تازيون خبرون
ڪڻڪ افغانستان اسمگل ڪري هٿ سان بحران پيدا ڪيو ويو: وڏو وزير - ٽرانسپيرنسي انٽرنيشنل کي پنهنجي ساک جو جائزو وٺڻ گهرجي: فردوس عاشق اعواڻ - جاچ ادري جي ٽيم کي سنڌ اسيمبلي ۾ ڇو داخل ٿيڻ ڏنو ويو؟: اسپيڪر جو نوٽيس - نظام الائي ڪيئن پيا هلائين، خيبرپختونخوا حڪومت جو ڪهڙو علاج ڪريان؟: چيف جسٽس - حڪومت سيڙپڪاري جي سهولت لاءِ سڌارن جي ايجنڊا تي عمل ڪري رهي آهي: وزيراعظم - حڪومت سڪندر سلطان راجا کي اليڪشن ڪميشن جو سربراهه مقرر ڪري ڇڏيو، 2 ميمبرن جي مقرري جو نوٽيفڪيشن به جاري - آءِ جي سنڌ جي تڪرار ۾ اهم اڳڀرائي، وفاق آءِ جي سنڌ جي بدلي وفاقي ڪابينا جي منظوري سان مشروط ڪري ڇڏي - آرمي چيف اليڪٽرانڪ وارفيئر اينڊ گرائونڊ سرويلينس ريڊار ليبارٽريز جو افتتاح ڪري ڇڏيو - ڪراچي پوش علائقي مان ٽن گڏهن جون منڍيپن ۽ اوجهه هٿ، گوشت ڪيڏانهن ويو پوليس پريشان - آئي جي سنڌ حڪومت سان تعاون نٿو ڪري، اڳ ڪڏهن وفاقي ڪابينا ڪنهن آئي جي جي مقرري جي منظوري ناهي ڏني: سعيد غني

Daily Archives: January 21, 2019

ساهيول دهشتگردي، 16 نامعلوم سي ٽي ڊي اهلڪارن خلاف ڪيس داخل، مقتولن جي علائقي ۾ سوڳ برقرار

