تازيون خبرون
بي نامي ملڪيتون ضبط ڪري غريب کي ڏينداسين، ڪجهه به ڪيو احتساب ٿي ئي رهندو: وزير اعظم - دفاعي صنعت کي پاڻ ڀرو بڻائڻ لاءِ خانگي شعبي ۾ ڀائيواري وڌائڻ جي ضرورت آهي: آرمي چيف - ڳالهين لاءِ ڪيترائي ڀيرا رابطو ڪيو ويو پر نواز شريف ۽ مان تيار ناهيون: مريم نواز - سينيٽ چيئرمين خلاف رٿ، مخالف ڌر طرفان 60 سينيٽرن جي حمايت جي دعويٰ - عمران خان ۽ ملالا يوسفزئي دنيا جي سڀ کان وڌيڪ پسنديدا شخصيتن ۾ شامل - انصاف تي ٻڌل معاشر جي لاءِ ڪوڙي شاهدي جو خاتمو ڪرڻو پوندو: چيف جسٽس آصف سعيد کوسا - ملڪ ۾ ادارا آزاد آهن، پهريون ڀيرو طاقتور ماڻهو احتساب جي وڪڙ ۾ آهن: فردوس عاشق - فردوس شميم ادارن جو ترجمان نه بڻجي، وعدي موجب نرسن جي مطالبن جي منظوري جو نوٽيفڪيشن جاري ڪري ڇڏيو: مرتضيٰ وهاب - شاهد خاقان عباسي ايل اين جي ڪيس ۾ 13 ڏينهن جي رمانڊ تي نيب حوالي، هڪ ئي وقت 90 ڏينهن جو رمانڊ ڏنو وڃي: عباسي - پرامن ڪارڪنن جون گرفتاريون عمران نيازي جي خوف ۾ مبتلا هجڻ جي علامت آهي: شهباز شريف

Daily Archives: May 11, 2019

قوم ڪرپشن ۽ غربت مان ڇوٽڪارو چاهي ٿي، مايوس نه ڪنداسين: عمران خان

اسلام آباد ( ويب ڊيسڪ ) وزيراعظم عمران خان چيو آهي ته ڏکيا فيصلا قوم ۽ ملڪ جي وسيع مفاد ۾ ڪري رهيا آهيون، ڪرپشن ۽ ترقي جو سفر گڏ نه ٿو هلي سگهي.  وزيراعظم عمران خان سان سندس پارلياماني معاملن بابت صلاحڪار بابر اعواڻ ملاقات ڪئي. ملاقات دوران آئيني، قانوني ۽ سياسي معاملن تي مشورا ڪيا ويا.  ان موقعي تي وزيراعظم عمران خان چيو ته قومي ادارن جي نئين سر تنظيم سازي جو عمل پٽڙي تان نه لهندو. هن چيو ته پاڪستان تيزيءَ سان معاشي استحڪام طرف وڌي رهيو آهي، قوم ڪرپشن ۽ غربت مان ڇوٽڪارو چاهي ٿي، مايوس نه ڪنداسين. سندس چوڻ هو ته ڏکيا فيصلا قوم ۽ ملڪ جي وسيع مفاد ۾ ڪري رهيا آهيون، ڪرپشن ۽ ترقي جو سفر گڏ نه ٿو هلي سگهي. بابر اعواڻ چيو ته قوم حڪومتي پاليسين تي ڀرپور اعتماد جو اظهار ڪيو آهي، قومي ترقي لاءِ ادارن جي مضبوطي ۽ نئين سر تنظيم سازي ضروري آهي. هن چيو ته  ڪرپشن جا مرڪزي ڪردار هڪ هڪ ڪري وائکا ٿي چڪا آهن، احتساب جو عمل بنا فرق جي جاري آهي، ڦرلٽ ڪندڙن کي انجام تائين پهچايو ويندو.

 

