تازيون خبرون
آخري دم تائين وڙهنداسين، مودي ياد رک سر جو جواب پٿر سان ڏينداسين: عمران خان - “آرٽيڪل 149” جو پڙاڏو: پ پ جو وفاقي سرڪار کان استعيفيٰ ۽ نئين سر چونڊن جو مطالبو - سنڌو ديش ڳالهه مناسب ناهي، صوبائي خودمختياري تي يقين رکون ٿا: شاهه محمود - آفيسر شاهي هلڻ نه ڏبي، عهدن تي ويٺل ماڻهن جي اڪثيريت عوام جي خدمت نٿي ڪري: سپريم ڪورٽ - اسان کي هر محاذ تي سفارتي ڪاميابي ۽ ڀارت کي شڪست ٿي رهي آهي: فردوس عاشق اعواڻ - مهاجرن جو قرض اسان کي نه وسارڻ گهرجي (اسد عمر) سڀ کان پهرين بنگال ۽ سنڌ ٺهراءُ پاس ڪيا: خورشيد شاهه - ڪشمير جو مسئلو حل ڪرڻ کان سواءِ ڳالهيون نٿيون ٿي سگهن، ٽيبل هيٺان ڪشميرين جو سمجهوتو ناهي ٿيڻ وارو: شيخ رشيد - بلاول ڀٽو زرداري جي بيان مان ملڪ دشمني ڪڍي ڏيکاريو: پيپلز پارٽي جو حڪومتي ميمبرن کي چئلينج - ڪراچي ۾ ٻوريون وجهي سيوريج لائيون ۽ گٽر بند ڪندڙن جي ڳولا جي ذميواري رينجرز حوالي - آزاد ڪشمير تي قبضي لاءِ مڪمل تيار آهيون، آخري فيصلو حڪومت ڪندي: ڀارتي آرمي چيف پاران ڌمڪي

Daily Archives: June 18, 2019

ڪا به سوديبازي نه ڪيو، سر جو جواب پٿر سان ڏيو: وزير اعظم جي ڪابينا ميمبرن کي هدايت

اسلام آباد (ويب ڊيسڪ) وزيراعظم عمران خان ڪابينا ميمبرن کي بجيٽ منظوري جي ڳڻتي نه ڪرڻ جي هدايت ڪندي چيو آهي ته اپوزيشن جي ڪنهن به بليڪ ميلنگ ۾ نه اچو. وزيراعظم عمران خان جي صدارت هيٺ وفاقي ڪابينا جو اجلاس ٿيو، جنهن ۾ حڪومت اپوزيشن کي منهن ڏيڻ جي حڪمت عملي تيار ڪئي. ذريعن موجب وزيراعظم عمران خان سمورن وزيرن کي اپوزيشن جي لهجي ۾ ئي جواب ڏيڻ جي هدايت ڪئي ۽ چيو ته ڪابينا ميمبر بجيٽ منظوري جي ڳڻتي نه ڪن، اسان بجيٽ منظور ڪرائينداسين. هن وڌيڪ چيو ته ميمبر ڪنهن جي به بليڪ ميلنگ ۾ نه اچن، اپوزيشن توهان کي ڳالهائڻ نٿي ڏئي ته توهان به انهن کي ڳالهائڻ نه ڏيو، پنهنجي موقف تان ڪنهن به صورت ۾ پوئتي نه هٽو، اسيمبلي سان گڏوگڏ ميڊيا تي به پنهنجي موقف تي قائم رهو ۽ ڀرپور جواب ڏيو. ذريعن موجب وزيراعظم عمران خان چيو جيڪڏهن اپوزيشن احتجاج ڪرڻ چاهي ٿي ته 100 ڀيرا ڪري پر عوام جي زندگي ۾ خلل وڌو ويو ته قانون چُرپر ۾ ايندو. سندس چوڻ هو ته مان ڊڄڻ ناهي سکيو ۽ نه بليگ ميل ٿيندو آهيان، توهان کي هوشيار ڪيان ٿو ته ڪا به سوديبازي نه ڪيو ۽ سِر جو جواب پٿر سان ڏيو.

