تازيون خبرون

Daily Archives: March 9, 2018

سياستدانن جو فيصلو ايندڙ عام چونڊن ۾ عوام ڪندو: وزيراعظم

ڪرڪ (ويب ڊيسڪ) وزيراعظم شاهد خاقان عباسي چيو آهي ته عام چونڊون اچڻ واريون آهن، جنهن ۾ سياستدانن جو فيصلو عوام کي ڪرڻو آهي. ڪرڪ ۾ نيشپا تيل، گئس ۽ ايل جي پي منصوبي جي افتتاح کانپوءِ تقريب کي خطاب ڪندي وزيراعظم چيو ته منصوبي سان او جي ڊي سي ايل کي سالياني 60 ارب رپين جي آمدني ٿيندي، منصوبي ۾ 42 ارب رپين جي رائلٽي ٿي چڪي آهي، اميد ته ان سان مقامي آبادي کي گئس جي فراهمي بهتر ٿيندي. سندس چوڻ هو ته تيل ۽ گئس منصوبي تي 20 ارب رپيا لاڳت آئي آهي، جڏهن ته منصوبي سان پيدا ٿيندڙ گئس جي ماليت سالياني 7 ارب رپيا آهي. شاهد خاقان عباسي چيو ته اسان جي حڪومت آئي ته ملڪ ۾ گئس ۽ بجلي جو بحران هو، هتي پيدا ٿيندڙ گئس جو وڏو حصو زيان ٿي رهيو هو، سڀ ڪم رُڪيل هئا پر اڄ صورتحال بهتر آهي. هن چيو ته ملڪ ۾ 16-16 ڪلاڪ لوڊشيڊنگ ٿيندي هئي پر اڄ پاڪستان اضافي بجلي پيدا ڪري رهيو آهي، لائن لاسز وارن علائقن ۾ مجبورن لوڊشيڊنگ ڪرڻي پئجي رهي آهي. وزيراعظم چيو ته اهو نواز شريف جو نظريو هو، جنهن کي پورو ڪري رهيا آهيون، اهي ڪم گذريل حڪومتون به ڪري پئي سگهيون پر ڪنهن به معاملن کي سڌارڻ لاءِ نه سوچيو. سندس چوڻ هو ته اڄ جيڪي فيصلا ٿي رهيا آهن، انهن جي ڪا حيثيت ناهي، عام چونڊون اچڻ واريون آهن ۽ فيصلو عوام کي ڪرڻو آهي ته اهي ترقي کي ووٽ ڏيڻ چاهيندا يا گاريون ڏيندڙن کي ووٽ ڏيندا. ان موقعي تي وزيراعظم ڪرڪ ۾ انڊس هاءِ وي جي ٻن روڊن کي مڪمل ڪرڻ جو اعلان ڪندي چيو ته هتي وومين يونيورسٽي ڪئمپس به ٺاهيو ويندو.27

 

ايپڪس سنڌ ڪميٽي پاران متحده باني جي نالي سان منصوب هنڌن جا نالا تبديل ڪرڻ جي منظوري

