روز هيٺ اچي رهي آهي، نالائق خان جي پارٽي کي ڪٿان سپورٽ نه پئي ملي، هن چيو ته اسان چئي پئي سگهياسين اسان کي ڪجهه نه چيو اسان ٻاهر هليا وڃون ٿا، جڏهن حالتون ٺيڪ ٿينديون واپس اينداسين، اين آر او وٺڻ سولو ڪم آهي پر اسان تي جيڪي ڪوڙا الزام لڳا ان تي اسان جيڪو موقف اختيار ڪيو ان لاءِ پنهنجي بيمار امڙ کي ڇڏي وطن واپس آيس ۽ ڪيسن کي منهن ڏنو، مريم نواز چيو ته اقتدار عارضي آهي، جعلي حڪومت ۽ جعلي اعظم جي اقتدار مان وڃڻ کانپوءِ اهو هال ٿيندو جو اسان سوچي به نٿا سگهون، هن حڪومت اقتدار ۾ رڳو دشمن پيدا ڪيا آهن، هي طاقت جو استعمال ڪري عوام جي ووٽ سان آيل حڪومت کي ڪيرائڻ لاءِ ڪلها پيش ڪن ٿا. هن چيف جسٽس آف پاڪستان سان مخاطب ٿيندي چيو ته هو بي گناهه نواز شريف کي وڊيوز واري احتساب جو نشانو بڻايو ويو، چيف جسٽس نه ترديد جوڳن ثبوتن جي بنياد تي قانون ۽ انصاف تي لڳل داغ کي ڌوئي ۽ تاريخ ۾ پنهنجو نالو رقم ڪندي بي گناهه نواز شريف کي عزت سان آزاد ڪري۔

 

برطانوي اخبار خلاف ساک کي نقصان جي دعويٰ داخل، عدالتن ۾ پنهنجي بيگناهي ثابت ڪندس: شهباز شريف

لنڊن ( ويب ڊيسڪ ) مسلم ليگ ن جي صدر شهباز شريف زلي متاثرن جي امداد چوري ڪرڻ جو الزام هڻندڙ برطانوي اخبار ڊيلي ميل خلاف ساک کي نقصان پهچائڻ جي دعويٰ داخل ڪري ڇڏي. قومي اسيمبليءَ ۾ مخالف ڌر جي اڳواڻ شهباز شريف برطانوي اخبار ڊيلي ميل خلاف باضابطا ڪارروائي لاءِ برطانيا جي مشهور  لا فرم ڪارٽر ريڪ جون خدمتون حاصل ڪيون آهن جيڪا برطانيا ۾ سندس ڪيس وڙهنديون. لا فرم جو چوڻ آهي ته اخبار ۾ ڪيل شهباز شريف بابت دعويٰ نهايت تڪراري آهي.  ٻئي طرف شهباز شريف پنهنجي دعويٰ ۾ موقف اختيار ڪيو آهي ته الزامن ۾ سچائي هجي ته گرفتار ڪري ڪيس هلايو وڃي، حڪومت جي اشاري تي منهنجي خلاف سياسي بنيادن تي خبر هلائي وئي آهي. مسلم ليگ ن جي صدر موقف اختيار ڪيو ته 2005ع ۾ زلزلي وقت برطانيا ۾ جلاوطني جي زندگي گذاري رهيو هيس، پنهنجي ساک پياري آهي، برطانوي عدالتن ۾ پنهنجي بيگناهي ثابت ڪندس.

 

ڪرپشن فري پاڪستان بڻائڻ جي لاءِ ميگا وائٽ ڪالر ڪرائمز کي انجام تائين پهچائينداسين: نيب چيئرمين

اسلام آباد(ويب ڊيسڪ) نيب چيئرمين جسٽس (ر) جاويد اقبال چيو آهي ته ڪرپشن فري پاڪستان بڻائڻ جي لاءِ ميگا وائٽ ڪالر ڪرائمز کي انجام تائين پهچائينداسين. تفصيل موجب اڄ نيب چيئرمين جسٽس جاويد اقبال جي صدارت هيٺ جائزي بابت خاص اجلاس ٿيو. اجلاس ۾ تقرير ڪندي نيب چيئرمين چيو ته ڪرپشن فري پاڪستان اسان جو ٽارگيٽ آهي، گذريل هڪ سال ۾ 600 ريفرنسز عدالتن ۾ داخل ڪيا ويا. سندس چوڻ هو ته ڪيسن جي پيروي جي لاءِ قانوني  سهڪار فراهم ڪري رهيا آهيون، نيب سمورن ڪيسن کي اُڪلائڻ جي لاءِ 10 مهينن جو عرصو مقرر ڪري رکيو آهي. بريفنگ کان پوءِ نيب چيئرمين هدايت ڪئي ته آفيسر هر ڪيس جي ڊائري تيار ڪن، جيڪي خاص ۽ اهم آهن، آفيسرن جي ريسرچ جي لاءِ نيب هيڊ ڪوارٽر لائبريري به قائم ڪئي وئي آهي، جنهن کان فائدو ورتو ويندو.

