تازيون خبرون

Monthly Archives: February 2018

ادارن کي ويڙهائڻ جي ڪوشش جو الزام رد، نواز شريف جي ڪوشش آهي ته ادارا ڪمزور ٿين: آصف زرداري

اسلام آباد (اين اين آءِ) پ پ جي ڪو چيئرمين آصف علي زرداري چيو آهي ته اسان ڪڏهن به ادارن کي ويڙهائڻ جي ڪوشش ناهي ڪئي، نواز شريف جي ڪوشش آهي ته ادارن کي ڪمزور ڪيو وڃي، پنجاب جي بيورڪريسي ۾ بغاوت ڪرائي پئي وڃي، اسان پنهنجي دور ۾ اسٽبلشمينٽ سان گڏجي مشڪل حالتن کي منهن ڏنو، اسان جو پاڙيسري وڏو چالاڪ آهي، هو عالمي طاقتن سان گڏجي اسان تي پابنديون هڻائي رهيو آهي،نريدر مودي هر فورم تي پنهنجي طاقت استعمال ڪري رهيو آهي، عالمي فورم تي بلاول ڀٽو جيئن پاڪستان جو دفاع ڪيو ائين مان به نه پئي ڪري سگهيس، عمران خان جي شادي سندس ذاتي مسئلو آهي منهنجو ان سان ڪو به تعلق نه آهي، جمعي تي پريس ڪانفرنس ڪندي هن چيو ته نواز شريف جي ڪوشش آهي ته ادارن کي ڪمزور ڪيو وڃي، ن ليگ وارا چون ٿا ته کين سينيٽ جي اليڪشن مان ڪڍيو ويو آهي، پر کين سينيٽ اليڪشن مان ناهي ڪڍيو ويو، هن چيو ته جڏهن ادارا ڪمزور ٿيندا آهن ته ملڪ ڪمزور ٿي ويندو آهي، اسان ڪڏهن به ادارن کي ويڙهائڻ جي ڪوشش ناهي ڪئي، هن چيو ته جسٽس رٽائرڊ مون کي 10 ڀيرا سزا ڏني پر پ پ عدالتي فيصلو قبول ڪيو، اسان عدالت وڃي انصاف گهريو پر ڪو به غير جمهوري رويو اختيار نه ڪيو، هن چيو ته پنجاب جي بيروڪريسي ۾ 14 کان 15 ايم اين ايز جا ڀائر ۽ ڀائٽيا آهن انهن جي مدد سان پنجاب جي بيروڪريسي ۾ بغاوت ڪرائي پئي وڃي انهن کي خوف آهي ته شهباز شريف به جيڪڏهن هليو ويو ته پوءِ انهن جو ڇا ٿيندو، هن چيو ته اسان جي دور ۾ به ڪافي ڏکيائيون هيون پر اسان اسٽبلشمينٽ سان گڏجي حالتن کي منهن ڏنو، اسان ۽ توهان سڀني کي آخر هڪ ڏينهن وڃڻو آهي، عاجزي سان چوان ٿو ته هن ملڪ تي رحم ڪريو، اسان کي هن مٽي ۾ مرڻو آهي، هن چيو ته اسان 4 سالن کان چئي رهيا هئاسين ته اوهان پرڏيهي وزير رکو پر اسان جي هڪ به نه ٻڌي وئي، ان جو نتيجو اهو نڪتو ته ڀارت پاڪستان خلاف عالمي سازشون ڪرڻ لڳو، اهڙين شين جو مقابلو اسان پنهنجي دور ۾ ڪيو هو، هن چيو ته ڏسو ته ڀارت جي مسلمانن سان ڪهڙو ورتاءُ ٿي رهيو آهي، ڀارت ۽ مودي جو فوڪس رڳو پاڪستان جي خلاف آهي، هن چيو ته اسان جي نااهلي جو فائدو ڀارت وٺي رهيو آهي، هن چيو ته توهان آسري ۾ آهيو ته ڀارت توهان جو دوست ٿي ويندو، هن چيو ته مخالف ڪڏهن به نٿا چاهين ته پاڪستان قائم رهي، عالمي سطح تي اسان جي خلاف سازشون ٿي رهيون آهن، مودي مسلمان ملڪن ۾ مندر تعمير ڪرائي رهيو آهي ۽ پاڪستان جي خلاف هر فورم تي پنهنجي طاقت استعمال ڪري رهيو آهي، هن چيو ته ميان صاحب ڪميشن کانسواءِ ڪو به ڪم ناهي ڪندو، هن پختونن ۽ بلوچن کي انهن جو حصو ڪڏهن به ناهي ڏنو رڳو لاهور کي ڏنو آهي، جڏهن ته پنجاب جا به ڪافي علائقا پٺ تي پيل آهن، هن چيو ته مان تونسا شريف ويس ته اتان جي رستن جي حالت به خراب آهي. پ پ جي تازو ننڍي چونڊ دوران خراب ڪارڪردگي بابت پڇيل هڪ سوال ۾ آصف چيو ته جڏهن صوبائي ۽ وفاقي حڪومت پنهنجي هجي ته ووٽ وٺڻ آسان ٿي ويندو آهي، ن ليگ اين اي 120 ۾ 4 ارب رپيا خرچ ڪيا آهن، هن چيو ته ڊي سي ان جو پنهنجو آهي ۽ ايس ايڇ اوز به سندس پنهنجا آهن، پنجاب ۾ سياست ئي ايس ايڇ اوز جي هوندي آهي، عمران خان کي مبارڪ جي حوالي سان آصف زرداري چيو ته اسان جا ان سان ايترا به سٺا لاڳاپا نه آهن جو کيس مبارڪ ڏيان.