ساهيوال/لاهور ( ويب ڊيسڪ)ساهيوال سانحي ۾ مبينا پوليس مقابلي ۾ چئن ماڻهن جي مارجڻ تي 16 نامعلوم سي ٽي ڊي اهلڪارن خلاف ڪيس داخل ڪيو ويو آهي. پوليس انتظاميه ۽ وارثن وچ ۾ ڳالهيون ڪامياب ٿيڻ بعد مقتول خليل جو ڀاءُ جليل پوليس ٽيم سان گڏ يوسف والا ٿاڻي تي پهتو. وارثن جو چوڻ هو ته 16 نامعلوم سي ٽي ڊي اهلڪارن خلاف ڪيس داخل ڪيو وڃي. ڪيس دهشتگردي ۽ قتل جي شقن تحت داخل ڪيو وڃي. پوليس وارثن جي درخواست تي ڪيس داخل ڪيو آهي، جنهن ۾ دهشتگردي ۽ قتل جون شقون شامل ڪيون ويون آهن. ٻئي طر ساهيوال ۾ سي ٽي ڊي جي مبينا مقابلي خلاف مارجي ويلن جي وارثن طرفان مظاهرو ڪري لاش روڊ تي رکي ڌرڻو هنيو ويو. ساهيوال واقعي خلاف مارجي ويلن جي وارثن ۽ عام شهرين جي احتجاج جو سلسلو جاري آهي. ساهيوال ۾ وارثن جي ٽي ڊي روڊ تي لاش رکي احتجاجي ڌرڻو هنيو ۽ ملوث اهلڪارن خلاف ڪيس داخل ڪرڻ جو مطالبو ڪيو آهي. وارثن حڪومت خلاف نعريبازي ڪندي چيو ته جيستائين سي ٽي ڊي اهلڪارن خلاف ڪيس داخل نه ٿو ڪيو وڃي احتجاج جاري رهندو. مظاهري دوران ڊي پي او ۽ ڊي سي ساهيوال ۾ ڳالهيون ڪيون. سي ٽي ڊي اهلڪارن تي ڪيس داخل ڪرڻ جي خاطري بعد ڌرڻو ختم ڪيو ويو. مارجي ويلن جي لاشن کي چئن ايمبولينسن ۾ لاهور منتقل ڪيو ويو.  هوڏانهن لاهور ۾ به مظاهرين چونگي امر سنڌو واري هنڌ فيروز پور روڊ کي ٻنهي پاسن کان بند ڪري ڇڏيو  جنهن جي نتيجي ۾ ٽريفڪ جي روانگي متاثر ٿي ۽ جڏهن ته ميٽرو بس سروس به بند ٿي وئي.  مقتول خليل جي ڀاءُ جليل چيو ته انصاف ملڻ تائين لاشن جي تدفين نه ٿيندي، اسان جو ڪيس لاڳاپيل ٿاڻي ۾ داخل ڪرڻ بدران لاهور ۾ داخل ڪرائڻ جو چيو ويو آهي جڏهن ته پوليس اسان جو ڪيس داخل ڪرڻ بدران فوتين تي ڪيس داخل ڪيو آهي.هوڏانهن  ساهيوال ۾ سي ٽي ڊي جي ڪارروائي جي نئين ويڊيو منظرعام تي اچي وئي آهي جنهن ۾ اهلڪارن جا پول پڌرا ڪري ڇڏيا آهن. ميڊيا جي رپورٽن موجب دهشتگرد ٽوڙ اداري جي ساهيوال ۾ ڪيل ڪارروائي جي نئين ويڊيو ملي وئي آهي جيڪا مبينا پوليس مقابلي وقت روڊ تي پٺيان بيٺل هڪ گاڏي ۾ ويٺل شهري موبائيل تي رڪارڊ ڪئي آهي. موبائيل ذريعي ٺاهيل هن ويڊيو ۾ واضح طور ڏسي سگهجي ٿو ته سي ٽي ڊي اهلڪارن گاڏي کي ٽڪر هڻي روڪيو ۽ پهريان گاڏي ۾ ٻارن کي لاٿو جنهن بعد اهلڪارن سڌي فائرنگ شروع ڪري ڏني جڏهن ته گاڏي ۾ ذيشان ۽ مهر خليل طرفان جوابي فائرنگ نه ڪئي وئي. ويڊيو ۾ ڏسي سگهجي ٿو ته اهلڪارن گاڏي مان ڪو به سامان نه ڪڍيو  ۽ نه ئي سي ٽي ڊي ٽيم تي ڪنهن موٽر سائيڪل سوار طرفان فائرنگ ڪئي وئي جڏهن ته فائرنگ وقت سي ٽي ڊي اهلڪارن پهريان ٽنهي ٻارن کي گاڏي مان لاهي سرڪاري گاڏي ۾ منتقل ڪيو ۽ پوءِ کين پاڻ گڏ کڻي ويا.

 

شهرين جي حفاظت حڪومت جي ذميواري آهي، ذميوارن کي عبرتناڪ سزا ڏني ويندي: صدر/وزير اعظم

اسلام آباد ( ويب ڊيسڪ )  وزيراعظم عمران خان ساهيوال واقعي تي افسوس جو اظهار ڪندي چيو آهي ته اڃا تائين صدمي جي ڪيفيت ۾ آهيان ۽ پريشان آهيان،  ٻارڙن جي اکين سامهون سندن والدين کي گوليون هنيون ويون.  وزيراعظم عمران خان پنهنجي ٽوئيٽر بيان ۾ چيو ته دهشتگرديءَ خلاف سي ٽي ڊي تمام سٺو ڪم ڪيو ۽ قانون سڀني سامهون جوابده آهي. هن چيو ته جيتري جلدي ساهيوال واقعي جي جي آءِ ٽي رپورٽ ايندي فوري طور ڪارروائي ڪئي ويندي، شهرين جي حفاظت حڪومت جي اوليتن ۾ شامل آهي. ساهيوال واقعي ۾ بچي ويل تن معصوم ٻارڙن بابت وزيراعظم عمران خان چيو ته سمورن ٻارڙن جي سموري ذميواري رياست کڻندي.  هن چيو ته سي ٽي ڊي دهشتگردي خلاف سٺو ڪم ڪيو آهي پر قانون اڳيان سڀ جوابده آهن.

