تازيون خبرون

Monthly Archives: April 2019

گوادر ڪوسٽل هاءِ وي تي هٿياربندن جي فائرنگ، نيوي اهلڪارن سميت  14 ڄڻا شهيد  

ڪوئيٽا (اين اين آءِ) بلوچستان صوبي جي ضلعي گوادر ۾ مڪران ڪوسٽل هاءِ وي تي اڻڄاتل هٿياربندن بس مان لاهي 14 مسافرن کي قتل/ڏسو صفحو 3 بقايا نمبر 01

ڪري ڇڏيو شهيدن ۾ پاڪستان ڪوسٽ گارڊ، نيوي جا اهلڪار به شامل هئا ٻن ڄڻن ڀڄي حياتيون بچايون ۽ ليويز کي واقعي جو اطلاع ڏنو سيڪيورٽي فورسز ذريعن موجب اربع ۽ خميس جي وچ واري رات گوادر ۾ مڪران ڪوسٽر هاءِ وي تي بزي ٽاپ جي هنڌ وٽ سيڪيورٽي فورسز جي وردي پهريل 15 کان 20 هٿياربندن ڪراچي کان گوادر ۽ گوادر کان ڪراچي ويندڙ مسافر بسن کي چيڪنگ جي بهاني روڪي بسن ۾ موجود مسافرن جا سڃاڻپ ڪارڊ چيڪ ڪيا ۽ مختلف بسن مان 16 ڄڻن کي لاهي پاڻ سان گڏ وٺي ويا جنهن کان پوءِ دهشتگردن هٿ ٻڌي 14 ڄڻن کي قتل ڪري ڇڏيو ۽ سندن لاش مڪران ڪوسٽل هاءِ وي تي نوربخش هوٽل ويجهو اڇلائي فرار ٿي ويا فائرنگ دوران ٻه مسافر موقعو ڏسي فرار ٿي وڃڻ ۾ ڪامياب ٿي ويا جن ويجهي ليويز ٿاڻي کي واقعي بابت اطلاع ڏنو واقعي بابت اطلاع ملندي ئي سيڪيورٽي فورسز واقعي واري هنڌ پهتي ۽ لاش تحويل ۾ وڍي اورماڙه اسپتال منتقل ڪري ڇڏي جتي لاشن جي سڃاڻپ يوسف، وسيم، فرحان الله، علي رضا، ذوالفقار، هارون، علي اصغر، حمزه، رضوان، ذهين جي نالن سان ٿي آهي جڏهن ته آخري اطلاعن تائين ٻين ماڻهن جي سڃاڻپ جاري هئي ذريعن موجب مارجي ويلن ۾ سرڪاري ملازم به شامل آهن جن جو تعلق پاڪستان نيوي، ايئرفورس، پاڪستان ڪوسٽ گارڊز سان ٻڌايو پيو وڃي ذريعن موجب بلوچستان جي چيف سيڪريٽري حيدر علي تصديق ڪئي ته هٿياربندن فرنٽيئر ڪور پس جون ورديون پهريل هيون گهرو سيڪريٽري ٻڌايو ته مقتولن ۾ نيوي ۽ ڪوسٽ گارڊ جا اهلڪار به شامل آهن واقعي کان پوءِ سيڪيورٽي فورسز گوادر ۽ ڀرپاسي ۾ سرچ آپريشن شروع ڪري جوابدارن جي ڳولا شروع ڪئي. آءِجي پي بلوچستان حسن بٽ مطابق بزي ٽاپ جي علائقي ۾ رات ساڍي 12 وڳي کان هڪ وڳي تائين اٽڪل 15 کان 20 هٿياربندن ڪراچي کان گوادر ايندڙ ويندڙ پنج کان 6 بسن کي روڪي ان ۾ موجود مسافرن جا سڃاڻپ ڪارڊ ڏٺا ۽ کين گاڏي تان لاهي قتل ڪري ڇڏيو. هن واقعي بابت ٻڌايو ته هي ٽارگيٽ ڪلنگ آهي ۽ مقتولن کي سندن سڃاڻپ ڪارڊ ڏسي ڀرسان کان گوليون هنيون ويون.