تازيون خبرون

Daily Archives: June 13, 2019

چورن ۽ لُٽيرن کي پنهنجي عملن جو حساب ڏيڻو پوندو: فردوس عاشق اعواڻ

اسلام آباد (ويب ڊيسڪ) اطلاعات بابت وزيراعظم جي خاص مددگار فردوس عاشق اعواڻ چيو آهي ته بجيٽ عوامي امنگن جي ترجماني ڪندي آهي ۽ وزيراعظم هن بجيٽ ۾ جيڪي ترجيحون طئي ڪيون آهن اهي ايندڙ نسل ۽ ملڪ کي اڳتي وٺي وڃڻ لاءِ آهن پر ڪجهه ڪوڙيون گوريون ضرور آهن. اسلام آباد ۾ وفاقي وزيرن سان گڏ پريس ڪانفرنس ڪندي فردوس عاشق اعواڻ چيو ته اسان چاهيون ٿا انهن ڪوڙين گورين کي توهان ”شوگر ڪوٽڊ“ ڪري ڳِهي وڃو ته جيئن ڪوڙائپ محسوس نه ٿئي ۽ آرام ضرور ايندو، مون کي اميد آهي ته هيءَ بجيٽ نيٺ توهان کي تڪليف مان آرام ڏيارڻ لاءِ اهڙي دوا جو ڪم ڪندي جيڪا ڳِهندي ڪوڙائپ محسوس ٿيندي پر پوءِ هر قسم جي تڪليف مان ڇوٽڪارو ملي ويندو، اهي گوريون معيشت سان جڙيل تڪليفن لاءِ آهن، سياست لاءِ گوريون الڳ آهن. هن چيو ته ڪالهه هڪ راج ڪماري نوڪرياڻين جي ميڙ ۾ جهڙي لهجي ۾ ڳالهايو، سندس تڪبر ۽ غرور اهو اشارو ڏئي رهيو هو ته شريف خاندان عبرت جو نشان بڻجي به ڪو سبق ناهي سکيو، اهو عبرت جو نشان آهي ته 3 ڀيرا ملڪ جو وزيراعظم رهندڙ پاناما جي ڪرپشن ۽ ڦرلٽ جي ڪهاڻين جو شڪار ٿيو، 22 ڪروڙ عوام کي اها خبر پاناما ذريعي پئي ته ملڪ جو سربراهه ڪرپشن ۾ ملوث رهي ٻاهر پنهنجي خاندان جون ملڪيتون ٺاهڻ ۾ مصروف رهيو. سندس چوڻ هو ته اهي ماڻهو سرڪاري فنڊ مان 70 ڪروڙ رپين جي چارديواري ٺاهرائيندا هئا پر ڪير پڇڻ وارو نه هو، وزيراعظم جو جهاز شهباز شريف استعمال ڪندو هو پر ڪير پڇڻ وارو نه هو، مريم نواز جا ڀائر هر قسم جو عيش، آرام ۽ ڪاروباري سودا ڪندا هئا ڪير کانئن پڇڻ وارو نه هو پر جهڙي ڪرڻي تهڙي ڀرڻي، اڄ نواز شريف جيل ۾ آهي. فردوس عاشق اعواڻ چيو ته نواز شريف مني لانڊرنگ ڪري مختلف ملڪن ۾ پنهنجي ٻارن کي فائدو پهچائيندو رهيو ۽ اڄ سندس ٻئي پٽ فخر سان چون ٿا ته اسان پاڪستاني شهري ناهيون، هو پاڪستاني شهري نه هجڻ جو اعلان ٿا ڪن، ن ليگ وارا نواز شريف سان جيل ۾ ملي ائين ڳالهائيندا آهن، ڄڻ جيل ڪو مقدس هنڌ هجي.  هن مريم نواز کي مخالف ٿيندي چيو ته توهان پنهنجي اوقات ۾ رهو ۽ جيڪڏهن پنهنجو لهجو درست نه ڪيو ته گهڻو ڪجهه چوڻ لاءِ موجود آهي پر عمران خان چوندو آهي ته معاشري جا سماجي، مذهبي ۽ ثقافتي قدر آهن، جن کي برقرار رکڻو آهي. سندس چوڻ هو ته وزيراعظم طرفان اعلانيل ڪميشن جي سربراهه جو اعلان ايندڙ هفتي ڪيو ويندو ۽ ان جي ضابطي ڪار کي حتمي شڪل ڏئي رهيا آهيون، حڪومت ۾ موجود ۽ ٻاهر رهندڙ هر شخص کي آئين ۽ قانون جي دائري ۾ رهندي پنهنجي عملن جو حساب ڏيڻو آهي. ان موقعي تي وفاقي وزير صاحبزادا محبوب سلطان چيو ته 1970 ۾ پاڪستان کي سنگاپور ۽ ملائيشيا جهڙا ملڪ رول ماڊل طور ڏسندا هئا ۽ اسان جي پيروي ڪندا هئا پر اڄ اسان ڪٿي ۽ اهي ملڪ ڪٿي پهچي ويا آهن، جنهن جو سبب گذريل حڪومتون آهن، جن ذاتي مفادن کي ترجيح ڏني، جيڪڏهن ايتري ڪرپشن باوجود هي ملڪ هلي رهيو آهي ته ان جو وڏو سبب رب پاڪ جو ڪرم آهي. سندس چوڻ هو ته اسان جي ملڪ ۾ 3 شعبا اهم آهن، پهريون زراعت، ٻيو تعيلم ۽ ٽيون صحت پر انهن تي ڌيان نه ڏنو ويو، زراعت جي شعبي کي مڪمل طور نظرانداز ڪيو ويو پر وزيراعظم ان شعبي تي ڌيان ڏنو ۽ جيڪو وفاقي حڪومت جو شيئر هڪ ارب رپين تائين هو، هيل ساڍا 12 ارب رپيا مليا آهن، جڏهن ته 12 کان 18 اربن جي صوبائي بجٽ 50 اربن تائين هوندي. وزيراعظم جي سڌسماءِ جي خاص مددگار ڊاڪٽر فردوس عاشق اعواڻ چيو ته ججن بابت ريفرنس هڪ آئيني مسئلو آهي مريم صفدر آئيني مسئلي کي سياسي ميدان ۾ نه آڻي ٽيوٽر تي پنهنجي بيان ۾ هن چيو ته مريم صفدر روپوش اشتهاري ڀائرن ۽ ملڪ جي معيشت کي لٽيندڙ ڊار انڪل کي عدالتن ۾ پيش ڪري عدليه جي تنظيم ۽ آئين ۽ قانون جي بالادستي تي يقين رکڻ جو ثبوت ڏي هن چيو ته عدليه سان ٻڌي جي اظهار جو بهترين طريقو عدليه جي فيصلن جو احترام آهي.

