تازيون خبرون
مودي نئين دور جو هٽلر قرار، ڪشمير تي حملو پاڪستان تي حملي جي برابر آهي: فردوس عاشق - الله جي ڳالهه ڪڏهن به تبديل ناهي ٿيندي، مسلمان پاڻ کي سياسي طور مضبوط ڪن: حج جو خطبو - وفاقي حڪومت جو اورسيز پاڪستانين لاءِ صحت کارڊ جاري ڪرڻ جو اعلان - وطن لاءِ حياتي ڏيڻ سڀ کان وڏي قرباني آهي، شهيد قوم جا هيرو آهن : آرمي چيف - ڀارت جو سمجهوتا ايڪسپريس ۽ ٿر ايڪسپرين بحال ڪرڻ جو مطالبو رد، آرمي چيف ۽ عمران خان هڪ ئي گاڏي جا ٻه ڦيٿا آهن: شيخ رشيد - فريال ٽالپر ۽ آصف زرداري خلاف ٽئڪس اوڳاڙي جو نوٽيس معطل، عدالت ايف بي آر کي ٽئڪس اوڳاڙڻ کان روڪي ڇڏيو - وفاقي حڪومت گيس ٽيرف ۾ 200 سيڪڙو تائين واڌ کان پوءِ  ڏيڍ مهيني اندر وڌيڪ 39 سيڪڙو واڌ ڪري ڇڏي - سپريم جوڊيشل ڪائونسل، جسٽس قاضي فائز عيسيٰ تي فرد جرم لاڳو ڪري ڇڏيو - ڪراچي سميت سنڌ ۾ سانوڻي جو وسڪارو، روڊ رستا ٻڏي ويا، مواصلاتي نظام درهم برهم، ڪرنٽ لڳڻ سبب 4 فوت - هزارين ڪشميرين جو پاڪستاني جهندي واري مارچ ڀارت جي لاءِ اڻٽٽ ڀت آهي: سراج الحق

Daily Archives: June 11, 2019

وفاقي بجيٽ پيش، خساري ۾ واڌ، کائڻ جون شيون مهانگيون، اپوزيشن جو احتجاج، “گو عمران گو” جا نعرا

