تازيون خبرون
ٽرمپ جي ڪشمير مسئلي تي وري ٽياڪڙي جي آڇ، ڀارت تي ڇڪتاڻ گهٽائڻ لاءِ زور - وفاقي حڪومت جو نجي شخصيتن تائين نيب ڪارروائي جا اختيار ختم ڪرڻ جو فيصلو - سرڪاري ملازم غير قانوني حڪم مڃڻ جو پابند ناهي: سپريم ڪورٽ - ستلج ۽ سنڌو درياهه ۾ پاڻي جي وهڪري ۾ واڌ، 33 ڳوٺ پاڻي هيٺ، لڏ پلاڻ - ڪرنٽ اڪائونٽ خساري ۾ لاٿ وڏي ڪاميابي آهي: عمران خان - صادق سنجراڻي سان اسد قيصر جي ملاقات، ڪشمير مسئلي کي بين الاقوامي سطح تي اٿارڻ لاءِ پارليامينٽ جا وفد موڪلڻ جو فيصلو - شاهه محمود قريشي جو آئيوري پوسٽ، ڊينش ۽ ناروي جي پرڏيهي وزيرن سان ٽيليفون تي رابطو، والاريل ڪشمير جي صورتحال تي ڳالهيون - ڪراچي جو ڪچرو سڀني کي صاف ڪرڻ کپي پر تحريڪ انصاف ۽ ايم ڪيو ايم سياسي پوائنٽ اسڪورنگ ۾ مصروف آهن: سعيد غني - ايف بي آر ٽيڪس  نيٽ کي وسعت ڏيندي هڪ لک امير ٽيڪس نان فائلرز کي نوٽيس جاري ڪري ڇڏيا - هتي ويچارا ٿي اچن ٿا، اهو وقت پري نه آهي جڏهن ڪراچي ۾ قبرن لاءِ جاءِ نه ملندي: سنڌ هاءِ ڪورٽ

Daily Archives: June 28, 2019

مشڪل معاشي حالتن مان نڪرڻ لاءِ سڀني کي ذميواري ادا ڪرڻي پوندي: آرمي چيف

راولپنڊي (اين اين آءِ) پاڪ فوج جي سربراهه قمر جاويد باجوا چيو اهي ته معاشي آزادي کان سواءِ آزادي جو تصور ممڪن نه آهي مالياتي بدنظمي جي ڪري هن وقت اسان مشڪل صورتحال مان لنگهي رهيا آهيون سيڪيورٽي ۽ معيشت وچ ۾ سڌو لاڳاپو آهي ڏکين حالتن ۾ ڪوئي هڪ فرد ڪامياب نٿو ٿي سگهي جيستائين سڄي قوم متحد ٿي انهن حالتن مان ڪڍڻ جي ڪوشش ڪري هي هڪ قوم بڻجڻ جو موقعو آهي انشاءالله ڏکين حالتن مان ڪاميابي سان نڪري وينداسين جمعي تي اسلام آباد ۾ نيشنل ڊفينس يونيورسٽي ۾ معاشي، اقتصادي حالتن تي هڪ سيمينار کي خطاب ڪندي هن علائقائي امن لاءِ پاڪستان جي ڪوششن تي روشني وڌي ۽ چيو ته هي ئي پاليسي خطي ۾ اقتصادي ترقي لاءِ رستو ٺاهيندي خطي جي ملڪن کي هڪ ٻئي سان ڳنڍڻ جي حوالي سان خيالن جو اظهار ڪندي آرمي چيف جي سربراهه چيو ته سندس خيال آهي ته ڪوبه ملڪ اڪيلي سر ترقي نٿو ڪري سگهي جيستائين سڄو خطو ترقي نه ڪري هن چيو ته پاڪستان به ان وقت ترقي ڪري سگهي ٿو جيستائين ٻين ملڪن سان اقتصادي منصوبن جي ذريعي ڳنڍيو نه وڃي. موجوده اقتصادي صورتحال تي ڳالهائيندي قمر جاويد باوجوا چيو ته مالياتي بدنظمي جي ڪري هن وقت اسان مشڪل صورتحال مان لنگهي رهيا آهيون هن چيو ته آرمڊ فورسز رضاڪاراڻي طور تي دفاعي بجيٽ ۾ پنهنجي سالياني واڌ ڇڏي ڏني هي صرف هڪ قدم نه آهي پر اسان معيشت کي سگهارو ڪرڻ لاءِ ٻيا به قدم کڻي رهيا آهيون هن چيو ته اسان سمجهون ٿا ته حڪومت ڊگهي مدي مفادن خاطر مشڪل فيصلا ڪيا آهن جنهن ۾ اسان به پنهنجو ڪردار ادا ڪري رهيا آهيون هن چيو ته اسان سڀني کي اهڙِن حالتن ۾ پنهنجون ذميوارون پوريون ڪرڻ گهرجن ته جيئن هن ڏکئي مرحلي مان نڪري ڪامياب ٿي سگهون. هن چيو ته ماضي قريب ۾ اهڙا مثال موجود آهن جڏهن ٻين ملڪن کي اهڙا چئلينجز هئا ۽ اهي ڪاميابي سان ڏکين حالتن مان نڪري آيا هن چيو ته اسان به انشاءالله ڏکين حالتن مان ڪاميابي سان نڪري اينداسين. ان موقعي تي پاڪ فوج جي سربراهه جنرل قمر جاويد باجوا هڪ سيمينار جي اهتمام تي اين بي يو ۽ پروگرام ۾ شريڪ ٿيندڙن جا ٿورا مڃيا ۽ چيو ته اهڙِ قسم جا سيمينار حڪومت ۽ ڌرين وچ ۾ اهم قومي مسئلن تي خيالن جي ڏي وٺ لاءِ مفيد آهن. اين بي يو پاڪستان جي معاشي چئلينجز ۽ حل تي سيمينار ڪوٺايو. پروگرام ۾ شريڪ ٿيندڙن ۾ پنجاب حڪومت جو معاشي صلاحڪار ڊاڪتر سلمان شاهه، ڊاڪٽر فرخ اقبال، ڊين ۽ ڊائريڪٽر آءِ بي اي ڊاڪٽر عابد قيوم سلهري، ايس جي پي آءِ جو ايگزيڪيوٽو ڊائريڪٽر الماس حيدر لاهور چيمبر آف ڪامرس جو صدر سيد محمد شبر زيدي چيئرمين ايف بي آر ڊاڪٽر اشفاق حسن خان نيسٽ يونيورسٽي جو اسڪول آف سوشل سائنسز جي پرنسپال به خطاب ڪيو.

