تازيون خبرون

Daily Archives: January 1, 2018

مراد علي شاهه سنڌ ۾ ڪمند جي بحران جو ذميوار وفاقي ۽ پنجاب حڪومت کي قرار ڏئي ڇڏيو

ڪراچي (اين اين آءِ) سنڌ جي وڏي وزير سيد مراد علي شاهه چيو آهي ته مون هدايت ڪري ڇڏي آهي ته سمنڊ ڪناري تي رڪاوٽون نه هئڻ گهرجن. شهري نئين سال جي خوشي ضرور ملهائن پر ٻين جي خوشيءَ جو به خيال ضرور رکيو وڃي. هن چيو ته شهري اڄ رات ٻاهر نڪري انجواءِ ڪن پر ڪنهن کي تڪليف نه پهچائي وڃي. سيد مراد علي شاهه چيو ته هوائي فائرنگ جي ڪنهن کي به هرگز اجازت نه هوندي. هن هدايت ڏيندي چيو ته ڪوبه حادثو نه ٿئي، ڪنهن کي ڪابه تڪليف به پچهي ۽ افراتفري نه ٿيڻ گهرجي. هن چيو ته نوجوان سمنڊ ڪناري ۽ روڊ تي ويهندا ته ڇا ٿيندو، روڊ تي زندگي اسان به گذاري آهي. هن چيو ته مان اهڙي مثال بڻائنديس جيڪو ايندڙ ڪم نه ڪندو ته مشڪل ۾ پئجي ويندو. سيد مراد علي شاهه چيو ته احتجاج جو شوق سڀني کي حاصل آهي پر احتجاج جائز مطالبي تي ڪيو وڃي. هن چيو ته پنجاب ڳالهيون وڏيون ڪندو آهي پر ڪمند جا اگهه ٺيڪ نه آهن. سيد مراد علي شاهه چيو ته آبادگارن جي فائدي لاءِ وفاق کان کنڊ تي 20 رپيا سبسڊي گهري هئي. هن چيو ته اسان کنڊ تي 9 رپيا 30 پئسا سبسڊي ڏيڻ جي منظوري ڏئي چڪا آهيون. اي سي سيءَ اسانکي کنڊ برآمد ڪرڻ جي اجازت نه ڏني آهي. سيد مراد علي شاهه چيو ته ڪراچي جي مختلف علائقن ۾ روڊ، انڊرپاسز سميت ترقياتي ڪم هلندڙ آهن جنهن ڪري 4 کان 8 مهينا شهرين کي تڪليف ٿيندي پر ايندڙ 8 کان 10 سال جو رليف ملندو. هن چيو ته سڄي شهر کي ٺيڪ ڪرڻ جو پلان آهي پر هڪ ڏينهن ۾ سڀ ڪجهه ممڪن نه آهي. هن چيو ته سنڌ ۾ ڪمند جي بحران جو ذميوار وفاقي ۽ پنجاب حڪومت آهي. پنجاب کان سئو رپيا في مڻ ڪمند سنڌ جي شگر ملن کي فراهم ڪيو پيو وڃي. سيد مراد علي شاهه چيو ته پنجاب کان گهٽ اگهه تي ڪمند ملندو ته سنڌ جي آبادگارن جو مهانگو ڪمند ڪير خريد ڪندو؟. هن چيو ته اسان پنجاب کان ڪمند جو اگهه ٻه رپيا وڌيڪ مقرر ڪيو ته جيئن آبادگارن کي فائدو پهچي. پنجاب هڪ سئو اسي ۽ اسان هڪ سئو ٻياسي رپيا اگهه مقرر ڪيو. وفاقي حڪومت طئي ڪرڻ باوجود شگرملن کي اڃا تائين سبسڊي ڏيڻ جو اعلان ناهي ڪيو. هن چيو ته سنڌ حڪومت شوگرملن کي پنهنجي حصي جي 9 رپيا 30 پيسا سبسڊي ڏئي رهي آهي. سي سي آءِ جلاس ۾ وفاقي حڪومت طئي ڪرڻ باوجود شگرملز کي 10 رپيا 70 پيسا سبسڊي ڏيڻ جو طئي ڪيو هو پر وفاقي حڪومت پنهنجي وعدي تي عمل نه پئي ڪري، جنهن سان سنڌ ۾ آبادگارن لاءِ مسئلا پيدا ٿي رهيا آهن. وڏي وزير چيو ته زراعت واري وزارت شوگرمل مالڪن ۽ آبادگارن جي