تازيون خبرون

Daily Archives: December 6, 2018

پي ٽي ايم اها حد پار نه ڪري جتي رياست کي زور لڳائڻو پئجي وڃي: پاڪ فوج جو ترجمان

راولپنڊي (اين اين آءِ) آٰءِ ايس پي آر جي ڊي جي ميجر جنرل آصف غفور پشتون تحفظ موومينٽ ( پي ٽي ايم ) کي خبردار ڪيو آهي ته اها اهڙي حد نه اورانگهي جو ڪو رياست کي پنهنجي رٽ قائم ڪرڻ لاءِ قدم کڻڻا پون، سڄي ملڪ ۾ دهشتگردي جا واقعا گهٽجي ويا آهن، وقت ويجهو آهي، اسان مڪمل امن قائم ڪري وٺنداسين، ايندڙ سال پاڪ افغان بارڊر تي ڪنڊيدار تار لڳائڻ جو ڪم مڪمل ٿي ويندو جنهن سان صورتحال بهتر ٿي ويندي، کنڀي گم ڪيل ماڻهن بابت ٻن هنڌن تان شڪايتون مليون، ڪل 7 هزار ڪيس آيا، اٽڪل 4 هزار ڪيس حل ٿي چڪا آهن، ڪرتارپور راهداري رڳو ون وي هوندي، ڀارت مان سک ياتري ايندا ۽ واپس هليا ويندا، ڪرتارپور رستي تي ڪنڊيدار تارون لڳايو وينديون، ڀارت اسان کي ائين برداشت ڪري جيئن آهيون، اسان مسلمان رياست آهيون، ڀارتي آرمي چيف اسان کي نه ٻڌائي، اسان کي ڪيئن هجڻ گهرجي، اسان ڄمي بيٺا آهيون، جيڪڏهن ڀارت اڳرائي ڪندو ته کيس منهن ٽوڙ جواب ڏنو ويندو، هلندڙ سال ڪنٽرول لائين تي سيز فائر جون 2593 ڀڃڪڙيون ٿيون جنهن سبب 55 شهري شهيد ۽ 3 سئو زخمي ٿيا، افغانستان ۾ جنگ ۾ ايتري ڪاميابي نه ملي جيتري پاڪستان حاصل ڪئي، آمريڪا خواهش ڪري رهيو آهي ته ڪنهن نه ڪنهن نموني ڳالهيون ٿي وڃن، جيترو ڪردار ادا ڪري سگهون ٿا ڪنداسين، 70 سال گذري ويا هاڻ به عوام کي ٻڌائي رهيا آهيون ته اسان نازڪ دور مان لنگهي رهيا آهيون، هي نازڪ دور ڇو آيا ۽ ان جو ذميوار ڪير آهي، اسان ماضي کي نه ڇڏيو ته اڳتي نه وڌي سگهنداسين، پاڻ کي ٺيڪ ڪنداسين تي اڳتي ڪجهه ٿي سگهندو، ڪو ئي شڪ نه آهي ڪنهن ٻئي جي جنگ ٻيهر نه وڙهنداسين، پاڪ فوج جو تعلق هڪ پارٽي، ماڻهو يا هڪ صوبي سان نه آهي، وزيراعظم جي سموري ڳالهه ٻولهه کي ٻڌڻو پوندو، ميڊيا رڳو 6 مهينن لاءِ پاڪستان جي ترقي ڏيکاري، بلوچستان ۾ امن جي صورتحال ماضي کان بهتر آهي، ملڪ کي هڪ هڪ سر رکي ٻيهر ٺاهي رهيا آهيون، اهڙو پاڪستان چاهيون ٿا جتي آئين موجب قانوني حڪمراني هجي، خميس تي ميڊيا کي ڄاڻ ڏيندي ڊي جي آءِ ايس پي آر چيو ته پي ٽي ايم وارا ان لائين ڏانهن وڌي رهيا آهن جتي انهن سان اهو ئي ٿيندو جيڪو رياست پنهنجي رٽ برقرار رکڻ لاءِ ڪندي آهي ۽ اسان ڪنداسين، چيڪ پوسٽون گهٽائڻ جي مطالبي جي حوالي سان هن چيو ته پاڪ فوج صورتحال بهتر ٿيڻ تي چيڪ پوسٽون گهٽايون آهن، ايندڙ سال پاڪ افغان بارڊر تي ڪنڊيدار تار لڳائڻ جو ڪم مڪمل ٿي ويندو، هن چيو ته جنهن ڏينهن فوج کي ائين محسوس ٿيندو ته هتي سيڪيورٽي صورتحال اهڙي ٿي وئي آهي ته جو هتي هڪ چيڪ پوسٽ جي ضرورت نه آهي ته ان کي هٽايو ويندو. هن چيو ته اسان پنهنجي پاران گهڻو ڪجهه ڪيو آهي، هتي اڏاوتي ڪم به شروع ٿي ويو آهي پر افغانستان جو پنهنجن دهشتگردن تي سرحد تي ۽ سرحدي علائقن تي ڪو ڪنٽرول نه آهي جنهن مان پاڪستان کي خطرو آهي ۽ ان ڪري هن علائقي ۾ 2 لک فوج مقرر آهي. ميجر جنرل آصف غفور چيو ته ٻن سالن دوران 4 سئو آفيسرن جي خلاف ڪارروائي ٿي، هڪ فوجي آفيسر کي 10 هزار رپين جي ڪرپشن تي گهر موڪليو ويو، اسان جي پهرين خواهش هوندي آهي ته غلطي نه ٿئي، ڪرپشن هجي يا موڪل وٺڻ کانسواءِ وڃڻ تي به سزا هوندي آهي، سزا مليلن ۾ هر رينڪ جو آفيسر شامل آهي، کين جيل موڪليو ويو، سروس مان نيڪالي ۽ جيل جي حد تائين پاڪ فوج ۾ سزا هوندي آهي، هن چيو ته بلوچستان ۾ سيڪيورٽي آپريشن لاءِ حڪمت عملي تبديل ڪئي آهي، گذريل 3 سالن ۾ 22 سئو ڀڳوڙا قومي ڌاري ۾ شامل ٿيا، انهن هٿيار ڦٽا ڪيا، صوبي ۾ امن امان جي صورتحال ماضي کان بهتر آهي، ڪراچي بابت هن چيو ته ڪراچي ۾ 99 سيڪڙو ڏوهه گهٽجي ويا آهن ۽ رينجرز 9 سالن کان قربانيون ڏئي امن قائم ڪيو آهي، شهر ۾ ڪاروبار تيزي سان بحال ٿي چڪو آهي ۽ سيڙپ ٿي رهي آهي.

