تازيون خبرون
ڪڻڪ افغانستان اسمگل ڪري هٿ سان بحران پيدا ڪيو ويو: وڏو وزير - ٽرانسپيرنسي انٽرنيشنل کي پنهنجي ساک جو جائزو وٺڻ گهرجي: فردوس عاشق اعواڻ - جاچ ادري جي ٽيم کي سنڌ اسيمبلي ۾ ڇو داخل ٿيڻ ڏنو ويو؟: اسپيڪر جو نوٽيس - نظام الائي ڪيئن پيا هلائين، خيبرپختونخوا حڪومت جو ڪهڙو علاج ڪريان؟: چيف جسٽس - حڪومت سيڙپڪاري جي سهولت لاءِ سڌارن جي ايجنڊا تي عمل ڪري رهي آهي: وزيراعظم - حڪومت سڪندر سلطان راجا کي اليڪشن ڪميشن جو سربراهه مقرر ڪري ڇڏيو، 2 ميمبرن جي مقرري جو نوٽيفڪيشن به جاري - آءِ جي سنڌ جي تڪرار ۾ اهم اڳڀرائي، وفاق آءِ جي سنڌ جي بدلي وفاقي ڪابينا جي منظوري سان مشروط ڪري ڇڏي - آرمي چيف اليڪٽرانڪ وارفيئر اينڊ گرائونڊ سرويلينس ريڊار ليبارٽريز جو افتتاح ڪري ڇڏيو - ڪراچي پوش علائقي مان ٽن گڏهن جون منڍيپن ۽ اوجهه هٿ، گوشت ڪيڏانهن ويو پوليس پريشان - آئي جي سنڌ حڪومت سان تعاون نٿو ڪري، اڳ ڪڏهن وفاقي ڪابينا ڪنهن آئي جي جي مقرري جي منظوري ناهي ڏني: سعيد غني

Daily Archives: January 23, 2019

خليل جو دهشتگردن سان تعلق ٿابت نه ٿيو، جي آئي ٽي سي ٽي ڊي آفيسر کي قتل جو ذميوار قرار ڏئي ڇڏيو

لاهور (ويب ڊيسڪ) پنجاب جي قانون واري وزير راجا بشارت ساهيوال ۾ سي ٽي ڊي جي آپريشن کي سئو سيڪڙو درست قرار ڏئي ڇڏيو آهي. پنجاب جي وڏي وزير عثمان بوزدار جي سربراهي ۾ اعليٰ سطحي اجلاس ٿيو، جنهن ۾ ساهيوال سانحي جي جاچ لاءِ قائم ڪيل جي آءِ ٽي شروعاتي رپورٽ پيش ڪئي. اجلاس ۾ سينيئر وزير عليم خان، قانون واري وزير راجا بشارت، چيف