تازيون خبرون
ڪڻڪ افغانستان اسمگل ڪري هٿ سان بحران پيدا ڪيو ويو: وڏو وزير - ٽرانسپيرنسي انٽرنيشنل کي پنهنجي ساک جو جائزو وٺڻ گهرجي: فردوس عاشق اعواڻ - جاچ ادري جي ٽيم کي سنڌ اسيمبلي ۾ ڇو داخل ٿيڻ ڏنو ويو؟: اسپيڪر جو نوٽيس - نظام الائي ڪيئن پيا هلائين، خيبرپختونخوا حڪومت جو ڪهڙو علاج ڪريان؟: چيف جسٽس - حڪومت سيڙپڪاري جي سهولت لاءِ سڌارن جي ايجنڊا تي عمل ڪري رهي آهي: وزيراعظم - حڪومت سڪندر سلطان راجا کي اليڪشن ڪميشن جو سربراهه مقرر ڪري ڇڏيو، 2 ميمبرن جي مقرري جو نوٽيفڪيشن به جاري - آءِ جي سنڌ جي تڪرار ۾ اهم اڳڀرائي، وفاق آءِ جي سنڌ جي بدلي وفاقي ڪابينا جي منظوري سان مشروط ڪري ڇڏي - آرمي چيف اليڪٽرانڪ وارفيئر اينڊ گرائونڊ سرويلينس ريڊار ليبارٽريز جو افتتاح ڪري ڇڏيو - ڪراچي پوش علائقي مان ٽن گڏهن جون منڍيپن ۽ اوجهه هٿ، گوشت ڪيڏانهن ويو پوليس پريشان - آئي جي سنڌ حڪومت سان تعاون نٿو ڪري، اڳ ڪڏهن وفاقي ڪابينا ڪنهن آئي جي جي مقرري جي منظوري ناهي ڏني: سعيد غني

Daily Archives: January 24, 2019

وفاقي حڪومت مني بجيٽ پيش ڪري ڇڏي، بئنڪنگ ٽرانزيڪشن تي ٽيڪس ختم ڪرڻ جو اعلان. مخالف ڌر جو احتجاج

