تازيون خبرون

Daily Archives: February 22, 2018

سپريم ڪورٽ نواز شريف کي پارٽي صدارت لاءِ نااهل قرار ڏئي ڇڏيو

اسلام آباد(ويب ڊيسڪ) چيف جسٽس آف پاڪستان ميان ثاقب نثار جي سربراهي ۾ 3 رڪني بينچ اليڪشن ايڪٽ 2017ع ڪيس جو فيصلو ٻڌائي ڇڏيو آهي. چيف جسٽس آف پاڪستان فيصلو ڏنو ته نااهل شخص  پارٽي جي صدارت نٿو ڪري سگهي، طاقت جو سر چشمو خدا آهي، آرٽيڪل 17 سياسي پارٽي بڻائڻ جو حق ڏئي ٿو جڏهن ته آرٽيڪل 17 ۾ قانوني شرطون موجود آهن. هن فيصلو ٻڌائيندي چيو ته نااهل شخص پارٽي صدر نٿو رهي سگهي، آرٽيڪل 62، 63 تي پورو نه لهندڙ شخص پارٽي جو صدر نٿو رهي سگهي. سپريم ڪورٽ اليڪشن ايڪٽ 2017ع جو فيصلو ٻڌائيندي نواز شريف جي پارٽي صدر طور ڪيل بندوبستن کي ڪالعدم قرار ڏئي ڇڏيو.

 

پارليامينٽ جو بڻايل قانون ختم ڪرڻ خطرناڪ هوندو: نواز شريف

اسلام آباد(ويب ڊيسڪ) اڳوڻي وزير اعظم نواز شريف جو چوڻ آهي ته پارليامينٽ جو قانون به عدالتي منظوري جو محتاج ٿي وڃي ته اهو ڪهڙو آئين آهي. پنهنجي هڪ بيان ۾ نواز شريف جو چوڻ هو ته پارليامينٽ جو بڻايل قانون من ماني تعمير سان ختم ڪرڻ خطرناڪ هوندو، پارليامينٽ جي ڪنهن قانون جي تشريح جي ضرورت آهي ته ابهام ختم ڪرڻ لاءِ پارليامينٽ موڪليو وڃي، پارليامينٽ جو قانون به عدالتي منظوري جو محتاج ٿي وڃي ته اهو ڪهڙو آئين آهي. اڳوڻي وزير اعظم جو چوڻ هو ته آئين رياست جو نظام هلائڻ وارو سڀ کان مقدس دستاويز آهي، آئين جو دستاويز عوام جي چونڊيل نمائندن جو پارليامينٽ ئي بڻائيندو آهي. سندس وڌيڪ چوڻ هو ته ادارن جو احترام انهن ادارن جي ڪارڪردگي ۽ احترام سان ٿيندو آهي، پارليامينٽ کي سڄي دنيا ۾ ادارن جي ماءُ سمجهيو ويندو آهي، جج صاحبن جو آئين کي مقدس ۽ مٿانهون دستاويز قرار ڏيڻ خوشي ڏيندڙ ڳالهه آهي.

 

