تازيون خبرون
ڪڻڪ افغانستان اسمگل ڪري هٿ سان بحران پيدا ڪيو ويو: وڏو وزير - ٽرانسپيرنسي انٽرنيشنل کي پنهنجي ساک جو جائزو وٺڻ گهرجي: فردوس عاشق اعواڻ - جاچ ادري جي ٽيم کي سنڌ اسيمبلي ۾ ڇو داخل ٿيڻ ڏنو ويو؟: اسپيڪر جو نوٽيس - نظام الائي ڪيئن پيا هلائين، خيبرپختونخوا حڪومت جو ڪهڙو علاج ڪريان؟: چيف جسٽس - حڪومت سيڙپڪاري جي سهولت لاءِ سڌارن جي ايجنڊا تي عمل ڪري رهي آهي: وزيراعظم - حڪومت سڪندر سلطان راجا کي اليڪشن ڪميشن جو سربراهه مقرر ڪري ڇڏيو، 2 ميمبرن جي مقرري جو نوٽيفڪيشن به جاري - آءِ جي سنڌ جي تڪرار ۾ اهم اڳڀرائي، وفاق آءِ جي سنڌ جي بدلي وفاقي ڪابينا جي منظوري سان مشروط ڪري ڇڏي - آرمي چيف اليڪٽرانڪ وارفيئر اينڊ گرائونڊ سرويلينس ريڊار ليبارٽريز جو افتتاح ڪري ڇڏيو - ڪراچي پوش علائقي مان ٽن گڏهن جون منڍيپن ۽ اوجهه هٿ، گوشت ڪيڏانهن ويو پوليس پريشان - آئي جي سنڌ حڪومت سان تعاون نٿو ڪري، اڳ ڪڏهن وفاقي ڪابينا ڪنهن آئي جي جي مقرري جي منظوري ناهي ڏني: سعيد غني

Daily Archives: January 22, 2019

بلوچستان ۽ سنڌ ۾ روڊ حادثا، 17 ڄڻا اجل جو شڪار، 27 کان وڌيڪ زخمي

حب/سيوهڻ/مٽياري(م.ڊ/نمائندن وٽان) بلوچستان جي علائقي حب ۾ هڪ هانءُ ڏاريندڙ حادثو پيش آيو آهي جنهن جي نتيجي ۾ 13 ڄڻا پنهنجي حياتي وڃائي ويٺا جڏهن ته ڪيترائي زخمي ٿيا جن کي طبي امداد ڏني پئي وڃي.رپورٽ موجب اهو حادثو حب جي علائقي بيلا ڪراس ويجهو بس ۽ ٽرڪ وچ ۾ ٽڪر سبب پيش آيو، ٻئي گاڏيون ٽڪرائيندي ئي بس ۾ باهه لڳي وئي جنهن جي ور چڙهي 13 ڄڻا فوت ٿي ويا جڏهن ته 16 زخمي ٿيا جن مان 4 جي حالت ڳڻتي جوڳي آهي.ڊي سي لسٻيلي شبير مينگل موجب حادثي جو شڪار ٿيندڙ مسافر بس ۾ لڳل باهه تي قابو ڪيو ويو آهي، بس ۾ ڪل 29 ماڻهو سوار هئا جيڪي ڪراچي کان پنجگوڙ وڃي رهيا هئا، ذريعن موجب مسافر بس جي ڳجهن خانن ۾ ايراني ڊيزل سبب باهه لڳي. ٻئي طرف  رات دير سان سيوهڻ ڀرسان لڪي شاھ صدر وٽ انڊس ھاءِ وي روڊ تي اڻڄاتل گاڏي ڪار کي پٺيان زوردار ٽڪر ھنيو، جنھن جي نتيجي ۾ ڪار ڪلٽيون کائي کڏ ۾ ڪري پئي، نتيجي ۾ ڪار سوار ٻه 2 ڄڻا نظير احمد ڀٽو ۽ عبدالحميد لوھار ترت طبي امداد نه ملڻ سبب ٿڏي تي فوت ٿي ويا، جڏهن ته ھڪ ڄڻو عبدالسبحان سخت زخمي ٿي پيو.ٺيٻاٺ پوليس اطلاع ملڻ کانپوءِ حادثي واري ھنڌ پھچي فوتين ۽ زخمين کي سيوھڻ  اسپتال  پھچايو. حادثي جو شڪار ٿيل ڪار سيوھڻ کان قاضي احمد طرف وڃي رھي ھئي ته حادثي جو شڪار ٿي وئي. فوتي پاڻ ۾ دوست هئا، جيڪي قلندر لال شهباز جي درگاهه جي زيارت لاءِ آيل هئا. هوڏانهن مٽيار، هالا، ڀٽ شاهه، نيوسعيدآباد، کيبر ۽ سيکاٽ نيشنل هاءِ وي تي مختلف روڊ حادثن ۾ ٻه ڄڻا فوت، جڏھن ته 20 کان وڌيڪ مسافر زخمي ٿي پيا، جن کي هالا، ڀٽ شاهه، مٽياري ۽ حيدرآباد اسپتالن ۾ نيو ويو، جن جو علاج ڪرايو ويو. جڏهن ته هالا ڀرسان سانڌاڻ روڊ وٽ صادق آباد کان ڪراچي ويندڙ مسافر ڪوچ ڪلٽي ٿيڻ ڪري 10 مسافر زخمي ٿيا. ٻئي پاسي ڀگي شير اسٽاپ وٽ ڪار ۽ بس جي ٽڪر ۾ ڪار سوار ٻه ڄڻا زخمي، هوڏانهن کيبر ويجهو ٽن گاڏين جنهن ۾ ٻن ٽرڪن ۽ هڪ ڊاٽسن ۾ ٽڪر ٿيڻ سبب 7 ڄڻا زخمي ٿي پيا. جڏهن ته مٽياري_سيکاٽ روڊ تي چنگچي رڪشا ۽ موٽرسائيڪل وچ ۾ ٽڪر سبب 3 ڄڻا زخمي ٿي پيا.

