تازيون خبرون

Daily Archives: February 1, 2018

عمران خان بجلي پيدا ڪرڻ بدران چوري ڪرائيندو آهي: مريم اورنگزيب

اسلام آباد (ويب ڊيسڪ) سڌ سماءَ واري مملڪتي وزير مريم اورنگزيب چيو آهي ته عمران خان ۽ پرويز خٽڪ پنهنجي نااهلي جي ذميواري وفاق تي نه وجهن، پنهنجي ناڪامين جو ذميوار ٻين کي چئي توهان عوامي احتساب کان نٿا بچي سگهو. پي ٽي آءِ سربراهه ۽ ڪي پي جي وڏي وزير جي پريس ڪانفرنس تي ردعمل ڏيندي مريم اورنگزيب چيو ته عمران صاحب! توهان جي 350 ڊيم ٺاهڻ واري دعويٰ ڪيڏانهن وئي، بجلي ايم او يو سان نه پر ڪارخانا هڻڻ سان ٺهندي آهي. هن چيو ته پرويز خٽڪ صاحب گڏيل مفادن واري ڪائونسل ۾ ڪهڙي ڳالهه ۽ عمران خان سان گڏ ويهي ٻي ڳالهه ڪندو آهي، سڄي قوم کي خبر آهي ته تحريڪ انصاف خيبر پختونخواهه ۾ عوام جي خدمت ڪرڻ ۾ ناڪام رهي آهي، عمران خان جيترو به ڪوڙ ڳالهائي قوم کي سندس اصليت جي خبر آهي. سندس چوڻ هو ته عمران خان جنهن وقت ڪنٽينر تيار ڪري رهيو هو ان وقت وفاقي ۽ پنجاب حڪومت عوام لاءِ توانائي ۽ بجلي جا منصوبا لڳائي رهي هئي، جيڪي اڄ مڪمل ٿي رهيا آهن، شهباز شريف سان ساڙ ڪرڻ بدران عمران خان محنت جي عادت ۽ خدمت جو جذبو پيدا ڪري. مريم اورنگزيب چيو ته عمران صاحب توهان بجلي ٺاهيندا ناهيو پر ڪي پي ۾ ويندڙ بجلي چوري ڪرائيندا آهيو.27

 

رائو انوار گينگ جو خاتمو ضروري آهي، پشت بناهي ڪندڙ بي نقاب ٿيڻ گهرجن: سينيٽ ڪميٽي

ڪراچي(م.ڊ) سينيٽ جي انساني حقن بابت قائمه ڪميٽي جو اجلاس چيئرپرسن سينيٽر نسرين جليل جي صدرت ۾ ٿيو، اجلاس ۾ سنڌ جي وڏي وزير سيد مراد علي شاهه  سميت ڪميٽي جي آفيسرن  شرڪت ڪئي، اجلاس ۾ رائو انوار هٿان جعلي مقابلي ۾ مارجي ويل نقيب الله محسود جي عدالت کان مٿانهين قتل جي مذمت ڪئي وئي، اجلاس ۾ خطاب ڪندي چيئرپرسن نسرين جليل چيو ته نقيب الله ڪيس کان علاوه گذريل 5 سالن ۾ رائو انوار جي ٿيندڙ مقابلن جي به جاچ ڪئي وڃي، سينيٽ جي پاس ڪيل ڊيٿ ان ڪسٽڊي قانون تي عمل ڪيو وڃي، هن چيو ته لڳي ٿو ته رائو انوار کي بااثر ماڻهن لڪايو آهي،  اجلاس ۾ سنڌ جي صوبائي گهرو وزير سهيل انور سيال چيو ته  رائو انوار جنهن جو وڻيس نالو کڻي اسان کي ڪو به خوف ناهي.

 

