تازيون خبرون
آخري دم تائين وڙهنداسين، مودي ياد رک سر جو جواب پٿر سان ڏينداسين: عمران خان - “آرٽيڪل 149” جو پڙاڏو: پ پ جو وفاقي سرڪار کان استعيفيٰ ۽ نئين سر چونڊن جو مطالبو - سنڌو ديش ڳالهه مناسب ناهي، صوبائي خودمختياري تي يقين رکون ٿا: شاهه محمود - آفيسر شاهي هلڻ نه ڏبي، عهدن تي ويٺل ماڻهن جي اڪثيريت عوام جي خدمت نٿي ڪري: سپريم ڪورٽ - اسان کي هر محاذ تي سفارتي ڪاميابي ۽ ڀارت کي شڪست ٿي رهي آهي: فردوس عاشق اعواڻ - مهاجرن جو قرض اسان کي نه وسارڻ گهرجي (اسد عمر) سڀ کان پهرين بنگال ۽ سنڌ ٺهراءُ پاس ڪيا: خورشيد شاهه - ڪشمير جو مسئلو حل ڪرڻ کان سواءِ ڳالهيون نٿيون ٿي سگهن، ٽيبل هيٺان ڪشميرين جو سمجهوتو ناهي ٿيڻ وارو: شيخ رشيد - بلاول ڀٽو زرداري جي بيان مان ملڪ دشمني ڪڍي ڏيکاريو: پيپلز پارٽي جو حڪومتي ميمبرن کي چئلينج - ڪراچي ۾ ٻوريون وجهي سيوريج لائيون ۽ گٽر بند ڪندڙن جي ڳولا جي ذميواري رينجرز حوالي - آزاد ڪشمير تي قبضي لاءِ مڪمل تيار آهيون، آخري فيصلو حڪومت ڪندي: ڀارتي آرمي چيف پاران ڌمڪي

Daily Archives: June 17, 2019

بلاول ڀٽو ۽ شهباز شريف جون مولانا فضل الرحمان سان ملاقاتون، حڪومت مخالف تحريڪ تي اتفاق

اسلام آباد(بيورو رپورٽ) پ پ چيئرمين بلاول ڀٽو ۽ اپوزيشن ليڊر شهباز شريف جون مولانا فضل الرحمان سان ڌار ڌار ملاقاتون، حڪومت مخالف تحريڪ ۽ اي پي سي بابت خيالن جي ڏي وٺ ڪئي وئي. اپوزيشن ليڊر شهبازشريف اسلام آباد ۾ جي يو آءِ سربراهه مولانا فضل الرحمان سان ملاقات ڪئي، جنهن دوران نئين پيش ڪيل بجيٽ، حڪومت مخالف تحريڪ، ۽ اي پي سي بابت صلاح مشورا ڪيا ويا، ان کان اڳ پ پ چيئرمين بلاول ڀٽو زرداري به مولانا فضل الرحمان سان ملاقات ڪئي، جنهن دوران نئين بجيٽ کي آءِ ايم ايف جي بجيٽ ۽ عوام دشمن بجيٽ قرار ڏيندي فيصلو ڪيو ويو ته بجيٽ منظور ٿيڻ نه ڏينداسين. ملاقات بعد ميڊيا سان ڳالهائيندي بلاول ڀٽو چيو ته بجيٽ پاڪستان ناهي ٺاهي، ٻاهران ٺاهي آندي وئي آهي. جيڪا آءِ ايم ايف جي حڪم تي ٺاهي وئي. اسان کي گڏجي نئين بجيٽ جي مخالت ڪرڻ گهرجي، ملڪ دشمن بجيٽ کي منظور ٿيڻ نه ڏينداسين، بلاول ڀٽو چيو ته پارليامينٽ کي پنهنجو آئيني مدو پورو ڪرڻ گهرجي. هن چيو ته پ پ ۽ جي يو آءِ ف جو پنهنجو پنهنجو نظريو آهي، ٻنهي جماعتن گڏجي آئين ٺاهيو، پرويز مشرف خلاف به گڏجي جدوجهد ڪئي. هاڻي ڪٺ پتيلن خلاف گڏجي جدوجهد ڪنداسين. بلاول چيو ته اڄ نئين پاڪستان مان جمهوريت کي نقصان پهچي رهيو آهي. ان موقعي تي جي يو آءِ سربراهه مولانا فضل الرحمان چيو ته اي پي سي جون جي آخري ڏهن ڏينهن دوران سڏائينداسين، اتفاق ٿيو آهي ته جيڪو اي پي سي ۾ طئي ٿيندو، ان تي عمل ڪنداسين، هن چيو ته هي دور معاشي غلامي جو دور آهي، نئين بجيٽ پاڪستان جي نه، آءِ ايم ايف جي بجيٽ آهي، آءِ ايم ايف جي نمائندي هتي اچي بجيٽ ٺاهي، جيڪا ملڪ دشمن ۽ عوام دشمن بجيٽ آهي، مولانا فضل الرحمان چيو ته ڊالر 157 رپين تائين پهتو آهي، ٻڌايو ته غريب ڪيڏنهن ويندو؟ نئين بجيٽ بعد عوام بجلي ۽ گئس جا بل ڀرڻ جي قابل به ناهي رهيو. موجوده حڪومت ملڪ جو ٻيڙو ٻوڙي ڇڏيو آهي.