 

 

پاڪ فوج مادر وطن جي دفاع لاءِ ڪنهن به خطري جو جواب ڏيڻ جي ڀرپور صلاحيت رکي ٿيۡ: جنرل باجوه

راولپنڊي(ويب ڊيسڪ) آرمي چيف جنرل قمر جاويد باجوه جو چوڻ آهي ته پاڪ فوج مادر وطن جي دفاع لاءِ ڪنهن به خطري جو جواب ڏيڻ جي ڀرپور صلاحيت رکي ٿي. پاڪ فوج جي شعبي آءِ ايس پي آر موجب جي ايڇ ڪيو ۾ سالياني فارميشن ڪمانڊرز ڪانفرنس رٿي وئي، 2 ڏينهن واري فارميشن ڪمانڊرز ڪانفرنس جي صدارت آرمي چيف جنرل قمر جاويد باجوه ڪئي. آرمي چيف جي صدارت هيٺ ٿيل فارميشن ڪمانڊرز ڪانفرنس ۾ جيو اسٽريٽجڪ ۽ قومي سلامتي صورتحال جو جائزو ورتو ويو. آءِ ايس پي آر موجب ڪانفرنس ۾ ملڪ جي اندرين سلامتي جي صورتحال ۽ ملڪ کي پيش چيلنجن ۽ انهن کي منهن ڏيڻ جي باري ۾ تفصيلي ڳالهيون ڪيون ويون. آءِ ايس پي آر ٻڌايو ته آرمي چيف هلندڙ سال فيبروري ۾ تڪرار دوران ڀارت کي ڀرپور جواب ڏيڻ جي تعريف ڪئي. آرمي چيف پائيدار امن ۽ استحاڪم جي لاءِ آپريشن رد الفساد ۾ حاصل ڪاميابين کي به ساراهيو. شعبي موجب آرمي چيف جو ڪانفرنس کي خطاب ڪندي چوڻ هو ته پاڪ فوج مادر وطن جي بچاءِ لاءِ ڪنهن به خطري جو جواب ڏيڻ جي ڀرپور صلاحيت رکي ٿي. جنرل قمر جاويد باجوه جو چوڻ هو ته پاڪ فوج مادر وطن جي دفاع لاءِ هر خطري جو جواب ڏيڻ لاءِ پوري طرح تيار آهي. آءِ ايس پي آر فارميشن ڪمانڊرز ڪانفرنس ملڪ جي خدمت جي لاءِ سموريون ڪوششون جاري رکڻ جي عزم جو اظهار به ڪيو.

