تازيون خبرون

Daily Archives: March 15, 2018

سنجراڻي جي درٻار تي سڀني جي جهڪڻ جو سبب سامهون اچڻ گهرجي: نواز شريف

اسلام آباد ( ويب ڊيسڪ ) اڳوڻي وزيراعظم نواز شريف چيو آهي ته سينيٽ چيئرمين جي چونڊن ۾ سمورين پارٽين جي هڪ ئي هنڌ جهڪڻ جو سبب سامهون اچڻ گهرجي. نيب ريفرنسز جي ٻڌڻي لاءِ احتساب عدالت ۾ پيشي کانپوءِ ميڊيا سان ڳالهائيندي نواز شريف چيو ته بني گالا ۽ بلاول هائوس وارا هڪ ئي درٻار تي وڃي ڇو جهڪا آهن، ڪراچي مان ايندڙ به سنجراڻي جي درٻار تي وڃي جهڪي پيا، ڪهڙو سبب هو ته جي پي ايس وانگر هر ڪو هڪ هنڌ وڃي پهتو، سبب عوام سامهون اچڻ گهرجي. صحافي نواز شريف کان سوال ڪيو ته سينيٽ اليڪشن وانگر عام چونڊن کي به مئنيج ڪيو ويو ته ڇا ڪندا؟ نواز شريف جواب ڏنو ته هاڻي نه وقت رهيو آهي ۽ نه ئي حالتون، دنيا هاڻي گهڻو اڳتي هلي وئي آهي، نئين حڪومت آئين کان هٽي ڪري ڪو ڪم نه ٿي ڪري سگهي.

 