اسلام آباد (ويب ڊيسڪ) حڪومت مني بجيٽ ۾ بئنڪنگ ٽرانزيڪشنز تي فائلرز لاءِ ود هولڊنگ ٽيڪس ختم ڪرڻ ۽ گهر ٺاهڻ لاءِ عوام کي قرض فراهم ڪرڻ لاءِ 5 ارب رپيا رکڻ جون تجويزون ڏنيون آهن. ناڻي واري وفاقي وزير اسد عمر قومي اسيمبلي ۾ بجيٽ تجويزون پيش ڪندي چيو ته ٽيڪس ريٽرنز فائل نه ڪندڙ ماڻهو وڌيڪ ٽيڪس ڏئي 1300 سي سي تائين گاڏي خريد ڪري سگهندا، مان وضاحت پيش ڪري رهيو آهيان ته اها نئين بجيٽ نه پر معيشت جي بهتري ۽ صنعتن جي بهتري لاءِ سڌارا پيش ڪيا پيا وڃن، اسان کي اهڙو ڪم ڪرڻو آهي ته جيئن اڳتي آءِ ايم ايف وٽ نه وڃڻو پئي ته جيئن ايندڙ حڪومت اهو نه چئي ته گذريل حڪومت آءِ ايم ايف کان قرض ورتو، ايندڙ هفتي معاشي فريم ٺاهي پيش ڪنداسين. بجيٽ پيش ڪرڻ دوران اپوزيشن طرفان سخت احتجاج ڪيو ويو ۽ اسد عمر جي تقرير دوران ”ڪوڙا ڪوڙا“ جا نعرا به هنيا ويا، جنهن تي اسد عمر به گذريل حڪومتن جي ڪارڪردگي تي ڳالهايو. هن چيو خوشخبري آهي ته معيشت ۾ بهتري اچي رهي آهي ۽ خساري ۾ گهٽتائي ٿي رهي آهي، بجيٽ اندر 6.6 ۽ ان کانسواءِ 800 اربن جو نقصان ڇڏي ويا آهن، ان کي پورو نٿا ڪري سگهون، هنن جيڪا معيشت ڇڏي، ان ۾ برآمد 70 کان 40 سيڪڙو رهجي وئي آهي. سندس چوڻ هو ته جيستائين سيڙپڪاري نه هوندي ته ملڪ جي معيشت ٺيڪ نه ٿيندي، تنهن ڪري سيڙپڪاري وڌائڻ جي ضرورت آهي، جنهن لاءِ بچت جي ضرورت آهي پر گذريل حڪومت بچت خطرناڪ حد تائين ڇڏي آهي، جيڪو هڪ رڪارڊ آهي. اسد عمر چيو ته ڪئميرا ۾ رڪارڊ ٿي رهيو آهي ته ايندڙ چونڊن ۾ عمران خان کي چونڊون خريدڻ نه پوندو، گردشي قرضن جو خسارو گهٽ ٿيندو ۽ قرضن ۾ گهٽتائي ايندي، ڇو ته اسان رڳو زبان سان پاڻ کي خادم اعليٰ نه چونداسين. ناڻي واري وزير چيو ته گذريل پنجاب حڪومت ايترا اشتهار ڏنا جو 40 ارب رپيا جو خسارو ڇڏيو، جڏهن ته پرويز خٽڪ ڪي پي ۾ خساري کي فائدو پهچايو. ٻيو فنانس ترميمي بل پيش ڪندر اسد عمر چيو ته ڪاروبار اهم هوندو آهي، جيستائين اهو مضبوط نه هوندو معيشت بهتر نٿي ٿي سگهي، تنهن ڪري بئنڪ جي سود جي شرح گهٽ ڪرڻ ۽ انهن صنعتن کي قرض لاءِ جيڪو ٽيڪس هوندو آهي ان کي 20 سيڪڙو ٽيڪس ڏنو ويندو، جيڪو اڌ هوندو. هن چيو ته زراعت اسان جو ٻيو هدف آهي ته زرعي بئنڪن جي ٽيڪس کي 39 مان گهٽائي 20 سيڪڙو ڪري رهيا آهيون، ٽئين نمبر تي اسان گهر ٺاهڻ جي شعبن ۾ حوصلا افزائي ڪري رهيا آهيون ۽ 50 لک رپين جو گهر ٺاهڻ جي ڪوشش ڪري رهيا آهيون، جنهن لاءِ ننڍن گهرن لاءِ جيڪو قرض ڏينداسين، ان ۾ ٽيڪس 39 سيڪڙو کان گهٽ ڪري 20 سيڪڙو ڪري رهيا آهيون ۽ 5 ارب رپين جي قرض جي اسڪيم آڻي رهيا آهيون، جنهن ذريعي غريبن لاءِ گهٽ لاڳت تي گهر ٺاهينداسين. سندس چوڻ هو ته بئنڪنگ جي ڊپازٽ تي ود هولڊنگ ٽيڪس لڳي هو پر اسان چاهيون ٿا ته ماڻهن کي فائلر ٺاهڻ جي صلاح ڏيندي ود هولڊنگ ٽيڪس کي ختم ڪيو پيو وڃي: (ٻئي فنانس ترميمي بل جا اهم نڪتا) گهرن جي اڏاوت لاءِ 5 ارب رپين جي قرض جي اسڪيم آڻڻ  ۽ زرعي قرضن تي ٽيڪس 39 مان گهٽائي 20 سيڪڙو تي آڻڻ جو اعلان ڪيو ويو، فائلرز لاءِ بئنڪ ٽرانزيڪشن تي ود هولڊنگ ٽيڪس ختم ڪيو ويو، ننڍن شادي هالن تي ٽيڪس 20 مان گهٽائي 5 هزار ڪرڻ ۽ صنعتن لاءِ خام مال تي ڊيوٽي ۾ گهٽتائي جي به  تجويز آهي، صنعتي مشينري لاءِ ڪسٽم ڊيوٽي ۾ 5 سالن جي ڇوٽ ڏني وئي، نان فائلرز وڌيڪ ٽيڪس ڏئي 1300 سي سي گاڏيون خريد ڪري سگهندا، 1800 سي سي کان وڌيڪ گاڏين جي درآمد تي ڊيوٽي تي اضافو ڪيو ويو، 100 کان 200 ڊالرز ماليت جي موبائل فون تي 500 رپيا ليوي لاڳو ڪرڻ، موبائل فون جي درآمد تي ايڊونس انڪم ٽيڪس لاڳو ڪرڻ ، موبائل فونز تي 3 ٽيڪسز کي ضم ڪري هڪ ڪرڻ،  اسٽاڪ ايڪسچينج ميمبرن تي ايڊوانس انڪم ٽيڪس ختم ڪرڻ، سيونگز تي لاڳو ٽيڪس ختم ڪرڻ، نان بئنڪنگ ماڻهن تي سپر ٽيڪس ختم ڪرڻ جي تجويز، انرجي منصوبن ۾ سيڙپڪاري 5 سالن لاءِ سمورن ٽيڪسن کان ڇوٽ، اسٽاڪ مارڪيٽ ٽريڊنگ تي لاڳو ود هولڊنگ ٽيڪس ختم، نيوز پرنٽ تي لاڳو 5 سيڪڙو ڊيوٽي ختم ڪرڻ جو اعلان ڪيو ويو، ناڻي واري وزير چيو ته واپاري برادري جي دانهن هئي ته 6 سيڪڙو ود هولڊنگ ٽيڪس هو، جيڪا ناانصافي هئي، جنهن کي اسان واپس وٺي رهيا آهيون، جيڪو برقرار نه رهندو. هن گذريل حڪومت تي تنقيد ڪندي چيو ته شادي هالن تي ٽيڪس لڳايو ويو هو، هاڻ اسان 500 اسڪوائر فٽ جي شادي هالن جي ٽيڪس کي 20 هزار مان گهٽائي 5 هزار رپيا ڪري رهيا آهيون، ڪاروباري طبقي لاءِ سادو ۽ سولو نظام آڻينداسين، نيوز پرنٽ جي صنعت کي درآمد تي لاڳو ٽيڪس تي مڪمل ڇوٽ جو اعلان ڪيون ٿا. سندس چوڻ هو ته خام مال جي امپورٽ ڊيوٽي ۾ گهٽتائي ڪري رهيا آهيون ته جيئن اها صنعت ترقي ڪري ۽ اهڙي ريت ننڍي ڪاروبار جي حوصلا افزائي ڪنداسين. اسد عمر چيو ته گذريل حڪومت برآمدڪارن جي چيلهه ڀڃي ڇڏي هئي پر هيءَ حڪومت درآمد ۽ برآمد ۾ خساري کي گهٽ ڪندي، اڪنامڪ زون تي ڌيان ڏنو پيو وڃي، جنهن ۾ سي پيڪ جو ڪردار اهم آهي ۽ فيڪٽري جي مڪمل اوزارن لاءِ واڌو شيون شامل ڪري رهيا آهيون، اسان چاهيون ٿا ته ماحوليات ۽ سستي بجلي جي پيداوار لاءِ شمسي توانائي ۽ ٻين متبادل ذريعن تي دارومدار هجي ۽ ان ئي ريت شين لاءِ ڪسٽم، سيلز ۽ انڪم ٽيڪس مان ڇوٽ هوندي. هن چيو ته راندين کي هٿي ڏيڻ ۽ نوجوانن لاءِ سرڪاري طور تي منظور ٿيل اسڪيم هوندي ۽ فرنچائز جيان راندين لاءِ جولاءِ کان ٽيڪس ختم ڪري رهيا آهيون، پهرين جولاءِ کان نان بئنڪنگ تي سپر ٽيڪس ختم ڪيو پيو وڃي ۽ گذريل حڪومت طرفان ڪيل ڪارپوريٽ اسڪيم تي هڪ سيڪڙو جي سالياني کوٽ کي جاري رکيو ويندو. اسد عمر چيو ته مارڪيٽ ۾ نجي شعبي کي مقابلو ڪرڻو آهي، انٽرڪارپوريٽ ڊيونڊ تي گروپ ڪمپنين کي رليف ملندو، 1800 سي سي جي وڏين گاڏين جي امپورٽ تي ٽيڪس جي شرح تي اضافو ڪري رهيا آهيون، موبائل فون جي ٽن ٽيڪسز کي هڪ ڪري ٽيڪس جي شرح گهٽ ڪئي پئي وڃي پر امير لاءِ گهٽتائي نه ڪري رهيا آهيون. نئين اسڪيم جو اعلان ڪندي هن چيو ته پروميسري نوٽ جي اسڪيم آڻي رهيا آهيون، جيڪا فيبروري جي وچ تائين ايندي ۽ ايڪسپورٽر وٺي سگهندا، جنهن تي ليڪويڊٽي جو مسئلو ختم ٿي ويندو، جي آءِ ڊِ سي اسڪيم تي ڳالهائي ايوان ۾ آڻينداسين ۽ فرٽيلائزر ۾ ريٽ جي گهٽتائي ڪري رهيا آهيون، جنهن سان هاري لاءِ 200 رپيا يوريا جي في ٻوري گهٽ ٿيندي، هاري کي قرض وٺڻ ۾ سولائي لاءِ انڊيڪس چئن ورهين کان 4 هزار يونٽ هو پر ان کي وڌائي اسان 6 هزار يونٽ ڪري رهيا آهيون ۽ هارين جي ڊيزل انجڻ تي موجوده 17 سيڪڙو ٽيڪس ۾ گهٽتائي ڪندي 7 سيڪڙو ڪري رهيا آهيون. طبي سهولتن جو ذڪر ڪندي هن چيو ته سپريم ڪورٽ جي حڪمن موجب ان حوالي سان ڊيوٽيز ۾ گهٽتائي ڪئي آهي، اسان سخت فيصلا ڪرڻ لاءِ تيار آهيون ۽ آءِ ايم ايف وٽ وڃڻو پيو ته به وينداسين.

