تازيون خبرون

Monthly Archives: December 2018

دهشتگردي جو ڪو به ٿاڪ ناهي، پاڪستان ڪنهن لاءِ به ڀاڙي جي فوج جو ڪم نه ڪندو: عمران خان

اسلام آباد ( ويب ڊيسڪ ) وزيراعظم عمران خان چيو آهي ته پاڪستان ڪنهن لاءِ به ڀاڙي جي فوجي جو ڪم نه ڪندو، اهو ئي ڪنداسين جيڪو ملڪي مفاد ۾ هوندو. آمريڪي اخبار واشنگٽن پوسٽ کي انٽرويو ڏيندي عمران خان چيو ته پاڪستان ۾ دهشتگرديءَ جو ڪو به ٿاڪ ناهي، نه ٿا چاهيون ته آمريڪا تڪڙ ۾ افغانستان مان نڪري وڃي، افغانستان ۾ امن قائم ڪرڻ پاڪستان جي مفاد ۾ آهي ۽ پاڪستان ڳالهين جي عمل لاءِ هر ممڪن ڪوشش ڪندو، سپر پاور سان ڪير بهتر لاڳاپا نه رکڻ چاهيندو آهي پر پاڪستان آمريڪا سان اهڙا ئي لاڳاپا چاهي ٿو جيئن ٻطرفا لاڳاپا چين سان آهن. هن چيو ته اسان واشنگٽن سان بهتر لاڳاپا چاهيون ٿا پر  اسان آمريڪا لاءِ جنگ نه وڙهنداسين، منهنجي ٽرمپ سان ٽوئيٽر تي ڪابه جنگ ناهي پر رڪارڊ جي درستگي ڪئي اهو انڪري آهي جو اسان کي افغانستان ۾ آمريڪا جي ناڪام پاليسين جو ذميوار  قرار ڏنو پيو وڃي. وزير اعظم عمران خان چيو آهي ته اڄ واضح ڪري ڇڏيان ته ڪڏهن ڪنهن جي جنگ نه وڙهنداسين ۽ نه ئي ڪنهن جي سامهون جهڪنداسين اسان سڀني سان امن ٿا چاهيون. اسلام آباد ۾ بلوچستان جي شاگردن کي خطاب ڪندي وزير اعظم عمران خان چيو ته قوم نظريي سان آهي ۽ نظريو نه رهندو ته قوم نه رهندي، قائد اعظم پوري ڪوشش ڪئي ته مسلمان ۽ هندو گڏ ٿي رهن، قائد اعظم محسوس ڪيو ته مسلمانن جي لاءِ لڳ ملڪ ضروري آهي، اسان کي سمجهڻ گهرجي ته ملڪ ڇو بڻيو، اڄ ڀارت ۾ جيڪي مسلمان جو حاصل آهي اُهو اُتي نظر ئي ناهي ايندو ته مسلمانن کي برابري جا حق ملندا، ڀارت ۾ مسلمانن جو اڄ ڪو به سربراهه ناهي. هن چيو ته جمهوريت جو مطلب حڪمران جو قانون جي هيٺان هئڻ آهي پر اسان جمهوريت کان بادشاهت تي اچي ويا آهيون، چين مديني جي رياست جي اصولن تي هلي 70 ڪروڙ عوام کي غربت مان ڪڍيو پر پاڪستان ۾ امير امير ٿيندو ويو ۽ غريب غريب ئي رهجي ويو، جيڪي علائقي اڳتي هئا انهن تي وڌيڪ پيسو لڳايو ويو جنهن سان گهٽ ترقي يافته علائقا وڌيڪ پوئتي رهجي ويا. هن چيو ته اندازو لڳايو ويو ته لاهور ۾ هڪ انسان تي 70 هزار رپيا خرچ ڪيا ويا جڏهن ته ننڍي علائقي راجن پور ۾ جتي پيسي جي ضرورت هئي اتي هڪ انسان تي اڍائي هزار رپيا خرچ ڪيا ويا اهڙي طرح امير ۽ غريب علائقين ۾ فرق وڌندو ويو. وزير اعظم وڌيڪ چيو ته هن ملڪ کي کڻڻو آهي ته نبي ڪريم ته جي اصولن تي کڻداسين، اسان جي ڪوشش آهي ته پنهنجي ڪمزور علائقن کي اڳتي آڻيون، بلوچستان پوئتي رهجي ويو پر هاڻ هن کي سٺو وڏو وزير مليو آهي، اسان عورتن جي لاءِ اسپيشل پروگرام آڻي رهيا آهيو.