وزيراعظم عمران خان مڪران ڪوسٽل هاءِ وي تي دهشتگرديءَ جي مذمت ڪندي اختيارين کان رپورٽ طلب ڪري ورتي آهي.  وزيراعظم عمران خان پنهنجي بيان ۾ چيو ته مڪران ڪوسٽل هاءِ وي جي واقعي ۾ بيگناهه ماڻهن کي نشانو بڻايو ويو، ملوث ماڻهن کي انجام تائين پهچائڻ لاءِ هر ممڪن قدم کنيا وڃن.  وزيراعظم عمران خان دهشتگردي جي واقعي تي اختيارين کان رپورٽ طلب ڪندي متاثرن جي خاندانن سان همدرديءَ جو اظهار ڪيو آهي. سڌ سماءَ واري وفاقي وزير فواد چوڌري چيو آهي ته  هزاره حملو، حيات آباد ۾ تي ٽي پي ۽ اڄ ڪوسٽل هاءِ وي تي وحشياڻو واقعو ٿيو آهي، اسان امن لاءِ گهڻي قرباني ڏني آهي، واقعي جي ذميوارن کي عبرت جو نشانو بڻايو ويندو. ٽويٽر تي هڪ بيان ۾ فواد چوڌري چيو ته  دهشتگردي جي واقعن ۾ هڪ منظم پيٽرن نظر اچي رهيو آهي، دهشتگردي خلاف جنگ ۾ وڏي ڪاميابي حاصل ڪئي پر اها جنگ اڃا ختم نه ٿي آهي.سينيٽ جيچيرئمين محمد صادق سنجراڻي ڪوئيٽا جي علائقي اورماڙه جي ڪوسٽل هاءِ وتي مسافرن کي قتل ڪرڻ جي واقعي جي سخت لفظن ۾ مذمت ڪندي چيو اهي ته دهشتگرد ملڪ جي امن کي تباهه ڪري پنهنجن ناپاڪ ارادن ۾ ڪامياب نٿا ٿي سگهن هڪ بيان ۾ هن هٿياربندن جي ڪارروائي کي بزدلاڻي ڪارروائي ۽ شڪست کاڌل ذهنيت قرار ڏنو سينيٽ جي چيئرمين چيو ته پرامن ماحول کي خراب ڪرڻ جي هر سازش کي ناڪام بڻايو ويندو هن چيو ته دهشتگردي جو ملڪ مان خاتمو پهرين ترجيحي آهي هن چيو ته دهشتگردن سان ڪنهن به قسم جي رعايت نٿي ٿي سگهي هن چيو ته 14 بيگناهه ماڻهن جي قتل تي ڏک ۽ افسوس جو اظهار ڪندي شهيدن جي وارثن سان تعزيت جو اظهار ڪيو ڊپٽي چيئرمين سينيٽ سليم مانڊوي والا، سينيتر سيد شبلي فراز، سينيٽر راجا محمد ظفرالحق به مسافرن جي رتوڇاڻ جي سخت لفظن ۾ مذمت ڪندي شهيدن لاءِ مغفرت جي دعا ڪئي.

