تازيون خبرون
شاهد خاقان عباسي نيب هٿان گرفتار، نيب ۽ نيازي تماشو لڳائي رهيو آهي: ن ليگ - ن ليگ جي خواهش پوري ٿي، شاهد خاقان چوري کائڻ وارو مجنو نه بڻجي: فردوس عاشق - ادارا قانون جي بالادستي کي يقيني بڻائن، حڪومت ڪم ۾ مداخلت نه ڪندي: عمران خان - سياسي اڳواڻن جون گرفتاريون بني گالا مان ملندڙ هدايتن تي پيون ٿين: مرتضيٰ وهاب - حڪومت گرفتارين ذريعي ناڪاميون لڪائڻ چاهي ٿي، اپوزيشن خلاف امتيازي احتساب قبولڻ جوڳو ناهي: بلاول ڀٽو زرداري - پنهنجي پارٽي ۾ پاڻ کي مڃرائڻ ۽ پنهنجي جاءِ بڻائڻ جي لاءِ ڏاڍيون قربانيون ڏيڻيون پيون: مريم نواز جو انٽرويو - ايڇ آءِ وي تي ڪنٽرول ۽ پکيڙجڻ کي روڪڻ لاءِ 600 ملين رپيا مختص، متاثرن جي بحاليءَ لاءِ ھڪ ارب فنڊ قائم ڪيو آھي: وڏو وزير - شاهد خاقان کي گرفتاري جي خبر هئي، ايل اين جي ڪيس ۾ اڃان به ڪيتريون ئي گرفتاريون ٿينديون؛ شيخ رشيد - جج ويڊيو اسڪينڊل: ايف آءِ اي ٽيم جو ميان طارق جي دڪان ۽ آفيس تي ڇاپو، اهم دستاويز هٿ - نيب جو نالو تبديل ڪري ن ليگ احتساب بيورو رکيو وڃي، عمران خان کي پاڪستاني هٽلر ٿيڻ نه ڏينداسين: احسن اقبال/مريم اورنگزيب