سيڪريٽري، گهرو معاملن بابت ايڊيشنل چيف سيڪريٽري، آءِ جي پوليس، لاڳاپيل ايجنسين جي اعليٰ آفيسرن سميت جي آءِ ٽي ميمبرن شرڪت ڪئي. جي آءِ ٽي جي شروعاتي رپورٽ ۾ سي ٽي ڊي آفيسرن کي خليل ۽ سندس خاندان جي قتل جو ذميوار قرار ڏنو ويو، جڏهن ته مقتول خليل ۽ سندس خاندان جو دهشتگردي سان ڪو به واسطو ثابت نه ٿي سگهيو. اجلاس کانپوءِ صحافين سان ڳالهائيندي راجا بشارت چيو ته سانحي تي وزيراعظم جي آءِ ٽي جوڙي ۽ تيز توڙي شفاف جاچ جو واعدو پورو ڪيو، اسان انصاف جا سمورا تقاضا پورا ڪنداسين، ساهيوال سانحو پنجاب حڪومت لاءِ هڪ ٽيسٽ ڪيس آهي ۽ ان ڪيس کي مثال بڻائينداسين. هن چيو ته جي آءِ ٽي جي شروعاتي جاچ موجب خليل جو خاندان بي گناهه آهي ۽ انهن جي قتل جو ذميوار سي ٽي ڊي کي قرار ڏنو ويو آهي، جي آءِ ٽي شروعاتي رپورٽ ۾ واقعي ۾ ملوث سمورن آفيسرن خلاف ڪارروائي جو حڪم ڏنو آهي، جڏهن ته ذيشان جي حوالي سان جاچ لاءِ وڌيڪ وقت گهريو ويو آهي. سندس چوڻ هو ته شروعاتي جاچ رپورٽ سامهون اچڻ کانپوءِ واقعي ۾ ملوث سي ٽي ڊي جي 5 اهلڪارن خلاف قلم 302 تحت چالان جو فيصلو ڪيو ويو آهي ۽ انهن تي دهشتگردي ٽوڙ عدالت ۾ ڪيس هلايو ويندو، ايڊيشنل آءِ جي آپريشن پنجاب ۽ ايڊيشنل آءِ جي سي ٽي ڊي کي عهدن تان هٽايو ويو آهي، جڏهن ته ڊي آءِ جي سي ٽي ڊي ۽ ايس پي سي ٽي ڊي کي معطل ڪيو ويو آهي. راجا بشارت چيو ته آپريشن سئو 100 درست هو ۽ ان ۾ ماريل ذيشان ڏوهي هو، سڀاڻي ميڊيا لاءِ ان ڪئميرا بريفنگ ڪرائي رهيا آهيون، جنهن ۾ واقعي ۽ جاچ جا سمورا معاملا سامهون آندا ويندا.