نمائندن سان ڳالهائي معاملي جو پائيدار حل ڪڍي رهي آهي. سيد مراد علي شاهه چيو ته اسان جي ڪوشش آهي ته ڪمند جي اگهن جو ٻيهر جائزو ورتو وڃي، ڪمند جو اگهه اهڙو هئڻ گهرجي جيڪو سڀني فريقين لاءِ قبول جوڳو هجي ڇاڪاڻ ته پنجاب کان سنڌ جي شگرملن کي گهٽ اگھ ڪمند موڪليو پيو وڃي. هن چيو ته آبادگارن کي احتجاج جو حق آهي پر اهي اهو ضرور ڏسن تي قصور ڪنهن جو آهي. سيد مراد علي شاهه چيو ته پاڪستان پيپلز پارٽي هارين سان گڏ آهي سندن ڪنهن به قسم جي زيادتي ٿيڻ نه ڏينداسين. وڏي وزير سيد مراد علي شاهه ايم ڊي واٽر بورڊ کي فوري طور تي نارٿ ايسٽ ڪراچي فلٽر پلانٽ پهچڻ جو حڪم ڏنو. وڏي وزير سيد مراد علي شاهه ايم ڊي (ڪي اي ڊبليو ايس بي) کي حڪم ڏيندي چيو ته اوهان ٽن شفٽن ۾ پنج پنج ماڻهو مقرر ڪيوباقي جيڪي پلانٽ تي غيرحاضر عملو آهي تنهن کي فارغ ڪيو وڃي. وڏي وزير ڊپٽي ڪمشنر اوڀر ڪراچي کي فوري طور تي ٽي پوليس گارڊ نارٿ ايسٽ ڪراچي فلٽر پلانٽ تي مقرر ڪرڻ جو حڪم ڪيو. ان موقعي تي ميڊيا سان ڳالهائيندي وڏي وزير سيد مراد علي شاهه چيو ته ڪراچي جي هڪ حصي کي بغير فلٽر جي پاڻي فراهم ٿي رهيو آهي جيڪو شهرين سان وڏو ظلم آهي، جيڪي ماڻهو ڪراچيءَ کي پنهنجو چوندا هئا سندن ئي اهڙو حال ڪيو آهي. انهيءَ بعد وڏو وزير سيد مراد علي شاهه سن سيٽ انٽرسيڪشن پل تي هلندڙ ترقياتي ڪم جو جائزو ورتو. هي پل 470 ملين رپين جي لاڳت سان تعمير ٿي رهي رهيو آهي. وڏي وزير سب ميرين انڊر پاس جو پڻ دورو ڪيو، جتي هلندڙ ڪم جي رفتار سست هئڻ تي پنهنجي ناراضگيءَ جو اظهار ڪندي سيد مراد علي شاهه مڪاني ادارن واري وزير ڄام خان شوري کي چيو ته مون کي سڀاڻي تائين ڊيٽ لائن ڏني وڃي ته ڪهڙي ڏينهن ان جي هڪ حصي جو افتتاح ڪريان. هن چيو ته مان سمجهان پيو ته ڪم جو معيار سٺو آهي پر دير ڇو ٿي رهي آهي. ان بعد سيد مراد علي شاهه سمنڊ ڪناري (سي ويو) پهتو جتي موجود ڪنٽينر هٽائڻ واري ڪم جو جائزو ورتو. ان دوران ميڊيا سان ڳالهائيندي وڏي وزير چيو ته نيو ايئر نائٽ لاءِ رڪاوٽون برادشت نه ڪيون وينديون. سيد مراد علي شاهه چيو ته مون جهڙا ماڻهو ته رات جو نڪرندا ئي نه آهي پر جيڪي ماڻهو ٻاهر نڪرندا آهن انهن جو خيال رکيو وڃي. سيد مراد علي شاهه چيو ته نوجوان سمنڊ ڪناري ۽ روڊن تي ويهندا ته ڇا ٿيندو، روڊ تي زندگي اسان به گذاري آهي. وڏي وزير ڊي آءِ جي سائوٿ کي هدايت ڪئي ته ڪنهن به قسم جو ڪو حادثو نه ٿئي، ڪابه ڪنهن کي تڪليف نه پهچي ۽ نه ئي افراتفري پيدا ٿئي. آخر ۾ وڏي وزير سيد مراد علي شاهه بوٽ بيسن وٽ صحافين ۽ سندس گڏ موجود آفيسرن سان ناشتو ڪيو.