اسلام آباد(ويب ڊيسڪ) روينيو بابت مملڪتي وزير حماد اظهر قومي اسيمبلي ۾ پاڪستان تحريڪ انصاف (پي ٽي آءِ) جي پهرين مڪمل بجيٽ پيش ڪري ڇڏي جنهن جي تقرير دوران مخالف ڌر طرفان سخت احتجاج ڪيو ويو. روينيو بابت مملڪتي وزير حماد اظهر مالي سال 20-2019 جي بجيٽ پيش ڪندي چيو ته وزير اعظم عمران خان جي قيادت ۾ هڪ نئين سفر جو آغاز ٿيو آهي، تحريڪ انصاف نئين سوچ، نئين عزم ۽ هڪ نئون پاڪستان آندو آهي، پاڪستان جي ماڻهن جي مرضي اسان کي هتي آندو آهي، هاڻ وقت آهي ماڻهن جي زندگي ڪرڻ جو، ادارن ۾ ميرٽ آڻڻ جو ۽ ڪرپشن ختم ڪرڻ جو. هن چيو ته اسان سڀ هن ملڪ ۽ آئين جا محافظ آهيون، هن حڪومت جي چونڊجندي وقت موجود معاشي صورتحال کي ياد ڪيو ۽ ڪجهه حقيقتون ٻڌائڻ جي اجازت ڏيو. سندس چوڻ هو ته پاڪستان جو گڏيل قرض ۽ ادائيگيون 31 هزار ارب رپيا هئي ۽ 97 ارب ڊالر پرڏيهي قرض ۽ ادائيگيون هيون ۽ ڪيترائي واپاري قرض وڌيڪ سود تي ورتا ويا، گذريل 5 سالن ۾ برآمدات ۾ ڪا به واڌ نٿي هئي، جڏهن ته حڪومت جو مالياتي خسارو 2 هزار 260 ارب رپين تائين پهچي ويو هو. مملڪتي وزير ٻڌايو ته جڏهن تحريڪ انصاف کي حڪومت ملي ته بجلي جي نظام جو گردشي قرض 1200 ارب رپين تائين پهچي ويو هو ۽ 38 ارب رپي اماهوار جي شرح سان وڌندو رهيو، سرڪاري ادارن جي ڪارڪردگي 1300 ارب رپين جي گڏيل خسارين سان ظاهر ٿي، پاڪستاني رپئي جو قدر بلند رکڻ جي لاءِ اربين ڊالر هنيا ويا، هن مهانگي حڪمت عملي سان برآمدات کي نقصان رسيو، درآمدات کي سبسڊي ملي ۽ معيشت کي نقصان رسيو، ائين گهڻي دير نه پئي هلي سگهيو ان ڪري ڊسمبر 2017ع ۾ رپيو ڪرڻ لڳو ۽ ترقي جو زور ٽٽي پيو، شين جي قيمتن تي دٻاءُ وڌي رهيو هو. هن چيو ته حڪومت وقت جي ذميواري هئي ته هو مناسب بندوبستن سان صورتحال کي قابو ڪري ها، اسان فوري خطرن کي منهن ڏيڻ ۽ معاشي استحاڪم جي لاءِ ڪجهه بندوبست ڪيا، درآمدي ڊيوٽي ۾ واڌ سان اِها درآمدات 49 ارب ڊالر کان گهٽ ٿي 45 ارب ڊالرن تائين اچي وئي ۽ واپاري خسارو 4 ارب ڊالر گهٽ ٿيو. وزير اعظم طرفان اعتماد ڏيارڻ سان ترسيلات زر ۾ 2 ارب ڊالر جي واڌ ٿي، 38 ارب رپيا ماهوار جي حساب سان وڌندڙ بجلي جي گردشي قرضي ۾ 12 ارب رپين جي ماهوار گهٽتائي آئي ۽ ان کي 26 ارب رپين تي آندو ويو جڏهن ته چين، متحده عرب امارات ۽ سعودي عرب سميت ٻين ملڪن مان 9.2 ارب ڊالر جي امداد ملي ان امداد تي  انهن ملڪن جا ٿورائتا آهيون. سندس چوڻ هو ته صنعتي ۽ برآمدي شعبن کي رعايتي اگهن تي بجلي ۽ گيس جي فراهمي، گهٽ وياج تي قرض جي فراهمي، ڪچي تيل تي لاڳو درآمدي ڊيوٽي ۾ گهٽتائي جي ذريعي گڏيل طور تي 10 ارب رپين جي رعايت، برآمدي شعبي ۾ وزير اعظم جي پروگرام ۾ 3 سالن جي واڌ، چين کان 313 شين جي ڊيوٽي فري معاهدي جهڙن بندوبستن سان موجوده سال ۾ برآمدات جي حجم ۾ واڌ ٿي. حماد اظهر چيو ٻڌايو ته نِٽ ويئر ۾ 16 سيڪڙو، بيڊ ويئر ۾ 10 سيڪڙو، ريڊي ميڊ گارمنٽس ۾ 29 سيڪڙو، ڀاڄين ۽ ميون ۾ 11 ۽ 18 سيڪڙو ۽ باسمتي چانورن جي مقدار ۾ 22 سيڪڙو واڌ ٿي.  هن چيو ته ان کان سواءِ آءِ ايم ايف کان 6 ارب ڊالر جو معاهدو ٿي ويو آهي، آءِ ايم ايف جي بورڊ جي منظوري کان پوءِ ان تي عملدرآمد شروع ٿي ويندو، ان پروگرام ۾ هئڻ جي ڪري گهٽ وياج تي 2 کان 3 ارب ڊالر جي اضافي امداد به ميسر ٿيندي، مالياتي نظم ۽ ضبط ۽ بنيادي سڌارن جي لاءِ حڪومت جي سنجيدگي نظر ايندي جنهن سان عالمي سيڙپڪارن جو اعتما حاصل ٿيندو ۽ معيشت کي استحاڪم حاصل هوندو. هن چيو ته سعودي عرب کان فوري ادائيگي کان سواءِ 3.2 ارب ڊالر جي ساليانو تيل درآمد ڪرڻ جي سهولت حاصل ڪئي جيئن عالمي ڪرنسي جي ذخيرن تي دٻاءُ گهٽ ٿئي، ان کان سواءِ حڪومت اسلامي ترقياتي بينڪ کان هڪ ارب ڊالر جي فوري ادائيگي کان سواءِ تيل درآمد ڪرڻ جي سهولت حاصل ڪئي، انهن قدمن جي ڪري ئي هن سال ڪرنٽ اڪائونٽ خساري ۾ 7 ارب ڊالرن جي گهٽتائي ايندي. حماد اظهر ٻڌايو ته پرڏيهي استحاڪم کان سواءِ حڪومت ٻيا بندوبست به ڪيا، اثاثا ظاهر ڪرڻ جي اسڪيم تي عملدرآمد جاري آهي جنهن سان ٽيڪس جو دائرو وسيع ٿيندو ۽ بنا نالي ۽ غير رجسٽرڊ اثاثا معيشت ۾ شامل هوندا، 95 ترقياتي منصوبا مڪمل ڪرڻ جي لاءِ فنڊ جاري ڪيا ويا، اسٽيٽ بينڪ کي وڌيڪ خودمختياري ڏني وئي، ٽيڪس پاليسي کي ٽيڪس انتظاميا کان الڳ ڪيو ويو آهي جيئن ٻئي ڪم بهتر طريقي سان ٿين، هڪ ٽريزري بينڪ اڪائونٽ بڻايو ويو آهي ۽ هاڻ حڪومت جي رقم ڪمرشل بينڪ اڪائونٽ ۾ رکڻ منع آهي، پاڪستان بڻايو سرٽيفڪيٽ جاري ڪيو ويو جيئن سمنڊ پار پاڪستاني 6.75 سيڪڙو منافعي مان فائدو کڻي وطن ۾ سيڙپڪاري ڪن.  ٻئي طرف  قومي اسيمبلي ۾ روينيو واري مملڪتي وزير حماد اظهر طرفان وفاقي بجيٽ پيش ڪئي وئي جنهن دوران اپوزيشن ميمبرن احتجاج ڪري وزيراعظم خلاف سخت نعريبازي ڪئي،  بجيٽ پيش ڪرڻ دوران اپوزيشن ميمبر پنهنجي سيٽن تي بيهي رهيا ۽ اسپيڪر ڊائس سامهون گڏ ٿي ويا، کين پلي ڪارڊ کنيل ها ۽ اهي وزيراعظم عمران خان خلاف نعريبازي ڪندي گو نيازي گو ۽ گو عمران گو جا نعرا هڻي رهيا هئا.