 

آصف زرداري جا پروڊڪشن آرڊر جاري نه ٿيڻ خلاف پ پ جو اسپيڪر آفيسر ٻاهران ڌرڻو

اسلام آباد(ويب ڊيسڪ) پاڪستان پيپلز پارٽي جي شريڪ چيئرمين ۽ اڳوڻي صدر آصف علي زرداري جا پروڊڪشن آرڊر جاري نه ٿيڻ تي پيپلز پارٽ جي اسيمبلي ميمبرن اسپيڪر آفيسر جي ٻاهران ڌرڻو هڻي ڇڏيو. پيپلز پارٽي جي ميمبرن ان موقعي تي قومي اسيمبلي جي اسپيڪر اسد قيصر کي ايوان ۾ وڃڻ کان روڪيو. ڌرڻي ۾ شرڪت ڪندڙن طرفان حڪومت جي خلاف نعريبازي ڪئي وئي، ان دوران بلاول ڀٽو زرداري، راجا پرويز اشرف، خورشيد شاهه ۽ شيري رحمان سميت ٻيا اڳواڻ موجود هئا. خيال رهي ته قومي اسيمبلي ۾ بجيٽ سيشن جو آغاز اڄ منجهد 4 وڳي ٿيڻو هو پر پيپلز پارٽي جي ميمبرن جي احتجاج جي ڪري دير جو شڪار ٿي ويو، پر بعد ۾ اجلاس جي ڪارروائي شروع ٿي پر ميمبرن طرفان شور شرابي جي ڪري اجلاس سڀاڻي (سومر) تائين ملتوي ڪيو ويو هو. ان کان اڳ قومي اسيمبلي جي اسپيڪر سان پيپلز پارٽي جي اڳواڻن راجا پرويز اشرف ۽ خورشيد شاهه به ملاقات ڪئي هئي. پر پيپلز پارٽي قومي اسيمبلي جي اسپيڪر جي رويي کان مايوس ٿي هئي ۽ پ پ پ اڳواڻن کي آصف زرداري جي پروڊڪشن آرڊر جاري بابت مثبت جواب نه ملي سگهيو هو. ذريعن ٻڌايو ته پيپلز پارٽي طرفان اسپيڪر کي پروڊڪشن آرڊر جاري ڪرڻ جي درخواست ڪئي وئي هئي پر آصف زرداري جا پروڊڪشن آرڊر اڄ به جاري نه ٿيڻ جا امڪان ناهن. جنهن کان پوءِ پارليامينٽ ۾ پاڪستان پيپلز پارٽي جو ڳالهين وارو اجلاس ٿيو جنهن ۾ پيپلز پارٽي جو اسپيڪر قومي اسيمبلي جي سامهون ڀرپور احتجاج ريڪارڊ ڪرائڻ جو فيصلو ڪيو هو. ذريعن موجب اجلاس ۾ احتجاج ريڪارڊ ڪرائڻ واري حڪمت عملي تي غور ڪيو ويو هو، ڳالهين واري اجلاس ۾ خورشيد شاهه، شيري رحمان ۽ سينيٽ ۽ قومي اسيمبلي جا ٻيا ميمبر شريڪ هئا. پ پ پ اڳواڻ خورشيد شاهه چيو ته ملڪ جو وزير اعظم پارليامينٽ جي تقدس کي قبولڻ لاءِ تيار ناهي. هن چيو ته پارليامينٽ ته اسپيڪر جي هٿ ۾ ناهي، اسپيڪر ته کليل نموني دٻاءَ جي ڳالهه ڪري رهيو آهي. خورشيد شاهه چيو ته اهڙي صورتحال پهريون ڀيرو ڏسي رهيو آهيان، چوڌري امير حسين به ايترو ڪمزور اسپيڪر نه هيو. پيپلز پارٽي جي اڳواڻ چيو ته اسپيڪر تي وزير اعظم جو دٻاءُ آهي، وزير اعظم تي ڪنهن جو دٻاءُ آهي ڪجهه چئي نٿا سگهون. هوڏانهن شيري رحمان ميڊيا سان ڳالهائيندي چيو ته پروڊڪشن آرڊر جاري ڪرڻ بابت رولز موجود آهن، آصف زرداري جي پروڊڪشن آرڊرن بابت قانون واري وزارت کان راءِ گهرڻ جو چيو پيو وڃي. هن چيو ته آصف زرداري جي پروڊڪشن بابت قانون واري وزارت کان راءِ وٺڻ جي ضرورت ئي ناهي، ان حوالي سان رول 90 موجود آهي.