آمريڪا افغانستان ۾ شڪست کائي چڪو آهي، اُتان ڀڄڻ جا رستا پيو ڳولي: ن ليگ

اسلام آباد ( ويب ڊيسڪ ) قومي اسيمبليءَ ۾ فاٽا جي قومي ۽ صوبائي اسيمبليءَ جي سيتن ۾ اضافي بابت 26 هين آئيني ترميم جو بل پيش ڪيو ويو آهي. قومي اسيمبليءَ جو اجلاس اسد قيصر جي صدارت هيٺ ٿيو جتي فاٽا جي سيٽن ۾ اضافي بابت بل تي بحث ڪيو ويو جڏهن ته هڪ موقعي تي حڪومتي ميمبرن طرفان گوڙ ڪيو ويو.  قبائلي علائقن مان چونڊيل آيل آزاد اميدوار محسن داوڙ آئيني ترميمي بل 2019ع  ايوان ۾ غور هيٺ آڻڻ لاءِ رٿ پيش ڪئي جنهن تي ايوان رٿ جي منظوري ڏني ۽ بل تي بحث شروع ٿيو.  ايوان ۾ ڳالهائيندي مسلم ليگ ن ايم اين اي خواجه آصف چيو ته چئن ڏهاڪن کان خطو دهشتگردي، بدامني جو آستان بڻيل هو، هتي آباد ماڻهن جو ڪو به ڏوهه نه هو، اسان 80 جي ڏهاڪي ۾ فيصلو ڪيو اسان کي هڪ سپر پاور جي پراڪسي ٿيڻو آهي ان جي نتيجي ۾ اسان پنهنجي ملڪ ۾ گهرو ويڙهه جو سامان پيدا ڪيو.  هن چيو ته 11 سيپٽمبر 2001ع ۾ اسان وري فيصلو ڪيو ته سپر پاور جي پراڪسي جو حصو ٿيڻو آهي جيڪا جنگ سرحد پار وڙهي پئي وئي تنهن کي اسان گهلي پنهنجي در تي آندو ۽ سمورو ملڪ جنگ جي ور چڙهي ويو.  سندس چوڻ هو ته 80 جي ڏهاڪي ۽ 11 سيپٽمبر 2001ع کانپوءِ ٻئي جنگون ٻن فوجي آمرن پنهنجي اقتدار کي هٿي ڏيڻ لاءِ وڙهيون، هي پاڪستان جي عوام جون جنگيون نه هيون، اقتدار جي پنهنجي ذاتي خواهشن کي عملي صورت ڏيڻ لاءِ دهشتگردي جي باهه ۾ ڌڪيو ويو.خواجه آصف چيو ته 70 سالن ۾ جيڪو ڪجهه ٿيو تنهن جو نشانو ڪراچي، فاٽا ۽ سوات ٿيا، اسان جا خوبصورت شهر دهشتگردي جو آستان بڻجي ويا، منشيات ۽ ڪلاڪشنڪوف ڪلچر مان اڄ تائين جان نه ڇٽي آهي. هن چيو ته اسان پنهنجي آزادي وڪرو ڪئي ۽ هڪ سپر پاور جي غلامي قبول ڪري هڪ فرد واحد پنهنجي اقتدار کي ڊيگهه ڏني، ڪو به قومي مفاد ان سان ڳنڍيل نه هو، افغان جنگ ۾ توهان جو ڪردار ادا ڪيو اهو نالي ماتر جهاد هو، سوويت يونين سان پاڪستان جي ڪابه دشمني نه هئي، اسان کي رڳو شوق هو ته اقتدار کي ڊيگهه ڏني وڃي. سندس چوڻ هو ته 11 سيٽپمبر کانپوءِ افغانستان کي نشانو بڻايو ويو ۽ اڄ 18 سال ٿي ويا آهن، آمريڪا ۽ سندس اتحادين کي پري تائين ڪاميابي نه ملي آهي، اهي شڪست کائي چڪا آهن ۽ واپسي جو گس ڳولي رهيا آهن، سمورين حالتن کي نظر ۾ رکندي اسان کي پنهنجي ملڪ جا سمورا وسيلا فٽا جي بحالي ۽ دردناڪ تاريخ کي ميسارڻ لاءِ استعمال ڪرڻ گهرجن. خواجه آصف چيو ته ايوان نئين تاريخ لکي رهيو آهي، هڪ پرائيويٽ ميمبر جي بل تي آئين جي اهڙي ترميم ڪئي پئي وڃي جيڪا وقت ۽ تاريخ جي گهرج آهي، اها خوشي جي ڳالهه آهي ته ايوان فاٽا جي آواز تي لبيڪ چئي رهيو آهي.

 