 

 

نئين پاڪستان ۾ شهري ٻارڙن سان گڏ ٻاهر نه نڪرن: بلاول ڀٽو زرداري

ڪراچي( ويب ڊيسڪ ) پ پ چيئرمين بلاول ڀٽو زرداري چيو آهي ته تحريڪ انصاف پنجاب کي پوليس اسٽيٽ ۾ تبديل ڪري ڇڏيو آهي، سانحو پيغام آهي ته نئين پاڪستان ۾ شهري ٻارڙن سان گڏ ٻاهر نه نڪرن. بلاول ڀٽو زرداري ساهيوال واقعي تي رد عمل ظاهر ڪندي چيو ته تحريڪ انصاف پنجاب کي پوليس اسٽيٽ ۾ تبديل ڪري ڇڏيو آهي. هن چيو ته ٻارڙن سامهون والدين جو قتل گوڊ گورننس جي ڪوڙن دعويدارن جي منهن تي چماٽ آهي، ايڏي وڏي سانحي کانپوءِ حڪومت گم ٿي وئي آهي. پ پ اڳواڻ چيو ته مديني جي رياست جي پيروي جا دعويدار اڄ جا حڪمران ٻڌائين ته ساهيوال سانحي جو ذميوار ڪير آهي، نيازي سرڪار جي جاچ تي ڪنهن کي اعتماد ناهي.  هن چيو ته ايس ايس پيز ۽ آءِ جيز کي بدلي ڪرڻ سان انصاف نه ٿيندو، ٽوئٽر واري سرڪار ٻٽاڪون هڻڻ ۽ مخالفن تي الزام هڻڻ کانسواءِ ڪجهه نه ٿا ڪري سگهن، نئين پاڪستان جي نالي تي ملڪ ۾ جهنگ جو قانون لاڳو ڪيو ويو آهي.

 

 