 

 

سنڌ حڪومت کي لهر نه لوڏو، وفاقي حڪومت پنهنجو خير گهري: مراد علي شاهه

نوابشاهه/خيرپور/ڀٽ شاهه(ويب ڊيسڪ) سنڌ حڪومت مضبوط آهي، وفاقي حڪومت پنهنجو خير گهري. تفصيل موجب وڏي  وزير سيد مراد علي شاهه نوابشاهه ويجهو ڳوٺ کڏهر پهچي  فصلن تي ٿيل ماڪڙ جي حملي جو جائزو ورتو. ان موقعي تي  ميڊيا سان ڳالهائيندي سيد مراد علي شاهه  چيو ته وفاقي حڪومت جي اها سوچ ته ٿي سگهي ته سنڌ حڪومت کي ختم ڪيو وڃي پر سندس وس ۾ ائين ناهي ڇاڪاڻ ته سنڌ حڪومت عوام جي مينڊيٽ سان آئي آهي ۽ هوءَ  پنهنجو آئيني مدو پورو ڪندي. هن چيو ته آصف علي زرداري جيڪڏهن سينيٽ چيئرمين جو بيان ڏنو آهي ته پوءِ مان ايترو چوندس ته آصف علي زرداري جيڪو چوندو آهي اهو ڪري ڏيکاريندو آهي. هن چيو ته مان سنڌ ۾ رهندڙ غير قانوني رهندڙ افغانين جي رهڻ يا نه رهڻ جي حوالي سان ڪوبه بيان نه ڏنو آهي. هن چيو ته سنڌ حڪومت مضبوط آهي وفاقي حڪومت پنهنجو خير گهري. وڏي وزير چيو ته سنڌ حڪومت کي اين ايف سي ايوارڊ ذريعي مقرر ٿيل رقم کان گهٽ ڏني وئي آهي. هن چيو ته منهنجي گرفتاري جو ڪوبه امڪان ناهي ۽ منهنجي گرفتاري جون خبرون افواهه آهن، هن چيو ته اسان سنڌ ۾ ماڪڙ تي90 سيڪڙو ڪنٽرول ڪري ورتو آهي باقي خيرپور ضلعي جي ڪجھ علائقن ۾ ماڪڙ فصلن کي ضرور نقصان رسايو آهي، هوڏانهن وڏي وزير خيرپور جي ناري تعلقي ۾ ماڪڙ سٽيل علائقي سرائي واحد بخش ويجهو مختلف ڀٽن جو معائنو ڪرڻ کانپوءِ ميڊيا سان ڳالهه ٻولهه ڪندي چيو ته صوبي جي ٽن ضلعن خيرپور، شهيدبينظيرآباد ۽ مٽياري جي غيرزرعي علائقن تي حملو ڪيو آهي، جنهن کي فصلن وارن علائقن ڏانهن وڌڻ کان اڳ ئي ختم ڪيو ويندو اُن لاءِ سنڌ حڪومت مالي بحران باوجود سڀ وسيلا ڪتب آڻيندي. وزيراعليٰ سنڌ چيو ته ناري تعلقي جي ريگستاني علائقن ۾ ماڪڙ حملو ڪيو آهي جنهن تي گهڻي ڀاڱي ڪنٽرول ڪيو ويو آهي، وفاقي اداري پلانٽ پروٽيڪشن يونٽ ۽ سنڌ زراعت کاتو توڙي ضلعي انتظاميه پاران ناري تعلقي ۾ ماڪڙ تي ڪنٽرول لاءِ اسپري وارو مرحلو جاري آهي. سيد مراد علي شاهه ميڊيا جي مختلف سوالن جا جواب ڏيندي چيو ته شهيدذوالفقار علي ڀٽو جي دور ۾ ڊزاسٽر کي سامهون رکندي اسپري لاءِ 17 جهاز خريد ڪيا ويا هئا ۽ 70 واري ڏهاڪي ۾ گڏيل عرب اماراتن، قطر ۽ ٻين ملڪن جي به اهڙن حملن جي صورت ۾ مدد ڪئي ويندي هئي، پر بدقسمتيءَ سان وفاق پاران گذريل 30 سالن ۾ ان طرف ڌيان نه ڏنو ويو ۽ هن وقت رُڳو 6 جهاز وڃي بچيا آهن اُنهن مان به هڪ جهاز آپريشنل آهي