 

12 ڊسمبر تي ٿر جي دوري جو اعلان، اتي به دورو ڪندس جتي بک آهي: چيف جسٽس

اسلام آباد (اين اين آءِ) چيف جسٽس ثاقب نثار 12 ڊسمبر تي ٿر جو دورو ڪرڻ جو اعلان ڪندي سنڌ حڪومت کي انتظام ڪرڻ جي هدايت ڪري ڇڏي ٻڌڻي شروع ٿي ته چيف جسٽس چيو ته مان 12 ڊسمبر تي ٿر وڃي رهيو آهيان سنڌ حڪومت انتظام ڪري چيف جسٽس ريمارڪس ڏنا ته ٿر ۾ تازه ڄاول ٻارڙا فوت ٿي رهيا آهن اتي پاڻي جي فراهمي ۽ دستيابي جا به مسئلا آهن صرف سٺا علائقا نه ڏيکاريو مون اهي علائقا به ڏيکاريوپ جتي غربت ۽ مسئلا آهن ايڊووڪيٽ جنرل سنڌ سپريم ڪورٽ کي ٻڌايو ته گذريل ٻڌڻي تي عدالت سيشن جج کان رپورٽ گهري هئي هن ٻڌايو ته متاثر ماڻهن ۾ اناج ورهايو ويو آهي چيف جسٽس ريمارڪس ڏنا ته 12 ڊسمبر تي ٿر وڃي مان پاڻ صورتحال ڏسندس پوءِ معاملي کي ٻڌڻ بهتر ٿيندو ايڊووڪيٽ جنرل سنڌ جواب ڏنو ته جيستائين اوهان ايندا حالتون بهتر ٿي وينديون ان موقعي تي جسٽس اعجازالحسن پڇاڻو ڪيو ته ٿر ۾ ڊاڪٽرن کي ڇا اضافي مراعتون ڏيئي رهيا آهيو جنهن تي ايڊووڪيٽ جنرل سنڌ عدالت کي ٻڌايو ته گرينڊ ون کان 11 جي ملازمن کي 10 هزار اضافي، گريڊ 12 کان 16 تائين جي ملازمن کي 17 هزار اضافي گريڊ 17 جي ملازمن کي 90 هزار جڏهن ته گريڊ 18 کان مٿي هڪ لک 40 هزار اضافي ڏيئي رهيا آهيون ٻڌني دوران سنڌ اسيمبلي ميمبر رميش ڪمار چيو ته وزيراعظم هائوسنگ اسڪيم ٿر ۾ آڻڻ گهرجي هن چيو ته مٺي ۾ ڊليوري لاءِ ڊاڪٽر نه آهن جڏهن ته ٿر ۾ جانورن جي ڊاڪٽرن جي به ضرورت آهي جنهن تي چيف جسٽس ريمارڪس ڏنا ته پنهنجي اکين سان اصل صورتحال ڏسي پوءِ معاملو ٻڌندس سپريم ڪورٽ عدالتي مددگار فيصل صديقي کي سنڌ حڪومت جي درخواست تي ڪمنٽس ڏيڻ لاءِ چيو جنهن تي فيصل صديقي چيو ته ٿر ۾ احتساب ۽ نگراني جي موثر نظام جي ضرورت آهي تنهنڪري هڪ عدالتي ڪميشن مقرر ڪيو وڃي فيصل صديقي چيو ته ٿر ۾ بئنڪ قرضن جو وڏو معاملو آهي ۽ قرض ادا نه ٿيڻ جي ڪري ماڻهو آپگهات ڪري رهيا اهن جنهن تي اسٽِٽ بئنڪ جي نمائندي عدالت کي آگاهه ڪيو ته هارين جا قرض ري شيڊول ڪري رهيا آهيون جنهن تي چيف جسٽس ريمارڪس ڏنا ته 11 ۽ 12 ڊسمبر تي ڪراچي وڃي رهيا آهيون سپريم ڪورٽ جي رٽائرڊ جج جي سربراهي ۾ ڪميشن ٺاهينداسين جنهن کان پوءِ ڪيس جي ٻڌڻي ملتوي ڪئي ويئي.

 

 