 

عمران خان جلد انجام تي پهچڻ وارو آهي: نواز شريف

لاهور (اين اين آءِ) اڳوڻي وزيراعظم نواز شريف چيو آهي ته ڪو ولي پير يا قسمت جو هال ٻڌائڻو وارو نه آهي پر عمران خان جلد انجام کي پهچڻ وارو آهي، عمران خان ۽ عليمه خان خلاف پڪا چارجز موجود آهن، انهن جو جلد سخت احتساب ٿيندو، ميڊيا رپورٽس موجب جيل ۾ ملاقات لاءِ آيلن سان ڳالهائيندي هن چيو ته عمران خان اهڙو کلاڙي آهي جنهن کي تماشائي جلد اسٽيڊيم کان ٻاهر ڍڪا ڏئي ڦٽو ڪندا، ان جو بني گالا ڪرپشن جي ڌٻڻ ۾ ڦاٿل آهي، ايمپائر جي آڱر جي ڳالهه ڪندڙ عمران خان کي شرم اچڻ گهرجي، هو راند دوران هٺ ڌرمي جو مظاهرو ڪري رهيو آهي، اسان عوام جي مينڊينٽ سان آياسين ۽ هي عوام جي مينڊيٽ کان محروم آهي، عمران خان بي انتظامي ۽ نااهلي لڪائڻ لاءِ اڳوڻي حڪومت تي الزام مڙهي رهيو آهي، ان جي نااهلي ملڪ کي تباهي جي ڪناري بيهاريو آهي، نواز شريف وڌيڪ چيو ته اسان جي دور ۾ ڀارتي وزيراعظم پاڻ هلي پاڪستان آيو، ڀارتي وزيراعظم کي ڪنهن حلف برداري ۾ نه گهرايو، اسان ايٽمي ڌماڪا ڪيا ته دنيا کي پاڪستان جي اهميت جو اندازو ٿيو، جڏهن ڪو پاڻ اندر وڃڻ وارو هوندو آهي ته اهو پهريان ٻين کي اندر موڪليندو آهي، موجوده حڪومت اجايو وڏن سياستدانن کي جيل موڪلي رهي آهي، اسان آءِ ايم ايف کي الوداع چئي ڇڏيو هو ۽ هي ان اڳيان گوڏا کوڙي رهيا آهن، ن ليگ ڀريل خزانو ڇڏيو، موٽر وي ٺاهيا، دهشتگردي ۽ مهانگائي گهٽائي، ملڪ ۾ بجلي سستي ڪري ڇڏي، عمران خان چوندو هو ته آپگهات ڪندس پر آءِ ايم ايف وٽ نه ويندس، هن آپگهات ته نه ڪيو پر قوم کي آپگهات تي مجبور ڪيو آهي، نواز شريف چيو ته اسان جي دور ۾ ڊالر ڪنٽرول ۾ رهيو ۽ ذخيرا وڌيا، تيل جو اگهه گهٽ ٿيو، اسان جي دور ۾ ترقي جي شرح 5.8 سيڪڙو تي پهچي وئي هئي، عمران خان جي دور ۾ ترقي جي شرح 4 سيڪڙو ناهي رهي، عمران خان سليڪٽيڊ وزيراعظم نه هجي ها ته اڄ ملڪ جي حالت بهتر هجي ها، هن 10 مهينن ۾ قوم کي مايوس ڪيو، اسان جي دور ۾ زندگي جي ضرورت جي هر شيءِ سستي هئي پر اڄ عوام جون رڙيون نڪري رهيون آهن.

 

