تازيون خبرون
ڪڻڪ افغانستان اسمگل ڪري هٿ سان بحران پيدا ڪيو ويو: وڏو وزير - ٽرانسپيرنسي انٽرنيشنل کي پنهنجي ساک جو جائزو وٺڻ گهرجي: فردوس عاشق اعواڻ - جاچ ادري جي ٽيم کي سنڌ اسيمبلي ۾ ڇو داخل ٿيڻ ڏنو ويو؟: اسپيڪر جو نوٽيس - نظام الائي ڪيئن پيا هلائين، خيبرپختونخوا حڪومت جو ڪهڙو علاج ڪريان؟: چيف جسٽس - حڪومت سيڙپڪاري جي سهولت لاءِ سڌارن جي ايجنڊا تي عمل ڪري رهي آهي: وزيراعظم - حڪومت سڪندر سلطان راجا کي اليڪشن ڪميشن جو سربراهه مقرر ڪري ڇڏيو، 2 ميمبرن جي مقرري جو نوٽيفڪيشن به جاري - آءِ جي سنڌ جي تڪرار ۾ اهم اڳڀرائي، وفاق آءِ جي سنڌ جي بدلي وفاقي ڪابينا جي منظوري سان مشروط ڪري ڇڏي - آرمي چيف اليڪٽرانڪ وارفيئر اينڊ گرائونڊ سرويلينس ريڊار ليبارٽريز جو افتتاح ڪري ڇڏيو - ڪراچي پوش علائقي مان ٽن گڏهن جون منڍيپن ۽ اوجهه هٿ، گوشت ڪيڏانهن ويو پوليس پريشان - آئي جي سنڌ حڪومت سان تعاون نٿو ڪري، اڳ ڪڏهن وفاقي ڪابينا ڪنهن آئي جي جي مقرري جي منظوري ناهي ڏني: سعيد غني