 

بلٽ پروف گاڏين جو ڪيس انڪوائري مان انويسٽيگيشن ۾ تبديل

اسلام آباد ( ويب ڊيسڪ )  اڳوڻي وزيراعظم نواز شريف ۽ شاهد خاقان عباسي جي ڏکيائين ۾ اضافو ٿي ويو آهي، نيب بلٽ پروف گاڏين جي ڪيس ۾ انڪوائري کي انويسٽيگيشن ۾ تبديل ڪرڻ جي منظوري ڏئي ڇڏي.  نيب چيئرمين جاويد اقبال جي صدارت هيٺ ايگزيڪيوٽو ڪميٽي جو اجلاس ٿيو اجلاس ۾ ڊپٽي چيئرمين نيب سميت ٻين آفيسرن شرڪت ڪئي.  نيب جي ايگزيڪيوٽو بورڊ اجلاس ۾ بلٽ پروف گاڏين جي ڪيس ۾ انڪوائري کي انويسٽيگيشن ۾ تبديل ڪرڻ جي منظوري ڏئي ڇڏي آهي. ڪيس ۾ گهرو وزارت ۽ اسٽبيلشمينٽ جا آفيسر بيان قلمبند ڪرائي چڪا آهن جڏهن ته نواز شريف، شاهد خاقان عباسي ۽ فواد حسن فواد جو بيان ورتو ويو آهي.  اجلاس ۾ مختلف ريفرنسن، انويسٽي گيشن ۽ انڪوائري جي منظوري ڏني ويندي.آصف علي زرداري خلاف پارڪ لين ڪيس ۾ ضمني ريفرنس سميت مختلف انويسٽيگيشن ۽ انڪوائري جي منظوري به غور هيٺ آهي. نيب چيئرمين چيو ته ڦريل 326 ارب رپيه جي رقم اوڳاڙي ويندي.

 

بدقسمتيءَ سان سنڌ حڪومت ۾ سمورا بيڪار ماڻهو ويٺا آهن: سُپريم ڪورٽ

ڪراچي (اسٽاف رپورٽر) سُپريم ڪورٽ پوليس ۾ ڀرتين جي حوالي سان درخواستون رد ڪندي ريمارڪس ڏنا آهن ته بدقسمتيءَ سان سنڌ حڪومت ۾ سمورا بيڪار ماڻهو ويٺا آهن. سُپريم ڪورٽ ڪراچي رجسٽري ۾ لاڙڪاڻو ريجن جي پوليس ۾ ڀرتين واري معاملي تي ٻڌڻي ٿي، عدالت ڀرتين جي حوالي سان سموريون درخواستون رد ڪري ڇڏيون. درخواست ۾ موقف اختيار ڪيو ويو هو ته 1996ع ۾ اي ايس آءِ طور ڀرتين لاءِ لکت ۾ ٽيسٽ پاس ڪئي وئي هئي، پر زباني امتحان ۾ کين فيل ڪيو ويو. ٻڌڻيءَ دوران ريمارڪس ڏيندي جسٽس سجاد علي شاهه چيو ته هاڻ 24 سالن کانپوءِ توهان کي ڪيئن بحال ڪريون، اُن وقت جيڪي ڀرتي ٿيا هئا، اُهي هاڻ رٽائرمينٽ جي ويجهو هوندا. درخواستگذارن جي وڪيل دليل ڏيندي چيو ته اُن ۾ سندسن ڪهڙو ڏوهه آهي، سرڪاري آفيسرز اِن حد تائين پهچايو. جسٽس سجاد علي شاهه ريمارڪس ڏيندي چيو ته بدقسمتي سان سنڌ حڪومت ۾ سڀ بيڪار ماڻهو آهن.