 

2018 جو استقبال، حڪومت عوام تي بم ڪيرائي ڇڏيو، تيل اگهن ۾ اضافي جو اعلان

اسلام آباد (اين اين آءِ) حڪومت پيٽرول 4 رپيا 6 پيسا ۽ ڊيزل 3 رپيا 96 پيسا في ليٽر مهانگو ڪرڻ جو اعلان ڪندي چيو آهي ته عالمي مارڪيٽ ۾ قيمتون وڌڻ تي پاڪستان ۾ تيل جون قيمتون وڌايون ويون آهن، آچر تي وزيراعظم جي ناڻي بابت صلاحڪار مفتاح اسماعيل صحافين سان ڳالهائيندي چيو ته پيٽرول جي قيمت ۾ 4 رپيا 6 پيسا في ليٽر واڌ ڪئي وئي آهي جنهن سان پيٽرول جي نئين قيمت 81 رپيا 53 پيسا ٿي وئي آهي، هن چيو ته ڪيروسين جي قيمت ۾ 13 ڏهائي 58 رپيا في ليٽر وڌائڻ جي تجويز ڏني وئي هئي، جڏهن ته وزيراعظم چيو ته ايتري قيمت وڌائڻ مناسب نه آهي تنهنڪري ڪيروسين ۾ 6 رپيا 74 پيسا في ليٽر واڌ ڪئي وئي جنهن سان ڪيرسين جي نئين قيمت 64 رپيا 32 ٿي وئي آهي،. هن ٻڌايو ته اوگرا پاران لائيٽ ڊيزل جي قيمت 12 رپيا 49 پيسا في ليٽر وڌائڻ جي تجويز ڏني وئي هئي جيڪا وزيراعظم رد ڪندي 6 رپيا 25 پيسا وڌائڻ جي منظوري ڏني، هاڻ لائيٽ ڊيزل 58 رپيا 56 پيسا في ليٽر وڪرو ٿيندو، وزيراعظم جي ناڻي بابت صلاحڪار چيو ته هاءِ ڊيزل جي قيمت ۾ 7 رپيا 51 پيسا في ليٽر وڌائڻ جي تجويز ڏني وئي جڏهن ته وزيراعظم 3 رپيا 96 پيسا في ليٽر وڌائڻ جي منظوري ڏني جنهن کانپوءِ هاءِ اسپيڊ 89 رپيا 91 پيسا في ليٽر ٿي ويو آهي، هن چيو ته عالمي مارڪيٽ ۾ تيل جون قيمتون وڌي ويون آهن ان جي باوجود پاڪستان ۾ ڀارت، ترڪي ۽ بنگلاديش جي ڀيٽ ۾ پيٽرول جي قيمت گهٽ آهي، هن چيو ته وزيراعظم اوگرا جي سفارش تي تيل جي قيمت وڌائڻ جي منظوري ڏني آهي.

 