Daily Archives: January 18, 2019

وفاقي ڪابينا بلاول ڀٽو ۽ مراد شاهه جا نالو اي سي ايل مان ڪڍڻ جي منظوري ڏئي ڇڏي

اسلام آباد(ويب ڊيسڪ) حڪومت پيپلز پارٽي جي چيئرمين بلاول ڀٽو زرداري ۽ سنڌ جي وڏي وزير سيد مراد علي شاهه جو نالو اي سي ايل مان ڪڍڻ جي منوظري ڏئي ڇڏي. وزير اعظم عمران خان جي صدارت هيٺ وفاقي ڪابينا جو اجلاس ٿيو جنهن ۾ بلاول ڀٽو زرداري ۽ مراد علي شاهه جا نالا اي سي ايل مان ڪڍڻ تي غور ڪيو ويو. وفاقي ڪابينا ٻنهي ڄڻن جا نالا اي سي ايل مان ڪڍڻ جي منظوري ڏئي ڇڏي. ڪوڙي اڪائونٽس ڪيس ۽ مني لانڊرنگ ڪيس ۾ جي آءِ ٽي پنهجي جاچ بعد آصف علي زرداري سميت 172 ڄڻن جا نالا اي سي ايل ۾ وجهڻ جي سفارش ڪئي هئي. وفاقي ڪابينا جي آءِ ٽي جي سفارشن جي روشني ۾ سمورا نالا اي سي ايل ۾ شامل ڪرڻ جي منظوري ڏني هئي. 7 جنوري تي ان ڪيس جي ٻڌڻي دوران چيف جسٽس پاڪستان بلاول ڀٽو زرداري ۽ مراد علي شاهه جا نالا اي سي ايل ۾ وجهڻ تي ڪاوڙ جو اظهار ڪيو.ٻئي طرف  پ پ چيئرمين بلاول ڀٽو زرداري چيو آهي ته ايوان ۾ 2 ڀاڱي 3 اڪثريت سان فيصلا ٿيندا آهن ۽ هڪ ٻه اڻ چونڊيل ماڻهو قلم جي چهنب سان ختم ڪري ڇڏين ٿا تنهن ڪري جمهوريت ۾ هو نه ٿو ٿي سگهي. قومي اسيمبلي جي اجلاس ۾ ڳالهائيندي بلاول ڀٽو زرداري چيو ته چيف جسٽس جي آءِ ٽي کان پڇا ڪئي ته ڪنهن جي چوڻ تي بلاول ڀٽو زرداري ۽ مراد علي شاهه جو نالو اي سي ايل ۾ وڌو پر ان سوال جو جواب ئي نه ٿو ملي، جڏهن ته وزيراعظم ايوان جي اجلاس ۽ اي سي ايل بابت بيان ڏنو سٺو ٿي ها ته وزيراعظم ٽوئٽ بدران اسيمبلي ۾ بيان ڏي ها، وزيراعظم سامهون ڳالهائي ته جيئن کيس سامهون جواب ڏيو پر کيس همت ئي ناهي. هن چيو ته  سنڌ سرڪار اين آءِ سي وي ڊي جهڙيون عالمي معيار جون اسپتالون قائم ڪيون جنهن ۾ مفت علاج ڪيو ويندو آهي، هي دنيا ۾ مفت علاج جي سهولت ڏيندڙ وڏو ادارو آهي،  جيڪڏهن واقعي سپريم ڪورٽ هي ادارو سنڌ کان کسي ٿي ته منهنجي لاءِ سنڌ جي عوام کي سمجهائڻ ڏکيو هوندو، مان سمجهندس ته ارڙهين ترميم تي حملو آهي. هن چيو ته  وزيراعظم ملڪ هلائڻ لاءِ سڄي دنيا مان چندو  گهري رهيا آهن، 14 بلين جي اين آءِ سي وي ڊي هلائڻ لاءِ ڪٿان پسئو آڻيندا،  جيڪڏهن اهو فيصلو ٿئي ٿو ته ڪهڙي گارنٽي آهي ته هي پئسو ڏيندا ۽ اسپتال ۾ مفت علاج جاري رهندو ڇو ته ايئن ممڪن ناهي. سندس چوڻ هو ته اپوزيشن اتفاق ڪيو آهي ته عوام جي معاشي، انساني ۽ جمهوري حق تي سوديبازي ڪرڻ لاءِ تيار نه آهن، هڪ  ڏينهن ايندو پي ٽي آءِ به مسئلن تي اسان جو ساٿ ڏيندي. بلاول ڀٽو زرداري چيو ته اهو ملڪ جي مفاد ۾ آهي، اسان پنهنجي معاشي حقن تي سوديبازي نه ڪنداسين، جدوجهد کانپوءِ صوبن کي حق مليا آهن، ڪو به اهي کسي نه ٿو سگهي ۽ نه وري ڇنڻ ڏينداسين.

 

