تازيون خبرون

Daily Archives: June 1, 2019

پاڪستان، افغانستان ۽ مصر جو سمورن شعبن ۾ تعاون، ٻه طرفي سياسي رابطن ۽ ڏي وٺ وڌائڻ تي اتفاق

مڪه (اين اين آءِ) وزيراعظم عمران خان مصر جي صدر ۽ افغانستا جي صدر سان ڌار اڌار ملاقات ڪئي جنهن ۾ ٻه طرفي لاڳاپن سميت مختلف معاملن تي ڳالهيون ڪيون ويون، وزيراعظم آفيس ميڊيا ونگ پاران جاري ڪيل بيان موجب وزيراعظم عمران خان 14 هين اسلامي سربراهه ڪانفرنس جي موقعي تي جمعي تي مصر جي صدر عبدالصح علي اسيسي سان ملاقات ڪئي، ٻنهي اڳواڻن علائقائي ۽ ٻين الاقوامي معاملن تي خيالن جي ڏي وٺ ڪئي وئي، مسلم امت جي مسئلن تي به ڳالهه ٻولهه ڪئي، ٻنهي اڳواڻن سمورن شعبن ۾ تعاون وڌائڻ ۽ ٻه طرفي سياسي رابطن ۽ ڏي وٺ وڌائڻ تي اتفاق ڪيو، وزيراعظم عمران خان ۽ افغان صدر اشرف غني جمعي تي 14 هي اسلامي سربراهي ڪانفرنس جي موقعي تي ملاقات ڪئي، وزيراعظم آفيس جي ميڊيا ونگ پاران بيان موجب ملاقات دوران پاڪ افغان ٻه طرفو لاڳاپا ۽ خطي جي صورتحال تي خيالن جي ڏي وٺ ڪئي وئي.

 

اتر وزيرستان واقعي خلاف قومي اسيمبليءَ ۾ مخالف ڌر جو هنگامو، اجلاس ملتوي

اسلام آباد ( ويب ڊيسڪ ) اتر وزيرستان جي علائقي بويا ۾ خار قمر چيڪ پوسٽ تي چڪرين ۽ 13 ڄڻن جي مارجڻ جي واقعي خلاف قومي اسيمبليءَ ۾ شديد هنگامو ڪيو ويو. حڪومتي ميمبرن  پي ٽي ايم ۽ سندن اسيمبلي ميمبرن محسن داوڙ ۽ علي وزير تي تنقيد ڪندي اسيمبلي ميمبرشپ معطل ڪرڻ جڏهن ته پي ٽي ايم جي حامين کي ملڪ مان ڪڍڻ جو مطالبو ڪيو. مخالف ڌر جي ميمبرن سخت رد عمل ظاهر ڪندي سيٽن تي بيهي احتجاج ڪيو ۽ اسپيڪر جي ڊائس جو گهيراءُ ڪري نعريبازي ڪئي. تحريڪ انصاف جي اسيمبلي ميمبر علي محمد خان جي تقرير تي هنگامو ڪيو جڏهن ته بلاول ڀٽو زرداري به پنهنجي سيٽ تي بيهي احتجاج ڪيو. خرم دستگير ايس پي طاهر داوڙ جو معاملو اٿاريندي چيو ته ايس پي طاهر داوڙ جي قتل بابت حقيقتون نه ٻڌايون ويون آهن، حڪومت ٻڌائي ته هڪ ايس پي کي ٻن صوبن مان گذاري ڪيئن افغانستان منتقل ڪيو ويو، طاهر داوڙ هڪ بهادر آفيسر هو، حڪومت سندس قتل تي خاموش ڇو آهي. شهريار آفريدي چيو ته ماضي ۾ پختون قوم کي 1979 کان اڳ واري سڃاڻپ ٻڌائڻ ضروري قرار ڏنو ويو، اسان اهي مسئلا حل ڪيا جيڪي ماضي جي حڪومتن پختونن سان پيدا ڪيا، طاهر داوڙ جو لاش اين ڊي ايس حڪومت بدران منظور پشتين کي ڏنو، قوميت جي نالي تي هتي ڪنهن کي دڪانداري چمڪائڻ جي اجازت نه ڏني ويندي، طاهر داوڙ جي قتل بابت ڌيان ڇڪايو نوٽيس جمع ڪرايو، آگاهه ڪيو ويندو.  ممڪلتي وزير ان معاملي تي جذباتي تقرير ڪندي چيو ته پاڪستان جي پٽ جو لاش افغانستان جي پٺو حوالي ڪيو ويو، ايوان جا ميمبر رياست کي للڪاريندا آهن، جن جي ڪري وڳوڙ ٿيا تن کي ايوان ۾ رهڻ جو ڪو به حق ناهي، سندس ميمبرشپ معطل ڪئي وڃي، انهن جي بيگناهه ماڻهن جا لاش ڪريا، سندن جلسن ۾ پاڪستان جو جهنڊو کڻي وڃڻ جي اجازت ناهي هوندي، اهڙن ماڻهن کي ملڪ ۾ رهڻ جو ڪو به حق ناهي. مخالف ڌر جي گوڙ کانپوءِ اسپيڪر اجلاس جي ڪارروائي ملتوي ڪري ڇڏي.

