تازيون خبرون
ڪاري ناڻي کي اڇو ڪرڻ جو موقعو، وفاقي ڪابينا ايمنسٽي اسڪيم جي منظوري ڏئي ڇڏي - ڪشمور: مسافر وين کي باهه،3 عورتن ۽ ٻارڙي سميت 5 ڄڻا سڙي فوت، 6 زخمي - حڪومتي ادارا سياسي انتقام لاءِ استعمال ٿي رهيا آهن: ن ليگ - سنڌ اسيمبلي ۾ رڳو هڪٻئي جا پٽڪا لاهڻ لاءِ بحث ٿيندو آهي: سنڌ هاءِ ڪورٽ - سڌ سماءِ صلاحڪار جي صدر سان ملاقات، صدر ميڊيا جا مسئلا حل ڪرڻ بابت ذميواري ڏني آهي: فردوس عاشق اعواڻ - آمريڪا پاڪستان تي ڪا ويزا پابندي نه لڳائي آهي، ميڊيا ۾ ڪوڙيون خبرون آيون هيون: شاهه محمود قريشي - حڪومت شهرين جي حفاظت بدران سياسي انتقام ۾ رُڌل آهي: آصف زرداري - پاڪستان پن بجلي جي پيداوار صلاحيت ۾ تازي واڌ جي حوالي سان سڄي دنيا ۾ ٽئين نمبر تي رهيو: رپورٽ جاري - انجينئر امير مقام جي پٽ ۽ سئوٽ جي گرفتاري جي مذمت، ٻه نمبري نئون پاڪستان نه کپي : شهباز شريف - ڪراچي مان ٻه مهينا اڳ پراسرار نموني گم ٿي ويل ايم بي بي ايس جي شاگردياڻي عروج صديقي جي ڊرامائي انداز ۾ گهر واپسي

Daily Archives: May 6, 2019

ڀٽو عوامي ليڊر هو، ملڪ کي فوج نه عوام متحد رکندو آهي: عمران خان

سوهاوا (ويب ڊيسڪ) وزيراعظم عمران خان چيو آهي ته معاشي بحران ايندا ويندا آهن پر نظريو هليو وڃي ته قوم ختم ٿي ويندي آهي، ملڪ کي فوج نه عوام متحد رکندو آهي. جهلم جي تعلقي سوهاوا ۾ القادر يونيورسٽي جي پيڙهه جو پٿر رکڻ جي تقريب کي خطاب ڪندي وزيراعظم چيو ته روحانيت جي سپهه سالار عبدالقادر جيلاني جي نالي تي يونيورسٽي جو بنياد رکيو آهي، عظيم صوفي بزرگ اسلام، روحانيت ۽ سائنس جو واسطو جوڙيو هو ۽ روحانيت ۾ تحقيق شروع ڪرائي هئي، اسان به ان نظريي سان اڳتي وڌنداسين، اسان به اسلام، روحانيت ۽ سائنس جو واسطو جوڙينداسين، روحانيات کي سپر بڻائينداسين. هن چيو ته اسان اسڪولن ۾ ٻارن کي مديني جي رياست ۽ پاڪستان جي نظريي بابت ٻڌائينداسين ته گهٽ ۾ گهٽ ايندڙ نسلن کي دين جي حقيقي تعليم ڏئي سگهون، جيڪڏهن اسان پاڪستان ٺهڻ جي حقيقي مقصد جي باري ۾ نه پڙهائي سگهياسين ته اولهه ڪلچر جو مقابلو ڪرڻو ڏکيو هوندو، اسان کي نوجوانن کي ليڊر بڻائڻو آهي ۽ اهي تڏهن بڻجندا جڏهن ته مديني جي رياست جي اصولن ۽ تصور جي باري ۾ پڙهندا، ان مقصد لاءِ القادر يونيورسٽي ۾ ريسرچ ڪرائينداسين. عمران خان چيو پاڪستان جو نظريو پوئتي هليو ويو ته اوڀر پاڪستان ٽُٽو، ڀُٽو کانپوءِ جيڪي به حڪمران آيا اهي عوام جا خير خواهه بڻيا ۽ ويا ته لنڊن ۾ ملڪيتون هيون، حقيقت ۾ پاڪستان کي اسلامي فلاحي رياست بڻجڻو هو، اڄوڪو اهو پاڪستان ناهي جيڪو بڻجڻ گهرجي ها، ملڪ ٺاهڻ لاءِ جيڪا سوچ هئي ان کي سياسي قيادت دفن ڪري ڇڏيو، نظريو ختم ٿئي ته قوم ئي ختم ٿي ويندي آهي، ملڪ کي فوج نه پر عوام متحد رکندو آهي. سندس چوڻ هو ته علاما اقبال دين سان گڏوگڏ اولهه جا فلسفا پڙهيا، اتان جي اسڪالرن سان مليو، اوڀر جي شاعر جون 90 سال اڳ واريون ڳالهيون ۽ ڪلام ائين لڳندو آهي ڄڻ هو اڄ اسان لاءِ ڳالهيون ڪري رهيو آهي، ڇو ته کيس سائنس جي به خبر هئي، اڄ بدقسمتي سان گهڻي ڀاڱي سياستدانن کي پنهنجي لڳل آهي ته ڪٿان نه ڪٿان ترقياتي فنڊ ملي وڃن، اسان کي وڏي سوچ واري ليڊر جي ضرورت آهي. وزيراعظم چيو ته عبدالقادر جيلاني يونيورسٽي کي نمل جيان ٺاهينداسين، جيڪا عوام جو پئسو گڏ ڪري ٺاهي ويندي، ان يونيورسٽي لاءِ حڪومت فنڊ نه ڏيندي، هتي ذهين شاگردن کي داخلا ڏينداسين ۽ ميرٽ جي بنياد تي سڄي ملڪ مان شاگردن کي هتي آڻينداسين.

