تازيون خبرون

Daily Archives: May 1, 2018

نواز شريف هر مرحلي تي اسان کي وڪرو ڪيو، هاڻي سندس ساٿ نه ڏينداسين: آصف زرداري

لاهور (اين اين آءِ) اڳوڻي صدر آصف علي زرداري چيو آهي ته نوازشريف مون کي هر موقعي تي اسٽيبلشمينٽ سان ويڙهائي پاڻ وڃي هٿ ملايو مان مشرف جي مواخذي جو اعلان ڪيو ته نوازشريف پوئتي هٽي ويو اينٽ سان اينٽ وارو بيان به نوازشريف جي اهڙي چال ۾ اچي ڏنو هو سنڌ ۾ نيب ۽ ٻين ادارن سان ڪارروايون به نوازشريف جي چوڻ تي ٿيون نوازشريف هاڻي ڀوڳي هاڻي ڪنهن به صورت ساڻس هٿ نه ملائيندس ميڊيا رپورٽ مطابق آصف علي زرداري نوازشريف کان وڇوٽين جو تفصيل سينيئر پارٽي اڳواڻن آڏو رکي ڇڏيو هن چيو ته نوازشريف پنهنجي ويجهي آفيسر جي ذريعي مون ڏانهن مختلف پيغام اماڻيندو رهيو اسان نوازشريف کي جيترو سادو سمجهون ٿا هو ان کان ڪيترائي ڀيرا وڌيڪ موقعي پرست آهي اسان سويلين بالادستي جي نيت سان نوازشريف جي سڏ ۾ سڏ ڏيندا رهياسي اسان سياست ۽ نوازشريف تجارت ڪندو رهيو نوازشريف اسان کي هر موقعي تي وڪرو ڪيو مان سياست کان هٽي نوازشريف سان سماجي لاڳاپا رکڻ چاهيان پيو پر هن منهنجي نيڪ نيتي جو ناجائز فائدو ورتو هن نوازشريف کان وڇوٽين جا راز کوليندي ٻڌايو ته نوازشريف پرويز مشرف تي غداري جو ڪيس ٺاهيو ته اسان ساٿ ڏنو نوازشريف يقين ڏياريو ته هو پرويز مشرف کي وڃڻ نه ڏيندو مان مشرف کي وڃڻ نه ڏيڻ جو بيان ڏنو ته نوازشريف کيس ٻاهر اماڻي ڇڏيو خبر پئي ته نوازشريف مون کي يقين ڏيارڻ کان اڳ مشرف سان ڊيل ڪري چڪو هو اڳوڻي صدر جو چوڻ هو ته اينٽ سان اينٽ وارو بيان به نوازشريف جي اهڙي چال ۾ اچي ڏنو هو آصف زرداري چيوت ه منهنجي بيان مان فائدو وٺي نوازشريف رائيل شريف سان معاملا سڌا ڪرڻ جي ڪوشش ڪئي نوازشريف پنهنجي ويجهي آفيسر ذريعي مون کي ورغلائيندو رهيو اسان نوازشريف کي جيترو سادو سمجهون ٿا هو ايترو .ئي چالاڪ ۽ موقعي پرست آهي هن چيو ته اسان جمهوريت آئين ۽ سويلين بالادستي جي نيت سان ان جي سڏ ۾ سڏ ڏيندا رهياسين.

 

مٿان حڪم وٺندڙ اصول جي ڳالهه پيا ڪن، ڪنهن ايجنڊا کي ڪامياب ٿيڻ نه ڏينداسين: نواز شريف