پ پ بعد ليگ فوجي عدالتن جي مدي ۾ واڌ جي مخالفت ڪري ڇڏي

لاهور/گوجر خان (ويب ڊيسڪ/اين اين آءِ) اڳوڻي وزيراعظم شاهد خاقان عباسي مخالف ڌر جي اتحاد کي ملڪ جي ضرور ڪوٺيندي چيو آهي ته سياست ۾ جمود ناهي هوندو مقصد تبديل نه ڪرڻ گهرجي ملڪ کي جيترو نقصان نيب ڏنو آهي ان جو ڪاٿو نه ٿو لڳائي سگهجي، فوجي عدالتن جي مدي ۾ واڌ هڪ ڏکيو فيصلو آهي حڪومت معاملي تي پارليامينٽ ۾ اچي ڳالهائي هڪ انٽرويو ۾ شاهد خاقان عباسي چيو ته نواز شريف کي پارليامينٽ ۾ گهڻا ڀيرا اچڻ گهرجي ها ۽ ڪابينا جا اجلاس به وڌيڪ ٿيڻ گهرجن ها جڏهن ته هن پنهنجن وزيرن جي ڪم ۾ به ڪڏهن مداخلت ناهي ڪئي ۽ هر وزير کي ڪم ڪرڻ جي آزادي ڏني موروثي سياست بابت ان جو موقف هو ته سڄي دنيا ۾ هي شيءِ رائج آهي ڀارت ۽ آمريڪا ۾ به موروثيت موجود آهي جڏهن ته قائد جون ذاتي صلاحيتون اهم هونديون آهن مريم نواز نه ئي جماعتي ۽ نه ئي حڪومتي عهدو رکيو آهي ان جي باوجود عام ڪارڪن کيس اهميت ڏين ٿا ان لاءِ سياست ۾ جڳهه موجود آهي هن چيو ته ڪرپشن ضرور ختم ٿيڻ گهرجي پر ان لاءِ جيڪو طريقو اختيار ڪيو پيو وڃي ان سان مقصد حاصل نه ٿيندو ڇو ته ان کي انتقامي ڪارروائي سمجهيو پيو وڃي نيب هڪ ڪارو قانون آهي ان جا قانون تبديل ڪرڻ لاءِ سمورين سياسي جماعتن ۾ اتفاق راءِ ضروري آهي شاهد خاقان عباسي چيو ته نيب اڄ تائين ڪنهن هڪ به ماڻهوءَ کي سزا ناهي ڏني تنهن ڪريم لڪ کي جيترو نقصان نيب ڏنو آهي ان جو اندازو نه ٿو لڳائي سگهجي.  ن ليگ اڳواڻ به ملڪ ۾ فوجي عدالتن جي مدي ۾ واڌ جي مخالفت ڪري ڇڏي آهي. گوجر خان ۾ صحافين سان ڳالهائيندي اڳوڻي وزيراعظم شاهد خاقان عباسي فوجي عدالتن جي مخالفت ڪندي چيو ته فوجي عدالتن جي پاڪستان ۾ ڪا به ضرورت نه آهي، فوجي عدالتن جي مدي ۾ واڌ جي حق ۾ ناهيون جڏهن ته مخالف ڌر جو اتحاد ڪرپشن ڪيسن جي ڪري نه  پر ملڪي مفاد ۾ ٿيو، نااهل حڪومت ملڪ جو ٻيڙو ٻوڙي ڇڏيو آهي. هن چيو ته شاهد خاقان عباسي ساهيوال ۾ سي ٽي ڊي جي فائرنگ ۾ مارجي ويل ماڻهن تي افسوس جو اظهار ڪندي چيو ته ساهيوال واقعي افسوسناڪ ۽ مذمت جوڳو آهي، حقيقتون سامهون آڻي ذميوارن کي عبرت جو نشان بڻايو وڃي.

 

 

ذيشان جو دائش سان تعلق هو، گاڏي مان 2 آپگهاتي جيڪيٽون، 8 هينڊ گرنيڊ، 2 پسٽل ۽ گوليون هٿ آيون: راجا بشارت