 

اڳوڻو صدر رمانڊ تي نيب حوالي، منهنجي گرفتاري دٻاءُ جي حربي ۾ آهي: زرداري

اسلام آباد ( ويب ڊيسڪ ) اسلام آباد جي احتساب عدالت جعلي بئنڪ اڪائونٽ ڪيس ۾ گرفتار اڳوڻي صدر آصف علي زرداري کي 10 ڏينهن جي جسماني رمانڊ تي نيب حوالي ڪري ڇڏيو آهي. نيب گذريل ڏينهن اسلام آباد هاءِ ڪورٽ طرفان آصف زرداري جي مستقل ضمانت جي درخواست رد ٿيڻ کيس زرداري هائوس مان گرفتار ڪيو هو. نيب طرفان اڳوڻي صدر کي احتساب عدالت جي ارشد ملڪ جي عدالت ۾ پيش ڪيو ويو. ٻڌڻي دوران نيب پراسيڪيوٽر مظفر عباسي موقف اختيار ڪيو ته بئنڪ اختيارين جي سهڪار سان جعلي بئنڪ اڪائونٽ کوليا ويا، جوابدار کي گرفتار ڪيو آهي، جاچ لاءِ رمانڊ جي ضرورت آهي. جج ارشد ملڪ پڇاڻو ڪيو ته آصف زرداري کي ڪهڙي بنيادن تي گرفتار ڪيو ويو پهريان اهي ٻڌايو جنهن تي نيب پراسيڪيوٽر چيو ته گرفتاري جي بيناد پڙهي ٻڌايان ٿو. نيب پراسيڪيوٽر طرفان چيو ويو ته آصف زرداري جي گرفتاري لاءِ اٺ پڪا بنياد آهن ، هن جعلي اڪائونٽن ۾ ٽرانزيڪشن ڪري غيرقانوني آمدني کي جائز ڪرڻ جو منصوبو جوڙيو ۽ پنهنجي فرنٽ مين ۽ بي نامي دارن ذريعي مني لانڊرنگ ڪئي، هن بئنڪ اختيارين جي سهڪار سان جعلي اڪائونٽن کوليا. نيب احتساب عدالت کان آصف زرداري جي 14 ڏينهن جي جسماني رمانڊ جي استدعا ڪئي جنهن تي عدالت فيصلو محفوظ ڪري ورتو. احتساب عدالت اٽڪل هڪ ڪلاڪ کان پوءِ فيصلو ٻڌائيندي اڳوڻي صدر جو 10 ڏينهن جو جسماني رمانڊ منظور ڪندي کيس نيب جي حوالي ڪري ڇڏيو آهي. عدالت آصف زرداري کي 21 جون کي ٻيهر پيش ڪرڻ جو حڪم ڏنو آهي. آصف زرداري نيب جيل ۾ اضافي سهولتن جي درخواست داخل ڪندي چيو ته ذاتي خدمتگار گڏ رکڻ جي اجازت ڏني وڃي ۽ سموريون طبي سهولتون به مهيا ڪيون وڃن. ان موقعي تي سيڪيورٽي جا انتهائي سخت انتظام ڪيا ويا هئا، 3 سئو پوليس اهلڪار نيب راولپنڊي جي آفيس ۽ 500 اهلڪار احتساب عدالت ٻاهران مقرر هئا جڏهن ته رينجرز اهلڪارن به گشت ڪيو.  اڳوڻي صدر آصف علي زرداري چيو آهي ته سليڪٽڊ وزيراعظم کي ڪا خبر ناهي، هي سڀ گهرو وزير ڪرائي رهيو آهي. عدالت جي ڪمري ۾ صحافين سان غيررسمي ڳالهه ٻولهه ڪندي اڳوڻي صدر آصف زرداري چيو ته سليڪٽڊ وزيراعظم کي ڪا خبر ناهي، سڀ گهرو وزير ڪرائي رهيو آهي، پرويز مشرف چونڊيل نمائندو نه هو تنهنڪري جيل وڃڻ لاءِ تيار ناهي، پرويز مشرف کي ووٽ وٺڻ لاءِ ناهي وڃڻو اسان کي ووٽ لاءِ وٺڻ وڃڻو آهي. آصف زرداري چيو ته گرفتاري ٽئين دنيا ۾ سياست جو حسن آهي، منهنجي گرفتاري دٻاءُ جي حربي ۾ آهي جڏهن ته مون چيو هو ته نيب چيئرمين جي ڪهڙي مجال، سڀ حڪومت ڪندي آهي پر عمران خان کي لنڊن ڀڃندي ڏسي رهيو آهيان. هڪ سوال تي نواز شريف کي پارليامنٽ مان آئوٽ ڪيو ويو، ڇا اوهان تي به اهو ئي فارمولو اپلائي ڪيو پيو وڃي، جنهن جي جواب ۾ آصف زرداري چيو ته ڪهڙو فرق پوندو، مان نه هوندس ته بلاول هوندو ۽ بلاول نه هوندو ته آصفه هوندي. صحافي طرفان سوال تي نواز شريف ميمو گيٽ تي افسوس جو اظهار ڪيو، اوهان کي بلوچستان حڪومت ڪيرائڻ تي افسوس آهي، اڳوڻي صدر چيو ته سياست ۾ انسان کي پوزيشن وٺڻي پوندي آهي.