 

ججن خلاف ريفرنس عدليه جي آزادي تي سڌو حملو قرار، سينيٽ ۾ ٺهراءُ منظور

اسلام آباد ( ويب ڊيسڪ ) سينيٽ ججن خلاف حڪومت طرفان ريفرنس موڪلڻ تي ججن سان ٻڌيءَ جي اظهار جو ٺهراءُ منظور ڪيو آهي. سينيٽ جي اجلاس ۾ مسلم ليگ ن اڳواڻ راجا ظفر الحق ججن سان ٻڌيءَ جي اظهار جو ٺهراءُ پيش ڪرڻ جي اجازت طلب ڪئي جنهن تي سينيٽ چيئرمين اجازت نه ڏني. ٺهراءَ ۾ چيو ويو ته ججن خلاف ريفرنس داخل ڪرڻ تي ايوان ڳڻتي ظاهر ڪري ٿو، اهو ريفرنس عدليه جي آزادي تي سڌو حملو آهي،  ايوان عدليه جي معزز ججن سان ٻڌيءَ جو اظهار ڪري ٿو.  راجا ظفر الحق جي ٺهراءَ ۾ مطالبو ڪيو ويو ته حڪومت معزز ججن خلاف ريفرنس واپس وٺي. ٺهراءَ ۾ چيو ويو ته ريفرنس ڳجهي انداز ۾ داخل ڪيو ويو جنهن بابت لاڳاپيل ججن کي ڪا خبر ناهي. ٺهراءَ ۾ چيو ويو ته ججن خلاف ريفرنس تي سخت تنقيد ٿي رهي آهي ۽ بار به ورهايل نظر پئي اچي، شڪ پيدا ٿئي ٿو ته ريفرنس معزز ججن جي تازن فيصلن بابت آهي، ايوان معزز ججن سان ٻڌيءَ جو اظهار ڪري ٿو ۽ حڪومت معزز ججن خلاف ريفرنس واپس وٺي. سينيٽ معزز ججن سان ٻڌيءَ جي اظهار جو ٺهراءُ منظور ڪري ورتو.

 