ڪراچي (اسٽاف رپورٽر) اپيڪس ڪميٽي جي 22هين اجلاس ۾ سيف سٽي پرجيڪٽ بابت خدشن جو اظهار ڪيو ويو ته قومي احتساب بيورو (نيب) جي مداخلت سبب ان منصوبي ۾ دير ٿي آهي انڪري اهو فيصلو ڪيو ويو ته نيب کي اعتماد ۾ وٺي ان منصوبي کي ٻيهر شروع ڪيو وڃي. اپيڪس ڪميٽيءَ جو اجلاس اڄ اڱاري ڏينهن وزيراعليٰ هائوس جي ڪانفرنس روم ۾ سنڌ جي وڏي وزير سيد مراد علي شاهه جي صدارت هيٺ منعقد ٿيو. اجلاس ۾ صوبائي گهرو وزير سهيل انور سيال، سڌسماءَ وارو وزير سيد ناصر حسين شاهه، قانون وارو وزير ضياءُالحسن لنجار، چيف سيڪريٽري سنڌ رضوان ميمڻ، ڪورڪمانڊر ڪراچي، ڊي جي رينجرز ميجر جنرل محمد سعيد، وڏي وزير جو پرنسپل سيڪريٽري سهيل راجپوت، ايڊووڪيٽ جنرل ضمير گهمرو، انسپيڪٽر جنرل پوليس سنڌ اي ڊي خواجا، صوبائي گهرو سيڪريٽري قاضي شاهد پرويز، ڊائريڪٽر ايف آءِ اي منير شيخ، قائم مقام پروجيڪٽ ڊائريڪٽر سليم ٻرڙو، قانون لاڳو ڪندڙ ادارن جا سربراهن ۽ لاڳاپيل عملدران شرڪت ڪئي. اجلاس ۾ مدرس بابت قانون، ڪراچي سيف سٽي منصوبي، سائبر ڪرائم، اي ٽي اي تحت ڊيٽينشن پاورز، اسٽريٽ ڪرائم ڪيسز، لينڊ گريبر وارن مامرن، بينڪن جي سڪيورٽي، موٽرسائيڪلن ۾ ٽريڪرز جي انسٽاليشن، درگاهن جي سڪيورٽي آڊٽ، معياري رجسٽريشن نمبر پليٽس، ڪچي آبادين وارن علائقن ۾ آپريشن تي ايجنڊا شامل هئا. آءِ جي پوليس ۽ گهرو سيڪريٽري مدرسن بابت قانون جي مسودي تي اجلاس کي آگاهي ڏني. ڪراچي سيف سٽي منصوبي بابت اپيڪس ڪميٽي اجلاس ۾ ٻڌايو ويو ته نيب ان منصوبي ۾ مداخلت ڪئي ۽ نيب جي ڪري سيف سٽي منصوبو دير جو سبب بڻيو. وڏي وزير چيو ته آءِ ٽي وارن کي گهرائي پروڪيورمينٽ واري معاملي کي حتمي شڪل ڏني وڃي. وڏي وزير چيف سيڪريٽريءَ کي هدايت ڪئي ته ڪراچي سيف سٽي منصوبي جو پروسيس ٻيهر شروع ڪيو وڃي. اهو منصوبو مونکي هر حال ۾ ڪرڻو آهي، اهو شهر جي سڪيورٽيءَ جي حوالي سان اهميت وارو آهي. نيب سان ڳالهه ڪري پنهنجن خدشن کان آگاهه ڪريو ته جيئن اهو منصوبو شروع ڪري سگهجي. واضح رهي ته سيف سٽي منصوبي جي ڪنسلٽنسي 40 ملين رپين کان وڌيڪ جي آهي، ان جي ابتدائي اسٽيج تي ئي نيب خط لکيو آهي، مختلف ايجنسين وڏي وزير کي صلاح ڏني ته اهو منصوبو اهم آهي، ان کي ڪنهن بهتر طريقي سان لاڳو ڪرڻ گهرجي. شهر ۾ اسٽريٽ ڪرائم ۽ ٻين ڏوهن جي کوجنا ڪرڻ ۽ انهن جي روڪٿام لاءِ سيف سٽي منصوبو ضروري آهي. اجلاس کي ٻڌايو ويو ته اهو مدرسن وارو قانون آءِ جي پوليس بڻايو آهي، وفاقي حڪومت به ان تي قانونسازي ڪري رهي آهي پر اڃا تائين ڪا اڳڀرائي ناهي ڪئي وئي. وڏي وزير ايڊووڪيٽ جنرل ضمير گهمري کي وفاقي حڪومت سان ڳالهائڻ جي هدايت ڪندي چيو ته اسان وفاقي حڪومت کي اختيار ڏئي سگهون ٿا ته اهي مدرسن تي قانونسازي ڪن. گهرو وزير چيو ته وفاقي حڪومت مدرسن ۾ سڌارن بابت هڪ ٻه ڀيرا اجلاس گهرايا هئا پر اجلاس نه ٿي سگهيا. وڏي وزير صوبائي گهرو وزير کي چيو ته اوهان وفاقي گهرو وزارت کي ٻڌايو ته مدرسن جي سڌارن تي اپيڪس ڪميٽيءَ دير ڪرڻ تي خدشن جو اظهار ڪيو آهي ۽ ان مسئلي کي فوري طور تي حل وڃي. وڏي وزير سيد مراد علي شاهه چيو آهي ته سائبر قانون جي حوالي سان ڊسمبر 2017ع تي اسان وفاق کي خط لکيو هو، اسان وفاق کي چيو هو ته ڊيٽا شيئرنگ جو معاملو سنڌ پوليس سان ڪيو وڃي. هن چيو ته مان وفاق کي ٻه خط لکيا پر ڪابه مثبت موٽ نه ملي. اي ٽي اي تحت ڊيٽينشن پاورز قانون جي مسودي بابت اپيڪس ڪميٽي اجلاس ۾ تجويز ڏني وئي ته رينجرز کي ڊيٽينشن جا اختيار ڏنا وڃن ۽ ان حوالي سان قانونسازي ڪئي وڃي. وڏي وزير اها تجويز سنڌ ڪابينا ۾ آڻڻ جي هدايت ڪئي. اسٽريٽ ڪرائم بابت اپيڪس ڪميٽي اجلاس کي ٻڌايو ويو ته جوڊيشري اڪيڊمي جي صلاح سان اسٽريٽ ڪرائم ۾ سڌارن آڻي رهيا آهيون، ڪراچيءَ ۾ ڏوهه ڪرڻ جو رجحان وڌي رهيو آهي، موبائل ڦرڻ تي به گولي هلائي ويندي آهي. اپيڪس ڪميٽي اجلاس ۾ تجويز ڏني وئي ته جيڪڏهن اسٽريٽ ڪرائم  ۾ فائر ڪيو وڃي ته ان کي اي ٽي سي زمري ۾ آندو وڃي. وڏي وزير چيو ته مان چاهيان ٿو ته هر حال ۾ اسٽريٽ ڪرمنلز کي سخت کان سخت سزا ملي. هن چيو ته جيڪا به ترميم ڪرڻي آهي ڪئي وڃي شهرين کي هر حال ۾ تحفظ فراهم ڪرڻ گهرجي. وڏي وزير قانون واري وزير کي هدايت ڪئي ته ايندڙ ٻن هفتن اندر اسٽريٽ ڪرائم جو سزائون سخت ڪرڻ جي حوالي سان قانوني مسودي کي منظوريءَ لاءِ موڪليو. لينڊ گريبر بابت اپيڪس ڪميٽي اجلاس ۾ ٻڌايو ويو ته قبضي مافيا خلاف سخت ڪارروائي ڪئي وڃي. سنڌ پوليس کي سول اٿارٽي ڊڪليئر ڪرڻ جي حوالي سان اجلاس ۾ ٻڌايو ويو ته وفاقي حڪومت کي چيو ويو آهي ته سنڌ پوليس کي فارين آرڊر 1951ع ۾ سول اٿارٽي ڏني وڃي. وڏي وزير مراد علي شاهه چيو ته مان پاڻمرادو ان مامري تي وفاقي حڪومت سان ڳالهائيندس. اجلاس ۾ آگاهي ڏني وئي ته سي پيڪ رٿائن ۾ جيترا پوليس اهلڪار هوندا اوترا ئي پرائيوٽ گارڊ رکڻ جي انهن کي هدايت ڪئي وئي آهي. وڏي وزير آءِ جي پوليس کي هدايت ڪئي ته نان-سي پيڪ رٿائن تي ڪم ڪندڙ چين جي ماڻهن کي به سڪيورٽي فراهم ڪئي وڃي. اوهان انهن سان ڳالهايو ۽ چائنيز جي سڪيورٽي کي يقيني بڻائڻ لاءِ ايس او پي بڻائي ڏيو. وڏي وزير فيصلو ڪندي چيو ته ڪنهن به چيني ماڻهوءَ کي جيڪڏهن واپاري پنهنجي منصوبي لاءِ آڻن ٿا ته انهن کي سڪيورٽيءَ جي ايس او پي فالو ڪرڻ گهرجي. وڏي وزير آءِ جي پوليس کي هدايت ڪئي ته چيمبر ۽ فيڊريشن هائوس ذريعي سموري واپاري برادري کي ٻڌايو وڃي. چين ۾ پاڪستان سفارتخانو جيڪو به ويزا ڏئي اهو سنڌ حڪومت کان پرڏيهي آفيس ذريعي شيئر ڪيو وڃي. وڏي وزير چيف سيڪريٽريءَ کي ان بابت مڪينزم بڻائڻ جي هدايت ڪئي. بينڪن جي سڪيورٽيءَ بابت اپيڪس ڪميٽي اجلاس ۾ گهرو سيڪريٽري قاضي شاهد پرويز ٻڌايو ته بينڪن جي سڪيورٽيءَ جي اڳئي ايس او پي آهي، اسان بينڪ مالڪن سان اجلاس ڪيا آهن. پرائيوٽ بينڪ ايس او پي کي فالو ناهن ڪندا، اسان ان تي عملدرآمد ڪرائي رهيا آهيون. سنڌ پوليس ڪرائم رڪارڊ برانچ سان جڙيل هڪ سافٽ ويئر بڻائي رهي آهي، جيل مان جيڪو به قيد آزاد ٿيندو سافٽ ويئر ذريعي سڀني کي شيئر ٿي ويندو. وڏي وزير آءِ جي پوليس کي هدايت ڪئي ته ان سافٽ ويئر جي جلد شروعات ڪئي وڃي. موٽرسائيڪلن ۾ ٽريڪرز لڳائڻ بابت اپيڪس ڪميٽي اجلاس کي گهرو سيڪريٽريءَ ٻڌايو ته موٽرسائيڪلن ۾ ٽريڪرز لڳائڻ بابت قانون بڻايو ويو آهي. ٽرانسپورٽ کاتو جلد سنڌ اسيمبليءَ مان ڄاڻايل قانون پاس ڪرائيندو. اپيڪس ڪميٽيءَ ۾ بوهري برادري جي پروگرام ۽ پرنس ڪريم آغا خان جي ڪراچي اچڻ تي سڪيورٽي انتظامن جي ساراهه ڪئي وئي. وڏي وزير مراد علي شاهه چيو ته پرنس ڪريم آغا خان خط لکي اسانجي ڪارڪردگيءَ جي واکاڻ ڪئي آهي. وڏي وزير سيد مراد علي شاهه درگاهن جي سڪيورٽي آڊٽ جي حوالي سان اپيڪس ڪميٽي اجلاس ۾ ٽن کاتن گهرو کاتي، ورڪس اينڊ سروسز کاتي ۽ اوقاف کاتي کي گڏيل اجلاس ڪرڻ جي هدايت ڪندي چيو ته ان اجلاس ۾ سڪيورٽي آڊٽ بابت ضروري اڏاوتون ڪيون وڃن. وڏي وزير چيو ته سال 2006ع ۾ بارڊ سڪيورٽي فورس بڻائي وئي هئي جنهن ۾ 1000 جوان ڀرتي ڪيا ويا هئا. وڏي وزير آءِ جي پوليس کي هدايت ڪندي چيو ته فورس کي وڌيڪ مضبوط ڪرڻ لاءِ انهن کي سموريون سهولتون فراهم ڪيون وڃن ان فورس جي جوانن کي سنڌ-بلوچستان سرحد تي مقرر ڪيو وڃي. معياري نمبر پليٽ رجسٽريشن واري قانون بابت اپيڪس ڪميٽي اجلاس ۾ ٻڌايو ويو ته معياري نمبر پليٽس قانون تي مڪمل ڪم ڪيو ويو آهي. ڪارن ۽ موٽرسائيڪلن جي نمبر پليٽ بلڪل واضح ۽ نمايان جاري ڪيون وينديون. اپيڪس ڪميٽيءَ ۾ تجويز ڏني وئي ته حڪومت چاهي پئي ته رجسٽريشن ڪاغذات ايڪسائيز کاتو لاڳاپيل ڊاڪ واري پتي تي ڪوريئر ذريعي موڪليا وڃن، ڄاڻايل ڪارروائيءَ سان صحي ايڊريس جي به ڄاڻ حاصل ٿي سگهندي ۽ اهڙي عمل سان ڪنهن به قسم جي ڏوهه جي صورت ۾ گاڏي ٽريس ڪرڻ سولي ٿي ويندي. آءِ جي پوليس اپيڪس اجلاس ۾ ٻڌايو ته وڏي وزير جي هدايت تي ڊرائيونگ لائسنس ڪوريئر ذريعي اماڻيا پيا وڃن. اپيڪس اجلاس ۾ فيصلو ڪيو ويو ته ڪچي آبادين ۾ ٽارگيٽڊ آپريشن ڪيو ويندو جنهن جي تياريءَ جو فيصلو صحيح وقت تي ڪيو ويندو. اپيڪس اجلاس ۾ اهو به فيصلو ڪيو ويو ته الطاف حسين ۽ سندس خاندان جي نالي سان 62 عمارتون ۽ روڊ منسوب آهن انهن سمورن نالن کي تبديل ڪرڻ جي منظوري ڏني وڃي، ان تي وڏي وزير چيو ته ان فيصلي کي ڪابينا اڳئي منظوري ڪري ڇڏيو آهي.