 

ايم ڪيو ايم باني لنڊن ۾ گرفتار، ڪراچي ۾ سيڪيورٽي سخت ڪرڻ جي هدايت

ڪراچي/لنڊن ( ويب ڊيسڪ ) ايم ڪيو ايم جي باني الطاف حسين کي لنڊن ۾ گرفتار ڪيو ويو آهي. ميٽرو پوليٽن پوليس طرفان جاري ڪيل بيان موجب متحدا قومي موومنٽ سان سلهاڙيل هڪ شخص کي پاڪستان ۾ ڪيل تقريرن بابت ڪئي ويندڙ جاچ جي سلسلي ۾ گرفتار ڪيو ويو آهي. بيان ۾ ڄاڻايو ويو آهي ته 60 ورهين جي شخص کي اتر اولهه لنڊن ۾ سنگين ڏوهن واري ايڪٽ 2007ع جي قلم 44 تحت،  ڀڙڪائڻ يا ڏوهه ۾ مدد فراهم ڪرڻ جي شڪ ۾ گرفتار ڪيو ويو آهي، کيس پوليس اينڊ ڪرمنل ايويڊنس ايڪٽ تحت گرفتار ڪري ڏکڻ لنڊن جي پوليس اسٽيشن منتقل ڪيو ويو آهي، جتي کائنس پڇاڳاڇا ڪئي پئي وڃي. بيان ۾ چيو وي آهي ته جاچ جي سلسلي ۾ آفيسرن اتر اولهه لنڊن جي ايڊريس تي تلاشي ورتي ۽ جاچ ڪندڙن اوتر اولهه لنڊن ۾ هڪ الڳ ڪمرشل ايڊريس جي به تلاشي ورتي وئي. ميٽرو پوليٽن پوليس جي بيان موجب ميٽرو پوليٽن پوليس جي دهشتگردي ٽوڙ ڪمانڊ سان تعلق رکندڙ آفيسرن طرفان ڪئي ويندڙ جاچ جون نظرون ايم ڪيو ايم سان سلهاڙيل شخص طرفان آگسٽ 2016ع ۾ پاڪستان ۾ ڪيل تقرير تي کتل آهن جڏهن ته گڏوگڏ ڄاڻايل شخص جي ٻين تقريرن جو به جائزو ورتو پيو وڃي. ان سڄي جاچ دوران لنڊن پوليس جي آفيسرن پاڪستاني اختيارين سان رابطي ۾ رهيا ۽ جاچ جاري رکي جيڪا اڃا تائين جاري آهي. لنڊن ۾ متحدا قومي موومنٽ جي باني جي گرفتار ٿيڻ کان پوءِ سنڌ جي راڄڌاني ڪراچي جي سمورن علائقن ۾ سيڪيورٽي جا انتظام انتهائي سخت ڪرڻ جي هدايتون جاري ڪيون ويون آهن. آءِ جي سنڌ ڊاڪٽر ڪليم امام ڪراچي جي سمورن ضلعن ۾ ايس ايس پيز  کي حڪم ڏيندي سمورن علائقن ۾ سيڪيورٽي انتظام فول پروف ڪرڻ جي هدايت ڪئي آهي. ايڊيشنل آءِ جي جو چون آهي ته ايس ايس پيز ۽ ايس ايڇ اوز پنهنجن حدن ۾ پٽرولنگ تي نڪرن، هن قانون جي ڀڃڪڙي ڪرڻ تي پوليس کي ڪارروائي ڪرڻ جي هدايت ڪندي چيو آهي ته ڪراچي جو امن خراب ڪرڻ جي ڪنهن کي به اجازت نه ڏني ويندي.