اسلام آباد ( ويب ڊيسڪ ) اڳوڻي وزيراعظم نواز شريف چيو آهي ته ووٽ کي عزت ڏيو جو نعرو مقبوليت حاصل ڪري چڪو آهي، مان حالتن کان گهٻرائڻ يا ڊڄڻ وارو نه آهيان، ايندڙ چونڊون حڪومت جي پنجن سالن جي ڪارڪردگي جي بنياد تي وڙهنداسين، عوامي نمائندا چونڊ مهم تيز ڪن.  نواز شريف جي صدارت هيٺ ملتان ۽ بهاولپور ڊويزن جي عهديدارن جو اجلاس ٿيو. اجلاس ۾ مريم نواز، حمزا شهباز شريف سميت ٻين اڳواڻن شرڪت ڪئي. عوامي نمائندن کي خطاب ڪندي نواز شريف چيو ته ووٽ کي عزت ڏيڻ کانسواءِ ملڪ ترقي نه ٿو ڪري سگهي، مسلم ليگ ن کي جلسن ۾ ڀرپور موٽ ملي رهي آهي. هن چيو ته ملڪ ۾ رڳو منهنجو ئي احتساب ٿي رهيو آهي، پاناما ۾ ايندڙ 400 ماڻهن خلاف ڪارروائي ٿي؟ الزام هڻندڙن کي پاڻ خبر ناهي ته منهنجو ڏوهه ڪهڙو آهي. سندس چوڻ هو ته ڪراچي ۾ امن امان جو ڪريڊٽ به مسلم ليگ ن کي وڃي ٿو، سي پيڪ منصوبو عوام لاءِ اسان جي حڪومت جو تحفو آهي. نواز شريف چيو ته ڪي پي ۾ تبديلي جا نعرا کوکلا آهن، مسلم ليگ ن اڳ وانگر متحد ۽ مضبوط آهي، ڪجهه مفاد پرست ماڻهو اسان کي ڇڏي ويا آهن. هن چيو ته اصولن جي ڳالهه ڪندڙ مٿان آڊر وٺندا آهن، جيئن سينيٽ ۾ ٿيو هاڻي قومي اسيمبلي ۾ به ساڳيو ڪجهه ٿيڻ وڃي رهيو آهي پر لوٽن کي چونڊن ۾ عبرت جو نشان بڻايو ويندو. سندس چوڻ هو ته اسان کي عهد ڪرڻو آهي ته ڪنهن به اهڙي ايجنڊا کي ڪامياب ٿيڻ نه ڏنو ويندو، مون کي جيل ۾ وجهي سگهجي ٿو پر فيصلو ڪري ڇڏيو آهي ته اهڙن ٽڪساٽن اڳيان نه جهڪندس، جيڪڏهن پوئتي هٽياسين ته تاريخ معاف نه ڪندي، اها جنگ ڪاميابي سان کٽنداسين. اڳوڻي وزيراعظم چيو ته پرويز مشرف ۽ آصف زرداري دهشتگردي خلاف ڪارروائي ڇو نه ڪئي، هو ڊنل هئا پر اسان چيو ته پاڪستان ۾ دهشتگردي جو ڪهڙو ڪم، هاڻي گهڻو ٿي ويو. هن چيو ته ڪراچي مان ڀتا خوري، ٽارگيٽ ڪلنگ کي ختم ڪرڻ جو فيصلو ڪيو، سنڌ ۾ پ پ حڪومت کي 10 سال ٿي ويا آهن پر هنن ڇا ڪيو آهي، ڇا ڪراچي ۾ امن سندن ذميواري نه هئي، کي عوام مئنڊيٽ ڏنو هو.

 

پ پ پورهيتن جو استحصال ڪندڙ قوتن آڏو پهاڙ بڻجي سامهون ايندي: بلاول ڀٽو زرداري

ڪراچي (اسٽاف رپورٽر) پاڪستان پيپلز پارٽي جي چيئرمين بلاول ڀٽو زرداري ملڪ جي مزدور ۽ پورهيت طبقي کي خاطري ڪرائي آهي ته پي پي پي سندن حقن لاءِ جاکوڙيندي رهندي، ڇاڪاڻ ته سماج وانگر پارٽي لاءِ به ڪرنگهي جي حيثيت اهي پورهيت ئي آهن. مزدورن جي عالمي ڏينهن جي موقعي تي جاري ڪيل پنهنجي پيغام ۾ پي پي پي چيئرمين چيو ته وزيراعظم شهيد ذوالفقار علي ڀٽي 10 فيبروري 1972ع ۾ ملڪ ۾ پهريون ڀيرو مزدور پاليسي جو اعلان ڪيو ۽ ملڪ ۾ ٽريڊ يونينز جا حق متعارف ڪرايا. هن چيو ته اها عوامي حڪومت ئي هئي، جنهن بينظير امپلائيز اسٽڪ آپشن اسڪيم جي شروعات ڪئي ۽ قومي ادارن جي ملازمن کي شيئر مفت ۾ ڏنا. بلاول ڀٽو زرداري سنڌ حڪومت پاران ٽي-ڌري مزدور پاليسي جي واکاڻ ڪئي، جنهن جي منظوري حڪومت، پورهيتن ۽  نوڪري ڏيندڙن گڏيل اتفاق سان ڏني ۽ اهو پڻ اتفاق ڪيو ويو ته انهن وچ ۾ سهڪار ضروري آهي. هن چيو ته سنڌ حڪومت کانسواءِ ٻي ڪنهن به صوبائي حڪومت اهو سنگ ميل پار نه ڪيو، ڇاڪاڻ ته انهن پارٽين جي اوليتن ۾ پورهيت شامل ئي ناهن. سندس وڌيڪ چوڻ هو ته اها به پاڪستان پيپلز پارٽي ئي هئي، جنهن سنڌ ۾ بي زمين هارياڻين کي زرعي زمين جا مالڪاڻا حق ڏنا ۽ يونين ڪائونسل سطح تي غربت جي خاتمي لاءِ پروگرام شروع ڪيو، جنهن 6 لک ڪٽنبن کي غربت جو خول ٽوڙي ٻاهر نڪرڻ ممڪن بڻايو ۽ اهي ننڍن ڪاروبارن وسيلي پنهنجو گذر سفر ڪري رهيا آهن. پي پي پي چيئرمين ملڪ جي مزدورن ۽ پورهيتن تي زور ڀريو ته هو پي پي پي ۾ شامل ٿي ان کي وڌيڪ سگهارو بڻائين ته جيئن اها کين حق ڏياري ۽ انهن کي تحفظ ڏي. بلاول ڀٽو زرداري ان عزم جو ارادو ڪيو ته پي پي پي مستقبل ۾ وڌيڪ مزدور دوست قانونسازي ڪندي ۽ پورهيتن جو استحصال ڪندڙ قوتن آڏو پهاڙ بڻجي سامهون ايندي.