افسوس سان چوان ٿو ته ڪراچي بدترين شهر بڻجي ويو آهي: جسٽس گلزار احمد

اسلام آباد (اين اين آءِ) سپريم ڪورٽ آف پاڪستان امل عمر قتل ڪيس ۾ سنڌ حڪومت جي ڪارڪردگي تي عدم اعتماد جو اظهار ڪندي چيو آهي ته ڌريون پنهنجا بيان 4 هفتن ۾ لکت ۾ جمع ڪرائين، خميس تي سپريم ڪورٽ ۾ امل عمر قتل ڪيس جي ٻڌڻي جسٽس گلزار جي سربراهي ۾ بينچ ڪئي، امل عمر جي والدين جي وڪيل چيو ته رپورٽ ۾ پوليس، ريگيوليٽر ۽ اسپتال تي ذميواري جو تعين ٿيڻو هو، وڪيل چيو ته رپورٽ تي عمل ڪندي سنڌ پوليس کي پيٽرولنگ ۾ ڳري هٿيارن جي استعمال کان روڪيو ويو آهي، وڪيل چيو ته پوليس رپورٽ ۾ غلطي کي تسليم ڪيو آهي، جسٽس گلزار چيو ته هن ڪيس جو وڌيڪ پسمنظر نٿا ڄاڻو، جسٽس گلزار چيو ته غلطي مڃڻ ته ٺيڪ پر ڇا هٿيار جي استعمال کان روڪڻ ڪراچي جهڙي شهر ۾ ٺيڪ ٿيندو، جسٽس گلزار چيو ته ڇا حالتن کي اڳيان رکي ڪراچي ۾ هٿيار جي استعمال کان پوليس کي روڪي سگهجي ٿو، وڪيل چيو ته دنيا جي ڪيترن ئي ملڪن ۾ پيٽرولنگ پوليس کي مشين گنز جهڙو هٿيار نٿو ڏنو وڃي، ٻڌڻي دوران سپريم ڪورٽ سنڌ حڪومت جي ڪارڪردگي تي عدم اعتماد جو اظهار ڪيو، سنڌ حڪومت جي وڪيل چيو ته عدالت اڳيان اهم اشو تي موقف ڏيڻ چاهيان ٿو، جسٽس گلزار احمد چيو ته سنڌ حڪومت وٽ ڪنهن مسئلي جو حل ناهي هوندو، هاڻ ڳالهه نه ڪريو، جسٽس گلزار احمد چيو ته سنڌ حڪومت جو هال خراب آهي، افسوس سان چئي رهيو آهيان ته ڪراچي پاڪستان جو بدترين شهر بڻجي چڪو آهي، جسٽس گلزار چيو ته ڪراچي شهر ۾ ڪا حڪومت ناهي پهريان اسان گهر کان پري وڃي کيڏندا هئاسين، هن چيو ته ڪراچي ۾ اسان جا ٻار گهر کان ٻاهر نٿا وڃي سگهن، گذريل ڏينهن ڪراچي ۾ ڏينهن ڏٺي ڌاڙو هنيو ويو، جسٽس گلزار چيو ته ڀريل بازار ۾ گاڏي روڪي 90 لک لٽيا ويا، هن چيو ته روڊن تي گاڏين کي لٽيو پيو وڃي، هن چيو ته ڪراچي ۾ روپوش سرعام گهمي رهيا آهن، جسٽس گلزار چيو ته هي روپوش سنجينده نوعيت جي ڏوهن ۾ ملوث آهن، پوليس انهن کي نٿي پڪڙي سگهي، هن چيو ته جيڪا ترقي ڪراچي ۾ ٿي هئي هاڻ ختم ٿي رهي آهي، جسٽس گلزار چيو ته آفيسرن کي پيسا ڪمائڻا آهن، عوام کي سندس هال تي ڇڏي ڏنو ويو آهي، ڌريون پنهنجا بيان 4 هفتن ۾ لکت ۾ جمع ڪرائين. جسٽس گلزار چيو ته ڪيس جي ايندڙ ٻڌڻي اونهاري جي موڪلن کانپوءِ ڪنداسين.

 

اڃا وڌيڪ گرفتاريون ٿينديون، زرداري کي ڪرپشن بجائڻ لاءِ پارليامينٽ استعمال ڪرڻ نه ڏينداسين: عمران خان