 

وفاقي ڪابينا ۾ ڦير ڦار، فواد چوڌري کان قلمندان واپس، اسد عمر عهدو ڇڏي ڏنو

اسلام آباد(ويب ڊيسڪ) وزير اعظم عمران خان وفاقي ڪابينا ۾ وڏي پيماني تي ڦيرڦار ڪندي/ڏسو صفحو 3 بقايا نمبر 52
فواد چوڌري سميت ٻين وزيرن کان سندن قلمدان واپس وٺي ڇڏيا. وزير اعظم هائوس طرفان جاري پڌرائي موجب فواد چڌري کان سڌُ سماءَ واري وزارت واپس وٺي کيس سائنس اينڊ ٽيڪنالاجي واري وزارت جو قلمدان ڏنو ويو آهي. وزير اعظم هائوس جي ترجمان موجب اعجاز شاهه وفاقي گهرو وزير بڻايو ويو آهي.  ان کان سواءِ غلام سرور خان کان پيٽروليم واري وزارت وٺي ايوي ايشن واري وزارت ڏني وئي آهي، شهريار آفريدي هاڻ مملڪتي گهرو وزير نه پر رياستي ۽ سرحدي معاملن بابت مملڪتي وزير (سيفران) هوندو. وزير اعظم هائوس جي ترجمان موجب محمد ميان سومري کان ايوي ايشن واري وزارت ورتي وئي آهي جڏهن ته خانگائڻ واري وزارت جو قلمدان هن وٽ ئي رهندو. وزير اعظم آفيس موجب ظفر الله مرزا کي وزير اعظم جو نيشنل هيلٿ بابت صلاحڪار بڻايو ويو آهي جڏهن ته فردوس عاشق اعواڻ کي وزير اعظم جي سڌُ سماءَ بابت خاص مددگار مقرر ڪيو ويو آهي. عبدالحفيظ شيخ کي ناڻي وارو صلاحڪار بڻايو ويو آهي ۽ في الحال ناڻي واري وزير جي نالي جو اعلان ناهي ڪيو ويو. اعظم سواتي کي پارليماني معاملن بابت وفاقي وزير مقرر ڪيو ويو آهي. وزير اعظم آفيس جي ترجمان موجب نديم بابر کي وزير اعظم جو پيٽروليم ڊويزن بابت خاص مددگار جڏهن ته ظفر الله مرزا کي قومي صحت بابت مددگار مقرر ڪيو ويو آهي. ذريعن موجب علي امين گنڊاپور کان ڪشمير معاملن، عامر محمود ڪيان کان قومي صحت ۽ طارق بشير چيما کان هائوسنگ جي وزارت به واپس ورتي وئي آهي. ذريعن جو چوڻ آهي ته پيٽروليم واري وزير کان استعيفيٰ ناقص ڪاڪردگي جي بنياد تي ورتي وئي آهي. ذريعن موجب مونس الاهي کي هائوسنگ واري وزارت ڏيڻ جا امڪان آهن. ان حوالي سان فواد چوڌري سماجي رابطن واري ويب سائيٽ ٽوئيٽر تي جاري پيغام چيو آهي ته وزير اعظم وفاقي ڪابينا ۾ ڦير ڦار جو فيصلو ڪيو آهي ۽ وزير اعظم آفيس ان حوالي سان اعلان ڪندي.

 

ناڻي واري وفاقي وزير اسد عمر  عهدو ڇڏڻ جو اعلان ڪري ڇڏيو آهي.  اسلام آباد ۾ پريس ڪانفرنس ڪندي اسد عمر چيو ته ايندڙ وفاقي بجيٽ وڌيڪ مشڪل هوندي، اهو نه ٿو چئي سگهان ته ٽن مهينن ۾/ڏسو صفحو 3 بقايا نمبر 42

کير ۽ ماکيءَ جون نديون وڌنديون. هن چيو ته وفاقي ڪابينا ۾ وڌيڪ تبديليون اينديون، وزيراعظم اڄ يا سڀاڻي ڪابينا ۾ وڌيڪ تبديليون آڻيندو. سندس چوڻ هو ته  وزيراعظم ملڪ جي بهتري لاءِ تبديليون ڪري رهيو آهي. اسد عمر چيو ته  عمران خان بار بار چئي چڪو آهي ته ملڪي ترقي لاءِ ڪم ڪيو وڃي. هن چيو ته وزيراعظم چاهي ٿو ته مان توانائي واري وزارت سنڀاليان پر مان انڪار ڪري ڇڏيو آهي. سندس چوڻ هو ته ايندڙ بجيٽ آءِ ايم ايف جي پروگرام تحت ئي ٺهندي،  نئين پاڪستان لاءِ منهنجون خدمتون حاصر آهن. سندس چوڻ هو ته تحريڪ انصاف ڇڏڻ جون ڳالهيون غلط آهن، پاور پاليٽيڪس جو حصو نه رهيو آهيان. اسد عمر چيو ته اسان جي معيشت ڏکي وقت مان گذري رهي آهي، ڪنهن به سازش جو حصو نه آهيان، جيڪو به ڪندو آهيان سڀني جي سامهون ڪندو آهيان. هن چيو ته اڄ به پڪ آهي ته نئون پاڪستان ٺهندو ۽ عمران خان قيادت ڪندو. سندس چوڻ هو ته  وزيراعظم پهريون به چيو هو ته جيڪو ڪارڪردگي ڏيکاريندو ڪابينا ۾ رهندو. اسد عمر چيو ته مان پاڪستان جي بهتري لاءِ حڪومت ۾ شامل ٿيس، عوام جو تيل ڪڍڻ جي فيصلن ۾ شامل نه ٿيندس.