 

رضا باقرملڪن کي قرض جي غلام ۾ رکڻ جو ماهر آهي: ن ليگ

اسلام آباد (اين اين آءِ) ن ليگ جي ترجمان چيو آهي ته عمران خان توهان ڊاڪٽر رضا باقر کي اسٽيٽ بينڪ جو گورنر ڪري ويهاريو آهي جيڪو 2000 کان آءِ ايم ايف جو ملازم آهي، ڊاڪٽر رضا باقر ملڪن کي قرض جي غلامي ۾ رکڻ جي مهارت رکي ٿو، پاڪستان جي سڀ کان اعليٰ ڳالهيون ڪندڙن کي برطرف ڪري آءِ ايم ايف جي ملازمن کي پاڪستان جي خزاني جي چاٻي ڏني وئي آهي، نواز شريف ملڪ کي سي پيڪ ڏنو ۽ عمران خان ملڪ کي آءِ ايم ايف ۾ گروي رکيو، آچر تي مريم اورنگزيب اسٽيٽ بينڪ جي گورنر جي مقرري تي رد عمل ڏيندي چيو ته عمران خان توهان پاڪستان ۾ آءِ ايم ايف جي آفيس کولي ڇڏي آهي، هن چيو ته وزيراعظم نااهل، ناڻي وزير آءِ ايم ايف جو، اسٽيٽ بينڪ جو گورنر آءِ ايم ايف جو، عوام کي دلاسا ۽ مخالفن کي چور چور ڌاڙيل ڌاڙيل سڏيو وڃي ٿو، هن چيو ته عمران رضا باقر جي مقرري ان ڳالهه جي تصديق آهي ته ملڪ ۾ آءِ ايم ايف جي قرض سڌارن ۽ ري اسٽرچرنگ جو نظام آندو پيو وڃي، هن چيو ته آءِ ايم ايف جو ملازم مقرر ٿيڻ سان اسٽيٽ بينڪ تي آءِ ايم ايف جو قبضو ٿي ويو آهي، هن چيو ته عمران خان ملڪ کي نئين ايسٽ انڊيا ڪمپني جي حوالي ڪري ڇڏيو آهي، عمران خان جا ارادا ڏسي هاڻ قوم کي پاڪستان جي ايٽمي صلاحيت لاءِ ڳڻتي ڪرڻ گهرجي، هن چيو ته عمران خان جي نالائق حڪومت لاءِ سولائي ٿي وئي آهي، هاڻ سڀ ڪجهه آءِ ايم ايف پاڻ ڪندو، هن چيو ته عمران خان صاحب توهان کي آءِ ايم ايف وٽ وڃڻ جي ضرورت نه آهي، توهان پاڪستان ۾ آءِ ايم ايف جي آفيس کولي ڇڏي آهي، هن چيو ته نواز شريف کي هٽائڻ جي اصل راند سمجهه ۾ اچي رهي آهي.