 

وفاقي سرڪار ترقياتي منصوبا ۽ پاليسيز جوڙڻ لاءِ قومي ترقياتي ڪائونسل جوڙي ورتي

اسلام آباد (م.ڊ) وفاقي سرڪار ترقياتي رٿائن جي حوالي سان قومي ترقياتي ڪائونسل جوڙڻ جو نوٽيفڪيشن جاري ڪري ڇڏيو. وفاقي سرڪار طرفان قومي ترقياتي ڪائونسل جي جوڙجڪ جي حوالي سان نوٽيفڪيشن جاري ڪيو ويو، جنهن موجب ڪائونسل جو چيئرمين وزيراعظم عمران خان کي مقرر ڪيو ويو آهي، جڏهن ته آرمي چيف جنرل قمر جاويد باجوه، پرڏيهي وزير شاهه محمود قريشي، ناڻي کاتي جي صلاحڪار حفيظ شيخ، ترقي ۽ رٿابندي واري کاتي جي وزير عمر ايوب کي ڪائونسل جو ميمبر بڻايو ويو. نوٽيفڪيشن موجب چارئي وڏا وزير، آزاد ڪشمير جو وزيراعظم ۽ گلگت بلستان جو وزير به ڪائونسل جي ميمبرز ۾ شامل آهن. اُن کانپوءِ پرڏيهي سيڪريٽري ۽ ناڻي کاتي جي سيڪريٽري کي به ڪائونسل ۾ شامل ڪيو ويو آهي. نوٽيفڪيشن موجب ڪائونسل ترقياتي رٿائون تيار ڪرڻ سان گڏ اُن هوالي سان پاليسيز جوڙيندي.

 

 

جعلي اڪائونٽن ذريعي ٽرانزيڪشن وڏو ڏوهه آهي: چيف جسٽس

اسلام آباد ( ويب ڊيسڪ ) چيف جسٽس آصف سعيد کوسا هڪ ڪيس ۾ رمارڪس ڏيندي چيو آهي ته جعلي اڪائونٽن ذريعي ٽرانزيڪشن ڪرڻ وڏو شديد ڏوهه آهي.  چيف جسٽس آصف سعيد کوسا جي سربراهيءِ ۾ سينئر اسسٽنٽ بئنڪ محمد انور جي جعلي اڪائونٽ کولرائڻ بابت ڪيس جي ٻڌڻي ٿي جنهن ۾ عدالت درخواست واپس وٺڻ جي بنياد تي معاملو  اڪلائي ڇڏيو. عدالت چيو ته هڪ ڪيس ۾ ٽرائل ڪورٽ جوابدار محمد انور ايوب کي 3 سال سزا ۽ 8 لک رپيه ڏنڊ وڌو ٻئي ڪيس ۾ ٽرائل ڪورٽ جوابدار محمد انور ايوب کي 8 سال سزا ڏني ۽ هاءِ ڪورٽ ٻنهي ڪيسن ۾ ٽن سالن جي سزا ٻڌائي ڇڏي. ٻڌڻي دوران چيف جسٽس رمارڪس ڏيندي چيو ته بئنڪ وارن جي شامل ٿيڻ کانسواءِ جعلي اڪائونٽ نه ٿا کلي سگهن، هڪ لک جو اڪائونٽ کولي 9 لک ڪيو ويو،اڪائونٽ بنا تصديق کولي نه ٿو سگهجي.  جسٽس آصف سعيد کوسا چيو ته جوابدار کي ٽن سالن جي قيد جي سزا ته تمام گهٽ ڏني وئي آهي، جعلي اڪائونٽن ذريعي ٽرانزيڪشن ڪرڻ شديد جرم آهي، جيترا به اڪائونٽ کوليا آهن سڀني اوپننگ فارمن تي جوابدار جون صحيحون آهن، ٽرانزيڪشن ۾ جوابدار ملوث آهي. ان موقعي تي چيف جسٽس رمارڪس ڏيندي چيو ته ڪرمنل ڪيس هاڻي ختم ٿي ويا آهن، انشاءَ الله ڪجهه هفتن ۾ ٻڙي رهجي ويندا،  هفتي کانپوءِ رڳو 100 اپيلون رهجي وينديون، سمورن ڪيسن جي گڏ تياري ڪيو، ڪيس ختم ٿيڻ وارا آهن.