اسان ڀوڳيو آهي ڀل ٻيا به ڀوڳين، نيب جهڙو آهي تيئن ئي رهڻ گهرجي: نواز شريف

اسلام آباد ( ويب ڊيسڪ ) اڳوڻي وزيراعظم نواز شريف چيو آهي ته نيب جو قانون غلط آهي، پر نيب جهڙو آهي اهڙو ئي رهڻ گهرجي، اسان ڀوڳي چڪا آهيون، باقي به ڀوڳين. عدالتي ڪمري ۾ ميڊيا سان غير رسمي طور ڳالهائيندي نواز شريف چيو ته دنيا اسان جي دور م معيشت جي تعريف ڪئي،  19 هزار اسٽاڪ ايڪسچينج کي وڌائي 53 هزار تي آندو، اسان جي چئن سالن جي دور ۾ ڊالر ايترو نه وڌيو جيترو موجوده حڪومت جي ڪجهه مهينن ۾ وڌي ويو آهي. هن چيو ته ملڪي معيشت لاءِ ڪرنسي مضبوط هئڻ گهرجي، 2013ع کان 2017ع تائين اسٽاڪ ايڪسچينج تمام سٺو رهيو، ملڪي معيشت موجوده حڪومت کانسواءِ هر شيءَ کي برداشت ڪري سگهي ٿي. اڳوڻو وزيراعظم چيو ته اهو نه ٿو ٿي سگهي ته ڊالر وڌي ۽ وزيراعظم کي خبر ئي نه پوي، اسان جي دور ۾ منهنجي فيصلي کانسواءِ ڊالر 10 پئسن کانسواءِ به نه وڌيو، مون کي خبر ناهي ته ڊالر کي هيٺين سطح تي رکڻ لاءِ هٿرادو طريقيڪار ڪهڙو آهي،  جيڪڏهن اسان ڊالر کي هيٺين سطح تي رکڻ لاءِ هٿرادو طريقو استعمال ڪيو ته موجوده حڪومت به ڪري وٺي. هن چيو ته اسان جي حڪومت دهشتگردي تي ضابطو آندو،  ڪراچي شهر کي پرامن بڻايو،  شهباز شريف ڪراچي نه ويو پوءِ فيصل واوڊا کان 500 ووٽن تان هارايو، اسان لوڊشيڊنگ جو خاتمو ڪيو هو،  آءِ ايم ايف جي رپورٽ موجب اسان جي دور ۾ معيشت جي گروٿ 6 ڏهائي 6 رهي. اڳوڻي وزيراعظم چيو ته اسان جي دور ۾ ٽماٽا 20 رپيه ڪلو هو، هاڻي 200 رپين کان وڌيڪ آهي، گئس ۽ ڀاڻ جي قيمتن ۾ ٻيڻ تي اضافو ڪيو ويو آهي، دنيا ۾ پئٽرول جا اگهه گهٽ ٿين ٿا پر هتي وڌي ويندا آهن. هن چيو ته ملڪي معيشت يوٽرن نه پر سچ ڳالهائڻ ۽ ڪم ڪرڻ سان مضبوط ٿيندي آهي، نيب کي مان نه پر مشرف ٺاهيو، نيب جو قانون غلط آهي، پڇن ٿا ته فيملي 1999ع ۾ ڇو ٻاهر وئي،  مشرف جلاوطن ڪيو، مرضي سان ٻاهر نه وياسين. هن چيو ته ڪو ته پڇي ته احتساب ڪئين ٿي رهيو آهي، نيب عمران خان جي هيليڪاپٽر جو به احتساب ڪري، نيب عمران خان جي ٻي ڪٽنب جو به احتساب ڪري، اسان جي آمدني جو رڪارڊ 1937ع کان وٺي موجود آهي. سندس چوڻ هو ته سياست ۾ اچڻ کان اڳ وڌيڪ خوشحال هئاسين، سياست ۾ اچڻ بعد پريشانين ۾ اضافو ٿيو آهي.

 

 

 