افغانستان کي طالبان، حقاني نيٽ ورڪ جا 27 شڪي ماڻهو ڏنا: پرڏيهي ترجمان

ڪابل/ اسلام آباد (اين اين آءِ/ويب ڊيسڪ) پرڏيهي ترجمان ڊاڪٽر فيصل چيو آهي ته پاڪستان نومبر 2017ع ۾ افغان طالبان ۽ حقاني نيٽ ورڪ جي 27 شڪي ماڻهن کي افغانستان حوالي ڪيو. سماجي رابطن واري هڪ ويب سائٽ ٽوئٽر تي پنهنجي پيغام ۾ پرڏيهي ترجمان جو چوڻ هو ته پاڪستان دحشتگردي خلاف جنگ ۾ آفيسرن ۽ جوانن جي قربانيون ڏنيون آهن ۽ ان حوالي سان پاڪستان جي شهادتن جي شرح سموري دنيا ۾ بلند ترين آهي. سندس چوڻ هو ته پاڪستان دهشتگردي جي انت ۾ پنهنجي 75 هزار شهرين ۽ 6 هزار سپاهين جي قرباني ڏني آهي. هن چيو ته دهشتگردي خلاف جنگ ۾ پاڪستان کي اقتصادي طور 123 ارب آمريڪي ڊالرن جو نقصان ٿيو. سندس چوڻ هو ته پاڪستان تحريڪ طالبان افغانستان ۽ حقاني نيٽ ورڪ جي ڪنهن به شڪي عنصر کي افغانستان خلاف ڪنهن به دهشتگردي لاءِ پنهنجي سرزمين کي استعمال ڪرڻ کان روڪڻ جون ڪوششون ڪري رهيو آهي. ڊاڪٽر محمد فيصل چيو ته پاڪستان ان ضمن ۾ نومبر 2017ع ۾ تحريڪ طالبان افغانستان ۽ حقاني نيٽ ورڪ سان لاڳاپيل 27 ماڻهن کي افغانستان حوالي ڪيو. (اين اين آءِ) افغان حڪومت پاڪستان پاران 27 شدت پسندن کي حوالي ڪرڻ جي ترديد ڪري ڇڏي افغان ميڊيا مطابق افغانستان پاڪستان پاران تحريڪ طالبان افغانستان ۽ حقاني نيٽ ورڪ جي 27 سدت پسندن کي افغان حڪومت جي حوالي ڪرڻ جي ترديد ڪندي چيو ته پاڪستان ڪنهن هڪ شدت پسند کي به اسان جي حوالي ناهي ڪيو گذريل ڏينهن پرڏيهي آفيس جي ترجمان ڊاڪٽر فيصل سماجي رابطي جي ويب سائيٽ تي چيو هو ته پاڪستان افغانستان خلاف ڪنهن به قسم جي دهشتگردي لاءِ پنهنجي سرزمين استعمال ڪرڻ کان  روڪڻ جي ڪوشش ڪري رهيو آهي ان ڏس ۾ گذريل سال نومبر ۾ تحريڪ طالبان ۽ حقاني نيٽ ورڪ سان تعلق رکندڙ 27 شدت پسندن کي افغانستان جي حوالي ڪيو ويو.

 

پوليس رائو انوار جي گرفتاري تي بي وس، ڊيڊ لائين نٿو ڏئي سگهان: اي ڊي خواجا

ڪراچي (ويب ڊيسڪ) سنڌ جي آءِ جي اي ڊي خواجا ملير جي اڳوڻي ايس ايس پي رائو انوار جي گرفتاري تي بي وسيءَ جو اظهار ڪندي ڪا به ڊيڊ لائن ڏيڻ کان انڪار ڪري ڇڏيو آهي. سپريم ڪورٽ ڪراچي رجسٽري ٻاهران صحافين جي آءِ کان سوال ڪيا ۽ کانئس رائو انوار جي عدم گرفتاري جو سبب ڄاڻڻ جي ڪوشش ڪئي. هڪ صحافي جي سوال ته رائو انوار ڪال ڪري رهيو آهي پر گرفتار ڇو نه پيو ٿئي؟ تي اي ڊي خواجا جواب ڏنو ته اسان وٽ واٽس ايپ ڪال ٽريس ڪرڻ جو ڪو نظام ناهي. رائو انوار جي ايئرپورٽ تان نڪري وڃڻ واري سوال تي آءِ جي چيو ته ان جو جواب اسلام آباد ايئرپورٽ وارن کان وٺو. سندس چوڻ هو ته اسان ڪيس داخل ڪري ڇڏيو آهي، جيڪا قانوني ڪارروائي ڪرڻي هئي ڪئي سين پر گرفتاري جي ڪا به تاريخ نٿو ڏئي سگھان. واضح رهي ته چيف جسٽس پاڪستان آءِ جي سنڌ جي درخواست تي کيس 27 جنوري جي ڏينهن رائو انوار جي گرفتاري لاءِ ٽن ڏينهن جي مهلت ڏني هئي پر نقيب الله قتل ڪيس ۾ نامزد روپوش معطل ڪيل ايس ايس پي رائو انوار کي پوليس اڃا تائين گرفتار نه ڪري سگھي آهي.27

 