 

چونڊيل حڪومتن جو احتساب ٿي سگهي ٿو ته پوليس ۽ بيورو ڪريسي جو ڇو نه: مرتضٰي وهاب

ڪراچي (21 جنوري، 2019): اطلاعات، قانون ۽ اينٽي ڪرپشن بابت وڏي وزير جي صلاحڪار بيريسٽر مرتضٰي وهاب چيو آهي ته جيل جي سوا سو سال پراڻي قانون ۾ ترميم لاءِ صوبائي ڪابينا منظوري ڏني آهي، انهيءَ تي پهرين ڪميٽي جوڙي وئي هئي اهو قانون انتهائي اهم آهي. انگريزن واري دور جي قانون ۾ ترميم ضروري هئي. اها ڳالهه هن ڪابينا اجالس کانپوءِ هڪ پرهجوم پريس ڪانفرنس کي خطاب ڪندي ڪئي. سنڌ ڪابينا جي اجلاس ۾ وڏو وزير، صوبائي وزير، صلاحڪارن، معاون خصوصي ۽ چيف سيڪريٽري شرڪت ڪئي. بيريسٽر مرتضٰي وهاب چيو ته سنڌ پريزينس ڪريڪشن ايڪٽ 2018 تي غور ويچار ڪيو ويو. ڄاڻايل ايڪٽ تي گهرو کاتي جو سيڪريٽري قاضي ڪبير، جيلن جي صوبائي وزير ناصر شاهه ۽ اطلاعات کاتي جو صوبائي وزير بيرسٽر مرتضيٰ وهاب تفصيلي ڄاڻ ڏني. وڏي وزير چيو ته آئون ايڪٽ تحت جيل کي هٿياربند گهر بڻائڻو آهي نئين ايڪٽ تحت قيدي عورتن کي بهتر ماحول ڏيڻ، سڀني قيدين کي طبي سهولتون کين پنهنجي علاج تائين رسائين، جيل ۾ تعليم ۽ فني تعليم جي فراهمي سان قيدين کي سٺو شهري بنايو وڃي. اجلاس ۾ جيل پوليس جي سکيا تي خاص ڌيان بابت ڳالهه ٻولهه ٿي. وڏي وزير انهيءَ تي زور ڀريو ته ڏوهاري کي جيل ۾ سزا ختم ٿيڻ کان پهرين معاشري جو ڪارگر شهري بڻائڻ انهيءَ ايڪٽ جو اهم مقصد آهي. وڏي وزير ڪابينا ڪميٽي قائم ڪئي آهي جنهن ۾ جيلن واري وزير ناصر شاهه، توانائي واري وزير امتياز شيخ ۽ قانون بابت صلاحڪار بيرسٽري مرتضيٰ وهاب شامل آهن. ڪابينا اجلاس ۾ سنڌ لوڪل گورنمينٽ ايڪٽ ۾ ترميم جي منظوري ڏني وئي آهي جڏهن ته سنڌ پبلڪ پروڪيورمينٽ اٿارٽي جي رولز جي منظوري ڏني وئي آهي. متروڪا وقف املاڪ سنڌ قانون سازي ڪئي آهي. اطلاعات واري صلاحڪار پريس بريفنگ ۾ ٻڌايو ته 18 ترميم کان پوءِ متروڪا وقف املاڪ جو انتظامي ڪنٽرول سنڌ حڪوپمت وٽ هجڻ گهرجي. متروڪا وقف املاڪ جي حاصلات لاءِ عدالتي عظميٰ سان رجوع ڪنداسين ۽ متروڪا وقف املاڪ بورڊ بڻايو ويندو. وڏي وزير جي صلاحڪار مرتضٰي وهاب هڪ سوال جي جواب ۾ چيو ته سنڌ حڪومت ميڊيا هائوسن جي رهتن جي ادائيگي لاءِ سنجيده آهي ۽ انهي لاءِ اپاءُ ورتا پيا وڃن ۽ ان ڏس ۾ وڏي وزير پڻ حڪم جاري ڪيا آهن. ڪابينا اجلاس ۾ هڪ ڪوايڪوپيشنل سيفٽي اينڊ هيلٿ ڪائونسل ايڪٽ وارو آئيٽم ڊفر ڪندي ڄاڻايل ايڪٽ کي وڌيڪ بهتر ڪري ٻيهر پيش ڪرڻ لاءِ ليبر کاتي کي هدايت ڪئي وئي. ڪابينا اجلاس ۾ ٻڌايو ويو ته سو ميگاواٽ نوري آباد پاور پلانٽ حڪومت پي پي پي تحت قائم ڪيو آهي ڄاڻايل پاور پلانٽ ۾ سنڌ حڪومت جي 49 