 

عدليه جي عزت انصاف سان ٿيندي آهي ڊيڄارڻ ۽ ڌمڪائڻ سان نه: مريم نواز

فيصل آباد(ويب ڊيسڪ) اڳوڻي وزير اعظم نواز شريف جي ڌيءَ مريم نواز چيو آهي ته عدليه جي عزت انصاف سان ٿيندي آهي ڊيڄارڻ ۽ ڌمڪائڻ سان ناهي ٿيندي. فيصل آباد اڄ فيصلو ٻڌائي ڇڏيو آهي ۽ سندس فيصلو ڪڏهن به غلط ناهي هوندو ۽ فيصل آباد جو فيصلو انصاف تي ٻڌل آهي، ن ليگ فيصل آباد ۾ ايتري پکڙجي چڪي آهي جو پاڻ ئي ٽي ٽوئنٽي کيڏندي رهندي آهي، ن ليگ پاڻ ۾ ئي مقابلو ڪندي رهندي آهي ۽ چونڊن ۾ ڪنهن مخالف کي ٽيم ناهي بڻائڻ ڏيندي. فيصل آباد ۾ جلسي کي خطاب ڪندي مريم نواز جو چوڻ هو هڪ کان پوءِ هڪ سزا ٻڌائي پئي وڃي، وزارت عظميٰ مان به ڪڍيو ويو، وزارت عظميٰ مان ڪڍڻ کان پوءِ به کين سک نه مليو ته هنن مسلم ليگ ن جي صدارت تان به هٽائي ڇڏيو پر ن ليگ پنهنجي صدر ۽ نشان ڦرجڻ جي باوجود سينيٽ ۾ سڀ کان وڏي پارٽي بڻجي آئي. فيصل آباد جي شهري مون کي هڪ ڳالهه ٻڌائن ته توهان جي ڀيڻ اڄ توهين جي ان عدالت ۾ توهان جي ليڊر جو ڪيس کڻي آئي آهي ڇا توهان کي نواز شريف جو فيصلو منظور آهي. سندس چوڻ هو ته نيب جي عدالت کان سڌو فيصل آباد آئي آهيان، ميان صاحب ۽ آئون هن هفتي جي ٽئين پيشي لاءِ اُتي موجود هئاسين، ست تاريخ تي جيڪي ڇهه مهينا نيب جي ڪيس جو فيصلو ڪرڻ لاءِ ڏنا ويا هئا اُهي ختم ٿي چڪا آهن ۽ ڪجهه به نه ملي سگهيو آهي، ڇهن مهينن ۾ ڇهن رپين جي به ڪرپشن ناهي، ڏيڍ سالن ۾ پنجون ڀيرو نواز شريف جو ٽرائل ٿي رهيو آهي، ايتري عرصي ۾ ڪجهه به نه مليو ته ايندڙ ٻن مهينن ۾ ڇا ملندو؟ سندس وڌيڪ چوڻ هو ته اڄ نيب ۾ واجد ضياءَ کي اچڻو هو، هن کي نواز شريف جي خلاف ڪهڙي جاچ ڪرڻي هئي پر هن ٺيڪو کڻي پنهجي هڪ ڪزن کي ڏئي ڇڏيو ۽ ان سان گڏوگڏ کيس 50 هزار پائونڊ به ڏنا ۽ پوءِ به ڪجهه نه مليو، عدالت ۾ اسان جي وڪيل واجد ضياءَ جي ڪزن کان پڇاڻو ڪيو ته توهان ڪيترا پيسا ورتا آهن ته هن چيو ته آئون نٿو ٻڌائي سگهان اهو منهنجو ذاتي معاملو آهي، قومي ناڻي مان توهان کي پيسا ڏنا ويا ته اهو ذاتي معاملو ڪيئن ٿيو.

