تازيون خبرون

Monthly Archives: January 2019

18 ڪميٽين جي سربراهي اپوزيشن حوالي، حڪومت ۽ مخالف ڌر ۾ اسٽيڊنگ ڪميٽين جي جوڙڻ تي اتفاق

اسلام آباد(ويب ڊيسڪ) حڪومت ۽ مخالف ڌر ۾ اسٽيڊنگ ڪميٽين جي جوڙڻ واري معاملي تي اتفاق راءِ ٿي ويو. ذريعن جو ٻڌائن آهي ته مخالف ڌر کي 18 ۽ حڪومت کي 20 اسٽيڊنگ ڪميٽين جي سربراهي ملندي. ذريعن موجب مخالف ڌر پارٽين پاڻ ۾ اسٽيڊنگ ڪميٽين جي سربراهي طئي ڪري ورتي آهي. ذريعن جو چوڻ آهي ته ن ليگ کي 9، پيپلز پارٽي کي 6، ايم ايم ا کي 2، اي اين پي کي 1 ڪميٽي جي سربراهي ملندي. اسٽيڊنگ ڪميٽين جي جوڙڻ وارو نوٽيفڪيشن سومر 28 جنوري تي جاري ڪيو ويندو. ٻئي پاسي مسلم ليگ ن ليگ جي پارليماني ڳالهين واري گروپ جي اجلاس ۾ اسٽيڊنگ ڪميٽين جي چيئرمين شپ لاءِ نالن کي حتمي شڪل ڏني وئي آهي. ذريعن موجب پبلڪ اڪائونٽس ڪميٽي سميت مسلم ليگ ن جي 9 اسٽيڊنگ ڪميٽين جي لاءِ 13 ميمبر ميدان تي اچي ويا. چيئرمين شپ جي اميدوار گهڻا هئڻ جي ڪري حتمي فيصلو شهباز شريف تي ڇڏيو ويو آهي. ذريعن جو چوڻ آهي ته مسلم ليگ کي مواصلات، سڌ سماءَ، ريلويز، سائنس اينڊ ٽيڪنالاجي، دفاعي پيداوار جي سربراهي ملندي. وفاقي تعليم ۽ تربيت، واپار ۽ ٽيڪسٽائيل، قومي خوراڪ تحفظ جون ڪميٽيون به ن ليگ کي ملنديون. ان کان سواءِ ڪشمير ۽ گلگت جي اسٽينڊنگ ڪميٽي جي سربرهي به ن ليگ کي ملندي.

 

 