 

عمران خان ڀلي گوڙ ۽ غنڊا گردي ڪري، عوام دشمن بجيٽ منظور ٿيڻ نه ڏينداسين: ن ليگ

اسلام آباد ( ويب ڊيسڪ ) مسلم ليگ ن جي ترجمان مريم اورنگزيب چيو آهي ته عمران خان ڀلي گوڙ ۽ غنڊا گردي ڪري، شهباز شريف جي تقرير به ٿيندي ۽ عوام دشمن بجيٽ به منظور ٿيڻ نه ڏينداسين. هڪ بيان ۾ مريم اورنگزيب چيو ته عمران خان صاحب جڏهن توهان پارليامينٽ ۾ پنهنجي وزيرن کي هنگامو ڪرڻ جي هدايت ڏيندا ته سوال ته اٿندا، پارليامينٽ تي حملو ڪندڙ ئي رڳو پارليامينٽ جي  آواز کان ڊڄي سگهي ٿو، عمران خان ڏوهه توهان جو ناهي نالائق، ووٽ چور، سليڪٽڊ وزيراعظم کي پارليامينٽ مان خوف ئي ايندو، افسوس آهي ته توهان پنهنجي وزيرن کي ڌرڻي ۽ ڏڦيڙ کانسواءِ ڪجهه نه سيکاري سگهيا.  هن چيو ته عمران خان ڪابينا جو اجلاس رڳو  پارليامينٽ ۾ ڏڦيڙ ۽ اپوزيشن ليڊر جي بجيٽ تقرير روڪڻ لاءِ باضابطا هدايتون ڏيڻ لاءِ  طلب ڪيو ويو آهي.  سندس چوڻ هو ته وفاقي ڪابينا اجلاس ۾ هنگامو ڪندڙن کي ميڊل ڏنا ويندا، عمران خان ڄاڻي ٻجهي سوچيل سمجهيل حڪمت عملي تحت بجيٽ تي بحث نه ٿيڻ ڏئي رهيو آهي، عمران خان نه ٿو چاهي ته شهباز شريف عوام دشمن آءِ ايم ايف ميڊ بجيٽ جون حقيقتون عوام کي ٻڌائي.

 

حسين اصغر کي قرضن بابت جاچ ڪميشن جو سربراهه بڻائڻ جو فيصلو

اسلام آباد ( ويب ڊيسڪ ) حڪومت نيب جي ڊپٽي چيئرمين حسين اصغر کي ڪرپشن جي جاچ ڪندڙ ڪميشن جو سربراهه بڻائڻ جو فيصلو ڪيو ويو آهي.  وزيراعظم عمران خان بجيٽ کانپوءِ قوم کي خطاب ۾ 10 سالن دوران اڳوڻي حڪومتن لاءِ قرضن جي جاچ لاءِ ڪميشن بڻائڻ جو فيصلو ڪيو هو جيڪا قرضن جي استعمال ۽ ڪرپشن جي جاچ ڪندي.  ذريعن موجب نيب جي ڊپٽي چيئرمين حسين اصغر کي ڪميشن جو سربراهه بڻائڻ جو فيصلو ڪيو آهي. حسين اصغر اڳوڻو پوليس آفيسر آهي ۽ ڊائريڪٽر اينٽي ڪرپشن پنجاب سميت ايف آءِ اي ۾ به خدمتون سرانجام ڏئي چڪو آهي.