نواز شريف عدالتن ۾ سڌارا نٿو چاهي: بلاول ڀٽو زرداري

لاهور(ويب ڊيسڪ) پاڪستان پيپلز پارٽي جي سربراهه بلاول ڀٽو زرداري چيو آهي ته نواز شريف عدالتن ۾ سڌارا نٿو چاهي. لاهرو ۾ ميڊيا سان ڳالهائيندي بلاول ڀٽو زرداري چيو ته اهڙو پاڪستان چاهيون ٿا جتي انساني حقن جو تحفظ حاصل هجي. هن چيو ته عاصمه جهانگير سمورن ماڻهن لاءِ هڪ جهڙو ماحول پئي چاهيو ۽ ترقي پسند پاڪستان جي حامي هئي. هن چيو ته ترقي پسند شهر لاهور دنيا لاءِ مثال هو پر اڄ اهو شريفن جي هٿن ۾ اچي ويو آهي، عوام کي پرامن ۽ ترقي پسند لاهور واپس ڏيارينداسين.  بلاول مسلم ليگ ن جي قيادت کي تنقيد جو نشانو بڻائيندي چيو ته ن ليگ عدالتن کي ڊڪٽيٽ ڪرڻ چاهي ٿي، شهباز شيرف ۽ سيف الرحمان ججن کي ڌمڪيون ڏنيون، اسان عدالتن کي ڌمڪيون ڏيڻ جي ڀرپور مذمت ڪيون ٿا. سندس چوڻ هو ته نواز شريف جي ووٽ جي تقدس واري ڳالهه مذاق آهي، نواز شريف پارليامينٽ جو سهارا ان وقت ورتو جڏهن هو 4 سالن تائين وزير اعظم هو پر هن وقت هو قومي اسيمبلي ۽ سينيٽ نه ايندو هو.  چيئرمين هن چيو ته آئين پارليامينٽ کان مٿانهون آهي پر پارليامينٽ ئي آئين کي بڻائيندو آهي ۽ تبديل ڪري سگهي آهي. هن چيو ته خبر آهي ته پارليامينٽ وٽ ڪيترا اختيار آهن ۽ اسان چونڊ سڌارا به چاهيون ٿا پر نواز شريف جي ارادن تي شڪ آهي، ڪير به اڪيلي سر عدالتي سڌارا نٿو ڪري سگهي، ان ڪري گڏجي ويهڻو پوندو. هن چيو ته نواز شريف  جو مخالف ڌر وارو ڪردار ادا ڪرڻ ڪنهن به ريت جائز ناهي ڇو ته ن ليگ وٽ وفاق، پنجاب گلگت بلتستان ۽ آزاد ڪشمير جي حڪومت آهي، وفاقي حڪومت روئڻ بند ڪري ۽ پنهنجو ڪم ڪري. نيب جي حوالي سان بلاول جو چوڻ هو ته سنڌ ۽ پنجاب جي سياستدانن ۾ فرق ڇو ڪيو ويندو آهي، نيب پاڪستان پيپلز پارٽي جي اڳواڻن کي فوري گرفتار ڪندو آهي. نقيب الله ڪيس ۾ مفرور اڳوڻي ايس ايس پي ملير رائو انوار جي حوالي سان پيپلز پارٽي جي چيئرمين جو چوڻ هو ته مون کي خبر ناهي ته رائو انوار ڪٿي آ پر سنڌ حڪومت رائو انوار جي گرفتاري لاءِ ڪوششون ڪري رهي آهي. بلاول ڀٽو چيو ته خبر ناهي رائو انوار اسلام آباد ايئرپورٽ تان ڪيئن هليو ويو پر اڄ به ڪوڙن مقابلن ۾ ماڻهو مري رهيا آهن ۽ حڪومت ڪوڙن مقابلن جي خاتمي لاءِ ڪردار ادا ناهي ڪري رهي.

 

فنانشل ايڪشن ٽاسڪ فورس اجلاس: پاڪستان تي دهشتگردي جو ليبل لڳائيندڙ آمريڪي ڪوشش ناڪام