 

هاڻوڪي حڪومت جي اڻٿڪ ڪوششن سبب دنيا پاڪستان کي انتهائي اهم ملڪ جي حيثيت سان ڏسي رهي آهي: عمران خان

اسلام آباد ( ويب ڊيسڪ ) وزيراعظم عمران خان چيو آهي ته اڄ جو پاڪستان اسٽريٽيجڪ ۽ سيڙپڪاري جي موقعن سان ڀرپور آهي. وزيراعظم عمران خان سان پي ٽي آءِ جي سينيٽرن وزيراعظم جي چيمبر ۾ ملاقات ڪئي جنهن ۾ سينيٽر شبلي فراز، خاص مددگار نعيم الحق، سينيٽر فيصل جاويد به موجود هئا. وزيراعظم ۽ سينيٽرن جي ملاقات ۾ سينيٽ ۽ پارلياماني ۽ قانونسازي بابت مختلف معاملن خاص طور بجيٽ تجويزن وارن معاملن تي ڳالهه ٻولهه ڪئي. وزيراعظم مٿين ايوان جي معاملن ۾ ميمبرن جي ڪردار بابت پنهنجي ويزن کان آگاهه ڪيو . ان موقعي تي ڳالهائيندي وزيراعظم عمران خان چيو ته عوام پارليامنٽيرينز کي پنهنجن حقن ۽ امنگن جي ترجمان جي حيثيت ۾ ڏسون ٿا ۽ ميمبر جڏهن عوام جو آواز بڻجندا آهن ته عوام جي حوصلا افزائي ٿيندي آهي. وزيراعظم جو چوڻ هوته هاڻوڪي حڪومت جي اڻٿڪ ڪوششن سبب دنيا پاڪستان کي انتهائي اهم ملڪ جي حيثيت سان ڏسي رهي آهي، اڄ جو پاڪستان اسٽريٽيجڪ ۽ سيڙپڪاري جي موقعن سان ڀرپور آهي، انشاءَ الله جلد اسان جو ملڪ ترقي ۽ خوشحالي ماڻيندو.

 

شهباز شريف جي خاندان جي مبينا فرنٽ مين مشتاق چيني شريف خاندان لاءِ مني لانڊرنگ جو اعتراف ڪري ورتو

لاهور (ويب ڊيسڪ) شهباز شريف جي خاندان جي مبينا فرنٽ مين مشتاق چيني شريف خاندان لاءِ مني لانڊرنگ جو اعتراف ڪري ورتو ۽ نيب جي جاچ ٽيم ان اڳڀرائي کي وڏي ڪاميابي قرار ڏنو آهي. مشتاق چيني ۽ سندس پٽ ياسر چيني احتساب عدالت ۾ پنهنجو بيان لکت ۾ رڪارڊ ڪرائي اهم انڪشاف ڪندي چيو ته هنن سلمان شهباز جي 69 ڪروڙن  کان وڌيڪ رقم جي مني لانڊرنگ ڪئي، ان ڪم لاءِ ٻنهي جا بينڪ اڪائونٽ استعمال ڪيا ويا. مشتاق چيني انڪشاف ڪيو ته شريف ڪٽنب جي ڪمپنين جي فنانشل چيف آفيسر محمد عثمان سان ملاقات ٿي، عثمان چيو ته سلمان شهباز جا 69 ڪروڙ رپيا وائٽ ڪرڻا آهن، آئون انڪار ڪيو ته اها منهنجي وس جي ڳالهه ناهي، جنهن تي عثمان چيو ته اسان رڳو توهان جا بينڪ اڪائونٽ استعمال ڪرڻ چاهيون ٿا، جن ذريعي ٽي ٽي لڳرائڻي آهي، آئون پراڻن واسطن ۽ پئسو وائٽ ٿيڻ جي لالچ سبب اجازت ڏئي ڇڏي، چيف منسٽر جو پٽ ۽ وزيراعظم جو  ڀائٽيو هجڻ ڪري انڪار به نه ڪري سگھيس. مشتاق چيني ٻڌايو ته 2014ع ۾ منهنجي اڪائونٽ مان 21 ڪروڙ 40 لکن جي ٽي ٽي لڳرائي وئي، رقم منهنجي اڪائونٽ ۾ ايندي هئي ۽ آئون سلمان شهباز جي نالي چيڪ ڪاٽي محمد عثمان کي ڏيندو هيس، 2014ع ۾ وري 29 ڪروڙ 30 لکن جي رقم تي ٽي ٽي لڳرائي وئي، جن ماڻهن جي نالن سان ٽي ٽي لڳرائي وئي، آئون انهن کي نٿو سڃاڻان، محمد عثمان ايتري رقم جي برابر چيڪ مون کي ڪاٽي ڏئي ڇڏيا، آئون لاڳاپيل ڪاغذن ۽ دستاويزن تي پنهنجون صحيحون ڪيون، 50 ڪروڙن کان وڌيڪ رقم جعلي ۽ فرضي اڪائونٽن ذريعي منهنجي اڪائونٽ ۾ منتقل ڪئي وئي. هن چيو ته سلمان شهباز جي وقار ٽريننگ ڪمپني جيڪا طاهر نقوي شخص جي نالي سان ٻڌائي وئي هئي، ان ڪمپني مان منهنجي اڪائونٽ ۾ 10 ڪروڙ رپين جي رقم چيڪ ذريعي آئي، سلمان شهباز ان سڄي ٽرانزيڪشن کي قانوني ثابت ڪرڻ لاءِ 2 مفروضي معاهدا ڪيا، هڪ ۾ منهنجو نالو، ٻئي ۾ منهنجي پٽ ياسر مشتاق جو نالو لکيو ويو، معاهدي ۾ اها رقم قرض طور ظاهر ڪئي وئي، معاهدن جون نقل ڪاپيون نيب کي فراهم ڪيون ويون آهن. سندس چوڻ هو ته مفروضي قرضن کي حقيقي رنگ ڏيڻ لاءِ سلمان شهباز پنهنجي جعلي ڪمپني ذريعي رقم منهنجي اڪائونٽ ۾ به منتقل ڪرائي، آئو ن ڪاروبار ۽ پئسا وائٽ ٿيڻ جي لالچ ۾ اهو ڪم ڪندو رهيس، مون کي پنهنجي ڏوهه جو احساس اهي، مون کي معافي ڏني وڃي.