حڪومت مهانگائي سٽيل عوام تي پيٽرول بم ڪيرائي ڇڏيو، تيل اگهن ۾ واڌ جو اعلان

اسلام آباد (ويب ڊيسڪ) حڪومت عوام تي مهانگائيءَ جو بم ڪيرائيندي پيٽروليم شين جا اگهه وڌائي ڇڏيا آهن. ناڻي واري وزارت جي پڌرائي موجب پيٽرول جي قيمت ۾ 2 رپيا 98 پئسا في ليٽر، ڊيزل جي قيمت ۾ 5 رپيا 92 پئسا في ليٽر، مٽي جي تيل جي قيمت ۾ 5 رپيا 94 پئسا في ليٽر ۽ لائٽ ڊيزل جي قيمت ۾ 5 رپيا 93 پئسا في ليٽر واڌ ڪئي وئي آهي.27

 

انساني وسيلن جي ترقي کان سواءِ ڪوبه معاشرو ترقي نٿو ڪري سگهي: وزيراعظم

اسلام آباد (اين اين آءِ) وزيراعظم شاهد خاقان عباسي چيو آهي ته انساني وسيلن جي ترقي کان سواءِ ڪوبه معاشرو ترقي نٿو ڪري سگهي بينظير انڪم سپورٽ پروگرام جي وسيلا تعليم جي پروگرام کي 50 ضلعن تائين وڌائڻ اطمينان جوڳو آهي اسان کي ماڻهن کي غربت مان ڪڍڻو پوندو پروگرام موجب ٻارڙن ۾ تعليم کي هٿي وٺرائڻ لاءِ وڌيڪ ڪم ڪرڻ جي ضرورت آهي ڪوبه ٻارڙو تعليم کان محروم نه رهڻ گهرجي هو اربع تي هتي بينطير انڪم سپورٽ پروگرام جي انتظام هيٺ وزيراعظم وسيلا تعليم پروگرام کي وڌائڻ واري تقريب کي خطاب ڪري رهيو هو. وزيراعظم شاهد خاقان چيو ته انساني وسيلن جي ترقي کان سواءِ ڪوبه ملڪ ترقي نٿو ڪري سگهي جڏهن ته تعليم دهشتگردي انتهاپسندي سميت ٻين مختلف برائين کان تحفظ فراهم ڪرڻ ۾ به مددگار ثابت ٿئي ٿي هن چيو ته حڪومت سدائين تعليم کي هٿي وٺرائڻ لاءِ ڪم ڪيو آهي ۽ 18هين ترميم کان پوءِ تعليم صوبائي حڪومت جي ذميواري اهي جڏهن ته وفاقي حڪومت صوبائي حڪومتن جي سهڪار سان ملڪ ۾ تعليمي معيار کي وڌيڪ وڌائيندي هن چيو ته پروگرام موجب 1.9 ملين ٻارڙا اسڪول وڃي رهيا آهن جڏهن ته توسيع پروگرام موجب ملڪ جي 50 ضلعن سان تعلق رکندڙ هڪ ملين ٻارڙن کي اسڪول موڪلکينداسين وزيراعظم چيو ته اسان جو ازم آهي ته سڀني ٻارڙن کي نه صرف تعليم پر معياري تعليم ڏني وڃي هن چيو ته عالمي بئنڪ جي وسيلا تعليم پروگرام لاءِ معاونت واکاڻ جوڳي آهي بي آءِ ايس پي مڪمل طور تي غير سياسي پروگرام آهي جيڪو صوبائي حدن 7 قيد کان به آزاد آهي جنهن ۾ مستحڪ ۽ غريب ماڻهن جي ٻارڙن کي سهولتون فراهم ڪيون پيون وڃن هن چيو ته وسيلا تعليم پروگرام جي ڪاميابي ۽ ان ۾ واڌ جي حوالي سان بي آءِ ايس پي جي چيئرپرسن ماروي ميمڻ جون خدمتون ساراهه جوڳيون آهن هن چيو ته پروگرام موجب ٻارڙن ۾ تعليم کي هٿي وٺرائڻ لاءِ وڌيڪ ڪم ڪرڻ جي ضرورت اهي ۽ اسان کي ماڻهن کي غربت مان ڪڍڻو پوندو جنهن سان معاشري جي ترقي ٿي سگهندي تقريب ۾ شامل بهتر ڪارڪردگي ڏيکاريندڙ ٻارڙن ۽ عورتن کي مبارڪون ڏيندي چيو ته هي پروگرام اوهان جي خدمت ۽ مدد جي لاءِ آهي ۽ پروگرام کي ڪامياب ڪرڻ لاءِ اوهان جي حقيقي مدد اها آهي ته اوهان پنهنجن ٻارڙن کي معياري تعليم ڏياريو ۽ والدين تعليم جي اهميت کي سمجهن جنهن جي نتيجي ۾ بي آءِ ايس پي جو وسيلا تعليم پروگرام ۽ ملڪ ٻئي ترقي ڪندا. هن چيو ته اميد آهي ته ايوارڊ وٺندڙ ٻارڙا ۽ انهن جا ڀائر ۽ ڀينر به تعليم حاصل ڪندا وزيراعظم اهو ازم ورجايو ته ڪوبه ٻارڙو تعليم کان محروم نه رهڻ گهرجي ته جيئن هو ملڪ ۽ معاشري تي بار نه بڻجي سگهي هن چيو ته اسان جو دين به تعليم حاصل ڪرڻ تي زور ڏي ٿو ان کان اڳ وزيراعظم سڄي ملڪ جي مختلف ضلعن شهرن ۽ ڏورانهين علائقن سان تعلق رکندڙ ٻارڙن ۾ ايوارڊ ورهايا جيڪي وزيراعظم وسيلا تعليم پروگرام مان فائدو وٺي رهيا آهن تقريب ۾ عالمي بئنڪ جو ڪنٽري ڊائريڪٽر، مختلف ملڪن جا سفير بي آءِ ايس پي جي پارٽنرن سميت سول سوسائٽي جي مختلف شعبن سان تعلق رکندڙ ماڻهو ۽ وسيلا تعليم پروگرام مان فائدو وٺڻن ماڻهن وڏي انگ ۾ شرڪت ڪئي هن پروگرام کي ملڪ جي 50 ضلعن تائين وڌايو ويندو ۽ وڌيڪ 10 لک ٻارڙن کي اسڪول ۾ داخل ڪرايو ويندو جڏهن ته پروگرام موجب پهريان 19 لک ٻارڙا فائدو وٺي رهيا آهن.