 

 

قومي ٽيم جي ناقص ڪارڪردگي، پابندي جو مطالبو، عدالت ۾ پٽيشن داخل، پي سي بي اختياريون رڪارڊ سميت طلب

گجرانوالا(ويب ڊيسڪ) ڪرڪيٽ ورلڊ ڪپ ۾ پاڪستاني ٽيم جي ناقص ڪارڪردگي ۽ ڀارت جي هٿان شڪست کان پوءِ ٽيم جي پابندي بابت عدالت ۾ پٽيشن داخل ڪئي وئي. گجرانوالا ۾ ايڊووڪيٽ منظور قادر ڀنڊر سينيئر سول جج راءِ افضال کرل جي عدالت ۾ داخل ڪئي. ڄاڻايل پٽيشن ۾ چيئرمين پاڪستان ڪرڪيٽ بورڊ (پي سي بي) ۽ سمورن رانديگرن کي ڌر بڻايو ويو. درخواستگذار موقف اختيار ڪيو ته پاڪستاني ٽيم جي ڪارڪردگي جي ڪري قوم جي دل آزاري ٿي ۽ ملڪ جو وقار به مجروح ٿيو. ان ۾ وڌيڪ چيو ويو ته جتي عوام بنيادي سهولتن محروم هجي اُتي ڪرڪيٽ تي ڪروڙين رپيا خرچ نٿا ڪري سگهجن. درخواستگذار عدالت کان اپيل ڪئي ته ورلڊ ڪپ ۾ پاڪستان جون ٻيون ميچون رد ڪري انهن کي فوري واپس گهرائڻ جو حڪم ڏنو وڃي جڏهن ته سليڪشن ڪميٽي کي ٽوڙي ڪرڪيٽ تي مڪمل پابندي لاڳو ڪئي وڃي. سينيئر سول جج راءِ افضال کرل پٽيشن ٻڌڻي جي لاءِ سول جج ابرار علي جي حوالي ڪري ڇڏي جن پي سي بي اختيارين کي 20 جون تي ريڪارڊ سميت طلب ڪري ورتو.

 

سنجراڻي تي مڪمل اعتماد جو اظهار ، مخالف ڌر سنيٽ چيئرمين کي هٽائڻ جي ڪوشش کي ناڪام بڻايو ويندو : عمران خان

اسلام آباد (اين اين آءِ) وزيراعظم عمران خان سينيٽ چيئرمين صادق سنجراڻي تي مڪمل اعتماد جو اظهار ڪندي واضح ڪيو آهي ته مخالف ڌر سنيٽ چيئرمين کي هٽائڻ جي ڪنهن به ڪوشش کي ناڪام بڻايو ويندو، اڱاري تي وزيراعظم عمران خان سان سنيٽ چيئرمين صادق سنجراڻي ملاقات ڪئي جنهن ۾ پرويز خٽڪ، شبلي فراز ۽ سينيٽر اورنگزيب خان به شامل هو، ملاقات ۾ فيصلو ڪيو ويو ته اپوزيشن پاران سينيٽ چيئرمين کي هٽائڻ جي ڪوشش ناڪام بڻائي ويندي، سينيٽ چيئرمين چيو ته ايوان کي قانون موجب ۽ سڀني کي گڏ کڻي هلائي رهيو آهيان، ميمبر سڀ هڪجهڙا آهن، ڪو فيوريٽ نه آهي، ٻئي پاسي وزيراعظم عمران خان سان بلوچستان جي وڏي وزير ڄام ڪمال خان وزيراعظم آفيس ۾ ملاقات ڪئي، جنهن بلوچستان جي صورتحال تي ڳالهه ٻولهه ڪئي وئي، وزيراعظم عمران خان سان عبدالرزاق دائود به ملاقات ڪئي جنهن ۾ سيڙپڪاري تي ڳالهه ٻولهه ڪئي، وزيراعظم سان ڊاڪٽر فردوس اعواڻ به ڌار ملاقات ڪئي،وزيراعظم عمران خان سان ماحوليات جي صلاحڪار ملڪ امين اسلم به ملاقات ڪئي.