 

وزيراعظم جي خطاب ۾ خلل منهنجي ناڪامي آهي، مخالف ڌر بجيٽ تي سياست ڪري آئين جو رستو پئي روڪي: فردوس عاشق

اسلام آباد (ويب ڊيسڪ) اطلاعات بابت خاص مددگار فردوس عاشق اعواڻ چيو آهي ته وزيراعظم جي خطاب ۾ خلل منهنجي ناڪامي آهي ۽ اسان ته ان رات وزيراعظم جو خطاب نه هلائڻ پئي چاهيو. اسلام آباد ۾ جاويد لطيف جي صدارت هيٺ اطلاعات ۽ نشريات بابت قومي اسيمبلي جي اسٽينڊنگ ڪميٽي جو اجلاس ٿيو، جنهن ۾ فردوس عاشق اعواڻ به شرڪت ڪئي. ڪميٽي چيئرمين جاويد لطيف چيو ٻڌايو وڃي ته وزيراعظم جي خطاب کي ڇا پيمرا سينسر ڪيو يا ٽيڪنيڪل مسئلو هو، وزيراعظم اصحابن جي باري ۾ جيڪو چيو، پيمرا کي اهو سينسر ڪرڻ گهرجي ها، عمران خان کي اها ڳالهه نه ڪرڻ گهرجي ها جنهن سان ماڻهن کي تڪليف پهچي. سيد امين الحق چيو ته وزيراعظم خطاب ۾ جيڪا ديني ڳالهه ڪئي ان کي نظرانداز ڪيو ويو، اسان کي مذهبي انتهاپسندي کان انڪار ڪرڻو پوندو، وزيراعظم جي تقرير ۾ خلل برداشت جوڳو ناهي، خلل جي ذميوارن کي منهن ڏنو وڃي. فردوس عاشق اعواڻ جواب ڏنو ته شروع ۾ وزيراعظم جو ارادو رڳو پبلڪ سروس ميسيج رڪارڊ ڪرائڻ جو هو، جڏهن رڪارڊنگ شروع ٿي ته وزيراعظم چيو ڪجهه ٻيا به مسئلا آهن، جن تي ڳالهائيندس، اسان سوچيو ته وزيراعظم وڌ کان وڌ ست منٽ ڳالهائيندو ۽ ايڊيٽنگ کان ٽن منٽن جو پيغام ٿي ويندو پر وزيراعظم 38 منٽ رڪارڊنگ ڪرائي، جيڪا ايڇ ڊي تي هئي، وزيراعظم جي خطاب ۾ خلل ٽيڪنالاجي جو مس ميچ (فرق) هو، پي ٽي وي ايڇ ڊي تي ناهي تنهن ڪري اهو خلل آيو، وزيراعظم جي خطاب ۾ خلل منهنجي ناڪامي هئي، مون کي اسٽينڊ وٺڻ گهرجي ها ته رڪارڊنگ پي ٽي وي کان ڪرائي وڃي. هن چيو ته اسان وزيراعظم جي تقرير ان ڳالهه نه پئي هلائڻ چاهي، اسان ميڊيا تي نه ڏنو هو ته وزيراعظم جو خطاب سوا نائين وڳي هلندو پر جڏهن ٽي وي تي هليو ته وزيراعظم سوا نائين وڳي خطاب ڪندو ته وزيراعظم چيو خطاب اڄ ئي نشر ڪيو وڃي، نه ته اسان رات جي اونداهي ۾ وزيراعظم جو خطاب نه هلايون ها. سندس چوڻ هو ته وزيراعظم جيڪا ديني ڳالهه ڪئي ان ۾ هو لفظن جي صحيح چونڊ نه ڪري سگهيو، اها ڳالهه قرآن ۽ حديث کان ٻاهر نه هئي، لفظن جي چونڊ ۾ غلطي ٿي سگهي ٿي، ان حوالي سان گهڻيون ڳالهيون نه ڪرڻ گهرجن. ڪميٽي چيئرمين چيو اسان کي وزيراعظم جي نيت تي شڪ ناهي، دين جي حوالي سان جيڪڏهن ڄاڻ گهٽ هجي ته ان تي ڳالهائجي ئي نه. جاويد لطيف چيو ٻڌايو وڃي ته ڪيبل آپريٽرز وٽ ڪهڙا حق آهن جو چئنلن جا نمبر اڳتي پوئتي ڪن، ڪنهن قانون تحت نمبر اڳتي پوئتي ڪيا ويندا آهن، ايندڙ گڏجاڻي ۾ سمورين صحافتي تنظيمن جي نمائندن کي گهرائي رهيا آهيون، ميڊيا ڪنٽرول ڪرڻ جو به ڳالهيون هلي رهيون آهن، ڪٿي ڪير ميڊيا بحران جو فائدو ته ناهي کڻي رهيو، ميڊيا ورڪرن کي تحفظ ملڻ گهرجي، حڪومت ايندڙ ميٽنگ ۾ رپورٽ پيش ڪري، فواد چوڌري جيڪو سميع ابراهيم سان ڪيو، ڪميٽي ان جي مذمت ڪري ٿي. فردوس عاشق اعواڻ چيو ته وزيراعظم سميع ابراهيم کي فون ڪئي ۽ مذمت به ڪئي، وزيراعظم فواد چوڌري کي گهرايو آهي، توهان کي خبر آهي ته جڏهن ليڊر گهرائيندو آهي ته ڇا ٿيندو آهي.