 

چيف سليڪٽر کان سليڪشن ۾ غلطي ٿي وئي: پيپلز پارٽي

سکر ( ويب ڊيسڪ ) پ پ اڳواڻ خورشيد شاهه چيو آهي ته چيف سليڪٽر کان سليڪشن ۾ غلطي ٿي وئي آهي. سکر ۾ ميڊيا سان ڳالهائيندي خورشيد شاهه چيو ته چيف سليڪٽر هاڻي پنهنجي سليڪشن تي سوچي رهيا هوندا، ملڪ ۾ پرڏيهي سيڙپڪاري ناهي، ماڻهن کي روزگار ڏيڻ بدران بيروزگار ڪيو ويو آهي. هن چيو ته صدارتي نظام آڻڻو آهي ته آئين کي ختم ڪيو،  حڪومت کي ڪيترائي ڀيرا گڏجي ويهڻ جي دعوت ڏني، وزيراعظم اڄ به ڪنٽينر تي چڙهيل آهي، پنجاب ۾ ٽي آءِ جيز جي تبديلي گوڊ گورننس جي نشاني آهي؟  خورشيد شاهه چيو ته سنڌ ۾ ترقياتي ڪم بند ٿي ويا آهن، ارڙهين ترميم ۾ اين ايف سي بابت ڳالهيون ٿيون آهن، ايف بي آر جا ٽارگيٽ پورا نه ٿي رهيا آهن،  اسان ٽارگيٽ کان وڌي 1945 بلين ٽيڪس اوڳاڙي ڪئي. هن چيو ته موجوده حڪومت سڀ کان وڌيڪ قرض ورتا، مخالف ڌر ڪڏهن نه چاهيندي ته امن خراب ٿي.  هن چيو ته  آءِ ايم ايف کان هر حڪومت قرض ورتو، عمران خان چيو هو ته آءِ ايم ايف وٽ ويو ته آپگهات ڪري ڇڏيندو.

 