لاهور (ويب ڊيسڪ) پنجاب جي قانون واري وزير راجا بشارت چيو آهي ته سي ٽي ڊي جي موقف موجب ساهيوال ۾ گذريل ڏينهن آپريشن 100 سيڪڙو انٽيليجنس، ٺوس شاهدين ۽ مڪمل ڄاڻ جي بنياد تي ڪيو ويو. لاهور ۾ ساهيوال مقابلي بابت ميڊيا کي بريفنگ ڏيندي راجا بشارت چيو ته مارجي ويل خليل جي وارثن جي درخواست تي واقعي جو ڪيس ساهيوال ٿاڻي ۾ داخل ڪيو ويو آهي، جڏهن ته آپريشن ۾ حصو وٺندڙ اهلڪارن جي سپروائزر کي معطل ۽ مقابلي ۾ حصو وٺندڙ سي ٽي ڊي اهلڪارن کي گرفتار ڪيو ويو آهي. سندس چوڻ هو ته پنجاب جي وڏي وزير خليل جي وارثن لاءِ ٻه ڪروڙ رپيا مالي امداد ۽ ٻارن لاءِ مفت تعليم جو اعلان ڪيو آهي، ٻارن جي علاج جو خرچ به پنجاب حڪومت برداشت ڪندي، مالي امداد انساني زندگين جي برابر ته ناهي پر حڪومت پنهنجي ذميواري نڀائيندي. هن چيو ته واقعي جي جاچ لاءِ ايڊيشنل آءِ جي جي سربراهي ۾ گڏيل جاچ ڪميٽي جوڙي وئي آهي، جيڪا ٻن ڏينهن ۾ رپورٽ پيش ڪندي. راجا بشارت موجب ذيشان جو ڪجهه عرصو اڳ داعش جي هڪ خطرناڪ نيٽ ورڪ سان واسطو هو، اهو نيٽ ورڪ ملتان ۾ آءِ ايس آءِ آفيسرن جي قتل، علي حيدر گيلاني جي اغوا ۽ فيصل آباد ۾ ٻن پوليس آفيسرن جي قتل ۾ ملوث آهي، دهشتگردن ملتان ۾ آءِ ايس آءِ آفيسرن جي قتل ۾ سلور رنگ جي هونڊا سٽي ڪار استعمال ڪئي، جنهن جي ڳولا پوليس ۽ ايجنسين کي هئي، 13 جنوري تي هونڊا سٽي ڪار دهشتگردن کي وٺي ساهيوال وئي، ان حوالي سان سيف سٽي ڪئميرائن جو معائنو ڪيو ويو ته خبر پئي ذيشان جي اڇي رنگ جي آلٽو ڪار به دهشتگردن جي گاڏي سان گڏ هئي. هن چيو ته ذيشان جي گاڏي به دهشتگردن جي استعمال ۾ هئي، ايجنسي اهلڪار 18 جنوري تي ڪئميرائن جي مدد سان ٽريس ڪري ذيشان جي گهر پهتا هئا، 13 کان 18 جنوري تائين ڪئميرائن جو معائنو ڪيو ويو، جنهن دوران اها تصديق ٿي ته ذيشان دهشتگردن سان ڪم ڪري رهيو هو. سندس چوڻ هو ته ذيشان جي گهر ۾ دهشتگرد وڏي مقدار ۾ گولي بارود سان موجود هئا، گهر ڳتيل آبادي واري علائقي ۾ هجڻ سبب آپريشن ڪرڻ مناسب نه هو، ڇو ته ان سان بي گناهه ماڻهن کي نقصان پهچڻ جو خدشو هو، تنهن ڪري علائقي مان گاڏي جي نڪرڻ جو انتظار ڪيو ويو. قانون واري صوبائي وزير جي بقول 19 جنوري تي سيف سٽي ڪئميرائن جي مدد سان اڇي آلٽو کي مانگا واري هنڌ ڏٺو ويو، جنهن جو اطلاع ايجنسي کي ڏنو ويو، گاڏي لاهور جي حدن کان ٻاهر نڪري چڪي هئي، تنهن ڪري سي ٽي ڊي ٽيم کي گاڏي روڪڻ لاءِ چيو ويو، انٽيليجنس موجب دهشتگرد گاڏي ۾ بارود کڻي ڪنهن ڳتيل آبادي ڏانهن وڃي رهيا هئا. راجا بشارت چيو ته جڏهن ساهيوال ۾ گاڏي کي روڪيو ويو ته ان موقعي تي فائرنگ ٿي، گاڏي جا شيشا ڪارا هئا، تنهن ڪري پوئين سيٽن تي ويٺل ماڻهو نظر نه پئي آيا ۽ گاڏي ذيشان پاڻ هلائي رهيو هو. هن چيو ته فائرنگ ڇو ۽ ڪيئن ٿي، ان جي جاچ لاءِ جي آءِ ٽي جوڙي آهي، جنهن جي رپورٽ جي روشني ۾ وڌيڪ ڪارروائي ڪئي ويندي، سي ٽي ڊي جي موقف موجب پهريون فائر ذاشان ڪيو هو، جڏهن ته وارثن موجب فائرنگ سي ٽي ڊي ڪئي، جنهن جو پتو لڳائڻ لازمي آهي، جي آءِ ٽي تحت اها جاچ به ڪئي ويندي ته خليل جو ذيشان سان ڪهڙو واسطو هو ۽ ان جو خاندان ذيشان جي گاڏي ۾ ڇو سوار ٿيو. سندس چوڻ هو ته ذيشان جي گاڏي مان 2 آپگهاتي جيڪيٽون، 8 هينڊ گرنيڊ، 2 پسٽل ۽ گوليون هٿ آيون، ان حوالي سان به جاچ ڪئي ويندي ته هٿيار ڪاڏي ۽ ڇو وڃي رهيا هئا. راجا بشارت وڌيڪ ٻڌايو ته آپريشن جي خبر ميڊيا تي هلڻ کانپوءِ ذيشان جي گهر ۾ موجود ٻن دهشتگردن سوشل ميڊيا تي خبر ڏٺي ۽ گوجرانوالا جو رُخ ڪيو، جڏهن ايجنسي ۽ سي ٽي ڊي اهلڪارن انهن دهشتگردن جو پيڇو ڪيو ۽ کين گهيري ۾ ورتو ته انهن پاڻ کي آپگهاتي جيڪيٽن ذريعي اڏائي ڇڏيو، جيڪڏهن انهن دهشتگردن جو پيڇو نه ڪيو وڃي ها ته اهي پنجاب ۾ وڏي تباهي ڪن ها، ان حوالي سان ٿريٽ الرٽ به وصول ٿيا هئا. هن چيو ته آپريشن انٽيليجنس بنياد تي آءِ ايس آءِ ۽ سي ٽي ڊي طرفان گڏيل طور ڪيو ويو پر ان ۾ خليل جي خاندان جي جاني نقصان سبب آپريشن جي حيثيت چئلينج ٿي وئي، وزيراعظم ۽ وڏي وزير کي متاثر خاندان سان دلي همدردي آهي ۽ انهن کي انصاف فراهم ڪيو ويندو، ڪنهن کي ڪا رعايت نه ڏبي ۽ سمورن ذميوارن کي انجام تائين پهچائبو.

