تازيون خبرون

Daily Archives: January 8, 2018

 دهشتگردن کي پالڻ جا الزام رد، پاڪستان دهشتگردي خلاف جنگ کٽي چڪو آهي: وزير اعظم

اسلام آباد (اين اين آءِ)وزيراعظم شاهدخاقان عباسي آ۾ريڪا پاران سيڪيورٽي سهڪار جي مد ۾ پاڪستان جي ٻه ارب ڊالرن تائين امداد روڪڻ جي رپورٽن تي حيرت جو اظهار ڪندي چيو آهي ته آمريڪا سول ۽ ملٽري امداد جي نالي تي هن وقت تائين جيڪا رقم ڏني اها نه هجڻ جي برابر هئي. آمريڪي صدر جا الزام گمراهه ڪندڙ آهن دهشتگردي خلاف جنگ پنهنجي وسيلن مان وڙهي رهيا آهيون جنهن تي عالمي برادري کي اسان جي ساراهه ڪرڻ گهرجي. برطانوي اخبار کي ڏنل انٽرويو ۾ وزيراعظم چيو ته دهشتگردي خلاف جنگ ۾ پاڪستان بي مثال جاني ۽ مالي قربانيون ڏنيون آهن پاڪستان پنهنجي سرزمين تي دهشتگردي خلاف جنگ فتح ڪري چڪو آهي. وزيراعظم چيو ته آمريڪا پاران گذريل پنجن سالن ۾ ساليانو اٽڪل هڪ ڪروڙ ڊالرز جي امداد ملي جيڪا نه هجڻ برابر آهي هن چيو ته مان اخبارن ۾ پڙهيو ته 250 ملين يا 500 يا 900 ملين ڊالرز جي رقم ڏني وئي گهٽ ۾ گهٽ اسان کي ان امداد بابت ڪا به خبر ناهي. وزيراعظم آمريڪي صدر پاران پاڪستان تي دهشتگردي خلاف جنگ ۾ ڊبل گيم کيڏڻ وارو الزام رد ڪري ڇڏيو ۽ دهشتگردن کي پناهه ڏيڻ واري الزام کي گمراهه ڪندڙ قرار ڏنو. هن واضح ڪيو ته پاڪستان هڪ خودمختيار ملڪ آهي ۽ هن هميشه بين الاقوامي ڪنوينشنز جي پابندي ڪئي آهي ۽ اڄ اسان دهشتگردي خلاف سڀ کان وڏي جنگ وڙهي رهيا آهيون وزيراعظم چيو ته هن جنگ ۾ پاڪستاني معيشت کي 120 ڊالرن جو نقصان ٿيو اسان دهشتگردن سان وڙهي رهيا آهيون. ان تي ڪو ئي چوي ٿو ته اسان دهشتگردن کي پاڙي رهيا آهيون اهو غلط چئي رهيو آهي اسان رڳو اهو چاهيون ٿا ته دنيا ان ڳالهه کي مڃي ته اسان دهشتگردي خلاف جنگ ۾ سڀ کان اڳيان آهيون. وزيراعظم چيو ته اسان هر سطح تي آمريڪا کي گڏ رکيو، کيس واضح ڪيو ته پاڪستان اڃا تائين ڇا ڪري چڪو آهي ۽ ان حوالي سان ٻيا ملڪ به ڄاڻين ٿا. هن چيو ته باقي دنيا افغانستان ۾ دهشتگردن کي ڪنٽرول ڪرڻ ۾ ناڪام ٿي آهي جيڪي اڄ سرحد پار کان پاڪستان تي حملا ڪري رهيا آهن پاڪستان پنهنجي سرزمين ۾ دهشتگردي خلاف جنگ فتح ڪري چڪو آهي. خانگي ٽي وي سان ڳالهائيندي وزيراعظم چيو ته فاٽا جو فيصلو گڏيل صلاح مشوري سان ٿيڻ گهرجي فاٽا جو ڪم به مسلم ليگ (ن) ڪيو هڪ ڏينهن جو فيصلو ناهي هتي غلط برابر چوڻ روز جو معمول آهي مشرف ۽ پيپلز پارٽي جي دور ۾ ڇو ڪم نه ٿيا، اسان فاٽا تي ڪميٽي جوڙي انشاءَ الله هي ڪم به ٿي ويندو خواهش آهي ته فاٽا جو معاملو گڏيل اتفاق راءِ سان حل ٿئي، فرق جو سبب نه بڻجي. هڪ سوال تي هن چيو ته ماڊل  ٽائون سانحي تي اهوئي جواب ڏيندا جيڪي هن فورم تي گڏ ٿيا. هن چيو ته مسلم ليگ (ن) ۾ ڪو به ڌڙو ناهي هڪ ئي ڌڙو آهي جيڪو ن ليگ جو آهي. هڪ سوال تي هن چيو ته حڪومت هميشه پنهنجي شهيدن کي ياد ڪندي آهي ۽ ڪندي رهندي. حڪومت شهيدن جي وارثن جو به خيال رکي ٿي، حڪومت شهيدن جي وارثن لاءِ جيڪو ڪري ٿي اهو ان تي لازم آهي ضرب عضب سان اڄ تائين ڪيترائي آپريشن ٿيا ان جا فائدا سڀني جي آڏو آهن هن چيو ته چونڊيل وزيراعظم کي ڪٽهڙي ۾ بيهاريو ويو جنهن جو ڪو به قانوني مثال ناهي. اسحاق ڊار چار سال محنت ڪئي کيس ڪٽهڙي ۾ بيهاريو ويو آخر هنن سڀني شين جا اثر ته پوندا جيڪڏهن 28 جولاءِ وارو فيصلو نه ٿئي ها ته اسان گهڻو اڳتي هجون ها. سي پيڪ جي حوالي سان وزيراعظم چيو ته سي پيڪ مسلم ليگ (ن) شروع ڪيو سي پيڪ ۾ پاڪستان جي تاريخ جي سڀ کان وڏي سيڙپ ٿي آهي سي پيڪ روڊ جو نالو ناهي 200 ملڪن جي وچ ۾ معاهدو آهي اقتصادي راهداري رٿا جا خاص نتيجا آهن سي پيڪ جا اثر پاڪستان پهچي رهيا آهن سي پيڪ مان اهي ملڪ خوش ناهن جيڪي پاڪستان جي ڀلائي نه ٿا چاهين.