برسات سڄي ملڪ ۾تباهي مچائي ڇڏي، 49 ڄڻا فوت، سنڌ ۽ پنجاب ڪڻڪ تباهه

اسلام آباد/لاهور (اين اين آءِ) پنجاب سميت ملڪ جي اڪثر علائقن ۾ گذريل ٽن ڏينهن دوران برسات ۽ ڳڙي تباهي مچائي ڇڏي آهي جڏهن ته گهرن جون ڇتون ڪرڻ سبب 49 ڄڻا فوت ۽ 176 زخمي ٿي پيا، 117 گهرن کي نقصان پهتو آهي،  ميڊيا رپورٽن موجب سموري ملڪ ۾طوفاني هوائن ۽ تيز برساتن سبب ڀتون ڪرڻ ۽ مختلف حادثن ۾ 49 ڄڻا فوت ۽ 176 زخمي ٿي پيا آهن. 117 گهرن کي نقصان پهتو آهي، برساتن سبب ڪڻڪ سميت هزارين ايڪڙن تي بيٺل فيصل تباهه ٿي ويو آهي جڏهن ته ٻوڏ وهڪرن ۾ ڪيئي ڪچا گهر به لڙهي ويا آهن.شانگالا ۾ چغزئي جي هنڌ تي  برسات سبب روڊ تي سلپ ٿيڻ جي نتيجي ۾ گاڏي کاهي ۾ وڃي ڪري، گاڏي ۾ سوار چار ڄڻا فوت ۽ ست زخمي ٿي پيا. اوڪاڙا جي علائقي حويلي لکا ۾ ڇت ڪرڻ سبب ٽي معصوم ٻارڙيون فوت ٿي ويون. بلوچستان جي ضلعي ڍاڍر ۾ برسات ۾ ڪچي گهر جي ڇت ڪرڻ سبب ٻه ٻارڙا ملبي هيٺان دٻجي فوت ٿي ويا دڪي ۽ سبي ۾ ڀت ڪرڻ سبب ٻه ڄڻا فوت ٿيا بارکان ۾ ندي مان هڪ همراهه جو لاش مليو آهي. بلوچستان ۾ ڪوئيٽا، زيارت، سبي، مستونگ ۽ ٻيا علائقا ۾ پاڻي هيٺ آهن. چاغي جي علائقي دالبندين ۾ 3 شاگرد برساتي نالي ۾ لڙهي ويا، جن مان 2 فوت ٿي ويا جڏهن ته هڪ کي ڳڻتي جوڳيءَ حالت ۾ ڪڍي اسپتال پهچايو ويو آهي. پوليس ذريعن مطابق اهو واقعو ڪلي خداءِ رحيم ۾ ان وقت پيش آيو جڏهن شاگرد اسڪول مان واپسيءَ تي نالي ۾ وهنجي رهيا هئا، ان دوران پير تِرڪڻ سبب اونهي پاڻيءَ ۾ ڪِري ٻُڏي ويا، جن کي فوري ريسڪيو ڪري پرنس فهد اسپتال دالبندين اسپتال منتقل ڪيو ويو جتي 9 سالن جو حشمت الله ۽ 8 سالن جو جهانزيب دم ڌڻيءَ حوالي ڪيو، جڏهن ته ٽئين ٻار کي ابتدائي علاج بعد وڌيڪ علاج لاءِ ڪوئيٽه منتقل ڪيو ويو آهي، هوڏانهن بلوچستان ۾ريلوي ٽريڪ ٻڏي وڃڻ ڪري ڪراچي کان ڪوئيٽا ويندڙ بولان ميل کي روڪيو ويو، 3 ٽرينون سبي اسٽيشن تي روڪيون ويون.

 

 

حفيظ پاشا، سلمان شاهه، شوڪت ترين ۽ عشرت حسين ناڻي وزارت جي ڊوڙ ۾ شامل

اسلام آباد ( ويب ڊيسڪ ) ناڻي واري وزير اسد عمر بعد ناڻي واري وزارت جا معاملا هلائڻ لاءِ  اميدوارن جا نالاسامهون اچي ويا آهن.  ذريعن موجب ناڻي واري وزير اسد عمر  جي استعيفيٰ منظور ٿيڻ جي صورت ۾ عهدي لاءِ ڪجهه نالا سامهون اچي رهيا آهن.  ذريعن موجب اڳوڻي ناڻي واري وزير شوڪت ترين کي مقرر ڪرڻ جو امڪان هو پر هن عهدو سنڀالڻ کان انڪار ڪري ڇڏيو آهي.  ذريعن موجب ناڻي واري وزارت هلائڻ لاءِ  اڳوڻي ناڻي واري وزير حفيظ پاشا، سلمان شاهه ۽ اسٽيٽ بئنڪ جو اڳوڻو گورنر عشرت حسين مضبوط اميدوار آهن.  ذريعن موجب عشرت حسين واپاري برادري لاءِ به قبولڻ جوڳو آهي ۽ هن وقت وزيراعظم جي ادارن جي سڌارن ۽ بچت بابت معاملن جو صلاحڪار آهي.  ذريعن موجب ناڻي واري وزارت جي امڪاني لسٽ ۾ اڳوڻو ناڻي واري وزير ڊاڪٽر حفيظ شيخ جو نالو به شامل آهي، هو پ پ جي دور ۾ ناڻي وارو وزير رهي چڪو آهي.