جيڪو خيرپور اماڻيو ويو پر ڪجهه ڏينهن اسپري بعد خراب ٿي پيو، اهو هاڻ ٺيڪ ٿي ويو آهي ۽ ٻڌايو ويو آهي ته هڪ ٻيو جهاز به اچي ويندو، ان سان گڏوگڏ سنڌ جو زراعت کاتو پنهنجي وسيلن آهر ماڪڙ تي ڪنٽرول لاءِ ڪم ڪري رهيو آهي. هن چيو ته ماڪڙ 2-4 سالن کان ايران ۾ هئي جنهن بعد فيبروري 2019ع ۾ بلوچستان ۾ حملو ڪيو جتان هاڻ جون ۾ سنڌ جي خيرپور، شهيدبينظيرآباد ۽ مٽياريءَ ۾ ماڪڙ پهتي آهي ۽ هن وقت تائين ان ڪراپڊ ايريا ۾ محدود ڪيو ويو آهي، ماهر ٻڌائن ٿا ته نومبر تائين مسئلو ٿي سگهي ٿو ڪوشش آهي ته ان کي فصل وارن علائقن ۾ وڃڻ کان روڪيو وڃي ۽ برسات کانپوءِ ماڪڙ جي افزائش ٿي سگهي اُن ڪري بريڊنگ کان اڳ ان کي ختم ڪيو ويندو. هن چيو ته هُن وفاق جي ڊپٽي ڊائريڪٽر پلانٽ پروٽيڪشن يونٽ کي بريفنگ دوران واضح ڪيو آهي ته وفاق جي ماهراڻه ۽ فني مدد جي ضرورت آهي بجيٽ جي پرواهه نه ڪئي وڃي هاڻي ڪجهه پئسا خرچ ڪرڻ سان هڪ وڏي ڊزاسٽر کان بچي سگهجي ٿو. هن چيو ته ڪمشنر سکر ۽ زراعت کاتي کي ماڪڙ تي ڪنٽرول لاءِ گهرجون ٻڌائڻ لاءِ چيو آهي، اسپري لاءِ زرعي دوائون خريدڻ ۽ گاڏين سميت ٻي مشينري هائر ڪرڻ جي هدايت ڪئي وئي آهي، جڏهن ته تر جي ايم پي اي ساجد ٻانڀڻ کي چيو آهي ته هو مقامي آبادگارن ۽ زميندارن کان به ڦوهارا مشينون ۽ ٻيو سامان وٺڻ جي سلسلي ۾ مدد حاصل ڪري. هڪ سوال جي جواب ۾ وڏي وزيرٰ چيو ته ماڪڙ جي حوالي سان ايمرجنسي جي صورتحال ضرور آهي ۽ چيف سيڪريٽري ڪمشنرن سان گڏجاڻي ڪري کين محتاط ڪيو هو ۽ روزانو ماڪڙ جي حوالي سان هر ڪمشنر جي رپورٽ ايندي آهي. سندس چوڻ هو ته سنڌ مهانگائي بابت پڇيل سوال جي جواب ۾ چيو ته مهانگائي بابت سڄي ملڪ جي ماڻهن ۾ تمام گهڻي بيچيني آهي، ماڻهو چون پيا ته سنڌ حڪومت به ٽيڪس وڌايا آهن پر اسانجو سڄي بجيٽ کولي ڏسو، 99 سيڪڙو ٽيڪس امير ماڻهن تي لڳندا، پهرئين جولاءِ 2018ع تي ڊالر جي قيمت 121 هئي ۽ سال بعد جولاءِ اچڻ کان اڳ ئي 164 رپيا في ڊالر ٿي ويو آهي، ان سان مهانگائي هر طرف وڌي ويندي آهي، وفاقي حڪومت کي درخواست آهي ته اها پنهنجي پاليسين تي نظرثاني ڪري. ٻئي پاسي تازن اطلاعن موجب سنڌ جو وڏو وزير سيدمراد علي شاھ ڀٽ شاھ ريسٽ هائوس پهچي ويو آهي. وڏو وزير ڳوٺ دودو جوڻيجو ڀرسان ماڪڙ جي حملي ۾ تباھ ٿيل زرعي فصل جي آبادگارن سان ملاقات ڪندو ۽ تباھ ٿيل فصل جو جائزو وٺندو. ڀٽ شاھ وڏو وزير آخر ۾ شاعرن جي سرتاج حضرت شاھ عبدالطيف ڀٽائي جي مزارتي چادر چاڙهڻ بعد ڪراڇي روانوٿيندو.