حڪومت آءِ ايم ايف جي ڊڪٽيشن تي بجيٽ ۾ بجلي ۽ گيس جا اگهه وڌائيندي: مخالف ڌر

اسلام آباد (اين اين آءِ) سينيٽ ۾ مخالف ڌر جي ميمبر پيٽرول شين ۾ واڌ ۽ وڌندڙ مهانگائي تي حڪومت تي ڇتي تقيد ڪندي چيو آهي ته حڪومت بجيٽ جي سموري ڄاڻ آءِ ايم ايف کي ڏئي رهي آهي، حڪومت آءِ ايم ايف جي ڊڪٽيشن تي بجيٽ ۾ بجلي ۽ گيس جا اگهه وڌائيندي، آءِ ايم ايف جي دٻاءُ تي وياج جي شرح وڌائي ويندي، شبر زيدي جي مقرري مفادن جو ٽڪراءُ آهي، آءِ ايم ايف جو قرض ناهي مليو، گذريل حڪومتن عوام کي رمضان جي مهيني ۾ رليف ڏنو، هاڻوڪي حڪومت رمضان جي پهرين ڏينهن 12 سيڪڙو جي ايس ٽي لڳايو، حڪومت کي 10 مهينا گذري ويا پر هڪ واعدو پورو نه ڪيو، 3 کان 4 ڀيرا تيل جون قيمتون وڌايون، اسان جي وزيراعظم چيو ته جيڪڏهن سان آءِ ايم ايف ڏانهن وياسين ته خودڪشي ڪندس، اسان کي انتظار آهي ته وزيراعظم ڪابينا سميت ڪڏهن خودڪشي ڪندو، اعظم سواتي چيو ته اسٽيل  ملز کي نه خانگايو ويندو، پرائيويٽ پبلڪ پارنٽرشپ تحت اسٽيل مل کي بهتر ڪيو ويندو، جمعي تي سينيٽ ۾ تيل شين ۾ واڌ تي منظور ٿيل التوا واري رٿ تي بحث شروع ڪندي سينيٽر جاويد عباسي چيو ته پيٽرول جا اگهه وڌائڻ کان اڳ گيس ۽ دوائن جا اگهه وڌايا ويا، رياست مديني جي ڳالهه ڪندڙ رمضان کان اڳ پيٽرول جو بم ڪيرايو، هن چيو ته ايف بي آر جو چيئرمين ۽ اسٽيٽ بينڪ جو گورنر ۽ ناڻي صلاحڪار آءِ ايم ايف جي چوڻ تي لڳايا، هن چيو ته آءِ ايم ايف جي چوڻ تي اسد عمر کي سائيڊ ڪيو ويو، شيري رحمان چيو ته هن وقت اهم معاملي تي بحث ٿي رهيو آهي، لاڳاپيل وزير هن وقت هجي ها ته معاملي تي ايوان ۾ جواب ڏئي سگهي ها، سينيٽ چيئرمين چيو ته پيٽروليم جو وزير هن وقت ٻاهر مصروف آهي، هو ايوان کي ٻڌائي ويو آهي، شيري رحمان چيو ته هي ڪهڙو خوفناڪ آءِ ايم ايف پروگرام آهي جيڪو اچڻ کان اڳ ئي شرطن تي عمل ٿيڻ شروع ٿي ويو آهي، هن چيو ته گذريل حڪومتون عوام کي رمضان ۾ رليف ڏينديون رهيون آهن، هن چيو ته هن حڪومت رمضان جي پهرين ڏينهن 12 سيڪڙو جي اي سي ٽي لڳايو، هن چيو ته تبديلي سرڪار جو پيٽرول بم ڀلاري مهيني ۾ آيو آهي، بحث ۾ حصو وٺندي رضا رباني چيو ته اڳ به آءِ ايم ايف سان معاهدا ٿيا پر اڳ اهڙي پوزيشن نه هوندي هئي، هن چيو ته هي ڪڏهن ناهي ٿيو ته آءِ ايم ايف جي سروس ماڻهو کي اهم عهدي تي ويهاريو ويو، رضا رباني چيو ته حڪومت آءِ ايم ايف اڳيان گوڏا کوڙي ڇڏيا، معاهدو ناهي ٿيو، اسٽيل ملز کي نجڪاري لسٽ ۾ وڌو ويو، هن چيو ته حڪومت آءِ ايم اي جي ڊڪٽيشن تي بجيٽ ۾ بجلي، گيس اگهن ۾ واڌ ڪندي، رضا رباني چيو ته چيئرمين شبير زيدي جي مقرري مفادن جو ٽڪراءُ آهي، شبير زيدي فرغوسن ڪمپني جو پارٽنر آهي، هن چيو ته شبر زيدي ڪيترن ئي وڏين ڪمپينن جو ٽيڪس ايڊوائزري رهيو آهي، شبر زيدي جي مقرري اسلام آباد هاءِ ڪورٽ جي فيصلي جي ڀڃڪڙي آهي جنهن کانپوءِ اجلاس سومر تائين ملتوي ڪيو ويو.

 