 

حڪومت جو ٻاهران شيون گهرائڻ تي ريگيوليٽري ڊيوٽي وڌائڻ جو اعلان

ڪراچي (اين اين آءِ) واپار جي وفاقي سيڪريٽري يونس ڍاڳا واضح ڪيو آهي ته عام واهپي جي شين جي ٻاهران گهرائڻ تي ريگيولرٽي ڊيوٽي ختم نه ڪئي ويندي پر وڌيڪ غير ضروري شيون گهرائڻ تي ريگيولرٽي ڊيوٽي لاڳو ڪئي ويندي ڪراچي چيمبر آف ڪامرس ۾ واپارين ۽ صنعتڪارن کي خطاب ڪندي يونس ڍاڳا چيو ته ٽن سالن کان ڪرندڙ برآمدات جي ڀيٽ ۾ گذريل سال ايڪسپورٽ ۾ 10 کان 15 سيڪڙو واڌ ٿي آهي جنهن ۾ چانور ۽ ٽيڪسٽائل شين جي برآمد ۾ سڀ کان وڌيڪ اضافو ٿيو آهي جيڪي شيون ملڪ ۾ تيار ٿين ٿيون انهن جي درآمدات قومي مفاد ۾ ناهي. يونس ڍاڳا چيو ته عالمي مارڪيٽ ۾ ڪچي تيل جي قيمت ۾ واڌ جو بار عوام کي برداشت ڪرڻو پوندو اها مجبوري آهي ڪراچي ايڪسپو سينٽر سان گڏ آءِ ٽي پارڪ قائم ٿيڻ سان روزگار جا نوان موقعا پيدا ٿيندا. هن چيو ته هو ڪراچي چيمبر ۾ واپارين سان واپاري سياست نه پر واپار بابت تجويزون ٻڌڻ آيو آهي. اسان لاءِ سمورا واپاري احترام جوڳا آهن پوءِ ڇو نه اهي ڪنهن به چيمبر ۽ ايسوسيئيشن جي اپوزيشن ئي ڇو نه هجن تنهن ڪري تاجر نمائندا صرف بزنس جي حوالي سان ڳالهائين سياست جي حوالي سان ڪنهن ٻئي فورم تي ڳالهه ٻولهه ڪئي ويندي. اسٽيٽ بئنڪ کي 25 ارب رپين جي جاري ڪيل فنڊن کانپوءِ ٻاهر موڪليندڙ شين کي ري فنڊز جي مد ۾ ادائگيون شروع ٿي وينديون ڪراچي ۾ سمنڊ کي گدلاڻ کان محفوظ ڪرڻ لاءِ پنج ايفولينٽ ٽريٽمينٽ پلانٽ لڳايا پيا وڃن.