پاڪستان مسلم ليگ (ن) ۽ پيپلزپارٽي تحريڪ انصاف جي حڪومت جي مني بجيٽ رد ڪندي چيو ته مهانگائي جو طوفان اچڻ وارو آهي غريب ۽ وچولو طبقو تياري ڪري جيستائين حڪومت مثبت ماحول پيدا نه ڪندي ملڪ ۾ سيڙپڪاري نه ايندي جون کان پوءِ خسارو پورو ڪرڻ لاءِ پئسا ڪٿان آڻيندا ڪاروبر دوست پاليسيون ۽ ماحول پيدا ڪيو وڃي لڳي ٿو ته جلد اڳيون قدم آءِ ايم ايف هوندو اربع تي ٽيوٽر تي پنهنجي بيان ۾ سعد رفيق چيو ته هڪ ٻي مني بجيٽ، پاڪستان جي واحد حڪومت آهي جيڪا مني بجيٽ ۾ رڪارڊ قائم ڪري رهي آهي هن چيو ته غريب ۽ وچولو طبقو تياري ڪري وٺي ميڊيا سان ڳالهائيندي رانا ثناءُالله چيو ته اڄ حڪومت رام ڪهاڻي ٻڏائي آهي جنهن قسم جو ماحول پيدا ڪيو آهي ملڪ ۾ ڪاروبار ٺپ آهي رانا ثناءُالله چيو ته ڊالر جي ڀيٽ ۾ رپئي جو ملهه گهٽ ڪيو ويوآهي رانا ثناءُالله چيو ته پنجن مهينن ۾ ملڪي ايڪسپورٽ گهٽجي ويئي آهي رانا ثناءُالله چيو ته ڪافي صنعتن جو ڪچو مال ٻاهران اچي ٿو جيستائين حڪومت مثبت ماحول پيدا نه ڪندي ملڪ ۾ سيڙپڪاري نه ايندي. احسن اقبال چيو ته ميڊيا جو آواز دٻائڻ لاءِ اقتصادي طور تي انکي گهٽو ڏنو پيو وڃي ته جيئن ميڊيا آزادي سان پنهنجو ڪم نه ڪري سگهي احسن اقبال چيو ته اسان حڪومت پاران ميڊيا سان ٿيندڙ ورتاءُجي مذمت ڪيون ٿا ۽ ميڊيا سان ٻڌي جو اظهار ڪيون ٿا (ن) ليگ جي اڳواڻ عائشه غوث پاشا چيو ته بجيٽ عوام دوست نه آهي اوهان ڪافي مراعتن جو اعلان ڪيو ان لاءِ سرمايو ڪٿان ايندو. پ پ پ  اڳواڻ سعيد نويد قمر چيو ته اپوزيشن چاهي ٿي ته ملڪ ۾ استحڪام رهي هن چيو ته اسان نٿا چاهيون ته حڪومت کي ڪيرايو وڃي احسن اقبال چيو ته 6 مهينن ۾ 12 ارب ڊآلر قرض ورتو ويو آهي هن حڪومت جي ڪائي ٻي حڪمت عملي نظر نٿي اچي صرف قرض وٺڻ کان سواءِ سيد نويد قمر چيو ته لڳي ٿو ته جلد اڳيون قدم آءِ ايم ايف هوندو قوم جون ڏکيائيون وڌي رهيون آهن. سيد نويد قمر چيو ته حڪومت جيڪڏهن ڪجهه شيون لڪائڻ جي ڪوشش ڪئي آهي ته ٻن ٽن ڏينهن ۾ سڀ ڪجهه ظاهر ٿي ويندو حڪومت کي سچ ڳالهائڻ گهرجي ها.

 

ساهيوال واقعو: اپوزيشن جي هر ڳالهه قبول، ذميوارن کي انجام تائين پهچايو ويندو: عمران خان

اسلام آباد (ويب ڊيسڪ) ساهيوال سانحي جي جاچ بابت جي آءِ ٽي جي سمري رپورٽ وزيراعظم عمران خان کي پيش ڪئي وئي آهي. ذريعن موجب وزيراعظم کي نه رڳو جي آءِ ٽي رپورٽ پيش ڪئي وئي پر کيس رپورٽ جي روشني ۾ پنجاب حڪومت جي قدمن بابت به آگاهه ڪيو ويو. ذريعن جو چوڻ آهي ته رپورٽ ۾ سي ٽي ڊي آفيسرن کي قتل جو ذميوار قرار ڏيندي ٻڌايو ويو آهي ته ساهيوال سانحي ۾ مقتول زال مڙس ۽ سندن ڌيءُ بي ڏوهه ثابت ٿيا آهن. رپورٽ موجب سي ٽي ڊي سربراهه سميت 3 آفيسرن کي تبديل ڪيو ويو، جڏهن ته ٻه آفيسر معطل ڪيا ويا ۽ واقعي ۾ ملوث اهلڪارن خلاف دهشتگردي ٽوڙ عدالت ۾ ڪيس هلايا ويندا. ذريعن موجب وزيراعظم عمران خان پنجاب پوليس ۾ سڌارن ۽ مستقبل ۾ اهڙن واقعن جي روڪٿام لاءِ به سفارشون طلب ڪيون آهن. وزيراعظم کي پيش ڪيل جي آءِ ٽي سمري رپورٽ 13 نڪتن تي ٻڌل آهي، جنهن موجب پنجاب حڪومت مڪمل انڪوائري رپورٽ 30 ڏينهن ۾ پيش ڪرڻ کي يقيني بڻائيندي. رپورٽ ۾ چيو ويو آهي ته مقتولن جي وارثن لاءِ ٻه ڪروڙ رپيا امدادي پيڪيج جو اعلان ڪيو ويو آهي، جڏهن ته خليل جي ٻارن کي مفت تعليم ۽ صحت جي سهولت فراهم ڪئي ويندي، ان کانسواءِ ڊرائيور ذيشان خلاف وڌيڪ جاچ جاري رهندي. سمري رپورٽ ۾ ٻڌايو ويو آهي ته ساهيوال واقعي تي سيد اعجاز حسين جي سربراهي ۾ جي آءِ ٽي جوڙي وئي، جنهن کي 72 ڪلاڪن ۾ رپورٽ ڏيڻ جي هدايت ڪئي وئي، دانهن ڪندڙ جي درخواست تي سي ٽي ڊي اهلڪارن خلاف يوسف والا ٿاڻي ۾ ايف آءِ آر ڪاٽي وئي. سمري رپورٽ موجب جي آءِ ٽي جي شروعاتي رپورٽ تي قانون لاڳو ڪندڙ آفيسرن جي لا اينڊ آرڊر تي ميٽنگ گهرائي وئي، جنهن تحت ڪيترائي قدم کنيا ويا. سمري رپورٽ موجب سي ٽي ڊي جي 5 آفيسرن کي ڏوهاري قرار ڏئي گرفتار ڪيو ويو، کانئن سيون اي ٽي اي تحت جاچ ڪئي پئي وڃي، اي آءِ جي سي ٽي ڊي کي هٽائي او ايس ڊي بڻايو ويو آهي، اي آءِ جي آپريشنز اظهر حميد جون خدمتون اسٽيبلشمينٽ ڊويزن حوالي ڪيون ويون آهن، اي آءِ جي آپريشنز خلاف قدم واقعي بابت آگاهه نه ڪرڻ ۽ ايڪشن نه وٺڻ تي کنيو ويو، ڊي آءِ جي سي ٽي ڊي بابر الپا کي هٽائي خدمتون اسٽيبلشمينٽ ڊويزن حوالي ڪيون ويون، ايس ايس پي آپريشنز سي ٽي ڊي کي او ايس ڊي بڻايو ويو، جڏهن ته آر او سي ٽي ڊي ساهيوال کي معطل ڪري ڪارروائي ڪئي پئي وڃي. ٻئي طرف  وزيراعظم عمران خان چيو آهي اپوزيشن جي مطالبي تي ساهيوال سانحي تي جڊيشل ڪميشن ٺاهڻ لاءِ تيار آهيون. قومي اسيمبلي اجلاس کان اڳ وزيراعظم جي صدارت هيٺ تحريڪ انصاف پارلياماني ڪميٽي جو اجلاس ٿيو. ذريعن موجب اجلاس ۾ موجود پي ٽي آءِ ميمبرن ساهيوال ۾ پيش آيل افسوس ناڪ واقعي تي پنجاب حڪومت تي ڇتي تنقيد ڪئي. پارٽي اڳواڻن جو چوڻ هو ته پنجاب حڪومت ساهيوال واقعي کي مس هينڊل ڪيو، پنجاب حڪومت طرفان واقعي تي گهڙي گهڙي موقف تبديل ڪرڻ سان حڪومت تي ٺٺول ٿي. وزيراعظم عمران خان چيو ته مان پاڻ ساهيوال واقعي جي جاچ جي نگراني ڪري رهيو آهيان، اپوزيشن جي مطالبي تي جاچ لاءِ جڊيشل ڪميشن به ٺاهڻ لاءِ تيار آهيان، اپوزيشن چاهي ته نئين جي آءِ ٽي به جوڙي سگهجي ٿي، اپوزيشن ٻڌائي ته جاچ ۾ ڪهڙن آفيسرن کي شامل ڪرڻو آهي. سندس چوڻ هو ته ساهيوال واقعي جي ذميوارن کي انجام تائين پهچايو ويندو، شفاف جاچ ڪرائي سڀ ڪجهه عوام سامهون رکنداسين.