 

ڀارت مسئلا حل ڪرڻ بدران بهانا پيو ڪري، شڪ ناهي ته بلوچستان ۾ پرڏيهي طاقتون ملوث آهن: شاهه محمود قريشي

اسلام آباد ( ويب ڊيسڪ ) پرڏيهي وزير شاهه محمود قريشي چيو آهي ته ڪو به شڪ شبهو ناهي ته بلوچستان ۾  پرڏيهي طاقتون ملوث آهن. هڪ بيان ۾ پرڏيهي ترجمان شاهه محمود قريشي چيو ته ڀارت مسئلا حل ڪرڻ بدران بهانا ڪري رهيو آهي، نئين ايندڙ ڀارتي حڪومت مان اميد آهي ته دانشمنداڻا فيصلا ڪندي.  هن چيو ته ڀارت جا ارادا ناڪام بڻائڻ تي بلوچستان جي عوام جا ٿورائتا آهيون.  پرڏيهي وزير شاهه محمود قريشي چيو ته ڀارت جي ارادن کي سمجهڻو آهي  ۽ ان لاءِ تيار رهڻو پوندو، ڀارتي اڳرائي خلاف سمورا اختلاف وساري متحد آهيون، پاڪستان جي ڪوشش آهي ته ڇڪتاڻ جي صورتحال کي بهتر ڪيو وڃي.

 

مڪران ڪوسٽل هاءِ وي تي بيگناهه ماڻهن جو قتل وحشياڻو فعل آهي: آصف علي زرداري

اسلام آباد (اين اين آءِ) پ پ پ جي ڪو چيئرمين اڳوڻي صدر آصف علي زرداري چيو آهي ته مڪران ڪوسٽ ل هاءِ وي تي معصومن بيگناهه ماڻهن جو قتل وحشياڻو فعل آهي هڪ بيان ۾ آصف زرداري چيو ته بيگناهه ماڻهن جو رت وهائيندڙ معافي جي لائق نه آهن هن چيو ته نيشنل ايڪشن پلان تي عمل ڪيو وڃي ها ته اهڙا واقعا نه ٿين ها هن چيو ته دهشتگردي هڪ لعنت آهي جنهن کي ختم ڪرڻو پوندو هن چيو ته شهيدن جي وارثن جي ڏک ۾ گڏ آهيون.

 

 

پاڪستان ۾ پوليو جو خطرو ٽري نه سگهيو. ملڪ جي 12 وڏن ملڪن ۾ خطرناڪ پوليو وائرس پي 1 جي موجودگي جو انڪشاف

اسلام آباد(ويب ڊيسڪ) پاڪستان ۾ پوليو جو خطرو ٽري نه سگهيو. ملڪ جي 12 وڏن ملڪن ۾ خطرناڪ پوليو وائرس پي 1 جي موجودگي جو انڪشاف ٿيو آهي. نيشنل پوليو ڪنٽرول پروگرام راولپنڊي جي 16، اسلام آباد جي 5 يونين ڪونسلز جي پوليو مهم ۾ حڪمت عملي تبديل ڪئي وئي آهي. ٽنهي ضلعن ۾ 10 سالن تائين جي ٻارن کي پوليو جا ڦڙا پيارڻ جو فيصلو ڪيو ويو آهي.  پشاور، ڪراچي، پشين ۽ حيدرآباد ۾ پوليو وائرس جي موجودگي جو انڪشاف ٿيو آهي. ملتان، راولپنڊي ۽ مردان جي گٽرن جي پاڻي ۾ به پوليو وائرس مليو آهي. نيشنل پوليو ڪنٽرول پروگرام طرفان لاهور شهر کي پوليو لاءِ انتهائي خطرناڪ قرار ڏنو ويو آهي. قلعي عبدالله، مردان ۽ ڏکڻ وزيرستان جي گٽرن جي پاڻي ۾ به پوليو وائرس ملڻ جي شڪايت سامهون آئي آهي. حڪومت پوليو اهلڪارن جي سيڪيورٽي يقيني بڻائڻ لاءِ به اهم فيصلو ڪيو آهي. سڄي ملڪ ۾ پوليو مهم ۾ 1 لک فوج ۽ پوليس جا اهلڪار پوليو اهلڪارن جي حفاظت تي مقرر هوندا.