 

سنڌ سرڪار پاران سرڪاري ڊاڪٽرن جون ڪلينڪون بند، جعلي ڊاڪٽرن خلاف ڪارروائي جو فيصلو

ڪراچي( ويب ڊيسڪ ) سنڌ سرڪار سرڪاري ڊاڪٽرن جون خانگي ڪلينڪون بند ۽ جعلي ڊاڪٽرن خلاف ڪارروائي جو فيصلو ڪيو آهي. صحت واري صوبائي وزير ڊاڪٽر سڪندر مينڌري طرفان جاري ڪيل بيان ۾ چيو ويو آهي ته سرڪاري ڊاڪٽرن خانگي اسپتالون بند نه ڪيون ته ڪارروائي ڪئي ويندي. هن چيو ته ڊاڪٽر سرڪاري اسپتالن ۾ گهٽ ۽ خانگي اسپتالن تي وڌيڪ ڏئي رهيا آهن. سندس چوڻ هو ته سنڌ ۾ ڪيترن ئي جعلي ڊاڪٽرن پنهنجا سينٽر ۽ ڪلينڪس کوليون آهن. ڊاڪٽر سڪندر مينڌري چيو ته جعلي ڊاڪٽرن خلاف سخت ڪارروائي سخت ڪرڻ جو فيصلو ڪيو ويو آهي. هن چيو ته سرڪاري اسپتالن ۾ مريضن جو علاج بهتر نموني ٿي رهيو آهي. سندس چوڻ هو ته سرڪاري ڊاڪٽرن خانگي اسپتالون بند نه ڪيون ته سخت ڪارروائي ڪئي ويندي.

 

ٽرمپ لاءِ پاڪستان سان لاڳاپا ختم ڪرڻ مهانگو ثابت ٿي سگهي ٿو: آمريڪي اخبار

نيويارڪ (اين اين آءِ) آمريڪا اخبار نيويارڪ ٽائمز صدر ڊونلڊ ٽرمپ کي باخبر ڪيو آهي ته واشنگٽن کي ڏنل پهچ پاڪستان ڪنهن به وقت بند ڪري سگهي ٿو نيو يارڪ ٽائمز پنهنجي ايڊيٽوريل ۾ خبردار ڪيو ته صدر ٽرمپ ان ڳالهه جو متهمل نه ٿو ٿي سگهي ته پاڪستان کي ڇڏي ڏئي، جڏهن ته ٽرمپ جي پاڪستان خلاف فيصلي مان نه ٿو لڳي ته ان وٽ اثرن کي منهن ڏيڻ جي پاليسي موجود آهي. ٽرمپ جو پراڻن پارٽنرز کي آمريڪا کان پري ڪرڻ جو فيصلو چين لاءِ فائديمند ثابت ٿيندو جڏهن ته ٽرمپ انتظاميه کي ٻيا سفارتي طريقا استعمال ڪرڻ گهرجن. آمريڪي اخبار ٽرمپ کي خبردار ڪيو ته سعودي عرب ۽ امارات سان لاڳاپا استعمال ۾ آڻڻ گهرجن ۽ آمريڪا کي پاڪستان سان تعاون لاءِ گوڙ ڪرڻ بدران خاموش ڳالهه ٻولهه ڪرڻ جي ضرورت آهي. اخبار آمريڪي صدر کي مشورو ڏنو آهي ته سعودي عرب ۽ گڏيل عرب امارات ذريعي طالبان جي خليج فارس ۾ فنڊ گڏ ڪرڻ جي ڪوشش ناڪام ڪرڻ گهرجي.