پاڪستان کي ڪو به خطرو ناهي خطرو صرف سنڌ جي زردارن کي آهي: فواد چوڌري

اسلام آباد ( ويب ڊيسڪ /اين اين آءِ) سڌ سماءَ جي وفاقي وزير چوڌري فواد حسين چٽو ڪيو آهي ته جيڪڏهن مخالف ڌر ذميواري جو مظاهرو نه ڪيو ته اسان پاران به سهڪار جي اميد نه رکي وزيراعظم جي ايوان ۾ اچڻ تي مخالف ڌر جو رويو اهڙو هيو جيئن ڪنهن بازار ۾ اچي ويا. ايوان کي جماعت ۽ حڪومت جي حيثيت سان مڇي مارڪيٽ نه بڻجڻ ڏينداسين مراد علي شاهه پاڻ ٻڏي رهيو آهي پاڪستان ۽ سنڌ کي ڪو به خطرو ناهي مسئلو افغانستان جي حل ۾ پاڪستان اهم ڪردار ادا ڪري رهيو آهي پاڪستان ۾ نئين ويزا پاليسي متعارف ڪرائي وئي آهي 175 ملڪن کي اي ويزا جي سهولت ڏني آهي. پنجاهه ملڪن کي ايئرپورٽ لائونچ تي ئي ويزا ڏني ويندي. سياحن کي ڪنٽونمينٽ، آزاد ڪشمير ۽ گلگت بلتستان لاءِ اين او سي جي ضرورت نه پوندي جمعي تي پارليامينٽ هائوس ٻاهران صحافين سان ڳالهائيندي چوڌري فواد حسين چيو ته موجوده حڪومت ۾ 70 سالن کانپوءِ هڪ نئين دور جي شروعات ٿي رهي آهي هن چيو ته 1965 تائين پاڪستان هڪ بهترين ملڪ رهيو چوڌري فواد چيو ته پاڪستان سياحن لاءِ جنت آهي هن چيو ته پاڪستان ۾ سياحت جي شعبي ۾ چار طبقا آهن هن چيو ته بزنس ويزا جي سهولت 96 ملڪن تائين وڌائي وئي آهي هن چيو ته ڊپلوميٽڪ ڪارڊ جو مدو ٽن سالن تائين وڌايو ويو آهي. هن چيو ته اسٽوڊنٽس لاءِ ويزا مدو ٻن سالن تائين وڌايو آهي هن چيو ته صحافين جو ويزا سڌ سماءَ واري وزارت ڏسندي. سڌ سماءَ جي وزير چيو ته نئين سياحتي پاليسي سان پاڪستان ۾ بهتري ايندي هن چيو ته امپورٽ کي گهٽ ۽ ايڪسپورٽ کي وڌائڻ چاهيون ٿا. هن چيو ته نئين سياحتي بل تي فائديمند ڳالهه ٻولهه ٿيڻ گهرجي فواد حسين چيو ته وزيراعظم جڏهن ايوان ۾ اچي ٿو ته اپوزيشن جو رويو مختلف هوندو آهي. شاهد خاقان عباسي جڏهن وزارت ڇڏي ته 157 ارب رپين جو قرض ڇڏيو هن چيو ته وزيراعظم جي بهتر پاليسين سان پاڪستان کي دنيا جي نقشي تي مٿي آندو ويو آهي، هن چيو ته وزيراعظم پنهنجي پهرين خطاب ۾ چونڊن جي جاچ لاءِ ڪميٽي قائم ڪرڻ جو اعلان ڪيو فواد چوڌري چيو ته شهباز شريف کي پي اي سي جو چيئرمين بنائڻ تي ڪافي مخالفت کي منهن ڏيڻو پيو هن چيو ته پارليامينٽ کي هلائڻ رڳو حڪومت نه پر مخالف ڌر جي به ذميواري آهي هن چيو ته ماِڊل ٽائون ۾ خراب ڪردار ماڻهو اڄ ساهيوال واقعي تي ڳالهائي رهيا آهن هن چيو ته ماڊل ٽائون ۾ رٿابندي سان رتوڇاڻ ڪئي وئي. هن چيو ته وزيراعظم عمران خان صاف ڪردار جو مالڪ سياستدان آهي هن چيو ته صحافين کي لانگ ٽرم ۽ شارٽ ٽرم ويزا جاري ڪنداسين ڊگري پروگرام لاءِ ٻه سال ۽ ماسٽر پروگرام لاءِ چئن سالن جي ويزا ڏينداسين.  سندس چوڻ هو ته شهباز شريف ۽ سعد رفيق خلاف نيب انڪوائري مذاق بڻجي وئي آهي، سندن پروڊڪشن آرڊر جاري ٿين ٿا ۽ پروٽوڪول ڏنو ويندو آهي.  فواد چوڌري چيو ته ماڊل ٽائون ۾ منصوبا بندي تحت قتل عام ڪيو ويو،  ساهيوال واقعو ته غلطي سان ٿيو آهي. هن چيو ته سنڌ وارن جون دليون اڄ ڪلهه ڪمزور آهن مٿن وڌيڪ بار نه وڌو وڃي، وزيراعظم سنڌ جا دورا ڪندو، پاڪستان کي خطرو ناهي پر سنڌ جي زردارن کي خطرو آهي.

 

سڀ وهندڙ گنگا ۾ هٿ ڌوئڻ ۾ لڳي ويا آهن، ڪنهن کي به پرواهه ناهي: سنڌ هاءِ ڪورٽ

ڪراچي (اسٽاف رپورٽر) سنڌ هاءِ ڪورٽ ۾ ايم پي ايز هاسٽل جي اڏاوتي فنڊز ۾ گهوٻين واري معاملي جي ٻڌڻي ٿي، جنهن دوران درخواستگذار ۽ وڪيل جي عدم حاضري تي عدالت ڪاوڙ جو اظهار ڪيو. چيف جسٽس احمد علي شيخ ريمارڪس ڏيندي چيو ته سڀ وهندڙ گنگا ۾ هٿ ڌوئڻ ۾ لڳي ويا آهن، ڪنهن کي به پرواهه ناهي. عدالتي حڪمن باوجود سنڌ سرڪار ڪي ايم سي، ڪي ڊي اي ۽ ٻين شهري حڪومت جي ملازمن جا تفصيل پيش ڇو نه ڪيا آهن. چيف جسٽس ريمارڪس ڏيندي چيو ته درخواستگذار به پريشان آهي ۽ سنڌ حڪومت به پريشان آهي، اسان کي سڀ خبر آهي. عدالت سنڌ سرڪار کان مختلف کاتن ۾17 سالن کان ٿيندڙ ڀرتين جو رڪارڊ طلب ڪري ورتو. ٻڌڻيءَ دوران ڪراچي واٽر اينڊ سيوريج بورڊ طرفان 6 هزار 626 ملازمن جو رڪارڊ عدالت ۾ پيش ڪيو ويو، جڏهن ته عدالت درخواستگذار کي 22 فيبروريءَ تي پيش ٿيڻ جو حڪم ڏئي ڇڏيو. گذريل ٻڌڻيءَ دوران درخواستگذار جي وڪيل ايم پي اي هاسٽل جي فنڊز ۾ مبينا گهوٻين خلاف درخواست واپس وٺڻ جي استدعا ڪئي هئي. درخواست ۾ موقف اختيار ڪيو ويو هو ته سنڌ اسيمبلي جي نئين عمارت جي اڏاوت ۾ وڏي پئماني تي ڪرپشن ٿي آهي، پي سي ون موجب عمارت جو ڪاٿو 2 ارب 70 ڪروڙ لڳايو ويو، جنهن کي بعد ۾ وڌائي 11 ارب 40 ڪروڙ ڪيو ويو.