پيرس (ويب ڊيسڪ) وفاقي پرڏيهي وزير خواجه آصف دعويٰ ڪئي آهي ته پيرس ۾ فنانشل ايڪشن ٽاسڪ فورس جي اجلاس ۾ پاڪستان تي دهشتگردي جو ليبل لڳائيندڙ آمريڪي ڪوشش ناڪام ٿي وئي ڇو ته واچ لسٽ ۾ پاڪستان جو نالو شامل ڪرائڻ جي ٺهراءَ تي اتفاق نه ٿي سگھيو ۽ معاملو 3 مهينن لاءِ ملتوي ڪيو ويو. عالمي اداري ايف اي ٽي ايف جو ڇهه ڏينهن جو اجلاس پيرس ۾ جاري آهي، جيڪو 23 فيبروري تي ختم ٿيندو. اجلاس ۾ پاڪستاني وفد جي قيادت ڊي جي فائنانس مانيٽرنگ يونٽ منصور شاهه ڪري رهيو آهي جڏهن ته ناڻي وارو صلاحڪار مفتاح اسماعيل به پيرس ۾ موجود آهي. اجلاس ۾ دهشتگردن جي مالي مدد ڪندڙ ملڪن خلاف ايڪشن پلان بڻائيندڙ ۽ مني لانڊرنگ خلاف قدمن جو جائزو ورتو پيو وڃي. آمريڪا برطانيا جي مدد سان پاڪستان جو نالو واچ لسٽ ۾ شامل ڪرڻ جي ڌمڪي ڏني هئي پر اجلاس کان اڳ پاڪستان خلاف آمريڪي ٺهراءَ تي اتفاق نه ٿي سگھيو. ان سلسلي ۾ نئين رپورٽ فنانشنل ايڪشن ٽاسڪ فورس جي جون ۾ ٿيندڙ اجلاس ۾ پيش ڪئي ويندي. پرڏيهي وزير خواجه آصف جو چوڻ آهي ته پاڪستان جي ڪوششن بهتر نتيجو ڏنو ۽ پاڪستان جو نالو واچ لسٽ ۾ شامل ڪرڻ تي اتفاق نه ٿي سگھيو.پرڏيهي وزير جو وڌيڪ چوڻ هو ته سهڪار ڪرڻ تي پاڪستان پنهنجن دوست ملڪن جو ٿورائتو آهي.

 

اڄوڪي فيصلي مان اها ئي اميد هئي، ان سان اسان تي ڪو به فرق نه پوندو: مريم اورنگزيب

اسلام آباد(ويب ڊيسڪ) اڳوڻي وزير اعظم نواز شريف جي پارٽي صدارت تان نااهلي وارو فيصلو اچڻ کان پوءِ ميڊيا سان ڳالهائيندي سڌُ سماءَ واري مملڪتي وزير مريم اورنگزيب جو چوڻ هو ته اڄوڪي فيصلي مان اها ئي اميد هئي، ان فيصلي سان اسان تي ڪو به فرق نه پوندو. هن چيو ته ان فيصلا سان نواز شريف جي هڪ ئي شخص کي ٽارگيٽ ڪرڻ واري  نظريي کي تقويت ملي، اسان جي حڪمت عملي هڪ ئي آهي، ن ليگ جو جيڪو به فيصلو ٿيندو اهو نواز شريف ڪندو. اهو ئي اسان جو پراڻو ۽ نئون فيصلو آهي جڏهن ته سينيٽ چونڊن سڀني لاءِ ضروري آهن.

 

احتساب عدالت: نواز شريف، مريم نواز ۽ ڪيپٽن صفدر جي حاضري کان ڇوٽ واري درخواست رد

اسلام آباد(ويب ڊيسڪ) اڳوڻي وزير اعظم نواز شريف، سندس ڌيءَ مريم نواز ۽ ناٺي ڪيپٽن (ر) صفدر جون حاضري کان ڇوٽ واريون درخواستون رد ڪيون ويون آهن. احتساب عدالت جج محمد بشير اعواڻ حاضري کان ڇوٽ واريون درخواستون رد ڪرڻ وارو حڪم حڪم نامو جاري ڪري ڇڏيو جنهن موجب گهرواري جي بيماري کي عدالت کان حاضري جي ڇوٽ جو جواز نٿو بڻائي سگهجي، ويڊيو لنگ بيان وقت لنڊن وڃي اٽارني مقرر ڪرڻ جو به جواز ناهي. حڪم نامي ۾ چيو ويو آهي ته ميڊيڪل رپورٽ موجب ڪلثوم نواز جون 6 ڪيموٿراپيون ٿي چڪيون آهن ۽ ڊاڪٽر جي رپورٽ موجب مريض جي بيماري تي ڪافي حد تائين ضابطو آندو ويو آهي جڏهن ته ڪينسر جو رسڪ گهٽ  ڪرڻ ۽ مستقبل ۾ علاج لاءِ ريڊيو ٿراپي تجويز ڪئي وئي آهي.