 

 وفاقي حڪومت وقت تي کنڊ ايڪسپورٽ نه ڪري بحران پيدا ڪيو: مراد علي شاهه

گهوٽڪي (ويب ڊيسڪ) وڏي وزير مراد علي شاهه چيو آهي ته آءِ جي سنڌ کي هٽائڻ جو معاملو انتظامي آهي، ن ليگ ۽ پي ٽي آءِ وچ ۾ تڪرار سان اسان جو ڪو واسطو ناهي. گهوٽڪي ۾ صحافين سان ڳالهائيندي وڏي وزير چيو ته وفاقي حڪومت وقت تي کنڊ جي ايڪسپورٽ نه ڪري بحران پيدا ڪيو، ڪيترائي ڀيرا وزيراعظم سان ڳالهه ٻولهه به ڪئي، سي سي آءِ ۾ به معاملو اٿاريو، ڪوشش آهي ته کنڊ جي ايڪسپورٽ تي سبسڊي ڏئي مسئلو حل ڪيو وڃي. هن چيو ته هي چونڊن جو سال آهي، تياريون ڪري رهيا آهيون.27

 

لڳي ٿو نواز شريف نٿو چاهي ته حڪومت پنهنجو مدو پورو ڪري: بلاول ڀٽو زرداري

اسلام آباد (اين اين آءِ) پ پ جي چيئرمين بلاول ڀٽو زرداري چيو آهي ته لڳي ٿو ته نواز شريف نه ٿو چاهي ته حڪومت پنهنجو مدو پورو ڪري سماجي رابطي واري سائيٽ ٽوئيٽر تي پنهنجي پيغام ۾ بلاول ڀٽو زرداري بلوچستان جي سياسي بحران تي ڳالهائيندي چيو ته ڇا وفاقي حڪومت کي فقر به آهي ته بلوچستان ۾ ڇا ٿي رهيو آهي. بلاول ڀٽو زرداري سوال ڪيو ته موجوده صورتحال ۾ ڇا هڪ به وفاقي وزير بلوچستان ويو آهي، لڳي ٿو ته نواز شريف نه ٿو چاهي ته حڪومت پنهنجو مدو پورو ڪري خيال رهي ته بلوچستان ۾ وڏي وزير نواب ثناءُ الله زهري خلاف 14 ميمبرن بي اعتمادي واري رٿ جمع ڪرائي ڇڏي آهي جنهن تي ووٽ 9 جنوري تي وڌا ويندا.

 

بي اعتمادي رٿ: ثناءَ الله زهري اڳوڻي وزير اعظم کان مدد گهري ورتي، بي اعتمادي رٿ سازش آهي: نواز شريف