 

اختر مينگل جي مولانا فضل رحمان سان ملاقات، دعوت قبول، اي پي سي ۾ شرڪت جو اعلان

اسلام آباد (اين اين آءِ) بي اين پي جي سربراهه اختر مينگل اپوزيشن پارٽي جي اي پي سي ۾ شرڪت جو اعلان ڪندي چيو آهي ته چاهيون ٿا ته جمهوريت مضبوط، شفاف اليڪشن ۽ عدالتون آزاد هجن، حڪومت جا اتحادي نه آهيون، ڪجهه نقطن تي ووٽ ڏنو، سياسي پارٽين کي جمهوريت جي بحالي لاءِ واضح اينجنڊا کڻي اچڻو پوندو، انساني حقن جي لتاڙ ٿئي ته جمهوريت کي وڌندي ويجهندي نٿو ڏسي سگهجي، اڱاري تي اختر مينگل مولانا فضل رحمان سان ملاقات ڪئي، سينيٽر جهان زيب جمال الديني ملاقات ۾ موجود هو، جي يو ف آءِ پاران مولانا عبدالفغفوري حيدري، مولانا اسد محمود ۽ ٻين شرڪت ڪئي، ملاقات ۾ حڪومت خلاف تحريڪ بابت ڳالهه ٻولهه ڪئي وئي، مولانا پاران اختر مينگل کي اپوزيشن جي اتحاد ۾ شامل ٿيڻ جي دعوت ڏني وئي، صحافين سان ڳالهائيندي مولانا فضل رحمان چيو ته اي پي سي تي صلاح مشورن جي شروعات ٿي چڪي آهي، ايندڙ هفتي ۾ اي پي سي جو احتمام ٿي سگهندو، هن چيو ته اختر مينگل جو هاڪاري جواب ڏيڻ تي ٿورائتو آهيان، ملڪ ۾ حقيقي جمهوريت جي بحالي لاءِ پيدا ٿيندڙ سوچ جا بهترين نتيجا نڪرندا، سڄي قوم کي هڪ صف ۾ اچڻو پوندو تڏهن ئي هدف حاصل ٿيندا، اپوزيشن قيادت جيل ۾ هئڻ سبب ئي اي پي سي جلد ٿي رهي آهي، اختر مينگل چيو ته بي اين پي ۽ جي يو آءِ ف جا پراڻا لاڳاپا آهن، منهنجو والد بلوچستان ۽ مولانا جو والد ڪي پي ڪي جو وڏو وزير هو، هن چيو ته بلوچستان اڄ به ٻئي پارٽيون اتحادي آهن، مولانا اي پي سي لاءِ دعوت ڏني هئي، ملڪ ۾ سياست ۾ اسان جو ڪردار ۽ ذميواريون آهن، هن چيو ته سياسي پارٽي طور اي پي سي ۾شرڪت ڪنداسين، جلد پارٽي جي گڏجاڻي گهرائي مولانا کي هاڪاري جواب ڏينداسين، ملڪ ۾ ڪيتريون ئي چونڊيل ۽ غير چونڊيل حڪومتون آيون ۽ ويون، ڪيتريون ئي بجيٽون آيون پر ملڪ جي قسمت سنوارجي نه سگهي تنهنڪري سياسي پارٽين کي جمهوريت جي بحالي لاءِ واضح ايجنڊا کڻي اچڻو پوندو. هن چيو ته سياسي اشو ۾ کنڀي گم ڪيل ماڻهن جو مسئلو سڀ کان وڌيڪ اهم آهي، هن چيو ته بلوچستان وارن کي خدشو آهي ته ترقي جي نالي تي ڊيمو گرافڪس تبديل نه ٿين، هن چيو ته ڪيتري ئي ڪوشش حڪومت کي بلوچستان جي مسئلن کان آگاهه ڪيان، جيڪڏهن ڪير مئسلن کي نٿو سمجهي ته ڇا ٿو ڪري سگهان، هن چيو ته غائب ماڻهن جو مسئلو رڳو بلوچستان نه پر سنڌ ۾ به آهي، بلوچستان جي کنڀي گم ڪيل ماڻهن جي لسٽ حڪومت کي ڏني، جمهوريت جو بنياد انساني حق آهن.