Monthly Archives: May 2019

ترقياتي اسڪيمن ۾ سنڌ کي جائز حصو نه پيو ڏنو وڃي: مراد علي شاهه

ڪراچي (اسٽاف رپورٽر): سنڌ جي وڏي وزير سيد مراد علي شاهه چيو آهي ته سنڌ جي ترقياتي اسڪيمن ۾ کيس جائز حصو نه ڏنو ويو، نيشنل هاءِ وي اٿارٽي ۾ سنڌ سان ظلم ڪيو ويو، 74 ارب رپين مان هڪ انچ روڊ به نه بڻايو ويو. مراد علي شاهه چيو ته بزنس ڪميونٽي به وزيراعظم کان تنگ آهي، خبر نه آهي وزيراعظم ڪنهن جي هدايت تي هلي رهيو آهي، اڪنامي ۾ 3 سيڪڙو به نمو نه ٿي سگهي، وزيراعظم فيصلو ڪندي وقت صوبن ۽ تاجرن کي اعتماد ۾ نه ورتو، جيستائين اسٽيڪ هولڊرن کي گڏ نه وٺنداسين ته مسئلا وڌندا. اهڙن خيلن جو اظهار هن اين اي سي اجلاس سان واپس اچڻ کانپوءِ ڪراچي ۾ نيوز ڪانفرنس کي خطاب ڪندي ڪيو. ان موقعي تي ان سان گڏ پيپلز پارٽي جو سينئر اڳواڻ ۽ سنڌ جو صدر نثار احمد کهڙو، اطلاعات وارو صلاحڪار مرتضيٰ وهاب، ايڪسائيز وارو وزير مڪيش ڪمار چاولا، صوبائي اسيمبلي ميمبر اعجاز جکراڻي ۽ ٻيا موجود هئا. سنڌ اسيمبلي جي ڪميٽي روم ۾ ٿيندڙ پريس ڪانفرنس کي خطاب ڪندي وڏي وزير مراد علي شاهه چيو ته اين اي سي جي اجلاس ۾ گذريل ڏينهن اسان اسلام آباد وياسين، گذريل سال نيشنل اڪنامڪ ڪونسل جا 2 اجلاس ٿيا هئا، گذريل ڏينهن ٿيندڙ اجلاس ۾ پنج سال جو منصوبو منظوري لاءِ پيش ڪيو ويو، هلندڙ سال نيشنل اڪنامڪ ڪونسل جو ڪوبه اجلاس ڪوٺايو نه ويو، وزيراعظم نيشنل اڪنامڪ ڪونسل جي سربراهي ڪندو آهي، نيشنل اڪنامڪ ڪونسل کي گهٽ ۾ گهٽ 2 اجلاس ٿيڻ گهرجن. وڏي وزير پريس ڪانفرنس ۾ ٻڌايو ته قومي اقتصادي ڪونسل آئيني ادارو آهي، پهرين ڀيرو ايئن ٿيو آهي ته اين اي سي ۾ 3 ايڊوائزر ورتا ويا، آئين ۾ لکيل آهي اداري طرفان سال ۾ 2 اجلاس ٿيڻ گهرجن، 30 جون تائين ٻئين ميٽنگ ٿيندي ته آئيني تقاضا پورا ٿيندا. هن چيو ته وزيراعظم فيصلو ڪندي وقت صوبن ۽ تاجرن کي اعتماد ۾ نه وٺندو آهي، جيستائين صوبن يعني اسٽيڪ هولڊرن کي گڏ نه کڻندو ته مسئلا رهندا. مراد علي شاهه چيو ته بزنس ڪميونٽي به وزيراعظم کان تنگ آهن، خبر نه وزيراعظم ڪنهن جي هدايت تي هلي رهيو آهي، اڪنامي ۾ 3 سيڪڙو به نمو نه ٿي سگهي، وزيراعظم فيصلا وٺندي وقت صوبن ۽ تاجرن کي اعتماد ۾ نه وٺندو آهي، جيستائين اسٽيل هولڊرن کي گڏ نه کڻندا ته مسئلا رهندا. وڏي وزير وڌيڪ چيو ته هو سمجهي ٿو ته معيشت ۾ 4 سيڪڙو گروٿ ٿيندي جيڪا آئون نه ٿو سمجهان ته ٿيندي. اجلاس ۾ 5 سال جو منصوبو منظوري لاءِ پيش ڪيو ويو، مون وزيراعظم کي چيو اوهان 5 سال جو منصوبو صوبي سان شيئر  ڪيو، جنهن جو ان وقت منهنجي سوال جو جواب نه هو. هن چيو ته وفاق صوبن کي اعتماد ۾ وٺندي فيصلو ڪري، وفاق اسڪيمن بابت پاڻ ئي فيصلا ڪري رهيو آهي، وزيراعظم پي ايس ڊي پي منظور ڪرڻ کان بغير اجلاس کان اٿي هليو ويو، صنعتڪار مونکي چوندا رهيا ته وزيراعظم اسان سان نه ٿو ملي. وڏي وزير چيو ته مون وزيراعظم کي چيو آڪٽوبر ۾ اين اي سي ۾ ملاقات ٿي هئي، مون وزيراعظم کي چيو سنڌ کي پي ايس ڊي پي ۾ حصو نه پيو ملي. مراد علي شاهه چيو ته پي ايس ڊي پي ۾ لکيل آهي ته ايندڙ سال 5 سيڪڙو گروٿ ٿيندي، پر جهڙي ريت منصوبا بڻايا ويا آهن ان ۾ 3 سيڪڙو به گروٿ ممڪن نه آهي، سڀئي منصوبا سيڪريٽري پيش ڪيا ۽ ميمبرن کان کيس راءِ به نه گهري وئي. وڏي وزير چيو ته سنڌ کي اسڪيمن ۾ جائز حصو نه ڏنو ويو، پي ٽي آئي اين اي سي ۾ وڃاڻ کان بغير پي ايس ڊي پي (پبلڪ سيڪٽر ڊيولپمينٽ پروگرام) کي تبديل ڪيو ۽ سيپٽمبر 2018 ۾ ٻيهر پي ايس ڊي پي بڻائي وئي. هن چيو ته اسان جا 36 منصوبا پي ايس ڊي پي مان ڪڍيا ويا آهن، اين ايڇ اي، سنڌ سان جيڪو ظلم ٿيو آهي، 74 بلين رپيا خرچ ڪيا ويا آهن جڏهن ته سنڌ ۾ 1.1 بلين رپيا خرچ ٿيو اهو به زمين جي حصول تي خرچ ڪيو ويو، ميرپورخاص-عمرڪوٽ سيڪشن هاءِ وي اسڪيم ختم ڪئي وئي. مراد علي شاهه چيو ته روهڙي ۾ درياءَ تي پل بڻائڻ جو نواز شريف اعلان ڪيو هو، ان دور ۾ پهرين 5 ڪروڙ پوءِ بعد ۾ اڍائي ارب رکيا ويا، آئون خوش هوس ته 4 سال ۾ اسڪيم مڪمل ٿي ويندي پر اها اسڪيم به روڪي وئي، شهدادپور، حيدرآباد ۽ سکر ۾ روڊن جون اسڪيمون به ختم ڪيون ويون. هن چيو ته نواز شريف چيو هو گرين لائين کي هڪ سال ۾ مڪمل ڪنداسين، جنهن جي انفرااسٽرڪچر تي 3 سال لڳي ويا، جڏهن موجوده وفاقي حڪومت سان ڳالهايو ته چيائين بسون اوهان آڻيو. ان کانپوءِ شهدادپور- حيدرآباد ۽ هيدرآباد-سکر روڊ جون اسڪيمون به ختم ڪيون ويون. نادرن باءِ پاس منصوبو جيڪو ڇهه رويا هو ان کي به پي ايس ڊي