 

تيل اسمن جا اگهه 7 رپين تائين وڌائڻ جي سفارش

اسلام آباد ( ويب ڊيسڪ ) اوگرا سڀاڻي کان پئٽرول 3 رپيه 22 پئسا ۽ ڊيزل 5 رپيه 2 پئسا في لٽر مهانگو ڪرڻ جي سفارش ڪري ڇڏي آهي. ايندڙ مهيني لاءِ اوگرا پئٽروليم شين جي اگهن ۾ اضافي جي سمري تيار ڪندي پئٽروليم وزارت حوالي ڪري ڇڏي آهي. سمري ۾ پئٽرول، ڊيزل، گاسليٽ ۽ ٻين شين جا اگهه وڌائڻ جي سفارش ڪئي وئي آهي. سمري ۾ پئٽرول 3 رپيه 22 پئسا، ڊيزل 5 رپيه 2 پئسا، گاسليٽ 6 رپيه 97 پئسا ۽ لائيٽ ڊيزل آئل 6 رپيه 95 پئسا في لٽر مهانگي ڪرڻ جي سفارش ڪئي وئي آهي.

 

 

ٿرپارڪر ۽ ٻين ڏورانهن علائقن ۾ ٻارن جي صحت جي خدمتن جي بهتريءَ لاءِ ڪوششون ڪري رهيا آهيون: مراد علي شاهه