 

نيب جو ڏوڪري ٽائون ڪميٽي تي ڇاپو، عملو فرار، رڪارڊ قبضي ۾ ورتو ويو، چيئرمين رڪارڊ سميت سکر طلب

ڏوڪري(تنوير ميمڻ) ڏوڪري ٽائون ڪميٽي تي نيب  سکر جو ڇاپو رڪارڊ تحويل ۾ وٺي کڻي وئي. 24جون تي نيب سکر پاران چئيرمين کي ظلب ڪري ورتو. ڏوڪري ٽائون ڪاميٽي آفيس ۾ نيب سکر ٽيم جي آفيسر امتياز علي رڪ پاران ڇاپو، ڇاپي دوران نيب ٽيم جو ٻڌي ڪري ٽائون چئرمين لياقت سومرو موقعي تي فرار ٿي ويو جڏھن ته  ،بعد ۾ چئيرمين لياقت علي سومرو ٻيهر  آفيس پهتو جڏھن ته ٽائون آفيس جي مکيه گيٽ بند ڪري پوليس اهلڪار مقرر ڪيا ويا بعد ۾ ٽائون آفيسر روشن لولائي سان رابطو ڪيو ويو ته هو فورن آفيس پهتو جڏھن ته نيب سکر 2016 جو رڪارڊ طلب ڪري ورتو آھي هوڏانهن نيب ٽيم جو ٻڌي ڪري آفيس جو عملو غائب ٿي ويو جڏھن ته آفيس ۾ صرف 2 ملازم موجود هئا. ان دوران نيب ٽيم جي آفيسر  امتياز علي رڪ جي اڳواڻي ۾ 12بجي کان آيل ٽيم پنجن ڪلاڪن تائين ٽائون ڪميٽي ڏوڪري جي ٽائون آفيسر روشن لولائي ۽ چئيرمين لياقت علي سومرو ٽيم کي ته رڪارڊ ۽ معلومات ڏيندا رهيا. جنهن بعد ميڊيا سان ڳالهائيندي نيب ٽيم جي آفيسر امتياز علي رڪ چيو ته جاچ جي سلسلي ۾ اسان هتي آيا آهيون ۽ رڪارڊ چيڪ ڪيو آهي ۽ اڃا رڪارڊ گهربل آهي جيڪو اهو جمعي 24 جون تي ٽائون ڪميٽي ڏوڪري جي چيئرمين لياقت علي سومرو رڪارڊ سميت سکر نيب آفيس آڏو پيش ٿيڻ جو حڪم. جنهن بعد نيب پنج ڪلاڪ مڪمل جاچ ۽ ڪجهه رڪارڊ کڻي رواني ٿي وئي.

 

رتي ديري ۾ ايڇ آءِ وي جي مريضن جو انگ 812 ٿي ويو، اسڪريننگ جو سلسلو جاري رکڻ جو فيصلو

لاڙڪاڻو ( ويب ڊيسڪ ) رتي ديري ۾ ايڇ آءِ وي جي مريضن جو تعداد 812 تائين پهچي ويو، مرض جو شڪار 52 سيڪڙو مريض مرد 48 ڏهائي هڪ سيڪڙو عورتون آهن، جڏهن ته اسڪريننگ جو سلسلو جاري رکڻ جو فيصلو ڪيو ويو آهي.  رتي ديري ۾ ايڇ آءِ وي سبب متاثر ماڻهن جي تعداد ۾ خطرناڪ حد تائين اضافو ٿي ويو آهي. ڊي جي هيلٿ سروسز رپورٽ سنڌ جي صحت کاتي حوالي ڪري ڇڏي آهي. ذريعن موجب 44 ڏينهن ۾ 28308 ماڻهن جي اسڪريننگ ڪئي وئي. رتي ديري ۾ 44 ڏينهن دوران 812 ماڻهن ۾ ايڇ آءِ وي جي تصديق ٿي آهي. ٻن ڏينهن دوران نون ماڻهن ۾ ايڇ آءِ وي جي تصديق ٿي چڪي آهي. ايڇ آءِ وي جو شڪار گهڻي قدر مريضن جي عمر هڪ کان پنج سال آهي. هڪ سال جي عمر جي 63 ٻارڙن، ٻن کان پنج سال جي عمر جي 458 ٻارڙن ۽ ٻن کان پنج سال جي عمر جي 458 ٻارڙن ۾ ايڇ آءِ وي جي تصديق ٿي آهي.