تازيون خبرون

Monthly Archives: January 2018

ميگهن مرڪل تي ڪيتريون ئي شاهي پابنديون، روايتن جي پوئواري جو حڪم

لنڊن(شوبز نيوز)برطانوي شهزادي هيري سان مڱڻي ڪندڙ آمريڪي اداڪارا ميگهن مرڪل کي راڻي ايلزبيٿ 2 عوامي ملاقاتن دوران يا محل کان ٻاهر ۽ محل جي اندر شهزادي جي پويان هلڻ جو حڪم جاري ڪري ڇڏيو آهي.ميڊيا مطابق تاج برطانيه جي راڻيءَ جي حڪمن تحت شاهي خاندان جي روايتن جي پوئواري کي ميگهن مرڪل لاءِ لازمي قرار ڏنو ويو آهي ۽ سندس آڏو واضح ڪيو ويو آهي ته هوءَ شاهي خاندان ۾ رهڻ چاهي ٿي ته شاهي پابندين تي عمل به ڪري. برطانوي رسالي لکيو آهي ته ميگهن مرڪل کي راڻي جا ڪيترائي حڪم ٻڌائڻ سان گڏ چيو ويو آهي ته شاهي خاندان ۾ شموليت سولو نه آهي.جڏهن ته شاهي خاندان جي فرد طور لاڳو ٿيل پابندين جو ٻڌي ميگهن کان اڪثر ڇرڪ نڪري ويندو آهي. راڻيءَ جي لاڳو ڪيل پابندين مطابق ميگهن مرڪل کي شهزادي هيري کان پهرين ڳالهائڻ کان روڪيو ويو آهي، کيس چيو ويو آهي ته اها سندس پٺيان هلي، ڇاڪاڻ ته زال جو غلام شهزادو وارو تاثر چڱو ناهي. جڏهن ته پابندين تحت ميگهن خوبصورتي، لباس ۽ ٻين عام معاملن بابت نه ڳالهائيندي ۽ نه وري ذاتي فون رکي سگهي ٿي.ذريعن جو چوڻ آهي ته شاهي خاندان جي روايتن مطابق شهزادي کي ارل يعني نواب ۽ ميگهن کي ڪائونٽيس آف راس جا شاهي لقب ڏيڻ جو فيصلو ٿي ويو آهي

 

پاڪستان ٽي ٽوئنٽي ميچ ۾نيوزيلينڊ کي شڪست ڏئي سيريز پنهنجي نالي ڪري ورتي

ويلنگٽن(اسپورٽس نيوز) پاڪستان ٽئين ۽ آخري ٽي ٽوئنٽي ميچ ۾ نيوزيلينڊ کي 18 رنسن تان شڪست ڏيئي ٽن ميچن واري سيريز پنهنجي نالي ڪري ورتي.نيوزيلينڊ خلاف 3 ٽي ٽوئنٽي ميچن واري سيريز  کٽڻ کانپوءِ پاڪستان ٽي 20 جي نمبر ون ٽيم بڻجي وئي آهي. پاڪستان ڪيويز کي انهن جي هوم گرائونڊ تي ٽي ٽوئنٽي سيريز ۾ پهريون ڀيرو شڪست ڏني آهي. بي اوول ۾ کيڏي ويندڙ ٽئين ۽ آخري ميچ ۾ پاڪستان جي 182 رنسن جي هدف جو پيڇو ڪندي نيوزيلينڊ جي پوري ٽيم 163 رنسن تي ڍير ٿي وئي.نيوزيلينڊ بيٽنگ جي شروعات ڪئي ته 32 رنسن جي مجموعي اسڪور تي ڪيويز ڪپتان وليم سن 8 رنسون ٺاهي آئوٽ ٿي ويو. مارٽن گپٽل شاندار 59، انارو ڪچن 19، ڪولن ڊي گرينڊ هوم هڪ، روس ٽيلر 25، ٽوم بروس 22 رنسون ٺاهي پويلين واپس هليا ويا.پاڪستان جي محمد عامر، عامر يامين، رومان رئيس ۽ فهيم اشرف  هڪ هڪ وڪيٽ حاصل ڪئي.

 

انگلينڊ هٿان سيريز جي آخري ون ڊي ميچ ۾ به آسٽريليا کي شڪست

سڊني(اسپورٽس نيوز) انگلينڊ جي هٿان آسٽريليا کي هڪ ٻي شڪست، انگلينڊ پنجين ون ڊي  12 رنسن تان کٽي پنجن ميچن جي سيريز 4-1 سان پنهنجي نالي ڪري ورتي.پرٿ ۾ به ناڪامي آسٽريليا جو مقدر بڻجي وئي، سيريز جي پنجين ون ڊي ۾ انگلينڊ 259 رنسون ٺاهيون، مهمان ٽيم جو ڪپتان جو روٽ 62 رنسن سان نمايان رهيو.آسٽريلوي فاسٽ بالر اينڊريو ٽائي پنج شڪار ڪيا، جواب ۾ ڪينگروز 247 رنسن تي ڍير ٿي وئي.ٽام ڪوررن جي شاندار بالنگ ڪندي ميزبان ٽيم جي پنجن رانديگرن کي پويلين جي راهه ڏيکاري اهڙي طرح انگلينڊ پنجن ميچن واري سيريز 4-1 تان کٽي ورتي

 

ڇا رائوانوار گرفتار ٿيندو..؟؟: غلام مصطفيٰ جمالي

ڪراچي اندر سري عام هڪ بلوچ نوجوان جو قتل ٿيو. جيڪو قتل ڪنهن ٻئي نه پر پوليس جو هيمشه کان بهترين آفيسر ڏسرائيندڙ رائوانوار خد ڪيو. بلوچ نوجوان نقيب الله مسعود جي قتل کانپوءِ سندس وڊيو توڙي ڦوٽو سوشل ميڊيا تي پوسٽ ٿيڻ شروع ٿيا ته پوري ملڪ جي پرنٽ توڙي اللڪٽرونيڪ ميڊيا جي نقيب الله مسعود جون خبرون شروع ڪيو ته نقيب الله مسعود جي قتل بابت پوري ملڪ اندر سراپا احتجاج ٿيڻ شروع ٿيو،آخرڪار سپريم ڪورٽ آف پاڪستان انهي قتل جو نوٽيس ورتو ۽ نيقيب الله مسعود قتل ڪيس تي تحقيات ٽيم قائم ڪئي.هڪ طرف سپريم ڪورٽ آف پاڪستان نقيب الله مسعود قتل ڪيس تي تحقياتي ٽيم جوڙي ته ٻئي پاسي سنڌ حڪومت ملير سابق ايس ايس پي رائو انوار جيڪو نقيب الله مسعود قتل ڪيس جو مک جوبدار هوُ کيس پنهنجي عهدي تان هٽائي ڇڏيو.ڪورٽ پاران جوڙيل تحيقاتي ڪيمشن جڏهن نقيب الله قتل ڪيس اندر جوابدار سابق ايس ايس پي رائو انوار کي تحيقات لاءِ گهرايو ته هن اچڻ کان صاف صاف انڪار ڪري ڇڏيو،جڏهن ته جوڙيل تحقياتي ڪميشن رائو انوار بابت بيان ڏيندي چيو ته اسان باربار نقيب الله مسعود قتل ڪيس بابت سابق ايس ايس پي رائو انوار کي نوٽيس موڪلي رهيا آهيون پر هن اچڻ کان انڪار ڪري ڇڏيو آهي  ٻئي پاسي اهو به ٻڌايو پئي ويو ته رائو انوار سان گڏ جيڪي ٻيا پوليس اهلڪار جيڪي نقيب الله مسعود قتل ڪيس ۾ شامل آهن انهن کي به  نوٽيس موڪليا ويا آهن پر انهن مان به ڪير جوڙيل تحقيقاتي ٽيم اڳيان پيش نه ٿي سگهيو آهي.