 

ٽئين فيصلي ۾ مون کي اليڪشن وڙهڻ کان نااهل ڪيو ويندو: نواز شريف

اسلام آباد (اين اين آءِ) اڳوڻي وزيراعظم محمد نوازشريف چيو اهي ته پارٽي صدارت مان ڪڍڻ پري پول ڌانڌلي آهي (ن) ليگ کي سينيٽ اليڪشن کان محروم ڪيو پيو وڃي ڪارن اکرن وارا ڪافي فيصلا آهن ٽيون فيصلو به اچي رهيو آهي جنهن ۾ مون کي اليڪشن وڙهڻ کان نااهل ڪيو ويندو گارڊ فادر سسلين مافيا چور ڦورو سڏيو ويو پوءِ ٻئي ڏينهن چيو وڃي ٿو ته سياسي ليڊرن جو احترام آهي جي آءِ ٽي جي سوالن جو جواب آهستي آهستي ملي رهيو آهي جمعي تي احتساب عدالت ٻاهران ميڊيا سان ڳالهائيندي نوازشريف چيو ته مون کي اوهان پارٽي جي صدارت تان ڪڍي رهيا آهيو ٽيون فيصلو به اچي رهيو آهي جنهن ۾ مون کي اليڪشن وڙهڻ کان به نااهل ڪندا ۽ مون کي خبر آهي ته هي مون کي اليڪشن وڙهڻ کان به محروم ڪندا. هن چيو ته ڪارن اکرن وارا ڪافي فيصلا آهن نٿو سمجهان ته اهڙو ڪوئي فيصلو آهي جيڪو سنهري اکرن سان لکيو وڃي پارٽي صدر کي ڪڍڻ پري پول ڌانڌلي آهي (ن) ليگ کي سينيٽ اليڪشن کان محروم ڪيو پيو وڃي.