 

دوا کائڻ بعد بيمار ماڻهو شفا ملڻ بدران وڌيڪ بيمار ٿيو وڃي: سپريم ڪورٽ

لاهور (اين اين آءِ) چيف جسٽس پاڪستان جسٽس ميان ثاقب نثار نقلي ۽ غير رجسٽرڊ دوائن واري ڪيس جي ٻڌني دوران ريمارڪس ڏنا ته تڪليف واري اها ڳالهه آهي جو نقلي دوائن جي معاملي تي ڪم ناهي ٿيو هڪ ماڻهو بيمار آهي دوائون کائڻ سان ان کي شفا ٿيڻ بدران ويتر بيمار ٿي پوي ٿو چيف جسٽس ميان ثاقب نثار جي سربراهي ۾ جسٽس اعجازالحسن ۽ جسٽس عمر عطا بنديال تي ٻڌل ٽن ميمبرن واري بئنچ سپريم ڪورٽ لاهور رجسٽري ۾ ڪيس جي ٻڌني ڪئي آءِ جي پنجاب ڪئپٽن رٽائرڊ عارف نواز خان ۽ ريجنل پوليس آفيسر بهاولپور راجا رفعت مختيار پيش ٿيا آءِ ڊي پنجاب موقف اختيار ڪيو ته آر پي او بهاولپور تي نقلي دوائن جي معاملي تي پنهنجي برادر نسبتي جي سپورٽ جو الزام غلط آهي جڏهن ته فاضل عدالت جو چوڻ هو ته اسان جي اطلاعن مطابق آر پي او پنهنجي ربرادر نسبتي جي سپورٽ ڪئي چيف جسٽس چيوت ه ڪنهن کي نقلي دوائن جي معاملي تي اثر ۽ رسوخ استعمال ڪرڻ جي اجازت نٿا ڏيئي سگهون ڏک واري اها ڳالهه آهي جو نقلي دوائن جي معاملن تي ڪم ناهي ٿيو. چيف جسٽس چيو ته اسان جي چوڻ تي هڪ آفيسر فيڪٽري تي ڇاپو هنيو ۽ نيب ڪالهه ان کي نوٽيس جاري ڪري ڇڏيو لڳي ٿو ته هي ماڻهو طاقتور آهن پر هن معاملي ۾ ڪنهن کي پنهنجي طاقت استعمال ڪرڻ جي اجازت نٿا ڏيئي سگهون چيف جسٽس چيو ته ججن جو ڪنهن جي ذاتي معاملن سان ڪوبه تعلق ناهي هوندو يا پنهنجي ڀبينرن ۽ ڀائرن سان تعلق رهندو آهي الله سڀني کي پنهنجي حقن لاءِ وڙهڻ جي جرئت ڏي فاضل بئنچ ڊي جي جنرل ايف آءِ اي نقلي دوائن تي جاچ ڪري مفصل رپورٽ پيش ڪرڻ جي هدايت ڪندي ٻڌني ملتوي ڪري ڇڏي.

 

سينيٽ چيئرمين لاءِ گهربل اڪثريت حاصل ڪرڻ جي دعويٰ، منهنجي خلاف سڀ ڪجهه وڏي منصوبابندي سان ٿي رهيو آهي: نواز شريف

اسلام آباد (اين اين آءِ) اڳوڻي وزيراعظم نواشريف چيو آهي ته اڃا هڪ هارس ٽريڊنگ جو عملي نمونو ڏٺو ۽ رضا رباني جو سينيٽ چيئرمين طور نالو ان لاءِ ڏنو جو ايندڙ هارس ٽريدنگ کي روڪيو وڃي خميس تي احتساب عدالت ۾ ميڊيا سان غير رسمي ڳالهائيندي نوازشريف چيو ته رضا رباني پنهنجو ڪم بهتر نموني سان ڪري ٿو ۽ مناسب ماڻهو آهي اڳوڻي وزيراعظم چيو ته هارس ٽريدنگ بابت قانون سازي ٿيڻ گهرجي جنهن لاءِ اسان تيار آهيون بلوچستان ۾ ٻه ٽي مهينا اڳ ئي هارس ٽريڊنگ شروع ٿي ويئي هئي جيڪا هڪ خراب روايت آهي ۽ ان کي ختم ٿيڻ گهرجي نوازشريف چيو ته اسان سينيٽ ۾ واحد اڪثريتي جماعت آهيون ۽ اسان جو حق آهي ته پنهنجو اميدوار ڏيون مولانا فضل الرحمان، محمود اچڪزئي ۽ حاصل بزنجو کي ملائي سٺو انگ بڻجي سگهي ٿو صحافي سوال ڪيو ته مولانا فضل الرحمان جي ته آصف زرداري سان وڏي دوستي آهي جنهن تي هن چيو ته مولانا فضل الرحمان اسان جو به گهاٽو دوست آهي اڳوڻي وزيراعظم نوازشريف چيو ته 6 مهينن ۾ خبر نه پئجي سگهي ته مون مٿان الزام ڪهڙو آهي ڇهن مهينن ۾ مون مٿان ڪرپشن جو ڪو الزام نه لڳي سگهيو مون مٿان ڪوڙو ڪيس ٺاهيو ويو 7 هي سڀ ڪجهه وڏي پلان تحت ٿي رهيو آهي رابرٽ ريڊلي کي وڏن ارمانن سان وٺي آيا هئاسين ۽ هو اسان جو ئي ڪيس ٺاهي هليو ويو ان کان پوءِ پنجاب هائوس اسلام آباد ۾ وڪيلن سان ملاقات دوران نوازشريف چيو ته مان 3 ڀيرا ملڪ جو وزيراعظم رهجي چڪو آهيان جيڪڏهن مان ڪرپشن ڪئي هجي ها ته هن وقت تائين ثابت ٿي وڃي ها پر مون تي هڪ پئسي جي به ڪرپشن ٿابت ناهي ٿي ملڪ جڏهن به ترقي ڪرڻ شروع ڪندو آهي ته سازشون شروع ٿي وينديون آهن مون کي سي پيڪ ۽ موٽر وي ٺاهڻ جي سزا ملي رهي آهي مان ووٽ جو تقدس بحال ڪرڻ جي مشن تي نڪتل آهيان.