حڪومت ستي پئي آهي، پيسا سمنڊ پار موڪلڻ کان روڪڻ لاءِ ڪجهه ته ڪري ها: چيف جسٽس

اسلام آباد(ويب ڊيسڪ) چيف جسٽس پاڪستان جسٽس ثاقب نثار ريمارڪس ڏنا آهن ته حڪومت ننڊ پيل آهي، پيسا ٻاهر موڪلڻ کان روڪڻ لاءِ ڪجهه ته ڪري ها هڪڙو آرڊيننس کي کڻي اچي ها. سپريم ڪورٽ سمنڊ پار پاڪستانين جي بينڪ اڪائونٽن بابت پاڻمرادي  نوٽيس جي ٻڌڻي ٿي. ٻڌڻي دوران چيف جسٽس پاڪستان ريمارڪس ڏنا ته پاناما ۽ پيراڊائز ليڪس ۾ شامل پاڪستانين جي هن وقت تائين ڪا به خبر ناهي، حڪومت پيسا ٻاهر کڻي وڃڻ کان روڪڻ لاءِ ڪجهه ته ڪري ها رڳو هڪ آرڊيننس ئي کڻي اچي ها. ميمبر ريونيو ايف بي آر عدالت کي ٻڌايو ته سمنڊر پار پاڪستانين کي اثاثا ظاهر ڪرڻ لاءِ ايمنسٽي اسڪيم مارچ جي پڄاڻي تائين متعارف ڪرائي ويندي جنهن جو فارميٽ تيار آهي. جسٽس عمر عطا بنديال چيو ته قانون ۾ خامين جي ڪري ڪنهن به اثاثا ظاهر ڪرڻ جي زحمت نه ڪئي، اسان کي ليڪس مان خبر پئي ته ماڻهن جون ڪيتريون ملڪيتون سمنڊ پار آهن، جيڪڏهن ان ۾ قانوني بندوبست ڪيا ويا آهن ته ڪم شروع ٿيڻ گهرجي. فنانس واري سيڪريٽري عدالت ۾ چيو ته ڪيس جا ٻه حصا آهن، هڪ ٻاهر کان پيسا آڻڻ جو، هڪ ٻاهر موڪلڻ کان روڪڻ جو. ان تي چيف جسٽس پاڪستان چيو ته توهان کي ڪو نه ڪو قدم کڻڻ گهرجي ها جيئن پيسا ٻاهر وڃڻ وارو سلسلو بند ٿئي، پاڪستان جي تباهي ائين ٿيندي آهي ڇو ته ماڻهو پيسا ٻاهر کڻي ويندا آهن. جسٽس ثاقب نثار چيئرمين ايف بي آر کان پڇاڻو ڪيو ته توهان انهن ماڻهن کي نٿا پڪڙي سگهو جن جا نالا پاناما ۽ ٻين ليڪس ۾ آيا. ايف بي آر جي چيئرمين جواب ڏنو ته اسان اشتهار ڏنا پر ڪا به انفارميشن ناهي آئي. معزز چيف جسٽس چيو ته ڏسڻو آهي ته اسان پاڪستان کان ٻاهر پيسا کڻي وڃڻ وارو عمل بند ڪري سگهون ٿا يا نه،  اسان جو ڌيان ٻن ڳالهين تي آهي، ڪيمٽي کي ڪجهه به ناهي ڪرڻو، ڪميٽي کي پيش ڪيل رپورٽ ۾ ڪجهه خاص ناهي، اسان ان معاملي کي روزاني جي بنياد تي ٻڌنداسين.  جسٽس ثاقب نثار پڇاڻو ڪيو ته ڇا پاڪستاني شهرين کي  سمنڊ پار پراپرٽي آهن ۽ سندن اڪائونٽن ۾ ڇا رکيل آهي؟ فنانس جي چيف سيڪريٽري چيو ته ٽن مهينن کان حڪومت جي سامهون شيون آنديون آهن. چيف جسٽس پاڪستان ڪاوڙ جو اظهار ڪندي چيو ته حڪومت ڇا ڪري رهي آهي؟ اها ستي پئي آهي، اها خبر هئڻ گهرجي ته ڪهڙن ڪهڙن ماڻهن جا ملڪ کان ٻاهر ڪرنسي اڪائونٽ آهن، ٻارن جي پڙهائي لاءِ پيسا موڪلڻ الڳ شئي آهي. عدالت معاشي ايڪسپرٽ محمود مانڊوي والا ۽ شبرزيدي کي مددگار مقرر ڪندي ٻڌڻي 20 مارچ تائين ملتوي ڪري ڇڏي.

 

زرداري ۽ نواز شريف سان ذاتي جهيڙو ناهي، ويڙهه ڪرپٽ ٽولي خلاف آهي: عمران خان

جهلم(ويب ڊيسڪ) پاڪستان تحريڪ انصاف جي چيئرمين عمران خان چيو آهي ته منهنجي آصف زرداري ۽ نواز شريف سان ڪا به ذاتي ويڙهه ناهي پر اسان جي ويڙهه رڳو ڪرپٽ ٽولي جي خلاف آهي. جهلم ۾ ڪارڪنن کي خطاب ڪندي عمران خان چيو ته 9 سال پهرين هر پاڪستاني تي 35 هزار رپيا قرض هو، پوءِ انهن 9 سالن ۾ آصف زرداري ۽ نواز شريف جو دور آيو جنهن بعد هر پاڪستاني هڪ لک 30 هزار رپين جو قرضي آهي. هن چيو ته ملڪ کي قرضن جي دلدل ۾ ڦاسائي ڇڏيو آهي، ننڍو طبقو امير ۽ عوام قرضي ٿي رهيو آهي، مٿان ويٺل شخص ملڪ جو پيسو چوري ڪري ٻاهر موڪليندا آهن، دنيا ۾ پيٽرول جا اگهه گهٽ آهن پر اسان وٽ اڃان مٿي چڙهي رهيا آهن، چوري ٻيو ڪير پيو ڪري ۽ قيمت عوام پيو ادا ڪري. سندس وڌيڪ چوڻ هو ته زرداري ۽ نواز شريف پيسا چوري ڪري ٻاهر موڪليندا آهن، اسان جي جنگ ڌاڙيلن ۽ ننڍڙي ڪرپٽ ٽولي جي خلاف آهي، آصف زرداري ۽ نواز شريف سان ذاتي ويڙهه ناهي، جيسين جيئرو آهيان جنگ وڙهندو رهندس، 2018ع ۾ کٽي به ڏيکاريندس.