حڪومت سليڪٽڊ اپوزيشن ۽ سليڪٽڊ جج چاهي ٿي: بلاول زرداري

اسلام آباد ( ويب ڊيسڪ ) پ پ چيئرمين بلاول ڀٽو زرداري چيو آهي ته حڪومت سليڪٽڊ اپوزيشن ۽ سليڪٽڊ جج چاهي ٿي. پارليامينٽ هائوس ٻاهران ميڊيا سان ڳالهائيندي بلاول ڀٽو زرداري چيو ته اڄ جيڪو پارليامينٽ ۾ ٿيو جمهوريت ناهي پر آمراڻو طريقو آهي،  حڪومت اپوزيشن جي ڪنهن به اڳواڻ کي ڳالهائڻ نه ڏنو، اسلام آباد ۾ ٻه ڏينهن اڳ پرامن ماڻهن تي حملو ڪيو ويو،  ٻن اسيمبلي ميمبرن کي گرفتار ڪيو ويو، اسان جي عورت ايم اين اي تي تشدد ڪيو ويو. بلاول ڀٽو زرداري چيو ته پاڪستان ۾ حساس معاملا هلي رهيا آهن، حڪومت مشرف جو طريقو اختيار ڪري رهي آهي. هن چيو ته علي وزير جا پراڊڪشن آرڊر جاري ڪيا وڃن، حڪومت ڪوڙ ڳالهايو ته منهنجو خط کين نه مليو آهي.

 

نيب اڳوڻي صدر آصف زرداري جا ”گرفتاري وارنٽ“ جاري ڪري ڇڏيا

اسلام آباد ( ويب ڊيسڪ ) نيب چيئرمين ميگا مني لانڊرنگ ڪيس ۾ اڳوڻي صدر آصف علي زراري جا گرفتاري وارنٽ جاري ڪري ڇڏيا آهن، اڳوڻي صدر جعلي اڪائونٽس ڪيس ۾ جون تائين ضمانت حاصل ڪري رکي آهي. نيب چيئرمين جسٽس ريٽائرڊ جاويد اقبال پيپلز پارٽي جي شريڪ چيئرمين ۽ اڳوڻي صدر آصف علي زرداري جا گرفتاري وارنٽ منظور ڪندي موقف اختيار ڪيو ته هو ميگا مني لانڊرنگ جي جاچ ۾ گهربل آهي. نيب جو چوڻ آهي ته ڏهه جون تي اسلام آباد هاءِ ڪورٽ ۾ اڳوڻي صدر جي ضمانت بابت ٿيندڙ ٻڌڻي ۾ گرفتاري وارنٽ پيش ڪيا ويندا. ٻڌايو پيو وڃي ته نيب کي آصف زرداري کان ميگا مني لانڊرنگ جاچ ۾ پڇا ڳاڇا ڪرڻي آهي.

 