 

نواز شريف ۽ آصف زرداري جي اهڙي حيثيت آهي جئين اقتدار کان هٽڻ بعد يحييٰ ۽ ايوب خان جي ٿي هئي: فواد چوڌري

لنڊن (اين اين آءِ) سڌ سماءَ جي وفاقي وزير چوڌري فواد حسين چيو آهي ته پاڪستان ۾ سمورا ادارا فعال آهن ۽ پنهنجون ذميواريون بهتر نموني ادا ڪري رهيا آهن، وزيراعظم عمران خان جي اڳواڻي ۾ حڪومت جو قيام پاڪستاني قوم جي سياسي پختگي جو مظهر آهي، پاڪستان تحريڪ انصاف جو اقتدار ۾ اچڻ معاشري جي وچولي طبقي جو بدعنواني ۽ اسٽيٽس ڪو جي خلاف انقلاب آهي، سول ۽ عسڪري سمورن ادارن ۾ شاندار هم آهنگي آهي، اسان انتظار ۾ آهيون ته ڀارت ڪشمير تي پنهنجي موقف جو ٻيهر جائزو وٺي، اميد آهي ته هڪ ڏينهن پاڪستاني مسلمانن کي اجمير شريف جي درگاهه تي وڃڻ جي اجازت ملندي، خميس تي چوڌري فواد حسين انٽرنيشنل انسٽيٽيوٽ آف اسٽيٽجڪ اسٽيڊيز ۾ خطاب ڪندي چيو ته پاڪستان هڪ خوبصورت ملڪ آهي جنهن کي دنيا چڱي طرح سمجهي نه سگهي آهي، هن چيو ته 1980 کان تباهه ڪندڙن حالتن کي منهن ڏنو، ڪو ٻيو ملڪ اهڙين حالتن کي منهن نه ڏئي سگهي ها، هن چيو ته پاڪستان انهن سمورين چئلينجز مان نڪري آيو، مسلم ملڪ ۽ ٽين دنيا ۾ جديد ملڪ بڻجي اڳيان آيو. هن چيو ته پاڪستان ۾ آزاد عدليا ۽ متحرڪ ميڊيا آهي، پاڪستان ۾ ميڊيا کي آزادي حاصل آهي، هن چيو ته ڪرتارپور بارڊر جي افتتاح سان هڪ نئين تاريخ رقم ٿي، فواد چوڌري چيو ته آمريڪا عالمي طاقت آهي، آمريڪا جي اهميت کان آگاهه آهيون، هن چيو ته وزيراعظم افغانستان ۾ امن لاءِ بهترين تجويز پيش ڪئي، هن چيو ته تحريڪ انصاف جي حڪومت اچڻ سان پاڪستان ۽ آمريڪا جا لاڳاپا بهتر ٿي رهيا آهن، هن چيو ته آمريڪي صدر جو پاڪستاني وزيراعظم کي خط ۽ زلمي خليل زاد جي وزيراعظم سان ملاقات لاڳاپن ۾ بهتري جو ثبوت آهي، وفاقي وزير چيو ته موجوده حڪومت جون پاليسيون عوام کي غربت مان ڇوٽڪارو ڏيڻ لاءِ آهن، ان کانپوءِ سڌ سماءَ جي وفاقي جي انٽرنيشنل انسٽيٽيوٽ آف اسٽريٽجڪ اسٽيڊيز جي اعليٰ عهدارن سان ملاقات ٿي، وفاقي وزير کي انسٽيٽيوٽ جي سرشتي ۽ ورڪنگ جي حوالي سان ڄاڻ ڏني وئي.