.ٻئي طرف  مسلم ليگ ن جي ڪميٽي چيئرمين ۽ ڊپٽي چيئرمين سينيٽ لاءِ نامزد ڪيل اميدوارن جي ڪاميابيءَ جي دعويٰ ڪئي آهي. پنجاب هائوس اسلام آباد ۾ مسلم ليگ ن جي قائد نواز شريف جي سربراهيءَ ۾ پارٽيءَ جو مشاورتي اجلاس ٿيو جنهن ۾ چار رڪني ڪميٽي پنهنجي رپورٽ پيش ڪئي. رپورٽ ۾ چيو ويو آهي ته اڪثر پارٽيون سينيٽ چيئرمين لاءِ نواز شريف جي تجويز جون حامي آهن ۽ هنن سينيٽ چيئرمين لاءِ حمايت جي خاطري ڪرائي آهي. رپورٽ ۾ چيو ويو ته مسلم ليگ ن کي سينيٽ ۾ گهربل اڪثريت حاصل ٿي وئي آهي، هاڻي مسلم ليگ ن آساني سان چيئرمين چونڊرائڻ جي پوزيشن ۾ آهي. نواز شريف ڪميٽي جي رپورٽ تي اعتماد جو اظهار ڪيو  جڏهن ته آصف علي زرداري طرفان رضا رباني جو نالو رد ڪرڻ تي مايوسي جو اظهار ڪندي چيو ته اسان جمهوريت کي مضبوط ۽ پارليامينٽ کي بالادست ڪرڻ چاهيون ٿا. ذريعن موجب رپورٽ جي روشني ۾ فيصلو ڪيو ويو آهي ته چيئرمين جو تعلق مسلم ليگ ن ۽ ڊپٽي چيئرمين جو تعلق اتحادي پارٽي سان ٿيندو.

 

بنيادي حق ۽ آزادي سڀ کان اهم آهي، عورتن کي عورتن جي طاقت بڻجڻ گهرجي: مريم اورنگزيب

اسلام آباد (اين اين آءِ) سڌسماءَ جي مملڪتي وزير مريم اورنگزيب چيو آهي ته بنيادي هق ۽ آزادي سڀ کان اهم آهي عورتن کي عورتن جي طاقت بڻجڻ گهرجي جڏهن عورتون ئي معاشي سرگرمين ۾ حصو نه وٺنديون ته اسان ڪهڙي ترقي جي ڳالهه ڪري رهيا آهيون جمهوريت ۾ عورتن جو ڪردار اهم آهي فاطما جناح کان وٺي ڪلثوم نواز تائين عورتن جمهوريت جي جنگ وڙهي بينظير ڀتو خطي ۾ سياست جو مقصد ئي تبديل ڪري ڇڏيو خميس تي مريم اورنگزيب عورتن جي عالمي ڏهاڙي تي اسلام آباد چيمبر ۾ تقريب کي خطاب ڪندي چيوت ه فخر واري ڳالهه آهي جو عورتن جو عالمي ڏينهن ملهايو پيو وڃي هن چيو ته وزيراعظم هائوس ۾ به عورتن جي عالمي ڏينهن جي حوالي سان تقريب رکي ويئي آهي هن چيوت ه معاشرو جيڪڏهن عورتن کي آزادي ۽ هق ڏي تڏهن مقصد حاصل ٿئي ٿو هن چيو ته پاڪستان انهن ملڪن مان آهي جتي پاليسيون ۽ قانونسازي ڪافي بهتر ٿينديون آهن هن چيو ته ان تي عمل لاءِ سدائين چئلينجز سامهون هوندا آهن هن چيو ته عورتن کي عورتن جي طاقت بڻجڻ گهرجي عالمي برادري پاڪستان ۾ عورتن جي حقن لاءِ کنيل قدمن جي واکاڻ ڪئي آهي هن چيو ته عالمي دنيا ۾ 50 سيڪڙو عورتون آهن.