 

ساهيوال سانحو: ن ليگ جو عمران خان ۽ عثمان بوزدار کان استعيفيٰ جو مطالبو

اسلام آباد (ويب ڊيسڪ ) ن ليگ ساهيوال سانحي تي وزيراعظم عمران خان ۽ پنجاب جي وڏي وزير عثمان بوزدار کان استعفيٰ جو مطالبو ڪري ڇڏيو  آهي.  قومي اسمبلي ٻاهران صحافين سان ڳالهائيندي ن ليگ اڳواڻ راڻا ثناءَ الله چيو ته وزيراعظم ۽ وڏو وزير استعفيٰ ڏين، غيرجانبدار جي آءِ ٽي اڳيان پيش ٿين ۽ جيڪڏهن بي ڏوهه ثابت ٿي وڃن ته پنهنجي عهدن تي واپس اچي ڪم ڪن. راڻا ثناءَ الله جو چوڻ هو ته ساهيوال سانحي تي جي آءِ ٽي رپورٽ اکين ۾ ڌوڙ وجهڻ برابر آهي، ڪو به شخص حڪومت جي بيوقوفاڻي ۽ جاهلاڻي موقف کي نٿو مڃي سگهي.  اسان ان ڊرامي کي رد ڪريون ٿا.  هن چيو ته ڪٺ پتلي حڪومت ڊرامو ڪري ذميوارن کي فائدو ڏيڻ جي ڪوشش ڪئي جڏهن ته وزيرن مارجي ويل چئني ڄڻن کي دهشتگرد چيو، چيو ويو ته چئني جا نالا ريڊ بڪ ۾ داخل هئا.  راڻا ثناءَ الله جو چوڻ هو ته مزاحمت ۽ 2 دهشتگردن جي فرار ٿي وڃڻ جو چيوويو  ۽ آپگهاتي جيڪٽ ۽ هٿيارهٿ اچڻ جو به چيوويو، هاڻي جواب ڏيو ته وزيرن جو اهو موقف جوابدارن کي بچائڻ جي ڪوشش هئي، هاڻي هو قوم کان معافي گهرن.  ن ليگ اڳواڻ چيو ته ذيشان پهريون دهشتگرد هو جنهن جو واسطو دهشتگردن سان ٽن ڏينهن کان ڳنڍڻ جي ڪوشش ڪئي پئي وڃي، اڃا تائين هي ذيشان جو تعلق دهشتگردن جوڙڻ ۾ ڪامياب ناهن ٿي سگهيا. ان موقعي تي اتي موجود راڻا تنوير چيو ته ساهيوال سانحي سان پوري قوم ۾ بي چيني ۽ خوف آهي، ڪجهه آفيسرن جي قرباني جو ٻڪرو بڻايو ويو، ڪيترائي سوال اڃا تائين حل طلب آهن. راڻا تنوير جو چوڻ هو ته وزيراعظم جو ٽوئيٽ ڪجهه ٻيو ۽ وزيرن جو موقف ڪجهه ٻيو هو.  هن چيو ته هڪ پاسي دهشتگرد چون ٿا ٻئي پاسي وري ٻه ڪروڙ امدا ڏين ٿا، ڪجهه آفيسرن کي قرباني جو ٻڪرو بڻايو ويو آهي، وزيراعظم ۽ پنجاب جو وڏو وزير استعفيٰ ڏين.

 

 

ٽارگيٽ ڪلنگ ۽ اسٽريٽ ڪرائيم تي ڌيان ڏنو پيو وڃي پر ڪنٽرول ناهي ٿي رهيو: مراد علي شاهه