 

سپريم ڪورٽ شريف خاندان جون بند شگر ملون کولڻ جو حڪم ڏئي ڇڏيو، هر مهيني اڪائونٽن جا تفصيل ڏيڻ جي هدايت

اسلام آباد(ويب ڊيسڪ) سپريم ڪورٽ شريف ڪٽنب جون بند شگر ملون کولڻ جو حڪم ڏئي ڇڏيو. سپريم ڪورٽ ۾ ڪمند جي خريداري بابت ڪيس جي ٻڌڻي ٿي جنهن ۾ چيف جسٽس ميان ثاقب نثار شريف خاندان جون بند شگر ملون کولڻ جو حڪم ڏئي ڇڏيو. جهانگير ترين جي شگر مل جي ڊيبليو جي وڪيل اعتزاز احسن چيو ته عدالت ملن کي کولي ٿي ته بند ڪرڻ جي تاريخ به مقرر ڪري ڇڏيو. چيف جسٽس چيو ته ملن کي بند ڪرڻ جي تاريخ اسان مقرر ڪيون؟ اسان ته هارين جي مفاد ۾ ملون کولي رهيا آهيون، جهانگير ترين جي ڊڪٽيشن تي ملون بند نه ڪنداسين، هر مهيني ان ڪيس جي ٻڌڻي ڪنداسين، کلندڙ ملون پنهنجي اڪائونٽن جي تفصيل ڏين، هارين کي نقصان نه ٿيڻ گهرجي.  اعتزاز احسن چيو ته ڪمند جي ڪريشنگ اپريل کان پوءِ به ڪندا رهدنا، ڪمند جو وزن شگر مل جي اندر ئي توريو ويندو آهي، ڏکڻ پنجاب ۾ وزن تورڻ وارا ڪانٽا ناهن، جنهن جو ريٽ ايندو ان کان ڪمند خريديو ويندو. هارين جي وڪيل چيو ته اسنا 160 رپيا ريٽ ڏئي ڇڏيو ۽ شگر ملون پڪ اپ پوائنٽ تان ڪمند خريدن. چيف جسٽس ريمارڪس ڏنا ته شگر ملون ڪمشنر جي مختص ڪيل پوائنٽ تان ڪمند کڻنديون، هارين جون ٽراليون جيترا ڏينهن شگر ملن ٻاهران بيٺل رهنديون، خرچ شگر ملون برداشت ڪنديون. جسٽس عمر عطا بنديال چيو ته شگر ملون پڪ اپ پوائنٽن کان ڪمند خريدڻ ۽ رقم ادا ڪرڻ جو يقين ڏياريو آهي.

 

حديبيه ڪيس ٻيهر سپريم ڪورٽ کڻي وينداسين، عدليه جي حمايت ۾ جلسو ڪبو: عمران خان جو اعلان