2017 جي پڄاڻي، 2018 جي شاندار آجيان، آتشبازي جو مظاهرو

ڪراچي (ويب ڊيسڪ) پاڪستان ۾ 2017ع جو آخري سِج لهي ويو آهي، جڏهن ته اڄ نئين سال جو سِج نين اميدن سان اڀرندو، سڄي ملڪ ۾ نئين سال جي آجيان شاندار آتشبازي سان ڪئي وئي،  2017ع پاڪستان کي ڇا ڏنو ۽ ڇا ورتو؟ ان تي هڪ نظر وجهون ٿا. هلندڙ سال پاڪستان جي سپريم ڪورٽ ۾ وڏا وڏا ڪيس آيا. نواز شريف ۽ جهانگير ترين کي نااهل قرار ڏنو ويو، اسحاق ڊار جو گهيرو به تنگ رهيو. پاڪستان پيپلز پارٽي جي گولڊن جوبلي ٿي، قانون واري وفاقي وزير زاحد حامد کي استعيفيٰ ڏيڻي پئي. پاڪ فوج پنهنجي ڪاميابين جو سلسلو جاري رکيو، آپريشن ردالفساد تحت ملڪي سرزمين تي ڏڦيڙ پيدا ڪندڙ عنصرن کي ٺڪاڻي لڳايو ويو، جڏهن ته ڪيترائي جوان شهيد ٿيا. ڪرڪيٽ جي ميدانن ۾ به پاڪستان لاءِ سٺيون خبرون آيون. پي ايس ايل جو فائنل لاهور ۾ ٿيو، جڏهن ته قومي ٽيم آءِ سي سي چيمپيئنز ٽرافي جي فائنل ۾ روايتي مخالف ڀارت کي عبرتناڪ شڪست ڏئي ٽائيٽل پنهنجي نالي ڪيو، ان سان گڏوگڏ دنيا جي مشهور رانديگرن جي ٻڌل ورلڊ اليون پاڪستان آئي، جنهن کانپوءِ سريلنڪن ٽيم پڻ پاڪستان جو رُخ ڪيو. پاڪستاني ڪرڪيٽ ٽيم ٽي ٽوئنٽي فارميٽ ۾ پهريون نمبر ماڻيو، جڏهن ته 2017ع شوبز جي ستارن لاءِ پڻ سٺو رهيو. لالي ووڊ فلمن باڪس آفيس تي سٺو بزنس ڪيو، جن ۾ ”پنجاب نهين جائونگي، نا معلوم افراد ٽو، يلغار“ ۽ ٻيون فلمون اڳڀريون رهيون.27

 

سرگوڌا: مسافر بس ۽ ڪار ۾ خوفناڪ ٽڪر، 2 عورتن سميت 4 ڄڻا فوت

سرگوڌا (اين اين آءِ) سرگوڌا ميان والي روڊ جوهر آباد ڦاٽڪ ويجهو سيالڪوٽ کان ايندڙ مسافر بس ۽ ڪار وچ ۾ ٽڪر جي نتيجي ۾ 2 عورتن سميت 4 ڄڻا فوت، 12 زخمي ٿي پيا، فوتي ڪار ۾ سوار 2 عورتون ۽ 2 مرد شامل آهن جن ۾ ماءُ ۽ ان جو پٽ به آهي، لاش پوسٽ مارٽم کانپوءِ گهر پهتا ته علائقي ۾ روڄ راڙو ٿي ويو. حادثو بس ڊرائيور جي لاپرواهي سبب پيش آيو، حادثو ايتري قدر شديد هو جو ٻئي گاڏيون تباهه ٿي ويون ۽ ڪار کي ڪٽي فوتين جا لاش ڪڍيا ويا. پوليس جاچ شروع ڪري ڇڏي آهي.

 

آصف علي زرداري اي پي سي جي فيصلن جي منظوري ڏئي ڇڏي

لاهور (اين اين آءِ) پ پ چيئرمين بلاول ڀٽو زرداري ۽ اڳوڻي صدر آصف علي زرداري اليڪشن محاذ ۾ تيزي آڻڻ جو فيصلو ڪري ورتو، طاهر قادري جي اي پي سي ۾ ٿيل فيصلن جي مڪمل تائيد ڪري ڇڏي، آصف زرداري لاهور ۾ حضرت داتا گنج بخش ۽ بي بي پاڪ دامن جي مزار تي حاضري ڀري گلن جي چادر چاڙهي ملڪ جي سلامتي ۽ خوشحالي لاءِ دعا گهري. بلاول ڀٽو ۽ آصف زرداري چونڊن واري مهم کي تيز ڪرڻ جي هدايت ڪندي چئني صوبن ۾ چونڊن ۾ اميدوار بيهارڻ جو جائزو وٺڻ جو فيصلو ڪيو آهي، آصف زرداري ماڊل ٽائون سانحي لاءِ انصاف جو آواز ڀرپور نموني اٿارڻ جي هدايت ڪندي چيو ته اي پي سي جي اسٽيرنگ ڪميٽي ۾ پ پ پنهنجو ڀرپور سياسي ڪردار ادا ڪندي. ان موقعي تي عزيز رحمان چن ۽ اشرف ڀٽي سميت ٻيا به ساڻس گڏ هئا، بي بي پاڪ دامن جي مزار تي حاضري کانپوءِ هو سخت سيڪيورٽي ۾ واپس بلاول هائوس روانو ٿي ويو.