ڪراچي (23 جنوري 2019ع) سنڌ جي وڏي وزير  سيد مراد علي شاهه هفتيوار امن امان جو جائزو وٺندي فيصلو ڪيو ته سنڌ-بلوچستان سرحد تي چيڪنگ کي وڌيڪ سخت ڪيو وڃي. هن انسپيڪٽر جنرل سنڌ پوليس کي هدايت ڪئي ته هُو سنڌ، بلوچستان ۽ پنجاب جي آءِ جيز سان گڏ اجلاس منعقد ڪيو وڃي ته جيئن ملڪ ۾ عمومي ۽ خاص طور تي سنڌ ۾ امن امان جي وسيع تر فائدي ۾ گڏيل سهڪار کي وڌائي سگهجي. اجلاس ۾ وڏي وزير جو صلاحڪار مرتضيٰ وهاب، چيف سيڪريٽري سنڌ ممتاز علي شاهه، انسپيڪٽر جنرل سنڌ پوليس ڊاڪٽر ڪليم امام، گهرو سيڪريٽري قاضي ڪبير، ڪمشنر ڪراچي افتخار شهلواڻي، ايڊيشنل آءِ جي ڪراچي ڊاڪٽر امير شيخ، ايڊيشنل آءِ جي (سي ٽي ڊي) ڊاڪٽر ولي الله دل، ڊي آءِ جيز ڪراچي ۽ ٻين ضلعن حيدرآباد، سکر، ميرپورخاص، لاڙڪاڻو، شهيد بينظيرآباد جا جي ڊي آءِ جيز وڊيو ڪانفرنس ذريعي اجلاس ۾ شريڪ ٿيا. اجلاس جي شروع ۾ وڏي وزير ٻن واقعن پي اِي سي ايڇ ايس ۾ ڪي ڊي اي ملازم جو قتل ۽ پوليس جي فائرنگ جنهن جي نتيجي ۾ هڪ جوڙو مڙس ۽ زال سان ڪورنگي واري علائقي ۾ زخمي ٿيا انهن جو حوالو ڏيندي چيو ته اهي واقعا نه ٿيڻ گهرجن ها، ڪهڙي ريت پوليس اهلڪارن مارڪيٽ واري علائقي ۾ فائر ڪيو جنهن جي نتيجي ۾ اهي ماڻهو زخمي ٿيا. ان تي آءِ جي پوليس ڪليم امام چيو ته هُو ان فائرنگ واري واقعي جي ذاتي طور تي مانيٽرنگ ڪري رهيو آهي. اجلاس ۾ ان ڳالهه تي اتفاق ڪيو ويو ته سروس ۾ تربيت وٺندڙ يا اهي جيڪي شهري علائقن ۾ پوليس آپريشن، اسنيپ چيڪنگ جي طريقيڪار، مارڪيٽ ۽ رهائشي علائقن ۾ ڏوهارين جي ڳولها جي حوالي سان گائيڊ لائين ڏني ويند. گهرو سيڪريٽري قاضي ڪبير واضح ڪيو ته ڪجهه پوليس اسٽيشن غيرقانوني عمارتن يا هنڌن تي قائم آهن، ان تي وڏي وزير چيف سيڪريٽري ۽ آءِ جي پوليس کي هدايت ڪئي ته اهي گڏجي ويهي اتان کان پوليس اسٽيشنن جي مناسب هنڌن تي منتقل ڪرڻ جي نشاندهي ڪئي وڃي. اهڙي ريت شهيد بينظير آباد مان به شڪايتون موصول ٿيون آهن، جتي وومين هاسٽل پوليس ورتو آهي. هن چيو ته ان کي روڪڻ گهرجي ۽ پوليس کي گهرجي ته اهي پنهنجو سيٽ اپ قانوني هنڌن تي قائم ڪيو وڃي. آءِ جي پوليس وڏي وزير کي ٻڌايو ته گذريل هڪ هفتي دوران سڄي صوبي ۾ 1700 چيڪنگ رائونڊ ڪيا آهن، چيڪنگ دوران ٽن هزارن کان وڌيڪ گاڏيون ضبط ڪيون ويون، ان ۾ 2200 گاڏيون جعلي نمبر پليٽس جڏهن ته 1500 گاڏيون بغير نمبر پليٽس ۽ 1700 گاڏيون ٽرانسفر ليٽر تي هلي رهيون هيون. ايڊيشنل آءِ جي ڪراچي ڊاڪٽر امير شيخ تجويز ڏني ته نمبر پليٽس خلاف هڪ مهم شروع ڪرڻ گهرجي ته جيئن ڏوهاري ان جو استعمال نه ڪري سگهن. وڏي وزير واضح ڪيو ته صوبائي وزير ايڪسائيز سندس رپورٽ پيش ڪئي آهي ته وڌيڪ رجسٽريشن نمبر پليٽس تيار آهن پر مالڪ نه پيا وٺن، انڪري هن آءِ جي پوليس کي هدايت ڪئي ته فينسي نمبر پليٽس، جعلي سرڪاري پليٽس ۽ اوپن ليٽر تي هلندڙ گاڏين خلاف آپريشن شروع ڪيو وڃي. اهو آپريشن سڄي صوبي ۾ شروع ڪيو ويندو. ڊي آءِ جي ڏکڻ ڪراچي شرجيل کرل وڏي وزير کي ٻڌايو ته سندس اسٽريٽ واچ فورس قائم ڪئي آهي ۽ اها تازيون ڀرتي ۽ فريش سکيا ورتل اهلڪارن کي ان فورس ۾ مقرر ڪيو ويو آهي ۽ انهن کي موٽرسائيڪل ۽ موبائل گاڏيون فراهم ڪيون ويون آهين جن تي اهي پيٽرولنگ ڪندا آهن انهن جي چيڪنگ ڪري ضلعي ۾ اسٽريٽ ڪرائيم جي شرح گهٽ ٿي آهي. وڏي وزير واضح ڪيو ته روڊ جي وچ تي پوليس چڪاس ڪندي آهي جنهن ڪري ٽريفڪ جا مسئلا پيدا ٿيندا آهن ۽ ان سان غلط تاثر به پيدا ٿيندو آهي. هن پوليس کي چيو ته اهي پنهنجي چيڪنگ وارو عمل جاري رکن پر گهٽ ۾ گهٽ صبح آفيس ۽ اسڪول واري وقت دوران گريز ڪيو وڃي. ڊي آءِ جي ويسٽ امين يوسف زئي اجلاس کي ٻڌايو ته سندس 22000 ليٽر ايراني پيٽرول پڪڙيو آهي جيڪو ڊمپر ۾ شهر اندر آندو پيو وڃي ۽ هن 84 ڪلوگرام چرس به ضبط ڪئي آهي. هن چيو ته سندس زون ۾ سخت اسنيپ چيڪنگ شروع ڪئي آهي ۽ چيو ته 31 جنوريءَ کان منگهوپير ۾ هڪ تبليغي اجتماع به منعقد ٿيندو. وڏي وزير ڊي آءِ جي ويسٽ کي هدايت ڪئي ته انهن کي بهتر ۽ فول پروف سڪيورٽي فراهم ڪئي وڃي. وڏي وزير آءِ جي پوليس کي هدايت ڪئي ته اي سي بس، ٽرڪ، ڊمپر، ليبنڊ ڪروز خلاف آپريشن شروع ڪيو وڃي ۽ انهن جي اضافي ٽينڪ هٽايا وڃن ۽ انهن تي جرمانو لاڳو ڪيو وڃي. ۽ نان ڪسٽم گاڏين بابت وڏي وزير کي ٻڌايو ويو ته انهن ڪيترائي ڀيرا گاڏيون ضبط ڪيون آهن ۽ ڪسٽم اٿارٽيز حوالي ڪيو آهي پر ان باوجود اهي روڊن تي اچي وينديون آهن. وڏي وزير چيف