 

 

ساهيوال مبينا مقابلي جو ڪيس، سي ٽي ڊي ٿاڻي لاهور ۾ به داخل، سي ٽي ڊي جي فرياد تي داخل ڪيس ۾ ٽن اهلڪارن جو نالو به ڏنو ويو

لاهور (اين اين آءِ) ساهيوال ۾ مبينا مقابلي جو ڪيس ڪائونٽر ٽِيرازم ڊپارٽمينٽ لاهور ٿاڻي ۾ به داخل ڪيو ويو آهي. سي ٽي ڊي جي فرياد تي داخل ڪيس ۾ ٽن اهلڪارن جو نالو به ڏنو ويو آهي جيڪي آپريشن ۾ شريڪ ٿيا. سي ٽي ڊي جي فرياد تي داخل ايف آءِ آر موجب ڪارروائي ۾ ڪارپورول، محسن، رمضان ۽ حسنين اڪبر شريڪ ٿيا ڪيس 324/302، 353 ۽ دهشتگردي سميت ٻيا قلم داخل ڪيا ويا آهن سي ٽي ڊي ٿاڻي ۾ داخل ڪيس جي متن ۾ چيو ويو آهي ته اطلاع مليو هو ته پابندي پيل تنظيم سان تعلق رکندڙ اشتهاري جوابدار دهشتگرد شاهد جبار، عبدالرحمان ۽ انهن جا ٻيا ساٿي هڪ موٽر سائيڪل ۽ ڪار سوار فيملي جي ڪور ۾ ساهيوال ڏانهن وڃي رهيا آهن جنهن تي اڳواٽ ناڪابندي ڪئي وئي ۽ موٽر سائيڪل سوارن وٽ هڪ وڏو بيگ هيو ۽ ان جي پويان اڇي رنگ جي الٽو ڪار هئي جڏهن کين روڪڻ جي ڪوشش ڪئي وئي ته موٽر سائيڪل سوارن فائرنگ شروع ڪئي ۽ سي ٽي ڊي ۽ حساس ادارن جي آفيشلز آپريشنل ٽيڪنڪس جي ڪري محفوظ رهيا ۽ دهشتگردن کي گرفتار ڪرڻ لاءِ دفاعي حڪمت عملي اختيار ڪئي ۽ ان دوران ڪار مان به هڪ ماڻهو فائرنگ شروع ڪئي موٽر سائيڪل سوارن جي فائرنگ سبب ڪار ۾ ويٺل ان جا پنهنجا ساٿي به نشاني ۾ اچي ويا جڏهن ڪار ۾ چيڪ ڪيو ويو ته ٻه ماڻهو هڪ عورت هڪ ٻارڙي دهشتگردن جي فائرنگ ۾ مارجي چڪا هئا جڏهن ته هڪ ٻارڙو ۽ ٻارڙي زخمي هئا جن کي سرڪاري اسپتال پهچايو ويو ڪار سوارن جو سامان چيڪ ڪيو ويو ته ان ۾ ٻه آپگهاتي جيڪٽس، 8 هينڊ گرنيڊ، ٻه پستول، ۽ سوين گوليون هٿ ڪري تحويل ۾ ورتيون ويون ايف آءِ آر جي متن ۾ چيو ويو آهي ته اسان جي سرڪاري گاڏي تي دهشتگردن جا فائر پڻ لڳا.