 

خدشن جو اظهار، آءِ ايم ايف ايمنسٽي اسڪيم جي مخالفت ڪري ڇڏي

اسلام آباد(ويب ڊيسڪ) عالمي مالياتي فنڊ (آءِ ايم ايف) حڪومت پاڪستان طرفان اثاثا ظاهر ڪرڻ واري اسڪيم تي خدشن جو اظهار ڪري ڇڏيو. وفاقي حڪومت اثاثا ظاهر ڪرڻ واري اسڪيم ڏني آهي جنهن جي ڊيڊ لائن 30 جون تائين آهي پر وزير اعظم عمران خان گذريل ڏينهن سرڪاري ٽي وي کي انٽرويو ڏيندي اسڪيم جي تاريخ ۾ واڌ جو اشارو ڏنو هو. ٻئي پاسي عالمي مالياتي اداري ( آءِ ايم ايف) حڪومت جي ايمنسٽي اسڪيم جي مخالفت ڪئي آهي ۽ ان کي ٽيڪس گذارن سان ناانصافي قرار ڏنو آهي. ميڊيا سان خاص ڳالهه ٻولهه ۾ آءِ ايم ايف جي ڪنٽري ڊائريڪٽر جي ترجمان ٽريسا ڊبن جو چوڻ هو ته ٽيڪس ايمنسٽي معيشت جي لاءِ بهتر ناهي هوندي ۽ آءِ ايم ايف ٽيڪس ايمنسٽي اسڪيم جي حق ۾ ناهي. هن چيو ته سڄي دنيا جي تجربن مان ثابت ٿيو آهي ايمنسٽي نقصان ڪار آهي، ٽيڪس ايمنسٽي اسڪيم وقتي فائدي جي لاءِ موثر پر ديانتدار ٽيڪس گذارن سان سراسر ناانصافي آهي.

 

قومي اسيمبلي، حماد اظهر جي تقرير، مخالف ڌر ميمبرن جو گوڙ، فنانس بل نامنظور جا نعرا