ايترو ڀت سان نه لڳايو جو عوام منهنجي هٿ ۾ نه رهي: آصف زرداري

بدين (اين اين آءِ) اڳوڻي صدر ۽ پ پ جي ڪوچيئرمين آصف علي زرداري چيو آهي ته عمران خان جي حڪومت پنج سال پورا نه ڪندي پنجاب سميت سمورن صوبن جو عوام حڪومت ۽ ٿيل اليڪشن کي نٿو مڃي عوام کي ايترو ديوار سان نه لڳايو وڃي جو عوام سياستدانن جي هٿن مان به نڪري وڃي اهڙو اظهار گذريل ڏينهن هن راهوڪي ۾ شهيد فاضل راهو جي 32 ورسي جي موقعي تي وڏي عام جلسي کي خطاب ڪندي ڪيو هن چيو ته مهنگائي ۽ حڪومتي غلط پاليسن سبب غريب ماڻهو حڪومت کي بد دعائون ڏيئي رهيا آهن اسان سان جنگ صرف 18ترميم سبب ڪئي پئي وڃي ان ترميم جي ذريعي اسان صوبن کي سندن حق ڏنا جيڪي حق انهن کي هضم نٿا ٿين هن چيو ته نااهلن کي خبر ناهي ته ڊالر ڇو چڙهي رهيو آهي هو چون ٿا ته ڊالر چڙهن جي خبر کين ٽي وي تان ملي آهي اسان پنهنجي دور ۾ ڊالر کي مستحڪم رکڻ لاءِ اڳواٽ پاليسيون جوڙيندا هئاسين اسان حڪومت به هلائي ۽ ملڪ به سنڀاليو هنن کان نه حڪومت هلي ٿي ۽ نه ملڪ سنڀالي سگھيا آهن اسان بلوچستان جي عوام سان زيادتين تي معافي ورتي ۽ حقوق بلوچستان تحت بلوچ عوام جي حقن لاءِ پيش قدمي ڪئي هن وقت سازشون شروع ڪيون ويون آهن اسان انهن کان ڊڄڻ وارا ناهيون اهي سازشون عوام جي خلاف آهن اهي عوام کي حق ڏيڻ نٿا چاهين ۽ اسان انهن کان عوام جا حق وٺي رهنداسين سفيد پوش ماڻهو حڪمرانن جي نااهلي جي ڪري پريشان ۽ مجبور آهن ڪارخانه بند ٿي رهيا آهن آبادگارن ۽ هارين وٽ فصل پوکڻ لاءِ پاڻي به ناهي ۽ حادثاتي طور وزير اعظم ٿيندڙ کي عوام جي ڏکن سورن جي ڪابه خبر ناهي اهي اقتدار ۾ آيا آهن ته انهن کي حڪومت هلائڻ جو فن به سکڻ گھرجي سندن پاليسن جي ڪري سڄي ملڪ جو عوام پريشان آهي حڪمرانن جا اسڪينڊل اچڻ شروع ٿي ويا آهن سوچيان ٿو ته اهي انهن اسڪينڊلن مان ڪئين ٻاهر نڪرندا هن چيو ته شهيد فاضل راهو ، شهيد ڀٽو ، شهيد بينظير ڀٽو جي سوچ هڪ هئي اهي عوام کي حق ڏيارڻ جي لاءِ جدوجهد ڪري رهيا هئا انهن کي جن شهيد ڪرايو اهي اڄ به عوام جي حقن جي رستي ۾ رڪاوٽ بڻيل آهن هن موقعي تي وزير اعليٰ سنڌ سيد مراد علي شاهه خطاب ڪندي چيو ته وفاقي حڪومت منهنجو نالو اي ٽي سي ۾ ڀلي وجھي اسان کي نه ڪيڏانهن وڃڻو آهي ۽ نه ئي ڪنهن جو ڊپ آهي هن چيو ته اڄ شهيد فاضل راهو جي ورسي جي موقعي تي مان وزير اعظم پاڪستان کان مطالبو ٿو ڪريان ته هو فوري طور تي سي سي آئي جو اجلاس گھرائي ۽ صوبن کي انهن جو حق ڏي هن چيو ته سنڌ کي سندس حصي جي رقم مان ڪٽوتي ڪري ڏنل رقم مان 90 ارب روپيا وفاق ڏانهن رهيل آهن جيڪي جاري نه ٿيڻ جي ڪري سنڌ معاشي مسئلا پيدا ٿيا آهن هن چيو ته بدين ۾ پاڻي جي بدترين کوٽ آهي ان لاءِ بدين جي واهن کي پڪو ڪيو ويندو جن ماڻهن پي پي پي سان غداري ڪري وفاقي ڪابينا ۾ پهتا آهن انهن کي وزيراعظم کان بدين لاءِ پاڻي گھرڻ گھرجي هن موقعي تي هن بدين ۾ زرعي يونيورسٽي ڪيمپس قائم ڪرڻ جو اعلان ڪيو صوبائي وزير زراعت محمد اسماعيل راهو شهيد فاضل راهو جي شهادت کي 32 سال گذري ويا آهن موسمون ۽ حالتون تبديل ٿيون آهن پر عوام جي دلين مان شهيد فاضل راهو جي محبت ۽ راهوڪي سان رشتو برقرار آهي هن چيو ته وفاقي حڪومت ۾ نااهلن ۽ بيوقوفن جو لشڪر ويٺل آهي اهي چون ٿا آصف زرداري ۽ نواز شريف جي سياست ختم ٿي ويئي انهن کي خبر هجڻ گھرجي ته هو جن جا بوٽ چٽي اقتدار ۾ آيا آهن اهي به عوامي سياست کي ختم نه ڪري سگھيا ملڪ جي عوام جمهوريت لاءِ وڏيون قربانيون ڏنيون آهن ملڪ ۾ جمهوريت جي نالي تي آمريت مسلت ڪئي ويئي ته ان جو مقابلو ڪيو ويندو هن موقعي تي ايم اين اي غلام علي ٽالپر ايم پي اي تاج محمد ملاح بشير احمد هاليپوٽو مير الله بخش ٽالپر سهيل انور سيال اسلم راهو غلام قادر پليجو سينيٽر ڪرشنا ڪولهي ۽ ٻيا اڳواڻ موجود هئا جلسي کان اڳ ۾ آصف علي زرداري سيد مراد علي شاهه ۽ ٻين اڳواڻن شهيد فاضل راهو جي مزار تي گلن جي چادر چاڙهي فاتح خواني ڪئي . ان کان اڳ ورسي کي صوبائي وزير ۽ شهيد فاضل راهو جو پٽ اسماعيل راهو، ايم اين اي مير غلام علي ٽالپر، يادگار ڪميٽي جو چيئرمين محمد اسلم راهو، حاجي رمضان چانڊيو، عادل راهو خطاب ڪندي شهيد فاضل راهو جي جدوجهد ۽ قربانين کي خراج عقيدت پيش ڪيو، ان موقعي تي مقررن بدين ۾ پاڻي جي سخت کوٽ سبب زرعي معيشت جي تباهي تي ڳالهائيندي فوري طور تي پاڻي جي کوٽ ختم ڪرڻ جو مطالبو ڪيو.