 

ٿر پاڪستان جو مستقبل آهي، جنوري جي آخري هفتي تائين بجلي جي پيداوار شروع ٿي ويندي: مراد علي شاهه

مٺي  (ڊ.ر) سنڌ جو وڏو وزير سيد مراد علي شاهه چيو آهي ته ٿر ڪول مان ايندڙ سال جنوري جي آخري هفتي تائين بجلي جي پيداوار جي شروعات ٿي ويندي ۽ ان پروجيڪٽ سميت ٿر ۾ 70 ارب رپين جي سيڙپڪاري ڪئي وئي آهي. هن اها ڳالهه اڄ خميس ڏينهن ٿر ۾ ٿيندڙ ترقياتي ڪمن جو جائزو وٺڻ جي موقعي تي ڪئي. وڏي وزير سان گڏ توانائي وارو صوبائي وزير امتياز شيخ، وڏي وزير جو صلاحڪار مرتضيٰ وهاب پڻ گڏ هئا. وڏي وزير سيد مراد علي شاهه اسلام ڪوٽ جي بختاور ايئرپورٽ تي پهتو جتي سندس آجيان سينٽر، قومي ۽ صوبائي اسيمبلين جي ميمبرن ڪئي. بختاور ايئرپروٽ اسلام ڪوٽ کي سنڌ حڪومت ٿر ۾ سيڙپڪارن جي سهولت لاءِ تعمير ڪرايو آهي. وڏي وزير سيد مراد علي شاهه ڪول مائنگ، ٿرڪول پاور پلانٽ، صحت جي سهولتن جو معائنو ڪيو. وڏي وزير سيد مراد علي شاهه چيو ته ٿر پاڪستان جو مستقبل آهي، انشاءَ الله جنوري 2019ع ۾ ٿر پاور پلانٽ مان بجلي پيدا ڪئي ويندي. مراد علي شاهه چيو ته پاڪستان پيپلز پارٽي جي سنڌ حڪومت سنڌ جي عوام بلڪه سڄي پاڪستان جي ترقيءَ ۽ بجلي جي بحران جي خاتمي لاءِ اپاءَ وٺي رهي آهي. هن ٿر ڪول بلاڪ ٽو پهچي ڪول مائننگ جو جائزو ورتو. ڪول مائننگ جو 96 سيڪڙو ڪم مڪمل ڪيو ويو آهي، پاور پلانٽ وارو ڪم به 96 سيڪڙو مڪمل ڪيو ويو آهي. مراد علي شاهه چيو ته پارو پلانٽ مان بجليءَ جي شيڊول پيداوار جون 2019ع ۾ ٿيڻي هئي جيڪا هاڻ جنوري 2019ع جي آخري هفتي يا فيبروري جي پهرين هفتي ۾ بجلي جي پيدا شروع ٿي  ويندي. ان پروجيڪٽ سميت ٿر ۾ 70 بلين رپين جي سيڙپڪاري ڪئي وئي آهي. هن چيو ته سنڌ حڪومت ٿر فائونڊيشن جي ذريعي 20 هزار ڪٽنبن کي سندن چوپائي مال لاءِ چارو فراهم ڪري رهي آهي. ٿر فائونڊيشن سان هن سال 90 ٻار انجنئيرنگ جو ڊپلوما ڪري رهيا آهن. ٿر فائونڊيشن اسپتال 2 بلين رپين جي لاڳت سان تعمير ٿي رهي آهي. ان اسپتال کي سنڌ حڪومت 50 ملين رپيا ڏئي رهي آهي. اسپتال جو پهريون بلاڪ جيڪو 82 بسترن تي مشتمل آهي فيبروري 2019ع ۾ ڪم شروع ڪندو. اهو اسپتال 250 بسترن تي مشتمل آهي، هن مهيني 20 ڊسمبر تي نئي سنهري ڳوٺ ۾ 172 ڪٽبن حڪومت پاران بڻايل گهرن ۾ منتقل ٿي ويندا. اهي 172 ڪٽنب ٿر ڪول بلاڪ ٽو کان متاثر ٿيا هئا. انهن 172 ڪٽنبن کي ٿر ڪول ۾ نوڪريون، سندن گهرن جو معاوضو، هر هڪ کي 1100 اسڪوائر ميٽر جو گهر، تعليم ۽ صحت جون سهولتون نئين ڳوٺ ۾ ڏنيون ويون آهن. 5000 ٻارن لاءِ سنڌ حڪومت ٿر فائونڊيشن ذريعي 25 اسڪول قائم ڪري رهي آهي، انهن اسڪولن تي ڪم هلندڙ آهي. وڏي وزير سيد مراد علي شاهه 150 ميٽر هيٺ وڃي ڪول مائن جو جائزو ورتو، اهو ڪول مائن 180 ميٽرن تائين هيٺ آهي هن وقت تائين 150 ميٽر کوٽائي ڪئي وئي آهي، 180 ميٽر جي ڪول سيم نڪرندي، اهو ڪول پاور پلانٽ جيڪو ڪول مائن کان 2.5 ڪلو ميٽرن جي مفاصلي تي آهي جنهن کي بجلي بڻائڻ لاءِ سپلاءِ ڪيو ويندو. وڏي وزير مراد علي شاهه چيو ته پاڪستان ٿر ڪول سان چمڪڻ وارو آهي قوم تيار رهي. ٿر ڪول پاور پلانٽ جي چمني 180 ميٽر آهي. پاور پلانٽ 660 ميگاواٽ بجلي پيدا ڪندو. وڏي وزير سيد مراد علي شاهه ڪچن گارڊننگ واري پروجيڪٽ جو معائنو ڪيو، اهو پروجيڪٽ ملهاڻو ڳوٺ ۾ شروع ڪيو ويو آهي. انهيءَ بعد وڏي وزير سيد مراد علي شاهه مٺي اسپتال و دورو پڻ ڪيو ۽ اتي صحت جي سهولتن جي فراهمي جو جائزو ورتو ۽ اسپتال جي عملي کي مريضن جي علاج معالج جي بهترين سهولتون فراهم ڪرڻ جي هدايت ڪئي.