اسلام آباد (اين اين آءِ) قومي اسيمبلي ۾ روينيو بابت مملڪتي وزير حماد اظهر جي تقرير دوران اپوزيشن ميمبرن پاران سخت گوڙ ۽ نامنظور جا نعرا لڳايا ويا جنهن تي حڪومتي ميمبرن جوابي نعرا لڳايا جنهن سان ايوان جو ماحول هڪ دفعو بيهر گرم ٿي ويو قومي اسيمبلي اسپيڪر حڪومتي ۽ اپوزيشن ميمبرن کي سيٽن تي ويهي نعرا نه هڻڻ لاءِ چوندو رهيو جڏهن ته حماد اظهر احسن اقبال جي تقرير تي وضاحت ڪندي چيو ته الله پاران ڪوڙن تي لعنت هجي جنهن تي مخالف ڌر ميمبرن پاران آمين آمين جا آواز بلند ٿيندا رهيا حماد اظهر جي تقرير دوران شهريار آفريدي ۽ مرتصيٰ جاويد عباسي وچ ۾ منهن ماري ٿي حمايت اظهر جي تقرير کان پوءِ شاهد خاقان عباسي کي وضاحت جي اجازت نه ڏيڻ تي مخالف ڌر ميمبرن سخت احتجاج ڪيو قومي اسيمبلي جي بجيٽ اجلاس به جمعي تي جاري رهيو جنهن ۾ مخالف ڌر جي ميمبرن ٻانهن تي ڪاريون پٽيون ٻڌي ايوان ۾ شرڪت ڪئي ٻانهن تي ڪاريون پٽيون ٻڌي ايوان ۾ شرڪت ڪرڻ جو فيصلو شهبازشريف جي صدارت هيٺ ٿيندڙ اپوزيشن جماعتن جي اجلاس ۾ ڪيو ويو اجلاس دوران حماد اظهر مالي سال 20-2019 جو فنانس بل پاس ٿيڻ لاءِ پيش ڪيو ته مخالف ڌر ميمبرن پاران نامنظور جا نعرا هنيا ويا نئين مالي سال جي فنانس بل تي بحث شروع ڪندي سيد نويد قمر چيو ته فنانس بل منظور ٿيڻ جو ڏينهن آهي وزيرستان جي ٻن ميمبرن کي هتي هئڻ گهرجي ها هن چيو ته مخالف ڌر جي مطالبي جي باوجود پروڊيڪشن آرڊر جاري ناهن ڪيا ويا ايڏو اهم ڏينهن هجي ۽ ميمبر موجود نه هجن ته اسان سڀني لاءِ شرم جي ڳالهه آهي هن چيو ته ايوان مڪمل ناهي اڄ اهي ٻه موجود نه آهن سڀاڻي ڪوئي ٻيو به ٿي سگهي ٿو هن چيو ته پاڪستان جي مشڪل قرضن جي نه اوهان جي نااهلي ۽ نالائقي آهي جنهن جي ڪري عوام کي مشڪل ۾ وجهي ڇڏيو آهي هن چيو ته شاهد خاقان جي تقرير تي حماد اظهر مداخلت ڪئي ته شاهد خاقان عباسي چيو ته مان تنهنجي پيءُ کي سڃاڻيندو هيس هو سٺو ماڻهو هو شاهد خاقان عباسي چيو ته حڪومت جي نااهلي جي ڪري 1400 ارب رپين کان وڌيڪ قرض صرف 10 مهينن ۾ وڌي ويو جيڪا ان جي نااهلي آهي هن چيو ته هي واڌ ڪل دفاعي بجيٽ کان به وڌيڪ آهي هي آهي ان حڪومت جي ڪارڪردگي. هن چيو ته هي دنيا جي واحد اسيمبلي آهي جنهن تي سليڪٽڊ لفظ تي پابندي لڳائي ويئي آهي پر اسان ايوان ۾ سليڪٽڊ نٿا چئي سگهون ۽ اسان نه پيا چئون ٻار ٻچو ٻچو چئي رهيو آهي وزيراعطم جي حڪومت سليڪٽڊ آهي شاهده اختر علي چيو ته اسپيڪر لفظ سليڪٽڊ تي پابندي هڻي ڇڏي آهي اسپيڪر ٻڌائي ته اسان لفظ سليڪٽڊ جي بدران ڪهڙو لفظ سليڪٽ ڪيون منهنجي تربيت اهڙي آهي جو اسان ڪو غيرپاليماني لفظ استعمال نٿا ڪريون نه ئي ڪراس ٽاڪ ڪريون ٿا پر ٻڌايو ته اسان لفظ سليڪٽڊ جي بدران ڪهڙو لفظ استعمال ڪريون هن چيو ته بجيٽ ۾ اوهان عوام کي ڇا ڏنو آهي جو اوهان چئو ٿا ته 8 هزار ارب رپيا گڏ ڪرڻا هئا پر ساڍا 5 هزار ارب وصول ڪنداسين. احسن اقبال خيالن جو اظهار ڪندي چيو جيڪو وزيراعظم پاڻ چوي ته اسان جي معيشت جوڏيوالو نڪري چڪو آهي ته پوءِ ان کي ملڪ کي ڪنهن دشمن جي ضرورت نه آهي هن چيو ته هي منفي گروٿ بجيٽ آهي جيڪا بيروزگاري وڌائيندي مهانگائي وڌائيندي هن چيو ته پاڪستان جي تاريخ ۾ پهريون ڀيرو وزيراعطم آفيس جو خرچ هڪ ارب کان وڌيڪ ڪيو ويو ٻڌايو ته اوهان بجيٽ ۾ ڪهڙي ڪٽوتي ڪئي آهي. هن چيو ته دفاعي پيداوار جي بجيٽ ۾ لڪي وزيراعظم جي استعمال هيٺ هيليڪاپٽر جو ڪروڙين رپيا رکيا ويا آهن هڪ پاسي اسپيشل سيڪريٽريز جي پگهارن ۾ واڌ ۽ غريب سرڪاري ملازمن جي پگهار گهٽائي ويئي آهي اوهان ماڻهن لاءِ گيهه کنڊ تي ٽيڪس لڳائي جيئڻ جو حق کسي رهيا آيو هن چيو ته پرائمري، پري پرائمري ۽ هائر ايجوڪيشن بجيٽ ۾ ڪٽ لڳايو ويو هن چيو ته اسان زرعي ملڪ آهيون پر افسوس هاري لاءِ ڪوئي رليف ناهي ڏنو ويو. احسن اقبال جي تقرير تي حماد اظهر وضاحت ڪندي چيو ته الله جي ڪوڙن تي لعنت هجي جنهن تي مخالف ڌر ميمبرن پاران آمين آمين چيو ويو حماد اظهر چيو ته اسان 10 هزار ارب اسٽيٽ بئنڪ کان قرض ناهي ورتو جون 2018 ۾ ماضي جي حڪومت جو قرض 31 هزار ارب تائين پهچي ويو آهي هن چيو ته هلندڙ سال موجوده حڪومت 950 ارب ڊالر قرض ادا ڪيو آهي. وزيراعظم هائوس جي خرچن کي 550 ارب جو ٽيڪس لڳايو آهي هن چيو ته اسان خرچن ۾ گذريل سال جي ڀيٽ ۾ 5 سيڪڙو گهٽتائي ڪئي آهي وزيراعظم هائوس جي خرچن کي 98 ڪروڙ مان گهٽائي ان جي بجيٽ ۾ 12 سيڪڙو گهٽتائي ڪئي آهي هي جنرل جيلاني جو دور نه آهي اپوزيشن اهڙو رويو اختيار نه ڪري حماد اظهر جي تقرير دوران شهريار آفريدي ۽ مرتصيٰ جاويد عباسي وچ ۾ منهن ماري ٿي حماد اظهر جي تقرير کان پوءِ شاهد خاقان عباسي کي وصاحت جي اجازت نه ڏيڻ تي اپوزيشن ميمبرن گوڙ ڪيو جنهن تي ڊپٽي اسپيڪر چيو ته انهن اوهان جو نالو ناهي ورتو مان غور سان ٻڌي رهيو هيس.