 

حساب جو ڳالهيون نه ڪريو، وفاق کان حق وٺي رهنداسين: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته اسان وفاق کان پنهنجو حق وٺي رهنداسين، اسان سنڌ جي عوام کي حساب ڏئي هر ڀيري سوڀارا ٿيندا آهيون، حساب وٺڻ واري ڳالهه نه ڪئي وڃي. هن چيو ته ماڻهن کي لٽڪائڻ واريون ڳالهيون نه ڪيون وڃن، پڪڙ ڌڪڙ جي ڪوشش ڪئي وئي ته پوءِ وزارت عظميٰ به باقي نه رهندي. هن چيو ته سندس چين وڃڻ ڪري نالو اِي سي ايل ۾شامل ڪيو ويو، سنڌ حڪومت ڪراچي سرڪلر ريلوي جي رٿا جي حوالي سان تمام سنجيده آهي پر وفاق پاران عدم دلچسپي جو مظاهرو ڪيو پيو وڃي. هن اڱاري ڏينهن سنڌ اسيمبليءَ جي اجلاس دوران ڪراچي سرڪلر ريلوي واري منصوبي بابت پنهنجو پاليسي بيان ڏيندي چيو ته گذريل ڏينهن هن ايوان ۾ جڏهن ڪي سي آر رٿا جي حوالي سان ڳالهايو ويو ته مان موجود نه هئس انڪري اڄ ضروري سمجهان پيو ته ان بابت سنڌ اسيمبليءَ جي پوزيشن ۽ حقيقتن کي ريڪارڊ تي آندو وڃي. هن چيو ته ڪالهه ايوان ۾ ڪي سي آر بابت ڪجهه خط ڏيکاريا ويا مان سموري ڳالهه ٻڌايان ٿو ته ماضيءَ ۾ نٿو وڃا سڀني کي خبر آهي ته 29 ڊسمبر 2016ع تي چين ۾ ميٽنگ ٿيڻي هئي مون چيو هو ته جيڪو پئڪيج لاهور ۾ اورينج ٽرين کي ڏنو ويو آهي اهو ئي ڪي سي آر کي ڏنو وڃي پر ان تي اڳڀرائي نه ڪئي وئي، مون چار شيون گهريون هيون، 3 ڊسمبر تي لکيل منهنجي خط جو 7 ڊسمبر تي جواب آيو هو، نواز شريف جو ٿورائتو آهيان منهنجي 4 مان 3 ڳالهين جو جواب ڏنو ويو هو. چين جي ڪمپنين کي بينڪ گارنٽي ڏيڻ لاءِ اڳوڻي وفاقي حڪومت کي خط لکيو، 3 آڪٽوبر تي وزيراعظم عمران خان کي به خط لکيو، هاڻي ته خطن جو جواب به نٿو ڏنو وڃي، پهرين گهٽ ۾ گهٽ خط جو جواب ته ايندو هو، ان مان اندازو لڳايو وڃي ته سندن دلچسپي ڪيتري آهي. وڏي وزير چيو ته چين وڃڻ جي ڪري نالو اِي سي ايل ۾ وڌو ويو. مراد علي شاهه پاليسي بيان ڏيندي چيو ته ماڻهن کي ڦاهيءَ تي چاڙهڻ بند ڪريو پنهنجن ووٽرن لاءِ ڪم ڪريو جن اوهانکي ووٽ ڏنو ملڪ جي معاشي حالت تمام خراب آهي، مان ان وفاقي حڪومت ڪري ملڪ کي ٻڏندي ڏسي رهيو آهيان. وڏي وزير چيو ته ڦاهيءَ تي هڪ کي ته چاڙهيو ويو ته پر هُو اڃا تائين زنده آهي. اسانکي به ڦاهي ڏيو، ڦاهيءَ تي چاڙهڻ ۽ مارڻ مرڻ جون ڳالهيون ڇڏيو. مراد علي شاهه چيو ته اسان وفاق کان پنهنجو حق زبردستي وٺي رهنداسين، ڪوبه اسان کان حساب وٺڻ جي ڳالهه نه ڪري اسان سدائين حساب ڏنو آهي، سنڌ جي ماڻهن اسان کان حساب وٺي چوندا رهيا آهن. وڏي وزير چيو ته ماڻهن کي جيلن ۾ وجهڻ، ڦاهي چاڙهڻ بند ڪريو، مان چوان ٿو ته ايئن نه ڪريو جيڪڏهن پڪڙ ڌڪڙ ڪئي وئي ته وزارت عظميٰ به نه بچندي. مراد علي شاهه چيو ته ڪراچي سرڪلر ريلوي رٿا وفاق جي سهڪار بنا بڻائڻ ممڪن نه آهي، اسان لون وٺي ان رٿا لاءِ رقم ڏئي سگهون ٿا. اسان وٽ پيسا نه آهن پر پوءِ به ان رٿا لاءِ تيار آهيون. هفتو اڳ به وزيراعظم کي ڪي سي آر بابت خط لکيو آهي، مان لکندو رهندو آهيان متان ڪڏهن ڪو اثر ٿي پوي. هن چيو ته 15 سيڪڙو اسان ڏيڻ لاءِ تيار آهيون، چين ان رٿا لاءِ تمام سنجيده آهي، سنڌ حڪومت سان ريلوي کاتو سهڪار نه پيو ڪري جنهن تي اسان کي تمام گهڻا خدشا آهن.

 