سيڪڙو ڀاڱي ڀائيواري آهي جڏهن ته نجي ڪمپني جا 51 سيڪڙو انهيءَ ۾ شيئرز آهن. ڪابينا کي ڄاڻ ڏني وئي ته نوري آباد ڪمپني 6.62 بلين رپيا فائدو ڪمايو آهي. سنڌ ڪابينا نوري آباد جي فنڪشنل ڪلوز جي لائين ۾ 30 جون 2020 تائين واڌ جي منظوري ڏئي ڇڏي آهي. سنڌ ڪابينا جي اجلاس ۾ سيپرا جي ڪجهه قانون ۾ ترميم جي منظوري ڏني وئي جنهن ۾ قورم ۽ ڪجهه ٽيڪنيڪي ڊيفينيشن ۾ بهتري آندي وئي ڪابينا پيمرا ۾ جنرل پبلڪ نمائندن کي چونڊڻ بابت خيالن جي وٺ ڪندي ڪابينا اهو اختيار صوبائي اطلاعات واري صلاحڪار مرتضيٰ وهاب کي  اختيار ڏنو ويو ته اهو نامزدگي ڪري. اسٽيوٽا ايڪٽ 2010 ۾ ترميم تي ڪابينا ۾ غور ويچار ڪيو ويو جنهن ۾ اسٽيوٽا جو چيئرمين ٽيڪنيڪي تعليم جو وزير ٿيڻو هو. جنهن ۾ ترميم ڪندي چيئرمين ، صلاحڪار ، معاون خصاص يا وزيراعليٰ نامزد شخص چيئرمين هوندو. سنڌ ڪابينا جي اجلاس ۾ سنڌ لوڪل گورنمنٽ ايڪٽ 2013 جي سيڪشن 26 ۾ ڪابينا ترميم جي منظوري ڏئي ڇڏي آهي. پهرين ميئر، ڊپٽي ميئر، چيئرمين، وائيس چيئرمين يا ڪوبه ميمبر استعيفيٰ ڏيندو هو ته اهو ڪونسل کي اماڻيندو هو پر هاڻي ترميم ڪرڻ کانپوءِ هو پنهنجو استعيفيٰ ايڊمنسٽريٽو ڊپارٽمينٽ کي اماڻيندو. اطلاعات ۽ قانون بابت صلاحڪار بيريسٽر مرتضٰي وهاب چيو ته اهو تاثر غلط آهي ته سنڌ حڪومت آئي جي سنڌ پوليس جا اختيار ختم ڪري رهي آهي، پوليس جي اٽانومي قائم رهندي اسڪروٽني بهتر انداز ۾ ٿيندي. آئي جي اختيارن ۾ گهٽتائي جو ڪو به ارادو ناهي سنڌ پوليس ايڪٽ ۾ آزادي ۽ احتساب شامل ٿيندو. اسان پوليس کي با اختيار ۽ آزاد بڻائڻ چاهيون ٿا پر پوليس کي به چيڪ اينڊ بيلينس جي ضرورت آهي. سنڌ جي پوليس قانون ۾ اهڙين شين کي نظر ۾ رکيو پيو وڃي جڏهن چونڊيل حڪومتن جو احتساب ٿي سگهي ٿو ته پوليس ۽ بيورو ڪريسي جو احتساب پڻ ضروري آهي. اطلاعات ۽ قانون بابت وڏي وزير جي صلاحڪار بيرسٽر مرتضيٰ وهاب چيو آهي ته سرڪاري ناڪاره ۽ اضافي گاڏين کي نيلام ڪرڻ جو فيصلو ڪيو ويو آهي ٻن هفتن اندر انهي تي اڳڀرائي ٿيندي. ڪجهه سرڪاري گاڏين تي جعلي نمبر پليٽ لڳائڻ جو انڪشاف ٿيو آهي جنهن تي سخت هدايتون جاري ڪيون آهن. وڏي وزير جي صلاحڪار بيرسٽر مرتضيٰ وهاب ميڊيا سان ڳالهائيندي چيو ته وڏي وزير سيد مراد علي شاهه سعيد غني جي درخواست تي قبرستان لاءِ جاءِ جي نشاندهي ڪرڻ جي هدايت ڪئي آهي ڪراچي ۾ وڌيڪ قبرستان جي ضرورت آهي ان ڏس ۾ ايندڙ ڪابينا اجلاس ۾ چيف سيڪريٽري کي اهو آئيٽم ڪابينا ۾ آڻڻ جي هدايت ڪئي وئي آهي. مرتضٰي وهاب ساهيوال واقعي جي مذمت ڪندي چيو ته اهڙا واقعا معاشري جي دامن تي بدنما داغ آهن ڪو به شخض قانون کان مٿاهون ناهي.