 

تيل اگهن ۾ واڌ رد، اسد عمر جي تبديلي پويان آءِ ايم ايف آهي: پيپلز پارٽي

سکر (اين اين آءِ)  پ پ جي اڳواڻ خورشيد شاهه چيو آهي ته وزيراعظم عمران خان اسد عمر کي آءِ ايم ايف جي خواهش تي هٽايو، نئين معاشي ٽيم آڻي عوام کي بدهال ڪرڻ جو منصوبو آهي، حڪومت بجيٽ کان اڳ ئي تباهي آڻي ڇڏي آهي، اميد هئي ته حڪمران رمضان کان اڳ پيٽرول جا اگهه وڌائڻ جي بيوقوفي نه ڪندا پر هيءَ حڪومت نااهل ثابت ٿي آهي، هر شيءِ هٿ مان نڪري رهي آهي، غريب ماڻهو هڪ ماني جا محتاج هئا، هاڻ شايد روزو به نه کولي سگهن، آچر تي ميڊيا سان ڳالهائيندي هن چيو ته منهنجي انفارميشن آهي ته اسد عمر کي هٽائڻ ۾ باقر رضا کي استعمال ڪيو ويو، باقر رضا ذريعي پيغام پهچايو ويو ته آءِ ايم ايف اسد عمر مان خوش نه آهي، خورشيد شاهه چيو ته اهو به ٻڌايو ويو ته اسد عمر جي هوندي آءِ ايم ايف کان پيڪيج نه ملندو، هن چيو ته آءِ ايم ايف سخت فيصلا نه ڪرڻ تي اسد عمر کان راضي نه هو، هن چيو ته آءِ ايم ايف سمجهي رهيو هو ته اسد عمر کي ڪا به خبر نه آهي، اسٽيٽ بينڪ جي گورنر ۽ ايف بي آر جي چيئرمين جي تبديلي ڳالهائيندي هن چيو ته نئين ناڻي وزير جو حق آهي ته پنهنجي مرضي جي ٽيم آڻي پر لڳي اهو رهيو آهي ته ٽيم آڻي عوام کي بکيو مارڻ جو منصوبو آهي، هن چيو ته حڪومت بجيٽ کان اڳ ئي تباهي مچائي ڇڏي آهي، هن چيو ته ٽيڪس نيٽ وڌائڻ بدران سمورو بار غريبن تي وڌو ويو، هي سڀ پيسا غريب مان ڪڍي حڪومت هلائڻ چاهين ٿا، هن چيو ته سوچي به نه پئي سگهياسين ته تيل جو اگهه 122 ليٽر ٿيندو، هن چيو ته اسان جي دور ۾ تيل هڪ سئو 40 ڊالر في بيرل ۽ هاڻ 70 ڊالر في بيرل آهي، هيءَ حڪومت نااهل ثابت ٿي آهي.   ٻئي طرف  پ پ جي مرڪزي ترجمان مولا بخش ڇانڊيو پيٽرول اگهن ۾ واڌ جي مزمت ڪندي چيو آهي ته واڌ رد ڪريون ٿ، آءِ ايم ايف جي حڪم تي عوام تي مهانگائي جا بم ڪيرايا پيا وڃن، عوام جو صبر موڪلائي چڪو آهي، هاڻ حڪومت گهڻي وقت تائين نه هلي سگهندي، آچر تي هن چيو ته حڪومت غريبن کان جيئڻ جو حق کسي ورتو آهي، عوام جي شيون خريد ڪرڻ جي سگهه جواب ڏئي چڪي آهي، ڳاٽي ٽوڙ مهانگائي ملڪ کي ڏڦيڙ ڏانهن ڍڪي رهي آهي، هن چيو ته جنهن آءِ ايم ايف ڏي نه وڃڻ جو واعدو ڪيو هاڻ ان کي معيشت تي ويهاري ڇڏيو آهي، هن چيو ته هاڻ آءِ ايم ايف جي مرضي آهي ته غريب پاڪستاني کي هڪ ويلي جي ماني کائڻي آهي يا ناهي کائڻي.