فيض گنج لڳ لاشاري برادري جي ٻن ڌرين جهيڙو، 2 سڳن ڀائرن سميت 3 ڄڻا قتل، 4 زخمي

فيض گنج (رپورٽ: رياض سولنگي) فيض گنج لڳ لاشاري برادري جي ٻن ڌرين ۾َزميني معاملي تان جهيڙو. فائرنگ ۾ ٻن سڳن ڀائرن سميت ٽي ڄڻا قتل ٿي ويا، چار ڄڻا زخمي، وارثن جي ڌرڻي بعد پوليس مک جوابدار کي گرفتار ڪري ورتو، وارثن پاران لاش رکي ڌرڻو. ڳوٺ ننڌرو لاشاري ۾ زمين جي تڪرار تان لاشاري برادري جي ٻن ڌرين ۾ جهيڙو ٿي پيو، گوليون لڳڻ سبب ٻه سڳا ڀائر الهبچايو لاشاري سندس ڀاءُ ڪاشف پٽ نظر لاشاري ۽ شاهنواز پٽ جوڳي لاشاري قتل ٿي ويا، چار ڄڻا ساجد، عابد، الهوڌايو لاشاري ۽ وقار لاشاري زخمي ٿي پيا. هڪ زخمي عابد لاشاري جي حالت نازڪ هجڻ ڪري کيس نوابشاهه منتقل ڪيو ويو. جهيڙي ۾ قتل ٿيلن جا لاش پوسٽ مارٽم لاءِ فيض گنج جي سرڪاري اسپتال آندا ويا. زخمين کي فيض گنج جي سرڪاري اسپتال ۾ داخل ڪيو ويو، ٽن قتلن باوجود پوليس اطلاع ملڻ باوجود واقعي واري هنڌ ٽي ڪلاڪ دير سان پهچي جهيڙي تي ڪنٽرول ڪرائي ورتو. ٻڌايو وڃي ٿو ته 28 ايڪڙن زمين جي معاملي تان جهيڙو ٿيو، جهيڙو ڪندڙ پاڻ ۾َچاچا ڀائٽيا آهن، ٽن قتلن بعد علائقي ۾ ڇڪتاڻ واري صورتحال پيدا ٿي وئي. ڌريون مورچا بند ٿي ويون، وڌيڪ جهيڙي کي روڪرائڻ لاءِ ضلح مان پوليس طلب ڪئي وئي، جڏهن ته ٽن مقتولن جي وارثن ۽ شهرين لاش مهراڻ نيشنل هاءِ وي تي رکي مظاهرو ڪري ڌرڻو هنيو، اُڪري چودڳي ۾ مهراڻ نيشنل هاءِ وي تي ڌرڻي سبب روزيدار ماڻهو پريشان ٿي ويا، مقتولن جي وارثن پاران قاتلن جي گرفتاري جي گهر ڪئي وئي، پوليس ڌرڻي واري جاءِ تان گم رهي. جڏهن ته ٽن متقولن جا لاش رکي روڊ تي ڌرڻو هڻندڙ لاشاري برادري جي ماڻهن سان پيپلز پارٽي ايم پي اي ساجد خان ٻانڀڻ پاران جوابدارن جي گرفتاري جي خاطري ڪرائڻ بعد ڌرڻو ختم ڪيو ويو. جنهن بعد پوليس مک جوابدار مريد لاشاري کي گرفتار ڪري ورتو، پوليس جو چوڻ آهي ته واقعي ۾ استعمال ٿيل رپيٽر به جوابدار وٽان هٿ ڪيو ويو آهي.

 

ملڪ کي آءِ ايم ايف تائين پهچائڻ جي ذميوار لٽيندڙن جون رڙيون نڪري رهيون آهن، سمورا چور گوڙ ڪري رهيا آهن: فردوس عاشق اعواڻ

اسلام آباد (اين اين آءِ) وزيراعظم جي سڌ سماءَ بابت مددگار فردوس عاشق اعواڻ چيو ته ملڪ کي آءِ ايم ايف تائين پهچائيندڙ جون رڙيون نڪري رهيون، سمورا چور گوڙ ڪري رهيا آهن ۽ هاڻ اڃا وڌيڪ گوڙ ڪندا، بلاول صاحب توهان جي حڪومت جي ڪارڪردگي قيمت سنڌ جا معصوم ٻار پنهنجون حياتيون ڏئي ادا ڪري رهيا آهن، جمعي تي هڪ بيان ۾ هن چيو ته اسلام آباد ۾ گوڙ ڪرڻ بدران کين سنڌ جي متاثر ٻارن ۽ انهن جي والدين سان ساٿ ڏيڻ گهرجي، هن چيو ته عوام ڄاڻي ٿو ته اهي سمورا لٽيندڙ گوڙ ڪري رهيا آهن ۽ اڃا وڌيڪ گوڙ ڪندا، هن چيو ته عوام وزيراعظم عمران خان تي اعماد ڪري ٿو جيڪو قوم جي اميد آهي.