وڏي وزير جي ميڊيا سان ڳالهه ٻول:

ميڊيا سان ڳالهائيندي سنڌ جي وڏي وزير سيد مراد علي شاهه چيو ته مون ٿر ڪول مائننگ واري ڪم جو جائزو ورتو آهي ۽ راستي ۾ اسان بي ايڇ يو جو دورو به ڪيو. ٿر ڪول رٿا پنهنجو وقت کان اڳ مڪمل ڪئي ويندي. آڪٽوبر 2019ع تائين ٿر ڪول رٿا جي مڪمل ٿيڻ جي تاريخ هئي، اسان جون 2019ع ۾ ئي ٿر ڪول رٿا مڪمل ڪئي ويندي. هن چيو ته ماڻهو يقين نه ڪندا هئا ته هتان ڪوئلو نڪرندو، هاڻ ڪوئلو نڪرندي نظر اچي رهي آهي. ڪجهه معاملا نظر آيا آهن اهي به ختم ٿي ويندا. ٻارن جا ماهر ڊاڪٽر به ٿر جي اسپتال ۾ موجود آهن بهتري اچي رهي آهي. هن چيو ته وڌيڪ ڊاڪٽر بدين ۽ عمرڪوٽ مان ٿر اچي رهيا آهن ڇاڪاڻ ته هتي سهولتون بهتر آهن. اسان وٽ ڊاڪٽر ڪافي محنت ڪندا آهن. هن چيو ته گهٽ وزن جي ٻارن جي پيدائش ٿي رهي آهي،جنهن ڪري ٻارن فوت ٿيندا آهن. اسان ٻارن جي پيدائش کان اڳ ڳوڙهاري عورت نشاندهي ڪرڻي آهي ته جئين کين ٻار تندرست ۽ صحتمند پيدا ٿئي. هن چيو ته ٻار خوراڪ جي کوٽ ڪري فوت ناهن ٿيندا بلڪه ماءُ ڪمزو هوندي ته ٻار ڪمزو پيدا ٿيندو.