هڪ پاسي جوڙيل ڪيمشن پاران اهڙا بيان سامهون آيا ته ٻئي پاسي رائوانوار پنهنجي هڪ بيان ۾ چيو ته هوُ جوڙيل تحقياتي ڪميشن جي اڳيان انڪري پيش نه پيو ٿي جو کيس اها اميد ئي ناهي ته کيس انصاف ملندو.جوڙيل تحيقاتي رپورٽ ٽيم پاران اهو به چيو ويو ته جيڪڏهن رائو انوار جوڙيل ڪميٽي اڳيان پيش نه ٿيو ته کيس گرفتار ڪيو ويندو،نه رڳو هڪ رائوانوار کي گرفتار ڪيو ويندو پر انهي جي سموري ٽيم کي گرفتار ڪيو ويندو جيڪي نقيب الله مسعود قتل ڪيس ۾ ملوث آهن.جڏهن اهڙا بيان منظرعام تي اچڻ لڳا ته رائوانوار به منظرعام تان غائب ٿي ويو،ڪجهه ڏينهن پهرين رائونوار کي  حوالي اڏي تي ڏٺو ويو هوُ جتان هن ٻاهر ڀڄي وڃڻ جي ڪوشش ڪئي پر هو ناڪام ويو،جڏهن ته انکان پهرين اسلام آباد ۾ به رائوانوار نه رڳو ڀڄڻ جون تياريون ڪيون پر هوُ جهاز جو ٽڪيٽ به ڪرائي ويو هوُ ۽ جهاز ۾ چڙهي به ويو هوُ اتي جهاز ۾ عملي مان ڪنهن کيس سڃاڻي ورتو ته هي سابق ايس ايس پي رائوانوار آهي جنهن تي پاڪستان ۾ نقيب الله مسعود قتل ڪيس بابت جانچ هلي رهي آهي،جنهن کانپوءِ نقيب الله مسعود جي قاتل پوليس آفيسر رائوانوار کي جهاز مان لاٿو،پران وقت به کيس گرفتار نه ڪيو ويو،۽ هي ٻيو دفعو هو جڏهن سابق ايس ايس پي آساني سان فرار ٿيڻ ۾ ڪامياب ٿي ويو،۽ هاڻ ان ڏنهن کان وٺي سابق ايس ايس پي مسلسل غائب آهي ۽ پوليس کي تلاش ڪري رهي آهي.

ڪراچي آءِ سنڌ اي ڊي خواجه جو پڻ اهڙو بيان سامهون آيو آهي ته هوُ رائونوار جي باري ۾ کيس پهرين ڄاڻ هجي هان ته هوُ کيس گرفتار ڪري وٺِي هان،جڏهن ته هن اهو به چيو ته رائوانوار لاءِ بهتر اهوئي ٿيندو ته هو پنهنجو پاڻ کي قانون جي حوالي ڪري ڇڏي.ايس ايس پي رائو انوار جي گرفتاري لاءِ آءِ جي سنڌ سموري صوبن جي اداران کي اطلاع ڪري ڇڏيو آهي،جڏهن ته اهو به آءِ سنڌ جو بيان سامهون آيو آهي ته رائوانوار پنهنجو پاڻ کي قانون جي حوالي ڪري سندس موقفن جو به خيال ڪيو ويندو ۽ سندس موقفن کي به ٻڌو ويندو.مان سمجهان ٿو ته آءِ سنڌ جي انهي بيان ۾ رائو انوار لاءِ بهتري آهي ڇو ته هڪ پاسي پاڪستان جي عدالت آهي جنهن جو احترام ڪرڻ به رائوانوار تي فرض ٿي ٿو ٻئي پاسي ڳالهه انصاف جي آهي ته سندس موقفن جي به ڳالهه ڪئي وئي آهي ته سندس موقفن کي به ٻڌو ويندو،انجي باوجود به رائوانوار جيڪڏهن ڀڄڻ جون ڪوششون ڪري رهيو آهي ته مان سمجهان ٿو ته اهو فيصلو کيس نقصان ۾ وجهندو.

رائوانوار هن وقت اسلام آباد ۾ آهي يا ڪراچي يا پاڪستان جي ڪنهن ٻئي صوبي ۾ هوندو اهو عمل صرف ان کي آهي ٻيو الله کي ڇو ته پاڪستان جي سموري سڪيورٽي ڪوششون ڪري رهي آهي ته رائونوار کي ڪنهن به حالت ۾ گرفتار ڪجي پر رائو انوار مسلسل پوليس توڙي سڪيورٽي ادارن جي نظرن کان اوجهل آهي،جيڪو هن وقت تائين پوليس ۽ سيڪورٽي ادارن کي هٿ نه اچي سگهيو آهي، جيڪڏهن ڳالهه پوليس جي ڪوششن جي ڪجي ته مان سمجهان ٿو ته اهو ڪم انهن لاءِ مشڪل ناهي جيڏو مشڪل ٺاهيو پيو وڃي،ڇو ته اها ڳالهه ظاهر آهي ته آخري دفعو رائو انوار کي اسلام آباد ۾ ڏٺو ويو هو جنهن کانپوءِ هو ڪراچي به اچي سگهيو آهي،جنهن ڳالهه مان اهو صاف ظاهر ٿئي ٿو ته رائو انوار اسلام آباد جي ڪنهن وي آءِ پي هوٽل يا ڪنهن مٽ مائٽ وٽ رهائش پزير هوندو،ڇو ته اهوجنگ منهن ته هر گز نه ڪندو.!! انڪري پوليس لاءِ سڀ کان بهتر اهوئي آهي ته هوُ ڪراچي،اسلام آباد سميت ملڪ جي وڏن وڏن هوٽل جي رهائش پزيرماڻهن جي لسٽ چيڪ ڪري اهو انهي لاءِ ته رائوانوار ڪو عام ماڻهو ناهي جيڪو ڪنهن ٻئي پاسي سان هوٽلن ۾ لڪيو ويٺو هجي،رائو انوار هڪ سابق ايس ايس پي آهي ۽ ملڪ توڙي ٻاهرين ملڪن اندر سندس وڏا چرچا آهن ۽ ملڪ جو ننڍو توڙي وڏو ماڻهو نه رڳو نالي سان سڃاڻي ٿو ته پر هر ماڻهو کيس چهري مان به صاف صاف سڃاڻي ٿو ڇو ته اهو انهي ڳالهه جو چٽو ثبوت آهي ته جيڪڏهن رائوانوار کي ڪير به سڃاڻي ها ته کيس اسلام آباد اندر جهاز مان نه لاٿو وڃي ها ۽ هوُ آساني سان ملڪ کان ٻاهر هليو وڃي ها،پر اها سندس بدقسمتي چئبي يا نقيب جي قتل جو انصاف. جنهن کيس ملڪ کان ٻاهر وڃڻ کان روڪي ڇڏيو جو کيس جهاز مان ڪنهن چهري سان سڃاڻي ورتو هو هي رائو انوار آهي انڪري هي  ملڪ مان ٻاهر نه ٿو وڃِي سگهي.