 

تاپي گئس پائيپ لائن رٿا خطي جا قديمي رابطا بحال ٿيڻ جو تاريخي موقعو آهي: وزيراعظم

سرحت آباد ( ويب ڊيسڪ )  وزيراعظم شاهد خاقان عباسي چيو آهي ته ترڪمانستان، افغانستان، پاڪستان، ڀارت تاپي گئس پائيپ لائن رٿا خطي جا قديمي رابطا بحال ٿيڻ جو تاريخي موقعو آهي ۽ رٿا سان خطي ۾ مجموعي طور خوشحالي ايندي. وزيراعظم شاهد خاقان عباسي ترڪمانستان جي شهر سرحت آباد ۾ تاپي گئس پائيپ لائن رٿا جي افتتاحي تقريب کي خطاب ڪندي چيو ته رٿا کي حقيقت ۾ تبديل ڪرڻ لا3 تاپي ملڪن جا ٿورائتا آهيون. هن چيو ته پاڪستان سڄي دنيا جي سيڙپڪارن کي سيڙپڪاري جو محفوظ موقعو فراهم ڪري ٿو. سندس چوڻ هو ته پاڪ چين اقتصادي راهداري حقيقت جو روپ اختيار ڪري چڪي آهي، گوادر بندرگاهه وچ ايشيا سميت خطي جي ملڪن کي سهولت فراهم ڪندي. وزيراعظم شاهد خاقان عباسي چيو ته پاڪستان ڪيترن ئي اقتصادي چئلينجن تي ضابطو آڻي ڇڏيو آهي، پاڪستان ۾ گئس جي کوٽ تي ضابطو آندو ويو آهي، ملڪ ۾ چئن سالن ۾ بجلي جي پيداوار ۾ 10 هزار ميگا واٽ کان وڌيڪ اضافو ٿيو آهي.  وزيراعظم شاهد خاقان عباسي ترڪمانستان جي شهر ميري ۾ ترڪمان صدر قربان محمدوف سان ملاقات ڪئي. ملاقات دوران ٻنهي اڳواڻن ٻطرفي سهڪار، توانائي، واپار ۽ اقتصادي راهداري بابت تاپي گئس پائيپ لائين رٿا جي اهميت کي اجاگر ڪيو ۽ علائقائي سلامتي سميت گڏيل دلچسپي جي معاملن تي ڳالهيون ڪيون.  ان موقعي تي وزيراعظم شاهد خاقان عباسي چيو ته اها رٿا ٻنهي ملڪن ۾ ٻطرفن لاڳاپن ۾ هڪ نئون باب شامل ٿيندي.

 

سنڌ فيسٽيول نالي ڪرپشن، نيب پاران تحقيقات جو فيصلو

ڪراچي (اين اين آءِ) سنڌ ۾ ڪلچر جي نالي تي ڪرپشن ميلي جو نيب نوٽيس وٺندي سنڌ فيسٽيول جي آرگنائيزر حشام رياض شيخ، ان جي گهرواري شرميلا فاروقي ۽ ٻين کان پڇا ڳاڇا جو فيصلو ڪيو آهي. نيب جي انڪوائري رپورٽ جي مطابق افتتاح ۽ اختتامي تقريبون ساڍا 10 ڪروڙ رپين ۾ پيون. سوا ٻه ڪروڙ رپين جون پتنگون اڏايون ويون، گهوڙن تي ٻه ڪروڙ ۽ گڏهن جي ريس تي نصف ڪروڙ لڳائي ورتا. ذريعن جي مطابق مينجنگ ڪميٽي جي ميمبرن فريال ٽالپور، شيري رحمان، فخر عالم، اويس مظفر ٽپي، شرجيل ميمڻ ۽ شهريار تاثير کان به تحقيات ڪئي ويندي. ذريعن ٻڌايو ته  اڳوڻي سيڪريٽري بلديات ثاقب سومرو، ذوالفقار شلواڻي، سيڪريٽري خزانه ۽ ڊي جي ڪلچر سميت ٻين کان به پوڇا ڳاڇا ڪئي ويندي. فيسٽيول ايترا ضروري هئا ته سمري کان انڪار تي ٻن ڏينهن ۾ ٽي سيڪريٽري بدلي ڪيا ويا نيب وڌيڪ تفتيش جي لاءِ اجازت گهري ورتي آهي.