 

ملڪ ۾ ڌڪي اسٽارٽ حڪومت آهي، پارليامينٽ کي مفلوج ڪيو پيو وڃي: شيري رحمان

اسلام آباد (اين اين آءِ) پاڪستان پيپلز پارٽي چيو آهي ته آمريت ۾ صدارتي حڪم ذريعي حڪومت هلائي ويندي هئي ۽ آرڊيننس ذريعي حڪومت نٿي ڪري سگهجي، جيڪڏهن ڪو به آرڊيننس آيو ته ان جي خلاف ٺهراءُ آڻينداسين، هڪ سئو ڏينهن کانپوءِ قومي اسيمبلي ۾ پبلڪ اڪائونٽس ڪميٽي ناهي ٺاهي وئي، سئو ڏينهن ۾ ڀتيون ڊاهڻ، مينهون ۽ ڪڪڙين جي آنن جي ڳالهه ٿي، حڪمران چونڊيل ادارن جي نفي ڪري رهيا آهن، اسان ائين نه ڪرڻ ڏينداسين، احتساب جي ويس ۾ آمراڻي طرز تي اپوزيشن کي حدف بڻايو پيو وڃي، سليڪٽيڊ وزيراعظم وٽ ڪو به تجربو نه آهي، ڊالر جي قيمت تي وزيراعظم ۽ ناڻي وزير مان ڪو ئي هڪ ڪوڙ ڳالهائي رهيو آهي، ڪوڙ ڳالهائڻ تي آرٽيڪل 62 ون ايف لڳي ٿو، اهڙن خيالن جو اظهار پاڪستان پيپلز پارٽي جي اڳواڻ فرحت الله بابر، شيري رحمان ۽ نير بخاري پريس ڪانفرنس کي خطاب ڪندي ڪيو، سينيٽر شيري رحمان چيو ته اسان گذارش ڪئي هئي ته پارليامان جي ذريعي ملڪ کي هلايو، قانونسازي رڳو پارليامان جي ذريعي ٿيندي، انکانسواءِ قانونسازي ڪئي وئي ته ڀرپور مخالفت ڪنداسين، هاڻ به ملڪن جي دورن جو تفصيل پارليامان ۾ نه پيا ٻڌائين، هن چيو ته حڪومت ۾ موجوده حڪمرانن وچ ۾ تضاد آهي، وزير چون ٿا ته اسان کي علم هو ۽ وزيراعظم چوي ٿو ته ميڊيا ذريعي خبر پئي، جڏهن ته احتساب جي شڪل ۾ آمراڻي نموني تي اپوزيشن کي حدف بڻايو پيو وڃي، هن چيو ته اليڪشن نتيجن بابت ڪميٽي تي به يو ٽرن ورتو ويو آهي، حڪومت جي چوڻ تي اها ڪميٽي ٺهي ۽ حڪومت ئي مفلوج ڪري ڇڏي، هي 18 هين ترميم تي سوال نشان اٿاري رهيا آهن، وزيراعظم عمران خان کي ياد ڏيارڻو پوي ٿو ته هو وزيراعظم آهي، هن چيو ته ڇا توهان ڌڪو اسٽارٽ نظام آڻڻ چاهيو ٿا، صدارتي آرڊيننس رڳو ان وقت آڻي سگهجي ٿو جڏهن هنگامي حالت هجي، هن چيو ته وزيراعظم اقتدار جي نشي ۾ وساري ويٺو ته رڳو قومي اسيمبلي ۾ ان جي اڪثريت آهي، صدارتي آرڊيننس کي ڪو به ميمبر هڪ قرارداد آڻي ان کي روڪي سگهي ٿو، پ پ سينيٽر چيو ته ٻئي هائوس هلائڻ جي ذميواري تان پاڪستان تحريڪ انصاف هٿ کڻي چڪي آهي، فرحت الله بابر چيو ته اليڪشن ۾ ڌانڌلي جون رپورٽون اچڻ شروع ٿي ويون آهن، فافن رپورٽ موجب 78 هزار فارمن مان 345 فارمز تي صحيحون هيون، 95 سيڪڙو فارم اڻ تصديق آهن، هن چيو ته حڪمران عدالتن جي حڪمن تي عمل ڪن ته جيئن غائب ماڻهن جو پتو پئجي سگهي، ان موقعي تي نير بخاري چيو ته آمريت ۾ صدارتي حڪم ذريعي حڪومت هلائي سگهجي ٿي ۽ صدارتي آرڊيننس ايمرجنسي ۾ جاري ڪري سگهجي ٿو، آرڊيننس ذريعي حڪومت نٿي ڪري سگهجي، هن چيو ته حڪومت جي عقل ڌوڙ ڄمي وئي آهي ۽ سليڪٽيڊ وزيراعظم وٽ ڪو تجربو نه آهي، آرڊيننس ڪو به آيو ته ان جي خلاف ٺهراءُ آڻينداسين.