وڏي وزير جو ٿر کان ڪينجهر ۽ ڪراچي کان ڪشمور تائين وڻڪاري جو اعلان

ڪراچي  (اسٽاف رپورٽر) سنڌ جو وڏو وزير سيد مراد علي شاهه چيو آهي ته سندس ڪجهه اهم رٿائن ڪراچي سرڪلر ريلوي (ڪي سي آر)، ڪيٽي بندر، ڌاٻيجي اسپيشل اڪنامڪ زون، درياهه جي لائننگ، ڪراچيءَ لاءِ ميگا ڊيسيلينيشن پلانٽ جهڙين رٿائن کي ڊسمبر 2018ع جي آخر ۾ رٿيل سي پيڪ بابت جوائنٽ ڪوآرڊينشن ڪميٽي (جي سي سي) اجلاس ۾ پيش ڪندو. هن اها ڳالهه بيجنگ ۾ ٿيندڙ جي جي سي واري اجلاس تياري ڪرڻ بابت هڪ اعليٰ سطحي اجلاس جي صدارت ڪندي ڪئي. اجلاس ۾ صوبائي زراعت وارو صوبائي وزير اسماعيل راهو، توانائي وارو صوبائي وزير امتياز شيخ، ٽرانسپورٽ وارو صوبائي وزير اويس شاهه، رٿابندي ۽ ترقيءَ وارو چيئرمين محمد وسيم، وڏي وزير جو پرنسپل سيڪريٽري ساجد جمال ابڙو، سنڌ بورڊ آف انويسٽمينٽ جي ڊائريڪٽر عظيم عقيليءَ ۽ لاڳاپيل سيڪريٽرين شرڪت ڪئي. وڏي وزير چيو ته 29 ڊسمبر 2018ع تي منعقد ٿيندڙ جي سي سي جي ڇهين اجلاس ۾ انهن ٽن رٿائن جي منظوري ڏني وئي هئي ۽ انهن کي ٻيهر اٿاريو ويندو. هن چيو ته سندس ڪيترين ئي فارملٽيز کي مڪمل ڪيو ويو آهي. ڪراچي سرڪلر ريلوي هڪ تمام اهم رٿا آهي جيڪا مان پنهنجي شهرين کي بطور تحفو ڏيڻ چاهيان ٿو. هن چيو ته اهو 1.97 بلين ڊالرن ۽ 43.24 ڪلوميٽر ڊگهي رٿا سان شهر جي ٽريفڪ جا مسئلا حل ٿيندا پر ان جي بدولت شهر جو اربن ٽرانسپورٽ واري سهولت جي حوالي سان گڏيل طور تي اميج پڻ بهتر ٿيندو. ڪي سي آر رٿا وزير مينشن کان شروع ٿيندو ۽ ٽاور، ڪراچي سٽي، ڊي او سيز، ڪراچي ڪينٽ، نيول، چنيسر، شهيد ملت، ڊرگ روڊ، ڊرگ ڪالوني، اسٽارگيٽ، جناح ٽرمنل، جوهر، الادين پارڪ، نيپا، گيلاني، ياسين آباد، لياقت آباد، ناظم آباد، اورنگ آباد، ڪي بي ايل، منگهوپير، سائيٽ، شاه لطيف، بلديا، لياري ۽ واپس وزير مينشن تائين آهي. ڌاٻيجي اسپيشل اڪنامڪ زون رٿا بابت ڳالهائيندي وڏي وزير چيو ته اها رٿا 1530 ايڪڙ ايراضيءَ تي قائم ڪيو پيو وڃي، اهو زون هڪ اهم هنڌ تي واقع آهي جيڪو نيشنل هاءِ وي سان ڳنڍيل آهي ۽ موٽر وي جي ويجهو آهي، ان رٿا تي اٽڪل 43 بلين رپيا لاڳت ايندي. چيئرمين پي اينڊ ڊي محمد وسيم وڏي وزير کي ٻڌايو ته ڪيٽي بندر جو ڪاغذي ڪم مڪمل ڪيو ويو آهي ۽ پهرين ڀاڱي ۾ اهو بطور هڪ جيٽي ڪوئلي جي برآمد لاءِ استعمال ڪيو ويندو ۽ ٻئي ڀاڱي ۾ انکي هڪ مڪمل بندرگاهه طور تي اپ گريڊ ڪيو ويندو. اها ويڪري ۽ وسيع روڊ سان گڏ بطور بندرگاهه ڳنڍيل آهي ۽ ان جي نيشنل هاءِ وي ۽ موٽر وي ڏانهن ويندڙ پهچ وارا روڊ هوندا. مراد علي شاهه چيو ته سندس ڪجهه ٻين رٿائن تي پڻ ڪم ڪيو آهي جن ۾ زراعت جي رٿا، ماحوليات وارو منصوبو، ڪراچيءَ لاءِ ميگا ڊيسيلينيشن پلانٽ ۽ گڊو کان سکر درياهه جي لائننگ جي درخواست ڪري سگهون ٿا. وڏي وزير چيو ته چين زراعت جي شعبي ۾ شاندار ترقي ڪئي آهي ۽ اسان انهن جي تحقيق ۽ عملي ڪم کان فائدو حاصل ڪرڻ چاهيون ٿا. هن چيو ته زراعت جي منصوبي ۾ فصلن جي پوکيءَ ۾ تبديلي، لو ڊيلٽا کي متعارف ڪرائڻ، وڌيڪ پيداوار حاصل ڪرڻ ۽ سموري زراعت جي نظام جو ميڪنيزم شامل آهي. ماحولياتي منصوبي تي ڳالهائيندي مراد علي شاهه چيو ته سندس سڄي صوبي کي ”سرسبز سنڌ“ طور ڏسڻ چاهي ٿو جنهن تحت لکن جي انگ ۾ وڻ ۽ ٻوٽا لڳايا ويندا ۽ انهن جي سارسنڀال ڪئي ويندي. هن چيو ته مان ٿر کان ڪينجهر ۽ ڪراچي کان ڪشمور وڻڪاري شروع ڪندس. هن چيو ته اهو سڀ سائنسٽيفڪ ريت ٿيندو. وڏي وزير چيو ته ماڻهو ماحوليات جي تبديليءَ جي ڳالهه ڪندا آهن پر اسان عملي طور تي پيرس معاهدي جي رهنمائيءَ ۾ مجموعي ماحول کي بهتر بڻائڻ لاءِ اپاءَ وٺنداسين. هن چيو ته سندس هڪ پلان جوڙيو آهي جنهن تحت گڊو بئراج کان سکر بئراج درياهه جي لائننگ ڪئي ويندي. هن چيو ته مون پاڻيءَ جي ماهرن سان صلاح مشورا شروع ڪيا آهن ۽ انهن صلاح مشورن کي ايندڙ 15 ڏينهن ۾ حتمي شڪل ڏني ويندي جيڪڏهن اهو منصوبو فزيبل آهي ته ان کي جي سي سي واري اجلاس ۾ پيش ڪيو ويندو. مراد علي شاهه چيو ته گڊو بئراج کان سکر بئراج درياهه جي لائننگ سان نه رڳو اهو ته پاڻي کي محفوظ ڪرڻ ۾ مدد ملندي پر ان جي ڪري درياهه جي ساڄي ۽ کاٻي پاسي دياهه جي ڪنارن تي وڻن جي ڪٽائي ۾ پڻ گهٽتائي ايندي جتي هزارين ايڪڙ ايراضي پاڻيءَ هيٺ آهي. هن چيو ته ان سان ڪچي وارا علائقا ٻوڏ کان پڻ محفوظ رهندا.