 

ڪراچي ۾ برسات، 2 ڄڻا فوت، ڪيترائي زخمي، بجلي غائب، روڊن تي پاڻي جمع، عوام پريشان

ڪراچي  (ويب ڊيسڪ)ڪراچي جي مختلف علائقن ۾ پيل هلڪي برسات شهر جو نقشو تبديل ڪري ڇڏيو، جڳهه جڳهه تي پاڻي جمع ٿي ويو، ڪرنٽ لڳڻ سبب 2 شهري حياتيون وڃائي ويٺا، روڊ پسيل هئڻ ڪري موٽر سائيڪلون سلپ ٿيڻ سبب ڪيترائي ماڻهو زخمي ٿي  پيا،  هوڏانهن ڪي اليڪٽرڪ جي نااهلي سبب اڌ شهر اونداهي ۾ ٻڌي ويو، ڪيترن ئي هنڌن تي 18 ڪلاڪ گذرڻ باوجود بجلي بحال نه ٿي سگهي،  ڪراچي ۾ رات وقفي وقفي سان بارش جو سلسلو جاري رهيو، موسميات کاتي موجب سڀ کان وڌيڪ مينهن لانڍي ۾ 31 ملي ميٽر ريڪارڊ  ڪيو ويو. گلستان جوهر ۾ 29، نارٿ ڪراچي 6، ناظم آباد ۾ 10، پي ايف بيس، فيصل ۽ مسرور بيس جي ڀرپاسي وارن علائقن ۾ 12 ملي ميٽر برسات ريڪارڊ ڪيو ويو. حيدرآباد ، ميرپورخاص ۽ ٽنڊو الهيار ۾ برسات کان بعد مرڪزي شاهراهون شاهراهون ندين نالن جو منظر پيش ڪرڻ لڳيون. پنجاب جي شهر لاهور، گوجرانوالا، سرگوڌا، وهاڙي، پوري والا، ميسلي ۽ ڀرپاسي وارن علائقن ۾ گذريل رات کان برسات جو سلسلو وقفي وقفي سان جاري آهي. ملڪ جي مٿين علائقن ۾ برفباري جو سلسلو جاري آهي، ڪالام ۽ مالم جبا ۾ وقفي وقفي سان برفباري جاري آهي، مياندم ۽ مرغزار جي پهاڙن تي به برفباري ٿي رهي آهي، شديد ترين برفباري سان ڪالام اتروڙ روڊ ٽريفڪ لاءِ بند ڪيو ويو . موسميات کاتي موجب سومر کان اربع تائين مالاکنڊ، هزارا ڊويزن  ۾ وچولي بارش جو امڪان آهي ۽ اڄ پشاور، مردان، راولپنڊي، گوجرانوالا، لاهور ڊويزن، سرگودا، فيصل آباد، بهاولپور،ملتان، ساهيوال، ميرپرخاص ۽ ٺٽي ڊويزن ۾ ڪجهه هنڌن تي برسات جو امڪان آهي

بلديات جي صوبائي وزير سعيد غني لاڳاپيل ادارن کي 2 ڪلاڪن اندر روڊن ۽ گھٽين پاڻي ڪڍڻ جي هدايت ڪندي چيو آهي ته ڪوتاهي ڪرڻ تي آفيسرن ۽ ملازمن کي شوڪاز نوٽيس جاري ڪيا وڃن. سعيد غني چيو ته ڪوتاهي ڪرڻ تي آفيسرن کي شوڪاز نوٽيس جاري ڪيا ويندا. ٻئي پاسي وڏي وزير سيد مراد علي شاهه ڪمشنر ڪراچي کي هدايت ڪئي آهي ته سڀني ڊپٽي ڪمشنرز جي فيلڊ ۾ رهي ۽ پنهنجي ضلعي ۾ عوام جي سهولت لاءِ ڪم ڪري. وڏي وزير چيو ته برسات جي پاڻي جي نيڪالي کي يقيني بڻائين، ٽريفڪ جي راونگي لاءِ ٽريفڪ پوليس عوام جو خيال رکي جڏهن ته بلديات وزير سعيد غني کي روڊن جي صفائي جو ڪم شروع ڪرائڻ جي به هدايت ڪئي آهي.