 

ملڪ ۾ تازن ڄاول ٻارن جي موت جي شرح ۾ خطرناڪ حد تائين اضافو

اسلام آباد (ويب ڊيسڪ) پاڪستان ۾ تازن ڄاول ٻارن جي موت واري شرح ۾ خطرناڪ حد تائين اضافو ٿيو آهي. صحت واري وزارت طرفان تازل ڄاول ٻارن جي پيدائش ۽ موت جا تفصيل قومي اسيمبلي ۾ پيش ڪيا ويا، جن ۾ انهن جي موت جي شرح 60 سيڪڙو تائين پهچڻ جو انڪشاف ڪيو ويو آهي. صحت واري وزارت جي تحريري جواب ۾ ٻڌايو ويو آهي ته 2016ع ۾ 63 لک ٻار ڄاوا، 4 لک 41 هزار ٻار هڪ سال ٿيڻ کان اڳ ئي مري ويا، جن مان 2 لک 90 هزار ٻارن جو موت رڳو هڪ مهيني جي عمر ۾ ٿيو. صحت واري وزارت موجب ٻارن جي وقت کان اڳ پيدا ٿيڻ سبب فوت جي شرح 40 سيڪڙو آهي، ڄمڻ کانپوءِ ساهه ٻوساٽجڻ سبب 21 سيڪڙو، جڏهن ته انفيڪشن سبب تازن ڄاول ٻارن جي موت جي شرح 18 سيڪڙو آهي.

 

اسان جهڪيا ناهيون پر ميان صاحب ميمو اسڪينڊل ياد ڪري: خورشيد شاهه

اسلام آباد(ويب ڊيسڪ) مخالف ڌر جي اڳواڻ خورشيد شاهه چيو آهي ته الزام تراشيون نواز شريف جي عادت آهي، اسان جهڪيا ناهيون پر ميان صاحب ميمو اسڪينڊل ياد ڪري. تفصيل موجب مخالف ڌر جي اڳواڻ خورشيد شاهه نواز شريف جي بيان تي رد عمل جو اظهار ڪندي چيو ته نواز شريف کي سينيٽ چونڊن کان پوءِ ڇانگا مانگا ياد اچي رهيو آهي پر هاڻ اُتي وڏيون وڏيون عمارتون بڻجي ويون آهن. خورشيد شاهه جو چوڻ هو ته اسان ڪنهن جي درٻار تي ناهيون جهڪيا،  اسان جي درٻار رڳو جمهوريت آهي، اسان جهڪيا ناهيون پر ميان صاحب ميمو اسڪينڊل ياد ڪري، ميان صاحب ماضي ۾ وڃي ته گهڻيون ئي ڳالهيون ياد اچي ويندس. هن چيو ته الزام تراشيون نواز شريف جي عادت آهي، لڳي ٿو ته نواز شريف عمران خان واري روش اختيار ڪري ورتي آهي. سندس وڌيڪ چوڻ هو ته سينيٽ چيئرمين صادق سنجراڻي اسان سان گڏ ڪم ڪري چڪو آهي، شيري رحمان کي اميدوار نامزد ڪيو ويو آهي کيس ووٽ ڏينداسين، اسان وٽ 21 ۽ پي ٽي آءِ وٽ رڳو 12 ميمبر آهن.