 

100 ڏينهن جي ڀڃڪڙي عليمه باجي جي پڪڙي وئي، شهباز شريف جي گرفتاري نيب ۽ نيازي ملي ڀڳت جو حصو آهي: مريم اورنگزيب

لاهور ( ويب ڊيسڪ ) مسلم ليگ ن ترجمان مريم اورنگزيب چيو آهي ته عمران خان بدلي جي باهه ۾ ٻري رهيو آهي،  شهباز شريف جي گرفتاري نيب جي ملي ڀڳت جو حصو آهي، هن وقت تائين خبر نه پئجي سگهي آهي ته شهباز شريف ڇا ڪيو آهي.  لاهور ۾ ميڊيا سان ڳالهائيندي مريم اورنگزيب چيو ته 100 ڏينهن ۾ ڪا چوري پڪڙي وئي آهي ته اها عليمه باجي جي پڪڙي وئي آهي. هن چيو ته عليما باجي جي چوري ۽ مني لانڊرنگ جي پويان عمران خان آهي، کين پوئين دروازي کان اين آر او ڏنو ويو آهي. سندس چوڻ هو ته ليگي قيادت ٻن سالن کان پيشين مٿان پيشيون ڀوڳي رهي آهي،اسان صبح، منجهند ۽ شام عدالت ۾ پيش ٿي رهيا آهيون. مريم اورنگزيب چيو ته شهباز شريف ڪينسر جو مريض آهي،  سندس چڪاس ضروري آهي، طبي معائني لاءِ ٻن هفتن بعد بورڊ جوڙيو ويو آهي. هن چيو ته شهباز شريف جي ڪم جا سموري دنيا ۾ مثال ڏنا ويندا آهن. مسلم ليگ ن جي ترجمان چيو ته اڄ آبادگار ۽ عوام مشڪل ۾ آهن، آبادگارن جا فصل سڪي رهيا آهن، بوزدار صاحب ڪٿي آهي.

 

 

آصف زرداري ۽ فريال ٽالپر احتساب جي ڄار ۾ ڦاسي چڪا آهن: ڊاڪٽر ذوالفقار مرزا

پنگريو (اين اين آءِ) اڳوڻي سنڌ جي گهرو وزير ڊاڪٽر ذوالفقار علي مرزا چيو آهي ته آصف علي زرداري ۽ فريال ٽالپر احتساب جي ڄار ۾ ڦاسجي چڪا آهن تنهنڪري پيرن فقيرن جي درگاهن تي وڃي پنهنجي جند ڇڏائڻ جي ڪوشش ڪري رهيا آهن پر هاڻي سندن احتساب جو وارو اچي چڪو آهي مان 8 سال اڳ سنڌ ڌرتي جي دشمنن ۽ ظالمن جي خلاف جيڪا جدوجهد شروع ڪئي هئي ۽ اڄ تائين ان جي خلاف وڙهي رهيو آهيان ان جو ڦل ملڻ وارو آهي ۽ هاڻي مهينن ۾ نه پر ڏينهن ۾ عوام کي ڪرپٽ ٽولي مان نجات ملڻ واري اهي پنگريو ويجهو ملڪاڻي شريف ۾ ڪوٺايل مچ ڪچهري کي خطاب ۽ ميڊيا سان ڳالهائيندي ڊاڪٽر ذوالفقار مرزا چيو ته ڪجهه ڏينهن اڳ مان لنڊن ۾ آخري ڌڪو ڏيئي ڇڏيو آهي جنهن جا نتيجا جلد ايندا ۽ سنڌ جي عوام جي ادا ۽ ادي مان جان آجي ٿي ويندي هن چيو ته انور مجيد جهڙو ماڻهو قانون جي چنڀي ۾ آهي اڳ ايئن نه هو هي ڪا ننڍڙي ڳالهه نه آهي انور مجيد کي ڊاڪٽر ذوالفقار علي مرزا چيو ته مان اهڙو ڪم ڪرڻ چاهيان ٿو ته سنڌ جا ايندڙ ست نسلن جي ڪرپٽ ٽولي مان جند آجي ٿي وڃي ۽ منهنجا سنڌي ڀائرن سک جو ساهه کڻن هن هڪ سوال جي جواب ۾ چيو ته آصف زرداري منهنجو ڇا احتساب ڪندو هن مون تي ۽ منهنجن ڪارڪنن تي 32 ، 32 ڪيس داخل ڪرايا آهن هي وڌيڪ منهنجو وار به ونگو نٿو ڪري سگهي هاڻي سندس احتساب جو وارو اچي چڪو اهي هن چيو ته بدين ضلعي ۾ سخت پاڻي جي کوٽ آهي ۽ اسان وٽ پنهنجن پيارن جي ميتن کي غسل ڏيڻ لاءِ پاڻي نه آهي پر سنڌ جي حڪمرانن جون ٽنڊوالهيار ۾ 100 سيڪڙو زمين آباد آهن هي ظلم نه آهي ته ٻيو اڇا آهي هن وڌيڪ چيو ته سنڌ جا آبپاشي آفيسر به حڪمران ٽولي لاءِ غيرقانوني ڪم ڪري رهيا آهن کين ايئن نه ڪرڻ گهرجي ٻي صورت ۾ انهن آفيسرن کي به جوابده ٿيڻو پوندو ذوالفقار مرزا چيو ته موجوده حڪومت کي اڃا 3 مهينا ٿيا آهن ٽن مهينن اندر ڪنهن جي ڪاڪردگي جو تعين ڪرڻ ممڪن نه آهي هن چيو ته جيڪڏهن آصف زرداري حڪومت هلائي سگهي ٿو ته پوءِ عمران خان ڇو نه حڪومت هلائي سگهندو عمران خان حڪومت به سٺي نموني هلائيندو ۽ احتساب جو سلسلو به جاري رکندو ۽ ڪنهن ڪرپٽ کي نه ڇڏيندو هن چيو ته کيس سنڌ ڌرتي سان پيار آهن سنڌ جي ثقافت جا رنگ نرالا آهن مچ ڪچهرين جو اهتمام ثقافت جو اظهار آهي اهڙين ڪچهرين سان عوام کي پاڻ ۾ ويجهو اچڻ جو موقعو ملو مچ ڪچهري کي لطف علي ملڪاڻي، دلبر سنڌي ۽ ٻين به خطاب ڪيو مچ ڪچهري ۾ سنڌ جي نالي وارن اديبن دانشورن شاعرن ۽ فنڪارن پنهنجي فن جو مظاهرو ڪيو ان کان اڳ  ڊاڪٽر ذوالفقار مرزا پنڱريو ۾ مختلف برادرين جي تڏي تي وڃي دعا گهري مرزا گروپ جا مقامي اڳواڻ به ان موقعي تي ان سان گڏ هئا.