سيڪريٽري سنڌ کي چيو ته هُو ان حوالي سان ڪسٽم اٿارٽيز سان ڳالهائي ۽ هن ان ڳالهه تي زور ڀريو ته ايراني پيٽرول جي اسمنگلنگ خلاف مهم شروع ڪئي وڃي. ڊي آءِ جي شرقي چيو ته سخت چيڪنگ، پيٽرولنگ ۽ سول سوسائٽي جي سهڪار ڪري سندس زون ۾ ڏوهن واري شرح گهٽ ٿي آهي، هن چيو ته جيڪڏهن گذريل سال جي انگن اکرن هن سال کي ڀيٽيو وڃي ته موبائل فون ۽ موٽر سائيڪل ڦرڻ جي واقعن ۾ گهٽتائي ٿي آهي ۽ هن زون ۾ مختلف ڇاپن دوران 246 هٿيار ضبط ڪيا آهن. گهرو سيڪريٽري قاضي ڪبير وڏي وزير کي ٻڌايو ته سندس پرائيوٽ تعليمي ادارن جي انتظاميا سان گڏ اجلاس منعقد ڪرڻ شروع ڪيا آهن ته جيئن انهن ادارن ۾ منشيات کي ڪنٽرول ڪرڻ جهڙن حساس مسئلن کان آگاهه ڪري سگهجي. حيدرآباد، سکر، لاڙڪاڻو، شهيد بينظير آباد ۽ ميرپورخاص جي ڊي آءِ جيز وڊيو لنڪ ذريعي اجلاس ۾ شرڪت ڪئي. ڊي آءِ جي حيدرآباد وڏي وزير کي بريفنگ ڏيندي چيو ته سندس ڊويزن ۾ امن امان واري صورتحال قدر بهتر آهي. هن چيو ته سندس ڊرگ مافيا خلاف آپريشن شروع ڪيو آهي. هن واضح ڪيو ته هتي ڪجهه ٽريفڪ جا مسئلا آهن، ان تي وڏي وزير چيف سيڪريٽري ۽ آءِ جي پوليس کي هدايت ڪئي ته اهي حيدرآباد شهر ۾ ٽريفڪ سگنل واري نظام کي بهتر ڪيو وڃي، پوليس حيدرآباد ۾ اڳئي ايس پي ٽريفڪ ۽ ايس پي سي ٽي سي ٽي مقرر ڪيو ويو آهي. ڊي آءِ جي سکر اقبال ڊارا اجلاس کي ٻڌايو ته ٽي ماڻهو اغوا ٿيا هئا، انهن مان ٽي بازياب ڪيا ويا آهن ۽ باقي رميش کي بازياب ڪرڻ جي ڪوشش جاري آهي، جنهن تي وڏي وزير ڪاوڙ جو اظهار ڪندي چيو ته اهو گذريل ڏيڍ مهيني کان ٻڌي رهيو آهيان رميش کي بازياب ڪرائي مون کي رپورٽ ڏني وڃي. وڏي وزير چيو ته جيڪي پوليس اهلڪار سٺو ڪم ڪري رهيا آهن انهن جي همت افرائي ڪئي وڃي ۽ ميڊيا کي پڻ ان بابت ٻڌايو وڃي. وڏي وزير ڊي آءِ جي سکر کي هدايت ڪئي ته ڀنگ لاءِ اغوا وارن واقعن کي ختم ڪرايو وڃي. ڊي آءِ جي لاڙڪاڻي اجلاس کي ٻڌايو ته لاڙڪاڻي ڊويزن ۾ مجموعي طور تي امن امان واري صورتحال بهتر آهي. هن ٻڌايو ته ڪچي وارن علائقن ۾ ننڍا ننڍا آپريشن هلندڙ آهي. ڊي آءِ جي لاڙڪاڻي چيو ته قبائلي تڪرارن ڪري ڪڏهن ڪڏهن مسئلا پيدا ٿي ويندا آهن، جن تي ضابطو آڻي رهيا آهيون. وڏي وزير پوليس عوام سان گڏيل عمل وڌائن جي هدايت ڪئي. سنڌ-بلوچستان سرحد پر 30 کان وڌيڪ چيڪ پوسٽون آهن. وڏي وزير سيد مراد علي شاهه سرحد تي چيڪنگ وڌائڻ جي هدايت ڪئي. وڏي وزير ڊي آءِ جي لاڙڪاڻي کي ٻين ايجنسين سان رابطا وڌائڻ جي هدايت ڪئي. وڏي وزير هر مهيني ٽن سرحدن سنڌ، بلوچستان ۽ پنجاب جي حوالي سان آٰءِ جي ليول تي اجلاس گهرائڻ جي هدايت پڻ ڪئي. ڊي آءِ جي شهيد بينظير آباد مظهر نواز اجلاس کي ٻڌايو ته سندس ڊويزن ۾ امن امان واري صورتحال اطمينان بخش آهي، هتي 10 ريلوي اسٽيشن، آئل فيلڊز، اهم تعليمي ادارا، ريلوي ٽريڪ آهن. هتي ڪرائم گهٽ آهي. سيڪيورٽي معامل تي توجهه ڏئي رهيا آهيون. هن وڏي وزير کي درخواست ڪئي ته سندس ضلعي ۾ سي ٽي ڊي يونٽ قائم ڪيو وڃي، ان تي وڏي وزير آءِ جي پوليس کي هدايت ڪئي ته هُو هر هڪ ضلعي جي هيڊڪوارٽر ۾ سي ٽي ٽي يونٽ کي قائم ۽ جي ايس ايم لوڪيٽرس لڳائڻ ۽ اهڙيون ٻيون سهولتون فراهم ڪرڻ جي حوالي سان منصوبو جوڙيو وڃي. ڊي آءِ جي ميرپورخاص عابد بلوچ ڊويزن کان ٻاهر هو انڪري ايس ايس پي ميرپورخاص وڏي وزير کي ڊويزن ۾ امن امان واري صورتحال بابت ٻڌايو ته علائقي ۾ موٽرسائيڪل چور/ ڦر، گٽڪي جي اسمگلنگ جهڙا وڏا ڏوهه آهن. اسان بائيڪ، گٽڪي ۽ ڪچڇي شراب خلاف ڪريڪ ڊائون شروع ڪيو آهي، 5 بائيڪ اسنيچنگ برسٽ ڪيا آھن. آپگهات جا ڪيس ميرپورخاص ۾ سڀ کان وڌيڪ ٿيا آهن، ان تي وڏي وزير چيو ته سندس حال ئي ۾ هڪ ٽيم سنڌ مينٽل هيلٿ اٿارٽي (ايس ايم ايڇ اي) جنهن جي اڳواڻي سندس چيئرمين ڊاڪٽر ڪريم خواجا ڪري رهيو هو ٿر ۾ ڪئي هئي. هن ناليوار نفسيات ماهرن سان گڏ مٺي ۾ هڪ سيمينار به منعقد ڪيو هو. هن چيو ته اسان جي ٽيم هڪ پيپر تيار ڪري رهي آهي جيڪا پنهنجن سفارشن سان پيش ڪندي. هن ايس ايس پي تي به زور ڀريو ته هُو سول سوسائٽي جي مقامي ماڻهن ۽ ڊاڪٽرن کي به شامل ڪيو وڃي ۽ هڪ ابتدائي پيپر پنهنجن سفارشن سان تيار ڪري کين موڪليو وڃي ته جيئن علائقي جي ماڻهن جي فلاح بهبود لاءِ ضروري انتظام ۽ اپاءَ ڪيا وڃن. وڏي وزير اجلاس جي آخر ۾ آءِ جي پوليس کي هدايت ڪئي ته هوُ شاهراهه فيصل تي ٽريفڪ مئنيجمنٽ لاءِ بهترين سکيا ورتل، بهترين ڊريس ۽ الرٽ پوليس اهلڪار مقرر ڪيا وڃن.