 

آصف علي زرداري ۽ عمران خان هارس ٽريڊنگ جا بادشاهه آهن: مريم اورنگزيب

اسلام ( ويب ڊيسڪ ) سڌ سماءَ واري ممڪلتي وزير مريم اورنگزيب آصف زرداري ۽ عمران خان کي هارس ٽريڊنگ جو بادشاهه قرار ڏئي ڇڏيو. اليڪشن ڪميشن ٻاهران ميڊيا سان ڳالهائيندي مريم اورنگزيب چيو ته هارس ٽريڊنگ جا 2 بادشاهه عمران خان ۽ زرداري صاحب آهن، جن سينيٽ اليڪشن سان جيڪو تماشو ڪيو اهو قوم ڏٺو، امپائر جي آڱر تي ڌمال هڻندڙ ۽ ٽوٽو چٻرائيندڙ پارٽي کان به جواب طلبي ڪرڻ گهرجي. هن چيو ته جن ماڻهن هارس ٽريڊنگ سان اليڪشن کٽي، ن ليگ ڪابه خريد ۽ وڪرو نه ڪيو آهي ۽ نه ٿيڻ ڏنو آهي، عوام اليڪشن ۾ جواب گهرندو، سندن ڪرپشن تي کين رد ڪري ڇڏيندا. ممڪلتي وزير چيو ته اسان جي درخواست تي اليڪشن ڪميشن سينيٽ جي چونڊن ۾ هارس ٽريڊنگ جو نوٽيس ورتو، چاهيون ٿا ته اهڙو قانون هجي جو اڳتي ڪو به هارس ٽريڊنگ نه ڪري سگهي. مريم اورنگزيب چيو ته 30 سيٽن واري پارٽي 44 ووٽ کڻي ته خدشا پيدا ٿيندا آهن، اميدوار جو پنهنجي پارٽي ميمبرن کان وڌيڪ ووٽ وٺڻ هارس ٽريڊنگ جي زمري ۾ اچي ٿو، اسان جو مطالبو آهي ته اليڪشن ڪميشن  هارس ٽريڊنگ بابت جاچ ڪري، اليڪشن ڪميشن کي ذميوارن کان جواب طلب ڪرڻ گهرجي. مريم اورنگزيب چيو ته جڏهن به اداري طرفان حد اورانگهي وئي ته ان جو ري ايڪشن ايندو، آئين تحت سمورن ادارن جو دائرو مقرر آهي ۽ سمورن ادارن کي آئيني حدن ۾ رهي ڪم ڪرڻ گهرجي.

 

سنڌ حڪومت چيٽا ڀيٽي امتحان ۾ شريڪ ٿيندڙ اميدوارن جي ڄمار جي حد ۾ 2 سال جي واڌ ڪري 30 سالن مان 32 سال ڪري ڇڏي

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته سنڌ پبلڪ سروس ڪميشن تحت ٿيندڙ گڏيل چيٽا ڀيٽي امتحان 2018ع ۾ شريڪ ٿيندڙ اميدوارن جي ڄمار جي حد ۾ 2 سال جي واڌ ڪري 30 سالن مان 32 سال ڪري ڇڏي آهي. شيڊول ڪاسٽ اميدوارن جي ڄمار حد 33 سال جڏهن ته سرڪاري ملازمت ڪندڙ اميدوارن لاءِ ڄمار جي حد 35 مان 37 سال هوندي. واضح رهي ته وڏي وزير کي سنڌ پبلڪ سروس ڪميشن جي گڏيل چيٽا ڀيٽي امتحان 2018ع لاءِ اهليت جي حوالي سان ڄمار جي حد ۾ رعايت لاءِ ڪجهه ردخواستون مليون هيون. وڏي وزير چيو ته هُو ڪجهه اميدوارن کي رعايت نه ڏيندس، هن درخواستن کي رد ڪري ڇڏيو ۽ سڀني لاءِ ڄمار جي حد ۾ رعايت ڏيڻ جو فيصلو ڪيو ته جيئن هر هڪ اميدوار ان رعايت مان فائدو حاصل ڪري سگهي. واضح رهي ته وڏي وزير اڳئي سرڪاري کاتن ۾ پهرين جولاءِ 2016ع کان 30 جون 2018ع (پوليس سروس ۽ سنڌ پبلڪ سروس ڪميشن تحت گڏيل چيٽا ڀيٽي وارن امتحانن ذريعي ڀريون ويندڙ اسامين کانسواءِ) جي لاءِ 15 سال عمر جي رعايت جي منظوري ڏني آهي، جنهن تحت 43 سال جي ڄمار جا درخواستگذار سنڌ حڪومت ۾ ملازمتن لاءِ درخواست ڏئي سگهن ٿا.

