تازيون خبرون

Daily Archives: June 12, 2019

عوام دشمن بجيٽ رد، ايمنسٽي اسڪيم مان ڪنهن کي اين آر او ڏيڻ جي ڪوشش ڪئي وئي؟: پ پ پ

ڪراچي (اسٽاف رپورٽر) سنڌ جي اطلاعات، قانون ۽ اينٽي ڪرپشن کاتن بابت وزيراعليٰ سنڌ جي صلاحڪار بيريسٽر مرتضيٰ وهاب چيو آهي ته عوام دشمن بجيٽ کي رد ڪيون ٿا، کاڌي پيتي جي شين کان وٺي هر شيءِ جون قيمتون وڌايون ويون آهن، وڏيون دعوائون ڪندڙ تحريڪ انصاف جي حڪومت عوام دشمن بجيٽ پيش ڪئي آهي. هن اهڙو اظهار سنڌ اسيمبليءَ ۾ ميڊيا ڪارنر تي پريس ڪانفرنس کي خطاب ڪندي ڪيو، صوبائي وزير سيد ناصر حسين شاهه، سعيد غني ۽ سيد ذوالفقار شاهه پڻ ساڻس گڏ موجود هئا. مرتضيٰ وهاب چيو ته عوام جي ڪنهن به شيءِ تي سبسڊي ناهي ڏني وئي هاڻي ماهوار پنجاهه هزار رپيا آمدني تي به ٽيڪس لاڳو ڪيو ويو آهي، عوام دشمن بجيٽ تي جنهن قومي اسيمبليءَ ۾ تنقيد ڪئي ته عمران خان اشارن کان ڪم ورتو، قوم کي خطاب ۾ عمران خان جي تقرير کي ميوٽ ڪيو ويو. هن چيو ته عمران خان چيو هو ته اسان اين آر او ڏيڻ وارا ناهيون اسان چئون ٿا ته پاڪستان پيپلزپارٽي کي ڪنهن اين آر او وٺڻ جي ضرورت ناهي، پر ايمنسٽي اسڪيم مان ڪنهن کي اين آر او ڏيڻ جي ڪوشش ڪئي وئي؟ هن چيو ته بجيٽ ۾ ڪا اهڙي شيءِ ناهي جنهن جي قيمت نه وڌائي وئي هجي گيس کان کائڻ پيئڻ جي شين تائين سڀ مهانگيون ڪيون ويون آهن رليف ڏيڻ ۽ ماضي ۾ وڏيون ڳالهيون ڪندڙ خان صاحب سرڪاري ملازمن جي پنجاهه هزار پگهار تي به ٽيڪس لاڳو ڪري ڇڏيو آهي ماهوار پنجاهه هزار رپيا ڪمائيندڙ ڪٿان ڪرايو ڀريندو ۽ ڪيئن گذر سفر ڪري سگهندو، بجيٽ هر طرح کان عوام دشمن ۽ رڙريون ڪڍندڙ بجيٽ آهي بجيٽ ۾ نان ٽيڪس فائلر کي ڇوٽ ڏني وئي آهي. هن چيو ته ڪالهه به وزيراعظم عوام کان رڙيون ڪڍائڻ کان نه مُڙيو ۽ خطاب به ڪيو، ماضي ۾ هڪ شخص پارليامان تي ٺونشا اُلاريا هئا اڄ هو ڪٿي آهي؟ جڏهن پارليامين تي ٺونشا اُلاريا ويندا ته ملڪ جي ڇا حيثيت بڻجندي، وزيراعظم جو ڪالهه جو خطاب حيرت انگيز هو جيڪي ماڻهو قوم کي خطاب نه ٿا ڪري سگهن اُهي ملڪ کي ڪيئن هلائيندا. مرتضيٰ وهاب وڌيڪ چيو ته وزيراعظم خطرناڪ ڪميشن بڻائڻ جو اعلان ڪيو ۽ ڏهه سالن جي جاچ پڙتال ڪندا پر ڇا ڏهه مهينن جي ڪارڪردگي جي به جاچ پڙتال ٿيندي؟ اسان چئون ٿا ته 1999 کان وٺي هاڻي تائين جي تحقيقات ٿيڻ گهرجي پيپلزپارٽي ماضيءَ جيان هاڻي به سرخرو ٿيندي. هن چيو ته عوام روڊن تي پنهنجي حقن لاءِ نڪرندو اسان پارليامينٽ ۽ روڊن تي عوام دشمن پاليسين کي وائکو ڪندا سون وزيراعظم ڪيترائي ڀيرا چيو ته اين آر او ڪنهن کي نه ڏيندس ۽ پنهنجي ڀيڻ لاءِ اين آر او ڳوليو، پيپلزپارٽي کي ڪنهن اين آر او جي ضرورت ناهي اوهان نان ٽيڪس فائيلرز کي جيڪا ڇوٽ ڏني آهي اُها ڇا اين ار او ناهي؟ اهو اين آر او ڪنهن کي ۽ ڪنهن جي جائيداد کي ڇوٽ ڏني وئي. صوبائي صلاحڪار اطلاعات چيو ته وزيراعظم کان خطاب ته ٿئي ڪونه ٿو هو ڪميشن جي ڇا سربراهي ڪندو، اوهان ڏهن مهينن ۾ جيڪا تباهي ڪئي آهي ڇا ان جي به جاچ ڪندا، جيڪڏهن جاچ ڪرڻي آهي ته پنهنجي دوستن جي به ڪيو ڪالهه اهي نوازشريف جي کٻي سڄي ويٺا هئا انهن خلاف انڪوائري سان شايد سندن به رڙيون نڪري وڃن. هن چيو ته عوام اسان لاءِ نه پر پنهنجي لاءِ نڪرندو افطار ڊنر ۾ اپوزيشن کي دعوت ڏني هئي ۽ عوام جي مسئلن تي احتجاج ۽ حڪمرانن خلاف نڪرڻ جو فيصلو ڪيو هو اسان آصف علي زرداري جي گرفتاري کان اڳ ئي نڪرڻ جو اعلان ڪري چڪا هئاسون، اپوزيشن جي حڪمت عملي درست پئي وڃي وزيراعظم ۽ ڪابينا پريشان هئا ان لاءِ اشارا ڪيا پئي ويا. هن چيو ته سنڌ حڪومت هميشه ڪوشس ڪئي آهي ته ڪو به اضافي ٽيڪس نه لڳي پر اين ايف سي نه ملي ته ڪم ڪيئن ڪري سگهجن ٿا، 132 ارب رپيا گهٽ ڏنا ويا وفاق 162 ارب ڪراچي کي ڏيڻ جو واعدو ڪيو پر بجيٽ ۾ پيسو ڪٿي آهي. هڪ سوال جي جواب ۾ هن چيو ته آصف علي زرداري تي الزام غلط آهن اسان سرخرو ٿينداسين اڪائونٽس مان پيسا منتقلي جا الزام غلط آهن احتساب ڪرڻو آهي ته عليمه باجي جو پئسو ڪٿان آيو پيپلزپارٽي تي حڪومت جي حيثيت ۾ الزام لڳايا ويندا آهن پر پي ٽي آءِ ته جماعت طور ڪرپٽ آهي، صدر عارف علوي ۽ پرويز خٽڪ سميت سمورن اڳواڻن پنهنجي اليڪشن ۾ پئسا خرچ ڪيا ان جماعت عوام کان چندو ورتو ان ۾ به ڪرپشن ڪئي وئي اها جماعت ۽ سندس اڳواڻ به ڪرپٽ  آهن ته انهن مان چڱائي ڇا ٿيندي. هن چيو ته هي بجيٽ پي ٽي آءِ جي نه پر آءِ ايم ايف جي بجيٽ آهي حڪومت جون دعوائون غلط آهن وزيراعظم ۽ ايوان صدر جي خرچن ۾ به اضافو ڪيو ويو آهي، ن ليگ جيڪا ٽيڪس ڇوٽ ڏني اها غلط هئي پر هنن ته پنهنجن کي نوازڻ لاءِ ان ۾ به اضافو ڪيو کين ٻين تي الزام نه ٿو جڳائي، ڏهه سال پُٺتي به وڃو شوڪت عزيز ۽ حفيظ شيخ به رڳڙي ۾ ايندا اسان ته خوش آهيون. هن چيو ته ملڪ جو سڀ کان وڏو معاشي دهشتگرد عمران خان آهي احتساب لاءِ ڪميشن رُڳو ڏهه سال نه آمرن جي دور لاءِ به جوڙيو وڃي.