اسلام آباد(ويب ڊيسڪ) تحريڪ انصاف جي چيئرمين عمران خان چيو آهي ته هو سڄي ملڪ ۾ مهم هلائيندو ۽ عدليه جي حمايت ۾ ن ليگ جي سڀني جلسن کان وڏو جلسو اسلام آباد ۾ ڪندو. پاناما ڪيس ۾ ايتريون شيون هيون ان ڪري اقامي تي فيصلو نه اچڻ گهرجي ها. هن نون ثبوتن تحت حديبيه پيپر ملز ڪيس ٻيهر سپريم ڪورٽ ۾ کڻي وڃڻ جو اعلان ڪري ڇڏيو. نيوز ڪانفرنس کي خطاب ڪندي پي ٽي آءِ جي چيئرمين عمران خان چيو ته اهي پنهنجي چوري بچائڻ لاءِ پاڪستان سان جيڪو ڪجهه ڪري رهيا آهن اهو دشمن به نٿو ڪري سگهي، ڪنهن ملڪ کي ختم ڪرڻو آهي ته ان تي بمباري جي ضرورت ناهي، ادارن جي تباهه ٿيڻ سان ملڪ تباهه ٿي ويندو. جيڪڏهن ادارا ٺيڪ هوندا ته نواز شريف کي نيب پڪڙي چڪي هجي ها، ڏکڻ آفريقا جي صدر زوما کي سندس پارٽي فارغ ڪري ڇڏيو پر هتي انهن ادارا تباهه ڪري ڇڏيا. هن چيو ته انهن نيب ۾ پنهنجا ماڻهو آندا جنهن قوم جو پيسو ڪڍرائڻ بدران کين تحفظ ڏيڻ شروع ڪري ڇڏيو، ايف بي آر جي اندر انهن ڪيسن جا ڪيس آهن پر هو انهن جي ٽيڪس چوري ۾ مدد ڪندا آهن، ناڻي واري وزير انهن جي مني لانڊرنگ ۾ مدد ڪندو رهيو،  اسان جو پرڏيهي وزير دبئي جي ڪمپني مان 16 لک رپيا ماهوار پگهار وٺندو رهيو، ملڪ جو وزير اعظم ايل اين جي جي اندر ڦاٿل آهي. اها هڪ مافيا آهي جنهن جي مٿان گاڊ فادر ويٺل آهي، هيٺيان ماڻهو چاهن ٿا ته نواز شريف کي پڪڙيو نه وڃي ڇو ته جيڪڏهن اهو پڪڙيو ويو ته سڀ پڪڙا ويندا. هن چيو ته جڏهن سپريم ڪورٽ يوسف رضا گيلاني کي خط لکڻ جو چئي رهي هئي ته نواز شريف کي عدليه وڻندي هئي پر هاڻ انهن خلاف عالمي سازش ٿي وئي،  انهن جي سموري ڪوشش پاڻ کي سپريم ڪورٽ جي فيصلي کان بچائڻ لاءِ آهي. پاناما ڪيس جي فيصلي تي هڪ ڀيرو ٻيهر عمران خان عدم اطمينان جو اظهار ڪيو ۽ چيو ته سپريم ڪورٽ جي فيصلي ۾ نواز شريف کي ڪوڙ تي جيل ۾ وجهڻ گهرجي ها، قطري خط جي سامهون اچڻ سان ڪيس بيهي وڃي ها ۽ نواز شريف انهيءَ ڏنهن جيل ۾ وجهڻ گهرجي ها. هن حديبيه پيپر ملز ڪيس ٻيهر سپريم ڪورٽ کڻي وڃڻ جو اعلان ڪندي چيو ته تحريڪ انصاف نون ثبوتن تحت حديبيه پيپر ملز ڪيس کي ٻيهر سپريم ڪورٽ کڻي ويندي.

 

شيخ رشيد وزير اعظم خلاف ڪرپشن بابت ريفرنس نيب ۾ جمع ڪرائي ڇڏيو

اسلام آباد(ويب ڊيسڪ) شيخ رشيد وزير اعظم شاهد خاقان عباسي خلاف قطر سان ايل اين جي درآمد معاهدي ۾ مبينا ڪرپشن بابت ريفرنس نيب ۾ جمع ڪرائي ڇڏيو. تفصيل موجب قومي احتساب بيورو جي هيڊ ڪوارٽر ۾ عوامي مسلم ليگ جي سربراهه شيخ چيئرمين نيب جسٽس جاويد اقبال سان ملاقات ڪئي جنهن ۾ هن وزير اعظم شاهد خاقان عباسي جي خلاف قطر سان ايل اين جي درآمد معاهدي ۾ مبينا ڪرپشن بابت ريفرنس نيب ۾ جمع ڪرايو. عوامي مسلم ليگ جي سربراهه ڪيپٽن صفدر جي خلاف به نيب ۾ درخواست جمع ڪرائي آهي. شيخ رشيد درخواست ۾ چيو ته ترقياتي فنڊن جي نالي تي ڪيپٽن صفدر کي 9 ارب رپيا ڏنا ويا، پبلڪ اڪائونٽ ڪميٽي به ڪيپٽن صفدر کي فنڊ ڏيڻ جو نوٽيس ورتو، پبلڪ اڪائونٽ ڪميٽي جي سربراهه ڪيبنٽ ڊويزن کي 4 خط به لکيا. درخواست ۾ وڌيڪ چيو ويو ته ڪوششن جي باوجود ناڻي واري سيڪريٽري  يا ڪيبنٽ ڊويزن جواب ناهي ڏنو ان ڪري ناڻي واري سيڪريٽري، ڪيبنٽ ڊويزن ۽ ڪيپٽڻ ريٽائرڊ صفدر کان فنڊن بابت پڇاڻو ڪيو وڃي.  ان موقعي تي شيخ رشيد ميڊيا سان ڳالهه ٻولهه ڪندي چيو ته نيب کي هلڪي ڦلڪي موسيقي ڪرڻي آهي پڪو راڳ ناهي ڳائڻو، نيب جو اڌ ڪم اسان ڪري ڇڏيو ۽ اڌ چيف جسٽس جو حڪم آهي. هن چيو ته شريف خاندان جي مرضي جيڪو ڪري قانون ۽ انصاف جو فيصلو ايندو.