هن وقت سابق ايس ايس پي رائو انوار ۽ سندس ساٿين جا فون نمبر به بند پيل آهن،ٻئي پاسي سپريم ڪورٽ آف پاڪستان جو جيڪو بيان سامهون آيو آهي ته جنهن اندر هن چيو آهي ته ڪٿي رائوانوار کي لڪايو ته نه ويو آهي ڇو ته هن ملڪ اندر چورن جا پاٿيدار تمام گهڻا آهن.مان سمجهان ٿو ته سپريم ڪورٽ آف پاڪستان جو اهو بيان به تمام پنهنجي جاءِ به بلڪل به درست آهي ڇو ته رائوانوار  ڪو پکي ناهي جيڪو هوا ۾ اڏامي ويو آهي جيڪو ڪيترا ڏينهن ٿي ويا آهن جو پوليس کي هٿ نه اچي سگهيو آهي،سابق ايس ايس پي رائو انوار جو پوليس جي اڳيان پيش نه ٿيڻ جنهن مان اها ڳالهه ثابت ٿئي ٿي ته نقيب الله مسعود قتل ۾ سنڌوسنئون رائوانوار ئي ملوث آهي جنهن جي ڪري هو پوليس کان لڪي رهيو آهي،جڏهن ته اها به ڳالهه سورهن آنا سچي آهي ته سابق ايس ايس پي رائو انوار کي ضرور ڪنهن چڱي سياسي ڌر جي هٿي آهي جنهن جي پست پنائي اندر رائوانوار لڪي وڃِي ويهي رهيو آهي،جو پوليس کي هٿ نه پيو اچي.

مان سمجهان ٿو ته پوليس کي جيڪا عدالت 72ڪلاڪن جي مهلت ڏني آهي انهي ملهت اندر رائوانوار کي پوليس ضرور گرفتار ڪري،پوليس جي ڪوششون سان رائوانوار گرفتار ٿي سگهي ٿو ڇو ته هوُ ملڪ اندر موجود آهي ملڪ کان ٻاهر ڀڄِي نه ويو آهي جو پوليس کي گرفتار ڪرڻ ۾ ناڪام  ويندي. ڪالهه رائوانوار بابت هڪ ٻيو بيان به سامهون آيو هو ته هڪ پوليس آفيسر جو رائو انوار سان فون تي رابطو ٿيو هو جنهن ۾ هڪ هن رائوانوار کي چيو ته هن لاءِ عدالت 72ڪلاڪن جو ٽائيم ڏنو  آهي، انڪري بهتر آهي ته ٿيندو ته هوُ پنهنجو پاڻ کي پوليس جي حوالي ڪري.انڪري مان سمجهان ٿو ته قانون کان ڪير به بالاتر ناهي انڪري رائو انوار کي پنهنجي گرفتاري ڏيڻي پوندي ۽ هوُ ان سلسلي ۾ جيڪڏهن پاڻ اچي پيش ٿي ته ان لاءِ بهتر ٿيندو..

 

 

علم ۽ ان جا پنج بنيادي ذريعا: شفيق الرحمان شاڪر

علم ڪنهن شيء جي ڄاڻ،سڃاڻ ۽ سمجھه کي چئجي ٿو.ڄاڻ ۽ فهم جو حاصل يا نتيجو جنهن ذريعي ڪجھه معلوم ڪجي يا معلوم ڪري سگھجي،سوچ سمجھه يا وقت سان گڏوگڏ مشاهدا، تجربا، اطلاع، ڇنڊڇاڻ ۽ اڀياس ذريعي بني نوع انسان جو زخيرو، حقيقتن يا سچائين جو مجموعو ۽ ان مجموعي متعلق ڄاڻ کي علم چئجي ٿو.

انسان جي فطرت ۾ اها شيء شامل آهي ته هو ڪائنات جي لڪيل رازن کي ظاهر ڪرڻ جي جستجو ۽ کوجنا ۾ لڳل رهي ٿو ۽ هن جي اها طلب بدستور وڌندي رهي ٿي ته جيئن هو قطعي ڄاڻ حاصل ڪري وٺي.اهي سمورا سوال جيڪي ڪائنات جي شين کي ڄاڻڻ لاء اٿاريا وڃن،اهي سڀ علم جي دائري ۾ اچن ٿا.علم الاهي عطيو ۽ ڄاڻ ان جو عظيم تحفو آهي. ان ڪري علم کي  اللہ جو نور چيو ويو آهي جنهن جي هڪ تجلّي عقل آهي ۽ ان جون ٻيون به ڪيتريون ئي تجلّيون آهن.جيئن ڪشف ۽ وجدان،وحي ۽ الهام جيڪو يقيني ۽ قطعي علم جو هڪ قسم آهي جنهن کي الهامي يا وهبي علم به چيو وڃي ٿوجيڪو علم جو سڀ کان مٿانهون درجو آهي.ٻيو علم ڪسبي آهي جنهنجون ڪيتريون ئي صورتون آهن،مثال احساس،عقل،منطق،استدلال ۽ دانائي وغيره.

منطق ۽ تجربي ذريعي حاصل ٿيندڙ علم به برحق آهن پر انهن کي قطعيت يعني آخري ڳالهه هئڻ جو درجو حاصل ناهي.اهو ئي سبب آهي جو انهن علمن جا باني روزمره جي تبديلين تي يقين رکن ٿا ۽ سندن نظريا ۽ علمي حقيقتون روزمره جي تبديلين کان متاثر ٿينديون رهن ٿيون.