 

حمزه شهباز نيب هٿان عدالتي ڪمري مان گرفتار، ليگي رودن تي نڪري آيا

لاهور ( ويب ڊيسڪ ) پاڪستان مسلم ليگ ن جي نائب صدر ۽ پنجاب اسيمبلي ۾ مخالف ڌر اڳواڻ حمزا شهباز شريف کي نيب گرفتار ڪري ورتو آهي. لاهور هاءِ ڪورٽ جي جسٽس مظاهر علي اڪبر نقوي جي سربراهي ۾ ٻه رڪني بئنچ حمزا شهباز جي ضمانت جي درخواست تي ٻڌڻي ڪئي. ٻڌڻي دوران نيب پراسيڪيوٽر جهانزيب ڀروانه دليل ڏيندي چيو ته حمزا شهباز شريف جي 38 ڪروڙ 80 لک جا اثاثا سندس آمدني سان هڪجهڙائي نٿا رکن. هن ٻڌايو 2015ع کان 2018ع تائين حمزا شهباز اثاثا ظاهر نه  ڪيا ۽ اوچتو حمزا شهباز 2019ع  ۾ چيو ته سندس اثاثا 5 ڪروڙ مان 20 ڪروڙ جا ٿي ويا آهن. نيب جي وڪيل اهو پڻ چيو ته حمزا شهباز کان پڇو ويو ته پرڏيهه مان جيڪي پئسا ايندا آهن ان جو ذريعو ٻڌايو پر حمزا شهباز نه ٻڌائي سگهيو، عدالت پڇاڻو ڪيو ته ڇا حمزا شهباز عدالت ۾ موجود آهي، جنهن تي سندس وڪيل سلمان بٽ چيو ته جي حمزا شهباز عدالت جي ڪمري ۾ موجود آهي. حمزا شهباز جي وڪيل ٻڌايو ته نيب رڳو گرفتاري جا سبب ۽ انڪوائري ۽ جاچ بابت دستاويز ڏئي. عدالت پڇاڻو ڪيو ته مني لانڊرنگ ڪيس ۾ حمزا شهباز جا گرفتاري وارنٽ  نيب چيئرمين جاري ڪيا آهن جنهن تي سندس وڪيل جواب ڏنو ته نيب چيئرمين سندس اصيل جا گرفتاري وارنٽ جاري ڪري ڇڏيا آهن. جسٽس مظاهر علي اڪبر نقوي رمارڪس ڏيندي چيو ته اسان جيڪو به فيصلو ڪنداسين بنهه قانون موجب ڪنداسين، نيب پراسيڪيوٽر عدالت کي ٻڌايو ته حمزا شهباز ڪيئي بئنڪ اڪائونٽن مان شڪي ٽرانزيڪشنز ڪئي ۽ سندس خلاف درخواست به ملي. هن ٻڌايو ته حمزا کان آف شور ڪمپنين بابت پڇا ڳاڇا ڪئي وئي جنهن دوران هو تسلي بخش جواب نه ڏئي سگهيو هو. حمزا شهباز پنهنجي ضمانت جون درخواستون واپس وٺي ڇڏيون جنهن کان پوءِ نيب اختيارين حمزا شهباز کي عدالت جي ڪمري مان گرفتار ڪيو، کيس نيب آفيس ٺوڪر نياز بيگ منتقل ڪيو ويندو. ٻئي طرف مسلم ليگ ن جي اڳواڻ ۽ اڳوڻي وزيراعظم شاهد خاقان عباسي چيو آهي ته ڪرپٽ ماڻهو هن وقت وزيراعظم جي ساڄي، کاٻي پاسي ويٺا آهن ۽ جنهن چور کي پروٽيڪشن حاصل ڪرڻو آهي اهو پي ٽي آءِ ۾ هليو وڃي کيس نيب سميت ڪو به نه هٿ نه لائيندو. اسلام آباد ۾ ميڊيا سان ڳالهائيندي شاهد خاقان عباسي چيو ته نيب حمزا شهباز کي جيترا سوالناما ڏنا اهي ڀريا ويا، هو هر پيشي تي نيب آڏو پيش ٿيو، هڪ ڏنهن جي ٻارڙي جو آپريشن ڇڏي آيو ۽ جاچ ۾ شامل رهيو، جڏهن اهو ڪيس شروع ٿيو ته نيب پريس ڪانفرنس ڪئي ۽ ٻڌايو ته 87 اربن جي مني لانڊرنگ ٿي آهي، پوءِ اها 33 اربن جي ٿي وئي ۽ اڄ آخرڪار 18 ڪروڙ تي وڃي پهتي آهي. هن چيو ته اهو ڪيس 2005ع کان 2008 تائين جو آهي جڏهن ملڪ ۾ مشرف جي حڪومت هئي ۽ حمزا شهباز ڪنهن به اسيمبلي جو ميمبر نه هو، هو هڪ عام شهري هو،  جن 18 ڪروڙن جي ڳالهه ڪئي وئي اها ملڪ کان ٻاهر ويندڙ نه پر هن ملڪ ۾ اندر اچڻ جو الزام آهي، ڇا مني لانڊرنگ ملڪ ۾ اندر ايندڙ پئسن تي ٿيندي آهي؟ هي اهو پئسو آهي جيڪو حمزا هر سال پنهنجي سمورن ٽئڪس ريٽرن ۾ ڏيکاريو، اها رقم لڪل نه هئي. شاهد خاقان عباسي جو چوڻ آهي ته اها سياست ۽ سياستدانن کي بدنام ڪرڻ جي ڪوشش آهي، اسان احتساب کان نٿا ڊڄون، الزام هڻو پر ثبوت عوام جي اڳيان رکو، جيڪو الزام حمزا شهباز تي مڙهيو ويو آهي اهو پاڪستان جي هر ان شخص تي لڳي ٿو جنهن جو ٻاهران پئسو ايندو آهي. اڳوڻي وزيراعظم چيو ته خسرو بختيار کان به سوال ڪيا وڃن، عليمه خان ۽ فيصل واوڊا کان پڇو، هٿان اثاثا ٻاهر موڪليا هنن وٽ ڪو به ثبوت ناهي، احتساب سڀني جو ڪريو پر اهو معيار سڀني لاءِ هڪجهڙو هئڻ گهرجي، جيڪو سوالنامو اسان کي ڏنو ويو اهو عمران خان به ڀري عوام اڳيان رکي، عوام کي ٻڌايو ته حمزا ڪهڙو ڏوهه ڪيو آهي. شاهد خاقان عباسي جو چوڻ هوته اڄ وزيراعظم خوش آهي ته ماڻهو ڪرپشن ۾ گرفتار ٿيا، ڪرپٽ ماڻهن سندس ساڄي ۽ کاٻي پااسي ويٺل آهن، کين به گرفتار ڪريو، جنهن ملڪ جو وزيراعظم ٽئڪس چور هجي، ايمنسٽي اسڪيم مان فائدو کنيو هجي، وري هو صبح جو تقرير ڪري اسان کي چئي ٽئڪس ادا ڪريو، معيشت تباهه ئي انڪري آهي جو ٻٽا معيار آهن، حڪومت اعتماد وڃائي چڪي آهي، ماڻهو سيڙپڪاري لاءِ تيار ناهن، جنهن چور کي پروٽيڪشن حاصل ڪرڻي اهو پي ٽي آءِ ۾ شامل ٿي وڃي، کيس نيب سميت ڪو به نه پڇندو. هن دعويٰ ڪندي چيو ته وزيراعظم طور اسان جو ريڪارڊ حڪومت وٽ آهي، حڪومت نيب کي لکي ته ڪهڙي وزير کاتي ۾ ڪرپشن ڪئي، احسن اقبال هزارين اربن جي ترقياتي منصوبن تي ڪم ڪيو مٿس هڪ رپئي جي ڪرپشن ٽابت نه ٿي سگهي