روينيو بورڊ کي ايندڙ سال بجلي ورڇ ڪندرن ڪمپنين کان اليڪٽرسٽي ديوٽي گڏ ڪرڻ جو اختيار ڏنو آهي: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه سنڌ ريوينيو بورڊ (ايس آر بي) کي اهو اختيار ڏنو آهي ته هو ايندڙ مالي سال کان پاور ڊسٽريبيوشن ڪمپنين کان اليڪٽرسٽي ڊيوٽي گڏ ڪري ۽ گذريل سالن جي اڪائونٽن جي ريڪنسائيل ۽ آڊٽ لاءِ سٺي ساک جي حامل آڊيٽرن کي تعينات ڪرڻ جي پڻ منظوري ڏني آهي. هن اهو فيصلو اڄ جمعي ڏينهن وزيراعليٰ هائوس ۾ منعقد هڪ اجلاس جي صدارت ڪندي ڪيو. اجلاس ۾ صوبائي وزير انرجي امتياز شيخ، وڏي وزير جو پرنسپل سيڪريٽري ساجد جمال ابڙو، سيڪريٽري ناڻو نجم شاهه، سيڪريٽري انرجي مصدق خان، سيڪريٽري بلديات خالد حيدر شاهه ۽ ٻين لاڳاپيل عملدارن شرڪت ڪئي. وڏي وزير چيو ته سال 16-2015  ۾ صارفين کان ڪي اليڪٽرڪ جي رقم ۾ باقي سالن کان وٺي هن سال تائين لازمي واڌ ٿيو آهي پر اسان کي اڃان تائين ان جو هڪ پيسو به نه مليو آهي. هن صوبائي وزير انرجي کي هدايت ڪئي ته هو پاور ڊسٽريبيوشن ڪمپنين، ڪي اليڪٽرڪ، حيسڪو ۽ سيپڪو جي اڪائوڻٽن جي آڊٽ لاءِ آڊيٽر تعينات ڪري ۽ ان حوالي سان اهو ڪم ڪيو وڃي ته اهي ادارا سنڌ حڪومت کي رقم ادا ڪن. وڏي وزير صوبائي وزير انرجي امتياز شيخ ، صوبائي سيڪريٽري انرجي مصدق خان ۽ سيڪريٽري ناڻو نجم شاهه تي ٻڌل ٽي رڪني ڪميٽي به جوڙي آهي جيڪا گورنر اسٽيٽ بينڪ سان اجلاس ڪندي ۽ ان کي درخواست ڪندي ته هو ڪمرشل بينڪن کي هدايت ڪري ته اهي بجلي جا بل گڏ ڪن ٿا ته انهيءَ مان اليڪٽرسٽي ڊيوٽي سڌوسنئون سنڌ حڪومت جي اڪائونٽ ۾ گڏ ڪرائين. انهيءَ سان گڏوگڏ، ايس آر بي پنهنجي قانون ۾ ترميم کانپوءِ پاور ڊسٽري بيوشن ڪمپنين سان سڌو سنئون ڊيل ڪندي. وڏي وزير ايس آر بي کي هدايت ڪئي ته هو پنهنجي قانون ۾ ترميم تجويز ڪري ته جيئن انهيءَ کي اليڪٽرسٽي ڊيوٽي جمع ڪرڻ، آڊٽ، اليڪٽرسٽي ڊيوٽي اڪائونٽن کي ري ڪنسائيل ڪرڻ بابت مجاز بڻائي سگهجي.وڏي وزير سيد مراد علي شاهه بورڊ آف ريونيو سان هڪ الڳ اجلاس جي صدارت ڪئي ۽ اي-اسٽيمپ ڊيوٽي واري منصوبي جي منظوري ڏني جنهن جو ايندڙ سال شروعات ڪئي ويندي. اجلاس ۾ صوبائي وزير ريونيو محبوب الزمان، سينئر ميمبر بورڊ آف روينيو شمس سومرو، سيڪريٽري خزانو نجم شاهه ۽ ٻين لاڳاپيل عملدارن شرڪت ڪئي. وڏي وزير کي ٻڌايو ويو ته کيس سالاني ڪليڪشن 10 ارب رپيا ٿي آهي. ان تي وڏي وزير چيو ته اسٽيمپ ڊيوٽي جي مد ۾ چوري ٿي رهي آهي ڇو ته اهو ڪم مينوئيل طريقي سان ٿي رهيو آهي. هن صوبائي وزير روينيو کي هدايت ڪئي ته اهو اي_اسٽيمپ ڊيوٽي شروع ڪري انهيءَ سان کيس ڪليڪشن ٻيڻي ٿي ويندي. صوبائي وزير روينيو مخدوم محبوب الزمان وڏي وزير کي ٻڌايو ته نادرا سان صلاح مشورو ڪيو ويو آهي ته هو اي_اسٽيمپ ڊيوٽي شروع ڪري. ان تي وڏي وزير چيو ته جيستائين نادرا بورڊ آف روينيو لاءِ سافٽ ويئر تيار نه ڪندو تيستائين پنجاب حڪومت جهڙي ريت اي_اسٽيمپ ڊيوٽي سسٽم متاعرف ڪرايو آهي انهيءَ ڏسندي ڪم شروع ڪيو وڇي. سينئر ميمبر بورڊ آف روينيو وڏي وزير کي ٻڌايو ته ايف بي آر نان فائلرز لاءِ 4 ملين رپين کان وڌيڪ املاڪ جي خريداري تي پابندي لاڳو ڪئي آهي، هن چيو ته انهيءَ پابندي سبب به گهڻو فرق پيو آهي. وڏي وزير چيئرمين ايس آر بي کي هدايت ڪئي ته هو سينئر ميمبر بورڊ آف روينيو سان گڏجي روينيو جمع ڪرڻ خاص طور زرعي ٽيڪس ۾ واڌ بابت معاملن جو جائزو وٺي ۽ طريقي ڪار وضع ڪري.