 

سول ۽ عسڪري ادارن جي گڏ هلڻ سان 70 سالن جو پرڏيهي پاليسي جو مهور تبديل، ڪرتارپور لنگهه ان جو هڪ مظهر آهي: فواد چوڌري

اسلام آباد (اين اين آءِ) سڌ سماءَ جي وفاقي وزير فواد حسين چيو آهي ته سول ۽ عسڪري ادارن جي گڏجي هلڻ سان 70 سالن جي پرڏيهي پاليسي جو مهور تبديل ٿي ويو آهي، ڪارتارپور بارڊر ان جو هڪ مظهر آهي، چين پاڪستان اقتصادي لنگهه عظيم معاشي منصوبو آهي، ڪشمير سميت ٻيا تڪرار حل ڪرڻ لاءِ ڀارت سان ڳالهيون ئي اڳتي وڌڻ جو رستو آهي، اميد آهي ته ايندڙ چونڊن کانپوءِ ڀارت پاڪستان جي ڳالهين جي آڇ تي غور ڪندو، پاڪستان سميت دنيا جي مشهور يونيورسٽين مان شاگردن کي حڪومت انٽرنشپ جا موقعا فراهم ڪندي، وزيراعظم جي اڳواڻي ۾ موجوده حڪومت ملڪ جي معيشت بحال ڪرڻ لاءِ خاص ڌيان ڏئي رهي آهي، افغانستان ۾ امن قائم ڪرڻ لاءِ پاڪستان ڪردار ادا ڪرڻ لاءِ تيار آهي، تشدد ۽ نفرت پکيڙيندڙ ميڊيا جي ذريعن کي ريگيوليٽ ڪرڻ لاءِ عالمي سطح تي نظام جي تياري جي ضرورت آهي، خميس تي چوڌري فواد حسين آڪسفورڊ يونيورسٽي ۾ قومي، علائقائي ۽ پرڏيهي اهم معاملن تي ليڪچر ڏنو، ليڪچر جو احتمام آڪسفورڊ ڏکڻ ايشيا سوسائٽي ۽ آڪسفورڊ پاڪستان سوسائٽي ڪيو هو، مختلف عنوانن ۾ تعليم هيٺ شاگردن جو وڏو انگ ليڪچر ۾ شريڪ ٿيو، هن چيو ته آڪسفورڊ يونيورسٽي جي دوري جو مقصد وزيراعظم عمران خان جي سوچ موجب شاگردن ۽ تعليمي ادارن سان رابطا قائم ڪرڻ آهي، سڌ سماءَ جي وزير اهم قومي ۽ علائقائي معاملن تي اڳڀرائپ بابت تاريخي جائزو پيش ڪيو، هن چيو ته علائقائي تڪرارن جا اثر پاڪستان جي معيشت ۽ سماجي زندگي تي پيا، ان جي باوجود پاڪستان غير معمولي مزاحمت ڪندي پنهنجو پاڻ کي برقرار رکيو آهي. فواد چوڌري چيو ته پاڪستان کي پنهنجي تجارتي خساري تي ضابطو آڻڻو پوندو، اهو مقصد حاصل ڪرڻ لاءِ ملڪ ۾ خاص اقتصادي زون جوڙي حڪومت صنعتي ترقي لاءِ ڪم ڪري رهي آهي، وفاقي وزير شاگردن جي سي پيڪ بابت اولهه ميڊيا ۾ موجود ناڪاري تاثر کي زائل ڪيو ۽ ڪيترن ئي عنوانن تي شاگردن جي سوالن جا جواب ڏنا. هن چيو ته آمريڪا گڏيل عرب امارات، سعودي عرب سميت ٻين ملڪن جي وڏين ڪمپنين پاڪستان جي معيشت جي مختلف شعبن ۾ اربين ڊالرن جي سيڙپڪاري ۾ دلچسپي ڏيکاري آهي، ڪرپشن جي پاڙ پٽڻ ۽ مني لانڊرنگ ختم ڪرڻ جو پڪو پهه ڪيو آهي، هن چيو ته پاڪستان ۾ ميڊيا مڪمل آزاد آهي، موجوده حڪومت رياستي ميڊيا مان به سينسرشپ ختم ڪري ڇڏي آهي، هن چيو ته تشدد ۽ نفرت پکيڙيندڙ ميڊيا ذريعن کي ريگيوليٽ ڪرڻ لاءِ عالمي سطح تي نظام تيار ڪرڻ جي ضرورت آهي، هن چيو ته حڪومت ملڪ کان ٻاهر رهندڙ پاڪستانين جي معاشي ۽ سياسي معاملن ۾ شرڪت وڌائڻ لاءِ ڪم ڪري رهي آهي، هن چيو ته ملڪ کان ٻاهر رهندڙ پاڪستانين جي مختلف شعبن ۾ مهارت ۽ تجربن مان فائدو حاصل ڪنداسين، ان موقعي تي شاگردن چيو ته پي ٽي آءِ حڪومت جي ملڪ کان ٻاهر رهندڙ پاڪستانين ۾ مقبوليت جو هڪ سبب ڪرپشن جي خاتمي لاءِ ان جو عزم آهي.