 

هڪ نه ڏهه ڪميشن جوڙيو اسان وٽ هڪ هڪ رپئي جو حساب آهي: ن ليگ

اسلام آباد/ ظفروال(ويب ڊيسڪ) مسلم ليگ ن جي نائب صدر مريم نواز چيو آهي ته تيزي سان ترقي ڪندڙ ملڪ هاڻ پوئتي وڃي رهيو آهي ۽ اڄ ڪو به غريب پرسڪون زندگي ناهي گذاري رهيو. مريم نواز ظفر وال ۾ جلسي کي خطاب ڪندي چيو ته جنهن ڏينهن نواز شريف کي ڪرسي تان هٽايو ويو ته ملڪ تباهه ٿي ويو. موجوده بجيٽ ۾ عوام تي قيامت برپا ڪئي وئي. ملڪ ۾ ريڙهي واري سميت ڪير به خوش ناهي ڇو ته بجيٽ ۾ هر شئي مهانگي ڪئي وئي آهي. هن چيو ته پاڪستان اُهو ملڪ آهي جتي هڪ ڏينهن ۾ 2-2 ڌماڪي ٿيندا هئا پر نواز شريف جي ئي ڪوششن سان ملڪ ۾ امن قائم ٿيو. نواز شريف جي دور ۾ ئي سڄي ملڪ ۾ روڊن جا ڄار وڇايا ويا. مريم نواز چيو ته نواز شريف کي اقامي جهڙي مذاق تي وزير اعظم جي ڪرسي تان هٽايو ويو. عمران خان چوي ٿو ته آئون ڪنهن جي خلاف ڪارروائي ناهيان ڪري رهيو نيب ڪري رهيو آهي پر نيب کي عليمه باجي ڏوهه جي اعتراف باوجود ڇو نظر ناهي اچي رهي. نواز شريف جي خلاف گاڏين جو ڪيس بڻائيندڙن کي گهرجي ته هو هڪ ڪيس نواز شريف جي ڪرسي تي به بڻائي ڇڏي ها. هن چيو ته عمران خان پٺيان لڪي وار ڪرڻ جو عادي آهي. ان ۾ ايتري جرعت آهي ته سامهون اچي چوي ته آئون نواز شريف شهباز شريف جي خلاف ڪيس قائم ڪيا.  جنهن شخص سازشون ڪرڻ سکيون هو قانون ۽ عوام کي منهن نٿو ڏئي سگهي. هن چيو ته عمران خان اشتهار ڏيندي نواز شريف جي خلاف درخواستون وٺي عدالتن ۾ وڃي رهيو هو ججن تي دٻاءُ وجهندو هو پر ڪنهن ۾ ايتري جرعت نه هئي جو ان اشتهاري ۾ ڪير هٿ وجهي. مسلم ليگي اڳواڻ چيو ته 300 ڪنال جي گهر ۾ رهندڙ وزير اعظم رڳو هڪ لک رپيا ٽيڪس ڏيندو آهي پر غريب عوام جي کير پيئندڙ ٻار کان به ٽيڪس وصول ڪيو پيو وڃي. هن ملڪ ۾ رڳو غريبن کي نشانو بڻايو پيو وڃي. هن چيو ته جنهن انسان ڪڏهن پنهنجي هٿ سان ڪمائي ناهي کاڌو ۽ جنهن جي خاندان ڪڏهن ڪو واپار ناهي ڪيو ڇا نيب ۾ ايتري همت آهي جو عمران خان جي خلاف اثاثن کان وڌيڪ ڪيس بڻائي؟ عمران خان باڪردار ۽ ايماندار جج جي خلاف ئي ريفرنس بڻايو. عمران خان ۾ ايتري جرعت آهي ته سامهون اچي چوي ته جج جي خلاف ريفرنس ۾ بڻايو. مريم نواز چيو ته بني گالا جو گهر ته بنا اين او سي جي بڻيو پر ڪنهن ۾ ايتري همت ناهي جو ان کي ڊاهي پٽ ڪري. هتي ته رڳو غريبن جا ئي گهر ڊاهي پٽ ڪيا پيا وڃن.