 

اسان کانسواءِ ڪنهن کي به پاڪستان ۾ دلچسپي ناهي: فواد چوڌري

اسلام آباد(ويب ڊيسڪ) سڌُ سماءَ واري وفاقي وزير فواد چوڌري وزير اعظم جي ٽوئيٽ تي مخالف ڪندڙن کي جواب ڏيندي چيو آهي ته وزير اعظم ته رڳو نشاندهي ڪئي آهي ته ڪيترن ئي ماڻهن جا دل ٻاهر ڇو ڌڙڪندا آهن؟ ڪنهن کي پاڪستان ۾ دلچسپي ناهي. تفصيل موجب وفاقي وزير فواد چوڌري ميڊيا سان ڳالهائيندي وزير اعظم جي ٽوئيٽ تي تنقيد ڪندڙن کي جواب ڏيندي چيو ته جنهن جي هتي انٽرسٽ آهي اُهو هن ملڪ مان اوڏانهن ئي ڀڄڻ چاهي ٿو، وزير اعظم ته رڳو نشاندهي ڪئي آهي ته ڪيترن ماڻهن جي دل ٻاهر ڇو ڌڙڪي ٿي؟ جن جو واپار ٻاهر آهي اُتي اوڏانهن ئي وڃڻ چاهن ٿا، ڪنهن جي به پاڪستان ۾ دلچسپي ناهي. فواد چوڌري جو چوڻ هو ته اسان جهڙن ماڻهن جن جو پاڪستان کان ٻاهر ٽڪي جو به واپار ناهي اسان جي دلچسپي پاڪستان ۾ آهي، جتي اسان کي سڄي عمر رهڻو آهي جتي اسان جون قبرون ٺهڻيون آهن، اسان ان جاءِ کي سنوارينداسين.

 

 