بئي طرف   سڌ سماءَ واري خاص مددگار فردوس عاشق اعواڻ چيو آهي ته مخالف ڌر بجيٽ تي سياست ڪري آئين جو رستو روڪي رهي آهي. ٽوئٽر تي بيان جاري ڪندي فردوس عاشق اعواڻ چيو ته بجيٽ پاڪستان ۽ عوام لاءِ آهي، بجيٽ جي منظوري آئيني گهرج ۽ ملڪي ضرورت آهي، اپوزيشن ان تي سياست ڪري آئين جو رستو روڪي رهي آهي. هن چيو ته ملڪي گورننس ۽ ادارن جي ورڪنگ بجيٽ جي منظوري سان جڙيل آهي، پارليامينٽ جو هلڻ ۽ اپوزيشن جي پگهارن سان به بجيٽ جي منظوري ايندي آهي، ملڪي معيشت جو ٻيڙو ٻوڙيندڙ بجيٽ جو رستو روڪي ڇا عوام کي وڌيڪ تباهه ڪرڻ چاهين ٿا.

 

حڪومتن جي ناقص پاليسي ۽ مبينه ڪرپشن ڪراچي ۾ پاڻي جو بحران وڌي ويو، 100 بجاءِ رڳو 58 ڪروڙ گيلن پاڻي ميسر