ٻِئي طرف پاڪستان مسلم ليگ ن جي ترجمان مريم اورنگزيب وزيراعظم عمران خان طرفان اعليٰ اختياراتي ڪميشن جي تجويز کي مخالف ڌر کي ڌمڪائڻ جي ڪوشش قرار ڏنو ۽ چيو ته هڪ نه ڏهه انڪوائري ڪميشن جوڙيو اسان وٽ هڪ، هڪ رپئي جو حساب آهي. مريم اورنگزيب چيو ته اعليٰ اختياراتي ڪميشن جوڙي عمران خان جو دماغي معائنو به ڪيو وڃي، وزيراعظم پنهنجي تقرير ۾ انتهائي نروس نظر آيو ۽ آءِ ايم ايف سان معاهدي تان نظر هٽائڻ لاءِ ڪنٽينر وارو لهجو استعمال ڪيو ويو. ن ليگ ترجمان جو چوڻ هو ته ان تي ڪميشن جوڙي وڃي ته عوام هن نالائق حڪومت کي ٽئڪس ڏيڻ بند ڪيو، اها مخالف ڌر کي نه ڌمڪائي، مولابجٽ بڻجڻ جي ڪوشش نه ڪريو ۽ ڪنٽينر تان لهو، آءِ ايم ايف سان ڊيل ۽ عوام دشمن بجيٽ جو کين جواب ڏيڻو پوندو. مريم اورنگزيب چيو ته اڄ جي مخالف ڌر جيل وڃڻ کان نٿي ڊڄي، ڌمڪين سان ڪجهه نه ٿيندو، اسان قرض ورتو ته يارنهن هزار ميگاواٽ بجلي سسٽم ۾ داخل ڪئي، موٽروي ۽ روڊن جو ڄار وڇايو، هڪ نه ڏهه انڪوائري ڪميشن ٺاهيو اسان وٽ هڪ، هڪ رپئي جو حساب آهي.

 

نان فائيلرن کي نئين فنانس بل ۾ ڪا به ڇوٽ نه ڏني ويندي: ايف بي آر

اسلام آباد ( ويب ڊيسڪ ) ايف بي آر ترجمان طرفان نئين فنانس بل ۾ نان فائيلرن بابت وضاحت جاري ڪئي وئي آهي. فيڊرل بورڊ آف ريونيو ( ايف بي آر ) طرفان جاري ڪيل وضاحت ۾ چيو ويو آهي ته نان فائيلرن کي نئين فنانس بل ۾ غير منقوله جائيداد ۽ گاڏين جي خريد تي ڪا به ڇوٽ نه ڏني ويندي، حقيقت اها آهي ته نئين فنانس بل ۾ نان فائيلرن جي قانوني حيثيت کي ئي ختم ڪيو ويو آهي. ايف بي آر ترجمان موجب سمورن انڪم ٽئڪس آرڊيننس تحت پنهنجي ٽئڪس ايبل انڪم جا گوشوارا جمع ڪرائڻا پوندا آهن، ڪنهن به وڏي مالي ٽرانزيڪشن تي گواشوارا داخل نه ڪرڻ جي صورت  ۾ مڪمل طريقيڪار ڏهين شيڊول تحت واضح ڪيو ويو آهي. ترجمان ٻڌايو ته اهڙن ماڻهن کي نه رڳو ود هولڊنگ اسٽيج تي 100 سڪيڙو وڌيڪ ٽيڪس ڏيڻو پوندو پر طريقيڪار مان ٽئڪس جو تعين کان پوءِ لڪايل آمدني تي ڏنڊ ۽ سزا به لاڳو ٿيندي.