 

الله تعاليٰ کي پاڪستان تي رحم اچي ويو آهي، جيڪي ماڻهو پڪڙيا پيا وڃن ان سان اسان کي فائدو ٿيندو: وزير اعظم

اسلام آباد ( ويب ڊيسڪ ) وزيراعظم عمران خان چيو آهي ته الله تعاليٰ کي پاڪستان تي رحم اچي ويو آهي ۽ جيڪي ماڻهو پڪڙجي رهيا آهن ان سان اسان کي فائدو ٿيندو. اسلام آباد ۾ وزيراعظم عمران خان جي صدارت هيٺ تحريڪ انصاف جي پارلياماني پارٽي جو اجلاس ٿيو جنهن دوران کيس لنڊن ۾ ايم ڪيو ايم باني الطاف حسين جي گرفتاري کان آگاهه ڪيو ويو . مخالف ڌر اڳواڻن جي گرفتاري تي وزيراعظم عمران خان تبصرو ڪندي چيو ته الله تعاليٰ کي پاڪستان تي رحم اچي ويو آهي، جيڪي ماڻهو پڪڙيا پيا وڃن ان سان اسان کي فائدو ٿيندو، مهذب معاشري ۾ ننڍي وڏي لاءِ الڳ قانون ناهي هوندو،  تنهنڪري نئين پاڪستان ۾ سڀني لاءِ هڪجهڙو قانون آهي. اجلاس ۾ اسيمبلي ميمبرن وزيراعظم جي ترقياتي فنڊ جاري نه ٿيڻ تي شڪايت ڪئي جنهن تي وزيراعظم عمران خان چيو ته تمام جلد اسيمبلي ميمبرن جي تڪن لاءِ فنڊ جاري ڪنداسين.