پي مان ڪڍيو ويو. ان کانپوءِ ٽنڊو ڄام ايڇ اي سي اسڪيم هئي، مهران يونيورسٽي سينٽر آف آرٽ منصوبو به ڪڍيو ويو. منڇر جهيل کي تازو پاڻي ڏيڻو هو اهو به نه ٿي سگهيو، ڪي بي فيڊر جي لائيننگ ۽ سکر بيراج جون اسڪيمون به ڪڍيون ويون. وڏي وزير چيو ته آئون وزيراعظم کي چيو ته اوهان اسان جون 36 اسڪيمون ته ڪڍي ڇڏيون آهن هاڻي وڌيڪ 31 اسڪيمون ٻيون ڪڍڻ چاهيون ٿا، جيڪڏهن وفاق کي ڪوبه فيصلو ڪرڻو آهي ته صوبن کي اعتماد ۾ ڇو نه ورتو ويندو آهي. مراد علي شاهه چيو ته ايس ٿري جي اسڪيم به ختم ڪئي وئي آهي. هن ٻڌايو ته ايس ٿري منصوبي لاءِ وزيراعظم چيو آهي ته ان ۾ گهوٻيون ٿي آهن، جنهن تي مون کيس چيو ته جنهن به گهوٻيون ڪيون آهن، ملوث ماڻهن کي سزا ڏيو، پر ڪراچي جي شهرين کي ته سزا نه ڏيو. هن چيوته هڪ طرف سنڌ ۾ ترقي تي گاريون پيون ڏنيون وڃن ٻئي طرف وفاق چوي ٿو ته سنڌ ۾ ڪوبه ترقي پذير علائقو نه آهي، جڏهن ته ٽنڊوڄام ۾ هڪ منصوبو هو اهو به ڪڍيو ويو. مراد علي شاهه وڌيڪ چيو ته ايندڙ سال 119 ارب جون اسڪيمون آهن، هڪ طرف چون ٿا 10 سال ۾ سنڌ ڪجهه نه ڪيو، ٻئي طرف سمري ۾ اعتراف ڪيو ويو آهي ته سنڌ ۾ ڪوبه گهٽ ترقي وارو علائقو نه آهي، وفاق اسڪيمن بابت فيصلا پاڻ ڪري رهيو آهي. حيدرآباد يونيورسٽي جي 2 ارب رپيا واري اسڪيم لاءِ به فقط 50 ڪروڙ رکيا ويا. وڏي وزير چيو ته وفاقي حڪومت ٻين صوبن کي لوڪلائيز ڪيو آهي پر سنڌ جي لوڪلائيز اسڪيم تي سنجيده نه آهي. وڏي وزير چيو ته ايندڙ سال جي پي ايس ڊي پي ۾ 129 بلين رپين جون اسڪيمون آهن پر سنڌ کي ان ۾ ڪوبه خاص شيئر نه ڏنو ويو. وفاقي حڪومت چوي ٿي ته صوبن جي روڊن جون اسڪيمون نه ڪنداسين ته پوءِ وفاقي حڪومت ساوٿ پنجاب، بلوچستان ۽ فاٽا ۾ روڊن جون اسڪيمون ڪهڙي بنياد تي هلائي رهي آهي. انهيءَ مان ظاهر ٿئي ٿو ته سنڌ ۾ پسمانده علائقا نه آهن، ۽ ساڳيا لفظ مون وزيراعظم کي چيو ته اوهان پنهنجي تقرير ۾ ضرور چئو. مراد علي شاهه چيو ته اين ايف سي اجلاس جي آخر ۾ وزيراعظم پي ايس ڊي پي بغير منظوري جي اجلاس مان اٿي هليو ويو، ٻئي ڏينهن اخبار ۾ پڙهيو ته منظور ڪيو ويو آهي. هن ٻڌايو ته روينيو بابت وفاقي وزير  خسرو بختيار سان اڄ وڊيو ڪال تي ڳالهائيندي سمورن مسئلن بابت آگاهه ڪيو آهي جنهن تي هن مونکي خاطري ڪرائي آهي ته ڪجهه اسڪيمون جيڪي ختم ڪيون ويون آهن اهي ٻيهر شامل ڪنداسين. وڏي وزير سيد مراد علي شاهه هڪ سوال جي جواب ۾ ٻڌايو ته 7 سيپٽمبر 2018 جو آئون وزيراعظم کي خط لکيو هو ته ڄامشورو-سيوهڻ روڊ 14 ارب رپيا جو آهي جنهن ۾ سنڌ حڪومت 7 ارب رپيا ڏنا آهن، وڏي وزير چيو ته سڄو سال گذريو ويو ۽ 14 ارب جي اسڪيم تي فقط 15 ڪروڙ خرچ ٿيا آهن، منصوبي تي وزيراعظم کي خط کيو جنهن تي ايڪشن ورتو ويو پر نتيجو ٻڙي نڪتو. وڏي وزير چيو ته مراد سعيد اسٽيٽ منسٽر هو هو ڪراچي آيو پر وزيراعليٰ هائوس ۾ اچڻ لاءِ تيار نه ٿيو. اسٽيٽ منسٽر مان مڪمل منسٽر بڻجي ويو ڇوته هن وزيراعليٰ سان ملڻ کان  انڪار ڪيو. هن ٻڌايو ته 62 ارب رپيا جو ڪراچي پيڪيج تي 162 رپيا به نه مليا، گرين لائين منصوبي لاءِ وفاقي حڪومت بسون ڏيڻ تي رضامند ٿي هئي پر ڪجهه به ڪيائين. هلندڙ سال اپريل ۾ ڪابينا اجلاس ٿيو، جنهن ۾ هڪ نفيس منسٽر چيو ته جيڪا رقم سنڌ حڪومت اسپتالن تي خرچ ڪري رهي آهي اها اسان ايٽ سورس ختم ڪنداسين، ۽ اهو ئي ڪارڻ آهي ته وزيراعظم هر شيءِ تي نفيس ماڻهن جي ڳالهين ۾ اچي گمراه ٿئي ٿو، ڪجهه ماڻهو غلط مشورا ڏئي رهيا آهن ۽ غلط مشورا ورتا وڃن ٿا. وڏي وزير چيو ته 7 مارچ 2018 ، اين اي سي جو اجلاس ٿيو، خاقان عباسي وزيراعظم هو، مون چيو ته اسڪيم جو صوبي جي تحت لوڪيشن لائيڪ وائيز آهي ۽ اهو فيصلو ٿيو ويو، پر هاڻي به اسڪيم جي لوڪيشن نه پيا لکن، جنهن سان خبر نه ٿي پوي ته ڪيتريون اسڪيمون سنڌ کي ڏنيون ويون آهن. هن چيو ته ٿر ۾ اسان پاور پلانٽس کي پاڻي ڏيڻ چاهيون ٿا، پر هو چون ٿا ته اهو صوبي جي پاڻي واري اسڪيم ٿيڻ گهرجي، اسان چيو ته سکر بيراج، ڪوسٽل هاءِ وي به پي ايس ڊي پي ۾ شامل ڪيو، مون پرپوز ڪيو آهي ته موٽروي کان دادو تائين اندريان روڊ تعمير ڪيو وڃي پر اڃان تائين انهن ڪوبه وعدو نه ڪيو آهي. هن ٻڌايو ته نئين پي ايس ڊي پي ۾ روڊ نيٽ ورڪ، ايگريگيشن ۽ هاءِ ايجوڪيشن جي اسڪيمن ۾ سنڌ کي نظرانداز ڪيو ويو. وڏي وزير چيو ته 35 ارب رپين جا منصوبا پيپلز پارٽي جي حڪومت سنڌ کي ڏنا ته وفاق جي اسڪيمن کي ايگزيڪيوٽ ڪري پر اهو ڪم ٿيندي ٿيندي 7 بلين رپين جو ٿي ويو، 88 اسڪيمون سنڌ بيسڊ آهن جيڪي حذف ٿي رهيون آهن، ايس ٿري منصوبو 8 بلين رپين جو هو، شروع ۾ 50:50 سيڪڙو انٽريٽڊ پاڻي سمنڊ ۾ هوندو آهي. وڌيڪ چيو ته آئيني ادارا اين اي سي، سي سي آئي جنهن جو هر 90 ڏينهن کانپوءِ اجلاس ٿيڻو آهي پر اهي نه ٿا ڪن. هاڻي سي سي آئي جي ميٽنگ شيڊول ٿي آهي پر ان کي به رد ڪيو ويو آهي هاڻي شايد 17 جون تي ٿيندي. وڏي وزير چيو ته آئون سٺو سوچيان ٿو، شايد انهيءَ ڪري جو نفيس نه آهيان، اجلاس مان اٿي وڃڻ غير سنجيده قدم آهي، وزيراعظم پي ايس ڊي پي کي منظور ڪرڻو نه هو شايد ميمبرن ئي ان کي منظور ڪيو آهي، ڇا هو سنجيده نه آهي؟ وڏي وزير چيو ته سنڌ مالي مشڪلات جو شڪار آهي، اسان پنهنجي بجيٽ ۾ ڪجهه نيون اسڪيمون شامل ڪرڻ چاهيون ٿا. هن چيو ته وفاق ۾ پيپلز پارٽي جي حڪومت اين ايف سي، ارڙهين ترميم کي سي سي آئي جي اجلاس ۾ مستقل فيچر ڪيو، انهيءَ مان ظاهر ٿئي ٿو ته پيپلز پارٽي ئي حڪومت هلائي سگهي ٿي. پنهنجي پريس ڪانفرنس ۾ هن چيو ته سنڌ حڪومت ٻين صوبائي حڪومتن کان بهتر آهي، اسان عوام جي ووٽ ذريعي آيا آهيون انهيءَ ڪري اسان کي عوام جي فڪر آهي. وڌيڪ چيو ته اهو شخص جنهن تي قوم کي فخر هو ته هو سڀني مسئلن کان ملڪ کي ڪڍندو پر هو پاڻ نڪري ٿو. وڏي وزير چيو ته سرڪيولر ريلوي پاڪستان ريلوي هلائيندي، اهو وفاقي حڪومت جو سبجيٽ آهي، جڏهن پي ايم ايل (ن) حڪومت لاهور ۾ ميٽرو ٺاهي ته اسان وفاق کي چيو هو ته ڪي سي آر اسان کي ڏنو ويو، جيڪو وفاق ڪنسيشن لاهور اورينج لائين ميٽرو کي ڏنو ويو آهي اهو ڪي سي آر لاءِ سنڌ کي به ڏنو وڃي. وزيراعظم نواز شريف ڪي سي آر تي ساورين گانرٽي، ڪي يو ٽي سي جو ڪنٽرول ۽ سي پيڪ ۾ مدد ڏيڻ تي وفاقي حڪومت رضامند ٿي وئي هئي، پر ڪي سي آر کي 8 مهينن کانپوءِ ساوريين گارنٽي ڏني وئي، منصوبو سست روي جو شڪار ٿيو حالانڪه ڪي سي آر منصوبي جو رائيٽ آف وي به انهن اڃان تائين اسان کي نه ڏنو آهي. وڏي وزير چيو ته سنڌ حڪومت وٽ ريلوي بوگيز ۽ انجڻون نه آهن ته اسان 15 ڏينهن ۾ ڪيئن لوڪل ٽرين هلائينداسين. مراد علي شاهه چيو ته اسان سان وفاق جو سٺو رويو نه آهي تنهن هوندي به اسان پنهنجو حصو ضرور وٺنداسين، پر انهن جي نااهلي جو حل اسان وٽ نه آهي، اسان ته انهن کي حل ٻڌايو هو ته سيلز ٽيڪس سنڌ حوالي ڪيو، اسان وصوليون ڪري ڏينداسين پر اها ڳالهه انهن نه مڃي. هن چيو ته آڊيٽر جنرل جي رپورٽ اسيمبلي ۾ جمع ٿيندي آهي، جيڪا پبلڪ اڪائونٽس ڪميٽي وٽ ويندي آهي. وڌيڪ چيو ته مون خيبرپختونخواه جي به آڊيٽر جنرل جي رپوٽ اوهان آڏو رکندس، ان جي پيرس اسان کان وڌيڪ آهي. هن چيو ته سنڌ صوبي جي اپوزيشن کي سمجهه ئي نه آهي. آئون 2002 کان سياستدان رهيو آهيان، سياسي نظام ۽ سياسي ڪمن کي ڀلي ريت ڄاڻان ٿو، پر اهي ماڻهو ڪڏهن به سياسي سسٽم جي ويجهو کان به نه گذريا آهن ۽ وڏي منصب تي اچي پهتا آهن. وڏي وزير چيو ته نشتر روڊ جا 1.9 بلين رپيا جي اسڪيم وفاقي حڪومت ڪري رهي آهي ۽ جنهن تي 880 بلين رپيا خرچ ٿي چڪا آهن، منگهوپير 2.4 بلين رپيا جي اسڪيم آهي ۽ جنهن تي 1.37 بلين رپيا خرچ ٿيو آهي، اهو به وفاقي حڪومت بڻائي رهي آهي، پر انهيءَ جو الزام اسان مٿان لڳايو پيو وڃي. هن چيو ته وفاقي حڪومت چوي ٿي ته 4.4 ٽريلين وصول ڪندي، جنهن ۾ اسان 100 بلين رپين کان وڌيڪ گهٽ مليا آهن. وڌي چيو ته اين اي سي جو ڪم آهي ته اڪنامڪس سان فناننس تي صوبن کي گائيڊ ڪري، پر اهو پنهنجو ڪم نه پئي ڪري. وڏي وزير چيو ته وفاقي حڪومت هيوي ٽيڪس لڳائڻ وڃي رهي آهي ، اسان ٽيڪس ان تي لڳائينداسين جنهن کي سهولت ڏيون ٿا، پر وفاق ته سڀن تي ٽيڪس لڳائي رهي آهي. هن چيو ته اسان جو غربت جي خاتمي وارو پروگرام آهي جيڪو اسان شروع ڪرڻ وڃي رهيا آهيون، اهو پروگرام جون 10 تي چيئرمين پيپلز پارٽي پنهنجو اعلان ڪندو. مراد علي شاهه چيو ته ايڊز جو پکڙجڻ تشويشناڪ آهي، اسان کي ڪنٽرول ڪرڻو آهي پر ان تي سياست ڪرڻ ناقابل برداشت آهي، اسان عوام جي اسڪريننگ ڪرائي رهيا آهيون. هن چيو ته اسان انڊومنٽ فنڊ قائم ڪري رهيا آهيون، اسان متاثر ٿيندڙ جي تصديق کي به لڪ ۾ رکنداسين، ميڊيا کي به گهرجي ته هو متاثرين جو نالو نه وٺن. وڏي وزير چيو ته ايڇ آئي وي آهي پر اهو قابل علاج آهي جيڪڏهن انهيءَ جي وقت سر تشخيص ٿي وڃي. آخر ۾ هن چيوته پي ايس ڊي ۾ سنڌ کي خاص طور ڪراچي جناح ايوينيو تي فلائي اوو جي 14 بلين رپيا جي اسڪيم آهي. ۽ ڊملوٽي کان ايجوڪيشن سي روڊ، گرين لائين بي آر ٽي جي به 10.4 بلين رپين جي هڪ اسڪيم آهي پر ان لاءِ فقط 1 بلين رپيا رکيا ويا آهن.