 

وزيراعظم سياسي نه قومي مفاد ۾ جرئتمنداڻا فيصلا ڪيا، پيدائشي ڊيفيڪٽڊ جو بيان ڪنهن خاص شخص لاءِ نه هو: فردوس عاشق اعواڻ

اسلام آباد (اين اين آءِ) اطلاعات بابت وزيراعظم جي جي صلاحڪار ڊاڪٽر فردوس عاشق اعواڻ چيو آهي ته سندس ڄائي ڄم کان ڊفيڪٽيڊ وارو بيان ڪنهن خاص ماڻهو لاءِ نه هو جنهن جي قول ۽ فعل ۾ تضاد هجي اهو ڊفيڪٽيڊ آهي تفصيل موجب گذريل ڏينهن پريس ڪانفرنس ڪندي فردوس عاشق اعواڻ چيو ته عمران خان جو مينڊيٽ آهي کيس پارليامينٽ پهريان سليڪٽيڊ چيو پوءِ پنهنجي ووت سان اليڪٽ ڪيو پر هڪ ماڻهو اهڙو به آهي جنهن کي سڄي ڄمار لاءِ سپريم ڪورٽ ريجيڪٽ ڪيو سليڪٽيڊ، اليڪٽيڊ ۽ هڪ سڄي ڄمار لاءِ رجيڪٽيڊ جي ڳالهه ٿيڻ گهرجي ان سان گڏ هڪ سياسي ليڊر اهڙو به آهي جيڪو ڄائي ڄم کان ڊفيڪٽيڊ آهي ان حوالي سان خانگي ٽي وي هڪ پروگرام ۾ خيالن جو اظهار ڪندي فردوس عاشق اعواڻ چيو ته ڄائي ڄم کان ڊفيڪٽيڊ طبي اصطلاح آهي ۽ ان کي سياست جو رنگ ڇو پيو ڏنو وڃي پنهنجن لفظن تي قائم آهيان بيان ڪنهن خاص شخص لاءِ نه هو هن چيو ته هر اهو شخص جنهن جو پنهنجو عمل ان جي زبان جو ساٿ نه ڏي ۽ اهو ڄائي ڄم کان ڊفيڪٽيڊ آهي ڪوبه سياسي شخص ٿي سگهي ٿو جنهن ۾ ڄائي ڄم کان نقص هجن، ڄائي ڄم کان نقص جسماني، ذهني ۽ نفسياتي طور ڪنهن ۾ به ٿي سگهن ٿا ٻئي پاسي پنهنجي بيان ۾ عاشق اعواڻ چيو ته وزيراعظم عمران خان ملڪ جي تاريخ ۾ پهريون ڀيرو ٽيڪس اڳاڙي کي تحريڪ جي شڪل ڏني. پاڪستان کي پنهنجن پيرن تي بيهارڻ لاءِ عملي قدم ڪپتان کنيو هن چيو ته وزيراعظم پنهنجي عمل سان ثابت ڪيو ته اسان قوم بڻجي محتياجي جي ڌٻڻ مان نڪرڻ جي جدوجهد ڪيون وزيراعظم سياسي نه قومي مفاد ۾ جرئت منداڻا فيصلا ڪيا آهن.