ڪراچي (اين اين آءِ) سنڌ جي وڏي وزير سيد مراد علي شاهه چيو آهي ته هُو خاص طور تي ٿرپارڪر ۽ ٻين ڏورانهن علائقن ۾ ٻارن جي صحت جي خدمتن جي بهتريءَ لاءِ ڪوشان آهي. هن اها ڳالهه اڄ وزيراعليٰ هائوس ۾ چائلڊ فائونڊيشن جي هڪ وفد سان ملاقات جي موقعي تي ڪئي. وڏي وزير چيو ته سندس هر هڪ ٽيچنگ اسپتال، ضلعي هيڊڪوارٽر اسپتال، تعلقي هيڊڪوارٽر اسپتال ۽ بنيادي صحت جي مرڪزن ۾ ٻارن لاءِ صحت جون بهترين خدمتن جي فراهميءَ لاءِ هڪ واضح پلان ڏنو آهي. هن چيو ته اهو چائلڊ فائونڊيشن سان شراڪتداريءَ تحت ڪم ڪرڻ جو محرڪ هو. وڏي وزير ٻڌايو ته چائلڊ فائونڊينش کي مختلف ضلعي اسپتالن ۽ ٽيچنگ اسپتالن ۾ تمام جلد وارڊ يا خاص جاءِ ڏني ويندي. هن چيو ته شهيد بينظير آباد ۾ 18 مئي کان، ڄام شورو ۾ 18 جون کان ۽ سکر ۾ 18 ڊسمبر کان وارڊ چائلڊ فائونڊيشن وارڊ آپريٽ ڪندا. وڏي وزير چيو ته سندس ٿر جي ٻارن جي تمام گهڻي فڪر آهي جتي ٻارن کي اڃا به خاص توجهه جي ضرورت آهي. هن چائلڊ فائونڊيشن کي هدايت ڪئي ته اهي مٺي سول اسپتال ۾ پنهنجي پروفيشنل ٽيم موڪلي وڃي ۽ اتي موجود سمورين سهولتن جو معائنو ڪري ۽ هڪ هفتي اندر کين رپورٽ ڏني وڃي ته اتي سهولتن ۾ ڪا گهٽتائي ته نه آهي ته جيئن جيڪڏهن ڪا گهٽتائي آهي ته ان جو فوري طور تي تدارڪ ڪري سگهجي. هن چيو ته اسان سول اسپتال مٺي کي تمام تر جديد سهولتن ۽ اوزارن سان آراستا ڪيو آهي ۽ اڃا به اتي ٻارن جي موت جي شرح جون رپورٽس آهن جيڪي مون لاءِ ڳڻتيءَ جوڳي ڳالهه آهي.هن چيو ته مان چاهيان ٿو ته اوهان مٺي اسپتال ۾ موجود سهولتن جو مڪمل ريت سروي ڪري ان بعد مون کي رپورٽ ڪريو ته جيئن چائلڊ فائونڊيشن سان گڏجي ان کي اپ گريڊ ڪري سگهجي. مراد علي شاهه اهو به چيو ته ٽيچنگ اسپتالن، ڊي ايڇ ڪيو ۽ ٽي ايڇ ڪيو ۾ فارميسي کي به بهتر بڻائڻ جي ضرورت آهي. هن چيو ته مان سمورين سرڪاري اسپتالن ۽ صحت جي سهولتن جو ڪمپيوٽرائيزڊ رڪارڊ چاهيان ٿو ته انهن کي مناسب ريت چڪاس ڪري سگهجي. وڏي وزير چيو ته سڄي صوبي ۾ سمورين سرڪاري اسپتالن ۾ مريضن کي مناسب ريت دوائون ڏنيون وينديون آهن پر صحت جون خدمتون انهن سرڪاري اسپتالن جتي خانگي شعبو حڪومت سان گڏ شراڪتداريءَ ۾ ڪم ڪري رهيو آهي ڪجهه بهتر آهن. مراد علي شاهه چيو ته سندس نيشنل انسٽيٽيوٽ آف چائلڊ هيلٿ (اين آءِ سي ايڇ) کي خاص توجهه ڏني آهي ۽ انهن جي خدمتن ۽ آلات کي بهتر بڻائي رهيا آهيون ۽ سڄي صوبي ۾ ان جا سيٽيلائيٽس به قائم ڪيا ويندا. ٻئي طرف سنڌ جي وڏي وزير سيد مراد علي شاهه چيو آهي ته اسانجي حڪومت 2008ع ۾ آئي ته پاڪستان پيپلز پارٽي پهرين ئي بجيٽ ۾ شهيد بينظير يوٿ ڊولپمينٽ پروگرام شروع ڪيو ۽ 2008ع کان هن وقت تائين 9 مرحلا ٿي چڪا آهن ۽ اسان رڳو ان کي پروگرام تائين محدود ناهي رکيو پر عملي طور تي ان پروگرام تي عملدرآمد ڪنديلکين جي انگ ۾ ٻارن ۽ ٻارڙين کي فني سکيا ڏني وئيئ وڏي وزير اها ڳالهه اڄ نيشنل ووڪيشنل اينڊ ٽريننگ ڪميشن جي اهتمام هيٺ پروگرام کي خطاب ڪندي ڪئي. وڏي وزير چيو ته جيڪڏهن اسان پنهنجي نوجوانن کي صحي نموني استعمال نه ڪيو ته اهي هيڏانهن هوڏانهن جي ڪمن ۾ لڳي ويندا ۽ ان کي ڏسندي اسان 2013ع ۾ قانونسازي ڪئي ۽ اسيمبليءَ مان هڪ قانون پاس ڪيو ۽ شهيد بينظير ڀٽو يوٿ ڊولپمينٽ بورڊ قائم ڪيو ويو. هن چيو ته 2008ع کان وٺي اڃا تائين سوا ٽي لک ٻار ۽ ٻارڙيون ان پروگرام تحت سکيا حاصل ڪئي آهي ۽ انهن کي 90 مختلف شعبن ۾ سکيا ڏني پئي وڃي ۽ اسانجي ڪوشش آهي ته اسان ان پروگرام کي اڃا اڳتي وڌايون. هن چيو ته هتان کان سکيا وٺندڙن جي اها ئي سوچ هوندي آهي ته انهن کي سرڪاري نوڪري ملي وڃي پر حڪومت ايتريون ملازمتون نه ٿي ڏئي سگهي جيڪڏهن سڀ ماڻهو ڪلرڪ ۽ ايڊمنسٽريشن ۾ هلي ويندي ته ٽيڪنيڪل شعبي کي ڪير ڏسندو. وڏي وزير چيو ته فني سکيا حاصل ڪندڙ ٻارن ۽ ٻارڙيون کي اصل ۾ اسانجي قوم جا معمار آهن ۽ انهن ئي قوم کي بڻائيندا انڪري انهن تي خاص ڌيان ڏيڻ گهرجي. وڏي وزير چيو ته سنڌ حڪومت هڪمائننگ ڪمپني بڻائي ۽ ان تحت هڪ پاور پلانٽ به بڻجي رهيو آهي ۽ اتي فني ليبر ۽ ٽيڪني ماڻهن ۽ انجنيئرز جي گهرج آهي. هن چيو ته ٿر ۾ 70 سيڪڙو ملازمتون مقامي رهواسين کي ڏنيون ويون آهن. هن چيو ته چين جون ڪمپيون جيڪي اتي ڪم ڪري رهيون آهن انهن سان معاهدو ڪيو ويو آهي ته هر هڪ چائنيز پنجن مقامي رهواسين کي سکيا ڏيندو آهي. ٿر ۾رهواسين کي مڪمل سنڌي به ڳالهائڻ ناهي ايندي ڇاڪاڻ ته انهن جي پنهنجي مختلف ٻولي آهي ۽ جيڪي چيني ايندا آهن انهن کي به انگريزيءَ جو هڪ به لفظ ناهي ايندو پر اهي هڪٻئي کي سيکاريندا رهندا آهن ۽ گڏجي ڪم ڪري رهيا آهن. وڏي وزير چيو ته هتان سکيا وٺندڙ اڄ هڪ لک ماهوار پگهار کڻي رهيا آهن جيڪا وزيراعليٰ جي پگهار کان به وڌيڪ آهي. هن چيو ته اوهان پنهنجي پاڻ ۾ اعتماد پيدا ڪندا ته اوهان گهڻي ترقي ڪندا ۽ اوهان ڪڏهن به منفي سوچ نه رکيو. وڏي وزير چيو ته الله پاڪ اسانکي هڪ اهڙي ملڪ کان نوازيو آهي جيڪو قدرتي وسيلن سان مالا مال آهي ۽ ان جي ترقي ۽ خوشحاليءَ لاءِ اسانکي گڏجي ڪم ڪرڻ گهرجي. وڏي وزير چيو ته نيڪ ٽيڪ جا ٿورا مڃيندي چيو ته اڄ اوهان مونکي ان تقريب ۾ گهرايو. هن چيو ته 2008 کان سنڌ حڪومت اسڪل ڊولپمينٽ جو جيڪو پروگرام شروع ڪيو آهي ان لاءِ اڃا به وڌيڪ ڪرڻ جي ضرورت آهي.وڏي وزير چيو ته سدنس ٻڌايو ويو آهي ته هتي 24 هزار ماڻهن کي هر سان سکيا ڏني ويندي آهي ۽ انهن 24 هزار ماڻهن مان ٽن ريجن ڪراچي، حيدرآباد ۽ سکر جي ماڻهن ۾ پهرين هڪ مقابلو ڪرايو ويو ۽ پوءِ اتان جيڪي ڪامياب ٿيا انهن کي هتي مقابلي لاءِ گهرايو ويو آهي. وڏي وزير تقريب ۾ ڪامياب شاگردن ۽ شاگردياڻين ۾ انعامات پڻ تقسيم ڪيا.