اسلام آباد (م.ڊ) وزيراعظم عمران خان تمام جلد هڪ هفتي جو سنڌ جودورو ڪرڻ ۽ سنڌ جي عوام سان ملڻ جو اعلان ڪندي چيو آهي ته آصف علي زرداري کي پارليامينٽ جو فلور پنهنجي ڪرپشن لڪائڻ لاءِ استعمال ڪرڻ نه ڏينداسين، ايندڙ 15 ڏينهن اهم آهن، ٿيل گرفتاريون آخري نه آهن، ڪنهن کي به نه ڇڏيندس، تفصيل موجب وزيراعظم عمران خان سان حيدرآباد، لاڙڪاڻو، سکر، ميرپور خاص ڊويزنن سان تعلق رکندڙ قومي اسيمبلي جي ميمبرن ملاقات ڪئي، وزيراعظم آفيس ۾ ٿيل ملاقات ۾ وفاقي وزير محمد ميان سومرو، ڊاڪٽر فهميده مرزا، قومي اسيمبلي جو ميمبر لال مالهي، نزهت پٺاڻ، جئي پرڪاش، صابر حسين قائمخاني، صلاح الدين، سائره بانو شرڪت ڪئي، ملاقات ۾ وزيراعظم جو خصوص معاون نعيم الحق، ارشد داد، سيف الله نيازي به موجود هو، وزيراعظم آفيس مان جاري ڪيل پڌرائي ۾ وڌيڪ چيو ويو آهي ته ملاقات دوران سنڌ صوبي جي مجموعي صورتحال، وفاق پاران جاري ترقياتي منصوبن ۽ صوبي جي عوام کي درپيش مسئلن تي خيالن جي ڏي وٺ ڪئي وئي، ملاقات ۾ قومي اسيمبلي جي ميمبرن ملڪي معيشت جي استحڪام، سال 20-2019ع جي پيش ڪيل بجيٽ ۽ وزيراعظم پاران اڱاري ۽ اربع جي وچ واري رات اهم قومي مامرن تي عوام کي اعتماد ۾ وٺڻ لاءِ ڪيل قوم کي خطاب تي وزيراعظم جي ساراهه ڪئي، جاري ڪيل بيان موجب وزيراعظم سان ملاقات ڪندڙ ميمبرن وزيراعظم کي پنهنجي تڪن جي عوام کي درپيش مسئلن کان آگاهه ڪيو، ان موقعي تي ڳالهائيندي وزيراعظم چيو ته سنڌ جي عوام کي درپيش مسئلن جو مڪمل احساس آهي، تمام جلد ڪجهه ڏينهن لاءِ سنڌ جو دورو ڪندس، قومي وسيلن جي لٽ مار ڪرڻ وارن جو مڪمل احتساب ٿيندو، ٻئي طرف ذريعن ٻڌايو آهي ته وزيراعظم سان ملاقات ڪندڙ سنڌ سان تعلق رکندڙ ميمبرن آصف علي زرداري جي گرفتاري تي وزيراعظم کي مبارڪباد ڏني، جڏهن ته ايم ڪيو ايم کانسواءِ باقي ملاقات ڪندڙ سنڌ جي ميمبرن رڳو ڪراچي لاءِ پيڪيج ڏيڻ بجاءِ سڄي سنڌ کي ترقياتي پيڪيج ۾ شامل ڪرڻ جو مطالبو ڪيو ۽ چيو ته “ڪراچي ۽ سنڌ” وارا لفظ ۽ جملا استعمال نه ڪرڻ گهرجن، اهو سنڌ صوبي لاءِ حساس مامرو آهي، جڏهن ته ايم ڪيو ايم جي ميمبرن حيدرآباد يونيورسٽي جي قيام واري اعلان کي جلد مڪمل ڪرڻ جو مطالبو ڪيو، ذريعن ٻڌايو ته اهڙي مطالبي تي وزيراعظم ڳالهائيندي چيو ته حيدرآباد يونيورسٽي کي جلد فنڪشنل ڪيو ويندو، سنڌ جي حساسيت جو علم آهي، ان ڪري مان “ڪراچي ۽ سنڌ” وارا لفظ استعمال نه ٿو ڪريان، ذريعن مطابق ملاقات دوران وزيراعظم واضح ڪيو ته آصف علي زرداري کي قومي اسيمبلي جو فلور ڪرپشن لڪائڻ لاءِ استعمال ڪرڻ نه ڏينداسين، اهو پنهنجي ڪيسن جو دفاع ڪورٽن ۾ وڃي ڪري، هن چيو ته ملڪ لٽڻ بعد وري هيرو ٿيڻ جي ڪوشش ڪن ٿا، قانون پنهنجو رستو اختيار ڪندو، ايندڙ 15 ڏينهن اهم آهن، ٿيل گرفتاريون آخري گرفتاريون ناهن، ڪنهن به ڪرپٽ ماڻهو کي نه ڇڏيندس، هن جو چوڻ هو ته پهريان ملڪ جي خراب معاشي صورتحال ۾ ڦاٿل هئس، ملڪ کي ڊفالٽ ٿيڻ کان ٻاهر ڪڍيو آهي، هاڻي باقي مسئلن تي ڌيان ڏينداسين، آصف علي زرداري کي ڪرپشن لڪائڻ لاءِ قومي اسيمبلي جو استعمال ڪرڻ نه ڏينداسين، ملڪ قرضن ۾ هنن ڪري ٻڏل آهي، جيڪا ٽيڪس وصولين جي رقم گڏ ٿئي ٿي ان مان اڌ رقم قرضن تي وياج جي ادائگي ۾ هلي وڃي ٿي، هوڏانهن ٽوئيٽ ڪندي وزيراعظم عمران خان چيو ته وقت اچي ويو آهي ته قوم مني لانڊرنگ ڪرڻ وارن جي حوصلا افزائي نه ڪري، مني لانڊرن قوم کي نقصان پهچايو، عوام کي غربت ۾ ڌڪيو ۽ هاڻي جمهوريت جي پويان لڪي رهيا آهن، مني لانڊرنگ ڪندڙن کي ڪو پروٽوڪول نه ملڻ گهرجي، ڪٿي قومي دولت لٽڻ وارن سان خاص ورتاءُ ڪيو ويندو آهي؟ وقت اچي ويو آهي ته مني لانڊرنگ ڪندڙن سان ڏوهارين جهڙو سلوڪ ڪيو وڃي.