نيٽو اجلاس ۾ ڪنهن به ملڪ پاڪستان جي ڪردار تي تنقيد ناهي ڪئي: جنرل زبير محمود

ڪراچي(ويب ڊيسڪ) چيئرمين جوائنٽ چيفس آف اسٽاف ڪميٽي جنرل زبير محمود حيات چيو آهي ته نيٽو اجلاس ۾ ڪنهن هڪ ملڪ به پاڪستان جي ڪردار تي تنقيد ناهي ڪئي. نيٽو اجلاس ۾ شرڪت بعد برسلز کان ڪراچي پهچڻ تي جنرل زبير محمود حيات چيو ته اجلاس ۾ افغانستان جي صورتحال تي ڳالهيون ٿيون جنهن ۾ شريڪ 29 ملڪن پاڪستاني ڪوششن کي ساراهيو آهي ۽ ڪنهن هڪ ملڪ پاڪستان جي ڪردار تي تنقيد ناهي ڪئي، اميد آهي ته افغانستان ۾ جنگ جو خاتمو ٿيندو ۽ افغان جنگ جي خاتمي سان پاڪستان کي خاص فائدو ٿيندو. جوائنٽ چيفس آف اسٽاف ڪميٽي چيو آهي ته پاڪستان ۾ 2014ع کان 2019ع تائين تشدد گهٽ ٿيو آهي ۽ تشدد جي درجي ۾ 92 سيڪڙو گهٽتائي ٿي آهي، پاڪستان خوبصورت ملڪ ۽ معدني وسيلن سان مالا مال آهي، هاڻ حالتون تبديل ٿي رهيون آهن ۽ پاڪستان ايندڙ ورهين ۾ وڌيڪ بهتر ٿيندو، معاملا پر امن طريقي سان حل ٿيندا، تعليم ملڪ جي ترقي ۾ ڪليدي ڪردار ادا ڪندي. اولهه ۾ چيف ايگزيڪٽو تعليمي ادارا قائم ڪيا آهن، تعليم ۽ ٽيڪنالاجي کان سواءِ پاڪستان بنا دل وارو هوندو، مصنوعي ذهانت مستقبل آهي ۽ ان ۾ پاڪستان به اڳتي وڌي رهيو آهي. جنرل زبير چيو ته ڊيٽا جي اهميت هاڻ ٻارڻ سان به وڌندي پئي وڃي، ڊيٽا ئي مستقبل آهي ۽ اسان کي ڊيٽا کي محفوظ ڪرڻ جي لاءِ ڪلائوڊ ڪميوٽنگ جي ضرورت آهي. پاڪستان ۾ ڊيٽا جي لاءِ وڏو انفرااسٽريچڪر بڻايو ويو آهي پر ڊيٽا جي حوالي سان وڌيڪ گهڻو ڪم ڪرڻ جي ضرورت آهي.

 

پارليامينٽ ميمبر پرڏيهه وڃڻ لاءِ بي چين ۽ ڪجهه قانوندان اي سي ايل کان ڊنل ڇو آهن؟ : عمران خان

اسلام آباد (اين اين آءِ) وزيراعظم عمران خان چيو آهي ته اسيمبلي ميمبر اي سي ايل کان ايترا ڊنل ڇو آهن ۽ اهي ٻاهر وڃڻ جا خواهشمند ڇو آهن وزيراعظم عمران خان پنهنجي ٽيوٽر بيان ۾ چيو ته پاڪستان ۾ سياستدانن جي ڪرڻ لاءِ گهڻا ڪم آهن جنهن سان اهي محبت جي دعويٰ ڪن ٿا پر هي ماڻهو ٻاهرين ملڪ دورن تي وڃڻ لاءِ تيار ويٺا هوندا آهن وزيراعظم چيو ته ڪافي ميمبر ٻاهرين ملڪن جا اڪامه ۽ رهائش رکن ٿا وزيراعظم سوال ڪيو ته ڇا ڪوئي ان عجيب مفروضي جي وضاحت کيس ڏيئي سگهي ٿو جيڪي حقيقي طور تي پاڪستان سان پيار ڪن ٿا ۽ پاڪستان ۾ رهڻ ۽ هتي ئي ڪم ڪرڻ پسند ڪن ٿا.

 

جوڊيشري ۾ ڪرپشن انصاف جو قتل آهي ، جج جي زندگي ۾ خوف جي ڪابه گنجائش نه هوندي آهي: چيف جسٽس ميان ثاقب نثار