 

جنهن وٽ 5 سالن کان هڪ صوبو آهي اُهو رڳو تقريرون پيو ڪري: احسن اقبال

اسلام آباد(ويب ڊيسڪ) وفاقي گهرو وزير احسن اقبال عمران خان جي تقرير تي رد عمل ڏيندي چيو آهي ته ڇا عمران خان زندگي ۾ ڪڏهن هڪ ڏينهن به سرڪاري آفيس هلائي. تفصيل موجب اڳوڻي وفاقي وزير سماجي رابطن واري ويب سائيٽ ٽوئيٽر تي پنهنجي پيغام ۾ عمران خان جي تقرير رد عمل ڏيندي چيو ته تقرير جو اسڪرپٽ 2011ع وارو هو. احسن اقبال چيو ته جنهن وٽ 5 سالن کان هڪ صوبو آهي اُهو رڳو تقريرون ڪري رهيو آهي، ڇا عمران خان زندگي ۾ ڪڏهن هڪ ڏينهن ڪا سرڪاري آفيس هلائي.  هن وڌيڪ چي ته ڪنهن اهڙي ڊيسينٽ وٽ ويندسين جنهن هڪ ڏينهن به پريڪٽس نه ڪئي هجي؟ هن ڊاڪٽر عارف علوي کي مخاطب ڪندي چيو ته هو حيقيقت پسند بڻجي.

 

پنجاب ۾ هاڻ ٽو هارس ريس آهي، چونڊن ۾ صرف پي ٽي آءِ ۽ ن ليگ وچ ۾ مقابلو ٿيندو: عمران خان