 

مريم صفدر جو تکو لهجو سندس وڌندڙ فرسٽريشن جو نتيجو آهي: فردوس عاشق

اسلام آباد (اين اين آءِ) وزيراعظم جي سڌ سماءَ جي خاص مددگار فردوس عاشق اعواڻ ن ليگ جي نائب صدر ۽ اڳوڻي وزيراعظم نواز شريف جي نياڻي تنقيد ڪندي چيو آهي ته مريم صفدرجو وزيراعظم بابت لهجو سندس فرسٽريشن جو اظهار آهي، ٽوئيٽر تي پنهنجي پيغام ۾ فردوس عاشق اعواڻ مريم نواز تي تنقيد ڪندي چيو ته کيس ڊپ آهي ته عمران خان جي ڪاميابي سان ملڪ ترقي ۽ سياسي پارٽي جي آڙ ۾ سندس پرائيويٽ ڪمپني خساري ۾ويندي، هن چيو ته مريم صفدر پاران وزيراعظم پاڪستان بابت اهڙي قسم جو لهجو اختيار ڪرڻ سندس وڌندڙ فرسٽريشن جو اظهار آهي.

 

ايف بي آر چيئرمين ٽيڪس نظام کي معيشت لاءِ سنگين خطرو قرار ڏئي ڇڏيو

اسلام آباد ( ويب ڊيسڪ ) ايف بي آر چيئرمين شبر زيدي ٽيڪس نظام کي نه قبولڻ جوڳو قرار ڏيندي موجوده ٽيڪس نظام کي ملڪي معيشت لاءِ سنگين خطرو قرار ڏئي ڇڏيو آهي. ايف بي آر چيئرمين وزيراعظم عمران خان کي ملڪي معيشت کي خطري بابت لکت آگاهي ڏيندي چيو آهي ته موجوده نظام ايندڙ نسلن لاءِ مضبوط ناهي، ٽيڪس اوڳاڙي جو نظام جي ڊي پي جي 10 سيڪڙو کان به گهٽ ٽيڪس گڏ ڪري رهيو آهي. هن چيو ته حقيقي آمدني بدران ڊائريڪٽ ٽيڪسن ذريعي ٽيڪس گڏ ڪيو پيو وڃي، جڏهن ته ملڪ ۾ وڏي پئماني تي غير ٽيڪس شده دولت جمع ٿيل آهي. ايف بي آر چيئرمين طرفان وزيراعظم کي لکيل خط ۾ چيو ويو آهي ته بجلي جا ڪمرشل ڪنيڪشن رکندڙ 31 لک واپارين مان 90 سيڪڙو ٽيڪس کان ٻاهر آهن، 85 سيڪڙو کان وڌيڪ ٽيڪس ملڪ جون 300 ڪمپنيون ادا ڪنديون آهن، 75 سيڪڙو کان وڌيڪ ٽيڪس ميو  فيڪچرز سيڪٽر سان گڏ ڪئي پئي وڃي، جڏهن ته ملڪ جو مينو فيڪچرنگ سيڪٽر ۽ صنعتي شعبو متاثر ٿيو آهي. ٻئي طرف ايف بي آر چيئرمين شبر زيدي بئنڪن کي بي نامي اڪائونٽن جا تفصيل فراهم ڪرڻ جي هدايت ڪئي آهي. ايف بي آر چيئرمين بئنڪن جي چيف فنانشل آفيسرن سان ايف بي آر هيڊ ڪوارٽر ۾ ملاقات ڪئي. ايف بي آر چيئرمين سمورين بئنڪن کي بي نامي اڪائونٽن جا تفصيل فراهم ڪرڻ جي هدايت ڪئي. ايف بي آر چيئرمين شبر زيدي بي نامي اڪائونٽن جو خاتمو يقيني بڻائڻ جو فيصلو ڪيو آهي. ايمنسٽي اسڪيم مان فائدو حاصل نه ڪندڙن خلاف پهرين جولاءِ کان ڪارروائي ڪئي ويندي.