 

قوم مني لانڊرنگ ڪندڙن سان مجرماڻو سلوڪ ڪري، مون لاءِ پنهنجي ملڪ ۽ قوم کان وڌيڪ ڪجهه ناهي : عمران خان

اسلام آباد ( ويب ڊيسڪ ) وزيراعظم عمران خان چيو آهي ته وقت اچي ويو آهي ته قوم مني لانڊرنگ ڪندڙن سان مجرماڻو سلوڪ ڪري. سماجي رابطن واري ويب سائيٽ تي جار ڪيل پنهنجي بيان ۾ وزيراعظم عمران خان چيو ته قوم مني لانڊرنگ ڪندڙن جي تعريف ڪرڻ بند ڪري، مني لانڊرنگ ڪندڙن کي ڪو به پروٽوڪول نه ملڻ گهرجي. وزيراعظم جو چوڻ هو ته وقت اچي ويو آهي ته قوم مني لانڊرنگ ڪندڙن سان مجرماڻو سلوڪ ڪري، مني لانڊرنگ ڪندڙن قوم کي غربت ۾ ڌڪيو ۽ نقصان پهچايو . عمران خان وڌيڪ چيو ته ڪٿي عوام جي دولت لوٽيندڙن سان خاص ورتاءُ ٿيندو آهي؟  اڄ مني لانڊرنگ ڪندڙن جهموريت پٺيان پناهه وٺڻ چاهن ٿا. ٻئي طرف وزيراعظم عمران خان چيو آهي ته مون لاءِ پنهنجي ملڪ ۽ قوم کان وڌيڪ ڪجهه ناهي. وزيراعظم عمران خان خان تحريڪ انصاف اڳواڻ بابر اعواڻ ٽيليفونڪ رابطو ڪيو ۽ حڪومت جي پهرين بجيٽ تي کيس مبارڪ پيش ڪئي. بابر اعواڻ گذريل رات عمران خان طرفان قوم کي تقرير جي تعريف ڪندي ان کي اميد جو ڪرڻو قرار ڏنو. سندس چوڻ هو ته وزيراعظم جي خطاب عوام جي دلين تي گهرو اثر ڇڏيو، عوام کي يقين ٿي ويو ته تبديلي جو سفر تيزي سان جاري آهي، اهم قومي معاملن تي عوام کي اعتماد ۾ وٺڻ بهترين روايت آهي. ان موقعي تي عمران خان چيو ته مون لاءِ پنهنجي ملڪ ۽ قوم کان وڌيڪ ڪجهه ناهي، چاهيان ٿو ته ترقي جي هن سفر ۾ عوام ڀرپور ساٿ ڏئي.سندس چوڻ هو عوام کي خبر هجڻ گهرجي ته ملڪ کي ڪهڙي ريت بي دردي سان ڦريو ويو، ملڪ کي ترقي ڏيارڻ لاءِ سڀني کي گڏجي ڪوشش ڪرڻي پوندي، احتساب جو عمل مضبوط ۽ قانون تي عملداري يقيني بڻائڻي پوندي.

 

عوام جي ڏک سور وزيراعظم جي تقرير جو بنيادي جزو هو: فردوس عاشق اعواڻ

اسلام آباد (اين اين آءِ) وزيراعظم جي سڌسماءِ جي خاص مددگار ڊاڪٽر فردوس عاشق اعواڻ چيو آهي ته عوام جو ڏک سور ۽ احساس وزيراعظم جي تقرير جو بنيادي جز هو عمران خان جو خطاب قوم جو آواز آهي عوامي وزيراعظم قوم جي دلين جي ڳالهه ڪري عوام جون دليون کٽي ورتيون هڪ بيان ۾ ڊاڪٽر فرودس عاشق اعواڻ چيو ته عمران خان جو خطاب قوم جو آواز آهي هن چيو ته ملڪ ۽ قوم تي مڙهيل ٻن خاندان جي استحصالي راڄ تي ڪاري ضرب لڳائي حقيقي عوامي تبديلي آڻڻ ان جو عظيم ڪارنامو آهي هن چيو ته حڪومت نهايت متوازن بجيٽ پيش ڪئي جيڪا معيشت جي استحڪام ۽ ترقي جا نوان دروازا کولي ڇڏيندي هن چيو ته صحت ۽ تعليم ۾ بهتري جو منصوبو ساراهه جوڳو آهي هن چيو ته سرڪاري ملازمن جي پگهارن ۾ واڌ ۽ وزيرن جي پگهارن ۾ گهٽتائي تاريخي فيصلا آهن.