 

جوتي جوتي واري راند جلد گولي گولي ۾ تبديل ٿي ويندي: شيخ رشيد جي اڳڪٿي

اسلام آباد ( ويب ڊيسڪ ) عوامي مسلم ليگ جي سربراهه شيخ رشيد احمد چيو آهي ته هاڻي جوتي جوتي جي راند ٿي رهي آهي بعد ۾ گولي گولي کيڏندا،  جيڪو شخص ايترو ويجهو اچي جوتو هڻي سگهي ٿو اهو گولي به هڻي سگهي ٿو، الله ملڪ کي حادثي کان بچائي. اسلام آباد ۾ ميڊيا سان ڳالهائيندي شيخ رشيد احمد چيو ته نواز شريف ۽ سندس پارٽي بد حواس ٿي چڪي آهي، مون کي ڪجهه ٿيو ته ذميوار نواز شريف ۽ شهباز شريف هوندا. هن چيو ته اليڪشن جي اهڙي حڪمت عملي هئڻ گهرجي جنهن سان ڪنهن کي به اختلاف نه هجي، سپريم ڪورٽ کي اليڪشن جي حڪمت عملي ڏيڻ گهرجي. سندس چوڻ هو ته شفاف چونڊن لاءِ اهم مسئلو عبري حڪومت جو هوندو، عمران خان تي حملا بدبودار شخص راڻا ثناءَ الله ڪرائي رهيو آهي. شيخ رشيد احمد چيو ته الله مون کي جيڪا عزت ڏني آهي تنهن جي مان قابل نه آهيان، راڻا ثناءَ الله جو معاشري ۾ جيڪو ڪردار آهي اهو شريفن کي سمجهه ۾ نه اچي رهيو آهي،  کين خبر پئجي ويندي، پهريون به راڻا ثناءَ الله جا شهپر ۽ ڀرون خاص مصالحي سان صاف ڪيا ويا هئا.

 

سينيٽ اليڪشن: جي يو آءِ (ف) جي 3 ميمبرن جو ن ليگ کي ووٽ نه ڏيڻ جو انڪشاف

اسلام آباد(ويب ڊيسڪ) سينيٽ جي چيئرمين چونڊن ۾ مسلم ليگ ن جي اتحادي پارٽي جميعت علماءِ اسلام (ف) جي 3 ميمبرن جو ووٽ نه ڏيڻ جو انڪشاف ٿيو آهي. سينيٽ چيئرمين جي چونڊ ۾ حڪمران پارٽي مسلم ليگ ن جي اميدوار راجا ظفر الحق 46 ووٽ حاصل ڪيا هئا جڏهن ته سندس مقابلي ۾ صادق سنجراڻي 57 ووٽ کڻي سينيٽ جو چيئرمين چونڊجي ويو هو.، مسلم ليگ سينيٽ ۾ گهربل ووٽ نه ملڻ جي جاچ ڪرڻ جو اعلان ڪيو هو ۽ هاڻ جاچ ۾ حيران ڪندڙ انڪشاف ٿيا آهن. ذريعن موجب ن ليگ کي امڪاني انگن کان 7 ووٽ گهٽ مليا جڏهن ته پارٽي جي اميدوارن کي ووٽ نه ڏيڻ وارن ۾ ن ليگ جي سينيٽر ڪلثوم پروين ۽ فاٽا مان مرزا آفريدي شامل آهن. ذريعن جو چوڻ آهي ته اتحادي پارٽي جميعت علماءِ اسلام (ف) جي 3 ميمبرن جو به ن ليگ کي ووٽ نه ڏيڻ جو انڪشاف ٿيو آهي. ذريعن ٻڌايو ته ن ليگ جي جاچ موجب جي يو آءِ (ف) جي سينيٽر طلحه محمود، مولانا عطا الرحمان ۽ مولوي فيض محمد به حڪومتي اميدوارن کي ووٽ نه ڏنا جنهن جي ڪري جي يو آءِ ف کي سينيٽ جي ڊپٽي چيئرمين شپ نه ملڻ جا خدشا هئا، راجا ظفر الحق کي رڳو مولانا عبدالغفور حيدري ووٽ ڏنا.