علم جا بنيادي طور تي پنج مکيه ذريعا آهن.

  1. حسي علم(Sense perception)؛ــ پنجن انساني حِسن يعني ڏسڻ،ٻڌڻ،ڇهڻ، سنگھڻ ۽ چکڻ ذريعي حاصل ٿيندڙ ڄاڻ کي حسي علم چئجي ٿو.حسي علم هڪ زنده حقيقت آهي ۽حواس به اللہ جو عطيو آهن.اهو علم حاصل ڪرڻ جو عام ۽ بنيادي ذريعو آهي. حسي علم جو وڏي ۾ وڏو مظاهرو اڄ جي جديد سائنس آهي.سائنسي مفروضن جي مشاهدن ۽ تجربن ذريعي ترديد يا تائيد ڪئي ويندي آهي.سائنسي نظريا برابر بدلجندڙ ۽ سائنسي حقيقتون هروقت زيرتڪميل رهن ٿيون. ياد رکڻ گھرجي ته سائنسي نظريا يا حقيقتون آخري حرف ناهن ان ڪري انهن جي اقرار يا انڪار ۾ سخت احتياط جي ضرورت هوندي آهي.
  2. عقلي علم (Reasonism)؛ـــ هن کي قياس،استدلال،برهان ۽ فڪري علم به چيو وڃي ٿو.سوچ ۽ ويچار به علم حاصل ڪرڻ جي ذريعن مان هڪ آهي.پر هن نظريي جي مفڪرن جيڪا غلطي ڪئي سا اها ته انهن صرف عقل کي ئي حق ۽ سچائيء جو معيار سمجھيو.مثال؛ افلاطون جي چوڻ مطابق؛ “صرف اهو علم ئي سچو علم آهي جيڪو عقل ذريعي حاصل ٿئي.” جڏهن ته زندگيء ۽ ڪائنات متعلق ڪجھه معاملا ۽ مسئلا اهڙا آهن جو انهن جي نوعيت جي لحاظ کان عقلي علم بيڪار ثابت ٿئي ٿو ۽ رڳو عقل ذريعي انهن کي سلجھائي نٿو سگھجي.جهڙيء طرح حسي علم ڪيترن ئي معاملن ۾ لاچار نظر اچي ٿو اهڙيء طرح هر مسئلو عقلي علم جي ذريعي به حل ڪري نٿو سگھجي.
  3. ادراڪ يا وجدان (Intuition)؛ــ اهڙو علم جيڪو بنان ڪنهن حس،استدلال ۽ سوچ جي سڌو سنئون ذهن ۾ ڪنهن ڇوليء جيان پيدا ٿئي يا ايئن چئجي ته اونهي سوچ ويچار سان ماڻهوء تي اهڙي ڪيفيت طاري ٿئي جو هن جي اندر مان ڪنهن حقيقت يا سچائيء جو آواز اڀري ۽ هن جي دل ان ڪيفيت مان سڪون ۽ اطمينان حاصل ڪري ته اهڙي علم کي ادراڪ يا وجدان چئبو آهي.ان علم جي نه ته ڪا خاص ڪسوٽي آهي ۽ نه ئي ڪو واضح دليل. پر اهو علم به برحق آهي.انهيء علم کي انڪشاف،ڪشف يا القا به چيو وڃي ٿو.
  4. سَنَد (Authority)؛ـــ ڪنهن شخصيت،اداري يا ڪتاب وغيره کي علم جو جامع يا سند سمجھيو ويندو آهي ۽ انهن جي قول،فعل ۽ نظرين کي حرف آخر سمجھندي پيروي ڪئي ويندي آهي.انهي تعليم ۾ ڪنهن به قسم جي ترميم يا تبديلي ممڪن نه سمجھي ويندي آهي ۽ سمورن نظرين کي جيئن جو تيئن قبول ڪيو ويندو آهي.مثال؛ مذهبي . سياسي ۽ پرچارڪ شخصيتون، مستند ڪتاب،مختلف رياستون،حڪومتون،تنظيمون ۽ ادارا وغيره جيتوڻيڪ سَنَد علم حاصل ڪرڻ جو هڪ اهم ذريعو آهي پر ان ۾ به هڪ وڏي ڪمزوري آهي.سند ڪنهن ماهر معاشيات جي هجي يا ڪنهن جج،سائنسدان،دانشور،مذهبي اڳواڻ. والدين يا سياستدان وغيره جي ،اهو غلط به ٿي سگھي ٿو ان ڪري علم جي صرف ان ذريعي تي حتمي ڀروسو ڪرڻ نه رڳو قابل اعتماد ٿي نٿو سگھي بلڪه گھڻا دفعا اهڙو علم خطرناڪ ثابت به ٿي سگھي ٿو.
  5. وحي ۽ الهام (Revelation)؛ــ وحيء مان مراد خدا تعاليٰ جو پنهنجن چونڊيل بندن ( نبين ۽ رسولن) کي ڪنهن غيبي ذريعي سان اطلاع يا خبر پهچائڻ آهي.اهوعلم روحاني ذريعن جي آخري ۽ اعليٰ حد آهي.وحيء تي ٻڌل علم به انسان لاء ايتروئي ضروري آهي جيترو حسي يا ٻيو ڪو علم. اصل ۾اهو علم انسان جي باطني زندگيء سان تعلق رکي ٿو ۽ انهن معاملن جي گھرج آهي.زندگيء جا ڪيترائي اهم۽ بنيادي مسئلا اهڙا آهن جيڪي علم جي ڪنهن ٻئي ذريعي سان حل ڪري نٿا سگھجن.انهن جي حل لاء الهامي علم جي ضرورت پوي ٿي. نبوي علم يقين،عقيدو ۽ جذبو به مهيا ڪري ٿو ته ساڳئي وقت زندگيء جو عملي نمونو به پيش ڪري ٿو.اهڙا مسئلا جن ۾ ٻين علمن جهڙوڪ حواس،عقل،فلسفي جي حد ختم ٿي وڃي ٿي ۽ اهي ڪا حتمي راء ڏيڻ ۾ حيران،پريشان ۽ لاچار نظر اچن ٿا.مثال؛ زندگي،ڪائنات جي تخليق،موت کان پوء جي زندگي،خالق ڪائنات جي ذات ۽ سندس صفتون،جزا ۽ سزا،ڀلائي ۽ برائي،جبر ۽ قدر،وجود ۽ عدم وجود،روح ۽ بدن ۽ بيا به ڪيترا ئي معاشي.اخلاقي،سماجي ۽ روحاني معاملا جيڪي نبوي علم جي روشنيء سواء موثر نموني حل ڪري نٿا سگھجن.وحيء جو علم هر قسم جي نقص،اوڻائي،غلطي۽ خطا جي امڪان کان پاڪ هوندو آهي.