اسلام آباد (اين اين آءِ) چيف جسٽس جو عهدو ڇڏيندڙ جسٽس ميان ثاقب نثار چيو آهي ته هن آئين ۾ ڏنل حق زندگي، تعليم ۽ صحت جا مسئلا حل ڪرڻ جي ڪوشش ڪئي ۽ ججن جي ضابطئه اخلاق اندر رهندي ڪم ڪيو ججن جو ڪم نهايت مشڪل آهي عدليه ۾ ڪرپشن انصاف جو قتل آهي ملڪ لاءِ ڪم ڪيو آهي جيڪا اعزاز جي ڳالهه آهي خميس تي چيف جسٽس ميان ثاقب نثار جي نوڪري جو مدو پورو ٿيڻ تي سپريم ڪورٽ ۾ سندس اعزاز ۾ فل ڪورٽ ريفرنس جو اهتمام ڪيو ويو جنهن ۾ سپريم ڪورٽ جي 17 مان 16 ججن شرڪت ڪئي فل ڪورٽ ريفرنس کي چيف جسٽس جي عهدي تي ويهندڙ جسٽس آصف سعيد کوسه ۽ عهدو ڇڏيندڙ چيف جسٽس ثاقب نثار به خطاب ڪيو. ميان ثاقب نثار چيف جسٽس طور فل ڪورٽ ريفرنس کي پنهنجي آخري خطاب ۾ سپريم ڪورٽ جي اهم فيصلن تي روشني وڌي هن چيو ته هن عدالت ڪيترائي فيصلا ڏنا سڀ کان پهريان گلگت بلتستان جو فيصلو آهي ٻيو مسئلو عدالت آبادي ۾ واڌ جو اٿاريو ملڪ کان باهر رهندڙ پاڪستانين کي ووٽ جو حق ڏنو چيف جسٽس ميان ثابق نثار چيو ته عدالت ملڪ ۾ پاڻي جي کوٽ جو نوٽيس ورتو ۽ سڄي قوم پاڻي لاءِ چندو ڏنو پٺتي پيل ماڻهن جي حقن لاءِ ڪم ڪيو ۽ هر شخص کي عزت سان زندگي گذارڻ جو حق ڏنو خانگي اسپتالن جي فين تي نوٽيس ورتو کدڙن فقيرن کي سڃاڻپ ڪارڊ جاري ڪرڻ جي معاملي جو نوٽيس ورتو عدالت طيبه سميت گهرن ۾ ڪم ڪندڙ ٻارڙن جو به نوٽيس ورتو. ميان ثاقب نثار چيو ته ججن جو ڪم نهايت مشڪل آهي عدليه ۾ ڪرپشن انصاف جو قتل آهي منهنجي لاءِ اعزاز جي ڳالهه آهي ته مان ملڪ لاءِ ڪم ڪيو واضح رهي ته جسٽس ميان ثاقب نثار 31 ڊسمبر 2016 تي چيف جسٽس پاڪستان جي عهدي تي ويٺو سندس دور ۾ سپريم ڪورٽ نهايت اهم نوعيت جا فيصلا ڏنا جن جا ملڪ جي سياست تي خاص اثر پيا.

 

وزير اعظم سنڌ اچي چوي ٿو سازشون ڪرڻ اچي رهيا آهيون، ڪابه طاقت سرڪاري دوري تي ٻاهر وڃڻ کان روڪي نه ٿي سگهي: وڏو وزير

ڪراچي( ويب ڊيسڪ ) سنڌ جي وڏي وزير مراد علي شاهه چيو آهي ته مون کي جيڪڏهن سرڪاري دوري تي ٻاهر وڃڻو پئجي ويو ته ڪابه طاقت روڪي نه ٿي سگهي. سيوهڻ ۾ ميڊيا سان ڳالهائيندي سنڌ جي وڏي وزير مراد علي شاهه چيو ته فواد چوڌريءَ وٽ ڪرڻ لاءِ به ڪابه شيءَ ناهي،  هو خبرن ۾ اچڻ لاءِ خبرون ٺاهيندو آهي، ڪڪڙيون ۽ آڻا پراڻيون شيون بڻجي چڪيون آهن، جڏهن ته وزيراعظم عمران خان پاڪستان جو وزيراعظم آهي جڏهن چاهي سنڌ اچي سگهي ٿو. هن چيو ته  اسان جي سياست ۽ جمهوريت جي ليول هاڻي اها آهي ته وزيراعظم سنڌ اچي ٿو ته چوي ٿو ته سازشون ڪرڻ اچي رهيا آهيون. سندس چوڻ هو ته  اي سي ايل ۾ نالو وجهڻ سان ڪو به فرق نه ٿو پوي، مون کي جيڪڏهن سرڪاري دوري تي وڃڻو پيو ته ڪابه طاقت روڪي نه ٿي سگهي. وڏي وزير مراد علي شاهه چيو ته نيب ۽ سپريم ڪورٽ وفاقي وزيرن کي جي آءِ ٽي رپورٽ تي بيانن کان روڪيو آهي جڏهن ته پي ٽي آءِ حڪومت عوام جا مسئلا حل ڪرڻ بدران پ پ ۽ ٻين پارٽين خلاف انتقامي ڪارروايون ڪري رهي آهي.  هن چيو ته مخالف ڌر جون پارٽيون عوام جا مسئلا حل ڪرڻ لاءِ گڏ ٿيون آهن، مخالف ڌر جي پارٽين جي متحد ٿيڻ سان حڪومت تي عوام جا مسئلا حل ڪرڻ لاءِ دٻاءُ وڌندو، جيڪو طريقو هنن اختيار ڪيو آهي تنهن سان عوام جي معاشي صورتحال بهتر نه ٿيندي. سندس چوڻ هو ته چئن يا پنجن مهينن ۾ حڪومت تي ماڻهو ايتري تنقيد ڪري رهيا آهن جيڪا ڪڏهن پ پ ۽ ن ليگ تي نه ٿي آهي.