 

 

ساهيوال واقعو: سينيٽ ۾ مخالف ڌر قائم جي آءِ ٽي کي رد ڪري ڇڏي

اسلام آباد (اين اين آءِ) سينيٽ ۾ مخالف ڌر ساهيوال واقعي جي حوالي سان قائم جي آءِ ٽي کي رد ڪندي چيو آهي ته واقعي جي حوالي سان شڪي حالتن تان پردو کڄڻ گهرجي، جي آءِ ٽي ۽ 2-2 ايف آءِ آرز جي ذريعي معاملي کي لڪائڻ جي ڪوشش نه ڪئي وڃي، سڌارن وارو عمل سٺي ڳالهه آهي ان کان اڳ معاملي کي ڏسڻ ضروري آهي، سومر تي سينيٽ اجلاس ۾ چيئرمين سينيٽ صادق سنجراڻي حڪومت ۽ مخالف ڌر جو موقف ٻڌڻ کانپوءِ ساهيوال سانحي تي ميمبرن کي خيالن جي اجازت ڏني، اجلاس ۾ سينيٽر جاويد عباسي چيو ته هو ساهيوال ۾ ٿيل سانحي تي التوا واري رٿ پيش ڪرڻ چاهي ٿو، اها بنا دير بحث هيٺ آندي وڃي، قائد ايوان سينيٽر شبلي فراز چيو ته ان واقعي تي جي آءِ ٽي رپورٽ اچڻ کانپوءِ ڳالهيو وڃي، پارلياماني ليڊرز جي اجلاس ۾ ان حوالي سان فيصلو ٿي چڪو آهي، مخالف ڌر اڳواڻ سينيٽر راجا ظفر الحق چيو ته سڄو ايوان هن وقعي تي خيالن جو اظهار ڪرڻ چاهي ٿو، اڄ ئي ان معاملي تي ڳالهايو وڃي، ڇو ته هي معاملو ترت بحث ڪرڻ جوڳو آهي، سينيٽر شبلي فراز اسرار ڪيو ته هائوس بزنس ايڊوائزري ٿيل اجلاس ۾ ٿيل فيصلي جي رکوالي ڪئي وڃي، جيڪڏهن هائوس بزنس ايڊوائزري ۾ ٿيندڙ فيصلن کي ناهي مڃڻو ته پوءِ ان جو اجلاس ڪرڻ جي ضرورت نه آهي، سينيٽ چيئرمين چيو ته سڄي ايوان هڪ راءِ ڏئي رهيو آهي ان جو احترام ڪرڻ گهرجي، سينيٽر شيري رحمان چيو ته هائوس بزنس ايڊوائزري ۾ اهو طئه ٿيو هو ته اڄ ئي ان معاملي تي بحٿ ٿيندو، سينيٽ چيئرمين چيو ته مهملي رٿ بدران عوام جي اهميت جي معاملي تي هن تي سمورا ميمبر خيالن جو اظهار ڪري سگهن، عوامي معاملي تي بحث ۾ حصو وٺندي شيري رحمان چيو ته سڄي قوم ڏسي رهي آهي ته حقيقتون ڇا آهن، ڇو ته ڪيمرا جي اک سڀ ڪجهه ڏيکاري ڇڏيو آهي، هن چيو ته ساهيوال ۾ وڏو ظلم ڪيو ويو، پوليس پاران چيو ويو ته ڪار جا شيشا ڪارا هئا جيتوڻڪ وڊيوز مان صاف ظاهر آهي ته شيشا ڪارا نه هئا، ان واقعي تي ايڪشن نه ورتو ويو ته سڄي قوم پڇاڻو ڪندي ته اسان هتي ڇو ويٺا آهيون، هن چيو ته ڏينهن ڏٺي ٿيل قتل تي جي آءِ ٽي ناهي ٺهندي، پنجاب حڪومت چيو آهي ته مارجي ويل دهشتگرد آهن پر انهن سان سڄو خاندان ساڻ هو، جيڪڏهن واقعو پلان موجب هو ته انڌا ڌنڌ فائرنگ جي ڪهڙي ضرورت هئي، کين جيئري ئي گرفتار ڪري سگهجي پيو، هن چيو ته وزيراعظم ان بابت هڪ ٽوئيٽ به ڪئي آهي ۽ اسان جي ٽوئيٽ سان اتفاق ڪريون ٿا پر هو پنهنجو موقف بار بار تبديل نٿو ڪري سگهي، هن چيو ته سڌارن جي ڳالهه سٺي آهي پر ان کان اڳ هن معاملي کي ڏسڻ بهتر ڳالهه آهي. راجا ظفر الحق چيو ته ساهيوال ۾ لڱ ڪانڊاريندڙ واقعو ٿيو، ان معاملي تي ايوان ۾ بحث سٺي ڳالهه آهي ڇو ته هي هڪ انسان نه پر ڪيترين ئي انساني حياتين جو مسئلو آهي، هن چيو ته پوليس جو موقف غلط آهي، فائرنگ ڪندڙ پوليس جي وردي ۾ نه هئا ۽ مقتولن سمجهيو ته شايد اهي ڦورو آهن، ان لاءِ انهن چيو ته پيسا وٺو پر اسان کي گوليون نه هڻو، واقعي جي حوالي سان پنجاب جي وڏي وزير جي ڪارڪردگي تي تنقيد ڪندي هن چيو ته هر معاملي ۾جي آءِ ٽي جو رواج ٿي ويو آهي، اسان ان معاملي تي جي آءِ ٽي کي رد ڪريون ٿا، ڇو ته جي آءِ ٽي سان اڳ ئي پنجاب حڪومت ۽ انتظاميا جو موقف پريس ڪانفرنس ذريعي اچي رهيو آهي، هن چيو ته هن واقعي جا جيڪي به ذميوار آهن انهن کي سزا ڏني وڃي، واقعي تي 2 ايف آءِ آر داخل ڪيون ويون آهن، جيتوڻڪ سپريم ڪورٽ جي رولنگ آهي ته هڪ واقعي تي 2 ايف آءِ آر داخل نٿيون ٿي سگهن، مقتولن جي وارثن جي ايف آءِ آر ۾ اڻڄاتل ماڻهن کي ملوث ڪيو آهي، اسان سمجهون ته ها ان واقعي ۾ جيڪي ملوث آهن انهن کي بچڻ نه گهرجي. سينيٽر فيصل جاويد چيو ته ساهيوال واقعي تي وزيراعظم سڄي رات نه ستو آهي، عوام ۾ هن واقعي تي ڏک ۽ ڪاوڙ جائز آهي، وزيراعظم هن واقعي کان باخبر آهي ۽ هن يقين ڏياريو آهي ته ذميوارين کي مثالي سزا ڏني ويندي، هن چيو ته اهو به ڏسڻ گهرجي ته پنجاب کي گذريل 30 سالن ۾ هن هال تي ڪنهن پهچايو آهي، پوليس ۽ ادارن جي ڍانچي ۾ بهتري لاءِ ڇا ڪرڻ جي ضرورت آهي، ڪي پي ڪي ۾ هن پنهنجي 20 اسيمبلي ميمبرن خلاف ڪارروائي ڪئي، هن چيو ته پنجاب جي وڏي وزير اعلان ڪيو آهي ته جي آءِ ٽي جي رپورٽ اڱاري تي شام 5 وڳي تائين اچي ويندي، سينيٽر سراج الحق چيو ته ساهيوال واقعو سياسي نه پر انساني مسئلو آهي، ساهيوال ۾ بي رحمي سان مارجي ويل رات جي اونداهي ۾ ماريا وڃن ها ته سچ ڪڏهن به ظاهر نه ٿئي ها، هن چيو ته جيڪو ڪجهه ساهيوال ۾ ٿيو ائين ته جهنگ ۾ ناهي ٿيندو، رياست جو مثال ماءُ وانگر هوندو آهي پر هي ڪهڙي رياست آهي جتي هي سڀ ڪجهه ٿي رهيو آهي، پنجاب حڪومت پنهنجو موقف لاڳيتو تبديل ڪري رهي آهي، ذميوارن کي وائکو ڪري سخت سزا ڏني وڃي.