 

تحريڪ انصاف جو حشر ق ليگ کان به خراب ٿيندو: احسن اقبال

نارووال (ويب ڊيسڪ) ن ليگ اڳواڻ احسن اقبال دعويٰ ڪئي آهي ته تحريڪ انصاف جو حشر ق ليگ کان به خراب ٿيندو. صحافين سان ڳالهائيندي احسن اقبال چيو ته هن حڪومت غريب جا چُلها وسامي ڇڏيا آهن ۽ مهانگائيءَ جي سونامي عام ماڻهو جي زندگي عذاب ڪري ڇڏي آهي. هن چيو عمران خان ته محل ۾ رهندو آهي ۽ سندس اي ٽي ايمز خرچ هلائيندا آهن پر غريب کي ته محنت ڪري پنهنجي کاڌي جو بندوبست ڪرڻو پوندو آهي. سندس چوڻ هو ته عمران خان غربت نه غريب ختم ڪري رهيو آهي، اسان ان ظلم خلاف چُپ نه ويهنداسين، وزراعظم ارب پتي ماڻهن کي فائدو پهچائي رهيو آهي، جن چونڊن تي پئسو لڳايو، ايندڙ چونڊن ۾ غريب جي پِٽَ انهن جون ضمانتون ضبط ڪرائيندي. احسن اقبال چيو ته فردوس عاشق اعواڻ جي بيانن کي سنجيده نه وٺڻ گهرجي، اها اڳ زرداري جو بچاءَ ڪندي هئي، هاڻ عمران خان جو بچاءُ ڪري رهي آهي، مريم نواز خلاف ڪير به ناهي، هوءَ پارٽي عهديدار بڻجڻ جي صلاحيت رکي ٿي، مريم نواز کي احتساب عدالت طرفان ڏنل سزا اسلام آباد هاءِ ڪورٽ جي فيصلي ۾ معطل ٿي چڪي آهي.

 

عوام تي پئٽرول بم ڄاڻي واڻي ناهي ڪيرايو، عالمي سطح تي تيل جي اگهن ۾ واڌ سبب اهو فيصلو ڪيو: فردوس عاشق اعواڻ

لاهور ( ويب ڊيسڪ ) وزيراعظم جي سڌ سماءَ بابت خاص مددگار فردوس عاشق اعواڻ چيو آهي ته عوام تي پئٽرول بم ڄاڻي واڻي ناهي ڪيرايو، عالمي سطح تي تيل جي اگهن ۾ واڌ سبب اهو فيصلو ڪيو آهي . لاهور ۾ ميڊيا سان ڳالهائيندي فردوس عاشق اعواڻ چيو ته عالمي مارڪيٽ ۾ اگهه وڌيا ۽ قيمتن ۾ اضافي جو بار حڪومت ۽ عوام کي گڏجي برداشت ڪرڻو پوندو. خاص مددگار چيو ته وزيراعظم عمران خان گهٽ ۾ گهٽ نه چاهيندو ته هو عوام جي پريشانين اضافو ڪري.

 

لائن آف ڪنٽرول تي ڀارتي فوج جي بنا سبب فائرنگ ۾ عورت ۽ نينگر شهيد

ڪوٽلي (ويب ڊيسڪ) لائن آف ڪنٽرول تي ڀارتي فوج جي بنا سبب فائرنگ ۾ عورت ۽ نينگر شهيد ٿي ويو. آءِ ايس پي آر موجب ڀارتي فوج سيز فائر معاهدي جي ڀڃڪڙي ڪندي ڪنٽرول لائن تي گرم چشما ۽ ڪوٽ ڪوٽيرا سيڪٽر تي بنا سبب فائرنگ ڪندي آبادي کي نشانو بڻايو، جنهن تي نتيجي ۾ ٻه شهري شهيد ٿيا. پاڪ فوج جي ترجمان موجب ڀارتي فوج جي فائرنگ ۾ 45 ورهين جي نسرين بي بي ۽ 12 ورهين جو زاهد پٽ شبير شهيد ٿيو، جڏهن ته فائرنگ ۾ هڪ عورت سونيا بي بي زخمي پڻ ٿي..