لاهور( ويب ڊيسڪ ) بلوچستان جي وڏي وزير ثناءَ الله زهري بي اعتمادي رٿ ناڪام بڻائڻ لاءِ اڳوڻي وزيراعظم نواز شريف کان مدد طلب ڪئي آهي. ذريعن موجب بلوچستان جي وڏي وزير ثناءَ الله زهري اڳوڻي وزيراعظم نواز شريف سان فون تي رابطو ڪيو آهي. فون تي رابطي دوران ثناءَ الله زهري سياسي صورتحال بابت آگاهه ڪيو ۽ بي اعتمادي رٿ ناڪام بڻائڻ لاءِ مدد طلب ڪئي آهي. نواز شريف چيو ته بلوچستان جي وڏي وزير خلاف بي اعتمادي جي رٿ سازش آهي، سينيٽ جي چونڊ روڪرائڻ لاءِ اهو سڀ ڪجهه ٿي رهيو آهي. هن چيو ته ڪنهن به غير جمهوري رويي کي قبول نه ڪيو ويندو، عوامي مئنڊيٽ سندن پهرين ترجيح آهي. ثناءَ الله زهري چيو ته  بي اعتمادي جي رٿ سان ايندڙ چونڊن ۾ نقصان ٿي سگهي ٿو. هن چيو ته بي اعتمادي رٿ جو معاملو حل ٿيڻ گهرجي.

 

ذاتي مفادن جي شيطاني چڪر ۾ ڦاٿل جمهوريت کي آزاد ڪرائڻ وڏو چئلينج آهي: سراج الحق

لاهور (اين اين آءِ) امير جماعت اسلامي پاڪستان سينيٽر سراج الحق چيو آهي ته ذاتي مفادن جي شيطاني چڪر ۾ ڦاٿل جمهوريت کي آزاد ڪرائڻ وڏو چئلينج آهي جيستائين جمهوريت ماڻهن ۽ خاندانن جي چوڌاري ڦرندي رهندي عوام جي حڪمراني جو خواب ساڀيان نه ٿي سگهندو. عوام جي ڪنڌن تي سوار ايليٽ ڪلاس جمهوريت ۽ سياست کي پنهنجي گهر جي نوڪرياڻي سمجهي ٿي، جماعت اسلاميم لڪ ۾ حقيقي جمهوريت جي بحالي جي جدوجهد ڪريرهي آهي اسان جمهوريت جي نالي تي آمريت کي مڙهڻ واري ڪا به سازش ڪامياب ٿيڻ نه ڏينداسين چونڊون طئه ٿيل ٽائيم موجب نه ٿيون ته ملڪ سياسي بحران جي ور چڙهي ويندو ملڪ کي سياسي عدم استحڪام کان بچائڻ لاءِ وقت تي چونڊون ڪرايون وڃن پر چونڊن تي ڪارا ڪڪر ڇانيل آهن. اڳوڻي وزيراعظم جو ادارن سان وڙهڻ جو اعلان جمهوريت لاءِ به نقصان وارو آهي. آمريڪا لاءِ پنهنجي افغان ڀائرن کي دشمن نه بڻائينداسين امداد لاءِ پنهنجي عزت ۽ غيرت جو سودو نه ٿا ڪري سگهون آبادگارن کي ڪمند جو اگهه نه پيو ملي ۽ نه ئي وري انهن جي مطالبن جي ڌيان ڏنو پيو وڃي ته پوءِ زراعت ڪيئن ترقي ڪندي اهڙن خيالن جو اظهار هن لنڊن جو دورو مڪمل ڪرڻ کانپوءِ لاهور پهچي منصوره ۾ جماعت اسلامي يوٿ جي سپريم ڪائونسل جي اجلاس کي خطاب ۽ جڙان والا ۾ صحافين سان ڳالهائيندي ڪيو . ان موقعي تي صدر جي يو آءِ يوٿ زبير احمد گوندل ۽ سيڪريٽري ميان عثمان جاويد به موجود هئا. سينيٽر سراج الحق چيو ته ملڪ ۾ جماعت اسلامي اڪيلي حقيقي جمهوري ۽ پروگريسو جماعت آهي جنهن جي هر سطح جي باقاعده ۽ تسلسل سان چونڊون ٿينديون آهن جنهن ۾ امير غريب جي فرق بنا جمهوري عمل ذريعي ذميوارن جي چونڊ ڪئي ويندي آهي.