 

شهباز شريف اليڪشن ڪميشن ميمبرن جي مقرري لاءِ نظرثاني ٿيل نالا وزيراعظم ڏانهن موڪلي ڇڏيا

اسلام آباد ( ويب ڊيسڪ ) مخالف ڌر اڳواڻ شهباز شريف اليڪشن ڪميشن ميمبرن جي مقرري لاءِ نظرثاني ٿيل نالا وزيراعظم عمران خان ڏانهن ڏياري موڪليا آهن. قومي اسيمبلي ۾ مخالف ڌر اڳواڻ شهباز شريف اليڪشن ڪميشن ميمبرن جي مقرري لاءِ نظر ثاني ٿيل نالا وزيراعظم کي ڏياري موڪليا آهن، شهباز شريف طرفان وزيراعظم عمران خان کي لکيل خط ۾ سنڌ مان سينيئر وڪيل خالد جاويد، جسٽس ( ر ) عبدالرسول ميمڻ ۽ جسٽس ( ر ) نور الحق قريشي جڏهن ته بلوچستان مان صلاح الدين مينگل، شاهه محمد جتوئي ۽ رئوف عطاءَ جا نالا تجويز ڪيا ويا آهن. شهباز شريف طرفان خط ۾ لکيو ويو آهي ته چونڊن لاءِ هر اميدوار تي تفصيلي گڏيل مشاورت ضروري آهي، اتفاق راءِ  لاءِ مخلص، سنجيدا ۽ حقيقي مشاور ٿيڻ گهرجي، حقيقي مشاورت نه ٿي ته آئيني ذميوري ادا نه ٿيندي. شهباز شريف خط ۾ لکيو ته اوهان اڳوڻن نامزدگين تي ڪوڙا، بي بنياد الزام مڙهيا ۽ خلاف راءِ ڏني، اوهان پنهنجي پرڏيهي وزير جي خط ۾ نامزد شخص کي ئي بعد ۾ ” نااهل “ قرار ڏنو تنهنڪري آئون فيصلو ڪيو آهي ته اهڙي راءِ نه ڏيان جنهن سان ڪنهن جي دل آزاري ٿئي، توهان جي نامزد ڪيل ماڻهن جي نالن تي آئون تفصيلي غور ويچار ڪيو آهي، درخواست آهي ته اوهان انهن ترميم ٿيل نالن تي سنجيدگي سان غور ڪريو.

 

”ن ليگ رڳو سازش ڪري سگهي ٿي مزاحمت نه“، حڪومت عوام جون دليون کٽي ورتيون آهن: فردوس عاشق اعواڻ

اسلام آباد ( ويب ڊيسڪ ) وزيراعظم جي سڌ سماءُ بابت خاص مددگار فردوس عاشق اعواڻ چيو آهي ته سنڌ تائين محدود ٿيندڙن جي عوامي مقبوليت ٻڙي آهي. فردوس عاشق اعواڻ سماجي رابطن واري ويب سائيٽ ٽوئيٽر تي پنهنجي پيغام ۾ چيو آهي ته سچا هجن ها ته جهموريت جو پٽڻو پٽڻ بدران سچائي جو ثبوت ڏين ها، کين سزا سندن پنهنجن هٿن ڏني آهي. خاص مددگار چيو ته نيب سندن ٺاهيل ۽ چيئرمين سندن پنهنجو مقرر ڪيل آهي، پاناما پيپر اسان جاري نه ڪيو هو. فردوس عاشق چيو ته سنڌ تائين محدود ٿيندڙن جي عوامي مقبوليت ٻڙي آهي، سندس سياسي وجود جو اندازو ڪلهه ڪجهه ماڻهن جي ٻاهر نڪرڻ مان ٿي ويو. هن چيو ته ڪرپٽ ٽولو تحريڪ هلائي پنهنجي رسوائي جو انتظام ڪري رهيو آهي، قومي ناڻو لٽيندڙن جي احتجاج کي عوام رد ڪري ڇڏيندو. سندس وڌيڪ چوڻ هو ته تاريخ شاهد آهي ن ليگ ٻين جي ڪلهن تي سوار ٿي آئي، اها رڳو سازش ڪري سگهي ٿي مزاحمت نه.فردوس عاشق اعواڻ چيو آهي ته اڄ حڪومت قانون تي عملدرآمد ڪري عوام جون دليون کٽي ورتيون آهن. فردوس عاشق چيو ته هڪجهڙي قانون کي ممڪن بڻائڻ تي عمران خان کي وڌايون پيش ڪريان ٿي، ٻن وڏين شخصيتن جو قانون پڪڙ ۾ اچڻ هاڪاري اڳڀرائي آهي. حمزا شهباز ۽ آصف زرداري صاحب جو گرفتار ٿيڻ ان ڳالهه جو ثبوت آهي ته قانون سڀ کان مٿانهون آهي، هن چيو ته طاقتور شخصيتن کي قانون  جي پڪڙ ۾ آڻڻ ۽ عدليا جي آزادي وزيراعظم عمران خان جو خواب هو. هن چيو ته عمران خان عوام سان واعدا ڪري آيو هو اڄ واعدن جي مڪمل ٿيڻ ڏانهن پهرين وک آهي.