 

نيب ۽ معيشت گڏ نه ٿا هلي سگهن، حڪومت جي ڪابه لائف ناهي: آصف زرداري

اسلام آباد (اين اين آءِ) اڳوڻي صدر آصف زرداري هڪ ڀيرو ٻيهر چيو آهي ته احتساب هلندو يا معيشت هلندي، حڪومت جو اسٽائيل ٻڌائي رهيو آهي ته هي نه هلندي، انشاالله اپوزيشن عيد کانپوءِ گڏجي تحريڪ هلائيندي، خميس تي آصف زرداري احتساب عدالت ٻاهران صحافي سوال ڪيو ته ڇا اپوزيشن عيد کانپوءِ گڏجي تحريڪ هلائڻ واري آهي، آصف زرداري جواب ڏنو ته انشاالله، جسٽس قاضي فائز عيسيٰ جي خلاف ريفرنس جي سوال تي آصف زرداري خاموش ٿي ويو، اڳوڻي صدر وات تي آڱر رکي خاموش رهڻ جو اشارو ڏنو، صحافي سوال ڪيو ته حڪومت ڇا ڪرڻ وڃي رهي آهي، صحافي سوال ڪيو ته آصف صاحب توهان خاموش رهڻ جو مشورو ڏنو ته ڪيسيتائين خاموشي اختيار ڪندا رهندا، آصف زرداري جواب ڏنو ته اسان توهان کي ڪڏهن چيو آهي ته توهان خاموش رهو، مون چيو آهي ته مان خاموش آهيا، صحافي سوال ڪيو ته خان صاحب چيو هو ته توهان ايندا ته ڪنٽينر ۽ کاڌو پيتو ڏينداسين پر ڪالهه جيڪو ٿيو ان تي ڇا چوندا، آصف زرداري چيو ته هي ڇا کاڌو پيتو ڏيندا، هنن تي عوام کان کاڌو پيتو کسي ورتو آهي، صحافي ٻيهر سوال ڪيو ته جڏهن حڪومت ڪيرائڻ مقصود نه آهي ته حڪومت خلاف تحريڪ هلائڻ جو ڪهڙو فائدو، آصف زرداري چيو ته عيد کانپوءِ حڪومت خلاف تحريڪ هلائينداسين، تحريڪ هلائڻ جا مختلف مقصد آهن.

 

اوگرا عيد کان پهرين عوام تي ٻيو مهانگائيءَ جو بم ڪيرائڻ جي سفارش ڪري ڇڏي

اسلام آباد (ڊيسڪ رپورٽ)عيد کان پهرين عوام تي هڪ ٻيو مهانگائيءَ جو بم ڪيرائڻ جون تياريون: اوگرا پيٽروليم شين جي اگهن ۾ واڌ جي سفارش ڪري ڇڏي. اوگرا طرفان اگهن ۾ واڌ واري سمري پيٽروليم ڊويزن ڏانهن موڪلي وئي، جنهن ۾ مجموعي طور 8 رُپيا اضافو ڪرڻ جي سفارش ڪئي وئي آهي. ذريعن جو چوڻ آهي ته پهرين جون کان پيٽرول 8 رُپيا 53 پئسا في لِٽر ۽ ڊيزل 8 رُپيا 99 پئسا مهانگو ڪرڻ جي سفارش ڪئي وئي. جڏهن ته گاسليٽ هڪ رُپيو 69 پئسا ۽ لائيٽ ڊيزل هڪ رُپيو 68 پئسا مهانگو ڪرڻ جي سفارش ڪئي وئي آهي.

 

 

هڪ ارب 60 ڪروڙ جي ڪرپشن جو الزام، آغا سراج دراني خلاف ريفرنس داخل

ڪراچي (اين اين آءِ) نيب سنڌ اسيمبلي جي اسپيڪر آغا سراج دراني خلاف ريفرنس داخل ڪري ڇڏيو آهي، خميس تي عدالت ۾ نيب پاران ريفرنس داخل ڪيو ويو، ريفرنس ۾ آغا سراج دراني جي زال، پٽ، 4 نياڻيون هڪ ڀاءُ ۽ نوڪر سميت 20 جوابدارن کي نامزد ڪيو ويو آهي، ريفرنس ۾ چيو ويو آهي ته سراج دراني هڪ ارب 61 ڪروڙ کان وڌيڪ جا اثاثا ٺاهيا آهن، آغا سراج دراني ۽ ٻين گهرڀاتين کان 11 ڪروڙ رپين جون قيمتون گهڙيون ۽ لاڪر مان ساڍا 3 سئو تولا سون هٿ آيو، غير قانوني اثاثن ۾ گهر ۽ 35 گاڏيون شامل آهن، ريفرنس ۾ چيو ويو آهي ته آغا سراج دراني غير قانوني طور ٺاهيل پراپرٽيون وڪرو به ڪيون آهن، اثاثن ۾ 11 گاڏيون، پٽ، زال  ڌيئرن جي نالي تي ڪراچي ۽ ايبٽ آباد ۾ ملڪيتون آهن، جاچ دوران آغا سراج دراني 8 ڪروڙ آمدني ٻڌائي هئي، خميس تي آغا سراج دراني جي آمدني کان وڌيڪ ملڪيت ٺاهڻ بابت ٻڌڻي ٿي، نيب جي جاچ آفيسر ريفرنس عدالت ۾ پيش ڪيو، نيب پاران جمع ڪرايل ريفرنس جي ڪاپي آغا سراج دراني جي وڪيل کي فراهم ڪئي وئي، ريفرنس پراسيڪيوٽر پاران عدالت ۾ ريفرنس جي ڪاپي اڃا تائين جمع ناهي ڪرائي، عدالت جاچ آفيسر کان پڇاڻو ڪيو ته وڌيڪ ڪيترا ڏينهن گهرجن عدالت کي ڪاپي فراهم ڪرڻ ۾، جنهن تي جاچ آفيسر ٻڌايو ته 3 کان 4 ڏيهن لڳندا، آغا سراج دراني جي وڪيل ٻڌايو ته سندس هڪ درخواست اڃا به التوا ۾ آهي، ريفرنس اڃا ٻڌڻي جوڳو نه آهي تنهنڪري عدالت پابند ناهي ته ريفرنس کي لازمي ٻڌڻي لاءِ منظور ڪري، عدالت آغا سراج دراني جي عدالتي ريمانڊ ۾ 17 جون تائين واڌ ڪندي ٻڌڻي ملتوي ڪري ڇڏي.