 

مٺي: معصوم ٻارڙن تي موت جو رقص جاري، غذائي کوٽ سبب 5 ٻارڙا فوت

مٺي(م.ڊ) مٺي ۾ معصوم ٻارڙن تي موت جو رقص جاري آهي، سول اسپتال سميت ٻين اسپتالن ۾ مختلف بيمارين ۽ غذائي کوٽ سبب پنج ٻارڙا فوت ٿي ويا. ننگرپارڪر جي ڳوٺ اوڻ جو وانڊيو جي رهواسي ايشور ڪولهي جو تازو ڄاول پٽ، ڀورو جو هڪ ڏينهن جو پٽ، ڳوٺ مٺڙيو اوٺا جي رهواسي رزاق اوٺو جو تازو ڄاول ٻارڙو ،ڳوٺ چڻيندا جي رهواسي پرڪاش جو هڪ ڏينهن جو پٽ اوم ۽ ڳوٺ چوپڻي جي رهواسي ڪيول ڪولهي جي تازي ڄاول  نياڻي فوت ٿي وئي. سول اسپتال مٺي سميت ٻين شهرن جي اسپتالن ۾ سهولتن جي کوٽ جئين جو تئين برقرار آهي، جنهن سبب ٿرواسي سخت پريشان آهن. معصوم ٻارڙن جون فوتگيون رڪجي ناهن سگهيون، غذائي کوٽ ۽ مختلف بيمارين وگهي ٻارڙا فوت ٿي رهيا آهن، پر سنڌ حڪومت ڪو خاص ڌيان ناهي ڏنو

 

دادو لڳ سراز برادري جي ٻن ڌرين ۾ جهيڙو، ڀاڻج هٿان مامو قتل، جوابدارن ۾ 2 پوليس اهلڪار به شامل، پوليس تي ڌر هئڻ جو الزام

دادو (ڊ.ر) دادو ڀرسان بي سيڪشن ٿاڻي جي حد رميز ڪالوني ۾ مبينا ڀاڻج هٿان چاچو قتل ٿي ويو، سراز برادري جي ٻن ڌرين ۾ جهيڙي دوران 72 سالا پيرسن سابقہ انفارميشن کاتي جو ملازم هاشم پٽ صديق سراز قتل ٿي ويو جنهن جو لاش وارث سول اسپتال دادو کڻائي پهتا مقتول پيرسن جي گهر واري مسمات حميده سراز سندس پٽ غفار سراز، سڪندر سراز ۽ ٻين احتجاج ڪندي دانهيو ته ڪجھه ڏينهن کان گهٽي جي معامري تان تڪرار هلندڙ هو، جوابدارن ۾ ٻن پوليس اهلڪارن سميت 6 ڄڻن گهر تي حملو ڪيو ڏنڊا ۽ سروتا لڳڻ سبب پيرسن موقعي تي ئي فوت ٿي ويو، پوليس اهلڪار عرس سراز، اهلڪار بشير سراز، انور، حسيب، اصغر، سرور سراز ۽ ٻين گهر تي حملو ڪيو مقتول جو لاش وارث ضروري ڪاروائي کان بنا ئي اسپتال مان کڻائي دادو پريس ڪلب آڏو لاش رکي ڌرڻو هنيو، مقتول جي وارثن دانهيو ته جوابدارن ۾ ٻه پوليس اهلڪار آهن پوليس پنهنجن پٽي ڀائرن کي بچائڻ جي ڪوشش ڪري رهي آهي قاتلن کي گرفتار ڪري انصاف فراهم ڪيو وڃي، هوڏانهن ڊيوٽي ڊاڪٽر طالب ڪلهوڙو جو چوڻ هو ته پيرسن جي جسم تي ڪوبه واضع تشدد جو نشان نه هو، پوليس ليٽر نه هجڻ سبب مقتول جي وارثن کي پوليس جو ليٽر کڻي اچڻ لاءِ چيو ته هو لاش کڻائي هليا ويا، هن چيو ته پوسٽ مارٽم بعد ئي وڌيڪ ڪجھه ٻڌائي سگهجي ٿو، آخري اطلاع تائين پوليس پاران ڪوبه ڪيس داخل نه ڪيو ويو هو.