لاهور (اين اين آءِ) تحريڪ انصاف جي چيئرمين عمران خان چيو آهي ته پنجاب ۾ هاڻ ٽو ريس آهي ۽ چونڊن ۾ رڳو پي ٽي آءِ ۽ ن ليگ وچ ۾ مقابلو ٿيندو، چونڊن کان اڳ ڪيترائي سياستدان پي ٽي آءِ ۾ اچڻ چاهين ٿا جن ۾ ڪجهه بدنام آهن ته ڪافي سٺا نالا به آهن، بي بي سي کي انٽرويو ڏيندي هن چيو ته لاهور جلسي جو مقصد هڪ ته ايندڙ چونڊن لاءِ پارٽي جا 11 نقطا عوام کي ٻڌائڻا هئا ۽ ٻيو مقصد ان تاثر کي غلط ثابت ڪرڻو هو ته ماڻهو عدليا جي فيصلن سان خوش نه آهن، هي ن ليگ جو ڳڙهه آهي ۽ ثابت ڪرڻ چاهيان ٿو ته ماڻهو خوش آهن، پهريون ڀيرو هڪ طاقتور کي ڪنهن قانون جي هيٺان وٺي آيو آهي، هن چيو ته هتي ته رول آف لا ئي نه آهي، هتي طاقتور لاءِ هڪ ۽ ڪمزور لاءِ ٻيو قانون آهي، ان ڪري هن ريلي جو اهو مقصد آهي ته اسان هڪ پاڪستان، هڪ جهڙو تعليمي نظام، هڪ ئي قانون ۽ طاقتور ۽ ڪمزرو لاءِ هڪجهڙو نظام چاهيون ٿا، هن چيو ته اسان ته 2013 کان اڳ لڳاتار لڳل هئاسين پر اهڙا ماڻهو پي ٽي آءِ ۾ ايندا نه هئا، اهڙا سياست تڏهن توهان جي جماعت ۾ اچن تڏهن اهي سمجهن ٿا ته منهنجو ايترو ووٽ بينڪ آهي ۽ پارٽي جي ووٽ بينڪ سان مان اليڪشن کٽي سگهندس، هن وقت تائين ته اهي سمجهي رهيا هئا ته پارٽي جو ووٽ بينڪ نه آهي، هن چيو ته 2013 ۽ هاڻ ۾ اهو فرق آهي ته پنجاب ۾ هيءَ ٽو هارس ريس آهي، ن ليگ ۽ پي ٽي آءِ جو مقابلو آهي، ان کان پ پ ۽ ق ليگ به هئي، ٽو هارس ريس ڪري اسان وٽ موقعو آهي ته اسان اهڙن سياستدانن جي چونڊ ڪريون جن مان ڪجهه اهڙا آهن جيڪي بدنام آهي ۽ ڪجهه سٺا آهن پر اسان کي چونڊ ڪرڻي آهي ۽ سچ پچ ۾ ماڻهو اسان وٽ اچي رهيا آهن، هن چيو ته جمهوريت ۽ آمريت ۾ فرق اهو آهي ته جمهوريت ۾ قيادت جوابده هوندي آهي، آمريت ۾ نه هوندي آهي ته اسان ان کان جواب گهرون ٿا ۽ اهي چون ٿا ته مون کي ڇو ڪڍيو، مطلب اهو آهي ته اهي سمجهن ٿا ماڻهون رڌون، ٻڪريون ۽ بيوقوف آهن، ماڻهن کي توهان چوتيو بڻائي وٺندا ته مان وڏو مظلوم آهيان ۽ اهو هي سمجهي رهيو آهي ته ان سان هو منڊيلا بڻجي ويندو. هو ته مارڪوس بڻجي سگهي ٿو پر منڊيلا ڪڏهن به نٿو بڻجي سگهي، آڪٽومبر 2011 ۽ پوءِ 29 اپريل جي جلسي ۾ فرق ٻڌايئندي هن چيو ته 30 آڪٽومبر 2011 جي ريلي ۾ اسان جي جماعت پهريون اڀري سامهون آئي هئي، هاڻوڪي ريلي ۾ اهو ڏيکارڻو ته هاڻ هيءَ هڪ وڏي پارٽي بڻجي چڪي آهي، هيءَ هڪ ملڪي پارٽي بڻجي چڪي آهي ۽ چئني صوبن ۾ پکڙجي وئي آهي، ان سوال تي ن ليگ پنهنجن جلسن ۾ ترقياتي ڪم بيان ڪري ٿي ۽ ان جو ئي نعرو هڻي ٿي، پاڪستان تحريڪ انصاف جو نعرو ڇا هوندو، سندس چوڻ هو ته اسان ۾ ۽ ان ۾ بنيادي فرق اهو ته آهي ته اهي افتتاح ڪندا رهن ٿا، چون ٿا ته ميٽرو ٺاهي ڇڏي، اسان چئون ٿا ته اصل ڊولپمينٽ انسانن جي هوندي آهي، ته انسانن جي ڊولپمينٽ اوهان نه ڪريو ۽ رڳو  پلون ٺاهيندا رهو، ائين ته ڪو به ملڪ ترقي ناهي ڪري سگهيو، اهي ميگا منصوبا ان ڪري نٿا بڻائين جو اهي ملڪ جي ضرورت آهي، پر ان لاءِ بڻائين ٿا ته ان ۾ وڏي رشوت ملي ٿي، جنهن به ملڪ ترقي ڪئي آهي ان پنهنجي عوام تي پيسو خرچ ڪيو آهي.

 

چيف جسٽس ٿرڪول منصوبي جي دوري کانپوءِ ان بابت ڪجهه چوي ها ته مناسب ٿئي ها: ناصر شاهه