 

ادارن جو احترام ڪرڻ گهرجي، نواز شريف عدالت جا فيصلا قبولي: خورشيد شاهه

سکر ( ويب ڊيسڪ ) قومي اسيمبليءَ ۾ مخالف ڌر جي اڳواڻ خورشيد شاهه چيو آهي ته نواز شريف کي عدالتن جا فيصلا مڃڻ گهرجن. سکر ۾ ميڊيا سان ڳالهائيندي خورشيد شاهه چيو ته اسان کي ادارن جو احترام ڪرڻ گهرجي. هن چيو ته نواز شريف پاڻ چئي رهيو آهي ته عدالتي فيصلا قبول ڪرڻ گهرجن تنهن ڪري نواز  شريف کي به عدالتن جا فيصلا قبول ڪرڻ گهرجن. سندس چوڻ هو ته گار ۽ الزامن جي سياست نه ٿيڻ گهرجي جڏهن ته مون کي نه ٿو لڳي ته سينيٽ جي چونڊ ملتوي ٿيندي. خورشيد شاهه چيو ته حڪومت پنجن سالن دوران 7 هزار ارب رپين جو قرض ورتو آهي، اسان 21 ارب رپين جا قرضي آهيون، ملڪي معاشي حالت خراب آهي، اسان قرضن ۾ ٻڏل آهيون، هر پيدا ٿيندڙ ٻارڙو به قرضي آهي.

 

پ پ چيئرمين پاران اڳواڻ تي حملي ۽ اغوا جي مذمت، مخالف پارٽي جي مقبوليت کان ڊنل آهن: بلاول ڀٽو زرداري

ڪراچي (اسٽاف رپورٽر)           پاڪستان پيپلز پارٽي جي چيئرمين بلاول ڀٽو زرداري، پي پي پي بلوچستان جي صدر علي مدد جتڪ تي فائرنگ ۽ واشڪ ضلعي ۾ پارٽي جي ميمبر شپ مهم دوران ٻن ڪارڪنن جي اغوا جي سخت مذمت ڪئي آهي. واضح رهي ته گذريل ڏينهن ڪوئيٽا ۾ سيشن ڪورٽ ٻاهران اڻڄاتل جوابدارن علي مدد جتڪ تي فائرنگ ڪئي، جنهن ۾ خوشقسمتي سان هو محفوظ رهيو هو، جڏهن ته واشڪ ۾ پي پي پي جي ٻن ڪارڪنن امام ۽ محمد عيسيٰ کي ان وقت اغوا ڪيو ويو، جڏهن هو پارٽي جي ميمبرشپ مهم هلائڻ ۾ مصروف هئا. بلاول ڀٽوزرداري چيو ته ڄاڻايل واقعن مان واضح آهي ته بلوچستان ۾ پارٽي جي وڌنڌڙ مقبوليت کان مخالف ڊنل آهن ۽ انهن پي پي پي جي جيالن کي هيسائڻ ۽ ڌمڪيون ڏيڻ شروع ڪري ڇڏيو آهي. پي پي پي چيئرمين مطالبو ڪيو ته پي پي پي بلوچستان جي صدر تي حملي ۾ ملوث جوابدارن کي بنا دير گرفتار ڪيو وڃي ۽ اغوا ٿيل ڪارڪنن جي محفوظ بازيابي کي جلد کان جلد يقيني بڻايو وڃي. بلاول ڀٽو زرداري بلوچستان ۾ پي پي پي اڳواڻن ۽ ڪارڪنن کي سڪيورٽي لاءِ قدم کڻڻ جو پڻ مطالبو ڪيو.

 

18هين ترميم کانپوءِ فلم صوبائي سبجيڪٽ آهي، حڪومت فلمن جي واڌري لاءِ فلم فيسٽيول ڪرڻ جا انتظام ڪندي: وڏو وزير