 

پاڪستان جي ترقي ۾ عظيم عورتن جو اهم ڪردار آهي: آرمي چيف

راولپنڊي ( ويب ڊيسڪ ) آرمي چيف جنرل قمر جاويد باجوه چيو آهي ته پاڪستان جي ترقي ۾ عظيم عورتن جو ڪردار اهم آهي. آءِ ايس پي آر موجب عورتن جي عالمي ڏهاڙي تي پنهنجي پيغام ۾ آرمي چيف جنرل قمر جاويد باجوه چيو ته پاڪستان جي ترقي ۾ عظيم عورتن جو ڪردار اهم آهي، اسان کي وردي پهريل عورتن جي ڪردار ۽ خدمت تي فخر آهي، خاص ڪري انهن عورتن کي جن جو شهيدن جي خاندانن سان تعلق آهي.

 

عورتن جي ترقي، تحفظ ۽ عزت اسان سڀني جي گڏيل ذميواري آهي: خورشيد شاهه

اسلام آباد (اين اين آءِ) قومي اسيمبلي ۾ مخالف ڌر اڳواڻ سيد خورشيدشاهه چيو اهي ته عورتن جي ترقي تحفظ ۽ عزت اسان سڀني جي گڏيل ذميواري آهي خميس تي مخالف ڌر اڳواڻ سيد خورشيد شاهه عالمي عورتن واري ڏهاڙي تي پنهنجي پيغام ۾ چيو ته عورتن جي ترقي تحفظ ۽ عزت اسان سڀني جي گڏيل ذميواري اهي ۽ پاڪستان پيپلزپارٽي سڌائين عورتن جي ترقي لاءِ اهم قدم کنيا آهن هن چيو ته پهرين عورت وزيراعظم پهرين عورت اسپيڪر پهرين عورت پرڏيهي وزير ۽ هاڻي محروم طبقن جي نمائندگي ڪندڙ اقليتي عورت جي سينيٽ ميمبر طور چونڊ پيپلزپارٽي جا اعزاز آهن هن چيو ته هيٺين سطح تي عورتن جي ڀلائي لاءِ پيپلزپارٽي بينظير انڪم سپورٽ پروگرام ليڊي هيلٿ ورڪرز پروگرام بيسڪ ايجوڪيشن پروگرام فرسٽ وومين بئنڪ ۽ وومين پوليس اسٽيشن جهڙا پروگرام متعارف ڪرايا هن چيو ته عورتن جي ترقي کان سواءِ معاشرو ترقي نٿو ڪري سگهي تنهنڪري عورتن جي ترقي لاءِ وڌيڪ قدم اڻٽر آهن هن چيو ته عورتون سياست ادب انجنيئرنگ ميڊيڪل، تعليم ۽ ٻين شعبن ۾ خاص ڪردار اداڪري رهيون آهن.

 

فرحت الله بابر درست چيو ته فوج ۽ عدليه حدن ۾ رهن، سندس تقرير مان 100 سيڪڙو متفق آهيان: اعتزاز احسن

اسلام آباد(ويب ڊيسڪ) پاڪستان پيپلز پارٽي جي سينيٽر اعتزاز احسن چيو آهي ته جج زبان کان وڌيڪ ڳالهائيندا آهن ۽ قلم کان گهٽ ته منهنجي نظر ۾ حددخلي ڪندا آهن،  ٻين جون غلطيون ڪڍڻ کان پوءِ خود احتسابي تي عمل ڪرڻ گهرجي. اهڙن خيالن جو اظهار سينيٽر اعتزاز احسن سينيٽ ۾ پنهنجي الوداعي تقريب کي خطاب ڪندي ڪيو، هن چيو ته فرحت الله بابر جي تقرير مان 100 سيڪڙو متفق آهيان ته عدليه کي پنهنجي دائري ۾ رهڻ گهرجي. هن چيو ته فرحت الله بابر درست چي ته فوج ۽ عدليه کي حدن ۾ رهڻ گهرجي، عدليه شاعري ڪرڻ لڳي ته طلب آهي ته کين خوف اچي رهيو آهي، ادارن جو احترام ڪندو آهيان پر پهرين اسان کي پنهنجي ڪارڪردگي وڌائڻي آهي، اسان  وڏي دشمن کي منهن ڏئي رهيا آهيون. هن چيو ته سياسي اعتبار سان جڏهن گرفتار ڪيو ويو تڏهن آئون هڪ سال جو هيس، 1964ع کان آمرن خلاف جدوجهد ڪندو پيو اچان، 1964ع ۾ يونيورسٽي آرڊيننس جي خلاف جلوس ڪڍيا ته لاڪ اپ ۾ بند ٿيس. هن چيو ته 1977ع کان 1988ع تائي پاڪستان تي مارشل لاءِ جو گندو پاڇو رهيو، ڪوڙا هنيا ويندا هئا، فوجي عدالتون لڳنديون هيون، ڪيترائي ڀيرا جيل ويس، ڪڏهن گهڻي عرصي لاءِ جيل ويس ته ڪڏهن ٻن کان ٽن ڏينهن ۾ ڇڏي ڏيندا هئا، ڪڏهن ۾ ويندو هيس ته گرفتاريون ٿينديون هيون، ڪيڏانهن وڃان ته جهنڊو کڻي منهنجي زال جلوس جاري رکندي هئي. هن چيو ته مشرف لالچ به ڏني، ٽي ڀيرا بار لائرز موومينٽ ڇڏڻ جي آڇ ڪئي، مشرف چيو ته لائرز موومينٽ ڇڏ ۽ وزير اعظم بڻجي وڃ، مون انڪار ڪري ڇڏيو، چار ڊڪٽيٽر آيا چئني جي خلاف عملي احتجاج ڪيو. ن ليگ جي عدالت تي تنقيد جي حوالي سان سينيٽر اعتزاز احسن چيو ته عدليه تي تنقيد ڪندا آهن ته پاناما مان اقامي تي ڇو نااهل ڪيو ويو، توهان يوسف رضا گيلاني کي چوندا آهيو ته سپريم ڪورٽ جو فيصلو مڃو، چوندا آهن ته فيصل جو احترام ڪندا آهيون پر پوءِ به هنن فيصلو نامنظور جا نعرا هڻايا.