دٻاءَ ۾ کيڏڻ ايندو آهي، ملڪ کي ڏکيائين مان ڪڍنداسين: عمران خان

دوحا (ويب ڊيسڪ) وزيراعظم عمران خان چيو آهي ته اسان جي حڪومت کي 5 مهينا ٿي ويا آهن پر ڪرپشن جو هڪ به اسڪينڊل سامهون ناهي آيو. دوحا جي الوڪارا اسٽيڊيم ۾ پاڪستاني برادري کي خطاب ڪندي وزيراعظم چيو ته ٻاهرين ملڪن ۾ رهندڙ پاڪستانين سان منهنجو پراڻو واسطو آهي، اوورسيز پاڪستانين سدائين ملڪ لاءِ دل کولي مدد ڪئي، انهن جي دل سان عزت ڪيان ٿو. هن چيو ته ٻاهرين ملڪن ۾ رهندڙ پاڪستانين کي روزگار جي حوالي سان ڏکيائين کي منهن ڏيڻو پوندو آهي پر اهو وقت پري ناهي جڏهن توهان کي نوڪريون ڳولڻ لاءِ ٻاهر نه وڃڻو پئي. سندس چوڻ هو ته مني لانڊرنگ ڪندڙن سان منهنجي جنگ آهي، توهان کي خبر آهي ته مون کي دٻاءَ ۾ کيڏڻ ايندو آهي ۽ انشاءَ الله اسان ملڪ کي ڏکئي وقت مان ڪڍنداسين. عمران خان چيو ته جهڙي ريت پاڪستانين کي لُٽيو ويو ڪو ٻيو ملڪ هجي ها ته ان جو ڏيوالو نڪري چڪو هجي ها، اسان کي 5 مهينا ٿي ويا آهن ۽ ڪرپشن جو هڪ به اسڪينڊل سامهون ناهي آيو. وزيراعظم چيو ته پاڪستان کي ڪرپٽ ماڻهن ٻنهي هٿن سان ڦريو آهي، ڪو به ملڪ وسيلن سان مضبوط ناهي ٿيندو، ڇو ته ڪانگو ۾ هر قسم جا هيرا جواهر آهن پر اهو ملڪ غريب آهي. هن چيو ته پاڪستان جو خسارو تمام گهڻو آهي، الله پاڪستان کي سڀني خزانن سان نوازيو آهي، بس ملڪ ۾ رڳو سٺي حڪمراني هجي، پرڏيهي سيڙپڪار پاڪستان ۾ سيڙپڪاري لاءِ تيار آهن، ڪرپشن ۽ ٽيڪس جو ڏکيو نظام سيڙپڪاري ۾ رنڊڪ هو. سندس چوڻ هو ته ملائيشيا ۾ سياحت ذريعي 20 ارب ڊالر ۽ ترڪي ۾ سياحت سان سالياني آمدني 40 ارب ڊالر آهي، اسان به سياحت سان ايترا پئسا گڏ ڪري سگهون ٿا ته اسان کي ڊالر جي ضرورت نه پئي.

 

 

جيڪڏهن ڊڄو ٿا ته انصاف نه گهرو: چيف جسٽس

اسلام آباد (ويب ڊيسڪ) سپريم ڪورٽ 8 سالن کانپوءِ عمر قيد جي ٽن جوابدارن کي آزاد ڪري ڇڏيو. چيف جسٽس آصف سعيد کوسا فيصلو ٻڌائيندي ريمارڪس ڏنا ته جيڪڏهن ڊڄو ٿا ته انصاف نه گهرو، الله جو فرمان آهي ته سچي شاهدي لاءِ سامهون اچي وڃو، پنهنجي پيءُ، ماءُ ۽ عزيزن خلاف به شاهد بڻجو. سپريم ڪورٽ ۾ ٻڌڻي دوران چيف جسٽس آصف سعيد کوسا 8 سالن کانپوءِ عمر قيد جي ٽن جوابدارن کي آزاد ڪري ڇڏيو. چيف جسٽس چيو ته مغوي جي آزادي پوليس ذريعي ناهي ٿي، مغوي آزاد ٿيڻ کان 6 مهينا پوءِ به پڇا ڳاڇا ۾ شامل نه ٿيو، مغوي جاچ ۾ شامل نه ٿيڻ جو ڪو جواز به پيش نه ڪيو، تنهن ڪري جوابدارن کي شڪ جو فائدو ڏيندي سزا ختم ۽ آزاد ڪرڻ جو حڪم ڏنو. جسٽس آصف کوسا وڌيڪ ريمارڪس ڏنا ته پوليس ڌمڪي ڏيندي آهي، اسان وٽ ڪيترائي اڻڄاتل ڪيس هلي رهيا آهن، توهان کي به ڪنهن ڪيس ۾ وجهي ڇڏينداسين، جنهن تي جوابدار اسد علي جي وڪيل چيو ته جوابدارن خلاف ماڻهو شاهدي ڏيڻ کان ڊڄندا آهن. چيف جسٽس چيو جيڪڏهن ڊڄن ٿا ته انصاف نه گهرن، رڪارڊ موجب شاهدن ۽ پوليس ۾ تڪرار رهيو هو.