 

پاڪساني اختيارين ۽ آءِ ايم ايف وچ ۾ ويڊيو ڪانفرنس تي رابطو، ڳالهيون جاري رکڻ تي اتفاق

اسلام آباد (ويب ڊيسڪ ) پاڪستان اختيارين ۽ عالمي مانيٽري فنڊ ( آءِ ايم ايف) وچ ۾ ويڊيو ڪانفرنس تي رابطو ٿيو، جنهن دوران ڳالهيون جاري رکڻ تي اتفاق ڪيو ويو. ذريعن موجب ويڊيو ڪانفرنس ۾ پاڪستان طرفان ناڻي واري وزير اسد عمر ۽ ناڻي واري سيڪريٽري سميت ٻين اختيارين شرڪت ڪئي. ذريعن وٽان مليل ڄاڻ موجب ويڊيو ڪانفرنس دوران پاڪستان آءِ ايم ايف جي مطالبن تي هن وقت تائين ڪيل عملدرآمد جي باري ۾ آگاهه ڪيو. پاڪستان اختيارين موقف ڄاڻايو ته پاڪستان قابل قبول شرطن تي آءِ ايم ايف جو پروگرام وٺڻ چاهي ٿو ۽ ملڪي معيشت ۽ ترقي کي نقصان پهچائڻ واري ڪا به شرط تسليم نٿا ڪري سگهون. ذريعن موجب آءِ ايم ايف طرفان پاڪستاني موقف تي هاڪاري ردعمل ڏنو ويو ۽ ڳالهيون جاري رکڻ تي اتفاق ڪيو ويو .

 

 

بلاول ڀٽو زرداري کان تقريبن 20 سوال پڇيا ويا، جعلي اڪائونٽس جي معاملي تي سوالنامي جو تفصيل سامهون اچي ويو