 

 

ماضي جا حڪمران معاشي تباهي جا ذميوار قرار، عوام هاڻ قيدي نمبر 420 جي دوکي ۾ اچڻ وارو ناهي : فردوس عاشق اعواڻ

اسلام آباد(ويب ڊيسڪ)وزير اعظم جي سڌُ سماءَ ۽ نشريات بابت خاص مدگار فردوس عاشق اعواڻ جو چوڻ آهي ته عوام هاڻ قيدي نمبر 420 جي دوکي ۾ اچڻ وارو ناهي. اسلام آباد ۾ پريس ڪانفرنس ڪندي فردوس عاشق اعواڻ جو چوڻ هو ته طلال کان نهال تائين توهين عدالت جي نوٽيس جو ريڪارڊ ن ليگ وٽ آهي، ايتري وڏي انگ ۾ ڪنهن ٻي پارٽي وٽ اِهو ريڪارڊ موجود ناهي، هي واحد پارٽي آهي جنهن توهين عدالت جي نوٽيس جي شڪل ۾ ايترا گولڊ ميڊل کٽيا آهن. هن چيو ته اڄ اسان کي ادارن جي احترام جو سيکاريو پيو وڃي، هي ڪرپشن ليگ مال بچايو ۽ جلد جلدي ڀڄي وڃو وارو فارمولي تي هلي رهيا آهن پر انهن جي جلدي جلدي واري رستي ۾ عمران خان رنڊڪ آهي. سپريم ڪورٽ ۽ هاءِ ڪورٽن ججن خلاف سپريم جڊيشل ڪونسل ۾ ريفرنس بابت سوال تي فردوس عاشق اعواڻ چيو ته سپريم جڊيشل ڪونسل نوٽيس جاري ڪندي 14 جون تي اٽارني جنرل کي طلب ڪري ورتو آهي. هن چيو ته رازداري اختيار ڪرڻ لاءِ سپريم جڊيشل ڪونسل جي ڪارروائي اِن ڪيمرا ٿيندي آهي، سپريم جڊيشل ڪونسل جي ڪارروائي جي ميڊيا تي تفصيل نٿي ٻڌائي سگهجي. سندس چوڻ هو ته قانون واري وزارت ٻنهي ريفرنس بابت معاملن کي ڏسڻو آهي، قانون واري وزارت  جيڪا به ڳالهه هوندي ان بابت ميڊيا کي آگاهه ڪندي. فردوس عاشق اعواڻ چيو ته تبديلي ڪاٿي آهي، ڏسو تبديلي اچي ناهي رهي پر گذريل رات اچي چڪي آهي، گذريل رات ملائيشيا مان 320 پاڪستاني وطن واپس پهتا آهن. سڌُ سماءَ بابت خاص مددگار چيو ته هن وزير اعظم عمران خان انسان دوست هئڻ جو ثبوت ڏنو آهي، وزير اعظم پرڏيهه ۾ قيد پاڪستانين جو درد محسوس ڪيو ۽ انهن پاڪستانين کي عيد کان پهرين پهرين سندن ڪٽنبن سان ملرائي ڇڏيو.

ٻئي طرف  وزيراعظم جي سڌ سماءَ بابت خاص مددگار فردوس عاشق اعواڻ چيو آهي ته ماضيءَ جي حڪمرانن جو قوم تي وڌل بار لاهي رهيا آهيون، موروثي سياستدانن جي علمبردارن کي تڪليف آهي ته عمران خان پاڪستانين کي ٻن خاندانن جي آمراڻي سوچ مان آزاد ڇو ڪرايو آهي؟ سماجي رابطن جي ويب سائيٽ ٽوئٽر تي بيان جاري ڪندي فردوس عاشق اعواڻ چيو ته موروثي سياست جي علمبردارن کي تڪليف ٿي رهي آهي، موروثي سياست جي علمبردارن کي تڪليف آهي ته عمران خان پاڪستانين کي ٻن خاندانن جي آمراڻي راڄ مان ڇو آزاد ڪرايو آهي.  هن چيو ته مشڪل فيصلن جي نتيجي ۾ معيشت بهتري طرف وڌي رهي آهي، رڪارڊ انگ ۾ قرضن جي ادائيگيون ۽ واپاري خسارو اٺ سيڪڙو گهٽ ٿيو، مٽاسٽا جي ذخيرن ۾ 9 سيڪڙو اضافو ٿيو آهي. سندس چوڻ هو ته  موروثي سياست جي علمبردارن ميثاق جمهوريت جي نالي تي اولاد جي وارن جو شيڊول طئي ڪيو، عوام جعلي مئنڊيٽ خلاف حقيقي مئنڊيٽ ڏئي منصوبو ناڪام بڻايو.

 

 

آرمي چيف ٻن فوجي ۽ هڪ سول آفيسر کي سزائن جي منظوري ڏئي ڇڏي

راولپنڊي (ويب ڊيسڪ) پاڪ فوج جي سربراهه جنرل قمر جاويد باجوا ٻن اڳوڻن فوجي آفيسرن ۽ هڪ سول آفيسر جي سزا جي منظوري ڏئي ڇڏي. آءِ ايس پي آر موجب سزا ماڻيندڙن فوجي آفيسر بريگيڊيئر (ر) راجا رضوان ۽ ليفٽيننٽ جنرل (ر) جاويد اقبال، جڏهن ته سول آفيسر ڊاڪٽر وسيم اڪرم شامل آهن. آءِ ايس پي آر ٻڌايو ته بريگيڊيئر (ر) راجا رضوان کي موت ۽ ليفٽيننٽ جنرل (ر) جاويد اقبال کي 14 سال قيد جي سزا ٻڌائي وئي، جڏهن ته سول آفيسر ڊاڪٽر وسيم اڪرم کي به موت جي سزا جي منظوري ڏني وئي. آءِ ايس پي آر موجب ٽنهي جوابدارن کي پرڏيهي ايجنسين کي حساس ڄاڻ فراهم ڪرڻ تي پاڪستان آرمي ايڪٽ ۽ آفيشل سيڪرٽ ايڪٽ تحت سزا ٻڌائي وئي.