 

پاڪ-ڀارت جي قومي سلامتي صلاحڪارن جي بئنڪاڪ ۾ ڳجهي ملاقات، ايل او سي ۽ ڪشمير مسئلي تي ڳالهيون

نئين دهلي (اين اين آءِ) بينڪاڪ ۾ پاڪستان ۽ ڀارت جي قومي سلامتي جي صلاحڪارن جي ڳجهي ملاقات ٿي جنهن ۾ لائين آف ڪنٽرول ۽ ڪشمير جي مسئلي تي ڳالهيون ٿيون، ڀارتي ميڊيا رپورٽ موجب 25 ڊسمبر تي ڪل ڀوشن سان سندس گهرڀاتين جي ملاقات جي هڪ ڏينهن کانپوءِ 26 ڊسمبر تي پاڪستان ۽ ڀارت جي قومي سلامتي صلاحڪارن جي ٿائيلينڊ جي گادي شهر بينڪاڪ ۾ ڳجهي ملاقات ٿي، جنرل رٽائرڊ ناصر خان جنجوعا ۽ ڀارتي هم منصب اجيت ڊول جي ملاقات 2 ڪلاڪ جاري رهي، اها ميٽنگ اڳواٽ طئه ٿيل هئي جنهن جو ڪل ڀوشن ۽ ان جي گهرڀاتين سان ملاقات جو ڪو به تعلق نه هو، ڀارتي ميڊيا ذريعن سان ٻڌايو ته ملاقات ۾ لائين آف ڪنٽرول ۽ ڪشمير معاملي تي ڳالهه ٻولهه ٿي، ناصر جنجوعا ڪشمير ۾ ڀارتي ظلم کي وائکو ڪندي چيو ته ايل او سي تي آزاد ڪشمير ۾ ڀارتي فائرنگ سان بي گناهه شهري شهيد ٿي رهيا آهن، ٻنهي ملڪن جي پرڏيهي وزيرن ۽ پاڪستان فوج کي به ان ملاقات کان باخبر ۽ تفصيل جو علم هو، جڏهن ته خاص طور تي ان ميٽنگ جو احتمام هڪ غير جانبدار هنڌ تي ڪيو ويو هو، ان کانپوءِ ناصر جنجوعا خميس تي جاتي امرا ۾ نواز شريف سان 5 ڪلاڪ ڊگهي ملاقات ڪئي جنهن ۾ قومي سلامتي جي معاملن تي ڳالهيون ڪيون ويون.

 

ٽرمپ انتظاميا پاران پاڪستان جي امداد ۾ 25 ڪروڙ 50 لک ڊالر امداد روڪڻ جو فيصلو

واشنگٽن (اين اين آءِ) ٽرمپ انتظاميا افغانستان ۾ دهشتگردي خلاف جنگ ۾ پاڪستان جي رويي سبب ڏني ويندڙ 25 ڪروڙ 50 لک ڊالر امداد روڪڻ تي ويچار ڪري رهي آهي، آمريڪي اخبار نيو يارڪ ٽائيمز جي رپورٽ ۾ دعويٰ ڪئي وئي آهي ته ٽرمپ انتظاميا کي لڳي ٿو ته گرفتار حقاني نيٽ ورڪ جي هڪ عسڪريت پسند تائين پهچ جي آمريڪي مطالبي تي مسلسل انڪار سان پاڪستان جي آمريڪا پاران رويي جو پاڇو نظر اچي ٿو، اخبار ۾ چيو ويو آهي ته آڪٽومبر ۾ پاڪستاني فورسز پاران آمريڪي ڪينڊين گهرڀاتين جي بازيابي لاءِ ڪيل آپريشن دوران حقاني نيٽ ورڪ سان تعلق رکندڙ هڪ عسڪريت پسند کي گرفتار ڪيو هو، خيال رهي ته گذريل سال آڪٽومبر ۾ پاڪستاني فورسز ڪينيڊين شهري جو شوابوئل ۽ ان جي آمريڪي زال ڪيٽلان ڪولمين کي سندس 3 ٻارڙن سميت بازياب ڪرايو هو، آمريڪي اخبار دعويٰ ڪئي ته آمريڪي عملدارن کي ان ڳالهه جي خبر آهي ته پاڪستان ان آپريشن دوران حقاني نيٽ ورڪ سان تعلق رکندڙ هڪ شخص کي گرفتار ڪيو هو ۽ ان جي گرفتاري کي پاڪستان جي عملدارن ڳجهو رکيو هو. تازوئي آمريڪي نائب صدر مائيڪ پينس پاران بيان اڳيان هو جنهن ۾ چيو ويو هو ته آمريڪي صدر ڊونلڊ ٽرمپ اسلام آباد کي نوٽيس تي رکي ڇڏيو آهي.