اسلام آباد (اين اين آءِ) مبينه جعلي اڪائونٽس ڪيس جي جاچ ۾ قائم ٿيل گڏيل جاچ ٽيم پاران بلاول ڀٽو زرداري کي موڪليل سوالنامي جو تفصيل آڏو اچي ويو ذريعن موجب بلاول ڀٽو زرداري کي تفصيلي سوالنامو موڪليو ويو آهي جنهن ۾ بلاول کان زرداري گروپ جي ڊائريڪٽر جي حيثيت سان اٽڪل 20 سوال پڇيا ويا آهن ذريعن موجب سوالنامي ۾ بلاول کان پڇا ڪئي ويئي ته زرداري گروپ جا ڪاروباري معاملا ڪير ڏسي ٿو ڊائريڪٽر جي حيثيت سان اوهان ڪڏهن ذميواريون سنڀاليون زرداري گروپ جو اومني گروپ سان ڪاروباري تعلق جي نوعيت ڇا آهي ذريعن موجب بلاول کان لڪي انٽرنيشنل جي اڪائونٽ مان زرداري گروپ ۾ جمع ڪيل پئسن بابت پڇا ڳاڇا ڪئي ويئي آهي جڏهن ته عمير ايسوسيئيٽ، اوشين انٽرپرائيزز ۽ ڊريم ٽريڊنگ اينڊ ڪمپني بابت سوال به شامل آهن ذريعن موجب سوالنامي ۾ پڇا ڪئي ويئي ته عمير ايسوسيئيٽ اڪائونٽس مان پئسن جون 34 منتقليون ڪيئن ٿيون آهن گهرنمبر ڊي 30 بلاڪ، 3 ڪلفٽن جو 15 لک 40 هزار رپئن جو پاڻي جو بل هو، 20 اپريل 2015 تي هي بل هڪ خانگي بئنڪ ۾ ميسرز رائيل انترنيشنل جي اڪائونٽ مان ڪيئن جمع ڪرايو ويو بلاول هائوس کي کاڌو فراهم ڪندڙ ريسٽورنٽ کي لاجسٽڪ ٽريڊنگ جي اڪائونٽ مان 44 لک 40 هزار رپيا ڪيئن ادا ڪيا ويا پيپلزپارٽي جي اڳواڻ فاروق ايڇ نائڪ بلاول ڀٽو لاءِ جي آءِ ٽي جو سوالنامو وصول ڪرڻ جي ترديد ڪري ڇڏي آهي ذريعن جو چوڻ آهي ته جي آءِ ٽي بلاول ڀٽو کي 22 نومبر تي ان حوالي سان سمن موڪلي هئي سمن ۾ بلاول ڀٽو کي 28 نومبر تي گهرايو ويو هو پر بلاول ڀٽو جي آءِ ٽي جي سمن تي پيش نه ٿيو هو جڏهن ته 23 نومبر تي بلاول ڀٽو زرداري جي قانوني ٽيم جعلي بئنڪ اڪائونٽس جي جاچ ڪندڙ جي آءِ ٽي کي پنهنجي لکت جواب ۾ ٻڌايو آهي ته ان جي مئوڪل کي زرداري گروپ پرائيويٽ لميٽيڊ جي لين دين جي حوالي سان خبر نه آهي ذريعن موجب بلاول ڀٽو زرداري پاران جي آءِ ٽي کي ڏنل لکت جواب ۾ چيو ويو هو ته سندس پيءُ آصف علي زرداري سمورا ڪاروباري معاملا ڏسي رهيو هو بلاول پنهنجي جواب ۾ دعويٰ ڪئي ته جيتوڻيڪ اهو سچ آهي ته هو زرداري گروپ پرائيويٽ لميٽيڊ جي ڊائريڪٽر مان آهي جڏهن ته هن ڪاروباري معاملن ۾ حصو ناهي ورتو سمورا معاملي سندس پيءُ آصف علي زرداري ڏسندو هو تنهنڪري جي آءِ ٽي کي جعلي بئنڪ اڪائونٽس ڪيس بابت ان کان ئي پڇا ڳاڇا ڪرڻ گهرجي.

 

سياسي پد وڌڻ سان جمهوريت جي ڊي ريل ٿيڻ جو خطرو آهي: سعد رفيق

لاهور(ويب ڊيسڪ) پاڪستان مسلم ليگ ن جي اڳواڻ خواجا سعد رفيق جو چوڻ آهي ته سياسي گرمي پد وڌي ويو ته خطرو آهي ڪٿي جمهوريت ڊي ريل نه ٿي وڃي. لاهور پريس ڪلب ۾ پريس ڪانفرنس ڪندي اڳوڻي ريلوي واري وفاقي وزير خواجا سعد رفيق جو چوڻ هو ته عمران خان جيڪو به چيو يوٽرن ورتو، يوٽرن هاڻ عمران خان جو برينڊ بڻجي چڪو آهي. هن چيو ته سفارتي محاذ تي موجوده حڪومت سخت شرمندو ڪيو آهي، ڪستي ۾ سعودي عرب کان سواءِ ٻيو ڪجهه به سڪو نه وڌو، سي پيڪ سان راند ڪئي پئي وڃي ۽ هنن اهو سڀ ڪجهه سي پيڪ سان ڪيو جيڪو هندوستان نه ڪري سگهيو. سندس چوڻ هو ته وزير اعظم چوي ٿو ته مون کي ٽي وي ڏسي رپئي جي قدر ڪرڻ جي خبر پئي، اسٽاڪ مارڪيٽ روز ڪريش ڪندي آهي پر ڪو به سنڀالڻ وارو ناهي، پهريون ڀيرو اهڙي حڪومت ڏٺي آهي جيڪا 100 پورا ٿيڻ تي چوي ٿي ته وقت کان اڳ چونڊون ٿي سگن ٿيون يعنيٰ هي پاڻ ئي عدم اعتماد ڪري رهيو آهن ملڪ نه پيا سنڀالي سگهن. هن چيو ته جڏهن به ووٽ جو مذاق اڏايو ويندو ۽ عوام جو فيصلو نه مڃيو ويندو ته اهڙا ئي حڪمران ايندو جن کي ڪم ڪرڻ ئي ناهي ايندو.