 

 

حڪومتي دعوائن باوجود سنڌ ۾ بجلي ۽ گئس جو بحران: صاحب خان ڀٽي

افسوس جي ڳالهه آهي ته  وفاقي  حڪومت  بجلي بحران کي ختم ڪرڻ جون دعوائون ته ڪري رهي آهي پر  ان مسئلي کي حل ڪرڻ لاءِ ڪي به اپاءُ نه وٺي رهي آهي، ڪڏهن ڪڏهن ته اهڙا تڪرار فيصلا ڪري به ڪيا ويندا آهن، جنهن سان صوبن  ۾ ويڇا وڌي ويندا  آهن اهو به دور هو جڏهن ملڪ اندر بجلي جي لوڊشيڊنگ نه هئڻ جي برابر هئي پر جئين جئين آبادي وڌندي وئي تئين تئين بجلي جي بحران سان گڏ ٻيا ڪيترائي بحران به وڌي ويا آهن. بجلي جو بحران ته  الائي ڪڏهن ختم ٿيندو پر هن وقت عوام آزار ۾ اچي ويو آهي. ڪجهه عرصواڳ نيشنل پاور ريگيو ليٽري اٿارٽي نيپرا پنهنجي سالياني رپورٽ  ۾ پاڻيءَ ۽ بجلي واري وزارت جا پول پڌرا ڪري ڇڏيا هئا، نيپرا جي رپورٽ ۾ ڄاڻايو ويو هو ته بجلي جي کوٽ ۽ لوڊشيڊنگ ڄاڻي واڻي ڪئي وئي، جڏهن ته سرڪاري پاور پلانٽ به صلاحيت موجب گهربل بجلي پيدا ڪرڻ ۾ ناڪام  رهيا. رپورٽ ۾ وڌيڪ اهو به ڄاڻايو ويو هو ته 2014-2015ع  سرڪاري  پاور پلانٽ رڳو 41 سيڪڙو بجلي پيدا ڪري سگهيا، جناح پن بجلي رٿا مان به گهربل بجلي پيدا نه ٿي سگهي هئي. رپورٽ ۾ چيو ويو هو ته ٿرمل پاور پلانٽن کي به ڄاڻي واڻي بند ڪيو ويو هو. رپورٽ ۾ ٻڌايو ويو هو ته ڪجهه سرڪاري پاور پلانٽن جون مشينون ڄاڻي واڻي بند ڪيون ويون جنهن سبب لوڊشيڊنگ جو وقت وڌايو ويو. اهڙي رپورٽ اچڻ بعد به وفاقي توڙي صوبائي حڪومت ۾ ويٺل وزيرن کي ڪجهه به محسوس نه ٿيو، جنهن سبب هن وقت به عوام ٻٽي عذاب ۾ مبتلا آهي.  نيپرا جي رپورٽ مان صاف ظاهر آهي ته وفاق ۾ ڪجهه ويٺل ماڻهو بجلي بند ڪرائي پنهنجا  مرضي جا فيصلا ڪرڻ چاهين ٿا، جنهن سبب هن وقت تائين بجلي  جي لوڊشيڊنگ جو جنگ بوتل ۾ بند نه ٿي سگهيو آهي.  جيڪڏهن هن ڀيري به لوڊشيڊنگ جو سلسلو جاري رهيو ته پوءِ لڳي ٿو ته هن  دفعي ڪيترائي ماڻهو پنهنجي حياتين تان هٿ کڻي ويهي رهندا. ڪجهه ڏينهن هڪ تقريب ۾ پيپلزپارٽي جي هڪ صوبائي وزير پنهنجي خطاب ۾ چيو هو ته هن ڀيري به هيٽ اسٽروڪ سبب ماڻهو فوت ٿي سگهن ٿا.  بيان ڏيڻ ته ڪيترو آسان آهي پر حڪومت ۾ ويهي عوام کي بنيادي سهولتون فراهم ڪرڻ ڪيترو ڏکيو آهي، ان جو اندازو هن حڪومت ۾ ويٺلن مان لڳائي سگهجي ٿو.  ڇاڪاڻ ته کين ايترو به وقت نه ملي سگهندو آهي جو هو پنهنجيون مصروفتيون ڇڏي ڪنهن عوام ماڻهو جا مسئلا حل ڪن. گذريل هيٽ اسٽروڪ ۾  جيڪي ماڻهو فوت ٿيا، جن کي هن وقت تائي ويساري ناهيون سگهيا. هڪ طرف اها ظالم گرمي هئي ته ٻي طرف اي سي ۾ ويٺل حڪمران جيڪي صرف پنهنجا بيان ڏئي پنهنجي سياست چمڪائي رهيا هئا.  ڪجهه سياستدان ته ڪئمپون لڳائي برف جا ٽڪرا  رکي ماڻهن کي ٿڌو پاڻي پياري فوٽو سيشن به ڪري رهيا هئا. پر ڪنهن به هڪ  وزير طرفان اهو ٻڌڻ ۾ نه آيو ته بجلي جي لوڊشيڊنگ لاءِ ڪي قدم کنيا ويندا. اڍائي هزار کان وڌيڪ ماڻهن جي فوت ٿيڻ باوجود حڪومت هن وقت تائين ڪو بجلي جو منصوبو شروع ڪري ناهي سگهي. وفاقي حڪومت  وٽ گرين بس، اورينج بس، فري وائي فائي سروس جي لاءِ ڪيترائي فنڊ موجود آهن پر انهن وٽ بجلي جا  نوان منصوبا ته ٺهيو پراڻن کي بحال ڪرائڻ لاءِ به فنڊ موجود نه آهي، يار وري وفاقي  حڪومت ڄاڻائي واڻي بجلي جو بحران ختم ڪرڻ نٿي چاهي جنهن سبب بجلي جو بحران ڪر کنيو بيٺو آهي. ڇو ته سال گذرڻ باوجود وفاقي حڪومت جي ڪن تي هن وقت تائين جونءَ به  نه چري آهي.