 

فواد چوڌري نظام کان لاعلم آهي، کيس خبر هجڻ گهرجي ته اجلاس موسميات کاتي ۾ ٿيندو آهي: مفتي منيب الرحمان

ڪراچي (ويب ڊيسڪ) چنڊ ڏسڻي ڪميٽي جي چيئرمين مفتي منيب الرحمان اسلامي ڪئلينڊر ٺاهڻ جي حوالي سان سائنس ۽ ٽينڪنالاجي بابت وفاقي وزير فواد چوڌري کي سخت جواب ڏئي ڇڏيو آهي. ڪراچي ۾ ڏنڊ ڏسڻي ڪميٽي جي اجلاس کان اڳ صحافين سان ڳالهائيندي مفتي منيب الرحمان چيو ته فواد چوڌري نظام کان لاعلم آهي، کيس خبر هجڻ گهرجي ته اجلاس موسميات کاتي ۾ ٿيندو آهي، ڪڏهن به ائين ناهي ٿيندو ته کليل آسمان ۾ چنڊ نظر نه اچي. هن چيو فواد چوڌري چاهي ته کيس 100 سالن جو ڪئلينڊر به ٻڌائي ڇڏينداسين، هو جلسا ڪري پر ديني معاملن ۾ ڳالهائڻ کان پرهيز ڪرڻ گهرجي، فواد چوڌري پاڪستان جي تاريخ کي نه ڊاهي، وزيراعظم وزيرن کي هدايت جاري ڪري ته اهي تاريخ کي مسخ نه ڪن. واضح رهي ته فواد چوڌري پنهنجي بيان ۾ چيو هو ته هڪ ڪميٽي قائم ڪئي وئي آهي، جنهن کانپوءِ هر سال چنڊ جي حوالي سان پيدا ٿيندڙ تڪرار ختم ٿي ويندو. سندس چوڻ هو ته سپارڪو، موسميات کاتي ۽ سائنس ٽيڪنالاجي جي ماهرن تي ٻڌل هڪ 5 رڪني ڪميٽي قائم ڪئي وئي آهي، جيڪا ايندڙ 10 سالن لاءِ چنڊ، عيدن، محرم ۽ رمضان سميت اهم تاريخ جو ڪئلينڊر جاري ڪندي.

 

هن وقت ن ليگ جو باقاعدا حصو ناهيان، شاهد خاقان عباسي جي خواهش بابت خبر ناهي: چوڌري نثار

راولپنڊي (اين اين آءِ) سينيئر سياستدان ۽ اڳوڻي گهرو وزير چوڌري نثار خان چيو آهي ته مڪاني کاتن کي ٽوڙڻ جي حڪومتي پاليسي ڪامياب نه ٿيندي، جنگ ضرور عدالت ۾ وڙهي ويندي، جيڪي قرض ڏيندا آهن انهن جي دڪٽيشن تي هلڻو پوندو آهي، موجوده حڪومت قرض وٺڻ ۾ ن ليگ ۽ پ پ کان اڳتي نڪري وئي آهي، هي قوم سان ظلم نه پر جرم آهي، آءِ ايم ايف جو 6 يا 7 ارب رپيا ڪيئن اسان جي معيشت کي مضبوط ڪري سگهي ٿو، اسان بند گهٽي ڏانهن وڌي رهيا آهيون،پاڪستاني ڪرڪيٽ ٽيم ۽ فنڪار ڀارت نٿا وڃي سگهن، ان کان وڏي انتهاپسندي ڪيئن ٿيندي، هو ميڊيا سان ڳالهائي رهيو هو، صحافي جي سوال تي چوڌري نثار جواب ڏنو ته هن وقت ن ليگ جو حصو نه آهيان، ن ليگ ڪنهن کي عهدا ڏنا ڪنهن کي نه ان تي ڪجهه نه چوندس، هن چيو ته گهڻو اڳ چيو هو ته موجوده حڪومت موجوده مڪاني ادارن کي ڪم ڪرڻ نه ڏيندي، ان ۾ اها به سياسي جرئت نه آهي ته مڪاني چونڊون نئين سر ڪرائين، هن چيو ته مڪاني ادارن کي جيئن موجوده حڪومت گهر موڪليو ائين نٿو ٿي سگهي، هي جنگ ضرور عدالت ۾ وڙهي ويندي. اڳوڻي گهرو وزير چيو ته ڀارت ۾ پاڪستان جو نالو وٺندڙ کي قتل ڪيو وڃي، هن چيو ته ان ۾ خامي اسان جي آهي ته ڀارت جا ڏوهه دنيا کي نظر نٿا اچن، هن چيو ته عمران خان ٽرمپ کي جواب ڏنو ته مون ساراهه ڪئي، هن چيو ته اهو ڏينهن ۽ هي ڏينهن مون کي عمران خان جي اها بهادري ۽ وطن سان محبت جو جذبو نظر نٿو اچي.