 

وزيراعظم اڌ رات جو ڊڄي عوام کي خطاب ڪيو. بجيٽ خودڪشي آهي، منظور ٿيڻ نه ڏينداسين : بلاول زرداري

اسلام آباد ( ويب ڊيسڪ ) پ پ چيئرمين بلاول ڀٽو زرداري جو وزيراعظم عمران خان جي تقرير تي پنهنجي ردعمل ۾ چيو آهي ته وزيراعظم اڌ رات جو ڊڄي عوام کي خطاب ڪيو. سماجي رابطن واري ويب سائيٽ ٽوئيٽر تي پنهنجي ٽوئيٽ پ پ چيئرمين چيو ته وزيراعظم کي ڊپ آهي ته هو ”پي ٽي آءِ ايم ايف“  بجيٽ پاس ڪرائڻ ۾ ناڪام ٿي ويندو ۽ سندس حڪومت ڪري پوندي. بلاول ڀٽو چيو ته جبر ۽ دٻاءُ فائديمند نه هوندو، ڪو به باشعور شخص ٽئڪس ۾ واڌ، مهانگائي ۽ بيروزگاري کي ووٽ نه ڏيندو. هن چيو ته اها بجيٽ خودڪشي آهي ته ۽ اسان ان کي منظور ٿيڻ نه ڏينداسين.

 

عليمه خان، جهانگير ترين، پرويز خٽڪ جي ڪرپشن ڇو نٿو ٻڌائي، وزيراعظم ۾ همٿ آهي ته پرويز مشرف کي واپس آڻي ڏيکاري، : خورشيد شاهه