سنڌ ۾ جڏهن به بجلي جي لوڊشيڊنگ خلاف احتجاج ٿيو  آهي ته وفاقي حڪومت ۾ ويٺلن جي صرف اها  ئي شڪايت هوندي آهي ته وڏا ڊيم نه پيا ٺاهين جنهن سبب بجلي بحران پيدا ٿيو آهي. جيڪڏهن انهن سياستدانن کان پڇيو ويندو آهي ته اڳ ۾ جيڪي تعمير ٿيل ڊيم  آهن انهن مان ڪيتري بجلي جي پيداوار آهي ته اهي ڪمي وانگر خاموش ٿي ويندا آهن ۽ وري هڪ دفعو ٻيهر موسمي ڏيڏرن وانگر ٽانءُ ٽانءُ ڪري ٻاهر نڪرندا آهن ۽ انهن جي وات ۾ صرف ڪالا باغ/ڏسو صفحو 3 بقايا نمبر 01

ڊيم جو ذڪر ئي هوندو آهي. جنهن سبب نڪي بجلي بحران جي خامتي لاءِ ڪي قدم کنيا پيا وڃن ۽ نه وري صوبائي حڪومت چاهين ٿيون ته بجلي جو بحران ختم ٿئي. حڪمرانن کي ته اهو خدشو آهي جيڪڏهن عوام کي بجلي، پاڻي ۽ گئس جهڙيون بنيادي سهولتون ملي ويون ته اهي کانئن  ٽڪي ٽڪي جو پڇاڻو ڪندا جنهن سبب عوام کي گئس ۽ بجلي جي لوڊشيڊنگ سان گڏ ٻين مسئلن جي ور چاڙهيو ويو آهي.  جنهن مان ڇٽڪارو حاصل ڪرڻ آسان نه آهي. سنڌ مان ڪوئلو، گئس ۽  پيٽرول به نڪري رهيو آهي پر ان باوجود سنڌ ۾ ٻين صوبن جي ڀيٽ وڌيڪ بجلي بند ڪئي پئي وڃي. سنڌ  ۾  ڪيترائي ٻهراڙي وارا علائقا آهن. جن ۾ گئس ته ڇا بجلي جي سهولت به ميسر ناهي. هن جديد دور ۾ اهڙي سهولتن کان محروم بڻيل آهن

ڪلاڪ بند رهي ٿي ته ٻي طرف وري واڌو بل به موڪلڻ جو سلسلو شروع ڪيو ويو آهي، ڪجهه عرصو اڳ وفاقي حڪومت جي هڪ وزير چيو هو ته سنڌ ۾ بجلي چوري پئي ٿئي، جنهن سبب لوڊشيڊنگ پئي ٿئي، جڏهن ان وقت جي وزير اهو بيان ڏنو هو، ان وقت سنڌ جي ساڃاهه وندن طرفان ڳڻتي ظاهر ڪئي وئي هئي ڇاڪاڻ ته هڪ ته بجلي ڪلاڪن جا ڪلاڪ بند رهي ٿي ته مٿان وري واڌو بل موڪليا پيا وڃن پر انهن خلاف ڪو به نوٽيس وٺڻ لاءِ تيار ئي نه آهي. جيڪڏهن ڏٺو وڃي ته سنڌ ۾ جيڪي به بجلي ورهاست ڪندڙ ڪمپنيون آهن انهن ۾ اهڙو عملو ڀرتي ڪيو ويو آهي جن جي غلطين سبب عام ماڻهو پريشان ٿي ويو آهي، لائين مين هجن يا ٻيو ڪو عملدار، اهي سمورا لائين لاسز پورو ڪرڻ لاءِ ٻين صارفين تي بار وجهي ڇڏيندا آهن جنهن جو نقصان غريب ماڻهو کي ئي ڀرڻو پوندو آهي،

ڪڏهن ڪڏهن ته انهن عملدارن جي نااهلي سبب واڌو بل موڪليا ويندا آهن جن کي ڏسي ائين لڳندو آهي ته هي بجلي ڪا ڪنهن گهر ۾ نه پر  ڪنهن فيڪٽري ۾ استعمال ٿي هجي، پر جڏهن اهڙي بل جي شڪايت به  ويندي آهي ته ان جي به ڪو دانهن ٻڌڻ لاءِ تيار نه هوندو ۽ اهو ماڻهو بل کي کڻي هيڏانهن هوڏانهن رلندو ورتندو آهي، مطلب ته نااهل عملي سبب عام ماڻهو پريشان ٿي رهيو آهي، هن وقت ته ڪي اليڪٽرڪ کي چائنا حوالي ڪيو ويو آهي، ٻڌڻ  ۾ آيو آهي ته هر بجلي جي لوڊشيڊنگ جو وقت گهٽايو ويندو ۽ صارفين کي به بهتر سهولتون فراهم ڪيون وينديو، بهرحال ڪراچي جهڙي انٽرنيشنل شهر ۾ بجلي جو بحران به حڪومت جي لاءِ هڪ وڏو سواليه نشان آهي ۽ حڪومت جي پت ان مان ئي وائکي ٿي وڃي ته ڪراچي ۾ ڪيترن ڪلاڪن لاءِ لوڊشيڊنگ ٿي رهي آهي، جيڪڏهن ڏٺو وڃي ته حڪومت ڪراچي جهڙي شهر ۾ لوڊشيڊنگ تي ضابطو نه آڻي سگهي آهي ته پوءِ آخر ٻين ٻهراڙين وارن علائقن جو ڪهڙو حشر هوندو، هي حڪومت جي ئي ذميواري آهي ته بجلي جي لوڊشيڊنگ تي جلد کان جلد ضابطو آڻي ماڻهن کي پريشاني کان بچائي سگهي.

اڳوڻي صدر آصف علي زرداري به پنهنجي حڪومت ۾ بجلي ۽ گيس جي لوڊشيڊنگ جي بحران تي ضابطو آڻڻ لاءِ ايران سان گيس پائپ لائن جو معاهدو ڪيو هو، جيڪڏهن اهو به مڪمل ٿي وڃي ها ته شايد هن ملڪ ۾ گيس جي بحران تي ضابطو اچي وڃي ها ۽ هتان جون صنعتون به ٻيهر ترقي ڪري سگهن ها. ڀلي کڻي وفاقي حڪومت ڪيتريون ئي به دعوائون ڪري پر سنڌ ۾ لوڊشيڊنگ جو بحران ختم نه ٿيڻ سان هڪ ڳالهه واضع ٿي وڃي ٿي نواز ليگ سرڪار بحران جي خاتمي لاءِ ڪي به قدم نه کنيا آهن جنهن سبب اڄ ماڻهو ٿڌي موسم ۾ بجلي جي بحران کي منهن ڏئي رهيا آهن، سنڌ جو ڪو اهڙو شهر بچيوئي نه آهي، جتي لوڊشيڊنگ نه ٿيندي هجي، ڪراچي، حيدرآباد، سکر، لاڙڪاڻي ۽ شهيد بينظيرآباد سميت ٻين شهرن ۾ لوڊشيڊنگ سبب عوام بيزار  آهي، موري ۾ ته بجلي هڪ ڪلاڪ اچي ٿي ته ٽي ڪلاڪ بند ڪئي وڃي ٿي پر سندن ڪو به دانهن ٻڌڻ لاءِ تيار نه آهي، گذريل ڪيترن ئي مهينن کان موري جا شهري احتجاج ڪري رهيا آهن پر ڪامورن جي ڪن تي جونءَ به چري رهي آهي، رهواسي اهي دانهون ڪري رهيا آهن رات جي وقت بجلي نه هجڻ سبب سندن ٻارڙا پڙهائي نه پيا ڪري سگهن، جنهن سبب سندن تعليم متاثر ٿي رهي آهي، موري ۽ ڀرپاسي وارن علائقن ۾ ڪلاڪن جا ڪلاڪ بجلي بند ٿيڻ سبب ماڻهن جو ڪاروبار ٺپ ٿي ويوآهي،

sahibkhanbhatti@gmail.com

 

رائو انوار جي گرفتاري جو حڪم…!