 

جي آءِ ٽي رپورٽ رڳو بيان بازي آهي ٻيو ڪجهه نه آهي، پيپلز پارٽي ساهيوال سانحي تي رپورٽ رد ڪري ڇڏي

اسلام آباد (اين اين آءِ) پاڪستان پيپلزپارٽي ساهيوال واقعي تي جي آءِ ٽي جي رپورٽ رد ڪندي چيو اهي ته جي آءِ ٽي رپورٽ رڳو بيان بازي آهي ٻيو ڪجهه نه آهي (ق) ليگ جو حڪومت سان معاملو اندروني آهي (ق) ليگ اسان جي ڪلهي تي بندوق رکي نه هلائي پي ٽي آءِ جي ڪي پي ڪي ۽ سنڌ ۾ پيپلزپارٽي جي حڪومت ۾ وڏو فرق آهي پنجاب جي حڪومت کي پنج مهينا ٿيا آهن ڊليور ڪرڻ جي اميد رکڻ نه گهرجي قطر مان سيڙپڪاري ايندي ته اسان کي خوشي ٿيڻ گهرجي اربع تي پ پ پ جي سينيئر اڳواڻ خورشيد شاهه ميڊيا سان ڳالهائيندي چيو ته حڪومت ٽين مني بجيٽ پيش ڪرڻ وااري اهي هن چيو ته حڪومت رفارمز جي صورت ۾ ٽيڪسز ۾ وڌيڪ اضافو ڪرڻ چاهي ٿي خورشيد  شاهه چيو ته حڪومت واعدو ڪيو هو ته ڪشتو کڻڻ بدران خودڪشي ڪنداسين حڪومت قرض وٺڻ جو رڪارڊ ٽوڙي ڇڏيو ساهيوال سانحي جي حوالي سان هڪ سوال تي هن چيو ته جي آءِ ٽي رپورٽ مان بلڪل مطمئن نه آيون جي آءِ ٽي جي رپورٽ رڳو بيان بازي آهي ٻيو ڪجهه نه آهي هن چيو ته حڪومت سان علحيدگي جو فيصلو (ق) ليگ کي ڪرڻو آهي هن چيو ته (ق) ليگ سان جي ڪلهي تي بندوق رکي نه هلائي سيد خورشيد شاهه چيو ته نوازشريف به پنهنجي زماني ۾ قطر کي سڀ کان وڏو دوست سمجهندو هو.

 

گلگت بلتستان جي عوام کي معاشي ۽ سياسي طور تي مضبوط ڪرڻ پاڪستان تحريڪ انصاف جي ترجيحي آهي: فواد چوڌري

اسلام آباد (اين اين آءِ) سڌسماءِ جي وفاقي وزير چوڌري فواد چيو آهي ته گلگت بلتستان جي عوام کي معاشي ۽ سياسي طور تي مضبوط ڪرڻ پاڪستان تحريڪ انصاف جي ترجيحي آهي گلگت بلتستان جو عوام پاڪستان سان محبت ڪري ٿو ان جي خواهشن جي روشني ۾ گلگت بلتستان کي آئيني ۽ انتظامي لحاظ کان بااختيار بڻائينداسين اربع تي چوڌري فواد حسين سان گلگت بلتستان اسيمبلي ۾ مخالف ڌر اڳواڻ محمد شفيع ملاقات ڪئي چوڌري فواد چيو ته گلگت بلتستان جي عوام کي معاشي ۽ سياسي طور تي مضبوط ڪرڻ پاڪستان تحريڪ انصاف جي ترجيحي آهي هن چيو ته قانوني فريم ورڪ تحت گلگت بلتستان کي آئيني ۽ انتظامي حق فراهم ڪيا پيا وڃن مخالف ڌر اڳواڻ چيو ته مسلم ليگ (ن) جي حڪومت گلگت بلتستان ۾ مختلف منصوبن لاءِ فنڊ غير شفاف ۽ بدعنواني جي بنياد تي ورهايا هن چيو ته اميد ڪيون ٿا ته پاڪستان تحريڪ انصاف جي حڪومت گلگت بلتستان جي عوام کي سندس جائز حق ڏيارڻ لاءِ عملي قدم کڻندي.

 

جي آءِ ٽي موجب سمجهون ٿا ته خليل جي خاندان کي قتل ڪيو ويو، ڪنهن به سرڪاري آفيسر کي تحفظ نه ڏنو ويندو: شاهه محمود قريشي

اسلام آباد (ويب ڊيسڪ) پرڏيهي وزير شاهه محمود قريشي چيو آهي ته ڪنهن سرڪاري آفيسر کي تحفظ نه ڏنو ويندو، جي آءِ ٽي موجب سمجهون ٿا ته خليل جي خاندان کي قتل ڪيو ويو. قومي اسيمبلي اجلاس ۾ ڳالهائيندي شاهه محمود قريشي چيو ته ماضي ۾ حڪومتون ڳالهيون دٻائڻ جي ڪوشش ڪنديون هيون، اسان جي حڪومت ائين ناهي ڪيو، ڪنهن به سرڪاري آفيسر کي تحفظ ڏيڻ جو مقصد هو نه هوندو. سندس چوڻ هو وزيراعظم چيو ته جيڪو ڏوهاري هوندو ان کي ڪٽهڙي ۾ بيهاري سزا ڏياري ويندي، حڪومت جو ڪنهن ڏوهاري کي تحفظ ڏيڻ جو ارادو ناهي، ساهيوال واقعي جون حقيقتون ايوان ۾ رکنداسين ۽ ذميوارن کي سزا ڏني ويندي، جي آءِ ٽي رڳو ذيشان بابت وڌيڪ جاچ لاءِ وقت گهريو آهي. هن چيو ته اسان ڪجهه به لڪائڻ نٿا چاهيون، ميڊيا کي ان ڪئميرا بريفنگ ڏيڻ لاءِ به تيار آهيون، حقيقتون سامهون اينديون ته خبر پوندي ڪير ذميوار آهي، ساهيوال واقعي جو ڪيس دهشتگردي ٽوڙ عدالت ۾ ويندو، حڪومت اختيار اورانگهيندڙ آفيسرن کي تحفظ ناهي ڏنو. شاهه محمود قريشي چيو ته ساهيوال واقعي تي ٻن ڏينهن کان بحث ٿي رهيو آهي، پنجاب جو وڏو وزير چونڊيل نمائندو آهي، ان بابت اپوزيشن ليڊر شهباز شريف جا لفظ مناسب ناهن، چونڊيل نمائندن بابت اهڙا لفظ ڳالهايا ويندا ته جمهوري روايتن جي خدمت نه ٿيندي.