 

 

آمري لڳ مسافر وين ۽ ڊمپر ۾ ٽڪر، ٻارڙن ۽ عورتن سميت 6 ڄڻا فوت

ڄامشورو/ سيوهڻ (رپورٽر) آمري ڀرسان مسافر وين ۽ ڊمپر وچ ۾ ٽڪر جي نتيجي ۾ فوت ٿيلن جو انگ 6 ٿي ويو.
فوتين ۾ حيدرآباد واسي اعجاز سولنگي، سندس 6 ورهين جو پٽ رحيم، هڪ عورت بختاور، سندس معصوم ڌي 7 ورهين نينگري رشيده، جوهي واسي امين لغاري ۽ هڪ اڻڄاتل شخص شامل آهن. حادثي جي نتيجي ۾ 10 ڄڻا زخمي ٿي پيا.
فوتين جا لاش ۽ زخمين کي سيوهڻ اسپتال منتقل ڪيو ويو. زخمين ۾ سيوهڻ ڊگري ڪاليج جو ليڪچرار، ڊراما رائيٽر ۽ اديب سن واسي محمد ايوب عمراڻي به شامل آهي، جنهن جي حالت ڳڻتي جوڳي ٻڌائي پئي وڃي، حادثي جي زخمين ۾ عورتون ۽ ٻارڙا به شامل آهن.

 

پاڪ فوج ڪنهن به مهم جوئي جي خلاف مڪمل تيار آهي:آرمي چيف

راولپنڊي(ويب ڊيسڪ) پاڪ فوج جي سربراهه جنرل قمر جاويد باجوه جو چوڻ آهي ته پاڪ فوج مادر وطن جي بچاءَ لاءِ هر وقت تيار آهي. پاڪ فوج جي شعبي (آءِ ايس پي آر) موجب آرمي چيف جنرل قمر جاويد باجوه جهلم ڀرسان فوجي مشقن جي علائقي جو دورو ڪيو. آءِ ايس پي آر ٻڌايو ته آرمي چيف لائن آف ڪنٽرول ماحول جهڙي هڪ بريگيڊ جي مشق جو مشاهدو ڪيو جنهن ۾ ٽينڪ، اينٽي ٽينڪ ويپنز سميت مختلف ويپنز سسٽم سان فائرنگ مشق جو حصو هئي. آءِ ايس پي آر جو چوڻ آهي ته ملٽي پل آرٽلري گنز ۽ هوائي فوج جا جنگي جهاز به مشق جو حصو هئا.  ان موقعي تي آرمي چيف جوانن جي بلند جذبي کي ساراهيندي چيو ته پاڪ فوج خطي ۾ امن ۽ مضبوطي جي لاءِ ڪم ڪيو ۽ پاڪ فوج مادر وطن جي بچاءَ لاءِ هر وقت تيار آهي. هن چيو ته پاڪ فوج ڪنهن به مهم جوئي جي خلاف مڪمل تيار آهي. آءِ ايس پي آر موجب آرمي چيف جوانن کي ٽريننگ ۽ پيشيوراڻي مهارت تي ڌيان ڏيڻ تي زور ڏنو.

 

 

نيب آزاد ادارو آهي، حڪومت وڃي ته وڃي پنهنجن اصولن تي سمجهوتو نه ڪنداسين: شاهه محمود قريشي