 

 

خورشيد شاهه جي مخالف ڌر اڳواڻ سان ملاقات، غليظ ٻولي خاموشي سان ٻڌي نٿا سگهون: شهباز شريف

اسلام آباد(ويب ڊيسڪ) مخالف ڌر اڳواڻ شهباز شريف جو چوڻ آهي ته اِهو نٿو ٿي سگهي ته اسان غليظ ٻولي خاموشي سان ٻڌندا رهون. قومي اسيمبلي ۾ مخالف ڌر اڳواڻ شهباز شريف ايوان ۾ پنهنجي خيالن جوا ظهار ڪندي مخالف ڌر جي واڪ آئوٽ جي وضاحت ڏيندي چيو ته ائين نٿو ٿي سگهي ته ڪير غليظ ٻولي استعمال ڪري ۽ اسان خاموشي سان ٻڌندا رهون، حڪومتي نمائندا پنهنجي جواب ۾ جيتري به تنقيد ڪن ٻڌنداسين پر جنهن صاحب کي جواب ڏيڻو هو هن غليظ ٻولي استعمال ڪئي. شهباز شريف چيو ته اسپيڪرص احب توهان جي حڪم جي عدولي نٿو ڪري سگهان، سٺي طريقي سان ڳالهائيندا ته ٻه وکون اڳتي وڌي ڀليڪار ڪنداسين. ٻئي پاسي شهباز شريف سان پيپلز پارٽي جي اڳواڻ خورشيد شاهه مخالف ڌر اڳواڻ جي چيمبر ۾ ملاقات ڪئي جنهن ۾ قومي اسيمبلي اجلاس جي حڪمت عملي ۽ سياسي صورتحال تي ڳالهيون ڪيون ويون.

 

 