 

ايشيا جي پرڪشش عورتن ۾ ماهرا خان عاليا ڀٽ کي پوئتي ڇڏي ڏنو

 

ڪراچي(شوبز نيوز)پاڪستاني اداڪارا ماهرا خان ايشياء جي دل ڪش ترين عورتون جي فهرست ۾ ڀارتي اداڪارا عاليه ڀٽ جي پوئتي ڇڏي ڏنو آهي. برطانوي ميگزين”ايسٽرن آئي“ طرفان ايشياء جي 50 پر ڪشش ۽ دل ڪشش ترين عورتون جي فهرست جاري ڪئي  آهي. ان فهرست ۾ ماهرا خان چوٿين نمبر  تي قبضو ڪيو آهي جڏهن ته عاليه ڀٽ پنهنجي جاءِ ڇهين نمبر تي ٺاهي ورتي آهي. ياد رهي ته گذريل سال عاليه ڀٽ چوٿين نمبر تي هئي ۽ ماهرا خان پنجين نمبر تي موجود هئي. ماهرا خان لاءِ هي سال ڪاميابين سان گڏ اختتام پذير ٿي رهيو آهي. جنهن ۾ هن ڪو به ڊرامو يا فلم ناهي ڪئي، جيئن ته ٽي وي اشتهارن جي بدولت سبب سڀني جي نظر جو مرڪز رهي ۽ فلاحي ڪمن ۾ به پيش رهي. برطانوي ميگزين فلم ۽ ٽي وي مشهور اداڪار ماهرا خان کي مسلسل چوٿين سال پاڪستان جي دلڪش ترين عورت قرار ڏنو آهي، جڏهن ته ميگزين سماجي مسئلا اجاگر ڪرڻ تي ٻين پاڪستان اداڪارائون کي جي به تعريف ڪئي آهي، هن فهرست ۾ پاڪستان کان صنم سعيد 19 نمبر تي، ارمينا خان 24 ، ميهوش حيات 40 نمبر ، جڏهن ته اقرا عزيز 46 نمبر تي موجود آهي، هي ميگزين هر سال ايشياء سان تعلق رکندڙ دلڪشش ماڻهن خاص طور تي شوبز اسٽارن جي فهرست شائع ڪندو آهي،  ايشياء جي 50 دلڪشش ترين عورتون جي فهرست ۾ اداڪارا دپيڪا پڊوڪون پهرين نمبر تي آهي جڏهن ته گذريل سال پريانڪا پهرين نمبر تي هئي. هن سال پريانڪا چوپڙا کي ڀارٽي ٽي وي اداڪارا نيا شرما ٽئين ۽ عاليه ڀٽ ڇهين نمبر تي آهي.