سپريم ڪورٽ ڪراچي رجسٽريءَ ۾ چيف جسٽس ميان ثاقب نثار ، جسٽس گلزار احمد ۽ جسٽس فيصل عرب تي ٻڌل 3 رڪني بئنچ نقيب الله قتل ڪيس جي ٻڌڻي ڪئي. آءِ جي سنڌ اي ڊي خواجه، ايڊيشنل آءِ جي ۽ ڊي آءِ جي عدالت ۾ پيش ٿيا پر رائو انوار طلب ڪرڻ باوجود پيش نه ٿيو. نقيب الله قتل جي جاچ ڪميٽي رپورٽ عدالت ۾ پيش ڪئي، آءِ جي سنڌ اي ڊي خواجا جي طرفان جمع ڪرايل جاچ رپورٽ ۾ رائو انوار جي موقعي تي موجودگيءَ جو انڪشاف ٿيو آهي.جنهن ۾ رائو انوار جي دعوائن کي ثبوتن جي بنياد تي ڪوڙو ثابت ڪيو ويو آهي. رپورٽ ۾ چيو ويو ته رائو انوار ۽ سندس ٻين نهايت ويجهن ساٿين جي موبائل فون نمبرز جي فارنزڪ ۽ سي ڊي آر ڪيا ويا جنهن ۾ ثابت ٿي ويو ته مقابلي ۾ شامل پوليس اهلڪار ۽ آفيسر هر وقت رائو انوار سان گڏ رهيا. نقيب الله پوليس مقابلي وقت رائو انوار سميت 9 پوليس اهلڪار موقعي تي موجود هئا ۽ ڪال تفصيل (ڊيٽيل) ۾ اها ڳالهه ثابت ٿي آهي ته پوليس مقابلي دوران رائو انوار کانسواءِ 8 ساٿي به ساڻس گڏ هئا. موبائل فون فارنزڪ ۽ سي ڊي آر ۾ رائو انوار جو آفيسرن ۽ اهلڪارن سان هر وقت رابطو ثابت ٿيو ۽ سمورا ماڻهو هر وقت هڪ ٻي سان گڏ ڏٺا ويا، رپورٽ پيش ڪرڻ کان پوءِ چيف جسٽس آف پاڪستان ثاقب نثار سخت ڪاوڙ جو اظهار ڪندي  پڇاڻو ڪيو ته اسان رائو انوار کي پيش ٿيڻ جو حڪم ڏنو هو، ڇا رائو انوار عدالت ۾ آهي. آءِ جي سنڌ اي ڊي خواجه عدالت کي ٻڌايو ته هو روپوش آهي، چيف جسٽس ٻيهر چيو ته رائو انوار کي هر صورت ۾ پيش ٿيڻ گهرجي ها، توهان رائو انوار کي گرفتار ڪرڻ جي ڪهڙي ڪوشش ڪئي؟ آءِ جي سنڌ عدالت کي رائو انوار جي گرفتاري بابت قدمن جا تفصيل ٻڌائيندي چيو ته اسان رائو انوار کي هر طرح گرفتار ڪرڻ جي ڪوشش ڪري چڪا آهيون، جيستائين رائو انوار اسلام آباد ۾ هيو ڪيس داخل نه ٿيو  هو. چيف جسٽس ايوي ايشن اختيارين کان پڇاڻو ڪيو ته ٻڌايو ته ڇا خانگي جهاز ۾ رائو انوار سفر ته نه ڪيو آهي، ٻڌايو ته  رائو انوار 15 ڏينهن اندر پرڏيهه سفر ڪيو ته ناهي؟ سمورا چارٽر جهاز رکندڙ مالڪ حلف ناما پيش ڪن. هن آءِ جي سنڌ کان پڇاڻو ڪيو ته هتي به وڏا وڏا لڪائيندڙ موجود آهن، آءِ جي صاحب ٻڌايو ڪراچي ۾ ڪنهن رائو انوار کي لڪايو ته ناهي، اهو ته ناهي ته رائو انوار جتي ويو اتي توهان جي پهچ ناهي، توهان آزادي سان ڪم ڪيو ڪنهن جي دٻاءُ ۾ نه اچو، اسان ايماندار آفيسرن کي ناڪام ٿيڻ نه ڏينداسين، اسان کي ٻڌايو توهان کي ڪيترو وقت گهرجي. آءِ جي سنڌ چيو ته مان وقت نه ٿو ڏئي سگهان، سندس گرفتاري لاءِ هر ممڪن ڪوشش ڪئي ويندي. عدالت جي پڇاڻي تي آءِ جي سنڌ سپريم ڪورٽ کان رائو انوار جي گرفتاري لاءِ ٽن ڏينهن جو وقت طلب ڪري ورتو. چيف جسٽس رمارڪس ڏيندي چيو ته ٺيڪ آهي ٽن ڏينهن اندر رائو انوار جي گرفتاري کي يقيني بڻايو وڃي، مون کي پوليس تي اعتبار آهي، پوليس ۾ سٺا آفيسر آهن، پر اوهان جي ڪميٽي درست ڪم نه ڪيو ته پوءِ اسان پنهنجي ڪميٽي جوڙينداسين .نقيب الله قوم ۽ اسان جو ٻچو هو، اسان رياست کي قتل عام جي اجازت نه ڏينداسين. ڊي جي سول ايوي ايشن کي پائلٽس جي ڊگرين جي تصديق ڪرائڻ جو حڪم ڏئي ڇڏيو آهي

 