 

جاپاني سفير جون آرمي چيف ۽ فواد چوڌري سان ملاقاتون، ٻه طرفن مثالي لاڳاپن کي وڌيڪ مضبور ڪرڻ تي اتفاق

اسلام آباد ( ويب ڊيسڪ ) آرمي چيف جنرل قمر جاويد باجوا سان جاپاني سفير ڪني نوري متسودا ملاقات ڪئي، ملاقات ۾ ٻنهي ملڪن جي مثالي لاڳاپن کي وڌيڪ مضبوط ڪرڻ واري عزم جو اظهار ڪيو. پاڪ فوج جي ترجمان جو چوڻ آهي ته پاڪستان لاءِ نئين نئين جاپاني سفير ڪني نوري متسودا جي ايڇ ڪيو راولپنڊي جو دورو ڪيو. ان موقعي تي آرمي چيف جنرل قمر جاويد باجوا سان سندس ملاقات ٿي. آءِ ايس پي آر موجب ملاقات ۾ گڏيل دلچسپي ۽ علائقائي سيڪيورٽي وارن معاملن تي خيالن جي ڏي وٺ ڪئي وئي. جاپاني سفير خطي ۾ ڇڪتاڻ واري ماحول کي گهٽائڻ لاءِ پاڪستاني ڪوششن جي واکاڻ  ڪئي. ملاقات ۾ ٻنهي ملڪن جي مثالي لاڳاپن کي وڌيڪ مضبوطي ڏيڻ واري عزم جو اظهار پڻ ڪيو ويو. ان کان اڳ جاپاني سفير سائنس ۽ ٽيڪنالوجي واري وزير فواد چوڌري سان به ملاقات ڪئي هئي جنهن ۾ ٽيڪنالوجي واري شعبي ۾ سهڪار تي ڳالهه ٻولهه ڪئي وئي . فواد چوڌري جو چوڻ هو ته اسان پاڪستان جاپان لاڳاپا وڌيڪ مضبوط ڪرڻ جا خواهشمند آهيون، پاڪستان جي متعارف ڪرايل نيو اليڪٽرڪ ويزا پاليسي ۾ جاپان به شامل آهي. سندس چوڻ هو ته پاڪستان سيڙپڪاري لاءِ پرڪشش ملڪ آهي. جاپان ٽيڪنالوجي جي لحاظ کان دنيا ۾ پنهنجي هڪ الڳ سڃاڻپ رکي ٿو.

 

سنڌ ڪابينا ۾ ڦير ڦار جي ترديد، ڪابينا مڪمل ناهي، تبديلي جو سوال ئي پيدا نٿو ٿئي: مراد علي شاهه

ڪراچي (اسٽاف رپورٽر)سنڌ جي وڏي وزير سيد مراد علي شاهه صوبائي ڪابينا ۾ ڦيرڦار ڪرڻ واري تاثر کي غلط قرار ڏيندي چيو ته کيس ڪابينا اڃان تائين مڪمل نه آهي، جڏهن اها مڪمل ٿيندي ته انهيءَ ۾ تبديلي ممڪن ٿي سگهي ٿي. اها ڳالهه هن جمعي ڏينهن انڊس اپستال جي پيڊياٽرڪ ڪمپليڪس جي افتتاحي تقريب کانپوءِ ميڊيا سان ڳالهائيندي چئي. ان دوري ۾ اطلاعات وارو صلاحڪار مرتضيٰ وهاب پڻ کيس گڏ هو. هڪ سوال جي جواب ۾ هن چيو ته ڪابينا ۾ هيرڦار ڪرڻ جي ڪابه تجويز غور هيٺ نه آهي. وڌيڪ چيو ته منهنجي ڪابينا اڃان تائين مڪمل نه آهي تنهن ڪري تبديلي جو سوال ئي پيدا نه ٿو ٿئي، جيستائين وزير ڪابينا جو حصو بڻجي وڃن پوءِ تبديلي ڪري سگهجي ٿي. سنڌ جي ورهاڱي بابت گورنر سنڌ جي بيان تي هڪ سوال جو جواب ڏيندي چيو ته اهو هڪ ناقابل يقين بيان آهي ۽ ان کي اهڙو بيان ڏيڻ نه گهرجي ها. هڪ سوال جو جواب ڏيندي وڏي وزير چيو ته ڪراچي بابت سپريم ڪورٽ جو حڪمنامو پڙهيو نه آهي جنهن ۾ حددخلين جي خاتمي بابت چيو ويو آهي. هن چيو ته هڪ نيوز چينل جي ٽڪرن مان خبر پئي آهي. آرڊرز ايندا ته آئون انهيءَ تي تبصرو ڪرڻ جي حيثيت رکان ٿو. وڏي وزر چيو ته سنڌ سالڊ ويسٽ مينجمنٽ اٿارٽي (ايس ايس ڊبليو ايم اي) جي ڏکڻ ۽ اوڀر ضلعن ۾ صفائي سٿرائي واري ڪم کي بهتر بڻائڻ لاءِ واضح هدايتون ڏنيون آهن. هن چيو ته آئون ملير ۾ صفائي سٿرائي واري ڪم سان مطمعن نه آهيان، تنهن ڪري اتي ڪم ڪندڙ ٺيڪيدار ڪمپنين کي نوٽيس ڏنا آهن. ميون، ڀاڄين ۽ ٻين روزمره جي شين جي اگهن ۾ واڌ بابت وڏي وزير چيو ته هن ڊويزنل انتظاميا کي متحرڪ ڪيو آهي. ڪمشنر، ڊپٽي ڪمشنرز ۽ ٻيا عملدارن کائڻ پيئڻ جي شين کي جانچڻ ۽ قيمت ڪنٽرول کي لاڳو ڪرڻ لاءِ روڊن تي موجود آهن. هن چيو ته اڄ ٽيون روزو آهي ۽ ٽن ڏينهن اندر ڪمشنر دڪانن ۽ هٿرادو اگهن ۾ واڌ ڪرڻ وارن اسٽال مالڪن کان 6 ملين رپيا وصول ڪيا آهن. هن وڌيڪ چيو ته مختلف سببن، پاليسين ۽ نااهلي سبب قيمتن ۾ واڌ ٿي آهي جنهن تي هن چيو ته هو مناسب وقت ڏسي ڳالهه ڪندو.