 

چيف اليڪشن ڪمشنر اڳوڻي جج کي چيمبر مان ٻاهر ڪڍي ڇڏيو، وجيه الدين جو سپريم جوڊيشل ڪونسل وڃڻ جو اعلان

اسلام آباد(ويب ڊيسڪ) اليڪشن ڪميشن ۾ عام ماڻهو اتحاد پارٽي رجسٽريشن ڪيس جي ٻڌڻي دوران چيف الڪيشن ڪمشنر جسٽس (ر) وجيه الدين کي چيمبر مان ٻاهر ڪڍي ڇڏيو. اليڪشن ڪميشن ۾ چيف اليڪشن ڪمشنر سردار محمد رضا جي سربراهي ۾ عام ماڻهو اتحاد پارٽي جي رجسٽريشن جي حوالي سان ڪيس جي ٻڌڻي ٿيڻي هئي جيڪا ڌرين جي دير سان اچڻ سبب ملتوي ڪئي وئي. ٻڌڻي ملتوي ڪرڻ تي پارٽي چيئرمين جسٽس (ر) وجيه الدين چيف اليڪشن ڪمشنر جي چيمبر ۾ پهتو ۽ چيو ته توهان انتظار ڪيو ها اسان ڪراچي کان آيا آهيون جنهن تي چيف اليڪشن ڪمشنر چيو ته توهان وڏي واڪي ڳالهائي رهيا آهيو، توهان جي وڏي واڪي ڳالهائڻ سان مون کي تڪليف ٿي، جسٽس (ر) وجيه الدين چيو ته توهان پبلڪ سرونٽ آهيو توهان انهن ڳالهين لاءِ تيار رهڻ گهرجي. جسٽس (ر) وجيه الدين سان تلخ ڪلامي کان پوءِ چيف اليڪشن ڪمشنر جسٽس ريٽائرڊ وجيه الدين ۽ سندس وڪيل کي چيمبر مان ٻاهر ڪڍي ڇڏيو. جسٽس ريٽائرڊ وجيه الدين اليڪشن ڪمشنر جي رويي خلاف احتجاج ڪندي چيو ته آئون ڪراچي مان خاص طور تي ان ڪيس لاءِ آيو آهيان، اسان عدالت جي ڪمري ۾ پيش ٿياسين پر ساڍا 10 ٿي ويا، اليڪشن ڪيمشن لاءِ وڏو افسوس جوڳو ڏينهن آهي، هي ريٽائرڊ جج هتي ويهي ٻئي نوڪري ڪري رهيو آهي، ريٽائرڊ ماڻهو هتي اهو ٿا سمجهن ته هو چانهن پيئڻ لاءِ ويٺا آهن. سندس وڌيڪ چوڻ هو ته چيف اليڪشن ڪمشنر جي خلاف سپريم جوڊيشل ڪونسل ويندس، هن منهنجي مون کي ذليل ڪيو، سردار محمد رضا چيف اليڪشن ڪمشنر جي عهدي جو نااهل ناهي جڏهن ته آئون پنهنجي ڪيس ۾ چيف اليڪشن ڪمشنر جي آڏو پيش ٿيس.