 

نواز شريف ٺاهه تحت جلاوطني اختيار ڪري سگهي ٿو: برطانوي اخبار

لنڊن( ويب ڊيسڪ ) برطانوي اخبار ٽائمز دعويٰ ڪئي آهي ته سعودي عرب جي ٽياڪڙي ۾ ٺاهه تحت اڳوڻو وزيراعظم نواز شريف جلاوطني اختيار ڪري سگهي ٿو. برطانوي اخبار ٽائيمز دعويٰ ڪئي ته اڳوڻو وزيراعظم نواز شريف سعودي عرب جي ٽياڪڙي ۾ ٺاهه تحت جلاوطن ٿي سگهي ٿو. اخبار موجب اڳوڻي وزيراعظم نواز شريف تي دٻاءُ وجهي شهباز شريف کي سياسي جانشين بڻائڻ جو اعلان ڪيو ويو جڏهن ته هو عملي سياست تان هٿ کڻڻ تي به راضي ٿي چڪو آهي. برطانوي اخبار لکيو آهي ته سعودي ڊيل تحت نواز شريف کي ٻاهر رهڻ جي اجازت ڏئي سگهجي ٿي، اهڙي نموني کيس ڪرپشن ڪيسن مان ڇوٽڪارو ملي ويندو. رپورٽ موجب نواز شريف کي ٻاهر وڃڻ لاءِ اجازت گهرجي جنهن لاءِ سعودي عرب ۾ معاملا طئي ٿي سگهن ٿا. ٻئي طرف مريم نواز برطانوي اخبار جي خبر تي رد عمل ڏيندي چيو ته جلاوطنيون هاڻي چونڊيل نمائندن جو مقدر نه ٿينديون، جلاوطنيون آمرن ۽ جمهوريت تي راتاهون هڻندڙن جون مقدر ٿينديون.

 

موجوده حالتن ۾ پاڪ فوج سٺو ڪردار، پهريون ڀيرو ڪنهن آرمي چيف جمهوريت جو ساٿ ڏيڻ جو چٽو موقف اختيار ڪيو: عمران خان

لاهور (اين اين آءِ) تحريڪ انصاف جي چيئرمين عمران خان چيو آهي ته موجوده حالتن ۾ پاڪ فوج بهتر ڪردار ادا ڪري رهي آهي، پهريون ڀيرو ڪنهن آرمي چيف جمهوريت جو ساٿ ڏيڻ جو چٽو موقف اختيار ڪيو آهي، پاڪستان نائين اليون ۾ ملوث نه هئو ان جي باوجود آمريڪا جي جنگ ۾ حصو ورتو، جڏهن ته پاڪستان ۾ القائده يا طالبان جو ڪو به وجود نه هو، پرڏيهي خابرو اداري کي انٽرويو ڏيندي عائشا گلالئي جي الزامن تي موبائيل فرانزڪ جي آڇ ڪندي چيو ته گل لئي جي الزامن تي پاڻ کي احتساب لاءِ پيش ڪيو، هوءَ 3 سال اڳ ڪيل منهنجو ميسيج ڏيکاري ۽ پنهنجو موبائيل فون کڻي اچي ته ٻنهي جي موبائيل جو فرانزڪ ٿي وڃي، هن چيو ته مخالفن مون مٿان فوج جي مدد جو الزام مڙهيو پر سوال اهو پيدا ٿئي ٿو ته جيڪڏهن فوج مون سان گڏ آهي ته مون کي ڪيئن فائدو پهچائي رهي آهي، ڇا جلسن ۾ ماڻهن کي فوج ئي موڪليندي آهي، عمران خان چيو ته فوج فيز آباد جو ڌرڻو ختم ڪرايو جنهن تي حڪمرانن ۽ سڄي قوم کي فوج جا ٿورا مڃڻ گهرجن، جيڪڏهن اهو معاملو حل ڪرڻ لاءِ فوج نه اچي ها ته پاڪستان جون حالتون خراب ٿي سگهن پيون.