 

زمين جي مالڪي تان ناريجا برادري جي ٻن ڌرين وچ ۾ جھيڙو، 2 ڄڻا مارجي ويا، 2 زخمي، ڇڪتاڻ جاري

احمدپور( رپورٽر) احمدپور لڳ ٻن ڌرين وچ ۾ جهيڙي دوران فائرنگ جي نتيجي ۾ 2 ڄڻا مارجي ويا، 2 زخمي ٿي پيا، ڳوٺ رفيق مهيسر ۾ زمين جي مالڪي تان ناريجا برادري جي ٻن ڌرين وچ ۾ جھيڙو ٿيو، جنهن دوران فائرنگ ۾ سهراب ناريجو ٿڏي تي مارجي ويو، 3 ڄڻا نياز ناريجو، دوست محمد، عجيب ناريجو زخمي ٿي پيا، جن کي خيرپور اسپتال جي ايمرجنسي وارڊ ۾ داخل ڪرايو ويو، جتي زخمي عجيب ناريجو زخمن جا سور نه سهندي فوت ٿي ويو، جنهن بعد مارجي ويلن جو انگ 2 ٿي ويو، ٽنڊو مستي پوليس واقعي واري هنڌ پهچي مقتول سهراب ناريجو جو لاش پوسٽ مارٽم ڪرائڻ لاءِ خيرپور اسپتال منتقل ڪيو، پر هڪ به جوابدار گرفتار نه ٿي سگهيو، ٻن ڄڻن جي قتل بعد ڌرين وچ ۾ ڇڪتاڻ تيز ٿي وئي.

 

لاڙڪاڻي ۾ ايڊز جي مريضن جي انگ ۾ لڳاتار واڌ، ايڊز ۾ ورتل ماڻهن جو انگ 158 ٿي ويو

لاڙڪاڻو (اين اين آءِ) لاڙڪاڻي ۾ ايڊز جي مريضن جي انگ ۾ لڳاتار واڌي ٿي رهي آهي، ايڇ آءِ وي جا متاثر 29 نوان ڪيس ظاهر ٿيا آهن جنهن کانپوءِ ايڊز ۾ ورتل ماڻهن جو انگ 158 ٿي ويو آهي، رتوديرو ۾ 8 ڏينهن ۾ 3940 ماڻهن جي بلڊ اسڪريننگ ٿي چڪي آهي، ڪراچي سول اسپتال جي ٽيم رتوديرو پهچي متاثرن جي مڪمل ٽيسٽ سان هڪ ڊاڪٽر علاج کي ٽريننگ ڏني ويندي، واضح رهي ته حيدرآباد ۾ هن سال ايڇ آءِ وي جي 43 نون ڪيسن جو انڪشاف ٿيو آهي، ڊسٽرڪٽ هيلٿ آفيسر موجب هلندڙ سال ايڇ آءِ وي جي وڌيڪ 43 مريضن جي واڌ ٿي آهي، مختلف ڳوٺن ۾ 12 سئو ماڻهن جي اسڪريننگ ڪئي، سڄي سنڌ ۾ اسڪريننگ جو سلسلو جاري آهي، ملڪ 23 وڏن شهرن ۾ ايڊز جو خطرو وڌي ويو آهي، ڪراچي، بنون، جيڪب آباد سميت مختلف شهرن ۾ ايڊز تيزي سان ڦهلجي رهي آهي.