پرڏيهي معاملن واري وفاقي وزير شاهه محمود قريشي چيو آهي ته نيب آزاد ادارو آهي جيڪو ڪنهن جي حڪم تي نٿو هلي ڀارت ۾ چونڊن سبب ڳالهن ۾ دير ٿي رهي آهي اسان کي تڪڙنه آهي ڳالهيون ضرور ٿينديون ڪرتار پور راهداري کولي اسان سکن جو پراڻو مطالبو حل ڪرڻ سميت محبت ۽ دوستي جو ثبوت ڏنو آهي دنيا جي ڪيترن ئي ملڪن لاءِاي ويزا سروس شروع ڪئي وئي آهي ڪنگال حڪومت ۽ مفلوج ادارا ورثي ۾ مليا پر ڪنهن جي اگيان هٿ نه ٽنگيو آهي اهڙو اظهار هن گڏريل ڏينهن عمرڪوٽ ۾ وفاقي پارليماني سيڪريٽري ايم اين اي لال مالهي جي رهائش گاهه تي هڪ عوامي ميڙ کي خطاب ڪندي ڪيو ، شاهه محمود قريشي چيو ته هو اڄ عمرڪوٽ ۾ پنهنجي ووٽرن جا ٿورا مڃڻ آيو آهي هتان جي عوام جي اسرار تي چونڊ وڙهيس ۽ هڪ لک پنج  هزار ووٽ حاصل ڪري سگهيس ۽ هو سمورن ووٽرن جو شڪر گزار آهي جن هن تبديلي ۾ سندس ساٿ ڏنو، هن چيو ته  14 هزار ووٽ ڊبل قرار ڏئي 8 هزار ووٽن تان شڪست ڏني وئي ، هن چيو ته هو اصولن جي پاسداري ڪري ٿو ۽ پي پي پي جي حڪومت ۾ لاهور جي ٽن شهرين جي قتل واري اصولي موقف تي هن وزارت تان استعيفا ڏني پر اصولن تي سودي بازي نه ڪئي ۽ اڄ کيسرب پاڪ عزت ڏني آهي ۽ هو وري ساڳي منصب تي فائز آهي هن چيو ته طاقت جو سرچشمو عوام آهي ۽ جڏهن عوام فيصلو ڏئي ٿو ته ان اڳيان ڪو به بند نٿو ٻڌي سگهي هن چيو ته اڄ ساڻس ساٿ ڏيندڙن کي پريشان ڪيو پيو وڃي پوسٽل بيلٽ وسيلي ووٽ ڏيندڙن کي بدلي ڪيو پيو وڃي ۽ هنن کي هر حوالي سان پريشان ڪيو پيو وڃي ووٽرن کي پيئڻ جي پاڻي سميت زرعي پاڻي کان محروم رکيو پيو وڃي هو انهن مست هاٿين کان پڇڻ چاهي ٿو ته ڇا هنن کان ماضي جي تاريخ وسري وئي آهي شهيد ڀٽي جو ساٿ ڏيندڙن کي به پريشان ڪيو ويو هو پر اهي آمرن اڳيان نه جهڪيا ته هي ان عوام کي ڪيئن جهڪائي سگهن ٿا، هن چيو ته جمهوريت جي بالادستي جون ڳالهيون ڪندڙن اٻوجهه عوام کي ايذائي رهيا آهن پر اڄ جو عوام ڪڏهن به غلامي قبول نه ڪندو هن چيو ته ڪي پي ڪي، پنجاب ۽ بلوچستان جي عوام پي پي پي کي رد ڪري ڇڏيو آهي ۽ اهو وقت پري ناهي جڏهن سنڌ ۾ به رڳو تبديلي جا نظارا نظر ايندا جڏهن ته گلگت بلتستسان ۽ آزاد ڪشمير ۾ به تبديلي نظر اچي رهي آهي هن چيو ته سنڌ ۾ به ڪراچي جي عوام تبديلي آڻي ڇڏي آهي ۽ اها تبديلي سنڌ جي جهر جهنگ ۾ تمام جلدي نظر ايندي هن چيو ته ڏکڻ پنجاب جيڪو اڳ پي پي پي جو ڳڙهه هو اتي به اڄ پي ٽي آءِ 14 ايم اين جون سيٽون کٽي ان کي به پي ٽي آءِ جو ڳڙهه بڻائي ڇڏيو آهي تبديلي جي اها برسات عمرڪوٽ ۽ ٿر سميت سموري سنڌ ۾ وسندي هن عوام ڏانهن مخاطب ٿيندي چيو ته اوهان نه ڊڄو پروردگار جي عدالت ۾ دير آهي پر انڌير نه آهي، اڄ سڄي سنڌ پي پي پي مان مطئمن ناهي 11 سالن جي حڪومتي دور ۾ پي پي پي وارن عوام لاءِ ڪجهه به ناهي ڪيو چيف جسٽس جي ٿر جي اسپتالن جي دوري دوران رات وچ ۾ اسپتالن کي سينگاري عملي کي گهرايو ويو پر وري ساڳئي حالت آهي پي پي وارن کي عوام جو فڪر ناهي اڄ به ٿر ۾ غذائي کوٽ سبب معصوم ٻارڙا مري رهيا آهن ٿر سڄو ضلعو پي پي جو هجڻ باوجود اتي ڪو ڪم نه پيو ٿئي هن چيو ته اسان کي روڪڻ وارن کي چوان ٿو ته جيسين سنڌ جي عوام سان ظلم بند نه ٿيندو هو ايندو رهندو. هن چيو ته تمام جلد گهڻو ڪجهه ٿيڻ وارو آهي ۽ گهڻا ئي سبق سکڻ وارا آهن ڇو ته عوام انهن کي سبق سيکارڻ جو پڪو پهه ڪري ڇڏيو آهي. هن چيو ته هڪٻئي جو پيٽ چيري عوام جي لٽيل دولت پيٽ مان ڪڍڻ وارا شريف ۽ زرداري اڄ هڪٻئي سان ٺاهه ڪري رهيا آهن ڇو ته اهي پي ٽي آءِ جي تبديلي مان ڊنل آهن اهي رڳو عوام کي لٽڻ لاءِ آهن انهن کي عوامي مفادن جي فڪر ناهي. هن چيو ته حڪومتون اچڻ وڃڻ واريون آهن اسان پنهنجي اصولي موقف تي ڪاربند رهنداسين جڏهن عوام گڏجي ويو ته پوءِ ڪير به ڪجهه نٿو ڪري سگهي خوف جا ڪڪر لهڻ وارا آهي. هن چيو ته ملڪ ۾ رڳو هڪ پي ٽي آءِ عوامي پارٽي آهي جيڪا عوام جي مفادن لاءِ سياست ڪري ٿي باقي رڳو پنهنجو پنهنجو پيٽ پالڻ لاءِ آهن. ان موقعي تي هن لياري مان چونڊيل پي ٽي آءِ جي ايم پي اي محمد رمضان تي ٿيل حملي جي مذمت ڪندي اميد ظاهر ڪئي ته سنڌ حڪومت ان معاملي تي ضرور انصاف ڪندي، ان موقعي تي وفاقي پارلياماني ايم اين لال مالهي خطاب ڪندي چيو ته عوام کي خبر آهي ته ووٽ جي ڪيتري اهميت آهي پاڪستان ڪيترن ئي مسئلن جي ورچڙهيل هو ان وقت عمران خان پرڏيهي معاملا حل ڪرڻ لاءِ شاهه محمود قريشي کي ذميواري ڏني جيڪو بهتر نموني اها ذميواري نڀائي رهيو آهي ۽ سڄي دنيا سان  لاڳاپا بهتر ٿي رهيا آهن ۽ معاشي طور پاڪستان مستحڪم ٿي رهيو آهي، هن چيو ته هتان جي عوام پي ٽي آئي جو ڀرپور ساٿ ڏنو آهي، جنهن تي انهن کي هر نموني سان پريشان ڪيو پيو وڃي انهن تي ايف آئي آر ڪيون پيون وڃن ۽ ظلم جا جبل ڪيرايا پيا وڃن ظلم جڏهن وڌندو آهي ته ان کي ختم ٿيڻو پوندو آهي هن چيو ته شاهه محمود قريشي ٻڌايو آهي ته ايندڙ مهيني وزيراعظم عمران خان ٿرپارڪر جو دورو ڪندو جنهن مان وڏيون اميدون آهن ۽ هو عمرڪوٽ لاءِ به ريلوي لائين، گيس منصوبو ۽ هيلٿ ڪارڊ جون اسڪيمون ضرور ڏيندو. ان موقعي تي ايم اين اي جئه پرڪاش، ايم اين اي ڊاڪٽر رميش اڪراڻي سميت پي ٽي آئي جا ڪارڪن پڻ وڏي انگ ۾ موجود هئا.