 

عمران خان وزيرن کان فوري طور استعيفيٰ وٺي، ساهيوال واقعو سڀني سامهون آهي ڪميٽي ٺاهڻ جو ڪو جواز ناهي: خورشيد شاهه

سکر ( ويب ڊيسڪ ) پ پ جي سينئر اڳواڻ خورشيد شاهه چيو آهي ته ساهيوال واقعو افسوس جوڳو آهي، سموريون شيون سامهون آهن جنهن تي ڪميٽي ٺاهڻ جو ڪو به جواز ناهي. سکر ۾ ميڊيا سان ڳالهائيندي خورشيد شاهه چيو ته وفاقي ۽ صوبائي حڪومت ساهيوال واقعي تي افسوس جوڳا بيان ڏنا، وزيراعظم عمران خان وزيرن کان فوري طور استعيفيٰ وٺي. هن چيو ته ڇا ٻار به دهشتگرد ٿي سگهن ٿا.  سندس چوڻ هو ته فوجي عدالتون پهريون وقت جي ضرورت هيون هاڻي ملڪ ۾ مضبوط عدالتي نظام موجود آهي، موجوده حالتن ۾ فوجي عدالتون قائم ڪرڻ جي ضرورت ناهي. پ پ اڳواڻ خورشيد شاهه چيو ته ماضي ۾ دهشتگردي سبب پ پ فوجي عدالتن قائم ڪرڻ جي حمايت ڪئي، ملڪ ۾ امن امان به قائم ٿي ويو آهي، حڪومت به طاقتور آهي جڏهن ته عدالتن مان وڏا وڏا فيصلا ٿي رهيا آهن.

 

پاڪستان ڏکيائين باوجود علائقائي سلامتي لاءِ ڪم ڪيو، افغانستان ۾ امن علائقائي امن لاءِ اهم آهي: آرمي چيف

اسلام آباد ( ويب ڊيسڪ ) پرڏيهي وزير شاهه محمود قريشي سان آمريڪي سينيٽر لنڊسي گراهم پرڏيهي وزارت ۾ ملاقات ڪئي. ملاقات دوران ٻطرفن لاڳاپن، افغانستان جي صورتحال سميت علائقائي ۽ عالمي معاملن تي ڳالهيون ڪيون ويون.  پرڏيهي وزير شاهه محمود قريشي سان آمريڪي سينيٽر لنڊسي گراهم ملاقات ڪئي. ملاقات دوران ٻطرفن لاڳاپن، افغانستان جي صورتحال سميت علائقائي توڙي عالمي معاملن تي ڳالهيون ڪيون ويون. ملاقات دوران اقتصادي ۽ واپاري شعبن ۾ سهڪار وڌائڻ سميت مختلف رخن جو جائزو ورتو ويو. آمريڪي سينيٽر لنڊسي گراهم جي وزيراعظم سان به ملاقات جو امڪان آهي.