 

ملڪ جي مختلف علائقن ۾ زلزلو، هڪ ٻارڙي فوت، 10 کان وڌيڪ زخمي

اسلام آباد/نئين دهلي (اين اين آءِ) آزاد ڪشمير، گلگت بلستان ۽ اسلام آباد سميت ملڪ جي مختلف شهرن ۾ زلزلي جا سخت لوڏا محسوس ڪيا ويا جن جي ريئڪٽر اسڪيل تي شدت 6.2 رڪارڊ ڪئي ويئي زلزلي جي لوڏن سبب شهري خوف وچان گهرن ۽ آفيسن مان ٻاهر نڪري آيا ڪچن گهرن جون ڇتون ۽ ڀتيون ڪرڻ جي واقعي جي نتيجي ۾ هڪ ٻارڙي سميت 10 کان وڌيڪ ماڻهو زخمي ٿيا تفصيل مطابق اسلام آباد سميت پنجاب بلوچستان خيبرپختونخواهه آزاد ڪشمير گلگت بلتستان جي مختلف حصن ۾ اربع تي 12 لڳي 8 منٽن تي زلزلي جا سخت لوڏا محسوس ڪيا ويا رپورٽ مطابق اسلام آباد لاهور پشاور ايبٽ آباد هريپور پاراچنار مهمند ايجنسي مردان چنيوٽ چارسده ڊي آءِ خان، ٽانڪ لڪي مروت، شانگلا، سوات، منگورا، بنو، بيلا، راولپنڊي، ملتان، بکر، ٽوباٽيڪ سنگهه، حافظ آباد گجرانوالا، ڪماليا سرگوڌا جهلم، فيصل آباد، جهنگ ۽ ڊيرا اسماعيل خان سميت مختلف شهرن ۾ زلزلي جا سخت لوڏا محسوس ڪيا ويا زلزلي جو مرڪز ڪوهه هندوڪش ريجن افغانستان ۽ گهرائي 169 ڪلوميٽر هئي جڏهن ته زلزلو هندو ڪش جي جابلو سلسلي ۾ آيو جنهن جو مرڪز چترال کان 140 ڪلوميٽر اتر اولهه ۾ افغانستان جو علائقي فيض آباد هو.

 