 

بجيٽ ۾ بينظير انڪم سپورٽ پروگرام تحت وظيفو وڌائڻ ۽ راشن ڪارڊ اسڪيم شروع ڪرڻ جو اعلان

اسلام آباد (بيورو رپورٽ) بجيٽ ۾ بينظير انڪم سپورٽ پروگرام تحت وظيفو وڌائڻ ۽ راشن ڪارڊ اسڪيم شروع ڪرڻ جو اعلان ڪيو ويو آهي. نئين مالي سال 20-2019ع جي بجيٽ ۾ بينظير انڪم سپورٽ پروگرام تحت هن سال غريب ماڻهن کي ماهور 5 هزار ساڍا 5 هزار رُپيا ڏيڻ جي تجويز ڏني وئي آهي، اعليٰ تعليم لاءِ 45 ارب رکيا ويا، جڏهن ته ڪامياب جوان پروگرام تحت نوجوانن کي هڪ سئو ارب رُپين تائين سستا قرض ڏنا ويندا. بجيٽ ۾ غربت جي خاتمي لاءِ راشن ڪارڊ اسڪيم شروع ڪرڻ جو اعلان ڪندي مملڪتي وزير چيو ته روزگار پيدا ڪرڻ حڪومت جي پهرين ترجيح آهي، اُن سلسلي ۾ 50 لک گهر ٺاهڻ وار پروگرام ۾ 28 صنعتن کي فائدو ٿيندو.

 

اختر مينگل جي پ پ چيئرمين سان ملاقات، بلوچستان جي عوام جا زخم ڀرڻ بغير ملڪي ترقي جو هر تصور ناپائيدار هوندو: بلاول

اسلام آباد ( ويب ڊيسڪ ) بي اين پي سربراهه سردار اختر مينگل پاڪستان پيپلز پارٽي جي چيئرمين بلاول ڀٽو زرداري سان زرداري هائوس اسلام آباد ۾ ملاقات ڪئي ۽ اڳوڻي صدر آصف زرداري جي گرفتاري تي ٻڌيءَ جو اظهار ڪيو آهي . ان اهم ملاقات ۾ بلاول ڀٽو زرداري ۽ اختر مينگل ملڪي ۽ سياسي صورتحال تي خيالن جي ڏي وٺ ڪئي،  جڏهن ته بدترين معاشي صورتحال تي پيدا ٿيندڙ عوامي بي چيني ۽ ردعمل به بحث هيٺ آيو. سردار اختر مينگل پ پ چيئرمين کي چيو ته اڳوڻي صدر آصف علي زرداري جي گرفتاري تي ايڪي جو اظهار ڪرڻ لاءِ توهان وٽ آيو آهيان،  حڪومت 10 مهينن ۾ بي اين پي جي ڇهن نڪتن تي عملدرآمد ناهي ڪري سگهي. بلاول ڀٽو زرداري ٻڌيءَ جو اظهار تي سردار اختر مينگل جا ٿورا مڃيا، پ پ چيئرمين چيو ته بلوچستان جي عوام جا زخم ڀرڻ بغير ملڪي ترقي جو هر تصور ناپائيدار هوندو. هن وڌيڪ چيو ته بدقسمتي سان پاڪستان پيپلز پارٽي طرفان بلوچ عوام جي حقن جي فراهمي جي سلسلي کي ايندڙ حڪومتن روڪي ڇڏيو.

 

بلوچستان ۾ روڊ حادثي ۾ عورتن ۽ ٻارن سميت 7 ڄڻا فوت، 4 زخمي

ڪوئيٽا ( ويب ڊيسڪ ) حب ۾ وندر ويجهو روڊ حادثي ۾ عورتن ۽ ٻارن سميت هڪ ئي ڪٽنب جا ست ڀاتي فوت جڏهن ته ڪيترائي زخمي ٿي پيا آهن. بلوچستان جي علائقي حب ۾ وندر ويجهو قومي شاهراهه تي ٽرڪ ۽ ويگن ۾ ٽڪر جي نتيجي ۾ عورتن ۽ ٻارن سميت هڪ ئي ڪٽنب جا 7 ڄڻا فوت ۽ چار زخمي ٿي پيا. حادثي جو شڪار ٿيندڙ پنهنجن عزيزن سان ملڻ سرياب روڊ وڃي رهيا هئا. ريسڪيو ذريعن موجب حادثو تيز رفتاري سبب پيش آيو، حادثي کان پوءِ فوتين ۽ زخمين کي حب ۽ ڪراچي منتقل ڪيو ويو آهي. فوت ٿيندڙ لياقت آباد بلوچ پاڙا جا رهواسي هئا، حادثي ۾ ڪراچي سول اسپتال پهچي دم ڏيندڙ عورت جي سڃاڻپ حضيفهٰ جي نالي سان ٿي آهي.