ڪراچي (اين اين آءِ) حڪومت جي ڪمزور ۽ ناقص پاليسي ۽ مبينه ڪرپشن سبب ڪراچي ۾ پاڻي جو بحران وڌي ويو آهي ڪراچي کي روزانو بنيادن تي اٽڪل 100 ڪروڙگيلن پاڻي جي ضرورت آهي پر رڳو 58 ڪروڙ گيلن پاڻي ميسر آهي واٽر بورڊ جي انگن اکرن مطابق 45 ڪروڙ گيلن پاڻي ڌاٻيجي، 3 ڪروڙ گيلن گهارو ۽ 10 ڪروڙ گيلن حب ڊيم مان فراهم ڪيو پيو وڃي شهر کي حب ڊيم مان سپلاءِ اٽڪل چئن سالن کان پوءِ بحال ٿي آهي ماهرن موجب شهر ۾ پاڻي جو بحران هڪ ٻيو وڏو سبب واٽر بورڊ جي لائينن مان ضايع ٿيندڙ پاڻي به آهي خود واٽر بورڊ جي انگن اکرن مطابق اٽڪل 17 ڪروڙ گيلن پاڻي ضايع ٿئي ٿو واٽر بورڊ جي انگن اکرن مطابق شهرين کي رڳو 40 ڪروڙ گيلن پاڻي ئي ملي ٿو ماهرن موجب ڪراچي ۾ پاڻي جي بحران جي سڀ کان وڏو سبب ڪي فور پروجيڪٽ جو التوا به آهي، 26 ڪروڙ گيلن جو هي منصوبو 2016 ۾ شروع ٿيو ۽ ان کي جون 2018 ۾ مڪمل ٿيڻو هو پر ذريعا چون ٿا ته ڪي فور مڪمل ٿيڻ ۾ وڌيڪ 3 کان 4 سال لڳي سگهن ٿا سعيد غني تسليم ڪيو ته ڪراچي ۾ جتي پاڻي جي ضرورت آهي ايترو پاڻي فراهم ڪرڻ ۾ اڃا تائين ڪامياب نه ٿيا آهيون. هن چيو ته ڪراچي جي شهرين کي پاڻي فراهم ڪرڻ لاءِ سنڌ حڪومت قدم کڻي رهي آهي هن الزام مڙهيو ته ڇا ڪراچي جي هڪ جماعت جا ماڻهو به ڪراچي جي شهرين کي بنيادي سهولتون فراهم ڪرڻ ۾ رنڊڪ وجهن ٿا هن چيو ته ايم ڪيو ايم جا ماڻهو نه رڳو پاڻي جي پائيپن ۾ بجري جون ٻوريون وجهن ٿا پر پاڻي جي نيڪال جي حوالي سان به انهن جي ساڳي روش آهي ڪراچي جي شهرين کي ڏسڻو پوندو ته ڪير انهن جا مسئلا حل ڪرڻ جي ڪوشش ڪري رهيو آهي ۽ ڪير رنڊڪون ري رهيو آهي ٻئي پاسي خرم شيرزمان چيو ته ڪراچي ۾ پاڻي جي غير منصفاڻي ورڇ جي زميوار واٽر بورڊ ۽ سنڌ حڪومت آهي شهرين جو جيڪڏهن پاڻي جو مسئلو حل نه ٿيو ته وزراعليٰ هائوس ٻاهران ۽ پوءِ بلاول هائوس تي احتجاج ڪنداسين هن چيو ته پاڻي جو نظام بهتر ڪرڻ لاءِ وفاقي حڪومت واٽر بورڊ جي مدد ڪرڻ لاءِ تيارآهي جيڪڏهن واٽر بورڊ ڪم نه ڪندو ته صوبائي اسيمبلي ميمبرن کي ڪم پنهنجي هٿ ۾ کڻڻو پوندو خرم شيرزمان چيو ته سنڌ صوبي ۾ جيستائين ڪرپشن ختم نه ٿيندي اهڙي قسم جا مسئلا ايندا رهندا.

 

ڪراچي ۾ ٽارگيٽ ڪلنگ، اورنگي ٽائون ۾ ٻه پوليس اهلڪار شهيد

ڪراچي( ويب ڊيسڪ ) ڪراچيءَ جي علائقي اورنگي ٽائون ۾ هٿياربندن جي فائرنگ جي نتيجي ۾ ٻه پوليس اهلڪار شهيد ٿي ويا. ڪراچيءَ جي علائقي اورنگي ٽائون ۾ موٽرسائيڪل سوار هٿياربندن ٻن پوليس اهلڪارن تي فائرنگ ڪري ڏني.  هٿياربندن جي فائرنگ جي نتيجي ۾ ٻئي اهلڪار موقعي تي ئي مارجي ويا جڏهن ته هٿياربند ڀڄي ويا. واقعي جو اطلاع ملندي ئي امدادي ڪارڪن ۽ پوليس جي وڏي نفري واقعي واري هنڌ پهچي وئي ۽ لاشن کي اسپتال منتقل ڪري شاهديون گڏ ڪيون. ايس ايڇ او مومن آباد موجب سادا ڪپڙا پهريل اهلڪار هڪ ئي موٽرسائيڪل تي سوار هئا. اکين ڏٺن شاهدن موجب نوري چوڪ تي اسپيڊ بريڪر سبب موٽرسائيڪل آهستي ٿي ته موٽرسائيڪل تي سوار ٻنهي هٿياربندن نائن ايم ايم پسٽل تي ٻنهي پوليس جوانن تي فائرنگ ڪئي. ٻئي طرف ڪراچي پوليس چيف ڊاڪٽر امير شيخ ايس ايس پي ويسٽ کان واقعي جي رپورٽ طلب ڪئي آهي. حملو ڪندڙن جي ڀڄڻ جا سي سي ٽي وي فوٽيجز منظر تي اچي ويا آهن جنهن ۾ ٻنهي موٽرسائيڪل سوارن کي فائرنگ کانپوءِ ڀڄندي ڏسي سگهجي ٿو. فوٽيجز ۾ ڏسي سگهجي ٿو ته ٻن موٽرسائيڪلن تي سوار چئن جوابدارن فائرنگ ڪئي ۽ ڀڄي ويا ۽ ٻن جوابدارن پي ڪيپ ۽ هڪ هيلمٽ پهري رکي آهي.