وفاقي حڪومت اسان کان سستي بجلي نه پئي خريد ڪري: عمران خان

اسلام آباد (ويب ڊيسڪ) ڪي پي حڪومت ۽ روسي ڪمپني وچ ۾ آئل ريفائنري جي حوالي سان معاهدو ٿي ويو آهي، جڏهن ته صوبي ۾ حڪومتي پارٽي جي سربراهه عمران خان چيو آهي ته وفاقي حڪومت خيبرپخونخواهه کان سستي بجلي نه پئي خريد ڪري. اسلام آباد ۾ پرويز خٽڪ سان گڏ پريس ڪانفرنس ڪندي عمران خان چيو ته ڪي پي حڪومت ۽ روسي ڪمپني آئل اينڊ گئس حيماش اپارات ۽ آرفيوز سان معاهدو ٿي ويو آهي، جنهن تحت روسي ڪمپني هر ڏينهن خيبر پختونخواهه ۾ 20 هزار بيل آئل ريفائن ڪندي ۽ آئل ريفائنري پلانٽ ڪوهاٽ ۾ لڳايو ويندو. هن چيو ته 74 ميگا واٽ بجلي تيار آهي، جيڪا سستي به آهي پر وفاقي حڪومت خريد نه پئي ڪري، شهباز شريف کي هر شئي جي اجازت ملي ويندي آهي پر جنهن ڳالهه ۾ پاڪستان جو فائدو هجي ته ان کي اجازت ناهي ڏني ويندي. سندس چوڻ هو ته ملڪ جو سڀ کان وڏو مسئلو گدلاڻ آهي، جيڪو پنجاب ۾ پاور پلانٽ سان پيدا ٿي رهيو آهي، جڏهن ته پاڻي تي بجلي سڀ کان سستي آهي، ملڪ جي ترقي جو دارومدار ان تي آهي پر ايل اين جي، ڪوئلو يا ڪا ٻي انرجي ڊالر سان حاصل ڪئي ويندي آهي، جيڪو معيشت تي ٻوجهه آهي، ڇو ته ٻاهران شيون گهرائڻ جو مقصد رڳو ڪميشن آهي، جيڪا حڪمران کائي رهيا آهن.27

 

لاڙڪاڻو ڪرپشن ڪيس: عدالت فريال ٽالپر سميت ٻين ڏي نوٽيس جاري ڪري ڇڏيا

ڪراچي (ويب ڊيسڪ) سنڌ هاءِ ڪورٽ لاڙڪاڻي ۾ مبينا 90 ارب رپين جي ڪرپشن جي معاملي تي فريال ٽاپلر ۽ ٻين خلاف اربين رپين جي ڪرپشن جي درخواست بحال ڪري ڇڏيو. سنڌ هاءِ ڪورٽ لاڙڪاڻي ۾ مبينا 90 ارب رپين جي ڪرپشن جي معاملي تي فريال ٽالپر ۽ ٻين خلاف اربين رپين جي ڪرپشن جي درخواست بحال ڪري ڇڏي. عدالت فريال ٽالپرل، اياز سومرو، شفقت سومرو، چيف سيڪرٽري ۽ ٻين ڏي نوٽيس جاري ڪندي 2 فيبروري تائين جواب داخل ڪرڻ جي هدايت ڪري ڇڏي. ان کان اڳ درخواست ڪندڙ موقف اختيار ڪيو ته خاندان کي خطرن کي نظر ۾ رکندي درخواست واپس ورتي هئي، تنهن هوندي خاندان کي محفوظ مقام تي منتقل ڪيو ويو ان ڪري ان درخواست کي بحال ڪيو وڃي ۽ لاڙڪاڻي ۾ ٿيل ڪرپشن جي جاچ جو حڪم ڏنو وڃي.

 

لاهور سيشن عدالت ۾ فائرنگ سبب پوليس اهلڪار سميت 2 ڄڻا مارجي ويا

لاهور(ويب ڊيسڪ) سيشن عدالت ۾ فائرنگ سبب پوليس اهلڪار سميت 2 ڄڻا مارجي ويا ۽ 2 زخمي ٿي پيا. تفصيل موجب قتل ڪيس ۾ گرفتار جوابدار ملڪ امجد خان کي سيشن ڪورٽ ۾ عدالت ۾ پيشي لاءِ آندو ويو ته مخالف گروپ جي ماڻهن مٿس فائرنگ ڪري ڏني جنهن جي نتيجي ۾ جوابدار ملڪ امجد سان گڏ پوليس اهلڪار به مارجي ويو. فائرنگ سبب ملڪ امجد جي هڪ ساٿي سميت 2 ڄڻا زخمي ٿي پيا. جوابدارن ۽ پوليس وچ ۾ ڪافي دير تائين فائرنگ جي ڏي وٺ ٿي تنهن هوندي حملي آور فائرنگ ڪندي فرار ٿي ويا. واقعي جو اطلاع ملندي ئي پوليس جي ڳري نفري طلب ڪئي وئي ۽ جوابدارن جي ڳولا لاءِ سرچ آپريشن ڪيو ويو. تنهن هوندي حملي آور هٿ نه اچي سگهيا. مارجي ويل پوليس اهلڪار هيڊ ڪانسٽيبل هيو جنهن جي سڃاڻپ آصف جي نالي سان ٿي.