 

هندستان پاڪستان خلاف سازشون ڪري رهيو آهي پر هو سمجهي ڇڏي ته اسان جي فوج ۽ دفاع ڪافي مضبوط آهي: پرويز مشرف

ڪراچي (اين اين آءِ) آل پاڪستان مسلم ليگ جي سربراهه جنرل ريٽائرڊ پرويز مشرف چيو آهي ته هندستان پاڪستان جي خلاف سازشون ڪري رهيو آهي پر هو ڄاڻ وٺي ته اسان جي فوج ۽ دفاع ڪافي مضبوط آهي پاڪستان پنهنجو دفاع ڪرڻ ڄاڻي ٿو ملڪ جي سياست ۾ تبديلي جي ضرورت آهي. اي پي ايم ايل هم خيال ماڻهن سان گڏجي نئون اتحاد ٺاهي رهي آهي عوام اسان جو ساٿ ڏئي اسان حڪومت ۾ اچي سندن مسئلا حل ڪنداسين ايم ڪيو ايم جو نالو هڪ چٽو آهي پيپلز پارٽي ايم ڪيو ايم ۽ اي اين پي هٿيار ڏئي ڪراچي جي ماڻهن کي ويڙهايو. اسان کي انهن کان نجات حاصل ڪرڻي پوندي. عوام کي چوان ٿو ته قوميتن واري سياست ڇڏي پاڪستانيت جي سياست ڪريو اسان ايندڙ چونڊن ۾ ڀرپور ڪاميابي حاصل ڪرڻ جي ڪوشش ڪنداسين. اهڙن خيالن جو اظهار هن گذريل رات اي پي ايل ايل سنڌ سائوٿ ريجن ڪراچي جي تحت لياقت آباد فلاءِ اوور تي عام جلسي کي خطاب دوران ڪيو. جلسي کي اي پي ايم ايل جي صدر ڊاڪٽر محمد امجد، اي پي ايل ايل سائوٿ ريجن جي صدر احمد حسين، جنرل سيڪريٽري اسلم مينائي، محمد علي شيرواني ۽ ٻين اڳواڻن به خطاب ڪيو. جلسي ۾ عوام کي پرويز مشرف جون تصويرون، پاڪستان ۽ اي پي ايم ايل جا جهنڊا هئا جلسي ۾ جيئي پاڪستان ۽ جيئي پرويز مشرف جا نعرا پڻ لڳايا ويا. جلسي ۾ ميوزيڪل پروگرام ۽ آتشبازي جو پڻ مظاهرو ڪيو جلسي کي خطاب ڪندي پرويز مشرف چيو ته ڪراچي جي عوام کي ڀليڪار چوان ٿو لياقت آباد ايم ڪيو ايم جو قلعو هوندو هو اڄ اسان لياقت آباد ۾ جلسو ڪيو آهي ڪراچي پاڪستان آهي هن شهر ۾ سنڌي، مهاجر، پٺاڻ، بنگالي، برمي، سرائيڪي، پنجابي، بلوچي سميت سموريون قومون رهن ٿيون هتي سڀ ماڻهو آباد آهن ڪراچي جي ماڻهن کي استعمال ڪيو هتي لاش ملندا هئا ڪجهه سياسي طاقتون عوام کي ويڙهائينديون رهيون اسان کي انهن کان ڇوٽڪارو حاصل ڪرڻو پوندو هن چيو ته مون کي ڪجهه به نه گهرجي مان صدر، آرمي چيف رهي چڪو آهيان مان مڊل ڪلاس طبقي سان تعلق رکان ٿو مان پاڪستان جي ترقي جو سوچان ٿو ڪراچي ۾ لاشن تي سياست ٿيندي هئي ڪراچي ۾ ڪيترائي خاندان تباهه ٿي ويا، مان به مهاجر آهيان پر مان پنهنجو پاڻ کي مهاجر نه ٿو سمجهان مان سڀ کان پهريان پاڪستاني آهيان.