 

شيخ رشيد رائل پام ڪلب ڪيس جو حق ۾ فيصلو اچڻ تي وزيراعظم ۽ ڪابينه ميمبرن کي مٺائي کارائڻ پهچي ويو

لاهور (اين اين آءِ) ريلوي جي وفاقي وزير شيخ رشيد احمد سپريم ڪورٽ پاران رائل پام ڪنٽري ڪلب ڪيس ۾ حق ۾ فيصلو اچڻ تي وزيراعظم عمران خان ۽ ڪابينه جي ميمبرن کي مٺائي کارائڻ پهچي ويو سپريم ڪورٽ جي ٻن ميمبرن واري بئنچ پاران فيصلو ٻڌائڻ کان پوءِ شيخ رشيد احمد مٺائي جي دڪان تان مٺائي ورتي شيخ رشيد احمد وزيراعظم عمران خان کي سپريم ڪورٽ جي فيصلي جي تفصيل کان آگاهه ڪيو وزيراعطم ۽ ڪابينه ميمبرن کي مٺائي کارائي شيخ رشيد احمد چيو ته هن فيصلي سان ريلوي جو خسارو ختم ٿيڻ ۾ مدد ملندي وزيراعظم ريلوي وزير کان پڇاڻو ڪيو ته هاڻي رائل پام ڪنٽري ڪلب کي ڪير هلائيندي شيخ رشيد ٻڌايو ته هاڻي انٽرنيشنل ٽينڊر ٿيندو ۽ عالمي سطح جي ڪمپني ان کي هلائيندي.

 

وفاقي سرڪار جسٽس قاضي فائز عيسيٰ خلاف داخل ريفرنس تي وڪيل برادري جي حمايت کٽڻ لاءِ ساڍا 17 ڪروڙ بار ۾ ورهائي ڇڏيا

اسلام آباد(ويب ڊيسڪ) قانون واري وزير ڊاڪٽر فروغ نسيم سپريم ڪورٽ جي جسٽس قاضي فائز عيسيٰ جي خلاف داخل ريفرنس تي وڪيل برادري جي حمايت کٽڻ لاءِ قومي ناڻي مان 17 ڪروڙ 50 لک رپيا بار ايسوسيئيشن ۾ ورهائي ڇڏيا.واضح رهي ته جسٽس قاضي فائز عيسيٰ جي خلاف سپريم جوڊيشل ڪونسل (ايس جي سي) ۾ ٻڌڻي 2 جولاءِ  تي مقرر آهي جڏهن ته سپريم ڪورٽ بار ايسوسيئيشن (ايس سي بي اي) جي صدر امانت الله ٻڌڻي دوران سڄي ملڪ ۾ ڪارو ڏينهن ملهائڻ جو فيصلو ڪيو آهي.

 

ڌهاٻيجي ۽ ملير ۾ ٽينڪر مافيا خلاف وڏي ڪارروائي. 21 غير قانوني هائيڊرينٽس پٽ، 13 ڪنيڪشن ڪاٽا، ٻن ايڪسيئين سميت 6 ماڻهون گرفتار

ڪراچي(اسٽاف رپورٽر)  وزير اعليٰ سنڌ جي اطلاعات، قانون ۽ اينٽي ڪرپشن بابت صلاحڪار جي خاص هدايت تي ڌهاٻيجي ۽ ملير ۾ ٽينڪر مافيا جي خلاف وڏي ڪارروائي. 21 غير قانوني هائيڊرينٽس پٽ، 13 غير قانوني ڪنيڪشن جو خاتمون ڪيو ويو واٽر بورڊ جي ٻن ايڪسيئين سميت 6 ماڻهون گرفتار، تفيصل مطابق صوبائي صلاحڪار بئريسٽر مرتضيٰ وهاب جي هدايت تي اينٽي ڪرپشن اسٽيبلشمينٽ جي ٽيم ڊپٽي ڊائريڪٽر اينٽي ڪرپشن شرقي جي سربراهي ۾ مئجسٽريٽ جي موجودگي ۾ ڏهاٻيجي ۽ ملير ۾ منظم پاڻي مافيا جي خلاف وڏي ڪارروائي عمل ۾ آندي. اينٽي ڪرپشن اسٽبلشمينٽ جي مطابق غير قانوني ڪنيڪشن مان وڏي مقدار ۾ پاڻي ٽينڪرز جي ذريعي ڪراچي ۽ ڌهاٻيجي سپلائي ڪيو پئي ويو. ڊپٽي ڊائريڪٽر اينٽي ڪرپشن جو چوڻ هو ته غير قانوني ڪنيڪشن مان 46 ٺيڪيدارن جا ٽينڪر پاڻي چوري ۾ ملوث هئا. اينٽي ڪرپشن بابت صوبائي صلاحڪار بئريسٽر مرتضيٰ وهاب اينٽي ڪرپشن جي ٽيم جي ڪارروائي کي ساراهيندي کين شاباس ڏني آهي ۽ چيو آهي ته پاڻي چوري ۾ ملوث ماڻهن کي ڪيفر ڪردار تائين پهچايو ويندو.