 

 

سنڌ هاءِ ڪورٽ سنڌ حڪومت کي سي پي اين اي جي ميمبرن سمورين اخبارن کي بقايائون ادا ڪرڻ جو حڪم ڏئي ڇڏيو

ڪراچي(پ ر): سنڌ هاءِ ڪورٽ، سنڌ حڪومت کي سي پي اين اي جي ميمبرن سمورين اخبارن کي بقايائون ادا ڪرڻ جو حڪم جاري ڪري ڇڏيو آهي، اهڙو حڪم سنڌ هاءِ ڪورٽ جي جج جسٽس محمد علي مظهر جي سربراهيءَ ۾ هڪ ڊويزن بينچ ڪائونسل آف پاڪستان نيوز پيپرايڊيٽرز ( سي پي اين اي) جي سيڪريٽري جنرل ڊاڪٽر جبار خٽڪ جي پٽيشن تي ٻڌڻيءَ بعد ڪيو. عدالت پنهنجي حڪم ۾ واضع طور تي چيو آهي ته وزير اعلى سنڌ جي انسپيڪشن ٽيم 15- ڏينهن اندر سي پي اين اي جي سمورين ميمبر اخبارن کي بقايائن جي ادائگين جي تصديق ڪري. سي پي اين اي پنهجي آئيني درخواست ۾ موقف اختيار ڪيو هو ته سنڌ حڪومت سرڪاري اشتهارن جي مد ۾ سي پي اين اي جي ميمبر اخبارن جون ادائگيون ڪيئي سالن کان نه ڪيون آهن جنهن ڪري اخباري ادارا شديد مالي بحران جي ور چڙهيل آهن نتيجي ۾ اخبارن ۾ ڪم ڪندڙ صحافي ۽ ٻيا ورڪر پڻ شديد مالي بحران جي ور چڙهي ويا آهن. سنڌ حڪومت ڪيئي سالن کان ادائگيون نه پئي ڪري ۽ مختلف هيلا بهانا ڪري مسلسل ٽاريو پيو وڃي. واضع هُجي ته سپريم ڪورٽ به اخباري ادارن کي ادائگيون نه ڪرڻ واري معاملي جو ازخود نوٽس ورتو هو ۽ سنڌ حڪومت کي 4- هفتن اندر ادائگيون ڪرڻ جو حڪوم ڏنو هو جنهن تي به اڄ تائين عمل ٿي نه سگهيو آهي. سي پي اين اي پاران داخل درخواست جي پيروي رفيق احمد ڪلوڙ ۽ جي ايم درس ايڊووڪيٽس ڪئي، جڏهن ته ڪيس جي ٻڌڻيءَ دوران ايڊيٽرن ۽ اخباري ادارن ۾ ڪم ڪندڙ صحافين ۽ ورڪرن جو هڪ وڏو انگ پڻ موقعي تي موجود هو.

 

جيڪب آباد ۾ مسافر ڪوچ ۽ مزدا وچ ۾ ٽڪر، 2 مسافر فوت، 3 عورتن سميت 5 زخمي

جيڪب آباد (اين اين آءِ) جيڪب آباد ۾ مسافر ڪوچ ۾ مزدا وچ ۾ ٽڪر، 2 مسافر فوت، 3 عورتن سميت 5 زخمي ٿي پيا، تفصيل موجب جيڪب آباد جي آباد ٿاڻي جي حد قومي شاهراهه تي زيرو پوائنٽ وٽ اربع ۽ خميس جي وچ واري رات صادق آباد کان ڪراچي ويندڙ مسافر ڪوچ ۽ مزدا وچ ۾ ٽڪر ٿيو جنهن جي نتيجي ۾ ٺل جو رهواسي مکڻو ۽ ڪوئيٽا جو رهواسي محمد مسلم ٿڏي تي فوت ٿي ويا، جڏهن ته 3 عورتن سميت 5 ڄڻا مسمات صادقه بي بي، مسمات نيهالي، مسمات جڳل، طالب ۽ ٻيا زخمي ٿيا، اطلاع تي پوليس پهچي لاشن ۽ زخمين کي اسپتال پهچايو، جتي ٻن زخمي عورتن مسمات صادقه بي بي ۽ مسمات جڳل جي حالت نازڪ هئڻ سبب لاڙڪاڻي منتقل ڪري ڇڏيو، حادثي ۾ فوتي مسافرن جا لاش وارثن حوالي ڪيا ويا، آخري اطلاعن تائين واقعي جو ڪيس داخل نه ٿي سگهيو هو.

 

احتساب عدالت طرفان خواجه ڀائرن خلاف جلد ريفرنس داخل ڪرڻ جو حڪم

لاهور ( ويب ڊيسڪ ) احتساب عدالت نيب کي خواجه سعد رفيق ۽ سلمان رفيق خلاف جلد ريفرنس داخل ڪرڻ جو حڪم ڏئي ڇڏيو آهي.  لاهور جي احتساب عدالت ۾ خواجه ڀائرن خلاف پيرا گون هائوسنگ سوسائٽي ۾ مبينا بيقائدگين بابت ڪيس جي ٻڌڻي ٿي، ان سلسلي ۾ جيل اختيارين اڳوڻي صحت واري وير خواجه سلمان رفيق کي عدالت ۾ پيش ڪيو.  ٻڌڻي دوران احتساب عدالت جيل آفيسر کان پڇاڻو ڪيو ته خواجه سعد رفيق ڪٿي آهي جنهن تي عدالت کي آگاهه ڪيو ويو ته هو اسلام آباد ۾ قومي اسيمبلي جي اجلاس ۾ آهي. عدالت نيب جي جاچ آفيسر کان ريفرنس بابت ڄاڻ حاصل ڪئي جنهن تي نيب آفيسر ٻڌايو ته ريفرنس جي نيب چيئرمين باقاعده منظوري ڏئي ڇڏي آهي، ريفرنس جون ڪاپيون ڪرائي جد عدالت ۾ پيش ڪنداسين. احتساب عدالت نيب کي خواجه ڀائرن خلاف جلد ريفرنس فائل ڪرڻ جو حڪم ڏنو جڏهن ته خواجه ڀائرن جي جوڊيشل رمانڊ ۾ 13 جون تائين واڌ ڪري ڇڏي.