 

نواز شريف اڳ ۾ اعلان نه ڪري ها ته سينيٽ چيئرمين رضا رباني کي ٿيڻو هو: اعتزاز احسن

اسلام آباد (ويب ڊيسڪ) پ پ اڳواڻ اعتزاز احسن چيو آهي ته نواز شريف جيڪڏهن اڳ ۾ اعلان نه ڪري ها ته رضا رباني سينيٽ چيئرمين بڻجي وڃي ها، سينيٽ چيئرمين رضا رباني کي بڻائڻ گهرجي ها، اها منهنجي ذاتي راءِ آهي ته رضا رباني سان اسان کي گهڻو فائدو ٿئي ها. خانگي ٽي وي چئنل جي پروگرام ۾ ڳالهائيندي اعتزاز احسن چيو ته مان 2008ع ۾ پارٽي سان بغاوت ڪئي، ان باوجود مون کي سينيٽر بڻايو ويو، مون کي جڏهن به ڳالهائڻو هوندو آهي ته سڌو سنئون نالو کڻندو آهيان،  نواز شريف ۾ جرئت آهي ته نالو کڻي ڳالهائي. هن چيو ته صادق سنجراڻي ڳجهي راءِ شماري تي سينيٽ چيئرمين چونڊيو ويو، راجا ظهر الحق ن ليگ جو اوپننگ اميدوار نه هو، کيس ن ليگ آخري منٽ ۾ نامزد ڪيو، منهنجي خيال ۾ مولانا نه ن ليگ جا پنهنجا ماڻهو پاسيرا ٿي ويا، نواز شريف سان گڏجي پنهنجو سينيٽر آڻڻ نه پئي چاهيوسين، رضا رباني کي نامزد نه ڪرڻ سياسي فيصلو هو، جيڪڏهن نواز شريف سندس نالو نه کڻي ها ته اهو سينيٽ چيئرمين ٿي پئي سگهيو. سندس چوڻ هو ته نواز شريف کي عدالت جي توهين تي ان وقت ئي طلب ڪيو وڃي ها، جڏهن هو ريلي ڪڍي جاتي امرا پهتو ۽ “مون کي ڇو ڪڍيو” جو پٽڻو پٽي رهيو هو، جيڪڏهن ان وقت اڳوڻو وزيراعظم عدالت ۾ پيش ٿئي ها  ته ڪجهه به نه ڳالهائي سگهي ها، هاڻ نواز شريف ۽ سندس ڌيءُ مريم نواز هوا جي گهوڙي تي سوار آهن. اعتزاز احسن چيو ته جڏهن کان نواز شريف جو ٽرائل ٿي رهيو آهي ته هو پنهنجي صفائي ۾ هڪ ڪاغذ به پيش ناهي ڪري سگهيو، پنجاب ۾ اسان جا ووٽر نٿا چاهين ته نواز شريف کي رعايت ملي، آصف زرداري جنهن شهر ويندو آهي ته ڪجهه ٿيڻ جو گوڙ شروع ٿي ويندو آهي، آصف زرداري جي دل نواز شريف کان وڏي آهي. هن چيو ته هاڻ ن ليگ جا سڀ ووٽ مريم وٽ آهن، هاڻ نواز ليگي اميدوارن کي ٽڪيٽ به مريم ڏيندي، شهباز شريف ۽ چوڌري نثار سميت سڀ گيم مان آئوٽ ٿي چڪا آهن.