 

حڪومت روزگار جا موقعا ۽ ميونيوفيڪچرنگ شعبي جي تيز ترقي ذريعي خانگي شعبن کي هٿي وٺرائڻ لاءِ پڪو پهه ڪيو آهي: صدر

اسلام آباد (اين اين آءِ) صدر عارف علوي چيو آهي ته حڪومت سيڙپڪاري وڌائڻ ۽ روزگار جا موقعا ۽ مينيوفيڪچرنگ شعبي جي تيز ترقي ذريعي خانگي شعبن کي هٿي ڏيڻ لاءِ پڪو پهه ڪيو آهي، هو سومر تي پاڪستاني ڪمپني ايمرلي اسٽيلز جي چيئرمين عباس اڪبر علي سان ڳالهائي رهيو هو جنهن ساڻس ملاقات ڪئي، صدر ان ڳالهه تي زور ڀريو ته معيشت کي بحال ڪرڻ حڪومت جي پهرين ترجيح آهي، ڪاروبار ۾ سهولت ڏيڻ لاءِ هر قدم کڻڻ جو پڪو پهه ڪيو آهي، هن چيو ته تيار شين ۾ سيڙپڪاري اسان جي معيشت جي بحالي جي لائيف لائين آهي، هن ان ڳالهه تي زور ڀريو ته سمورن چئلينجز جي باوجود حڪومت ملڪ ۾ سيڙپڪاري کي راغب ڪرڻ لاءِ سازگار ماحول پيدا ڪرڻ لاءِ سخت محنت ڪري رهي آهي.

 

ٻن کان ٽن مهينن ۾ 2019ع جي اپيلن جي ٻڌڻي شروع ڪندس، رولڙي جو شڪار ڪيسن جي شرح جلد زيرو ٿي ويندي: چيف جسٽس