 

 

اڄ خبر پئي ته هي ادارا ڪهڙو ڪم ڪندا آهن، چيف جسٽس کي ساهيوال سانحي جو نوٽيس وٺڻ گهرجي: سراج الحق

لاهور ( ويب ڊيسڪ ) جماعت اسلامي جي امير سراج الحق چيو آهي ته سمورو ملڪ ساهيوال واقعي تي ڏکويل آهي، اڄ خبر پئي ته هي ادارا ڪهڙو ڪم ڪندا آهن، قوم بي گناهه شهرين جي قتل تي پريشان آهي. لاهور ۾ ميڊيا سان ڳالهائيندي چيو ته  ڪجهه ڪلاڪن دوران حڪومت 6، 7 بيان تبديل ڪيا، حڪومت جو موقف آهي ته شهيد ماڻهن جو تعلق دهشتگردن سان هو،  چيف جسٽس کي درخواست آهي ته معاملي جي پاڻ جاچ ڪرائي وڃي، واقعي کي بنياد بڻائي شهرين جي حفاظت يقيني بڻائي وڃي.  هن چيو ته حڪومت کي ساهيوال واقعي جو جواب ڏيڻو  پوندو هي ڪو سياسي نه پر انساني مسئلو آهي، اسان حڪومتي قدمن جي مذمت ڪيون ٿا. سراج الحق چيو ته سي ٽي ڊي کي ڪنهن قتل جو لائسنس ڏنو آهي، جيڪڏهن اهو ئي ڪم ڪرڻو آهي ته عدالت کي تالا هنيا وڃن.

 

 

ايف سي آر ختم ٿي ويو پر متبادل قانون نه ڏنو ويو. 18هين ترميم سان هٿ چراند ٿي ته روڊ تي هونداسين: اسفند يارولي

پشاور ( ويب ڊيسڪ ) عوامي نيشنل پارٽي جي سربراهه اسفند يار ولي چيو آهي ته ارڙهين ترميم ڪنهن به صورت ۾ ختم ٿيڻ نه ڏينداسين. پشاور ۾ تقريب کي خطاب ڪندي اسفند يار ولي چيو ته ايف سي آر ختم ٿي ويو پر متبادل قانون نه ڏنو ويو آهي، فاٽا ۾ قانون نه هئڻ سبب ماڻهو جيلن ۾ آهن. هن چيو ته چيو ويندو هو ته منهنجون ملائيشيا ۽ دبئي ۾ ملڪيتون آهن پر هاڻي سلائي مشينن سان دبئي ۾ ٺاهيل ملڪيت نڪري آئي آهي.سندس چوڻ هو ته حسن نواز چوندو هو ته ڏاڏي پئسا ڏنا، هو مني ٽريل به ڏئي رهيو هو، هاڻي عليما خان کان مني ٽريل ڇو نه ٿي ورتي وڃي. اسفند يار ولي چيو ته ڪپتان کي احتساب جو گهڻو شوق آهي، وزيراعظم چوندو هو ته پارليامينٽ ۾ سوالن جا جواب ڏيندو، عمران خان جڏهن کان وزيراعظم بڻيو ڪيترا ڪلاڪ ايون ۾ ويٺو آهي.  هن چيو ته صدارتي نظام جا اڄ به آواز اچي رهيا آهن، نئين پاڪستان کان اڳ پٽاٽي جو ڪهڙو اگهه هو، اڄ ڇا آهي، پٽاٽي جا اگهه ڏسو تبديلي نظر اچي ويندي.