 

پهرين فيبروري کان ريلوي هيڊ ڪوارٽر لاهور کان ڪراچي منتقل ڪرڻ جو اعلان، ڪرپشن کي معاف نه ڪندس: شيخ رشيد

ڪراچي (اين اين آءِ) ريلوي وزير شيخ رشيد احمد پهرين فيبروري کان ريلوي جو هيڊڪوارٽر ڪراچي منتقل ڪرڻ جو اعلان ڪندي چيو آهي ته زرداري صاحب ساهورين ويندو مان پاڻ بيمار آهيان ۽ اوهان کي چورن، ڌاڙيلن ۽ لٽيرن جي لڳي آهي ڪراچي جي ترقي لاءِ جيڪو ڪي سي آر جو رستو روڪيندو ان کي لتاڙي هليا وينداسين ڪي سي آر جي ڪميٽي جو اعلان ڪري رهيو آهيان جنهن کي هيڊ مان ۽ سپروائيز وزيراعظم ڪندا پهرين کان 28 فيبروري تائين گنيز ورلڊ رڪارڊ جو رڪارڊ ٽوڙيندس ان دوران ٽرين ۾ ئي رهندس اتي سمهندس هلندڙ سال 20 نيون مال گاڏيون هلايون وينديون مسافر گاڏين کي ڇڏيو ان ۾ ڪوئي ڪمال نه آهي جيڪڏهن اڄ ٽرينون مهيا هجن ته اسان رستن جي سموري رش ٽريڪ تي آڻينداسين. اسان نوجوانن کي ترغيب ڏيون ته گدلاڻ ختم ڪري سگهجي ٿي ملڪ ۾ گاڏين سان پيدا ٿيندڙ گدلاڻ کي ريلوي ئي ختم ڪري سگهي ٿي اهڙن خيالن جو اظهار هن جمعي تي ڪينٽ اسٽيشن تي ٻي شيڊولڊ ٽريٽ ٽرين سروس جي افتتاحي تقريب کي خطاب ۽ ميڊيا سان ڳالاهئيندي ڪيو، ميرين گروپ جي ٻي فريٽ ٽرين 75 ڪنٽينرز تي ٻڌل ڪارگو کڻي لاهور لاءِ رواني ٿي ريلوي جي وزير چيو ته پاڪستان ريلوي ميزائل بڻائي سگهي ٿو روڊ رستا ٺاهڻ آسان آهي ٽريڪ ۽ انجڻ ٺاهڻ ڏکيو ڪم آهي اسان جون فيڪٽريون انجڻ بڻائي سگهن ٿيون پر اڄ هڪ هڪ پرزو ٻاهران گهرائڻو پوي ٿو شيخ رشيد چيو ته صدر کي درخواست ڪندس ته مدثر نالي ٻار کي خدمت واري تمغي سان نوازي، مدثر ريلوي کي فري ٽيڪر ڏنو آهي 10 فيبروري کان ڪم ڪنداسين چاهيان ٿو ته ريلوي جو ملازم جتان لنگهي ڪنڌ کڻي لنگهي سڄي دنيا جون نظريون پاڪستان ريلوي ۾ آهن پاڪستان ريلوي ۾ بي حساب صلاحيتون آهن عمران خان جي قيادت ۾ اسان وٽ تبديلي جي مڪمل صلاحيت موجود آهي الله کيس بدنظر کان بچائي ريلوي ترقي ڪري رهي آهي  اسان لاهور ۾ ڪمانڊ اينڊ ڪنٽرول روم بڻائينداسين هر ماڻهو جي ريلوي تي نظر آهي اداري جي بهترين ڪارڪردگي هوندي، گهر ويهي ٽرين جي جڳهه ڏسي سگهبي هن چيو ته عمران خان جي دور ۾ ٽرينن کي عوام جي امنگن مطابق هلائينداسين وزير جي نوڪري عارصي نوڪري هوندي آهي جڏهن ته ڪرپشن معاف نه ڪنداس ۽ پاڪستان ريلوي ۾ ڪرپشن لاءِ زيرو ٽالرنس پاليسي اختيار ڪئي آهي هن چيو ته دبئي جا ٻه سيڙپڪار پاڪستان ريلوي ۾ سيڙپ لاءِ دلچسپي رکن ٿا پبلڪ پرائيوٽ پاٽنرسپ تحت وڌيڪ 2 ٽرينون هلايون وينديون شيخ رشيد چيو ته ايم ايل ون بابت سومر تي وزيراعظم جي سربراهي ۾ اجلاس آهي ايم ايل ون تي ٽريننگ جي رفتار 160 ڪلوميٽر في ڪلاڪ هوندي اسان چئن مهينن ۾ 10 لک ليٽر آئل بچايو آهي شيخ رشيد نوازشريف جي صحت بابت ڳالهائيندي چيو ته منهنجي پنهنجي صحت خراب آهي اوهان کي نوازشريف جي صحت جي ڳڻتي آهي هڪ مهيني کان طبيعت خراب آهي پوءِ به ڪراچي آيو آهيان شيخ رشيد چيو ته اسان 20 فريٽ ٽرينون هلائينداسين 30 مارچ تي وي وي آءِ پي مسافر ٽرين هلائينداسين ڪراچي کان پشاور تائين ٽريڪ تبديل ٿيندو 10 مارچ کان اڳ هڪ ٻي مال ڊوهيندڙ ٽرين هلائينداسين پهرين کان 28 فيبروري تائين ٽرين ۾ ئي رهندس مان پنهنجي آفيس فريٽ لاءِ راولپنڊي کان ڪراچي منتقل ڪري رهيو آهيان هاڻي جي ايم يا چيئرمين ريلوي جي آفيس به هتي هوندي جڏهن ته پهرين فيبروري کان ريلوي جو هيڊڪوارٽر ڪراچي منتقل ڪري رهيو آهيان.

 

آئيني ضمانت باوجود وفاق سنڌ کي وسيلن کان محروم پيو ڪري، خاطرين باوجود استحصال جاري آهي: مرتضٰي وهاب

ڪراچي (اسٽاف رپوٽر) وزيراعليٰ سنڌ جي اطلاعات، قانون ۽ اينٽي ڪرپشن بابت صلاحڪار بيريسٽر مرتضٰي وهاب چيو آهي ته سنڌ کي ڏني وئي ضمانت جيڪا آئين ۾ لکيل آهي ان جي بر خلاف سنڌ کي ان وسيلن کان محرو ڪيو پيو وڃي. اهڙن خيالن جو اظهار هن اڄ سنڌ اسيمبلي بلڊنگ ۾ پريس ڪانفرنس ڪندي ڪيو.هن چيو ته سنڌ کي پهريون قدرتي گيس جي بندش سان محروم ڪيو ويو آهي جڏهن ته ملڪي پيداوار جو 70 سيڪڙو قدرتي گيس جو حصو سنڌ فراهم ڪري ٿو ۽ وري سنڌ کي انهي جي پاڻي کان به محروم ڪيو ويو ۽ اڄ ظلم آهي ته بجلي جي بندش سان شهر  جا سمورا ڪاروبار زندگي ٺپ ٿي ويو آهي.اڄ سنڌ اسيمبلي به بجلي کان محروم آهي. هن چيو ته تحريڪ انصاف جي سليڪٽيڊ حڪومت کان ڪو به سوال ڪرڻ واروناهي ته بجلي جهڙي بنيادي ضرورت کي به ڪراچي جي شهرين لاءِ بندش آهي.تحريڪ انصاف جي حڪومت مني بجيٽ ۾ هڪ ٻي ايمنسٽي اسڪيم ڏني آهي جنهن جو فائدو چند مخصوص ماڻهن کي پهچي رهيو آهي جڏهن ته عام ماڻهو لاءِ زندگي اجيرڻ ڪري ڇڏي آهي. ٻارن جي کير ضرورت جون لازمي شين تي ٽيڪس مڙهي وڌيڪ مهنگائي ڪري ڇڏي آهي.هن چيو ته گيس جي بندش تي گورنر سنڌ ۽ وفاقي وزير ايئن نه ٿيڻ جو يقين ڏياريو هيو مگر اهي وائدا وفا نه ٿيا گهٽ ۾گهٽ پنهنجي واعدن کي ته پاس ڪيو وڃي. صحافين جي سوالن جا جواب ڏيندي صلاحڪار اطلاعات چيو ته سنڌ ۾ بجلي جي بندش سان مسئلن ۾ اضافو ٿيو صنعت جو ڦيٿو بجلي سان هلندو آهي ۽ بجلي ئي نه هوندي ته ڪارخانا ڪهڙي طرح هلندا ۽ اها خطرناڪ صورتحال روزگار تي به اچي رهي آهي مگر حڪمرانن جي سر تي جون تائين نه ٿي رينگي. هن وڌيڪ چيو ته ڪراچي جي لاءِ اضافي پاڻي جي درخواست تي ڪو به عمل نه ٿو ڪيو ويو ۽ اسان جي پاڻي جو جائز حصو نه ٿو ڏنو وڃي  جنهن سان سنڌ جي زراعت جو شعبو زبون حالي طرف وڃي رهيو آهي