 

نوازشريف کي جيل ۾ سموريون طبي سهولتون ڏنيون پيون وڃن، نواز شريف جي ضمانت رد ڪرڻ بابت تفصيلي فيصلو جاري

اسلام آباد ( ويب ڊيسڪ ) اسلام آباد هاءِ ڪورٽ اڳوڻي وزيراعظم نواز شريف جي طبي بنيادن تي داخل ضمانت جي درخواست  رد ڪرڻ جو لکت فيصلو جاري ڪري ڇڏيو. اسلام آباد هاءِ ڪورٽ طرفان ستن صفحن تي ٻڌل  تفصيلي فيصلي ۾ چيو ويو آهي ته  نوازشريف کي جيل ۾ سموريون طبي سهولتون ڏنيون پيون وڃن، سهولتن جي فراهمي کانپوءِ  طبي بنيادن تي ضمانت نه ٿي ڏئي سگهجي. اسلام آباد هاءِ ڪورٽ جي فيصلي ۾ چيو ويو آهي ته سپرنٽنڊنٽ جيل ۽ نواز شريف ڪڏهن به ميڊيڪل بورڊ جوڙڻ جي درخواست نه ڪئي آهي جڏهن ته نواز شريف بابت شريف ميڊيڪل سٽي جي رپورٽ به مبهم آهي. هاءِ ڪورٽ جي فيصلي ۾ چيو ويو آهي ته  پرڏيهي ڊاڪٽر به ٻڌائڻ کان لاچار آهن ته ڪيئن پاڪستان ۾ نواز شريف جو علاج ممڪن ناهي.

 

اڄڪلهه عدالتن جو رويو ڪرپشن خلاف ڏاڍو سخت آهي، ڪڏهن منشيات ۽ دهشٽگردي ڪيسز ۾ اهڙو رويو هوندو هو: چيف جسٽس

اسلام آباد (اين اين آءِ) سپريم ڪورٽ سرڪاري زمين بوگس اين او سي جي ذريعي خانگي ماڻهو کي الاٽ ڪرڻ جي جوابدارن جون اپيلون رد ڪري ڇڏيون جمعي تي چيف جسٽس جي سربراهي ۾ ٽن ميمبرن واري بئنچ ڪيس جي ٻڌڻي ڪئي مختيارڪار خادم حسين ۽ مشتاق علي ملير جي سرڪاري زمين خانگي شخص کي الاٽ ڪرڻ جو جعلي اين او سي جاري ڪيو هو احتساب عدالت پنجن سالن جي سزا ٻڌائي هاءِ ڪورٽ سزا برقرار رکي چيف جسٽس چيو ته مختيارڪار سرڪاري زمين جو نگهبان هو زمين جي محافظن 21 ايڪڙ زمين ڪنهن کي ڏيئي ڇڏي چيف جسٽس چيو ته اهڙي جرم ۾ پنج سال سزا گهٽ آهي چيف جسٽس چيو ته پنج سال سزا ڪنهن کي سوٽي يا پٿر هڻڻ تي ٻڌائي وڃي ٿي نيب جي وڪيل چيو ته زمين جي الاٽمينٽ سان 430 ملين نقصان ٿيو خادم حسين جي وڪيل چيو ته الاٽ ڪيل زمين واپس ٿي ويئي چيف جسٽس چيو ته چور پڪڙجڻ تي رقم واپس ڪري ڇڏي ٿو چيف جسٽس چيو ته چور پڪڙجڻ تي رقم واپس ڪئي وڃي ته ڇا ڏوهه ختم ٿي وڃي ٿو خادم حسين عهدو سنڀالڻ جي پنجن ڏينهن ۾ هي ڪارنامو سرانجام ڏيئي ڇڏيو چيف جسٽس چيو ته ڇو نه جوابدارن کي سزائون وڌائڻ جو نوٽيس ڏيون جوابدارن جي وڪيل چيو ته اپيلون واپس وٺي ڇڏيون ٿا عدالت سزا گهٽائي ڇڏي چيف جسٽس چيو ته اڄڪلهه ڪرپشن جي خلاف عدالتن جو رويو سخت آهي ڪڏهن منشيات، دهشتگردي ڪيسن ۾ عدالتن جو رويو سخت هوندو هو چيف جسٽس چيو ته اڄڪلهه سرڪاري ادارن ۾ ڪرپشن ڪيس تي عدليه جو رويو اهڙو آهي.