انڊس اسپتال:

پيڊياٽرڪ ڪمپليڪس جي افتتاحي تقريب کي خطاب ڪندي وڏي وزير سيد مراد علي شاهه چيو ته انڊس اسپتال لاءِ منهنجي دل ۾ هڪ خاص جاءِ آهي جيڪا پاڪستان جي صحت جي سارسنڀال واري نظام ۾ قيمتي حصو رکي ٿي. هن چيو ته بدين ۾ اسان جي ضلعي اسپتال کي انڊس هلائي رهيو آهي جتي بهتريم ڪم ٿي رهيو آهي. هن چيو ته حڪومت سان گڏجي ڪم ڪرڻ مشڪل آهي پر انهيءَ باوجود انڊس جي ورڪنگ ڏينهون ڏينهن بهتر ٿي هي آهي، آئون هميشه سٺي صحت جي سهولتن لاءِ انڊس سان گڏ آهيان. هن چيو ته آئون گهڻي ڀاڱي نيچر فارورڊ لوڪنگ آهيان جيڪو وعدو ڪريان ٿو الله پاڪ انهيءَ کي پورو ڪندو آهي. مراد علي شاهه چيو ته اڄ ڪلهه صوبي جي مالي صورتحال چڱي نه آهي، انهيءَ باوجود اسان اوهان کي 1000 بسترن جو اسپتال تعمير ڪرڻ ۾ اوهانجي مدد ڪنداسين. وڌيڪ چيو ته جيڪڏهن ٻارن ۾ ڪينسر جي سڃاڻپ ٿي وڃي ته اهو قابل علاج ٿي وڃي ٿو، انهيءَ لاءِ اسان ڪوشش ڪري رهيا آهيون ته شروعاتي سڃاڻپ واري نظام کي ترقي ڏني وڃي. هن پنهنجي خطاب ۾ چيو ته نجي شعبي ۾ اسان جو گمبٽ انسٽيٽيوٽ آف هيلٿ سائنسز هڪ سٺي سهولت آھي جتي افغانستان مان بھ مريض ايندا آھن ۽ اسان ڳوٺاڻي علائقن ۾ آنڪلوجي سھولتون بھ پيدا ڪري رھيا آھيون. ھن چيو تھ اسان جا وسيلا جيئن وڌندا ويندا اسان صحت جي سھولتن ۾ سيڙپڪاري ڪنداسين، ھن سال اين آئي سي وي ڊي 13 ارب رپيا بجيٽ ڊيمانڊ آھي ۽ جڏھن اسان اين آئي سي وي ڊي ورتي ھئي تھ انھيءَ جو 700 ملين رپيا بجيٽ ھو. مراد علي شاھھ چيو تھ ڊاڪٽر اديب رضوي ايترو سٺو ڪم ڪندو آھي تھ انکي فنڊ ڏيان ٿو ڇوتھ مونکي فنڊز جي غلط استعمال جو ڊپ نھ ھوندو آھي. پنھنجي خطاب ۾ ھن سول سوسائٽي کان گھر ڪئي تھ جيڪڏھن سول سوسائٽي اسان سان گڏجي ڪم ڪندي اسان بھترين ڪم ڪري سگھون ٿا. 150 بستر تي ٻڌل انڊس اسپتال 2007 ۾ شروع ٿيو جنھن ۾ ھر مريض کي جديد رياستي، گڏيل صحت جي سارسنڀال جي سھولت بلڪل مفت ۾ معياري علاج ڏنو ويندو آھي. ڪم جي گنجائش ۾ واڌ کانپوءِ انڊس اسپتال کي سنڌ ھيلٿ نيٽورڪ (آئي ايڇ اين) ۾ تبديل ڪيو ويو آھي. نيٽورڪ سڄي پاڪستان ۾ مختلف عوامي ۽ نجي اسپتالن جي ترقي ۽ انتظام تي توجھ مرڪوز ڪيل آھي. نيٽورڪ ملڪ ۾ مليريا، ايڊز ۽ ٽي بي جي آئوٽ پلي پروگرام بھ ڪري رھيو آھي.