 

دادو لڳ ٽرڪ جو لوڊر رڪشي کي زوردار ٽڪر، 2  ڄڻا فوت، عورتن ۽ ٻارڙن سميت 12 سخت زخمي

دادو(د.ر) جوهي تعلقي جي ڳوٺ پٽ گل محمد ويجهو ڳوٺ گل ٻٻر وٽ ٽرڪ جو لوڊر رڪشي کي زوردار ٽڪر جي نتيجي ۾ ڀنڊ برادري جا 2  ڄڻا فوت فوت 12 ڄڻا سخت زخمي ٿي پيا، فوتين ۾ 60 سالا پيرسن غلام سرور ڀنڊ ۽ 10 سالن جي فضا ڌئ قلندر بخش شامل آهن، جڏهن ته 5 عورتون ۽ 7 ٻارڙا سخت زخمي ٿي پيا، فوتين ۽ زخمين کي سول اسپتال دادو آندو ويو، جتي زخمين کي طبي امداد ڏني وئي، زخمين ۾ نسيم، وسيم، خورشيد بيگم، حاڪم علي، ذڪيه، شائلان، شهنيلا، سلمى، يامين، حميران، ياسين، جنسار شامل آهن، جڏهن ته هڪ معصوم ٻارڙو 8 سالا وسيم ۽ 16 سالن جي حاڪم علي ڀنڊ کي ڳڻتي جوڳي حالت ۾ نوابشاهه علاج لاءِ نيو ويو، ٻڌايو پيو وڃي ته حادثي جو شڪار ٿيل ڀنڊ برادري جا ماڻهو پنهنجي اباڻي ڳوٺ پٽ گل محمد جي قبرستان تي فاتح خواني لاءِ ويل هئا جيڪي واپس پنهنجي ڳوٺ ٻيٽو جتوئي اچي رهيا هئا ته ڳوٺ گل ٻٻر وٽ ٽرڪ جو ٽڪر لڳڻ سبب حادثي جو شڪار ٿي ويا، جڏهن ٽرڪ ڊرائيور موقعي تان فرار ٿي ويو آهي.

 

شاهپورچاڪر ويجهو پرڻيل ناري غربت کان تنگ اچي ڦاهو کائي خودڪشي ڪري ڇڏي

شاهپورچاڪر(رپورٽر)شاهپورچاڪر ويجهو ڳوٺ پراڻو ڪرم الله ۾ ڳوٺاڻي ڌرمون ڪولهي جي 26 هن ورهين جي زال ڌني ڪولهڻ مبينا طور غربت کان تنگ اچي ڇت ۾ لڳل بجلي جي پکي ۾ رسو ٻڌي ڦاهو کائي خودڪشي ڪري ڇڏي، وارثن پکي مان ٽنگيل لاش لاهي، فوتي عورت جي مائٽن  کي اطلاع ڪيو، جنهن  بعد عورت جا مائٽ ۽ شاهپور چاڪر پوليس پھچي ضروري ڪاروائي لاء واقعي هنڌ پهتي.   هوڏانهن فوتي عورت جي مڙس ڌرمون ڪولهي ٻڌائيندي چيو ته اسين پورهيت، هارپو ڪري ٻچن جو پيٽ گذر ڪندڙ آهيون، اسين گهر مان زمين جي ڪم ڪار سان نڪري ويا هئاسين، تہ اوچتو گهر مان خبر پئي تہ منهنجي گهر واري ڦاهو کائي ڇڏيو آهي، جنهن تي اسان گهر پهتاسون، هن ٻڌايو ته واقعو گهر ۾ پيش اچڻ ڪري اسين پريشان آهيون. ٻئي طرف پوليس موجب فوتڻ جي وارثن پوسٽ مارٽم سميت ڪنهن بہ قسم جي ڪاروائي کان انڪار ڪيو آهي، جنهن ڪري پوسٽ مارٽم ناهي ٿيو لاش وارثن حوالي ڪيو ويو آهي. پوليس ڪاروائي نہ ڪرائڻ بابت وارثن کان لکت وٺي ڇڏي آهي.