ڪراچي (اسٽاف رپورٽر) سنڌ جي وڏي وزير سيد مراد علي شاهه چيو آهي ته 18هين ترميم کانپوءِ فلم صوبائي سبجيڪٽ آهي ۽ سندس حڪومت ملڪ ۾ فلمن جي واڌري لاءِ اهڙا فلم فيسٽيول ڪرڻ جا انتظام ڪندي. هن اها ڳالهه اڄ ايشيا پيس فلم فيسٽيول جنهن جو اهتمام صوبائي سڌسماءَ واري کاتي جي سهڪار سان ثقافت کاتي ايڪسپو سينٽر ڪراچيءَ ۾ ”ڪراچي سڀ ڪا“ جي عنوان سان رٿيل صدارتي خطاب ڪندي ڪئي. هن چيو ته فيسٽيول جو ٿيم ”ڪراچي سڀ ڪا“ دلچسپيءَ وارو آهي ۽ ان م ڪو شڪ نه آهي ته ڪراچي بحيثيت هڪ جديد معاشري جي عڪاسي ڪندو آهي ۽ هتي هر هڪ طبقي سان تعلق رکندڙ ماڻهو رهندا آهن ۽ جن جا هڪٻئي سان سنڌي يا اڻ سڌي ريت لاڳاپا آهن. هن چيو ته هن شهر جي اها اونرشپ يقينن مستحڪم ٿيندي ۽ مختلف ٻوليون ڳالهائيندڙ، مختلف سوچ رکندڙ ۽ مختلد مذهبن سان واسطو رکندڙ ماڻهو پُرامن ماحول ۾ ڀائيچارگي واري فضا ۾ رهي رهيا آهن. وڏي وزير سيد مراد علي شاهه صوبائي ثقافت واري وزير سيد سردار شاهه کي ان ايونٽ جي انعقاد وارين ڪاوشن جي واکاڻ ڪندي چيو ته اهڙي طرح اسانجي معاشري جي حقيقي هم آهنگي جو اظهار ٿيندو آهي. صوبائي حڪومت فلم جي فروغ ۽ صوبي ۾ سينيما واري صنعت جي بحاليءَ لاءِ ڪوششون جاري رکنداسين. هن چيو ته فيسٽيول ۾ پنجاهه کان وڌيڪ ملڪ شرڪت ڪري رهيا آهن ۽ 109 کان وڌيڪ فلمون ڏيکاريون وينديون. هن چيو ته هي فيسٽيول ٽيڪنالاجي جي تجربي، اسڪرپٽ واري ڪم، اسڪرپٽ جي ٽيڪنيڪ، پڪچرائيزنگ واري ٽيڪنيڪ کي شيئر ڪرڻ لاءِ بهتر آهي ۽ ان سان گڏوگڏ مختلف ماحول ۾ مختلف ٽيڪنالاجيز جي شيئرنگ ٿيندي آهي ۽ مختلف ملڪن ۾ فلم مارڪيٽ کي فروغ حاصل ٿيندو آهي. وڏي وزير چيو ته سندس ادبي فيسٽول، فوڊ فيسٽيول، فلم فيسٽيول، ميوزڪ ڪانسرٽ، ادبي پروگرام ۽ اهڙي طرح جي ٻين پروگرامن جي شهر ۾ انعقاد کي ڏسي فخر محسوس ٿيندو آهي ته اڳ هي شهر دهشتگردن، مافيا، قانون جي ڀڃڪڙي ڪندڙن ۽ گينگسٽر جو هدف هو پر اڄ هي شهر امن، سڪون، واپار، صنعت ۾ تبديل ٿي ويو آهي ۽ هي شهر ٻيهر روشنين جو شهر بڻجي ويو آهي. مراد علي شاهه چيو ته فلم فيسٽيول سان سياحت کي فروغ ڏيڻ ۾ به مدد ملندي. هن چيو ته هن فلم فيسٽيول بدولت مختلف ملڪن کان 400 کان وڌيڪ ماڻهو ان کي ڏسڻ لاءِ آيا آهن ۽ هن شهر ۾ رٿيل هن فلم فيسٽيول سان لطف اندوز ٿي رهيا آهن. انکان اڳ وڏي وزير سيد مراد علي شاهه چئن ڏينهن واري (23 کان 26 فيبروري 2018) فلم فيسٽيول جو ربن ڪاٽي افتتاح ڪيو. هن فلم فيسٽيول جي موقعي تي منعقد ٿيل پينٽنگ نمائش جو به دورو ڪيو.