 

ن ليگ جو وزيراعظم ۽ وزيرن کان اثاثا ظاهر ڪرڻ جو مطالبو، جتي انصاف نه هجي جمهوريت ناهي هلندي: شاهد خاقان عباسي

اسلام آباد ( ويب ڊيسڪ ) مسلم ليگ ن وزيراعظم ۽ وزيرن کان اثاثا ظاهر ڪرڻ جو مطالبو ڪيو آهي. اسلام آباد ۾ پريس ڪانفرنس ڪندي مسلم ليگ ن اڳواڻ شاهد خاقان عباسي چيو ته  رات 12 وڳي وزيراعظم قوم کي خطاب ڪري ٿو، اها حڪومت جي ذهني حالت آهي. هن چيو ته  وزيراعظم ۾ همت آهي ۽ بزدلي ناهي ته پنهنجن ۽ وزيرن جي اثاثن جا تفصيل ويب سائيٽ تي رکي اڇو چٺو پڌرو ٿي ويندو. سندس چوڻ هو ته 72 سالن کان گهٽ عرصي ۾ ٻڌو آهي ته ڪنهن صدر يا وزيراعظم رات 12 وڳي قوم کي خطاب ڪيو هجي. شاهد خاقان عباسي چيو ته جتي انصاف نه هوندو آهي اتي جمهوريت نه هلندي آهي، پرويز مشرف جي دور ۾ به جمهوريت لاءِ قربانيون ڏنيون، هاڻي به ڏينداسين. هن چيو ته بجيٽ تان ڌيان هٽائڻ لاءِ مخالف ڌر جي اڳواڻن کي گرفتار ڪيو پيو وڃي.سندس چوڻ هو ته اڄ جمهوريت ۽ معيشت کي خطرو آهي،حڪومت عمران خان وٽ آهي پر کيس ان ڳالهه جو احساس ئي ناهي. شاهد خاقان عباسي چيو ته ڪميشن ٺاهڻي آهي ته ڀلي ٺاهي وڃي، ملڪ جي خدمت ڪندڙ سياستدانن کي بدنام ڪيو پيو وڃي. هن چيو ته نيب ذريعي هڪ ڪم ٿي رهيو آهي، جيڪو ڳالهائي ٿو تنهن کي دٻايو وڃي ٿو. سندس چوڻ هو ته الزام هڻي حڪومت جي ڪمن تان ڌيان هٽايو پيو وڃي. شاهد خاقان عباسي چيو ته ڌمڪيون ڏيڻ سان ڪم نه هلندو حڪومت کي حقيقت کان ڪم وٺڻو پوندو.

 

افغانستان ۾ امن قائم ڪرڻ لاءِ پاڪستان پنهنجو مفاهمتي ڪردار ادا ڪندو رهندو: شاهه محمود قريشي

اسلام آباد ( ويب ڊيسڪ ) پرڏيهي وزير شاهه محمود قريشي چيو آهي ته افغانستان ۾ امن قائم ڪرڻ لاءِ پاڪستان پنهنجو مفاهمتي ڪردار ادا ڪندو رهندو، خطي ۾ تعمير ۽ ترقي جو عمل افعانستان ۾ امن قائم ڪرڻ سان مشروط آهي.  پاڪستان لاءِ آمريڪي سفارتخاني جي انچارج پرڏيهي آفيس ۾ پرڏيهي وزير شاهه محمود قريشي سان ملاقات ڪئي.  ملاقات دوران گڏيل دلچسپي جي معاملن ۽ خطي جي سڪيورٽي جي صورتحال تي ڳالهيون ڪيون ويون.  ملاقات دوران ڳالهائيندي شاهه محمود قريشي چيو ته سموري خطي ۾ تعمير ۽ ترقي جو عمل افغانستان ۾ امن قائم ڪرڻ سان مشروط آهي، افغانستان ۾ امن قائم ڪرڻ لاءِ پاڪستان پنهنجو ڪردار ادا ڪندو رهندو.