انھيءَ کان پھرين وڏي وزير انڊس اسپتال جو دورو ڪيو، وڏي وزير جي پھچڻ تي اسپتال جي اڳواڻ ڊاڪٽر عبدالباري کيس استقبال ڪيو. وڏي وزير پيڊياٽرڪ ڪمپليڪس جو افتتاح ڪيو. وڏي وزير ٻارن جي مختلف وارڊن ۾ ويو ۽ ڊاڪٽرن کي ٻارن جي علاج بابت ڄاڻ ورتي. ھن ٻارن جي ڊاڪٽرن کي ھدايت ڪئي تھ اھو ٻارن جي بھتر علاج سان گڏ کيس خوراڪ جو پڻ خيال رکن. ھن اسپتال ۾ صفائي سٿرائي کي پڻ يقيني بڻائڻ جي ھدايت ڪئي.

 

آئي ايم ايف جي شرطن جون مبارڪون، وفاقي سرڪار کي شرط قبولڻا هئا ته ڊرامو ڇو رچايو ويو: مرتضيٰ وهاب

ڪراچي (اسٽاف رپورٽر) اطلاعات، قانون ۽ اينٽي ڪرپشن بابت وزيراعليٰ سنڌ جي صلاحڪار بئريسٽر مرتضيٰ وهاب چيو آهي ته پي ٽي آئي حڪومت يو ٽرن جو هڪ ٻيو ريڪارڊ قائم ڪري ورتو آهي، ۽ آئي ايم ايف جي شرط کي وڏي خوشدلي سان قبول ڪري ورتو آهي. پي ٽي آئي جي گورنمينٽ کي اهي شرطون قبول ڪرڻيون هيون ته اهو سڄو ڊرامو ڇو رچايو ويو. پاڪستان پيپلزپارٽي آئي ايم ايف جو شرطون تسليم ڪرڻ تي پي ٽي آئي گورنمينٽ کي مبارڪباد ڏيندي اهو ڇوڻ چاهي ٿي ته هو پنهنجي يوٽرن سان قوم کي ڪيترو بيوقوف بڻائيندا رهندا سموري پاڪستاني قوم توهان جي حقيقت ڄاڻي ورتي آهي. ۽ توهان جون آئي ايم ايف سامهون ڄنگهون کوڙن تي سموري قوم حيران آهي ڪيترائي ڀيرا آئي ايم ايف وٽ نه وڃڻ جو چئي پنهنجي ساک کي بهتر ڪرڻ جي ناڪام ڪوشش ڪئي پر ثابت ٿي ويو ته حڪومت هلائڻ عمران خان صاحب جي وس جي ڳالهه ناهي. توهان پنهنجي تقريرن جلسن ۾ پاڪستاني قوم کي آئي ايم ايف جي غلامي کان نجات ڏيارڻ جو راڳ الاپي رهيا آهيو. پر اهو ٿيو جنهن جو سئو سيڪڙو يقين پاڪستانين کي هو توهان آئي ايم ايف جي ڪشڪول سان پنهنجي حڪومت کي فيض ياب ڪيو اها حڪومت هلائڻ  اوهان جي وس جي ڳالهه نه آهي توهان حڪومت هلائي ئي نٿا سگهو ضرورت جي شين ۾ اگهه وڌائن پيٽرول جي اگهن ۾ اضافو آسمان سان ڳالهائي رهيو آهي پر توهان پاڪستاني عوام سان ڪيل وعدا وساري ويٺا آهيو پاڪستان پيپلزپارٽي اڄ به ۽ هميشه پاڪستاني عوام جي مسئلن کي حل ڪرڻ لاءِ تيار آهي .

 

ملڪ ۾ سڀ کان وڏو مسئلو ڪوڙ ۽ دوکو آهي، سڀ ماڻهو دوکو ڏين ٿا، عورت ٽيچر دوکو ڏنو: چيف جسٽس