اسلام آباد (ويب ڊيسڪ) پيپلز پارٽي جي اڳواڻ خورشيد شاهه چيو آهي ته عمران خان ملڪ ۾ لڳندڙ ”گو نيازي گو“ جي نعرن سان منهن ڏيڻ جهڙو ناهي رهيو. وزيراعظم جي تقرير تي رد عمل ڏيندي خورشيد شاهه چيو ته عمران خان رات جو لڪي تقريرون ڪري رهيو آهي، عمران خان گو نيازي گو جي نعرن لڳندڙ نعرن سان ملڪ ۾ ڏينهن جي روشني ۾ عوام سان منهن ڏيڻ جوڳو ناهي رهيو، سندس منافقت جي انتها آهي جو هو بسم الله پڙهي ڪوڙ ڳالهائيندو آهي، ڇا رڳو مخالف ڌر اڳواڻن کي گرفتار ڪري هاڻي نيب پي ٽي آءِ جي منشور کي پورو ڪندو؟ ڇا اپوزيشن اڳواڻن جون گرفتاريون ئي مديني جي رياست قائم ڪرڻ جو طريقو آهي. هن چيو ته 60 ورهين ۾ ايتري تيزي سان قرض نه ورتو ويو جيترو پي ٽي آءِ 10 مهينن ۾ ورتو آهي، مهانگائي ۽ بيروزگاري ۾ واڌ تان ڌيان هٽائڻ لاءِ عمران خان ڪرپشن ڪري رهيو آهي، جيڪڏهن عمران خان ڪرپشن جي خاتمي لاءِ سنجيده آهي ته عليمه خان، جهانگير ترين، پرويز خٽڪ جي ڪرپشن ڇو نٿو ٻڌائي ۽ نيب آصف علي زرداري تي هڪ رپئي جي ڪرپشن هن وقت تائين ثابت ناهي ڪري سگھيو، عمران خان آصف زرداري تي اهو الزام مڙهي رهيو آهي، جيڪو ٽن ڏهاڪن کان ثابت ناهي ٿي سگھيو. سندس چوڻ هو ته بجيٽ اجلاس کان پوءِ اڌ رات جو الزام لڳائڻ رڳو مهانگائي تان ڌياڻ هٽائڻ جي هڪ ناڪام ڪوشش آهي، ٻين جي ٻارن جي ٻاهر هجڻ تي تنقيد ڪندڙ عمران خان جا پنهنجا ئي ٻار ٻاهر پلجي رهيا آهن، ٻين کان قرض وٺڻ جو حساب وٺندڙ عمران خان ان قرض جو حساب ڪڏهن ڏيندو جيڪو سندس حڪومت ورتو آهي، عمران خان بدحالي، مهانگائي ۽ بيروزگاري جو حساب ڪڏهن ڏيندو، قوم عمران خان کان معاشي تباهي جو حساب گھري رهي آهي، اپوزيشن کي احتجاج لاءِ ڪنٽينر ڏيڻ جي ڳالهه ڪندڙ عمران خان اڄ ڌمڪين تي لهي آيو آهي. پ پ اڳواڻ جو چوڻ هو ته اپوزيشن احتجاج جو اشارو ڏنو آهي ته عمران خان جو رڙيون نڪري ويون، عمران خان قوم کي جيترو قرضي ڪيو، ان جو حساب ڏيڻو پوندو، عمران خان اسيمبلي ۾ ائين لٿ لوڏيو جيئن اڳ پرويز مشرف لوڏيو هو، سياستدانن کي جيلن ۾ وجهڻ جو سلسلو ايوب خان کان شروع ٿيو، جنرل ضياءَ ذوالفقار علي ڀٽو کي شهيد ڪيو، پرويز مشرف هٿان محترمه بينظير ڀٽو کي شهيد ڪيو ويو، پرويز مشرف جي دور ۾ نواب اڪبر بگٽي کي قتل ڪرايو ويو پر نتيجو ڇا نڪتو، هو اين آر او ڏئي عمران خان جي ويجهو ملڪ کي تباهه ڪندڙ سڀ کان وڏو ڏوهاري دبئي ۾ ويٺو آهي. سندس وڌيڪ چوڻ هو ته اسان توهان کي ياد ڏياريون ٿا ته پرويز مشرف ٻه ڀيرا آئين ٽوڙيو، جنهن جو هو ڏوهاري آهي، عمران خان سان گڏ سڀ ادارا آهن، جيڪڏهن همٿ اٿس ته پرويز مشرف کي واپس آڻي ۽ ان کي ڪيفر ڪردار تائين پهچائي، عمران خان صاحب! توهان ايوان جا قائد آهيو، ايوان ۾ تقرير ڪرڻ جي همٿ ڪريو، عمران خان صاحب بزدل بڻجي اسٽوڊيو ۾ تقرير ڪرڻ ڪو ڪمال ناهي.

 

دوداپور: اوڍا ۽ جکراڻي برادري ۾ پراڻي تڪرار تان فائرنگ، 3 ڄڻا مارجي ويا، 7 زخمي

دوداپور (م.ڊ) دودا پور ويجهو اوڍا ۽ جکراڻي خوني تڪرار ٻيھر ڀڙڪي اٿيو، ٻنهي ڌرين پاران هڪ ٻئي مٿان فائرنگ سبب اوڍا برادري جا 3 ڄڻا ٿڏي تي مارجي ويا جڏهن تھ 7 ڄڻا زخمي ٿي پيا آهن. تاجو ديرو ٿاڻي جي حد ڳوٺ شير خان اوڍو ۾ اوڍا ۽ جکراڻي برادري ۾ ڪرڪيٽ جي معمولي ڳالھه تان شروع ٿيل تڪرار ٻيھر ڀڙڪي اٿيو. جکراڻي برادري جي ماڻھن ڳوٺ شير خان اوڍو تي جديد ھٿيارن سان فائرنگ ڪري ڏني، جنهن جي نتيجي ۾ صوبدار علي، ضمير حسين عرف حاجن اوڍو ۽ نادر علي اوڍو مارجي ويا.  فائرنگ جي نتيجي ۾ عامر اوڍو، آزاد اوڍو، مزمل اوڍو، لعل بخش اوڍو، گل محمد اوڍو ۽ ھڪ نينگري ثناءِ سخت زخمي ٿي پئي. ان موقعي تي  زخمي عامر علي اوڍي ميڊيا سان ڳالهائيندي چيو ته  جکراڻي برادري جي ھٿياربندن  ماڻهن صبح سوير سندن  ڳوٺ شير خان اوڍو تي چڙهائي ڪري فائرنگ ڪئي. هن ٻڌايو تھ  فائرنگ جي نتيجي ۾ سندن ٽي ڄڻا موقعي تي ئي مارجي ويا جڏهن تھ 7 ڄڻا زخمي ٿي پيا. هوڏانهن زخمين کي ڳڻتي جوڳي حالت ۾ لاڙڪاني منتقل ڪيو ويو آهي جڏهن تھ ڌريون پڻ مورچابند ٿي ويون آهن ۽ ٽن ڄڻن جي مارجي وڃڻ بعد علائقي ۾ خوف واري صورتحال ڇائنجي وئي آهي.