 

مٺي سول اسپتال ۾ خوراڪ جي کوٽ ۽ ٻين بيمارين وگهي داخل وڌيڪ 7 ٻارڙا  فوت

اسلام ڪوٽ(رپورٽ:سجاول بجير) مٺي سول اسپتال ۾ خوراڪ جي کوٽ ۽ ٻين بيمارين وگهي داخل وڌيڪ 7 ٻارڙا  بجلي جي لوڊشڍنگ  ۽ جرنيٽر خراب هجڻ سبب گرمي جي سٽ نه سهندي فوت ٿي ويا آھن.  جنهن کان پوءُ هلندڙ مهيني فوتي ٻارن جو انگ 29 ۽ هلندڙ سال 358 ٿي ويو آھي. تازو فوت ٿيل 7 ٻارن ۾ ھڪ سال جي گوري. اڍائي سالن جي آسيت. 16 ڏينهن جو وڪرم ڪمار. 8 مهينن جي پنشا سميت 3 تازو ڄاول ٻارڙا شامل آھن.   ان ڏس ۾  هڪڙي پاسي علاج جون سهوليتون نٿ هجڻ ڪري اڳ ۾ ئي ٻارن جي موت جا واقعا معمول بڻيل آھن جن تي ضابطو اچڻ مشڪک بڻيل آھي ته ٻئي پاسي ٻن ڏينهن کان شديد گرمي ۾ مسلسل بجلي جي لوڊ شيڊنگ ۽ اسپتال جا جرنيٽر خراب هجڻ ڪري داخل مريضن جو جيئڻ مشڪل بڻجي ويو آھي. معلوم ٿيو آهي ته گذريل ٻن ڏينهن کان سول اسپتال مٺي ۾ بجلي جي لوڊشٽينگ ۽ جرنيٽر خراب هجڻ سبب سڄي اسپتال اونداهه ۾ گهيريل آهي ۽ شديد گرمي سبب مختلف وارڊن نرسري وارڊ، ٻارن جو وارڊ، فيميل وارڊ، ميل وارڊ سميت اوپي ڊي سميت سموري اسپتال ۾ داخل توڙي اوپي ڊي ۾ ايندڙ مريض سخت پريشان آهن ۽ داخل مريض ٻارڙا توڙي وڏا تڙپي رهيا آهن ۽ شديد گرمي سبب ٻارن جي وارڊ ۾ ست ٻارڙا تڙپي تڙپي فوت ٿي ويا  جيڪي وارث احتجاج ڪندي پنهنجا لاش کڻائي ويا آهن پر ضلعي انتظاميا سميت ڪنهن به چونڊيل نمائندي کي ڪهل نه آئي جو اهي اسپتال پهچي مريضن جي سار لهن، جڏهن ته اسپتال ۾ بجلي نه هجڻ سبب ليبارٽري، ايڪسري مشين، الٽراسائونڊ مشين ۽ ٻيون مشينون نه هلڻ سبب مريض ٽيسٽون ڪرائڻ لاء پريشان آهن ۽ ٻاهر کان ٽيسٽون ڪرائڻ تي مجبور آھن. سول اسپتال مٺي اونداهه ۾ هجڻ سبب سمورو نظام درهم برهم پيل آهي، اسپتال ۾ بجلي نه هجڻ ۽ جرنيٽر خراب هجڻ واري معاملي تي سول سرجن ڊاڪٽر جاويد اقبال چانڊيو رابطو ڪرڻ تي ڳالهائيندي چيو ته بجلي نه هئڻ ۽ شديد گرمي هجڻ سبب رڳو مريض ڇا اسين به تڙپي رهيا آهيون ٻارڙا مري رهيا آهن اسين به مري وينداسين، هن چيو ته ڪواٽر بجيٽ هئي اها ختم ٿي ويئي آهي ۽ هاڻي پئسا نه آهن ڊي ايڇ او کي چيو آهي حال صحيح نه آهي اها جيڪا ڏسو پيا اهو ڀلين ميڊيا تي لکو، جڏهن ته سول اسپتال مٺي امڪاني طوفان ۽ برسات سبب ضلعي انتظاميا الرٽ جاري ڪندي اسپتالن ۾ هنگامي حالتون لاڳو ڪيون آهن پر سول اسپتال مٺي ۾ سهولتون نه هئڻ برابر آهن.

 

لاڙڪاڻي ۾ هٿياربندن جي فائرنگ، 2 پوليس اهلڪار قتل، آئي جي سنڌ نوٽيس ورتو، رپورٽ طلب

لاڙڪاڻو (بيورو رپورٽ) لاڙڪاڻي ۾ اڻڄاتل هٿياربندن ٻن پوليس اهلڪارن کي قتل ڪري ڇڏيو. پوليس جو چوڻ آهي ته تعلقي ٿاڻي جي حد ۾ پروفيسر ڪالوني ۾ اڻڄاتل هٿياربندن فائرنگ ڪئي، جنهن جي نتيجي ۾ 2 پوليس اهلڪار داد محمد مغيري ۽ ذوالفقار قتل ٿي ويا. پوليس ذريعن جو چوڻ آهي ته ٻئي پوليس اهلڪار قمبر جي باگو ديرو واري علائقي جا رهواسي هئا، جيڪي ڳوٺ وڃي رهيا هئا ته مٿن فائرنگ ڪئي وئي. هوڏانهن آءِ جي سنڌ ڪليم امام واقعي جو نوٽيس وٺندي ايس ايس پي لاڙڪاڻو کان واقعي ۽ پوليس جي ايڪشن جي حوالي سان رپورٽ طلب ڪري ورتي آهي.