 

اسد عمر جي وڃڻ مان ثابت ٿي ويو ته عمران خان جون معاشي پاليسيون ناڪام آهن: مريم اورنگزيب

اسلام آباد (اين اين آءِ) مسلم ليگ ن ترجمان مريم اورنگزيب چيو آهي ته اسد عمر جي وڃڻ مان ظاهر آهي ته عمران خان جون معاشي پاليسيون ناڪام آهن. سماجي رابطن جي ويب سائيٽ ٽويٽر تي بيان جاري ڪندي چيو ته مسلم ليگ ن ترجمان مريم اورنگزيب چيو ته  اصل مسئلو ناڻي وارو وزير اسد عمر نه پر وزيراعظم آهي،  حڪومت جو اعتراف آهي ته ملڪ معاشي بحران جو شڪار آهي، جيڪڏهن حڪومت جون پاليسيون سٺيون آهن ته پوءِ ڇا آهي؟  هن چيو ته اسد عمر کي ڇو ناڻي واري وزارت ڇڏڻ جو چيو ويو، ناڻي واري وزير جو وڃڻ ثبوت آهي ته عمران خان جون معاشي پاليسيون ناڪام آهن.

 

عمران خان ۽ سندس حڪومت باهه سان کيڏي رهيا آهن، انتقام سان ڀريل احتساب معيشت ۽ جمهوريت کي ٻوڙي ڇڏيندو : سعد رفيق

لاهور ( ويب ڊيسڪ ) مسلم ليگ ن اڳواڻ خواجه سعد رفيق چيو آهي ته عمران خان ۽ سندس حڪومت باهه سان کيڏي رهيا آهن، انتقام سان ڀريل احتساب معيشت ۽ جمهوريت کي ٻوڙي ڇڏيندو.  احتساب عدالت خواجه سعد رفيق ۽ سلمان رفيق جي پيرا گون هائوسنگ اسڪيم ۾  عدالتي رمانڊ ۾ 2 مئي تائين واڌ ڪري ڇڏي آهي.  نيب عدالت ۾ ميڊيا سان ڳالهائيندي خواجه سعد رفيق چيو ته قومي معيشت نفرت ۽ انتقام جي چتا ۾ ساڙي پئي وڃي،  مخالف ڌر جو ڪنڌ لاهڻ جي چڪر ۾ معيشت کي تباهه ڪيو ويو آهي، تحريڪ انصاف جي سونامي ترقي لاءِ تباهي واري ثابت ٿي آهي.  هن چيو ته حڪمران عدل جي نظام، احساب ۽ ميڊيا تي ڪنٽرول ڪري مخالف آواز کي چٿڻ چاهين ٿا،  انتقام جوڳو احتساب معيشت ۽ جمهوريت کي ٻوڙي ڇڏيندو،  سياسي ۽ معاشي مسئلا حل ڪرڻ لاءِ نفرت ۽ دسمني کي پاسي تي رکڻو پوندو.  خواجه سعد رفيق چيو ته آئين سان هٿ چراند خطرناڪ ثابت ٿيندي، آئيني چئني فيدريشن يونٽن کي حق ڏئي ٿو، عمران خان جيئن تيئن ان آئين تحت ڪامياب ٿيو آهي، آئين سان هٿ چراند ڪندو ته ٻيهر آئين ٺاهڻ ممڪن نه هوندو، عمران خان ۽ سندس حڪومت باهه سان کيڏي رهيا آهن