منهنجا حوصلا بلند آهن، جلد عوام جي وچ ۾ هوندس: نواز شريف

لاهور (اين اين آءِ) شريف خاندان جي گهرڀاتين، مٽن مائٽن، دوستن، پارٽي اڳواڻن ۽ ڪارڪنن ڪوٽ لکپت جيل ۾ نواز شريف سان ملاقات ڪئي سندس گهرڀاتي نواز شريف جي پسند جو کاڌو آندو، حمزه شهباز، مريم نواز سميت پارٽي جي مرڪزي اڳواڻن نواز شريف سان ملاقات ۾ جملي سياسي صورتحال، قانوني معاملن ۽ پارٽي معاملن تي خيالن جي ڏي وٺ ڪئي ۽ رهنمائي حاصل ڪئي، تفصيل موجب اڳوڻي وزيراعظم نواز شريف سان ڪوٽ لکپت جيل ۾ سندس امڙ بيگم شميم اختر، نياڻي مريم نواز، ناٺي محمد صفدر ڀائٽي حمزه شهباز، يوسف عباس شريف، عزيز عباس سميت ويجهن مائٽن، دوستن، آزاد ڪشمير جي وزيراعظم راجا فاروق حيدر، سنڌ جي اڳوڻي گورنر محمد زبير، اقبال ظفر جهڳڙا، پرويز ملڪ، سليم ضيا، انجم عقيل، طارق فضل چوڌري ميان مربوب، خواجه عمران نظير سميت قومي ۽ صوبائي اسيمبلي جي ميمبرن ۽ ڪارڪنن ملاقات ڪئي ۽ ان کان صحت بابت پڇاڻو ڪيو، نواز شريف جي امڙ پنهنجي پٽ جي ڊگهي ڄمار ۽ تڪليفون گهٽجڻ لاءِ دعائون ڪندي رهي، گهر ڀاتين نواز شريف جي پسند جو کاڌو آندو جيڪو سڀني ويهي کاڌو، نواز شريف پارٽي اڳواڻن سان ملاقات ۾ ملڪ جي موجوده سياسي صورتحال تي ڳالهه ٻولهه ڪئي، جڏهن ته اڳواڻن پارٽي قائد کان ڪجهه معاملن تي رهنمائي ورتي، نواز شريف مهانگائي، خاص طور تي معيشت جي صورتحال تي ڳڻتي ظاهر ڪئي ۽ ان حوالي سان اڳواڻن سان ملاقات ڪئي، مريم نواز ۽ حمزه شهباز سان ملاقات ۾ به سياسي، پارٽي ۽ ڪيسن جي حوالي سان ڳالهه ٻولهه ڪئي وئي، ان کانسواءِ مردن ۽ عورتن، ڪارڪنن جي وڏي انگ نواز شريف سان ٻڌي جي اظهار لاءِ صبح ڪوٽ لکپت جيل پهتو جيڪو نواز شريف جي گهرڀاتين جي وڃڻ تائين جيل ٻاهران موجود رهيو، مريم نواز ۽ حمزه جي اچڻ تي ڪارڪنن گلن جي ورکا ڪئي ۽ حمايت ۾ نعرا هنيا.

 

قومي حڪومت قائم ڪرڻ جي ضرورت ناهي نه حامي آهيون، وفاق غير آئيني قدم کنيو ته ڀرپور مزاحمت ڪئي ويندي: خورشيد شاهه

اسلام آباد ( ويب ڊيسڪ ) پ پ اڳواڻ خورشيد شاهه چيو آهي ته  سڌ سماءَ واري وزير کي سنڌ جي دوري مان ڪجهه نه مليو آهي،وفاق غير آئيني قدم کنيو ته ڀرپور مزاحمت ڪئي ويندي. اسلام آباد ۾ ميڊيا سان ڳالهائيندي خورشيد شاهه چيو ته قومي حڪومت قائم ڪرڻ جي ضرورت نه آهي ۽ نه وري حامي آهيون،  چاهيون ٿا ته حڪومت پنجن سالن جو مدو پورو ڪري پر ايئن نظر نه ٿو اچي. هن چيو ته هي حڪومت پنهنجي وزن سان پاڻ ئي ڪري پوندي، قانونساز پرڏيهه نه ٿا وڃن هتي قانونسازي لاءِ موجود آهن، ڇا عمران خان جو نالو اي سي ايل ۾ شامل آهي جو هو پارليامينٽ ۾ نه ٿو اچي، حڪومت ٻڌائي پنجن سالن ۾ ڪهڙي قانونسازي ڪئي وئي آهي. هن چيو ته عمران خان اڃا تائين ڪنٽينر تي بيٺل آهي، هيٺ لهي ته حقيقت جي خبر پوي،  هي حڪومت معيشت سميت هر شعبي ۾ ناڪام ٿي چڪي آهي، مخالف ڌر جو اتحاد گڏيل اعتماد سان قائم ڪري سگهي ٿو، اسان گڏ هلڻ جو پڪو پهه ڪيو آهي.  پ پ اڳواڻ مني بجيٽ جي ڪنهن به صورت ۾ حمايت نه ڪئي ويندي،  حڪومت پهرين پنجن مهينن ۾ ئي ملڪ کي 7 ارب ڊالر جو قرضي ڪري ڇڏيو آهي.