ڪراچي (اين اين آءِ) صوبائي وزير سيد ناصر حسين شاهه چيو آهي ته چيف جسٽس جيڪڏهن ٿرڪول منصوبي جو دورو ڪرڻ بابت ان منصوبي بابت ڪجهه چوي ها ته مناسب ٿئي ها، سنڌ حڪومت اتي سٺو ڪم ڪيو آهي ٿي سگهي ٿو ته اسان کان ڪا ڪوتاهي ٿي هجي پر اسان جي سوچ هاڪاري آهي، هي سنڌ جو سڀ کان وڏو منصوبو آهي جنهن سان سڄي پاڪستان کي فائدو ٿيندو، اتي هن وقت تائين 15 ارب رپين کان وڌيڪ رپين جي سيڙپ ٿي چڪي آهي، هتي ڪنهن صوبائي حڪومت پاران ٺاهيو ويندڙ پهريون هوائي اڏو اسلام ڪوٽ بڻايو ويو آهي ۽ ان ئي بنياد تي اهي چئي سگهن ٿا ته ٿر بڻجندو پاڪستان اهڙن خيالن جو اظهار هن گذريل شام هڪ مقامي هوٽل ۾ هڪ اداري اين او ويٽ جي ارسلان احمد ۽ علي ناصر پاران پهرين بزنس اينڊ انڊسٽري ايڪسيلنس ايوارڊ ورهائڻ واري تقريب کي خطاب ڪندي ڪيو، جنهن ۾ تعليم، ميڊيا، ٽريڊ ۽ انڊسٽري جي شعبي ۾ نمايا ڪارڪردگي ڪندڙ ماڻهن کي ايوارڊ ڏنا ويا، تقريب کي بلوچستان جي اقليتي معاملن جي وزير، اڳوڻي سينيٽر عبدالحسيب خان، محمد علي جناح يونيورسٽِي جي ايسوسيئيٽ ڊين ڊاڪٽر شجاعت مبارڪ، بلوچستان جو مشهور صنعتڪار سردار شوڪت ۽ ٽي وي اينڪر نديم پڻ خطاب ڪيو، سيد ناصر حسين شاهه چيو ته کيس ڏسي وڏي خوشي ٿي آهي جو هن تقريب ۾ زندگي جي مختلف شعبن سان تعلق رکندڙ ڪامياب ماڻهن کي ايوارڊ ڏنا پيا وڃن، سٺو ڪم ڪندڙ ماڻهن جا حوصلا وڌائڻ سان ملڪ ترقي ڪندو، اسان قومي ترقي ۽ خوشحالي جا گهربل حدف حاصل ڪري سگهنداسين، سينيٽر عبدالحسيب خان چيو ته اڄ ملڪ ۾ قومي بجيٽ تي هر طبقي جو ماڻهو پنهنجو اظهار ڪري رهيو آهي، ڪجه چون ٿا ته بجيٽ سٺي آهي ۽ ڪي چون ٿا ته بجيٽ مناسب نه آهي جنهن سان ايندڙ حڪومت کي ڏکيائيون پيدا ٿينديون، هن موجوده حڪومت سان 5 سالن تائين بجيٽ ٺاهڻ ۾ حصو ورتو آهي، اسحاق ڊار 2015 تائين تعليم جي بجيٽ 5 مان 7 سيڪڙو تائين آڻڻ جو واعدو ڪيو هو جيڪو اڄ تائين پورو نه ٿيو آهي، اڄ به ملڪ جا 23 لک ٻارڙا اسڪول وڃڻ کان محروم آهن. ٻئي طرف  سنڌ جي اطلاعات، ليبر ۽ ٽرانسپورٽ کاتي واري وزير سيد ناصر حسين شاهه پنهنجي بيان ۾ چيو آهي ته ايف سي ايريا لياقت آباد ۾ چيئرمين بلاول ڀٽو زرداري کي ڪامياب جلسي ڪرڻ تي مبارڪباد پيش ڪيون ٿا. سيد ناصر حسين شاهه چيو آهي ته ڪراچي جي ماڻهن ثابت ڪري ڇڏيو آهي ته اهي پيپلز پارٽي تي اعتماد ڪن ٿا. هن چيو ته اڄ ڪراچي جي عوام دهشتگردن جي خلاف فيصلو ڪيو آهي. سيد ناصر حسين شاهه چيو ته ايندڙ اليڪشن ۾ ڪراچي مان پيپلز پارٽي ڪلين سئيپ ڪندي. سيد ناصر حسين شاهه چيو ته خان صاحب ڪجهه به ڪري پر ڪراچي جا ماڻهو هن جي ڳالهين ۾ ڪونه ايندا. جلسي کان اڳ سيد ناصر حسين شاهه ۽ آغا علي نقوي پاران بلاول ڀٽوزرداري لاءِ ٻڪرن جو صدقو پڻ پيش ڪيو.

 

ڪوئيٽا ۾ موٽرسائيڪل سوار هٿياربندن جي فائرنگ، 3 ڄڻا مارجي ويا

ڪوئيٽا ( ويب ڊيسڪ ) ڪوئيٽا ۾ موٽرسائيڪل سوار هٿياربندن جي فائرنگ ۾  3 ڄڻا مارجي ويا ۽ 3 زخمي ٿي پيا، بلوچستان جي گهرو وزير واقعي واري هنڌ جو معائنو ڪري زخمين کي بهتر طبي سهولتون ڏيڻ جي هدايت ڪئي آهي.ريسڪيو ذريعن موجب جان محمد روڊ تي موٽرسائيڪل سوار نامعلوم هٿياربندن فائرنگ ڪري ڏني.فائرنگ جي نتيجي ۾ 3 ڄڻا مارجي ويا، جڏهن ته 3 ڄڻا زخمي ٿي پيا، لاشن ۽ زخمين کي سول اسپتال نيو ويو، جتان کين ٽرانا سينٽر منتقل ڪيو ويو.مارجي ويل ماڻهن جي سڃاڻپ وقاص خان، شبير احمد ۽ علي خان جي نالن سان ٿي آهي.واقعي کانپوءِ پوليس ۽ ايف سي علائقي ۾ پهچي واقعي واري هنڌ کي سيل ڪري ڇڏيو ۽ جوابدارن جي تلاش شروع ڪري ڇڏي، پوليس طرفان واقعي جي جاچ جاري آهي.بلوچستان جي گهرو وزير سرفراز بگٽي جان محمد روڊ تي فائرنگ واري هنڌ جو دورو ڪيو ۽ آءِ جي بلوچستان کان واقعي جي رپورٽ طلب ڪري ورتي آهي.گهرو وزير زخمين کي بهتر طبي سهولتون فراهم ڪرڻ جي هدايت ڪئي آهي