اسلام آباد ( ويب ڊيسڪ ) چيف جسٽس آصف سعيد کوسا چيو آهي ته ملڪ ۾ سڀ کان وڏو مسئلو ڪوڙ ۽ دوکو آهي، سڀ ماڻهو دوکو ڏين ٿا.  سپريم ڪورٽ ۾ چيف جسٽس آصف سعيد کوسا جي سربراهيءَ ۾ ٽه رڪني بئنچ ماسترياڻي جي فاٽا ۾ هڪ وقت ۾ ٻه نوڪرين بابت ڪيس جي ٻڌڻي ڪئي. ماسترياڻي جي وڪيل ٻڌايو ته لبنيٰ بلقيس 2009ع ۾ نائين گريڊ ۾ ماسترياڻي هئي، 2012ع ۾ ڪانٽريڪٽ تي سترهين گريڊ جي ليڪچرار لڳي، ليڪچرار ٿي ته هڪ سال جي پگهار وٺڻ کانسواءِ اسڪول ٽيچر واري نوڪري کان موڪل ورتي.  وڪيلن جي دليلن تي چيف جسٽس آصف سعيد کوسا چيو ته سالن بعد ڪانٽريڪٽ وڌيو ته ليڪررشپ جاري رکي، اسڪول واري پگهار به ايندي رهي. ماسترياڻي جي وڪيل چيو ته اسان سموري پگهار واپس ڪري ڇڏي آهي.  ان موقعي تي جسٽس سجاد علي شاهه رمارڪس ڏيندي چيو ته عورت ٽيچر دوکو ڏنو، ٽن سالن بعد اسڪول واري نوڪري تان استعيفيٰ ڏئي ڇڏي. چيف جسٽس چيو ته ماسترياڻي حقيقتن کان انڪار نه ٿي ڪري سگهي، هڪ ئي وقت ۾ ٻه نوڪريون جاري رکيون ويون جيڪو ڏوهه آهي، ملڪ ۾ سڀ کان وڏو مسئلو ڪوڙ ۽ دوکو آهي، ملڪ ۾ سڀ دوکو ڏيندا آهن،  جيڪڏهن پڙهيل لکيل ماڻهو دوکو ڏيندا ته پوءِ اڻپڙهيل ڇا ڪندا. جسٽس آصف سعيد کوسا ماسترياڻي جي وڪيل سان ڳالهائيندي چيو ته توهان سوچو ته فاٽا جو معاملو آهي ڪنهن کي خبر نه پوندي، ان بعد ته توهان ڪنهن پبلڪ سروس جا حقدار ئي نه ٿا رهو، پهرين غلطي آخر غلطي هوندي آهي.

 

سنڌ ۾ گورنر کان بيان ڏيارڻ ملڪ ٽوڙڻ جي سازش آهي. عيد کانپوءِ عمران خان لاءِ ڏکيائين ۾ اضافو ٿيندو: منظور وساڻ

ڪراچي( ويب ڊيسڪ ) پ پ اڳواڻ منظور وساڻ اڳڪٿي ڪندي چيو آهي ته عمران خان وزيراعظم جو عهدو ڇڏي ڀڄي ويندو ڇو ته ڪجهه طاقتن جي ڪوشش آهي ته ٽيڪنو ڪريٽس ذيعي حڪومت هلائي وڃي. عيد کانپوءِ عمران خان جي ڏکيائين ۾ اضافو ٿيندو. ڪراچيءَ ۾ سنڌ هاءِ ڪورٽ ٻاهران ميڊيا سان ڳالهائيندي منظور وساڻ چيو ته سنڌ ۾ گورنر کان بيان ڏيارڻ ملڪ ٽوڙڻ جي سازش آهي، عمران خان ذريعي ملڪ ٽوڙڻ جي سازش ڪري سگهجي ٿي. هن چيو ته عمران خان تي آءِ ايم ايف جو ڪنٽرول ٿي ويو آهي، عيد کانپوءِ هن لاءِ وڌيڪ ڏکيائيون پيدا ٿينديون، عمران خان وزيراعظم جو عهدو ڇڏي ڀڄي ويندو ڇو ته ڪجهه طاقتن جي ڪوشش آهي ته ٽيڪنو ڪريٽ ذريعي حڪومت هلائي وڃي. سندس چوڻ هو ته نواز شريف چونڊ نه وڙهندو پر هن جي جاءِ تي مريم نواز اليڪشن ۾ حصو وٺندي، ٿي سگهي ٿو ته ميان صاحب کي هڪ ٻن مهينن اندر عدالت مان رليف ملي وڃي. منظور وساڻ چيو ته اسان جو فيصلو عدالت جي هٿ ۾ آهي، اقامو 2012ع ۾ ورتو ۽ 2013ع ۾ فارم ڀريو، لڪايو ناهي، 2015ع ۾ ختم ڪرايو، اقامي سبب ڪابه ٽرانزيڪشن نه ٿي ۽ مان اليڪشن نه وڙهي سگهيس، جيڪڏهن الزام هنيو ويو آهي ته پئسا ڪڍي ڏيکاريو، اسان احتساب کان نه ڊڄنداسين. هن چيو ته حڪومت مشرف کي به ته واپس آڻي کيس ڇو نه پيو آندو وڃي.