اسلام آباد ( ويب ڊيسڪ ) چيف جسٽس  آصف سعيد کوسا چيو آهي ته مان هن وقت اپريل 2018ع جي اپيلن جي ٻڌڻي ڪري رهيو آهيان، ايندڙ ٻن کان ٽن مهينن ۾ 2019ع جي اپيلن جي ٻڌڻي شروع ڪندس، جلد رولڙي جو شڪار ڪيسن جو انگ ٻڙي ٿي ويندو.  چيف جسٽس آصف سعيد کوسا جي سربراهيءَ ۾ 3 رڪني بئنچ فوجداري ڪيسن بابت اپيلن جي ٻڌڻي ڪئي. پهريون فوجداري ڪيس گجرات جي رهواسي ڊاڪٽر شمس الرحمان تي 2010ع ۾ گهر واري کي قتل ڪرڻ جي الزام بابت هو جڏهن ته ٻيو فوجداري ڪيس مڙس طرفان گهر واري جي اعتراض جوڳي تصوير شير ڪرڻ بابت هو.  بئنچ شمس الرحمان جي آزادي خلاف اپيل تي ٻڌڻي ڪئي ۽ عدالت هاءِ ڪورٽ جو فيصلو برقرار رکندي سندس آزادي خلاف اپيل رد ڪري ڇڏي. عدالت چيو ته فريادي ڌر ڏوهه ثابت ڪرڻ ۾ ناڪام رهي جڏهن ته پوسٽ مارٽم رپورٽ ۾ به دير ڪئي وئي ۽ تنهن ڪري شڪ جو فائدو ڏيندي جوابدار کي آزاد ڪيو وڃي ٿو. سپريم ڪورٽ جي بئنچ ٻئي ڪيس جي ٻڌڻي ڪندي گهر واري طرفان مڙس جي ضمانت رد ڪرڻ لاءِ داخل درخواست به رد ڪري ڇڏي. چيف جسٽس رمارڪس ڏيندي چيو ته تصوير ۾ جوابدار پاڻ به موجود آهي پنهنجي فحش تصوير ڪو پاڻ شيئر نه ڪندو آهي، درخواستگذار ۽ جوابدار وچ ۾ ڪاروباري تڪرار هلي رهيو آهي.

 

 

ساهيوال سانحي ۾ مارجي ويل ڊرائيور جي وارثن کي ڌمڪيون ڏئي تدفين ڪرائي وئي: راجا پرويز اشرف

اسلام آباد (ويب ڊيسڪ) اڳوڻي وزيراعظم راجا پرويز اشرف چيو آهي ته ساهيوال سانحي ۾ مارجي ويل ڊرائيور جي وارثن کي ڌمڪيون ڏئي لاشن کي دفنايا ويا. ڪو به معاملو سرد خاني ۾ رکڻ جو هجي ته جي آءِ ٽي ٺاهي ويندي آهي، ڪريل حڪومت به هجي ها ته حقيقت سامهون اچي ها.ساهيوال سانحي جي حوالي سان قومي اسيمبلي ۾ جاري بحث ۾ حصو وٺندي اڳوڻي وزيراعظم راجا پرويز اشرف چيو آهي ته جنهن اداري کي دهشتگردي کان پچائڻو آهي ان ئي بي گناهن کي گوليون هڻي ماريو آهي، هر ماڻهو پاڻ کي غير محفوظ سمجهي ٿو، حڪومتي وزيرن جا ساهيوال واقعي تي بيان اعتراض جوڳا هيا. سڀاڻي ڪنهن کي به ٻارن سان گڏ سفر دوران گوليون هڻي ماري چيو ويندو ته دهشتگرد هيا. ساهيوال سانحو پاڪستانين کي ئي نه پر سموري دنيا کي رواريو آهي. هن چيو ته ڇا ڪنهن جي والدين کي ماري سندن گل پيش ڪيا ويندا آهن؟ ڇا ڪنهن جي گھر ۾ ماتم هجي ته ان ڏي وڃي گل پيش ڪيا ويندا آهن؟ ڪيتري ڏک جي ڳالهه آهي ته وڏو وزير ٻارن وٽ گل کڻي وڃي ۽ تصوير ڪڍرائي، ڇا مدينه رياست ۾ ايئين ٿيندو آهي؟ وزيراعظم بيان ۾ چوندو آهي ته آئون صدمي ۾ آهيان، ڪو ٻيو لفظ استعمال ڪري پر مديني واري رياست جهڙي لفظ جو استعمال نه ڪري، خدا خدا ڪيو.هن چيو ته چيو رهيا آهن ته ڊرائيور دهشتگرد هيو، وارث چون ٿا هو ڪڏهن شهر کان ٻاهر ناهي ويو، ڊرائيور جي وارثن کي ڌمڪيون ڏئي تدفين ڪرائي وئي. جي آءِ ٽي ته مذاق آهي، سرد خاني ۾ وجهڻو هجي ته جي آءِ ٽي ٺاهيو، ويل حڪومت به هجي ها ته صحيح حقيقت سامهون اچي وئي هجي ها.