 

 

اڄ اهم ڏينهن آهي، اقتصادي ويزن عوام اڳيان پيش ڪنداسين: فواد چوڌري

اسلام آباد ( ويب ڊيسڪ ) سڌ سماءَ واري وفاقي وزير فواد چوڌري چيو آهي ته سڀاڻي اهم ڏينهن آهي، حڪومت پنهنجو اقتصادي ويزن پيش ڪندي. ٽوئيٽر تي جاري ڪيل بيان ۾ فواد چوڌري چيو ته سڀاڻي حڪومت پنهنجي اقتصادي ايجنڊا عوام سامهون رکڻ وڃي رهي آهي. هن چيو ته پنجن مهينن دوران ادائيگين جي توازن کي منهن ڏنو ويو، اڳوڻي حڪومت جي تباهي پکيڙيندڙ اقتصادي پاليسي سبب پيدا ٿيل مالياتي ايمرجنسي کي منهن ڏنو ويو. فواد چوڌري چيو ته  هاڻي پنهنجو اقتصادي ويزن پيش ڪري رهيا آهيون، 2019ع اصل هدف حاصل ڪرڻ جو سال آهي.

 

بدقسمتي سان حڪومت وٽ ڪا سوچ، ويزن يا سياست ناهي، اتحادين کي پنهنجو محتاج سمجهي ٿي: خورشيد شاهه

اسلام آباد ( ويب ڊيسڪ ) پيپلز پارٽي جي مرڪزي اڳواڻ سيد خورشيد شاهه چيو آهي ته حڪومت ۽ اتحادين جو الائنس ميرٽ تي ناهي ٿيو، اهو اتحاد حالتن تحت ٺهرايو ويو آهي.  پارليامنٽ هائوس ٻاهران ميڊيا سان ڳالهائيندي سيد خورشيد شاهه چيو ته حڪومتي اتحاد ۾ شامل سمورين پارٽيون سياسي آهن ۽ انڪري ڪاوڙيل آهن جو حڪومت ساڻن ڪنهن به معاملي تي صلاح مشورو نٿي ڪري جڏهن ته حڪومت سمجهي ٿي ته اسان کين اقتدار جو حصو بڻايو ۽ کين اسپيڪرشپ ڏني آهي.  پ پ اڳواڻ چيو ته حڪومت سمجهي ٿي ته اتحادي سندن محتاج آهن پر حڪومت اهو سمجهڻ لاءِ تيار ناهي ته اتحادين جي ڪري ئي سندن حڪومت ٺهي آهي. پنجاب حڪومت ۾ تبديلي بابت سندس چوڻ هو ته پنجاب ۾ تبديلي جي هوا گهلندي ته پوءِ ڏسنداسين جڏهن ته پيپلز پارٽي سان پنجاب ۾ تبديليءَ لاءِ ڪو به رابطو نه ڪيو ويو آهي.  خورشيد شاهه چيو ته بدقسمتي سان حڪومت وٽ ڪا سوچ، ويزن يا سياست ناهي ۽ حڪومت ڪجهه به سمجهڻ لاءِ تيار ناهي.  ساهيوال سانحي بابت ڳالهائيندي پيپلز پارٽي اڳواڻ چيو ته پنجاب ۾ جي آءِ ٽي بدران پارلياماني ڪيمٽي جوڙڻ گهرجي. ساهيوال سانحو پنجاب حڪومت جي نااهلي آهي جڏهن ته جوابدارن کي سخت سزا ملڻ گهرجي.

 