 

نيب طرفان نواز شريف خلاف پهريون ايون فيلڊ ريفرنس جو ٽرائل مڪمل ڪرائڻ جو فيصلو

اسلام آباد (اين اين آءِ) قومي احتساب بيورو نيب اڳوڻي وزيراعظم نوازشريف خلاف احتساب عدالت ۾ پهريان ايون فيلڊ ريفرنس جو ٽرائيل مڪمل ڪرڻ جو فيصلو ڪيو آهي سومر تي احتساب عدالت جي جج محمد بشير نيب پاران داخل ريفرنسز جي ٻڌڻي ڪئي ان موقعي تي نامزد ٽئي جوابدار نوازشريف، مريم نواز ۽ ڪئپٽن رٽائرڊ محمد صفدر عدالت جي ڪمري ۾ موجود رهيا ٻڌڻي شروع ٿي ته نوازشريف ٽنهي ريفرنسز ۾ واجد ضياء جو بيان قلمبند ڪرڻ جي درخواست داخل ڪئي جنهن تي ڊپٽي پراسيڪيوٽر نيب سردار مظفرعباسي ايتراض واريو ۽ چيو ته شاهد ڪٽهڙي ۾ پيش ٿي چڪو آهي ۽ هاڻي هي نئين درخواست آندي آهي نيب پراسيڪيوٽر چيو ته نوازشريف جي وڪيل واجد ضياء تي جرح کان اڳ ٽنهي ريفرنسز ۾ بيان جو سوچيو وڃي وڪيل ڪارروائي کي بلڊوز ڪرڻ چاهي ٿو ڊپٽي پراسيڪيوٽر نيب عدالت کي اپيل ڪئي ته اسان پهرين مرحلي ۾ لنڊن فليٽس ريفرنس جو ٽرائيل مڪمل ڪرڻ چاهيون ٿا نيب جي جاچ آفيسر عمران ڊوگر صرف ايون فيلڊ ريفرنس ۾ جاچ ڪندڙ آهي ان لاءِ پهريان ان جو بيان رڪارڊ ڪيو وڃي نيب پراسيڪيوٽر چيو ته استغاثا جي شاهدن جي ترتيب پراسيڪيوشن جو قانون اختيار آهي واجد ضياء کان پوءِ فطري طور تي اڳيون شاهد آهي ان موقعي تي نوازشريف جي وڪيل خواجه حارث پاران متفرق درخواست جمع ڪرائي ويئي جنهن ۾ چيو ويو ته ايون فيلڊ ريفرنس ۾ جاچ آفيسر جو بيان رڪارڊ ڪرڻ سان اسان جو دفاع متاثر ٿيندو احتساب عدالت جي جج جاچ آفيسر عمران ڊوگر جو بيان رڪارڊ ڪرڻ جو فصيلو ڪندي چيو ته وڪيل جي درخواست تي فيصلو بعد ۾ ٻڌايو ويندو عمران ڊوگر بيان قلمبند ڪرائيندي چيو ته ڊپٽي ڊائريڪٽر طور نيب لاهور ۾ ڪم ڪري رهيو آهيان نيب ريفرنسز جي جاچ شروع ڪئي ته اسسٽنٽ ڊائريڪٽر نيب هيس عمران ڊوگر ٻڌايو ته 28 جولاءِ 2017 جي فيصلي کان پوءِ مجاز اٿارٽي جاچ لاءِ مقرر ڪيو ۽ 3 آگسٽ 2017 تي ايون فيلڊ پراپرٽيز بابت جاچ سونپي مجاز اٿارٽي نوازشريف، مريم نواز حسن ۽ حسين نواز سميت ڪئپٽن رٽائرڊ صفدر کان جاچ ڪرڻ لاءِ چيو نيب جي گواهه چيو ته جوابدارن کان جاچ ايون فيلڊ پراپرٽي بابت هئي سپريم ڪورٽ کان حاصل جي آءِ ٽي جا واليم هڪ کان واليم 9 اي ريفرنس جو اهم جز آهن ان موقعي تي خواجه حارث اعتراض اٿاريندي چيو ته هي جي آءِ ٽي رپورٽ ڪيئن پيش ڪري سگهن ٿا جنهن تي ڊپٽي پراسيڪيوٽر نيب چيو ته جي آءِ ٽي رپورٽ هڪ دستاويز آهي جيڪا ثبوتن طور حاصل ڪئي ويئي.