 

 

70 سالن کانپوءِ به پينڊولم جيان ڪم پيا ڪريون، آهيون قومي ادارن جي ساک عوام جي نظرن ۾ تڪراري بڻجي وئي آهي: احسن اقبال

لاهور (اين اين آءِ) پاڪستان مسلم ليگ (ن) جي مرڪزي اڳواڻ احسن اقبال چيو آهي ته ساهيوال جو واقعو لڱ ڪانڊاريندڙ آهي جيڪو هر پاڪستاني کي تڪليف ڏني آهي ڪنهن قسم جو دٻاءُ نه هئڻ گهرجي ۽ جي آءِ ٽي جي رپورٽ حقيقت تي ٻڌل هئڻ گهرجي آبادي وڌڻ جي مقابلي ۾ اسان جي ترقي جي رفتار سست آهي اسان کي هر صورت ترقي جي شرح 6 ک ان 8 سيڪڙو ڪرڻي آهي اهڙن خيالن جو اظهار هن لاهور هاءِ ڪورٽ پاران ڪوٺايل ڪتابي ميلي ۾ شرڪت جي موقعي تي ڳالهائيندي ڪيو احسن اقبال لاهور هاءِ ڪورٽ بار جي قدم کي فائديمن قرار ڏيندي چيو ته دنيا جي سمورن شعبن ۾ ترقي علم جي بنياد تي ڪئي پئي وڃي هن چيو ته جنهن نموني نوازشريف کي ڪڍيو ويو آهي انس ان ملڪ ۾ سياسي بحران پيدا ڪيو ويو جيڪڏهن ملڪ کي قانون ۽ عوام جي راءِ مطابق نه هلائينداسين ته اسان هي ملڪ قائداعظم جو پاڪستان نه بڻجندو. هتي حڪومتن کي ٽوڙيون وڃي ٿو اسان کي نظام هلائڻ لاءِ ڌانڌلي واريون چونڊون قبول ڪيون ڇو ته اسان ڏڦيڙ نه پيا چاهيون پي ٽي آءِ جي حڪومت کي ڪنهن ٻئي مان خطرو نه اهي رپ ان کي پنهنجي نااهلي مان خطرو آهي اڄ عوام جي نظر ۾ قومي ادارن جي ساک تڪراري هوندي هن حڪومت جي هر برائي قومي ادارن تي وڌي وڃي ٿي عوام ۾ وڃان ٿو ته هر شخص قومي ادارن بابت ڳالهائي ٿو چيف جسٽس جيڪا ڳالهه ڪئي آهي اها هن بحران جي آهي جيڪو اسان کي درپيش آهي هن چيو ته پاڪستان انتظامي لحاظ کان مفلوج ٿي چڪو آهي ڪرپشن کي فڪس ڪري سگهجي ٿو پر ملڪ انتظامي لحاظ کان ڪمزور ٿيو ته ان جو ڍانچو خطري ۾ پئجي وڃي ٿو اسان شفاف احتساب جي حمايت ڪريون ٿا اهڙو احتساب جنهن ۾ رڳو اپوزيشن کي نشانو بڻايو وڃي پر بنا فرق احتساب ٿئي موجوده احتساب جو نظام تڪراري ٿي رهيو آهي اسان ملڪ جي سمورن ادارن جو احترام چاهيون ٿا سڀ ماضي جي غلطين مان سبق سکن ۽ جمهوريت کي مضبوط ڪرڻ لاءِ گڏجي ڪم ڪرڻو پوندو سمورن اسٽيڪ هولڊرز کي گڏجي قومي ادارن جي احترام کي بحال ڪرڻو پوندو.

 

 

پاڪ پتن ضلعي ڪچهري ۾ اڻڄاتل ماڻهن جي فائرنگ، ٻن سڳن ڀائرن سميت 3 ڄڻا قتل

پاڪ پتن (اين اين آءِ) پاڪ پتن ضلعي ڪچهري ۾ نامعلوم ماڻهن جي فائرنگ ۾ ٻن سڳن ڀائرن سميت 3 ڄڻا مارجي ويا پوليس موجب ٽئي ڄڻا ڪيسن جي پيروي لاءِ ضلعي ڪچهري پهتا هئا ته اڻڄاتل ماڻهن مٿن فائرنگ ڪئي جنهن سان اهي ٿڏي تي ئي فوت ٿي ويا لاش پوسٽ مارٽم لاءِ اسپتال پهچايا ويا پوليس موجب واقعو پراڻي دشمني لڳي ٿو وڌيڪ جاچ شروع ڪئي ويئي آهي.

 

گهوٽڪي ڀرسان پراڻي تڪرار تان ٻه ڀائر قتل

گهوٽڪي(م.ڊ) گهوٽڪي ڀرسان پراڻي تڪرار تان وارهه واسي ٻه ڀائر قتل ٿي ويا آهن. رپورٽن مطابق گهوٽڪي جي خان ڳوٺ ۾ پراڻي تڪرار تان زيتون جي فارم تي هٿياربندن حملو ڪندي وارهه واسي ٻن ڀائرن غلام چانڊيو ۽ نازل خان چانڊيو کي قتل ڪري ڇڏيو. اطلاع تي گيمڙو ٿاڻي جي پوليس پهچي مقتولن جا لاش اسپتال مان پوسٽ مارٽم ڪرائڻ کانپوءِ وارثن حوالي ڪري ڇڏيا.پوليس مطابق واقعو پراڻي تڪرار تان پيش آيو آهي، مارجي ويلن جو غلام قادر، جمعو ۽ پهلوان چانڊيو جي ڌر سان زمين جي معاملي تان تڪرار هلندڙ هو.