 

 

پاڪستان ۾ رڳو 48 سيڪڙو مائرون پنهنجي ٻارن کي کير پيئارين ٿيون: وفاقي سرڪار جي سهڪار سان ٿيل سروي ۾ انڪشاف

لنڊن (بي بي سي رپورٽ) وفاقي سرڪار جي سهڪار سان ٿيل سروي ۾ انڪشاف ڪيو ويو آهي ته پاڪستان ۾ رڳو 48 سيڪڙو مائرون پنهنجي ٻارن کي کير پيئارين ٿيون. وفاقي حڪومت جي سهڪار سان ٿيل قومي نيوٽريشن سروي جي رپورٽ ۾ انڪشاف ڪيو ويو آهي ته پاڪستان ۾ رڳو 48 سيڪڙو مائرون پنهنجي ٻارن کي کير پيئارين ٿيون، شهرن ۽ ٻهراڙي وارن علائقن ۾ اها شرح هڪجيتري آهي. اهڙي سروي سنڌ، پنجاب، ڪي پي، اسلام آباد، فاٽا ۽ ڪشمير توڙي گلت بلتستان ۾ ڪئي وئي. سروي ۾ 15 هزار گهرن جي ٻارن، سندن مائرن ۽ 10 کان 19 سالن جي ڇوڪرن توڙي ڇوڪرين جي نيوٽريشن (غذا) جي ڀيٽ ڪئي وئي.رپورٽ ۾ انڪشاف ڪيو ويو آهي ته 48 سيڪڙو مائرون 5 مهينن تائين پنهنجي ٻارن کي مڪمل طور کير پيئارينديون آهن، جڏهن ته 15 سيڪڙو مائرون زبردستي ۽ 17 سيڪڙو جُزوي (نالي ماتر) پنهنجو کير پيئارين ٿيون، اُن کانسواءِ 20 سيڪڙو مائرون ته پنهنجي ٻارن کي شروع کان ئي کير نٿيون پيئارين. سروي ۾ ٻڌايو ويو آهي ته 45 سيڪڙو عورتون ٻار جي پيدا ٿيڻ کان هڪ ڪلاڪ اندر، جڏهن ته 25 سيڪڙو مائرون 24 ڪلاڪن ۾ ٻار کي پنهنجو کير پيئارينديون آهن. سروي رپورٽ ۾ چيو ويو آهي ته مائرن طرفان ٻارن کي پيدائش کان هڪ سال تائين کير پيئارڻ جو رجحان ملڪ ۾ سڀ کان وڌيڪ سنڌ صوبي ۾ آهي، جتي اُها شرح 77 سيڪڙو آهي، جڏهن ته پنجاب ۾ اهڙين مائرن جي شرح 62 سيڪڙو آهي. اُن کانسواءِ ڪي پي ۾ اها شرح 74، بلوچستان ۾ 69، اسلام آباد ۾ 74، فاٽا ۾ 71، آزاد ڪشمير ۾ 65 ۽ گلت بلتستان ۾ 72 سيڪڙو شرح آهي. سروي رپورٽ جي سربراهه جو چوڻ هو ته پنج مان هڪ ڪُٽنب ۾ ماءُ تازي ڄاول ٻار کي ته پنهنجو کير پيئاريندي ئي ناهي، اهو رجحان رڳو شهري نه پر ٻهراڙي وارن علائقن ۾ به ڏٺو ويو آهي. اُن حوالي سان ماڻهن ۾ شعور اُجاڳر ڪرڻ جي ضرورت آهي.