 

مخالف ڌر اڳواڻ کي روڪيو ويو ته قائد ايوان به قومي اسيمبلي ۾ نه اچي سگهندو: مسلم ليگ ن

اسلام آباد (اين اين آءِ) پاڪستان مسلم ليگ (ن) وزيراعظم جي خاص مددگار نعيم الحق جي ٽوئٽ تي سخت خدشن جو اظهار ڪندي واضح ڪيو آهي ته جيڪڏهن مخالف ڌر اڳواڻ اسيمبلي ۾ نه ايندو ته ليڊر آف دي هائوس به نه ايندو نعيم الحق جي ڪابه حيثيت نه آهي جڏهن خاص مددگار ڳالهائي ٿو ته سمجهو ته وزيراعظم ڳالهائي ٿو اسپيڪر معاملي تي نوٽيس وٺڻ جي خاطري ڪرائي آهي وزيراعظم پاڻ 6 مهينن کان پوءِ اسيمبلي آيو ۽ ناراض ٿي هليو ويو اسان ته وزير اعظم جي ڳولا جو اشتهار ڏيڻ وارا هئاسين اڳتي ڏسون تبديلي وارا به ڀوڳي وٺندا حڪومت ججز جو انگ وڌائڻ جو پهريون بل پاس ڪيو آهي اسان چاهيون ٿا ته جيڪو شخص به هاءِ ڪورٽ جي جج بڻجڻ اچي رهيو آهي اهو پنهنجا اثاثا ڊڪليئر ڪري بدقسمتي سان حڪومتي بئنچ ان ڳالهه جي اجازت ڏيئي ڇڏي آهي ته سپريم ڪورٽ ۽ هاءِ ڪورٽ جا جج ٽيڪس چور به بڻجي سگهن ٿا جمعي تي (ن) ليگ جي مرڪزي اڳواڻ اڳوني وزيراعظم شاهد خاقان عباسي، اڳوڻي وزيرن خواجه محمد آصف ۽ مريم اورنگزيب سان گڏ پارليامينٽ هائوس ٻاهران ميڊيا سان ڳالهائيندي چيو ته حڪومت قومي اسيمبلي ۾ پهريون بل پاس ڪيو آهي هي ججن جو تعداد وڌائڻ جو بل هو هن چيو ته صوبائي ڪوٽا بابت ڪو جواب ناهي آيو هن چيو ته جيڪو شخص به هاءِ ڪورٽ جو جج بڻجندو اهو پنهنجا اثاثا ڊڪليئر ڪري هن چيو ته اسپيڪر اجلاس اوچتو ملتوي ڪري ڇڏيو آهي اڳوڻي وزيراعظم چيو ته هڪ شخص نعيم الحق 3 ٽوئٽ ڪيا آهن جنهن ۾ مخالف ڌر اڳواڻ کي ڌمڪي ڏني ويئي آهي هن چيو ته حڪومت پارليامينٽ کي ڌمڪيون ڏيئي رهي آهي هن نعيم الحق جي حوالي سان چيو ته هي شخص وزيراعظم جو خاص مددگار آهي اڳوڻي وزيراعظم چيو ته اسپيڪر کي ٻڌائي ڇڏيو آهي ته ميمبرن جو تحفظ اوهان کي ڪرڻو آهي. خواجه محمد آصف ان موقعي تي حڪمران جماعت تي ڇتي تنقيد ڪندي چيو ته هي پاڻ گٿي زمان ڳالهائيندا رهيا آهن. ڊي چوڪ شاهد آهي هن چيو ته نعيم الحق جي ڪابه حيثيت نه آهي جڏهن خاص مددگار ڳالهائي ٿو ايئن سمجهو وزيراعطم ڳالهائي ٿو هن چيو ته اسان چاهيون ٿا ته هي سسٽم ڪري پر حڪمرانن جي رويي تي افسوس آهي هن چيو ته سڀ محترم ادارا آهن جيڪڏهن هي معاملو پارليامينٽ ۾ رکڻو آهي ته اسان به تيار آهيون هڪ هڪ دفعو ٻيهر نعيم الحق تي تنقيد ڪندي چيو ته اهڙِ قسم جي ٽوئٽ ڪري پارليامينٽ جوا حترام ناهي ڪيو هي پارليامينٽ کي گاريون به ڏيندا رهيا آهن خواجه محمد آصف چيو ته وزيراعظم 6 مهينن کان پوءِ اسيمبلي آيو آهي. هڪ سوال تي شاهد خاقان عباسي چيو ته اسپيڪر خاطري ڪرائي آهي ته ان جو نوٽيس وٺنداسين شاهد خاقان عباسي چيو ته وزيراعطم ٻڌائي ڇڏيو آهي ته جيڪو گاريون گهڻيون ڏيندو ان کي وڏو عهدو ملندو هي هن ملڪ جي بدقسمتي آهي هن چيو ته وزيراعظم عمران خانکي پنهنجي ڀيڻ لاءِ ايمنسٽي اسڪيم جي حوالي سان ڳالهائڻ نه گهرجي ها ايمنسٽي اسڪيم ۾ سڀ ڪجهه لکيل آهي خواجه محمد آصف چيو ته وقت ايندو ته رسيدون به گهريون وينديون هڪ سوال تي شاهد خاقان عباسي چيو ته پهرين حڪومت آهي فنانس بل پيش ڪري اجلاس ملتوي ڪري گهر هلي ويئي. اسان سمجهون ٿا ته حڪومت بجيٽ تي بحث کان ڀڄي رهي آهي خواجه آصف تحريڪ انصاف تي تنقيد ڪندي چيو ته گذريل پنجن سالن ۾ هن اسيمبلي اندر ۽ ٻاهر ڇا ڪيو سڀني کي خبر اهي اڃا ته 6 مهينا گذريا آهن اسان نٿا چاهيون ته پارليامينٽ عوام آڏو مذاق بڻجي حڪومت پاران ججز جو انگ وڌائڻ جي حوالي سان پاس ڪيل بل جي حوالي سان اڳوڻي وزيراعظم چيو ته بدقسمتي سان حڪومتي بئنچن کان اجازت ڏني ويئي ته ٽيڪس چور هاءِ ڪورٽ جو جج بڻجي سگهي ٿو. شاهد خاقان عباسي چيو ته نعيم الحق 3 ٽيوٽ ڪيا ۽ ڌمڪيون ڏنيون خواجه آصف چيو ته ٽوئٽ ڪندڙ جي پنهنجي ڪائي حيثيت نه آهي.