 

 

پنجاب ۾ موجود نظام بنا اجازت ڪم نه ٿو ڪري، ساهيوال سانحي تي وزيراعظم ۽ پنجاب جو وڏو وزير استعيفيٰ ڏين: مخالف ڌر اڳواڻ

اسلام آباد (ويب ڊيسڪ) قومي اسيمبلي ۾ مخالف ڌر اڳواڻ شهباز شريف ساهيوال سانحي تي وزيراعظم عمران خان ۽ پنجاب جي وڏي وزير عثمان بوزدار کان استعيفيٰ جو مطالبو ڪري ڇڏيو. قومي اسيمبلي ۾ ڳالهائيندي ن ليگ صدر شهباز شريف چيو ته ساهيوال واقعي تي سڀني وفاقي ۽ پنجاب جي وزيرن چيو ته رپورٽ 72 ڪلاڪن ۾ سامهون آندي ويندي، جيڪا نه آندي وئي، اهو به چيو ويو ته سانحي جي نتيجي ۾ ڪجهه آفيسرن کي عهدي تان هٽايو ويو آهي ۽ اهو پهريون ڀيرو ٿيو آهي، جيڪا غلط بياني هئي. هن چيو ته اسان ماڊل ٽائون واقعي جي رات ئي آر پي او لاهور کي عهدي تان هٽائي ڇڏيو هو، جڏهن ته معاملي جي جاچ لاءِ ان ئي رات جڊيشل ڪميشن جوڙي ڇڏي هئي. سندس چوڻ هو ته وزيراعظم صاحب اڄ ساڍن ٽن مهينن کانپوءِ آيو آهي، ماڊل ٽائون واقعي تي عمران خان چيو هو ته مون کي استعيفيٰ ڏيڻ گهرجي، راڻا ثناءُ الله کي گرفتار ڪرڻ گهرجي، پنجاب ۾ موجود نظام ۽ صوبي جو وڏو وزير وزيراعظم جي اجازت کانپوءِ ڪو ڪم نٿو ڪري، تنهن ڪري وزيراعظم کي پنهنجي ئي منطق موجب اڳ استعيفيٰ ڏيڻ گهرجي ۽ پوءِ عثمان بوزدار کي استعيفيٰ ڏيڻ گهرجي.

 

مني لانڊرنگ ڪيس : آصف علي زرداري، فريال ٽالپر، انور مجيد ۽ ٻين جوابدارن جي عبوري ضمانت ۾ 6 فيبروري تائين واڌ

ڪراچي ( ويب ڊيسڪ ) ڪراچي جي بئنڪنگ ڪورٽ اڳوڻي صدر آصف علي زرداري، فريال ٽالپر ۽ 11 جوابدارن جي عبوري ضمانت ۾ 6 فيبروري تائين واڌ ڪندي ميگا بجيٽ مني لانڊرنگ ڪيس جي ٻڌڻي 14 فيبروري تائين ملتوي ڪري ڇڏي آهي.  بئنڪنگ ڪورٽ ۾ ميگا بجيٽ مني لانڊرنگ ڪيس جي ٻڌڻي ٿي، ڪيس جي ٻڌڻي تي آصف علي زرداري، سندس ڀيڻ فريال ٽالپر ۽ ٻيا جوابدار عدالت جي روبرو پيش ٿيا جڏهن ته ايف آءِ اي جو جاچ آفيسر اسلام آباد ۾ موجود هئڻ سبب عدالت ۾ پيش نه ٿي سگهيو. ان موقعي تي عدالت چيو ته نه جاچ آفيسر موجود آهي، نه ايف آءِ اي جو رڪارڊ، ڪيس ڪيئن هلايون، پهريان سپريم ڪورٽ جي فيصلي، رڪارڊ ۽ جاچ آفيسر کي اچڻ ڏيو. بئنڪنگ ڪورٽ جي جج رمارڪس ڏيندي چيو ته عدالت ڪيس ٻڌڻ لاءِ تيار آهي، پر فائل موجود ناهي، عبوري چالان موجود آهي ۽ عدالت ان جي بنياد تي ضمانت ٻڌي سگهي ٿي.  عدالت ايف آءِ اي جي وڪيل کي چيو ته فائل آهي ته ضمانت واري درخواست تي دليل ڏيو. ان موقعي تي انور مجيد جي وڪيل درخواست ڪئي ته ايف آءِ اي هاڻي حتمي چالان پيش ڪري ته جيئن عدالت ۾ ٻڌڻي ڪئي وڃي جنهن تي ايف آءِ اي پراسيڪيوٽر ممتاز الحسن موقف ڄاڻايو ته سپريم ڪورٽ جي حڪم ۾ صرف معاملو نيب کي موڪلڻ جو چيو ويو آهي.  عدالت قرار ڏنو ته رڪارڊ اچڻ تائين ٿورو انتظار ڪري وٺو، اوهان کي پورو موقعو ڏينداسين. جنهن بعد عدالت آصف علي زرداري، فريال ٽالپر، انور مجيد ۽ ٻين جوابدارن جي عبوري ضمانت ۾ 6 فيبروري تائين واڌ ڪندي مني لانڊرنگ ڪيس جي وڌيڪ ٻڌڻي 14 فيبروري تائين ملتوي ڪري ڇڏي.

 

 

ٿيليم اسڪين رپورٽ اڳوڻي وزيراعظم کي پريشان ڪري ڇڏيو، دل جي هڪ رڳ ۾ معمول کان وڌيڪ تنگي جا اثر ظاهر

لاهور ( ويب ڊيسڪ ) اڳوڻي وزيراعظم نواز شريف جي پنجاب انسٽيٽيوٽ آف ڪارڊيولوجي ۾ ڪيل ٿيليم اسڪين ٽيسٽ جي رپورٽ سامهون اچي وئي آهي جنهن ۾ سندس دل جي هڪ رڳ ۾ معمول کان وڌيڪ تنگي جا اثر ظاهر ٿي رهيا آهن.  پنجاب اسنٽيٽيوٽ آف ڪارڊولوجي ۾ گذريل ڏينهن طبي معائني دوران نواز شريف جو ٿيليم اسڪين ٽيسٽ پڻ ڪيو ويو هو ، جنهن ۾ نواز شريف جي دل جي هڪ رڳ  ۾ معمول کان وڌيڪ تنگ هئڻ جا اثر ظاهر ٿي رهيا آهن، رڳ ۾ رنڊڪ جي ڪري دل جي هيٺين حصي کي رت جي فراهمي متاثر ٿي رهي آهي.  ڊاڪٽرن جو چوڻ آهي ته دل جي رڳ ۾ رڪاوٽ پراڻي به ٿي سگهي ٿي. بيماري جي حتمي تشخيص لاءِ نواز شريف جي اينجيو گرافي جي ضرورت به پيش اچي سگهي ٿي.  نواز شريف جي اي سي جي ۽ ايڪو ڪارڊيوگرافي رپورٽ به ڳڻتي جوڳي آئي هئي، جن جي رپورٽن موجب نواز شريف دل جا پٺا سخت  وال به معمل کان تنگ آهن.