 

ارشد پپو قتل ڪيس: سرڪاري سرپرستي ۾ قتل ۽ ڏوهن جو اعتراف، رينجرز عزير بلوچ جو حلفي اعترافي بيان پيش ڪري ڇڏيو

ڪراچي(ويب ڊيسڪ) سنڌ هاءِ ڪورٽ ۾ ارشد پپو قتل ڪيس جي ٻڌڻي ٿي، عدالت جاچ آفيسر جي عدم حاضري تي ٻڌڻي ملتوي ڪري ڇڏي، رينجرز پراسيڪيوٽر عزير بلوچ جو حلفي بيان عدالت ۾ پيش ڪري ڇڏيو. تفصيل موجب سنڌ هاءِ ڪورٽ ارشد پپو قتل ڪيس جي ٻڌڻي جي موقعي تي جوابدارن جي ضمانت واري درخواست ۾ اهم اڳڀرائي ٿي آهي، جاچ آفيسر عدالت ۾ پيش نه ٿي سگهيو.  عدالت جو چوڻ هو ته پوليس کي هڪ ٻيو موقعو ڏيون ٿا نه ته وارنٽ جاري ڪري سگهون ٿا، بعد ۾ سنڌ هاءِ ڪورٽ ٻڌڻي 16 ڊسمبر تائين ملتوي ڪري ڇڏي. ان کان سواءِ رينجرز پراسيڪيوٽر عزير بلوچ جو حلفي بيان عدالت ۾ پيش ڪري ڇڏيو، حلفي اعترافي بيان ۾ عزير بلوچ سرڪاري سرپرستي ۾ قتل، ڀتا خوري ۽ زمينن تي قضبن جو اعتراف ڪيو آهي، عزير بلوچ جي اعترافي بيان ۾ چيو ويو آهي ته انسپڪٽر چاند نيازي به منهنجي اِشارن تي ڪم ڪندو هو. ٻئي وپاسي وڪيل جو چوڻ هو ته ڪنهن شاهد جوابدارن ۽ درخواستگذارن جي خلاف شاهدي ناهي ڏني، پراسيڪيوٽر رينجرز ساجد محبوب جو چوڻ هو ته اِهو بيان عزير بلوچ جي گرفتاري کان پهرين جا آهن، گرفتاري کان پوءِ واري صورتحال تبديل ٿي چڪي آهي، عدالت ٻڌڻي 16 ڊسمبر تائين ملتوي ڪري ڇڏي.

 

 

جعلي ڊگري ڪيس: پي آءِ اي ۽ سول ايوي ايشن جا سربراهه طلب

اسلام آباد (اين اين آءِ) سپريم ڪورٽ جعلي ڊگري ڪيس ۾ پاڪستان ايئر لائينز ۽ سول ايويئيشن جي سربراهن ۽ جعلي ڊگري هولڊرز جو سمورو رڪارڊ ماتحت عدالتن کان گهري ورتو جڏهن ته ڊگرين جي تصديق نه ڪندڙ يونيورسٽيز جي سربراهن کي گهرائي ورتو جمعي تي جعلي ڊگرين جي ڪيس جي ٻڌني ٿي ٻڌڻي دوران سپريم ڪورٽ ۾ پي آءِ اي جي جعلي ڊگرين بابت تفصيل پيش ڪيو ويو ڊپٽي اٽارني جنرل عدالت کي ٻڌايو ته پي آءِ اي ۾ 498 پائليٽ آهن 12 پائليٽس جون ڊگريون جعلي نڪتيون ۽ جعلي ڊگري هولڊرز جي خلاف ڊسپلنري ڪارروائي ڪئي پئي وڃي هن ٻڌايو ته هڪ هزار 864 ڪريو ميمبرن مان 73 جي ڊگري جعلي نڪتي 146 ڪريو ميمبرن جون ڊگريون تصديق جي مرحلي ۾ آهن چيف جسٽس ريمارڪس ڏنا ته ڊگري جعلي آهي ته انڪوائري ڪهڙي ڳالهه جي جنهن تي سول ايويئيشن عملدارن مطابق پائليٽس کي گرائونڊ ڪيو ويو آهي جعلي ڊگري واري پائليٽس جا لائسنس معطل ڪري ڇڏيا آهن. جنهن کان پوءِ عدالت پي آءِ اي سول ايويئيشن جي سربراهن ماتحت عدالتن کان جعلي ڊگري هولڊرز جو سمورو رڪارڊ ۽ ڊگرين جي تصديق نه ڪندڙ يونيورسٽيز جي سربراهن کي به طلب ڪري ورتو.