 

لنڊن پوليس جي الطاف حسين کان ٻن ڪلاڪن تائين پڇا ڳاڇا، متحده باني ڪنهن به سوال جو جوابا نه ڏنو، کيس آزاد ڪيوويو

لنڊن ( ويب ڊيسڪ ) برطانوي پوليس ايم ڪيو ايم باني الطاف حسين کان ٻه ڪلاڪ پڇا ڳاڇا ڪئي آهي. رپورٽن موجب ايم ڪيو ايم باني کان گذريل رات برطانوي وقت موجب رات 10 کان 12 تائين پڇا ڳڇا ڪئي وئي ۽ ان دوران لنڊن پوليس کائنس سوال ڪيا جنهن جو الطاف حسين ڪو به جواب نه ڏنو. ايم ڪيو ايم باني رڳو پنهنجو نالو، پيدائش جي تاريخ ۽ گهر جو پتو پوليس کي ٻڌايو جڏهن ته پڇاڳاڇا دوران الطاف حسين جا وڪيل به ساڻس گڏ هئا. ٻئي پاسي لنڊن پوليس ايم ڪيو ايم باني کي وڌيڪ ٻارنهن ڪلاڪ قيد ۾ رکڻ جي درخواست ڏئي ڇڏي آهي، الطاف حسين جي 24 ڪلاڪن لاءِ قيد جو وقت پورو ٿيڻ کان پوءِ کيس وڌيڪ قيد ۾ رکيو ويندو جنهن لاءِ درخواست سائوٿ ورڪ پوليس اسٽيشن جي سپرنٽنڊنٽ ڏني آهي.

 

چهري سان گڏ دل به خوبصورت هجي ته انسان جي شخصيت مڪمل ٿي ويندي آهي: صبا نور

لاهور(شوبز نيوز)ٽي وي جي مقبول اداڪار صبا قمر چيو آهي ته کيس خوبصورتي کان وڌيڪ پنهنجي فن تي ناز آهي. چهري سان گڏ دل به /ڏسو صفحو 6 بقايا نمبر 36

خوبصورت هجي ته انسان جي شخصيت مڪمل ٿي ويندي آهي. هن چيو ته“ شو بز ۾ ڪيترن ئي ماڻهن تي ڀروسو ڪيم پر افسوس جو ڪجهه ماڻهن منهنجي اعتماد کي ڇيهو رسايو پر آئون ان ۾ به بهتري ٿي سمجهان ڇاڪاڻ ته مون کي انهن ماڻهن جي رويي مان اهڙو تجربو ٿيو جيڪو آئون شايد سالن ۾ به حاصل نه ڪري سگهان ها.صبا قمر وڌيڪ چيو ته“ ڪڏهن به مقابلي جي ڊوڙ ۾ شامل نه ٿيس. جيڪو به سٺو ڪم ڪندو اهو نمبر ون هوندو آهي ۽ ان لاءِ کيس ڪنهن کان به سرٽيفڪيٽ وٺڻ جي ضرورت نه هوندي آهي”.صبا قمر چيو آهي ته هو جڏهن سمجهندي ته هاڻي هنجو دئور ختم ٿي ويو آهي ته ڪنهن مناسب وقت تي شو بز کي خيرآباد چئي ڇڏيندي.