سول ۽ ملٽري لاڳاپا بهتر بڻائڻ جي ڪوشش ڪري رهيا آهيون: وزيراعظم

ڊيووس (اين اين آءِ/ ويب ڊيسڪ ) وزيراعظم شاهد خاقان عباسي چيو آهي ته سول ملٽري لاڳاپن کي بهتر بڻائڻ جي ڪوشش ڪري رهيا آهيون. ڊيووس ۾ پاڪستاني ڪميونٽي کي خطاب ڪندي وزيراعظم شاهد خاقان عباسي چيو ته پاڪستان ۾ جمهوريت مضبوط ٿي رهي آهي ۽ اسان جمهوريت مان سک رهيا آهيون. هن چيو ته سول ملٽري لاڳاپا بهتر بڻائڻ جي ڪوشش ڪري رهيا آهيون حڪومت پنهنجو مدو پورو ڪندي. سندس چوڻ هو ته ملڪ ۾ جيڪو ڪجهه ٿي رهيو آهي اهو آئين ۽ قانون جي دائري ۾ ٿي رهيو آهي۽ سمورا ادارا آئين ۽ قانون جي دائري ۾ رهي ڪم ڪري رهيا آهن. وزيراعظم شاهد خاقان عباسي چيو ته پاڪستان لائن آف ڪنٽرول جي ڀڃڪڙين جو ڀرپور جواب ڏيڻ جي صلاحيت رکي ٿو. وزيراعظم شاهد خاقان عباسي چيو آهي ته پاڪستان هڪ ڊگهي عرصي کان 30 لک کان وڌيڪ افغان پناهگيرن جي ميزباني ڪري رهيو آهي عالمي برادري کي پاڪستان جي قربانين جو اعتراف ڪرڻ گهرجي. پاڪستان کي چين جي قيادت جي ون بيلٽ ون روڊ قدم جو حصو بنجڻ جو اعزاز حاصل آهي. پاڪ  چين اقتصادي راهداري سان ڪيترن ئي ملڪن کي روزگار جا موقعا، صنعتي ترقي ۽ رابطن ۾ بهتري جي صورت ۾ وڏا فائدا پهچندا. هو خميس تي سوئزرلينڊ جي شهر ڊيووس ۾ عالمي اقتصادي فورم جي موقعي تي پاٿ فائنڊر گروپ پاران ناشتي تي ميٽنگ ۾ ڳالهه ٻولهه ڪري رهيو هو. ان موقعي تي پاڪستاني واپاري، ميڊيا جا نمائندا ۽ ڪيترن ئي ملڪن مان پاڪستان جا دوست به موجود هئا. وزيراعظم چيني قيادت کي ون بيلٽ ون روڊ قدم جي ويزن جي واکاڻ ڪندي چيو ته اسان کي چيني قيادت جي ون بيلٽ ون روِڊ قدم جو حصو بنجڻ جو اعزاز حاصل آهي هن چيو ته پاڪستان ۾ جمهوريت جي مضبوطي ۽ هڪ مثبت ۽ خوش آئيند موقعو آهي ۽ سمورن ادارن کي گڏجي ۽ هٿ ۾ هٿ ڏئي ملڪ جي ترقي لاءِ ڪم ڪرڻ گهرجي. هن چيو ته 2013 ۾ اقتدار سنڀالڻ کانپوءِ پاڪستان مسلم ليگ (ن) جي حڪموت کي امن امان، دهشتگردي، بجلي جي کوٽ ۽ خراب معيشت جهڙا وڏا چئلينج سامهون هئا موجوده حڪومت جي سخت محنت ۽ پڪي پهه سبب امن امان جي صورتحال ۾ وڏي تبديلي آئي ۽ ملڪ تي سيڙپڪارن جي اعتماد کي بهال ڪيو ويو وزيراعظم چيو ته ڊيووس ۾ سندس ڪيترن ئي عالمي بزنس اڳواڻن سان ملاقاتون ٿيون آحن ۽ انهن پاڪستان ۾ سيڙپڪاري ۽ واپاري سرگرمين کي وڌائڻ جي خواهش ظاهر ڪئي آهي.

 

شاهراهه فيصل پوليس مقابلو به ڪوڙو قرار، ڪنهن کي رعايت نه ڏبي: سهيل انور سيال

ڪراچي (ويب ڊيسڪ) صوبائي گهرو وزير سهيل انور سيال چيو آهي ته شاهراهه فيصل تي پوليس جي فائرنگ ۾ مارجي ويل شخص مقصود بي ڏوهه هو، وارث جي مرضي موجب جاچ ڪرائينداسين. گهرو وزير شاهراهه تي فيصل تي پوليس جي فائرنگ ۾ مارجي ويل نوجوان مقصود جي گهر پهچي سندس وارثن سان تعزيت ڪئي، جنهن کانپوءِ صحافين سان ڳالهائيندي سهيل انور سيال چيو ته مقصود بي ڏوهه هو، تنهن ڪري ان کي شهيد سمجهان ٿو، مقصود جا وارث جهڙي طريقي سان چاهيندا جاچ ڪنداسين، انهن سي سي ٽي وي فوٽيج سامهون آڻڻ جو مطالبو ڪيو هو، جيڪي جلد منظر تي آڻينداسين. هن چيو ته تسلسل سان اهڙا واقعا سامهون اچي رهيا آهن، جيڪي افسوس جوڳا آهن پر پوليس ڄاڻي واڻي ڪنهن کي قتل ناهي ڪندي، جاچ آفيسر جڏهن مناسب سمجهندو واقعي جي ويڊيو رليز ڪندو. سهيل انور سيال چيو ته عام طور تي اهو تاثر ڏنو پيو وڃي ته سنڌ حڪومت رائو انوار يا ڪنهن به پوليس آفيسر کي بچائڻ جي ڪوشش ڪري رهي آهي پر ائين ناهي، اسان هر ڪنهن خلاف سخت قانوني ڪارروائي عمل ۾ آڻينداسين.27

 

سپريم ڪورٽ 24 منرل واٽر ڪمپنين کي پاڻي جي وڪري کان روڪي ڇڏيو

اسلام آباد (اين اين آءِ) سپريم ڪورٽ سڄي ملڪ جي 24 منرل واٽر ڪمپنين جي پاڻي جي وڪرو تي پابندي هڻي ڇڏي چيف جسٽس آف پاڪستان ثاقب نثار جي سربراهي ۾ سپريم ڪورٽ جي ٻن ميمبرن تي ٻڌل بئنچ پيئڻ جي صاف پاڻي جي فراهمي بابت ڪيس جي ٻڌڻي ڪئي، ٻڌڻي دوران منرل واٽر ڪمپني جي وڪيل جو موقف هو ته ان جي موڪل اداري پاران فراهم ڪيل پاڻي صحيح آهي عدالت پي سي ايس ڪيو اي جي رپورٽ گهرائي، چيف جسٽس ريمارڪس ڏنا ته اسان رپورٽ گهرائينداسين ڪمپني ان وهم ۾ نه رهي ته وڏو وڪيل ڪرڻ سان رليف ملندو، ڪمپني جو وڪيل ڳري فيس وٺي ٿو جڏهن ته ڳري فيس وٺي رليف وٺڻ ان جو حق ناهي، ڪمپنين کي اها ڳالهه سمجهڻ گهرجي ته خراب پاڻي وڪرو ناهي ڪرڻو اسان کي قوم ۽ ٻارڙن جي مفاد کي ڏسڻو آهي جيستائين صاف پاڻي جي پڪ نه ڏني ويندي وڪري جي اجازت نه ڏينداسين. سپريم ڪورٽ ملڪ جي 24 منرل واٽر ڪمپنين کي پاڻي جي وڪرو کان روڪيندي ٻڌڻي اڻڄاتل مدي تائين ملتوي ڪري ڇڏي.