 

ماضي جي مشهور اداڪارا روحي بانو لاڏاڻو ڪري وئي

اسلام آباد ( ويب ڊيسڪ ) پاڪستاني ڊراما انڊسٽري جي مشهور اداڪارا روحي بانو ترڪي ۾ لاڏاڻو ڪري وئي، مشهور اداڪارا 10 آگسٽ 1951ع تي سنڌ جي راڄڌاني واري شهر ڪراچي ۾ نامياري ڍولڪ نواز الله رکا خان جي گهر اک کولي هوءَ ذاڪر حسين جي ويڳي ڀيڻ هئي.  هن ڪرن ڪهاني، زرد گلاب، دروازا سميت ڪيئي ڪلاسڪ ڊرامن ۾ يادگار ڪردار ادا ڪيا.  لجينڊري اداڪارا روحي بانو کي سندس خدمتن جي اعتراف ۾ حڪومت پاڪستان صدارتي ايوارڊ سان به نوازيو هو.  پاڪستاني ڊراما انڊسٽري تي 70۽ 80 جي ڏهاڪي ۾ راڄ ڪندڙ اداڪارا نفسيات جي شعبي ۾ ماسٽرس ڪئي پر اداڪارا جي خود پنهنجي سموري حياتي هڪ سانحي جيان گذاري. ٻن ناڪام شادين ۽  2005ع ۾ جوان پٽ جي قتل کيس دماغي بيماري ۾ مبتلا ڪري ڇڏيو.  روحي بانو پنهنجي حياتي جا آخري ڏهاڙا لاهور جي فائونٽين هائوس ۾ به گذاريا پر شرپسندن جي ڌمڪين کانپوءِ هوءَ ترڪي هلي وئي هئي. جتي اڄ سندن ساهه جو سڳو ٽٽي پيو ۽ هوءِ پنهنجي مالڪ حقيقي سان وڃي ملي. پنهنجي يادگار ڪردارن سبب هوءَ سدائين مداحن جي دلين ۾ زندا رهندي.