 

منهنجي زندگي ۾ محبت به ايندي پر صحيح وقت تي: ڪترينا ڪيف

 

ممبئي(شوبز نيوز)بالي ووڊ جي باربي ڊول ڪترينا ڪيف چيو آهي ته ان کي يقين آهي ته ان جي زندگي ۾ هڪ ڏينهن محبت ضرور ايندي پر صحيح وقت تي، اداڪارا ڪترينا ڪيف جو شمار هالي ووڊ جي پهرين صف جي اداڪارائون ۾ هوندو آهي جنهن وٽ شهرت ۽ دولت جي ڪا به ڪمي ناهي، جيئن ته پروفيشنل زندگي ۾ ڪامياب اداڪارا ڪترينا ڪيف جي نجي زندگي ايتري به خوشگوار ناهي، جڏهن ته هن هڪ انٽرويو دوران ڪترينا ڪيف پنهنجي نجي زندگي بابت ڪيتريون ڳالهيون ٻڌايون، ڪترينا ڪيف شادي  ۽ ٻارن جي حوالي سان ٻڌائيندي چيو هڪ سٺو وقت هو جڏهن شادي ۽ ٻارن بابت سوچي رهي هئس پر ائين نه ٿيو جيڪو مان سوچيو هو، اداڪارا چيو مان ڪيترائي ڀيرا پاڻ سان جنگ وڙهي آهي ۽ آخر ڪار جڏهن شئيون منهنجي اميد موجب نه ٿيون ته مان الله تي ڇڏي ڏنو، ڇو ته مونکي يقين آهي ته ڪير ته آهي جيڪو توهان جا رستا چونڊ ڪندو آهي، اداڪارا ڪترينا ڪيف رنبير سان گڏ پنهنجي ناڪام محبت جي باري ۾ چيو ته مونکي يقين آهي ته هڪ ڏينهن محبت منهنجي زندگي ۾ ضرور ايندي پر صحيح وقت تي، جڏهن منهنجي ان کي سڀني کان وڌيڪ ضرورت هوندي.

 

ياسر شاهه تيز ترين 200 وڪيٽون وٺي 82 سال پراڻو رڪارڊ ٽوڙي ڇڏيو

 

ابو ظهبي (اسپورٽس نيوز)ياسر شاهه تيز ترين 200 وڪيٽون وٺڻ جو 82 سال پراڻو رڪارڊ ٽوڙي ڇڏيو آهي. نيوزيلينڊ خلاف ابو ظهبي ٽيسٽ ۾ ياسر شاهه پنهنجي ٻي وڪيٽ حاصل ڪئي ته سندس 200 وڪيٽون مڪمل ٿيون. اهڙي نموني هن آسٽريلوي ليگ اسپنر ڪليري گرمٽ جو 1936 ۾ 36 ٽيسٽ ميچن ۾ 200 وڪيٽون حاصل ڪرڻ جو رڪارڊ ٽوڙي ڇڏيو. ياسر شاهه 33 ميچن ۾ 200 وڪيٽون حاصل ڪيون ۽ اهڙي نموني پهريون بالر بڻجي ويو آهي جنهن تيز ترين 200 وڪيٽون مڪمل ڪيون آهن. ليگ اسپنر ياسر شاهه نيوزيلينڊ خلاف پهرين ٽيسٽ ميچ ۾ 14 وڪيٽون حاصل ڪيون هيون، جيڪا سندس ڪيريئر جي بهترين بالنگ آهي.

 

ڪو مون کي وڏو بيٽسمين نه به سمجهي ته پرواهه ناهي: اسد شفيق

 

لاهور(اسپورٽس نيوز) اسد شفيق جو چوڻ آهي ته ڪو مون کي وڏو بيٽسمين نه به سمجهي ته مون کي پرواهه ناهي.ٽيسٽ ڪرڪيٽر اسد شفيق چيو ته مون کي ان ڳالهه جو ڪو فرق نٿو پوي ته ڪو منهنجي بابت ڪهڙي راءِ رکي ٿو، منهنجي اها ڪوشش هوندي آهي ته جڏهن به کيڏان پاڪستان ۽ ٽيم لاءِ ڪارڪردگي ڏيکاريان.هن چيو ته يونس خان ۽ مصباح الحق کانپوءِ اظهر علي ۽ مون تي جيڪا ذميواري آهي اسان ان کي نڀائڻ جي ڪوشش ڪنداسين