 

پي ٽي آءِ پاران پنهنجون سيٽون بلوچستان جي وڏي وزير کي ڏيڻ جو اعلان، ڪوشش آهي ته ن ليگ جو سينيٽ چيئرمين نه چونڊجي: عمران خان

پشاور/اسلام آباد (اين اين آءِ/ اسلام آباد(ويب ڊيسڪ) تحريڪ انصاف جي چيئرمين عمران خان پنهنجون سينيٽ جون 13 ئي سيٽون بلوچستان جي وڏي وزير کي ڏيڻ جو اعلان ڪري ڇڏيو آهي ۽ چيو آهي ته سينيٽ جو چيئرمين بلوچستان مان هئڻ گهرجي. اسلام آباد ۾ بلوچستان جي وڏي وزير عبدالقدوس بزنجو سان گڏ پريس ڪانفرنس ڪندي عمران خان جو چوڻ هو ته سينيٽ جو چيئرمين بلوچستان مان هئڻ گهرجي، ان حوالي سان فيصلو ڪيو آهي ته اسان پنهنجون 13 ئي سيٽون بلوچستان جي وڏي زوير جي حوالي ڪري رهيا آهيون. هن چيو ته اسان سڀني جي ڪوشش هئڻ گهرجي ته سينيٽ جو چيئرمين ن ليگ مان نه هجي ڇو ته ن ليگ وارا جمهوريت جي نالي تي ڦرڻ وارا ماڻهو آهن ۽ اهي ماڻهو نواز شريف کي ڪرپشن ڪرڻ جي اجازت ڏيڻ وارو قانون بڻائڻ جي ڪوشش ڪندا. عمران خان چيو ته جڏهن کان پاناما سامهون آيو آهي ن ليگ وارا نواز شريف جي چوري بچائڻ جي ڪوشش ڪري رهيا آهن، اهو هر ان اداري تي حملو آهي جيڪو انهن جو غلام ناهي، اِهي ڪڏهن فوج تي حملا ڪندا آهن ته ڪڏهن سپريم ڪورٽ تي، اهو جمهوري رويو ناهي. ان موقعي تي بلوچستان جي وڏي وزير عبدالقدوس بزنجو جو چوڻ هو ته عمران خان جو ٿورائتو آهيان جو هن دل وڏي ڪري اسان جي حمايت جو اعلان ڪيو آهي، ڪجهه ڪلاڪن کان پوءِ آصف زرداري اسان سان ملڻ لاءِ اچي رهيو آهي، آصف زرداري کي راضي ڪنداسين ته سينيٽ جو چيئرمين بلوچستان مان اچي.هوڏانهن پاڪستان تحريڪ انصاف جي چيئرمين عمران خان چيو آهي ته مسلم ليگ (ن) شريفن جي ڪرپشن بچائڻ جي پارٽي بڻجي چڪي اهي تنهنڪري اسان جي ڪوشش آهي ته (ن) ليگ جو چيئرمين سينيٽ نه بڻجي پشاور ۾ ميڊيا سان ڳالهائيندي عمران خان چيو ته ڳجهي ڳڻپ سان سدائين ووٽ وڪرو ٿيڻ جو خطرو رهندو آهي سڀني کي خبر آهي ته سينيٽ جون چونڊون وڪرو ٿينديون آهن ايتري ته خبر پئي ته ماڻهن کي ووٽ جي عيوض 4-4 ڪروڙ رپيا ڏنا ويا جڏهن ته اها خبر نه آهي ته ڪنهن پئسا ورتا سوشل ميڊيا تي نالو اچڻ تي ڪارروائي نٿي ڪري سگهجي سينيٽ اليڪشن جي حوالي سان ڪنهن وٽ ثبوت آهي ته اسان کي ڏي جن ماڻهن رقم ورتي انهن جو ڪيس نيب کي ڏيئي پارٽي مان ڪڍي ڇڏينداسين. سينيٽ اليڪشن ۾ نه وڪرو ٿيندڙن کي چونڊن ۾ ٽڪيٽ ڏينداسين سينيٽ چيئرمين جي چونڊ جي حوالي سان عمران خان چيو ته پيپلزپارٽي سان هلڻ مشڪل آهي مسلم ليگ (ن) شريفن جي ڪرپشن بچائڻ واري پارٽي بڻجي چڪي آهي تنهنڪري اسان جي ڪوشش آهي ته (ن) ليگ جي سينيٽ چيئرمين نه بڻجي.