بدعنواني معاشرتي ڦَٽ بڻجي چڪي آهي، گڏيل تعاون سان ئي سدباب ممڪن آهي: مرتضيٰ وهاب

ڪراچي (اسٽاف رپورٽر) وڏي وزير جي اينٽي ڪرپشن، قانون ۽ اطلاعات بابت صلاحڪار بيرسٽر مرتضيٰ وهاب چيو آهي ته ڪرپشن جهڙن ڦَٽن اسان جي معاشرتي ڍانچي کي تباهه ڪري ڇڏيو آهي اسان سڀني کي گڏجي انهيءَ ناسور جي سدباب ڪرڻ جي ضرورت آهي. چيئرمين اينٽي ڪرپشن مختار احمد سومرو اينٽي ڪرپشن کاتي جي تفصيلي رپورٽ اينٽي ڪرپشن جي صلاحڪار کي پيش ڪئي. رپورٽ ۾ ٻڌايو ويو ته گذريل سال 2018 ۾ سنڌ صوبي ۾ اينٽي ڪرپشن جي ڪميٽين جا ٽوٽل هڪ سو چوڏهن اجلاس ڪوٺايا ويا. اينٽي ڪرپشن ڪميٽي ون، ٽو ۽ ٿري جي ٽنهي زونن تحت ٽي سو اوڻويهه ايف آئي آر درج ڪرايون ويون انهيءَ کان علاوه هڪ هزار سترنهن انڪوائريون ڪيون ويون جنهن تحت ٻه هزار ٽي سو اٺهٺ فردن خلاف کاتي جاتي ڪارروائي ڪئي وئي جڏهن ته ڇهه سو 65 انڪوائريون شاهدين جي اڻاٺ سبب خارج ڪيون ويون. انهيءَ کان علاوه 76 انڪوائرين کي ڊيفر ڪيو ويو وڌيڪ اهو ته هڪ سو يارنهن مقدمن جون شاهديون ملڻ تي ٻيهر تحقيق لاءِ درج ڪيو ويو. اهڙي ريت اينٽي ڪرپشن کاتي جي ٽن ڪميٽين ۾ چار هزار ڇهه سو ڏهه ڪيس درج ڪرايا ويا. اينٽي ڪرپشن جي صلاحڪار بيرسٽر مرتضيٰ وهاب چيئرمين اينٽي ڪرپشن مختيار احمد سومرو ۽ ڊائريڪٽر اينٽي ڪرپشن فياض علي عباسي کي هدايت ڪئي ته ڪرپشن جي معاملن ۾ ڪنهن به شخص سان کيس عهدي جي ڪري ڪابه رعايت نه ڪئي وڃي. ڪرپشن کي پاڙ مان پٽي ڦٽي ڪرڻ اسان سڀني جو گڏيل فرض آهي.

 

ساهيوال سانحي جي متاثرن کي انصاف ملڻ تائين ساڻن ڄمي بيٺل آهيون: نواز شريف

لاهور ( ويب ڊيسڪ ) اڳوڻي وزيراعظم نواز شريف چيو آهي ته ساهيوال متاثرن کي انصاف ملڻ تائين ساڻن ڄمي بيٺل آهيون. مسلم ليگ ن جي قائد نواز شريف ساهيوال واقعي تي ڪاوڙ جو اظهار ڪندي پارٽي کي انصاف جي فراهمي تائين متاثرن جو ساٿ ڏيڻ جي هدايت ڪئي آهي.  مسلم ليگ ن لاهور جي جنرل سيڪريٽري خواجه عمران نذير پنجاب انسٽيٽيوٽ آف ڪارڊيالوجي ۾ نواز شريف سان ملاقات کانپوءِ ميڊيا سان ڳالهائيندي چيو ته نواز  شريف باهمت شخص آهي، سندس ڪجهه ٽيسٽون ٿيون آهن، جنهن جون رپورٽون سٺيون نه آهن. خواجه عمران نذير چيو ته  پروفيسر شاهد حميد جي سربراهي ۾ ڊاڪٽڙن جي ٽيم نواز شريف جو طبي معائنو ڪيو ۽ وڌيڪ ٽيسٽون ٿيڻيون آهن، جڏهن ته نواز شريف جو ذاتي ڊاڪٽر عدنان به موجود آهي. هن چيو ته نواز شريف ڪارڪنن کي سلام موڪليو آهي ۽ دعا ڪرڻ جي درخواست ڪئي آهي. سندس چوڻ هو ته نواز شريف ساهيوال سانحي تي تمام گهڻو ڏکويل آهي، هو جيل ۾ هئڻ سبب متاثر خاندانن سان تعزيت لاءِ نه ٿو وڃي سگهي پر هن پارٽي کي هدايت ڪئي آهي ته متاثرن کي انصاف ملڻ تائين ساڻن گڏ بيٺل رهي.