 

نواز شريف ملڪ خانه جنگي شروع ڪرائڻ چاهي ٿو: عائشه گلالئي جو الزام

اسلام آباد(ويب ڊيسڪ) پاڪستان تحريڪ انصاف جي باغي اڳواڻ عائشه گلالئي نئين سياسي پارٽي بڻائڻ جو اعلان ڪري ڇڏيو آهي. اسلام آباد ۾ پريس ڪانفرنس ڪندي عائشه گلالئي ” پاڪستان تحريڪ انصاف گلالئي“ جي نالي سان نئين سياسي پارٽي جو اعلان ڪري ڇڏيو آهي. هن الزام هڻندي چيو ته نواز شريف ملڪ خانه جنگي شروع ڪرائڻ چاهي ٿو، جڏهن ته تحريڪ انصاف جي سينيٽ چونڊن ۾ ڪرپٽ ماڻهن کي ٽڪيٽون ڏنيون. هن چيو ته سياستدانن جي ترجيح ۾ ذاتي مفاد ملڪي مسئلن کان وڌيڪ اهم آهن.  عائشه گلالئي چيو ته نواز شريف سپريم ڪورٽ مان نااهل ٿيڻ کان پوءِ پنجاب سميت سڄي ملڪ ۾ پنهنجي مقبوليت وڃائي ويٺو آهي. هاڻ هو ملڪ ۾ خانه جنگي شروع ڪرائڻ چاهي ٿو.

 

عورتن کي بااختيار بڻائڻ ۾ ڪي پي ٻين صوبن کان گهڻو اڳتي آهي: عمران خان

اسلام آباد ( ويب ڊيسڪ ) تحريڪ انصاف سربراهه عمران خان چيو آهي ته عورتن کي بااختيار بڻائڻ ۾ ڪي پي ٻين صوبن کان گهڻو اڳتي آهي. ٽوئيٽر تي جاري ڪيل بيان ۾ عمران خان چيو ته ملڪي تاريخ ۾ پهريون ڀيرو ٻيلن جي رائلٽي سڌو عورتن کي ڏني پئي وڃي. هن چيو ته ڪي پي حڪومت ٻيلن جي رائلٽي ۾ پهريون ڀيرو عورتن کي به حصيدار بڻايو آهي جنهن جي شروعات چترال کان ڪئي وئي آهي. سندس چوڻ هو ته ٻيلن ۾ عورتن کي رائلٽي ڏيڻ جي شروعات چترال مان ڪئي وئي آهي ۽ اها رائلٽي جلد مالاڪنڊ کي به ڏني ويندي.

 

احد چيما جي گرفتاري خلاف بيورو ڪريٽن جي هڙتال رياست خلاف جنگ جو اعلان آهي: طاهر القادري

ٽورنٽو(ويب ڊيسڪ) پاڪستان عوامي تحريڪ جي سربراهه علامه طاهر القادري چيو آهي ته نواز شريف ۽ شهباز شريف ادارن جي خلاف هڪ ئي صفحي تي آهن. تفصيل موجب ميڊيا سان ڳالهائيندي طاهر القادري جو چوڻ هو ته ڪرپٽ شهباز شريف جو چور بٽڻ احد چيما وٽ آهي، انهيءَ ڪري هن جي گرفتاري تي تنقيد ڪئي پئي وڃي. سندس چوڻ هو ته گرفتاري کان پوءِ پنهنجي مالي ڏوهن جي تحفظ لاءِ شهباز شريف بيورو ڪريٽن کي ورغلايو،  بيورو ڪريٽن جي اها هڙتال رياست جي خلاف جنگ جو اعلان آهي. هن انڪشاف ڪيو ته ٻن ڏينهن وري سروسز ڪلب ۾ وزير بغاوت جي منصوبابندي ڪندا آهن، ان سڄي معاملي ۾ خاموشي ۽ ايڪشن نه وٺڻ سان ثابت ٿيو ته پنجاب جو وڏ وزير ان ۾ شامل آهي.