 

سليڪٽڊ وزيراعظم ملڪي معيشت جو ٻيڙو ٻوڙي ڇڏيو آهي: راڻا ثناءَ الله

لاهور (اين اين آءِ)  ن ليگ پنجاب جي صدر رنا ثناءُ الله چيو آهي ته هاڻ صبر موڪلائي ويو آهي، هاڻ مزمت نه پر مزاحمت ڪرڻي پوندي، حڪومت خلاف تحريڪ ۾ شامل نه ٿيندڙ پاڪستان جي نقصان ۾ حصيدار سمجهيو ويندو، جعلي وزيراعظم کي هاڻ ٽپڙ گول ڪرڻا پوندا، ڊو مور جو مطالبو نه مڃڻ تي نيب جي چيئرمين کي نشانو بڻايو ويو، نهايت وقار واري جج جسٽس فائز عيسيٰ جي خلاف ريفرنس داخل ڪري نااهل اعظم سڄي قوم کي ڳڻتي ۾ وجهي ڇڏيو آهي، ڪوٽ لک پت جيل ٻاهران ميڊيان سان ڳالهائيندي هن چيو ته اسان پاڪستان کي استحڪام جي منزل تي پهچائيندڙ نواز شريف کي خراج عقيدت پيش ڪريون ٿا، جيڪو ورتاءُ ذوالفقار ڀٽو سان ٿيو اهو هاڻ نواز شريف سان ڪيو پيو وڃي، جسٽس فائز عيسيٰ پنهنجي ڪردار ۽ فيصلن سبب قوم ۾ عزت جي نگاهه سان ڏٺو وڃي ٿو، جسٽس فائز عيسيٰ جو والد پاڪستان مسلم ليگ جو هر اول دستو هو، قائد اعظم محمد علي جناح پنهنجي قلم سان کيس بلوچستان مسلم ليگ جو صدر مقرر ڪيو، پاڪستان ٺاهيندڙ، ان کي ترقي ڏيندڙ ۽ احسان ڪندڙ جيلن ۾ آهن، جڏهن ته سليڪٽيڊ وزيراعظم ۽ جعلي مينديٽ وارو تباهي ڪري رهيو آهي، اعلان ڪريان ٿو ته هاڻ گهڻو ٿيو، صبر موڪلائي ويو آهي، هاڻ مزمت سان ڪم نه هلندو، هن طاقتن، سليڪٽيڊ حڪومت جي مزاحمت ڪرڻي پوندي، اڄ پارليامينٽ کي سليڪٽيڊ پارليامينٽ بڻائي ڇڏيو آهي، اسپيڪر کي حڪم ڏنو ويو ته قرآن پاڪ جي تلاوت کانپوءِ اجلاس ملتوي ڪري ڀڃي وڃو، جيڪڏهن ڪو نااهل حڪومت جي خلاف مزاحمت ۾ شامل نه ٿيندو ۽ ان سان همدردي ڪندو ته اهو پاڪستان کي پهچندڙ نقصان جو ذميوار هوندو، هن چيو ته جيڪو جج اپوزيشن کي قانون موجب رليف ڏئي ان کي ٽارگيٽ بڻايو پيو وڃي، موجوده عدليا جي خلاف ساڳيو ئي طريقو استعمال ڪيو ويو، اپوزيشن کي ضمانت ڏيندڙ ججز کي ڌماڪيو پيو وڃي ۽ ريفرنس ڏنا پيا وڃن، پاڪستان جون سموريون بارز ان جي مزمت ڪري رهيون آهن، سڄو ملڪ جسٽس فائز عيسيٰ جي بهترين جج هئڻ، لياقت ۽ غير جانبداري تي يقين رکي ٿو، جعلي وزيراعظم ۽ سليڪٽيڊ حڪومت کي ٽپڙ ويڙهڻا پوندا، نالائق وزيراعظم 126 ڏينهن تائين اسلام آباد کي بند ڪري ڇڏيو ۽ چيو ته ڪير منهنجي ڪارڪنن کي اچڻ کان نه روڪي، پ پ جي ڪارڪنن تي لٺبازي شرم جوڳي آهي، اهو ڏينهن ويجهو آهي سموريون سياسي پارٽيون اسلام آباد پهچنديون ۽ پوءِ ڏسنداسين ته حڪومت ڪئين طاقت سان اسلام آباد کي سيل ڪري ٿي، هن چيو ته موجوده صورتحال ۾ اهو عيد جو تحفو آهي ته نالائق اعظم کان پاڪستان جي جان ڇٽي ڇو ته هن معيشت ۽ ادارن جو ٻيڙو ٻوڙي ڇڏيو آهي، ڪوٽ لک پت جيل ٻاهران ميڊيا سان ڳالهائيندي طلال چوڌري چيو ته ڪافي دير کان چئي رهيو آهيان ته هي حڪومت مشرف جي پراسڪي آهي، عمران مشرف جو بغل ٻار آهي، اهو ئي چاهي ٿو جيڪو مشرف چاهيندو هو، هن چيو ته جڏهن گهرو وزير مشرف جو هوندو، قانون وارو وزير مشرف جو وڪيل هوندو ته پوءِ عدليا جي خلاف سازش ته ٿيندي، تاريخ ياد رکي ته ماڻهو جڏهن ٻاهر نڪتا ته عدليا بحال ڪرائڻ کانسواءِ واپس نه ورندا، حڪومت جو ججز جي خلاف ريفرنس ته اچي ويو، پر نيب چيئرمين جي وڊيو بابت جاچ ۽ ريفرنس ڇو نه آيو. انجنيئر خرم دستگير چيو ته عدليا جي فيصلن سان اختلاف ٿي سگهي ٿو پر عدليا جو احترام ڪريون ٿا، پنهنجن حقن جي جنگ وڙهي رهيا آهيون ۽ وڙهندا رهنداسين، حمزه شهباز جي ڪچي ضمانت جي درخواست تي نئين بينچ جوڙي آهي، انصاف جي اميد آهي، ان اڳيان پيش ٿينداسين.