 

رتوديرو ايڊستان بڻجي ويو، هزارين ماڻهو موذي مرض ۾ مبتلا، وڌيڪ 13 ماڻهن ۾ وائرس جي تصديق، انگ 826 ٿي ويو

رتوديرو(رپورٽر) رتوديرو تعلقو ايڊزستان بڻجي ويو، هزارين ماڻهون موذي مرض ۾ مبتلا ٿي ويا، وڌيڪ 13 ماڻهن ۾ ايڇ آء وي ايڊز هئڻ جي تصديق ٿي، ايڇ آء وي متاثرن جو انگ 826 ٿي ويو، رپورٽ موجب ايڊز وبائي صورت اختيار ڪري ورتي رتوديرو تعلقو ايڊزستان بڻجي ويو هزارين ماڻهون خطرناڪ وائرس ۾ مبتلا علائقي ۾ خوف حراس پکڙيل، تعلقه اسپتال ۾ هڪ مهينو 22 ڏينهن به سنڌ ايڊز ڪنٽرول پروگرام ۽ پي پي ايڇ آء جي نگراني ۾ بلڊ اسڪريننگ ڪئمپ جاري رهي جتي 155 ماڻهن جي رت جي چڪاس ڪئي وئي، جن ۾ 13ماڻهن جون رپورٽس پازيٽو آيون، جڏهن ته ٽوٽل متاثرن جو انگ 826 ٿي ويو، ايڊز سينٽر لاڙڪاڻو انتظاميه جي پت وائکي متاثرن کي ايڇ آء وي ايڊز جون دوائون ڏيڻ بجاء پرائيويٽ اسٽورن جو پئسن عيوض بخار دست ۽ الرجي جون سيرپ لکي ڏئي موٽائن ٿا، ايڇ آء وي ايڊز جي ٻن متاثر ٻارن جي والد عبدالغفار بلوچ صحافين اڳيان داهيندي چيو ته منهنجي ٻن ٻارن اويس علي ۽ ماجده کي ايڇ آء وي ايڊز ظاهر ٿي مونکي ٻارن جي علاج ڪرائڻ لاء لاڙڪاڻي موڪليو ويو هڪ هفتو روز مسلسل لاڙڪاڻي وڃڻ ٿيو پر اتي وڌيڪ ٽيسٽ ۽ ايڪسرا نه ٿي رهيا هئا، هفتي بعد وڌيڪ ٽيسٽ ۽ ايڪسرا ٿيا بدقسمتي سان اتي به رپورٽس پازيٽو آيون، پر ظلم ڏسو اسان کي علاج نٿو ڏنو وڃي، 15 ڏينهن اڳ ايڊز سينٽر انتظاميه پرائيوٽ اسٽور تان هڪ وٽامن سيرپ ۽ ٻيو زينٽل سيرپ لکي ڏئي چيو ته فلحال اسان وٽ دوائون نه آھن عيد کان پوء موٽي اچو جڏهن هاڻ هڪ ڀيرو ٻيهر سينٽر تي علاج لاء وياسين ته ايڇ آء وي ايڊز جون دوائون نه ڏنيون ويون، جڏهن ته منهنجي ٻارن کي ايڇ آء وي وائرس آھي ان جون دوائون ڏيڻ بجاء پرائيويٽ اسٽور جو دوائون سيٽرازين، سيپٽران، ميٽرانڊازول سيرپ لکي ڏئي چيو ته گهر وڃو، انتظاميه آڏو رڙيون ڪيان ته مونکي سرڪاري دوائون ڏنيون وڃن پر نه مليون، منهنجي سامهون انتظاميه کي پارٽي جي مقامي اڳواڻن سان فون تي ڳالهرائيندڙن کي انتظاميه ايڇ آء وي سرڪاري دوائن جي ڪورس ڏئي رهيا هئا، پر اسان غريب مسڪينن وٽ ڪا شفارس نه هئڻ ڪري کالي موٽايو وڃي، هن وڌيڪ چيو ته مان حڪومت سنڌ، صحت کاتو ۽ ايڊز ڪنٽرول ٽيم جي اعليٰ اختيارين کي اپيل ٿو ڪيان ته منهنجي ٻچڙن کي ايڇ آء ايڊز جو ڪورس ڏئي انهن جي حياتي بچايو وڃي،