 

ملڪ جون موجوده حالتون چونڊن لاءِ نامناسب قرار، شريف ڀائرن سان ڊيل نه ٿيڻ گرجي: پرويز مشرف

ڪراچي (اين اين آءِ) آل پاڪستان مسلم ليگ جي سربراهه ۽ اڳوڻي صدر پرويز مشرف چيو آهي ته ملڪ جون حالتون ڇڪتاڻ واريون آهن جيڪي چونڊن لاءِ مناسب نه آهن، هن سياسي وٺ پڪڙ ۽ ڄنڊا پٽ دوران اليڪشن ٿيندي نظر نه پئي اچي، نواز شريف ڪرپشن سبب نااهل ثابت ٿي چڪو آهي، تنهنڪري شريف ڀائرن سان ڪا به ڊيل نه ٿيڻ گهرجي، نواز شريف جو مقصد فوج تي دٻاءُ وجهڻ آهي جيڪا کيس پراڻي بيماري آهي، مون تي به دٻاءُ وجهڻ جي ڪوشش ڪندو رهيو آهي، هڪ انٽرويو ۾ اڳوڻي صدر نواز شريف جي سعودي عرب ۾ ڊيل بابت خبر نه آهي، پر ٿي سگهي ٿو ته سعودي عرب ٻنهي ڀائرن کي جاچ لاءِ گهرايو هجي ڇو ته اتي ڪرپشن جي خلاف مهم هلي رهي آهي ۽ نواز ۽ شهباز جا اتي به ڪاروباري معاملا هئا، هن چيو ته ملڪ ڏکئي دور مان گذري رهيو آهي، حڪومت منهنجو رستو روڪڻ لاءِ مختلف طريقڪا استعمال ڪري رهيا آهي، ويزا پاسپورٽ جي حوالي سان مون کي تنگ به ڪيو پيو وڃي پر ان جي باوجود مان مناسب وقت تي پاڪستان ضرور ويندس، پرويز مشرف چيو ته بلاول ڀٽو ٻارڙو آهي ان لاءِ پاڻ کان وڏي عمر جي ماڻهن لاءِ زبان ۽ بيان ۾ تهذيب جو دامن نه ڇڏڻ گهرجي، هن مون تي پنهنجي ماءُ جو قتل الزام لڳائي منهنجي خلاف نعريبازي ڪرائي جيتوڻڪ سڀ ڄاڻين ٿا ته بي بي جي شهادت کان سڀ کان وڌيڪ فائدو آصف زرداري کي ٿيو. اڳوڻي صدر چيو ته پاڪستان، آمريڪا سان لاڳاپن ۾ لاهاچاڙها ايندا رهندا آهن ۽ ان جو ذميوار صرف آمريڪا آهي، پاڪستان دهشتگردي خلاف جنگ ۾ وڏيون قربانيون ڏنيون آهن جنهن جو اعتراف ڪرڻ گهرجي، هن چيو ته ڀارتي جاسوس ۽ دهشتگرد ڪل ڀوشن سان سندس زال ۽ ماءُ جي ملاقات پاڪستان پاران سٺو قدم آهي جنهن مان پاڪستان جي انساني حقن ۽ روداري جي ڀرپور ڪردار جي خبر پوي ٿي جنهن لاءِ سڄي دنيا کي پاڪستان جي واکاڻ ڪرڻ گهرجي.