 

 

اسان جي حڪومت کي آئي 5 مهينا ٿياآهن، حڪومت لولي لنگڙي ئي صحيح پر هلي ته رهي آهي: نعيم الحق

لاهور (ويب ڊيسڪ) وزيراعظم جي سياسي معاملن بابت خاص صلاحڪار نعيم الحق چيو آهي ته عمران خان سڀاڻي قومي اسيمبلي ۾ شرڪت ڪندو، ساهيوال واقعي تي وزيراعظم ۽ پنجاب جو وڏو وزير ڪاوڙيل آهن. چيئرمين سيڪريٽريٽ لاهور ۾ صحافين سان ڳالهائيندي نعيم الحق چيو ته اسان جي حڪومت کي آئي 5 مهينا ٿي ويا آهن، حڪومت لولي لنگڙي ئي صحيح پر هلي ته رهي آهي، اسان کي هاڻ نئون نظام آڻڻو پوندو، حقيقي تبديلي ان وقت ايندي جڏهن سڀ رنڊڪون ختم ٿي وينديون. هن چيو ته ساهيوال سانحي سڄي قوم کي سوچڻ تي مجبور ڪري ڇڏيو آهي، اسان جي جدوجهد ڪنهن جي خلاف نه پر سسٽم جي خلاف آهي، ماڊل ٽائون ۾ معصوم شهرين کي قتل ڪيو ويو، اهڙي ريت نقيب الله محسود جو به قتل ٿيو، ملڪ جي حالت سڌرندي ته شهرين جي حالت به بهتر ٿيندي. سندس چوڻ هو ته ساهيوال مقابلي ۾ جنهن گوليون هلايون اهي ئي قاتل آهن، متاثرن جي تڪليف سمجهون ٿا، اهو معاملو اسان جي حڪومت لاءِ چئلينج آهي، پوليس جو نظام تبديل ڪرڻ جي ضرورت آهي، ان جي بهتري لاءِ سياسي ۽ معاشي سطح تي تبديلي آڻڻي پوندي.

 

ڏوڪري لڳ گم ٿيل 4 سالا معصوم ٻار جو لاش ڳوٺ ٻاهران هٿ، گهر ۾ ڪهرام

ڏوڪري (رپورٽر) ڳوٺ بگي جو رهواسي گم ٿيل 4 سالا معصوم ٻار جو لاش ڳوٺ ٻاهران ڦٽل ناري مان مليو،گهر ۾ ڪهرام متل تفصيل موجب موهن جو دڙو ڀرسان ڳوٺ بگي جو رهواسي 4 سالا معصوم ٻارڙو ايان علي پٽ رابيل ڪوري هڪ ڏينهن اڳ گم ٿي ويو هيو جنهن جو لاش پاڻيءَ جي ڦٽل ناري مان هٿ آيو آهي جڏھن ته ڏوڪري تعلقي جي ڳوٺ بگيءَ جو رهواسي رابيل ڪوريءَ جو 4 ورهين جو پٽ ايان گذريل ڏينهن راند کيڏڻ لاءِ گهر کان ٻاهر نڪري ويو هيو ته هو واپس گهر نه آيو هوڏانهن وارثن پاران ڳولها ڪرڻ باوجود ٻارڙو هٿ نه آيو جڏھن ته گذريل ڏينهن نينگر کي ڳوٺ ٻاهران پاڻيءَ جي ڦٽل ناري ۾  نينگر جو لاش مليو جڏھن ته معصوم گل جهڙي معصوم نينگر جو لاش هٿ اچڻ بعد علائقي ۾ سوڳ واري حالت ڇائنجي وئي ھئي جڏھن ته ميڊيا کي وارثن ٻڌايو ته سندن اسان جي ڪنهن سان دشمني نه آهي ان ڪري هي واقعو اتفاقي ٿي سگهي ٿو.هوڏانهن نينگر جو لاش گهر پهچڻ تي امڙ کي بيهوشي جا دورا پئجي ويا جڏھن ته هوڏانهن جنازي جي نماز ۾ علائقي واسي توڙي سماجي ماڻھن وڏي انگ ۾ نينگر جي جنازي جي نماز ۾ شرڪت ڪئي.